ཟབ་དོན་གཅོད་ཀྱི་གནད་བསྡུས་བརྒྱུད་དྲུག་གཅིག་འདུས།
༈ ཡེ་ཤེས་སྒྱུ་འཕྲུལ་དྲྭ་བ་ལསཿ ཟབ་དོན་གཅོད་ཀྱི་གནད་བསྡུས་བརྒྱུད་དྲུག་གཅིག་འདུས་བཞུགས་སོཿ
ན་མོ་གུ་རུ་པདྨ་ཀཱ་རཱ་ཡེཿ བདུད་གཅོད་ཟབ་མོ་ཉམས་ལེན་པསཿ རྒྱུན་གྱི་རྣལ་འབྱོར་སྤྲོས་པ་མེདཿ བརྒྱུད་ཚུལ་ཀུན་གྱི་ལྡེའུ་མིག་དུཿ མན་ངག་སྒོ་བརྒྱ་འབྱེད་འདི་ལོངསཿ ས་མ་ཡཱཿ དེ་ལ་ཐོག་མར་བདག་དང་ཡུལ་གྱི་འཆིང་བ་ཐད་ཀར་དུ་གཅོད་པའི་ཕྱིར་བྱུང་གནས་འགྲོ་གསུམ་གཟུགས་དབྱིབས་ཁ་དོག་སོགས་ཀྱིས་གང་ཟག་གི་བདག་གམ་སེམས་ལ་དཔྱད་པསཿ བདག་སྟོང་ཉིད་དུ་གོཿ གཅིག་དང་དུ་མ་དངཿ སྒྱུ་མའི་དཔེ་བཅུ་སོགས་ཀྱིས་དཔྱད་པསཿ ཡུལ་སྟོང་ཉིད་དུ་གོ་ཡངཿ སྟོང་པ་ཕན་མེད་གནོད་མེད་དུ་གྱུར་ནསཿ སྙེམས་ཐག་མ་ཆོད་པའི་གང་ཟག་གིཿ གཉན་སར་སོང་ནས་རྐྱེན་དང་བསྲེས་པས་བདུད་བཞི་གཅིག་ཆར་དུ་གཅོད་པའི་ཐབས་མཁས་ཡིན་པསཿ དེ་ལ་སྔ་ནོནཿ བར་ནོནཿ ཕྱི་ནོན་གསུམ་གསུམ་གྱིས་བསྡུས་པའི་ཐོག་མར་སྔ་ནོན་ནིཿ རིམ་པ་གསུམ་དངཿ ཡང་ན་ཐམས་ཅད་ལ་ཁྱབ་པའི་གཅིག་གིས་ཀྱང་ཆོགཿ དང་པོ་རང་གི་གནས་ཁང་ནས་སྔ་ནོན་འཕེན་པ་ནིཿ རང་ཉིད་ཁྲོས་མ་ནག་མོ་ཕྱག་གཡས་གྲི་གུག་གཡོན་ཐོད་ཁྲག་འཛིན་པ་ཞབས་གཉིས་གར་སྟབས་ཀྱིས་པད་ཉི་རོའི་གདན་གྱི་སྟེང་དུ་བརྫིས་པཿ རྣ་ལྟག་གཡས་སུ་ཕག་ཞལ་ངུར་བཿ ཞལ་གཅིག་ཕྱག་གཉིས་པར་གསལ་བའི་ཐུགས་ཀ་ནས་མཁའ་འགྲོ་སྡེ་ལྔ་དཀར་སེར་དམར་ལྗང་མཐིང་ནག་གཡས་པས་མི་ལྤགས་ཀྱི་གཡང་གཞི་སྡེབ་པས་ཁམས་གསུམ་དབང་དུ་སྡུད་པཿ གཡོན་མི་རྐང་གི་གླང་བུ་འབུད་པས་སྲིད་གསུམ་ཟིལ་གྱིས་གནོན་པཿ ཤར་ལྷོ་ནུབ་བྱང་ཕྱོགས་མཚམས་སྟེང་འོག་ཏུ་འཕྲོས་པསཿ ཉོན་མོངས་ལྔའི་བསྐྱེད་པའི་ལྷ་འདྲེ་ཐམས་ཅད་དབང་དུ་བསྡུས་ཤིང་བཀུག་ནས་གཉན་ས་དེར་མི་ནག་པོ་གཅིག་ཏུ་བསྒྱུར་ནས་སྲུང་བའི་འཁོར་ལོ་རིམ་པ་དྲུག་གི་ནང་དུ་ཚུད་པར་བསམཿ གཉན་མིག་རིག་ས་དེ་ནས་ཡང་དེ་ལྟར་ཟིལ་ནོན་འཕེན་པ་ནི་སྔ་ནོན་བར་བཿ གཉན་སར་སླེབ་ནས་ཡང་དེ་ལྟར་ཟིལ་ནོན་འཕེན་པ་ནི་སྔ་ནོན་ཕྱི་མའོཿ ཡང་ན་སྔ་ནོན་གསུམ་པོ་ལ་རང་ཁྲོས་མའི་ཐུགས་ཀ་ནས་འོད་ཟེར་སྣང་སྲིད་ཐམས་ཅད་ཁྱབ་པར་འཕྲོས་པསཿ འོད་ཇེ་ཆུང་དུ་འདུས་པའི་ནང་དུ་ལྷ་འདྲེ་ཐམས་ཅད་བསྡུས་ནས་གཉན་ས་དེར་གནས་པའི་མཐར་སྲུང་འཁོར་བསྒོམ་པ་སྤྱིའི་ཟིལ་ནོན་གྱིས་འཐུསཿ བར་ནོན་དང་པོ་ནིཿ བྲོ་ར་ཕུར་ཁྱེར་དམིགས་པ་འདོན་ཆ་བཞིནཿ བར་ནོན་བར་བ་ནིཿ བདག་ཟིལ་གྱིས་ནོན་ཕྱིར་བདག་འཛིན་གྱི་སྙེམས་ཐག་བཅད་དེཿ བདག་མེད་དང་ཁྲོས་མར་བསྒོམཿ གནས་ཟིལ་གྱིས་ནོན་ཕྱིར་ལུས་པོ་ལུང་པ་གང་བར་བསམ་པའི་འོག་ཏུ་གནས་དེའི་ལྷ་འདྲེ་མི་ནག་ཏུ་གསལ་བ་དེ་མནན་ནས་སྐད་ངན་ཙི་རི་རི་འདོན་པར་བསམཿ ལྷ་འདྲེ་ཟིལ་གྱིས་ནོན་ཕྱིར་སྣང་སྲིད་ཀྱི་ལྷ་འདྲེ་ཐམས་ཅད་འོད་ཟེར་སྔར་ལྟར་སྤྲོས་ནས་གདན་འོག་གི་མི་ནག་ལ་ཡང་ཡང་ཐིམ་པར་བསམཿ བར་ནོན་ཐ་མ་ནིཿ བར་བར་དུ་ལུས་སྦྱིན་བྱས་ནས་མགྲོན་གྱི་ལྷ་འདྲེ་ཐམས་ཅད་སྔར་ལྟར་བསྟིམས་པ་དངཿ ཅི་ནས་ཀྱང་སློང་མ་ཐུབ་ན་རི་བོ་ཁམ་ཆོད་ལ་སོགས་པ་མཐར་གཏད་ཀྱི་དམིགས་པ་བྱ་བའོཿ ཕྱི་ནོན་དང་པོ་ནིཿ ཤ་ཁྲག་མགྲོན་དུ་འགྱེད་ནས་གནས་དེའི་ལྷ་འདྲེ་དྲེགས་ཤོས་རྣམས་ལ་ངའི་གནས་འདིར་སྔར་མེད་ཀྱི་ལྷ་འདྲེ་ནང་དུ་མ་བཏངཿ འདིར་གནས་ཀྱི་ལྷ་འདྲེ་ཕྱིར་མ་བཏངཿ ཁྱེད་རྣམས་ཀྱིས་ཕྱག་མཆོད་ཀྱི་རྟེན་འདིའི་གྱིས་ཤིགཿ ཅེས་ཨོཾ་ཨཱཿཧཱུྃ་བྲིས་ལ་རབ་གནས་བྱས་ཏེ་བཞག་པའོཿ ཕྱི་ནོན་བར་བ་ནིཿ ཁྲོཾ་གཅིག་བྲིས་པ་བྱ་ཁྱུང་མེ་འབར་བར་བསྒོམ་ལ་ཤ་ཁྲག་གི་ཕོག་གཏད་ནས་ངའི་རྗེས་སུ་ལྷ་འདྲེ་མ་མངག་ཞེས་ཕྲིན་ལས་བཅོལ་ལ་ཕྱི་བལྟས་མི་བྱེད་པར་འགྲོའོཿ ཕྱི་ནོན་ཐ་མ་ནིཿ རང་གི་རྣམ་ཤེས་ཕཊ་ཀྱིས་དབྱིངས་ཀུན་ཏུ་བཟང་མོའི་མཁའ་ཀློང་དུ་བསྲེས་ཏེ་དབྱིངས་ལས་འོད་ཟེར་ཁ་དོག་ལྔ་ལྡན་ཤིན་ཏུ་ཕྲ་བའི་ནང་དུ་རིག་པ་འོད་ཀྱི་ཐིག་ལེ་འདྲིལ་ནས་རང་ཁྱིམ་དུ་སོང་བར་བསམ་པའམཿ གཉན་ས་གཞན་དུ་འགྲོ་ན་དེ་ནས་སྔ་ནོན་འཕེནཿ ལར་གཉན་སར་འགྲོ་དུས་སྦྲུལ་ནག་འཁྱིལ་འགྲོས་ཀྱིས་ལྷ་འདྲེ་ཐམས་ཅད་དེད་དེ་འགྲོ་བར་བསམ་པ་དངཿ མཁའ་འགྲོའི་གར་འགྲོས་གྱིས་ལྷ་འདྲེ་རང་ལུས་ལ་བསྟིམས་ཏེ་འགྲོ་བར་བསམ་པ་དངཿ ལྟ་བའི་གདེང་འགྲོས་ཀྱིས་འཁོར་འདས་རང་སྣང་དུ་ཤེས་པའི་ངང་ནས་འགྲོ་བར་བསམ་པ་སོགས་འགྲོ་ལུགས་ལྔ་སོགས་གང་རུང་གིས་འགྲོཿ དེའི་སློང་ཚད་ལ་དགའ་སྡུག་རེ་དོགས་སྐྲག་དངངས་སོགས་འབྱུངཿ ཚར་ཚད་ལ་དབང་དུ་འདུས་པཿ ཟིལ་གྱིས་གནོན་པཿ བྲན་དུ་ཁོལ་བའི་རྟགས་སོགས་ཡོད་ཀྱང་ཀུན་ལ་དགའ་སྡུག་རེ་དོགས་མི་བྱ་བརཿ ལྟ་བ་སྟོང་ཉིད་ཀྱི་ངང་མདངས་དང་མ་བྲལ་བར་བྱའོཿ ཐུན་བཞིར་ཞི་གཅོད་དཀར་འགྱེད་དང་ཁྲ་འགྱེདཿ དྲག་གཅོད་དམར་འགྱེད་དང་ནག་འགྱེད་སོགས་བྱའོཿ ས་མ་ཡཱཿ རྒྱ་རྒྱ་རྒྱཿ ཅེས་པ་འདི་ཡང་གནད་དོན་གོ་སླ་བར་དྲིལ་དེ་ག་གཱ་བས་སོ། །