སེམས་དོན་གནད་ཀྱི་མེ་ལོང་།
༈ སེམས་དོན་གནད་ཀྱི་མེ་ལོང་བཞུགས་སོ༔ འོ་ཁྱེད་ཀྱི་ཕྱིའི་ཆོས་ཐམས་ཅད་སེམས་སྣང་རྨི་ཡུལ་ལྟ་བུར་ཐག་ཆོད་ཅིག༔ དེ་ནས་སེམས་ཁོ་རང་གི་ངོ་ལ་ལྟོས་ཤིག༔ བལྟས་པས་མ་མཐོང་བ་ནི་ཆོས་སྐུ་ངོ་བོ་སྟོང་པ་ཉིད་ཡིན་ནོ༔ སྟོང་བཞིན་དུ་མ་འགགས་པ་ནི་ལོངས་སྐུ་རང་བཞིན་གསལ་བ་ཡིན་ནོ༔ སྟོང་གསལ་གཉིས་སུ་མེད་པའི་ཡེ་ཤེས་ཀུན་ཤེས་ཀུན་རིག་གི་བདག་ཉིད་དེ་སྤྲུལ་སྐུ་ཐུགས་རྗེ་ཀུན་ཁྱབ་ཡིན་ནོ༔ རང་ལ་སྐུ་གསུམ་ལྷུན་གྲུབ་ཏུ་དེ་ལྟར་ཡོད་པ་ནི་གཞི་ཡིན་ནོ༔ དེ་ལྟ་བུའི་གཞི་ཡོད་མེད་ཀྱི་མཐའ་བྲལ་ཆེན་པོ་མ་ཤེས་པའི་གཟུང་འཛིན་ཕྱིར་བལྟས་སུ་གཡེངས་བས་ནི་སེམས་ཅན་ཐམས་ཅད་འཁྲུལ་བ་ཡིན་ནོ༔ ཤེས་ནས་ཀུན་ཏུ་བཟང་པོ་གྲོལ་བ་ཡིན་ནོ༔ ད་ལྟ་ལྟ་བས་ཤེས༔ བསྒོམ་པས་ངང་དུ་གནས་ནས་སྣང་བ་ལ་ཞེན་ཆགས་གཟུང་འཛིན་དུ་མ་ཤོར་བ་ནི་ལམ་ཡིན་ནོ༔ དེ་མངོན་དུ་གྱུར་ཏེ་སྐུ་དང་ཡེ་ཤེས་ཕྲིན་ལས་མཐར་ཕྱིན་པ་ཐོབ་པ་ནི་འབྲས་བུ་ཡིན་ནོ༔ འདི་ལས་གཞན་མེད་དོ༔ ཅེས་ཀྱང་དཔལ་བཟང་ངོར་ག་གཱས་སོ། །
༈ ཡུལ་དུ་སྣང་བ་ཕྱི་ཡི་ནམ་མཁའ་ཡིན། །རྩ་སྦུབས་སྟོང་པ་ནང་གི་ནམ་མཁའ་སྟེ། །སེམས་ཉིད་སྟོང་ཆ་གསང་བའི་ནམ་མཁའ་འོ། །ཁྲེགས་ཆོད་ལུགས་ཀྱིས་གཅིག་ལ་གཅིག་འབྲེལ་འཆར། །ཕྱིར་སྣང་སྒྲོན་མ་སྤྲུལ་སྐུའི་ནམ་མཁའ་ལ། །རྩ་བཞིར་ལམ་དབྱིངས་ལོངས་སྤྱོད་རྫོགས་པའི་སྐུ། །ཙིཏྟ་གཞི་དཀྱིལ་ཆོས་སྐུའི་ནམ་མཁའ་སྟེ། །ངོ་བོ་རང་གསལ་བདག་གཅིག་བཞག་པས་འཆར། །དེ་སྐད་ཉི་སར་བློ་གྲོས་གསུང་བསྐུལ་བཞིན། །གསེར་ཤོད་སྨྱོན་པ་ག་གཱ་ཞེས་བྱའི་སྨྲས། །
༈ ཨཻ། སེམས་ཉིད་སྦུབས་གསུམ་རྒྱ་ཡིས་བཅིངས་པ་ལས། །གྲོལ་ནས་ཆོས་ཉིད་དོན་གྱི་ནམ་མཁར་བསྲེ། །ནམ་མཁའི་ངང་ནས་ནམ་མཁའི་ཆོ་འཕྲུལ་དུ། །ནམ་མཁའི་ཕྱག་རྒྱ་ཁྲོས་མ་ནག་མོར་ལྡང༌། །བདག་བཟུང་གཞི་གསུམ་ནམ་མཁའི་ངང་དུ་འདོར། །བརྟུལ་ཞུགས་ནམ་མཁའི་ཆུ་སྲིན་ཕྱག་གིས་གདབས། །སྙིང་རྗེ་ནམ་མཁའ་ནམ་མཁའི་མགྲོན་ལ་འགྱེད། །འདི་ནི་ནམ་མཁའ་སྒོ་འབྱེད་ཡངས་པ་ཧོ། །དེ་ལས་ཅི་ཡང་མེད་དོ་སྐུ་ཚེ་རིང༌། །ག་གཱས་སོ། །
༈ ཉིད་ཀྱིས་རང་གི་སྙིང་ཀར་རྩ་བའི་བླ་མ་རིག་འཛིན་བདུད་འཇོམས་རྡོ་རྗེ་སྐུ་མདོག་སྔོན་པོ་ལོངས་སྐུའི་རྒྱན་ཆས་ཅན་ཕྱག་གཡས་འཁོར་ལོ་དང་གཡོན་རྡོ་རྗེ་རྒྱ་གྲམ་རྣམ་པས་ཁ་ཆོད་ཅན་གྱི་བྷནྡྷ་བདུད་རྩིའི་བཀང་བ་བསྣམས་པ་ཞབས་རྡོ་རྗེའི་སྐྱིལ་ཀྲུང་དུ་བཞུགས་པ་གསལ་བའི་སྐུ་ལས་འོད་ཟེར་འཕྲོས་པས་ཕྱོགས་བཅུ་དུས་བཞིའི་རྒྱལ་བའི་དཀྱིལ་འཁོར་རྟེན་དང་རྟེན་པར་བཅས་པ་འོད་ཟེར་ཁ་དོག་ལྔ་ལྡན་གྱི་རྣམ་པར་བྱོན་ནས་སིབ་སིབ་ཐིམ་པར་མོས་ལ། ཨོཾ་བཛྲ་གུ་རུ་ཧེ་རུ་ཀ་ས་མ་ཡ་ཛ་ཛཿ ཞེས་ཅི་མང་བརྗོད་ལ་དེ་ལས་མ་ཡེངས། སྐབས་སུ་རང་གི་སེམས་ཀྱི་ངོ་བོ་ལ་ཡང་ནས་ཡང་དུ་ལྟོས་ལ་རྩ་གདར་ཆོད་དང༌། ཅི་ཡང་མཐོང་དུ་མེད་པ་ནི་གནས་ལུགས་རང་བབས་ཀྱི་གཤིས་བླ་མའི་ཐུགས་རྣམ་པར་མི་རྟོག་པའི་ཡེ་ཤེས་རང་སེམས་དང་གཉིས་སུ་མེད་པའི་དེ་ཁོ་ན་ཉིད་ཀྱི་དོན་མངོན་སུམ་མཐོང་བ་ཡིན་པས། བཟའ་གཏད་དང་དམིགས་འཛིན་བཅས་བཅོས་དགག་བསྒྲུབ་སྤང་བླང་མེད་པར་དེའི་ངང་ལ་ཞོག་དང༌། བདེ་སྡུག་དང་མཚན་མ་བྲལ་བའི་ཆོས་སྐུ་ལྷུན་གྲུབ་ཆེན་པོའི་ངང་དུ་འཁོར་འདས་རང་གྲོལ་བའི་གདམས་པ་ཟབ་གནད་ཅན་ཡིན་ནོ། ཞེས་ཀྱང་འོད་གསལ་དྲྭ་བ་སྡོམ་པའི་འཁྲིལ་བར་ནས་སྣང་ཆ་ལ་མཁའ་འགྲོ་རིག་བྱེད་མས་གསུངས་བའོ། །འབར་གྲགས་གི་ཉམས་སྣང་རང་གྲོལ་བའི་ཆེད་དུ་སྔགས་མིང་ག་གཱ་བས་སོ། །