སྙེ་མ་ལྔ་པ། རིམ་གཉིས་ཀྱི་ཡན་ལག་དབང་བསྐུར་བ་རྣམ་པར་བཤད་པ།
རྫོགས་པའི་རིམ་པ་དང་བསྐྱེད་པའི་རིམ་པ་འདི་དབང་བསྐུར་མེད་པར་མ་ཡིན་ཞིང་དེ་ཡང་དཀྱིལ་འཁོར་མེད་པར་མ་ཡིན་པས་ཇི་ལྟ་བའི་ཆོ་ག་བཞིན་དེ་དག་གསུངས་པ། དེ་ནས་ཞེས་པ་ལ་སོགས་པའོ། །ཆོ་ག་ཡང་དག་བཤད་བྱ་སྟེ། །དཀྱིལ་འཁོར་གྱི་ཞེས་པ་ལྷག་མའོ། །གང་གིས་སློབ་མ་དབང་བསྐུར་བའི། །ཆོ་ག་དེ་ཡང་རབ་བཤད་བྱ། །ཞེས་སྦྱར་རོ། །དང་པོར་ལྷ་ཡི་བདག་ཉིད་ཀྱིས། །ཞེས་པ་ཏིང་ངེ་འཛིན་གསུམ་བསྒོམས་པས་སྔོན་དུ་བསྙེན་པ་
བྱས་པ་དཔལ་རྡོ་རྗེ་འཛིན་པའི་སྐུར་གྱུར་པས་སོ། །ཧཱུཾ་ཞེས་པ་ཧཱུཾ་ཡིག་གོ །རྡོ་རྗེར་བྱ་བ་ནི་རྐང་མཐིལ་དག་དང་སའི་མཐིལ་གྱི་བར་ཧཱུཾ་ལས་སྐྱེས་པའི་རྡོ་རྗེར་བསྒོམ་པའོ། །འབད་པས་ཏེ་འཆད་པར་འགྱུར་བས་སོ། །ལྷའི་རྡུལ་ཚོན་ནི་རིན་པོ་ཆེ་རྣམས་ཀྱིའོ། །བར་མ་ནི་འབྲས་ཀྱི་ཕྱེ་མ་ལ་སོགས་པ་རྣམས་ཀྱིའོ། །བཞི་ཞེས་པ་ལོགས་བཞི་རྣམས་ལ་སོར་གསུམ་ལྷག་པའི་ཁྲུ་གསུམ་མོ་ཞེས་དཀྱིལ་འཁོར་མདོར་བསྟན་པ་ཉིད་ཤུ་བརྒྱད་པར་རྒྱས་པར་སྟོན་པར་འགྱུར་རོ། །དེ་ལ་ཕྲེང་བ་དང་ཆུ་ལ་སོགས་པའི་དབང་བསྐུར་ནི་རྒྱས་པར་རྒྱུད་གཞན་རྣམས་སུ་གོ་སླ་བར་འདིར་ཡང་ཤེས་པར་བྱའོ། །དེ་སྐད་དུ་ཡང་གསུངས་པ། གང་དུ་ལས་ནི་ཡོད་གྱུར་ཅིང༌། །རང་གི་ལས་ཀྱི་ཆོ་ག་མེད། །དེར་ནི་སྤྱི་ཡི་རྒྱུད་གསུངས་པའི། །ཆོ་ག་མཁས་པས་བསྟེན་པར་བྱ། །ཞེས་སོ། །མདོར་བསྡུས་པས་ནི་དཀྱིལ་འཁོར་སྒྲུབ་པའི་དོན་དང་དབང་བསྐུར་བའི་དོན་དུ་སྐབས་གསུངས་པ། རིག་མ་ཞེས་པ་ལ་སོགས་པའོ། །བཟང་མོ་མཆོག་རྣམས་རྡོ་རྗེ་རྣལ་འབྱོར་མ་རྣམས་གཞུག་པར་བྱའོ། །ཅི་འདི་རྣམས་དབང་བསྐུར་བ་ཁོ་ནའི་དོན་དུ་བསྟེན་པར་བྱའམ་ཞེ་ན་མ་ཡིན་ཏེ། གང་གི་ཕྱིར་སྔགས་ཞེས་པ་ལ་སོགས་པ་སྟེ། སྔགས་ཀྱི་ལམ་ནི་སྔགས་ཀྱི་ཚུལ་ལོ། །མཐའ་ཡས་འཇིག་རྟེན་ཁམས་དབང་མ། རྡོ་རྗེ་ལྷ་མོ་དབང་གི་དུས་སུ་རང་བྱིན་གྱིས་བརླབ་པའི་གནས་གཉིས་སུ་མེད་པའི་བདེ་བ་ཆེན་པོའི་གོ་འཕང་རྟོགས་ནས་གཞན་གྱི་ཚེ་ཡང་བསྟན་པར་བྱའོ། །དམ་ཚིག་ནི་བདེ་བ་ཆེན་པོ་ཉམས་སུ་མྱོང་བ་སྟེ་སྔར་ཇི་སྐད་བཤད་པ་བཞིན་ནོ། །དོན་དམ་པར་ཞེས་པ་དམ་པ་བླ་ན་མེད་པ་ཟག་པ་མེད་པའི་བདེ་བ་ཆེན་པོའི་རྒྱུན་ཉམས་སུ་མྱོང་བ་དོན་དགོངས་པ་ཡིན་པ་དེ་ལ་སྟེ་དེའི་རྒྱུ་མཚན་དུ་རྡོ་རྗེ་སེམས་དཔའ་ལ་སོགས་པ་རྣམས་ཀྱིས་ཀྱང་འདི་འདའ་བར་དཀའ་ན་གཞན་རྣམས་ཀྱིས་ལྟ་ཅི་སྨོས། འདི་ཁོ་ན་ཡང་གྲུབ་པའི་མཐའ་སྟེ། དེ་ལྟར་ནི། དཀྱིལ་འཁོར་ངེས་པའི་དུས་དང་ནི། །བརྡ་དང་སྔགས་དང་ཕྱག་རྒྱ་དང༌། །ལྷ་དང་གྲུབ་པའི་མཐའ་ལ་ཡང༌། །དམ་ཚིག་རྒྱལ་བ་རྣམས་ཀྱིས་གསུངས། །དེའི་ཕྱིར་དོན་ཞེས་པ་བཤད་པའི་དགོས་པ་འདི་ཡིས་སོ། །དབང་བསྐུར་ཡང་དེའི་
དོན་ཉིད་ཀྱི་ཕྱིར་རོ། །དབུལ་ཞེས་མདོར་བསྟན་པ་རྒྱས་པར་སྟོན་པར་འགྱུར་ཏེ། ཤེས་རབ་མ་འབུལ་བས་སོ། །རྡོ་རྗེ་ནི་བྱང་ཆུབ་ཀྱི་སེམས་ཏེ་དེའི་རང་བཞིན་གྱི་འཇིག་རྟེན་པ་དང་འཇིག་རྟེན་ལས་འདས་པའི་སྤྱོད་པ་སྟོན་ཏོ་ཞེས་པ་རྡོ་རྗེ་སློབ་དཔོན་བླ་མ་སྟེ་དེ་ལའོ། །ཡོན་ཏན་མཚོར་ཞེས་པ་ཆོ་ག་ཇི་ལྟ་བ་བཞིན་བླ་མ་རྣམས་ཀྱིས་དབང་བསྐུར་བ་ཉིད་དང་རྗེས་སུ་གནང་བ་ཉིད་དང་སྙིང་རྗེ་དང་དད་པ་དང་ཐོས་པ་དང་བསམ་པ་དང་སྒྲུབ་པ་ལ་སོགས་པའི་རྣམ་པར་དབྱེ་བ་ཤེས་པ་ཉིད་དང་ཟབ་མོའི་དེ་ཁོ་ན་ཉིད་རིག་པ་ཉིད་དང་དེ་ཁོ་ན་ཉིད་བཅུ་ཤེས་པ་ལ་སོགས་པ་རྣམས་ཡོན་ཏན་ནོ། །དཀྱིལ་འཁོར་རང་གི་ཏིང་འཛིན་དང༌། །ཕྱག་རྒྱ་བྱེད་པ་གདན་དང་ནི། །བཟླས་པ་སྦྱིན་སྲེག་དེ་བཞིན་མཆོད། །ལས་ཀྱི་སྦྱོར་བ་ཉེ་བར་སྡུད། །ཅེས་པ་དང༌། སྲུང་བ་དབང་བསྐུར་གཏོར་མ་བཟླས་པ་དབྱེ། །ཕྱིར་ཟློག་དག་དང་དཀྱིལ་འཁོར་སྒྲུབ་ཐབས་དང༌། །བཙན་ཐབས་སྦྱོར་བ་གཤེགས་སུ་གསོལ་བའོ། །ཞེས་པ་དེ་ཉིད་བཅུ་རྣམས་སུ་ནི་བཤད། །དེ་རྣམས་ནི་སྐབས་ཇི་ལྟ་བར་འཆད་པར་འགྱུར་རོ། །ཤེས་རབ་ནི་བཟང་མོ་རྣམས་མ་རྙེད་ན་གཞན་རྣམས་ཀྱང་ངོ་ཞེས་གསུངས་པ། ཡང་ན་ཞེས་པ་ལ་སོགས་པ་སྟེ། དེ་ཞེས་པ་དེ་དང་ལྷན་ཅིག་ཏུ་ལྷན་ཅིག་སྐྱེས་པའི་བདེ་བ་བསྒྲུབ་པའོ། །བུ་མོ་རྣམས་ཞེས་པ་བུ་མོ་ཉིད་དེ་འདི་རྣམས་ལོངས་མ་སྤྱད་པའི་ཕྱིར་རོ། །དེ་ལ་འཆད་པར་འགྱུར་བའི་རིམ་པས་རིག་མའི་བརྟུལ་ཞུགས་ལ་ལོངས་མ་སྤྱད་པ་ཁོ་ན་གཟུང་བར་བྱའོ། །དཀྱིལ་འཁོར་དུ་ཞུགས་པ་ལ་སོགས་པ་ལ་ནི་དེ་མེད་ན་རྡུལ་དང་ལྡན་པའི་དེ་མ་ཐག་ཏུ་ལོངས་མ་སྤྱད་པ་ཡང་གཟུང་བར་བྱའོ། །དེ་མེད་ན་ཡང་ཉི་མ་དེ་ལ་ཉེ་བར་མ་སྤྱད་པའང་ངོ༌། །འདི་རྣམས་ཀྱང་བུ་མོ་ཉིད་དེ་བུ་མ་སྐྱེས་པ་ཉིད་ཀྱི་ཕྱིར་དང་ལང་ཚོ་ཕུན་སུམ་ཚོགས་པ་ཉིད་ཀྱི་ཕྱིར་རོ། །རིན་ཐང་མེད་ནི་རིན་ཐང་མེད་པ་ཞེས་པ་རྙེད་པར་དཀའ་བ་ཉིད་དང་མཆོག་ཏུ་དགའ་བས་མཆོད་བྱ་ཉིད་དུ་གསལ་བར་བྱེད་དོ། །རིགས་ཀྱི་རིམ་པ་ནི་རྣམ་པར་སྣང་མཛད་ལ་སོགས་པའི་རིམ་པའོ། །ལོ་གྲངས་བཅུ་དྲུག་མ་ཞེས་བཤད་པ་ལང་ཚོ་གཙོ་བོ་ཉིད་ཀྱི་ཕྱིར་རོ། །ཚིག་འདི་ཡང་ཇི་ལྟར་སྲིད་པ་སྟེ་
མ་ཡ་ཞེས་བརྗོད་པའི་ཕྱིར་རོ། །དེ་ཉིད་ཀྱི་ཕྱིར་གསུངས་པ། ལང་ཚོ་གསར་པ་ཕུན་སུམ་ཚོགས། །ཞེས་པ། དེ་མེད་ན་གཞན་ཡང་ཞེས་པའོ། །དེ་ལྟར་ནི། བཅུ་གཉིས་ལོ་ལོན་ཉི་ཤུའི་བར། །ཕྱག་རྒྱ་གསར་པ་མཆོག་རྣམས་ཏེ། །དཀྱིལ་འཁོར་ཀུན་ལ་ཐུན་མོང་དུ་འམ། །ཡང་ན་རྣལ་འབྱོར་པ་ཀུན་གྱིའོ། །ལོ་ནི་ཉི་ཤུ་རྩ་ལྔའི་བར། །ཕྱག་རྒྱ་བར་མའོ་གཞན་རྣམས་དམན། །གང་ཕྱག་རྒྱ་ཆེན་པོ་ཐིག་ལེར་གསུངས་པ། ཉི་ཤུ་རྩ་ལྔའི་ལོ་ལོན་པ། །གཟུང་བྱ་ལྷག་མ་རྣམ་སྤང་བྱ། །ཞེས་སོ། །ལོ་བཅུ་གཅིག་མ་ནི་བཅུད་ལེན་ལ་ཕན་པའོ་ཞེས་གསུངས་སོ། །སྐྱབས་གསུམ་རྣམས་ནི་སངས་རྒྱས་དང་ཆོས་དང་དགེ་འདུན་རྣམས་ཏེ་དེ་རྣམས་བདག་ཉིད་ཀྱི་སྐྱབས་ཉིད་དུ་ཤིན་ཏུ་ཁས་ལེན་པ་འདའ་བར་བྱ་བ་མ་ཡིན་པའི་ཤེས་རབ་ནི་སྐྱབས་སུ་འགྲོ་བའོ། །དེ་ཁོན་ཉིད་གསང་ཆེན་ཞེས་པ་དེ་ཁོ་ན་ཉིད་དང་གསང་ཆེན་དམ་ཚིག་ལ་སོགས་པ་བའོ། །འོན་གང་དེ་ལྟར་འཆད་པ་དེ་ཁོ་ན་བླ་མ་དང༌། མོ་དེ་ཡང་སློབ་མ་ཡིན་ན་རྩེ་བར་འདོད་པའི་བླ་མ་དེ་དང་ལྷན་ཅིག་སྙོམས་པར་འཇུག་པར་འོས་སམ། མ་ཡིན་ཞེ་ན་འོས་ཏེ། དེ་སྐད་དུ་ཡང་རྡོ་རྗེ་ཨཱ་རལླིའི་རྒྱུད་དུ་གསུངས་པ། ཐེ་ཚོམ་ཡོངས་སུ་སྤངས་ནས་ནི། །དགོད་དང་དེ་བཞིན་སྟེག་པ་དང༌། །བླ་མས་ལྷ་མོ་རབ་དགའ་བའི། །རོལ་བའི་གཙོ་བོ་སྦ་མི་བྱ། །བླ་མ་འབྲས་བུ་ཀུན་སྟེར་བ། །སྐྱེས་བུ་འདོད་ན་དགའ་བར་བྱ། །བླ་མའི་སྟེང་དུ་ངེས་ལྟ་སྟེ། །རྟག་ཏུ་ཆགས་བཅས་བླ་མ་ལའོ། །དེ་ནས་ལག་པ་གཡས་པ་ཡིས། །བླ་མའི་རྟགས་ནི་གཟུང་བྱས་ནས། །བྷ་གར་བླ་མའི་ལག་སོན་བྱས། །རིག་པ་གསང་སྔགས་རྗེས་དྲན་བྱ། །དེ་ཡི་རོ་ནི་རྟག་བཟུང་ནས། །ཙཱ་རུ་བྱས་ཏེ་བཟའ་བར་བྱ། །རྒྱུད་དང་རྒྱུད་དུ་ངས་བཤད་པའི། །དངོས་གྲུབ་རྣམས་ནི་བཞིན་བཟང་མ། །བླ་མ་མཉེས་ན་ཐོབ་པར་འགྱུར། །དེ་ཕྱིར་བླ་མ་རྟག་མཉེས་བྱ། །ཞེས་སོ། །སྒྲ་ནི་སྒེག་པ་དང་དགོད་པའི་རོ་དང་ལྡན་པ་ལེགས་པར་སྦྱར་བ་དང༌། རང་བཞིན་ལ་སོགས་པ་སྟེ་མཆོག་ཏུ་ལྟུང་བ་ལ་སོགས་པའི་འཁུན་པ་ཡང་ངོ༌། །འོག་གི་ལམ་ནི་སྐྱེས་པའི་འོག་ཏུ་ཀུན་དུ་གནས་པ་ལ་མཁས་པ་དང་པདྨར་ལྟ་བའོ། །
ལྕེའི་དེ་ཁོ་ན་ཉིད་ནི་ལྕེས་རྡོ་རྗེའི་དང་པདྨའི་ལྟེ་བ་སྤྲོ་བ་བསྐྱེད་པ་ལ་དང་གདོང་པས་སྦྲང་རྩི་འཐུང་བ་ལ་སོགས་པ་ལ་མཁས་པ་ཉིད་དོ། །མིག་གི་རྗེས་སུ་ཆགས་པ་དགའ་བ་ལ་རྗེས་སུ་ཆགས་པ་དང་བཅས་པར་གྱུར་པ་ནི་བདེ་བ་སྐྱེད་པར་བྱེད་པའོ། །སྟེང་དུ་བསྐྱོད་པ་ནི་སྐྱེས་པ་འདོད་པའི་ལག་པ་དང་རྐང་པ་འགོད་པའི་ཁྱད་པར་རོ། །ཕན་ཚུན་དུ་གདོང་དང་མིག་ལྟ་བ་ཡང་ངོ༌། །ནམ་མཁས་ནི་མིག་ལ་སོགས་པར་འོ་བྱེད་པ་དང་ཡི་གེ་གསུམ་དང་སེན་མོ་འདེབས་པ་དང་ཆུ་རི་ཏ་ཀ་ལ་སོགས་པ་དང༌། རྡོ་རྗེ་བསྡམས་པས་མགྲིན་པ་བསྡམས་ཤིང་ལག་པ་གཡས་པས་ནུ་མ་འཛིན་པ་ལ་སོགས་པའོ། །སྣ་ཚོགས་པའི་བྱེད་པ་རྣམས་ནི་ཆེར་རྒྱས་པ་ལ་སོགས་པ་རྣམས་སོ། །དེ་ལ་ལུས་ཀྱི་རོ་སྟོད་དམའ་བའི་ཕྱོགས་སུ་བྱས་ཤིང་ཕྱི་མ་ཕྱེད་མཐོ་བར་བཞག་ནས་བུད་མེད་ཀྱི་པུས་མོ་དག་སྐྱེས་པའི་དཀུར་དང་རྒྱབ་ཀྱི་ཕྱོགས་སུ་རྐང་པ་དག་སྟེ་བུད་མེད་ཀྱི་འཕང་ཚོས་དག་གི་དབུས་དང་འོག་ཏུ་དམའ་བར་བྱས་པའི་སྐྱེས་པའི་རྐང་པ་དག་དང༌། རྩིབ་ལོགས་ལ་རིག་པའི་དཔུང་བ་ཅན་སྐྱེས་པ་དང་བུད་མེད་སྐྱེས་པའི་རྒྱབ་ལ་རེག་པའི་དབུང་པ་གཉིས་ཅན་ནོ་ཞེས་པ་ཆེར་རྒྱས་པའོ། །བྱིན་པ་གཉིས་བཀུག་ཅིང་གན་རྐྱལ་དུ་བུད་མེད་བྱས་ཏེ། སྐྱེས་པ་ཡང་ལུས་དྲང་པོར་བྱས་ཤིང༌། བུད་མེད་ཀྱི་རྐང་པ་དག་སྐྱེས་པའི་རྐུབ་ཚོས་དག་ལ་དང༌། ཕན་ཚུན་མགྲིན་པ་ལ་འཁྱུད་པ་ལས་མི་མཉམ་པར་སྦྱར་བའོ། །བུད་མེད་གན་རྐྱལ་གྱི་བྱིན་པ་དག་ཉེ་བར་གནས་པའི་སྐྱེས་པའི་བརླ་ལ་སོན་ཞིང་བུད་མེད་ཀྱི་ལག་པ་དག་སྐྱེས་པའི་མགྲིན་པར་དང༌། སྐྱེས་པའི་ལག་པ་དག་བུད་མེད་ཀྱི་གཞོགས་སུ་དང་བུད་མེད་ཀྱི་རྐང་པ་དག་སྐྱེས་པའི་རྩིབ་ལོགས་དག་ཏུའོ་ཞེས་པ་གྲོང་བའོ། །བུད་མེད་ཀྱི་པུས་མོ་གཉིས་བདག་ཉིད་ཀྱི་ཕྱོགས་སུ་འོངས་ཤིང་བྱིན་པ་དག་བརྐྱང་པ་སྟེ། རྐང་པ་དག་སྐྱེས་པའི་རྩིབ་ལོགས་ལ་རེག་ཅིང་བུད་མེད་ཀྱི་ལག་པ་དག་སྐྱེས་པའི་མགྲིན་པར་དང༌། བུད་མེད་ཀྱི་པུས་མོའི་ཕྱི་རོལ་དུ་སོན་པར་སྐྱེས་པའི་ལག་པ་དག་མ་ལ་སྟན་ལའོ་ཞེས་གྲོང་ཁྱེར་གྱི་གར་རོ། །བུད་མེད་གན་རྐྱལ་གྱི་རྐང་པ་དག་བྲང་དུ་བཟུང་ནས། སྐྱེས་པས་དཔུང་པ་གཉིས་ཀྱིས་མགྲིན་པ་དཀྲིས་ཤིང་བུད་མེད་ཀྱི་
ལག་པ་དག་སྐྱེས་པའི་ཚང་ར་ལའོ་ཞེས་པ་བྲང་འབུགས་པའོ། །རྐང་པ་གཅིག་སྙིང་གར་དང་གཉིས་པ་བརྐྱང་སྟེ་ལག་པ་དག་རྒྱབ་ཏུ་འཇུས་ཤིང༌། སྐྱེས་པའི་ལག་པ་དག་ཏུ་བུད་མེད་ཀྱི་རྐེད་ངོས་སུའོ་ཞེས་པ་རབ་ཏུ་བརྐྱང་པའོ། །བུད་མེད་གན་རྐྱལ་གྱི་ཁྲི་ལས་ཕྱི་རོལ་དུ་རྐང་པ་དག་བརྐྱང་སྟེ། དེ་ལྟར་ཉེ་བར་ཞུགས་པའི་སྐྱེས་པའི་རྐང་པ་དག་ཁྲི་ལས་ཕྱི་རོལ་དུ་བརྐྱང་ཞིང༌། སྐྱེས་པའི་ལག་པ་དག་བུད་མེད་ཀྱི་མགྲིན་པར་འཇུས་ལ། བུད་མེད་ཀྱི་ལག་པ་དག་སྐྱེས་པའི་རྒྱབ་ཏུ་སྦྱར་བའོ་ཞེས་པ་ཁ་བ་ཅན་ནོ། །གང་དུ་སྟེང་དུ་གནས་པ་ཁོ་ནའི་བུད་མེད་རོལ་ཞིང་རྫ་མཁན་གྱི་འཁོར་ལོ་བཞིན་དུ་བསྐོར་ལ། རྐང་པ་ཟུང་གྱེན་དུ་བསྐྱོད་ཅིང་བསྐྱོད་ནས། ལག་པ་གཡོན་པའི་གྲུ་མོ་གཡས་པའི་སྟེང་དུ་སྦྱིན་ཞིང༌། གཡས་པ་ཡང་གྲུ་མོ་གཡོན་པའི་སྟེང་དུ་འཛིན་པ་ཞེས་པ་བུང་བ་ཅན་ནོ། །སྐྱེས་པ་གན་རྐྱལ་གྱིས་ཡང་དག་པར་མཐོང་བར་བྱས་པའི་རྐང་པ་གཉིས་ཀྱི་རྩེ་མོས་ནམ་མཁའི་མཐིལ་བཀག་ཅིང༌། མངོན་དུ་ཕྱོགས་པས་ཉེ་བར་ཞུགས་པའི་རབ་མྱོས་མ་སྐྱེས་མདུན་སྟན་དུ་བྱས་ནས་རོལ་ཅིང་ལག་པ་མགྲིན་པར་འཁྱུད་དེ། སྐྱེས་པའི་ལག་པ་དག་བུད་མེད་ཀྱི་རྒྱབ་ཏུ་སྦྱར་བའོ་ཞེས་པ་མྱོས་བྱེད་ཀྱི་རྟ་བབས་སོ། །སྐྱེས་པ་ཉེ་བར་འདུག་པ་བརྐྱང་བཞིན་ཅུང་ཟད་བཀུག་པའི་རྐང་པ་གཉིས་ལ་གནས་པའི་འདོད་ལྡན་མ་རྐང་པ་གཉིས་བསྐུམ་པ་ཅན་རོལ་ཅིང་བསྲུབ་པ་ནི་སྲུབ་བྱེད་དོ། །དེ་བཞིན་དུ་བྱེད་པ་གཞན་རྣམས་ཀྱང་དེ་ལ་མངོན་པར་བརྩོན་པ་རྣམས་ཀྱིས་གཞན་དུ་རིག་པར་བྱའོ། །བྱེད་པ་རྣམས་ཀྱིས་ནི་ལུས་མཉེན་པར་བྱེད་པའི་ཕྱིར་ཤིན་ཏུ་དགའ་བའི་བདེ་བ་ཆེན་པོའི་རོ་མྱོང་བ་ཐོབ་པར་རྣལ་འབྱོར་མ་རྣམས་སྐྱེའོ། །འབད་པ་འདི་ཅིའི་དོན་དུ་ཡིན་ཞེ་ན། དངོས་གྲུབ་ཀྱི་དོན་དུའོ། །གང་གི་ཕྱིར་འདི་ལྟར་བྱེ་བྲག་ཏུ་བཤད་པའི་རིམ་པ་གཉིས་གོམས་པས་སམ། རིགས་ལྔའི་ཚོགས་བཀོད་པས་སྦྱངས་པའི་རིག་མ་ནི་ཕྱག་རྒྱ་ཆེན་པོའི་དངོས་གྲུབ་ཀྱི་རྒྱུར་འགྱུར་ན། དངོས་གྲུབ་གཞན་རྣམས་ཀྱིས་ལྟ་ཅི་སྨོས་ཞེས་པ་དགོངས་པའོ། །དེའི་ཕྱིར་དེ་ལྟར་འདུས་བྱས་པའི་རིག་མ་ནི་རིག་པ་འཛིན་པ་རང་གི་ཤེས་རབ་དང་བཅས་པས་དབུལ་ཞིང༌། བདག་ལ་རྗེས་སུ་བརྩེ་བས་དབང་བསྐུར་བ་ཞལ་གྱིས་བཞེས་པར་མཛོད་
ཅིག་ཅེས་བླ་མ་ལས་རྟོགས་པར་བྱའོ། །ཅི་བྱས་ནས་ཤེ་ན་གསུངས་པ། དྲི་དང་ཞེས་པ་ལ་སོགས་པའོ། །འོ་མ་ནི་འདིར་ཆང་ངོ༌། །ཕྱག་རྒྱ་ནི་འདིར་སྒྲུབ་པ་པོ་སྟེ། དེས་ཀྱང་བསྙེན་བཀུར་ལ་སོགས་པ་བྱའོ་ཞེས་པའི་དོན་ཏོ། །སྟོང་ཉིད་སྙིང་པོ་ཞེས་པ་སྟོང་པ་ཉིད་ལས་རབ་ཏུ་སྐྱེས་པ་ཉིད་ཀྱི་ཕྱིར་རོ། །ཀུན་མཁྱེན་ཡེ་ཤེས་རྣམས་ནི་སྟོབས་དང་མི་འཇིགས་པ་ལ་སོགས་པ་རྣམས་སོ། །ཤིན་ཏུ་རྣམ་པར་དག་པའི་ཡེ་ཤེས་ཀྱི་ངོ་བོ་ཉིད་ཀྱི་ཕྱིར་ཡེ་ཤེས་སྐུའོ། །དེ་ལྟར་མི་བསྐྱོད་པའི་ངོ་བོས་བསྟོད་ནས་རྣམ་པར་སྣང་མཛད་ལ་སོགས་པའི་ངོ་བོར་སྟོང་པར་བྱེད་དེ། འགྲོ་བ་ཞེས་པ་ལ་སོགས་པའོ། །སྒྲིབ་པ་གཉིས་ཀྱི་དྲི་མ་དང་བྲལ་བའི་ཕྱིར་དག་པ་སྟེ། དེ་ཁོ་ན་ཉིད་ནི་མེ་ལོང་ལྟ་བུའི་ཡེ་ཤེས་སོ་ཞེས་པའི་དོན་ཏོ། །བྱང་ཆུབ་སེམས་ནི་མཉམ་པ་ཉིད་ཀྱི་ཡེ་ཤེས་ཏེ། རིན་ཆེན་འབྱུང་ལྡན་ནོ། །སོ་སོར་རྟོག་པའི་ཡེ་ཤེས་ཀྱིས་ནི་མི་མཐུན་པའི་ཕྱོགས་ལས་རྒྱལ་བ་ཉིད་ཀྱིས་འགྲོ་བ་ལ་སོ་སོར་རྟོག་པའི་ཕྱིར་འགྲོ་བའི་དཔའ་བོ་འོད་དཔག་ཏུ་མེད་པའོ། །རྡོ་རྗེ་འཛིན་པའི་སེམས་ཅན་གྱི་དོན་བྱ་བའི་བཀའ་བསྒོ་རྫོགས་པར་བྱེད་པའི་ཕྱིར་བདེ་གཤེགས་བཀའ་བཞིན་མཛད་དོ། །དཔལ་ནི་བྱ་བ་བསྒྲུབ་པའི་ཡེ་ཤེས་ཏེ། དེའི་བདག་ཉིད་ཀྱི་ཕྱིར་དེ་དང་ལྡན་པ་དོན་ཡོད་གྲུབ་པའོ། །རྡོ་རྗེ་འཛིན་པས་བསྐྱེད་པ་ཉིད་ཀྱི་ཕྱིར་སངས་རྒྱས་སྲས་པོའོ། །བླ་མེད་དེ་ཁོ་ན་ཉིད་ནི་དབང་བཞི་པའོ། །རྡོ་རྗེ་ནི་བྱང་ཆུབ་ཀྱི་སེམས་ཀུན་རྫོབ་པ་དང་དོན་དམ་པ་ལ་སྟེ། དེས་བུམ་པའི་དབང་ལ་སོགས་པ་ལ་གང་དབང་བསྐུར་བ་དེ་ཡིས་སོ། །གསང་ཆེན་ནི་ཉན་ཐོས་ལ་སོགས་པའི་སྤྱོད་ཡུལ་མ་ཡིན་པའི་དེ་ཁོ་ན་ཉིད་དོ། །རྡོ་རྗེ་ཆོས་ཅན་ནི་རྡོ་རྗེ་སྙིང་པོ་སྟེ་དེ་ལ་དབང་བསྐུར་ནས་སོ། །གང་གསུངས་པ། རྡོ་རྗེ་སྙིང་པོར་དབང་བསྐུར་བ། །སྦྱིན་ཆེད་ཏི་ལ་མཆོག་མ་བཀུག་གོ །ཞེས་སོ། །དེ་ནས་ཞེས་པ་ཡང་དག་པར་མཆོད་ནས་རིག་མ་དབུལ་བ་སྔོན་མ་ཅན་གསོལ་བ་བཏབ་ནས་སོ། །ལྔ་ཞེས་པ་སྟེ་མ་ཐོབ་པ་རྣམས་འདོད་པར་བྱ་ཞིང་མངོན་པར་འདོད་པར་བྱ་བའོ་ཞེས་པ་འདོད་པའོ། །ཐོབ་པ་རྣམས་ཡོན་ཏན་དུ་བྱ་ཞིང་ཡང་དང་ཡང་དུ་སྤྱད་པར་བྱ་བའོ་ཞེས་པ་ཡོན་ཏན་རྣམས་
སོ། །འདོད་པ་རྣམས་ཀྱང་དེ་ཡིན་ལ་ཡོན་ཏན་རྣམས་ཀྱང་ངོ་ཞེས་པ་འདོད་པར་ཡོན་ཏན་རྣམས་ཏེ། གྱ་ནོམ་པའི་གཟུགས་དང་སྒྲ་དང་དྲི་དང་རོ་དང་རེག་བྱ་རྣམས་སོ། །འདི་རྣམས་ཀྱི་འདོད་པ་ཉིད་ཀྱང་བྱིས་པ་རྣམས་དང་རྣལ་འབྱོར་པ་རྣམས་ཀྱིའོ། །རྣལ་འབྱོར་ཞེས་པ་རྣལ་འབྱོར་བའོ། །ཕྱག་རྒྱ་དང་སྦྱོར་བ་ནི་སློབ་མས་ཕུལ་བའི་ཕྱག་རྒྱ་དང་སྙོམས་པར་འཇུག་པའོ། །པདྨའི་སྣོད་དུ་སྟེ་ཆོས་འབྱུང་དུའོ། །བྱང་ཆུབ་ཀྱི་སེམས་ནི་ཁུ་བ་སྟེ། རྒྱལ་བའི་བདག་ཉིད་སྐྱེས་ཞེས་པ། རང་གི་སྙིང་གའི་ས་བོན་གྱི་འོད་ཟེར་གྱིས་བཀུག་པའི་དེ་བཞིན་གཤེགས་པ་རྣམས་བདག་ཉིད་ཀྱི་སྐུ་ཤེས་རབ་མ་དང་བཅས་པ་བདེ་བ་ཆེན་པོའི་དགའ་སྟོན་གྱིས་ཞུ་བར་གྱུར་ཏེ་རྣམ་པར་སྣང་མཛད་ཀྱི་ལམ་ནས་ནང་དུ་བཅུག་ནས་རྡོ་རྗེའི་ལམ་ནས་ཕྱིར་བྱུང་བར་བསྒོམས་ཤིང༌། དེས་པདྨར་གནས་པའི་སློབ་མ་དབང་བསྐུར་ནས་དེ་ལས་སྐྱེས་པ་པདྨ་ནས་ཕྱུང་ནས་ཕྱིའི་ནམ་མཁར་གནས་པའི་དེ་བཞིན་གཤེགས་པ་རིག་མ་དང་བཅས་པ་རྣམས་ཀྱིས་དང་ལྷ་མོ་རྣམས་ཀྱིས་ཀྱང་དབང་བསྐུར་བཞིན་པ་པདྨ་ལས་ཕྱིར་བྱུང་བའི་སློབ་མ་ཡེ་ཤེས་ཀྱི་ཕྱག་རྒྱ་དང་ལྡན་པ་ལ་དབང་བསྐུར་བར་བྱའོ། །འགྲོ་བའི་གཙོ་བོ་ནི་རྡོ་རྗེ་འཛིན་པའི་ངོ་བོའི་བླ་མའོ། །རིན་ཆེན་དམ་པ་ཞེས་པ་མཆོག་ཏུ་དགའ་བའི་རྒྱུ་བུམ་པའི་དབང་ངོ༌། །ཉམས་དགའ་ནི་ལྷའི་བྱིན་རླབས་དང་སྲུང་བ་ལ་སོགས་པའི་རྒྱུ་ཉིད་ཀྱི་ཕྱིར་རོ། །བཟང་བ་ནི་མཆོག་སྟེ་བསྐྱེད་པའི་རིམ་པ་ཅན་རྣམས་ཀྱི་བདུད་རྩི་བྱེད་པའི་ཕྱིར་དང༌། རྫོགས་པའི་རིམ་པ་ལ་གནས་པ་རྣམས་ཀྱི་ནི་རང་བཞིན་གྱིས་འདུས་བྱས་སོ། །ཁྲག་ཆེན་པོ་ནི་རྡུལ་ལོ། །ག་བུར་ནི་ཤ་ཆེན་པོ་འམ་རྐང་ངམ་མར་རམ་བད་ཀན་སྲ་བའོ། །ཙནྡན་དམར་པོ་ནི་བཤང་བ་སྟེ་ལུས་དང་སེམས་རྒྱས་པ་བསྐྱེད་པས་སྨིན་པར་བྱེད་པའི་ཕྱིར་དང་དགའ་བར་བྱེད་པའི་ཕྱིར་རོ། །རྡོ་རྗེའི་ཆུ་ནི་གཅི་བའོ། །སེམས་ལས་ཡང་དག་བྱུང་ནི་ཁུ་བ་སྟེ། འདུས་པ་ཕྱི་མར་ཡང་གསུངས་པ། རང་བཞིན་གྱིས་ལུས་ཆོས་རྣམས་ལ། །དྲི་མ་ལྔ་ཡིས་རྣམ་པར་མཛེས། །ཡེ་ཤེས་ལྔ་ཡིས་བྱིན་བརླབས་ཕྱིར། །བདུད་རྩི་ལྔ་ཞེས་བྱ་བར་བཤད། །ཅེས་སོ། །དམ་ཚིག་ཅེས་པ་བདུད་རྩི་ལྔའོ། །སྲོག་ཆགས་གསོད་པ་ཞེས་པ་ཉེས་
པར་སྤྱོད་པ་གཞན་རྣམས་ཉེ་བར་མཚོན་པའོ། །གསང་བའི་དབང་བསྐུར་བའི་སྐབས་བྱེད་དེ། སྔོན་དུ་གསུངས་པ་ཞེས་པ་གང་སློབ་མས་ཕུལ་བའོ། །སྤྲུལ་པ་ཞེས་པ་ལྷ་མོའི་གཟུགས་སུའོ། །སིཧླ་ག་བུར་གྱིས་བསྒོས་པ་ནི་རྡུལ་དང་ཁུ་བ་མང་བའོ། །གང་འདུས་པ་ཕྱི་མར་གསུངས་པ། དྲི་དང་མེ་ཏོག་གིས་དཀྲིགས་ནས། །ཞེས་དང༌། བུ་མོ་གསར་བའི་མཁའ་ཡི་ཁམས། །མེ་ཏོག་ཅེས་པར་མངོན་བརྗོད་བྱ། །ཞེས་ཀྱང་ངོ༌། །དེ་ལ་གསར་བ་ནི་རིག་མའི་པདྨའོ། །གསར་བ་ཉིད་ཀྱང་མངོན་པར་གསར་པར་རྒྱས་པ་ཉིད་ཀྱིས་ཏེ། རྡུལ་ཡང་དག་པར་སྐྱེས་པས་ནི། དེ་རྒྱས་པ་དང་ཡོངས་སུ་དག་པར་གྱུར་པར་འགྱུར་ཏེ། རིམ་གྱིས་ནི་ཡོངས་སུ་མཉེས་པར་འགྱུར་རོ། །མེ་ཏོག་གིས་དཀྲིགས་པར་བྱས་ནས་ཞེས་པ་མེ་ཏོག་དང་ལྡན་པར་གྱུར་པ་ལ་འདོད་པ་བྱའོ། །པདྨ་མ་ཟུམ་པ་ནི་རྡུལ་དང་ལྡན་མ་ཐག་པ་ནས་ཉི་མ་བཅུ་གསུམ་ཇི་སྲིད་པར་ཉི་མ་གསུམ་ལས་གོང་དུ་འདོད་དེ། འགྱུར་དུ་ཟིན་ཡང་འགའ་ཞིག་རྩོལ་བ་ཆེན་པོས་ཀྱང་ཁུ་བ་མི་འཛག་པ་དེ་སྤང་པའི་དོན་དུ་འདི་གསུངས་པའོ། །གདོང་བཅིང་བ་ནི་གཉིས་ཀ་དག་མི་མཐོང་བའི་དོན་དུ་སྟེ། མཐོང་ན་མི་དད་པར་དོགས་པས་སོ། །གང་ཞེས་པ་ཁུ་བའོ། །དབབ་པར་བྱ་ཞེས་པ་རྡོ་རྗེ་མཐེ་བོང་དང་མིང་མེད་ཀྱིས་བཙིར་ནས་པདྨ་ལས་བྱུང་སྟེ། དངོས་སུ་གཞུག་པར་བྱའོ། །སློབ་དཔོན་གྱི་ཤེས་རབ་ཀྱང་ལངས་ནས་པདྨ་ཁོ་ནས་དབབ་པར་བྱའོ་ཞེས་པ་ཤེས་རབ་དང་ཐབས་དག་གི་གསང་བདག་གིས་དབང་བསྐུར་བའོ་ཞེས་པ་གསང་བའི་དབང་གསུངས་སོ། །ཤེས་རབ་ཡེ་ཤེས་ཀྱི་དབང་གསུངས་པ། བྱེད་དུ་གཞུག་ཅེས་པ་ལ་སོགས་པའོ། །དེ་ཉིད་ལ་ཞེས་པ་སློབ་མའི་ཕྱག་རྒྱ་ཁོ་ན་ལའོ། །གང་སློབ་མས་ཐམས་ཅད་ཀྱི་ཚེ་ལོངས་སྤྱོད་པའི་དོན་དུ་ཕུལ་བའམ། བདག་ཉིད་ཀྱི་རྣལ་འབྱོར་མ་དེ་ལ་མི་མ་ཡིན་ཏེ། དེ་བསྟེན་པས་དམྱལ་བའི་རྒྱུ་ཉིད་ཀྱི་ཕྱིར་རོ། །འཇིགས་རུང་དམྱལ་བ་སྡིག་ཅན་དུ། །བླ་མའི་ཤེས་རབ་མ་བགྲོད་འགྲོ། །ཞེས་གསུངས་པའི་ཕྱིར་རོ། །བཅོམ་ལྡན་འདས་ཀྱིས་གསུངས་པ་ཡང༌། །བླ་མའི་རྫས་ནི་སྲོག་བཞིན་ཏེ། །དེ་ཡི་རིག་མ་བླ་མ་བཞིན། །དེ་ཡི་འཁོར་
ནི་གཉེན་བཞིན་དུ། །མཉམ་པར་གཞག་པས་རྟག་ཏུ་བལྟ། །མཆོད་རྟེན་བཤིག་འདྲའི་སྡིག་འཇིགས་པས། །དེ་ཡི་གྲིབ་མའང་མི་འགོམ་ན། མཆིལ་ལྷམ་གདན་དང་བཞོན་པ་སོགས། །འགོམ་པར་བྱ་བ་སྨོས་ཅི་དགོས། །ཞེས་སོ། །གང་བླ་མའི་གྲིབ་མ་ལ་སོགས་པ་འགོམ་པ་ལ་ཡང་སྡིག་པ་འབྱུང་བ་དེས་བླ་མའི་མཆོག་ཏུ་དགའ་མ་ལ་བླ་མ་བཞིན་དུ་བལྟ་བར་བྱ་སྟེ། གང་ལ་འགོམ་པ་ནི་སྡིག་པ་ཆེན་པོ་ཁོ་ནའོ། །དེ་ཉིད་ཀྱི་ཕྱིར་མཁའ་འགྲོ་མ་རྡོ་རྗེ་གུར་དུ་གསུངས་པ། བླ་མའི་གྲིབ་མ་ཆུད་མ་དང༌། །མཆིལ་ལྷམ་གདན་དང་མལ་སྟན་ལ། །གང་རྣམས་རྨོངས་ཆེན་ལས་འགོམ་བྱེད། །མི་དེ་སྤུ་གྲི་གཅོད་པ་རྣམས། །ལེགས་དབང་བསྐུར་ཡང་སློབ་མ་ནམ། །བླ་མའི་བཀའ་ལ་འོག་མ་བྱེད་པ། །འཇིག་རྟེན་འདིར་ནི་ལྐུགས་པར་འགྱུར། །འཇིག་རྟེན་ཕ་རོལ་དམྱལ་བར་གནས། །སྒྱུ་དང་གཡོ་ཡི་སྦྱོར་བ་ཡིས། །བརྫུན་པའི་གུས་པ་གསལ་བྱེད་ལས། །ཟད་བྱེད་མཛེ་དང་ནད་ཆེན་ཅན། །དམྱལ་སོགས་རྣམས་སུ་སྐྱེ་བར་འགྱུར། །ཞེས་སོ། །གང་ཡང་རིག་མ་སློབ་མས་གསང་བའི་དབང་གི་དོན་ཁོ་ནར་བླ་མ་ལ་ཕུལ་བ་དེ་བླ་མས་རང་ཉིད་ཉེ་བར་སྤྱད་ནས་སློབ་མ་ལ་སྦྱིན་པར་བྱ་ཞིང༌། དེ་ལ་ཡང་སློབ་མས་ཤེས་རབ་ཡེ་ཤེས་མྱོང་བར་བྱ་སྟེ། དེ་ལྟར་ཡང་འདུས་པ་ཕྱི་མར་གསུངས་པ། ཤིན་ཏུ་དད་ཅིང་ཤེས་རབ་ཆེ། །གཟུགས་བཟང་སྒྲུབ་པ་པོ་ལ་དགའ། །རྣལ་འབྱོར་གཅིག་པུའི་བྱ་བ་གོམས། །དམ་ཚིག་རྣམས་ཀྱི་དམ་ཚིག་ཅན། །སྒྲུབ་པ་པོ་ཡིས་བླ་མ་ལ། །ཡོན་གྱི་ཆེད་དུ་དབུལ་བར་བྱ། །བླ་མས་བྱིན་གྱིས་བརླབ་བྱས་ནས། །སྒྲུབ་པོ་དེ་ལ་སྦྱིན་པར་བྱ། །ཞེས་སོ། །སྒྲུབ་པ་པོ་དང་ལྷན་ཅིག་ཏུ། །གང་གིས་ལྷའི་རྣལ་འབྱོར་གཅིག་པུ་གོམས་ཤིང༌། གཅིག་ཀྱང་ཡིན་ལ་བྱ་བ་ཡང་སྟེ་དེ་སྒོམ་པ་དང་སྙོམས་པར་འཇུག་པ་རྗེས་སུ་སྒྲུབ་པའི་མཚན་ཉིད་ཅན་གང་གིས་གོམས་པར་བྱས་པ་དེ་རྣལ་འབྱོར་གཅིག་པུའི་བྱ་བ་གོམས་པའོ། །རྣམ་པར་སྣང་མཛད་ལ་སོགས་པའི་གཟུགས་ཀྱི་སྒྲུབ་པ་པོའི་དམ་ཚིག་ཅན་ཏེ་རང་གི་རིགས་དང་རྗེས་སུ་མཐུན་པའོ། །མ་རྟོགས་པས་ནི་རྣལ་འབྱོར་གཅིག་པའི་བྱ་བ་གོམས་པ་ཁོ་ན་ལས་འདིའི་དམ་ཚིག་ཅན་མ་
འདིའོ་ཞེས་རྟོགས་པར་བྱའོ། །ཡོན་ནི་མི་འཁྱོག་པ་སྟེ་ཡོན་ནི་ཉེ་བར་ཕུལ་བ་འདི་ཉེ་བར་འདུན་པར་བྱེད་དོ། །བྱིན་གྱིས་བརླབས་ནས་རང་ཉིད་ཉེ་བར་ལོངས་སྤྱོད་དེ་བླ་མས་ཡང་སྒྲུབ་པ་པོ་ལ་སྦྱིན་པར་བྱའོ། །དེ་ལྟར་ན་འདི་བྱིན་གྱིས་བརླབས་པར་འགྱུར་རོ། །རོ་མཉམ་ཞེས་པ་ལྷན་ཅིག་སྐྱེས་པའི་བདེ་བའོ། །སློབ་མའི་སྤྱོད་ཡུལ་ནི་སློབ་མས་ཡང་དག་པར་རིག་པར་བྱ་བ་སྟེ། ཇི་ལྟར་འདིར་དེ་ཁོ་ན་ཉིད་རྟོགས་པ་བཞིན་ཏེ། གཟུང་བ་ལ་སོགས་པའི་རྟོག་པ་དང་བྲལ་བས་བྱང་ཆུབ་སེམས་སྤྲོ་བའི་དུས་སུ་བཤད་ཟིན་པའི་སྒྲུབ་པའི་ཁྱད་པར་ལས་བླ་མའི་ཞལ་ལས་རྟོགས་པར་བྱའོ། །གང་བརྟག་པ་གཉིས་པར་གསུངས་པ། མཆོག་ཏུ་དགའ་བ་ཐོབ་པ་ན། །སྣ་ཚོགས་སྤངས་པའི་སྐད་ཅིག་ལ། །སྟོན་པས་གསུངས་པ་སེམས་དཔའ་ཆེ། །བདེ་བ་ཆེན་པོ་གཟུང་བར་བྱ། །ཞེས་སོ། །མཆོག་ཏུ་དགའ་བ་ནི་འདིར་ལྷན་ཅིག་སྐྱེས་པའི་དགའ་བ་ཁོ་ན་སྟེ་སྣ་ཚོགས་སྤངས་པ་ཉིད་ཀྱིས་ཁྱད་པར་དུ་བྱས་པ་ཉིད་ཀྱི་ཕྱིར་རོ། །འབྱུང་བའི་རིམ་པས་དེ་འཐོབ་པ་རྟོགས་པར་བྱའི། །དེ་བྱུང་བ་ན་བླ་མའི་གསུང་སྐབས་མ་ཡིན་ཏེ། ཉེ་བར་མི་མཁོ་བ་ཉིད་ཀྱི་ཕྱིར་རོ། །གཟུང་བར་བྱ་བ་ནི་ངེས་པར་གཟུང་བར་བྱ་བའོ། །འདིར་ཡང་མྱོང་བར་སྨྲ་བ་རྣམས་ནི་དེ་ཁོ་ན་བདེ་བ་ཆེན་པོ་མྱོང་བ་དེ་ཁོ་ན་ཉིད་དུ་སྨྲའོ། །དབུ་མ་པ་རྣམས་ནི་ཐབས་ངེས་ཆོས་ཐམས་ཅད་བསམ་གྱིས་མི་ཁྱབ་པ་ཉིད་དུ་བརྗོད་ཅིང༌། དེའི་ཕྱིར་དེ་ཁོ་ན་བཞི་པར་འཆད་དོ། །དེས་ཅི་ཞེ་ན་གསུངས་པ། རང་གིས་རིག་བྱ་ཞེས་པ་ལ་སོགས་པ་སྟེ། གང་གི་ཕྱིར་རོ་མཉམ་པར་རང་གིས་རིག་པ་བསྒོམས་པས་ཡེ་ཤེས་འབྲས་བུར་གྱུར་པར་འགྱུར་ཏེ། ཉེ་བར་མ་མཚོན་པའི་ཕྱིའི་སྒོམ་པ་མི་འཐད་དོ་ཞེས་པ་དགོངས་པའོ། །འབྲས་བུའི་ཡེ་ཤེས་ཁོ་ན་ཁྱད་པར་དུ་བྱེད་དེ། རང་གཞན་ཡང་དག་རིག་པ་སྤངས། །བླང་བྱ་དང་དོར་བྱ་ལ་སོགས་པའི་རྣམ་པར་རྟོག་པ་དང་བྲལ་བའི་ཕྱིར་རོ། །དེ་ཉིད་ཀྱི་ཕྱིར་མཁའ་མཉམ་སྟེ་སྤྲོས་པ་མེད་པའོ། །རྔུལ་དང་བྲལ་བ་སྟེ་སྒྲིབ་པ་གཉིས་མེད་པའི་ཕྱིར་རོ། །སྟོང་པ་སྟེ་རང་བཞིན་མེད་པའོ། །གང་གི་ཕྱིར་དངོས་དང་དངོས་མེད་བདག་ཉིད་དེ། འབྱུང་བས་ན་
དངོས་པོ་སྟེ་གཟུགས་ལ་སོགས་པ་རྣམས་དང༌། དེ་རྣམས་ཀྱི་དངོས་མེད་ནི་མ་སྐྱེས་པ་སྟེ་དེའི་བདག་ཉིད་དོ། །ཡང་ན་དངོས་པོ་ནི་རྣལ་འབྱོར་པའི་ལུས་སོ། །དངོས་མེད་ནི་དེ་ཁོ་ནའི་ཚོར་བ་ལ་སོགས་པ་སྟེ། དེ་དག་འདིའི་བདག་ཉིད་ཡིན་པ་ཞེས་པ་ནི་དེ་སྐད་གསུངས་སོ། །མཆོག་ནི་དོན་དམ་པའོ། །སྲོག་ཅེས་པ་ནི་འཚོ་བ་སྟེ། དེ་དང་བྲལ་ན་འཚོ་བ་མེད་པ་ཉིད་ཀྱི་ཕྱིར་རོ། །འགྱུར་མེད་དམ་པ་ནི་ཐོག་མ་དང་ཐ་མ་མེད་པ་ཉིད་ཀྱི་ཕྱིར་རོ། །ཐམས་ཅད་ཁྱབ་པ་ནི་ཆོས་ཐམས་ཅད་བྱང་ཆུབ་ཀྱི་སེམས་ཀྱི་རང་བཞིན་ཉིད་ཀྱི་ཕྱིར་རོ། །སངས་རྒྱས་ཡེ་ཤེས་ཅན་ནི་རྣམ་པར་སྣང་མཛད་ལ་སོགས་པའི་ངོ་བོ་མེ་ལོང་ལྟ་བུ་ལ་སོགས་པའི་ཡེ་ཤེས་དང་ལྡན་པའི་ཕྱིར་རོ། །དཔལ་ཧེ་རུ་ཀ་ནི་གཉིས་སུ་མེད་པའི་ཡེ་ཤེས་ཕུན་སུམ་ཚོགས་པས་རྒྱུ་དང་རང་བཞིན་དང་འབྲས་བུར་སྒྲོ་འདོགས་པ་དང་བྲལ་བའི་ཕྱིར་རོ། །དེ་ཉིད་ཀྱི་ཕྱིར་བྱང་ཆུབ་ཀྱི་སེམས་རྒྱུའི་རྒྱུད་ཀྱི་ངོ་བོ་ལས་སྣ་ཚོགས་སྐྱེ་སྟེ། དེའི་བདག་ཉིད་ཀྱི་ཕྱིར་ཉོན་མོངས་པ་དང་ལས་འབྱུང་བའི་ཕྱིར་རོ་ཞེས་པ་འདི་གསུངས་པ། དངོས་དང་ཞེས་པ་ལ་སོགས་པས་སོ། །དངོས་པོ་ནི་བྱིས་པའི་བར་གྱི་དངོས་པོའི་ཐ་སྙད་ཀྱི་ཡུལ་ཉིད་ཀྱི་ཕྱིར་རིགས་པའི་ངོ་བོ་ལུས་སོ། །དངོས་མེད་ནི་ཕྲ་བའི་དངོས་པོ་སེམས་དང་སེམས་ལས་བྱུང་བའི་ངོ་བོའོ། །ཉེ་བར་མཚོན་པ་ལས་བར་མ་ཡང་དག་གི་རང་བཞིན་དུ་རིག་པར་བྱའོ། །དེ་ལྟར་ན་ལུས་དང་ངག་དང་སེམས་རྣམས་གསུངས་སོ། །གཞན་རྣམས་ནི་དབང་པོ་རྣམས་སོ། །གང་རྣམས་དེ་རྣམས་ཞེས་པ་འདིས་བརྟན་པ་ལ་སོགས་པ་རྣམས་དང་གཡོ་བ་གཞན་སྲོག་ཆགས་རྣམས་བརྗོད་དོ། །དེ་སད་དུ་ཡང་བརྟག་པ་གཉིས་པར་གསུངས་པ། དམན་པ་ཕྲ་བའི་དངོས་པོ་སྟེ། །མཆོག་ནི་དངོས་པོར་བརྗོད་པར་བྱ། །བར་མ་གཉིས་ཀ་སྤངས་པའོ། །གཞན་རྣམས་ཞེས་པ་དབང་པོ་དྲུག །གང་རྣམས་དེ་རྣམས་བརྟན་དང་གཡོ། །ཞེས་སོ། །དངོས་པོ་ལ་སོགས་པ་འདི་རྣམས་བསྒོམ་པས་བདེ་བ་ཆེན་པོའི་རང་བཞིན་ཉིད་དུ་འགྲུབ་པོ། །བྱང་ཆུབ་ཀྱི་སེམས་ཁོ་ན་ནི་རྨི་ལམ་ལ་སོགས་པ་ན་བཞིན་དུ་དེ་དང་དེའི་རྣམ་པར་སོ་སོར་སྣང་བ་རྣམས་ཏེ། དེ་བདེ་བའི་རང་བཞིན་ཉིད་ན་དེ་རྣམས་ཀྱང་དེའི་
རང་བཞིན་ཉིད་དུ་གྲུབ་པ་ཁོ་ན་སྟེ། ཆུ་བསིལ་བ་ཉིད་ན་དེའི་རང་བཞིན་ཆུ་རླབས་རྣམས་བཞིན་ནོ་ཞེས་དགོངས་པའོ། །དེ་ཉིད་ཀྱི་ཕྱིར་ཡང་བྱང་ཆུབ་ཀྱི་སེམས་ལས་དེའི་རང་བཞིན་དགའ་བ་བཞི་རྣམས་སྤྲོ་བར་བྱེད་དོ་ཞེས་གསུངས་པ། དགའ་བ་ཞེས་པ་ལ་སོགས་པའོ། །དཔའ་བོ་ནི་སྒྲུབ་པ་པོ་སྟེ་རང་གཞན་དག་ཕ་རོལ་དུ་འགྲོ་བའི་དོན་དུ་བརྩོན་འགྲུས་བརྩམས་པ་ཉིད་ཀྱི་ཕྱིར་རོ། །དེ་ཁོ་ན་དགའ་བ་སྟེ། དགའ་བ་ལས་གཞན་པའི་བདེ་བ་སྤྱོད་པ་པོ་མི་སྲིད་པའི་ཕྱིར་རོ། །མཆོག་ཏུ་དགའ་བ་རྣལ་འབྱོར་མ། །ཞེས་པ་ཤིན་ཏུ་དགའ་བའི་ཀུན་དགའ་དོན་དུ་གཉེར་བར་བྱ་བ་ཉིད་ཀྱི་ཕྱིར་རོ། །རབ་རྩེའི་དགའ་བ་ནི་ཁྱད་པར་དགའ་བ་སྟེ་ཁྱད་པར་གྱི་ངོ་བོས་རབ་ཏུ་རྩེ་བ་ན་དགའ་བའི་ཕྱིར་རོ། །མཐའ་དག་ཅེས་པ་ཤེས་རབ་དང་ཐབས་ཀྱི་ངོ་བོ་སྟེ། དེའི་ཚེ་བུད་མེད་དང་སྐྱེས་པ་དག་བསམ་པ་མཚུངས་པ་ཉིད་ཀྱི་ཕྱིར་རམ། དགའ་བ་དང་། མཆོག་གི་ངོ་བོའི་དཔའ་བོ་དང་རྣལ་འབྱོར་མ་དག་གི་འདུ་བའི་གནས་ཉིད་ཀྱི་ཕྱིར་རོ། །དེ་བདེ་བའི་ཐབས་ཅན་ཞེས་པ། རབ་ཏུ་རོལ་པའི་དགའ་བའི་བདེ་བ་དེ་འདིའི་ཐབས་ཏེ་དེ་མ་ཐག་པའི་རྒྱུ་ཡིན་པའོ་ཞེས་པས་དེ་བདེའི་ཐབས་ཅན་ཡང་འདི་ཡིན་ལ་ཐམས་ཅད་རིག་པ་ཐམས་ཅད་མཁྱེན་པ་ཡང་སྟེ། བཅོམ་ལྡན་འདས་ནི་ལྷན་ཅིག་སྐྱེས་པའི་དགའ་བའི་ངོ་བོ་ཉིད་ཀྱི་ཕྱིར་རོ། །འདི་རྣམས་ཀྱི་ངོ་བོ་མཚོན་པའི་ཆེད་དུ་གསུངས་པ། དང་པོ་ཞེས་པ་ལ་སོགས་པའོ། །དགའ་བ་ཙམ་ནི་ཕུལ་དུ་བྱུང་བ་མ་ཡིན་པ་བདེ་བ་ཆུང་བ་རྣམ་པར་སྣ་ཚོགས་པ་གཟུང་བ་དང་འཛིན་པའི་རྣམ་པར་རྟོག་པ་ཡོད་པར་གྱུར་པའི་ཕྱིར། འཁྱུད་པ་དང་འོ་བྱེད་པ་ལ་སོགས་པ་རྣམས་ཀྱིས་པདྨ་དང་རྡོ་རྗེ་དག་ཡང་ཡང་དུ་རེག་པས་འདོད་པ་ཕུལ་དུ་བྱུང་བའི་མཚན་ཉིད་ཅན་རྡོ་རྗེ་དང་པདྨ་དྲུད་པའི་མཐར་ཐུག་པ་སྟེ། ཤེས་རབ་བཅུ་དྲུག་ལོན་པ་ལ། །ལག་པ་དག་གིས་འཁྱུད་བྱས་ནས། །དྲིལ་བུ་རྡོ་རྗེ་མཉམ་སྦྱོར་ལས། །སློབ་དཔོན་གྱི་ནི་དབང་དུ་འདོད། །ཅེས་བརྟག་པ་གཉིས་པར་གསུངས་པའི་ཕྱིར་རོ། །མཆོག་ཏུ་དགའ་བ་ཡང་གོང་ནས་གོང་དུ་བདེ་བ་འདོད་པའི་མཚན་ཉིད་ཅན་དགའ་བ་ལས་ཕུལ་དུ་བྱུང་བ་ཉིད་ཀྱིས་བཟློག་པའི་བདེ་བའི་ཡེ་ཤེས་ཉེ་བར་
ལོངས་སྤྱོད་པ་རྣམ་པར་སྨིན་པའི་ངོ་བོ་སྟེ། སྲབ་པར་གྱུར་པའི་གཟུང་བ་དང་འཛིན་པའི་རྟོག་པ་གཉིས་ཀྱིས་བསྒྲིབས་པ་ཉིད་ཀྱི་ཕྱིར་རོ། །ཁྱད་པར་དགའ་བར་བཤད་ཅེས་པ་ཁྱད་པར་དུ་འཕགས་པར་དགའ་བ་སྟེ། བདེ་བ་འདོད་པའི་ངོ་བོ་ཉིད་ཆགས་པ་དང་བྲལ་བའི་ཕྱིར་རྩོལ་བ་དང་བྲལ་བའི་མཚམས་ཁྱད་པར་དགའ་བ་འབྱུང་བར་འགྱུར་བའི་བདེ་བ་ཆེན་པོའི་ལྟ་བ་ཉེ་བར་མཚོན་པ་འདི་སྟེ་དེའི་བདེ་བ་བདག་གིས་བཤད་དོ་ཞེས་པ་རྣམ་པར་ཉེད་པའི་ངོ་བོ་རབ་ཀྱི་གནས་སྐབས། བདེ་བ་ལ་ཆགས་པའི་ངོ་བོར་འཛིན་པའི་རྣམ་པར་རྟོག་པ་དང་ལྡན་པ་དེ་དང་བྲལ་བའི་མཚམས་ཏེ། བརྟག་པ་གཉིས་པར་ཇི་སྐད་གསུངས་པ། གསུམ་པ་འདོད་ཆགས་ཉམས་པའི་ཕྱིར། །ཞེས་སོ། །བཞི་པ་ལྷན་ཅིག་སྐྱེས་ཞེས་པ་ལྷན་ཅིག་སྐྱེས་པའི་དགའ་བ། ཀུན་རྫོབ་པའི་བྱང་ཆུབ་སེམས་ཀྱི་རང་བཞིན་རང་གི་དངོས་པོ་སྟོང་པ་བདེ་བ་ཆེན་པོའི་མྱོང་བ་རྣམ་པར་རྟོག་པ་མེད་པ་སྟེ། དེ་ཉིད་ཀྱི་ཕྱིར་བདེ་བའི་ཆགས་པ་སྤངས་པ་དང་དེ་ལས་བཟློག་པའི་མངོན་པར་ཞེན་པ་དང་བྲལ་བའོ། །དེ་གསུངས་པ། །མཚན་ཉིད་བྲལ་བ་གསུམ་ལས་གཞན། །ཆགས་དང་ཆགས་བྲལ་རྣམ་པར་སྤངས། །ཞེས་སོ། །དེ་ཅི་འདི་མཐོང་བའི་ལམ་ཡིན་ན་མ་ཞེ་ན། དེ་ལྟ་མ་ཡིན་ཏེ། ཐབས་ཀྱི་ཁྱད་པར་ལས་དང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་དང་བླ་མའི་བྱིན་རླབས་ལས་འཐོབ་པའི་ཕྱིར་རོ། །རང་གི་ངང་གིས་འཐོབ་ན་ནི་དེ་ལྟར་འགྱུར་རོ། །དེ་ཁོ་ན་དབུགས་དབྱུང་བ་གཉིས་སུ་སྨྲ་སྟེ། བདེ་བ་ཆེན་པོའི་ཡེ་ཤེས་དང་སྟོང་པ་ཉིད་དག་དེའི་བདག་ཉིད་ཀྱི་ཕྱིར་ཕན་ཚུན་རྒྱས་བཏབ་པ་དག་མི་བསྐྱོད་པ་དང་རྡོ་རྗེ་འཛིན་པའི་ངོ་བོ་ཉིད་ཀྱི་ཕྱིར་དེ་བཞིན་གཤེགས་པ་དང་རྡོ་རྗེ་འཛིན་པར་གདོན་མི་ཟ་བར་འབྱུང་བར་འགྱུར་རོ་ཞེས་པ་དེའི་ལམ་ཐོབ་པའི་ཕྱིར་ཞེས་པ་ནི་དེ་བཞིན་གཤེགས་པའི་དབུགས་དབྱུང་དང་རྡོ་རྗེ་འཛིན་པའི་དབུགས་འབྱུང་བ་སྐྱེད་པར་བྱེད་པ་ཉིད་ཀྱི་ཕྱིར་རོ། །ཇི་སྐད་དུ་གསུངས་པ། ཐབས་དང་ཐབས་བྱུང་དབྱེ་བ་ཡིས། །བཞི་པའི་དོན་ནི་རྣམ་གཉིས་འདོད། །གཅིག་ནི་དེ་བཞིན་གཤེགས་དངོས་གྲུབ། །གཞན་ནི་རྡོ་རྗེ་འཛིན་པར་འདོད། །ཅེས་སོ། །འོ་ན་ལྷན་ཅིག་སྐྱེས་པའི་རྗེས་ཐོགས་སུ་ཁྱད་པར་གྱི་
དགའ་བ་རིགས་ཏེ། ཇི་སྐད་དུ་བརྟག་པ་གཉིས་པར་གསུངས་པ། ལྷན་ཅིག་སྐྱེས་དགའི་རང་བཞིན་པ། །མཆོག་མཐའ་ཁྱད་དགའ་དང་པོ་ཅན། །ཞེས་སོ་ཞེ་ན། མ་ཡིན་ཏེ། མཆོག་གི་མཐའ་ཁྱད་དགའ་ནི་གང་གི་དང་པོ་ཡིན་པ་སྟེ། མཆོག་གི་རྗེས་སུ་ཁྱད་པར་དགའ་བ་དང་དེའི་རྗེས་སུ་ལྷན་ཅིག་སྐྱེས་པའོ་ཞེས་དོན་གྱི་ཤུགས་ལས་སོ། །གང་མཆོག་གི་མཐའ་དང་ཁྱད་དགའི་དང་པོ་སྟེ། མཆོག་དང་ཁྱད་པར་དགའ་བ་དག་གི་བར་རོ་ཞེས་དོན་འཆད་པ་དེ་ནི་མི་འཐད་དེ། ཁྱད་དགའ་དང་པོར་མཚོན་པར་བྱ། །དེ་ཡང་དགའ་བ་གསུམ་སྤངས་པ། །ཞེས་པའི་གསུང་ལས་སོ། །འདི་ནི་ཁྱད་དགའ་ཡང་འདི་ཡིན་ལ། དང་པོ་ཡང་ངོ་ཞེས་པས་ཁྱད་པར་དགའ་བའི་དུས་ཁོ་ན་ལྷན་ཅིག་སྐྱེས་པ་ཉེ་བར་འཆར་བ་དང་པོ་ཁོ་ནར་མཚོན་པར་བྱའོ་ཞེས་བསྒྲུབས་ཏེ། ལྷན་ཅིག་སྐྱེས་པ་ཤར་བ་ན་ནི་རྣམ་པར་རྟོག་པ་ཐམས་ཅད་ནུབ་པའི་རང་བཞིན་ཉིད་ཀྱི་ཕྱིར་ག་ལ་མཚོན། དེ་ཉིད་ཀྱི་ཕྱིར་ཡེ་ཤེས་རྡོ་རྗེ་ཀུན་ལས་བཏུས་པ་རྣལ་འབྱོར་ཆེན་པོའི་རྒྱུད་དུ་དང༌། རིམ་པ་ལྔ་པར་གསུངས་པ། སྒྱུ་མ་རྣམས་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཡེ་ཤེས་གསུམ་གྱི་དབྱེ་བ་འདི། །འདི་ལ་གསལ་བར་མཚོན་པར་འགྱུར། །ཞེས་པ་འདིས་དང༌། རིམ་པ་ལྔ་པར། སྣང་བ་མཚན་མོའི་ཆ་ཡིན་གསལ་བའི་ཉི་མའི་འོད་ཅན་ཉིན་མོ་སྣང་བ་མཆེད་པར་འགྱུར། །མཚམས་ནི་སྣང་བ་ཐོབ་པ་རང་བཞིན་རང་ཉིད་རྣམས་ཀྱིས་ལན་ཅིག་མིན་པར་སྦྱོར་བ་འདིའོ། །མཚན་མོ་མ་ཡིན་མཚམས་ཀྱང་མ་ཡིན་ཉིན་མོར་ཡང་ནི་མ་ཡིན་མི་འགྱུར་རང་བཞིན་བྲལ་བ་གང༌། །དེ་འདི་བྱང་ཆུབ་སྐད་ཅིག་ཐུབ་མཆོག་གིས་གསུངས་རྣལ་འབྱོར་པ་རྣམས་ཁོ་ནའི་རྟོགས་བྱའོ། །ཞེས་པ་འདིས་ཀྱང་དགའ་བ་གསུམ་མཚོན་པ་དང་བཞི་པ་མི་མཚོན་པར་གསུངས་སོ། །བཅོམ་ལྡན་འདས་ཀྱིས་ཀྱང༌། མཚན་ཉིད་བྲལ་བ་གསུམ་ལས་གཞན། ཞེས་པ་འདིས་སོ། །དེའི་ཕྱིར་ཅི་ལྟར་ལྷན་ཅིག་སྐྱེས་པའི་རྗེས་སུ་ཁྱད་དགའ་སྐྱེ་སྟེ། མཚོན་པར་མི་ནུས་པ་ཉིད་ཀྱི་ཕྱིར་རོ། །ཁྱད་དགའི་དེ་མ་ཐག་པའི་རྗེས་སུ་དྲན་པ་ཁོ་ནས་མཚོན་པ་ཉིད་ན་ཉམས་སུ་མྱོང་བའི་ཐབས་མ་བསྟན་པར་འགྱུར་རོ། །ལྷན་ཅིག་
སྐྱེས་པ་འཆར་བའི་གནས་ལ་ནི་ལོག་པར་རྟོག་པ་མེད་པ་ཁོ་ནའོ། །འོ་ན་དང་པོར་ཡང་ཅིའི་ཕྱིར་མཚོན་དེ་ཉམས་སུ་མ་མྱོང་བ་ཉིད་ཁོ་ནའི་ཕྱིར་ཞེ་ན། མ་ཡིན་ཏེ་ཐོ་རངས་ཀྱི་དུས་སུ་མཚམས་བཞིན་ནོ། །འོ་ན་དེ་ལྟ་ན་ཡང་དེའི་ངོ་བོ་ཉེ་བར་མ་མཚོན་པ་ཁོ་ནའོ་ཞེ་ན། བདེན་ཏེ། ཉམས་སུ་མྱོང་བའི་ཐབས་ནི་འདི་ལྟར་ཉེ་བར་བསྟན་པར་བྱའོ། །འོ་ན་དེ་ལྟ་བུ་ཐབས་སུའང་འགྱུར་བར་འོས་པ་མ་ཡིན་ཏེ། དེ་ནས་བཟུང་ནས་དེ་ཉེ་བར་མཚོན་པར་མངོན་པར་ཞེན་པ་འདི་ལ་དེ་མི་སྲིད་པའི་ཕྱིར་རོ་ཞེ་ན། བདེན་ཏེ། གལ་ཏེ་དེ་ལྟར་གྱུར་ནའོ། །དེར་ནི་དེ་ལྟར་འབྱུང་བཞིན་པ་ན་ཇི་ལྟར་བྱ་བ་དེ་ལྟར་བླ་མ་རྣམས་གསུང་བར་འགྱུར་རོ། །དེ་ལྟར་འདོད་པ་གཉི་ག་ལ་ཡང་ཉེ་བར་མཚོན་པའི་རིམ་པ་གསལ་བར་བྱས་སོ། །དེ་ལྟར་དེ་ཁོ་ན་ཉིད་ཀྱང་བསྟན་པར་བྱའོ། །དེ་ལ། །མཆོག་མཐའི་ཁྱད་དགའ་དང་པོ་ཅན། ཞེས་པ་འདི་ལ་ཡང་མཆོག་གི་མཐའ་ནི་མཆོག་མཐའ་སྟེ། གང་གི་དང་པོ་ཁྱད་དགའ་ཡིན་པ་ཞེས་པ་ཁྱད་དགའ་དང་པོ་ཅན་ཏེ། མཆོག་དང་ཁྱད་དགའ་ངག་གི་མཐའོ་ཞེས་པའི་དོན་ཏོ། །དེ་ཁོ་ན་ཉིད་དེ་ཅི་འདྲ་ཞེས་འདྲི་བ་ལ། ཐོག་མ་ཐ་མ་དབུས་མེད་པ། །སྲེད་མེད་མྱ་ངན་འདས་པ་མེད། །འདི་ནི་མཆོག་ཏུ་བདེ་ཆེན་པོ། །གཞན་མིན་བདག་ཀྱང་མ་ཡིན་པའོ། །ཞེས་པ་དང་པོ་དང་ཐ་མ་དང་དབུས་རྣམས་ཏེ་སྐྱེ་བ་དང་འཇིག་པ་དང་གནས་པ་རྣམས་བཀག་པ་ལས་ཆོས་ཐམས་ཅད་སྟོང་པ་ཉིད་ཁོ་ན་འདིར་བདེ་བ་ཆེན་པོ་དང་རོ་གཅིག་པ་ཐབས་འདིས་མངོན་པར་རྟོགས་པར་བྱའོ་ཞེས་པ་ལན་གྱི་དོན་ཏོ། །དགའ་བ་དང་ཁྱད་དགའ་དང་མཆོག་དགའ་རྣམས་བཀག་པ་ལས་དང་མི་འཕོ་བ་ཉིད་ཀྱི་ཕྱིར་སྲིད་པ་དང་ཞི་བ་ལ་མི་གནས་པ་ལྷན་ཅིག་སྐྱེས་པའི་དགའ་བ་ནི་དེ་ཁོ་ན་ཉིད་དོ་ཞེས་པ་ཡང་ནའོ། །དེ་བཞིན་དུ། མཆོག་མཐའ་དབུས་མ་ཁྱད་དགའ་ཡི། །སྟོང་དང་སྟོང་མིན་ཧེ་རུ་ཀ །ཞེས་པ་འདིར་མཆོག་དགའི་མཐའ་གང་ཞིག་དབུས་ཡིན་པ་ཁྱད་དགའ་སྟེ། དེའི་བར་མ་ཆད་པ་ཉིད་ཀྱིས་ན་འབྲེལ་པ་ཅན་དུ་མཚོན་པར་བྱ་བ། རང་གི་ངོ་བོ་དང་བྲལ་བའི་ཕྱིར་སྟོང་པ་དང༌། དེ་ལྟར་ཡང་བརྗོད་དུ་མེད་པའི་ཕྱིར་སྟོང་མིན་ཏེ། གཉིས་དང་བྲལ་བས་ན་བདེ་བ་ཆེན་པོའི་ངོ་བོར་གནས་པའི་ཕྱིར་
ལ། དེ་ཁོ་ན་ཉིད་བཅོམ་ལྡན་འདས་ཧེ་རུ་ཀའོ་ཞེས་པའི་དོན་ཏོ། །མཆོག་དང་ཁྱད་དགའ་དག་དབུས་སུ། །མཚོན་བྱ་བ་ལྟས་ནས་བསྟན་པར་བྱོས། །ཞེས་པ་འདི་གལ་ཏེ་སོ་སོའི་སྐྱེ་བོའི་ངག་ཡིན་ནའོ་ན་འདི་ལ་གུས་པས་ཅི་ཞིག །ཅི་སྟེ་ལུང་ཡིན་ན་དེའི་ཆ། དབུས་མ་དགའ་བ་ཙམ་ཉིད་དེ། །ཞེས་བརྟག་པ་གཉིས་པར་གསུངས་པའི་ཕྱིར། དགའ་བ་དང་མཆོག་དགའ་དང་ཁྱད་པར་གྱི་དགའ་བ་རྣམས་ཡོད་པ་ན་ཉེ་བར་འཆར་བའི་ལྷན་ཅིག་སྐྱེས་པ་མཚོན་བྱའོ་ཞེས་པའི་དོན་ཏོ། །ཡང་ན་དྲུག་པ་ནི་ངེས་པར་འཛིན་པ་ལ་སྟེ། མཆོག་ནི་རབ་སྟེ་ལྷན་ཅིག་སྐྱེས་པའོ། །གཉིས་དག་གི་དབུས་སུ་མཆོག་དེ་མཚོན་པར་བྱའོ་ཞེས་པའི་དོན་ཏོ། །བདེ་བ་མཆོག་ནི་མཆོག་དགའ་སྟེ་འདིར་ལྷན་ཅིག་སྐྱེས་པའི་དགའ་བ་ཁོ་ནའོ། །མཆོག་དགའ་ཡང་དག་ཐོབ་པ་ན། །སྣ་ཚོགས་སྤངས་པའི་སྐད་ཅིག་ལ། །ཞེས་གསུངས་པའི་ཕྱིར་རོ། །ཕྱག་རྒྱ་བཞི་པའི་རྗེས་སུ་འགྲོ་བའི་གཞུང་ནི་སོ་སོ་སྐྱེ་བོ་གདམས་ངག་མི་ཤེས་པ་ཁོ་ནས་བྱས་པ་སྟེ། ཕན་ཚུན་འགལ་བ་ནི་འཕགས་པ་ན་རྣམས་ཀྱིས་མི་སྦྱོར་བས་སོ། །དེ་ལྟར་ནི་འཕགས་པ་ཀླུ་སྒྲུབ་ཞབས་ཀྱིས་རིམ་པ་ལྔ་པའི་དོན་གསལ་བར་བྱེད་པའི་འཕགས་པ་ཤཱཀྱ་བཤེས་གཉེན་ཞབས་ཀྱིས་གསུངས་པ། སྟོང་པ་ཉིད་དང་ཤིན་ཏུ་སྟོང༌། །གསུམ་པ་སྟོང་པ་ཆེན་པོ་དང༌། །བཞི་པ་ཐམས་ཅད་སྟོང་པ་ནི། །འབྲས་བུ་རྒྱུ་ཡི་རབ་དབྱེ་ལས། །ཤེས་རབ་ཐབས་ཀྱི་མཉམ་སྦྱོར་ལས། །རྫོགས་པ་ཉེ་བར་དམིགས་པའོ། །རྫོགས་པ་ཉེ་བར་ཐོབ་པ་ལས། །ཐམས་ཅད་སྟོང་པ་འོད་གསལ་བའོ། །རྒྱུ་ཡི་རིམ་པ་རྣམ་དག་ནི། །རྣམ་ཤེས་གསུམ་གྱི་སྦྱོར་བ་ལས། །སྟོང་པ་གསུམ་པོ་སྙོམས་འཇུག་ལས། །གོ་འཕང་བླ་ན་མེད་པ་འཐོབ། །སྣང་དང་སྟོང་དང་ཤེས་རབ་མ། །ཞེས་དང༌། སྣང་བ་མཆེད་པ་ཞེས་གསུངས་པ། །ཤིན་ཏུ་སྟོང་པ་དང་ནི་ཐབས། །ཞེས་དང༌། སྣང་བ་མཆེད་སྦྱོར་ལས་སྐྱེས་པ། །སྣང་བ་ཉེ་བར་ཐོབ་པ་སྟེ། །དེ་བཞིན་ཉེ་བར་ཐོབ་པ་ཉིད། །ཅེས་དང༌། སྒྱུ་མ་རྣམས་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཡེ་ཤེས་གསུམ་གྱི་དབྱེ་བ་འདི། །གསལ་བར་
འདི་ཁོ་ན་ལ་མཚོན། །ཆགས་པ་ཉིད་དང་ཆགས་བྲལ་དང༌། །དེ་དག་གི་དབུས་གནས་གསུམ་པོ། །ཞེས་སོ། །དེ་བཞིན་དུ་རྣམ་པ་འདི་ལྟ་བུའི་གསུང་རབ་གཞན་ལ་ཡང་ཇི་ལྟར་ཕན་ཚུན་མི་འགལ་བ་ལྟར་དོན་གཞུང་གཟུགས་པར་བྱའོ། །ཁྱད་དགའ་ལྷན་ཅིག་སྐྱེས་པའི་དེ་མ་ཐག་པ་ཉིད་ན། འོ་བྱེད་དེ་བཞིན་འཁྱུད་པ་དང༌། །རྣམ་གཞན་རྣམས་ཀྱིས་སྣ་ཚོགས་པ། །བྷ་ག་ལིང་ག་རབ་སྦྱོར་བས། །རྣམ་པར་སྨིན་པའི་ཡེ་ཤེས་མཆོག །ཕྱག་རྒྱ་རྣམ་པར་ཉིད་བྱ་ཞིང༌། །མཚན་ཉིད་བྲལ་བ་ངེས་མཚོན་བྱ། །དགའ་བ་དང་པོ་ཡེ་ཤེས་དང༌། །མཆོག་ཏུ་དགའ་བ་ཡང་དག་ལྡན། །རབ་དགའི་དགའ་བ་དངོས་གྲུབ་ཆེ། །ལྷན་སྐྱེས་དགའ་བ་བླ་མའོ། །ཞེས་པ་མངོན་པར་བརྗོད་པ་ཕྱི་མའི་རྒྱུད་དོ། །རྒྱུད་གཞན་རྣམས་ལས་ཀྱང༌། །དགའ་བ་དེ་ནི་བསྐྱོད་བྱས་ནས། །བདེ་བ་གནས་དང་མི་འགྱུར་བ། །ཐུན་གཅིག་གམ་ནི་ཉིན་གཅིག་གམ། །ཟླ་ཕྱེད་ཟླ་བ་ལོ་དང་ནི། །བསྐལ་པའམ་བསྐལ་པ་སྟོང་ཕྲག་ཏུ། །ཡེ་ཤེས་མངོན་སྦྱོར་གྱིས་གནས་བྱ། །རྣལ་འབྱོར་པ་ཡིས་ཇི་སྲིད་དུ། །བྱང་ཆུབ་སེམས་གཤེགས་མི་བྱེད་པ། །དེ་སྲིད་དགའ་བ་ལ་སྐྱེས་བདེ། །ཅི་ཡང་རྒྱུན་མི་འཆད་པར་འཐོབ། །དངོས་གྲུབ་ཀུན་གྱི་གཏེར་གྱུར་པ། །བྱང་ཆུབ་སེམས་ནི་ལྷུང་གྱུར་ན། །ཕུང་པོ་རྣམ་ཤེས་བརྒྱལ་གྱུར་ལ། །མ་སྨད་དངོས་གྲུབ་ག་ལ་ཡོད། །ཅེས་དང༌། ཕྱག་རྒྱ་ཆེན་པོ་ཐིག་ལེར་ཡང༌། །བརྟན་པས་མཆོག་ཏུ་བདེ་ཉིད་དེ། །མི་བརྟན་པས་ནི་ག་ལ་བདེ། །ཞེས་དང༌། བཅུ་དྲུག་ཕྱེད་ཕྱེད་ཐིག་ལེ་འཆང༌། །ཞེས་པ་ཕྱག་རྒྱ་ཆེན་པོའི་དངོས་གྲུབ་མི་འཐད་ཅིང་ལྷན་ཅིག་སྐྱེས་པ་ཉམས་སུ་མྱོང་བའི་ཐབས་ཀྱང་སྲིད་པ་མ་ཡིན་ཏེ། ལྷན་ཅིག་སྐྱེས་པའི་ངོ་བོ་ཁོ་ན་འབའ་ཞིག་པ་ནི་མི་འཐད་པ་མེད་དོ་ཞེས་པས་ལུགས་སྔ་མ་ཁོ་ན་གདམས་ངག་རིག་པ་རྣམས་སྨྲའོ། །གང་རྣམས་སྦྱོར་བ་མེད་པའི་བདག་ཉིད་བཙན་ཐབས་ཀྱི་རྣལ་འབྱོར་ཁོ་ན་ལ་ཁྱད་པར་ཅན་གྱི་བདེ་བ་ཁྱད་པར་གྱི་དགའ་བ་གསུམ་པ་དང་ལྷན་ཅིག་སྐྱེས་པ་བཞི་པ་སྟེ། གཞན་པ་ནི། ལྷན་ཅིག་སྐྱེས་པ་གསུམ་པ་དང༌། །ཁྱད་པར་དགའ་བ་བཞི་པའོ། །ཞེས་སྨྲས་པ་དེ་རྣམས་ཀྱི་ཤིན་ཏུ་བབ་ཅོལ་ཁོ་ནའོ་ཞེས་པ་ཤིན་ཏུ་
རྒྱས་པས་ཆོག་གོ །སྐབས་སུ་བབ་པ་རྗེས་སུ་སྦྲེལ་བར་བྱ་སྟེ། དེ་ལ་བོ་ལླའི་རྩ་བ་ནས་ཏེ་གསང་བའི་པདྨ་ལས་རྡོ་རྗེ་ནོར་བུ་ལས་སྔར་དགའ་བ་ལ་སོགས་པ་གསུམ་དང་ནོར་བུའི་དབུས་སུ་ནི་ལྷན་ཅིག་སྐྱེས་པའོ་ཞེས་པ་རྣམ་པར་གཞག་པ་གཅིག་གོ །པདྨའི་ནམ་མཁའ་ནོར་བུ་དང༌། །ཟེ་འབྲུ་དག་བཙིར་བའི་གནས་སུ། །རྡོ་རྗེ་སྐྱིལ་ཀྲུང་གིས་སེམས་ནི། །ནོར་བུའི་ནང་དུ་ཆུད་ལྟ་ཞིང༌། །ཡེ་ཤེས་སྐྱེ་བ་གང་ཡིན་ཏེ། །ཡེ་ཤེས་དེ་ཡི་ངོ་ཤེས་ནུས། །ཞེས་མཆོག་གི་དང་པོའི་རྒྱུད་དུ་གསུངས་པའི་ཕྱིར། ཆུ་སྐྱེས་ཀྱི་དབུས་སྟོང་པའི་ཕྱོགས་སུ་སྟེ་རྡོ་རྗེའི་ཡོངས་སུ་བའི་མཚན་མ་གདེངས་པ་ལའོ། །ཡང་ན་རྡོ་རྗེ་སྐྱིལ་ཀྲུང་དུ་འདུག་པ་ལ་གང་ལས་ནོར་བུའི་ནང་དུ་ཆུད་པའི་ཡེ་ཤེས་ནི་ཤེས་རབ་ཡེ་ཤེས་ཡིན་ཞིང་དེའི་ངོ་བོ་སྟེ་དེ་དང་འདྲ་བའི་ཡེ་ཤེས་ནུས་ཏེ། ཡོངས་སུ་རྫོགས་ཤིང་རྟོགས་པ་མཐར་ཐུག་པར་འཇུག་པའོ། །རྒྱུད་གཞན་རྣམས་སུ་ཡང་ལྷན་ཅིག་སྐྱེས་པ་ནོར་བུའི་ནང་དུ་ཆུད་པ་གསལ་བར་བྱེད་པའི་གསུང་མང་པོ་རྣམས་ཏེ། ཁ་ཅིག་འཆད་པར་ཡང་འགྱུར་རོ། །གང་གི་དྲུད་པའི་མཐར་ཐུག་པ་དགའ་བ་སྟེ། དྲུད་པ་ཡང་བྱང་ཆུབ་ཀྱི་སེམས་ནོར་བུ་དང་ཉེ་བ་ཇི་སྲིད་པའོ། །ནོར་བུའི་མདུན་དུ་རེག་པ་ནི་མཆོག་དགའ་རིན་པོ་ཆེའི་རྩེ་མོ་ཇི་སྲིད་པའོ། །བོ་ལླའི་སྙིང་པོའམ་དེ་རྩེ་མོར། །ཡང་ན་ཐོད་པར་ལྷུང་གྱུར་པའམ། །བར་དུའང་འདོད་པ་མ་ཡིན་ཏེ། །དེ་ཉིད་བླ་མའི་ཞལ་ལས་རིག །ཅེས་པ་རྡོ་རྗེའི་ཁར་ལྷན་ཅིག་སྐྱེས་པ་དང་དེ་ལས་བྱང་ཆུབ་ཀྱི་སེམས་ལྟུང་བ་ན་ཁྱད་པར་དགའ་བ་སྟེ། གཉིས་སོང་ནས་ནི་གཉིས་གནས་པ། །རྡོ་རྗེ་ནས་ལྷུང་པདྨར་རེག །རྡོ་རྗེ་ནས་ལྷུང་མི་བསྐྱོད་པ། །པདྨར་རེག་པ་རྡོ་རྗེ་སྟེ། །འབྲས་བུར་རྒྱུ་ཡིས་རྒྱས་གདབ་པ། །འདི་ནི་བདེ་ཆེན་རྒྱལ་པོའོ། །ཞེས་འདོང་པ་དེ་ནི་མ་བཅད་པར་སྙིལ་བ་སྟེ། གང་ཕྱིར་པདྨ་དང་ནོར་བུ་རེག་པ་ན་ཡང་རྡོ་རྗེ་ནོར་བུ་རེག་པའི་གནས་རྣམས་ཁོ་ནར་བྱང་ཆུབ་ཀྱི་སེམས་ཉམས་སུ་མྱོང་བ་ཉེ་བར་མཁོའོ། །རྡོ་རྗེ་ལས་ཕྱི་རོལ་དུ་བྱུང་བ་ན། པདྨར་རེག་པ་ལ་ཡང་བདེ་བ་མྱོང་བའི་དྲི་ཡང་ཡོད་པ་མ་ཡིན་པས་ཁྱད་དགའ་ནི་དགའ་བ་ཉིད་མ་ཡིན་ཞིང༌། རྡོ་རྗེ་སེམས་དཔའི་བདེ་བ་
ཆེན་པོའི་རྒྱལ་པོ་ཉིད་ཀྱང་མ་ཡིན། བདེ་བ་མྱོང་བ་དང་བྲལ་བའི་རྡོ་རྗེ་སེམས་དཔའ་གང་ཅི་ཡང་ཡོད་པ་ཡང་མ་ཡིན། བདེ་བ་མྱོང་བ་ལས་ཐ་དད་པའི་དུས་སུ་འབྱུང་བ་དེ་དང་བདེ་བ་ཆེན་པོའི་ངོ་བོ་མི་བསྐྱོད་པ་ཕན་ཚུན་རྒྱས་གདབ་པ་ཡང་མ་ཡིན་ཏེ། ཆོས་དང་ཆོས་ཅན་སྟོང་པ་ཉིད་དང་སྙིང་རྗེ་དག་ནི་དེའི་བདག་ཉིད་ཁོ་ན་རྒྱས་འདེབས་པར་བརྗོད་ལ། དུས་ཐ་དད་པ་དག་ལ་དེའི་བདག་ཉིད་མེད་པས་སོ། །རིན་པོ་ཆེ་ལས་ཕ་རོལ་རྡོ་རྗེའི་ཞལ་དུ་ལྷན་ཅིག་སྐྱེས་པའི་བདེ་བ་ཆེན་པོ་ཉམས་སུ་མྱོང་བ་ཡང་མ་ཡིན་ན། དེའི་ཕྱིར་དེ་ཁོ་ན་ཉིད་ཅི་ཞིག་ཏུ་རིག་གང་ཞིག་རིན་པོ་ཆེའི་སྙིང་པོར་རང་དང་གཞན་གྱི་གྲུབ་མཐའ་གཞན་ཐལ་བར་འགྱུར་བར་བྱེད་པ་དེ་ཡང་ཤེས་པ་ཆུང་བའི་རྣམ་པར་རོལ་པ་སྟེ། ནོར་བུའི་དབུས་སུ་སོ་སོ་རང་གིས་རིག་པར་བྱ་བ། རྣམ་པ་ཐམས་ཅད་མཆོག་གིས་ཡོངས་སུ་བསྐོར་བ། ཀུན་རྫོབ་པ། བདེ་བ་ཆེན་པོ་མྱོང་བ། དོན་དམ་པར་རང་བཞིན་མེད་པ། དབུ་མའི་ལམ་གྱི་ངོ་བོ་ནི་མེད་པ་སྟེ། དབུ་མ་ལས་གཞན་པ་རྣམས་སྨྲའོ་ཞེས་པ་ཨུ་ཏ་པུ་ཏྲའི་རྟོག་པ་རྣམས་ལས་ཆེད་ཆེར་བྱེད་པས་ཆོག་གོ །རྣམ་པར་གཞག་པ་གཞན་ནི། གཙུག་ཏོར་ནས་ནི་མཛོད་སྤུ་ཡི། །པདྨར་ཁུ་བ་འོངས་དགའ་བ། །མགྲིན་པ་སྙིང་གར་མཆོག་དགའ་བ། །ཁྱད་པར་དགའ་བར་དེ་ནས་འགྱུར། །སྣ་ཚོགས་དགའ་བྱེད་ལྟེ་བར་ཏེ། །གསང་བའི་པདྨར་གང་འོངས་པའོ། །གསང་གནས་རྡོ་རྗེ་ནོར་བུའི་བར། །ལྷན་སྐྱེས་དགའ་བ་མི་འཕོ་བའོ། །མི་གནས་མྱ་ངན་འདས་པ་སྟེ། །འདོད་ཆགས་ཆེན་པོ་འགྱུར་མེད་གཙོ། །ཆགས་བྲལ་དང་པོ་འཕོ་ལས་འདས། །ཤེས་དེ་མྱ་ངན་འདས་པར་གནས། །ཞེས་དུས་ཀྱི་འཁོར་ལོར་གསུངས་སོ། །དེ་ལ་ཆེན་པོའི་རགས་པའི་རྟོག་པ་མེད་པ་ལས་མཆོག་གིའོ། །འབྲིང་པོའི་རགས་པ་མེད་པ་ལས་ཁྱད་དགའོ། །ཆུང་ངུའི་རགས་པ་མེད་ཙམ་གྱིས་ཕྲ་མོ་ཡོད་ན་ཡང་ལྷན་ཅིག་སྐྱེས་པར་གཞག་གོ །རྣམ་པར་རྟོག་པ་ཕྲ་མོའི་ནི་ཆུང་དུ་དང་འབྲིང་དང་ཆེན་པོ་དང་ཆེན་པོའི་ཆེན་པོའི་དབྱེ་བས་ཐ་དད་པའི་རིམ་པ་ཇི་ལྟ་བར་མེད་པ་ལས་སྔར་བརྗོད་པའི་དགའ་བ་བཞིའོ་ཞེས་མན་ངག་རིག་པ་རྣམས་འདོམས་པར་བྱེད་དོ། །བུད་མེད་རྣམས་ཀྱི་
གསང་བའི་ཆུ་སྐྱེས་ཀྱི་ལྟེ་བ་ནི་ནོར་བུ་ལྟ་བུ་སྟེ། གང་ཕྱག་རྒྱ་ཆེན་པོ་ཐིག་ལེར་གསུངས་པ། ལྟེ་འོག་གཉེར་མ་གསུམ་གྱི་གནས། །གྲུ་གསུམ་པོའོ་དེ་སྟེང་དུ། །གྲུ་གསུམ་ཟེ་འབྲུའི་རྣམ་པ་སྟེ། །རྡོ་རྗེའི་རང་བཞིན་ཅན་དུ་གསལ། །གྲུ་གསུམ་པ་ནི་རྩ་ཀུན་གྱི། །གནས་ནི་མཆོག་ཏུ་བཤད་པའོ། །ཞེས་སོ། །དེ་ལྟར་དབང་བསྐུར་བ་གསུམ་བརྗོད་ནས་བཞི་པ་རིམ་པ་སོ་སོར་བསྒྲུབ་པས་རྟོགས་པར་བྱ་བའི་ཆེད་དང་དགའ་བ་བཞི་རྣམ་པར་དག་པའི་ངོ་བོར་དབང་བཞི་རྣམས་བསྟན་པའི་ཆེད་དུ་གསུངས་པ། དེ་ཡང་ཞེས་པ་ལ་སོགས་པའོ། །བཞི་པ་དེ་ཡང་དེ་བཞིན་ནོ། །ཞེས་པ་ཤེས་རབ་ཡེ་ཤེས་མྱུ་གུར་གྱུར་པའི་བྱང་ཆུབ་ཀྱི་སེམས་དེ་ཉིད་ཡང་སྟེ་ཕྱིས་བཞི་པར་བརྗོད་དོ། །དེ་བཞིན་ཞེས་པ་དེ་འདྲ་བ་ཁོ་ན་སྟེ། ཆོ་ག་ཇི་ལྟ་བས་འཕེལ་བཞིན་པ་སྒྲིབ་པ་མེད་པ་ཉིད་དུ་འགྱུར་བའི་དེ་ཁོན་ཉིད་བླ་མའི་མན་ངག་ལས་ཡན་ལག་བདུན་དང་ལྡན་པའི་ཕྱག་རྒྱ་ཆེན་པོའི་བདག་ཉིད་རྡོ་རྗེ་འཛིན་པ་ཆེན་པོའི་རང་གི་ངོ་བོར་བརྗོད་པར་བྱའོ། །དེ་ཉིད་ཀྱི་ཕྱིར་མཐའ་དྲུག་པའི་འགྲེལ་པར་གསུངས་པ། སྐྱོན་ཐམས་ཅད་ཀྱི་དྲི་མ་འཁྲུད་པས་ན་ཡེ་ཤེས་འཆར་བར་བྱེད་པའི་ཕྱིར་བྱང་ཆུབ་ནི་དབང་བསྐུར་བའོ་ཞེས་སོ། །དེ་ཡང་བསོད་ནམས་དང་ཡེ་ཤེས་ཀྱི་བག་ཆགས་བསགས་པ་རྣམས་ལ་ཤེས་རབ་ཡེ་ཤེས་ཀྱི་དབང་གི་དུས་ཁོ་ནར་གསལ་ཞིང༌། དེ་ལས་གཞན་རྣམས་ལ་ཚིག་གིས་གསལ་བར་བྱའོ། །ཤེས་རབ་ཡེ་ཤེས་ཐབས་སུ་གྱུར་པ་ལྷན་ཅིག་སྐྱེས་པ་མཚོན་བྱེད་མན་ངག་ཇི་ལྟ་བ་བཞིན་ནི་ཡན་ལག་གཞན་དང་ལྡན་པ་གོམས་བཞིན་པ་ནི་མི་འགྱུར་བའི་བདེ་བ་ཆེན་པོ་མཚོན་པར་བྱ་བ་ཕུལ་དུ་དབྱུང་དུ་མེད་པ་ཐབས་ལས་བྱུང་བ་ཡན་ལག་ཡང་དག་པར་རྫོགས་པ་ཉེ་བར་སྐྱེད་དོ། །ལམ་གྱི་གནས་སྐབས་སུ་ཡང༌། གྲུབ་པ་ངའོ་ཞེས་སེམས་ཀྱིས། ཞེས་རྒྱུད་དུ་གསུངས་པའི་ཕྱིར་འབྲས་བུ་དང་རྒྱུ་དག་དབྱེར་མེད་པར་མོས་པས་ཕྱག་རྒྱ་ཆེན་པོའི་ང་རྒྱལ་དང་ལྡན་པས་བསྒོམ་པར་བྱའོ། །དེ་སྐད་དུ་ཡང་དཔལ་འདུས་པ་སྟོང་ཕྲག་ཉི་ཤུ་ལྔ་པར་གསུངས་པ། རྡོ་རྗེ་སྐྱིལ་ཀྲུང་གིས་སེམས་ནི། །ནོར་བུའི་ནང་དུ་ཆུད་ལྟ་བས། །རྒྱུ་མཐུན་ལ་སོགས་བདེ་བ་རྫོགས། །དྲི་མེད་ཇི་སྲིད་དེ་འགྲོའོ། །
དེ་བཞིན་དུ། བྷ་གར་ལིང་ག་རབ་བཞག་ནས། །བྱང་ཆུབ་སེམས་ནི་སྤྲོ་མི་བྱ། །ཁམས་གསུམ་པོ་ནི་མ་ལུས་ནས། །སངས་རྒྱས་གཟུགས་སུ་བསྒོམ་པར་བྱ། །ཞེས་སོ། །བདེ་མཆོག་ཏུ་ཡང༌། ཡིད་ནི་ནང་དུ་ཆུད་པ་ཡིས། །འདོད་པའི་དངོས་གྲུབ་བསྒོམ་པར་བྱ། །ཞེས་སོ། །འདིར་རྡོ་རྗེ་གྱེན་དུ་ལངས་པ་ནི་སྐྱིལ་ཀྲུང་གདན་ཏེ། དེར་ཆ་བཅུ་དྲུག་རྫོགས་པ་རྡོ་རྗེ་ནོར་བུའི་ནང་དུ་ཆུད་པའི་བྱང་ཆུབ་ཀྱི་སེམས་ནི་ཡིད་ནང་དུ་ཆུད་པར་བརྗོད་ཅིང༌། དེས་འཕོ་བ་མེད་པས་དང་ལས་དང་ཡེ་ཤེས་དང་བདེ་བ་ཆེན་པོའི་ཕྱག་རྒྱའི་རྣལ་འབྱོར་གྱིས་ཁམས་གསུམ་པ་སྟེ་བརྟན་པ་དང་གཡོ་བའི་དངོས་པོའི་རང་བཞིན་གྱི་བདག་ཉིད་དུ་མ་ལུས་པར་རྣམ་པ་ཐམས་ཅད་མཆོག་དང་ལྡན་པར། བདེ་བ་ཆེན་པོ་རང་བཞིན་གྱི་ཕྱག་རྒྱ་ཆེན་པོའི་དངོས་གྲུབ་ཀྱི་ཆེད་དུ། ཡོད་པ་དང་མེད་པ་ལས་འདས་པ་ལ་རྟེན་མེད་པ་ཉིད་ཀྱིས་དམིགས་པ་མེད་པའི་བློས་བསྒོམ་པར་བྱའོ། །དེ་གསུངས་པ། རྣལ་འབྱོར་པ་ཡིས་ཇི་སྲིད་དུ། །སྐྱེ་གནས་རྒྱུན་མི་འཆད་སྦྱོར་བས། །བྱང་ཆུབ་སེམས་འདོར་མི་བྱེད་པ། །དེ་སྲིད་བར་དུ་དགའ་མཆོག་འཐོབ། །བདེ་བའི་ངོ་བོ་དེ་ཉིད་ཀྱིས། །ཡང་དག་ལྡན་པའི་སངས་རྒྱས་གཟུགས། །ཇི་སྲིད་ཁུ་བ་བརྟན་འགྱུར་བ། །བདག་ཉིད་རྟག་ཏུ་བསྒོམ་པར་བྱ། །ཞེས་སོ། །དེ་ལྟར་ན་བྱང་ཆུབ་ཀྱི་སེམས་རྡོ་རྗེ་བཅོམ་ལྡན་ནི། རྡོ་རྗེ་སྐྱིལ་ཀྲུང་རྫོགས་སངས་རྒྱས། །སངས་རྒྱས་འགྲོ་བའི་ཆོས་འཛིན་པ་རུ་འགྱུར་ཏེ་གང་ལས། རྣམ་པ་ཐམས་ཅད་རྣམ་པ་མེད། །བཅུ་དྲུག་ཕྱེད་ཕྱེད་ཐིག་ལེ་འཛིན། །ཆ་མེད་ཆ་ལས་འདས་པ་སྟེ། །བསམ་གཏན་བཞི་པའི་རྩེ་མོ་འཆང༌། །འདིར་སངས་རྒྱས་འགྲོ་བའི་ཆོས་ནི་དགའ་བ་གསུམ་པོ་རོ་གཅིག་པ་ལྷན་ཅིག་སྐྱེས་པའི་དགའ་བ་སྟེ། དེ་འཛིན་པ་ནི་དེའི་བདག་ཉིད་ཀྱིས་སོ། །རྣམ་པ་ཐམས་ཅད་མཆོག་དང་ལྡན་པ་ནི་ཀུན་རྫོབ་ཏུ་སྟེ། དོན་དམ་པར་ནི་རྣམ་པ་མེད་པ་རང་བཞིན་མེད་པ་སྟེ། ཐམས་ཅད་དུ་རྣམ་པ་ནི་རང་བཞིན་དུ་བརྗོད་པར་བྱའོ། །དེ་སྐད་དུ་ཡང་འཕགས་པ་ཀླུ་སྒྲུབ་ཞབས་ཀྱིས་གསུངས་པ། རྣམ་བཅས་དངོས་པོ་ཀུན་བརྟགས་དང༌། །རྣམ་པ་
མེད་པ་ཉིད་ང་རྟགས་པ། །གཅིག་བྱས་རྣལ་འབྱོར་པ་ཡིས་དཔྱད། །དེ་ནི་ཟུང་དུ་འཇུག་པར་རིག །ཅེས་སོ། །ཆ་མེད་པ་ནི་ཆ་བཅོ་ལྔའི་མཐར་གནས་པའོ། །ཚེ་ལས་འདས་པ་ནི་ནག་པོའི་ཚེས་གཅིག་ལ་རབ་ཏུ་མ་ཞུགས་པའོ། །འདི་དག་གི་ཐབས་དང་ཐབས་ལས་བྱུང་བའི་བདེ་བ་དག་གི་དེ་ཁོ་ན་ཉིད་ནི་སྟོང་པ་ཉིད་ཁོ་ནའོ། །གང་རྣམས་བདེ་བ་ཁོ་ན་དེ་ཁོ་ན་ཉིད་དུ་རྟོགས་ནས་གནས་པ་དེ་རྣམས་ཀྱི་འཁྲུལ་པ་བསལ་བའི་དོན་དུ་བཅོམ་ལྡན་འདས་ཀྱིས་གསུངས་པ། གང་ཕྱིར་འབྱུང་བ་ཆེ་བདེ་བ། །དེ་ཕྱིར་བདེ་བ་དེ་ཉིད་མིན། །ཞེས་སོ། །འབྱུང་བ་ཆེ་ཞེས་པ་ཁུ་བ་དང་བདེ་བ་དག་དེའི་བདག་ཉིད་ཀྱི་ཕྱིར་རོ། །ལྷན་ཅིག་སྐྱེས་པ་ཡང་རྟག་ཏུ་ཐམས་ཅད་དུ་མི་འབྱུང་སྟེ། དེ་ལྟར་ནི་ལྷན་ཅིག་སྐྱེས་པ་ནི་དངོས་པོའི་རང་གི་ངོ་བོ་སྟེ་དེའི་དོན་དམ་པ་སྟོང་པ་ཉིད་ཁོ་ན་དང༌། ཀུན་རྫོབ་པ་རྟོགས་པའོ། །བདེ་བ་ནི་རྟོགས་པ་ཡིན་མོད་དེ་ལྟ་ན་ཡང་ཐམས་ཅད་ཀྱི་ཚེ་ཐམས་ཅད་དུ་ལྷན་ཅིག་སྐྱེས་པ་མ་ཡིན་ཏེ། སྡུག་བསྔལ་དང་བཏང་སྙོམས་ཉམས་སུ་མྱོང་བའི་དུས་སུ་དང་བསམ་གཏན་བཞི་པ་དང་གཟུགས་མེད་པ་ལ་སྙོམས་པར་འཇུག་པ་རྟོགས་པ་བཞིན་ཉམས་སུ་མ་མྱོང་བ་ཉིད་ཀྱི་ཕྱིར་རོ། །གང་མཚན་ཡང་དག་པར་བརྗོད་པར་གསུངས་པ་ནི། བསམ་གཏན་བཞི་པའི་རྩེ་མོ་འཆང༌། །ཞེས་པ་དེ་ལ་བསམ་གཏན་བཞི་པ་སྟེ། ལྷན་ཅིག་སྐྱེས་པའི་དགའ་བའི་རྩེ་མོ་ལ་སྒྲིབ་པ་མེད་པའི་རྟོགས་པ་མཐར་ཐུག་པ་ལ་དེའི་བདག་ཉིད་ཀྱིས་གནས་པ་ཉིད་ཀྱི་ཕྱིར་དེའི་རང་གི་ངོ་བོ་འཛིན་པའོ་ཞེས་པའི་དོན་ཏོ། །བདེ་བ་ཆེན་པོའི་རང་བཞིན་དུ་མུ་མཐའ་མེད་པའི་ཁམས་གསུམ་པ་སྣང་བར་གྱུར་པ་ན་བསམ་གཏན་ལ་སོགས་པ་ཡང་བདེ་བ་ཆེན་པོའི་རང་བཞིན་ནི་བཅོམ་ལྡན་འདས་ཁོ་ནའི་སྟེ། གཞན་གྱི་མ་ཡིན་ནོ་ཞེས་གསུངས་པ། བཟླས་ཏེ་བཤད་པའི་དོན་ཏོ། །འོ་ན་ཅི་ལྟར་བདེ་བ་ལྷན་ཅིག་སྐྱེས་པར་བརྗོད་ཅེ་ན། ཇི་ལྟར་དམིགས་པ་མེད་པའི་སྙིང་རྗེ་ཆེན་པོ་ནི་དེ་ཁོ་ན་ཉིད་མ་མཐོང་བའི་ཡོད་པ་མ་ཡིན་པ་ལྷག་པར་མོས་པས་བསྒོམ་བཞིན་པ་ནི་དེ་ཁོ་ན་ཉིད་རྟོགས་པ་ལ་རྟོགས་པའི་བདག་ཉིད་ཀྱི་ཕྱིར་ཀུན་རྫོབ་པའི་རང་བཞིན་གྱི་ལྷན་ཅིག་སྐྱེས་
པར་བརྗོད་པ། དེ་ལྟར་བདེ་བ་རེས་འགའ་ཉམས་སུ་མྱོང་བའི་གནས་སྐབས་སུ་དང་ཉམས་སུ་མ་མྱོང་བའི་གནས་སྐབས་སུ་དེ་ཁོ་ན་ཉིད་མ་མཐོང་བས་ལྷག་པར་མོས་པས་སྙིང་རྗེ་ཆེན་པོ་དང་དབྱེར་མེད་པའི་རང་བཞིན་སྟོང་པ་ཉིད་ཀྱི་བདག་ཉིད་རྣམ་པ་ཐམས་ཅད་མཆོག་དང་ལྡན་པར་བསྒོམ་བཞིན་པ་ནི་དེ་ཁོ་ན་ཉིད་རྟོགས་པའི་གནས་སྐབས་ན་འཇིག་རྟེན་ལས་འདས་པ་ནི་རྩོལ་བ་མེད་པ་ཉིད་ཀྱིས་མ་བཅོས་པ་ཉིད་ཀྱིས་ན་ལྷན་ཅིག་སྐྱེས་པར་བརྗོད་དོ། །དེ་ཁོ་ན་ཉིད་མ་རྟོགས་པའི་གནས་སྐབས་སུ་ཉམས་སུ་མྱོང་བ་ཟག་པ་དང་བཅས་པ་མི་བརྟན་པ་མ་རྒྱས་པ་ཡན་ལག་མཐའ་དག་མ་ཡིན་པ་གློག་འགྱུ་བ་བཞིན་དུ་སྐད་ཅིག་ཙམ་པ། འཇིག་རྟེན་པ་ཀུན་རྫོབ་པ་སྟེ། རྩོལ་བ་དང་བཅས་པ་ཉིད་ཀྱིས་ན་བཅོས་མ་ཉིད་ན་ཡང་ལྷན་ཅིག་སྐྱེས་པར་བརྗོད་དེ། ལྷན་ཅིག་སྐྱེས་པའི་གྲིབ་མའི་རྗེས་སུ་བྱེད་པའི་ཉིད་ཀྱི་ཕྱིར་འོད་གསལ་བ་བཞིན་ནོ། །ཇི་སྐད་དུ་ཕྱག་རྒྱ་ཆེན་པོ་ཐིག་ལེར་གསུངས་པ། གང་འདིར་དགའ་བ་དེ་སྣང་བ། །སྣང་བ་མཆེད་པ་མཆོག་ཏུ་བཤད། །ཁྱད་དགའ་ཉེ་བར་ཐོབ་པར་ཤེས། །ལྷན་ཅིག་སྐྱེས་དེ་འོད་གསལ་བའོ། །ཞེས་སོ། །དེ་ལྟར་ལྷན་ཅིག་སྐྱེས་པ་ལས་བྱུང་བའི་དེ་ཁོ་ན་ཉིད་བྱང་ཆུབ་ཀྱི་སེམས་སྟོང་པ་ཉིད་དང་སྙིང་རྗེ་དབྱེར་མེད་པའོ། །དེ་ཅི་འདི་ཤེས་རབ་ཡེ་ཤེས་ལས་གཞན་པ་ཁོ་ནའམ་ཞེ་ན། གཞན་མ་ཡིན་ཏེ། དེ་ཁོ་ནའི་འདི་མི་མཐུན་པའི་ཕྱོགས་བསལ་བས་དེ་ནི་རྣམ་པ་འདི་ལྟ་བུའོ་ཞེས་རང་གི་ངོ་བོ་རབ་ཏུ་གསལ་བའོ། །དེའི་ཕྱིར་ཤེས་རབ་ཡེ་ཤེས་འདི་ཉིད་ཉམས་སུ་མྱོང་ནས་ཡན་ལག་དང་བཅས་པ་སྒོམ་པས་འཕེལ་བ་ནི་བག་ཆགས་དང་བཅས་པའི་རྣམ་པར་རྟོག་པའི་དྲི་མ་རྣམས་དངོས་སུ་འཁྲུད་པའི་ཕྱིར་ཕྱག་རྒྱ་ཆེན་པོའི་དབང་བསྐུར་ཡིན་ཞིང་བཞི་པ་འོད་གསལ་བ་སྟེ། དཔག་བསམ་གྱི་རྐང་འཐུང་བཞིན། མངོན་པར་མཐོ་བ་ལ་སོགས་པའི་འབྲས་བུ་རྣམས་ཀྱིས་སྐལ་པ་ཇི་ལྟ་བ་བཞིན་དུ་ཤེས་རབ་དང་ཡང་དག་པར་སྦྱོར་བའི་དཔལ་བདེ་མཆོག་ལ་སོགས་པའི་གཟུགས་ཀྱི་ལོངས་སྤྱོད་རྫོགས་པའི་སྐུ་ལ་སོགས་པས་འགྲོ་བ་ཚིམ་པར་བྱེད་ཅིང་རྒྱུན་མི་འཆད་པར་མུ་མཐའ་མེད་པའི་དུས་སུ་བཞུགས་ཞེས་གནས་སོ། །དེ་ལྟར་འདི་
ལོངས་སྤྱོད་རྫོགས་པ་དང་ཡང་དག་པར་སྦྱོར་བ་དང་བདེ་བ་ཆེན་པོ་དང་རང་བཞིན་མེད་པ་དང་ཐུགས་རྗེས་གང་བ་དང་རྒྱུན་མི་འཆད་པ་དང་འགོག་པ་མེད་པའི་མཚན་ཉིད་ཀྱི་ཡན་ལག་བདུན་དང་ལྡན་པར་གསུངས་སོ། །འདིར་ཡན་ལག་དང་པོ་གསུམ་ཐེག་པ་གཞན་དང་ཐུན་མོང་མ་ཡིན་པ་སྟེ། གང་གི་ཕྱིར་རྒྱུའི་གནས་སྐབས་སུ་བསྐྱེད་པའི་རིམ་པས། དཔལ་བདེ་མཆོག་ལ་སོགས་པའི་གཟུགས་སུ་བསྒོམ་པར་གསུངས་པ་ཕ་རོལ་ཏུ་ཕྱིན་པའི་ཚུལ་ལ་མེད་པ་སྟེ། མཚན་དང་དཔེ་བྱད་འབར་བའི་ལོངས་སྤྱོད་རྫོགས་པའི་སྐུ་ནི་འབྲས་བུའི་གནས་སྐབས་ཁོ་ནར་གསུངས་པའི་ཕྱིར་རོ། །ཤེས་རབ་དང་སྦྱོར་བ་ཡང་མ་ཡིན་ལ། དེ་ལས་སྐྱེས་པའི་བདེ་བ་ཆེན་པོ་ཡང་མ་ཡིན་ནོ། །ཁ་ཅིག་གི་ནི་སེམས་ལོངས་སྤྱོད་རྫོགས་པ་དང་སྟོང་པ་ཉིད་ཀྱི་ཡེ་ཤེས་ཀྱི་བདག་ཉིད་ཅན་གྱི་ཤེས་རབ་དང་ཡང་དག་པར་སྦྱོར་བ་དང་སྒོམ་པ་ལས་སྐྱེས་པའི་བདེ་བ་ཆེན་པོ་དང་དེ་རང་བཞིན་མེད་པ་ཉིད་དང་དེ་ལས་བྱུང་བའི་སྙིང་རྗེ་ཞེས་པ་དེ་ལྟར་ཡན་ལག་ལྔ་ཐུན་མོང་མ་ཡིན་པའོ་ཞེས་རྣམ་པར་འཇོག་པ་ནི་མི་འཐད་དེ། ཕ་རོལ་ཏུ་ཕྱིན་པའི་ཐེག་པར་ཡང་འདི་མང་དུ་གསལ་བར་མཛད་པ་ཉིད་ཀྱི་ཕྱིར་རོ། །ཅི་སྟེ་སེམས་ནི་བྱང་ཆུབ་ཀྱི་སེམས་ཏེ། རྫོགས་པའི་རིམ་པས་དཔལ་ཧེ་རུ་ཀ་ལ་སོགས་པའི་རང་གི་ངོ་བོར་མོས་པ་དང༌། རང་བཞིན་མེད་པའི་བློ་རྡོ་རྗེ་ཕག་མོ་ལ་སོགས་པ་ཉིད་དུའོ། །དེ་གཉིས་ཀས་ཁྱད་པར་དུ་བྱས་པའི་ལྷ་དང་ཡང་དག་པར་སྦྱོར་བསྒོམ་པས་སྐྱེས་པའི་བདེ་བ་ཆེན་པོ་དང་དེ་རང་བཞིན་མེད་པ་ཉིད་དང༌། རྣམ་པ་འདི་ལྟ་བུའི་ལམ་སྟོན་པས་ཁྱད་པར་དུ་བྱས་པའི་སེམས་ཅན་གྱི་དོན་བྱེད་པ་ཡོད་པའི་ཕྱིར་ཐུགས་རྗེ་ཆེན་པོའོ་ཞེས་པས་ཐུན་མོང་མ་ཡིན་པ་ཉིད་དེ། འདི་རྣམས་ཕ་རོལ་ཏུ་ཕྱིན་པའི་ཐེག་པ་ལ་དེ་ལྟར་མ་བརྗོད་པའི་ཕྱིར་རོ་ཞེ་ན། གལ་ཏེ་དེ་ལྟ་ན་དེ་ལྟར་འགྱུར་བའི་བཅོམ་ལྡན་འདས་པར་སྐབས་སུ་རྣམ་པར་ཆད་པ་མེད་པའི་ཕྱིར་རྒྱུན་མི་འཆད་པ་དང་མཐའ་གཅིག་ཏུ་མྱ་ངན་ལས་འདས་པ་མེད་པའི་ཕྱིར་འགོག་པ་མེད་པ་ཡང་ཐུན་མོང་མ་ཡིན་པའོ་ཞེས་པས་ཡན་ལག་བདུན་རྣམས་ཀྱང་ཐུན་མོང་མ་ཡིན་པར་གསུངས་པར་བརྗོད་ཅིང་སྟེ་བསྐྱེད་པའི་རིམ་
པ་ལ་ཡང་ངོ༌། །ཁ་ཅིག་ལོངས་སྤྱོད་རྫོགས་པའི་ཡན་ལག་ཁོ་ན་ཐབས་ཉིད་དུ་འཁྲུལ་པ་ལས་སྙིང་རྗེའི་ཡན་ལག་ཏུ་སྨྲའོ། །དེ་མི་རིགས་ཏེ། གང་ཕྱིར་སྡུག་བསྔལ་ལས་གདོན་པར་འདོད་པ་ནི་སྙིང་རྗེ་སྟེ། དེ་ཡང་ལས་དང་པོ་པའི་ནི་སེམས་ཅན་ཆོས་ཅན་གྱི་ངོ་བོ་རྣམས་ཁོ་ན་ལ་དམིགས་ནས་སྐྱེ་ཞིང༌། དེ་ནས་བྱང་ཆུབ་སེམས་དཔའ་རྣམས་ཀྱི་རང་བཞིན་མེད་པ་ཉིད་ཀྱི་ཆོས་སྦྱར་བ་ལ་དམིགས་ནས་དང༌། དེ་ནས་རབ་ཏུ་གྱུར་པ་ལས་རྣམ་པར་མི་རྟོག་པ་ཉིད་ཀྱིས་ན་སངས་རྒྱས་རྣམས་ཁོ་ནའི་དམིགས་པ་མེད་པ་ལྷུན་གྱིས་གྲུབ་པ་ལས་རྒྱུན་མི་འཆད་པར་འགྲོ་བ་འདོན་པར་བརྗོད་དོ། །དེ་ལྟར་ཡང་གསུང་བར་འགྱུར་བ། ཡིད་བཞིན་ནོར་ལྟར་མ་ལུས་པའི། །སེམས་ཅན་དོན་བྱེད་སྙིང་རྗེའོ། །ཞེས་སོ། །དམིགས་པ་མེད་པའི་སྙིང་རྗེ་འདི་ཁོ་ན་དབང་པོ་རབ་ལས་དང་པོ་པས་ཀྱང་ལྷག་པར་མོས་པས་སྒོམ་མོ་ཞེས་པ་སྙིང་རྗེ་ནི་ཡན་ལག་ཐ་དད་པའོ། །དབང་བསྐུར་བཞི་པ་འདི་ཁོ་ན། དབང་བསྐུར་སྦྱིན་བྱ་ཞེས་པ་ལ་སོགས་པས་རྒྱས་པར་འཆད་པར་འགྱུར་རོ། །དབང་པོ་རབ་ཀྱི་སེམས་ཅན་ལ་ནི་དགའ་བ་བཞི་པོ་ཁོ་ན་དབང་བསྐུར་བཞི་རྣམས་སོ་ཞེས་སྟོན་པའི་དོན་དུ། དེ་ཡང་དབང་བསྐུར་རྣམ་པ་བཞི། །ཞེས་གསུངས་ཏེ། དེ་ནི་དགའ་བ་ལ་སོགས་པའོ། །དེ་སྐད་དུ་ཡང་བརྟག་པ་གཉིས་པར་གསུངས་པ། སློབ་དཔོན་གསང་བ་ཤེས་རབ་དང༌། །བཞི་པ་དེ་ཡང་དེ་བཞིན་ནོ། །དབང་ནི་བཞི་ཡི་གྲངས་ཀྱིས་ནི། །དགའ་བ་ལ་སོགས་རིམ་ཤེས་བྱ། །ཞེས་སོ། །འདིར་ནི་ནུ་མའི་བུམ་པའི་དང༌། །བྱང་ཆུབ་ཀྱི་སེམས་ཀྱི་རྟེན་རྡོ་རྗེ་བུམ་པའི་བྱ་བ་བྱེད་པའི་ཕྱིར་ན་བུམ་པའི་དབང་དང༌། ཀུན་དུ་སྤྱོད་པའི་ཁྱད་པར་ལས་སྐྱེས་པའི་ཕྱིར་སློབ་དཔོན་གྱི་དབང་ནི་དགའ་བའོ། །དེ་ལྟར་ཡང་ཕྱག་རྒྱ་ཆེན་པོ་ཐིག་ལེར་གསུངས་པ། བཅུ་དྲུག་ལོ་ལོན་གཟུགས་བཟང་མ། །དགའ་བའི་རོ་ཡིས་དེ་གང་བ། །ཕྱག་རྒྱ་དེ་ནི་གཅེར་བུར་བྱ། །དང་པོར་དམ་ཚིག་སོགས་ཀྱིས་མཆོད། །དེ་རྗེས་ཁ་སྦྱོར་རྣལ་འབྱོར་གྱིས། །ཡང་དང་ཡང་དུ་འདོད་པ་སྤྱད། །ཇི་སྲིད་ས་བོན་འབྱུང་འགྱུར་བར། །ཆུང་ངུ་རུ་ནི་བསྲུབ་པར་བྱ། །ཆུ་སྐྱེས་སུ་ནི་བྱུང་བ་
ན། །སྙིང་གར་ཤིན་ཏུ་བྲན་པར་བྱ། །དེ་ཡིས་སློབ་དཔོན་དབང་མཆོག་ཏུ། །འགྱུར་རོ་ལེགས་དགའི་དབང་ཕྱུག་མ། །གསང་བའི་དབང་ནི་མཆོག་གྱུར་པ། །བཤད་ཀྱིས་གུས་པར་མཉམ་པར་གྱིས། །གང་ཚེ་གསང་གནས་སྐད་ཅིག་གཅིག །བདེ་བ་ལེགས་པར་གནས་འགྱུར་བ། །དེ་ཚེ་གསང་བར་ཡང་དག་བཤད། །གཞན་དུ་འཇིག་རྟེན་པར་འགྱུར་རོ། །ཤེས་རབ་ཡེ་ཤེས་དབང་བསྐུར་ཡང༌། །ཀུན་དུ་རྙེད་དཀའ་བཤད་པར་བྱ། །ཤེས་རབ་ཁུ་བའི་ངོ་བོར་བཤད། །ཡེ་ཤེས་བདེ་བའི་རང་བཞིན་བཤད། །དབང་བསྐུར་ཞུ་བ་ལྷུང་བ་སྟེ། །ཡེ་ཤེས་གནས་སྐབས་གཞན་དུ་བདེ། །དེ་འགོག་པ་ནི་བཞི་པར་བརྗོད། །ལྷན་སྐྱེས་ཡེ་ཤེས་མཚན་ཉིད་དོ། །ཞེས་སོ། །ད་ནི་དབང་བཞི་པའི་རྗེས་ཐོགས་སུ་རྗེས་སུ་གནང་བ་སྦྱིན་པའོ་ཞེས་སྟོན་པ། བྱང་ཆུབ་ཅེས་པ་ལ་སོགས་པའོ། །བྱང་ཆུབ་སེམས་ཀྱི་དབང་བསྐུར་ནི་བཞི་པའོ། །ཆོས་ཀྱི་འཁོར་ལོ་ཞེས་པའི་ཆོས་ཀྱི་གནས་སུ་རྡོ་རྗེ་དང་རིན་པོ་ཆེ་དང་པདྨ་དང་ལས་ཀྱི་སྒྲ་བཅུག་པ་ལས་རིམ་པ་བཞིན་དུ་སློབ་མ་ལ་དེ་བཞིན་གཤེགས་པ་དེ་དང་དེ་བསྒོམས་པས་ལན་ལྔར་བཀླག་གོ །རྡོ་རྗེ་སེམས་དཔར་བསྒོམས་པས་ཤེས་རབ་ཅེས་པ་ལ་སོགས་པའི་ཚིགས་སུ་བཅད་པའོ་ཞེས་པ་རྗེས་སུ་གནང་བ་སྦྱིན་པའོ། །སྐྱེ་བ་འབྲས་བུར་བཅས་པ་ནི་དབང་བསྐུར་ཐོབ་པ་ལས་སོ། །སོན་པ་འབྲས་བུར་བཅས་ཏེ། གཞན་གྱི་དོན་བྱར་རུང་བ་ཉིད་ཀྱི་ཕྱིར་རོ། །སངས་རྒྱས་རིགས་སུ་སྐྱེས་པ་ནི་རབ་ཏུ་དགའ་བའི་ས་ཁོ་ནར་འགྱུར་ཏེ། ད་ལྟ་ནི་དབང་བསྐུར་བ་བཞི་རྣམས་ཀྱིས་རྡོ་རྗེ་སེམས་དཔའི་སྡོམ་པ་སྐྱེ་བ་ལས་དེར་རུང་བ་ཉིད་ཀྱིས་ན་བརྗོད་དོ། །སྒྲོལ་བ་དང་རྫོགས་པ་དང་བྱང་ཆུབ་གཞན་ལ་མངོན་པར་འདོད་པ་དང་བག་ཆགས་སྤངས་པ་རྣམས་ཀྱང་དེ་དང་དེར་རུང་བ་ཉིད་ཁོ་ནར་རིག་པར་བྱའོ། །ཀུན་འཛིན་གཞིག་པ་ནི་རྫས་ལའོ། །ཕན་པ་ནི་ཕྱིས་འཕྲོད་པའོ། །ཤིན་ཏུ་དང་བ་ཞེས་པ་འདི་ནི་ཆོས་ཉིད་དེ་གང་ཆོ་ག་ཇི་ལྟ་བར་དབང་བསྐུར་བ་ནི་སྡུག་པའི་བུ་བཞིན་དུ་དང་བའི་ཡིད་ཀྱིས་དགེ་བའི་ཆེད་ཉིད་དུ་སངས་རྒྱས་ཐམས་ཅད་ཀྱིས་དགོངས་པའོ་ཞེས་པའོ། །ཁྱོད་ཀྱི་སྟེ་ཉིད་ཀྱི་མཐུ་ལས་ཞེས་འབྲེལ་ལོ། །
འདིའི་རྒྱས་པར་སྟོན་པ་རྫོགས་པར་བགྱི་ཞེས་པ་ལ་སོགས་པའོ། །གོ་འཕང་ནི་གནས་པའོ། །ཀུན་མཆོག་རྣམས་ཀྱིས་ཏེ་བྱང་ཆུབ་སེམས་དཔའ་ཆེན་པོ་རྣམས་ཀྱིས་ཀྱང་མཆོད་པའོ། །དབང་བསྐུར་ནི་དབང་བསྐུར་བ་གསུམ་མོ། །རྟོགས་བྱས་ཏེ་ཞེས་པ་བཞིན་རས་དང་བ་དང་བ་སྤུ་ལྡང་བ་ལ་སོགས་པའི་རྟགས་རྣམས་ཀྱིས་སོ། །དབང་བསྐུར་རིན་ཆེན་ནི་བཞི་པ་སྟེ་བླ་ན་མེད་པའི་དགའ་བ་རྒྱས་པར་བྱེད་པས་ནའོ་ཞེས་བྱས་ནས་སོ། །དེ་ལྟར་འདིར་དབང་པོ་རབ་ཀྱི་སེམས་ཅན་གྱི་དབང་དུ་བྱས་པ་ལས་དཀྱིལ་འཁོར་དང་དབང་བསྐུར་གྱི་ཆོ་ག་མདོར་བསྡུས་ནས་གསལ་བར་བྱས་ལ། རྒྱས་པར་ནི་ཁོ་བོས་དཀྱིལ་འཁོར་གྱི་ཆོ་ག་རྡོ་རྗེ་ཕྲེང་བར་བཤད་པ་ལས་རིག་པར་བྱའོ། །དེ་ལྟར་ཀུན་རྫོབ་དང་དོན་དམ་པའི་དབང་བསྐུར་ཐོབ་པས་རྡོ་རྗེ་སེམས་དཔའ་ཉིད་ཀྱི་དངོས་གྲུབ་ཀྱི་ཆེད་དུ་སྤྱོད་པ་ལ་སྦྱོར་བ་གསུངས་པ། གང་ཞེས་པ་ལ་སོགས་པས་སོ། །རབ་མཆོག་ཅེས་པ་ལ་སོགས་པ་ལ། རྡོ་རྗེ་འཛིན་པའི་བླ་ན་མེད་པའི་ཕུན་ཚོགས་ལོངས་སྤྱོད་ཆེད་དུ་སེམས་ཅན་གྱི་ཞིང་དག་པ་ཕུན་སུམ་ཚོགས་པ་ལས་དང༌། སྣོད་ཀྱི་ཞིང་ཡང་དཔག་བསམ་གྱི་ཤིང་དང་རིན་པོ་ཆེའི་རང་བཞིན་གྱིས་གཞི་ལ་སོགས་པའི་ཕུན་སུམ་ཚོགས་པ་འཛིན་པའི་ཆེད་དུ་དབང་བཞི་པའོ་ཞེས་པའི་དོན་ཏོ། །བྱང་ཆུབ་ཀྱི་སེམས་ཁོ་ན་ཤིན་ཏུ་བརྟན་པར་ཕ་རོལ་ཏུ་ཕྱིན་པ་དྲུག་གི་ནང་དུ་འདུས་པར་བསྒོམ་པ་ནི་གོ་ཆ་སྟེ། བྱང་ཆུབ་ཏུ་སྟེ་དབང་བསྐུར་བ་རིན་པོ་ཆེའི་སེམས་བསྐྱེད་ནས། རྒྱ་ཆེ་བ་ནི་རང་དང་གཞན་གྱི་དོན་ཕུན་སུམ་ཚོགས་པར་བྱེད་པའི་ཕྱིར་སྤྱད་དེ་བྱང་ཆུབ་ཀྱི་སེམས་བསྒོམ་པར་བྱའོ་ཞེས་པའི་དོན་ཏོ། །འདིས་ནི་འཆད་པར་འགྱུར་བའི་སྒོམ་པ་མདོར་བྱས་པའོ། །དྲི་མ་མེད་པ་ནི་ལེ་ལོ་ལ་སོགས་པ་དང་བྲལ་བ་ཉིད་ཀྱི་ཕྱིར་དང༌། ལྟུང་བའི་དྲི་མའི་རྙོག་པ་དང་བྲལ་བའི་ཕྱིར་རོ། །རྡོ་རྗེ་སེམས་དཔའི་སྡོམ་པ་ཅན་གྱི་ལྟུང་བའི་རིས་ནི་གཉིས་ཏེ། རྩ་བའི་ལྟུང་བ་དང་སྦོམ་པོའི་ལྟུང་བ་ཞེས་བྱ་བ་དག་གོ །དེ་ལ་བླ་མ་ལ་བརྙེས་པ་དང་དེ་བཞིན་གཤེགས་པའི་བཀའ་ལ་འགོང་བ་དང་ཞེ་སྡང་གིས་རྡོ་རྗེའི་སྤུན་ལ་སྐྱོན་གསལ་བར་བྱེད་པ་དང༌། བྱམས་པ་གཏོང་བ་དང༌། ཐེག་པ་གསུམ་
ལ་སྨོད་པ་དང་ཡོངས་སུ་མ་སྨིན་པ་ལ་གསང་བ་འཆད་པ་དང༌། དེ་བཞིན་གཤེགས་པའི་བདག་ཉིད་ཀྱི་ཕུང་པོ་ལྔ་ལ་སྨོད་པ་དང༌། ཆས་ཐམས་ཅད་རང་བཞིན་གྱིས་ཡོངས་སུ་དག་པ་ལ་ཐེ་ཚོམ་ཟ་བ་དང་གདུག་པའི་བྱམས་པ་དང༌། ཐོག་མ་དང་ཐ་མ་དང་དབུས་སྟོང་པའི་ཆོས་ཐམས་ཅད་ལ་ཐོག་མ་དང་ཐ་མ་དང་དབུས་སུ་རྟོག་པ་དང༌། བྱང་ཆུབ་ཀྱི་སེམས་གཏོང་བ་དང༌། དད་པ་ཅན་གྱི་སེམས་སུན་འབྱིན་པ་དང་ཇི་ལྟར་རྙེད་པའི་དམ་ཚིག་མི་བསྟེན་པ་དང་བུད་མེད་ལ་སྨོད་པ་ཞེས་པ་རྩ་བའི་ལྟུང་བ་བཅུ་བཞི་རྣམས་སོ། །དེ་བཞིན་དུ་སྟོབས་ཀྱི་རྣལ་འབྱོར་མ་རང་གིར་བྱེད་པ་དང་སྟོབས་ཀྱིས་དེའི་བྱང་ཆུབ་ཀྱི་སེམས་ལེན་པ་དང་གསང་བ་མི་སྦེད་པ་དང་དམ་ཚིག་ལ་རྩོད་པ་དང༌། དད་པ་ཅན་ལ་ཕྱིན་ཅི་ལོག་གི་ཆོས་སྟོན་པ་དང་ཉན་ཐོས་ཀྱི་ཐེག་པ་རྣམས་དང་ལྷན་ཅིག་ཞག་བདུན་གནས་པ་དང་རྣལ་འབྱོར་མི་ཤེས་པར་རྣལ་འབྱོར་པ་ཉིད་དུ་མངོན་པའི་ང་རྒྱལ་བ་དང༌། མི་དད་པ་ལ་ཆོས་སྟོན་པ་ཞེས་པ་སྒོམ་པོའི་ལྟུང་བ་བརྒྱད་རྣམས་ཏེ། རྡོ་རྗེ་སེམས་དཔའི་སྡོམ་པ་ལ་གནས་པས་ཀུན་ནས་ཡོངས་སུ་སྤང་བར་བྱའོ། །ཡང་གཉིས་སུ་མེད་པའི་སྐབས་མངོན་དུ་བྱེད་པའི་གནས་སྐབས་ལས་འོག་མའི་གནས་སྐབས་སུ་ལྷན་ཅིག་སྐྱེས་པ་མི་བསམ་པ་ལ་སོགས་པའི་རྣལ་འབྱོར་ལ་སོ་སོར་རེ་བས་ཇི་ལྟར་འདོད་པར་སྤྱོད་པའི་ཕྱིར་ན། ནང་རུལ་བའི་ཤིང་ཐོག་ཀུ་ཥྨ་ཎྜ་བཞིན་དུ་ཕྱི་རོལ་གྱི་ཚུགས་ཙམ་གྱིས་གནས་པར་མི་བྱའོ། །དེ་ཉིད་ཀྱི་ཕྱིར་སྙོམ་ལས་ལ་སོགས་པ་དང་བྲལ་བ་ལས་བར་མ་ཆད་པར་ཕུལ་དུ་བྱུང་བས་ན་དེ་ཁོ་ན་ཉིད་ཀྱི་རྣལ་འབྱོར་དང་ལྡན་པའོ། །བྱང་ཆུབ་སེམས་ཀྱི་དབང་བསྐུར་བ་གཙོ་བོར་འཆད་པའི་ཕྱིར་གཞུང་ཡང་དེ་སྐད་དོ། །གཉིས་པའི་སྟེ་བརྟག་པའི་འོ། །དཔལ་ཡང་དག་པའི་སྦྱོར་བའི་རྒྱུད་ཀྱི་རྒྱ་ཆེར་འགྲེལ་པ། མན་ངག་གི་སྙེ་མར་སྙེ་མ་ལྔ་པའོ།། །།