ཆོག་པ་རྣམ་པ་བཅོ་བརྒྱད་ཀྱི་གླུ།
༈ ཆོག་པ་རྣམ་པ་བཅོ་བརྒྱད་ཀྱི་གླུ། འདི་སྣང་བློ་ཡིས་ཐོང་ན་ཆོག ༡ །གང་བྱས་ཆོས་སུ་འགྲོའོ་སྐལ་ལྡན་བུ། །མི་རྟག་བློ་སྣ་རྒྱུད་ལ་སྐྱེ་ན་ཆོག ༢ །ལེ་ལོ་ཕྱི་བཤོལ་མི་འཆོར་སྐལ་ལྡན་བུ། །དཀོན་མཆོག་ཡིད་ཆེས་སྐྱབས་འགྲོ་བྱས་ཀྱང་ཆོག ༣ །ཆོས་ཀུན་ཅིག་དྲིལ་ཡིན་ནོ་སྐལ་ལྡན་བུ༑ ༑བྱང་ཆུབ་སེམས་འདི་རྒྱུད་ལ་བསྟེན་ཀྱང་ཆོག ༤ །ཐེག་ཆེན་རྣལ་འབྱོར་ཡིན་ནོ་སྐལ་ལྡན་བུ། །སྟོང་ཉིད་དོན་ལ་གཅིག་དུ་གཞོལ་ཀྱང་ཆོག ༥ །ལྟ་བའི་སྤྱི་ཆིངས་ཡིན་ནོ་སྐལ་ལྡན་བུ༑ ༑བདག་མེད་ཙམ་ཞིག་ཁོལ་བུར་རྟོགས་ཀྱང་ཆོག ༦ །སྲིད་རྩ་དེས་ཀྱང་ཆོད་དོ་སྐལ་ལྡན་བུ༑ ༑ཚུལ་ཁྲིམས་མིག་འབྲས་ལྟ་བུར་བསྲུང་ཀྱང་ཆོག ༧ །ཡོན་ཏན་གཞི་རྟེན་ཡིན་ནོ་སྐལ་ལྡན་བུ། །བསམ་གཏན་ཙམ་དེར་གནས་ན་དེའི་ཀྱང་ཆོག ༨ །ཉོན་མོངས་ཉེས་པས་མི་གོས་སྐལ་ལྡན་བུ། །འབྲལ་མེད་བླ་མ་བསྟེན་ན་དེས་ཀྱང་ཆོག ༩ །བྱིན་རླབས་དགོངས་བརྒྱུད་འཕོའོ་སྐལ་ལྡན་བུ། །དབང་བསྐུར་ཙམ་ཞིག་ཐོབ་ན་ལོས་ཀྱང་ཆོག ༡༠ །སྐྱེ་བདུན་ཕན་ལས་མི་ལེན་སྐལ་ལྡན་བུ། །རྣམ་དག་དམ་ཚིག་བསྲུང་ན་དེས་ཀྱང་ཆོག ༡༡ །རིགས་ཡོད་གསོས་སུ་བྱེད་དོ་སྐལ་ལྡན་བུ། །དག་སྣང་མོས་གུས་བྱས་ན་དེས་ཀྱང་ཆོག ༡༢ །བར་དོ་ལྷ་རུ་འཆར་རོ་སྐལ་ལྡན་བུ། །ཀུན་རྫོབ་ལྷ་རུ་བསྒོམ་ན་དེས་ཀྱང་ཆོག ༡༣ །སྣང་བ་དག་པར་འགྱུར་རོ་སྐལ་ལྡན་བུ། །འོད་གསལ་རྫོགས་རིམ་བསྒོམ་ན་དེས་ཀྱང་ཆོག ༡༤ །ཕྱག་རྒྱ་ཆེན་པོ་ཐོབ་པོ་སྐལ་ལྡན་བུ། །ཟུང་འཇུག་རྫོགས་ཆེན་བསྒོམ་ན་དེས་ནི་མཆོག ༡༥ །འབྲས་བུ་སྐུ་གཉིས་འགྲུབ་པོ་སྐལ་ལྡན་བུ། །མ་ཎི་ཁ་ཏོན་བྱས་ན་དེས་ཀྱང་ཆོག ༡༦ །རི་བོ་ཏ་ལར་སྐྱེའོ་སྐལ་ལྡན་བུ། །བདེ་སྨོན་ཡི་དམ་བྱས་ན་དེ་ཡིས་ཆོག ༡༧ །བདེ་བ་ཅན་དུ་སྐྱེའོ་སྐལ་ལྡན་བུ། །གཞན་ཡང་དམན་པའི་དགེ་སྦྱོར་གཅིག་ཀྱང་མེད། །གང་དང་གང་ཞིག་གྲུབ་ན་དེ་ཡིས་ཆོག ༡༨ །དགེ་བ་སྒྲུབ་འདོད་དོན་གཉེར་མེད་པ་ལས། །ཆོས་ཀྱི་བརྡུགས་པ་མིན་ནོ་སྐལ་ལྡན་བུ། །འདི་ལས་གང་ཞིག་མོས་པ་ཆོས་སྐལ་དེའི། ཁྱོད་རང་གཏན་གྱི་འདུན་མ་འགྲུབ་པར་ཤོག །ག་གཱས་སོ། །