བཅུ་གཅིག་པ། ལྟ་སྟངས་བཤད་པའི་ལེའུའི་འགྲེལ་པ།
གསང་སྔགས་ཀྱི་གཞུང་ལུགས་ལ་སེམས་ཅན་རྣམས་གཞུག་པའི་ཕྱིར། ལྟ་སྟངས་བཞི་པོ་ལྟུང་བར་བྱེད་པ་དང༌། དབང་དུ་བྱ་བ་དང་དགུག་པ་དང་རེངས་པར་བྱ་བ་རྣམས་མཉམ་པར་ཞེས་བྱ་བ་ལ་སོགས་པ་གསུངས་ཏེ། མཉམ་པ་ནི་མི་གཡོ་བའོ། །མ་རུངས་པ་ནི་ཁོར་བ་དང་བཅས་པའོ། །དཔྲལ་བ་ཅན་ནི་མིག་འབྲས་གཉིས་དཔྲལ་བ་ལ་བརྟེན་པ་སྟེ། དེས་ནི་ལྟུང་བར་བྱེད་དོ། །གང་གཡོན་ཕྱོགས་སུ་བརྟེན་པ་ནི་གཡོན་ན་གནས་པ་སྟེ་དེས་དབང་དུ་བྱའོ། །གང་སྟེང་དུ་བརྟེན་པ་དག་གིས་གཡས་ལོགས་སུ་བལྟ་བ་དེས་ནི་དགུག་པར་བྱ་བས་སོ། །སྣ་གོང་དུ་དྲང་པོར་བལྟ་བ་གང་ཡིན་པ་དེས་ནི་རེངས་པར་བྱ་བའོ། །སྣའི་རྩེ་མོ་ནས་འབྱུང་བ་ཉིད་ཀྱི་རླུང་ནི་འབྱུང་བ་ཉིད་དོ། །འཇུག་པ་ནི་འགེངས་བྱེད་དོ། །ནང་གང་བར་འགྱུར་བ་ནི་བུམ་པའོ། །ཞུགས་ནས་མི་གཡོ་བར་གྱུར་པ་ནི་ཞི་བའོ། །འདི་དག་གོམས་པར་བྱ་བའི་གནས་བསྟན་པའི་ཕྱིར་རློན་པའི་ཤིང་ཞེས་བྱ་བ་ལ་སོགས་པ་གསུངས་ཏེ། ཁུ་བ་དང་བཅས་པའི་ཤིང་དང༌། མེ་ཏོག་དམར་པོ་དང༌། རྡོ་རྗེ་ཤིང་དང༌། གཡོ་བ་དང་བཅས་པའི་རྩྭ་རྣམས་ལའོ། །འཁྲུལ་པ་ནི་ཐེ་ཚོམ་དང་བཅས་པའོ། །གསང་བའི་ལྟ་སྟངས་ཅིའི་ཕྱིར་མ་གསུངས་ཤེ་ན། འདིར་དགོངས་པ་མ་ཡིན་ཏེ། ལྟ་སྟངས་བཞི་པོ་བསྒྲུབས་ནས་ནི། །མཁས་པས་སེམས་ཅན་གཞུག་
པར་བྱ། །ཞེས་གསུངས་པའི་ཕྱིར་རོ། །སྐྱེ་བ་བདུན་པ་ནི་ལེན་བདུན་སྐྱེས་པའོ། །དགའ་བྲལ་དགའ་བ་སྨོད་པ་ལ། །ཞེས་བྱ་བ་ནི་ལྷན་ཅིག་སྐྱེས་པའི་མཚན་ཉིད་ཅན་གྱི་དངོས་གྲུབ་བོ། །དབང་གི་ལས་ལ་ནི་ཀུ་རུ་ཀུལླེ་ཁྱད་པར་དུ་བསྔགས་ཏེ། དེའི་སྒྲུབ་ཐབས་མདོར་བསྡུས་པའོ། །གང་སྔོན་དུ་བསྟན་པ་དེར་ནི་རྒྱས་པར་བཤད་པ་སྟེ། དགྱེས་པའི་རྡོ་རྗེའི་རྒྱུད་བརྟག་པ་བཅུ་གཉིས་པར་རོ། །མདའ་ནི་མདའོ། །གཞུ་ནི་གཞུའོ། །ཨུཏྤལ་ནི་ཨུཏྤལོ། །ལྕགས་ཀྱུ་ནི་ལྕགས་ཀྱུའོ། །ཐམས་ཅད་ཀྱང་དམར་པོའོ། །རྡོ་རྗེ་ནི་རྡོ་རྗེ་འཆང་ངོ༌། །དེའི་སྙིང་པོ་ནི་ཐུགས་ཏེ་དགྱེས་པའི་རྡོ་རྗེའོ། །དེའི་མངོན་པར་ཞེས་བྱ་བ་མ་ལུས་པར་རྟོགས་པ་གང་ཡང་ཡོད་པ་དེ་ནི་རྡོ་རྗེ་སྙིང་པོ་མངོན་པར་བྱང་ཆུབ་པའོ། །དེ་གསལ་བར་བྱེད་པའི་རྟོག་པ་ལ་ཡང་དེ་སྐད་ཅེས་བྱའོ། །དགྱེས་པའི་རྡོ་རྗེའི་དཀའ་འགྲེལ་རྣལ་འབྱོར་རིན་པོ་ཆེའི་ཕྲེང་བ་ཞེས་བྱ་བ་ལས་བརྟག་པ་དང་པོའི་འགྲེལ་བའོ།། །།