ཐོད་རྒལ་བྱིན་འབེབས་དངོས་གྲུབ་ཆར་འབེབས།
༈ རྡོ་རྗེ་སེམས་དཔའི་དགོངས་ཉམས་ལས༔ ཐོད་རྒལ་བྱིན་འབེབས་དངོས་གྲུབ་ཆར་འབེབས་བཞུགས་སོ༔
ཐོག་མར་བླ་མའི་རྣལ་འབྱོར་དང་༔ དབང་བཞི་བླང་བ་བཅས་གྲུབ་ནས༔ རང་ལུས་མཁའ་འགྲོའི་སྐུར་གསལ་ལ༔ བྱིན་ཆེན་འབེབས་པ་འདི་ལྟར་བྱ༔ ཨོཾ་ཨཱཿཧཱུྃ༔ ཐོག་མའི་མགོན་པོ་ཆོས་སྐུ་ཀུན་ཏུ་བཟང་༔ རིགས་ལྔ་རིགས་བརྒྱ་གསང་ཆེན་རིགས་གཅིག་དང་༔ རྒྱུད་དང་སྒྲུབ་སྡེ་ཕྱི་ནང་གསང་བའི་ལྷ༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབས༔ སྐུ་གསུམ་མཁའ་འགྲོ་མ་རྒྱུད་གསང་བའི་དབྱིངས༔ ཁྱད་པར་འོད་གསལ་རྫོགས་ཆེན་བརྒྱུད་པ་ཡི༔ རྩ་བརྒྱུད་བླ་མ་རིག་འཛིན་རྒྱ་མཚོའི་ཚོགས༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབས༔ ཡང་གསང་ཐིག་ལེ་ཉག་གཅིག་གདམ་པའི་མཛོད༔ ཀུན་བཟང་རྡོར་སེམས་དགའ་རབ་འཇམ་བཤེས་དང་༔ ཤྲཱི་སེང་ཡེ་ཤེས་མདོ་དང་བི་མ་ལས༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབ༔ པདྨ་འབྱུང་གནས་ཏིང་འཛིན་བཟང་པོ་དང་༔ ལྡང་མ་ལྷུན་རྒྱལ་སེང་གེ་དབང་ཕྱུག་ཞབས༔ རྒྱལ་བ་ཞིང་སྟོན་མཁས་པ་ཉི་འབུམ་གྱིས༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབས༔ གུ་རུ་ཇོ་འབེར་སེང་གེ་རྒྱབ་པ་དང་༔ མེ་ལོང་རྡོ་རྗེ་ཀུ་མ་ར་ཛ་ཆེ༔ ཀུན་མཁྱེན་ཆོས་རྗེ་མངོན་རྫོགས་སངས་རྒྱས་དཔལ༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབ༔ ཁ་བསྐང༌། འཇིགས་མེད་གླིང་བ་ཕྲིན་ལས་འོད་ཟེར་དཔལ༔ རྒྱལ་བའི་མྱུ་གུ་ཆོས་ཀྱི་དབང་པོ་དང་༔ བདེ་ཆེན་རྡོ་རྗེ་ཀུན་བཟང་ཆོས་ཀྱི་གྲགས༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབ༔ འཇིགས་མེད་སྒྲ་དབྱངས་ནམ་མཁའ་འཇིགས་མེད་པ༔ གཏེར་སྟོན་བརྒྱ་རྩ་གྲུབ་ཆེན་བརྒྱད་ཅུ་གཉིས༔ གཞན་ཡང་ཕྱོགས་བཅུའི་སངས་རྒྱས་སྲས་འཁོར་བཅས༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབ༔ ཁྱད་པར་ཨོ་རྒྱན་བླ་མ་དངོས་བརྟེན་པ༔ ཉེ་བརྒྱུད་བྱིན་རླབས་མཛོད་ལྡན་བདུད་འཇོམས་གླིང་༔ ཀ་བཞི་གདུང་བརྒྱད་འཇའ་ལུས་ལྔ་བརྒྱ་ཡིས༔ དེང་འདིར་རྣལ་འབྱོར་བདག་ལ་བྱིན་ཆེན་ཕོབ༔ ལུས་ལ་རྡོ་རྗེ་སྐུ་ཡི་དབང་བྱིན་ཕོབས༔ ངག་ལ་རྡོ་རྗེ་གསུང་གི་དབང་བྱིན་ཕོབ༔ ཡིད་ལ་རྡོ་རྗེ་ཐུགས་ཀྱི་དབང་བྱིན་ཕོབ༔ མ་དག་སྣང་བ་དག་པ་རབ་འབྱམས་ཀྱི༔ དཀྱིལ་འཁོར་ཆེན་པོར་བྱིན་ཆེན་དབབ་ཏུ་གསོལ༔ ཆོས་ཉིད་མངོན་སུམ་མཐོང་བར་བྱིན་གྱིས་རློབསཿ ཉམས་སྣང་གོང་དུ་འཕེལ་བར་བྱིན་གྱིས་རློབས༔ རིག་པ་ཚད་ལ་ཕེབ་པར་བྱིན་གྱིས་རློབས༔ ཆོས་ཉིད་ཟད་སར་འཁྱོལ་བར་བྱིན་གྱིས་རློབས༔ མཐར་ཐུག་འབྲས་བུ་སྐུ་བཞི་ཡེ་ཤེས་ལྔ༔ མཛད་པ་ཕྲིན་ལས་དང་བཅས་མངོན་གྱུར་ནས༔ རང་གཞན་དོན་གཉིས་ལྷུན་གྱིས་གྲུབ་པ་རུ༔ ད་ལྟ་ཉིད་དུ་བྱིན་གྱིས་བརླབ་ཏུ་གསོལ༔ མྱུར་བ་ཉིད་དུ་བྱིན་གྱིས་བརླབ་ཏུ་གསོལ༔ འདུག་ས་འདི་རུ་བྱིན་གྱིས་བརླབ་ཏུ་གསོལ༔ གདན་ཐོག་འདི་རུ་བྱིན་གྱིས་བརླབ་ཏུ་གསོལ༔ འཇའ་ལུས་འཕོ་བ་ཆེན་པོའི་སྐུ་འགྲུབ་ནས༔ གཞོན་ནུ་བུམ་སྐུར་ཡང་དག་སངས་རྒྱས་ཤོག༔ ཞེས་གསོལ་བ་ཕུར་ཚུགས་སུ་གདབ་པས་རྒྱལ་བ་སྲས་བཅས་ཆོས་ཀྱི་དབྱིངས་ནས་གཟུགས་ཀྱི་སྐུར་བཞེངས་ཏེ་མདུན་གྱི་ནམ་མཁར་བྱོན་པར་བསམ༔ བླ་མ་རྒྱལ་བ་སྲས་དང་བཅས༔ འོད་ཕུང་ལྔ་ཡི་རོལ་བར་ཞུ༔ རྒྱང་ཞགས་སྒོ་ནས་རབ་ཞུགས་ཅིང་༔ འོད་རྩ་ཀ་ཏིའི་ལམ་ནས་བྱོན༔ སྙིང་དབུས་གཞི་ཡི་སྒྲོན་མ་ལ༔ ཆུ་ལ་ཆུ་བཞག་བཞིན་ཏུ་ཐིམ༔ བདག་རྒྱུད་རང་བཞིན་སངས་རྒྱས་ཏེ༔ རྟོགས་པ་མངོན་གྱུར་ཆོས་སྐུ་རུ༔ སངས་ནས་ཆོས་གཟུགས་ཡོན་ཏན་ཀུན༔ མངོན་གྱུར་སྐལ་བ་རྒྱུད་ལ་བཞག༔ གནས་ལུགས་དོན་དམ་སྒྲུབ་པ་ཡིས༔ ཤེས་ཐོབ་གྲོལ་མཐོང་གདེངས་ལྡན་པའི༔ ལ་ཟླའི་ཆོས་ཉིད་ཆེན་པོར་རོལ༔ ཞེས་བཟླས་པའི་དོན་པོར་འོད་གསལ་ཐིག་ལེའི་སྒྲུབ་པ་ལ་འབད་དོ༔ དེས་ནི་སྒོ་གསུམ་རྡོ་རྗེ་ཡི༔ གྲོང་འཕོ་མྱུར་ལམ་མཐའ་རུ་ཕྱིན༔ གོལ་ཤོར་བདུད་ཀྱི་གཡུལ་ལས་རྒྱལ༔ ཚེ་འདིར་ཡེ་ཤེས་བླ་མ་ཐོབ༔ ཅེས་པ་འདི་ཡང་ཀུན་བཟང་བསྟན་འཛིན་ལ་སོགས་སློབ་བུ་འགའ་ཡི་བསྐུལ་བ་དོན་ཡོད་པའི་ཕྱིར་དུ་ག་ག་ཨ་བྷྱེས་སྤེལ་བ་བཀྲ་ཤིས་པར་གྱུར་ཅིག །དགེའོ། །སརྦ་མངྒ་ལཾ། །