སྔགས་བསྲུང་ཤ་ཟ་ཧོར་མོའི་དོན་གསོལ་མ་མོའི་གད་རྒྱངས།
སྔགས་བསྲུང་ཤ་ཟ་ཧོར་མོའི་དོན་གསོལ་མ་མོའི་གད་རྒྱངས་ཞེས་བྱ་བཞུགས་སོཿ
བྷྱོཿ སྲིད་པའི་ཤ་ཟ་ཆེན་མོ་ཁྱོདཿ མ༵་ནི་སྙིང་པོའི་གནས་ལུགས་ཡིནཿ མོ་ནི་འཁོར་འདས་གནས་ལུགས་ཡིནཿ མ༵་ནི་མ་བཅོས་ཀུན་གྱི་གཞིཿ མོ༵་ནི་གཞི་ལ་ཅིར་ཡང་སྲིདཿ མ༵་ནི་རྒྱ་ཆད་ཕྱོགས་ལྷུང་མེདཿ མོ༵་ནི་ཀུན་འབྱུང་བྱང་ཆུབ་སེམསཿ ཆོས་ཉིད་ཀུན་ཁྱབ་མ་མོ་ཆེ་ཧོཿ མ༵་ནི་སེམས་མེད་ཆོས་ཀྱི་དབྱིངསཿ མོ༵་ནི་སྲོག་མེད་སྤྱན་ལྔའི་བཀྲཿ ཆེ་ཞེ་རྐང་མེད་མཁའ་ལ་འགྲོཿ རྟོགས་པ་ཡེ་ཤེས་མ་མོ་ཆེའོཿ འབྱུང་ལྔ་གཞི་ཡི་མ༵་ཞེས་བྱཿ བསྐྱེད་བྱེད་བརྟན་གཡོ་མོ༵འི་རྒྱུད་འཁྲུངསཿ ཡེ་ནས་མ་ཤེས་ཡེ་ཤེས་ཡིནཿ འབྱུང་བཞི་སྤྱི་ཡིས་ཆེན་མོ་ཧོཿ དངོས་པོ་ནང་གི་མ༵་ཞེས་བྱཿ ཤ་ཁྲག་དྲོད་དབུགས་མོ༵་ཞེས་ཡུམཿ ཤེས་པས་སྲིད་འབྱུང་མཁའ་འགྲོ་ཡིནཿ རྒྱུ་ལུས་ནང་གི་མ་ཆེན་མོ་ཧོཿ མི་སྲིད་སྲིད་པར་བརྫུ་ཐབས་སུཿ ཀུན་འཕྲུལ་སྒྱུ་མ་ཁ་མིག་མེདཿ མདུན་དུ་མི་འགྲོ་རྒྱབ་དུ་འཁྱོལཿ སེམས་ནི་ཀུན་སྲིད་མ་མོ་ཆེ་ཧོཿ ཡུལ་གྱིས་སེམས་ལ་བདེ་སྡུག་འདུདཿ དེ་ཡིས་ལུས་ལ་ཕན་གནོད་རྐྱེནཿ གཡས་སུ་མི་དགའ་གཡོན་ལ་འདརཿ ཕན་གནོད་ཡུལ་གྱི་མ་མོ་ཆེའོཿ ཡིད་ཟས་དང་བླངས་མཐུ་བརྟས་ནསཿ ཉོན་མོངས་དུག་ལྔའི་ལས་བསགས་ཀྱངཿ ལམ་འགོགས་སྲོག་ནི་ལྕགས་ལ་བླཿ ཕན་གནོད་ནང་གི་མ་མོ་ཆེའོཿ རྩ་བ་མ་ཆོད་ཡལ་གར་རྩེསཿ མཆོད་རྟེན་མ་བཀུར་ལྡོག་པས་བརྫིསཿ དེ་ལས་ཁ་བྲག་ལམ་དུ་འཁྱརཿ ཕན་གནོད་གསང་བའི་མ་མོ་ཆེའོཿ རྩ་ལ་ཞོན་ནས་ཁྲག་ལ་རྒྱུཿ དོན་སྙིང་ཡན་ལག་དབང་པོར་བདགཿ འབྱུང་འཇུག་དྭངས་སྙིགས་ལས་བྱེད་པསཿ འཇུག་ཤེས་བར་གྱི་མ་མོ་ཆེའོཿ དྭངས་སྙིགས་ལུས་སེམས་ཟུངས་བྱེད་དེཿ བཅོ་བརྒྱད་ཁམས་ཀྱི་སྐད་མེད་མའིཿ སླར་ཡང་ལ་ཝའི་ཆོས་སྐད་མཐོཿ གསང་བ་ཁམས་ཀྱི་མ་མོ་ཆེའོཿ ཁྱད་པར་འཇིག་རྟེན་ལས་གཟུགས་ཀྱིཿ བལྟ་ཞིང་དགོད་ལ་རེག་པས་འཁྱུདཿ བདེ་དགའི་དུས་སྟོན་ཕྱག་རྩེར་གཏོདཿ ཕྱག་རྒྱ་རཱ་ཏིའི་མ་མོ་ཆེའོཿ རི་རབ་རྩེ་སོགས་གནས་གསུམ་ནསཿ ཕྲ་མེན་གར་གྱིས་རྐེད་མེད་ཁྲོཿ རབ་འབྱམས་ལས་ལ་རང་བྱན་ཚུདཿ ཕྲིན་ལས་མྱུར་མཛད་མ་མོ་ཆེའོཿ མདོར་ན་འཁོར་འདས་གཡོ་འགྱུར་ཀུནཿ ཡེ་ཤེས་མ་མོའི་གར་སྟབས་ཡིནཿ ཡུལ་གྱི་བརྡ་སྒྲ་ཚངས་དབྱངས་ཀུནཿ ཆོས་ཉིད་མ་མོའི་གད་རྒྱངས་ཡིནཿ རྟོགས་རིག་ཉམས་དང་བློ་སྣང་ཀུནཿ བདེ་ཆེན་མ་མོའི་སྦྱོར་སྒྲོལ་ཡིནཿ བྱ་བྱེད་འབྱུང་དུས་འཁོར་ལོ་གངཿ ཅིར་ཡང་མ་མོའི་མི་མཛད་མཛདཿ སྲིད་ཞིའི་སྒོ་ཚུལ་བརྗིད་བག་བསྐྱངཿ དབང་ལྡན་མ་མོའི་མཚར་སྡུག་བཞདཿ ནད་རིམས་ཁྲག་དང་ཁྲམ་ཚོན་གྲུཿ དམ་ཚིག་མ་མོའི་ཆོ་འཕྲུལ་གཟེཿ ལྟས་ངན་བྱོལ་སོ་གོད་འབྱུང་འཁྲུགསཿ འཇིག་རྟེན་མ་མོའི་མཐུ་སྟོབས་ཡིནཿ དུས་འཁྲུགས་མཚོན་བསྐལ་མུ་གེ་སོགསཿ བྱས་ཉེས་མ་མོའི་གདུག་རྩུབ་ཡིནཿ ཆོས་སྲིད་དབང་ཐང་དགོས་འདོད་དགུཿ བསྟན་སྲུང་མ་མོའི་དངོས་གྲུབ་ཡིནཿ དེ་ཕྱིར་དོན་མཐོང་དབུ་འཕང་བསྟོདཿ མཆོད་བརྟེན་གུས་པའི་བྱིན་རླབས་ཀྱིསཿ ཆོ་འཕྲུལ་ནད་དལ་རང་ལ་བསྡུསཿ ཡེ་ཤེས་པ་ཁྱོད་རང་སར་བཞུགསཿ སངས་རྒྱས་བསྟན་དང་བསྟན་འཛིན་སྐྱོངསཿ ཀླ་ཀློ་གདུག་པའི་བསྟན་པ་བསྣུབསཿ རྣལ་འབྱོར་བདག་གི་ཕན་སྐྱོབས་མཛོདཿ དམ་ལ་མ་འདའ་ས་མ་ཡཱཿ བཅོལ་བའི་ཕྲིན་ལས་འགྲུབ་པར་མཛོདཿ འདི་ཚར་རེ་བཏོན་ན་དུས་ངན་གྱི་ནད་རིམས་ཐམས་ཅད་ཆད་དོཿ ཤ་ཟ་ཧོར་མོ་དངོས་ཀྱིས་རྨི་ལམ་དུ་ག་ག་ཨ་བྷྱེ་ལ་གནང་ངོཿ མངྒ་ལཾ། །