རྟོགས་པའི་དོན་གྱི་འདྲ་འབག་རྡོ་རྗེའི་དྭ་ཧའི་རྩེ་མོ།
༈ རྟོགས་པའི་དོན་གྱི་འདྲ་འབག་རྡོ་རྗེའི་དྭ་ཧའི་རྩེ་མོ་ཞེས་བྱ་བ་བཞུགས་སོ། །
ཐོག་མའི་སངས་རྒྱས་ཀུན་ཏུ་བཟང་པོ་ནི། །ངོ་བོ་རང་བཞིན་ཐུགས་རྗེ་མ་བཅོས་པར། །ལྷུན་གྲུབ་སྐུ་གསུམ་རྒྱལ་བའི་ཕྱི་མོ་ལ། །རྣམ་པ་ཀུན་ཏུ་འབྲལ་མེད་རིག་པས་འདུད། ཁྱེད་གསུང་མ་ལྡོག་ཙམ་དུ་ཅུང་ཟད་ཅིག །བྲི་རྒྱུ་མ་རྙེད་དལ་ཞིག་དཀའ་བསམ་ན། །རང་སེམས་ཆོས་ཉིད་དག་པའི་འོད་གསལ་དུ། །བདུད་འཇོམས་དཔའ་བོ་ཆེ་ལ་གསོལ་བཏབ་བྲིས། །ཨེ་མ་ཧོ། །དངོས་ཀྱི་དག་པ་ཆོས་ཉིད་དེ་བཞིན་པ། །སོ་སོ་རང་རིག་ཡེ་ཤེས་སྤྱོད་ཡུལ་ནི། །སེམས་ཅན་རྣམས་ཀྱིས་སྐད་ཅིག་གཞལ་མི་ནུས། །འདུས་མ་བྱས་པ་བློ་ལས་ཟང་ཐལ་ལོ། །ཡང་དག་གཉུག་མ་ཁྱབ་བརྡལ་ཆེན་པོ་ནི། །ཡེ་ནས་སེམས་ཅན་ཀུན་ལ་འབྲལ་འདུ་མེད། །དེ་ཉིད་བྱང་ཆུབ་རིག་སྟོང་སྐུ་ཡིན་ཏེ། །སྐུ་ནི་མི་མངོན་མ་སྐྱེས་སྒྱུ་མའི་གར། །མེད་སྣང་ཉག་གཅིག་བདེ་བ་ཆེན་པོ་སྟེ། །ལྷུན་གྱིས་གྲུབ་པ་རང་བཞིན་མ་འགགས་པས། །རོལ་པའི་རྩལ་དུ་འཁོར་འདས་ཨ་ཕྱིར་བཞེངས། །སྣང་བ་ཐམས་ཅད་བྱང་ཆུབ་སྐུ་ལའོ། །སྐུ་ལས་སྣ་ཚོགས་བཟང་ངན་ལྟར་སྣང་བ། །དག་པའི་ཞལ་དང་ཕྱག་དང་དེ་བཞིན་ཡུལ། །ཡབ་ཡུམ་རྒྱན་སྣང་རྩལ་གྱི་འཁོར་ལོ་ཆེ། །གཞིར་བཞེངས་མཉམ་པ་ཉིད་ལ་བབས་ཀྱིས་གྲུབ། །དེ་ལ་ཕྱོགས་ཆད་མི་དམིགས་སྒྱུ་འཕྲུལ་རྩེན། །དཔག་པའི་གྲངས་མེད་ཐམས་ཅད་སྐུར་ཤར་བ། །བཟོ་དང་སྐྱེ་བ་ལ་སོགས་མཐའ་མི་མངོན། །གང་འདུལ་རྩོལ་བྲལ་འདུས་མ་བྱས་སུ་ཞུགས། །མང་པོར་སྐུར་གསལ་དབུགས་འབྱིན་ཞིང་ལྔ་རུ། །རིགས་བརྒྱ་རིགས་ལྔ་ལ་སོགས་རྩོལ་མེད་ལས། །འཛད་མེད་ཡེ་ཤེས་འཕྲུལ་གྱི་སྒོ་རུའོ། །ངོ་བོ་དབྱིངས་བཞུགས་རིག་པའི་རང་བཞིན་གདངས། །སྐྱེ་འགགས་འགྱུར་མེད་བཅོས་མེད་བབས་ཀྱི་ཀློང་། །ཞལ་ཕྱག་མཚན་བྲལ་ཆོས་ཀྱི་དེ་བཞིན་མཆོག །སྟོང་ལ་སྣང་ལ་ཡོད་མཉམ་མེད་མཉམ་པར། །རང་དག་ཟུང་འཇུག་ལང་ཚོས་མཛེས་འཛུམ་ཟེར། །ཕ་རོལ་མཐར་ཕྱིན་སྲིད་ཞིར་མཁར་སྦྲུམ་ཡུམ། །དེ་ཙམ་ཆར་མིན་གང་གི་གཞིར་བཞུགས་ཡབ། །སྣང་སྟོང་མ་བྲལ་བྱང་ཆུབ་ཆོས་ཀྱི་སྐུ། །ཐམས་ཅད་སྐུ་ལ་འདུ་འབྲལ་མ་མྱོང་བ། །མི་གནས་དག་པ་རྒྱལ་ཀུན་བླ་མར་བཞུགས། །ངོ་བོ་ཉིད་དབྱིངས་རིག་པའི་དོན་གྱི་སྐུ། །ཐམས་ཅད་ཐམས་ཅད་རྡོ་རྗེའི་སྐུ་ལ་རྫོགས། །མི་ཤིགས་ཆོས་ཆེན་བདུན་གྱི་བདག་ཉིད་ནི། །ནམ་མཁའ་ལྟ་བུར་སྤྲོས་པའི་དྲྭ་བ་དབེན། །ཡེ་ནས་རང་ལ་འབྲལ་འདུ་ཡོད་མ་མྱོང་། །མི་འགྱུར་རྡོ་རྗེ་ལྟ་བུ་སྐུ་ཡི་དབྱིངས། །ཨེ་མ་ཧོ། གསུང་མེད་གསུང་ནི་ཆེད་བརྩལ་འཆིང་བ་དག །དབང་པོ་རབ་འབྲིང་ཐ་མའི་སྒོར་ཤར་ཏེ། །གང་ཟག་བདག་མེད་ཙམ་དང་ཆོས་ཕྱེད་རྟོགས། །སོ་སོར་རྟོག་དངོས་ཀུན་འབྱུང་འདྲེན་པ་གསུམ། །ཐམས་ཅད་གསུངས་ལ་བདག་གཉིས་རྟོགས་པར་རྫོགས། །དེ་ཀུན་མ་སྐྱེས་མ་འགགས་མི་གནས་གསུམ། །རྡོ་རྗེ་རྡུལ་བྲལ་དག་པའི་གསུངས་མཆོག་ཏུ། །འཁུ་ཞིང་གཤོང་བ་མ་དམིགས་ཆུ་བོ་ཕྲན། །བདག་ལྟ་ལྟ་སྤྱོད་གོང་འོག་འཛིང་མཉམ་སྤྱོད། །དངོས་གྲུབ་རྗེ་འབངས་གྲོགས་ཀྱི་གཉིས་མེད་ཀྱི། །གང་ལྟར་བསྐལ་བའི་གཉེར་བྱ་རྣམ་པ་གསུམ། །ལྡན་ཆོས་དཀའ་ཐུབ་རིག་བྱེད་ཐེག་བསྟན་པ། །གསུང་གསང་རྡོ་རྗེ་བཀོད་པ་ལྷུན་གྲུབ་ཏུ། །ཐམས་ཅད་ཐམས་ཅད་རྣམ་དག་ལྷ་ཡི་ལྷ། །དངོས་གྲུབ་ཐམས་ཅད་མ་བཙལ་རང་ལ་རྫོགས། །དེ་ཡང་མཆོག་གསང་རབ་འདིའི་ཆུ་བོ་ཕྲན། །སྣང་སྲིད་ལྷར་བཀོད་དབྱིངས་ཡེ་རྒྱུ་འབྲས་སུ། །རློམ་ནས་ཁྱེར་སོ་གསུམ་དང་ཞི་བདེ་ཡི། །དག་སྦྱོངས་རིག་རྟོག་དགའ་བཞིའི་ལྷན་སྐྱེས་ཀྱི། །ཡེ་ཤེས་དངོས་གྲུབ་སྒྲུབ་པར་ངེས་དབང་བསྒྱུར། །སྣོད་བཅུད་སྣང་སྲིད་བྱང་ཆུབ་སྐུ་གསུང་ཐུགས། །རིགས་ལྔ་སྐུ་ལྔ་ཡེ་ཤེས་རིག་པའི་དབྱིངས། །རང་བཞིན་བྱང་ཆུབ་གསུང་ཆེན་ཨ་ཏི་ལ། །ཀུན་རྫོགས་དེ་དག་ཆུ་བོ་ཕྲན་རྣམས་ཀྱང་། །གསུངས་ཆེན་གཅིག་པུར་དྲངས་པའི་ལུང་བསྟན་ཆེ༑ ༑མ་ཟད་དེ་དག་སྒྲིབ་པ་བརྒྱད་དུ་ངེས། །ངང་ལ་གཅིག་རྫོགས་གཉིས་རྫོགས་ཐམས་ཅད་རྫོགས། །རྒྱ་མཚོ་ཆེ་ཀློང་ཐེག་ཕྲན་སྟེགས་ཀུན་འབབས། །གཞན་གང་སྤྲོས་པ་ཚིག་གི་བཟང་ངན་ངག །ཀུན་བཟང་བདེ་གཤེགས་སྙིང་པོའི་གསུང་ཉིད་དེ། །སྒྲ་སྐད་གསུང་ཆེན་མི་ཟད་རྒྱན་དུ་ཤར། །དེ་དག་བསལ་བཞག་མེད་པའི་གསང་སྔགས་མཆོག །ཨེ་མ་ཧོ། རྣམ་པ་ཐམས་ཅད་ཐམས་ཅད་མཆོག་ལྡན་ཐུགས། །དབྱིངས་མེད་དབྱིངས་ཉིད་སྤྲོས་མཚན་ཀུན་དང་བྲལ། །ཟབ་ཞི་གཞོན་ནུ་བུམ་པ་སྐུ་ཡི་གདངས། །བྱང་ཆུབ་རང་བཞིན་འཛིན་མེད་རང་སར་ཞི། །འབྲལ་མེད་སྐྱོངས་མེད་བཙལ་ལས་གྲུབ་པ་མེད། །འབྲེལ་འབྱུང་སྒྱུ་མའི་ཆོས་སུ་ཚར་མ་ཕྱིན། །གཞི་མེད་རྩ་བྲལ་ཁྱབ་བརྡལ་མུ་མཐའ་མེད། །སྣང་མིན་སྟོང་མིན་གཉིས་གཉིས་མཐར་མ་བརྒལ། །བརྒལ་དང་མ་བརྒལ་ཆེད་དུ་འཛིན་པ་ཞིག །གང་ལྟར་བརྟགས་པ་དེ་བཞིན་མ་ཡིན་ལ། །འགལ་མིན་རང་གི་རིག་བྱ་སོ་སོ་བ། །རྟོག་པ་ཟད་པ་གཏད་མེད་རྒྱ་ཡན་ནི། །མ་བཅོས་ལྷུག་པ་ཕྱལ་བ་ཟང་ཀ་མ། །ཁྲལ་ཁྲོལ་འདིར་དམིགས་དག་པའི་དགོངས་ཤར་བ། །རེ་དོགས་གཉིས་མེད་མཉམ་གྲོལ་ཡེ་ཤེས་སུ། །མ་སྤངས་རང་གྲོལ་ཉོན་མོངས་རྒྱན་དུ་ཤར། །མེ་ལོང་ཆོས་དབྱིངས་མཉམ་ཉིད་སོར་རྟོགས་དང་། །བྱ་གྲོལ་ཆེན་པོའི་ལས་བཞི་ལྷུན་གྲུབ་པོ། །ཤིན་ཏུ་རྣལ་འབྱོར་ལྟ་བསྒོམ་སྤྱོད་པ་ཡི། །ཐ་སྙད་བཏགས་པ་ནམ་མཁའི་གོ་རིམ་བཞིན། །བྱར་མེད་གཤིས་ལ་འཚལ་བ་མ་ཡིན་ཏེ། །བཅིང་བ་མེད་པ་གྲོལ་བར་ག་ལ་སྲིད། །བསྡམ་པ་མེད་པར་གློད་པ་ཡོད་དམ་ཅི། །གོས་པ་མེད་པ་དག་པར་གནམ་པོའི་ཡུལ། །དམིགས་སུ་མེད་པ་དམིགས་པའི་དུག་གིས་བསླད། །འཁྲུལ་བ་མེད་ལ་གྲོལ་བ་ལྟོས་གཞི་ཟད། །དཔེ་ཡིས་མཚོན་པར་མི་ནུས་རང་བཞིན་བབས། །ཚིག་གིས་བརྗོད་བྱར་མི་འོས་གདོད་མ་ཉིད། །དོན་གྱི་སྟོན་བྱའི་དངོས་མེད་རྩ་བྲལ་དོན། །ཡིད་དཔྱོད་སྒྲོགས་སུ་མ་ཚུད་རིག་པའི་གདངས། །ཡུལ་འཛིན་རེ་དོགས་བྲལ་བ་རང་གི་ཞལ། །མི་རྟོག་མི་གཉིས་གཟུང་འཛིན་འཇུག་པ་གྲོལ། །སེམས་སུ་མ་འཁྲུལ་ངོ་བོ་ཉིད་ཀྱི་ངང་། །བག་ཆགས་མངལ་རྒྱར་མ་ཚུད་རྗེན་པའི་ཞལ། །ཐུགས་ཕྲད་ཡུལ་ལ་མི་འཕྲོ་ཡུལ་མ་འགགས། །ཆེད་འཛིན་ཞིག་པས་མངོན་པའི་ང་རྒྱལ་མེད། །གཉེན་པོ་བཟང་ངན་གང་གིས་བསྒྱུར་དུ་མེད། །གཞི་རྫོགས་ལམ་རྫོགས་འབྲས་བུ་ལྷུན་གྲུབ་རྫོགས། །ཡེ་རྫོགས་ཕྱལ་བ་སྐྱོན་ཡོན་སླད་མ་ཞུགས། །མ་ཉམས་མ་སྨད་རྒྱ་ཆེ་དཔང་ཀྱང་མཐོ། །མ་ཆགས་དག་པ་འཁོར་འདས་གཉིས་ཆར་ཡང་། །དག་དང་མ་དག་རིག་དང་མ་རིག་ལས། །ཐམས་ཅད་ཀུན་བཟང་མི་བཟང་མེད་པར་ནི། །ཕྱམ་གཅིག་མ་སྐྱེས་དང་པོའི་གཞི་ལ་ཕྱལ། །སངས་རྒྱས་ཀུན་ལས་སྔར་རྒྱས་ཡེ་ཕྲལ་མིན། །སེམས་ཅན་ཀུན་ལ་བསྐལ་བ་དོར་མེད་བ། །སྟོང་ཉིད་མཚན་མ་སྨོན་པ་མེད་པས་བསྡུས། །དེ་ཡང་གཏིང་གསལ་ཆེན་པོར་རང་བཞིན་ལྷག །གློ་བུར་བྱིས་པའི་མ་རིག་ཁམས་ཆེན་པོའི། །ཀུན་གཞིར་མ་བསྒྱུར་ངང་ལ་སྐྱོན་མ་ཞུགས། །རྨི་ལམ་བཞིན་དུ་འཁྲུལ་པའི་ལྷན་སྐྱེས་ཀྱི། །ཀུན་ཏུ་བཏགས་གང་རླུང་ལྔའི་དེ་མ་ཐག །ཡེ་ནས་གཞི་ལ་མ་ནོངས་ཨ་ལ་ལ། །རྩལ་གྱིས་ངོ་བོ་སྒྲིབ་པ་ཡུལ་མེད་དུ། །རྟོགས་པ་ཙམ་ཞིག་ལམ་གྱི་མདོ་རུ་བཤད། །སངས་རྒྱས་རྣམས་ཀྱི་ཐུགས་ལ་གཤིས་གཞིག་ཀྱང་། །ཡེ་ཤེས་རྒྱ་མཚོ་ཆེ་འདིར་ཆུ་བོ་གཅིག །དུ་བྲལ་རང་བཞིན་བྱས་བའི་ཆོས་མ་ཡིན། །དབང་གིས་བརྡ་ཤོག་དགོད་དུ་མ་དགོས་ལ། །དགོངས་བརྒྱུད་བྱིན་རླབས་སྟོབས་ཀྱིས་སྤྱི་བླུགས་རྫོགས། །གང་མ་ལྡན་ཀྱང་དེས་ནི་བཤོལ་དུ་མེད། །རྣམ་རྟོག་འཕྲོ་འདུས་བསྐྱེད་པའི་ཡུལ་ལས་འདས། །བཟླས་བརྗོད་རྫོགས་རིམ་ཟད་པའི་སྤྲོས་མེད་ནི། །དམ་ཚིག་བསྲུང་མེ༵ད་ཕྱ༵ལ་ཡས་གཅི༵ག་ཏུ་གྲུབ༵། །རང་བཞིན་བཅུ་ཡིས་དེ་ལ་ཅི་ཞིག་བྱས། །སྒྲིབ་པའི་སྤྲིན་ལ་དཀར་ནག་ཡོད་དམ་ཅི། །མཚོན་དུ་མེད་ལ་དཔེ་ཡི་གཞོལ་འགྱུར་རམ། །གནས་ལུགས་ཅི་བཞིན་རྒྱུ་འབྲས་གཉིས་ལས་མིན། །ལྟོས་ནས་བརྟགས་པའི་ཡུལ་ཀུན་མེད་པ་ན། །ལྟོས་གཞི་ཡོད་སྙམ་ལོག་པའི་བློ་བྲེལ་ལོ། །འདུས་བྱས་བསྒྲུབ་པས་འདུས་མ་བྱས་མི་འགྲུབ། །མཁའ་ལ་ཐེམ་སྐས་བཙུག་འདོད་མི་བླུན་ནམ། །ཐོས་བསམ་གཉིས་ཀྱི་དེ་ལ་དབང་མ་བསྐལ། །མཉམ་པར་བཞག་པའི་བདེན་དོན་ཇི་བཞིན་པ། །རང་བཞིན་བབས་ཀྱིས་ཉམས་མྱོང་ཁུང་ནས་རྡོལ། །ཆོས་ཉིད་མཁའ་ལ་མཁྱེན་གཉིས་ཉི་མ་འཆར། །མ་བཞག་གཉེར་བའི་རྙོགས་མ་དཀྲུག་པ་ལས། །ཆུ་བོའི་དྭངས་གསལ་གསལ་བར་ག་ལ་མངོན། །ཐོག་མཐའ་མེད་པ་ཤེས་རབ་ཡེ་ཤེས་ཆེ། །གཞལ་བྱ་བློ་ཡིས་འཇལ་བར་ཅི་སྟེ་ནུས། །རིག་པ་ཡེ་ནས་གཞན་དུ་མ་སོང་བས། །ནམ་ཡང་འདུ་འབྲལ་ཡོད་པ་མ་ཡིན་ནོ། །ང་དང་ང་ཡིར་འཛིན་པ་གཉིས་མེད་ཀྱང་། །མོས་པ་ཚིག་གི་མཚོན་ཆར་དེ་སྐད་དུ། །སེམས་དང་སེམས་བྱུང་ཉོན་མོངས་ཉེ་བར་བཅས། །ཐམས་ཅད་མ་ལུས་བྱང་ཆུབ་རོལ་བར་ཤར། །ངོ་བོ་མི་གཡོས་མི་འགྱུར་རྡོ་རྗེར་ཆེ། །རྒྱ་མཚོ་ཆེ་ལས་རླངས་པ་ཅི་བཞིན་ནོ། །ཡེ་ནས་གཡོ་མེད་རི་བོ་ལྟར་བརྟན་ཡང་། །ཕྱོགས་མེད་ཐུགས་རྗེ་དག་པའི་རྟོགས་མེད་པ། །ཡིད་བཞིན་ལྗོན་པ་འདོད་འཇོའི་བུམ་བཟང་བཞིན། །བཅུ་གཉིས་མཛད་པ་གཞན་ངོར་རྒྱུན་མི་ཆད། །ངང་ཉིད་སྤྲོས་མེད་མཁའ་བཞིན་དག་པ་ལ། །གློ་བུར་སྤྲིན་བཞིན་མ་དག་འཁྲུལ་པའི་སྒོར། །སེམས་ཅན་རྣམས་ཀྱི་རྣམ་པར་རྟོག་པའི་གདུང་། །འོན་ཀྱང་རྣམ་དག་དབྱིངས་ཀྱི་བཏང་བའང་མེད། །ངང་མདངས་ངེས་པ་དོན་གྱི་དབྱིངས་འཁྱིལ་བར། །གདུལ་བྱའི་དབང་གི་གང་འདུལ་སྣ་ཚོགས་གསུངས། །ངེས་དོན་མཐར་ཐུག་འདི་ཡི་ཉག་ཕྲན་རེ། །ཁམས་དབང་བསམ་པར་མཐུན་ཏེ་མི་གསུང་གསུངས། །བསྟན་མེད་གཟུགས་མེད་དམིགས་མེད་མཚོན་མེད་ལ༑ ༑རྟོག་མེད་བརྗོད་མེད་སྐྱེ་མེད་འགགས་པ་མེད། །གནས་མེད་འགྲོ་འོང་མེད་པ་དོར་ལེན་མེད། །ཐ་དད་གཅིག་ཏུ་མ་ངེས་གྲུབ་མཐའ་ནི། །ལྟར་མེད་བསྒོམ་མེད་རང་བཞིན་དག་པ་དེ༑ ༑སྤྱོད་མེད་སྒྲུབ་མེད་སྤྲོས་མེད་ཕྱལ་བ་ཆེ། །མེད་པ་ཕྱང་ཆད་བེམ་སྟོང་ཕྱོགས་གཅིག་མིན། །ལུང་མ་བསྟན་མིན་ལུང་དུ་སྟོན་པའང་མེད། །འདི་ཡིན་འདི་མིན་མིང་དངོས་མཐར་ཞེན་ཞིག །རྟག་མིན་ཆད་མིན་བདག་མིན་སྲོག་སོགས་མིན། །གང་ལྟར་བརྗོད་ཀྱང་ཐམས་ཅད་བྱང་ཆུབ་མིང་། །གང་ཡང་འགལ་མེད་ཡིན་མིན་སྤྲོས་པ་ཞི། །སྔར་དང་མུ་དང་གྲུབ་པ་གཞན་ཀུན་མཉམ། །ཕྱི་ནང་བར་མེད་ཡངས་པ་གོ་སྐབས་འབྱེད། །སྟེང་འོག་ཕྱོགས་མེད་སངས་རྒྱས་སེམས་ཅན་མཉམ། །ལྷ་མེད་འདྲེ་མེད་ཕན་གནོད་གཞི་རྩ་མེད། །སྣང་ངོ་སྟོང་ངོ་ཡིན་ནོ་མིན་པ་མེད། །ཐམས་ཅད་ཀུན་གྱི་སྤྱི་ཆིངས་ཡིན་པས་ན། །དངོས་རྣམས་སྟོང་ཉིད་ངང་དུ་ལ་བཟློས་ཤིག །སྟོང་རྣམས་རང་གསལ་ངང་དུ་ལ་བཟློས་ཤིག །སྐྱེ་རྣམས་སྐྱེ་མེད་ངང་དུ་ལ་བཟློས་ཤིག །སྐྱེ་མེད་ཉག་གཅིག་ངང་དུ་ལ་བཟློས་ཤིག །ཉག་གཅིག་སྤྲོས་མེད་ངང་དུ་ལ་བཟློས་ཤིག །སྤྲོས་མེད་ཡེ་གྲོལ་ངང་དུ་ལ་བཟློས་ཤིག །ཡོངས་གྲོལ་ཕྱོགས་མེད་ངང་དུ་ལ་བཟློས་ཤིག །ཕྱོགས་མེད་ཁྱབ་བརྡལ་ངང་དུ་ལ་བཟློས་ཤིག ཁྱབ་བརྡལ་བུམ་པའི་སྐུ་རུ་ལ་བཟློས་ཤིག །ཐམས་ཅད་ཕྱམ་གཅིག་ཡེ་སངས་ལ་བཟློས་ཤིག །ཆོས་ཅན་ཆོས་ཉིད་ཆེན་པོར་འགགས་སུ་བསྡོམ། །ཆོས་ཉིད་རིག་པ་ཆེན་པོར་འགགས་སུ་བསྡོམ། །རིག་པ་ཡེ་གྲོལ་ཆེན་པོའི་འགགས་སུ་བསྡོམ། །ཡེ་གྲོལ་གཉིས་སུ་མེད་པར་འགགས་སུ་བསྡོམ། །མིང་ལ་ངལ་བ་ཐེག་པ་རིམ་པ་བརྒྱད། །ཤིན་ཏུ་རྣལ་འབྱོར་སེམས་ཀློང་མན་ངག་གནད། །འབུམ་ཕྲག་དགོངས་པ་འདུས་ལ་སུ་ཞིག་སྨྱོན། །དེ་ཕྱིར་རང་རིག་སྟོང་གསལ་གང་གི་ཀློང་། །འཁོར་འདས་དབང་ཐོབ་རྣལ་མའི་ངང་ཉིད་ལས། །གར་ཡང་མ་ཕྱིན་གདོད་མའི་རྒྱལ་ས་ན། །མི་གཡོ་བྱང་ཆུབ་སྙིང་པོ་རང་ལ་འབྱོར། །རྩལ་དང་རོལ་པའི་ཡུལ་ལ་རང་ཆེར་དབང་། །ངང་ལས་ཀུན་འབྱུང་སྣང་བ་མཐའ་ཡས་པས། །ཡོན་ཏན་ལྷུན་སྡུག་བཀོད་པའི་མཁྱེན་གཉིས་ཆར། །དག་གྲོལ་གཉིས་ལྡན་ཐིག་ལེ་བདེ་ཀློང་ཆེ། །མེད་གཅིག་ལྷུན་གྲུབ་ཕྱལ་བའི་གནས་ཀུན་འདུས། ༈ ཨེ་མ་ཧོ། ངང་ལ་བལྟ་བར་བྱ་བ་མེད་པ་ལ། །ལྟ་བ་ཞེས་སུ་སྒྲོ་བཏགས་མིང་ལ་ངལ། །བལྟར་མེད་ངང་ལ་མཐོང་བ་ཆེན་པོ་ནི། །ཀུན་ཁྱབ་སྟོང་བ་བྱང་ཆུབ་ལྟ་བའོ། །བལྟས་ཤིང་ཡང་དག་དོན་ལ་མཐོང་བ་མེད། །མ་བལྟས་ཅི་ཡང་མ་མཐོང་ངང་མཐོང་ལ། །ངང་མཐོང་སངས་རྒྱས་ཀུན་གྱི་དེ་ཉིད་མཐོང་། །དེ་ཉིད་མཉམ་ཉིད་བྱང་ཆུབ་ཁྱོད་ལ་བརྡོག །རབ་ཏུ་མི་གནས་བྱང་ཆུབ་ཆེན་པོའི་དོན། །བརྡལ་ཁྱབ་རྡོ་རྗེ་ཡེ་ཡོད་རིག་པའི་སྐུ། །མཐོང་བར་འདོད་པས་རྩོལ་སྒྲུབ་ལོག་ལྟ་བའི། །རང་ལ་བཞག་ནས་གཞན་དུ་བཙལ་བས་ཅི། །མཁན་པོ་རང་སྟོང་བལྟ་བྱའི་ཡུལ་བཅས་པ། །མཉམ་གྲོལ་དབྱེར་མེད་བཞག་པས་རབ་མཐོང་བ། །མིག་དང་དབང་པོའི་ཡུལ་ལས་བསྐལ་ནའང་། །དེ་ནི་མི་ལྟ་ལྟ་བ་ལྟ་བའི་ཟབ། ཨེ་མ་ཧོ། བསྒོམ་མེད་བྱང་ཆུབ་སྙིང་པོ་བླ་ན་མེད། །ངང་བཞག་རྒྱ་ཡན་ལྷུན་འབྱམས་ལྷུག་པའི་ངང་། །སྙེམ་མེད་ཕྱམ་གཅིག་ཀློང་རྫོགས་བསལ་བཞག་མེད། །མ་བཟུང་མ་བཏང་འཇུར་བུའི་སྒྲོགས་ལས་གྲོལ། །མ་བཅོས་འོད་གསལ་གཉུག་མ་རང་གི་རིག །སྟོང་པའི་བདེ་ཀློང་ཡངས་བ་ཕྱམ་བྲལ་བ། །བཞི་ཆ་གསུམ་མིན་དུ་མ་གཅིག་འདས་པས། །དེ་ལ་སྐྱོངས་བསྡུད་མེད་དོ་ཨེ་མ་ཧོ༑ ༑བསྒོམ་གྱིན་རྣལ་མ་བྱང་ཆུབ་ཞལ་ལ་སྒྲིབ། །ཡིད་དཔྱོད་ལམ་ན་བློ་ལས་འདས་པ་མེད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དེ་ལ་བློས་བཅོས་བསྒོམ་པས་ཅི་ཞིག་བྱས། །རང་བཞིན་ཐ་མལ་འཁྲུལ་བའང་མ་ཡིན་ཏེ། །མ་འཁྲུལ་རྩེ་གཅིག་སྐུ་བཞི་ལྷུན་གྲུབ་པ། །ལམ་གྱི་རིག་པར་ཧར་སངས་ཡན་པ་ནི། །གུ་ཡང་བློ་བདེ་བྱར་མེད་ཆེན་པོ་སྟེ། །རྟོག་ཚོགས་ཕྲ་རགས་གང་ཅི་ཕྱམ་གཅིག་པར། །རང་གྲོལ་གཉེན་པོ་མེད་པས་རང་རྒྱས་ཆོད། །ཅེར་གྲོལ་ལྟོས་པ་མེད་པའི་དམ་རྒྱས་ཟིན། །ཡེ་གྲོལ་བསྐྱར་གཞི་མེད་པའི་ཡོངས་ཡེ་ཐེབ། །དེ་ཕྱིར་ངང་ལ་བསྒོམ་དང་མི་བསྒོམ་མེད། །ཡེངས་དང་མ་ཡེངས་དྲན་པས་ཟིན་མ་ཟིན། །གང་ཡང་ཐུག་ཕྲད་གཟུང་འཛིན་དག་པའི་ངོར། །ཡོངས་གྲོལ་ཀ་དག་ཆེན་པོའི་སྤྱི་རྒྱས་ཆོད། ཨེ་མ་ཧོ། ངང་ལ་སྤྱོད་དང་སྤྱད་བྱ་གཉིས་མེད་དེ། །སྤྱད་པའི་བྱ་བྲལ་དོན་ལ་ཕྱིར་ཞིང་ནོངས། །དགེ་སྡིག་རྒྱུ་འབྲས་འདས་པའི་བྱང་ཆུབ་ལ། །ཅོག་བཞག་རང་གི་གནས་ན་གནད་དུ་ཕེབས། །དགེ་བ་སྒྲུབ་པས་སྲིད་ན་མངོན་མཐོ་ལ། །སྡིག་པ་སྤྱད་པས་སྲིད་པའི་དམན་ཙམ་དུ། །གཉིས་ཀྱང་སྡུག་བསྔལ་གསུམ་གྱི་དམ་རྒྱས་ཟིན། །དོན་ལ་མེད་མཉམ་དག་མཉམ་གཞི་ལ་མཉམ། །ཚེ་གང་སྡིག་ལ་སྤྱོད་པའི་གང་ཟག་གིས། །ཐ་ཆད་ལས་ལ་དུས་གང་འདའ་བ་དང་། །ཚེ་གཅིག་དགེ་ལ་སྤྱོད་པའི་གང་ཟག་གཉིས། །མཉམ་ཉིད་རྟོགས་ལ་གྲོལ་དང་མི་གྲོལ་མེད། །སྐད་ཅིག་དུས་ལ་ནོངས་བ་མེད་པར་ནི། །ལྷན་ཅིག་རྟོགས་པས་ལས་ལ་མ་རེག་པར་། །གྲོལ་ལ་སྔ་ཕྱི་མེད་པའི་གཏན་ཚིག་གི །རྒྱུ་འབྲས་ཅན་ལ་ལོག་པར་ཞུགས་པ་འདྲ། །དགེ་སྡིག་སྤངས་ལེན་འཛོལ་བའི་གང་ཟག་གི །ལོག་རྟོག་ནོར་བ་ཆེན་པོའི་འཕྲང་ལ་ཐོགས། །དེ་ཕྱིར་བཟང་ངན་བར་གསུམ་ཆམ་བཞག་སྟེ། །དགུ་སྤྲུགས་བྱ་བ་བཏང་བ་སྤྱོད་མེད་གནད། ཨེ་མ་ཧོ། ངང་ལ་ཐོབ་དང་མ་ཐོབ་གཉིས་མེད་པས། །ལེན་པར་བྱ་བའི་འབྲས་བུ་རྡུལ་ཙམ་མེད། །རང་གི་ངང་ལས་གཞན་ལ་བགྲོད་དུ་མེད། །ཕྱིན་པར་བྱ་བའི་ལམ་གྱིས་ཅི་ཞིག་བྱ། །ཐམས་ཅད་མ་ལུས་འབྲས་ལས་དབྱིངས་མ་གཡོས། །གཉེར་བྱ་སངས་རྒྱས་ཡོན་ཏན་ཡིད་སྨོན་མེད། །འཁོར་བ་འཁྲུལ་བའི་ཡུལ་ལ་དོག་པ་མེད། །ཡུལ་མེད་དག་མཉམ་རང་གི་གཞི་ལ་སངས། །གར་ཡང་མ་འཁྲུལ་གང་དུ་གྲོལ་བ་མེད། །གྲོལ་བ་མེད་པས་འཁྲུལ་བ་ག་ལ་སྲིད། །ཡེ་ནས་གྲོལ་ལ་ཡང་གྲོལ་འཐད་མ་ཡིན། །སངས་རྒྱས་ཉིད་ཀྱི་རང་སྣང་དག་པ་ཙམ། །རང་ཞལ་རིག་དང་མ་རིག་ཁྱད་པར་ལས། །གཞན་དུ་བཅིང་བ་མེད་ཅིང་བགྲོལ་བ་མེད། །རྒྱུ་དང་རྐྱེན་གྱི་སྒྲུབ་བྱ་མེད་པས་ཕྱིར། །མཐར་ཐུག་དོན་གྱི་ངེས་པའི་སྙིང་པོ་ཆེ། །རང་བྱུང་ཡེ་ཤེས་ཉི་མ་ཁུང་ནས་ཤར། །མ་རིག་མུན་པ་གདོད་མའི་གཞི་ལ་སང༵ས། །སྐུ་དང་ཡོན་ཏན་རང་གི་ངང་ལ་རྒྱ༵ས། །གྲོལ་བ་མང་ཙམ་བཏགས་པ་དེ་ཙམ་མོ། །རྒྱུ་ལས་མ་བྱུང་རང་བྱུང་ཆེན་པོ་ནི། །སྣང་བཞི་ཚད་ཕྱིན་བློ་ཟད་ཆོས་ཟད་དུ། །གཟུང་འཛིན་ཡུལ་མེད་དག་པ་ཆོས་སྐུའི་ཀློང་། །ཕྲ་བ་སྣང་ཤེས་ཟད་པའི་གཉེན་པོ་ནི། །རྡོ་རྗེ་ལྟ་བུའི་ཏིང་འཛིན་དེར་ལྷག་ནས། །སྤྲོས་མཚན་ཉེར་ཞི་གཞི་ལས་རབ་འཕགས་པའི། །ཁྱད་པར་དྲུག་ལྡན་བདེ་བ་ཆེན་པོ་རུ༑ ༑ལྷུན་གྲུབ་རང་བཞེངས་ཆོས་ཉིད་གཏན་སྲིད་ཟིན། །ཐི་བྱ་ཚང་འཇུག་ལྟ་བུར་གྲོལ་བ་དང་། །མ་པང་བུ་འཇུག་ལྟ་བུར་གྲོལ་བ་དང་། །དེ་ལས་དབང་པོ་ས་བླར་མ་ཕྱིན་ཀྱང་། །སྔར་འདྲེས་མིར་འཕྲད་ལྟ་བུར་ཡང་དག་ཐོབ། །མངལ་གྱི་སྒོ་བཀག་གདམས་པའི་འཕྲོ་མཐུད་ཀྱི༑ ༑ཉེས་ཅན་བཙོན་ཐར་འདྲེན་ཆུར་ཝ་འཇུག་གིས། །འཁོར་བའི་རྒྱ་མཚོ་ཕ་རོལ་ཕྱིན་པར་བྱེད། །དེ་དག་རབ་འབྲིང་ཐ་མའི་གདེངས་ཐོབ་མཐུ། །སྐད་ཅིག་གསུམ་ལྔ་བདུན་ནམ་ཉེར་གཅིག་གི །སྤྲུལ་པའི་རང་བཞིན་འབྱིན་ནམ་མི་འབྱིན་པར། །ཉོན་མོངས་མ་སྤངས་རང་བྱུང་ཡེ་ཤེས་གྲོལ། །ཆོས་ཅན་མ་སྤངས་ཆོས་ཉིད་རོལ་བར་འཕོས། །བདག་ལྟ་མ་སྤངས་ལྷུན་གྲུབ་ཆེན་པོར་ཞི། །འཁོར་བ་མ་སྤངས་གདོད་མའི་གཞི་ལ་སངས། །འདས་པ་མི་ལེན་རང་གི་རང་བཞིན་གསལ། །སྤྲོས་པ་མ་སྤངས་ཀ་ནས་དག་པར་རོལ། །སྤྲོས་མེད་མ་གྲུབ་ལྟོས་གཞི་མེད་པར་ལྷུག །མི་འཇིགས་གདེངས་ཐོབ་རེ་དོགས་མེད་པར་འཕྱོ། །རྩོལ་མེད་གཏིང་གསལ་ཡེ་ནས་འཕོས་འཕགས་བྲལ། །དབྱིངས་ལ་དབྱིངས་ཞུགས་གདངས་ལ་གདངས་སུ་འཕོས། །མཁའ་ལ་མཁའ་ཐིམ་ལྟ་བུར་དག་མཉམ་བརྡལ། །ཕྱི་རྟགས་སྣ་ཚོགས་མི་འཇིགས་རྟེན་གྱི་རིགས། །འབྱུང་བ་འཇའ་ལུས་ཆེན་པོ་འོད་དུ་དག །ཆུང་ངུ་རྡུལ་ཕྲན་ཉིད་དུ་དེངས་པ་ཡི། །ནང་གི་རིག་པ་རང་གྲོལ་ཡེ་ཤེས་སུ། །གཟུང་འཛིན་འཇུག་ཞི་གནམ་སྟོང་ཟླ་བ་ལྟར། །སྐད་ཅིག་བག་ཆགས་སྣང་བར་བཅས་པ་དང་། །འོད་གསལ་དབྱིངས་སྣང་རང་བྱུང་རང་དག་ནས། །ཐིམ་ལ་མ་རྨུགས་ཡེ་ཤེས་ཆེན་པོ་ནི། །ལྷུན་གྲུབ་ཡོན་ཏན་འགགས་མེད་ཁ་སྦྱོར་གྱི། །བདེ་བ་ཆེ་ལ་དམིགས་མེད་ལྷུན་གྱིས་འབྱམས། །སྐུ་ལྔ་ཞིང་ལྔ་རིགས་ལྔའི་བཀོད་པ་ཡི། །སྒྱུ་འཕྲུལ་དྲྭ་བའི་རོལ་མོ་ཅིར་ཡང་རྩེན། །རྣམ་དག་དབུགས་འབྱིན་ཞིང་ལྔར་སྟོན་པ་ཡི། །ཅི་བཞིན་ཤུགས་ཀྱི་ཡེ་ཤེས་ལས་འཁྲུངས་པས། །རིགས་ལྔའི་མཁའ་འགྲོ་ས་བཅུའི་བརྟན་པ་ལ༑ ༑གང་འདུལ་རྟག་ཁྱབ་ངེས་པར་བསམ་མི་ཁྱབ། །མཆོག་གི་མཛད་པ་ཉེ་བར་སྟོན་པ་ཡི༑ ༑ཐུབ་པ་མཚན་དཔེའི་རང་བཞིན་སྤྲུལ་བའང་། །རྒྱ་ཆད་མེད་ཅིང་ཕྱོགས་ལྷུང་བྲལ་བར་གྱུར། །དེ་ཕྱིར་བྱང་ཆུབ་དགོས་འདོད་བུམ་པ་བཟང་། །ལས་སྨོན་དག་པའི་རྩོལ་དང་རྟོགས་བྲལ་བར། །སྐུ་གསུང་ཐུགས་ཀྱི་ཕུན་ཚོགས་བསམ་བྱར་མིན། །མཐའ་ཡས་རབ་འབྱམས་ཞིང་ལ་ལྷུན་གྱིས་གྲུབ། །གཉིས་འཛིན་མེད་པའི་ངང་ལ་འུབ་ཆུབ་པོ། །ཨེ་མ་ཧོ། ཆོས་ཉིད་བྱང་ཆུབ་རང་བྱུང་རིག་པ་ལ། །བསྒོམ་དང་ལྟ་དང་འབྲས་བུའི་ཐ་སྙད་གྲོལ། །འོན་ཏེ་རིམ་གྱི་དང་པོའི་ལས་ཅན་ལ། །རང་སྣང་སྟོན་པས་རང་ལ་ཤར་ནས་སྣང་། །རྡོ་རྗེའི་གནས་སུ་རྣམ་པར་བཀོད་པ་གང་། །ཡིད་དཔྱོད་ཚིག་གི་ལམ་དུ་མཚོན་ཚུལ་ཙམ། །དེར་ནི་གོལ་ཤོར་ནོར་བའི་འཕྲང་བསྟན་པའི། །ཤན་འབྱེད་འཕྱོང་ལ་རྣམ་མང་བཀྲོལ་བའང་། །འདིར་ནི་ཐམས་ཅད་གཞི་རུ་གཞི་སྣང་རྩལ། །གང་ཡང་ཡིན་ཏེ་མིན་པའི་མཐའ་ལས་འདས། །གང་ཡང་མིན་དེ་ཡིན་པའི་མཐའ་ཡས་པའི། །རྟག་མིན་ཆད་མིན་དངོས་མཚན་ཐེར་ཟུག་མིན། །བདེན་མིན་རྫུན་མིན་བག་ཆགས་རྟེན་གཞི་མེད། །མི་མངོན་མི་འགྱུར་ཟག་མེད་འདུས་མ་བྱས། །ལྷུན་གྱིས་གྲུབ་པ་རྒྱ་ཆད་ཕྱོགས་ལྷུང་གི །དམིགས་མེད་རང་བྱུང་རིག་པར་འབྱམས་སུ་ཀླས། །འཁོར་འདས་ཐམས་ཅད་རིག་པའི་ཀློང་མ་གཡོས། །སེམས་དང་སེམས་བྱུང་རོལ་བ་རང་གི་འཕྲུལ། །རང་སར་དག་མཉམ་རིག་པ་དེར་མི་གཅིག །གཞན་མིན་ནམ་མཁར་སྤྲིན་གྱི་རྒྱུ་རྩལ་བཞིན། །ཕན་མེད་གནོད་མེད་བཟང་དང་ངན་པར་མཉམ། །བདེ་གསལ་མི་རྟོག་ཉམས་ཀྱི་སྣང་བའང་། །གང་ལྟར་ཤར་ཀྱང་རྟོག་པ་ཙམ་ཞིག་གི །འཕོང་རྐྱེན་ཐར་བར་ཉེ་བ་ཁྱད་ཆོས་སོ། །ཅི་ཕྱིར་ཞེ་ན་དེ་དག་རིམ་པ་ནི། །མ་ཞེན་མི་ངལ་ལམ་གྱི་མ་རྨུགས་སུ༑ ༑བྱིང་རྒོད་ཁ་ཡན་ཆོས་ཉིད་ཆུ་བོའི་རྒྱུན། །མི་གོལ་བྱང་ཆུབ་མི་སྣང་རང་རྒྱས་ཆོད།
༈ བྱང་ཆུབ་རྒྱན་སྣང་ཀུན་གྱི་གཞི་ལ་དེངས། །ཤེས་རབ་རང་བྱན་རྣམ་པར་ཤེས་ལ་མེད། །ཡེ་ཤེས་མཁྱེན་ཆ་ཡིད་ལ་དངས་གསལ་མེད། །ཆོས་ཉིད་བདེ་ཀློང་ཞེན་པའི་རེ་བ་མེད། །སྤྱན་དང་མངོན་ཤེས་ཟག་པ་དོན་ལ་མེད། །བྱང་ཆུབ་ངང་འཁྱིལ་སེམས་མེད་གནས་ལྔ་ལྟར། །མི་རྟོག་ཙམ་མིན་རིག་པར་གཟུང་འཛིན་མེད། །དམ་པའི་དོན་ལ་དམིགས་མེད་ཤེས་རབ་འབར། །ཡེ་ཤེས་ཉག་གཅིག་མངོན་པའི་ང་རྒྱལ་མེད། །ཀློང་གསལ་ལྷུན་འབྱམས་མཐར་ཞེན་སྤྲོས་མེད་པ། །གཟུང་འཛིན་ཡུལ་མེད་ཟང་ཐལ་ཡོངས་གྲོལ་དུ། །རྟོགས་ནས་གོལ་ཤོར་ནོར་བའི་འཕྲང་ལས་གྲོལ། ཨེ་མ་ཧོ། དེ་ལྟར་ལྟ་བསྒོམ་སྤྱོད་འབྲས་ཤན་འབྱེད་འཕྱོངས། །གནད་རྣམས་ཐམས་ཅད་གང་ཤར་རྐང་བཅད་དུ། །དུམ་ཆོད་དུམ་ཆོད་བྱས་ནས་སྨྲས་པ་ནི། །ཐོས་པ་ཆུང་བས་འགལ་འདུ་ཡོད་ན་བཤགས། །ཚིག་དོན་གོང་འོག་འཛིང་འཁྲུགས་ཟློས་པའི་སྐྱོན། །མཐའ་དག་རང་སྐྱོན་བརྡོལ་བའི་སྤྱི་མཚན་པ། །ཡང་དག་ངེས་པ་ནང་ནས་མ་རྙེད་རིག །དེ་ལ་ཐུགས་རྗེའི་གཟིགས་ནས་བདག་ལ་ཞུ། འོན་ཀྱང་བླ་མ་མཆོག་གི་ཐུགས་རྗེ་དང་། །སྔོན་སྨོན་བཟང་པོའི་ཀུན་བཟང་བསྟན་པར་འཕྲད། །བག་ཆགས་དཀར་པོའི་གསོས་སུ་འགྱུར་སྙམ་སྟེ། །གླུ་འདི་ཡིད་ལ་གང་བབས་སྨྲས་པའོ། །འགལ་དང་མི་འགལ་ཆོས་ཉིད་གཤིས་ལ་མེད། །ནང་དོན་རྟོགས་པ་སངས་རྒྱས་ཐམས་ཅད་ཀྱི། །ཡེ་ཤེས་སེམས་ཅན་རྣམས་ལ་གཞིར་བཞུགས་པས། །སྙིང་པོ་བྱང་ཆུབ་སྐལ་བ་ལོས་ཀྱང་ཡོད། །དེ་སླད་ཐེ་ཚོམ་སྲིད་པ་ཟད་པའི་ཆོས། །རྡོ་རྗེ་མཆོག་ཏུ་གསང་བར་སྐལ་བ་བཞག །རྒྱུད་ཚོད་དེ་ལས་མི་འདུག་རྟོགས་འབུལ་ཞུ། །དགོངས་བརྒྱུད་བསྟན་པ་རིན་ཆེན་རྗེས་སུ་བསྙེད། །ཕུན་ཚོགས་འབྲས་ལ་སྨོན་ལམ་བཟང་བཏབ་པས། །བདག་འདྲ་མ་རིག་སྐལ་དམན་སེམས་ཅན་རྣམས། །ཕྱམ་གཅིག་གདོད་མའི་གཞི་ལ་ཡེ་རྒྱས་ནས། །དོན་གཉིས་མཐར་ཐུག་རྡོ་རྗེ་འཆང་ཐོབ་ཤོག ། ཞེས་ཁྱེད་ཞལ་མ་ལྡོག་ཙམ་དུ་སྨྲས་པ་པོ་ག་ག་ཨ་བྷྱེའི་བཅས་བཅོས་སུ་མེད་པར་རོ། །