རྩ་རླུང་སྤྱི་ལ་ཕན་པའི་གནད་ཀྱི་ཆིངས།
རྩ་རླུང་སྤྱི་ལ་ཕན་པའི་གནད་ཀྱི་ཆིངས་བཞུགས་སོ། །
དཔལ་མཁའ་འགྲོའི་དབང་ཕྱུག་ལ་ཕྱག་འཚལ་ལོ། །རྣམ་ཀུན་མཆོག་ལྡན་སྟོང་བ་དམ་པ་དང་། །དབྱེར་མེད་ལྷན་ཅིག་སྐྱེས་པའི་བདེ་བ་ཆེ། །ཕྱི་ནང་གཞན་གསུམ་དཀྱིལ་འཁོར་འཁོར་ལོར་ཤར། །རང་རིག་དོན་གྱི་བླ་མ་ལ་ཕྱག་འཚལ། །སྐུ་གསུམ་སྟོན་པའི་རྣམ་པར་ཡོངས་བཀོད་དེ། །ཐེག་གསུམ་དམ་པའི་ཆོས་འཁོར་བསྐོར་བ་ལས། །གསང་མཆོག་བླ་མེད་རྣལ་འབྱོར་ཆེན་པོ་ཡི། །སྣང་བཅས་སྣང་མེད་ཟུང་འཇུག་རྫོགས་རིམ་དོན། །ཕ་མ་གཉིས་མེད་རྒྱུད་ཀྱི་བཀའ་སྲོལ་ལས། །རིམ་ལྔ་སྦྱོར་དྲུག་ཆོས་དྲུག་ལ་སོགས་བའི། །གསར་རྙིང་བརྒྱུད་པའི་མན་ངག་ཕྱག་བཞེས་ཚུལ། །ཀུན་གྱི་གནད་གསང་རྡོ་རྗེ་གཏུམ་མོར་འདུས། །རྡོ་རྗེའི་གནས་འདི་ཟབ་ཅིང་རྒྱ་ཆེ་བས། །རྟོག་གེའི་བློ་ཡིས་ཕིག་བར་མི་ནུས་ཏེ། །ཚད་མ་གསུམ་གྱི་ངེས་གྱུར་བཀའ་ལུང་ལ། །དཔང་དུ་བྱས་ཏེ་འདི་ན་ཅུང་ཞིག་སྡེབ། ཞེས་པས་མདུན་བསུས་ནས་འདིར་རིམ་པ་དང་པོའི་རྣལ་འབྱོར་ལ་གོམས་བརྟན་ཡང་དག་པའི་གདེངས་རྩལ་བརྙེས་ནས་རིམ་པ་གཉིས་པ་འདི་ཉིད་ལ་འཇུག་པར་བྱ་སྟེ། ཇི་སྐད་དུ། བསྐྱེད་པའི་རིམ་ལ་ལེགས་གནས་ཤིང་། །རྫོགས་པའི་རིམ་པ་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །ཞེས་བཤད་པ་ལྟར་རོ། །དེ་ཡང་ཕ་མ་གཉིས་སུ་མེད་པའི་རྒྱུད་ཀུན་གྱིས་དོན་དུ་གཉེར་བྱའི་ལམ་གྱི་གཙོ་བོ་ལྷན་ཅིག་སྐྱེས་པའི་བདེ་བ་ཆེན་པོ་ཉིད་ཡིན་ལ་སྒྲུབ་གཞི་དེ་ཉིད་དོན་གྱི་རྒྱུ་འོད་དམ་སྐུ་གཉིས་ཟུང་འཇུག་གི་རང་བཞིན་ཅན་ཞིག་ཡིན་པས་ན་ཐབས་ཤེས་བསྐྱེད་རྫོགས་ཟུང་འཇུག་གི་ལམ་གྱིས་སྒྲུབ་པ་དང་། རྡོ་རྗེའི་ལུས་ལ་གནད་དུ་བསྣུན་དགོས་པ་སྤྱིར་བཏང་ལ། ཁྱད་པར་དུ་ཉི་མའི་འཁོར་ལོའི་རྒྱུད་ལས། བསྐྱེད་དང་རྫོགས་པ་ཆེན་པོ་སྟེ། །ཞེས་དང་། འཁོར་ལོ་སྡོམ་པའི་གསང་བ་བསམ་གྱིས་མི་ཁྱབ་པའི་རྒྱུད་ལས། །བསྐྱེད་དང་རྫོགས་སོགས་མི་གནས་ཤིང་། །རྫོགས་པ་ཆེན་པོར་གང་འདོད་པ། །འདི་དག་འཇུག་པའི་དུས་ཡིན་པས། །ཞེས་པ་ལྟར་ཕ་རྒྱུད་ཀྱིས་ཕྱི་སྣང་སྲིད་གཞིར་བཞེངས་སྤྲུལ་སྐུའི་དཀྱིལ་འཁོར་དག་མཉམ་ཟུང་འཇུག་ཏུ་ལྟ་བས་གཏན་ལ་ཕབ་ནས། ཕྱི་བསྐྱེད་རིམ་རྒྱས་པ་དང་རླུང་དང་སྣང་མེད་ཀྱི་བསམ་གཏན་གཉིས་གང་རུང་གི་རྫོགས་རིམ་གྱིས་ཉམས་སུ་བླང་བས། འབྲས་བུ་སྐུ་རྡོ་རྗེ་སྤྲུལ་པའི་སྐུ་ཐོབ་པ་དང་། མ་རྒྱུད་ཀྱིས་ནང་རྒྱུ་མ་ལུས་ཀྱི་དཀྱིལ་འཁོར་ལོངས་སྤྱོད་རྫོགས་པའི་རང་བཞིན་ཏུ་རྫོགས་རིམ་གྱི་ལྟ་བས་གཏན་ལ་ཕབ་ནས། སྒོང་སྐྱེས་སྦྱོང་བའི་བསྐྱེད་རིམ་བསྡུས་པ་དང་། རྩ་ཐིག་རླུང་གསུམ་གྱི་རྣལ་འབྱོར་གྱིས་ཉམས་སུ་བླང་ནས། འབྲས་བུ་ལོངས་སྐུ་འགྲུབ་པ་དང་། གསང་བ་རང་རིག་བྱང་ཆུབ་ཀྱི་སེམས་ཆོས་སྐུའི་དཀྱིལ་འཁོར་རམ་དབྱིངས་ནང་གསལ་དང་། ཡེ་ཤེས་ཕྱི་གསལ་གྱི་སྐུ་གཉིས་ཟུང་འཇུག་གི་དཀྱིལ་འཁོར་དུ་རྫོགས་པ་ཆེན་པོའི་ལྟ་བས་གཏན་ལ་ཕབ་ནས་ཁྲེགས་ཐོད་བསྐྱེད་རྫོགས་ཟུང་འཇུག་གི་བསྒོམ་པས་ཉམས་སུ་བླང་ནས། འབྲས་བུ་སྐུ་ལྔ་ལྷུན་གྱིས་གྲུབ་པའི་ངོ་བོར་བྱང་ཆུབ་པའོ། །ལུང་འདི་དག་གིས་རྫོགས་ཆེན་གྱི་མིང་ཙམ་ཡང་མ་གྲགས་ཞེས་བརྒལ་བ་དག་ཀྱང་བསལ་བའོ། །དེ་ལ་འདིར་ནི་སྣང་བཅས་རྩ་རླུང་ཐིག་ལེ་ཟུང་འཇུག་གི་སྒོ་ནས་ནང་སྒྱུ་མ་ལུས་ཀྱི་དཀྱིལ་འཁོར་ཉིད་ལ་གནད་དུ་བསྣུན་པས་ལྷན་སྐྱེས་འདྲེན་པའི་རྗེས་སུ་རྣལ་འབྱོར་གྱི་གྲུབ་པའི་མཐའ་ཅུང་ཟད་འཆད་པ་ལ། གཞི་རྩ་རླུང་ཐིག་ལེའི་གནས་ལུགས་གཏན་ལ་ཕབ་པ། ལམ་རླུང་དང་གཏུམ་མོ་དཔྱིད་ཐིག་གི་རྣལ་འབྱོར་གྱིས་གནད་དུ་བསྣུན་པའི་ཚུལ། འབྲས་བུ་འཕྲལ་ཕུག་གི་ས་ལམ་མངོན་ཏུ་གྱུར་པའི་རིམ་པའོ། །
དང་པོ་ནི་གསང་བ་ཐམས་ཅད་གཅོད་པའི་རྒྱུད་དང་དུར་ཁྲོད་ཀྱི་རྒྱན་རྨད་དུ་བྱུང་བའི་རྒྱུད་གཉིས་ལས་ཀྱང་། །གནས་པ་རྩ་དང་གཡོ་བ་རླུང་། །བཀོད་པ་བྱང་སེམས་དམན་པ་དབྱིབས། ཞེས་དེ་གསུམ་གྱི་གནས་ལུགས་བཤད་པའོ། དང་པོ་གནས་པ་རྩ་ལ། སྐྱེ་བའི་གོ་རིམ་ངེས་པ་དང་། རང་བཞིན་ངེས་པ་དང་། གནས་ཚུལ་ངེས་པ། གྲངས་ངེས་པའོ། དང་པོ་ནི། མན་ངག་སྙེ་མ་ལས། འདི་ལྟ་བུར་ཨ་ཝ་དྷཱུ་ཏཱི་དང་ལྷན་ཅིག་ཏུ་རྩ་ལྔ་རྣམས་དང་པོ་སྟེ། དེའི་རྗེས་སུ་དང་། དེ་ནས་ཉི་ཤུ་རྩ་བཞི་ཞེས་པའོ། །དེ་ཡང་མངལ་དུ་དང་པོ་ཆགས་དུས་སྙིང་ཁར་དབུས་སུ་དབུ་རྐྱང་རོ་གསུམ་ཤར་དང་ལྷོའི་འདབ་མ་ལ་སུམ་སྐོར་མ་དང་འདོད་མ་སྟེ་ལྔ་དུས་མཉམ་དུ་ཆགས་སོ། །དེ་ནས་ནུབ་ཏུ་ཁྱིམ་མ་དང་། བྱང་དུ་གཏུམ་མོ། དབུ་མ་དང་ལྷན་དུ་བདུད་བྲལ་མ་སྟེ་གསུམ་ཆགས་སོ། །ཕྱོགས་ཀྱི་རྩ་བཞི་པོ་དེ་དག་དབུ་རྐྱང་རོ་གསུམ་ལ་བུག་པ་བརྡོལ་བའི་ཚུལ་དུ་ཟུག་པ་ལས། ཤར་གྱི་སུམ་སྐོར་མ་ལས་ཤར་ལྷོའི་རྩ་དེ་གྱེད་པ་ལྟར། རྩ་གཞན་གསུམ་ལས་མཚམས་ཀྱི་རྩ་གཞན་རྣམས་གྱེས་པ་ཡིན་ལ། བདུད་བྲལ་མ་ནི་དབུ་མ་ལ་འཁྲིལ་ཏེ་ལྕེ་རྩེ་ལ་ཟུག་ནས་ཡོད་དོ། །རྩ་བརྒྱད་པོ་དེ་ལས་སྐུ་གསུང་ཐུགས་ཀྱི་རྩ་གསུམ་རེ་གྱེས་པས་ཉི་ཤུ་རྩ་བཞི་ཆགས་ཏེ། སྔར་སྙིང་ཀར་དང་པོ་ཆགས་པའི་རྩ་བརྒྱད་པོ་བསྣན་པས་བྱང་སེམས་འབབས་པའི་རྩ་སོ་གཉིས་སུ་བཞེད་དོ། །དེ་དག་ཀྱང་ཁ་སྦྱོར་ལས། སྙིང་གའི་ནང་སོན་པདྨ་ན། །འདབ་མ་བརྒྱད་པོ་སྙིང་པོར་བཅས། །ཞེས་དང་། སྐུ་གསུང་ཐུགས་ཀྱི་དབྱེ་བ་ཡིས། །ཉི་ཤུ་རྩ་བཞིར་ཉེར་བརྗོད་དོ། །ཅེས་དང་། བྱང་ཆུབ་སེམས་ཀྱི་རང་བཞིན་རྩ། །སུམ་ཅུ་རྩ་གཉིས་དམ་པ་ཡིན། །ཞེས་སོ། །སྔར་གྱི་གནས་ཉེར་བཞིའི་རྩའི་གཙོ་བོ་དེ་དག་ལ་ཐིམ་ལོངས་བདག་གསུམ་གྱི་དབྱེ་བས་བདུན་ཅུ་རྩ་གཉིས་སུ་གྱེས་པའང་། རྡོ་རྗེ་ཕྲེང་བ་ལས། །ཐིམ་དང་ལོངས་སྤྱོད་བདག་པོའོ། །ཞེས་སོ། །བདུན་ཅུ་རྩ་གཉིས་པོའི་རེ་རེ་ལའང་འཁོར་སྟོང་སྟོང་ཡོད་པའི་སྟོང་ཕྲག་དོན་གཉིས་ཏེ། བདེ་མཆོག་འབྱུང་བ་ལས། བདུན་ཅུ་རྩ་གཉིས་སྟོང་ཕྲག་རྣམས། །ལུས་ཀྱི་རྗེས་འབྲང་རྩ་རུ་འགྱུར། །ཞེས་སོ། །དེ་ཡང་གཙོ་མོ་གསུམ་མདུད་མཚམས་ནས་འཁོར་ལོའི་རྩ་རྣམས་རིམ་གྱིས་ཆགས་ཏེ། འཕྲང་གྱུར་ཞག་དང་པོ་ནས་དབུས་མ་བསྐྱེད་པའི་ལྟེ་སྙིང་གི་འཁོར་ལོ་རིམ་པར་ཆགས། ཟླ་བ་གཉིས་པར་གསང་འཁོར། གསུམ་པར་སྤྱི་མགྲིན་གྱི་འཁོར་ལོ་གཉིས། བཞི་བར་ཡན་ལག་གི་རྩ་ཕྲ་མོ། ལྔ་བར་ནང་ཁྲོལ་གྱི་གནས་རྣམས་དང་། དྲུག་པ་ཕན་ཆད་ཟླ་རེ་ལ་ཡན་ལག་གི་རླུང་གི་རྟེན་གྱི་རྩ་རེ་དང་བཅས། ཕྱིར་སྐྱེས་ནས་ཟླ་བ་གསུམ་དུ་རྩ་ཕྲ་མོའི་ཚོགས་ཀྱང་ཆགས་པ་སྟེ། མདོར་ན་ཟླ་བ་བཅུ་གཉིས་ཀྱི་རིང་ལ་ཉིན་རེ་རྩ་ཉིས་བརྒྱ་རེ་ཆགས་པས་སྟོང་ཕྲག་བདུན་ཅུ་རྩ་གཉིས་ཚང་པའོ། །སམྦུ་ཊི་ལས། འཁོར་ལོ་བཞི་ཡི་རབ་དབྱེ་བས། །བརྒྱ་ཕྲག་གཅིག་དང་ཉི་ཤུ་ལྷག །བྱང་ཆུབ་སེམས་ཀྱི་རང་བཞིན་གྱིས། །རྩ་རྣམས་སུམ་ཅུ་རྩ་གཉིས་སོ། །ཞེས་སོ། །
གཉིས་པ་རང་བཞིན་ངེས་པ་ནི། རྩ་དབུ་མ་དེ་གནས་ལུགས་ངོ་བོའི་དབང་དུ་བྱས་ན། དབྱིངས་དང་ཡེ་ཤེས་སྣང་བ་དང་སྟོང་བ། ཐབས་དང་ཤེས་རབ་གཉིས་སུ་མེད་པ་གཟུང་འཛིན་རྣམ་པར་སྤངས་པའི་ཐུགས་རྡོ་རྗེའི་བདག་ཉིད། ཆོས་ཀྱི་སྐུའི་རང་བཞིན་ཅན་ཞིག་ཡིན་ལ། རོ་མ་ནི་ཐབས་བདེ་བ་ཆེན་པོ། སྐུ་རྡོ་རྗེ་སྤྲུལ་པའི་སྐུའི་རང་བཞིན་ཅན། རྐྱང་མའི་ངོ་བོ་ཤེས་རབ་སྟོང་པ་ཉིད་དང་། གསུང་རྡོ་རྗེ་དང་། ལོངས་སྤྱོད་རྫོགས་སྐུའི་རང་བཞིན་ཉིད་ཡིན་པའི་གནད་ཀྱིས་འདི་དག་ཐབས་ཀྱིས་ཟིན་ན་སྐུ་གསུམ་གྱི་དགོངས་པ་འཆར་བའི་དོན་ཀྱང་དེ་ཡིན་ལ། རང་བཞིན་དུ་སྐུ་གསུམ་གྱི་དཀྱིལ་འཁོར་བཞུགས་པའི་གནས་ཀྱང་ཡིན་པས་སྐུ་གསུང་ཐུགས་དང་སྐུ་གསུམ་གྱི་ཡི་གེ་གསུམ་གནས་པར་སྒྱུ་འཕྲུལ་ལས་གསུངས་པའོ། །དེ་དག་ཀྱང་བདེ་མཆོག་འབྱུང་བའི་རྒྱུད་ལས། ཤེས་རབ་རང་བཞིན་ལ་ལ་ན། རཱ་ས་ན་ནི་ཐབས་ས་བཤད། །དབུས་ན་ཨ་ཝ་དྷཱུ་ཏཱི་སྟེ། གཟུང་འཛིན་རྣམ་པར་སྤངས་པའོ། །རཱ་ས་ན་ནི་སྤྲུལ་པའི་སྐུ། །ལོངས་སྤྱོད་རྫོགས་སྐུ་ལ་ལ་ན། །ཨ་ཝ་དྷཱུ་ཏཱི་ཆོས་སྐུ་སྟེ། །སྐུ་གསུམ་པོར་ནི་བཤད་པ་ཡིན། ཞེས་དང་། །རིན་ཆེན་འབར་པའི་རྒྱུད་ལས། གཡས་ནི་ཐབས་ཡིན་ལ་ལ་ན། །གཡོན་པ་ཤེས་རབ་རཱ་ས་ན། །ཨ་ཝ་དྷཱུ་ཏཱི་གཉིས་སུ་མེད། །ཐབས་དང་ཤེས་རབ་གཉིས་མེད་ཀྱི། །ར་ལའི་ངོ་བོར་ཤེས་པར་བྱ། །ཞེས་དང་། རྡོ་རྗེ་དྲ་བས་སྡོམ་པའི་རྒྱུད་ལས། སྐུ་གསུང་ཐུགས་ཀྱི་རྩ་གསུམ་ནི། ཞེས་དང་། གཏུམ་པོའི་རྒྱུད་ལས་ཀྱང་། ཨོཾ་ནི་སྐུ་ཡི་རྡོ་རྗེ་ཡི། །སྙིང་པོ་རུ་ནི་ཡང་དག་བཤད། །ཡི་གེ་ཨ་ནི་ཡེ་ཤེས་མཆོག །གསུང་གི་རྡོ་རྗེའི་སྙིང་པོ་མཆོག །ཧ་ཨུ་མ་གསུམ་གཅིག་གྱུར་སྙིང་ཀ་ན། །ཐུགས་ཀྱི་ས་བོན་དུ་ནི་བརྗོད། །སྐུ་དང་གསུང་གི་སྙིང་པོ་གཉིས། །ལ་ལ་ན་དང་ར་ས་ན། །ཞེས་གསུངས་སོ། །གཞན་ཡང་དཀོན་མཆོག་གསུམ་ཀྱི་རང་བཞིན་ཀྱང་ཡིན་པས་ན། རྡོ་རྗེ་ཕྲེང་བ་ལས། སངས་རྒྱས་ཨ་ཝ་དྷཱུ་ཏཱིར་འགྱུར། ཆོས་ནི་ལ་ལ་ན་རུ་བརྗོད། དགེ་འདུན་རཱ་ས་ན་རུ་བརྗོད། འདི་ནི་གསུམ་པོའི་མཚན་ཉིད་དོ། །ཞེས་སོ། སྣང་ཚུལ་འཁྲུལ་པའི་དུས་ན། སངས་རྒྱས་ཀྱི་འབྲས་ཆོས་དེ་དག་རང་ངོ་མ་ཤེས་པར་ལོག་པར་འཁྲུལ་པའི་གཞི་རུ་སོང་བས། དབུ་མས་གཏི་མུག་དང་། ༼ སེམས་ ༽གཟུགས་མེད་ཁམས་སུ་སྣང་བའི་རྟེན་བྱེད། རོ་མས་ཞེ་སྡང་དང་། འཛིན་པའི་རྣམ་རྟོག་ ༼ ལུས་ ༽འདོད་པའི་ཁམས་སུ་སྣང་བའི་རྟེན་བྱེད། རྐྱང་མས་འདོད་ཆགས་དང་། གཟུང་རྟོག་ ༼ ངག་ ༽གཟུགས་ཁམས་སུ་སྣང་བའི་རྟེན་བྱེད་དེ། ཀུན་གཞིའི་རྟེན་དབུ་མ། རྣམ་ཤེས་ཀྱི་རྐྱང་མ། ཡིད་ཀྱི་རོ་མས་བྱེད་དོ། །དེས་ན་དུག་གསུམ་གྱི་ཉེས་པས་ནད་རླུང་མཁྲིས་བད་ཀན་གསུམ། གདོན་གསུམ་ཉིན་མཚན་བར་གསུམ་ལ་སོགས་པ་འཁོར་བའི་ཆོས་ཐམས་ཅད་སྣང་བའོ། །ཁམས་དང་ཐབས་ཤེས་འབྲས་ཆོས་འཇོག་ཚུལ་མི་འདྲ་བ་གཞན་ཡང་ཡོད་དེ། རིན་ཆེན་འབར་བའི་རྒྱུད་ལས། འདོད་ཆགས་རྡུལ་ལ་ལུས་ནི་ཐབས། །ལ་ལ་ན་ནི་སྐུ་ཡིན་ཏེ། །གཏི་མུག་མིན་པ་ངག་དང་ཡང་། །ཤེས་རབ་ར་སཱ་ཡ་ན་གསུང་། །ཞེ་སྡང་སྙིང་སྟོབས་ཡིད་ཡིན་ཏེ། །སྐུ་གསུང་ཐུགས་ཀྱི་འགྱུར་བའོ། །ཞེས་སོ། །དུག་གསུམ་ལས་འདོད་ཆགས་དང་། དཀར་དམར་རླུང་གསུམ་ལས་རྡུལ་སྡུག་བསྔལ་ཏེ་ཁྲག །སྒོ་གསུམ་ལས་ལུས་འབྲས་ཆོས་སྐུ་རྡོ་རྗེའི་རྟེན་རྐྱང་མར་གསུངས། །གཏི་མུག་མུན་པ་བཏང་སྙོམས་ངག་གསུང་རྡོ་རྗེའི་རྟེན་རོ་མར། ཞེ་སྡང་སྙིང་སྟོབས་བདེ་བ་ཡིད་ཐུགས་རྡོ་རྗེའི་རྟེན་དབུ་མ་ཡིན་པར་བསྟན་པའོ། །
གསུམ་པ་གནས་ཚུལ་ངེས་པ་ལ། གཙོ་མོ་གསུམ་གྱི་གནས་ཚུལ་ངེས་པ། གཙོ་མོ་གཞན་གྱི་གནས་ཚུལ་ངེས་པ། འཁོར་ལོ་སོ་སོའི་གནས་ཚུལ་ངེས་པ། ནད་དང་ཉོན་མོངས་པའི་རྩའི་གནས་ཚུལ་ངེས་པ། སྟོང་ཕྲག་དོན་གཉིས་ཀྱི་གནས་ཚུལ་ངེས་པ། ཕྲ་མོ་གཞན་གྱི་གནས་ཚུལ་བཤད་པ་དང་དྲུག་ལས། དང་པོ་ལ། གཙོ་མོ་གསུམ་གྱི་གནས་ཚུལ་སྤྱིར་བཤད་པ་དང་། བྱེ་བྲག་སོ་སོའི་གནས་ཚུལ་བཤད་པ། གཙོ་མོའི་དོན་བཤད་པ། དེ་ཉིད་ལྷ་དང་སྦྱར་བའོ། །དང་པོ་ནི། དབུ་མ་དབུས་དང་རོ་མ་གཡས། །རྐྱང་མ་གཡོན་དུ་གནས་པ་སྟེ། །གཏུམ་པོའི་རྒྱུད་ལས། །རྐྱང་མ་ཤེས་རབ་རང་བཞིན་ཏེ། །གཡོན་པའི་རྩ་རུ་རབ་ཏུ་གྲགས། །རོ་མ་ཐབས་ཀྱི་རང་བཞིན་གྱི། །གཡས་པ་ལ་ནི་ཡང་དག་གནས། །རྐྱང་མ་རོ་མའི་དབུས་དག་ལ། །ཀུན་འདར་མར་ནི་རབ་ཏུ་གྲགས། །ཞེས་སོ། །
གཉིས་པ་ལ་དབུ་མ་རོ་རྐྱང་གི་གནས་ཚུལ་ལོ། དང་པོ་ལ། ངོ་བོ། ངེས་ཚིག །དབྱེ་བ་དོགས་སེལ་དང་བཅས་པ། མཚན་ཉིད། མཚོན་དཔེ། བྱེད་ལས། ཡོད་ཚུལ་ལོ། དང་པོ་ནི་སྔར་བཤད་ཟིན་ལ།
གཉིས་པ་ནི། རང་བཞིན་དུ་རོ་རྐྱང་གཉིས་ཀའི་དབུས་ན་ཡོད་པའི་མིང་ཡིན་ལ། ལམ་པས་དེར་རླུང་ཟིན་པས་ལྷན་སྐྱེས་ཀྱི་བདེ་བ་དབུ་མ་བསམ་གྱིས་མི་ཁྱབ་པའི་དོན་ཆོས་སྐུའི་དགོངས་པ་འཆར་བ་དང་། ཆོས་ཉིད་ཀྱི་དབང་དུ་བྱས་ན་ཡོད་མེད་ཀྱི་མཐའ་ལས་འདས་པའི་བདེ་སྟོང་གཉིས་སུ་མེད་པའི་ངོ་བོ་ཡིན་པས་མཚན་དེ་ལྟར་ཆགས་པ་སྟེ། སྡོམ་འབྱུང་ལས། དབུས་ཀྱི་ཆར་ནི་ཡང་དག་འཇུག །ཞེས་དང་། ལྷན་ཅིག་སྐྱེས་དགའ་སྟེར་བྱེད་པའོ། །ཞེས་དང་། རིན་ཆེན་འབར་པའི་རྒྱུད་ལས། ཨ་ཝ་དྷཱུ་ཏཱི་གཉིས་སུ་མེད། །ར་ལའི་ངོ་བོར་ཤེས་པར་བྱ། །ཞེས་སོ། མིང་གི་རྣམ་གྲངས་རྩ་རླུང་གི་བདེ་བ་ཀུན༵་ཏུ་བསྐྱེད་པ་དང་། སྤྱི་ལ་ཁྱབ་པས་འད༵ར་མ་ཞེས་བརྗོད་ལ། གཟུང་འཛིན་གྱི་རྟོག་པ་ཀུན་སྤངས་པས་ཀུན་སྤངས་མ། ཚངས་པའི་ཐོག་གི་ལམ་བསྒོམ་པའི་གནས་དང་། ཚངས་བུག་ནས་རྐང་མཐིལ་བར་ཟུག་པས་ཚངས་པའི་དབྱུག་པ། བདེ་བའི་ཡེ་ཤེས་བསྐྱེད་པས་སུ་མ་ན་ཞེས་བདེ་བའི་སྡོམ་པ་དང་། བསམ་གྱིས་མི་ཁྱབ་པའི་དོན་མཚོན་པའི་ཕྲ་མོའི་གཟུགས་ལ་སོགས་པར་བརྗོད་ལ། དུས་འཁོར་ལས་སྒྲ་གཅན་གྱི་རླུང་རྒྱུ་བ་གདོང་མཇུག་ཏུ་ཁམས་ཀྱི་དྭངས་མས་ཉི་ཟླ་འཇུག་པས་ན་སྒྲ་གཅན་གྱི་རྩར་གསུངས་སོ། །
གསུམ་པ་དབྱེ་བ་དོགས་སེལ་དང་བཅས་པ་ལ། ཀུན་རྫོབ་གནས་པ་ཐབས་ཀྱི་དབུ་མ་དང་། དོན་དམ་འབྲས་བུ་ཤེས་རབ་ཀྱི་དབུ་མ། ཟུང་འཇུག་རང་བྱུང་ཆོས་ཉིད་ཀྱི་དབུ་མ་དང་གསུམ་སྟེ། དང་པོ་ནི་སྲོག་པ་རྩ་དང་། གཉིས་པ་འབྲས་བུ་ངོ་བོ་ཉིད་མེད་པའོ། །གསུམ་པ་ནི། རྣམ་བཞི་བྱེ་བྲག་དྲུག་དང་བརྒྱད་དཀྱིལ་ན་དྭངས་མའི་རྩ་དཀར་པོ་ཡོད་པར་གསུངས་པ་དང་། ༼ གསང་ཐིག་ལས་མཆན། ༽དུས་འཁོར་ལས་དུས་ཀྱི་རྩ་ལ་མཐོང་བར་གསུངས་པའི་དུས་ཀྱི་རྩ་ནི་མཐར་ཐུག་གི་དོན་དུ་འདི་ཡིན་པས་རྫོགས་ཆེན་གྱི་དཀར་འཇམ་རྩའི་སྒྲོན་མ་དང་དོན་གཅིག་ཏུ་གནས་སོ། །ཡང་ལུགས་གཞན་དུ་གཞིའི་དབུ་མ་ནི་མ་དག་པའི་དབུ་མའམ་སྲོག་རྩ་ལ། འབྲས་དུས་ཀྱི་དབུ་མའི་རིགས་སམ་རྒྱུའི་དབྱིངས་ཀྱི་ཁྱབ་པ་དེ་ཉིད་ཡིན་ལ། ལམ་གྱི་དབུ་མ་ནི་སོར་སྡུད་ལ་སོགས་པ་བསྒོམ་པས་ནང་གི་དབུ་མའི་སྒོར་རླུང་ཅུང་ཟད་ཚུད་པས་ཕྱི་རོལ་སྟོང་གཟུགས་ལྟར་འཆར་བ་སྟེ། དུས་ཀྱི་རྩ་དང་རེ་ཁ་ཞེས་རི་མོའི་རྣམ་པ་སྐྲའི་ཚད་ཙམ། འབྲས་བུའི་དབུ་མ་ནི་གཞན་མཆོག་སྐུ་རྡོ་རྗེ་ལ་གནས་པ་སྒྲིབ་བྲལ་གྱི་རང་བཞིན་ནོ། །ཞེས་ཀརྨ་མི་བསྐྱོད་རྡོ་རྗེས་གསུངས་ཏེ། འདི་ཡང་རེ་ཁ་ནག་པོ་ནི་འཆར་ཆ་ཡིན་ལ། དུས་ཀྱི་རྩ་ནི་འཆར་བའི་གཞིའམ་ལམ་ཀྱང་ཡིན་པས་དུས་འཁོར་ལས། དུས་ཀྱི་རྩལ་ཞེས་གསུངས་ཀྱི་རི་མོ་དེ་དུས་ཀྱི་རྩ་ཡིན་ན་དུས་ཀྱི་རྩ་ནི་ཞེས་གསུངས་རིགས་ཀྱང་། བྱེ་བྲག་མ་ཕྱེད་པ་ཡིན་ནོ། །འདིར་དུས་ཀྱི་རྩ་འདི་ལམ་སྣང་འཆར་བའི་གཞི་ལམ་གཉིས་ཀ་ཡིན་པས་ན་ཆོས་ཉིད་ཀྱི་དབུ་མར་གནས་ཤིང་གསུངས་པ་ཡིན་ནོ། །ཀཱརྨ་བདུན་པས་བསྒོམ་པའི་དབུ་མ་དང་འདི་༼ ཟུང་འཇུག་རང་བྱུང་གི་དབུ་མ་མཆན། ༽གཉིས་དཔྱད་གསུམ་དག་པའི་རྒྱུད་ལུང་དང་མི་མཐུན་གསུངས་ཞིང་སྲོག་རྩ་གཅིག་པུ་དེ་ལས་གཞན་དབུ་མ་ཞིག་མེད་པར་འདོད་པས་དེའི་སྒྲུབ་བྱེད་དུ་བཀོད་པའང་། ཡེ་ཤེས་ཐམས་ཅད་ཀྱི་རྩ་བ་ཀུན་གཞིའི་ཡེ་ཤེས་དང་། རྣམ་ཤེས་ཐམས་ཅད་ཀྱི་རྩ་བ་ཀུན་གཞིའི་རྣམ་ཤེས་ཡིན་ལ། དེ་གཉིས་ཐ་མི་དད་པ་ཐ་མལ་གྱི་ཤེས་པ་ལ་སངས་རྒྱས་ཀྱི་རྒྱུ་བྱེད་པའི་ཆ་ནས་བདེ་གཤེགས་སྙིང་པོར་འབོད་པ་བཞིན་དུ། ཡེ་ཤེས་ཀྱི་རྩ་ཐམས་ཅད་ཀྱི་རྩ་བ་དབུ་མ་དང་། འཁོར་བའི་རྩ་ཐམས་ཅད་ཀྱི་རྩ་བ་སྲོག་རྩ་ཡིན་པས་དེ་གཉིས་མི་ཕྱེད་པ་སྒྲ་གཅན་གྱི་རྩ་ལ་སྲོག་བརྟེན་པའི་ཆ་ནས་སྲོག་རྩ་ཞེས་འབོད་པར་རིགས་ཏེ། ཡེ་ཤེས་ཀྱི་རླུང་ཐམས་ཅད་ཀྱི་རྩ་བ་མི་ཤིགས་པའི་རླུང་དང་། ལས་རླུང་ཐམས་ཅད་ཀྱི་རྩ་བ་སྲོག་ཆེན་པོའི་རླུང་ཡིན་པས། དེ་གཉིས་ཆུ་དང་འོ་མ་ལྟར་འདྲེས་པ་སྒྲ་གཅན་གྱི་རླུང་ལ་ཡང་སྲོག་འཛིན་གྱི་རླུང་ཞེས་འབོད་པ་འཐད་པའི་ཕྱིར་རོ། །ཞེས་གསུངས་པ་ལའང་དཔྱད་ན་གལ་ཏེ་ཤི་བའི་དུས་སུ་ཕ་མའི་ཁུ་ཁྲག་གིས་བསྐྱེད་པའི་སྲོག་རྩ་དེ་རོ་དང་ལྷན་ཅིག་ཏུ་འདོར་བཏང་ན། དེ་དང་ཆ་མི་ཕྱེ་བས་དབུ་མའང་འདོར་བ་ལས། དེ་ལྟ་ན་ཡེ་ཤེས་ཀྱི་རྩ་ཞེས་བྱ་བ་ཞིག་གཏན་ནས་མི་སྲིད་པ་དང་། རྩ་མི་ཤིགས་པའི་ཐིག་ལེའང་བརྗོད་གཞི་མེད་པའི་བརྗོད་བྱེད་ཞིག་གིས་རྒྱུད་རྣམ་དག་ཀུན་ལ་སྒྲོ་འདོགས་སུ་བྱས། ལས་རླུང་དང་ཆ་མི་ཕྱེ་བའི་ཡེ་རླུང་དེའང་ལས་རླུང་འགགས་དུས་འགགས་པར་ཐལ་ཞིང་། འོད་ཟེར་ལྔ་པ་དེ་ལ་མི་ཤིགས་པའི་ངེས་ཚིག་མེད་དེ་འགགས་པའི་ཕྱིར་དང་། ཀུན་གཞི་དེ་ལ་མ་རིག་པའི་བག་ཆགས་ཡོད་པའི་ཕྱིར། དེའི་ངང་དུ་སླེབ་པ་ཙམ་གྱིས་ལེགས་ནའང་གཟུགས་མེད་པའི་ཁམས་སུ་འདུ་བྱེད་པ་ཞིག་ལས་སངས་རྒྱས་མི་ཐོབ་ཏེ། བརྒྱལ་བས་མ་ངེས་པ་དང་། ཡང་ན་སྐད་ཅིག་མ་མ་ཡིན་པས་ཀུན་གཞི་ཡོད་ན་དང་། ཁྱེད་རང་གི་ ༼ ངེས་དོན་ཕྱག་རྒྱ་ཆེན་པོའི་ཡེ་ཤེས་མཆན། ༽ཐ་མལ་གྱི་ཤེས་པའང་སྐད་ཅིག་གི་རང་བཞིན་དུ་ཁས་བླང་ན་དང་། རྩ་རླུང་ཐིག་ལེ་མི་ཤིགས་པ་སྐུ་གསུང་ཐུགས་ཀྱི་རང་བཞིན་རྣམས་མི་རྟག་པ་དང་། ཀུན་འབྱུང་གི་བག་ཆགས་ལྡན་པ་དང་སྡུག་བསྔལ་དུ་སོང་ནའང་ཉམས་ཉེས་ཆེན་པོའི་ཐེག་ཆེན་དང་གསང་སྔགས་ཀྱི་སྲོག་རྩ་བཅད་པར་མི་འགྱུར་རམ། དེ་ལས་གཞན་ཡང་རྡོ་རྗེའི་སྐུ་ལ་མི་རྟག་པར་བལྟ་བའི་ཉེས་པ་དག་ཀྱང་ཅེས་ཕྱིར་མི་འབྱུང་སྟེ་འབྱུང་ངོ་། ལར་ཕྱི་ཡི་རྩ་ནི་ལུས་ལ་གནས་པའི་སྟོང་ཕྲག་བདུན་ཅུ་རྩ་གཉིས་སོ། །ནང་གི་རྩ་ནི་གནས་ཉེར་བཞིའི་རྩ་འཁོར་ལོ་ལྔ་དང་བཅས་པའོ། །གསང་བའི་རྩ་ནི་གནས་པའི་དབུ་མའི་མཚོན་གཙོ་མོ་གསུམ་དང་བཅས་པ་ལ། མཐར་ཐུག་གི་རྩ་ནི་ཆོས་ཉིད་ཀྱི་དབུ་མ་ཉིད་ཡིན་པས་ན། རིན་ཆེན་ཕྲེང་བའི་རྒྱུད་ལས། ཕྱི་ཡི་རྩ་དང་ནང་གི་རྩ། །གསང་བ་དེ་བཞིན་མཐར་ཐུག་པའི། །མན་ངག་ཡོད་པས་ཤེས་པར་བྱ། །ཞེས་སོ། །རྒྱུ་མཚན་དེ་དག་གི་ཕྱིར་ན་རྒྱུད་ཀྱི་རྡོ་རྗེའི་གནས་ལ་རྟོག་གེའི་དཔྱད་བཞག་ནི་ནམ་ཡང་མི་འཚལ་ཏེ། ལོག་བཤད་དུ་འགྱུར་ན་མི་རུང་བའི་ཕྱིར་རང་སོ་ལྟར་བཞག་པར་བྱའོ། །ཁྱད་པར་དུ་རྒྱུད་སྤྱི་མོ་རྣམས་ཚུལ་བཞི་དང་མཐའ་དྲུག་གིས་བཅིངས་ཡོད་པའི་མན་ངག་གི་རྒྱུད་ན་གསལ་བ་མཐར་ཐུག་གི་དགོངས་པ་དངོས་ཡིན་པས་སྨོད་པར་མི་བྱ་བར་མ་ཟད་དགོངས་པ་དེ་ལྟར་བླང་དགོས་པ་སྟེ། དེས་ན། དཔལ་ནམ་མཁའ་དང་མཉམ་པའི་རྒྱུད་ལས། ཡི་གེ་དང་ནི་ཡན་ལག་དང་། །བསྡུས་པའི་དོན་དང་སྤྱི་ཡི་དོན། །སྦས་པའི་དོན་དང་མཐར་ཐུག་དོན། །སྣ་ཚོགས་སེམས་ལས་འབྱུང་བར་འགྱུར། །ཞེས་སོ། །ཡང་སྲོག་རྩ་དེར་རླུང་ཞུགས་པ་སྨྱོ་འབོགས་སུ་འབྱུང་བར་བཤད་པ་དང་། དབུ་མར་ཞུགས་ན་རྟགས་བཅུའི་སྟོང་གཟུགས་མཐའ་དག་འཆར་བ་དང་། ལྷན་སྐྱེས་ཀྱི་བདེ་བ་སྟེར་བར་གསུངས་ཏེ། ན་རོ་བས་ཀྱང་། གང་ཚེ་རླུང་ནི་དབུ་མར་བུས་གྱུར་བ། །དེ་ཚེ་རྡོ་རྗེའི་མེ་དང་དུ་བ་འབྱུང་། ཞེས་པ་རྣམས་དང་མཚན་ཉིད་བྱེད་ལས་དང་བཅས་པ་འགལ་བས་མི་འཐད་པ་དང་། ཡང་ན་རྟགས་བཅུ་དང་ལྷན་སྐྱེས་དེ་དག་ཀྱང་སྨྱོ་འབོག་གི་འཁྲུལ་སྣང་དུ་འགྲོ་བས་དེ་འདྲའི་ལྷན་སྐྱེས་འོང་ན། སྲོག་རླུང་གིས་ཐེབ་པའི་ཐབས་ནི་སླ་ལ། དེང་སང་བུད་མེད་དང་རྒན་རྒོན་འགའི་ལྷན་སྐྱེས་མཐོང་བ་ཡིན་འདྲ་བ་དང་། སྡོམ་འབྱུང་གི་ལུང་དང་ཡང་མི་མཐུན་ཏེ། ཆུ་ཤིང་མེ་ཏོག་ལྟར་སྟོང་བ། ཞེས་གསུངས་པས་སྲོག་རྩ་ན་ཁྲག་ཡོད་པས་སྟོང་པ་མ་ཡིན་པས་རྒྱུ་མཚན་གཉིས་ཀྱིས་བྱང་ངོ་། ཡང་ན་ལྷན་སྐྱེས་མཐོང་བའི་ལུང་དེ་དཔྱད་གསུམ་གྱིས་མ་དག་པར་འདྲེན་པའི་རང་ཚིག་འགལ་བ་ཅན་ཞིག་དུ་འགྱུར་ཉེ་བས་དོན་སྔ་མ་ལྟར་ལེགས་སོ། །དེ་ལྟ་བུའི་ཆོས་ཉིད་ཀྱི་དབུ་མ་ནི། མཚན་ཉིད་བཞི་དང་ལྡན་པ། འོད་གསལ་བའི་རང་བཞིན་ཐོག་རེག་དང་བྲལ་བ་ཇི་སྲིད་ལུས་སེམས་དབུགས་གསུམ་ཚོགས་པ་དེ་སྲིད་དུ་ཡོད་ལ། དེ་གསུམ་གྱེས་པ་ན་མི་སྣང་བར་ཡལ་བའི་རྒྱུ་མཚན་གཉུག་མའི་ལུས་ཕྲ་རྩ་མི་ཤིགས་པའི་ཐིག་ལེ་ཡིན་པའི་གནད་ཀྱིས་རླུང་སེམས་ལ་འདུ་འབྲལ་མེད་པར་ཡོད་པས་ལུས་གློ་བུར་བ་དོར་དུས་མི་སྣང་བ་ཡིན་ནོ། །ཡེ་ཤེས་ཀྱི་རྩ་དེ་ལས་འཁོར་ལོ་ལྔ་དང་ཡང་ཕྲན་ཐམས་ཅད་དུ་འོད་རྩའི་ཆ་ཤེས་རེ་རེ་འཕྲོས་པས་ན། ད་ལྟ་ནི་སྲོག་རྩའི་དབུས་སུ་རྩ་ཡེ་ཤེས་སེམས་དཔའི་འོད་གསལ་སྤྲོས་པ་དང་བྲལ་བར་བཞུགས་པ་ནི་རྫོགས་པ་ཆེན་པོའི་དཔྱད་གསུམ་དག་པའི་ལུང་གིས་གྲུབ་པའི་ཕྱིར་དང་། རིན་ཆེན་ཕྲེང་བ་ལས་ཀྱང་། རྩ་དང་འཁོར་ལོ་འདི་རྣམས་ནི། །དེ་བཞིན་གཤེགས་པའི་སྙིང་པོར་གསུངས། །ཞེས་གསུངས་པའང་དེ་ཡིན་ནོ། །དེས་ན་རང་གི་དཔང་དུ་འཛིན་པའི་རྒྱུད་རྣམས་ཀྱི་ཚིག་དོན་ཙམ་ལ་ཞེན་ནས། སྦས་མཐར་གྱི་དོན་ལ་དཔྱད་པ་མ་ཞུགས་པར། གཞན་རྒྱུད་རྣམ་དག་ལ་ཡིད་མ་ཆེས་པས་ཆོས་སྤངས་སུ་སོང་བའོ། །དེས་ན་ས་གསུམ་འགྲོ་བའི་བླ་མ་རྗེ་བདག་ཉིད་ཆེན་པོའི་ཀྱང་དཔྱིད་ཐིག་གི་དམིགས་རྣམས་སྐྱོང་པའི་ཟིན་བྲིས་ལས། སྲོག་པ་རྩ་དེ་ལ་རོ་རྐྱང་དབུ་མ་གསུམ་བརྟེན་ནས་གནས་ཡོད་དོ་ཅེས་དང་། རྫོགས་རིམ་གྱི་སྤྱི་དོན་འཁོར་ལོ་སྡོམ་པ་ལ་བརྟེན་པའི་རྫོགས་རིམ་ཟིན་བྲིས་སོགས་ལས་ཀྱང་དེ་ལྟར་གསུངས་པས་གསར་རྙིང་གི་རྒྱུད་དང་མན་ངག་གོང་མཐུན་པས་དཔྱད་བཟོད་དུ་ཡོད་དོ། །བཞི་པ་མཚན་ཉིད་ནི། སྲོག་རྩ་དེ་མགོ་བོར་གྲུ་གསུམ། མགྲིན་པར་གཞོན་ནུ་མའི་ནུ་མ་ལྟ་བུ། སྙིང་ཁར་མིག་དང་འདྲ་བ། ལྟེ་བར་པདྨ་དང་འདྲ་བ། གསང་གནས་ན་རྡོ་རྗེ་དང་འདྲ་བ། ནོར་བུའི་རྩེ་མོར་ཟར་མའི་མེ་ཏོག་གི་དབྱིབས་འདྲ་བར་ཡོད་དོ། །ཞེས་རྒྱ་བོད་ཀྱི་མན་ངག་ཀུན་གྱི་དོན་རྗེ་རིན་པོ་ཆེའི་བསྡུས་ཏེ་གསུངས་བ་རྣམས་ནི་གནས་པའི་དབུ་མའི་མཚན་ཉིད་དོ། །ཆོས་ཉིད་ཀྱི་དབུ་མ་ནི་མཚན་ཉིད་བཞི་ལྡན་ཏེ། ཆུ་ཤིང་གི་སྡོང་པོ་ལྟར་དྲང་བ། ཏིལ་གྱི་མར་མེ་ལྟར་གསལ་བ། པདྨའི་འདབ་མ་ལྟར་སྲབ་པ། རྒྱ་སྐེགས་ཀྱི་ཁུ་བ་ལྟར་སྣུམ་པའམ། དཀར་དམར་རྒྱུ་བ་མེད་པས་སྟོང་བ་སྟེ། རྒྱུད་སྡེ་ཀུན་གྱི་དབུ་མའི་གསང་དོན་མཐར་ཐུག་པ་རྫོགས་ཆེན་གྱི་རྒྱུད་ཡན་ལག་དང་བཅས་པས་གསུངས་པ་དང་། སམྦུཊི་ལས་ཀྱང་། དེ་ཡི་ནང་དུ་སོན་པའི་རྩ། །མར་མེ་རང་གི་ངོ་བོ་ཅན། །ཆུ་ཤིང་གིས་ནི་མེ་ཏོག་ལྟར། །བསྐྱངས་ཤིང་ཁ་ནི་འོག་ཏུའོ། །ཞེས་དང་རྡོ་རྗེ་དྲ་བས་སྡོམ་པའི་རྒྱུད་ལས། །དབུས་ན་དྲང་པོར་གནས་པ་སྟེ། །ཞེས་སོ། །ཁ་དོག་གི་མཚན་ཉིད་ནི་རྗེ་བདག་ཉིད་ཆེན་པོའི། ལུས་ཀྱི་ནང་གི་དབུས་དྲང་པོར་ལས། ཚིགས་པའི་ཕྱོགས་ལ་སྲོག་རྩ་ཡོད་ཅིང་། དེའི་མདུན་ཕྱོགས་ལ་བརྟེན་ནས་དབུ་མ་ཁ་དོག་སྔོན་པོ། ཞེས་དང་སྤྱིར་དབུ་མ་ནི་མི་བསྐྱོད་པའི་རྩ་ཡིན་པས་ཁ་དོག་སྔོན་པོ་དང་། ཞེས་གསུངས་སོ། །དོན་དམ་པའི་དབུ་མ་ནི་མཚན་ཉིད་མེད་པའི་མཚན་ཉིད་ཆེན་པོ་སྟེ་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མའི་བྷ་ག་སྤྲོས་པ་ཐམས་ཅད་ཀྱི་མཐའ་དང་བྲལ་བའོ། །ལྔ་བ་མཚོན་དཔེ་ནི། དཔེར་ན་སྲད་བུ་བརྐྱང་བའི་ཚུལ་དུ་གནས་པའམ། ལུས་ཀྱི་དབུས་ན་ཁང་སྟོང་དུ་ཀ་བ་བཙུག་པ་ལྟར་ཡོད་པའི་རྣམ་པ་མཚོན་ཏེ། རྡོ་རྗེ་ཕྲེང་བར། གང་ཕྱིར་སྲད་བུའི་རྣམ་པར་གནས། །ཞེས་དང་། སྒྱུ་འཕྲུལ་ལས། ཀ་བའི་ཚུལ་དུ་གནས་པ་ལ། ཞེས་སོ། །དྲུག་པ་བྱེད་ལས་ནི། གནས་པའིདབུ་མ་སྤྱི་བོ་ནས་ལྟེ་བའི་བར་དུ་ཀུན་གཞིའི་རྟེན་སྲོག་རླུང་ཡོད་པས་ལུས་ཅན་གྱི་སྲོག་གནས་པར་བྱེད་ཅིང་། མར་སྣང་ཀུན་དྷ་བྱང་ཆུབ་ཀྱི་སེམས་འབབ་པའི་བདེ་བས་གཡོ་བར་བྱེད་པས་ཀུན་འདར་མར་གྲགས་ཤིང་། ཆོས་ཉིད་ཀྱི་དབུ་མ་ལ། ཡར་སྣང་ཧཾ་ཧེ་རུ་ཀ་དང་། མར་སྣར་ཨཱ་ཐུང་གནམ་ཞལ་མའི་རང་བཞིན་ཅན་དང་། བར་དུ་རང་རིག་པའི་རྟེན་ཡེ་ཤེས་ཀྱི་རླུང་འོད་ཟེར་ལྔ་བ་དང་། ཡེ་ཤེས་ཀྱི་ཐིག་ལེའི་རིག་པ་བྱང་ཆུབ་ཀྱི་སེམས་ཞི་ཁྲོ་སྐུ་འོད་ཡེ་ཤེས་སུམ་བརྩེགས་སུ་ཡོད་པའི་གནད་ཀྱིས། མ་དག་པའི་རྩ་རླུང་ཐིག་ལེའི་བྱེད་པ་བཅིངས་པས། དག་པའི་རྩར་རླུང་སེམས་ཚུད་པ་ན་དག་པ་ཡེ་ཤེས་ཀྱི་དཀྱིལ་འཁོར་དུ་འཆར་བའི་ལས་བྱད་པས་ལྷན་ཅིག་སྐྱེས་པའི་དགའ་བ་སྟེར་བར་བྱེད་དོན་ཀྱང་དེ་ཡིན་ནའང་རྩ་རླུང་ཕལ་གྱིས་སྦས་པར་སོང་བའོ། །དོན་དམ་པའི་དབུ་མས་ནི་དག་མ་དག་གི་རྩ་རླུང་ཐམས་ཅད་དབྱིངས་ངོ་བོ་ཉིད་ཀྱི་ཆོས་སྐུར་ཟླུམ་པར་མཛད་པའོ། །བདེ་མཆོག་འབྱུང་བ་ལས། དབུས་ཀྱི་ཆར་ནི་ཡང་དག་འཇུག །སྙིང་གའི་ཆུ་སྐྱེས་དབུས་སོན་པ། །ཆུ་ཤིང་སྙེ་མའི་མེ་ཏོག་ལྟར། །འཕྱང་བ་ཁ་ནི་ཐུར་དུ་བལྟས། །ཏིལ་གྱི་མར་མེར་ལྟར་འབར་ཞིང་། །བྱང་ཆུབ་སེམས་ནི་མཉམ་འབབས་ཏེ། །ཨ་ཝ་དྷཱུ་ཏཱིར་ཤེས་པར་བྱ། །ལྷན་ཅིག་སྐྱེས་པ་སྟེར་བྱེད་པའོ། །ཞེས་དང་། ལྷ་མོ་བཞིའི་ཞུས་ལས། དེ་གཉིས་འཕྲད་ནས་གཅིག་གྱུར་བ། །ཆོས་ཀྱི་དབྱིངས་སུ་འདུས་པ་ཡིན། །ཞེས་སོ། །བདུན་པ་ཡོད་ཚུལ་ནི། ལུས་གྲུབ་ཀྱི་དུས་སུ་དག་མ་དག་གི་ཆ་གཉིས་ཀྱི་དབུ་མ་རྟེན་དང་བརྟེན་པའི་རང་བཞིན་ནམ་ལུས་ཕྲ་དང་སྐུ་རྡོ་རྗེའི་སྒྲུབ་གཞི་རྩ་མི་ཤིགས་པའི་ཐིག་ལེར་གནས་པའི་རྟེན་གྱི་དབང་དུ་བྱས་ན་རགས་རིམ་དུ་དབུ་མ་འཁོར་ལོ་དྲག་གི་བར་ཐག་རང་སོར་ཕྱེད་བཅུ་གསུམ་རེ་ཡོད་པས་དབུ་མའི་ཡར་སྣེ་ཚངས་བུག་དང་། མར་སྣ་གསང་གནས་ཀྱི་བར་དུ་འབྲེལ་བ། ཞིབ་ཏུ་ནི་ལྟེ་བ་མན་ཆད་ནས་ནོར་བུའི་རྩེ་དང་། རྐང་མཐིལ་གཉིས་སུའང་འགྲོ་བས་གསུམ་དུ་གྱུར་བའོ། །ཆོས་ཉིད་ཀྱི་དབུ་མའི་དོན་སྒྲོན་མ་གསལ་བའི་རྒྱན་ལས་རྒྱས་པར་བསྟན་པས་དེར་ཤེས་པར་བྱའོ། །
གཉིས་པ་ལའང་། ངོ་བོ། ངེས་ཚིག །གནས་ཚུལ། བྱེད་ལས་སོ། །དང་པོ་ནི། སྔར་ཐུན་མོང་དུ་བཤད་ཟིན་ཏོ། །གཉིས་པ་ངེས་ཚིག་ནི། འདི་ལ་བརྟེན་ནས་རང་བཞིན་དུ་ཟས་ཀྱི་རོ་དང་། འཁྲིགས་པའི་བདེ་བ་ལ་སོགས་པའི་བདེ་བ་རོ་ལེན་པའམ་ཉམས་སུ་མྱོང་བའི་ཕྱིར་དང་། ལམ་པས་བཅུད་ལེན་དང་། ཁྱད་པར་གཏེམ་པའི་མན་ངག་གིས་ཟས་མཆོག་དང་འདྲ་བའི་རོ༵་མྱོང་ཞིང་། ཐབས་ལམ་སྟེང་འོག་གི་སྒོ་ལ་བརྟེན་པའི་ཐིག་ལེའི་འཁྲུལ་འཁོར་གྱིས་གཟུང་རྟོག་རང་སར་གྲོལ་ཞིང་བདེ་སྟོང་བརྗོད་པ་དང་བྲལ་བའི་ལྷན་ཅིག་སྐྱེས་གཉིས་ཀྱི་རང་བཞིན་ཐུན་མོང་མ༵་ཡིན་པའི་རོ་ཉམས་སུ་མྱོང་བའི་ཕྱིར་རོ༵་ཞེས་བྱ་ལ། རྩ་སྟོང་ཕྲག་ཉེར་བཞི་དང་། བདེ་སྟོང་གི་ཡེ་ཤེས། ལུས་ཀུན་སྐྱེད་པའི་མ༵་ལྟ་བུར་གྱུར་བས་མ་ཞེས་བྱའོ། །རྐྱང་མ་ནི་རང་བཞིན་གྱི་ཐིག་ལེ་གནས་པའི་སྣོད་ཡིན་པས་ན་གཅུད་པའི་མན་ངག་ལ་བརྟེན་ནས་ཆོས་ཉིད་རྐྱང༵་བའམ་རྗེན་པ། འཛིན་པའི་རྣམ་པར་རྟོག་པའི་ཡན་ལག་བྲལ་བའི་དོན་རྒྱུད་ལ་བསྐྱེད་པའི་མ༵་ལྟར་གྱུར་བ་ངེས་ཚིག་གོ །འདིའི་ངེས་ཚིག་ཡལ་ག་མེད་པར་བཤད་པ་ནི་དེ་ཡིན་གྱི་རིང་བུ་ཡལ་ག་མེད་པ་གཞན་དང་མ་འབྲེལ་བ་ལ་བྱས་ན། གནས་ཉེར་བཞིའི་རྩའི་ནང་ནས་བཅུ་བཞི་གཡོན་གྱི་ཆར་སྐྱེས་ཤིང་བརྟེན་པར་བཤད་པས་མི་འགྲིགས། གཞན་དང་མ་འབྲེལ་བའང་མཁལ་མའི་རྩ་ཆེན་དང་གཡོན་གྱི་ཨ༵་ཌ༵་ལ༵་འབྲེལ་བས་མ་ངེས་སོ། །འདི་ལ་དུས་འཁོར་ལས་ལུག་དང་། སེར་སྐྱའི་རྩ་ཞེས་བཏགས་སོ། །
གསུམ་པ་ལུས་ལ་ཇི་ལྟར་གནས་ཚུལ་ནི། །དེ་ཡང་དབུ་མའི་གཡས་སུ་རོ་མ་དང་། གཡོན་དུ་རྐྱང་མ་ཡོད་དེ། གཏུམ་པོའི་ཁྲོ་བོའི་རྒྱུད་ལས། རྐྱང་མ་ཤེས་རབ་རང་བཞིན་ཏེ། །གཡོན་གྱི་རྩ་རུ་རབ་ཏུ་གྲགས། །རོ་མ་ཐབས་ཀྱི་རང་བཞིན་གྱི། །གཡས་པ་ལ་ནི་ཡང་དག་གནས། །ཞེས་སོ། །དེ་ཡང་རོ་མ་ལྟེ་འོག་སོར་བཞིའི་མཚམས་ཀྱི་གཡོན་ནས་འཁྱིལ་ཞིང་། །དེ་ཡན་ཆད་ཀྱི་གཡས་སུ་སོང་། རྐྱང་མ་དབུས་ནས་བཟུང་སྟེ་གཡོན་དུ་སོང་ཞིང་ཡོད། དབུ་མ་གཡས་ནས་ལམ་བྱུང་ཞིང་དབུས་རྒྱང་གྱིས་ཐོན་ཏེ་དྲང་བོར་གནས་ལ། རོ་རྐྱང་གཉིས་ཀའི་ཤིང་ལ་སྦྲུལ་གྱིས་དཀྲིས་པ་ལྟར་མདུད་པའི་ཚུལ་དུ་འཁྱུད་ནས་ཡོད་དེ། དེ་ཡང་གསང་འཁོར་ནས་གྱེས་ཏེ། རྐྱེན་འཁོར་དུ་འདུས། དེ་ནས་གྱེས་ཏེ་ལྟེ་བར་རྩ་གསུམ་ནང་གཅིག་ཏུ་གྱུར་ནས་མཁལ་མའི་རྩ་ཆེན་གཉིས་དང་འབྲེལ་བར་གྱེས། ལྟེ་སྙིང་གི་འཁོར་མཚམས་སུ་འདུས། སླར་ཡང་སྙིང་ཀའི་གཡས་ཀྱི་རྩ་སེར་སྐྱ་དང་། གཡོན་གྱི་ཨི་ཌ་ཞེས་བྱ་བ་ལ་འབྲེལ་བའི་སྙིང་ཁར་ཅུང་ཟད་འདུས་ཤིང་། ཡང་གྱེས་ནས་མཆན་འོག་གི་སྙིང་རྩ་རྡུལ་འདུ་༼ དྷཱུ་ཏཱི་དཔྱད། ༽ ལ་བརྒྱུད་དེ་མགྲིན་པར་འདུས་ཤིང་། རྩེ་ཆུང་དུ་བརྒྱུད་ནས་རྣ་བའི་འོག་ནས་ཕུག་ཏེ་ལྗོན་ཤིང་གི་རྩ་ཞེས་ཀླད་པ་ལ་སོང་ཏེ་ཚངས་བུག་ཏུ་འབྲེལ་བས་དབང་པོའི་སྒོ་ཐམས་ཅད་དུ་ཁྱབ་ཅིང་། སྣ་བུག་གཉིས་སུ་ཡར་སྣ་ཟུག་གོ །འཁོར་མཚམས་དང་འཁོར་ལོར་འདུ་བའི་ཚུལ་གྱིས་ནོར་བུའི་རྩེའི་བར་དུའང་སོང་བར་གནས་པའོ། །དེ་ཡང་རིན་ཆེན་ཕྲེང་བའི་རྒྱུད་ལས། སྤྱི་བོར་ཚངས་པའི་བུ་ག་ནས། །གསང་བའི་འཁོར་ལོ་ཡན་ཆད་དུ། །ཨ་ཝ་དྷཱུ་ཏཱི་ཙནྡན་ ༼ ཀྱི་ལྡོང་པོ་ལྟར་དྲང་པོར་མཆན། ༽ གནས། །ལ་ལ་ར་ས་སྦྲུལ་ལྟར་གནས། །གཞན་རྣམས་བ་ཐག་ཁུག་པར་གནས། །འདི་རྣམས་རང་བཞིན་ཀུན་ལ་གནས། །ཞེས་དང་། དཔལ་ནམ་མཁའ་དང་མཉམ་པའི་རྒྱུད་ལས། མི་ཤེས་པ་ཡི་རབ་རིབ་ཀྱིས། །རིན་ཆེན་སེམས་ནི་དྲི་ཅན་བྱས། །འདི་ནི་རྣམ་རྟོག་རླུང་ཡིན་ཏེ། །འདི་ཉིད་ཀྱིས་ནི་ལམ་གྱུར་བ། །རོ་མ་དང་ནི་རྐྱང་མའོ། །སྦྲུལ་འཁྱིལ་ལྟ་བུའི་རྣམ་པ་སྟེ། །ཞེས་སོ། །དེར་མ་ཟད་དབུ་མའི་སྐབས་སུ་བཤད་པ་ལྟར། རོ་རྐྱང་གཉིས་ཀའི་ཡང་ཚན་རེ་རྐང་མཐིལ་གཉིས་ནོར་བུའི་རྩེའི་བར་ཡོད་པར་རྗེ་བདག་ཉིད་ཆེན་པོའི་གསུངས་སོ། །དེ་ཡང་རོ་མའི་ཡར་སྣའི་ཟུག་མཚམས་ཀྱི་སྤྱི་བོར་བདེ་ཆེན་གྱི་འཁོར་ལོའི་དབུས་སུ་དཀར་ཆའི་དྭངས་མ་ཕ་ལས་ཐོབ་པའམ་ཐབས་ཀྱི་རང་བཞིན་ཧཾ་ཡིག་བཞུགས་པ་ནས། གནད་མེད་པས་རོ་མའི་རིགས་འཛིན་པ་ཀུན་ཏུ་དཀར་ཆ་འཕྲོ་ཞིང་། ལམ་གྱི་གནད་དང་ལྡན་པས་དེར་དཀར་ཆ་ཀུན་བརྟན་པས་ན་ཁ་སྟེང་དུ་ཡོད་པར་གསུངས་བའི་མཐར་ཐུག་གི་༼ ནང་གི་ཁམས་དཀར་དམར་རྙིང་མས་གོ་བརྗེས་པ་ནི་རྒྱུད་དཀྲུགས་པ་མན་ངག་གི་རྒྱུད་ཀྱི་དྲང་པོར་སྡེབ་པའོ། །མཆན། ༽དོན་ནོ། །རྐྱང་མའི་ལྟེ་བར་ཟུག་མཚམས་ལས་མ་ལས་ཐོབ་པའི་རཀྟ་དམར་ཆ་ཀུན་གྱི་དྭངས་མ་ཨ་ཐུང་ཤེས་རབ་ཀྱི་རང་བཞིན་ལས་ཉི་མའི་འཕྲོ་འདུ་བྱེད་པས་ཀྱང་ཁ་འོག་ཏུ་བརྟན་པར་གསུངས་པའོ། །དེ་ཡང་ཁ་སྦྱོར་ལས། མགྲིན་པ་ནས་བཟུང་གཡོན་པའི་རྩ། །ལོངས་སྤྱོད་རྫོགས་པའི་སྐུ་ཅན་མ། །ལྟེ་བའི་ནང་དུ་ངལ་བསོའི་ཤིང་། ཁ་ནི་འོག་ཏུ་མྱོས་བྱེད་འབབས། །གང་ཞིག་ལྟེ་བ་ལ་སྟེ་རྩ། །དེ་བཞིན་ཁ་ནི་སྟེང་དུ་འབབས། །མགྲིན་པའི་ནང་དུ་ངལ་བསོའི་ཤིང་། ཁྲག་ནི་འབབ་པར་རབ་ཏུ་གྲགས། །མྱོས་བྱེད་ཟླ་བ་ཞེས་བྱར་བཤད། ཁྲག་ནི་ཉི་མ་ཞེས་སུ་གསུངས། ཞེས་སོ། །ཡང་རོ་མ་ནས་ཁྲག་རྐྱང་མར་བྱང་སེམས་གནས་པའི་ཕྱིར་དང་། ཁྲག་ཕྱིར་འཕེན་པ་དང་། ནང་དུ་སྡུད་པའི་བྱ་བ་རོ་མའི་ཡར་སྣའི་མགྲིན་པའི་བུག་པས་བྱེད་པས། ཁྲག་འབབས་པར་ནི་རབ་ཏུ་གྲགས། ཞེས་སོགས་དང་། རྐྱང་མ་ལའང་སྟེང་འོག་གཉིས་ཀ་ན་བུག་པ་ཡོད་ཀྱང་། ལྟེ་བ་ཁོ་ནས་ཡོད་པར་བཤད་དོན་ཁུ་བ་ཕྱིར་འཕེན་པ་དང་ནང་དུ་སྡུད་པ་གཉིས་ལྟེ་བ་ནས་བྱེད་པའི་ཕྱིར་ཡིན་ནོ་ཞེས་གསུངས་སོ། །འགྲེལ་ཚུལ་གཉིས་པོ་འདི་ལས་རྒྱུད་དེའི་གདོང་གཏད་ཀྱི་ཚིག་དོན་ནི་ཕྱི་མ་ལྟར་ལ་རྩ་འདི་དག་གི་ཡར་སྣ་སྤྱི་བོར་ཟུག་པ་དང་། མར་སྣ་རྐང་མཐིལ་དང་། ནོར་རྩེའི་བར་དུ་ཡོད་པའི་ལྟེ་མགྲིན་དགོངས་པ་འདི་དག་རྐེད་པ་ཙམ་དུ་གནས་པའི་གོང་མ་ལྟར་རོ། །གཞན་ཡང་ཡོད་དེ་དེ་གཉིས་ཀྱི་སྟེང་གི་རྩེ་མོ་རྐན་གྱི་ཕུག་ནས། འོག་གི་རྩེ་མོའམ་ཁ་ནི་ལྟེ་བའི་རྩ་གསུམ་གཅིག་ཏུ་གྱུར་པའི་བར་ལ་རླུང་འབྱུང་འཇིག་གི་ཚུལ་གྱིས་ཀྱང་ཡིན་ཏེ། དེ་ལྟར་བཤད་ན་རྩ་ གསུམ་འདུས་མདོ་ནས་གཡས་རྩ་བརྒྱུད 
་དེ་རླུང་སྣ་བུག་གཡས་འབྱུང་བའི་ལམ་དུ་གསུངས་པས་ན་ཁ་སྟེང་དུ་ཡོད་ཅེས་དང་། ནང་དུ་སྣ་བུག་གཡོན་པ་ནས་ནང་དུ་འོང་ནས་བསྐྱེད་བྱེད་ཀྱི་ཙཀྲའི་བར་དུ་འཇུག་པའི་དོན་གྱིས་རྐྱང་མའི་ཁ་འོག་ཏུ་ཡོད་ཅེས་གསུངས་སོ་སེམས་ཏེ། ཤེས་བྱེད་རྒྱུད་རྒྱུད་ཀྱིས་བཤད་ན། བདེ་མཆོག་འབྱུང་བའི་རྒྱུད་ལས། གཡས་དང་གཡོན་དུ་སྦྱོར་བ་ཡིས། །རིམ་པ་ཅི་བཞིན་རྒྱུ་བ་སྟེ། །གཡོན་དུ་རྐན་ནས་བཟུང་ནས་ནི། །ལྟེ་བའི་དཀྱིལ་འཁོར་རབ་འཇུག་པའི། །ཟླ་བའི་རྩ་ནི་འོག་བལྟས་ཏེ། །ཨ་ལི་ཟླ་བ་ཡང་དག་འབབས། །གཡས་སུ་ལྟེ་བ་ནས་བཟུང་ཏེ། །རྐན་གྱི་གནས་སུ་རབ་འཇུག་པའི། །ཉི་མའི་རྩ་ནི་སྟེང་བལྟས་ཏེ། །ཀ་ལི་ཉི་མར་རྟག་ཏུ་འབབས། །སྣ་ཡི་སྒོ་ནི་གཉིས་པོ་ནས། །རྩ་གཉིས་རྒྱུ་བའི་མཚན་ཉིད་ནི། །རྩ་གཡོན་འཇུག་པའི་ལམ་ཡིན་ཏེ། །གཡས་པ་འབྱུང་བའི་ལམ་ཡིན་ནོ། །ཞེས་དང་། ཡང་རིན་ཆེན་འབར་བའི་རྒྱུད་ལས་ནི། གཡས་ནི་ཐབས་ཡིན་ལ་ལ་ན། །གཡོན་པ་ཤེས་རབ་ར་ས་ན། ཞེས་གསུངས་དེ་རོ་རྐྱང་གཡས་གཡོན་གོ་བརྗེས་པ་དང་། རྒྱུད་གཞན་ནས་རོ་མ་གཡས་སུ་ཐབས་དང་། རྐྱང་མ་གཡོན་ཤེས་རབ་ཏུ་གསུངས་པས་ན་མི་འགྲིགས་སྙམ་པའི་རྟོག་གེ་དང་། ཁམས་ཀྱི་རྣམ་གྲང་རྙིང་མའི་རྒྱུད་ལས། གཡས་སུ་ཁུ་བ་བྱང་ཆུབ་ཀྱི་སེམས། གཡོན་དུ་རྡུལ་པདྨ་རཀྟ་འབབ་པར་གསུངས་ན། ཐུན་མོང་གི་རྒྱུད་རྣམས་ན་གོ་ལྡོག་ཏུ་ཡོད་དེ་མི་འཐད་པར་སེམས་ན་འགལ་བ་མེད་པར་གཉིས་ཀ་ན་ཤེས་ཆེ་ཆུང་ཙམ་མ་གཏོགས་པར་ཟླ་ཉི་འདྲེས་པར་འབབས་པས་ན་རྗེ་བདག་ཉིད་ཆེན་པོའི་རྫོགས་རིམ་གྱི་སྤྱི་དོན་ལས། གཡས་ན་རོ་མ་གནས་ཤིང་དེའི་ནང་ན་ཁུ་བ་དང་ཅུང་ཟད་འདྲེས་པའི་ཁྲག་ཕལ་ཆེར་འབབས་སོ། །ཞེས་དང་། རྐྱང་མ་གཡོན་ན་ཡོད་དེ་ཁྲག་དང་ཅུང་ཟད་འདྲེས་པའི་ཁུ་བ་ཕལ་ཆེར་འབབས། ཞེས་གསུངས་ཤིང་རོ་མ་ཤེས་རབ་དང་རྐྱང་མ་ཐབས་ཀྱི་རྩར་གསུངས་ནའང་། གོང་གི་རྒྱུད་འདིའི་དགོངས་པ་ཐད་སོ་ཡིན་པས་དང་། རྒྱུད་སྡེ་ ༼ བདེ་དགྱེས་སོགས་ནས་རོ་མ་ཐབས་དང་རྐྱང་མ་ཤེས་རབ་ཀྱི་རང་བཞིན་དུ་གསུངས་པ། མཆན། ༽གཞན་བསྒྲིགས་ཚུལ་ཞིག་ལས་འགལ་བ་ནི་མ་ཡིན་ཏེ། དེའི་སྒྲུབ་བྱེད་དུ་རོ་མ་ལ་འདི་ལྟར་གསུངས་ཏེ་ཤེས་རབ་ཀྱི་རྩ་ཞེས་བྱ་སྟེ་ཁྲག་གཙོ་བོར་འབབས་པའི་ཆ་ནས་ཡིན་པ་འདྲ་ཞེས་། རྐྱང་མ་ལ་ཐབས་ཀྱི་རྩ་ཞེས་བྱ་སྟེ་ཁུ་བ་འབབ་པའི་ཆ་ནས་ཡིན་པ་འདྲ་ཞེས། ཟླ་བ་ཐབས་དང་རཀྟ་ཤེས་རབ་ཀྱི་རང་བཞིན་དུ་གསུངས་སོ། །རྡོ་རྗེའི་གསུངས་འདི་རྙིང་མའི་རྒྱུད་ཀྱི་དག་བྱེད་ཀྱང་ཡིན་ཏེ་དཀར་ཆ་ཐབས་སུ་འདོད་པ་མཐུན་པའི་ཕྱིར་དང་། དེ་ཡང་ཡིན་ཏེ་རིན་ཆེན་འབར་པའི་རྒྱུད་ལས། འདོད་ཆགས་རྡུལ་ལ་ལུས་ནི་ཐབས། ཞེས་རྐྱང་མ་ན་དམར་ཆ་དང་། རོ་མ་ན་དཀར་ཆ་ཡོད་པར་བཤད་ལ། བདེ་མཆོག་འབྱུང་བའི་རྒྱུད་ལས། རླུང་ནི་བཅོམ་ལྡན་ཧེ་རུ་ཀའི། །རང་བཞིན་ཉིད་དེ་གསུམ་དུ་འགྱུར། །གཡོན་པ་ཤེས་རབ་རང་བཞིན་ཏེ། །གཡས་པ་སྙིང་རྗེའི་བདག་ཉིད་དོ། །ཞེས་གསུངས་སོ། ༼ རྡོ་རྗེའི་ལུང་འདི་དག་གི་ཚུལ་ལས་གཞལ་ནའང་། སྐབས་འགར་རྩ་རླུང་རླུང་ཁམས། རྩ་ཁམས་ཐབས་ཤེས་ལས་བསམ་ ༼ སེམས་དཔྱད་ ༽ཟུང་འཇུག་གི་དགོངས་བས་བཤད་པ་མང་པས་རྣམ་པ་གཅིག་ཏུ་འཐས་སུ་པར་མི་རིག་སྙམས་སོ། ༽རྐྱང་མ་ན་ཤེས་རབ་དང་། རོ་མར་ཐབས་ཀྱི་རླུང་ཡོད་པས་ན། དེ་དག་གི་ནང་གི་ཁམས་མ་ལས་ཐོབ་པའི་ཨ་ཐུང་ཕག་མོའི་རང་བཞིན་ལས་མཆེད་པའི་དམར་ཆ་ཤེས་རབ་ཀྱི་རང་བཞིན་ཏུ་གཙོ་ཆེར་ཤེས་རབ་ཀྱི་རྩ་རྐྱང་མ་ན་འབབས་པར་འཐད། ཡབ་ཧེ་རུ་ཀའི་ངོ་བོ་ཕ་ལས་ཐོབ་པ། ཧཾ་ལས་མཆེད་པའི་དཀར་ཆ་ཐབས་ཀྱི་རང་བཞིན་དེ་ཐབས་ཀྱི་རྩ་རོ་མ་ནས་འབབས་པར་འཐད་ཡང་སྔར་རླུང་འབྱུང་འཇུག་གིས་རོ་རྐྱང་གི་ཁ་འགྲེལ་ ༼ འབྲེལ་དཔྱད་ ༽བ་ལྟར། འདིར་ཡང་རྒྱུད་གཞན་ལས་ ༼ གཡས་སུ་ཕོ་རླུང་གཡོན་དུ་མོ་རླུང་རྒྱུ་བར་བཤད་པས་མཆན། ༽རླུང་དང་བསྟུན་ནས་ཁམས་ ༼ དཀར་ཆ་ཤེས་རབ་དང་དམར་ཆ་ཐབས་སུ། ༽དཀར་དམར་ཀྱང་གསུངས། རྙིང་རྒྱུད་ལས་རླུང་མཐུན་ཀྱང་ཁམས་ནི་ཨ་ཧཾ་དང་ཐབས་ཤེས་ཀྱི་རང་བཞིན་དང་རྩ་གཙོ་བོར་བྱས་ཏེ་གསུངས་པའང་ཡིན་ལ། འོན་ཀྱང་གཙོ་ཆེ་ཆུང་ཙམ་ལས་རང་བཞིན་དུ་ནི་གཉིས་ཀའང་འབབ་པས་རྒྱུད་སྡེ་དགོངས་ཀློང་གཅིག་ཏུ་རིག་སྟེ། གང་ལྟར་ཉམས་སུ་བླངས་ཀྱང་འགྲུབ་འབྲས་འབྱིན་པ་ལ་ནི་ཁྱད་པར་ཅུང་ཟད་ཀྱང་མེད་པའི་གནད་རྣམ་པ་ཀུན་ཏུ་ཐབས་ ༼ རྩ་རླུང་རླུང་ཐིག་ཐིག་སེམས་མཆན། ༽ ཤེས་འདུ་འབྲལ་མེད་པས་སོ། །དེའི་ན་རོ་མ་ཐབས་ཀྱི་རྩ་ཡིན་པས་ལུས། སྐྱེས་པ། ཞེ་སྡང་། སྙིང་སྟོབས། ཟླ་བ་འབབས་པ་སྐུ་དང་སྤྲུལ་སྐུའི་རྟེན་དུ་འཐད། རྐྱང་མ་ཤེས་རབ་ཀྱི་རྩ་ཡིན་པས། ངག་བུད་མེད་འདོད་ཆགས་རྡུལ་ཉི་མ་འབབས་པས། གསུང་དང་ལོངས་སྐུའི་དབུ་མ་གཉིས་མེད་ཀྱི་རང་བཞིན་ཡིན་པས། ཡིད་དང་མ་ནིང་གཏི་མུག་མུན་པ་རླུང་འབབས་པ། ཐུགས་རྡོ་རྗེ་དང་ཆོས་སྐུའི་རྟེན་ཡིན་པར་སྔར་བཤད་པ་དང་། ད་ལྟར་གྱི་སྐབས་དོན་གཉིས་ཀ་འཐད་བའི་རྒྱུ་མཚན་ཡང་འདིའི་ཕྱིར་ཡིན་པས་བཟློས་པར་མི་འགྱུར་བ་དང་བཅས་པའོ། །ཡང་རོ་མ་ན་ཕོའམ་མའི་རང་བཞིན་པདྨ་མགོན་པོའི་རླུང་འབབ་པའི་ཕྱིར་གསུང་འོད་དཔག་མེད་པའི་རྩ་ཡིན་པས་ཁ་དོག་དམར་པོར་གསུངས། རྐྱང་མ་ན་མོའམ་ཆུའི་རང་བཞིན་ལས་ཀྱི་མགོན་པོའི་རླུང་འབབས་པ་རྣམ་སྣང་གི་རྩ་ཡིན་པས་ཁ་དོག་དཀར་པོ་ཐུན་མོང་གི་རྒྱུད་རྣམས་ལས་གསུངས་པ་དང་། རྙིང་མའི་སྒོས་རྒྱུད་རྣམས་སུ་རོ་རྐྱང་དབུ་མ་གསུམ་སྐུ་གསུམ་གྱི་རང་བཞིན་དུ་གསུངས་པ་ནི། བདེ་མཆོག་འབྱུང་རྒྱུད་ལས། རོ་རྐྱང་དབུ་གསུམ་སྤྲུལ་ལོངས་ཆོས་གསུམ་དུ་གསུངས་པས་ན། སྐུ་རྡོ་རྗེ་སྤྲུལ་སྐུའི་རང་བཞིན་རཱ་ས་ན་རྣམ་སྣང་གི་རྩ་དཀར་པོ་དང་། གསུང་རྡོ་རྗེ་ལོངས་སྤྱོད་རྫོགས་པའི་སྐུའི་རང་བཞིན་ལ་ལ་ན་འོད་དཔག་མེད་ཀྱི་རྩ་ཡིན་པས་དམར་པོ་དང་༔ ཐུགས་རྡོ་རྗེ་ཆོས་ཀྱི་སྐུ་མི་བསྐྱོད་པའི་རྩ་དབུ་མ་སྔོན་པོར་གསུངས་པའོ། །ཡང་རྙིང་མ་དག་གིས་ཀྱང་ན་རེ། སྣ་བུག་གཡོན་པ་རྐྱང་མའི་རྩེ་ནས་ལས་ཀྱི་མགོན་པོའི་རླུང་ལྗང་སེར་དག་ཏུ་འབབས་པར་གསུངས་པས་ན། རྐྱང་མ་ན་ཆུ་རླུང་ཡོད་པར་གསུངས་པ་གཉིས་ཀྱང་འགལ་ལོ། ལས་ཀྱི་མགོན་པོའི་རླུང་འབབས་པའི་རྩ་དེ་ཡང་རྣམ་སྣང་གི་ཡིན་པ་དང་འགལ། ཡང་ན་ལས་ཀྱི་མགོན་པོ་མི་འབབས་ཟེར་རོ། །དེའི་ན་རྒྱུད་གཞན་དག་དཀྲུགས་པ་ལ། མན་ངག་རྒྱུད་ཀྱི་མཐར་ཐུག་གི་དགོངས་པ་སྒྲ་ཅི་བཞིན་པར་ ༼ འདི་ལ་རོ་རྐྱང་གཉིས་ཐབས་ཤེས་ཀྱི་རྩ་ཡིན་པར་གསུངས་པ་དང་། གཡས་སུ་ཐབས་སྙིང་རྗེ་གཡོན་དུ་ཤེས་རབ་ཀྱི་རླུང་ཡོད་པར་གསུངས་པ་དང་། ཨ་ཧཾ་གཉིས་ཐབས་ཤེས་སུ་ངེས་པའི་རྒྱུ་མཚན་དག་གི་དཀར་ཆ་ཤེས་རབ་གཡོན་རྩ་དམར་ཐབས་གཡས་སུ་བཞགས་པ་དཀྲུགས་པར་ཤེས་སོ། ༽སྡེབ་ནས་བསྟན་ཡོད་པས་རྟེན་པར་བྱ་བའི་སྙིང་པོར་ཡང་དེ་ཉིད་ལེགས་སོ། །
བཞི་བ་བྱེད་ལས་ལ་གཉིས་ལས་དང་པོ་ནི་རོ་མའི་མར་སྣས་དྲི་ཆེན་འབབས་པའི་ལས་བྱེད། རྐྱང་མས་དྲི་ཆུ་འདོར་བའི་ལས་བྱེད་པར་གསུངས་ཏེ། སྔར་བཤད་པ་ལྟར་དབུ་མས་ཁུ་བ་དབབས་ལྡོག་ལ་སོགས་པའི་ལས་བྱེད། ལམ་གྱི་གནད་ལ་མཁས་ན། ལུས་ངག་ཡིད་གསུམ་གྱི་ལས་དག་པར་བྱེད། བདེ་གསལ་མི་རྟོག་པའི་ཡེ་ཤེས་གསུམ་མཚོན་པར་བྱེད་དོ། །རོ་མས་ཟས་འདོར་ལེན། རྐྱང་མས་དྲོད་འཕེལ་འགྲིབ་དུ་བྱེད། དབུ་མས་སྐོམ་མི་སྐོམ་གྱི་བྱེ་བྲག་སྟོན་པ་དང་། གནད་དང་ལྡན་པས་ཟས་གོས་སྐོམ་གསུམ་དང་། རྨི་ལམ་གྱི་ཞེན་ཆོད་པར་ཡང་གསུངས་སོ། །
གཉིས་པ་ཐུན་མིན་གྱི་རང་ལུགས་བྱེ་བྲག་ཏུ་སྨོས་པ་ནི། སྔར་དབུ་མའི་སྐབས་སུ་བཤད་པ་ལྟར་འདིར་རོ་རྐྱང་གཉིས་ལའང་རྩ་ཡེ་ཤེས་སེམས་དཔའ་ཡོད་པའི་སྟབས་ཀྱིས་རོ་མའི་མདུད་པ་བཞིན་ཀུན་རྫོབ་རྒྱུའི་ཐིག་ལེ་བཞི་དང་། དེའི་དྭངས་མས་སྒྲོན་མའི་གདངས་སྟོན་པར་གསུངས་བས་ཡེ་ཤེས་ཀུན་རྫོབ་རྒྱུའི་ཐིག་ལེའི་ཡེ་ཤེས་སེམས་དཔའ་ཡོད་པར་བསྟན། རྐྱང་མའི་མདུད་པ་བཞིན་དྭངས་མར་རང་བཞིན་གྱི་ཐིག་ལེ་བཞི་དབུ་མའི་འཁོར་ལོ་བཞིའི་དྭངས་མའི་རྩ་ནང་ན། དོན་དམ་ཆོས་ཉིད་ཀྱི་ཐིག་ལེ་བཞི་གནས་པ་ཡིན་ནོ། །དེས་ན་དེ་དག་ཡོད་པའི་གནད་ཀྱིས་སྦ་བ་དང་གཅུན་པ་གཞིལ་བའི་གནད་གསུམ་གྱིས་རོ་མས་ལུས་སྐུ་གསུམ་ ༼ མམ་སྐུ་ལྔའི་ ༽དཀྱིལ་འཁོར་ཏུ། རྐྱང་མས་ངག་གནས་བརྗོད་ཟད་པ་ ༼ གསུངས་ལྔའི་དཀྱིལ་འཁོར། ༽བསམ་གཏན་ཏིང་འཛིན་གྱི་ཆོས་ཉིད་དང་བཅས་པར་གསང་སྔགས་ཀྱི་རང་སྒྲར་ཀུན་འདར་མས་རྟོགས་པ་ཆོས་ཉིད་ཀྱི་ངང་དུ་དྲན་བསམ་རང་ཟད་ཀྱི་དགོངས་པ་ ༼ ཐུགས་ལྔར། ༽འཆར་བའི་ཡེ་ཤེས་ཀྱི་ལས་ཀྱང་བྱེད་པའོ། །དེས་ན་ཐལ་འགྱུར་ལས། བྱེད་པའི་ལས་དང་མཚན་ཉིད་དང་། །ཉོན་མོངས་ལས་དང་ཡེ་ཤེས་ལས། །ཞེས་དང་། དེ་ལྟར་རྩ་ཡི་གནད་ཀྱིས་ཀྱང་། །སངས་རྒྱས་གནས་ནི་མཚོན་པའོ། །ཞེས་སོ། །རྩ་འདི་དག་མེད་ན་བསྒོམ་པའི་འབྲས་བུ་འབྱུང་རུང་ཙམ་ལས་རྩ་རླུང་ཐིག་ལེ་གནད་དུ་བསྣུན་པའི་དངོས་འབྲས་སྐུ་གསུམ་གྱི་དགོངས་པ་བདེ་གསལ་མི་རྟོག་པའི་ལྷན་སྐྱེས་འཆར་མི་སྲིད་པར་ཐལ་ལོ། །མ་ཟད་རྫོགས་པ་ཆེན་པོའི་རྟགས་ཀྱི་ངོ་སྤྲོད་དུ་རྩ་ཕྲན་གྱི་རྩེ་མོའི་བ་སྤུའི་ཁུང་བུ་ཀུན་ལས་འོད་ཀྱི་ཐིག་ལེ་འཆར་བའི་རྩ་རླུང་ཐིག་ལེའི་ཡེ་ཤེས་སེམས་དཔའ་ཡོད་པར་གསུངས་པ་ཡིན་ནོ། །འདི་ནི་རང་གིས་བརྣག་པར་བྱ་བ་ལས་ཚོགས་པར་དབྱུང་དུ་རུང་པ་མ་ཡིན་ནོ། །
གསུམ་པ་གཙོ་མོའི་དོན་བཤད་པ་ནི། རྩ་སྟོང་ཕྲག་བདུན་ཅུ་རྩ་གཉིས་བསྐྱེད་པའི་མ་ལྟ་བུར་གྱུར་པའི་ཕྱིར་དང་། ལུས་ཀྱི་དབུས་ན་རྩ་ཐམས་ཅད་ཀྱི་རྟེན་ནམ་རྒྱལ་པོ་ལྟ་བུར་ཁམས་དང་རླུང་གི་འཕྲོ་འདུས་གཞི་མར་གྱུར་པའི་ཕྱིར་དང་འདི་གསུམ་མེད་ན་ཐོག་མར་བསྐྱེད་པའི་རྩ་བ་དང་། ད་ལྟའང་བརྟེན་པའི་གཞི་མེད་པའི་ལྗོན་ཤིང་གི་སྡོང་པོ་བཞིན་དུ་གཙོ་ཆེ་བས་ན་གཙོ་མོ་ཞེས་བྱ་སྟེ། སྡོམ་འབྱུང་ལས། བདུན་ཅུ་རྩ་གཉིས་སྟོང་ཕྲག་རྣམས། །ལུས་ཀྱི་རྗེས་འབྲང་རྩ་རུ་འགྱུར། །རྩ་དང་ཉེ་བས་རྩ་རྣམས་ཏེ། །དེ་རྣམས་གནས་ན་བརྟེན་པའོ། །ཉི་ཤུའི་ལྷག་པའི་བརྒྱ་ཡིས་ནི། །རྩ་ཡི་འཁོར་ལོ་བརྗོད་པར་བྱ། །རྩ་ཡི་གནས་དང་ཡུལ་རྣམས་ནི། །ཉི་ཤུ་རྩ་བཞིའི་གྲངས་ཡིན་ཏེ། །དེ་རྣམས་གནས་ན་རྩ་གསུམ་ནི། །རྟེན་དང་ཀུན་ཏུ་འགྲོ་བའོ། །ལ་ལ་ན་ལ་སོགས་པའི་རྩ། །རྩ་རྣམས་ཀུན་གྱི་གཙོ་བོ་སྟེ། །དེ་ཉིད་ཕྱིར་ན་གཞན་གྱི་རྟེན། །གངྒཱ་སིནྡྷུར་གཞན་འཇུག་བཞིན། །ཞེས་སོ། །རིན་ཆེན་འབར་བའི་རྒྱུད་ལས། རྩ་ཡི་གཙོ་བོ་ཉིད་རྣམས་ནི། །གསུམ་པོ་ངེས་པ་ཞེས་ནི་བྱ། །ཞེས་རྡོར་ཕྲེང་ལས་ཀྱང་བཤད་དོ། །
བཞི་བ་ལྷ་དང་སྦྱར་བ་ནི། །སྔར་སྐུ་གསུང་ཐུགས་དང་། སྐུ་གསུམ་གྱི་བདག་ཉིད་དུ་བཤད་པ་དེའི་ཀྱང་འཐུས། ཁྱད་པར་དུ་དུས་ཀྱི་འཁོར་ལོའི་རྒྱུད་ལས་སྙིང་ཀའི་སྲོག་དང་བཅས་པའི་རྩ་དབུ་མ་ནི་དུས་འཁོར་དང་། རོ་རྐྱང་གཉིས་དེའི་ཞབས་ཀྱི་རང་བཞིན། ཡེ་ཤེས་ཀྱི་སྣང་བ་ནི་སྣ་ཚོགས་ཡུམ་ཡིན་པར་གསུངས་བ་དང་། འཁོར་ལོ་སྡོམ་པར་རོ་རྐྱང་དབུ་མ་གསུམ་རྡོ་རྗེ་ཕག་མོ་དང་སྦྱར་བར་མཛད། ཀྱེ་རྡོ་རྗེ་ལས། རྐྱང་མ་རོ་མ་ཀུན་འདར་མ། བདག་མེད་རྣལ་འབྱོར་མ་ཞེས་བརྗོད། ཅེས་གསུངས་པས་དབུ་རྐྱང་རོ་གསུམ་བདག་མེད་མ་དང་སྦྱར་བར་མཛད་དོ།
གཉིས་པ་གཙོ་མོ་གཞན་བཤད་པ་ལ། ནང་དོན་གནས་པ་རྩའི་རྣམ་བཞག །ཆོ་འཕྲུལ་ཕྱིའི་གནས་ཡུལ་སྣང་ཚུལ། དཀྱིལ་འཁོར་འཁོར་ལོའི་ངོ་བོར་གྲོལ་ལུགས། ལམ་དང་སའི་རྣམ་དག་སྦྱོར་ཚུལ་ལོ། །དང་པོ་ལ། ཆགས་རིམ་ལུས་གནས་རྩའི་གྲུབ་ཚུལ་ལོ། །དང་པོ་ནི། རྒྱུད་ཀྱི་རྒྱལ་པོ་སམྦུ་ཊི་ལས་ལུས་ཀྱི་སྙིང་ཀའི་རོ་རྐྱང་དབུ་མ་གསུམ་གྱི་ཕྱོགས་བཞིར། འབྱུང་པའི་རྩ་སུམ་སྐོར། འདོད་མ། ཁྱིམ་མ། གཏུམ་མོ། དབུ་མ་དང་ལྷན་ཅིག་ཏུ་བདུད་བྲལ་མ་དང་ལྔར་གྱེས་པའི། བདུད་བྲལ་ལས་གཞན་བཞི་པོ་ལ་མཚམས་བཞིར་རེ་རེ་གྱེས་པ་ལས་བདུད་རྩི་ལྔ་འབབས་པས་མཆོད་པའི་རྩ་བཞི་ཞེས་གསུངས་ཤིང་། དེ་བརྒྱད་པོ་ལས་དཀར་དམར་རླུང་གསུམ་གྱིས་ཁྱབ་པའི་ཁམས་ཉེར་བཞི་འབབ་བའི་ཕྱིར་དང་། གནས་ཀྱི་དབྱེ་བས་སྐུ་གསུང་ཐུགས་ཀྱི་རང་བཞིན་གསུམ་ཚན་དུ་གྱེས་པས་ཉེར་བཞིར་གྱུར་བ་ལ། དཀར་ཆ་འབབས་པ་ ༼ ཀུན་རོ་མའི་རིགས་ཡིན་པའི་མཆན། ༽སྐུའི་འཁོར་ལོ་ས་འོག་ཏུ་སྤྱོད་པ། དམར་ཆ་འབབས་པ་ ༼ རྐྱང་མའི་རིགས་མཆན། ༽ཐམས་ཅད་ལ་གསུང་གི་འཁོར་ལོ་སྟེ་ས་ལ་སྤྱོད་པ་དང་། རླུང་འབབས་པ་ ༼ དབུ་མའི་རིགས་མཆན། ༽ཀུན་ལ་ཐུགས་ཀྱི་འཁོར་ལོ་ནམ་མཁའ་ལ་སྤྱོད་པ་མཁའ་སྤྱོད་ཀྱི་གནས་སུ་གསུངས་བས་གོ་རིམ་དེ་ལྟར་ཆགས་པར་འདོད་དེ། སམྦུ་ཊི་ལས། སྙིང་གའི་ནང་སོན་པདྨ་ནི། །འདབ་མ་བརྒྱད་པོ་སྙིང་པོར་བཅས། ཞེས་དང། འདབ་མ་རྣམས་ཀྱི་བཞི་ལའང་། འབྱུང་བ་བཞི་ཡི་རྩ་རྣམས་ནི། །མར་མེའི་རང་བཞིན་ལྟ་བུར་ནི། །ཕྱོག་བཞི་ལ་ནི་རྣམ་པར་གནས། །རྩ་རྣམས་བཞི་ཡང་མཚམས་རྣམས་སུ། །རྣམ་པར་གནས་ཤིང་དེར་སོན་པ། །བདུད་རྩི་ལྔ་ནི་འབབས་པ་སྟེ། །དེ་མཆོད་རང་གི་གཟུགས་གནས་པའི། །དེ་ཡིས་དངོས་པོའི་ངོ་བོ་ལས། །མཆོད་པ་བཞིར་ནི་རྣམ་པར་བཤད། །ལུས་ཀྱི་སྙིང་གའི་ནང་དུ་ནི། །རྩ་རྣམས་ལྔ་ནི་རྣམ་པར་གནས། །སྐུ་གསུང་ཐུགས་ཀྱི་དབྱེ་བ་ཡིས། །ཉི་ཤུ་རྩ་བཞིར་ཉེར་བརྗོད་དོ། །ཅེས་སོ། །གཞན་དགྱེས་རྡོར་དང་སམྦུ་ཊིའི་དགོངས་པ་འགྲེལ་བྱེད་ན་རོ་བས། རོ་རྐྱང་ལ་བཅོ་ལྔ་བཅོ་ལྔ་གསུངས་བ་དང་། རྡོ་རྗེ་སྙིང་པོའི་འགྲེལ་བ་ལ་སོགས་པ་མང་པོ་ལས་རྐྱང་མ་ལས་གྱེས་པ་བཅུ་བཞི། རོ་མ་ལས་གྱེས་པ་བཅུ་ཞེས་གསུངས་ཏེ། དེ་ཡང་དངོས་བསྟན་དུ་ས་བཅད་པ་མི་གསལ་ཞིང་རྒྱུད་རྒྱུད་ཀྱིས་བཤད་པའང་རང་གིས་ནི་མ་མཐོང་ཞིང་། རྗེ་བདག་ཉིད་ཆེན་པོའི་མན་ངག་སོགས་ལས་དེ་ལྟར་མ་གསུངས་ནའང་། དགྱེས་རྡོར་དང་སམྦུ་ཊི་ཚིག་རིས་ཕྲ་མོ་ཙམ་མ་གཏོགས་མཐུན་པར། མི་ཕྱེད་མ་དང་། ཕྲ་གཟུགས་མ་དང་། རྩེ་བ་མ་དང་། གཡོན་པ་མ་དང་། ཐུང་ངུ་མ་དང་། རུས་སྦལ་སྐྱེས་མ་དང་། སྒོམ་པ་མོ་དང་། དབང་མ་དང་། སྐྱོན་མ་དང་། འཇུག་མ་དང་། མ་མོ་དང་། མཚན་མོ་དང་། བསིལ་སྦྱིན་མ་དང་། ཚ་བ་མ་དང་། རྐྱང་མ་དང་། ཀུན་འདར་མ་དང་། རོ་མ་དང་། གཞོལ་མ་དང་། རངས་མ་དང་། ཤིན་ཏུ་གཟུགས་ཅན་མ་དང་། སྤྱི་མ་དང་། རྒྱུ་སྦྱིན་མ་དང་། སྦྱོར་བྲལ་མ་དང་། སྡུག་གུ་མ་དང་། གྲུབ་མ་དང་། འཚེད་མ་དང་། དེ་བཞིན་དུ་ཡིད་བཟང་མ་དང་། སུམ་སྐོར་མ་དང་། འདོད་མ་དང་། ཁྱིམ་མ་དང་། གཏུམ་མོ་དང་། བདུད་བྲལ་མའོ། །ཞེས་དབུ་མ་དབུས་སུ་བཙུད་དེ་གསུངས་པས་ས་བཅད་པར་བྱས་ནས་ཡས་མན་རོ་རྐྱང་གི་ཕྱོགས་སུ་བླན་པར་སེམས་སོ། །རྒྱུད་ཀྱི་དགོངས་པ་དེ་ལས་གཞན་པ་ན། ཡང་རྡོ་རྗེ་ཕྲེང་བའི་རྒྱུད་ཀྱི་ཚིག་དོན་ལ་གཞལ་ན་དབུ་མ་ལས་གྱེས་པ་བརྒྱད་རོ་རྐྱང་ལས་གྱེས་པ་བརྒྱད་བརྒྱད་དེ་ཐུགས་གསུང་སྐུའི་འཁོར་ལོར་མཛད་དོ། །༼ འདིའང་རྙིང་མའི་རོ་རྐྱང་དབུ་གསུམ་གྱི་རིག་འཛིན་པའི་རྩ་གསུངས་པའི་དོན་མཐུན། མཆན། ༽དེ་ལ་སླར་ཡང་ངོ་བོའི་སྒོ་ནས་ཐིམ་པ་ཞེས་རླུང་འབབས་བ་དང་། ལོངས་སྤྱོད་དཀར་ཆ་དང་། བདག་པོ་ཞེས་ ༼ རྗེ་རིན་པོ་ཆེའི་མན་ངག་ཏུ་འདི་གཉིས་གོ་རྗེས་ཡོད། ༽ ཁྲག་འབབས་པའི་དབྱེ་བས་གསུམ་ཚད་དུ་གྱེས་པའི་བདུན་ཅུ་རྩ་གཉིས་དེ་རེ་རེ་ལ་འཁོར་སྟོང་ཕྲག་རེ་གྱེས་པས་རྩ་བདུན་ཁྲི་ཉིས་སྟོང་ཡོད་དེ། རྡོ་རྗེ་ཕྲེང་བ་ལས། །ལ་ལ་ན་དང་རཱ་ས་ནཱ། །ཨ་ཝ་དྷཱུ་ཏཱི་ཞེས་བྱའི་མིང་། །དེ་རྣམས་སྤྲོ་བའི་སྦྱོར་བ་ཡིས། །རེ་རེའི་རིམ་གྱིས་ཐུན་བརྒྱད་བརྒྱད། །གསུམ་པོ་ཉི་ཤུ་རྩ་བཞིར་འགྲོ། །ཐིམ་དང་ལོངས་སྤྱོད་བདག་པོའི་ཕྱིར། །རིམ་གྱིས་གྲངས་ནི་བདུན་ཅུ་གཉིས། །ཅུང་ཟད་དེ་སྤྲོས་སྦྱོར་བ་ཡིས། །རེ་རེའང་སྟོང་སྟོང་དབྱེ་བ་ཡིས། །རྟག་ཏུ་གྲངས་ཉིད་འགྱུར་བ་ཡིན། །སྟོང་ཕྲག་བདུན་ཅུ་རྩ་གཉིས་སོ། །ཞེས་སོ། །
གཉིས་པ་ལུས་གནས་རྩའི་གྲུབ་ཚུལ་། ལར་འདི་དག་གི་རྩའི་ཆགས་ལུགས་ལ་ལྟོས་ན་གཙོ་མོ་གསུམ་དང་། སྦས་པའི་རྩ་ལྔ། སྙིང་གའི་རྩ་བརྒྱད། གཙོ་མོ་ཉེར་བཞིའི་རིམ་པར་བཤད་དགོས་ཀྱང་། འདིར་དགྱེས་རྡོར་དང་སམྦུ་ཊིའི་གོ་རིམ་ལྟར་ཁམས་ཀྱི་དབྱེ་བས་སོ་གཉིས་དང་། དེའི་སྟེང་དུ་དུས་འཁོར་ལས་སྦས་པའི་རྩ་ལྔ་བསྣན་ཏེ་གསུངས་པ་དང་། དོན་དུ་ཕ་མ་གཉིས་མེད་ཀྱི་རྒྱུད་ཀུན་ལས་རྩ་རླུང་ཐིག་ལེའི་དབྱེ་བས། དག་བྱ་ཁམས་དང་དག་བྱེད་བྱང་ཕྱོགས་དག་གཞི་གཞི་འབྲས་དབྱེར་མེད་དཀྱིལ་འཁོར་གྱི་འཁོར་ལོའི་ལྷ་དང་། རྒྱུད་སྡེའི་གྲངས་ཚད་སོགས་འབྱུང་བར་བསྟན་པས་དེ་ལ་བསྟུན་ནས། ཁམས་དང་གནས་ཀྱི་དབང་དུ་བྱས་ནས་གཙོ་མོ་ཉེར་བཞི་དང་། སུམ་ཅུ་རྩ་གཉིས་དང་། སོ་བདུན་དུ་བཤད་པ་གསུམ་ལས། དང་པོ་ནི། རྡོ་རྗེ་གསུམ་མི་ཕྱེད་པས་མི་ཕྱེད་མ་ནི་མཚོག་མ་ལ་གནས་པའི་རྩ་༡ རྣམ་རྟོག་ཕྲ་མོར་བྱེད་པའམ་ཤིན་ཏུ་ཕྲ་བར་སྐྱེས་པས་སམ། སྐྲ་རྩེ་ལ་སོགས་པ་བསྐྱེད་བྱའི་བསྐྱེད་བྱེད་ལ་མིང་ཆགས་པ་ཕྲ་གཟུགས་མ་ཞེས་སྤྱི་གཙུག་ཏུ་འབྲེལ་བའི་རྩ། ༢ འདོད་ཡོན་ལ་རྩེ་ཞིང་དགའ་བར་བྱེད་པས་རྩེ་བ་མ་སྟེ་རྣ་བ་གཡས་ལ་གནས་པའི་རྩའོ། ༣།ལུགས་གཞན་དུ་རྐྱང་མ་ལས་གྱེས་ནས་སམ། དབུ་མ་ལས་གྱེས་པར་འདོད་ཀྱང་འདྲ་སྟེ། དོན་སྙིང་གི་གཡོན་ནས་གྱེས་ཏེ་རྒྱབ་གཡོན་སྐོར་གྱིས་ཚུལ་དུ་གནས་པས་གཡོན་པ་མ་སྟེ། རྩེ་མོ་ལྟག་པ་ན་གནས་པའི་རྩའོ། ༤།རྩ་སྣ་ཟླུམ་ཞིང་ཚད་སྔ་མ་རྣམས་ལས་ཐུང་བས་ཐུང་ངུ་མ་ཞེས་རྣ་བ་གཡོན་པར་གནས་པའི་རྩའོ། ༥།རུས་སྦལ་གྱི་གཟུགས་དང་འདྲ་པས་རུས་སྦལ་སྐྱེས་མ་ནི་སྨིན་མའི་དབུས་སུ་གནས་པའི་རྩའོ། ༦།སྲིད་པའི་དངོས་པོ་གསལ་བར་བྱེད་བའི་སྒོམ་པ་མ་ནི་མཆིན་པ་ནས་མིག་གི་ཕྱི་རོལ་དུ་གནས་པའི་རྩའོ། ༧།རྟོག་པ་འཁྲུད་པའི་དབང་བསྐུར་སྦྱིན་པས་དབང་བསྐུར་མ་སྟེ། ལུས་ཀྱི་ཕྲག་པ་གཉིས་ལ་གནས་པའི་རྩ་སྟེ། ༨།འདི་བརྒྱད་པོ་ནི་དབུ་མ་ལས་གྱེས་པའམ། སྙིང་ཀའི་རྩ་བརྒྱད་ལས་གསུམ་ཚན་དུ་གྱེས་པས་དབུ་མའི་བརྒྱད་ཡིན་པ་དང་། རླུང་གཙོ་བོར་འབབས་པའི་ཕྱིར་དབུ་མའི་རིགས་སུ་གཏོགས་པ་ལ། ལུས་ཀྱི་ཕྲག་པ་ཡན་ཆད་ན་གནས་པས་ན་ཐུགས་ཀྱི་འཁོར་ལོ་མཁའ་སྤྱོད་དོ། ཉོན་མོངས་པ་སུན་འབྱིན་པར་བྱེད་པའི་སྐྱོན་བྲལ་མ་ནི་མཆན་འོག་གཉིས་འབྲེལ་བའི་རྩའོ། ༩ །ལུས་སྐྱོངས་བར་བྱེད་པའི་མཇུག་མའམ་བཤང་ཆེན་མ་ནི་ནུ་མ་གཉིས་ལ་གནས་པའི་རྩའོ། ༡༠།མ་དང་རྗེས་སུ་མཐུན་པ་ལུས་བསྐྱེད་པའི་མ་མོ་ནི་གློ་བར་གནས་ཤིང་ལྟེ་བ་དང་འབྲེལ་བའི་རྩའོ། ༡༡།སྣང་བ་ནུབ་པར་བྱེད་པའི་བདག་ཉིད་ཅན་མཚན་མོ་ནི་རྒྱུ་མ་ནས་སྣ་རྩེར་འབྲེལ་པའི་རྩའོ། ༡༢།ཞི་ཞིང་བསིལ་བ་སྟེར་བ་མ་ནི་ཁའི་མཐས་ནས་འགྲམ་པ་དང་རྩིབས་ལོགས་སུ་འབྲེལ་བའི་རྩའོ། ༡༣།དྲོ་བ་སྟེར་བར་བྱེད་པའི་ཚ་བ་མའམ་དྲོད་མ་ནི། མགྲིན་པའི་དབུས་ནས་ལྟེར་བར་རྒྱུ་བའི་རྩའོ། ༡༤།དེ་ཡན་ཆད་ཀྱི་བཅུ་བཞི་པོ་ནི་རྐྱང་མའི་ཆར་སྐྱེས་པར་གསུངས་པའང་ཡོད། བདེ་བ་ལ་གཞོལ་བ་མའམ་ཟླ་བ་ལྟ་བུའི་ན་མཚན་མའང་ཟེར་ཏེ་བྲང་གཞོང་ ༼ གཞུང་དཔྱད། ༽ནས་བཤང་ལམ་དུ་འབྲེལ་བའི་རྩའོ། ༡༥།བདེ་བས་ཚིམ་ཞིང་རངས་བས་མུན་པ་ཆེན་པོ་ལྟ་བུ་སྟེ་རངས་མའང་ནག་མོ་སྟེ་མཚོག་མ་དང་ཆུ་སོར་འབྲེལ་བའི་རྩའོ། ༡༦།བཤད་ཚུལ་འདིར་རྒྱུད་ལས་དེ་བརྒྱད་གསུང་གི་འཁོར་ལོ་ས་སྤྱོད་ཅེས་གཙོ་ཆེར་རཀྟ་འབབ་བའི་རྩར་བཞེད་དོ། །བེམ་པོའི་བསྡུས་པའི་ཤིན་ཏུ་གཟུགས་ཅན་མ་སྟེ་ལུས་ཀྱི་མཚན་མ་ལ་གནས་པའི་རྩའོ། ༡།ཐམས་ཅད་ལ་ཁྱབ་པར་མཉམ་པས་སྤྱི་མ་སྟེ་བཤང་ལམ་དང་འབྲེལ་བའི་རྩའོ། ༢།རྒྱུ་ཐམས་ཅད་སྟེར་པའི་རྒྱུ་སྦྱིན་མ་སྟེ་བརླ་ཟུར་ལ་གནས་པའི་རྩའོ།༣།སྡུག་བསྔལ་གྱི་སྦྱོར་ཐམས་ཅད་དང་བྲལ་བསམ་མེད་པས་སྦྱོར་བྲལ་མ་ནི་བྱིན་པའམ་རྗེ་ངར་ལ་གནས་པའི་རྩའོ། ༤།དགའ་བ་ཐམས་ཅད་བསྡུས་ནས་དེ་ལ་རྗེས་སུ་ཆགས་པའི་སྡུག་གུ་མའམ། དགའ་བྱེད་མ་སྟེ། རྐང་བའི་སོར་མོ་དང་འབྲེལ་བའི་རྩའོ། ༥།དངོས་གྲུབ་སྦྱིན་ཅིང་གྲུབ་པར་བྱེད་པས་གྲུབ་མ་སྟེ་རྐང་པའི་བོལ་གོང་གི་རྩའོ། ༦།མེའི་རང་བཞིན་ཡིན་པས་ཉོན་མོངས་པ་བསྲེགས་པར་བྱེད་པ་འཚེད་མ་ནི་ལུས་ཀྱིས་རྐང་བའི་མཐེ་བོང་ལ་གནས་པའི་རྩའོ། ༧།ཆུ་ཁམས་ཤེས་རབ་ཀྱི་ལྷ་མོའི་རང་བཞིན་ཡིན་པས་ཡིད་བཟང་མ་ནི་པུས་མོའི་གཉན་གོང་ན་གནས་པའི་རྩ་སྟེ། ༨དཀར་ཆ་འབབས་པའི་ཕྱིར་སྐུའི་འཁོར་ལོ་ས་འོག་ལ་སྤྱོད་པ་ཞེས་བྱ་སྟེ། རྡོ་རྗེ་མཁའ་འགྲོའི་རྒྱུད་ལས། ཉི་ཤུ་རྩ་བཞིའི་དབྱེ་བ་ཡིས། །སྐུ་གསུང་ཐུགས་ཀྱི་འཁོར་ལོ་ཡིན། །གནས་རྣམས་དག་ནི་ཐམས་ཅད་དུ། །རྩ་རྣམས་ཀུན་ནི་ཡང་དག་བཅད། ཅེས་དང་། སམྦུ་ཊི་ལས། རང་གི་ནང་དང་ཕྱི་རོལ་གནས། །སྐུ་གསུང་ཐུགས་ཀྱི་འཁོར་ལོ་ལ། །ཉི་ཤུ་རྩ་བཞིར་དབྱེ་བ་ཡིས། །མཁའ་འགྲོ་མ་ནི་ཀུན་གྱི་གནས། །ཐམས་ཅད་དུ་ནི་ཡང་དག་བཤད། །འདི་དག་གནས་སུ་མཁའ་འགྲོ་མ། །རྩ་ཡི་གཟུགས་ཀྱིས་ཡང་དག་གནས། །ཞེས་དང་། རིན་ཆེན་འབར་བའི་རྒྱུད་ལས། །སྐུ་ལ་བརྒྱད་དེ་གསུང་ལ་བརྒྱད། །ཐུགས་ལ་བརྒྱད་དེ་ཉི་ཤུ་བཞི། །ར་ལི་ཉི་ཤུ་བཞི་རུ་ངེས། །ཞེས་སོ། འདིར་རྐྱང་མ་ལས་གྱེས་པ་བཅུ་བཞི་དང་། རོ་མ་ལས་གྱེས་པ་བཅུ་ཞེས་པའི་ལུགས་ལ། རྐྱང་མ་ལས་གྱེས་པའི་ལ་ནི། བསམ་པའི་སྒོ་ནས་ཤེས་རབ་དང་། ལུས་ཀྱི་སྒོ་ནས་ཐབས་ཀྱི་རང་བཞིན་ཟླ་བ་ཡར་ངོས་ཆ་རྣམ་པར་དག་པ་དང་། ཅིག་ཤོས་ལ་བསམ་པའི་སྒོ་ནས་ཐབས་དང་ལུས་ཀྱི་སྒོ་ནས་ཤེས་རབ་ཟླ་བ་མར་གྱི་ཆ་རྣམ་པར་དག་པ་ཉིད་དུ་རིམ་པ་ལྟར་འདོད་དོ། །དེ་དག་ཏུ་ཁམས་ཀྱི་སྙིགས་མ་ཉེར་བཞི་འབབས་པའི་ཕྱིར་དང་། ཕྱི༵་རོལ་གྱི་གནས་ཉེར་བཞིའི་འཕྲོ་གཞི། ན༵ང་རྡོ་རྗེའི་ལུས་ལ་རྫོགས་པ་དང་། གཞ༵ན་དཀྱིལ་འཁོར་གྱི་འཁོར་ལོར་བདེ་མཆོག་གི་ཐུགས་གསུང་སྐུའི་དཔའ་བོ་དང་རྣལ་འབྱོར་མ་གནས་པའི་དབང་གིས་གཙོ་མོ་ཉེར་བཞིར་རྣམ་པར་བཞག་པའོ། །
གཉིས་པ་ནི། སྙིང་ཀའི་པདྨའི་དབུས་དང་ཕྱོགས་ཀྱི་འདབ་མ་རྣམས་ལ་རྣམ་པ་གསུམ་གྱིས་དཀྲིས་པས་སུམ་སྐོར་མ་ནི་སྙིང་གའི་ཤར་ན་གནས་པའི་རྩའོ། །འདོད་པའི་ཡོན་ཏན་ཐམས་ཅད་དང་ལྡན་པའི་འདོད་མ་ནི་ལྷོ་ན་གནས་པ་དང་། རྩ་རླུང་གི་ཁྱིམ་གྱི་བདག་པོ་ཡིན་པས་ཁྱིམ་མ་ནུབ་དང་། གཏུམ་པའི་ལས་བྱེད་པའི་གཏུམ་མ་ནི་བྱང་ན་གནས་པའི་རྩའོ། །འཆི་བའི་བདུད་འཇོམས་པར་བྱེད་པའི་ཕྱིར་དང་། རྩ་གཞན་དུ་ཁམས་དང་རླུང་རྒྱུ་བ་ལ་འདིའི་གེགས་བྱེད་ཅིང་། རང་གི་ནང་དུའང་འཆི་བའི་ཚེ་མ་གཏོགས་མི་རྒྱུ་བས་དུས་ཀྱི་རྩའམ། རྣལ་འབྱོར་རྣམས་ཀྱི་འགོགས་པ་ཞེས་གསུངས་སོ། །སློབ་དཔོན་ཨ་བྷྱའི་འཆི་བའི་དུས་དང་རྣལ་འབྱོར་བས་ལམ་བསྒོམ་སྟོབས་མ་གཏོགས་ཁམས་མི་འབབས་པར་གསུངས་སོ། །བདུད་བྲལ་མ་དེ་ནི་དབུ་མ་ལ་འཁྲིལ་ནས་དབུས་ཀྱི་ཆར་གནས་ཤིང་། ཡར་གྱི་རྩེ་མོ་ལྕེ་ཆུང་ལ་ཟུག་གོ །རྩེ་མོ་གཞན་ལུས་ཀྱི་སྟོད་སྨད་ཐམས་ཅད་དུ་ཁྱབ་པའོ། །དེ་ལྟ་བུའི་རྩ་ལྔ་པོ་འདི་རྩ་འཁོར་གྱི་སྙིང་ཀའི་དབུས་སུ་གནས་པར་སྔར་སམྦུ་ཊིའི་རྒྱུད་ལུང་དྲངས་བས་བསྟན་པའོ། །དེའི་སྟེང་དུ་རོ་རྐྱང་དབུ་མ་གསུམ་བསྣན་ཏེ། འབྱུང་བ་བཞིའམ་ཡན་ལག་གི་རླུང་བརྟན་པའི་རྩ་བ་དང་། དཀར་དམར་རླུང་གསུམ་བརྟེན་པའི་དབང་གིས་བྱང་ཆུབ་སེམས་འབབས་པའི་རྩ་སོ་གཉིས་ཞེས་གསུངས་སོ། །
གསུམ་པ་ནི། དེའི་སྟེང་དུ་སྦས་པའི་རྩ་ལྔ་བསྣན་པས་སུམ་ཅུ་རྩ་བདུན་དུ་བྱས་པ་ཡིན་ཏེ། ལྟེ་བ་ཡན་ཆད་ཀྱི་ཨ་ཝ་དྷཱུ་ཏཱིའི་ཡར་སྣ་ལ་ཡིད་བཟང་མ་ཞེས་བྱ། རྩ་གསུམ་འདུས་མདོ་མན་ཆད་ཀྱི་ཨ་ཝ་དྷཱུ་ཏཱིའི་མར་སྣ་ནི་དུང་ཅན་མ། སྙིང་ཀའི་ཤར་ལྷོའི་ནུ་མ་གཡས་ཀྱི་ཐད་དུ་བརྒྱུད་ནས་མགྲིན་པར་ཟུག་པ་རྩ་གླང་ཆེན་ལྕེ་དང་། སྙིང་ཀའི་མདུན་ནམ་ཤར་ཕྱོགས་ཀྱི་རྩ་སྣར་མ་ནི་ཕོ་བར་ཟུག་ཅིང་། སྙིང་ཀའི་གཡས་ཕྱོགས་ཀྱི་རྩ་སེར་སྐྱ་ནི་རོ་མ་དང་འབྲེལ་བ་སྟེ། གོ་རིམ་བཞིན་དུ་སྲོག་དང་ཐུར་སེལ་གྱེན་རྒྱུ་མེ་མཉམ་ཁྱབ་བྱེད་ཀྱི་རླུང་བརྟེན་པས། རྩ་འདི་རྣམས་ཀྱི་ཡང་ཕྲན་གྲངས་མེད་པས་ལུས་ཀྱི་ཆ་ཤེས་ཀུན་ལ་ཁྱབ་པས་ན་རླུང་ལྔའི་ལམ་སྲང་དུ་གྱུར་པའོ། །འདི་དག་ལ་སྦས་པའི་རྩ་ལྔ་ཞེས་གསུངས་པ་ནི། བདེ་མཆོག་ཏུ་སྦས་པ་དང་། དགྱེས་རྡོར་གྱི་རྒྱུད་ལས་ཀྱང་རྩའི་གཙོ་མོ་སུམ་ཅུ་རྩ་བདུན་ཞེས་གསུངས་ཀྱང་། འདི་ལྔའི་ངོས་འཛིན་གསལ་བོར་མ་མཛད་པའི་ཕྱིར་སྦས་པ་ཡིན་གྱི་སུམ་སྐོར་ལ་སོགས་པ་ལྔ་ནི་དགྱེས་རྡོར་སམྦུ་ཊི་མཁའ་འགྲོ་རྒྱ་མཚོའི་རྒྱུད། རྡོ་རྗེ་མཁའ་འགྲོའི་རྒྱུད་སོགས་ལས་བྱུང་བས་མ་སྦས་པར་མངོན་ནོ། །འོན་ཀྱང་དབུ་མ་དང་འབྲེལ་བའི་རྩ་བཅུ་བོ་དེ་དག་ཐམས་ཅད་ལ་སྦས་པའི་རྩ་ཞེས་བསྟན་པ་ནི། སྙིང་གའི་འོད་གསལ་མི་ཤིགས་པ་ལས་ལངས་ནས་གཟུགས་སོགས་ཡུལ་ལ་འཇུག་པ་དང་། ལམ་དུས་སུ་དེ་རྣམས་ཀྱི་བྱེད་པ་བཅིངས་བས་རྟགས་བཅུ་འཆར་བའི་རྩ་བར་གྱུར་བས་སྦས་པ་སྟེར་ས་བོན་ནམ་གཏེར་དུ་སྦས་པ་ལྟ་བུའོ། །ཞེས་བླ་མ་གོང་མ་རྣམས་གསུངས་ཀྱང་། དོན་དུ་དུས་འཁོར་ལས་གཞན་པའི་ཐུན་མོང་གི་རྒྱུད་དུ་གསལ་པོར་མ་གསུང་བས་སྦས་པའི་རྩ་ཞེས་བཏགས་པ་ཡིན་ནོ། །
གཉིས་པ་ཆོ་འཕྲུལ་ཕྱིའི་གནས་ཡུལ་སྣང་ཚུལ་ནི། འདི་ལྟ་བུའི་རྩ་གནས་ཉི་ཤུ་རྩ་བཞི་ལ་སོགས་པ་འདི་ནང་ན་རྩ་དབུ་མའི་ཕྱོགས་བཅུར་བསྐོར་ནས་ཡོད་པའི་དབང་གིས། ཕྱི་མི་མཇེད་བྱེ་བ་ཕྲག་བརྒྱ་རུ་སྣང་བ་ལའང་། དེའི་གཟུགས་བརྙན་གྱི་ཚུལ་ཏུ་གནས་དང་ཡུལ་གྱི་བཀོད་པ་མ་ཚང་བ་མེད་པར་ཐུབ་པའི་ཉི་མ་རྣམས་གང་དུ་བྱང་ཆུབ་བའི་གནས་རྡོ་རྗེ་གདན་གྱི་ཕྱོགས་མཚམས་འཁོར་ཡུག་ལེགས་པར་ཡོད་པ་ཡིན་ཏེ། ནང་གི་རྩ་མི་ཕྱེད་མའི་རང་གདངས་སུ་ཕྱི་རོལ་གྱི་གནས་ཀོལ་ལ་ཀི་རིའམ། པུལླི་ར་མ་ཡ་སྟེ། པུརྞ་གཾ་རི་གང་བའི་རི་ཉིད་ ༼ ཨོ་རྒྱན་གྱི་བྱང་ན་ཡོད་པ་ཉིད། ༽ཤར་བ་ཡིན་པས་དེ་གཉིས་ཕྱི་ནང་གནས་སོ། །རྩ་ཕྲ་གཟུགས་མའི་རང་གདངས་སུ་ཛ་ལནྡྷ་ར་སྟེ་འབར་བ་འཛིན་མའོ། ༼ ཁ་ཆེའི་ཡུལ་དུ་ན་ག་ཀོ་ཌི་ཞེས་པའི་གྲོང་དང་ཉེ་བ་ན་ཡོད་ཟེར། ཁ་ཆེ་དང་རྡོ་རྗེ་གདན་གྱི་བར་ན་ཡོད་ཀྱང་ཟེར་རོ་མཆན། ༽རྩ་རྩེ་བ་མ་ལས་ཨོ་ཌི་ཡ་ན་འཕུར་འགྲོ་སྟེ་ཨོ་རྒྱན་ཉིད་དོ། །རྩ་གཡོན་པ་མ་ལས། ༼ གྲོང་ཁྱེར་རྡོ་འཇོག་ཞེས་པ་འདོད། ཁ་ཅིག །རྒྱ་གར་ལྷོ་ཕྱོགས་ཀྱི་རྒྱུད་ན་ཡོད་ཟེར། ༽ཨརྦུ་ཏ་ཆུ་བུར་ཅེས་པ་ཉིད་དོ། ཐུང་ངུ་མ་ལས་གོ ༼ རྡོ་རྗེ་གདན་གྱི་ལྷོ་ཕྱོགས་དཔལ་གྱི་རིའི་ཕྱོགས་ན་ཡོད་སྐད། ༽དཱ་བ་རི་སྟེ་བ་ཡི་མཆོག་སྦྱིན་ནོ། རུས་སྦལ་སྐྱེས་ལས་སིངྒ་ལའི་གླིང་ངམ་རིསྨི་ཤྭ་རི་སྟེ་དགའ་བའི་དབང་ཕྱུག་ཏུ་གྲགས་པའོ། ༼ ལིངྒའི་གླིང་ཕྲན་ན་ཡོད་ཟེར། ༽རྩ་སྒོམ་པ་མ་ལས་དཱེ་ཝ་ཀོ་ཊ་སྟེ་ལྷ་མོའི་མཁར། ༼ ཤར་ཕྱོགས་སུ་རེནྡྲའི་ས་ཆ་ན་གྲོང་ཁྱེར་གཟུགས་མཛེས་ཞེས་གྲགས་པའི་གནས་རྡོའི་ཆོས་འབྱུང་མིག་འདྲ་བས་མཚན་པ་ཅན་ནོ། །༽དབང་བསྐུར་མ་ལས་མཱ་ལ་བ་ཕྲེང་བ་ ༼ རྒྱ་གར་ནུབ་ཕྱོགས་ན་ཡོད་ཟེར། ༽ཅན་ཏེ་མཁའ་སྤྱོད་ཐུགས་ཀྱི་གནས་དང་ཉེ་བའི་གནས་བརྒྱད་དོ། །རྡོ་རྗེ་མཁའ་འགྲོའི་རྒྱུད་ལས། །མགོ་ནི་མ་ལ་ཡ་ཡུལ་ཏེ། །སྤྱི་གཙུག་ཛ་ལནྡྷར་ཡིན། །ཨོ་རྒྱན་རྣ་བ་གཡས་པ་སྟེ། །ཨརྦུ་ད་ནི་རྒྱབ་ཕྱོགས་ཡིན། །གནས་ཀྱི་མིང་ཅན་རྣམ་བཞིའོ། །གོ་དྷ་ཝ་རི་རྣ་གཡོན་ཏེ། རཱ་མེ་ཤྭ་རི་སྨིན་དབུས་གསུངས། །མིག་ནི་དེ་ཝཱི་གོ་ཊི་སྟེ། །དཔུང་བ་མ་ལ་ཝ་ཞེས་བརྗོད། །འདི་དག་ཉེ་བའི་གནས་ཡིན་ཏེ། གནས་ཀྱི་ཁྱད་པར་ཚུལ་གྱིས་ནི། །མཁའ་སྤྱོད་ཐུགས་ཀྱི་འཁོར་ལོར་གནས། །ཞེས་སོ། །རྩ་སྐྱོན་མ་ལས་ཡུལ་ཀཱ་མ་རུ་མ་སྟེ་ ༼ རྒྱ་གར་ཤར་ཕྱོགས་གཉལ་གྱི་ལྷོ་ཐད་ཆུ་བོ་ལོ་ཏ་ཐད་ཀར་ལྷོ་བྱང་དུ་འབབས་པ་དེར་ཡོད། ༽འདོད་པའི་གཟུགས་ཅན་ཉིད་དོ། །རྩ་འཇུག་མ་ལས་རང་བྱུང་གི་རྟེན་ཡོད་པའི་ཡུལ་ ༼ ལྷོ་ཕྱོགས་རྒྱལ་པོ་ཤིང་རྣ་བཅུ་པའི་ཡུལ་ཡིན་པར་བཤད། ༽ཀོངྐ་ན་འམ་ཨོ་ཊེ་ཞེས་བྱ་བའོ། །རྩ་མ་མོ་མས་ནི་ཡུལ་ཀྲི་ཤ་ ༼ སྟག་གཟིག་གི་ཡུལ་ན་ཆུ་གངྒ་དྷིནྡྷ་ས་རུ་ས་གསུམ་འདུས་པའི་མདོ་ན་སྒྲུབ་གནས་རྡོའི་ལིངྒ་ལྟེ་བ་ལྟ་བུའི་མཚན་མ་ཡོད་པར་བཤད། ༽ཀུ་ན་དགེ་མཚན་གསུམ་པའོ། །འདི་ལ་མུམྨུ་ནིར་ཡང་གྲགས་ཏེ་རྒྱ་མཚོའི་འགྲམ་ན་ཡོད་པར་ཡང་བཤད་དོ། །མཚན་མོ་མ་ལས་ཡུལ་མཉན་ཡོད་ ༼ རྒྱལ་པོ་གསལ་རྒྱལ་གྱི་ཡུལ་ཡིན་ཡང་ཟེར། ༽ཀྱི་ཀོ་ས་ལ་དགེ་བ་ཅན། བསིལ་སྦྱིན་མས་ཀ་ ༼ རྒྱལ་བུ་ཐམས་ཅད་སྒྲོལ་འཁྲུངས་ཡུལ་རྡོ་རྗེ་གདན་ནས་དཔག་ཚད་དྲུག་ཅུའི་ལྷོ་ནུབ་མཚམས་སུ་ཡོད་། ༽ལིངྐ་སུམ་ཚན་ཞེས་པའོ། །ཚ་བ་མ་ནི་ལམ་པ་ཀ་འཕྱང་བ་ཅན། ༼ རྒྱ་གར་ནུབ་ཕྱོགས་ན་ཡོད་ཟེར། ༽གཞོལ་མས་ནི་ཀཉྩི་ ༼ གྲོང་ཁྱེར་མཆོག་སློབ་དཔོན་ཆོས་ཀྱི་གྲགས་པའི་འཁྲུངས་ཡུལ། ༽ཀ་གསེར་ཅན་ནོ། །སྒང་བའི་རྩ་རངས་མ་ནི་ཧི་མཱ་ལ་ཡའམ་ཧི་མཱ་གི་རི་ཞེས་ཁ་བའི་རི་ཡང་ཟེར་གངས་ཅན་ཞེས་པ་ ༼ བོད་ཡུལ་ལའང་བཞེད་པའོ། །༽འདི་དག་གསུང་གི་འཁོར་ལོ་ས་སྤྱོད་ཅེས་ཀྱང་གསུངས་སོ། །རྡོ་རྗེ་མཁའ་འགྲོའི་རྒྱུད་ལས། །ཀམ་རུ་མཆན་ཁུང་དེ་བཞིན་དུ། །ནུ་མ་ཨོ་ཌེར་རབ་ཏུ་གྲགས། །དེ་དག་ཞིང་སྟེ་ལྟེ་བ་ནི། །ཏྲི་ཤ་ཀུ་ནི་ཞེས་བྱ་ཡིན། །སྣ་ཡི་རྩེ་མོ་ཀོ་ས་ལ། །དེ་དག་ཉེ་བའི་ཞིང་དུ་བརྗོད། །ཁ་ནི་ཀ་ལིངྒ་ཡིན་ཏེ། །མགྲིན་པ་ལམ་པ་ག་ཞེས་བརྗོད། །ཚནྡོ་ཧ་ཞེས་བྱ་བར་གྲགས། །སྙིང་ཀ་ཀཉྩི་ཞེས་བྱ་སྟེ། །ཆུ་བོ་ཧི་མ་ལ་ཞེས་བྱ། །ཉེ་བས་རོལ་བས་བརྗོད་པ་ཡིན། །གནས་ཀྱི་ཁྱད་པར་ཚུལ་གྱིས་ནི། །ས་སྤྱོད་གསུང་གི་འཁོར་ལོར་གནས། །ཞེས་སོ། །དེ་བཞིན་དུ་རྩ་གཟུགས་ཅན་མས་ནི་ཞིང་གཞན་བྱེད་པའི་བྲང་ཁང་སྟེ་གླིང་ཕྲན་ཞིག་ད་ང། པྲེ་ཏུ་པུ་རིར་ཡང་འདོད་པའོ། །རྩ་ཐུན་མོང་མའམ་སྤྱི་མས་ནི་གྲི་ཧ་དཱེ་ཝ་ལྷས་ཁྱིམ་དུ་གྲགས་པའམ། ༼ ལི་ཡུལ་ལྕང་ར་སྨུག་པོ་ན་རྡོའི་ལིངྒ་སྙིང་འདྲ་བས་མཚན་པའི་སྒྲུབ་གནས་ཡོད་པར་བཤད། ༽ཧ་རི་ཀཻ་ལ་སེངྒེ་གངས་ཞེས་པའོ། །རྩ་རྒྱུ་སྦྱིན་མས་ནི་སོ་རཱཥྛ་སྟེ་ ༼ ནུབ་ཕྱོགས་ཟླ་བ་ཕྱེད་གསུམ་གྱི་ཕྱིན་པ་སྲོ་མ་ནཱ་ཐ་ཞེས་ཕྱི་བའི་ལྷ་རྟེན་ཡོད་པའོ། ༽ཡུལ་འཁོར་བཟང་པོའོ། །རྩ་སྦྱོར་བྲལ་མས་ནི་སུ་ཝརྞ་ཞེས་གསེར་གླིང་། ༼ རྒྱ་གར་ལྷོ་ཕྱོགས་སྨན་རྩེ་དང་གཤིབ་ནས་ཡོད། ༽རྩ་སྡུག་གུ་མས་ནི་ན་ག་རའི་གྲོང་ཁྱེར་ཞེས་རྒྱ་གར་ཡུལ་དབུས་སོ། ༼ ན་ག་རའི་ཡི་གེ་འབྲི་བའི་ཡུལ་ལོ། ༽རྩ་གྲུབ་མས་ནི་ཡུལ་སིནྟུ་ར་སྟེ་རྒྱ་མཚོའམ་ཆུ་བོ་སིནྡྷུ་འབབས་པའི་ཡུལ་ལོ། ༼ རྒྱ་གར་ནུབ་ཕྱོགས་ན་ཡོད་ཁ་ཅིག་ལྷོ་ཕྱོགས་ཟེར། ༽ རྩ་འཚེད་མའི་རང་གདངས་ཕྱིར་ཤར་བ་ནི་མ་རུ་སྟེ་མྱ་ངམ་གྱི་ཡུལ་ ༼ ཛ་ལནྡྷ་ར་དང་ཉེ་བའི་བྱང་ཕྱོགས་བྲག་ཕུག་ཞིག་ན་རྡོའི་མཚན་མ་མཐེ་བོང་ལྟ་བུ་རྡོའི་ནང་དུ་འཕྲུལ་བ་ཕྱིར་བཏོན་མི་བཏུབ་པ་ཤིན་ཏུ་གཉན་པར་གྲགས་སོ། །༽ཡིད་བཟང་མའི་རང་གདངས་ཀུ་ལུ་ཏ་ཞེས་རྣམ་རྟོག་འཇོམས་པའོ། །རྡོ་རྗེ་མཁའ་འགྲོའི་རྒྱུད་ལས། མཚན་ནི་ཡི་དྭགས་གནས་པ་སྟེ། ཀྲ་ཧ་དེ་ཝ་བཤང་བའི་ལམ། །དེ་དག་འདུན་སར་བརྗོད་པ་སྟེ། །བརླ་ནི་སོ་རཥྛ་ཞེས་བྱ། །བྱིན་པ་གཉིས་ནི་གསེར་གླིང་སྟེ། །ཉེ་བའི་འདུན་ས་ཉིད་ཡིན་ནོ། །སོར་མོ་རྣམས་ནི་ནཱ་ག་ར། །རྐང་པའི་བོལ་ནི་སིནྡྷུ་སྟེ། །མཐེ་བོ་མ་རུ་ཞེས་བྱ་སྟེ། །པུས་མོ་ཀུ་ལུ་ཏཱ་ཞེས་བརྗོད། །ཉེ་བའི་དུར་ཁྲོད་ས་འོག་ནི། སྐུ་ཡི་འཁོར་ལོར་ཡང་དག་གནས། ཞེས་སོ། །འདི་དག་ནི་རྒྱུད་སོ་སོའི་ཕྱི་ནང་སྦྱོར་ཚུལ་མི་འདྲ་བས། བདེ་མཆོག་འབྱུང་བའི་རྒྱུད་དང་སམྦུ་ཊི་སོགས་མཚུངས་པ་ལ། མངོན་བརྗོད་བླ་མའི་སྟོད་དུ་ནི། ཀ་མ་རུ་པ་སྟེ་མིག་གཉིས་ལས་ས་བསྲུང་མའོ། །ཞེས་དང་། སྨད་དུ་ཀ་མ་རུ་མ་མཆན་ཁུང་དུ་གསུངས་པ་རྒྱུད་གཞན་དང་མཚུངས་མིན་གཉིས་སུ་གསུངས། རྡོ་རྗེ་ཕྲེང་བའི་རྒྱུད་ལས། ཀོ་ས་ལ་རྣ་རྩེ། ཏྲི་ཤ་ཀུ་ནེ་སྣ་རྩེ། ཁ་ཡི་པདྨ་ཀ་ལིངྒ། མཚན་མ་ཀྲི་ཧ་དེ་ཝ། བཤང་ལམ་པྲེ་ཏ་པུ་རི། བརླ་གཉིས་སུ་ཝརྞ། བྱིན་པ་སོ་རཱཥྛ། རྐང་མཐིལ་ཀུ་ལུ་ཏར་གསུངས། ཕག་མོ་མངོན་འབྱུང་གི་རྒྱུད་ལས། རྣ་རྩེ་ཀོ་ས་ལར་གསུངས་པ་ཙམ་ལས་མཐུན། ཕྱག་ཆེན་ཐིག་ལེ་ལས་ནི། ཨོ་ཌི་ཡ་ན་སྤྱི་བོའི་གནས། ཛ་ལནྡྷ་ར་སྤྱི་གཙུག་དྲན། པུལླི་ར་མ་མཚོག་མ་སྟེ། ཀ་མ་རུ་ནི་སྨིན་ཕྲག་དབུས། མ་ལ་ཝ་ནི་སྣ་རྩེ་སྟེ། སནྡྷུ་མིག་ ༼ བོལ་དང་མིག་རྩ་འབྲེལ་བས་བོལ་ལ་སྐུ་བཉེ་བྱས་ན་མིག་བདེ་བར་འགྱུར་བས་དེ་གཉིས་གཅིག་དུ་གསུངས། མཆན། ༽གཉིས་ཡིན་པར་གྲགས། ན་གར་རྣ་བ་གཉིས་སུ་དྲན། སིང་གྷ་ཁ་ཡི་པདྨར་གནས། མུམྨུ་ནི་ནི་ཀོསྐོ་སྟེ། ༼ མ་ནེ་མཆན། ༽དེ་ཝི་ཀོ་ཌ་མགྲིན་གླིང་ངོ་། ཀུ་ལུ་ཏ་ནི་རྒྱབ་གླིང་ངོ་། ཨརྦུ་ཏ་ནི་མིག་གཉིས་སོ། །༼ ཤར་ཕྱོགས་བྷི་ག་ལའི་ཡུལ་གྱི་བྱེ་བྲག་ཡིན་ཟེར་བའང་ཡོད། ༽ཧ་རི་གེ་ལ་སྙིང་ཀའོ། །ཀོ་དྷ་ཝ་རི་ལྟེ་བའི་གནས། །ལམ་བྷ་ཀ་ནི་གསང་བར་རོ། །ཀྃ་རྩི་ལིངྐའི་དབུས་གནས་སོ། །ཀརྨ་ལིངྐའི་རྩེ་མོར་རོ། །༼ ཁ་ཅིག་རྒྱ་གར་ཤར་ཕྱོགས་བྷཾ་ག་ལའི་ཡུལ་གྱི་བྱེ་བྲག་མགར་བ་མང་བོ་ཡོད་པའི་ཡུལ་དེ་ཡིན་པར་བཤད་གོང་བཤད་ཀརྨ་རས་ཌའོ་ཁ་ཅིག་སིངྒ་ལར་བཤད། ༽གསེར་གླིང་གཞང་ཁའི་གནས་སུ་སྟེ། ཀོ་༼ ལྷོ་ནུབ་ན་མཐའ་ཆུའི་བསྐོར་བ་སྐུ་མཆོག་བཞིའི་ཡ་གྱལ་གྲིབ་མའི་སྐུ་བཞུགས་པའི་གནས། གྲོང་ཁྱེར་བྱེ་བ་ཕྲག་བདུན་ཡོད་པ་དེ་ཡིན་ཟེར། ཡང་ཀོང་ག་ཞེས་པ་རྒྱ་གར་ལྷོ་ནུབ་ན་མ་ཧཱ་སཾ་བྷ་ཝ་ཞེས་པའི་རང་བྱུང་མཆོད་རྟེན་ཡོད་པ་ལ་བཤད་ཀྱང་འདི་སྔ་མ་དེའོ། །༽ཀ་ན་ནི་བརླ་གཉིས་དྲན། བིནྡྷ་པུས་ ༼ རི་བོ་འབིག་བྱེད་ཀྱི་ནང་ན་སློབ་དཔོན་ཕྱོགས་གླིང་གི་སྒྲུབ་གནས་ཡོད་པ་རྒྱ་གར་ལྷོ་ཕྱོགས་ངོས་སུ་གནས། ༽མོ་གཉིས་ཡིན་ནོ། །ཡི་དྭགས་འདུས་པ་བྱིན་པ་སྟེ། །རྐང་བོལ་གཉིས་སུ་རྒྱ་མཚོའི་ངོག །ཀོ་མ་ ༼ རྒྱ་མཚོའི་གླིང་ཕྲན་ཞིག་ན་བུད་མེད་གཟུགས་བཟང་ཤ་སྟག་སྐྱེ་བའི་ཡུལ་ཞིག་ཡོད་པའོ། །༽ཀོ་རུ་མཐེ་བོང་སྟེ། ཙ་རི་ ༼ རྒྱ་གར་ལྷོ་ཕྱོགས་རྒྱ་མཚོའི་འགྲམ་ན་འབྲས་བཟང་པོ་སྐྱེ་བ་རྡོ་རྗེ་ཕག་མོའི་ཆང་གི་བཅུད་བསྡུས་པའི་ཆང་ཡང་ཡང་བསིང་ན་རོ་བཅུད་མི་ཉམས་པའོ། །༽ ཊ་ནི་སོར་མོའོ། །ཀེ་ར་ཏ་ ༼ སུརྞ་ཀུ་རུ་ལས་ནུབ་ཕྱོགས་ཀོང་ཀན་དང་གཉིས་ཀྱི་བར་ན་ཡོད་དེ་འདི་ལ་མི་པ་ཀ་རའི་ཡུལ་ཡང་ཟེར་མཆན། ༽ནི་རྐང་མཐིལ་ལོ། ནེ་པ་ལ་ ༼ ནེ་པ་ལ་ནི་བལ་ཡུལ་ལོ། ༽ནི་ལྟག་པ་སྟེ། །ཀཾ་སོ་ཛོ་ནི་རྐེད་པའོ། །ཞེས་སོ། ཡང་རྒྱུད་གཞན་ལས། ཙ་རི་ཊ་ནི་རྐང་མཐིལ་ལོ། །ཞེས་གསུངས། དུས་འཁོར་ལས་ལྷའི་དཀྱིལ་འཁོར་འདི་དག་གསང་བའི་འཁོར་ལོར་སྦྱར་བ་ཡོད་ཀྱང་། རྩ་སོ་སོའི་མར་སྣ་གསང་བ་དང་། ཡར་སྣ་སྤྱི་བོ་པུ་ལི་ར་མ་སོགས་སུ་གནས་པ་ལ་སྤྱི་བོར་ཛ་ལནྡྷ་ར་ཞེས་གསུངས་པས་དགོངས་པ་མི་འགལ་ལོ་བླ་མ་གོང་མ་རྣམ་གསུངས་སོ། །དེའི་མཚོན་ཏེ་རྣ་རྩ་དང་ལྟེ་བ་འབྲེལ་བས་ལྟེ་བར་སྐུ་མཉེ་བྱས་ན་རྣ་བ་བདེ་བར་བཤད་པས་ཀོ་དཱ་ཝ་རི་གཉིས་སུ་བཤད་པ་ལ་སོགས་རྒྱུད་སྡེ་སོ་སོའི་བཞེད་པ་དང་། གནས་སོགས་ཀྱི་འཇོག་ཚུལ་ཀྱང་། རྒྱ་གར་གཅིག་པོར་མ་ངེས་ཏེ། དུས་འཁོར་རྩ་རྒྱུད་ལས། གླིང་བཞི་གནས་དང་། མཚམས་བཞི་ཉེ་གནས་སུ་གསུངས་ཤིང་། ལར་རྒྱ་དཀར་ནག་བོད་དང་ཤམ་བྷ་ལ་འཛམ་གླིང་བྱེ་བ་བརྒྱ་ནའང་གནས་སོགས་ཐམས་ཅད་ཚང་པར་གསུངས་པའི་ཕྱིར་དང་། ནང་གིས་ཀྱང་རྩ་སོ་སོའི་རྩ་བ་དང་འབྲས་བུ་སྨིན་ཚུལ་སོ་སོ་ལ་དགོངས་པ་དང་། སྐབས་ཐོབ་ཀྱི་གནས་སོ་སོ་ལའང་ཚང་བའི་གནད་ཀྱིས་ཕྱི་ནང་གཉིས་ཀ་སྡེ་ཚན་མང་དུ་བཞག་པ་དང་། དབང་པོ་རྣོན་པོའི་སེམས་ཅན་གྱིས་ཉི་ཚེ་བའི་གནས་སུ་འཛིན་ཞེན་གྲོལ་བའི་སླད་དུ་གསུངས་པ་ཡིན་པས་འགལ་བར་མི་བཟུང་ངོ་། །ཡང་ཡུལ་སུམ་ཅུ་སོ་གཉིས་སུ་སྣང་བ་ནི། ལན་ཚ་རྒྱ་མཚོའི་ནང་སྐྱེས་ནི་ཙནྡྲ་དཱི་པ་སྟེ་ཟླ་བའི་གླིང་ངམ། ཁྱབ་འཇུག་གི་བྱས་པའི་སྐུ་དང་ཉེ་བའི་གླིང་ཕྲན་དུ་བཤད་པ་མང་ཡང་། ༼ འགའ་ཞིག་གིས་བྷཾ་ག་ལའི་ཡུལ་གྱི་བྱེ་བྲག་མཚོ་གླིང་ཞིག་ལའང་བཤད་མཆན། ༽ཀྲི་ཧཱ་དཱེ་ཝའི་བྱེ་བྲག་ཏུ་ཤནྟི་པས་གསུངས་པ་དང་། འཐུང་གཅོད་ཀྱི་བྱེ་བྲག་གྲོང་ཁྱེར་གྱི་ངོས་འཛིན་པ་ཌ་ལ་སུ་ཌ་༡སྐྱ་སྣང་བུར་ཤནྟི་བས་བཞེད་པ་ནི་ཕྲག་པའི་རྩའི་འཁོར་ལོའི་དང་རྩ་ཐམས་ཅད་འདུས་པ། ༼ རྒྱལ་པོའི་ཁབ་ཀྱི་ནུབ་བྱང་གཱ་གའི་ལྷོ་འགྲམ་མྱ་ངན་མེད་ཀྱི་ཡུལ་ཏེ། ༽འཐུང་གཅོད་གྲོང་གི་༢མཐར་གནས་པ་ནི་མོན་ཡུལ་སྟེ་རྐེད་པའམ། རྐང་མཐིལ་ལམ་པགས་པ་ལ་སོགས་པར་གསུངས་པ་དང་། ཙ་རི་ཏྲ་༣ཞེས་སྤྱོད་པ་པོ་ནི་སོར་མོའམ་རྩ་ཐམས་ཅད་འདུས་པའི་དང་། རྐང་མཐིལ་རྐང་སོར་དུ་གསུངས་པ་དང་། བིནྡྱ་རི་བོ་འབིགས་བྱེད་ཀྱི་ནགས་ནི་༤པུས་མོས་གཉིས་ཀྱི་རྒྱ་མཚོའི་གླིང་ཕྲན་དུ་བཤད་པ་ཀོ་མཱ་རི་གཞོན་ནུའི་གྲོང་ཁྱེར་ནི་༥གསང་བའི་ཕྱི་རིམ་ནད་འདུས་པའི་རྩའོ། དུར་ཁྲོད་རབ་སོན་༦དགེ་འདུན་ནི་བྱིན་པའི་མཇུག་རྩ་ལས་དུར་ཁྲོད་བརྒྱད་ནི་རྒྱ་མཚོའི་འགྲམ་༧དུ་ཡོད་པ་ནང་གི་དབང་པོའི་སྒོ་བརྒྱད་ཀྱི་རྩའོ། །ཉེ་བའི་དུར་ཁྲོད་༨ཀྱང་རྩ་དེ་དག་གི་རང་མདངས་སུ་ཤར་བ་སྟེ། དེ་ལྟར་ན་རྩ་ཐམས་ཅད་འདུས་པ་ནི་དབུ་རྐྱང་རོ་གསུམ་དང་། དབང་པོའོ་སྒོ་ལྔ་ལ་སྙིང་ཀ་ནས། སུམ་སྐོར་མིག་ལ། འདོད་མ་རྣ་བ་ལ། ཁྱིམ་མ་སྣ་དང་། གཏུམ་མོ་ལྕེ། བདུད་བྲལ་ལྕེ་ཆུང་དུ་འབྲེལ་བས་འདོད་པའི་ཡོན་ཏན་ལྔ་དང་། ཡན་ལག་གི་རླུང་ལྔའི་རྟེན་གྱི་རྩ་རུ་གནས་པའི་དོན་གྱི་ཕྱིར་དང་། མཆོད་པའི་རྩའམ་མཚམས་རྩ་བཞི་ལས། ཆུ་དང་བཤང་ལམ་སྲིད་པའི་ལམ་དུ་བདུད་རྩི་ལྔ་འབབས་པས་རྩ་བཞི་བོ་དེའི་སྨིན་སོ་ལ་དགོངས་པ་ཡིན་ནམ་སྙམ་ཀྱང་བློ་བཟོས་ཙམ་མོ། ༼ བློ་བཟོ་དགོས་དོན་ནི་རྩ་སོ་གཉིས་ཡུལ་སོ་གཉིས་དང་སྦྱར་བས་འཕྲོས་ཀྱི་བྱུང་ངོ་། བླ་མ་གོང་མ་རྣམས་ཀྱི་སུམ་སྐོར་སོགས་འཐུང་གཅོད་དང་ཉེ་བའི་འཐུང་གཅོད་དུ་ཤུགས་ཀྱི་གོ་ཞེས་གསུངས་སོ། མཆན། ༽དེ་ལྟར་ཡིན་ན་གོང་གི་ཁམས་བྱང་སེམས་འབབས་པའི་རྩ་སོ་གཉིས་ཀྱི་སྨིན་སོ་ཡུལ་སུམ་ཅུ་རྩ་གཉིས་སུ་གནས་པ་ནི་ནང་གི་འབྱུང་ཆེན་དངོས་དང་། ཕྱིའི༵་གནས་ཡུལ་འདི་དག་དེའི་འབྱུང་གཟུགས་ཡིན་པ་སྟེ། ཕྱི་ནང༵་གི་འབྱུང་བ་གཉིས་ཀྱི་གནས་ལུགས་ནི། གཞ༵ན་དཀྱིལ་འཁོར་ངོ་བོར་ཡེ་ནས་སངས་རྒྱས་པ་རྣམ་པར་དག་པའི་ཞིང་ཁམས་ཞེས་གང་གསང་སྔགས་རྙིང་མས་གསུངས་པས་ཀུན་རྫོབ་དག་པ་ཆེན་པོའོ། །
གསུམ་པ་དཀྱིལ་འཁོར་འཁོར་ལོའི་ངོ་བོར་གྲོལ་ལུགས་ནི། དེ་ལྟར་གཙོ་མོ་ཉེར་བཞི་ལ་སོགས་པ་དེ་དག་ཀྱང་། མཁའ་འགྲོ་མ་རྣམས་ཀྱི་བྷ་ག་ཡངས་པ་ཆོས་ཀྱི་འབྱུང་གནས་དཀྱིལ་འཁོར་འཁོར་ལོ་བཞུགས་པའི་གནས་སུ་ལྷུན་གྱིས་གྲུབ་པའི་ཐབས་ཤེས་དབྱེར་མེད་ལྷ་མོའི་རང་བཞིན་དུ་ཡེ་ནས་གནས་པའི། གསང་བ་གཅོད་པའི་རྒྱུད་ལས། ལྷ་མོའི་རྩ་རུ་ཤེས་པར་བྱ། །ཞེས་དང་། ཕྱག་ཆེན་ཐིག་ལེ་ལས། ལྷ་མོའི་དངོས་པོའི་གཟུགས་སུ་ནི། །རྩ་ཡི་བྱད་གཟུགས་ཡིན་པར་གསུངས། །ཞེས་སོ། །
བཞི་བ་ལམ་དང་སའི་བསྒྲོད་ཚུལ་ནི་འོག་ཏུ་རྩ་རླུང་གི་ལམ་གྱུར་གྱི་འབྲས་བུས་སྐབས་སུ་འབྱུང་བས་འདིར་ཁུང་བཟུང་བ་ཙམ་ལས་མི་འཆད་དོ། །
གསུམ་པ་འཁོར་ལོ་སོ་སོའི་གནས་ཚུལ་བཤད་པ་ལ། །ཡོངས་སུ་གྲགས་པའི་འཁོར་ལོ་བཞིའི་ས། ཁྱད་པར་བའི་འཁོར་ལོ་གཉིས་ཀྱིས། ཞར་ལ་དགོས་དབང་། རྐྱེན་གྱི་འཁོར་ལོའི། ཚིག་གི་འཁོར་ལོའི་ཁམས་ཡབ་ཡུམ་འདུས་བསམ་ཐབས་ཤེས་ཟུང་འཇུག་ཏེ་གྱེས་པའི་གནས་ཚུལ་དང་ལྔ་ལས། དང་པོ་ལ། ཚད་དང་དབྱེ་བས་རྐང་གྲངས་སྤྱིར་བཤད་པའི་མདོར་བསྟན། བྱེ་བྲག་ནང་གསེས་ཀྱི་རྣམ་གྲངས་རྒྱས་པར་བཤད། ཁམས་དང་རིགས་ཀྱི་དབང་དུ་དོན་བསྡུ་པའོ། །
དང་པོ་ནི། སྤྱི་བོ་བདེ་ཆེན་འཁོར་ལོ་འདབ་མ་སུམ་ཅུ་རྩ་བཞི་རྒྱར་སོར་བཞི་ཡོད་པ། མགྲིན་པར་བཅུ་དྲུག་གི་འདབ་མ་ལ་སོར་ཚད་ཀྱང་བཅུ་དྲུག །སྙིང་ཁར་འདབ་བརྒྱད་སོར་བཅུ་གཉིས། ལྟེ་བར་རེ་བཞི་སོར་བཅུ་དྲུག་གི་གྲངས་དང་འདབ་མའི་རྒྱར་ངེས་པ་སྟེ། རྡོ་རྗེ་དྲྭ་བ་སྡོམ་པའི་རྒྱུད་ལས། འཁོར་ལོ་རྣམས་ཀྱི་དབྱེ་བ་ནི། །སྤྱི་བོའི་འཁོར་ལོའི་འདབ་མ་ནི། །སུམ་ཅུ་རྩ་གཉིས་གྲངས་ཡིན་ནོ། །དེ་ནས་ལོངས་སྤྱོད་འཁོར་ལོ་ནི། །འདབ་མ་བཅུ་དྲུག་དག་ཏུ་བསྟན། །ཆོས་ཀྱི་འཁོར་ལོ་འདབ་མ་བརྒྱད། །སྤྲུལ་བའི་འཁོར་ལོ་འདབ་མ་ནི། །དྲུག་བཅུ་རྩ་བཞི་དག་ཡིན་ནོ། །བདེ་ཆེན་འཁོར་ལོ་སོར་བཞི་སྟེ། །ལོངས་སྤྱོད་འཁོར་ལོ་སོར་བཅུ་དྲུག །ཆོས་ཀྱི་འཁོར་ལོ་སོར་བཅུ་གཉིས། །སྤྲུལ་པའི་འཁོར་ལོ་སོར་བཅུ་དྲུག །ཞེས་པ་དང་། སྙིང་པོ་བཀོད་པའི་རྒྱུད་ལས། སྲིད་གསུམ་སེམས་ཅན་ཐམས་ཅད་ལ། སྲོག་ཤིང་གསུམ་དང་འཁོར་ལོ་བཞི། ཞེས་སོ།
གཉིས་པ་ལ། ལྟེ་བ། སྙིང་ཀ མགྲིན་པ། སྤྱི་བོའི་འཁོར་ལོའི་གནས་ཚུལ་ལོ། དང་པོ་ལ་སྒྲ་དོན་དང་། གྱེས་ཚུལ། ཁམས་དང་བྱེད་ལས་སོ། །དང་པོ་ནི། མ་དག་པའི་དུས་སུ་ལུས་དང་པོ་ཆགས་པའི་ཚེ་དེ་ལས་གྱེས་པའི་མཆེད་གཞི་ལྟ་བུར་གྱུར་པའི་ཕྱིར་དང་། འཁོར་ལོ་འདི་ལ་གནད་དུ་བསྣུན་ན་དེར་རླུང་སེམས་ཚུད་དུས་སད་པའི་གནས་སྐབས་དག་ནས་སངས་རྒྱས་སྤྲུལ་སྐུའི་དགོངས་པ་འཆར་ཞིང་། སྐུ་དང་ཞིང་ཁམས་ཚད་མེད་པར་སྣང་བའི་དོན་གྱིས་ཀྱང་སྤྲུལ་པའི་འཁོར་ལོ་ཞེས་བྱ་སྟེ། ལུས་ངག་ཡིད་གསུམ་ལ་ཁམས་གསུམ་ཞེས་དེ་དག་སྤྲུལ་པའི་གནས་དང་། དེ་དག་ལ་ཁྱབ་པའི་དོན་ཡིན་ཏེ། གལ་པོ་ལས། བཅུ་དྲུག་གཅིག་དང་བཞིར་གྱེས་པ། ཁམས་གསུམ་ཁྱབ་པའི་སྤྲུལ་སྐུའོ། །ཞེས་སོ། །ཀྱེ་རྡོར་ལས། གང་གི་བསྐྱེད་དང་སྤྲུལ་པ་ཡིས། །སྐུ་ནི་སྤྲུལ་པ་ཅན་ཞེས་བརྗོད། །ཅེས་སོ། །དབྱིབས་འཁོར་ལོ་ལྟར་ཡོད་པ་དང་ང་རྒྱལ་དང་སད་པའི་གནས་སྐབས་ཀྱི་འཁྲུལ་བ་སོགས་སྤངས་བྱ་མི་མཐུན་པའི་ཕྱོགས་འཇོམས་པས་འཁོར་ལོའི་ངེས་ཚིག་གི་བསྟན་པའོ། །
གཉིས་པ་གྱེས་ཚུལ་ནི། དབུ་མ་ལས་རྩ་བཞིར་གྱེས་ཤིང་། ཡང་དེ་ལ་རེ་རེ་སྟེ་བརྒྱད་གྱེས་པས་བཞི་ལས་གཉིས་རེ་གྱེས་པས་འཕོ་བའི་རྩ་བཅུ་གཉིས་དང། དེའི་སྔར་གྱེས་པ་བརྒྱད་ལས་ལྔ་ལྔ་དང། མ་གྱེས་པ་བཞི་ལས་དྲུག་རེ་གྱེས་ནས་དྲུག་ཅུ་རྩ་བཞིར་གྱུར་རོ། །ཞེས་གསང་བ་སྙིང་པོའི་དགོངས་པ་དང་། ཡང་དུས་འཁོར་དང་རྡོར་ཕྲེང་སོགས་ཕ་མའི་རྒྱུད་ཀྱི་དགོངས་པ་ནི། སྟོང་པའི་རྩ་བཞི་ལས་གསུམ་ཚན་དུ་གྱེས་པའི་བཅུ་གཉིས་ལུག་སོགས་དུས་སྦྱོར་གྱི་རྩ་བཅུ་གཉིས་ལ་འཕོ་ཆུང་གི་རིམ་པས་ལྔ་ཚན་དུ་གྱེས་པས་དྲུག་བཅུར་འདོད་དོ། །དེ་ལྟར་དྲུག་ཅུ་པོ་ལའང་མིང་རྣམ་གྲངས་བྱེད་ལས་ཀྱི་སྒོ་ནས། རྡོ་རྗེ་ཕྲེང་བའི་རྒྱུད་ལས་གསུང་ནའང་རྙོགས་པར་དོག་ནས་མ་བྲིས་སོ། །དུས་འཁོར་ལས་ནི། འཁོར་ལོ་དྲུག་གི་དང་བར་མཚམས་དྲུག་ཏེ་བཅུ་གཉིས་པོ་འཕོ་བའི་དང་རྟེན་འབྲེལ་དུས་སྦྱོར་གྱི་རྩར་གསུངས་སོ། །
གསུམ་པ་ཁམས་ཀྱི་དབང་དུ་བྱས་ན་ལྟེ་བའི་འཁོར་ལོ་ས་ཁམས་སུ་རྒྱུད་སྤྱི་ཁྱབ་ལས་གསུངས་སོ། །ཁྱད་པར་གསང་རྒྱུད་རྣམས་སུ་ལྟེ་བ་ཆུའི་འཁོར་ལོར་གསུངས་པ་ནི། འཁོར་ལོ་བཞིར་བསྡུས་ཏེ་སྲིད་པ་ཆགས་རིམ་ལས་ལུས་ཆགས་ཚུལ་བཟུངས་ནས་བསྟན་པ་ཡིན་ཀྱང་གཞན་ཡང་འཁོར་ལོ་འདིས་སའི་བསྐྱེད་བསྡུད་སོགས་ཀྱི་ལུས་སྟོབས་ཆེ་ཆུང་དང་། ཕོ་མོའི་དབང་པོར་བསྒྱུར་བ་ལ་སོགས་པའི་ལས་བྱེད་པའོ། །འདི་ལ་སོགས་པའི་གསང་རྒྱུད་ཀྱི་དགོངས་པ་ཀུན་མཁྱེན་ཆོས་རྗེའི་དབྱིངས་ཆེ་ལ་དོན་ཟབ་པར་གསུངས་བ་ནི་ཆོས་སྤྲིན་ཆེན་པོའི་སར་བཞུགས་པའི་དགོངས་ཁྱབ་ཡངས་ཤིང་ལེགས་གསུང་གི་ཡོན་ཏན་ཕུན་སུམ་ཚོགས་པ་སོ་སྐྱེས་དང་རྟོག་གེའི་སྤྱོད་ཡུལ་ལས་འདས་པར་མངོན་ནོ། །འོན་ཀྱང་ཁོ་བོའི་ས་ཁུང་ཙམ་འཛིན་པར་བཀོད་དེ། ཐུན་མོང་རྒྱུད་དོན་གྱི་དབང་གི་ས་ཁམས་ལ་བཞག་གོ །
གཉིས་པ་སྙིང་གའི་འཁོར་ལོ་ལའང་། སྒྲ་དོན་གྱེས་ཚུལ་ཁམས་ཀྱི་རྣམ་གྲངས་ཏེ་གསུམ་ལས། དང་པོ་ནི། རྩ་འཁོར་གྱི་སྙིང་ཀུ་ནུ་བར་ཐད་དྲང་ན་ཡོད་པ་དང་། མ་དག་པའི་གཞི་དུས་ཡིད་ཀྱི་རྣམ་ཤེས་ཆོས་ཁམས་ལ་སྐྱེ་ཞིང་མཆེད་པའི་གནས་དང་། དབྱིབས་ནི་འཁོར་ལོ་ལྟར་ཡོད་པ་དང་། གནད་དུ་བསྣུན་པ་དེར་རླུང་སེམས་ཞུགས་པས་གཉིད་འཐུགས་གནས་སྐབས་ཆོས་ཀྱི་སྐུའི་དགོངས་པ་འོད་གསལ་གྱི་མི་ཁྱབ་པའི་ཆོས་ཉིད་དུ་འཆར་ཞིང་སྤངས་བྱ་གཏི་མུག་ལས་དང་བག་ཆགས་ཐམས་ཅད་གཅོད་པའི་འཁོར་ལོ་དང་འདྲ་བས་ཀྱང་མིང་དེ་ལྟར་ཆགས་པ་ཡིན་ནོ། །དབང་གི་གལ་པོ་ལས། རྩ་བཞི་འོད་བཞི་ས་བོན་དྲུག །མདོར་བསྡུས་སྙིང་པོ་ཆོས་ཀྱི་སྐུ། །དེ་ཕྱིར་ཆོས་ཀྱི་འཁོར་ལོའོ། །ཞེས་དང་དགྱེས་རྡོར་ལས། སེམས་ནི་ཆོས་ཀྱི་རང་བཞིན་ཏེ། །ཆོས་ཀྱི་སྐུ་ཡང་སྙིང་ཁར་འགྱུར། །ཞེས་སོ། །
གཉིས་པ་ནི། དང་པོ་དབུ་མ་ལས་ཕྱོགས་བཞིར་རྩ་བཞི་གྱེས་དེ་ལ་གཉིས་གཉིས་སུ་གྱེས་པས་བརྒྱད་ཡོད་པར་བཤད་དེ། དེ་ཡང་ཕྱིར་ལྟར་ཐུན་ཚོད་བརྒྱད་ཀྱི་རླུང་བརྟེན་པའི་རྩ་དང་། རིགས་ཀྱི་གསུམ་པ་ནི། ཕྱོགས་བཞིའི་རྩ་རྣམས་རྡོ་རྗེ་ལ་སོགས་པའི་རིགས་བཞིའི་རིགས་སུ་གཏོགས་པར་གསུངས། མཚམས་བཞིའི་རྩ་ནི་ཤེས་རབ་ཡུམ་གྱི་ངོ་བོའི་ཆར་གཏོགས་པར། འདི་མན་གསུངས་གྲུབ་པ་འདྲ་དཔེ་མ་རྙེད།