ཚིག་གསུམ་གནད་བརྡེགས་ཀྱི་བསྡུས་དོན་པུཎྜ་རི་ཀའི་ཕྲེང་བ།
༈ ཚིག་གསུམ་གནད་བརྡེགས་ཀྱི་བསྡུས་དོན་པུཎྜ་རི་ཀའི་ཕྲེང་བ་བཞུགས་སོ། །
དེ་ཡང་བདུད་རྩི་བཅུད་ཐིག་ལས། ང་ཡི་དགུ་རྩེ་སྤྱི་ཏི་འདིར། །སྤྲོས་པ་རང་གི་ཐོག་ཏུ་བཅད། །རང་ངོ་རང་གི་ངང་ལ་སྤྲད། །རང་གདེངས་རང་གྲོལ་ཐོག་ཏུ་བཅའ། །ཞེས་པས་ན་རང་གི་སེམས་རང་བབས་སུ་རྟོག་གཉིས་གཟུང་འཛིན་བཏང་སྙོམས་དཔྱད་རྒྱའི་མ་བསླད་པར་བཞག་པས། རང་གསལ་འཛིན་མེད་སྟོང་བ་ཉམས་སུ་མྱོང་བའི་རིག་གེ་སེང་ངེ་བ་དེ་ཆོས་སྐུ་གཞི་ལྡན་གྱི་དགོངས་པ་རང་ལ་ཡོད་པ་ཉིད་ཡིན་པས་དེ་ལས་གཞན་དུ་ཚོལ་མི་དགོས་པས་ངོ་རང་ཐོག་ཏུ་སྤྲད་པ་ཟེར་རོ། །ཡང་དེའི་ངོ་བོ་ལ་ཡོད་མེད་མཐའི་དངོས་པོ་གང་གིས་ཀྱང་མ་རེག་པའི་དབུ་སེམས་སྔགས་ཀྱི་དབང་བཞི་བའི་ཡེ་ཤེས་ཚོགས་གཉིས་མཉམ་རྫོགས་ཀྱི་ཕྱག་རྒྱ་ཆེན་པོར་ཤེས་པས་བློས་སྤྲོས་པའི་གཟུང་འཛིན་མཐའ་དག་རང་བཞག་ན་ཡེ་ཤེས་ཆེན་པོ་གཅིག་གི་ཐོག་ཏུ་ཐག་ཆོད་གདེངས་ལྡན་དུ་བཞག་གོ །ཡང་རིག་པའི་རང་གདེངས་རྣམ་རྟོག་སྣང་ཞེན་གྱི་ཚོགས་ཐམས་ཅད་བཅས་བཅོས་སྤང་བླངས་བསྒྱུར་བཀོད་སྦྱོངས་གཞིག་རང་ལུགས་གང་དུའང་མི་བྱེད་པར་འགྱུ་བ་གསལ་དག་ཏུ་རང་གྲོལ་བར་སྔ་ཕྱི་བསུ་གཅོད་བག་ཆགས་ཀྱི་མཐའི་འཕྲང་ལ་མི་བཤར་བར་གཏོང་ངོ། །དེའི་གཞི་འབྲས་དབྱེར་མེད་རང་གནས་ཆེན་པོ་མངོན་དུ་འགྱུར་བའོ། །དེའི་དུས་སུ་འཛིན་པས་ཕྱོགས་དང་འཁྲུལ་པ་རྩིས་གདབ་ཕྲན་གྱི་ཟུག་རྡུ་ཡང་གོལ་སྒྲིབ་འཁྲུལ་པར་འཕྱན་པས། དགོངས་པ་དམིགས་མེད་ཀྱི་ངང་ལ་སླར་བརླན་པས་སྤྲོས་སྐྱོན་ཐམས་ཅད་དུས་གཅིག་ཏུ་ཆོད་དོ། །དེ་སྐད་རིམ་པར་གསལ་ཕྱེས་མགོ་རྨོངས་ལ། །གནད་བསྡུས་ཙམ་གྱིས་ཤེས་རབ་སྒྲོག་ཡིན་ཀྱང༌། །སྨོན་བཞིན་ག་ག་རྒྱལ་པོས་རེ་བ་བསྐང༌། །འདིས་ཀྱང་ཕན་པ་རྒྱ་ཆེར་འགྲུབ་གྱུར་ཅིག །ཕྱུག་རྡིས་ལ་ཕུལ།
༈ སྣང་མཆེད་ཐོབ་གསུམ་ཡིན་ལགས། སྔོན་ནམ་མཁའ་སྟོང་པ་རྟེན་མེད་དུ་སྣང་ཟེར་བ་དེ་དོན་ལ་ཀུན་གཞི་མཚན་ཉིད་ཅི་ཡང་མི་སེམས་པས་སྟོང་ཧད་དེ་ལ་ཟེར། ནམ་མཁའ་རྟེན་མེད་ཀྱི་ཁམས་གསུམ་རླུང་རི་ནག་པོ་རྡོ་རྗེ་རྒྱ་གྲམ་གྱི་དབྱིབས་ལྟར་ཆགས་ཟེར་བ་དེ་ནི་ལས་རླུང་གཡོ་བ་ཉིད་ཡིན། དེའི་སྟེང་དུ་ཞི་བ་གསལ་དག་གི་རྒྱ་མཚོ་ནི་ཀུན་གཞིའི་རྣམ་ཤེས་ཡིན། དེ་སྟེང་དུ་དབང་ཆེན་གསེར་གྱི་ས་གཞི་ནི་ཉོན་ཡིད་ཡིན་ནོ། །ཀུན་རྫོབ་ལ་མེ་ཡོད་ཟེར་བ་ཡིད་དྭངས་གསལ་ཀྱི་ཆ་ཡིན་ནོ། །དེ་ནི་དོན་གྱི་སྐལ་བ་ཆགས་ཚུལ་དང་འཁོར་བ་ལུགས་སུ་འབྱུང་ཚུལ་ཡིན་ནོ། །ལུགས་སུ་ལྡོག་ཚུལ་ནི། ཀུན་རྫོབ་ལ་སྔོན་མེའི་ཞེ་དགུ་ཆུའི་ལན་བདུན་རླུང་གི་ལན་གཅིག་སོགས་གཏོར་ཟེར་བ་སྲིད་ཀྱང་དོན་ལ་རྣམ་ཤེས་སྣང་བ་ལ་ཐིམ་ཚེ་དམར་ལམ་འཆར་བ་ལ་མེའི་ཞེ་དགུ་དང༌། སྣང་བ་མཆེད་པ་ལ་ཐིམ་ཚེ་དཀར་ལམ་སྣང་བ་ལ་ཆུའི་ལན་བདུན་དང༌། མཆེད་པ་ཉེར་ཐོབ་ལ་ཐིམ་ཚེ་ནག་ལམ་འཆར་བ་ལ་རླུང་གི་ལན་ཅིག་གཏོར་བ་ཞེས་བརྗོད་པ་ཡིན་ནོ། དེ་ལྟར་ལུགས་སུ་ལྡོག་ནས་སྲིད་རྩེ་རུ་འཕེན་པ་ལྟ་བ་ཡིན་ནོ། །བྲི་བ་རྒན་པོ་སྦ་ཁའི་བྲིས། །མཁོ་བ་འཕྲིན་ཆོས་ཁྱོད་ལ་མཁོ། །སྒོམ་པ་འཆི་ཁའི་གདམས་ངག་ཡིན། །གྲོལ་གྱུར་བ་ལ་ཐེ་ཚོམ་མེད། །དགེའོ། །