ཆོས་སྐུའི་བླ་མས།

ཆོས་སྐུའི་བླ་མས། དེ་ལྟར་ཡུལ་སྣང་མེད་པའི་རང་བཞིན་ལྟར། །ཡུལ་ཅན་བྱང་ཆུབ་སེམས་ཀྱི་རང་བཞིན་ཡང་། །མེད་པའི་ངོ་བོ་ནམ་མཁའ་ལྟ་བུ་སྟེ། །སྨྲ་བསམ་བརྗོད་ལས་འདས་པ་ཤེས་པར་བྱ། །ཞེས་གསུངས་པས། རིག་པ་ཟང་ཐལ་བ་མཐོང་དུ་མེད་པའི་མཐོང་བ་ཆེན་པོ་དམིགས་མེད་རྟོག་བྲལ་རྗེན་པའི་ཡེ་ཤེས་ནི་ཀ་དག་ཕྱལ་བ་རང་གསལ་བའི་ཁྱད་ཆོས་དུ་མ་ཡོད་པས་སེམས་དང་ནོར་ས་མེད་ལ། དེ་ཉིད་ངོ་ཟིན་པའི་ངང་དེར་སྣང་སེམས་ཀྱི་སྤྲོས་པ་ཐམས་ཅད་རྒྱ་མཚོ་དྭངས་བ་ལ་གཟའ་སྐར་ཤར་བ་རྒྱ་མཚོ་ལས་མ་འདས་པ་ལྟར་ཆོས་ཉིད་རང་བྱུང་གི་ཡེ་ཤེས་ཀྱི་ངང་དུ་བཞག་པ་རྒྱ་མཚོ་ཅོག་བཞག་གི་དགོངས་པ། སྣང་བ་ཐམས་ཅད་རིག་པ་གཅིག་གི་ཀློང་དུ་བཞག་ནས་གཟུང་ཡུལ་ལ་འཛིན་པ་མ་འགྱུས་བཞག་པ་དེ་ཡང་ལུང་མ་བསྟན་མིན་པར་རིག་གེ་རྗེན་ནེ་བའི་ཆོས་སྐུ་ངོས་ཟིན་པའི་ངང་དུ་བཞག་པ་རིག་པ་ཅོག་བཞག །རིག་པ་དྭངས་པ་ལ་ཡུལ་ཤར་བ་ཐུགས་རྗེའི་རྩལ་མ་འགགས་པས་རྟོག་མེད་ཡིན་ཀྱང་། རིག་ཅིང་གསལ་བས་རྟོག་པར་འདྲ་བར་སྣང་ལ། སྤྲོ་བསྡུ་མེད་པར་རང་བབས་སུ་བཞག་དུས་ཆོས་ཉིད་ཀྱི་ངང་ལས་མི་འདའ་བ་ནི་སྣང་བ་ཅེར་བཞག །དགོངས་པ་ཆོས་ཉིད་རིག་པ་ལས་མི་གཡོ་བས་རྐྱེན་སྣང་ཆོས་ཉིད་ཀྱི་གསལ་འདེབས་སུ་དག་པའི་གདེངས་རྙེད་པ་རི་བོ་ཅོག་བཞག་གི་དགོངས་པའོ། །

༈ ཡང་སྣང་སེམས་གང་ཤར་ཤར་དུས་ནས་རིག་པའི་ཡེ་ཤེས་ཀྱི་ཕྱག་རྒྱས་ཐེབ་པ་རྒྱས་འདེབས་ཏིང་འཛིན་གྱི་དགོངས་པ། རྐྱེན་ཁར་ཤོར་བའི་གང་ཟག་གིས་སླར་རིག་པ་ཡུལ་བཙན་ཐབས་སུ་འབེབས་པ་ཐོག་བབ་ཏིང་འཛིན་གྱི་དགོངས་པ། །རང་གནས་ཀྱི་རིག་པ་འོད་གསལ་བའི་གཤིས་ལྟ་བསྒོམ་སྤྱོད་འབྲས་ལས་འདས་པས། མི་ལྟ་བས་ལྟ་བ། མི་སྒོམ་པས་སྒོམ་པ། མི་སྤྱོད་པར་བྱ་བྲལ། མི་སྒྲུབ་པས་འབྲས་བུ་སྟེ། རིག་པ་གཅིག་གི་ཆོས་ཉིད་ཀྱི་ངང་དུ་འབྱམས་སུ་ཀླས་པ་ནི་རང་གནས་ཀྱི་ཏིང་འཛིན་ཡེ་ནས་གནས་པའི་དགོངས་པ་ཤེས་པ་སྟེ། དེ་ལ་གདེངས་གྲོལ་ཐོག་ཏུ་བཅའ་བ་དང་འདི་གཉིས་ཀྱང་འབབ་སོ་གཅིག་སྟེ། རྣམ་རྟོག་རང་གི་རང་གྲོལ་བ་སྦྲུལ་གྱི་མདུད་པ་ལྟ་བུ་དབང་པོ་འབྲིང་གི་གྲོལ་བ་དང་རང་གནས་ཀྱི་ཏིང་འཛིན་དགོངས་པ་གཅིག་སྟེ། གང་ཡང་ཆོས་ཉིད་གཅིག་གི་རང་བཞིན་རྩལ་དང་རོལ་བའི་ཡོ་ལང་དང་ཆོ་འཕྲུལ་དུ་གནས་པ་དང་རྣམ་རྟོག་ཐམས་ཅད་ཀྱང་རང་བཞིན་གཞིའི་འོད་གསལ་ཡིན་པས་ངོ་བོ་བརྗོད་དུ་མེད་པར་མཉམ་པ་དང་། རང་བཞིན་འགགས་མེད་དུ་ཉམས་པའི་རང་གྲོལ་བར་ཤར་བའང་མཉམ་པའི་དང་། །རྒྱས་འདེབས་དང་ཕན་མེད་གནོད་མེད་དུ་གྲོལ་བ་མཉམ་སྟེ། གང་ཤར་ཐམས་ཅད་ལ་རིག་པ་ཉིད་བཞེངས་བཞུགས་ཀྱི་ཁྱད་པར་ལས་དོན་དུ་ཆུ་དང་རླབས་སུ་ཤར་བ་ལ་བཟང་ངན་མེད་པའི་ཟག་མེད་ཡེ་ཤེས་འདུས་མ་བྱས་པའི་སྤྱི་རྒྱས་བཏབ་པའི་བསལ་བཞག་དང་ཐོབ་ཤོར་མེད་པའི་ཁང་སྟོང་དུ་རྐུན་པོ་ཞུགས་པའི་གྲོལ་ཚུལ་དབང་པོ་རབ་ཀྱི་དང་། དབང་པོ་ཐ་མ་འོད་གསལ་ངོ་ཤེས་པས་གྲོལ་བ་སྔར་འདྲེས་ཀྱི་མི་དང་འཕྲད་པ་ལྟ་བུ་དང་ཐོག་བབ་ཀྱི་ཏིང་འཛིན་ཀྱང་གཅིག་ཏུ་འབབས་ཏེ་དེ་དུས་ཀྱི་འོད་གསལ་ལམ་རིག་པ་གཤིས་རང་བབ་ན་གནས་པ་ངོ་ཤེས་པའི་ངང་དུ་ཀློང་འབྱམས་པ་སྟེ། དེ་ལྟ་བུའི་རྣམ་རྟོག་ཐམས་ཅད་ཀྱི་ངོ་བོ་ཡེ༵་གྲོལ༵། །རང་བཞིན་རང་གིས་རང༵་གྲོལ༵་བ། །ཅེ༵ར་གྱི་མཐོང་སར་དུས་གཉིས་པར་མི་སྡོད་པར་གྲོལ༵་བས་མ་གྲོལ་བ་དང་གྲོལ་བའི་བསལ་བཞག་མེད་པར་མཐ༵འ་ནས་ཡོ༵ངས་སུ་གྲོལ༵་བ་དེ་དག་རིག་པ་གཅི༵ག་ཏུ་གྲོལ༵་བ་ཉིད་དུ་གདེངས་འཆའ་བ་ལས་གཞན་དུ་བློའི་མང་པོ་བཞག་པའི་རྗེས་སུ་བསྙེགས་ན་རྟོག་པས་སྔར་ཡང་འཁྲུལ། ད་ཡང་བཅིང་པར་འགྱུར་བའི་ཚུལ་ཤེས་པར་བྱས་ནས་རང་བབས་ཀྱིས་བསམ་གཏན་ཆུ་བོའི་རྒྱུན་གྱི་ཏིང་འཛིན་གྱི་སྐྱོངས་ཤེས་དགོས་པ་དེ་ལྟ་བུའི་གན༵ད་ཀྱི་གྲོལ༵་བའང་ཡེ་ཤེས་རང་རིག་པའི་ཚུལ་དུ་མཉམ་པར་བཞག་པའོ། །རྗེས་ཐོབ་ཀྱི་དུས་སུའང་དང་པོའི་ལས་ཅན་བྱ་བ་གང་བྱས་རིག་ཐོབ་ཏུ་གནས་བཞིན་ཞེན་མེད་རྨི་ལམ་ལྟ་བུར་བལྟས་ནས་སྐྱོང་། །གདེངས་ཐོབ་པ་ན་རི་བོ་ཅོག་བཞག་གི་ངང་ལས་འདའ་མི་སྲིད་པའི་ཁྱད་པར་ཤེས་པར་བྱའོ། །༈དེ་ལྟར་སྐྱོང་ལུགས་དང་གྲོལ་ལུགས་བཤད་པ་དེ་ཐམས་ཅད་རིག་པ་གཅིག་ཏུ་འགགས་བསྡམ་པའང་མུ་ཏིག་ཕྲེང་བ་ལས། །འདི་ནི་རྫོགས་པའི་སངས་རྒྱས་ཏེ། །ངོ་བོ་ཉིད་ལས་མ་གཡོས་པའོ། །ཞེས་རྟོག་བྲལ་ཟང་ཐལ་འོད་གསལ་བའི་རིག་ཆ་ཡེ་ཤེས་དེ་ངོས་ཟིན་ནས་ངང་ལས་མི་གཡོ་བ་ལ་གྲོལ་བ་ལྔ་དང་བཞག་ཐབས་བཞི་ཏིང་འཛིན་གསུམ་དང་བཅས་པ་ཡོངས་སུ་རྫོགས་པའོ། །ག་གཱས་སོ། །

སྐུ་གསུམ་ལམ་སྣང་དུ་སྦྱོངས་ནས་ད་ལྟ་རྟོགས་པའི་རྩལ་གསུམ་རྫོགས་ནས་མཐར་ལུས་རྒྱ་རལ་བ་དང་མཉམ་དུ་རང་བཞིན་བརྒྱད་ཅུའི་རྟོགས་༼ རྟོག་དཔྱད། ༽ཚོགས་འགགས་ནས་འཆི་སྲིད་གཞིའི་འོད་གསལ་ལ་ཐིམ་དུས་ཐུགས་རྗེ་ཉིད་རིག་ཙམ་ནང་དུ་གཡོས་ཏེ་སླར་ཡང་གཞི་སྣང་འཆར་བ་ན་སྲོག་རླུང་ཡན་ལག་བཞི་ལྡན་ཕྱིར་འཕགས་པས། ངོ་བོའི་གདངས་སྟོང་ལ་གོ་ཕྱེ་བའི་རྣམ་པར་ཡོད་པ་ལ། རང་བཞིན་གྱི་གདངས་འོད་ཀྱི་ཁྱིམ་གྱི་རྣམ་པ། ཐུགས་རྗེའི་རིག་གདངས་ཤེས་རབ་ཀྱི་རྣམ་པར་ཤར་བ་ན། སྐད་ཅིག་དེ་ཉིད་ལ་རང་སྣང་དུ་ངོ་ཤེས་པའི་ར༵ང་ངོ༵ར་སྣང༵་བའི་ཁྱད་ཆོས། དེ་དང་ལྡན་པའི་རིག་པ་ག༵ཞི་ལུང་མ་བསྟན་ལ༵ས་འཕ༵གས་པའི་ཁྱད་པར་དེ་ལྡན་པའི་སྟོབས་ཀྱི་གྲོལ་འཁྲུལ་གྱི་བྱེ༵་བྲག༵་ཕྱེད༵་པའི་ཁྱད་པར་ཁྱད་པར་བྱེད༵་པའི་ཐོ༵ག་ཏུ་གྲོལ༵་བ༵་དང་རྒྱུ་རྐྱེན་སྒྲ་དང་གཏན་ཚིག་གཞ༵ན་ལ༵ས་མ༵་བྱུང༵་ཞིང་རང་གི་ཀུན་གཞིའི་རྙོགས་པ་དྭངས་ནས་བྱང་ཆུབ་བླ་ན་མེད་པའི་རང༵་སར༵་གན༵ས་དེ་ཕྱིན་ཆད་འཁྲུལ་མི་ཤེས་པའི་ཁྱད་ཆོས་དྲུག་དང་ལྡན་ནོ། །ག་གཱས་སོ། །