རྗེ་བཙུན་བླ་མ་རིན་པོ་ཆེ་ཞི་བར་གཟིམ་པའི་གདུང་མདུན་ན་བདག་ཉལ་ནས་གཉིད་མ་ཟིན་པར་ཞག་གསུམ་དུ་ལོངས་པའི་ཐོ་རངས།

རྗེ་བཙུན་བླ་མ་རིན་པོ་ཆེ་ཞི་བར་གཟིམ་པའི་གདུང་མདུན་ན་བདག་ཉལ་ནས་གཉིད་མ་ཟིན་པར་ཞག་གསུམ་དུ་ལོངས་པའི་ཐོ་རངས་ན། ཀྱེ་མ་ད་ནི་གསེར་ཞལ་ཇི་ཞིག་མཇལ། །ཀྱེ་མ་ད་ནི་བསོད་ནམས་གང་ལ་བསགས། །ཀྱེ་མ་ད་ནི་རེ་ལྟོས་སུ་ལ་འཆའ། །ཀྱེ་མ་ད་ནི་བླང་དོར་སུ་ལ་དྲི། །ཀྱེ་མ་ད་ནི་དབང་བསྐུར་སུ་ལ་ཞུ། །ཀྱེ་མ་ད་ནི་འདྲེན་སྟོན་སུ་ཡིས་བགྱིད། །ཞེས་བརྒྱལ་སོང་ནས་ཅུང་ཞིག་ན་དྲིལ་བུ་ཞིག་གི་སིལ་སྒྲ་ཐོས་པའི་སྣང་བ་ཤར་བས་བརྒྱལ་སངས་བས། འོད་ལྔའི་དྲྭ་བ་འཁྲིགས་པའི་དབུས་ཐིག་ལེ་སྟོང་པའི་སྒྲོན་མ་ཞིག་གི་དཀྱིལ་དུ་སྐུ་སྔར་ལས་གཟི་བརྗིད་ཆེ་བ་ཞལ་འཛུམ་པའི་ཉམས་བག་ཅན་ཞིག་ཏུ་ཕྱག་གཉིས་རྡོ་རྗེ་དང་དྲིལ་བུ་བསྣམས་པ་མངོན་སུམ་དུ་བཞུགས་པར་སྣང་བའི་ཞལ་ནས་ཁྱོད་ཀྱིས་ཅི་བྱེད་དུ་ཡོད་པའང་གསུངས་པའི་མོད་ལ། བདག་གིས་ཅི་ཡང་ཞུ་མ་རྣལ་བར་ཞབས་སྤྱི་བོར་བླངས་ནས་མཆི་མ་བླགས་བཞིན་ཇེན་པ་ན། །བླ་མའི་ཞལ་ནས་ཨ་ཡ་ཨ་ཡེ་ང་ནི་སྔར་ནས་གར་ཡང་མི་གནས་ད་ལྟའང་གང་ནས་ཀྱང་མ་བྱོན་ཞེས་གསུངས་ནས། ཀྱེ་ཧོ་ང་ལ་ལུས་གཉིས་ཡོད་པ་ཡིན། །བཏགས་པའི་ལུས་ནི་སྒྱུ་མའི་འདོད་ཡོན་བཞིན། །ལས་སྨོན་དགེ་བའི་མིག་སྔར་སྣང་བ་ལས། །རང་བཞིན་བདེན་པར་འཛིན་པ་ཁྱོད་ཀྱིས་ནོངས།༡།དོན་དམ་ཡེ་ཤེས་ཆོས་སྐུ་མཁའ་ཁྱབ་ཕྱིར། །གསང་བ་བསམ་གྱིས་མི་ཁྱབ་རང་བཞིན་ཏེ། །ཆོས་རྣམས་ཀུན་གྱི་ཆོས་ཉིད་དེ་བཞིན་ཉིད། །འདི་ན་མི་སྣང་བྱ་བ་ཨ་རེ་འཁྲུལ།༢།ཡེ་ཤེས་སྒྱུ་མའི་ལུས་ནི་དུས་རྟག་པར། །འཕོ་འགྱུར་མེད་བརྟེན་རྡོ་རྗེའི་གདན་ལ་རོལ། །ངེས་པ་ལྔ་དང་ལྡན་པའི་རང་བཞིན་ལས། །འདའ་ཉམས་མེད་པར་མ་མཐོང་ཁྱོད་ཀྱིས་གོལ།༣།ང་ཡིས་བཏགས་གཟུགས་རྣམ་པ་ཐམས་ཅད་པས། །སྤྲུལ་པ་རྣམ་བཞིར་ཅིར་ཡང་འགོག་མེད་པར། །རྒྱུན་མི་འཆད་པར་རྟག་པའི་ཐུགས་རྗེ་ལས། །རིས་ཆད་ཕྱོགས་གཅིག་ལྟ་བ་ཉོན་རེ་མོངས།༤།ད་ལྟའང་འཚོ་གཞེས་གཟུགས་སྐུ་མང་ཡོད་ན། །མྱ་ངན་འདས་ཞེས་བྱ་བ་ཅི་ལ་བྱུང་། །ལར་ནི་གནམ་ཟླ་ལྟ་བུའི་ཡེ་ཤེས་ལུས། །དེ་ཡོད་དེ་ལ་བཤུམ་མོ་མི་དགོས་ཀྱིས། ༥།སྤྲུལ་པའི་ཆུ་ཟླ་བྱེ་བ་ཕྲག་གྲངས་མེད། །དེ་ཡོད་དེ་ལའང་དེ་བཞིན་རིག་མ་ཡིན། །ཆུ་ལ་དང་བོ་ཉིད་ཀྱི་ཟླ་བ་མེད། །མེད་བཞིན་ཡོད་མཐོང་སླར་ནི་འགགས་སོ་ཞེས། ༦།མི་ཤེས་བླུན་པོ་དག་བཞིན་འཛེར་ཞིང་འཕྲེང་། །མྱ་ངན་ཉམ་ཐག་འོ་དོད་ཅི་ཞིག་ཡིན། །མཁའ་ལམ་དབང་པོའི་གཞུ་ལ་བདག་ཏུ་རེ། །བྱིས་པ་རྣམས་ནི་ག་ཆད་རྒྱུག་བཞིན་ཀྱང་།༧།དེ་ཡི་རྣམ་པའང་ཕྱིར་ཞིང་ནུར་ནས་འགྲོ །བླ་མ་ཡུལ་གོལ་རེ་འཁེང་དེ་ཙམ་མོ། །འཁོར་འདས་ཆོས་ཀུན་སེམས་ཀྱི་རོལ་བའི་རྩལ། །དེ་ལ་ཐ་དད་མ་ལྟ་ཕ་ཡི་བུ།༨།རོ་གཅིག་བྱང་ཆུབ་སེམས་སུ་ཡེ་སངས་རྒྱས། །དེ་ལས་ཆོས་བདག་མ་ལྟ་ཕ་ཡི་བུ། །བླ་མ་གཞན་དུ་འཛིན་པའི་དག་སྣང་ཀྱང་། །ཤེས་བྱའི་སྒྲིབ་པས་ཡིན་ནོ་ཕ་ཡི་བུ།༩།གཞི་མེད་རྩ་བ་བྲལ་བའི་སྡུག་བསྔལ་མཁན། །གང་ཟག་བདག་ཏུ་མ་ལྟ་ཕ་ཡི་བུ། །དག་སྣང་བྱེད་པོ་ལྟ་ཞིག་གྲུབ་ནའང་། །ཉོན་མོངས་སྒྲིབ་པས་ཡིན་ནོ་ཕ་ཡི་བུ།༡༠།ང་ནི་སྒྲོ་བསྐུར་བྲལ་བའི་དགེ་སློང་སྟེ། །དེ་ལ་གཟུགས་སུ་བལྟས་ན་སྒྲོ་འདོགས་ཡིན། །ཚོར་སོགས་ལྷག་མའི་ཕུང་ཁམས་དེ་བཞིན་དེ། །སྣང་ཞེན་འཁྲུལ་བའི་ཚོགས་ལས་གྲོལ་བའོ།༡༡།ང་ནི་མི་གནས་པ་ཡི་ཡེ་ཤེས་ཡིན། །སྟོང་པའི་ཕྱོགས་སུ་ལྟ་ན་བསྐུར་འདེབས་དངོས། །ང་ནི་མཚན་མ་བྲལ་བའི་རྣམ་ཐར་ལ། །གཟུགས་སོགས་རྫས་སུ་འཛིན་པ་དེས་མི་མཐོང་།༡༢།ང་ནི་སྨོན་པ་མེད་པའི་རྣམ་ཐར་གྱི། །རང་ལ་གཞན་དུ་བལྟ་བ་དེའི་མི་མཐོང་། ། དམིགས་པ་ཡུལ་ཡིན་དད་པའི་རྣམ་པ་སེམས། །འདུས་པའི་བློ་ལ་སྙན་མིང་ཅི་བཏགས་ཀྱང་།༡༣།སྲིད་རྩའི་ཉེས་དམིགས་བདག་གཉིས་རྟོགས་ལས་བྱུང་། །ཁྱེད་ཅག་འཁོར་པ་ང་ཉིད་མྱང་འདས་སུ། །རེ་སྨོན་གཉིས་སྣང་མ་རིག་དུག་སྡོང་ལ། །སྨན་གྱི་ལོ་འབྲས་སྨིན་འདོད་ཨ་རེ་མཚར།༡༤།དེ་ལྟས་དེ་ལ་དད་མོས་མི་ཟེར་གྱི། །སངས་རྒྱས་མ་ལྟ་རང་གི་སེམས་ལ་ལྟོས། །ང་ནི་ཡེ་ནས་འདུས་མ་བྱས་པའི་ཕྱིར། །འདུས་བྱས་རྩོལ་སྒྲུབ་རྐྱེན་གྱི་ཁ་ན་མེད། ༡༥།རང་བྱུང་བྱང་ཆུབ་སེམས་ཀྱི་དཀྱིལ་འཁོར་ཡིན། །རང་ཉིད་སྟོར་ནས་རང་གིས་འཚོལ་བ་ཁྱོད། །ང་མཐོང་འབྲེལ་བའི་ཚད་མས་ཀྱང་ངེས་ཀྱི། །རྨི་ལམ་སངས་རྒྱས་རང་རྒྱུད་སར་ཡོད་ཅེས།༡༦།འཁྲུལ་སྣང་བདེན་འཛིན་བྱིས་པའི་རྣམ་ཐར་ཙམ། །ང་དང་གནམ་ས་ཙམ་དུ་རིང་པར་འགྱུར། །ཁྱོད་རང་བདེ་གཤེགས་སྙིང་པོའི་དབྱིངས་ཀྱི་གཟུགས། །ལས་སྨོན་བསོད་ནམས་སྒྲིབ་གསུམ་དག་པའི་རིམ།༡༧།སྔོན་དང་ད་ལྟ་ང་འདྲར་སྣང་བར་ཟད། །དེ་ལས་ཐ་དད་འཛིན་པ་བློ་རྒྱ་ཆུང་། །བལྟམས་བཞུགས་གྲོངས་བར་སྣང་བའི་ཚུལ་མཐོང་བློས། །མྱ་ངན་འོ་དོད་བོས་པས་སུ་ཞིག་འོང་།༡༨།རང་གདངས་རང་དང་འདུ་འབྲལ་མ་མཆིས་ཀྱི། །འདུས་བྱས་མཐའ་བཞིར་འཁྲུལ་བས་ཅི་ཞིག་ལྟོ། །གལ་ཏེ་སངས་རྒྱས་ཡུལ་དུ་གྲུབ་ཞིག་ནས། །དམྱལ་བ་རྣམས་ཀྱི་འོ་དོད་བོས་པའི་སྒྲིབ།༡༩།རྣམ་མཁྱེན་ཐུགས་རྗེས་མ་བཟུང་ཅི་ལ་ཡིན། །དེ་བས་རང་སྣང་དག་དང་མ་དག་ལན། །རང་སྣང་དག་ན་དག་པ་རབ་འབྱམས་ཏེ། །སྣང་སྟོང་དབྱེར་མེད་རྡོ་རྗེ་བླ་མའི་སྐུ།༢༠།གྲགས་སྟོང་ཟུང་འཇུག་རྡོ་རྗེ་རྒྱལ་པོའི་གསུང་། །དྲན་སྟོང་རོ་གཅིག་རྡོ་རྗེ་སྙིང་པོའི་ཐུགས། །ཐམས་ཅད་སྐུ་གསུང་ཐུགས་ཀྱི་འཁོར་ལོར་གྲོལ། །ཐམས་ཅད་སྐུ་གསུང་ཐུགས་ཀྱི་རྒྱན་དུ་ཆེ།༢༡།ཐམས་ཅད་སྐུ་གསུང་ཐུགས་ཀྱི་ཕྲིན་ལས་ཀྱིས། །གསུང་ལྔའི་ཆོས་འཁོར་མ་བསྐོར་ཅི་ཞིག་ཡོད། །མ་དག་སྣང་བའང་དོན་ལ་ཚད་མིན་ཏེ། །ང་ཡི་གསང་བ་གསུམ་ལ་གཟུང་འཛིན་གྱིས།༢༢།གོལ་སྒྲིབ་ཐག་ཁྲར་སྦྲུལ་མཐོང་ཇི་བཞིན་དུ། །དོན་ལ་མཐོང་དང་མཐོང་བློ་གཉིས་ཀ་འཁྲུལ། །དེ་བས་མ་བཅོས་དོན་གྱི་རྣལ་མ་ལ། །ལྟ་དང་བལྟ་བྱ་མེད་པར་ཆམ་གྱིས་ཞོག༢༣།ངོ་བོ་ཆོས་སྐུའི་བླ་མའི་དགོངས་བརྒྱུད་འཕོ། །སྤྲོས་བྲལ་བློ་ལས་འདས་པའི་རྟོགས་པ་འཆར། །དབྱེར་མེད་རོ་གཅིག་བྱང་ཆུབ་རང་དོན་གྲུབ། །སྒོམ་དང་ཡིད་དཔྱོད་མེད་པར་ངང་དངས་བཞག༢༤།རང་བཞིན་ལོངས་སྐུའི་བླ་མའི་བརྡ་བརྒྱུད་ཐོབ། །སེམས་བྲལ་ཡེ་ཤེས་དཀྱིལ་འཁོར་མཐའ་ཀླས་འཆར། །ཐེག་ཆེན་ཆོས་ཀྱི་རྒྱལ་སྲིད་དེ་ལ་དབང་། །སྤང་བླང་རེ་དོགས་མེད་པའི་རང་གྲོལ་ཞོག །༢༥།ཐུགས་རྗེས་སྤྲུལ་སྐུའི་བླ་མའི་ཚིག་བརྒྱུད་ཐོབ། །རྩོལ་མེད་རང་བྱུང་ཕྲིན་ལས་རབ་འབྱམས་ཀྱིས། །མཐའ་ཡས་མཁའ་ཁྱབ་འགྲོ་དོན་ལྷུན་གྲུབ་འབྱུང་། །ང་ཉིད་ཁྱོད་ཡིན་ཁྱོད་ཀྱང་ང་ཡིན་ཏེ།༢༦།སྲིད་ཞིའི་བདེ་སྡུག་བཟང་ངན་འཁྲུལ་པའི་ཆོས། །ཐེག་གཅིག་དབྱེ་བ་མེད་པའི་དགོངས་ཀློང་དུ། །ཕྱམ་གྲོལ་གདལ་ཡངས་ཆེན་པོར་ཨ་ཨཱཿཕཊཿ༢༧