གསུང་མགུར་ལྷའི་རྔ་སྒྲ་རྒྱུ་འབྲས་དང་པོའི་རྣམ་པར་བཞག་པ་སྲིད་གསུམ་འགྲོ་བའི་མགོན་པོ།

གསུང་མགུར་ལྷའི་རྔ་སྒྲ་རྒྱུ་འབྲས་དང་པོའི་རྣམ་པར་བཞག་པ་སྲིད་གསུམ་འགྲོ་བའི་མགོན་པོ་ཞེས་བྱ་བ་བཞུགས་སོ། །

འགྲོ་མགོན་བདུད་འཇོམས་རྡོ་རྗེ་ལ་གསོལ་བ་འདེབས། ཞེས་གསོལ་བ་བཏབ་ནས་ཆེད་དུ་སྨོས་བྱ་ལ། ངས་ཉིན་གཅིག་སྲོག་གཅོད་ཀྱི་ཉེས་པ་མང་པོ་བཤད་ནས་སྲོག་གཅོད་ལ་མི་དགེ་བ་མང་པོ་ཚང་ཞེས་བྱས་པ་ན་གཞན་ཞིག་གི་མི་དགེ་བ་གཅིག་ལ་མང་པོ་ཡོད་ན་ཐན་ཡིན་ཟེར་བ་ན་ངས་དེ་ལོས་བདེན་བསམ་ནས་ཡོད་དུས། ང་ཉིན་གཅིག་དགོན་ནང་ལ་འགྲོ་བའི་ལམ་ཞིག་ན་ཁྱི་རྒན་རྒྱ་བོ་གཅིག་འདུག་པ་དེ་ལ་ངས་རྡོས་བརྒྱབ་ནས་སོ་ཕུད་བཏང་དུས། ཨ་ར་ར་ཟེར་དུས་ངས་ཐན་རེད་བསམ་ནས་བཟློག་པ་བརྒྱབ་དུས། ཁྱི་རྒན་ན་རེ། ཞེ་སྡང་ཅན་ཁྱོད་ཀྱི་ཞེ་སྡང་དེ་བཟློག །འདོད་ཆགས་ཅན་ཁྱོད་ཀྱི་འདོད་ཆགས་དེ་བཟློག །གཏི་མུག་ཅན་ཁྱོད་ཀྱི་གཏི་མུག་དེ་བཟློག །ཕྲག་དོག་ཅན་ཁྱོད་ཀྱི་ཕྲག་དོག་དེ་བཟློག །ང་རྒྱལ་ཅན་ཁྱོད་ཀྱི་ང་རྒྱལ་དེ་བཟློག །ཁྱོད་རང་བཟློག་པ་བརྒྱབ་ཤེས་མཁན་ཞིག་ཡིན་ན་དུག་ལྔ་དེ་བཟློག །ཁྱད་པར་ཧེབ་རྒན་ཁྱོད་ཀྱི་ཤ་ཆང་ཟ་བའི་ཆེད་དུ་སེམས་ཅན་གསོད་པ་དང་། དཀོར་ཟས་བརླག་པ་དེ་བཟློག །དགྲ་ལ་བཟློག་བསམ་པའི་ངན་སེམས་དེ་བཟློག །རང་ལ་མ་འོང་བསམ་པའི་ཡིད་བྱེད་དེ་བཟློག །བཟློག་པ་རྒྱག་མ་ཤེས་ན་ཁྱོད་འདྲ་བ་ཟེར་བ་ན། ང་སྙིང་ཤ་ཅུང་ཟད་ཟིན་ནས། ཁྱོད་སུ་ཡིན་དྲིས་ཚེ། འོ་ང་ནི་ཁྱོད་མཁའ་རེའི་དུས་ན་མ་བྱང་ཆུབ་ཆོས་ཀྱི་སྒྲོལ་མ་ཡིན། ད་ལྟའི་མ་ཡང་ཡིན། མ་ཚད་ཁྱོད་ཀྱི་སྔ་སོར་ལུག་གྲོ་བོ་ཞིག་བསད་དུ་བཅུག་ནས་ཤ་ཟོས་པ་དེ་ང་ཡིན། གསོད་མཁན་དེ་དགེ་ལེགས་ཡེ་ཤེས་ཡིན་ཟེར་བ་ན། ངས་བསམ་པ་མ་བདེ་ནས། ན་མོ་བུདྡྷ་ཡ། ན་མོ་དྷརྨ་ཡ། ན་མོ་སངྒ་ཡ། ཞེས་མཚན་བརྗོད་ན་ཕན་ཡོན་ཆེ་བསམ་ནས་བརྗོད་ཚེ། ཁྱི་རྒན་ན་རེ། དེ་ཡང་བསམ་པ་བཟང་། ཕན་ཡོན་ཡང་ཆེ་དང་། དེ་བས་ངས་བཤད་པ་འདི་ཡང་སངས་རྒྱས་ལ་ཐུགས་དབེན་ཆེ། བུ་ཁྱོད་མ་ཡེངས་པར་ཉོན་ཅིག་ཟེར་ནས་བཤད་པ་མི་གོ་བ་མང་པོ་བྱེད། ཁྱད་པར་དུ་བླ་མ་དཀོན་མཆོག་གསུམ་ལ་ཕྱག་འཚལ་ལོ། །བདེན་པའི་ཚིག་ཞིག་ཨ་མས་བུ་ལ་འདོམས། །དྲན་པ་བསྡུས་ལ་རྣ་བའི་དབང་པོ་གཏོད། །གཏོད་ལ་གང་སྨྲས་བཞིན་དུ་གནས་པར་བྱོས། །དེང་སང་རྒྱལ་བསྟན་སྙིགས་མར་གྱུར་བ་ཡི། །དམ་ཆོས་རྣམ་དག་སྒྲུབ་པ་ཉིན་སྐར་ཙམ། །མ་ཟད་ཆོས་ལ་བརྟེན་པའི་སྡིག་པ་ནི། །སྣ་ཚོགས་འཕྱང་མོ་ཉུག་ཏུ་རྣམ་པར་སྤྱོད། །དམ་པ་རྣམས་ཀྱིས་གསང་སྔགས་ཆོས་བསྟན་པ། །གོ་བ་ལོག་ནས་ཕྱིན་ཅི་ལོག་ཏུ་བལྟས། །མཚན་ཉིད་ཆོས་ཀྱི་གྲུབ་མཐའ་ཆས་ཆོད་བྱས། །ང་ལ་དེ་ལས་ལྷག་པའི་ཐབས་ཡོད་ཟེར། །དམར་ཆོག་བྱས་པར་དམ་ཅན་བསྲུང་མ་མནོལ། །སེམས་ཅན་བསད་པས་ཡེ་ཤེས་ལྷ་ཡང་གཡེལ། །སྡིག་པ་བྱས་པས་ནག་ཕྱོགས་རླུང་ལྟར་འཚུབས། །སྡུག་བསྔལ་སྦྱིན་པའི་འབྲས་བུའི་ངན་སོང་ལྟུང་། །མཆོད་གྲྭལ་བཞག་པའི་གཙང་མས་དམ་རྫས་མནོལ། །སྲོག་བཅད་གཞན་གྱི་ཁ་དབུགས་དངོས་སུ་བླང་། །གཞན་ཡང་མི་དགེ་བཅུ་པོ་ལེགས་པར་ཚང་། །དགེ་བ་བཅུ་ཡི་རྣམ་བཞག་གཏན་ནས་ཆད། །རྣམ་པར་དཔྱད་ན་མཚམས་མེད་གྲངས་འགྲོ་བ། །ཚེ་ཐུང་ནད་མང་འབྲས་བུའི་སྡུག་བསྔལ་ལ། །མནོག་ཆུང་རང་གཞན་གཉིས་ཀ་ཕུང་བ་ཡི། །ངན་པ་ཐ་ཆད་སྲོག་གཅོད་དེ་སྤོངས་ཤིག །གང་ཞིག་ལང་ཚོའི་གེ་སར་འཛུམ་པ་ལ། །འགལ་རྐྱེན་ཐ་གུའི་དཀྲིས་པའི་ངན་སྤྱོད་ཀྱི། །སྒྲ་འོད་ཟེར་གསུམ་སྣང་བྱེད་སྦྲོན་པ་འདི། །བསམ་ཞིང་བསམ་ན་འདྲེ་ཡི་ཆོས་ལུགས་ཡིན། །སྙིང་རྗེའི་སྐེད་བཅིང་ལྷོད་པའི་བྱང་སེམས་སྐད། །གནས་སྐབས་བདེ་བའང་འཕྲོག་པའི་ཆོམ་པོ་དེའི། །མཐར་ཐུག་གཏན་དུ་བདེ་བའང་འདོད་པ་ནི། །ར་ཞིག་མི་ཤོས་གཡག་ཞིག་ཁ་བཏང་ཡིན། །ལ་ཟླ་འགའ་ལ་འཚོ་བའི་ཉམ་ཆུང་དེའི། །གཞན་ལ་མི་གནོད་རང་ཁ་རང་གི་བཏོན། །དེ་མཐུས་རེ་ཞིག་གྱི་ནར་གནས་པ་ལ། །མི་འདོད་མངོན་པར་འཚེ་བ་ཉོན་རེ་མོངས། །གང་ལ་ཤ་ཚ་སྙིང་རྗེ་ཕར་ཞོག་དང་། །མ་ཚད་ལག་གི་འདུ་བྱེད་གཡོ་བཞིན་དུ། །ངག་གིས་མ་ཎི་བཏོན་ནས་ཁ་ས་འཐེན། །ཁྱོད་འདྲའི་བཤད་བཤད་ཆོས་དེ་མི་བདེན་ངེས། །གདོང་ནས་མཆི་མ་གཡོ་ཞིང་མ་ཉེས་པའི། །ཞོ་ཤས་བསྐྱང་བའི་མ་འབྲི་དྲིན་ཆེན་དེས། །དབུགས་སྲོག་སྡུད་པའི་བདག་པོ་གཤེད་གྱུར་ལ། །ལན་བརྒྱར་གསོད་པའི་སྨོན་ལམ་འདེབས་པར་བྱེད། །སྐུ་རིམ་ཡིན་ཟེར་དམར་ཆོག་བྱེད་པ་འདི། །ཆོས་ལ་འཐེན་ནས་སྡིག་པ་བསྒྲུབ་པ་སྟེ། །སྡིག་གཞན་ཀུན་ལས་སྲོག་གཅོད་ཆེ་བཞིན་དུ། །ཁྱད་པར་ཆེ་བ་འདོན་པའི་རྣོ་སོ་ཡིན། །དེ་ལྟར་སྲོག་བཅད་བསོད་ནམས་ཞིང་ལ་མཆོད། །ཡང་ན་ངན་སློང་གང་ལ་ས་བོན་བཏབས། །མ་དག་སྦྱིན་པ་ཡིན་པས་དེའི་འབྲས་བུ། །དཀར་ནག་བསླུ་བ་མེད་པར་ངེས་པར་སྨིན། །དེ་བཞུགས་དགེ་འདུན་གྲངས་ཀྱི་སྲོག་གཅོད་རེ། །རྗེས་སུ་ཡི་རང་གྲངས་ཀྱི་སྲོག་གཅོད་རེ། །བར་གྱི་བསྐལ་པར་དེ་གྲངས་དམྱལ་མྱོང་རེ། །ཚོགས་ཞིག་རྫོགས་པར་ཨེ་འདུག་སྡིག་རྒན་པོ། །དེ་ལྟར་སྡིག་གི་ཟབ་གནད་ཀུན་ཚང་བས། །ཤ་ཁྲག་བུད་ཤིང་སྐམ་པོ་སྤུང་བའི་མཐུས། །ཉོན་མོངས་མེ་ལྕེའི་ཁང་པར་བསྟི་བ་ན། །ཉམས་དགའི་རྐང་བྲོ་དེ་ན་ཡོད་དམ་ཀྱེ། །ཞེས་ཟེར་བ་ན། ངས་ཁ་ཞིག་གཙེ་དགོས་བསམ་ནས་སྨྲས་པ། །ཐབས་མཐོན་སྙིང་རྗེ་ཤེས་རབ་སྟོང་བ་ཉིད། །ཆོས་དབྱིངས་མཁའ་ལ་དྲང་བའི་དཀྱུས་བསྐྱོད་མཆོག །འགྲོ་ལ་ཐུགས་རྗེའི་གཟིགས་བའི་མཆུ་སྡེར་གྱིས། །སྡུག་བསྔལ་ཀླུ་ཚོགས་བསྒྲལ་བར་མཛད་ལ་འདུད། །གང་མ་བྱོན་ན་མུན་པའི་བསྐལ་བ་རུ། །དགེ་སྡིག་རྒྱུ་འབྲས་རྣམ་བཞག་མི་ཤེས་ཤིང་། །གང་ཞིག་གིས་མཐུའི་བླང་དོར་ཚུལ་འབྱེད་པའི། །རྒྱལ་བ་ཉིན་མོར་བྱེད་པའི་བསྟན་པ་ལ། །སྦྱོར་བ་སྒྲོལ་བ་ལ་སོགས་ཐབས་མཁས་རྒྱུད། །ཏནྟྲ་བཅོ་བརྒྱད་མདོ་ལུང་ཐམས་ཅད་དུ། །ཤ་ཆང་ཟ་བ་སྔགས་ཀྱི་དམ་ཚིག་དང་། །རིག་མ་བརྟེན་པ་ལས་ཀྱི་ཕྱག་རྒྱལ་གསུངས། །ཤ་ནི་སྙིང་རྗེ་ཅན་གྱིས་བཟའ་བ་དང་། །ཆང་ནི་དམ་ཚིག་ཅན་གྱི་འཐུང་བྱ་ཡིན། །ཁྱད་པར་གྷ་ན་ཚོགས་ཀྱི་མཆོད་པ་ལ། །ཤ་ཆང་མེད་ན་མི་རུང་ཞེས་ཀྱང་བསྟན། །ལྷག་པར་འཕགས་པའི་དགེ་འདུན་མང་པོ་ཡི། །ཞལ་དུ་དུད་འགྲོའི་ཤ་ཁྲག་སོང་བ་ན། །དེ་ཡི་འབྲེལ་ཐོག་བསོད་ནམས་ཚོགས་རྫོགས་ནས། །དོན་དང་ལྡན་པར་འགྱུར་བ་ཨ་ལ་ལ། །གསང་སྔགས་ལམ་དུ་སྲོག་གཅོད་ཡོད་པ་དང་། །དེ་ཡང་ངན་སོང་གསུམ་པོ་བསྒྲལ་ཞིང་ཡིན། །བསྒྲལ་ནས་ཐར་བར་བཀོད་པ་སྙིང་རྗེ་ཡིན། །མཐར་ཐུག་བདེ་བ་ཐོབ་པ་ཐབས་མཁས་ཡིན། །གཞན་ཡང་སྲོག་གཅོད་གཅིག་ལ་སྡིག་པ་གཅིག །དེ་ལས་མང་པོ་ཡོད་ཅེས་ག་ལ་འཐད། །ཚོགས་ཀྱི་མཆོད་པར་ཤ་ཆང་དགོས་གསུངས་ཏེ། །དེ་ཡིས་མནོལ་བར་འགྱུར་བ་གང་དུ་ཡོད། །སེམས་ཅན་དེ་ལའང་རབ་ཏུ་བཟང་བ་ཡིན། །ལུས་དེ་མཆོད་པར་གྱུར་བ་སྐལ་བ་བཟང་། །ད་སྔོན་འཁོར་བ་གྲངས་མེད་ལུས་བླང་ཀྱང་། །དེ་དག་ཐམས་ཅད་དོན་མེད་གྱི་ནར་འདས། །ལུས་ངན་དུད་འགྲོར་སྐྱེ་བའི་རྒྱུན་བཅད་པ། །གནས་སྐབས་བདེ་བ་ཞེས་སུ་སྨོན་ནས་ཀྱང་། །ཡུན་རིང་གནས་ལ་སྤྲོ་བའི་ཡིད་ཡོད་ན། །ཁྱོད་ཀྱི་དུད་འགྲོའི་ལུས་ཤིག་སྨོན་ལམ་ཐོབ། །གཞན་ཡང་སངས་རྒྱས་ཐམས་ཅད་མཁྱེན་པ་དེའི། །ཆོས་ཕྱིར་སྐུ་ལུས་མེ་དོང་མཆོང་བ་དང་། །བླ་མ་མཆོད་སླད་སྐུ་གཏོང་ལ་སོགས་པ། །ཆོས་ལ་བསྔོས་པའི་སྡིག་པར་སུ་ཡིས་འདྲེན། །སྙིང་སྟོབས་ཆེན་པོའི་ལུས་སྦྱིན་བྱས་པ་དང་། །སྦྱིན་པའི་སྟོབས་དང་མནྡྷེ་བཟང་མོ་སོགས། །བྱང་ཆུབ་སྤྱོད་སླད་ཤ་ཁྲག་གཏོང་བ་རྣམས། །མ་དག་སྦྱིན་པར་ལུང་རིག་ཇི་ལྟར་དག །སྐུ་བཏང་ལེན་པོ་དེ་ལ་སྡིག་པའང་། །འབྱུང་བ་ཡིན་ན་ཚོགས་ཆེན་རྫོགས་གནས་མེད། །སེམས་ཅན་མ་བསྲུང་བྱང་ཆུབ་སེམས་དཔའ་ཞེས། །རྣམ་པ་ཀུན་ཏུ་བརྗོད་པར་མི་ནུས་སོ། །ལྷ་དང་སྲུངས་མ་མཆོད་པར་བྱེད་པ་ཚོའི། །ཤ་ཁྲག་དམར་གྱི་གཏོར་མ་ཟེར་བ་ལས། །དཀར་གཏོར་རྐྱང་བས་མཆོད་པ་འོང་བའང་། །ངས་ནི་རྣམ་པ་ཀུན་ཏུ་མ་མཐོང་ངོ་། །ཚོགས་ཀྱི་མཆོད་པ་ཡེ་ཤེས་ལྷ་ལ་འབུལ། །ཤ་ཁྲག་གཏོར་མ་དམ་ཅན་སྲུང་མར་འབུལ། །བདུད་གཅོད་ལམ་དུ་ཤ་ཁྲག་མཆོད་སྦྱིན་བྱེད། །ཀུན་གྱིས་མནོལ་ན་སྐྱིད་སྡུག་གྲ་མཉམ་རེད། །འདི་ན་དུད་འགྲོ་ཁྱོད་ལས་ལྷག་པ་ཡི། །ཆོས་ཀྱི་དབང་ཕྱུག་སྐྱེ་བོ་དམ་པའི་ཚོགས། །ས་རྡུལ་གྲངས་དང་མཉམ་པ་ཐམས་ཅད་གང་། །དེ་འདྲའི་སྡིག་པ་ཆེ་བ་མ་ཤེས་སམ། །གཞན་ཡང་རིག་ཚད་གསོད་པའི་བཤན་པའི་གྲལ། །བསད་བསད་འདྲེན་པའི་བླ་མ་ཡོད་པས་ན། །ཁྱོད་ཀྱིས་ལོག་ལྟའི་སྒྲིབ་པས་ཐམས་ཅད་ལ། །སྡིག་པ་ཅན་ཞེས་རེས་སུ་བཅད་དུའང་མེད། །མ་བསད་པས་ནི་ཤ་ཁྲག་མི་འབྱུང་ལ། །དེ་མེད་དགེ་འདུན་འཚོ་བ་རོ་བདའ་བ། །ཉེས་པ་དེ་ལྟ་བུ་ཞིག་མི་གནང་བས། །དགྱེས་མཆོད་དམ་པའི་ཚོགས་མཆོག་ངེས་པར་རྫོགས། །སྙིང་སྟོབས་ཆེན་པོའི་བདུད་གང་བསད་པ་དང་། །ཨོ་རྒྱན་ཆེན་པོའི་མུ་སྟེགས་བསྒྲལ་བ་རྣམས། །ཚོགས་རྫོགས་པ་ལས་ཐར་བའི་གེགས་ཡིན་ཞེས། །རྣམ་པ་ཀུན་ཏུ་བརྗོད་པར་མི་རུང་ངོ་། ཞེས་བརྗོད་པ་ན། ཧ་ཧ། དེ་ཚོ་ཡིན་ན་བཟང་གི་དང་མིན་ཟེར་ཞེས་ཞེ་ཁྲེལ་བྱེད་པ་ལ། །ངས་ཡང་ན་དེ་ལས་གཞན་ཞིག་ཡོད་ན་ང་ལ་ལན་ཞིག་རྒྱོབ་བྱས་པ་ན། ཁྱོད་ལ་ལན་ནི་ངས་ཐ་ ༼ ལྷ་དཔྱད་ ༽མི་ཐེབ་ན་དང་དགོས་མེད་ཟེར། ངས་ད་ལྟ་ཁྱོད་ལ་ལན་མེད་བྱས་ཚེ། འོ་ན་ངས་ཁྱོད་ལ་གཟབ་གཟབ་བྱས་ནས་ལན་ཞིག་ལྷ་མི་འདེབས་ན་ཟེར། ཨ་ཧ་ཧ། རྟེན་འབྲེལ་ཟབ་མོ་ཕྱིན་ཅི་མ་ལོག་པ། །སྙིང་རྗེའི་བདག་ཉིད་གང་དེའི་ལེགས་གཟིགས་ནས། །མཐར་ལྟའི་རི་དྭགས་ཚོགས་ཀུན་བསྐད་མཛད་པ། །ཐུབ་པ་སེང་གེའི་སྒྲ་དེ་རྒྱལ་གྱུར་ཅིག །ཨ་མས་ཁྱོད་ལ་སྙིང་གཏམ་སྨྲས་པ་ན། །སྦྱོར་སྒྲོལ་དམ་པ་གསང་སྔགས་ལམ་ཡིན་ཏེ། །དེ་ཡང་གོལ་བའི་འཕྲང་ཞིག་འདི་མིན་པ། །ཤ་ལྔ་བདུད་རྩི་ལྔ་སོགས་དམ་ཚིག་རྫས། །དམ་ཚིག་ཅན་གྱི་སྐལ་བར་གསུངས་ནའང་། །དེ་ནི་ཡན་ལག་ཡིན་ཏེ་རྩ་བ་མིན། །སེམས་ཅན་བྱམས་སྤངས་རྩ་བ་ཉམས་པ་ལགས། །རྩ་བ་མེད་ན་ཡན་ལག་གྱི་ན་ཙམ། །རྩ་བ་ཅན་གྱི་གང་ཟག་ཐམས་ཅད་ཀྱི། །སྡིག་པ་མེད་དེ་གསང་སྔགས་རྫས་ཡིན་མོད། །ཐེག་ཆེན་རྫས་ལ་བཟང་ངན་ལྟ་མི་རུང་། །ཚོན་པོའི་ཚིལ་དེ་དགོས་ཞེས་གང་ན་ཡོད། །སྙིང་རྗེ་ཅན་གྱི་ཤ་ལ་ཟ་ནའང་། །སྙིང་རྗེ་མེད་པ་སྲོག་ལ་གཅོད་པ་ལགས། །དམ་ཚིག་ཅན་གྱིས་ཆང་མ་བཏུང་ནའང་། །འབོག་དང་བརྒྱལ་བ་དམ་ཚིག་ཅན་ལ་མེད། །ག་ཎས་མཆོད་པར་ཤ་ཆང་དགོས་གསུངས་ཀྱང་། །གསངས་སྔགས་ཡང་དག་རྫས་དེ་བཟའ་བ་ལས། །རེག་པ་ཙམ་ཡང་མི་འདོད་གྱུར་བཞིན་པར། །འདི་ན་ཚབ་མར་དུད་འགྲོ་བསོད་པ་སྨད། །གཙང་རྨེ་གཉིས་འཛིན་ཅན་དེ་དམ་ཚིག་ཞེས། །རྡོ་རྗེ་འཆང་གི་གསུང་བ་ག་ལ་ཡོད། །དེ་ལ་དགྱེས་པའི་ལྷ་ཞིག་ཡོད་པ་དེ། །སྲོག་དབུགས་སྡུད་པའི་འབྱུང་པོར་གདོན་མི་ཟ། །ཅི་ཕྱིར་རྒྱལ་བ་སྙིང་རྗེའི་མངའ་བདག་གིས། །སེམས་ཅན་ཀུན་ལ་བུ་གཅིག་མ་བཞིན་དུ། །བདག་ཏུ་གཟུང་བ་འདི་ལ་ཐེ་ཚོམ་མེད། །དེ་བསད་དེ་ལ་མཆོད་པས་ག་ལ་དགྱེས། །ཇི་ལྟར་གདུག་པའི་བུ་ལ་གསོད་པ་ཡིས། །དགྲ་དེའི་གཡུལ་བཤམ་ཕན་ཚུན་རྩོད་པ་ན། །བྱམས་པའི་མ་དེའི་བུ་ལ་སྡང་བ་ནི། །ཕར་ཞོག་རང་སྲོག་ཕུང་ཀྱང་འགྱོད་པ་མེད། །དེ་བཞིན་སངས་རྒྱས་ཐུགས་རྗེ་ཆེ་རྣམས་ཀྱིས། །སེམས་ཅན་བསད་ན་དགྱེས་པར་ཕར་ཞོག་དང་། །མ་ཟད་སེམས་ཅན་སྲོག་གི་ཚབ་མ་རུ། །བརྩེ་བདག་རང་ལ་ཕངས་བར་མི་མཛད་དོ། །མ་དེ་མགྲོན་དུ་བོས་པའི་གཡོས་སྦྱར་ལ། །བུ་དེའི་ཤ་ཁྲག་ཐང་མར་བཤམས་པ་ནི། །དགའ་སྤྲོ་ཕར་ཞོག་ཕྱིར་ཞིང་སྡུག་བསྔལ་གྱི། །ཁོན་དུ་སྤྲོད་པ་འདི་ལ་ཐེ་ཚོམ་བྲལ། །གལ་ཏེ་དམ་ཚིག་ཅན་ཞིག་ཁྱོད་ལགས་ན། །འདི་ན་བ་ལང་མི་རྟ་ཁྱི་སོགས་པ། །མིང་མཐར་བས་ཤིང་བདུད་རྩི་ལྔ་དཀོན་ན། །དེ་ཡི་ཚབ་ཞིག་དགོས་པར་ཁྱོད་བདེན་གྲང་། །སེམས་ཅན་བསད་ན་རང་ལ་དཔེ་ལོང་དང་། །འཇིག་རྟེན་འདི་ན་གྱ་ནོམ་དངོས་པོ་ནི། །ལྷུན་སྡུག་བཀོད་ལེགས་ཡིད་འཇུག་གང་བདོག་ལས། །ཐ་ན་ཡན་ལག་ཙམ་ལ་འདམ་པར་ངེས། །སངས་རྒྱས་བྱམས་བརྩེའི་བདག་དེ་ཐམས་ཅད་ཀྱི། །ཐུགས་ལ་ངལ་བ་ཆེས་ཆེར་བསྐྱེད་ནས་ཀྱང་། །སེམས་ཅན་ཉོན་མོངས་ཉེས་མེད་གང་དེ་དག །སྲོག་ལ་ཆད་པས་བཅད་དེའི་ཚོགས་རྫོགས་སམ། །ལྷག་པར་དགེ་འདུན་དཀོན་མཆོག་རིན་པོ་ཆེ། །བསོད་ནམས་ཞིང་དུ་ལྷུན་གྱིས་གྲུབ་པ་ལ། །བསྔོས་ནས་སེམས་ཅན་སྲོག་ལ་གཟེས་པ་ན། །དེ་ལས་ལྕི་བ་ཐམས་ཅད་དུ་ན་དཀོན། །ཆོས་དང་སངས་རྒྱས་སྐུ་ལའང་དེ་བཞིན་དེ། །རྣམ་བཞག་འགལ་བའི་ལས་དེ་བྱེད་པ་ལས། །ཆོས་ཞིག་འདོད་ན་ཚེ་ཐར་བཏང་བ་མཆོག །སྟོན་པ་སངས་རྒྱས་ཐམས་ཅད་ངེས་པར་དགྱེས། །ཇི་ལྟར་བུ་ལ་མངར་ཟས་བྱིན་པ་ཙམ། །ཕ་དང་མ་ལ་དགའ་མགུར་ལྡན་པ་དང་། །བུ་དེའི་སྲོག་གི་འཇིགས་པ་བསལ་བྱས་ན། །ལྟ་ཞིག་གཞོལ་དུ་མེད་པའི་དྲིན་དུ་བལྟ། །ཐོག་མེད་དུས་ཀྱི་མ་འདྲེས་བཤེས་པོ་ལ། །མཉེས་པའི་ཐབས་ཤིག་ངེས་པར་དེ་ན་ཡོད། །དེ་འདྲའི་དགེ་བ་བྱེད་པ་སུ་ཞིག་སྟེ། །དེ་འདྲའི་བྱང་ཆུབ་སེམས་དཔའ་སུ་ཞིག་ཡོད། །སྲོག་གཅོད་གོང་ན་སྡིག་གཞན་མེད་གསུངས་ཤིང་། །ལྷག་པར་སོ་ཐར་ལམ་དུ་སྲོག་གཅོད། །རིས་བདུན་གང་ལའང་ཆེ་བར་བཞག་པ་དང་། །བྱང་ཆུབ་སེམས་སྐྱེད་གནོད་སེམས་ཀྱིས་ལྟུང་ལ། །རྡོ་རྗེ་ཐེག་པའི་སྣང་བ་ལྷར་བསྒོམ་ན། །ལྷ་བསད་པ་དང་ཁྱད་པར་ཅི་ཡོད་དེ། །མ་ཚད་རང་བཞིན་ཁྱིམ་དུ་གནས་པ་ལའང་། །མི་དགེ་བཅུ་པོ་ཚང་པས་ལྕི་བར་བཞག །སྲོག་གཅོད་དངོས་ཏེ་སྦྱོར་བས་འགུམ་པ་པོ། །གང་དེའི་སྲོག་དང་ཤ་ཁྲག་སྦྱིན་ནམ་ཅི། །སྐྱབས་སྡོམ་ནས་བཟུང་ཚངས་སྤྱོད་ལ་གནང་ངམ། །ལུས་ཀྱི་མི་དགེ་གསུམ་པོ་ཡོངས་སུ་ཚང་། །རྫུན་གྱི་མཚན་ཉིད་ཚང་བ་སྨྲེ་ངན་གཏམ། །གསང་སྔགས་དམ་རྫས་ལ་སོགས་ཟེར་བ་དང་། །གཞན་ཡང་བླ་མ་འགའ་རེས་ངས་འདྲེན་ཟེར། །ཕྲ་མའི་མཚན་ཉིད་ལུས་སེམས་དབྱེ་བར་བྱས། །ཚིག་རྩུབ་འདི་ཉིད་བཤའ་དགོས་ལ་སོགས་ཟེར། །དེ་ལས་རང་ལ་དཔེ་ཞིག་ལོང་མཛོད་དང་། །ཁྱོད་ཀྱི་སྲོག་དེ་བཅད་ཞེས་ལས་ཟབ་པའི། །མི་སྙན་ངག་དེ་གཞན་དུ་ཆེ་ཤོས་མེད། །དེ་ལ་བརྟེན་པའི་ངག་འཁྱལ་བསམ་མི་ཁྱབ། །གཞན་ཡང་ཤ་དང་ཁྲག་ལ་བརྣབ་སེམས་སྐྱེས། །སེམས་ཅན་གསོད་པར་འདོད་པའི་གནོད་སེམས་ཀྱི། །རྒྱལ་བའི་བཀའ་ལ་རྩིས་ཐང་མི་བྱེད་དོ། །ཁྱད་པར་བླ་མ་སོགས་ལ་ཁ་བསྔོས་ནས། །རང་གི་ཁ་ཟས་མ་ཞུས་མཚང་རེ་ཆེ། །སེམས་ཅན་གཅིག་གི་སྡིག་པ་མ་ཐེག་ན། །ངས་ཀྱང་སྐྱིད་ལ་དེ་ཡང་མཐུ་སྡུག་སྐད། །དེ་ལྟ་ན་ནི་ལོག་ལྟ་རྔམ་པོ་ཆེ། །ལར་ནི་སེམས་ཅན་ཕ་མར་མ་གྱུར་མེད། །རིག་པས་དཔྱད་ན་དེ་ཉིད་བསད་པ་ནི། །མཚམས་མེད་གྲངས་སུ་འགྲོ་སྙམ་ལུང་ནའང་སྣང་། །འོན་ཀྱང་རྒྱུ་འབྲས་རྟོགས་དཀའ་རྒྱལ་བས་གསུངས། །མི་དགེ་བཅུ་སྤངས་དགེ་བཅུ་ཡིན་གསུངས་ན། །ལྷག་པའི་དགེ་བ་དེ་ལས་ལྡོག་ནས་བརྩམས། །ལྷག་པ་ཕར་ཞོག་སྤངས་དང་རྣམ་བཞག་འགལ། །སྔགས་ཀྱི་སྒྲོལ་བ་ཐབས་ཀྱི་ཁྱད་པར་ཅན། །འཚང་བ་གསུམ་ལྡན་བླ་ན་མེད་པ་ནི། །རལ་གྲི་རྣོན་པོའི་སྦྱོར་བ་རྩུབ་མོ་ཅན། །ཁྱོད་ཀྱི་ཆོས་ལུགས་འདི་ལས་རིང་བར་སོན། །དེ་ལྟ་ན་ནི་བསད་པ་གསོ་ནུས་སྲིད། །གཞན་དུ་སྲོག་དབུགས་ལེན་པའི་རྒྱུ་རྩལ་གྱི། །སྣ་ཚོགས་ཐབས་དང་བྱེད་པ་ལ་ལྟོས་ན། ཁྱི་རྒན་རྒྱ་པོ་ངས་ཀྱང་དཀའ་ཚེགས་མེད། །སེམས་ཅན་བསད་ནས་ཤ་ཁྲག་དམར་མཆོད་ཀྱི། །ལྷ་ཚོགས་དགྱེས་པར་འདོད་པའི་བློ་ངན་འདི། །མུ་སྟེགས་རྣམས་ཀྱི་གཞན་གྱི་མགོ་བཅད་ནས། །ཨ་སྔོན་གནམ་ལ་མཆོད་པའི་ལན་མོ་ཡིན། །སྙིང་རྗེའི་གཞན་དོན་དམིགས་པའི་ཆོས་ལུགས་འདི། །ཤེས་རབ་རྫོགས་བྱང་བརྙེས་པའི་གསུང་ཡིན་པས། །གནོད་པ་བྱས་པ་བྱང་ཆུབ་ལམ་ཡིན་ཞེས། །ནམ་ཡང་ཁྱོད་ཀྱི་ཕྱིན་ཆད་མ་བྱེད་ཅིག །སྙིང་རྗེའི་སྒྲོལ་བ་གསང་སྔགས་ལམ་ཡིན་ཀྱང་། །བསད་པ་གསོ་ནུས་དེ་ཡི་ཁྱད་ཆོས་སུ། །འདྲེན་པར་ནུས་པའི་ཕྱི་རྟགས་ཅན་དག་ལ། །འགྲན་འདོད་ཁྱོད་ལ་བཞད་གད་གནས་སུ་སོན། །སྙིང་སྟོབས་ཆེན་པོ་ལ་སོགས་བྱང་སེམས་འགས། །ཤ་དང་ཁྲག་ལ་རྔམ་སེམས་མ་ཡིན་ཏེ། །དེ་རྒྱུད་དགེ་བས་དྲང་པའི་སྡོང་པོ་ལ། །དེ་དང་མཐུན་པའི་འབྲས་བུ་སྨིན་པ་ལགས། །གལ་ཏེ་ལུས་ཀྱི་མཆོད་སྦྱིན་བྱས་ཞེ་ན། །ཡང་ན་ཁྱོད་ཀྱི་ལྟོག་འཕོངས་དབུལ་བ་ཡི། །དུད་འགྲོ་རྣམས་ལ་མཆོད་སྦྱིན་ངེས་པར་གྱིས། །རང་གཞན་དོན་གཉིས་འགྲུབ་པར་གདོན་མི་ཟ། །བསམ་བཞིན་མཆོད་ན་དགེ་བ་ཡོད་པ་སྲིད། །ཤེས་བཞིན་ཁྱོད་ཀྱིས་སྒྲུབ་པར་མ་ནུས་ན། །མི་འདོད་མི་ཤེས་ཞེ་སྡང་རྒྱུར་གྱུར་བ། །གཞན་སྲོག་གཅོད་པ་དུད་འགྲོར་ག་ལ་ཕན། །གལ་ཏེ་བསམ་མི་ཤེས་ཀྱི་ལེགས་འབྱུང་ཞེས། །བཤད་ཀྱང་མི་བདེན་ཤ་ལ་རྔམས་པ་ཁྱོད། །འདོད་ཆགས་དགེ་བར་འགྱུར་བའི་རྣམ་བཞག་ཞིག །བསྟན་དུ་ཡོད་ན་དེ་ཡང་ཁྱོད་རེ་བདེན། །བསམ་བཞིན་དགེ་བའི་ཆེད་དུ་མཛུབ་མོ་ཙམ། །བསྲེགས་པར་མི་ནུས་རང་ལ་སྙིང་རྗེ་ན། །སྲོག་གི་མཆོད་པ་དུད་འགྲོ་བསམ་མེད་ལས། །བསམ་ཡོད་གཞན་དོན་ཅན་ཁྱོད་ཁ་གཤོབ་ཆེ། །མི་འདོད་ཆོས་ལ་བརྟེན་པའི་ཞེ་སྡང་གི །ཕྱིར་ཞིང་ཐར་པ་མེད་དེ་ཁྱོད་ཀྱིས་བྱེད། །དེས་ནི་བསམ་པ་མི་དགེའི་བྱེ་བྲག་གི །སྲོག་དེ་གཅོད་ལ་སྨོན་ལམ་ལོག་པ་འདེབས། །ཁྱོད་ཀྱི་མ་ཤེས་ཉེས་པ་མེད་ཅེ་ན། །མ་མཐོང་དུག་ཟོས་འབྲས་བུ་མངོན་དུ་གྱུར། །སངས་རྒྱས་ཐབས་མཁས་འགྲོ་བའི་བླ་མ་དེའི། །སོ་སྐྱེས་ལུས་ཀྱི་སྦྱིན་པ་མ་གནང་བ། །འགྱོད་པ་ཡོད་ལ་མ་དག་སྦྱིན་པ་རུ། །དགོངས་པར་ཡང་ནི་ཐེ་ཚོམ་ཅི་ཞིག་ཟ། །འཕགས་པས་བསམ་བཞིན་གཞན་ཕན་རྒྱུ་མ་ནི། །རླབས་ཆེན་སྤྲུལ་པའི་ཆུ་གཏེར་གཏིང་དཔོག་མིན། །སློང་བ་པོ་ལ་བསྔོ་རྒྱུའི་རང་མཚན་སྲོག །བསམ་མི་ཁྱབ་འགྱུར་ཙམ་ལའང་ཐེ་ཚོམ་ཟ། །འཁོར་གསུམ་རློམ་པ་ཟད་ལས་དོ་གལ་གྱི། །ཁྱོད་ལུས་སེམས་ཅན་དོན་དུ་དམ་ཆོས་ལ། །དཀའ་བ་སྤྱོད་པའི་དམ་རྫས་མྱོང་གྲོལ་བ། །ཉེས་པ་ཅུང་ཟད་ཙམ་ཡང་ཡོད་པ་མིན། །གལ་ཏེ་གཅིག་ལ་གནོད་པ་ཅུང་ཡོད་ཀྱང་། །མཐའ་ཡས་སེམས་ཅན་ཁུར་ཆེན་ཁུར་བོ་ལ། །དེ་ཙམ་ཆུང་ངུའི་ཆེད་དུ་ཆེ་མ་སྤོངས། །དེའི་འཁོར་བ་དེ་ལ་མཐའ་ཞིག་སྡུམ། །དེ་ལྟར་སྲོག་བཅད་གཅིག་ལ་མི་དགེ་བཅུ། །ཚང་བས་རང་རང་རྣམ་སྨིན་རྒྱུ་མཐུན་དང་། །དབང་དང་བྱེད་པའི་འབྲས་བུ་ལྔ་བཅུ་པོ། །སྨིན་པ་འདི་ལ་ཐེ་ཚོམ་ཡོད་རེ་ཀན། །ཡང་ཅིག་སྡོམ་གསུམ་ཉམས་པའི་ཉེས་པ་ཀུན། །ཅིག་ཆར་འདུ་བྱེད་པ་ལ་འདི་འདྲ་མེད། །སྲོག་ལན་ལྔ་བརྒྱའི་ཆད་པ་རྩུབ་མོ་ཡང་། །ངེས་པར་འབྱུང་བ་བདེན་པར་སྨྲ་བས་གསུངས། །ཀུན་སློང་སྟོབས་ཀྱིས་ངན་སོང་རྣམ་པ་གསུམ། །སྡུག་བསྔལ་ཞིང་གི་ལྕི་བས་སྒྲིབ་པ་དང་། །བཅས་ཏེ་མི་བཟད་འབར་བའི་སྦྲུལ་གདུག་ལ། །རྒྱན་པོར་འཆང་བ་ངོ་མཚར་རྨད་པོ་ཆེ། །མི་ཁོམ་བརྒྱད་པོ་མགྲོན་དུ་དགུགས་པ་སྟེ། །ཕྱུགས་ཀྱི་མཆོད་སྦྱིན་བྱེད་པའི་ཀླ་ཀློར་ངེས། །འདི་དང་བསྟན་པའི་རྣམ་བཞག་མི་འགལ་ན། །རིག་པའི་དབང་ཕྱུག་རྣམས་ཀྱང་སྨྲ་ལ་དགའ། །དུད་འགྲོར་སྐྱེས་པ་ཡིད་སྨོན་གནས་མིན་ཀྱང་། །ཤི་བའི་འོག་ཏུ་ཅི་འདྲ་ཤེས་པར་མེད། །གལ་ཏེ་ཚེ་སྲོག་མཐའ་རུ་མ་ཕྱིན་ཅིང་། །གནད་གཅོད་སྡུག་བསྔལ་རབ་ཏུ་བརྣག་དཀའ་བ། །དེ་ནི་སྨོན་པའི་གནས་སུ་འོས་པ་ན། །ཁྱོད་ཀྱིས་ཉིན་ཚེ་བ་ཞིག་སྨོན་ལམ་ཐོབ། །ཁྱོད་ནི་སྡིག་པས་གོས་པའི་གྲིབ་དང་གཅིག །ང་ཉིད་ཉོན་མོངས་སྡང་བའི་གྲིབ་དང་གཉིས། །ཡེ་ཤེས་ལྷ་ཚོགས་གཡེར་བའི་སྐྱོན་གསུམ་གྱིས། །ཐར་བ་ཐོབ་ལ་ཕྱིར་ཞིང་གནོད་པ་འདྲ། །སྲོག་ཆད་ཚོར་བ་མྱོང་བའི་མིག་ཆུ་དང་། །བརྩེ་བདག་སྙིང་རྗེའི་གདུང་བའི་སྤྱན་ཆབ་དང་། །ཕྱི་མར་འོ་དོད་འབོད་པའི་མིག་ཆུ་གསུམ། །ཚོགས་ཀྱི་མཆོད་པ་དེ་ལ་དགོས་སམ་ཅི། །འདི་ནི་ཆོས་ཀྱི་དབང་ཕྱུག་ཆེན་པོ་རྣམས། །སྲོག་གཅོད་གོང་ན་དགེ་བ་མེད་ཅེ་ན། །དེ་ནི་རྒྱལ་བ་གང་གིས་མ་གསུང་བས། །ཕྱིར་ལོག་བདུད་ཀྱི་ལུང་བསྟན་ངེས་པར་འདུག །སྲོག་བཅད་དགེ་བ་མིན་པའི་ཚད་མ་རུ། །ཁྱི་རྒན་ངས་ཀྱང་གཏན་ཚིག་ཞིག་གྲུབ་ན། །ང་ལས་གཞན་པའི་མཁས་རྣམས་སྨོས་ཅི་དགོས། །འདི་འདྲའི་ཉེས་པ་གཏན་ནས་མི་འཚལ་ལོ། །གལ་ཏེ་བསད་ཤ་སྡིག་ཁྲག་ཞིག་མེད་ཀྱང་། །ཞིམ་མངར་རོ་བཅུད་ནུས་པ་སྟོང་ལྡན་པའི། །ཁ་ཟས་བཟང་པོ་བུར་སྦྲང་ལ་སོགས་པས། །མ་ངོམས་ཤ་ཞིག་ཟེར་ན་བྱ་ཐབས་མེད། །རིག་རིག་བསད་བྱེད་བཤན་པ་ཞིག་ཡིན་ནས། །བསད་བསད་འདྲེན་པར་ནུས་ན་ངོ་མཚར་ཆེ། །འོན་ཀྱང་ཁྱོད་ལ་སེམས་ཅན་གསོད་ལས་གཞན། །ངེས་པ་སྐྱེ་བས་གྲུབ་རྟགས་རེ་ཡོད་དམ། །ཞེས་ཟེར་བ་ན། །བདག་གི་བསམ་པ་ལ་དེ་འདྲ་བདེན་བསམ་ནས་ངེས་པ་སྐྱེས་ནས། བདག་གི་འདི་ལྟར། ཨ་མ་དེ་ལྟ་ན་ཤ་ཟ་རྒྱུ་མེད་ན་འདུག་མི་ཐུབ། ཤ་ཟ་མི་རུང་བར་འདུག་ན་ཅི་བྱེད་བྱས་པ་ན། མོ་ན་རེ། སྡིག་མེད་དེ་ཟོས་ཀྱང་བཟང་། དགེ་འདུན་པ་ལ་དྲངས་ཀྱང་བཟང་ཟེར། ཡང་བདག་གི་བསམ་པ་ལ། སྲོག་མ་བཅད་ན་ཕན་ཡོན་ཅི་ཡོད་བསམ་ནས་སྨྲས་པ། ཨ་མ་སྲོག་མ་བཅད་ན་དགེ་བ་ཅི་ཡོད་བྱས་པ་ན། ཡང་ཁྱི་རྒན་མོ་ན་རེ། ཡེ་ཤེས་ཆེན་པོའི་མཐའ་ཡས་ཆོ་རོལ་ངོམས། །ཤེས་རབ་ཆེན་པོའི་སྲིད་ལས་རྣམ་པར་འཕགས། །སྙིང་རྗེ་ཆེན་པོའི་ཞི་ལ་མི་བཞོལ་༼ གཞོལ་དཔྱད། ༽བ། །བླ་མ་སངས་རྒྱས་ལྷ་དང་བཅས་ལ་འདུད། །གང་ཞིག་གཞན་ལ་ཕན་པའི་བསམ་པ་ཡིས། །རང་དང་དེ་ལ་ལྡོག་པ་ཐམས་ཅད་ལ། །སྙོམས་སེམས་བློ་བཟང་ཉི་མའི་རང་བཞིན་ཅན། །འཆང་ནས་གཞན་གནོད་སྤངས་པའི་འོད་སྟོང་འགྱེད། །སྲིད་གསུམ་འགྲོ་བའི་ཁམས་ན་ལྟ་བའི་ཚུལ། །མ་ལུས་རྡུལ་སྙེད་གྲངས་ལ་སྙོགས་ནའང་། །རང་ཉིད་ཡིད་ལ་བྱེད་པ་འབའ་ཞིག་ལས། །གཞན་ལ་ཕན་འདོད་ཐུབ་མཆོག་ཁོ་ནའི་ལུགས། །ལྷ་དང་དེ་བཞིན་གདོང་བཞི་ལ་སོགས་པ། །དྲང་སྲོང་མངོན་ཤེས་ཐོབ་པ་ཐམས་ཅད་ཀྱི། །རྣམ་དཀར་དགེ་བའི་ཕུང་པོ་ཇི་སྙེད་པ། །རིན་ཆེན་བྱང་ཆུབ་སེམས་ཀྱི་ཆར་མི་ཉེ། །དེ་ཡི་རྒྱུ་གང་གཞན་ལ་བརྩེ་བས་འཁྲུངས། །སྡུག་བསྔལ་འདོར་བར་འདོད་པའི་སྙིང་རྗེ་དང་། །བདེ་བ་ཐོབ་པར་འདོད་པའི་བྱམས་པ་དང་། །ཉེ་རིང་ཆགས་སྡང་མེད་པའི་བཏང་སྙོམས་དང་། །བདེ་ཐོབ་ཡིད་ལ་དགའ་བའི་ཡི་རང་རྣམས། །སྲོག་གཅོད་གཅིག་པོ་བྱེད་པའི་གང་ཟག་ལ། །འཚལ་བ་མིན་པའི་དོན་དེ་ཤེས་བྱས་ནས། །སྐྱོན་ཏེ་སྤངས་བ་དམ་བའི་ལམ་དུ་ཚུད། །སྲོག་གཅོད་གཅིག་ལ་མི་དགེ་བཅུ་ཚང་ལ། །དེ་སྤངས་དེ་ལ་བརྟེན་པའི་དགེ་བཅུ་འཐོབ། །སྡོམ་པ་གསུམ་ཚང་ཚེ་འདིར་ཚེ་རིང་ལ་། །ཕྱི་མ་བྱང་ཆུབ་ལམ་གྱི་རྒྱུར་འགྲོ་གསུངས། །ཐམས་ཅད་ཀུན་གྱི་ཡིད་དུ་འོང་བ་དང་། །སྲོག་ལ་གེགས་མེད་སླར་ཡང་བྱེད་པ་མཐུན། །ཐམས་ཅད་མཁྱེན་རྣམས་དེ་ལ་དགྱེས་པ་དང་། །ལྷ་དང་སྲུང་མ་རྟག་ཏུ་བྱམས་པ་དང་། །ནག་ཕྱོགས་རྣམས་ཀྱི་ནུས་མཐུ་སྐལ་བ་ཞན། །ཚེ་འདིར་འཆི་བ་བསླུ་བའི་བྱིན་རླབས་ཀྱི། །གང་ལྟར་སྨོན་པ་ཐམས་ཅད་ཡིད་བཞིན་འགྲུབ། །འཆི་བདག་བཞིན་སྡུག་སྤངས་བ་ངོ་ཚས་སྐྱེངས། །གྲིབ་རིགས་སུམ་བརྒྱ་དྲུག་ཅུ་སྲིད་མཐའ་ཙམ། །གང་སྒྲུབ་ལྷ་ལ་དཀའ་ཚེགས་མེད་པར་འགྲུབ། །དེ་ལྟར་གདོལ་བའི་བྱ་སྤྱོད་ཀུན་བྲལ་བས། །མཾ་ས་ཐམས་ཅད་གསང་སྔགས་རྫས་སུ་འོས། །ནག་ཕྱོགས་དམར་ལ་དགའ་རྣམས་གོ་སྟོང་ཡིན། །རིམ་གྲོ་གང་བྱས་ཚད་འགྲོ་གནད་སྨིན་ཡིན། །གཞན་ཞིག་སངས་རྒྱས་ཉིད་ལ་མཆོད་པ་དང་། །བྱམས་པའི་སེམས་ཅན་གཅིག་ལ་བསྒོམ་པ་མཉམ། །གཞན་ལ་དགེ་བསྐུལ་སྲོག་གཅོད་སྤངས་བཅུག་ན། །གསོད་པའི་སེམས་དེ་འཆོས༵་པས་ཡོན་ཏན་དང་། །གཞན་ཞིག་སྲོག་གི་འཇིགས་པ་སྐྱོབ༵ས་པ་ནི། །དམ་པའི་ཆོས་སུ་ངེས་པར་འགྲོ་བ་ཡིན། །དེ་ལྟར་ཕན་བརྩོན་བྱང་ཆུབ་ད༵གེ་འདུན༵་བྱོན། །འདི་ནི་སང༵ས་རྒྱས༵་ཕྲིན་ལས་རྨད་དུ་བྱུང་། །ཨ་ལ་ལ་ཏེ་ངོ་མཚར་རྨད་དུ་བྱུང་། །དེས་ན་རྟག་ཏུ་སྲོག་གི་སྐྱབས་བཞིན་སྤེལ། །སྲོག་ལ་མི་འཇིགས་སྩལ་བའི་སྦྱིན་པ་དང་། །སེམས་ཅན་དོན་ལ་དགོངས་པའི་ཚུལ་ཁྲིམས་དང་། །གནོད་སེམས་སྤང་བར་བཟོད་པའི་དཀའ་ཐུབ་དང་། །གཅིག་ཏུ་རང་གཞན་དགེ་བསྐུལ་བརྩོན་འགྲུས་ཕྱིན། །བསམ་གཏན་སྐྱེ་བའི་བར་ཆད་ཀུན་ཞི་ཞིང་། །ཤེས་རབ་སྙིང་རྗེའི་རྒྱུད་དུ་ལེགས་འཁྲུངས་ནས། །ཚོགས་གཉིས་འབྲས་བུར་སྨིན་པའི་དགེ་མཚན་གྱིས། །དོན་གཉིས་ལྷུན་གྱིས་འགྲུབ་འགྱུར་ཨེ་མ་ཧོ། །ལྷག་པའི་ཀུན་རྫོབ་དེ་བཞིན་གཤེགས་པ་ལ། །ཁྲག་འབྱིན་སྤངས་པས་བཞུགས་པར་གསོལ་བཏབ་འདིའི། །ལྷག་པའི་ཆོས་སྐུ་དག་སྣང་རྒྱུད་འཁྲུངས་ནས། །ད་ལྟ་ཉིད་ནས་གསང་སྔགས་རྩེ་མོར་ཕྱིན། །སྲོག་ལ་མི་འཇིགས་བརྩལ་བའི་སྦྱིན་པ་དང་། །སྲོག་གཅོད་སྤོང་ཞེས་སྙན་པར་སྨྲ་བ་དང་། །དེ་དང་དོན་མཐུན་རང་གི་སྤྱོད་པ་དང་། །གཞན་དོན་སྤྱོད་ལ་དཀའ་ཚེགས་ཁྱད་གསོད་ཅིག །ཐབ༵ས་མཁས་མཛད་པས་བདག་གཞན་དོན་སྒྲུབ་ནས། །ཐ༵བས་ཤེས་ཟུང་འཇུག་སྒྱུ་འཕྲུལ་གར་རྩེན་པའི། །ཐ༵བས་མཆོག་འདིས་མཚོན་རྣམ་པ་སྣ་ཚོགས་ཀྱི། །ཐ༵བས་བྱུང་རྡོ་རྗེ་འཆང་གི་སྐུ་འགྲུབ་ཤོག །ཞེས་ཟེར་ནས་རི་མགོ་ཞིག་ཏུ་བྲོས་སོང་། །ཞེས་པ་འདི་ཡང་རྨོངས་པ་ག་ག་ཨ་བྷྱེས་སོ། །དགེའོ། །དགེའོ། །དགེའོ། །