རྒྱུད་ལ་འཇུག་པ་བསྟན་པ།
རྒྱ་གར་སྐད་དུ། ཤྲཱི་སཾ་པུ་ཊི་ཏི་ལ་ཀཱ་ནཱ་མ་ཡོ་གཱི་ནཱི་ཏནྟྲ་རཱ་ཛ་སྱ་ཊཱི་ཀཱ་སྨྲྀ་ཏི་སཾ་དཪྴ་ནཱ་ལོ་ཀ་ནཱ་མ། བོད་སྐད་དུ། དཔལ་ཁ་སྦྱོར་ཐིག་ལེ་ཞེས་བྱ་བ་རྣལ་འབྱོར་མའི་རྒྱུད་ཀྱི་རྒྱལ་པོའི་རྒྱ་ཆེར་འགྲེལ་པ་ཡང་དག་པར་ལྟ་བའི་དྲན་པའི་སྣང་བ་ཞེས་བྱ་བ། བྱང་ཆུབ་སེམས་དཔའ་སེམས་དཔའ་ཆེན་པོ་པདྨ་དཀར་པོ་ལ་ཕྱག་འཚལ་ལོ། །སྐྱེ་བ་དང་ནི་འཇིག་པ་ཡི། །གཟུགས་ནི་མ་ལུས་པ་རྣམས་ནི། །གཉི་ག་སྡང་ཕྱིར་ཐིག་ལེ་ནི། །བདེ་ཆེན་དེ་ལ་ཕྱག་འཚལ་ལོ། །ཕྱག་རྒྱ་ཆེན་པོ་ཞེས་བྱ་ལས། །རང་གི་སྤྱོད་པ་སྟོན་བྱེད་པ། །སྟོང་པ་སྙིང་རྗེ་དབྱེར་མེད་པ། །མཆོག་ཏུ་རྟག་པ་དེ་ཕྱག་འཚལ། །འདོད་ཆགས་མེ་ཡི་རྒྱ་མཚོ་ལས། །ཕ་རོལ་དུ་ནི་འགྲོ་ནུས་པ། །བླ་མའི་ཞབས་ལ་སྤྱི་བོ་ཡིས། །ཕྱག་འཚལ་འཇིགས་པའི་དབང་གིས་ཏེ། །རྣལ་འབྱོར་རྣལ་འབྱོར་མ་ཕུན་ཚོགས། །རྒྱུད་འདི་རྟེན་དང་བརྟེན་པ་ལས། །མཚན་མ་ཐོབ་ནས་སྦྱོར་བ་ནི། །ཡང་དག་ལྟ་བའི་དྲན་སྣང་བ། །བསྟན་པའི་ཚིག་གི་སྦྱོར་བ་ཡིས། །སྐལ་ལྡན་སེམས་ཅན་དོན་ཕྱིར་རོ། །བྱིས་བ་མཁས་པར་མངོན་རྒྱལ་ཅན། །རྣམས་ལ་བསྟན་པ་ཉིད་མི་སྦྱར། །གལ་ཏེ་ཤེས་རབ་འཆལ་སྟོན་བྱེད། །མཁའ་འགྲོ་མ་སོགས་ཉེར་གཙེས་ཏེ། །སེམས་ནི་འཁྲུགས་པར་དུ་འབོད་དམ། །མནར་མེད་ལ་སོགས་པར་ནི་འགྲོ། །དེ་ཕྱིར་བླ་གུས་སེར་སྣ་མེད། །དབང་པོ་ཐུལ་ཞིང་དབང་བསྐུར་བ། །བརྟན་ཞིང་ཡང་དག་ལམ་སྨྲ་བྱེད། །འདི་ནི་ཐེག་པ་ཆེན་པོའི་སྣོད། །རྒྱལ་བའི་བཀའ་རྣམས་རབ་སྐྱོང་བྱེད། །ཡང་དག་སྦྱིན་ལ་རྟག་ཆགས་ཤིང༌། །བདག་ཉིད་དམ་ནི་གཞན་དག་ནི། །འཇུག་ཅིང་འདི་ནི་སྟོན་བྱེད་ལའོ། །འདིར་ངེས་པར་བརྗོད་པ་དང༌། བརྗོད་པར་བྱ་བ་དང༌། འབྲེལ་པ་དང༌། དགོས་པ་དང༌། དགོས་པའི་དགོས་པ་སྔོན་དུ་འགྲོ་བ་མངོན་པར་བལྟ་སྟེ། འདིར་རེ་ཞིག་རྣལ་འབྱོར་དང་རྣལ་འབྱོར་མའི་རྒྱུད་རྒྱས་པ་འབུམ་ཕྲག་སུམ་ཅུ་རྩ་དྲུག་ལས་བྱུང་བ་རྒྱུད་ཉུང་དུ་བརྟག་པ་བཅུ་གཅིག་གི་བདག་ཉིད་ཅན་ཁ་སྦྱོར་ཐིག་ལེ་ཞེས་བྱ་བ་ནི་རྗོད་པར་བྱེད་པ་དང༌། དེ་ལས་རྒྱུ་དང་འབྲས་བུ་སྔོན་དུ་འགྲོ་བའི་ཕྱིར་གཞུང་གི་ཚོགས་ནི་བརྗོད་པར་བྱ་བའོ། །
སྨྲ་བྱ་དང་སྨྲ་བྱེད་ཀྱི་མཚན་ཉིད་ལ་འབྲས་བུ་ཉེ་བར་བརྟག་པའི་ཕྱིར་འབྲེལ་བའོ། །ཕྱི་མ་ལས་ཕྱི་མའི་དབང་བྱིན་པ་ནི་དགོས་པའོ། །ལས་ཀྱི་ཚོགས་ཀྱི་རིགས་པ་དང༌། བསྐྱེད་བྱ་དང༌། སྐྱེད་བྱེད་ཀྱི་འབྲེལ་པ་དང༌། དཀྱིལ་འཁོར་གྱི་འཁོར་ལོ་ཁོང་དུ་ཆུད་པ་དང༌། ཡན་ལག་བཅུ་གཉིས་སྤངས་པ་དང༌། །བསོད་ནམས་དང་ཡེ་ཤེས་ཀྱི་ཚོགས་གཉིས་ཀྱིས་ཕྱག་རྒྱ་ཆེན་པོ་ཐོབ་པ་ནི་དགོས་པའི་དགོས་པར་བསྟན་པའོ། །འདི་ནི་བསྡུས་པའི་དོན་ཏོ། །འདི་ཉིད་ཀྱི་བཤད་པ་ནི་རྒྱས་པའི་རྒྱུད་ཀྱི་རིགས་པས་གསུངས་སོ། །ད་ནི་བརྗོད་པར་བྱ་བ་བརྗོད་དེ་གདུལ་བྱའི་སྐྱེ་བོ་ངེས་པ་དང་བྲལ་བ་རྣམས་ཀྱི་རང་གི་སེམས་ཀྱི་བསམ་པ་ཉིད་ཀྱིས་ཚེ་འདི་ལ་སངས་རྒྱས་ཉིད་ཀྱི་འབྲས་བུ་རབ་ཏུ་སྟེར་བ་ཕྱག་རྒྱ་ཆེན་པོའི་བདེ་བའི་གནས་རྡོ་རྗེ་སེམས་དཔས་གསུངས་པའི་རྒྱུད་ཀྱི་རྒྱལ་པོའི་དཀྱིལ་འཁོར་ཆེན་པོའི་སྦྱོར་བས་བསྒྲུབ་བྱ་དང༌། སྒྲུབ་པ་དང༌། སྒྲུབ་པ་པོ་རབ་ཏུ་སྟོན་པར་བྱེད་པ། འཇིག་རྟེན་པ་དང༌། འཇིག་རྟེན་ལས་འདས་པའི་བདེན་པ་ལ་བརྟེན་པ། མངོན་པར་བྱང་ཆུབ་པ་བཞི་དང༌། རྡོ་རྗེ་བཞིས་ཡོངས་སུ་དག་པ། རིགས་བཞི་དང༌། རིགས་དྲུག་ལ་སོགས་པ་མཐའ་མེད་པའི་མཐར་ཐུག་པ་དང༌། བདེན་པ་བཅུ་གཉིས་དང༌། དེ་ཁོ་ན་ཉིད་བཅུ་དྲུག་དང༌། སྟོང་པ་ཉིད་བཅུ་དྲུག་དང༌། སྙིང་རྗེ་བཅུ་དྲུག་དང༌། མངོན་པར་བྱང་ཆུབ་པ་རྣམ་པ་ཉིད་ཤུའི་བདག་ཉིད་ཅན་དུས་ལྔ་དང་ལྡན་པ་འདི་ནི་བརྗོད་པར་བྱ་བར་བསྟན་ཏོ། །དེ་ལྟར་ཡང་བཅོམ་ལྡན་འདས་ཀྱིས་སྒྱུ་འཕྲུལ་དྲ་བ་ལས་གསུངས་པ། རྣམ་པ་བཅུ་གཉིས་བདེན་པའི་དོན། །རྣམ་པ་བཅུ་དྲུག་དེ་ཉིད་རིག །རྣམ་པ་ཉི་ཤུ་མངོན་བྱང་ཆུབ། །རྣམ་པར་སངས་རྒྱས་ཐམས་ཅད་རིག །ཅེས་པ་འདིས་སྔགས་ཀྱི་ཐེག་པས་འཁྱུད་པའི་དབང་པོར་བསྟན་ཏོ། །འདིའི་གཞུང་གི་ཚོགས་བརྟག་པ་བཅུ་གཅིག་གི་བདག་ཉིད་བ་སྦྱོར་ཐིག་ལེ་ཡང་རྗོད་པར་བྱེད་པའོ། །དེ་ཡང་ཡང་བརྟག་པ་བཅུ་གཅིག་གི་རང་བཞིན་འདི་བཅོམ་ལྡན་འདས་རྡོ་རྗེ་སེམས་དཔར་ཀུན་དུ་གནས་ཏེ། དང་པོ་རེ་ཞིག་རྒྱུད་ཐམས་ཅད་གསང་བའི་རང་བཞིན་དུ་ཀུན་དུ་གནས་སོ། །རྗོད་པར་བྱེད་པ་དང༌། བརྗོད་པར་བྱ་བ་དང༌། བྱང་ཆུབ་ཏུ་སེམས་བསྐྱེད་པ་རྣམ་པར་
བསྒོམ་པའི་རྟོག་པའི་རང་བཞིན་དེ་ཀུན་དུ་གནས་སོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་བྲི་བའི་རྟོག་པའི་རང་བཞིན་དེ་ཀུན་དུ་གནས་སོ། །རྡོ་རྗེ་མཁའ་འགྲོ་མའི་བརྡའི་རྟོག་པའི་རང་བཞིན་དེ་ཀུན་དུ་གནས་སོ། །སྤྱོད་པའི་རྟོག་པའི་རང་བཞིན་དེ་ཀུན་དུ་གནས་སོ། །དཔྱིད་ཀྱི་ཐིག་ལེ་ཞེས་པའི་རྟོག་པའི་རང་བཞིན་དེ་ཀུན་དུ་གནས་སོ། །ལས་ཐམས་ཅད་དང་བསམ་གཏན་འབྱུང་བ་ཞེས་པའི་རྟོག་པའི་རང་བཞིན་དེ་ཀུན་དུ་གནས་སོ། །བྱ་བ་ཐམས་ཅད་ཡང་དག་པར་འབྱུང་བའི་རྟོག་པའི་རང་བཞིན་དེ་ཀུན་དུ་གནས་སོ། །བྱ་བའི་དེ་ཁོ་ན་ཉིད་ཀྱི་རྒྱལ་པོའི་རྟོག་པའི་རང་བཞིན་དེ་ཀུན་དུ་གནས་སོ། །རྒྱུད་ཐམས་ཅད་ཀྱི་གླེང་གཞིའི་རྟོག་པའི་རྒྱལ་པོའི་རང་བཞིན་དེ་ཀུན་དུ་གནས་སོ། །རྟོག་པ་ཐམས་ཅད་ཀྱི་གླེང་གཞི་ཐིག་ལེ་ཐབས་སྣ་ཚོགས་ཀྱི་རང་བཞིན་དེ་ཀུན་དུ་གནས་སོ། །འདི་ནི་བརྗོད་པར་བྱ་བའོ། །འདིའི་མིང་བརྗོད་པས་རྗོད་པར་བྱེད་པ་དང༌། བརྗོད་པར་བྱ་བ་དག་གི་སྨྲ་བྱ་དང༌། སྨྲ་བྱེད་ཀྱི་མཚན་ཉིད་རབ་ཏུ་བྱེད་པ་སུམ་ཅུའི་བདག་ཉིད་ནི་འབྲེལ་བའོ། །འདི་ལྟ་སྟེ། དང་པོ་རེ་ཞིག་རྗོད་པར་བྱེད་པ་དང༌། བརྗོད་པར་བྱ་བ་དང༌། བྱང་ཆུབ་ཏུ་སེམས་བསྐྱེད་པ་ལ་སོགས་པའི་རང་བཞིན་གྱི་དངོས་པོས་དང༌། བྱང་ཆུབ་སེམས་ལ་འཇུག་པའི་རང་བཞིན་གྱི་དངོས་པོས་དང༌། དེ་ཁོ་ན་ཉིད་མན་ངག་གི་རང་བཞིན་གྱི་དངོས་པོས་དང༌། བྱང་ཆུབ་སེམས་ཀྱི་དབང་གི་རང་བཞིན་གྱི་དངོས་པོས་དང༌། ཤེས་རབ་དང་ཐབས་ཀྱི་དོན་བསྒོམ་པའི་རང་བཞིན་གྱིས་དངོས་པོས་དང༌། འཁོར་ལོ་ཐམས་ཅད་ཀྱི་རྣམ་འཕྲུལ་གྱི་རང་བཞིན་གྱི་དངོས་པོས་དང༌། ཧེ་རུ་ཀ་བསྐྱེད་པའི་རང་བཞིན་གྱི་དངོས་པོས་དང༌། ཡེ་ཤེས་མཁའ་འགྲོ་མའི་སྒྲུབ་ཐབས་ཀྱི་རང་བཞིན་གྱི་དངོས་པོས་དང༌། བདག་མེད་པའི་སྒྲུབ་ཐབས་ཀྱི་རང་བཞིན་གྱི་དངོས་པོས་དང༌། ངག་གི་བརྡའི་ཡི་གེའི་མཚན་ཉིད་ཀྱི་རང་བཞིན་གྱི་དངོས་པོས་དང༌། ལུས་སྲུལ་པོའི་མཚན་མ་དང་ཕྱག་རྒྱའི་རང་བཞིན་གྱི་དངོས་པོས་དང༌། ལཱ་མའི་མཚན་ཉིད་ཀྱི་མཚན་མ་དང༌། ཕྱག་རྒྱའི་རང་བཞིན་གྱི་དངོས་པོས་དང༌། འདུས་པའི་གནས་ཀྱི་རང་བཞིན་གྱི་དངོས་པོས་དང༌། ཕུང་པོ་དང་ཁམས་དང་སྐྱེ་མཆེད་ཀྱི་རྣམ་པར་དག་པའི་རང་བཞིན་གྱི་
དངོས་པོས་དང༌། སྤྱོད་པ་དང་ལྡན་པའི་རང་བཞིན་གྱི་དངོས་པོས་དང༌། ཡི་གེ་བཅུ་དྲུག་མཚོན་བྱ་དང༌། མཚོན་བྱེད་ཀྱི་རང་བཞིན་གྱི་དངོས་པོས་དང༌། རྩ་བའི་གནས་དགོད་པའི་རང་བཞིན་གྱི་དངོས་པོས་དང༌། ལུས་ཀྱི་དཀྱིལ་འཁོར་དང༌། སྦྱིན་སྲེག་གི་རང་བཞིན་གྱི་དངོས་པོས་དང༌། ཐམས་ཅད་མཁྱེན་པའི་ཡེ་ཤེས་འབྱུང་བའི་རང་བཞིན་གྱི་དངོས་པོས་དང༌། སྦྱིན་སྲེག་གི་ཆོ་གའི་རང་བཞིན་གྱི་དངོས་པོས་དང༌། ལས་ཚོགས་ཐམས་ཅད་དང༌། འཁོར་ལོ་འབྱུང་བའི་རང་བཞིན་གྱི་དངོས་པོས་དང༌། དྲིལ་བའི་དེ་ཁོ་ན་ཉིད་ཀྱི་རང་བཞིན་གྱི་དངོས་པོས་དང༌། སྔགས་ཀྱི་བཟླས་པ་དང༌། བསྒོམ་པའི་རང་བཞིན་གྱི་དངོས་པོས་དང༌། མུ་སྟེགས་པའི་རྣམ་པར་ཤེས་པ་བསལ་བའི་རང་བཞིན་གྱི་དངོས་པོས་དང༌། དེ་བཞིན་གཤེགས་པ་ཐམས་ཅད་བསྐྱེད་པའི་རང་བཞིན་གྱི་དངོས་པོས་དང༌། གཏོར་མ་དབུལ་བའི་རང་བཞིན་གྱི་དངོས་པོས་དང༌། བྲིས་སྐུ་དང་གླེགས་བམ་གཏན་ལ་དབབ་པའི་རང་བཞིན་གྱི་དངོས་པོས་དང༌། སློབ་དཔོན་གྱི་སྒྲུབ་ཐབས་ཆེན་པོའི་རང་བཞིན་གྱི་དངོས་པོས་དང༌། བདེ་བ་ཆེན་པོའི་དངོས་གྲུབ་དང༌། མཆོད་པ་དང༌། བཀུར་སྟིའི་རང་བཞིན་གྱི་དངོས་པོས་དང༌། སངས་རྒྱས་ཀྱི་སྒྱུ་མའི་རྣམ་འཕྲུལ་གྱི་རང་བཞིན་གྱི་དངོས་པོར་དེ་ཀུན་དུ་གནས་སོ། རྟོག་པ་ཐམས་ཅད་ཀྱི་གླེང་གཞིའི་ཐིག་ལེ་རྟོག་པ་བཅུ་གཅིག་གི་བདག་ཉིད་རབ་ཏུ་བྱེད་པ་སུམ་ཅུའི་རང་བཞིན་གྱི་དངོས་པོར་དེ་ཀུན་དུ་གནས་སོ། །དེ་ཡང་བཅོམ་ལྡན་འདས་རྡོ་རྗེ་སེམས་དཔའ་དཔལ་ཧེ་རུ་ཀ་ཞེས་པ་དང་འབྲེལ་ཏོ། །ད་ནི་དགོས་པ་བརྗོད་པ་བརྗོད་དེ། འདི་སྐད་བདག་གིས་ལ་སོགས་པ་ནི་རྒྱུད་མཐའ་དག་ཡོངས་སུ་རྫོགས་པར་སྟོན་པར་བྱེད་པའི་ཚིག་ཕྲད་དོ། །འདིར་བྱང་ཆུབ་སེམས་དཔའ་བྱེ་བ་ཕྲག་བརྒྱད་ཅུའི་ནང་ནས། རྡོ་རྗེ་སྙིང་པོ་གསོལ་བ་འདེབས་པ་པོས། བཅོམ་ལྡན་འདས་ཉིད་ལས་བདག་གིས་ཐོས་ཀྱི་གཞན་ལས་བརྒྱུད་པ་མ་ཡིན་ཞིང་སུ་ཞིག་ལས་འོངས་པ་དང༌། མ་ཐོས་པ་དང༌། དུས་ཀྱི་ཁྱད་པར་འགའ་ཞིག་ལས་ཐོས་པ་ནི་མ་ཡིན་ནོ། །དེའི་ཕྱིར་བཅོམ་ལྡན་འདས་རྡོ་རྗེ་འཆང་སྟོན་པ་པོ་དང༌།
བདག་གིས་ཐོས་པ་དུས་གཅིག་ན་ཞེས་འབྲེལ་ཏོ། །དུས་ནི་དུས་མང་སྟེ། དེ་ཡང་འཇིག་རྟེན་པ་དང༌། འཇིག་རྟེན་ལས་འདས་པའོ། །འདིར་རེ་ཞིག་འཇིག་རྟེན་པ་ནི་རྣམ་པ་བཞི་སྟེ། ཆགས་པ་དང༌། འཇིག་པ་དང༌། གནས་པ་དང༌། སྟོངས་པའོ། །དེ་བཞིན་དུ་ལྷར་ཡང་སྐྱེས་པའི་མཚན་ཉིད་གནས་སོ། །དེ་ལྟར་རྣམ་པར་ཤེས་པ་གསུམ་གྱི་དབྱེ་བས་ལུས་དང་ངག་དང༌། སེམས་ཀྱི་བདག་ཉིད་སྒོ་ང་ལས་སྐྱེས་པ་དང༌། དྲོད་གཤེར་ལས་སྐྱེས་པ་དང་མངལ་ལས་སྐྱེས་པ་དང༌། རྫུས་ཏེ་སྐྱེས་པའོ། །དེ་ཡང་ལུས་ཀྱི་དབང་གིས་མཚུངས་སོ། །སླར་ཡང་རྣམ་པ་བཞིར་འགྱུར་ཏེ། བསྟན་པའི་ཚིག་གོ །ལྷར་བཤད་པ་བརྗོད་དེ། དུས་དེ་ཉིད་ནི་འཕགས་པ་རྣམས་བརྟན་ཞིང་སེམས་ཅན་གྱི་དོན་རྒྱུན་ཆགས་པ་ཐར་པ་སྟེར་བར་བྱེད་པའོ། །དེ་བཞིན་དུ་བྱིས་པ་རྣམས་ལ་འདོད་ཆགས་དང༌། ཞེ་སྡང་དང༌། གཏི་མུག་དང༌། ཕྲག་དོག་གི་དབང་གིས་ངན་འགྲོ་སྟེར་བར་བྱེད་པའོ། །ཅི་འཕགས་པ་རྣམས་ཀྱི་དང༌། ཅི་བྱིས་པ་རྣམས་ཀྱི་ལས། འཕགས་པ་རྣམས་ཀྱི་དུས་གཅིག་མི་ཉམས་པའི་མཚན་ཉིད་གཟུང་བ་དང༌། འཛིན་པ་དང་བྲལ་བ། སྨྲ་བྱ་དང་སྨྲ་བྱེད་ལས་འདས་པ་ཆོས་ཀྱི་སྐུའི་རང་བཞིན་ཉིད་དང༌། ཡང་དག་པའི་མཐའ་དང༌། སྟོང་པ་ཉིད་དང༌། གཉིས་སུ་མེད་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་དང༌། དོན་དམ་པ་དང༌། འོད་གསལ་བའི་བདག་ཉིད་དོ། །བྱིས་པ་རྣམས་ཀྱི་གཡོ་བའི་ཕྱིར་སེམས་ཉམས་ཤིང་སད་པའི་མཚན་ཉིད་ཀྱིས། རྒས་པ་དང༌། ན་བས་འཇིགས་པ་དང༌། འཆི་བ་སྟེར་བར་བྱེད་པ་སྡིག་པའི་དབང་གིས་དམྱལ་བའི་འཇིགས་པ་འབྱུང་ངོ༌། །བསོད་ནམས་ཀྱི་དབང་གིས་མཐོ་རིས་ཀྱི་འབྲས་བུ་འཐོབ་བོ། །དེ་དེ་བཞིན་དུ་ཡང་རྣམ་པ་བཞི་ཞེས་པའོ། །དེ་ལ་རྫོགས་ལྡན་དང༌། གསུམ་ལྡན་དང་གཉིས་ལྡན་དང་། རྩོད་པའི་དུས་འབྱུང་བར་འགྱུར་ཏེ། དེར་ཚེ་རབས་སྔ་མའི་ཚོགས་གཉིས་ཀྱི་དབང་གིས། སངས་རྒྱས་པ་རྣམས་སངས་རྒྱས་སུ་འགྱུར་རོ། །ཉན་ཐོས་ལ་སོགས་པ་ནི་མ་ཡིན་ཏེ། བདག་དང༌། བདག་གི་དང༌། གཟུང་བ་དང༌། འཛིན་པའི་རྣམ་པར་རྟོག་པའི་དབང་
གིས་འཁོར་བར་འཁོར་རོ། །དེ་བཞིན་དུ་འཆད་བཞིན་པ་ལས་རྒྱས་པར་བཤད་པར་བྱའོ། །དེ་བཞིན་དུ་འཇིག་རྟེན་ལས་འདས་པ་ཡང་གཅིག་གི་རྣམ་པ་སྐད་ཅིག་མ་གཅིག་ལ་མངོན་པར་བྱང་ཆུབ་པའི་མཚན་ཉིད་དུས་བཞི་རྣམས་ཀྱིས་ཡོངས་སུ་ཤེས་པ་སྨྲ་བྱ་དང་སྨྲ་བྱེད་ཀྱི་མཚན་ཉིད་དང་བྲལ་བ། བསྐྱེད་བྱ་དང༌། སྐྱེད་བྱེད་རྗེས་སུ་མཐུན་པར་གནས་པའོ། །འདི་ཡོངས་སུ་ཤེས་པས་སེམས་ཅན་ཐམས་ཅད་གྲོལ་བར་འགྱུར་རོ། །འདི་ནི་དུས་གཅིག་གི་མཚན་ཉིད་དགོངས་པའོ། །དེ་ནས་འདིར་འདི་སྐད་བདག་གིས་ཐོས་པ་ངེས་པར་གཟུང་ཞེས་པའི་དོན་ཏོ། །འོན་ཀྱང་འདི་སྐད་བདག་གིས་ཐོས་པ་ཞེས་བྱ་བ་ལ་སོགས་པ་ནས་ཁ་སྦྱོར་ལས་བྱུང་བའི་རྒྱུད་ཅེས་པ་འདིའི་མཐར་ཐུག་པའི་ངག་དང་པོས་བརྗོད་པར་བྱ་བ་དང༌། དགོས་པ་ཉེ་བར་དགོད་པ་ནི་ཉན་པ་པོ་རྣམས་གཞུག་པའི་ཕྱིར་བསྟན་ཏོ། །གཞན་དུ་གལ་ཏེ་བརྗོད་པར་བྱ་བ་དང༌། དགོས་པ་འདིར་མ་བརྗོད་ན། ཇི་ལྟར་སེམས་ཅན་རྣམས་མཉན་པ་ལ་ཡང་འཇུག་པར་འགྱུར། ཐམས་ཅད་དུ་དགོས་པ་ལ་འདོད་པ་དང་བཅས་པའི་ཕྱིར་འཇུག་པར་འགྱུར་མོད། ཇི་སྲིད་གསུམ་དུ་དགོས་པ་ངེས་པར་མ་བཟུང་བ་དེ་སྲིད་དུ་སྐྱེས་བུ་སུ་ཞིག་འཇུག་པར་འགྱུར། དེ་ཡང་སྐྱེས་བུའི་དོན་གྱི་དགོས་པ་ལ་སྦྱོར་བས་ཐབས་དང་བཅས་པར་གལ་ཏེ་འགྱུར་བ་དེའི་ཚེ་འཇུག་གོ །དེ་ཡང་འདིར་ཡོད་པ་ཉིད་དེ། འདི་ལྟར་ཡང་འཆད་བཞིན་པའི་རྣམ་པ་ལ་སོགས་པའི་ཚུལ་གྱིས་གཉིས་སུ་མེད་པའི་ཡེ་ཤེས་ཀྱི་མཚན་ཉིད་དེ་ཁོ་ན་ཉིད་དོན་དམ་པ་སྐྱེས་བུའི་དོན་དུ་དགོས་པ་དེའི་དོན་དུ་བསྟན་པར་བྱའོ། །དེའི་ཕྱིར་འདིར་བརྗོད་པར་བྱ་བ་ནི་ཧེ་རུ་ཀ་ལ་སོགས་པའི་མཚན་ཉིད་དེ་ཁོ་ན་ཉིད་དོ། །དགོས་པ་ཡང་དེ་ཡོངས་སུ་ཤེས་པའོ། །དེའི་ཕྱིར་དེ་ཡོངས་སུ་ཤེས་པས་མྱ་ངན་ལས་འདས་པ་ཐོབ་སྟེ། ཤིན་ཏུ་རབ་ཏུ་གྲུབ་པ་འདི་ནི་དགོས་པའོ། །གལ་ཏེ་ཡང་སྒྲའི་དོན་གྱི་རྒྱུན་མེད་པའི་ཕྱིར་ཚད་མེད་དེ། དེ་ལྟར་ན་ཡང་དོན་ལ་ཐེ་ཚོམ་ཟ་བར་ཡང་འགྱུར་ཏེ། དེ་ལ་རྟོག་པ་དང་ལྡན་པར་འཇུག་གོ །དབང་པོ་རྣོན་པོ་འཇུག་སྟེ་གཞན་གྱི་རྣམ་པ་མེད་པའི་ཕྱིར་རོ། །དབང་པོ་
རྣོན་པོས་སྐྱེས་བུའི་དོན་དེ་ཁོ་ན་ཉིད་ལ་འཇུག་པར་བྱའོ། །འདི་ལྟར་ཡང་རང་གི་ངོ་བོས་དེ་ཁོ་ན་ཉིད་དེ་ལ་བརྗོད་པར་བྱ་བ་དང༌། རྗོད་པར་བྱེད་པའི་དངོས་པོ་མེད་དོ། །དེར་བླ་མས་བརྗོད་པ་ལས་ཀྱང་རང་གིས་རིག་པ་མེད་དེ། དེ་ཁོ་ན་ཉིད་ནི་ངག་ཐམས་ཅད་ཀྱི་ཐ་སྙད་ལས་འདས་པའི་ཕྱིར་རོ། །དེ་ལྟ་མོད་ཀྱི་ཡང་དག་པའི་རིགས་པ་ཅན་གྱིས་བླ་མའི་ངག་ལས་དེས་ལམ་འགའ་ཞིག་རྙེད་དེ་ཕྱི་ནས་འཇིག་ཚོགས་ལ་ལྟ་བ་ལ་སོགས་པ་ཡོངས་སུ་སྤོང་པའི་མཚན་ཉིད་ཀྱི་ལམ་ཉེ་བར་དམིགས་པའི་རིམ་གྱིས་དད་པ་ལ་སོགས་པའི་ཡོན་ཏན་དང་ལྡན་པའི་སློབ་མའི་བསྒོམ་པ་བརྒྱུད་པ་ལས་དེ་ཁོ་ན་ཉིད་དེས་རང་ཉིད་བྱིན་གྱིས་རློབ་པར་བྱེད་དོ། །རིགས་པས་ཐམས་ཅད་ཀྱི་ཤེས་པ་ངན་པའི་མཚན་ཉིད་ཡོངས་སུ་གཏང་བའི་ཕྱིར་རོ། །དེའི་ཕྱིར་མ་ལུས་པའི་ཤེས་པས་ངན་པ་ཡོངས་སུ་སྤངས་པའི་ཕྱིར། །ཡང་དག་པའི་ཡེ་ཤེས་གང་དོན་དམ་པ་དེ་རང་ཉིད་ཀྱིས་རྙེད་པར་འགྱུར་ཏེ། སྣང་བ་མུན་པ་སེལ་བ་བཞིན་དང༌། ཉི་མས་མུན་པ་སེལ་བ་བཞིན་ནོ། །དེར་འདི་སྐད་བདག་གིས་ཐོས་པ་དུས་གཅིག་ན་ཞེས་པ་འདིས་རྡོ་རྗེ་སྙིང་པོ་ཐོས་པ་མང་བ་དང་ལྡན་པར་གསལ་བར་བསྟན་ཏེ། དུས་གཅིག་གི་ཚེ་ན་བདག་གིས་དེ་ཁོ་ན་ཉིད་འདི་ཐོས་ལ། གཞན་དུ་ནི་དེ་བཞིན་གཤེགས་པ་གཞན་ལས་ཀུན་རྫོབ་དུ་མ་དང་དོན་དམ་པའི་དབྱེ་བས་སོ། །དུ་མའི་དབྱེ་བས་བཅོམ་ལྡན་འདས་གཅིག་པུ་བཞུགས་ཏེ། བརྟན་པ་དང་གཡོ་བ་དང་བུད་མེད་དང༌། སྐྱེས་པ་ལ་སོགས་པའི་དབྱེ་བས་དང་། དེ་བཞིན་དུ་ཀུན་རྫོབ་དང་དོན་དམ་པའི་བདེན་པའི་དབྱེ་བས་སོ། །བཅོམ་ལྡན་འདས་དེ་ཉིད་ཀུན་རྫོབ་ཀྱི་གཟུགས་ཀྱང་ཡིན་ལ་དོན་དམ་པའི་གཟུགས་ཀྱང་དེ་ཡིན་ནོ། །འདིས་དེ་ཁོ་ན་ཉིད་སྒྲིབ་པར་བྱེད་པས་ཀུན་རྫོབ་བོ། །དོན་ཡང་ཡིན་ལ་དམ་པ་ཡང་ཡིན་པས་དོན་དམ་པའོ། །དམ་པའི་སྒྲ་ནི་ཕུལ་དུ་བྱུང་བའི་རྣམ་གྲངས་སོ། །དེའི་ཕྱིར་བཅོམ་ལྡན་འདས་གཅིག་པུའི་གཟུགས་ཉིད་ཇི་ལྟར་དེ་སོ་སོའི་དབྱེ་བས་གནས་པར་འགྱུར་ཞེས་བྱ་བའི་དོན་ཏོ། །དེ་ལྟར་བཅོམ་ལྡན་འདས་ཀྱི་གཟུགས་དེ་ནི་ལྷན་ཅིག་སྐྱེས་པའི་དགའ་བའི་རང་བཞིན་དགའ་
བ་རྒྱུན་མི་འཆད་པའི་ཡིད་ཀྱིས་རིག་པར་བྱའོ། །འདིས་ནི་ཕྱག་རྒྱ་ཆེན་པོ་གསལ་བར་བསྟན་པར་འགྱུར་རོ། །འདི་ནི་དགོས་པའི་དགོས་པའོ། །ད་ནི་བཅོམ་ལྡན་འདས་བཞུགས་ཞེས་པའི་ཚིག་གི་ཚུལ་གྱིས་གསུངས་པའི་ཕྱག་རྒྱ་ཆེན་པོ་འབྲས་བུ་ལ་རྒྱུར་ཉེ་བར་བཏགས་པས་གནས་ཕུན་སུམ་ཚོགས་པ་བསྟན་པའི་ཕྱིར། བཅོམ་ལྡན་འདས་དེ་བཞིན་གཤེགས་པ་ཞེས་བྱ་བ་ལ་སོགས་པ་གསུངས་ཏེ། བྷ་ནི་སྲིད་པ་སྟེ། རང་བྱིན་གྱིས་བརླབས་པའི་ཉེ་བར་བཏགས་པས་ཀུན་རྫོབ་ཀྱི་བདེན་པར་བསྟན་པའི་ཕྱིར་རོ། །ག་བཱན་ཞེས་པ་ནི་མྱ་ངན་ལས་འདས་པར་འགྲོ་བར་འགྱུར་ཞེས་སྦྱར་རོ། །སུ་ཞིག་འགྲོ་བར་འགྱུར་ཞེ་ན། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་སོ། །དེ་བཞིན་གཤེགས་པ་ཡང་དེ་ཡིན་ལ་ཐམས་ཅད་ཀྱང་དེ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ལས་བྱུང་བ་རྣམས་སོ། །འདིར་སྐུ་ལས་བྱུང་བ་རྣམས་ནི་དགོངས་བཤད་གཞན་གྱིས་གསུངས་པ་འཇུག་པའི་ཚོགས་དྲུག་གི་རྣམ་པར་ཤེས་པ་རྣམས་སོ། །དེ་ཡང་འདི་ལྟ་སྟེ། མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་རྣམ་པར་ཤེས་པ་རྣམས་སོ། །དེའི་ཕྱིར་གཟུང་བ་དང་འཛིན་པ་ཉམས་སུ་མྱོང་བས་རེ་རེ་ཡང་གྲངས་མེད་པ་དེ་རྣམས་སུ་སྣང་སྟེ། བརྟན་པ་དང་གཡོ་བ་དང་ཡུལ་འཁོར་དང་རྒྱལ་པོའི་ཕོ་བྲང་དང་ལྗོན་ཤིང་དང་གེལ་བ་དང༌། ལྕུག་མ་ལ་སོགས་པ་དང༌། དེ་བཞིན་དུ་གྲོང་དང་གྲོང་ཁྱེར་དང་ལམ་དང་ཚོང་དུས་ལ་སོགས་པ་ན་གནས་པའི་སེམས་ཅན་སྣ་ཚོགས་པ་རྣམས་ཡང་དག་པར་མཐོང་བའི་ཕྱིར་དེ་རྣམས་དེ་བཞིན་གཤེགས་པ་རྣམས་ཉིད་དོ། །འོན་ཀྱང་མུ་སྟེགས་ལ་སོགས་པ་ནི་མི་ཤེས་པའི་སྒྲིབ་པས་གཡོགས་སོ། །སངས་རྒྱས་པ་སྙིང་རྗེ་ཅན་རྣམས་ནི་ཡང་དག་པར་ཡོངས་སུ་ཤེས་པས་དེ་ལ་དེ་སྐད་ཅེས་བྱའོ། །དེ་བཞིན་དུ་གསུངས་ལས་བྱུང་བའི་དེ་བཞིན་གཤེགས་པ། ཉོན་མོངས་པ་ཅན་གྱི་ཡིད་ཀྱི་རང་བཞིན་མ་རིག་པ་ལ་སོགས་པའི་དྲི་མས་བསྒྲིབས་པ་རྣམས་ནི་འཁོར་བ་ནས་འཁོར་བར་འཁོར་རོ། །འོན་ཀྱང་གཞན་གྱི་དོན་ལ་ཆགས་ཤིང་བརྩོན་པའི་བྱང་ཆུབ་སེམས་དཔའ་རྣམས་ནི་སེམས་ཅན་རྣམས་སྐྱེ་བས་སྣ་ཚོགས་
པར་སྤྲུལ་ཅིང་རང་གི་ལས་ཀྱི་སྲིད་པ་ལེན་ཏོ། །དེའི་ཕྱིར་ཉོན་མོངས་པ་ཅུང་ཟད་ཙམ་གྱིས་བསྒྲིབས་མོད། རང་གི་དབང་གིས་ནི་མ་ཡིན་ནོ། །དེ་བཞིན་དུ་ཐུགས་ལས་བྱུང་བ་ནི་སྔོན་གྱི་བག་ཆགས་ཀྱི་སྟོབས་ཀྱིས་རྟེན་ཅིང་འབྲེལ་པར་འབྱུང་བ་བཞིན་ཏེ། དེ་ཡང་དེ་བཞིན་གཤེགས་པ་རྣམས་སོ། །འོན་ཀྱང་རྣམ་པར་རིག་པ་ཙམ་ལ་ཆགས་པའི་འཚོ་བ་ལུས་ལས་སྐྱེ་བ་དགོས་དང་ལྕགས་སྒྲོག་བཞིན་འཁོར་བར་བཅིངས་པ་རྣམས་ཏེ། བརྒྱ་ལམ་ན་མཚན་མོའི་གློག་བཞིན་དགེ་བའི་གྲོགས་དང་ཕྲད་པས་གྲོལ་བར་འགྱུར་ཏེ། དེ་ལྟར་ཡང་རང་དབང་ཐོབ་པ་འཇིག་རྟེན་གྱི་ཆོས་བརྒྱད་རྣམ་པར་སྤངས་པའི་ཕྱིར་དེ་བཞིན་གཤེགས་པར་འགྱུར་རོ། །དེ་ལྟར་ཁམས་གསུམ་པའི་སེམས་ཅན་བུད་མེད་དང་སྐྱེས་པ་ལ་སོགས་པ་རྣམས་སྐུ་དང་གསུང་དང་ཐུགས་ལས་སྐྱེས་པར་འགྱུར་རོ། །འདི་རྣམས་ཀྱི་རང་གི་ངོ་བོ་ཡོངས་སུ་ཤེས་པ་དང༌། ཀུན་རྫོབ་ཀྱི་བདེན་པ་མཐོང་བ་དང༌། དགེ་བའི་གྲོགས་མཆོག་མཉེས་པ་དང༌། ཕོ་ཉ་དང་ཕོ་ཉ་མོ་རྣམས་ཀྱི་མཆོད་པ་ལ་ཉེ་བར་གནས་པའི་ཉེ་བར་སྤྱོད་པ་དང༌། དེ་བཞིན་གཤེགས་པའི་གསུང་གི་ཕ་རོལ་ཏུ་འགྲོ་བ་དང༌། འདོད་པའི་ཡོན་ཏན་ལྔ་ལ་ཉེ་བར་ལོངས་སྤྱོད་པ་དང་བྲལ་བ་དང༌། དཀྱིལ་འཁོར་གྱི་འཁོར་ལོ་ལ་སོགས་པ་དང་འདོད་པའི་ལྷ་མཉེས་པ་དང༌། ཐེག་པ་གསུམ་གྱི་ཆོ་ག་དང༌། ཐེག་པ་མཆོག་རྟོགས་པ་དང༌། མོས་པས་སྤྱོད་པའི་ས་ལ་གནས་པ་དང༌། ཕ་རོལ་ཏུ་ཕྱིན་པ་བཅུའི་ཚུལ་ཡོངས་སུ་རྫོགས་པ་དང༌། གཉིས་སུ་མེད་པ་དང༌། དེ་བཞིན་ཉིད་དང༌། འོད་གསལ་བའི་ཏིང་ངེ་འཛིན་ལ་གནས་པས་སོ། །འདི་མཐའ་དག་རྣམ་པར་མི་རྟོག་པ་དང་འབྲེལ་པའི་དེ་བཞིན་གཤེགས་པའི་སྐུ་དང་གསུང་དང་ཐུགས་ཀྱི་བདག་ཉིད་རྣམས་སོ། །སྐུ་དང་གསུང་དང་ཐུགས་དབྱེར་མེད་པར་བྱས་ཤིང་རོ་གཅིག་པར་འགྱུར་བ་བདེ་བ་ཆེན་པོ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསུམ་བསྡུས་པའི་བདག་ཉིད་རྡོ་རྗེ་འཆང་ཧེ་རུ་ཀར་བཤད་དོ། །གང་དུ་བཞུགས་ཤེ་ན། རྡོ་རྗེ་བཙུན་མོའི་བྷ་ག་ལ། །ཞེས་སོ། །རྡོ་རྗེ་བཙུན་མོ་ནི་སྤྱན་མ་ལ་སོགས་པ་སྟེ། དེ་རྣམས་ཀྱི་བྷ་གའི་པདྨ་ལ་བྱེ་བ་
ཕྲག་བརྒྱད་ཅུའི་འདབ་མའི་བདག་ཉིད་རང་གི་འཁོར་འདུས་པ་དང་ལྷན་ཅིག་པ་རྣམས་ལ་བཅོམ་ལྡན་འདས་ཡེ་ཤེས་ཀྱི་རང་གི་ངོ་བོ་རོལ་པ་དང་ལྡན་པར་བཞུགས་ཞེས་སྦྱར་རོ། །པདྨ་ནི་མདོར་བསྡུས་ན་ལུས་སོ། །རྣམ་པར་རྟོག་པ་མཐའ་དག་བཅོམ་པའི་ཕྱིར་བྷ་གའོ། །བྱེ་བ་ཕྲག་བརྒྱད་ཅུའི་རང་བཞིན་གྱི་བདག་ཉིད་ནི་འདབ་མ་རྣམས་སོ། །ཤེས་བྱའི་མཆོག་ཉིད་འདི་ཤེས་པའི་ཕྱིར་རྣམ་པར་ཤེས་པ་ནི་རྡོ་རྗེ་སྙིང་པོའོ། །རྡོ་རྗེ་ཡང་ཡིན་ལ་སྙིང་པོ་ཡང་ཡིན་པས་ན་རྡོ་རྗེ་སྙིང་པོ་སྟེ། བཅོམ་ལྡན་འདས་ཀྱི་གཟུགས་གཟུགས་བརྙན་གྱི་རང་བཞིན་སྤྲུལ་པའི་སྐུའི་མཚན་ཉིད་དོ། །དེ་ལྟར་ཡང་། རང་ཉིད་བྱེད་ཅིང་རང་ཉིད་འཕྲོག །རང་ཉིད་རྒྱལ་པོ་རང་ཉིད་གཙོ། །དེ་ནི་སྟོན་པ་རང་ཉིད་དེ། །བསྟན་བྱ་ཡང་ནི་རང་ཉིད་དོ། །ཞེས་གསུངས་སོ། །འདིས་ནི་སྡུད་པ་པོའི་ངེས་པ་སྤང་བ་བསྟན་ཏོ། །དོན་འདི་ཉིད་གསལ་བར་བྱ་བ་གསུངས་པ། བཞུགས་ཞེས་པ་ནི་རྡོ་རྗེ་བཙུན་མོ་རྣམས་ཀྱི་བྷ་ག་རྣམས་ལ་སྟེ། རྩ་སྟོང་ཕྲག་བདུན་ཅུ་རྩ་གཉིས་ཀྱི་གསང་བའི་བུ་ག་རྣམས་སུ་རོལ་པ་དང་ལྡན་པའོ། །སུ་ཞིག་ཅེ་ན། བཅོམ་ལྡན་འདས་ཡེ་ཤེས་སྐུའོ། །རྩ་འདི་རྣམས་ཀྱི་དབུས་སུ་ཁོང་སྟོང་གི་བདག་ཉིད་ཨ་ཝ་དྷཱུ་ཏཱིའི་རྣམ་པ་རང་གི་ངོ་བོས་འབར་བ་སྲོག་ལ་སོགས་པའི་རླུང་རྣམས་སྡུད་པ་ཕུང་པོ་དང་ཁམས་དང༌། སྐྱེ་མཆེད་རྣམས་རང་བཞིན་མེད་པར་བྱེད་ཅིང་ཐིག་ལེའི་གནས་སུ་སོན་པ་མི་ཤིགས་པ་དང་འཁྱུད་པ་རོ་གཅིག་པའི་དངོས་པོ་བྱང་ཆུབ་ཀྱི་སེམས་ཡེ་ཤེས་མི་འཛག་པ་ལས་རང་རིག་པའི་ཡེ་ཤེས་སྐྱེ་བ་ནི་ཕྱག་རྒྱ་སྟེ། ཕྱག་རྒྱ་ཆེན་པོའོ། །འོན་ཀྱང་སྲོག་ལ་སོགས་པའི་རླུང་རྣམས་རྣམ་བ་གསུམ་དུ་འགྱུར་ཏེ། རེ་ཞིག་ལས་དང༌། དབྱིངས་དང་རྡོ་རྗེ་ལྟ་བུ་རིམ་པ་བཞིན་དུ་དབུགས་དབྱུང་བ་དང་འཇུག་པ་དང༌། འགྲོ་བ་དང་འོང་བའི་དབྱེ་བས་གནས་པ་ནི་ལས་སོ། །ཕུང་པོ་ལ་སོགས་པའི་ལུས་ཀྱི་རྩ་ལ་གནས་པ་ནི་དབྱིབས་སོ། །དེ་བཞིན་དུ་ཡེ་ཤེས་དང་རྣམ་པར་ཤེས་པ་ཕུན་སུམ་ཚོགས་པ་ནི་རྡོ་རྗེ་ལྟ་བུའོ། །དེ་ཡོངས་སུ་ཤེས་པ་ནི་བླ་མ་བརྒྱུད་པའི་རིམ་པས་རྡོ་རྗེ་བཟླས་པ་ལ་སོགས་པའི་རྒྱུན་གྱི་སྟོབས་དང༌། སྦྱོར་བའི་ཡན་ལག་དྲུག་ཁོང་དུ་ཆུད་པའི་ཕྱིར་རོ། །དེ་ལ་ཡན་ལག་དྲུག་ནི་འདི་ལྟ་སྟེ། སོ་སོར་སྡུད་དང་བསམ་གཏན་དང༌། །སྲོག་དང་རྩོལ་བ་དེ་བཞིན་གཟུང༌། །རྗེས་སུ་དྲན་དང་ཏིང་འཛིན་རྣམས། །སྦྱོར་བའི་ཡན་ལག་འདོད། །ཅེས་སོ། །
དགོངས་བཤད་གཞན་གྱིས་དཔལ་གསང་བ་འདུས་པ་ལ་སོགས་པར་གསུངས་པའི་ཕྱིར་རོ། །དེ་ཡང་དུ་བ་ལ་སོགས་པའི་མཚན་མའི་མཚན་ཉིད་དང༌། སྟོང་པའི་སྐུ་མཐོང་བའི་ཕྱིར་དང༌། ཇི་སྲིད་དུ་ཡན་ལག་དྲུག་ཅུར་འགྱུར་གྱི་བར་རོ། །དེ་ལྟར་ཡང་བཅོམ་ལྡན་འདས་ཀྱིས་སྒྱུ་འཕྲུལ་དྲ་བ་ལས་གསུངས་ཏེ། ས་བཅུའི་དབང་ཕྱུག་མགོན་པོ་སྟེ། །ས་བཅུ་ལ་ནི་རབ་ཏུ་གནས། །ཤེས་བཅུ་རྣམ་པར་དག་པའི་བདག །ཤེས་བཅུ་རྣམ་པར་དག་པ་འཆང༌། །རྣམ་པ་བཅུ་པོ་དོན་གྱི་དོན། །ཐུབ་དབང་ཁྱབ་བདག་སྟོབས་བཅུའི་བདག །མ་ལུས་སྣ་ཚོགས་དོན་བྱེད་པ། །རྣམ་བཅུ་དབང་ལྡན་ཆེ་བ་པོ། །ཞེས་སོ། །འདིའི་དོན་ནི་རྒྱུད་སྣ་ཚོགས་ཀྱི་དགོངས་པས་རྟོགས་པར་བྱའོ། །དེ་བཞིན་དུ་བྱང་ཆུབ་སེམས་དཔས་མཛད་པའི་རྒྱ་ཆེར་འགྲེལ་ལས་ཉེ་བར་མཚོན་པར་བྱའོ། །བདག་གིས་ཀྱང་རྒྱུད་འདིའི་དོན་ཅུང་ཟད་རང་གི་བློའི་དབང་གིས་སྦྱར་བར་བྱའོ། །འདི་ནི་རྣལ་འབྱོར་གྱི་རྒྱུད་ཀྱི་ངེས་པའོ། །ཁ་སྦྱོར་ཐིག་ལེ་ཞེས་པ་རྒྱུད་ཀྱི་རྒྱལ་པོའི་རྒྱ་ཆེར་འགྲེལ་པ་ཡང་དག་པར་ལྟ་བའི་དྲན་པའི་སྣང་བ་ཞེས་པ་ལས་རྗོད་བྱེད་དང༌། བརྗོད་བྱ་ལ་སོགས་པས་རྒྱུད་ལ་འཇུག་པ་བསྟན་པ་སྟེ་དང་པོའོ།། །།