སེམས་འཛིན་ཉེར་གཅིག་གི་སེམས་གནས་ཐབས་བདུན།
༈ སེམས་འཛིན་ཉེར་གཅིག་གི་སེམས་གནས་ཐབས་བདུན་ནི། ཚ་གྲང་གི་ནད་ལ་གཉེན་པོ་ཡི་གེ་ཨ་དཀར་པོ་གཅིག་སྣ་རྩེར་བསྒོམ་ལ་རླུང་དང་བསྦྲགས་ནས་ཕར་འགྲོ་ཚུར་འོང་བྱེད་པར་བསམ་པ་དང་གཅིག རླུང་སྔར་དང་འདྲ་བ་ལས། ཕཊ་ཞིག་བརྗོད་དེ་ཤེས་པ་རྟོག་མེད་དུ་གནས་པ་ལ་སེམས་བཟུང༌། ཡང་རྣམ་རྟོག་སྐྱེས་དུས་ཡང་བརྗོད་པ་དང་གཉིས། ཧ་དྲག་པོའི་རྣམ་རྟོག་གཏོར་ལ་སེམས་སུ་བཟུང་བ་དང་གསུམ། ལུས་ཙོག་པུས་རི་རྩེ་སོགས་སུ་མགོ་བསྒྲིལ་བ་དང་བཞི། འདི་དུས་རླུང་ཆོས་བྱེད། ཧཱུྃ་རིང་པོ་དང་ཐུང་ངུ་ཡང་བརྗོད་ནས་སེམས་ཧཱུྃ་ལ་གཏད་པ་དང་ལྔ། ལུས་གནད་སྔར་ལྟར་ལ་ལྟེ་བར་རཾ་གསལ་བས་སེམས་བཟུང་བ་དང་དྲུག སྣ་རྩེ་དང་བ་སྤུ་ཐམས་ཅད་ལ་སྐུ་ཕྲ་མོ་མང་པོ་ཕར་འཕྲོ་ཚུར་འདུས་པར་བསྒོམ་པ་དང་བདུན་ནོ། །ལུས་གནད་སྔར་ལྟར་ལ་སྨིན་མཚམས་སུ་ཐིག་ལེ་དཀར་དམར་ལ་སེམས་བཟུང་བ་དང་གཅིག རྩ་གསུམ་གསལ་ནས་རླུང་བཟུང་བ་དང་གཉིས། སྣ་རྩེ་རླུང་དཀར་པོ་མདའ་གང་པ་ཞིག་ཕར་འགྲོ་ཚུར་འོང་ལ་སེམས་བཟུང་བ་དང་གསུམ། ལུས་འོད་ཕུང་སྣ་ལྔར་གྱུར་བ་ལ་སེམས་བཟུང་བ་དང་བཞི། སེམས་རླུང་གཉིས་ནམ་མཁའ་ལ་འཕང་ནས། ཡི་གེ་འོད་གོང་གང་རུང་ཇེ་མཐོར་ཉི་ཟླ་ལ་ཐུག་པར་བསམ་པ་དང་ལྔ། སེམས་རྣ་བ་ལ་གཏད་དེ་གནས་པ་དང་དྲུག སྙིང་ནང་དུ་ལྷ་སྐུ་ཕྲ་མོ་གསལ་བ་ལ་སེམས་བཟུང་བ་དང་བདུན་ནོ། །དེས་ལུས་སེམས་ཀྱི་ཞེན་པ་བྲལ་ལོ། །གསུམ་པ་ཆོས་ཉིད་མཐོང་བ་བསྟན་པའི་བདུན་ཚན་ནི། མིང་གི་གདགས་གཞི་བཙལ་ནས། །འཁོར་འདས་ཀྱི་ཆོས་ཐམས་ཅད་སྟོང་ཉིད་དུ་བསྒོམ་པ་དང་གཅིག སྣང་ཚད་ལ་བལྟས་ནས་སྟོང་བར་བསྒོམ་པ་དང་གཉིས། གང་སྣང་བདེན་མེད་མི་རྟག་པར་བསྒོམ་པ་དང་གསུམ། འབྱུང་ལྔ་གང་སྣང་གི་སྟེང་དུ་མ་ཡེངས་བར་བཞག་པ་དང་བཞི། སྣང་ཤེས་གང་ཤར་ཐམས་ཅད་སྐད་ཅིག་མའི་ཕྲེང་བར་ཤེས་ནས་རྟོག་བྲལ་དུ་ཡེ་ནས་གནས་པ་ངོས་བཟུང་བ་དང་ལྔ། གཉིས་སྣང་གཉིས་འཛིན་དུ་ཤར་དུས་ཤར་བ་དེ་ལ་བལྟ་བ་དང་དྲུག རིག་པ་ནམ་མཁའ་ལ་ཐིམ། སྣང་སེམས་ཐམས་ཅད་ནམ་མཁའི་ངང་ན་ལང་ངེར་འདུག་བར་བསྒོམ་ལ། ནམ་མཁའ་དང་ཆོས་ཐམས་ཅད་སྟོང་པ་ཉིད་དུ་མཉམ་པའོ་སྙམ་དུ་སེམས་བཟུང་བ་དང་བདུན་ནོ། །དེ་དག་གིས་ཆོས་ཉིད་ལ་ངང་གིས་གནས་པ་ཐེག་མཆོག་མཛོད་ཀྱི་ཉི་ཟླ་ཁ་སྦྱོར་གྱི་དགོངས་པ་བླང་ནས་གསུང་བ་མདོར་བསྡུས་པའོ། །ཅེས་པ་འདི་ཡང་སློབ་བུ་འགའ་ལ་ཕན་པའི་ཕྱིར་དུ་ག་ག་ཨ་བྷྱེ་ནས་བྲེལ་འཚུབ་ཀྱི་ངང་ནས་སྨྲས་པའོ། །དགེའོ། །དགེའོ།
༈ སེམས་དོན་མདོར་བསྡུས་བདུད་རྩིའི་བཅུད་ཐིག་བཞུགས་སོ། །འོ་ཁྱོད་ཀྱི་ད་ལྟའི་སེམས་ལ་སྣང་བའི་ཆོས་ཐམས་ཅད་རྨི་ལམ་ལྟ་བུར་གཞན་དུ་གྲུབ་པ་མེད་པར་སེམས་ཀྱི་འཁྲུལ་སྣང་ཡིན་པར་བློ་ཐག་མ་ཆོད་ཀྱི་བར་དུ་དཔྱད། དེའི་སེམས་ཙམ་མན་ཆད་ཀྱི་གྲུབ་མཐའ་རྫོགས་པ་ཡིན་ནོ། །དེ་ནས་སེམས་དེ་ཡང་ཇི་འདྲ་ཡོད་ལྟོས་དང་ཅི་ཡང་མ་མཐོང་བ་ནི་ངོ་བོ་སྟོང་པའི་ཡེ་ཤེས་ཞེས་བྱ། དེས་དབུ་མ་མན་ཆད་ཀྱི་གྲུབ་མཐའི་དོན་རྟོགས་པའོ། །ངོ་བོ་སྟོང་བཞིན་པའི་སེམས་ཉིད་གསལ་སེང་ངེ་བ་འདི་རང་བཞིན་འོད་གསལ་བ་ཞེས་བྱའོ། །གསལ་སྟོང་དབྱེར་མེད་པའི་ཡེ་ཤེས་ཀུན་མཁྱེན་ཀུན་གཟིགས་ཤེས་རབ་ཀྱི་ཆ་ནས་ཐུགས་རྗེ་ཀུན་ཁྱབ་ཞེས་བྱའོ། །གསལ་རིག་སྟོང་གསུམ་འདུ་འབྲལ་མེད་པ་དེ་ནི་གཞི་རྒྱུད་སྐུ་གསུམ་ལྷུན་གྲུབ་ཞེས་བྱ་བ་ཡིན། དེའི་ངང་མངོན་དུ་བྱ་བའི་རྒྱུན་བསྐྱངས་ཏེ་འཁྲུལ་རྟོག་གཟུང་འཛིན་ཐ་མལ་གྱི་མ་རྙོགས་པར་ཆེད་དུ་འཛུར་བས་མ་བཅིངས་བར་བཞག་པ་ནི་མཉམ་བཞག་དམིགས་གཏད་དང་བྲལ་བའི་བསྒོམ་པ་ཡིན་ནོ། གལ་ཏེ་རྟོག་པ་སྐད་ཅིག་ཆ་མེད་བྱུང་ཞིག་དུ་ཤར་ཀྱང་དགག་བསྒྲུབ་སྤང་བླང་དང་བྲལ་བའི་ཆོས་ཉིད་དུ་ཤེས་པའི་ངང་ནས་རྗེས་མཐུད་མེད་པར་གནས་ལུགས་བསྐྱངས་བས་རང་རྒྱུད་འཛིན་ཞེན་གྱིས་མི་འཆིངས་བ་ནི་རང་གྲོལ་ཞེས་བྱ་སྟེ། རྗེས་ཐོབ་རྩལ་སྦྱོངས་ཀྱི་དགོངས་པའོ། །དེ་ནས་སྤྱོད་དུ་མེད་པ་མཉམ་བཞག་གི་སྤྱོད་པ་དང༌། སྤྱོད་དུ་ཡོད་པ་རྗེས་ཐོབ་ཀྱི་སྤྱོད་པ་གཉིས་སུ་དུས་ཚོད་དང་བསྟུན་དེ་སྤྱད་དོ། འབྲས་བུ་ནི་རང་ངོའི་སྐུ་གསུམ་ཡེ་ཤེས་དང་བཅས་པ་སྒྲིབ་བྱེད་ཀྱི་དྲི་མ་མཐའ་དག་དང་བྲལ་དེ་མངོན་དུ་གྱུར་ནས་མཛད་པའི་ཕྲིན་ལས་ཕྱོགས་མེད་དུ་རྒྱས་པའོ། །ཅེས་ཀྱང་ཐུབ་བསྟན་ངོར་ག་གཱས་སོ། །དགེའོ། །