རྟོགས་པའི་ཐོལ་གླུ་དཔའ་བོ་མཁའ་འགྲོ་དགྱེས་པའི་གད་མོ།
རྟོགས་པའི་ཐོལ་གླུ་དཔའ་བོ་མཁའ་འགྲོ་དགྱེས་པའི་གད་མོ་ཞེས་བྱ་བ་བཞུགས་སོ༔
ཨེ་མ་ཧོ༔ ཚོགས་སྨོན་ལས་འཕྲོ་བཟང་པོའི་རྒྱུ་རྐྱེན་གྱིས་བསྐྱེད་པའི༔ དལ་འབྱོར་ཕུན་སུམ་ཚོགས་པའི་ཞིང་བཟང་ཞིག་རྙེད་ནས༔ སྐུ་གསུམ་དམིགས་མེད་ཐུགས་རྗེའི་སྤྲིན་ཆེན་ལས་ཐོན་པའི༔ ཐེག་གསུམ་གྲུ་ཆར་རིགས་ཁམས་ས་བོན་ལ་ཐེབ་ཕྱུང་༔ རང་རིག་དོན་གྱི་གསང་ཆེན་ཀུན་བཟང་གི་ཆོས་སྐུ༔ རང་མདངས་སྒྱུ་འཕྲུལ་རྡོ་རྗེའི་བླ་མ་རུ་ཤར་ནས༔ འགགས་མེད་གསུངས་འདིའི་སྣང་བའི་དབང་ཁྲིད་ཀྱི་མཐུ་ལས༔ གཞི་རིག་བྱང་ཆུབ་ཆེན་པོའི་སྨིན་བྱེད་དུ་ཐལ་ལོ༔ ལྟ་བས་འཁོར་འདས་དབྱེར་མེད་དག་མཉམ་རིམ་རྟོགས་ནས༔ བསྒོམ་བྱུང་སྣང་བ་རྣམ་འབྱེད་རང་དབང་ཀྱང་བརྙེས་ཤིང་༔ དེ་རིང་ཕུན་ཚོགས་ལྔ་ལྡན་ཚོགས་སྒྲུབས་སུ་ཞུགས་ཏེ༔ བསོད་ནམས་ཡེ་ཤེས་ཚོགས་གཉིས་དུས་གཅིག་ལ་འདུམ་ཕྱིར༔ སྣང་སྟོང་ཐབས་ཤེས་ཐིག་ལེའི་ཟབ་མོ་དབང་མཆོག་མཐུའི༔ མགོན་པོ་ལྔ་ཡི་རང་བཞིན་ཕྱི་ནང་གི་དཀྱིལ་འཁོར༔ ཉི་ཁྲི་ཆིག་སྟོང་འབབས་པ་སྒྲ་གཅན་ལ་ཐིམ་ནས༔ རླུང་གི་འགྲོས་ཀྱིས་སྣང་བའི་ཡེ་ཤེས་འདི་མཚར་རོ༔ ཁམས་གསུམ་ཞིང་བསྒྱུར་དུག་གསུམ་རྩི་བསྒྱུར་གྱི་བདུད་རྩི༔ དང་དུ་བླངས་བའི་དམ་ཚིག་རིགས་ལྔ་ཡི་བརྟུལ་ཞུགས༔ འདོད་ཡོན་ལྷ་མོའི་འཇོ་སྒེག་ནམ་མཁའི་མཛོད་རྣམ་རོལ༔ སྣང་སྲིད་གཞིར་བཞེངས་འབྱོར་ལྡན་ཡོ་བྱད་ཀྱི་ཚོགས་འཁོར༔ ཚིམ་པ་དྲུག་ལྡན་བདེ་ཆེན་དགའ་སྟོན་དེའི་མཐུ་ལས༔ གཞི་རྒྱུད་བདེ་གཤེགས་སྙིང་པོ་སྐུ་གསུམ་གྱི་དཀྱིལ་འཁོར༔ མ་རྟོགས་ཡེ་ཤེས་ལྷ་ཚོགས་གཞན་བཟུང་གི་གོལ་རྟོག༔ རང་རིག་སྒྱུ་འཕྲུལ་དྲྭ་བའི་འཁོར་ལོ་རུ་སྨིན་ནས༔ རྣམ་སྨིན་སྐྱེས་ཀྱི་ཕུང་ཁམས་སྐྱེ་མཆེད་ལ་བརྟེན་བཞིན༔ རྣམ་དག་སེམས་ཉིད་ཕྱག་རྒྱ་ཆེན་པོར་ནི་མངོན་པ༔ དངོས་གྲུབ་ལྷ་ཡི་ཚོགས་འཁོར་དམ་པ་ཞེས་དེ་ཀོ༔ ད་ནི་རིག་པ་འཛིན་པའི་གྲྭལ་འགོ་ལ་གནས་སོ༔ ལས་ཅན་རྣལ་འབྱོར་ཐབས་ཤེས་ཟུང་འཇུག་གི་ལྷ་སྐུ༔ དཔའ་བོ་དཔའ་མོར་ཡེ་ནས་རང་གྲོལ་གྱི་ངོ་བོ༔ དེ་རིང་རྗེས་དཔག་རྟགས་དང་གཏན་ཚིག་ལས་འདས་པར༔ མངོན་གྱུར་སྐལ་ལྡན་མི་ཡི་ཚོགས་འཁོར་དེ་ཚར་ཕྱིན༔ རྩ་རླུང་ལས་སུ་རུང་བའི་ཐབས་ལྡན་པའི་སྤྱོད་པ༔ གསུམ་པའི་དབང་གི་ཉམས་ལེན་དབབ་ལྡོག་གིས་མཐུ་ཡིས༔ དཔེ་ཡི་འོད་གསལ་མྱོང་བའི་ཤིང་རྟ་ལས་དྲངས་ནས༔ རང་བཞིན་ལྷན་ཅིག་སྐྱེས་པའི་རང་ཞལ་ཀྱང་མཇལ་བྱུང་༔ སྣང་སྲིད་ལྷ་སྐུར་སྨིན་པ་བསོད་ནམས་ཀྱི་ཚོགས་ལས༔ ཆོས་སྐུ་ཕྱག་རྒྱ་ཆེན་པོ་ཡེ་ཤེས་ཚོགས་མཐར་ཐུག༔ ཡེ་རྫོགས་སྐུ་གཉིས་འཕྲལ་དག་དེ་རིང་གི་སྐལ་བཟང་༔ འདི་ལས་གཞན་ཞིག་ནམ་ཡང་བརྗོད་གཞི་ཡི་དབུལ་སོང་༔ ཨ་ཧོ་ཡེ༔ དེ་སྔོན་མ་དག་སྒྱུ་མའི་བརྫུ་བག་གི་རོལ་བའི༔ འདོད་ཡོན་སྒེག་མོའི་བཞིན་རིས་བསླུ་བྲིད་ལ་མཁས་ཀྱང་༔ དེ་ནི་ཡེ་ཤེས་རྒྱན་གྱི་འཁོར་ལོ་རུ་རྫོགས་སངས༔ འདོད་ཡོན་སོ་ན་མི་འདུག་ཆ་མེད་དུ་དེངས་སོང་༔ ང་བདག་ཀུན་དཀྲིས་དམ་པོའི་འཆིང་བ་ཞིག་ཡོད་དེ༔ འཆིང་བྱ་འཆིང་བྱེད་འཆིང་ཡུལ་མཁན་པོ་རང་མ་རྙེད༔ མ་བཀྲོལ་རང་གྲོལ་ཡེ་གྲོལ་ཆེན་པོ་རུ་གྲོལ་ནས༔ བདག་འཛིན་སོ་ན་མི་གནས་ཆ་མེད་དུ་དེངས་སོང་༔ འདོད་ཆགས་ཞེ་སྡང་གཏི་མུག་ང་རྒྱལ་དང་ཕྲག་དོག༔ བག་ཉལ་ཀུན་ནས་སྡང་བའི་མཚན་ཉིད་ཞིག་ཡོད་དེ༔ རང་བྱུང་ཡེ་ཤེས་ལྔ་ལྡན་དཀྱིལ་འཁོར་དུ་དག་ནས༔ ཉོན་མོངས་སོ་ན་མི་གནས་ཆ་མེད་དུ་དེངས་སོང་༔ ངམ་འབྲོག་གཡང་ས་རིགས་དྲུག་སྙིགས་མ་ཡི་གནས་ངན༔ སྡུག་བསྔལ་གཅོང་རོང་ཟབ་མོའི་ལྟུང་གནས་ཤིག་ཡོད་དེ༔ རང་སྣང་དོན་གྱི་འོག་མིན་ཆེན་པོ་རུ་གྲོལ་ནས༔ གནས་རིས་སོ་ན་མི་འདུག་ཆ་མེད་དུ་དེངས་སོང་༔ རྣམ་སྨིན་སྡུག་བསྔལ་སྙིགས་མ་འབྱུང་འདུས་ཀྱི་ གཡར་ཁང ་༔ ཟག་བཅས་འདོར་ལེན་སྒྱུ་མའི་ལུས་པོ་ཞིག་ཡོད་དེ༔ དབྱིངས་ལྔ་བདེ་ཆེན་ཡུམ་གྱི་དཀྱིལ་འཁོར་དུ་གྲོལ་ནས༔ ཕུང་པོ་སོ་ན་མི་གནས་ཆ་མེད་དུ་དེངས་སོང་༔ སྐྱེ་འགགས་རྒྱུ་རྐྱེན་འབྲེལ་བའི་ཚོགས་བརྒྱད་ཀྱི་རྟོག་པ༔ འགྱུར་བཅས་ཟུག་རྔུའི་རྩེན་པའི་སེམས་སྣང་ཞིག་ཡོད་དེ༔ ཆོས་སྐུ་གཞི་ལྡན་ཆེན་པོའི་དགོས་པ་རུ་གྲོལ་ནས༔ སྣང་སེམས་སོ་ན་མི་འདུག་ཆ་མེད་དུ་དེངས་སོང་༔ བདག་སྣང་ལོག་རྟོག་ངན་པས་བཅོས་མ་ཡི་གཟུགས་བརྙན༔ གཞན་སྣང་དམུ་རྒོད་འཁྲུལ་བའི་སེམས་ཅན་ཞིག་ཡོད་དེ༔ རིག་འཛིན་སྨིན་པ་རྒྱ་མཚོའི་དཀྱིལ་འཁོར་དུ་དག་ནས༔ རྒྱུད་ལྔ་སོ་ན་མི་གནས་ཆ་མེད་དུ་དེངས་སོང་༔ ས་ལམ་ཏིང་འཛིན་རྟོགས་པའི་ཡོན་ཏན་གྱི་རྣམ་གྲངས༔ ལྟོས་བཏགས་དག་པའི་རྟེན་ཅིང་འབྲེལ་འབྱུང་ཞིག་ཡོད་དེ༔ ཅིག་ཆོད་བློ་རིམ་གྲོལ་བས་ཆོས་ཟད་ལ་སླེབས་ནས༔ ཉམས་རྟོགས་སོ་ན་མི་འདུག་ཆ་མེད་དུ་དེངས་སོང་༔ ཉོན་མོངས་ཟག་པ་ཟད་པའི་རྟེན་མེད་ཀྱི་མཁའ་ལ༔ ཁམས་གསུམ་དབང་མེད་ཟག་པའི་ཉམ་ང་ཡི་གཡང་སྟོང་༔ ལུས་ལྔའི་ཟག་པ་ཕྱག་རྒྱ་ཆེན་པོ་རུ་སྲ་ཡས༔ འདི་ཡང་ངོ་མཚར་རྨད་བྱུང་རྣལ་འབྱོར་པའི་ཁྱད་ཆོས༔ ད་ནས་ཐོད་རྒལ་འབྱུང་བའི་ཆོས་གསུམ་རང་ལྷག་ནས༔ འདོད་ན་ཞག་བཅུའི་བྱང་ཆུབ་ཡོན་ཏན་ཚོར་དབང་བསྒྱུར༔ ཚོམ་བུ་ཕྱམ་གཅིག་ཐོགས་མེད་གཞན་དོན་ལ་ཆས་འགྲོ༔ འཁོར་བ་དོང་སྤྲུགས་རྟེན་དེ་རིང་ནས་འགྲིགས་བྱུང་༔ དགའ་འོ་ལྷན་སྐྱེས་བདེ་ཆེན་ཐོབ་པ་ངས་དགའ་བ༔ སྐྱིད་དོ་ཟག་མེད་དབྱིངས་ལ་འཕྱོ་བ་འདིའི་སྐྱིད་པ༔ བདེའོ་འཁོར་བའི་མྱ་ངན་སངས་པ་འདི་བདེའོ༔ འཚེངས་སོ་བཅོམ་ལྡན་གདན་སར་འཁོད་པ་འདིའི་འཚེངས་སོ༔ འགྱུར་མེད་རྡོ་རྗེ་ལྟ་བུའི་གངས་ཆེན་པོར་འགྱིངས་ཤིང་༔ བསྙིལ་མེད་རྐང་བ་བརྒྱད་པའི་སྙེམས་པ་དེ་འཆང་ནས༔ འཛད་མེད་ཆུ་སྤྲིན་ལ་ ༼ སྤྲིན་ལྟ་བུའི་སེམས་བསྐྱེད་མཆན། ༽དཀྱུའི་དུས་རྔ་དང་བརྩེ་བཞིན༔ འཇིགས་མེད་སྒྲ་དབྱངས་ཆེན་པོའི་གདུགས་ཞོ་ཞིག་ལོས་ཕབས༔ ཀུན་རྨོངས་ཁྲི་མུན་ཁྲོད་ན་ལས་ཉོན་གྱིས་བཅིངས་ཏེ༔ བཟོད་མེད་བཙོན་སྡུག་ཕ་མ་མཁའ་མཉམ་གྱིས་སེམས་ཅན༔ དགའ་བའི་གར་བསྒྱུར་རྩེ་བྲོའི་གླུ་ཆུང་ཞིག་སྒྲོགས་དང་༔ མི་འཇིགས་དབུགས་དབྱུང་ཆེན་པོ་རྣལ་འབྱོར་ངས་སྩལ་ཡོང་༔ དབྱིངས་བཞུགས་རྟོགས་པ་མངོན་གྱུར་འབྱོན་བཞུགས་ཀྱི་སངས་རྒྱས༔ འགྲོ་བའི་སྡུག་བསྔལ་གཟིགས་པས་ཐུགས་ངལ་དེ་ཐོངས་དང་༔ ད་ནས་ཕྲིན་ལས་རྫོགས་པར་ངེད་ཅག་གིས་བསྒྲུབ་གཏོང་༔ མཐུན་འགྱུར་བྱིན་རླབས་མེ་ཏོག་སྤྱི་བོ་རུ་སྩོལ་ཤོག༔ དེ་ལྟར་སྙན་འགྱུར་གླིང་བུའི་གླུ་དབྱངས་སུ་བླངས་པས༔ རྒྱལ་བའི་ཞིང་ཁམས་རྒྱ་མཚོར་སྙན་སྤྲིན་གྱི་རོལ་མོའི༔ བསྟོད་དབྱངས་ཕྱོགས་དུས་གནས་སྐབས་ཐམས་ཅད་པར་ཁྱབ་འབྱུང་༔ ཆོས་ཉིད་རང་སྒྲའི་མཆོད་པས་དགྱེས་སྐོངས་སུ་གྱུར་ཅིག༔ ཐེག་ཆེན་དམ་པའི་ཆོས་ཀྱི་རྒྱལ་རྔ་རུ་བརྡུང་བས༔ འགྲོ་ཀུན་མ་རིག་མལ་དུ་དུབ་པ་ལས་བསླང་ནས༔ ཡང་དག་བདེན་པའི་དོན་གྱིས་གསང་ལམ་དུ་བཀོད་དེ༔ འགོགས་བདེན་མཐར་ཐུག་མྱུར་ཐོབ་འཁོར་ལོ་རུ་གྱུར་ཅིག༔ འདིར་འཚོགས་རྩ་གསུམ་རྡོ་རྗེའི་མཆེད་ལྕམ་དང་བཅས་པའི༔ སྐུ་གསུང་ཐུགས་ལ་མཉེས་པའི་མཆོད་སྤྲིན་དུ་འཇོ་བའི༔ བྱིན་རླབས་དངོས་གྲུབ་བདུད་རྩིའི་དུས་ཆར་གྱི་མཐུ་ལས༔ ཉམས་རྟོགས་མྱུ་གུའི་གེགས་སྒྲོལ་སྨིན་བྱེད་དུ་གྱུར་ཅིག༔ ཆོས་ཅན་རྟེན་འབྲེལ་འཁྲུལ་འཁོར་འདུས་བྱས་དང་འཁོར་བ༔ མཉམ་གྲོལ་འདུས་མ་བྱས་པ་ལྷུན་གྲུབ་ཀྱི་སྦུབས་སུ༔ ཁྱད་ཆོས་དྲུག་ལྡན་གཞོན་ནུ་བུམ་པའི་སྐུར་མཉམ་གྲོལ༔ མངའ་དབང་རྫོགས་པའི་ཀུན་བཟང་གཏན་སྲིད་ལ་འགོད་འགྲོ༔ ཅེས་ཀྱང་ཤེས་རབ་བློ་འཕེལ་དང་། པདྨ་བློ་གྲོས་ཟུང་གིས་བསྐུལ་བ་ལ་བརྟེན་ནས་དབུ་ཙམ་བཙུག་པ་ལ། རྡོ་རྗེ་འཛིན་པ་ཆེན་པོ་འགྱུར་མེད་རྣམ་པར་རྒྱལ་བ་ནས་ཀྱང་ལེགས་སོའི་མཐུན་འགྱུར་དང་དབུགས་དབྱུང་ཐོབ་པ་ལས་སྒྱིད་སྙོམས་ལེ་ལོ་སྤང་ནས་ཚིག་རིས་ལ་སྤངས་བླང་མེད་པར་ཐོལ་བྱུང་དུ་དུས་མཐའི་སྔགས་མིང་ག་ག་ཨ་བྷྱེས་གླུར་བླངས་པ་མ་བཅོས་པའི་དོ་ཧ་ཞིག་གོ །སརྦ་མངྒ་ལཾ། །