འཕགས་པ་མཁའ་འགྲོ་མ་རྡོ་རྗེ་གུར་ཞེས་བྱ་བའི་རྒྱུད་ཀྱི་རྒྱལ་པོ་ཆེན་པོའི་བརྟག་པ་དང་པོའི་རྒྱལ་པོའི་བཤད་སྦྱར།
ནག་པོ་པས་མཛད།
རྒྱ་གར་སྐད་དུ། །ཨཱཪྻ་ཊཱ་ཀི་ནཱ་བཛྲ་པཉྫ་ར་མ་ཧཱ་ཏནྟྲ་རཱ་ཛ་ཀ་ཝ་ནཱ་མ་མུ་ཁ་བནྡྷ། བོད་སྐད་དུ། འཕགས་པ་མཁའ་འགྲོ་མ་རྡོ་རྗེ་གུར་ཞེས་བྱ་བའི་རྒྱུད་ཀྱི་རྒྱལ་པོ་ཆེན་པོའི་བརྟག་པ་དང་པོའི་རྒྱལ་པོའི་བཤད་སྦྱར། དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ། །ནག་པོ་ཤེས་རབ་ལས་རིང་བ། གང་ཞིག་
སྙིང་རྗེ་རྣམ་བཟུང་བ། །རྡོ་རྗེ་སེམས་དཔའ་ཞེས་བྱ་བའི། །འདྲེན་སྐྱོབ་དེ་ལ་ཕྱག་འཚལ་ཞིང༌། །ཐང་མཆོག་དབང་ཕྱུག་རྩོལ་བ་ཡི། །སློབ་དཔོན་ཞབས་ལ་ཕྱག་འཚལ་ནས། མཁའ་འགྲོ་མ་ཡི་རྡོ་རྗེ་གུར། །དྲན་ཕྱིར་ཅུང་ཟད་བཤད་པར་བྱ། །ནམ་མཁའ་ལ་ཞེས་བྱ་བ་ལ་སོགས་པས་དོན་དམ་བར་དངོས་པོ་ཐམས་ཅད་ཀྱི་དོན་དམ་པ་དང༌། ཀུན་རྫོབ་ཀྱིས་དཔྱད་ན་ཐམས་ཅད་དུ་བཞུགས་ཏེ། སྟོན་པ་པོ་བཅོམ་ལྡན་འདས་མཁའ་འགྲོ་མའི་རྡོ་རྗེ་གུར་གྱི་བསྒྲུབ་བྱའི་རིགས་པ་འགྲོ་བ་ཐམས་ཅད་ལ་ཁྱབ་པར་མཛད་པའི་ཕྱིར་རེ་ཞིག་གསལ་བར་བྱའོ། །སྡུད་པར་བྱེད་པ་རྡོ་རྗེ་སྙིང་པོས་ཀྱེའི་རྡོ་རྗེ་གཡོ་བ་དང་གནས་པར་ཁྱད་ཅིང་བཞུགས་པ་ཞེས་བྱ་བ་དེ་བརྗོད་དོ། །དེ་ལ་གཞུང་གི་ནང་དུ་བཤད་པའི་ཕྱིར་འབྱུང་བ་ཆེན་པོ་ལྔ་རྣམས་ཀྱི་བསྐྱེད་པའི་རིམ་པའི་འབྲེལ་བ་དང༌། དེའི་བག་ཆགས་ཀྱི་བདག་པོ་དེ་དང་པོར་རེ་ཞིག་བཤད་པར་བྱ་སྟེ། དེ་རྣམས་ཀྱི་ནང་ནས་ནམ་མཁའ་ནི་མི་གསལ་བའི་ཕྱིར་དེ་ཉིད་ལ་སོགས་པ་བརྗོད་པར་བྱའོ། །ནམ་མཁའ་ལ་ཞེས་བྱ་བ་ནི་སྒྲིབ་པ་མེད་པ་ལའོ། །བེམས་པོ་ལ་ཞེས་བྱ་བ་ནི་སྲ་བའི་ཚུལ་དང་ས་ལའོ། །དང་བ་ལ་ཞེས་བྱ་བ་ནི་ཁུ་བ་དང་ཆུ་ལའོ། །གོ་སྐབས་མེད་པ་ལ་ཞེས་བྱ་བ་ནི་སྲེད་པར་བྱེད་པ་དང༌། གོ་སྐབས་རབ་ཏུ་མི་སྟེར་བའི་ཕྱིར་མེ་ལའོ། །འབྱེད་པ་ལ་ཞེས་བྱ་བ་ནི་མིག་དང་ཡུལ་དང་རླུང་ལའོ། །འདི་རྣམས་ཉིད་ལ་སོགས་པ་ཡང་པུཀྐ་སཱི་ལ་སོགས་པར་འགྱུར་ཏེ། ཡང་ན་ས་ནི་པུཀྐ་སཱི་རུ་བཤད། །ཆུ་ཁམས་རི་ཁྲོད་མར་ནི་བརྗོད། །དྲོད་ནི་གདོལ་པ་མོར་ཤེས་བྱ། །རླུང་ནི་གཡུང་མོར་རབ་ཏུ་གྲགས། །བདེ་བ་ནམ་མཁའ་ཞེས་བྱ་བ་ནི་ལྷའི་རྣལ་འབྱོར་ཀུན་དུ་འཛིན་པ་དང༌། གང་དག་རྣམས་ཀྱི་གནས་སུ་དངོས་པོ་རྫོགས་པའི་རིམ་པའི་སེམས་དཔའི་མན་ངག་གསུངས་སོ། །སྣ་ཚོགས་ལ་ཞེས་བྱ་བ་ནི། སྟོང་པ་ཉིད་ཀྱི་ཚུལ་གྱིས་འགྲོ་བ་ཐམས་ཅད་ཁྱབ་པར་མཛད་པའི་ཕྱིར་ནམ་མཁའ་ལའོ། །རྡོ་རྗེ་བཞི་ལ་ཞེས་བྱ་བ་ནི་སྣ་ཚོགས་འདུལ་བ་ཞེས་བྱ་བ་དང༌། རྡོ་རྗེ་སེམས་དཔའི་གནས་ཐམས་ཅད་དང༌། དབང་ཆེན་གྱི་དཀྱིལ་འཁོར་ལའོ། །གནས་ཁང་ལ་ཞེས་པ་ནི་དེའི་གཞལ་མེད་ཁང་དང་ཆུའི་དཀྱིལ་འཁོར་ལའོ། །སེམས་ཅན་ཁམས་ལ་ཞེས་བྱ་བ་
ནི། དེའི་སྟེང་དུ་འདིས་མེའི་དཀྱིལ་འཁོར་ལའོ། །ཡིད་དུ་འོང་བ་ལ་ཞེས་བྱ་བ་ནི་ཡིད་ཀྱིས་ཡིད་སྡུད་པའོ། །དེ་རྣམས་ཀྱི་གནས་དང་རླུང་གི་དཀྱིལ་འཁོར་ལ་འབྱུང་བ་ཆེན་པོའི་སྤྲོས་པ་དེ་ལ་གནས་པ་སྟེ། སེམས་ཅན་ཆེན་པོ་ལ་ཞེས་བྱ་བ་ནི་འཚོ་བའི་འཇིག་རྟེན་ལའོ། །སྣོད་ལ་ཞེས་བྱ་བ་ནི་སེམས་ཅན་གྱི་གནས་དང་ས་ལ་སོགས་པ་དག་ལའང་སྤྲོས་པ་བརྗོད་དོ། །ས་ལ་ཞེས་བྱ་བ་ལ་སོགས་པས་ནི་ས་འོག་དང་མི་ཡུལ་དང་མཐོ་རིས་སུ་བདེ་བར་སྣང་བ་ལའོ། །འཇིག་རྟེན་ཐམས་ཅད་ཁྱབ་པར་གནས་པ་གསུངས་པ། ཡིད་ལ་ཞེས་བྱ་བ་གསུངས་པ་ནི་འདི་རྣམས་ལ་ལྷ་མོ་རྣམས་སུ་གནས་པ་ཡིན་ཏེ། དེ་ནས་མཁའ་སྤྱོད་མ་ནི་ཐུགས་ཀྱི་རྡོ་རྗེ་དང༌། གསུང་གི་རྡོ་རྗེ་ལ་ས་སྤྱོད་མ་དང༌། སྐུ་ལ་ཞབས་འོག་གནས་མ་སྟེ། །ཨོཾ་ཨཱཿ་ཧཱུཾ་གི་སྙིང་པོ་ལས་བྱུང་བའོ། །སྐུ་ལ་སོགས་པའི་བྱ་བ་ཡང་གསུངས་པ་གཅིག་ལ་གཉིས་ལ་ཞེས་བྱ་བ་ནི་གཟུང་བ་དང་འཛིན་པའི་རྣམ་པར་ཤེས་པ་ལའོ། །མཁའ་བདེ་ལ་ཞེས་བྱ་བ་ནི་དངོས་པོ་དང་དངོས་པོ་མེད་པའི་བདག་ཉིད་དང༌། དེ་ནམ་མཁའ་ལ་ཞེས་བརྗོད་དེ། ཡེ་ཤེས་འདི་ཉིད་ཆེན་པོ་སྟེ། ཐམས་ཅད་ལུས་ལ་རྣམ་པར་གནས། གཉིས་དང་གཉིས་སུ་མེད་པའི་ཚུལ། །དངོས་དང་དངོས་པོ་མེད་པའི་གཙོ། །རིགས་དྲུག་པོ་འདི་རྣམས་རྣམ་པར་དག་པར་གྱུར་པ་འདི་བརྗོད་པར་བྱ་སྟེ། དྲུག་ལ་ཞེས་བྱ་བ་ནི་དེ་ནས་ཡང་རིགས་དྲུག་པོ་རྣམས་མངོན་པར་བརྗོད་པར་ཤེས་པར་བྱ་སྟེ། འདོད་ཆགས་ཞེ་སྡང་གཏི་མུག་དང༌། །དམ་ཚིག་སེམས་ཅན་ནོར་བུ་སྟེ། །འདོད་པའི་ཐང་པར་བསྒྲུབ་པ། །འདི་རྣམས་རིགས་ནི་དྲུག་ཏུ་བརྗོད། །བྱེ་བྲག་ཏུ་སྨྲ་བ་དང༌། མདོ་སྡེ་པའི་རྫས་སུ་བཙལ་ན་གང་ཞིག་འགྲོ་བ་དེ་ཡིས་ཁྱབ་པར་བྱེད་པ་བརྟན་པར་བྱ་སྟེ། ལྔ་པ་ཞེས་བྱ་བ་ནི་ཕུང་པོ་ལྔ་པོ་འདི་རྣམས་ལྷན་རྣམས་སུ་འགྱུར་བ་སྟེ། དེ་ནས་ཡང༌། གཟུགས་ཕུང་ལ་ནི་རྡོ་རྗེ་ཡིན། །ཚོར་བ་ལ་ནི་དཀར་མོར་བརྗོད། །འདུ་ཤེས་ཆུ་ཡི་རྣལ་འབྱོར་མ། །འདུ་བྱེད་རྡོ་རྗེ་མཁའ་འགྲོ་མ། །རྣམ་ཤེས་ཕུང་པོའི་ཚུལ་གྱིས་ནི། །བདག་མེད་རྣལ་འབྱོར་མ་གནས་སོ། །ཞེ་སྡང་ལ་སོགས་པ་ཡང་ལྔ་པོ་བསྟན་ཏོ། །དེ་རྣམ་པར་དག་པ་ཡང་ལྷ་མོར་གྱུར་པ་སྟེ། དེ་ཡང་། ཞེ་སྡང་ཞེས་བཤད་རྡོ་རྗེ་མ། །འདོད་ཆགས་ཆུ་བདག་
རྣལ་འབྱོར་མ། །ཕྲག་དོག་རྡོ་རྗེ་མཁའ་འགྲོ་མ། །སེར་སྣ་གསང་བའི་དཀར་མོ་སྟེ། །གཏི་མུག་དེ་བཞིན་རྡོ་རྗེར་བཤད། །ཞེ་སྡང་ལ་སོགས་སྦྱོང་བའོ། །གཟུགས་ཀྱི་ཕུང་པོ་སྤྲོས་པ་ལ་སྐྱེ་མཆེད་བཅུ་གཉིས་ལ་གནས་པར་རིག་པར་བྱ་སྟེ། དྲུག་གཉིས་ལ་ཞེས་བྱ་བ་ནི་འདི་རྣམས་ལྷ་མོ་རྣམས་སུ་དབྱེ་བར་བྱ་ཞིང་དེ་ཡང༌། མིག་ལ་གཏི་མུག་རྡོ་རྗེ་དགོད། །ཞེ་སྡང་རྡོ་རྗེ་རྣ་བ་ལ། །སྣ་ལ་སེར་སྣ་རྡོ་རྗེ་མ། །ཁ་ལ་འདོད་ཆགས་རྡོ་རྗེ་མ། །རེག་ལ་ཕྲག་དོག་རྡོ་རྗེ་མ། །ཡིད་ལ་བདག་མེད་བསྒོམ་པར་བྱ། །གཟུགས་ལ་དཀར་མོ་ཡང་དག་བཤད། །སྒྲ་ལ་ཆོམ་རྐུན་མ་རབ་གྲགས། །དྲི་ཡི་ཆ་ལ་རོ་ལངས་མ། །རོལ་གྷ་སྨ་རཱི་རབ་གྲགས། །རེག་ལས་སྤྱོད་མར་ནི་བཤད། །ཆོས་ཀྱི་དབྱིངས་ལ་མཁའ་སྤྱོད་མ། །བྱེ་བྲག་ཏུ་སྨྲ་བའི་གཞུང་གི་སྐྱེ་མཆེད་རྣམས་ཀྱང་འབྱུང་བ་དང་འབྱུང་བའི་བདག་ཉིད་ཅན་གྱི་རང་བཞིན་གྱི་སྐྱེ་མཆེད་དེ། དེ་ལ་གཞུང་རྗེས་སུ་བཙལ་བས་འགྲོ་བ་ལ་གནས་པ་འདི་རྣམས་ཀྱིས་ལྷ་རྣམས་དང་ལྡན་པར་ཐམས་ཅད་དུ་གནས་པར་བརྗོད་པ་ཉིད་དོ། །མདོ་སྡེ་པའི་གཞུང་གིས་ནི་འབྱུང་བ་རྣམས་ཉིད་འགྱུར་བ་ཞེས་བྱ་བ་ནི། གཟུགས་དང་རེག་བྱ་བ་སོགས་པ་ལ་ཟེར་རོ། །བཞི་ལ་ཞེས་བྱ་བ་ནི། གཟུགས་དང༌། རོ་དང༌། དྲི་དང༌། རེག་བྱ་ལ་སྟེ། འདི་རྣམས་ཉིད་ལ་ཡང་ཕུང་པོ་དང༌། ཁམས་དང༌། སྐྱེ་མཆེད་དང༌། འདོད་ཁམས་ལ་སོགས་པའི་རང་བཞིན་དུ་གནས་པར་གསུངས་པ། སྐྱེ་འགྲོ་ལ་ཞེས་བྱ་བ་ནི་བཞི་ལ་ཡང་ཞེས་བྱ་བ་ཡིན་ཏེ། དེ་ལ་འདོད་ཁམས་དང༌། གཟུགས་ཀྱི་ཁམས་དང༌། གཟུགས་མེད་བའི་ཁམས་དང༌། འཇིག་རྟེན་གྱི་མཆོག་དང༌། རྡོ་རྗེ་སེམས་དཔའ་ལ་སོགས་པ་བཞི་ནི་འགྲོ་བ་གསུམ་ལའོ། །གཟུགས་ཀྱི་ཡེ་ཤེས་ཀྱི་སྤྲོས་པ་ལ་སོགས་པ་ལ་གསུངས་པ། གཅིག་གིས་ཉི་ཤུར་མ་ཚང་བའམ། །ཞེས་བྱ་བ་ནི་ཁམས་བཅོ་བརྒྱད་གདོད་མ་ནས་མ་སྐྱེས་པའི་རང་བཞིན་ཞེས་བྱ་བ་ནི། གཅིག་གིས་ཉི་ཤུར་མ་ཚང་བའོ། །དེ་ཡང་དབང་པོ་དང༌། ཡུལ་ཉིད་དང༌། དབང་བོའི་རྣམ་པར་ཤེས་པ་ཉིད་དོ། །རྣལ་འབྱོར་མ་རྣམས་གོ་བྱའི་ཕྱིར། །ཁམས་ནི་བཅོ་བརྒྱད་དག་ཏུ་བཤད། །རང་བཞིན་གདོད་ནས་མ་སྐྱེས་པ། །བདེན་མིན་དེ་བཞིན་བརྫུན་པ་མིན། །ཐམས་ཅད་ཆུ་ཟླ་ལྟ་བུ་སྟེ། །རྣལ་
འབྱོར་མ་ཡི་འདོད་ཤེས་ཀྱིས། །ཁམས་བཅོ་བརྒྱད་རྣམ་པར་དག་པའོ། །ཕུང་པོ་དང་ཁམས་དང་སྐྱེ་མཆེད་རྣམ་པར་དག་པར་ཤེས་པར་བྱ་སྟེ། རང་བཞིན་གྱིས་མ་སྐྱེས་པ་ནི་གཅིག་ཏུ་དག་པ་སྟེ། དེ་ཉིད་ཀྱིས་གཞན་ཇི་སྙེད་པ་སྦྱོར་བར་བྱེད་པའོ། །དེ་རྣམ་པར་དག་པ་ཇི་ལྟ་བུ་ཞེ་ན། དེ་ཁྱད་པར་དུ་ཉེ་བར་བསྟན་པའི་ཕྱིར་མདོར་བྱས་པ། ཁམས་གསུམ་ལ་ཞེས་བྱ་བ་ལ་སོགས་པ་ནི། དེ་ལ་འདོད་པའི་ཁམས་སུ་རབ་ཏུ་དགའ་བར་གཉིས་གཉིས་འཁྱུད་པ་དང༌། ལག་བཅངས་དང༌། དགོད་པ་དང༌། བལྟ་བར་བརྗོད་དེ་སེམས་ཅན་རྣམས་ཀྱི་སེམས་པ་ཉིད་དང་ཕ་དང་བུ་དང་མ་མོ་རྣམ་པར་གནས་པ་ཞེས་བརྗོད་དོ། །ཕ་དང་ཞེས་བྱ་བ་ལ་སོགས་པ་ནི་གཟུགས་ཀྱི་ཁམས་སུ་བརྗོད་དོ། །ཕྱི་རོལ་གྱི་དོན་ལ་ཞེས་བྱ་བ་ནི་འདོད་པའི་ལོངས་སྤྱོད་ཀྱི་རང་བཞིན་སྤངས་པའོ། །ནང་ལ་ཞེས་བྱ་བ་ཡང་གཟུགས་མེད་པའི་ཁམས་སུ་ཡེ་ཤེས་ཙམ་ལའོ། །བཙུན་མོ་ཀུན་ལ་ཞེས་བྱ་བ་ནི་འཇིག་རྟེན་གྱི་མཆོག་དང་ལྷ་མོའི་འཁོར་ལའོ། །ཆོས་ལ་ཞེས་བྱ་བ་ནི་དེའི་ཚོགས་ལའོ། །ལས་ཐམས་ཅད་ལ་ཞེས་བྱ་བ་ནི། དེའི་བྱ་བ་ཕལ་པ་ལ་སོགས་པ་ནི་གྲུབ་པ་ཚད་མ་གཅིག་ཏུ་འདིར་མི་སྨྲ་ཞིང༌། དེ་རྣམས་ཀྱི་རང་བཞིན་ཡང་དེ་རྣམས་བརྗོད་པར་བྱ་སྟེ། བདག་མེད་པ་ལ་ཞེས་བྱ་བ་ནི། གང་ཟག་ལ་བདག་མེད་པ་ནི་བདག་མེད་པའོ། །འདིར་ནི་འཁོར་བར་འབྲས་བུ་དང༌། བྱེད་རྒྱུ་ཙམ་གྱི་བདག་མེད་པར་ཡང་བསྒོམ་པ་དང༌། དགྲ་བཅོམ་པ་ལ་རྣམ་པར་གནས་པའི་གནས་སྐབས་གསུངས་པ། འབྲས་བུ་ལ་ཞེས་བྱ་བ་ནི་རྒྱུན་དུ་ཞུགས་པའི་འབྲས་བུ་ལ་སོགས་པ་རྣམས་འབྲས་བུར་སྒྲུབ་པའི་ཕྱིར་རོ། །རྒྱུ་ཞེས་བྱ་བ་ནི་བདག་མེད་པ་སྒོམ་པ་ལ་སོགས་པ་བྱེད་པ་ལས་སྐྱེ་བའི་ཕྱིར་རོ། །བྱེད་རྒྱུ་ཉིད་འབའ་ཞིག་ནི་རྒྱུ་མ་ཡིན་ནོ། །བྱ་བའང་ཤེས་པར་བྱ་བའི་ཕྱིར་རོ། །རྒྱུ་ལ་ཞེས་བྱ་བ་ལ་སོགས་པ་ལ། བྱ་བ་ཞེས་བྱ་བ་ནི་བྱ་བའི་མིང་ངོ༌། །གཉིས་པོ་དེ་ཡང་སོ་སོར་བསྒྲུབ་བྱ་དང༌། སྒྲུབ་པའི་རང་བཞིན་གྱི་ཕྱིར་གྲུབ་པ་གསུངས་པ། བསྒྲུབ་བྱ་སྒྲུབ་ཐབས་རྡོ་རྗེ་ལ། །ཞེས་བྱ་བ་ནི། དེ་ཡང་རྒྱུན་དུ་ཞུགས་པའི་འབྲས་བུ་ལ་སོགས་པ་བསྒྲུབ་པར་བྱ་བ་ནི་བདག་མེད་པའི་བསྒོམ་པ་ལས་སྐྱེས་པའི་ཕྱིར་རོ། །སྒྲུབ་པའི་ཐབས་ཀྱང་བདག་མེད་པར་བསྒོམ་
པས་ཤེས་པར་བྱ་བའི་ཕྱིར་རོ། །བདག་མེད་པར་བསྒོམ་པ་ལ་སོགས་པ་ཡང་རྒྱུ་དང་བསྒྲུབ་པར་བྱ་བ་རྒྱུན་དུ་ཞུགས་པའི་འབྲས་བུ་ལ་སོགས་པའི་ཤེས་པར་བྱ་བའི་ཕྱིར་རོ། །རྒྱུན་དུ་ཞུགས་པའི་འབྲས་བུ་ལ་སོགས་པའི་བྱེད་པ་པོ་ཉིད་ཀྱི་ཕྱིར་སྒྲུབ་པའི་ཐབས་སོ། །རྣལ་འབྱོར་སྤྱོད་པའི་གཞུང་གིས་ཀྱང་སྐྱེ་འགྲོའི་གནས་པ་གསུངས། དེ་བཞིན་ཞེས་བྱ་བ་ནི་འབྲས་བུ་དང་རྒྱུ་ལ་ཡང་འདི་ལྟར་བལྟ་བར་བྱ་སྟེ། ཀུན་གཞི་རྣམ་ཤེས་ཞེས་བྱ་བ་ནི་བདག་དང་སེམས་ཅན་དང་དོན་ནུབ་ཅིང་བག་ཆགས་སྤངས་པ་ལའོ། །ཆོས་ཀྱི་དབྱིངས་ལ་ཞེས་པ་ནི་ཆོས་རྣམས་ཀྱི་བདག་ལ་སོགས་པར་འཛིན་པ་ལ་སོགས་པ་རྣམས་ཀྱི་སྐྱེ་བ་དང༌། རྒྱུ་ཉོན་མོངས་པ་ཅན་གྱི་ཡིད་ལའོ། །མ་བྱུང་ཞེས་བྱ་བ་ནི་འདིར་དབྱེར་མེད་པའི་རང་བཞིན་གྱི་ཕྱིར་སོ་སོར་སྐྱེ་བ་སྤངས་པའོ། །བདག་མེད་པ་རྣམས་ཀྱི་སྤྱོད་པ་རྣམ་པར་ཤེས་པ་རྒྱུ་དང་འབྲས་བུ་ཙམ་གྱིས་འཁོར་བར་དགྲ་བཅོམ་པའི་གནས་སྐབས་གསུངས་པ། འབྲས་བུ་ཞེས་བྱ་བ་ལ་སོགས་པ་ནི་འབྲས་བུ་དང་རྒྱུའི་རྣམ་པར་འབྲེལ་པ་གསུངས་པའོ། །བྱ་བ་ལ་ཞེས་བྱ་བ་ལ་སོགས་པ་ནི་འབྲས་བུ་དང་བྱ་བ་དུ་བ་ལ་སོགས་པ་མེ་ལ་སོགས་པས་མེད་པའི་ཕྱིར་རོ། །བསྒྲུབ་བྱ་དང་གཏན་ཚིགས་མེ་དང་དུ་བས་ཤེས་པར་བྱ་བའི་ཕྱིར་འདི་གཉིས་ཀའང་སྒྲུབ་ཐབས་སོ། །དེ་ཡང་དུ་བ་ལ་སོགས་པས་སྒྲུབ་པའི་ཐབས་སུ་ཤེས་པར་བྱའོ། །ཕྱི་རོལ་ལ་སོགས་པའི་སྒྲུབ་ཐབས་དང༌། བྱེད་པ་པོར་ཆ་ཤས་མེད་པར་བདག་ཉིད་ཀྱི་བློས་མ་ལོག་པར་མཐོང་བས་གཟུང་བ་དང་འཛིན་པ་ཡང་དག་པར་རིག་པའི་དབྱེ་བ་ཅན་ལྟ་བུར་བརྟག་པར་བྱ་སྟེ། འདི་དག་ནི་ཚིག་ཙམ་ཉིད་དོ། །སྐྱེ་འགྲོ་ལ་སོགས་པ་གསུངས་པ། སེམས་ཅན་ལ་ཞེས་བྱ་བ་ནི་སྣོད་ཀྱི་འཇིག་རྟེན་གྱི་ཀུན་གཞི་རྣམ་པར་ཤེས་པ་གཅིག་ལས་གཅིག་ཉིད་ཅེས་བྱ་བ་ལ་སོགས་པའི་དགོངས་པ་སྟེ། འདིས་འདིའི་དོན་དུ་མངོན་པར་འདོད་པའོ། །དེ་ལ་ནམ་མཁའི་ཁམས་ཞེས་བྱ་བ་ནི་སེམས་དཔའི་ཁམས་སོ། །དེ་ལས་གཞན་པ་རྣམས་ཀྱི་བདག །ཅེས་བྱ་བའི་ཁྱད་པར་གསུངས་པ། བདག་མེད་པ་དང་བདག་ཅེས་བྱ་བ་དང༌། ཞེས་བྱ་བ་ནི་དབུ་མའི་གཞུང་གིས་སྐྱེ་འགྲོ་གང་ཞིག་དེའི་གནས་སུ་གསུངས་པའོ། །དངོས་པོ་མེད་དང་ཞེས་བྱ་བ་ནི་
དོན་དམ་པ་ལས་སོ། །དངོས་མེད་མིན་ཞེས་བྱ་བ་ཡང་ཀུན་རྫོབ་ཀྱི་དངོས་པོའི་ཚུལ་གྱི་ཕྱིར་རོ། །ཉེ་བར་ཐོབ་པའི་གནས་ཀྱི་ཁྱད་པར་གསུངས་པ། བདེ་པ་ཅན་དུ་ཞེས་བྱ་བ་ལ་སོགས་པ་ནི་འཁོར་བའི་ནང་དུ་བྱིང་བའི་གནས་སྐབས་བཞིན་དུ་རྣལ་འབྱོར་རྣམ་པར་སྤྱོད་པའོ། །ཨ་སྐྱེས་ཞེས་བྱ་བ་ནི། ཨ་ཞེས་བྱ་བ་ལ་སོགས་པའི་ཟླ་བའི་དཀྱིལ་འཁོར་ལའོ། །སྐྱོན་བྲལ་ལ་ཞེས་བྱ་བ་ནི་ཀ་ཞེས་བྱ་བ་ལ་སོགས་པ་ཉི་མའི་དཀྱིལ་འཁོར་ལའོ། །རྡུལ་བྲལ་ཞེས་བྱ་བ་ནི་རྡོ་རྗེ་ལའོ། །སྡིག་བཅོམ་ཞེས་བྱ་བ་ནི་རྡོ་རྗེའི་ང་རྒྱལ་ལའོ། །དཔའ་རླབས་མེད་པའི་རང་བཞིན་ལ། །ཞེས་བྱ་བ་ནི་ཀུན་དུ་བཟང་པོའི་རྣམ་པ་ལ་ལྷ་གནས་པར་བརྗོད་པའོ། །ལྷའི་སྤྲོས་པ་གསུངས་པ། གསང་བ་ལ་ཞེས་བྱ་བ་ལ་སོགས་པ་ལ། དེ་ལ་གསང་བ་ནི་ཆོས་ཀྱི་དབྱིངས་རྣམ་པར་དག་པའི་རང་བཞིན་ཧེ་རུ་ཀའི་དཀྱིལ་འཁོར་འདི་ནི་བསྒྲུབ་པར་བྱ་བའོ། །མཆོག་ནི་འདི་སྐད་དུ་སོ་སོར་རྟོག་པའི་ཡེ་ཤེས་པདྨ་གར་གྱི་དབང་ཕྱུག་གིའོ། །དགྱེས་པ་ཞེས་བྱ་བ་ནི་མཉམ་པ་ཉིད་ཀྱི་ཡེ་ཤེས་ཉིད་དེ་རྡོ་རྗེ་ཉི་མ་ལའོ། །ཐམས་ཅད་བདག་ཉིད་ཅེས་བྱ་བ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་མཚན་ཉིད་དོ། །སངས་རྒྱས་ཀུན་ཁྱབ་ཅེས་བྱ་བ་ནི་རྟ་མཆོག་གིའོ། སེམས་དཔའ་ཞེས་བྱ་བ་ནི་བྱ་བ་ནན་ཏན་ལའོ། །ལྷའི་བདག་པོ་ཞེས་བྱ་བ་ནི་སྐྱེས་བུའི་ཁྱད་པར་གྱི་བྱ་བའོ། །ལྷའི་བདག་པོ་ཞེས་བྱ་བ་ནི་སྐྱེས་བུའི་ཚིག་ལས་གསང་བ་ཞེས་བརྗོད་པ་རྒྱས་པར་གསུངས་པའོ། །ལྔ་ཞེས་བྱ་བ་ལ་སོགས་པ་གསུངས་པ་ནི་མདོར་བསྟན་པའི་རིམ་པའི་རྗེས་སུ་ཡང་ཧེ་རུ་ཀའི་དཀྱིལ་འཁོར་ལ་ལྷའི་རིམ་པ་མཆོག་རྒྱས་པར་གསུངས་པ། དཀར་མོ་ཞེས་བྱ་བ་ལ་སོགས་པ་ནི་དཀྱིལ་འཁོར་གྲུ་བཞི་པ་འཕར་མ་གཅིག་པར་ལྷ་མོ་ལ་སོགས་པའི་ལྷ་མོ་བཞི་པོ་རྣམས་ནི་ཤར་གྱི་སྒོ་ལ་སོགས་པ་སྲུང་བའོ། །པུཀྐ་ལཱི་ལ་སོགས་པ་ནི་དབང་ལྡན་ལ་སོགས་པའི་མཚམས་སུ་ཡང་དག་པར་གནས་པའོ། །དགུའི་བདག་ཉིད་ཀྱི་དཀྱིལ་འཁོར་རོ། །དེ་ལྟར་སྐམ་པ་མ་ལ་སོགས་པ་ནི་སྒོ་སྲུང་མའོ། །མེ་ཏོག་མ་ལ་སོགས་པ་ནི་མཚམས་ཀྱི་ཆ་ལའོ། །དེ་བཞིན་དུ་ཉི་མ་ལ་སོགས་པ་ནི་སྒོ་ལའོ། །ལཱ་སྱ་དང་ཕྲེང་བ་མ་དང་དེ་བཞིན་དུ་གང་མ་དང་གླུ་མ་རྣམས་ནི་
མཚམས་སུའོ། །དེ་བཞིན་དུ་པདྨ་ལ་སོགས་པ་ནི་སྒོར་གནས་པའོ། །གླིང་བུ་མ་དང་པི་ཝང་མ་དང༌། རྫ་རྔ་མ་དང༌། མུ་ཀུནད་རྣམས་ནི་མཚམས་སུ་ཤེས་པའོ། །རྡོ་རྗེ་སྒོ་ལྕགས་མ་ལ་སོགས་པ་ནི་སྒོར་གནས་པའོ། །སྤྱན་དང་མཱ་མ་ཀཱི་དང་གོས་དཀར་མོ་དང་སྒྲོལ་མ་རྣམས་ནི་མཚམས་སུའོ། །གང་དུ་བཤད་པ་ཞེས་བྱ་བ་ནི། སངས་རྒྱས་དཀྱིལ་འཁོར་དཀྱིལ་འཁོར་ཉིད། །རྡོ་རྗེ་ཅན་གྱི་ཟླ་ཕྱེད་མཚུངས། །རྡོ་རྗེ་ཆོས་ཀྱི་པདྨ་འདྲ། །ཉི་མའི་ཡིད་བཞིན་ནོར་བུ་བཞིན། །རྟ་མཆོག་ཅེས་ནི་བྱ་བ་ཡི། །བདེ་གཤེགས་ཀུན་གྱི་གྲུ་གསུམ་མོ། །དེ་ནས་དེ་རྣམས་ཀྱི་སྙིང་པོའི་འཕར་མའི་དགོངས་པས་འདི་རྣམས་ཀྱི་འཕར་མ་གཉིས་པོ་རྣམས་སུ་ཡང་འགྱུར་རོ། །སྐྱེ་འགྲོ་མི་ཟད་མགྲོན་གཉེར་ཕྱིར། །ཞེས་བྱ་བ་ལ། མི་ཟད་པ་ཞེས་བྱ་བ་ནི། །ཐར་པ་ཟད་པ་མེད་པའོ། །མགྲོན་གཉེར་ཕྱིར་ཞེས་བྱ་བ་ནི། །མགྲོན་དུ་གཉེར་བའི་དོན་ཏོ། །མི་ཟད་པ་དེས་བཟའ་བའི་ཕྱིར་འགྲོ་བ་ལ་གུས་པ་དང་བཅས་པའོ། །སྟོང་པ་ཞེས་བྱ་བ་ནི་ཀུན་རྫོབ་ཏུ་ཡང་ཐམས་ཅད་ཉེ་བར་བཤད་པ་དངོས་པོའི་མཚན་ཉིད་དང་བྲལ་བའོ། །ཐབས་ནི་སྟོང་པ་ཉིད་མ་ཡིན། །ཞེས་བྱ་བ་ནི་ལུས་བསྐྱེད་པའི་སྦྱོར་བ་ལས་ཀུན་རྫོབ་ཏུ་ཡང་བརྫུན་པའོ། །བདག་ཞེན་བསམ་པ་ཟློག་པའི་ཕྱིར། །ཞེས་བྱ་བ་ནི་བདག་ལ་མཆོག་ཏུ་འཛིན་པ་དང༌། གང་ཟག་ཏུ་འཛིན་པ་དང༌། ཆོས་སུ་འཛིན་པ་དང༌། ཆོས་ཀྱི་རང་བཞིན་དུ་འཛིན་པ་ཚར་བཅད་པའི་ཕྱིར་ཀུན་རྫོབ་ཏུ་ཐམས་ཅད་རིགས་སོ་ཞེས་བྱ་བར་དགོངས་སོ། །དེ་ནས་ཡང་འདི་ཉིད་དུ་བཤད་པ། སངས་རྒྱས་ཀྱི་ང་རྒྱལ་དུ་དམིགས་ནས་ཆོས་ཀྱི་དབྱིངས་འོད་གསལ་བ་བསྒོམ་པ་ཞེས་བྱ་བ་ལ་སོགས་པ་མཆོད་པའི་ཁྱད་པར་གསུངས་པའོ། །ཡང་རྡོ་རྗེ་ཞེས་བྱ་བ་ལ་སོགས་པ་ལ། དག་པའི་གནས་ཞེས་བྱ་བ་ནི། འཁོར་ལོ་ཆེན་པོ་ལའོ། །གནས་ཆེན་པོ་ཞེས་བྱ་བ་ནི་ལོངས་སྤྱོད་ཀྱི་འཁོར་ལོ་ལའོ། །སངས་རྒྱས་ཀུན་གྱིས་རབ་གང་བ། །ཞེས་བྱ་བ་ནི་ཆོས་ཀྱི་འཁོར་ལོ་ལའོ། །རྡོ་རྗེ་རིན་ཆེན་ཀུན་ཁྱབ་པ། །ཞེས་བྱ་བ་ནི་སྤྲུལ་པའི་འཁོར་ལོ་ལའོ། །ཕན་པའི་གྲོང་ཁྱེར་ཞེས་བྱ་བ་ནི་སྐུའི་འཁོར་ལོ་སྟེ་ལུས་ལའོ། །གསུང་དང་ཐུགས་ངག་ལས་རྣམ་པ་དེ་ལྟར་བྱུང་བའི་རང་བཞིན་
རྒྱས་པར་བསྟན་པའོ། །རྡོ་རྗེ་ལུ་གུ་རྒྱུད་ཅེས་བྱ་བ་ནི་ནང་གི་ཕྱི་རོལ་སངས་རྒྱས་ཐམས་ཅད་ཀྱི་སྒྱུ་མ་ཆེན་པོ་སྟེ་ཕྱི་རོལ་དང་ནང་གི་བསྙེན་པའོ། །དེ་ལྟར། ལྕགས་སྒྲོག་རྡོ་རྗེ་བཅིང་བར་བྱ། །ཞེས་བྱ་བ་ལ་སོགས་པ་ནི་ཉེ་བར་སྒྲུབ་པའོ། །དགའ་ལྡན་དུ་ནི་ལྡེག་པར་འགྱུར། །ཞེས་བྱ་བ་ནི་སྒྲུབ་པའོ། །སངས་རྒྱས་རྣམས་ཀྱི་ཞེས་བྱ་བ་ནི་སྒྲུབ་པ་ཆེན་པོའོ། །དེ་ལྟར་ཡང་འབྲས་བུ་ཐོབ་པར་གསུངས་པའོ། །འདོད་པ་ཐོབ་ཅེས་བྱ་བ་ནི་འདིར་ཡང་བྱང་ཆུབ་སེམས་དཔའ་རྣམས་བླ་ན་མེད་པ་ལ་གནས་པ་གསུངས་པའོ། །བྱམས་པ་ཞེས་བྱ་བ་ལ་སོགས་པ་ནི། ལྕགས་ཀྱུ་མ་ཞེས་བྱ་བ་ལ་སོགས་པས་སྟོབས་ཀྱིས་བསྒྲུབ་པ་གསུངས་པའོ། །འབུམ་ཕྲག་ལྔ་བྲིས་པ་ཞེས་བྱ་བ་ནི་རྡོ་རྗེ་སྙིང་པོ་མངོན་པར་བྱང་ཆུབ་པ་ལ་སོགས་པ་ནི་སྟོང་ཕྲག་སུམ་ཅུས་གར་གྱི་ཁྱད་པར་དང་ལྷན་ཅིག་གསུངས་པའོ། །ཆོས་འབྱུང་ཞེས་བྱ་བ་ལ་སོགས་པ་ནི་རྡོ་རྗེ་བསྒྲུབ་པའི་དམ་ཚིག་གོ །པདྨ་ནི་དེའི་བྷ་ག་སྟེ་དེ་ཉིད་བུད་མེད་དོ། །གྲོལ་བར་འགྱུར་བའི་ཐབས་ཀྱི་གླུ་ཡིས་རྡོ་རྗེ་ཉིད་བསྐྱེད་པའོ། །མཐར་ནི་རྫ་རྔ་ལཱ་སྱེ་སོགས་ཞེས་བྱ་བ་ནི་མཐར་རྡོ་རྗེ་རྫ་རྔ་ལ་སོགས་པས་རྩེ་བའོ། །བདུན་པོ་རྣམ་པར་དག་པར་བྱ། །ཞེས་བྱ་བ་ནི། སངས་རྒྱས་གནས་ནི་རྣམ་རྫོགས་དང༌། །རྣམ་པ་ལྔ་པོ་བསྒོམ་པ་དང༌། །ཀུན་དུ་བཟང་པོའི་རང་བཞིན་དང༌། །རང་གི་ལྷག་པའི་ལྟར་སྒྲུབ་དང༌། །དཀྱིལ་འཁོར་རྣམས་ཀྱི་དགོད་པ་དང༌། །མཆོད་བསྟོད་བདུད་རྩི་ལ་སོགས་པ། །རིམ་པས་རྗེས་སུ་བསྒོམ་པར་བྱ། །རྣལ་འབྱོར་ཡན་ལག་དྲུག་ཏུ་དགོད། །རང་བྱིན་གྱིས་བརླབ་པའི་རིམ་པའི་ཡང་དྲུག་པའོ། །དེ་ཡང་ཕྲ་མོའི་རྣལ་འབྱོར་དུ་བཤད་ན། རང་བྱིན་གྱིས་བརླབ་པའི་རིམ་པ་གཞན་གསུངས་པའོ། །འགུལ་ཞེས་བྱ་བ་ལ་སོགས་པ་ནི་བཏོན་པ་སྟེ། སྟེང་དུ་སྤྱོད་པའི་ཁྱད་པར་དུ་གསུངས་པའོ། །འཕྲལ་དུ་ཞེས་བྱ་བ་ལ་སོགས་པ་ནི་ས་སྤྱོད་མ་ཞེས་བྱ་བ་པ་སོགས་པ་སྟེ། ངེས་པར་ས་སྤྱོད་མ་ནི་གསུང་གི་རྡོ་རྗེ་དང་ཞབས་འོག་གནས་མ་ནི་སྐུ་ཞེས་བཤད་པ་འདི་ཇི་ལྟར་གོང་འོག་འགལ་བར་འགྱུར། །ཞབས་འོག་གནས་མ་ཞེས་འབྲེལ་བའི་ཕྱིར་ས་སྤྱོད་མ་ནི་སྐུ་དང་གསུང་དང་ཐུགས་རྡོ་རྗེ་མ་ཡིན་ཏེ་ངེས་པ་མེད་པར་ཉེ་བར་བསྟན་པའི་
ཕྱིར་རོ། །མཚམས་ཀྱི་ལྷ་མོ་རྣམས་ཀྱི་འབྱུང་བ་བཞིའི་རང་བཞིན་གསུངས་པ། བྱང་སེམས་བུམ་པ་ཞེས་བྱ་བ་ནི། བྱང་ཆུབ་ཅེས་བྱ་བ་ལ་སོགས་པ་སྟེ། ཆུའི་ཁམས་ཀྱི་རང་བཞིན་ནི་རི་ཁྲོད་མའོ། །རི་རབ་ཅེས་བྱ་བ་ནི་སའི་རང་བཞིན་ཏེ་པུཀྐ་སཱིའོ། །མེའི་ཐབ་ཁུང་ཞེས་བྱ་བ་ནི་དྲོད་རྣམ་པར་དག་པ་སྟེ་གདོལ་པ་མོའོ། །རྒྱལ་མཚན་ཆེན་པོ་ཞེས་བྱ་བ་ནི་རླུང་གི་རང་བཞིན་ཏེ་གཡུང་མོའོ། །དཀྱིལ་འཁོར་རྣམས་ཀྱི་རིམ་པ་རྒྱས་པར་བསྟན་པ་ཡང་རི་ཁྲོད་མ་དང༌། པུཀྐ་སཱི་ཡིས་བསྐུལ་ལ་བྱམས་པ་དང་སྙིང་རྗེ་བྱེད་པ་ཉེ་བར་བསྟན་པ་འདིས་དོན་འདི་ཡང་བརྗོད་དོ། །བྱང་སེམས་བུམ་པ་རི་རབ་དང༌། །ཞེས་བྱ་བ་དང༌། པདྨ་དང་ནི་རྒྱལ་མཚན་ཆེ། །ཞེས་བྱ་བ་ནི་ཁུ་བའི་ཕྱིར་རྡོ་རྗེའོ། །དཀྱིལ་འཁོར་རྣམས་ཀྱི་འབྱུང་གནས་ཞེས་བྱ་བ་ནི་ལྷ་རྣམས་ཀྱི་ལུས་ཀྱིས་བསྡུས་པའི་དཀྱིལ་འཁོར་རྣམ་པར་འགྲེལ་པ་གསུངས་པའོ། །བརྒྱད་བརྒྱད་དབུས་སུ་གནས་པའམ། །ཞེས་བྱ་བ་ནི་སོ་སོར་ལྷ་རྣམས་བརྒྱད་པོ་དག་གི་གཙོ་བོ་བྱིན་གྱིས་བརླབ་པ་རྣམས་ཀྱི་བརྒྱད་བརྒྱད་དེ། དེའི་དབུས་སུ་གནས་པའི་དཀྱིལ་འཁོར་གྱི་མཆོག་བསྒོམ་པ་ཞེས་བྱ་བའི་དོན་ཏེ། མཁའ་འགྲོ་མ་རྡོ་རྗེ་གུར་གྱི་དཀྱིལ་འཁོར་ཇི་ལྟ་བར་དང་པོར་བྲིས་ནས་ཀྱང་དེའི་དཀྱིལ་དུ་མཁའ་འགྲོ་མ་རྡོ་རྗེ་གུར་གྱི་དཀྱིལ་འཁོར་དགུའི་བདག་ཉིད་ཅན་ནོ། །དབུས་ཀྱི་དཀྱིལ་འཁོར་གྱི་ཤར་ལ་སོགས་པའི་ཕྱོགས་རྣམས་སུ་རྣམ་པར་སྣང་མཛད་དང༌། རྡོ་རྗེ་ཉི་མ་དང༌། པདྨ་གར་གྱི་དབང་ཕྱུག་དང༌། རྟ་མཆོག་གི་དཀྱིལ་འཁོར་རྣམས་ནི་སོ་སོ་དགུའི་བདག་ཉིད་ཅན་རྣམས་ཏེ། དེ་ལྟར་བལྟས་ནས་གང་ཞིག་བདག་པོར་འདོད་པ་དེའི་དཀྱིལ་འཁོར་བྲིས་ནས། དེའི་དཀྱིལ་འཁོར་དེ་ཉིད་ཀྱི་དཀྱིལ་འཁོར་རོ། །ཤར་ལ་སོགས་པའི་ཕྱོགས་སུ་དེ་རྣམས་ཀྱི་དཀྱིལ་འཁོར་བྲི་བར་བྱའོ། །ཡང་ན་ཉི་ཤུ་རྩ་ལྔ་རུ། །ཞེས་བྱ་བ་ནི། གང་གི་ཚེ་དཀྱིལ་འཁོར་འདི་རྣམས་འཕར་མ་གཉིས་པ་རྣམས་སུ་འདོད་པ་དེའི་ཚེ་དཀྱིལ་འཁོར་འཕར་མ་གཉིས་པོ་བྲིས་ནས། དེའི་དབུས་ཀྱི་འཕར་མ་ལ་དེ་ཉིད་ཀྱི་ལྔའི་བདག་ཉིད་ཅན་གྱི་དབུས་ཀྱི་འཕར་མ་ལའོ། །དེའི་ཤར་ལ་སོགས་པའི་ཕྱོགས་སུ་གཞན་རྣམས་ཀྱི་སྙིང་པོའི་འཕར་མ་རྣམས་སོ་སོར་ལྔའི་བདག་ཉིད་ཅན་རྣམས་སོ། །ལྷ་ཉི་ཤུ་རྩ་ལྔའི་དཀྱིལ་
འཁོར་ལས་གཞན་པར་གྱུར་པ་གཉིས་པོ་དག་ལ་ཡང་གཞན་དག་ཧེ་རུ་ཀའི་དཀྱིལ་འཁོར་དགུའི་བདག་ཉིད་ཅན་དང༌། བདག་མེད་མའི་དཀྱིལ་འཁོར་ཡང་བཅུ་གསུམ་གྱི་བདག་ཉིད་ཀྱི་གསུངས་སོ། །བསྡུས་པའི་དཀྱིལ་འཁོར་གཉིས་པོ་དག་ལ་དཀྱིལ་འཁོར་གཉིས་པོ་དག་གི་གནས་སུ་དཀྱིལ་འཁོར་གྱི་སྒོ་སྲུང་དགོད་པར་བྱ་བ་གསུངས། སྒོ་སྲུང་རྣམས་ནི་ཞེས་བྱ་བ་ལ་སོགས་པའོ། །གླང་པོ་ལ་སོགས་རབ་ཏུ་གྲགས། །ཞེས་བྱ་བ་ནི་གོང་དུ་གསུངས་པའི་ཧེ་རུ་ཀའི་ཕྱག་མཚན་རྣམས་སོ། །ནམ་མཁའི་ཁམས་ཞེས་བྱ་བ་ནི་ཆོས་ཀྱི་འབྱུང་གནས་ཏེ། དེའི་མཁའ་ནི་ནམ་མཁའ་ཉིད་དོ། །དེའི་རང་བཞིན་ནི་ཐར་པ་མཆོག་གི་གནས་ཏེ། ཁྲག་དང་ཁུ་བས་ཁྱབ་པའི་ལུས། །ཞེས་བྱ་བ་ནི་ཉེ་བར་མཚོན་པ་ཙམ་མོ། །གཞན་རྣམས་ཀྱི་ཡང་དྲི་མ་རྣམས་འབྱུང་བའི་ཕྱིར་སྐྱོན་གྱི་ཁམས་སོ། །དེ་བཞིན་དུ་གཟུགས་མེད་པའི་ཁམས་མ་བྱུང་བའི་ཕྱིར་དེ་ཡང་འབྱུང་ངོ༌། །གལ་ཏེ་ཡང་ཁམས་གསུམ་གྱི་འབྱུང་བ་སྤངས་ནས། ས་དང་ས་འོག་པར་སྣང་ཞེས་བྱ་བ་ནི། འདིར་གནས་རྣམས་གསུངས་པའོ། །ཇི་ལྟར་རླུང་གིས་དཀྲུགས་པའི་སེམས་ཅན་རྣམས་ཀྱི་ཞེས་བྱ་བ་ནི་འཇིག་རྟེན་གྱི་གྲགས་པར་གསུངས་པ་སྟེ། བསྟན་བཅོས་ཀྱི་གྲགས་པ་ནི་མ་ཡིན་ནོ་ཤིན་ཏུ་བཞིན་མཛེས་ཞེས་བྱ་བ་ལ་སོགས་པ་དང༌། པདྨ་མེ་ཏོག་ཡང་དག་ལྡན། །ཞེས་བྱ་བ་ནི་པདྨ་དང༌། མེ་ཏོག་གིས་ཡང་དག་པར་ལྡན་པ་ཞེས་བྱ་བ་གསང་བའི་དབང་ཅུང་ཟད་གསུངས་སོ། །པདྨ་དམར་པོ་ཞེས་བྱ་བ་ལ་སོགས་པ་ནི་ཤེས་རབ་ཡེ་ཤེས་གསུངས་པའོ། །འཕགས་པ་མཁའ་འགྲོ་མ་རྡོ་རྗེ་གུང་ཞེས་བྱ་བའི་རྒྱུད་ཀྱི་རྒྱལ་པོ་ཆེན་པོའི་བརྟག་པའི་བཤད་སྦྱར་སློབ་དཔོན་ཆེན་པོ་ནག་པོ་ཞབས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་ག་ཡ་དྷ་རའི་ཞལ་སྔ་ནས་དང༌། བོད་ཀྱི་ལོ་ཙཱ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།