བླ་མ་ཨོ་མུག་གི་ངོར་བྲིས་པ་སྐྱེ་མེད་རྡོ་རྗེའི་གླུ་དབྱངས།
བླ་མ་ཨོ་མུག་གི་ངོར་བྲིས་པ་སྐྱེ་མེད་རྡོ་རྗེའི་གླུ་དབྱངས་བཞུགས་སོ། །
ཡེ་ཤེས་ཁྱད་པར་ཆེ་བ་བཤད་པ་ནི། །རང་བྱུང་ཡེ་ཤེས་ཡེ་ནས་ཤེས་པ་ནི། །གཞན་བྱུང་རྣམ་པར་རྟོགས་ལས་ཁྱད་དུ་༡འཕགས། །ཡུལ་འཕྲོ་འདུ་མེད་པའི་རིག་པ་ནི། །ཡུལ་འཕྲོས་ལྟོས་པས་གཡོ་ལས་ཁྱད་པར་༢འཕགས། །ཕྱི་གསལ་ཡུལ་ཤེས་པ་ཡི་སེམས་ཉིད་ལས། །ནང་གསལ་གཉིས་ཆར་མཁྱེན་པས་ཁྱད་པར་༣འཕགས། །ཡུལ་མེད་ཙམ་ནས་འགགས་པའི་སེམས་ཉིད་ལས། །འགགས་མེད་ངང་གིས་གསལ་བས་ཁྱད་པར་༤འཕགས། །ཞི་གནས་རྟེན་ལ་གནས་པའི་སེམས་ཉིད་ལས། །ངང་གནས་རྒྱ་ཡན་ཆེན་པོའི་ཁྱད་པར་༥འཕགས། །རྟོག་བཅས་སྣ་ཚོགས་བསམ་པའི་སེམས་ཉིད་ལས། །རྟོགས་མེད་དྲན་བསམ་འཕོ་བྲལ་ཁྱད་པར་༦འཕགས། །རྟོག་མེད་ལུང་མ་བསྟན་པའི་སེམས་ཉིད་ལས། །ཐ་དད་སྒྲོ་འདོག་ཆོད་པས་༧ཁྱད་པར་ཆེ། །ང་རུ་ཞེན་པའི་བདག་འཛིན་སེམས་ཉིད་ལས། །འཛིན་པའི་གཉིས་ཆོས་བྲལ་བས་ཁྱད་པར་༨འཕགས། །བྱིང་རྒོད་རྨུག་པའི་དབང་གྱུར་སེམས་ཉིད་ལས། །རྒོད་རྨུག་དྲི་མ་མེད་པས་ཁྱད་པར་༩འཕགས། །དུག་གསུམ་རང་བཞིན་ལྡན་པའི་སེམས་ཉིད་ལས། །སྐུ་གསུམ་ཀློང་ནས་གསལ་བས་ཁྱད་པར་༡༠འཕགས། །དུག་ལྔའི་རྒྱུད་འཁྲུལ་འདུ་བྱེད་སེམས་ཉིད་ལས། །ཐུག་འཕྲད་རྣམ་ལྔ་གྲོལ་བའི་ཁྱད་པར་༡༡འཕགས། །བྱིང་ཆད་ཆད་རྟག་ཕྱོགས་ལྷུང་སེམས་ཉིད་ལས། །ཀ་དག་ལྷུན་གྲུབ་ཟུང་འཇུག་ཁྱད་པར་༡༢འཕགས། །དགག་སྒྲུབ་འཁྲུལ་བར་ཤར་བའི་སེམས་ཉིད་ལས། །འདོད་བློའི་འཁྲིས་ཟད་ནམ་མཁའི་ཁྱད་པར་༡༣འཕགས། །ཟང་མ་ཐལ་བྱུང་ཡུལ་ལ་མི་འདྲེས་པ། །ཟག་བཅས་ཡུལ་འདྲེས་དམིགས་ལས་ཁྱད་པར་༡༤འཕགས། །སྤྲོས་པ་མཐའ་རུ་ལྟ་བའི་དམིགས་པ་ལས། །ལྟ་མིན་གཞི་བྲལ་ཆེན་པོའི་ཁྱད་པར་༡༥འཕགས། །ཡེ་བབ་རང་སྟོང༵་མཚ༵ན་བྲལ་བརྗོ༵ད་མེད་པ། །ཡོད་འཛིན་མཚན་འཛིན་བརྗོད་ལས་ཁྱད་པར་༡༦འཕགས། །རྟག་ཆད་གཅིག་དང་དུ་མར་ངེས་པ་ལས། །དུ་བྲལ་རྗེན་པ་མཐའ་དག་ཁྱད་པར་༡༧འཕགས། །རང་བཞིན་བབ་ལས་གཡོས་པའི་སེམས་ཉིད་ལས། །ཀུན་ཁྱབ་བརྡལ་བ་ཉག་གཅིག་ཁྱད་པར་ཆེ། །ཡེ་ནས་མ་འཁྲུལ་ངོ་བོ་བསླད་མ་ཞུགས། །ཙམ་པོ་བ་མིན་གྲོལ་བའི་ཁྱད་པར་༡༨འཕགས། །ཡེ་ཤེས་མཁྱེན་པ་མ་འགགས་པས། །གཞན་ཕྱིར་བརྩེ་བའི་སྤྱོད་ལམ་དྲུག །ལ་སོགས་མ་འདྲེས་བཅོ་བརྒྱད་པོ། །འདི་ཡི་འདི་ལྡན་པ་ལས་སོ། །རང་བཞིན་བསམ་གཏན་བར་མེད་ལ། །འབྱམས་སུ་ཀླས་པའི་ཐབས་ཆེན་གྱིས། །ལྷག་མཐོང་རིག་པ་དེ་ཟིན་པ། །སྐྱོན་མེད་དག་པས་སྐྱོང་བར་བཤད། །ཞི་གནས་རྩེ་གཅིག་ནོར་བའི་སྐྱོན། །དེ་ཡང་བྱེད་རྩོལ་ལྟོས་མ་ལྟོས། །སྣང་བ་སྒྱུ་མ་ལྟར་རྟོགས་ནས། །ཤེས་པ་རང་ཡལ་རྗེས་མེད་དུ། །རིག་པ་ཟང་ཐལ་ལ་གནས་ན། །སྣང་ཤེས་རིག་པ་ཅོག་བཞག་གོ །སྤྲོ་བསྡུ་མེད་པའི་གཏིང་གསལ་དངས། །རིག་པ་ཆོས་ཉིད་ངོས་བཟུང་ནས། སྣང་བ་ཤར་པར་ཅེར་གྱིས་བཞག །དགོངས་པ་གཡོ་མེད་རི་བོ་བཞི། ༼ ཅོག་བཞག་བཞི།༽།བཀྲོལ་མ་དགོས་པས་རང་གྲོལ་བ། །སླད་ནས་མ་ཡིན་ཡེ་གྲོལ་བ། །༼ ཟིལ་གནོན་གསུམ་ཀྱང་དེ་ལ་ཟེར། ༽།བསལ་བཞག་མེད་པར་ཡོངས་གྲོལ་བ། །ཅེར་གྱིས་ཤར་བ་ཐོལ་གྱིས་གྲོལ། །མཐའ་གཞན་གཅིག་འདས་ཆེན་པོར་གྲོལ། །༼ གྲོལ་ལུགས་ལྔ། ༽དེ་ལྟའི་ཚུལ་དུ་བསྐྱང་བ་ན། །གྲོལ་འགྱུར་འདི་ལ་ཐེ་ཚོམ་མེད། །ག་གཱ་ཨ་བྷྱེའི་གང་དྲན་ལ། །ཚིག་ལ་མ་བསམ་རྐང་བཅད་དུ། །དུམ་ཆོད་དུམ་ཆོད་སྨྲས་པའོ། །དགེའོ། །
སྐུ་ལུས་སྐྱོན་གྱིས་མ་གོས་དགེ་ཚུལ་དཔལ་བཟང་གི་བཀོད་པ། །བཟླས་བརྗོད་ཆུ་ཀླུང་འདྲ་བ་དགེ་ཚུལ་དཔལ་བཟང་གི་བཀོད་པ། །ཐུགས་བསམ་སོལ་བའི་མདོག་འདྲ་དགེ་ཚུལ་དཔལ་བཟང་གི་བཀོད་པ། །ཕྱི་དཀར་ནང་ནག་སྣག་བུམ་དགེ་ཚུལ་དཔལ་བཟང་གི་བཀོད་པ། །བསྲུང་སྡོམ་སྲོག་ལྟར་བཙའ་བ་ཉན་ཐོས་དཔལ་བཟང་གི་རྣམ་ཐར། །ཐུན་འགོར་བྱང་སེམས་བསྐྱེད་པ་ཉན་ཐོས་དཔལ་བཟང་གི་རྣམ་ཐར། །ཐུན་མཐར་དམོད་པ་བོར་བ་ཉན་ཐོས་དཔལ་བཟང་གི་རྣམ་ཐར། །རྟག་ཏུ་བཟློག་པ་བྱེད་པ་ཉན་ཐོས་དཔལ་བཟང་གི་རྣམ་ཐར། །དབྱར་གསུམ་རྩ་རླུང་སྦྱང་བ་ཨ་ནུ་དཔལ་བཟང་གི་རྣམ་ཐར། །དགུན་གསུམ་ཤ་ཆེན་དགུ་བརྩེགས་ཨ་ནུ་དཔལ་བཟང་གི་རྣམ་ཐར། །རྟག་ཏུ་དྲོད་ཁུང་བསྙེགས་པ་ཨ་ནུ་དཔལ་བཟང་གི་རྣམ་ཐར། །རླུང་སེམས་འབྱོངས་ན་དགའ་བ་ཨ་ནུ་དཔལ་བཟང་གི་རྣམ་ཐར། །རི་ནས་སྡོད་འདོད་མེད་པ་བྱ་བྲལ་དཔལ་བཟང་གི་རྣམ་ཐར། །ཐུན་ལ་ལུས་གནད་མེད་པ་བྱ་བྲལ་དཔལ་བཟང་གི་རྣམ་ཐར། །སྒོམ་ལ་ནན་ཏན་མེད་པ་བྱ་བྲལ་དཔལ་བཟང་གི་རྣམ་ཐར། །ཨ་ཏིའི་རྣལ་འབྱོར་ཟེར་བ་བྱ་བྲལ་དཔལ་བཟང་གི་རྣམ་ཐར། །བལྟས་སྔར་ཆོས་བཞིན་འཆོས་པ་ཞི་དུལ་དཔལ་བཟང་གི་རྣམ་ཐར། །ནང་ནས་ཆོས་བརྒྱད་ཆེ་བ་ཞི་དུལ་དཔལ་བཟང་གི་རྣམ་ཐར། །གསང་བ་ལྷག་མ་མང་བ་ཞི་དུལ་དཔལ་བཟང་གི་རྣམ་ཐར། །འགྲོ་ན་ཐག་རིང་མི་ཆོད་སེམས་ཆུང་དཔལ་བཟང་གི་རྣམ་ཐར། །འདུག་ན་བློ་རྩ་རྩིང་བ་སེམས་ཆུང་དཔལ་བཟང་གི་རྣམ་ཐར། །ཅི་བྱའི་ངེས་བཟུང་མེད་པ་སེམས་ཆུང་དཔལ་བཟང་གི་རྣམ་ཐར། །གར་འདུག་གཏད་སོ་མེད་པ་སེམས་ཆུང་དཔལ་བཟང་གི་རྣམ་ཐར། །ཡོན་པོའི་ཤིང་སྐྱེན་འཆོས་ཕྱིར་ཕ་རྒན་ངས་བསྟན་ཡོད། །ལྟ་བ་ནམ་མཁའ་ལྟ་བུར་སྤྲོས་མེད་ཅིག་དགོས་སོ་དཔལ་བཟང་། །སྒོམ་པ་རྒྱ་མཚོ་ལྟ་བུར་རྟོག་མེད་ཅིག་དགོས་སོ་དཔལ་བཟང་། །སྤྱོད་པ་རི་བོ་ལྟ་བུར་གཡོ་མེད་ཅིག་དགོས་སོ་དཔལ་བཟང་། །འབྲས་བུ་སྟོན་ཐོག་ལྟ་བུར་སྨིན་པ་ཞིག་དགོས་སོ་དཔལ་བཟང་། །ཁྱེད་ལ་རེ་བ་ཆེ་བས་རྣམ་ཐར་མཚངས་ཐོག་ཏུ་བཞག་ཡོད་སྐུ་མཁྱེན། །དེ་ལྟར་སྐྱོན་སྤངས་རྟོགས་པ་མཐར་ཕྱིན་དེས་ཕ་ཡི་བུ་རྒོད། །ཅེས་ཀྱང་ག་གཱས་སོ། །