དུས་མཆོད་ཆེན་མོ་བཞིའི་ཚིག་ལེའུར་བྱས་པ།
ཤཱཀྱ་ཤྲཱི།
རྒྱ་གར་སྐད་དུ། ཀཱ་ལ་སུ་ཙ་མ་ཧ་ཙ་ཏུརྐཱ་རི་ཀ།བོད་སྐད་དུ། དུས་མཆོད་ཆེན་མོ་བཞིའི་ཚིག་ལེའུར་བྱས་པ། ཐམས་ཅན་མཁྱེན་པ་ཕྱག་འཚལ་ལོ། །རྒྱལ་བའི་བསྟན་ལ་ཞུགས་རྣམས་ཀྱིས། །སྐྱབས་གསུམ་དག་ལ་མཆོད་དམ་བཅའོ། །སྟོན་པས་ལེགས་པར་གསུངས་པ་ཡིས། །དུས་མཆོད་བཞི་ནི་འདི་ཡིན་ཏེ། །ཆོ་འཕྲུལ་ཆེ་དང་མངོན་བྱང་ཆུབ། །ཆོས་འཁོར་ལྷ་ལས་བབས་པའོ། །སྐར་མ་ཆུ་དང་ས་ག་དང་། །ཆུ་སྟོད་ཐ་སྐར་རིམ་བཞིན་ཉ། །མེ་ཏོག་ཨུ་དུམ་ཝ་ར་དང་། །བསིང་མ་ཁུག་ཆོས་སྤང་བརྒྱན་རྣམས། །རིམ་པ་བཞིན་དུ་ཁ་འབུས་སྟེ། །ཁ་ཏ་ཅོ་ག་ཁུ་ཕྱུག་དང་། །ཤ་བ་རིམ་བཞིན་སྒྲ་འབྱིན་ཏེ། ༈ །མདོར་ན་ཁྱིམ་རྩིས་དང་སྦྱར་ན། །བུམ་གླང་ཀརྐ་ཊ་དང་སྲང་། །ཉི་མ་གང་ལྡོག་རྒྱལ་དུ་རྩི། །ཕྱི་ཚེས་གཅིག་ནས་ཉ་ཡི་བར། །ཟླ་ཕྱེད་ཆོ་འཕྲུལ་ཆེན་པོ་ཡིན། །གཉན་ཡོད་ན་ནི་ལག་ལེན་དར། །བདུད་བཏུལ་བ་ཡི་དུས་ཡིན་པས། །ཆོ་འཕྲུལ་ཆེན་པོ་ཞེས་ཀྱང་གྲགས། །མདོ་སྡེ་མཛངས་བླུན་དག་ལས་གསུངས། །དེ་ནས་མཆོག་དེ་ན་དུས་མཆོད་འདིའི། །ལག་ལེན་དར་བར་གསུངས་པ་ཡིན། །མངོན་བྱང་ཆུབ་དང་བལྟམས་པ་ནི། །འདུལ་བའི་གླེང་གཞི་ཉིད་ལས་གསུངས། །མདོ་སྡེ་རྒྱ་ཆེ་རོལ་པ་ལས། །ལྷུམས་སུ་ཞུགས་པ་ཞེས་བཤད་དོ། །དེ་ནས་ཞག་ནི་ཞེ་དགུ་འདས། །ཚེས་བཞིའི་ཉིན་ཞག་བདེན་བཞིའི་ཆོས། །ཝ་ར་ཎཱ་སེར་བསྐོར་བ་དེས། །དེ་ན་འདི་ཡི་མཆོད་པ་དར། །རྒྱ་ཆེར་རོལ་པའི་མདོ་དང་ནི། །སིལ་བུ་ལས་ནི་དེ་ལྟར་གསུངས། །དེ་ན་བཅུ་ཕྲག་བཅུ་ཡི་ཉ། །སྟོན་འབྲིང་ཧོར་ཟླ་དགུ་པ་ལ། །མཆོད་པ་ཡངས་པ་ཅན་ན་དར། །སུམ་ཅུ་རྩ་གསུམ་གནས་ནས་ནི། །སྟོན་པས་དབྱར་གནས་མཛད་ནས་བྱོན། །མུ་སྟེགས་སྟོན་བཏུལ་བའི་ཕྱིར། །ཆོ་འཕྲུལ་ཆུང་ངུ་ཞེས་ཀྱང་བྱ། །འདི་ནི་མྱང་འདས་སིལ་བུ་དང་། །ཕྲན་ཚེགས་ཞེས་བྱའི་ལུང་ལས་གསུངས། ༈ །དེ་ནས་ཕན་ཡོན་སྟོན་པ་ནི། །དུས་ཆེན་བཞི་ལ་མཆོད་པ་ནི། །དམ་བཅས་མ་ཆག་བྱས་པ་ཡིས། །ཕན་ཡོན་སྤྱི་ནི་དཔག་མེད་ཀྱང་། །མདོར་བསྡུས་པ་ནི་འདི་ལྟ་སྟེ། །དཀོན་མཆོག་གསུམ་ལ་མ་གུས་དང་། །བླ་མ་གྲོགས་པོ་སུན་ཕྱུང་དང་། །ནད་པ་ཕ་མ་བསྙེན་མི་བཀུར། །དད་ཟས་ཟ་ཞིང་ལེ་ལོ་བྱེད། །རྒྱུན་གཏོར་ཆག་དང་དབུལ་འཕོངས་ལ། །སྦྱིན་པ་གཏོང་བར་མི་བྱེད་པའི། །ལས་རྣམས་མྱུར་དུ་ཟད་ནས་ཀྱང་། །བྱང་ཆུབ་ཐོབ་པར་ཐེ་ཚོམ་མེད། །དུས་མཆོད་བཞི་ནི་མ་ཆག་ན། །གཞན་ཡང་དགེ་སློང་སྨན་པ་ནི། །བརྒྱད་ཀྱི་སྨ་ཡང་བསོས་པར་འགྱུར། །སྡིག་གྲོགས་ཡུལ་དང་ཉེ་དུ་དང་། །མ་བརྟགས་བརྒྱད་དང་དགེ་སློང་མ། །འདུ་འཛི་ཤ་ཆང་བྲེ་མོའི་གཏམ། །དེ་དག་ལ་ཆགས་དམན་མ་ཡིན། །བླ་མ་དམ་ཚིགས་ཉམས་པ་དང་། །བྱང་ཆུབ་སེམས་ལ་ངན་སེམས་བསྐྱེད། །རྙེད་ཕྱིར་ཆོས་འདྲ་སྟོན་པ་དང་། །སྡིག་ལ་སྦྱོར་དང་དགེ་འདུན་གྱིས། །ཡོ་བྱད་བརྐུས་དང་རྩ་ལྟུང་བྱུང་། །དཀོན་མཆོག་སྤོང་དང་འཚམས་མེད་བྱས། །བསྟན་ལ་ཞུགས་ནས་རྩོད་པ་བྱེད། །མཛའ་ཤེས་སྤྱུགས་དང་བཅུ་པོ་ནི། །དམྱལ་བར་སྐྱེ་བར་གསུང་བའི་ལམ། །མྱུར་དུ་ཟད་ནས་ཀུན་མཁྱེན་ཐོབ། ༈ །དུས་འདིར་འཆི་བ་བླུ་བ་དང་། །མི་མཐུན་འདུམས་དང་མཆོད་རྟེན་བརྩེག །རྙིང་པ་གསོ་དང་ཡི་རང་བས། །བསོད་ནམས་དཔག་མེད་ཐོབ་པར་འགྱུར། ༈ །དུས་བཟང་གཞན་ཡང་བསྟན་པ་ནི། །བླ་མ་དང་ནི་མཛའ་བཤེས་དང་། །བྱང་ཆུབ་སེམས་དཔའ་གཤེགས་པའི་དུས། །ཉི་ཟླ་སྒྲ་གཅན་གདོན་གྱིས་ཟིན། །མུ་གེ་སྡེ་བརྩོད་ཡམས་ནད་འབྱུང་། །དུས་ཆེན་བཞི་དང་བཅུ་གཉིས་ལ། །དེ་བཞིན་གཤེགས་དང་དམ་པའི་ཆོས། །བྱང་ཆུབ་སེམས་དཔའ་ཉན་ཐོས་ཀྱི། །རྗེས་སུ་སློབ་པའི་དགེ་སློང་དང་། །བླ་མ་ཕ་མ་ལྷ་བཟོ་བ། །འགྲོ་བའི་ནད་གསོ་སྨན་པ་རྣམས། །ཟས་སྐོམ་རིན་ཆེན་སྨན་སོགས་ཀྱིས། །མཆོད་ན་སྐྱེ་བ་ཐས་ཅད་དུ། །གནས་དང་ལོངས་སྤྱོད་གྲོགས་ལ་སོགས། །དེ་དག་མཆོག་ཏུ་གྱུར་པ་ཐོབ། །ལྷ་ཡི་བསྲུངས་དང་བར་ཆད་མེད། །སྦྱིན་པ་གཏོང་ཞིང་ཚུལ་ཁྲིམས་ལྡན། །སྙིང་རྗེ་གཞན་གྱི་དབུགས་འབྱིན་ཅིང་། །ནད་མེད་འདོད་པ་ཆུང་བ་དང་། །གཞན་གྱིས་བཀུར་བའི་འོས་སུ་བྱུང་། །འཚོ་བ་རྣམ་པར་མ་དག་དང་། །དམ་ཚིག་ཉམས་པ་འབྱང་བར་བྱེད། །དགེ་འདུན་བྱང་ཆུབ་སེམས་དཔའ་དང་། །གཉེན་བཤེས་རྣམས་ཀྱིས་རྒྱན་དུ་གྱུར། །གནད་གཅོད་སྡུག་བསྔལ་མི་འབྱུང་ཞིང་། །ཤི་འཕོས་གསུམ་ལ་སྐྱབས་སུ་འགྲོ། །ཚེ་རབས་ཀུན་ཏུ་དལ་འབྱོར་ལུས། །ཐོབ་ནས་རབ་ཏུ་བྱུང་བ་དང་། །དགེ་བའི་བཤེས་གཉེན་བསྟེན་བྱེད་ཅིང་། །བསླབ་པ་གསུམ་དང་འབྲལ་མི་འགྱུར། །དུས་ཆེན་བཞི་དང་ཐ་མལ་པའི། །ཁྱད་པར་སིལ་བུ་མྱང་འདས་ལས། །ས་ཡ་ཕྲག་བརྒྱའི་འགྱུར་དུ་གསུངས། །ཉི་མ་གཟའ་ཡིས་ཟིན་པའི་དུས། །བྱེ་བ་ཕྲག་ནི་འབུམ་འགྱུར་དང་། །ཟླ་བ་བྱེ་བ་བདུན་འགྱུར་རོ། །དུས་ཆེན་བཞི་ལ་ཉི་ཟླ་ཟིན། །དེ་དག་བསོད་ནམས་ཁྱད་པར་འཕགས། །དུས་མཆོད་ཆེན་པོ་བཞིའི་ཚིག་ལེའུར་་བྱས་པ་ཁ་ཆེའི་པཎྜི་ཏ་ཤཱཀྱ་ཤྲིས་མཛད་པ་རྫོགས་སོ།། །།པཎྜི་ཏ་དེ་ཀི་དང་སྒྲ་འསྒྱུར་གྱི་ལོ་ཙཱ་བ་བྱམས་པའི་དཔལ་གྱིས་བསྒྱུར་བའོ།། །།