ལེའུ་གསུམ་པའི་རྣམ་པར་བཤད་པ།
རྡོ་རྗེ་དྲ་བའི་ཏིང་འཛིན་གནས། །ཞེས་བྱ་བ་ནི་དགྱེས་པའི་རྡོ་རྗེའི་ཏིང་ངེ་འཛིན་དུ་གནས་པའོ། །འབྱུང་པོ་ཆེན་པོའི་གཏོར་མ་བྱ། །ཞེས་བྱ་བ་ནི་འབྱུང་པོ་ཆེན་པོ་རྣམས་ཚིམ་པར་བྱ་བའི་གཏོར་མའི་མཆོད་པ་ཉེ་བར་སྤྱོད་པ་དང་བཅས་པའོ། །དེ་སྐད་དུ་ཡང༌། ཡན་ལག་རྒྱན་ཀུན་གྱིས་བརྒྱན་ཞིང༌། །རྡོ་རྗེ་རྒྱན་གྱིས་མཛེས་བྱས་ལ། །རྡོ་རྗེ་དྲིལ་བུ་བཟུང་ནས་སུ། །ལམ་གྱི་བཞི་མདོར་གཏོར་མ་གཏང༌། །མེ་ཏོག་སྤོས་དང་མར་མེ་དང༌། །དྲི་ཡི་དུང་སོགས་གཡས་སུ་གཞག །གཡོན་དུ་སྔགས་ཀྱི་མཆོད་ཡོན་སྣོད། །སྣོད་གཞན་མདུན་དུ་བཞག་ནས་ནི། །སྔོན་དུ་ཞལ་བསིལ་ཆོ་ག་ཡིས། །མེ་ཏོག་ལ་སོགས་རིམ་བཞིན་དབུལ། །མེ་ཏོག་མཆོད་སོགས་བྱས་ནས་སུ། །བཟང་པོའི་སྣོད་དུ་དབུལ་བར་བྱ། །མེ་ཏོག་ཚུལ་དུ་བསྐྱོད་པ་དང༌། །བདུག་པའི་ཚུལ་དུ་བསྐྱོད་པ་དང༌། །མར་མེ་འདེགས་པའི་ཚུལ་དང་ནི། །དྲི་ཡི་ཚུལ་དུ་བྱུག་པར་བྱ། །རོལ་བའི་ལག་པས་སྒེག་པ་དང༌། །ཕྲེང་ཚུལ་མཁའ་འགྲོ་ཕྲེང་བ་མ། །ཧཱུཾ་ཞེས་བྱ་བས་གླུ་བླང་ཞིང༌། །གར་ལ་པུས་མོས་དགུག་པར་བྱ། །འདི་དག་བླ་མེད་མཆོད་པ་སྟེ། །སངས་རྒྱས་རྣམས་ནི་མཉེས་མཛད་པའོ། །ནམ་མཁའི་ཁམས་ཀྱི་དབུས་གནས་པར། །ཞེས་བྱ་བ་ནི་ཆོས་ཀྱི་འབྱུང་གནས་ཀྱི་ནང་དུ་སོན་པའོ། །པདྨ་ཞེས་བྱ་བ་ནི་པདྨ་དམར་པོ་འདབ་མ་བརྒྱད་པའོ། །བསྒོམ་བྱ་ཞེས་བྱ་བ་ནི་སྟོང་པ་ཉིད་བསྒོམ་པའི་རྗེས་ལའོ། །ཧཱུཾ་ལས་ཞེས་བྱ་བ་ནི་ཧཱུཾ་རྣམས་ལས་ཏེ། ཕྱོགས་དང་ཕྱོགས་མཚམས་ཀྱི་འདབ་མ་རྣམས་སུ་བརྒྱ་བྱིན་ལ་སོགས་པ་ཁ་དོག་སྔོན་པོར་བྱའོ། །དེ་བཞིན་དུ་ཚངས་པ་ལ་སོགས་པ་རྣམས་ནི་སྟེང་དུ་ཨོཾ་དེ་རྣམས་ལས་ཏེ་ཁ་དོག་དཀར་པོར་བྱའོ། །ཀླུ་ལ་སོགས་པས་ས་འོག་རྣམས་ནི་ཨཱཿ་རྣམས་ལས་ཏེ། ཁ་དོག་དམར་པོར་བྱའོ། །ཐམས་
ཅད་ཀྱང་རྡོ་རྗེ་དྲིལ་བུ་ཐོགས་ཤིང་རང་གི་རིག་མས་འཁྱུད་པའོ། །གཡས་བརྐྱང་བའི་ཞབས་ཀྱིས་གདན་ལ་ཞེས་བྱ་བ་ནི་སྣ་ཚོགས་པདྨ་དང་ཉི་མ་ལའོ། །ཚངས་པ་ལ་སོགས་པ་བརྟག་པ་ཞེས་བྱ་བ་ནི་རྣམ་པར་སྣང་མཛད་དོ། །དབང་པོ་ལ་སོགས་རྡོ་རྗེ་ཞེས་བྱ་བ་ནི་མི་བསྐྱོད་པའོ། །ཀརྐོཊ་ལ་སོགས་པ་གར་གྱི་དབང་ཕྱུག་ཅེས་བྱ་བ་ནི་སྣང་བ་མཐའ་ཡས་སོ། །ཐམས་ཅད་རིགས་ནི་གསུམ་ལས་སྐྱེས། །ཞེས་བྱ་བ་ནི་གཏི་མུག་དང་ཞེ་སྡང་དང་འདོད་ཆགས་ཀྱི་རང་བཞིན་ཡི་གེ་གསུམ་ལས་བྱུང་བའོ། །གཽ་རཱི་ཡིས་ནི་དགུག་པར་བྱ། །ཞེས་བྱ་བ་ནི་དམ་ཚིག་འཁོར་ལོ་བསྐྱེད་པ་ལས་ཡེ་ཤེས་ཀྱི་འཁོར་ལོ་གཽ་རཱིའི་ལྕགས་ཀྱུས་དགུག་པའོ། །ཙཽ་རཱིའི་ཞབས་པས་བཅུག་ནས་ནི། །ཞེས་བྱ་བ་ལ་སོགས་པ་ནི་གོ་སླའོ། །དེ་ནས་མཆོད་ཡོན་ཞབས་བསིལ་ནས། །སྔགས་འདི་ཡིས་ནི་ཚིམ་པར་བྱ། །ཞེས་བྱ་བའི་མཆོད་ཡོན་དང་ཞབས་བསིལ་ནི་ཉེ་བར་མཚོན་པ་ཙམ་སྟེ། མཆོད་པ་དང་བསྟོད་པ་བྱས་ལ། །ཨོཾ་ལ་སོགས་པའི་ཡི་གེ་གསུམ་གྱིས་སྦྱང་བ་དང༌། བཙོ་བ་ལ་སོགས་པས་བདུད་རྩིར་བྱས་ལ་ཚིམ་པར་བྱ་སྟེ་ཞི་བ་ལ་སོགས་པ་ལ་ནི་རྡོ་རྗེ་དཀར་པོ་ལ་སོགས་པས་བརྒྱན་པའི་ཞལ་དུ་ཅུང་ཟད་ཕྱེ་བར་དབུལ་ལོ། །གསོད་པ་ལ་སོགས་པ་ལ་ནི་ཁྲོ་བོའི་རྡོ་རྗེས་བརྒྱན་པའི་ཞལ་གདངས་པར་རོ། །ལྷག་མ་ནི་གོ་སླའོ། །དེ་ནས་ཞེས་བྱ་བ་ལ་སོགས་པ་གཞུང་གི་ཚིག་སྣ་ཚོགས་ལ་རྡོ་རྗེའི་མིང་རྣམས་དཀྲུགས་པ་ཉིད་དུ་སྣང་སྟེ། དེ་རྣམས་འདིར་རིམ་པ་བཞིན་དུ་བསྡེབས་ལ་བརྗོད་པར་བྱའོ། །དེ་ལ་རྡོ་རྗེ་བཞད་པ་དང༌། རྡོ་རྗེ་རྣམ་པར་རོལ་པ་དང༌། རྡོ་རྗེ་འགྱིང་བ་དང༌། །རྡོ་རྗེ་ཨ་ལ་ལ་རྣམས་ནི་ཞེ་སྡང་གི་རིགས་སོ། །རྡོ་རྗེ་ཡེ་ཤེས་དང༌། །རྡོ་རྗེ་འབེབས་པ་དང༌། རྡོ་རྗེ་ཕ་རོལ་ཏུ་ཕྱིན་པ་རྣམས་ནི་གཏི་མུག་གི་རིགས་ཀྱིའོ། །རྡོ་རྗེ་མྱུ་གུ་དང༌། རྡོ་རྗེ་པདྨ་དང༌། རྡོ་རྗེ་པདྨའི་མྱུ་གུ་དང༌། རྡོ་རྗེ་ཀུན་དུ་གཟིགས་པ་དང༌། རྡོ་རྗེ་འདོད་ཆགས་རྣམས་ནི་འདོད་ཆགས་རིགས་ཀྱིའོ། །རྡོ་རྗེ་ཡིད་བཞིན་ནོར་བུ་དང༌། རྡོ་རྗེ་ཡན་ལག་མེད་པ་དང༌། རྡོ་རྗེ་མཆོག་ཏུ་དགའ་བ་དང༌། རྡོ་རྗེ་དགའ་བའི་བདེ་བ་དང༌། རྡོ་རྗེ་དགའ་བ་རྣམས་ནི་རིན་པོ་ཆེའི་རིགས་ཀྱིའོ། །རྡོ་རྗེ་ཤེས་རབ་དང༌། །རྡོ་རྗེ་
ཤེས་རབ་མྱུ་གུ་དང༌། རྡོ་རྗེ་སྙིང་རྗེ་མྱུ་གུ་དང༌། རྡོ་རྗེ་ནམ་མཁའ་རྣམས་ནི་དམ་ཚིག་གི་རིགས་སོ། །མཁའ་འགྲོ་མ་རྣམས་ཀྱི་བརྗོད་པར་བྱ་སྟེ། རྡོ་རྗེ་སྙིང་པོ་དང༌། རྡོ་རྗེ་མཚོན་ཆ་དང༌། རྡོ་རྗེ་ཨེ་མ་བདེ་བ་དང༌། རྡོ་རྗེ་བདག་མེད་མ་དང༌། རྡོ་རྗེ་ལག་པ་རྣམས་ནི་ཞེ་སྡང་གི་རིགས་ཀྱིའོ། །རྡོ་རྗེ་སྤྱན་མ་དང༌། རྡོ་རྗེ་མཁའ་འགྲོ་མ་དང༌། རྡོ་རྗེ་སེར་སྐྱ་མ་དང༌། རྡོ་རྗེ་སྒྱུ་འཕྲུལ་རྣམས་ནི་གཏི་མུག་གི་རིགས་ཀྱིའོ། །རྡོ་རྗེ་འབར་མ་དང༌། རྡོ་རྗེ་ལྕུག་མ་དང༌། རྡོ་རྗེ་འབེབས་མ་དང༌། རྡོ་རྗེ་རོ་ལངས་མ་དང༌། རྡོ་རྗེ་ལྕགས་ཀྱུ་མ་དང༌། རྡོ་རྗེ་ཕྲེང་བ་མ་རྣམས་ནི་རིན་པོ་ཆེའི་རིགས་ཀྱིའོ། །རྡོ་རྗེ་ཕྲེང་བ་མ་དང༌། རྡོ་རྗེ་སྒེག་མོ་དང༌། རྡོ་རྗེ་བཞད་པ་མ་དང༌། རྡོ་རྗེ་ཀུན་དུ་འཁྱུད་མ་དང༌། རྡོ་རྗེ་རྒྱས་མ་དང༌། རྡོ་རྗེ་པདྨ་དང༌། རྡོ་རྗེ་ཆགས་པ་མ་རྣམས་ནི་འདོད་ཆགས་ཀྱི་རིགས་ཀྱིའོ། །རྡོ་རྗེ་འབྱུང་མ་དང༌། རྡོ་རྗེ་དགོད་མ་དང༌། རྡོ་རྗེ་སྒྲོལ་མ་དང༌། རྡོ་རྗེ་རྣམ་པར་རོལ་མ་དང༌། རྡོ་རྗེ་བློ་གྲོས་དང༌། རྡོ་རྗེ་ཀིང་ཀ་མ་དང༌། རྡོ་རྗེ་ཁ་ཆུ་མ་དང༌། རྡོ་རྗེ་དབུགས་དབྱུང་མ་རྣམས་ནི་དམ་ཚིག་གི་རིགས་ཀྱིའོ། །འདོད་ཆགས་ཞེས་བྱ་བ་ལ་སོགས་པ་ལ། འདོད་ཆགས་ནི་སྙིང་རྗེ་ཆེན་པོའོ། །ཞེ་སྡང་ནི་གཉིས་མི་ཟད་པའོ། །གཏི་མུག་ནི་གཉིས་སུ་མི་ཤེས་པའོ། །ཀུན་དུ་དམ་ཚིག་ཅེས་བྱ་བ་ནི་ཀུན་དུ་རྣམ་པར་སྤྲུལ་པའོ། །སེམས་དཔའ་ཞེས་བྱ་བ་ནི་དངོས་པོ་གསུམ་གཅིག་ཏུ་གྱུར་པ་སྟེ། ཤིན་ཏུ་རྣམ་པར་དག་པའི་དབྱིངས་སོ། །ནོར་བུ་ཞེས་བྱ་བ་ནི་སངས་རྒྱས་ཐམས་ཅད་མཉམ་པ་ཉིད་ཀྱི་ཁྱད་པར་དུ་འཕགས་པའོ། །དེས་ནི་རིགས་དྲུག་གོ །རིགས་ལྔ་དང་གཅིག་སྟེ། གཞན་བྱང་ཆུབ་སེམས་དཔའ་རྣམས་ཀྱི་རིགས་ལྔའོ། །འདོད་པ་ཞེས་བྱ་བ་ནི་འདོད་ཆགས་དང་ཞེ་སྡང་དང༌། གཏི་མུག་དང་ལྡན་པའི་སེམས་སོ། །མཁའ་འགྲོ་མ་རྡོ་རྗེ་དྲ་བའི་དཀའ་འགྲེལ་དེ་ཁོ་ན་ཉིད་རྒྱས་པ་ལས་ལེའུ་གསུམ་པའི་རྣམ་པར་བཤད་པའོ།། །།