ཞལ་གདམས་སྐྱོན་མཚངས་འབྲུ་བ་སྙིང་གི་ཐུར་མ།

༈ ཞལ་གདམས་སྐྱོན་མཚངས་འབྲུ་བ་སྙིང་གི་ཐུར་མ་བཞུགས། །

ཨ་ཡེ། གང་ཞིག་ཕྱོགས་བཅུའི་རྒྱལ་བ་སྲས་བཅས་ཀྱི། །མཁྱེན་བརྩེ་ནུས་གསུམ་གཅིག་དུ་བསྡུས་པ་ཡི། །སྤྱི་གཟུགས་སྐལ་བ་དགེ་བའི་ངོར་གཏད་ནས། །དྲིན་ཆེན་བླ་མར་ཤར་ལ་ཕྱག་འཚལ་ལོ། །ཞལ་གདམས་སྨྲ་བ་དམ་པའི་མཛོད་ལྡན་ལས། །དམན་པ་བདག་ལྟའི་ཡུལ་དུ་མ་གྱུར་ཀྱང་། །བསྐུལ་བའི་ངག་ལ་གདོང་བཟློག་ཡང་འབྲས་ཀྱིས། །ཅུང་ཟད་བརྗོད་འདིར་ཐུགས་དམ་མཐིལ་སོ་མཛོད། །ལར་ནི་དེང་སང་སྙིགས་མའི་གཞན་དབང་གིས། །མི་ཐུབ་ལྔ་བྱུང་གང་དུ་བལྟས་ནའང་། །དམ་པའི་ཚུལ་དང་མཐུན་པ་ཉིན་སྐར་ཙམ། །ལགས་ཀྱང་ཐམས་ཅད་མཚངས་ནས་མི་འབྲུ་སྟེ། །ང་དང་ཁྱོད་གཉིས་ངང་ཚུལ་མཚུངས་འདྲར་མཆིས། །རང་སྐྱོན་འཆད་ཀྱི་ཉིད་ལ་དེ་ཡོད་ན། །ཞལ་གདམས་མཚངས་ཐོག་ཁེལ་བ་ཞེས་བྱ་སྟེ། །དེ་ལ་གཉེན་པོ་འཚམས་པར་བརྟེན་ན་ལེགས། །ཀྱེ་ལགས། བནྡྷེ་ཁྲིམས་ཉམས་བླ་མ་མཉམ་གྲོགས་ཀྱིས། །དད་པ་དག་སྣང་སྤུ་ཙམ་མེད་པ་དང་། །གཡོ་རྒྱུའི་ལྟག་བདུད་བྱེད་པའི་འདུན་ཕུག་གིས། །དངོས་སམ་ཟུར་གཏམ་སྨྲ་བའི་སྐྱོན་དང་གཅིག །ཆུང་ནས་དགེ་འདུན་མཉམ་འགྲོགས་བདུད་ཀྱིས་གཡེངས། །ཅི་མི་སྙམ་པའི་བརྙས་ཐབས་སྣ་ཚོགས་དང་། །ཕྲག་དོག་གཞི་ཡོད་མེད་པའི་ཚུལ་མིན་གྱིས། །སྒྲོ་བསྐུར་མ་གུས་བན་དྲེད་རྣམས་ཀྱི་སྐྱོན། །ཆོས་ལ་མཉམ་འགྲོགས་ཐོབ་གྲངས་མང་ངོ་སྐད། །ཁས་ལེན་སླ་སྟེ་ཉམས་ལེན་དཀའ་བར་འདུག །ནེ་ཙོའི་ཁ་ནས་ཆོས་བཤད་མིན་ནམ་ཟེར། །ཞེ་ཁྲེལ་ཆོས་སྤངས་བན་དྲེད་རྣམས་ཀྱི་སྐྱོན། །ཚུལ་ལྡན་མཐོང་ན་བཟང་བརྫུ་མཁན་དུ་སེམས། །མཁས་པ་མཐོང་ན་ང་རྒྱལ་ཅན་དུ་རློམ། །རྟོགས་ལྡན་མཐོང་ན་མི་ཆོས་བླ་མར་དྲན། །དེ་ཡང་བན་དྲེད་བདག་གི་སྐྱོན་དུ་མཆི། །གྲུབ་ཐོབ་མཐོང་ན་བསླུ་བྲིད་མཁན་དུ་བལྟ། །བཟོད་ལྡན་མཐོང་ན་ཁས་ཞན་སྙོམ་ཆུང་དང་། །ཆོག་ཤེས་ཅན་མཐོང་འཁོས་མེད་མདོ་ཤོར་སྙམ། །འདི་ཡང་བན་དྲེད་བདག་གི་སྐྱོན་དུ་མཆི། །དགེ་སྒྲུབ་མཐོང་ན་དགོས་སྣང་ཤར་རམ་ཟེར། །སྡིག་སྤང་མཐོང་ན་ཆས་ཆོད་དམོད་པར་བྱེད། །ཁྲེལ་མེད་མཐོང་ན་དེ་ཡི་རྗེས་སུ་སློབ། །འདི་ཡང་བན་དྲེད་བདག་གི་སྐྱོན་དུ་མཆི། །དམེ་བོ་མཐོང་ན་ཚུལ་བརྗོད་བསྟོད་ར་བྱེད། །ཚོང་ཁེ་མ་བྱིན་ལེན་མཐོང་ཕོ་རྒོད་ཟེར། །རྟག་ཏུ་ངན་སྤྱོད་བྱེད་ཀྱང་ཕོ་བཟོ་མཐོ། །འདི་ཡང་བན་དྲེད་བདག་གི་སྐྱོན་དུ་མཆི། །དམ་ཆོས་མཐོང་ན་ཕྱིར་ཞིང་ཞེན་ཁ་ལོག །ནག་ཆང་མཐོང་ན་སྲེད་པ་མེ་ལྟར་འབར། །དཀོར་ཟས་མཐོང་ན་ཧབ་ཐོབ་རྔམས་ཟས་བྱེད། །འདི་ཡང་བན་དྲེད་བདག་གི་སྐྱོན་དུ་མཆི། །མཐོན་པོ་མཐོང་ན་ཁ་གསག་སུ་ལས་ཆེ། །སྤྲང་པོ་མཐོང་ན་ཞེ་སྡང་སུ་ལས་ཆེ༑ ༑སེམས་ཅན་མཐོང་ན་སྙིང་རྗེ་སུ་ལས་ཆུང་། །འདི་ཡང་བན་དྲེད་བདག་གི་སྐྱོན་དུ་མཆི། །དང་པོ་ཚུལ་ཁྲིམས་ཡོད་སྙམ་ང་རྒྱལ་སྤོས། །བར་དུ་སྡོམ་པ་ཤོར་སྙམ་ངོ་སོ་དམའ། །ཐ་མ་དྲེད་པོ་ངེས་འབྱུང་རྩ་བ་ཆད། །འདི་ཡང་བན་དྲེད་བདག་གི་སྐྱོན་དུ་མཆི། །སྐྱོན་ཞིག་ཡོད་ན་ངན་རྒྱབ་སྔགས་ཀྱི་འཚོ། །ཆོས་ཁྲིམས་བསྡམས་ན་གཅིག་རྒྱབ་གཅིག་གིས་བསྲུང་། །རྟག་ཏུ་ཁྱིམ་གྱི་ཁ་འཛིན་གཡེངས་བས་བྲེལ། །འདི་ཡང་བན་དྲེད་བདག་གི་སྐྱོན་དུ་མཆི། །ཕྱི་ཚུལ་ངན་པའི་འདོད་ཆགས་མི་སོད་དེ། །ཁྱིམ་པ་སུན་འབྱིན་འདི་ལ་དགོས་འབྲས་མེད། །མ་འཁྱུད་ཚིམ་པ་མེད་པའི་དུས་ཡིན་པས། །འཁྲིགས་ཚིག་ཁྲོམ་བཤད་འདི་ཡང་བན་དྲེད་སྐྱོན། །བསོད་ནམས་མེད་ན་ལོངས་སྤྱོད་མི་འབྱུང་བས། །སྡིག་པའི་ཉོ་ཚོང་འདི་ལ་དགོས་པ་མེད། །སྡོམ་པ་གསུམ་ཀ་བརྒྱ་ལ་མ་བསྲུང་ཀྱང་། །སྐྱབས་འགྲོ་མེད་པ་འདི་ཡང་བན་དྲེད་སྐྱོན། །རྩིག་རྨང་མེད་པའི་ཁང་བ་ངོ་མཚར་ཆེ། །གཞི་རྟེན་མེད་པའི་སྡོམ་པ་ངོ་མཚར་ཆེ། །སྐྱོན་འདི་ཁྱིམ་པ་ངེད་ཚོར་སྨོས་ཅི་དགོས། །དགེ་སྦྱོང་ཆོས་བཞི་ལྡན་པའི་མེད་དོ་ལོ། །ཨེ་མ་འདི་འདྲ་མཐའ་མི་མངོན་པ་ཡི། །མང་པོ་བརྗོད་ན་རང་གིས་རང་ལ་ཁྲེལ། །གཞན་གྱི་སྔོན་ནས་དེ་ལས་སྨ་མི་ཕབས། །ད་ནི་ཁ་གཡང་འབོད་པའི་དུས་ལ་བབས། །ད་རིས་དལ་འབྱོར་རིན་ཆེན་ལག་ཏུ་ཐོབ། །དོན་མེད་རྡོ་བཞིན་ཨེ་བོར་ཁྱེད་ཅིག་མཁྱེན། །འཆི་བདག་བདུད་ནི་སྐད་ཅིག་གཅིག་མི་སྡོད། །མ་ཚོར་ཐ་མར་ལུས་སམ་ཁྱེད་ཅིག་མཁྱེན། །འཁོར་བ་མེ་ཡི་འོབ་ལ་བསིལ་བ་མེད། །སྡུག་བསྔལ་བདེ་བར་ཨེ་རྩི་ཁྱེད་ཅིག་མཁྱེན། །དཀར་ནག་ལས་འདི་ཀུན་བྱེད་མཁན་པོར་གྲུབ། །སྤོངས་ལེན་ཕྱིན་ལོག་མ་བྱེད་ཁྱེད་ཅིག་མཁྱེན། །བསླུ་མེད་དཀོན་མཆོག་རིན་ཆེན་རྣམ་གསུམ་གྱི། །རྗེས་སུ་ཟིན་པར་མཛོད་ཅིག་ཁྱེད་ཅིག་མཁྱེན། །བྱང་ཆུབ་སེམས་བསྐྱེད་སངས་རྒྱས་རྒྱུ་རུ་ངེས། །འདི་ལ་གལ་ཆུང་མ་བྱེད་ཁྱེད་ཅིག་མཁྱེན། །དཀྱིལ་འཁོར་དབང་ཕྱུག་དྲིན་ཆེན་བླ་མ་ལ། །དད་གུས་དག་སྣང་མ་ཆུང་ཁྱེད་ཅིག་མཁྱེན། །གསང་སྔགས་ཐམས་ཅད་དབང་ལ་བརྟེན་ནས་འགྲུབ། །ཆུ་བོ་རྒྱུན་མི་བཅད་པ་ཁྱེད་ཅིག་མཁྱེན། །དབང་སྲོག་རྒྱུད་ལ་འཛིན་པ་དམ་ཚིག་ཡིན། །གལ་ཆུང་ཞོལ་ལུས་མ་བྱེད་ཁྱེད་ཅིག་མཁྱེན། །མ་ཐོབ་བར་དུ་ཤེས་པར་མི་འགྱུར་བས། །སྒྲོ་འདོག་ཕྱི་ལྟར་ཆོད་ཅིག་ཁྱེད་ཅིག་མཁྱེན། །མགོ་གནོན་གཉེན་པོ་བསྒོམ་བྱུང་རྒྱུ་ཡིན་པས། །བསམ་པའི་ཤེས་རབ་བསྐྱེད་ཅིག་ཁྱེད་ཅིག་མཁྱེན། །རྩ་བ་དྲུངས་ནས་བྱུང་བའི་གཉེན་པོ་བ། །བསྒོམ་བྱུང་ཤེས་རབ་བསྐྱེད་པར་ཁྱེད་ཅིག་མཁྱེན། །ཐ་སྙད་མཁས་ཀྱང་ཁ་རྒྱལ་རྩོད་རྒྱུ་མེད། །དགོས་མེད་ལིང་གིས་བསྐྱུར་ཅིག་ཁྱེད་ཅིག་མཁྱེན། །རྒྱུ་རྫས་ཡོད་ཀྱང་ཕྱི་མ་ཁྱེར་ས་མེད། །ཆོས་རྒྱགས་གྱིས་ལ་བསྒོམ་ཞིག་ཁྱེད་ཅིག་མཁྱེན། །རྩི་སྒོ་ཡོད་ཀྱང་ཕྱི་མ་ཕན་ཐོགས་མེད། །སྟོང་རྒྱུག་བཤད་དགའ་མ་ཆེ་ཁྱེད་ཅིག་མཁྱེན། །མཁྱེན་ནོ་མཁྱེན་ནོ་ཁྱེད་གཅིག་མཁྱེན་ལ་ཐོངས། །ངས་ནི་ཁྱེད་ལ་གསང་རྐུང་ཅུང་ཟད་མེད། །ལེགས་བཤད་བྱིས་པའི་ཁ་ནས་བྱིན་ཟིན་གྱི། །ད་ནི་མ་འགྱང་བསྒོམ་སྒྲུབ་དང་དུ་ལོང་། །བློ་ལྷག་ངེས་པར་ཡོང་ངོ་ཁྱེད་ཅིག་མཁྱེན། །ཕྱི་ཚུལ་ང་ལ་མེད་དེ་རྫ་བུམ་འདྲ། །ནང་བཅུད་མ་དཱ་ན་ཡིས་མི་མཚུངས་བའི། །རིག་འཛིན་བརྒྱུད་པའི་ཞལ་ཆབ་དངར་བོ་ཡོད། །ཐེ་ཚོམ་ཅུང་ཟད་མི་དགོས་ཁྱེད་ཅིག་མཁྱེན། །ས་དགེ་ཀར་འབྲུག་ཕྱག་ཆེན་ཉམས་ལེན་དེའི། །མདོ་སོ་འདི་ལ་འདུས་སོ་ཁྱེད་ཅིག་མཁྱེན། །བསྐྱེད་རྫོགས་སྒྱུ་འོད་དགོངས་མིན་མཐར་ཐུག་གི །ངེས་དོན་འདི་ལས་མེད་དོ་ཁྱེད་ཅིག་མཁྱེན་། །གང་ཟག་ཕོ་མོའི་བརྟེན་ལ་ཁྱད་མེད་པས། །སྒྲུབ་གཞི་འདི་ལ་རུང་ངོ་ཁྱེད་ཅིག་མཁྱེན། །རྡོ་རྗེ་ཐེག་པའི་རྒྱུད་སྡེ་ཐམས་ཅད་ཀྱི། །མཐར་ཐུག་སྐྱེལ་སོ་ཡིན་ནོ་ཁྱེད་ཅིག་མཁྱེན། །བུམ་གསང་ཤེས་རབ་བཞི་བའི་དབང་རྣམས་ཀྱི། །ལམ་གྱི་གནད་ཀྱང་ཚང་ངོ་ཁྱེད་ཅིག་མཁྱེན། །རིམ་ལྔ་སྦྱོར་དྲུག་ལ་སོགས་ཟབ་ཟབ་ཀྱང་། །བཞི་པའི་ཡེ་ཤེས་ཡོངས་གཅོད་མཐོང་མིན་པས། །ད་ནས་རྒྱན་མེད་དགྲ་བཅོམ་ཅི་བཞིན་དུ། །མངོན་རྟོགས་རིམ་པའི་ཡོན་ཏན་གསལ་རྫོགས་ཀྱིས། །མ་ཁྱབ་པ་ལས་ཐལ་བས་བཀབ་པའི་མེས། །མི་བསྲེགས་ཞེས་སུ་སྦས་པའི་རྣལ་འབྱོར་སྨོད། ཁྱོད་མ་མཐོང་བའི་རྒྱུ་མཚན་མ་ངེས་པའི། །ལྟར་སྣང་རྗེས་དཔག་སྤྱོད་ཡུལ་གྱུར་པ་ཡི། །འཕགས་པའི་མཉམ་བཞག་དེ་ལ་རེ་སྨོན་མེད། །ཇི་ལྟར་ཉི་མས་ཕྱེ་བའི་པདྨ་འཛུམ་པ་ལས། །སྦྲང་རྩིའི་དགའ་སྟོན་བུང་བའི་ལུས་ཁམས་གསོས་སུ་སྨིན། །དེ་བཞིན་རྟོགས་པའི་སྣང་བའི་རྣམ་པར་རྗེས་ཐོབ་པའི། །བདུད་རྩིའི་བགོ་བྱ་འགྱེད་འདི་གཞན་དགའི་སྟོན་ཆེན་ཡིན། །ཅེས་ཀྱང་སྨྲ་བའི་སྦོབས་མེད་ཀྱང་། །ཁ་གཡང་བོས་པ་ཡིན་ནོ་ལགས། །འདི་ཡི་སྨྲ་གཞི་ཆོས་ཡིན་པས། །ཕན་པའི་སེམས་ཀྱིས་བསླང་བ་ཡིས། །དགེ་བའི་རྩ་བ་ཡོད་ཀྱང་སྲིད། །ཡོད་ན་མཁའ་ཁྱབ་སེམས་ཅན་ཀུན། །ཡོན་ཏན་ཀུན་ལྡན་སངས་རྒྱས་ཀྱི། །གོ་འཕང་ཐོབ་པའི་རྒྱུ་རུ་བསྔོ། །མ་བརྟགས་བྲེལ་དང་མི་དབོག་རྒྱུ། །གང་ཟག་རྒྱུད་ཚོད་མ་ཤེས་དང་། །རྨོངས་ཕྱིར་སྦྱངས་བརྩོན་མེད་ཕྱིར་གྱི། །འགལ་འཁྲུལ་ཡོད་ན་མཁས་ལ་བཤགས། །ཚིག་བཅད་རྐང་བས་དམན་པ་དང་། །གྲོང་ཚིག་གསལ་དང་བསྐྱར་བཟློས་སོགས། །ཁྱབ་དང་དབང་ཕྱུག་གྲུབ་མཐའ་ལས། །ཡང་དག་རྟོན་འདིར་སྐྱོན་མ་ཡིན། །ཅེས་ཀྱང་ག་གཱ་ཞེས་སྔགས་མིང་དུས་མཐར་སྐྱེས་པ་དེའི་བྲེལ་ཚུབས་ཀྱི་ངང་ནས་འབྲོག་རི་བ་འཇིགས་དགའ་ལ་སྨྲས་སོ། །