བླ་མ་ཨོ་མུག་ལ་སྤྲིང་བ།

བླ་མ་ཨོ་མུག་ལ་སྤྲིང་བ་ནི། སངས་རྒྱས་ཀུན་དང་འདུ་འབྲལ་མེད། །ཡེ་བབས་རིག་སྟོང་དོན་གྱི་ལྷ། །ཆོས་སྐུའི་མཁྱེན་བརྩེའི་རང་གཟུགས་པ། །བདུད་འཇོམས་རྡོ་རྗེར་ཕྱག་འཚལ་ལོ། །གང་གི་རྡོ་རྗེའི་གསུང་གསང་ལས། །ཟབ་དང་རྒྱ་ཆེ་ཐབས་ཤེས་རབ། །སྣ་ཚོགས་གཅིག་དུ་འདུས་པའི་ཆོས། །གཉིས་མེད་བསྩལ་བའི་དམ་ཚིག་གཅིག །ཁྱོད་ཀྱིས་བདག་ལ་དྲིས་པའི་ལན། །ཟག་མེད་མངོན་ཤེས་མི་ལྡན་ཕྱིར། །གསལ་ཉམས་ཤར་ཆ་ཙམ་པོ་བ། །ཕོ་རོག་དགོངས་པ་དེ་བསྟན་ན། །སྲིད་པ་ཁམས་གསུམ་འཁོར་བ་འདི། །རྨི་ལམ་ཙམ་ཞིག་ལུང་བསྟན་པ། །དེ་ལ་ངེས་པ་འཚལ་བ་ན། །ཤི་ཞེས་རྣམ་རྟོག་ནོར་བ་ཙམ། །ཤི་བའི་མཁན་པོ་ཞིག་མཆིས་ན། །དེ་ལ་འཆི་བ་ཡོད་གྲང་ན། །མཁན་པོ་མེད་པའི་སྐྱེ་ཤི་འདོད། །དེ་ནི་མོ་གཤམ་བུ་ལའོ། །སྐྱེ་བ་ཞེས་ཀྱང་ལོག་རྟོག་པ། །ཡོད་པ་སྐྱེ་བར་མི་འགྱུར་ཏེ། །མ་སྐྱེས་གོང་ནས་ཡོད་པའི་ཕྱིར། །མེད་པ་སྐྱེ་བར་མི་འགྱུར་ཏེ། །རི་བོང་རྭ་ལ་སྐྱེ་ཡོད་དམ། །ཡོད་དང་མེད་པ་གཉིས་ཡིན་དང་། །གཉིས་མིན་ཞེས་བྱ་མི་སྲིད་དེ། །ཡོད་པ་ཡིན་ན་མེད་པ་མིན། །མེད་པ་ཡིན་ན་ཡོད་པ་མིན། །ཡོད་པ་མིན་ན་མེད་པ་ཡིན། །མེད་པ་མིན་ན་ཡོད་པ་ཡིན། །དེ་ཕྱིར་སྐྱེ་བ་ཡོད་མིན་པས། །འཆི་བར་འགྱུར་བ་གང་ཞིག་ཡིན། །དེ་ལ་འཆི་བ་ཞིག་ཡོད་ན། །ནམ་མཁའི་མེ་ཏོག་རྒས་པར་ཐལ། །གལ་ཏེ་ད་དུང་མི་གོ་ན། །ཤི་ཞེས་བྱ་བ་ཅི་ལ་ཟེར། །འགགས་པར་འགྱུར་བ་ལྟ་ཞིག་ན། །ནམ་མཁའི་ཡིད་ཅན་ཐལ་བས་ཕྱུག ། འགགས་པ་མ་ཡིན་སྐྱེ་ཡོད་ཕྱིར། །རྟེན་ཅན་འབྲེལ་པའི་ཡུལ་མེད་ན། །ཤི་ཞེས་བྱ་བ་ཅི་ལ་ཟེར། །གལ་ཏེ་ཤི་རྒྱུ་ཞིག་ཡོད་ན། །གཟུང་འཛིན་འཁྲུལ་བ་འདྲ་མིན་པས། །དེ་ལས་སུ་ཡང་ཡོད་མི་འགྱུར། །ཆོས་རྣམས་མ་ལུས་ཐམས་ཅད་ནི། །ཡེ་གནས་སྤྲོས་བྲལ་ཆེན་པོ་སྟེ། །དེ་ཡི་ནང་ནས་ཆ་ཤས་ཀྱི། །འཆི་མཁན་རང་སྐྱ་ཐུབ་པ་ཞིག །ངས་ནི་ཀུན་ཏུ་མ་རྙེད་ཀྱང་། །ཁྱེད་ཀྱིས་རྙེད་ན་ང་ལ་སྟོན། །ཆོས་སྐུ་ཁྱབ་བདག་རིག་པའི་དབྱིངས། །སྐྱེ་འགགས་གནས་གསུམ་བྲལ་པའི་གཤིས། །རང་བཞིན་འོད་གསལ་ཆེན་པོ་ཉིད། །ཟང་ཐལ་རྟོག་བྲལ་ངང་གསལ་བ། །གསལ་ལ་སྟོང་པའི་ཁྱད་ཆོས་ཅན། །ཡེ་ཤེས་དྲི་མེད་རྗེན་པ་ནི། །ཉིད་ལ་ཆོས་སྐུའི་སྟོན་པ་དེའི། །དགོངས་བརྡ་སྙན་བརྒྱུད་གཅིག་རྫོགས་སུ། །རང་སྣང་ཚུལ་དུ་ཤར་བར་བྱས། །འདི་ནི་སངས་རྒྱས་ཉག་གཅིག་གི །རང་ཞལ་སྒྲིབ་པ་བྲལ་བའི་དངོས། །མཐོང་བཞིན་རང་གིས་རང་བསླུ་ན། །དེ་ལས་འཁྲུལ་བ་རྙེད་མི་འགྱུར། །དེ་ཕྱིར་གཟེབ་བཅུར་མ་ལྟུང་བས། །རང་གནས་རིག་པ་རླུང་སེམས་དང་། །བསམ་གཏན་ཉམས་ཀྱི་ཤུན་ཕྲོལ་ལ། །རང་རིག་ཚུལ་དུ་འབྱམས་ཀླས་ན། །རྣལ་འབྱོར་དབང་པོ་དེ་ལ་ཟེར། །མདོར་ན་སེམས་འདི་ཆོས་རྣམས་ཀུན། །བྱེད་པའི་རྒྱལ་པོ་ཡིན་པའི་ཕྱིར། །མདང་གི་རྨི་ལམ་འཁྲུལ་བ་ཀུན། །དེ་རིང་དབྱིངས་སུ་ཞིག་ནས་མེད། །དེ་རིང་འཁྲུལ་བའང་དེ་དང་འདྲ། །དེ་ཕྱིར་འཁྲུལ་བ་སེམས་ཀྱི་ཆོས། །ལྷུན་གྲུབ་རིག་པའི་རྩལ་ཉིད་ལས། །རོལ་བ་འགགས་མེད་ཆ་ཡིན་པས། །གཞི་མེད་རྩ་བ་བྲལ་བ་ནི། །བད་ཀན་ཅན་གྱི་སྐྲ་ཤད་དང་། །མཁྲིས་ནད་ཅན་ཀྱི་དུང་བཞིན་ནོ། །གང་ལྟར་ཤར་བའི་རྣམ་པར་རྟོག ། ཤར་སྟོང་མཚན་མ་བྲལ་བ་ནི། །ཀུན་བཟང་རིག་པའི་ཁྱད་ཆོས་ཆེ། །གང་ལྟར་ཚོར་བའི་དྲི་རྣམས་ཀུན། །ཚོར་སྟོང་མཚན་མ་བྲལ་བ་ནི། །ཀུན་བཟང་རིག་པའི་ཁྱད་ཆོས་ཆེ། །གང་ལྟར་མཐོང་པའི་གཟུགས་རྣམས་ཀུན། །མཐོང་སྟོང་མཚན་མ་བྲལ་བ་ནི། །ཀུན་བཟང་རིག་པའི་ཁྱད་ཆོས་ཆེ། །གང་ལྟར་ཐོས་པའི་སྒྲ་རྣམས་ཀུན། །ཐོས་སྟོང་ཆེན་པོའི་བདག་ཉིད་ནི། །ཀུན་བཟང་རིག་པའི་ཁྱད་ཆོས་ཆེ། །གང་ལྟར་མྱོང་དང་རེག་པ་ཀུན། །མྱོང་རེག་མཚན་མ་བྲལ་བ་ནི། །ཀུན་བཟང་རིག་པའི་ཁྱད་ཆོས་ཡིན། །གང་དུ་ཉོན་མོངས་དུག་ལྔ་ཀུན། །སྣང་སྟོང་གསལ་སྟོང་བདེ་སྟོང་དང་། །ཚོར་སྟོང་འགགས་མེད་བདག་ཉིད་དེ། །ཀུན་བཟང་རིག་པའི་ཡེ་ཤེས་ལྔ། །དེ་ཕྱིར་ཐུག་འཕྲད་རང་ ༼ ཡུལ་ཤེས་རིག་པ། ༽གྲོལ་གསུམ། །བཞག་ ༼ རྒྱ་མཚོར་སྣང་བ་ཅོག་བཞག་རིག་པ་ཆེར་བཞག་རི་བོ། ༽ ཐབས་བཞི་དང་ ༼ ཐོག་བབ། རྒྱས་འདེབས། རང་གནས། ༽ ཏིང་འཛིན་གསུམ། །གྲོལ་ལུགས་བཞི་དང་ལྡན་པ་དེ། །ལྷག་པའི་ལྟ་དགོངས་སྐྱོངས་ཤེས་ན། །འཆི་མེད་གཉུག་མ་ཆོས་སྐུའི་ཞལ། །བྱང་ཆུབ་སེམས་མཆོག་རིག་པ་ལས། །ཕྱོགས་བཅུ་དུས་བཞི་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་ནས་མ་ཚོལ་ཞིག །བཙལ་ཀྱང་དབྱིངས་ནས་མི་རྙེད་གསུངས། །དེ་ཚུལ་ཤེས་མཛོད་རྡོ་རྗེའི་གྲོགས། །དེ་ལྟར་བསྒོམ་པའི་སྐལ་ལྡན་ལ། །འཁྲུལ་འཁོར་རྩ་མ་ཆོད་པའི་རྟགས། །ཕྱི་སློང་ནང་སློང་གསང་བའི་སློང་། །ལྷ་འདྲེའི་ཆོ་འཕྲུལ་ཐན་ལྟས་ངན། །སེམས་ཀྱི་དགའ་སྡུག་འབྱུང་གསུངས་བ། །ཁྱེད་ཀྱི་ཐུགས་ལ་མངའ་བཞིན་པ། །ཁྱད་པར་མོ་རྩིས་སྨན་དཔྱད་འཁྲུགས། །མ་དག་བསྐལ་བ་ཞིག་ནས་ཀྱང་། །དག་དབྱིངས་དྭངས་མར་འཕོ་བའི་ལྟས། །དེ་དག་ཉམས་སུ་ཤེས་པ་ན། །ཉམས་ཀུན་རྨི་ལམ་བཞིན་ཡལ་ལོ། །ཤེས་ཉམས་བཅུ་དང་སྣང་ཉམས་ཚོགས། །ཐམས་ཅད་ཆོད་ན་རྣལ་འབྱོར་བ། །གཅོད་པ་ཞེས་བྱ་དེ་ལ་ཟེར། །ལྷག་མ་རོ་བཤའ་ཡིན་པའོ། །དེ་ཚུལ་དགོངས་ལ་རྣམ་རྟོག་དོར། །རྣམ་རྟོག་མ་རིག་ཆེན་པོ་སྟེ། །འཁོར་བར་ལྟུང་བྱེད་ཡིན་ཞེས་གསུངས། །དེ་ཕྱིར་རྣམ་རྟོག་སྤངས་བ་གང་། །འཁོར་པའི་གྲོང་ལས་དགོན་པར་ཕྱིན། །ཁྱད་པར་བླ་མེད་ཐིག་ལེ་ཆེ། །དབྱིངས་དང་རིག་པ་མངོན་གྱུར་ལམ། །བརྟེན་ན་འཆི་བདུད་བཅོམ་ནུས་པས། །སྣང་པའི་འཆི་བ་ཉི་ཚེ་བ། །འཇོམས་པ་འདི་ལ་ཐེ་ཚོམ་མེད། །མཐར་ཐུག་ཡེ་ཤེས་གསུམ་གྱི་དངོས། །མངོན་གྱུར་སྐལ་བ་ཁྱེད་ལ་མཛའ། །ང་ཡང་དེ་དུས་སླེབས་ནས་སུ། །ལྕང་ལོའི་ཟར་བུ་དཔྱང་བཞིན་དུ། །རིག་འཛིན་བླ་མའི་མཆོད་གྲྭལ་འཛིན། །ཨ་ཧོ་ཡེ། །ཀ་དག་གི་རང་ཞལ་རྗེན་པ་ཡི་ཆོས་སྐུ། །མངོན་གྱུར་གྱི་ངང་ལ་ཆམ་བརྡལ་དུ་ཞོག་དང་། །བྱ་བྱེད་རང་མི་དགོས་ལྷུན་གྲུབ་དུ་གསལ་བ། །དེང་དུས་ཀྱང་མ་ཉམས་མ་སྨད་པར་ཉེ་འདུག །བྱས་ཆོས་ཀྱི་རྙོགས་པའི་སྐལ་དམན་པའི་ལམ་གྱིས། །དྭངས་གསལ་གྱི་ཆུ་བོ་མཐོང་དུས་ཞིག་རློམ་པ། །ཐལ་རྩེད་དང་འདྲ་བའི་དོན་མེད་དེ་བོར་ལ། །རང་བབས་སུ་ལྷུག་དང་མཐོང་མེད་དེ་མཐོང་ཡོད། །དཀར་ནག་གི་སྤྲིན་གྱིས་ཉིན་བྱེད་མཆོག་འོད་ཟེར། །གཡུར་བག་ལ་ཤོར་དོགས་རྣལ་འབྱོར་བས་དགོས་སྐད། །དཀའ་ཐུབ་ཀྱི་སྤྱོད་པས་ཕྱག་བསྐོར་མང་བྱས་ཀྱང་། །དཀྱིལ་འཁོར་ལ་བརྙས་ཐབས་ཡང་དག་ཞིག་རེད་ཀོ །འབག་འབུག་གི་བཟླས་བརྗོད་གྲངས་ཀ་རེ་གཉེར་ཀྱང་། །འཇིགས་སྐྱོབས་ཀྱི་ཞེ་འདོད་རྣལ་མ་རུ་འདུག་གོ །ལྷ་བསྒོམ་གྱི་ང་རྒྱལ་བརྟན་པོ་སྟེ་བཟུང་བཟུང་། །ངར་འཛིན་གྱི་ཕུང་བའི་རྟོག་བཅས་ལས་མ་འདས། །སྐྱབས་ཡུལ་གཞན་བཙལ་སྙམ་འགྲོ་འདུག་གི་སེམས་པ། །འདུ་འཛི་དང་རྣམ་གཡེང་ལྟད་མོ་རུ་ངོ་མཚར། །བྱར་མེད་དུ་གནས་ལ་སྙེམས་བྱེད་བདུད་ལྡང་ངོ་། །ཞེན་མེད་ཀྱི་ངང་ནས་གཟུ་བོ་ཡི་རྣལ་འབྱོར། །ཆོས་མེད་རང་མ་ཡིན་བློ་བདེ་ཞིག་དགོས་སོ། །རྣམ་རྟོག་གིས་བསླུས་བསླུས་ནང་བདུད་ཀྱི་མཚངས་མང་། །སེམས་ཉིད་ཀྱི་རང་བཞིན་ནམ་མཁའི་ཁམས་སྤྲོས་བྲལ། །མ་རིག་གིས་བཅིངས་ཤིང་བདག་ཡོད་ལ་ཞེན་པ། །མ་ཆོད་ན་རྣལ་འབྱོར་ཟེར་བ་དེ་ཧོ་ཧོ། །གཞན་ཁྲེལ་དང་རང་ཉིད་ཡི་མུག་གི་སྣོན་མ། །གདམས་ངག་གི་ཆར་རྒྱུན་རྡོ་ཐོག་ཏུ་བབས་བབས། །ལོ་འབྲས་སུ་སྨིན་པའི་ཉེར་སྤྱད་ལ་རུང་འདོད། །གཞན་དག་གི་གནམ་པོར་འགྱུར་བ་ཞིག་དེ་ཀོ །རོ་སྙོམ་གྱི་གཅོད་ཡུལ་རེ་དོགས་ལ་འབེབས་ནུས། །རྒྱ་ཡན་གྱིས་སྤྱོད་པ་རང་བབས་སུ་རྣལ་བཞག །སྤྲོས་བཅས་དང་དམིགས་པ་ཀ་དག་སུ་ལྷུན་འབྱམས། །ཤར་སྟོང་གི་རོལ་བའི་ལྟས་མོ་ལ་མ་ཞེན། ཆུ་ཟླ་ལ་རྒན་པོའི་བློ་གྲོས་བཞིན་གཟུར་གནས། །ཆ་ལུགས་ཀྱི་འཆོས་ཚུལ་མཛེས་མཛེས་ཞིག་མེད་ཀྱང་། །སངས་རྒྱས་དེ་ལག་མཐིལ་རི་མོ་བཞིན་ལྡན་འདུག །ཁ་ཕོ་རང་ཆེ་བ་བརྒྱུད་པ་ཡི་ལན་རེད། །དོན་རྩ་ན་མེད་པ་ང་རང་གི་མཚངས་ཡིན། །བཤད་བཤད་ནི་སྙན་པ་བླ་རྒན་གྱི་དྲིན་ཡིན། །ཐུགས་ཁྲེལ་དེ་ཡོད་པ་བླུན་པོ་ཡི་ཚིག་ཞིག །ཁྱད་པར་དུ་གཞན་གྱིས་གོ་བདེ་ཡི་གྲོང་ཚིག །གོང་འོག་ནི་མི་འགལ་ཚིག་ཀ་ལ་རྟོན་མིན། །དོན་བཟང་ལ་རྟོན་དང་བློ་ལྡན་ཞིག་དེ་ལགས། ཞེས་རིག་འཛིན་ཆེན་པོ་བདུད་འཇོམས་རྡོ་རྗེའི་རིགས་ཀྱི་མྱུ་གུར་སྐྱེ་སྲིད་འཛིན་པ་ཀུན་བཟང་བདེ་ཆེན་རྡོ་རྗེ་དང་འཇིགས་མེད་སྒྲ་དབྱངས་རྒྱ་མཚོ་འཇམ་དཔལ་དགྱེས་པའི་རྡོ་རྗེ་སོགས་ཀྱི་བཀའ་འབངས་ཡོངས་ཀྱི་ཐ་ཤལ་བ་བསྟན་པའི་བླ་བཙོང་དུག་ལྔ་དབྱར་གྱི་ཆུ་རྒྱུན་ལྟར་འཕེལ་བ་ག་གཱ་ཨ་བྷྱེའི་རྡོ་རྗེའི་མཆེད་ལ་ཐུགས་གསལ་ཡིན། །དགེའོ། །མངྒ་ལཾ། །