ཉམས་ཆགས་བཤགས་པའི་ལུང་བྱང་བསྡུས་པ་རྣམ་གྲོལ་སྙིང་ནོར།
ཉམས་ཆགས་བཤགས་པའི་ལུང་བྱང་བསྡུས་པ་རྣམ་གྲོལ་སྙིང་ནོར་བཞུགས་སོ༔
ཧོ༔ དཀྱིལ་འཁོར་རྒྱ་མཚོའི་ཁྱབ་བདག་འཁོར་བཅས་དགོངས༔ སྐུ་ལ་ཕྱི་ནང་གསང་བ་རྣམ་གསུམ་ལས༔ ཕྱི་ལའང་ནི་ཕྱི་ནང་གསང་བ་སྟེ༔ བརྐུ་དང་མི་ཚངས་སྲོག་གཅོད་མཐོལ་ལོ་བཤགས༔ སྐུ་ཡི་ནང་གི་ཕྱི་ནང་གསང་བ་གསུམ༔ སྤུན་སྲིང་རང་ལུས་སྨོད་དང་ཆོས་དང་ནི༔ གང་ཟག་སྨོད་པ་རང་ལུས་དཀའ་ཐུབ་བརྙས༔ བརྡེག་གམ་བཙོག་པ་ཐམས་ཅད་མཐོལ་ལོ་བཤགས༔ སྐུ་ཡི་གསང་བའི་ཕྱི་ནང་གསང་བ་རུ༔ སྤུན་སྲིང་བརྡེག་གཟས་རྒྱན་ལ་སྨོད་པ་དང་༔ མཆེད་བརྡེག་བླ་མ་མཆེད་ཀྱི་ཡུམ་ལ་སྤྱོད༔ བླ་མའི་གྲིབ་འགོམ་སྒོ་གསུམ་མ་བསྡམ་བཤགས༔ གསུང་ལ་ཕྱི་ནང་གསང་བ་རྣམ་པ་གསུམ༔ ཕྱི་ལ་ཡང་ནི་ཕྱི་ནང་གསང་གསུམ་སྟེ༔ རྫུན་དང་ཕྲ་མ་ཚིག་རྩུབ་རྣམ་པ་གསུམ༔ སྨྲས་པ་ཐམས་ཅད་དུས་འདིར་མཐོལ་ལོ་བཤགས༔ གསུང་གི་ནང་གི་ཕྱི་ནང་གསང་བ་གསུམ༔ ཆོས་ཀྱི་ཚིག་སྨྲ་ཆོས་ཀྱི་དོན་ལ་བསམ༔ གནས་ལུགས་སྒོམ་ལ་གཤེ་སྐུར་མི་འདེབས་པའི༔ དམ་ཚིག་དེ་དག་འགལ་འཁྲུལ་མཐོལ་ལོ་བཤགས༔ གསུང་གི་གསང་བའི་ཕྱི་ནང་གསང་བ་རུ༔ རྡོ་རྗེའི་སྤུན་སྲིང་དེ་བཞིན་བླ་མའི་ཡུམ༔ ཉེ་འཁོར་བཅས་པའི་ཚིག་དང་བླ་མ་ཡིས༔ གསུང་ལ་བརྙས་པ་ཐམས་ཅད་མཐོལ་ལོ་བཤགས༔ ཐུགས་ལ་ཕྱི་ནང་གསང་བ་རྣམ་པ་གསུམ༔ ཐུགས་ཀྱི་ཕྱི་ལའང་ཕྱི་ནང་གསང་བ་ལས༔ གཞན་ཡང་བླ་མའི་ནོར་ལ་བརྣབ་སེམས་བྱས༔ སྤྱི་ལ་གནོད་སེམས་ལྟ་བསྒོམ་ལོག་ལྟ་བཤགས༔ ཐུགས་ཀྱི་ནང་ལ་ཕྱི་ནང་གསང་བ་སྟེ༔ སྤྱོད་པ་བག་མེད་བསྒོམ་པ་བྱིང་རྒོད་གྱུར༔ ལྟ་བ་ཡོད་མེད་མཐའ་རུ་ཞེན་པ་ཀུན༔ ཐམས་ཅད་མ་ལུས་དུས་འདིར་མཐོལ་ལོ་བཤགས༔ ཐུགས་ཀྱི་གསང་བའི་ཕྱི་ནང་གསང་གསུམ་རུ༔ ཉིན་མཚན་གཅིག་ལ་ལྟ་བསྒོམ་ཡིད་མི་བྱེད༔ ཡི་དམ་མི་བསྒོམ་བླ་མའི་རྣལ་འབྱོར་དང་༔ མཆེད་ལྕམ་བརྩེ་གདུང་སྤང་བ་མཐོལ་ལོ་བཤགས༔ གཞན་ཡང་བསྲུང་མེད་ཡན་ལག་དང་བཅས་པ༔ རྫོགས་ཆེན་དམ་ཚིག་ཉམས་ཆགས་ཐམས་ཅད་ཀུན༔ མི་འཆབ་གནོང་འགྱོད་མཐོལ་བཤགས་སླན་ཆད་སྡོམ༔ དག་ཚངས་མཆོག་གི་དངོས་གྲུབ་བསྩལ་ཏུ་གསོལ༔ ཞེས་ཀྱང་རང་སློབ་རྣམས་ཀྱི་ངོར་བསྔོ་བསྒྲང་བྱེད་རྒྱུར་གོ་སླ་བ་ག་གཱས་སོ། །
༈ དཀྱིལ་འཁོར་གསུམ་དང་མི་འབྲལ་བ༔ འདི་ནི་རྩ་བའི་དམ་ཚིག་གོ༔ དཀོན་མཆོག་རྟག་ཏུ་མཆོད་བཀུར་བྱ༔ སློབ་དཔོན་མི་སྨོད་མཆེད་མི་འཁྲོ༔ སེམས་ཅན་འཚེ་སྤངས་བྱམས་པ་བསྒོམ༔ མི་དགེ་བཅུ་སྤངས་དགེ་བཅུ་སྤྱོད༔ ཕ་མ་བཀུར་དང་གསང་མི་འཆོལ༔(ཆེན་པོ་བརྒྱད།)དམ་ཚིག་བསྲུང་དུ་ཡོད་པའོ༔ མེད་དང་ཕྱལ་བ་ཁྲེགས་ཆོད་དང་༔ གཅིག་པུ་ལྷུན་གྲུབ་ཐོད་རྒལ་གྱི༔ བསྲུང་མེད་དམ་ཚིག་རྣམ་པ་ལ༔ འགལ་ཉམས་རལ་བ་མཐོལ་ལོ་བཤགས༔ དག་ཚངས་མཆོག་གི་དངོས་གྲུབ་སྩོལ༔ ཡིག་བརྒྱ་ཅི་ནུས་འདོན༔ རྫོགས་ཆེན་དམ་ཚིག་ཉམས་ཆགས་ཀུན༔ བཤགས་ཐབས་ག་ག་ཨ་བྷྱེའི་བྲིས༔ དྷརྨའི་མཚན་གྱི་བཞེད་སྐོང་ངོ་༔
༈ ཀྱཻ༔ དཀྱིལ་འཁོར་དབང་ཕྱུག་བླ་མ་རྗེ༔ བདག་ནི་མ་རིག་ཉོན་མོངས་ཀྱི༔ སྐུ་གསུང་ཐུགས་ཀྱི་དམ་ཚིག་ལ༔ འགལ་འཁྲུལ་ནོངས་བ་མཐོལ་ལོ་བཤགས༔ དབང་བཞི་ཕྱི་ཡི་དམ་ཚིག་དང་༔ གསང་བ་ནང་གི་ཁྱད་པར་བ༔ ཨ་ཏི་བླ་མེད་དམ་ཚིག་ཀུན༔ མ་གུས་བག་མེད་ཉམས་ཆགས་བཤགས༔ སྤྱི་ཏི་ཀ་དག་རྣལ་འབྱོར་དང་༔ ཡང་ཏི་ཐིག་ལེ་མཐོང་བརྟོལ་ཆེ༔ བཀའ་དྲིན་ཁྱད་བསད་བསླབ་ལ་འགོང་༔ བསྲུང་མེད་རྒྱ་ལས་འདས་པ་བཤགས༔ རང་བྱུང་བདེ་བ་ཆེན་པོ་ལ༔ སྡུག་བསྔལ་འཁོར་བར་བལྟས་པ་བཤགས༔ རང་གྲོལ་རྡོ་རྗེ་སྙིང་པོ་ལ༔ ཀུན་ཉོན་དྲི་མར་གོལ་བ་བཤགས༔ ཁྱབ་བརྡལ་ཡེ་ཡོད་ཀུན་ཏུ་བཟང་༔ རང་ངོ་མ་ཤེས་ནོངས་པ་བཤགས༔ རྣལ་འབྱོར་འགྱོད་ཚངས་ཡང་དག་གིསཿ ཁམས་གསུམ་འཁོར་བ་སྟོང་གྱུར་ཅིག༔ ཅེས་མཐར་པདྨའི་ཡིག་བརྒྱ་བཟླ༔ ཅེས་ཀྱང་ཤྲཱི་ངན་ནས་སོ། །