སྙེ་མ་བརྒྱད་པ། དབང་པོ་འབྲིང་རྟུལ་དག་གིས་རྫོགས་པའི་རིམ་པའི་དངོས་སུ་བའི་ཐབས་བསྐྱེད་པའི་རིམ་པ་བསྒོམ་པར་བཤད་པ།
དེ་ལྟར་བཅོམ་ལྡན་འདས་ཀྱི་སྒྲུབ་ཐབས་ཀྱི་ཆོ་ག་ཉེ་བར་བསྟན་ནས་འཁོར་ལོ་ལ་སོགས་པས་ཞི་བ་ལ་སོགས་པའི་དོན་དུ་ལྷ་སྣ་ཚོགས་བསྒོམ་པ་ལ་འཇུག་པར་བྱེད་དེ། ཉོན་ཅིག་ཅེས་པ་ལ་སོགས་པའོ། །རྡོ་རྗེ་ནི་རྡོ་རྗེ་སྙིང་པོ་སྟེ། འཇིགས་པ་ནི་འཇིགས་སྡེའོ་ཞེས་པ་བཞིན་ནོ། །འཁོར་ལོས་བསྒྲུབ་བྱ་ཞེས་པ་ཞི་བ་དང་རྒྱས་པ་དང་དབང་དུ་བྱ་བ་དང་སྲུང་བ་དང་མངོན་སྤྱོད་དོ། །ཁྱད་པར་དུ་ནི་ཁ་དོག་ལ་སོགས་པའི་ཁྱད་པར་གྱིས་སོ། །ཞི་བ་ནི་ད་ལྟར་བའི་གནོད་པ་བྱེད་པའོ། །སྲུང་བ་ནི་འབྱུང་བར་འགྱུར་བའོ། །རེ་མིག་དགུ་སོགས་འཁོར་ལོ་ཡི། །ཞེས་པ་རྩིབས་བརྒྱད་རྣམས་ལྟེ་བ་དང་ལྷན་ཅིག་རེ་མིག་དགུ་གང་གི་ཡིན་པ་དེ་ཡང་ཡིན་ལ་དང་པོ་ཡང་སྟེ་འཆད་པར་འགྱུར་བའི་འཁོར་ལོ་ལ་ལྟོས་པ་སྟེ། འཁོར་ལོ་ཡང་ངོ༌། །དེའི་ཕྱི་རོལ་མུ་ཁྱུད་དོ། །ལས་ཀྱི་ཁ་དོག་སོགས་ཞེས་པ་ལས་དང་རྗེས་སུ་མཐུན་པའི་མདོག་ཏུ་བསམ་པ་ལ་སོགས་པ་བསྒོམ་པར་བྱའོ། །འདིའི་ཞེས་པ་སྔགས་ཀྱི་ས་བོན་ཏཱ་ལ་སོགས་པའི་ས་བོན་རྣམས་སོ། །ཀུན་གྱི་སྟེ་ཤར་དང་མེ་ལ་སོགས་པའི་རེ་མིག་རྣམས་ལ་ཕྱག་འཚལ་ཏེ། ཨོཾ་དང༌། སྲེག་པ་སྟེ་སྭཱ་ཧཱ་
དང༌། དེའི་མཐའ་བྲི་བ་ཧཱའོ། །དབུས་སུ་མིང་ཞེས་པ་ལྟེ་བ་ལ་ཨོཾ་དང་ཧཱ་ཡིག་དག་གི་དབུས་སུ་བསྒྲུབ་བྱའི་མིང་སྲུངས་ཀྱི་ངག་དང་བཅས་པའོ། །མཉམ་ཉིད་ཡེ་ཤེས་ནི་སྟོང་པ་ཉིད་ཀྱི་ཡེ་ཤེས་སོ། །ད་ཁོ་ན་སྟོང་པ་སྟེ་དེ་དང་ལྡན་པར་བདག་ཉིད་ཀྱིས་གཅིག་པའོ། །མཉམ་ཉིད་ཀུན་རིག་སྟོང་པ་ཉིད་ཀྱི་ཡེ་ཤེས་ནི་སྲུང་བ་མཆོག་སྟེ་གནས་སུ་དང་འཁོར་ལོར་བསྒོམ་པའོ། །དེའི་ཕྱིར་དེ་སྦྱར་བར་བྱའོ། །དེ་ལྟར་གྱུར་ན་སྲུང་པར་འགྱུར་ཏེ། ཡེ་ཤེས་ཅན་རྣམས་ཀྱིའོ། །འཇིགས་པ་ནི་ཉེ་བར་འཚེ་བ་བྱས་པ་རིང་པོ་སྟེ་འགྱུར་བ་མ་ཡིན་ཞེས་པའི་དོན་ཏོ། །དེའི་ཕྱིར་དངོས་པོ་མེད་པར་ཏེ་སྟོང་པ་ཉིད་དུའོ། །སེམས་ཅན་རྣམས་ཞེས་པ་སྣོད་ཀྱི་འཇིག་རྟེན་ཉེ་བར་མཚོན་པའོ། །རྣལ་འབྱོར་དངོས་པོ་ནི་ལྷ་རྫོགས་པའོ། །མིག་ལ་ཞེས་པ་མིག་དག་ལའོ། །སྣ་ལ་ཞེས་པ་སྣ་དག་ལའོ། །མགོ་ལ་སོགས་པ་རྣམས་ཀྱི་ནང་གི་བུག་པ་ལ་གནས་པའི་ཡི་གེ་རྣམས་སོ། །ལས་རྣམས་ཐམས་ཅད་བསྒྲུབ་པར་བྱ། །ཞེས་པ་ནི་ཞི་བ་ལ་སོགས་པ་རྣམས་སོ། །ལྷ་རྣམས་ཐམས་ཅད་ཅེས་ཁ་ཅིག་ཏུ་ཀློག་སྟེ། ལྷ་རྣམས་ཐམས་ཅད་ཀྱང་ཞེས་པའི་དོན་ཏོ། །དོན་ནི་འདི་ཡིན་ཏེ། ཆོས་ཐམས་ཅད་སྟོང་པ་ཉིད་དུ་བསམས་ནས་ཡུད་ཀྱིས་སྐྱེས་པ། པདྨ་དཀར་པོ་དང་ཟླ་བ་ལ་ཏཱཾ་ཡོངས་སུ་གྱུར་པ་ལྟེ་བ་ལ་ཏཱཾ་གིས་བྱིན་གྱིས་བརླབས་པའི་ཨུཏྤལ་སྟེ། དེ་ཡོངས་སུ་གྱུར་པ་ལས་འཕགས་མ་སྒྲོལ་མ་སེམས་དཔའ་སྐྱིལ་ཀྲུང་ཅན། རིན་པོ་ཆེ་ལ་སོགས་པ་སྣ་ཚོགས་པའི་རྒྱན་ཅན་མ། ཕྱག་གཡས་པ་མི་འཇིགས་པ་དང༌། གཡོན་པས་ཨུཏྤལ་འཛིན་པ། རྣམ་པར་སྣང་མཛད་ཀྱིས་རྒྱས་བཏབ་པར་བདག་ཉིད་རྣམ་པར་བསྒོམས་ནས། ཇི་སྐད་བཤད་པའི་སྔགས་རྣམས་ཀྱིས་གོ་ཆ་བྱས་ལ། སྙིང་གའི་ཆུ་སྐྱེས་དང་ཟླ་བ་ལ་གནས་པའི་རྩིབས་བརྒྱད་པའི་འཁོར་ལོའི་ལྟེ་བ་ལ་ཨོཾ་ལྷས་བྱིན་སྲུངས་ཤིག་ཧཱ། ཤར་དང་མེ་ལ་སོགས་པའི་རྩིབས་རྣམས་ལ་གཡས་སྐོར་གྱིས། ཏཱ་རེ་ཏུ་ཏྟཱ་རེ་ཏུ་རེ་སྭཱ་ཞེས་པ་བསྒོམ་པར་བྱའོ། །བཅོམ་ལྡན་འདས་མ་དང་པདྨ་དང་འཁོར་ལོ་དང་ཡི་གེ་རྣམས་དང་འོད་ཟེར་རྣམས་ཀྱི་ཁ་དོག་ནི་ལས་ཀྱི་
རྗེས་སུ་འབྲང་བ་ལས་ཤེས་པར་བྱའོ། །དེ་ལ་ཞིབ་དང་སྲུང་བ་ལ་དཀར་པོའོ། །རྒྱས་པ་ལ་སེར་པོའོ། །དབང་དུ་བྱ་བ་ལ་དམར་པོའོ། །མངོན་སྤྱོད་ལ་ནག་པོའོ། །རང་གི་ལུས་དང་འཁོར་ལོ་དང་ཡི་གེའི་འོད་ཟེར་མང་པོ་རྣམས་ཀྱིས་བསྒྲུབ་བྱ་ཁྱབ་པར་བསམ་ཞིང་སྔགས་བཟླས་པར་བྱ་སྟེ། ཨོཾ་ཏཱ་རེ་ཏུ་ཏྟཱ་རེ་ཏུ་རེ་སྭཱ་ཧཱ། ཞེས་པའོ། །སྭཱ་ཧཱ་སྔོན་དུ་ཇི་ལྟར་རིགས་པར་སྤེལ་ཚིག་གོ །སྔོན་དུ་བསྙེན་པའི་དུས་སུ་ནི་སྤེལ་ཚིག་མི་བྱའོ། །གྲོ་ག་ལ་ནི་པདྨ་དང་ཟླ་བ་དང་འཁོར་ལོ་དང་ཡི་གེ་རྣམས་བྲིས་ནས། གྲོ་ག་དང་བཅས་པ་རྣམས་སྟེང་གི་བུ་གནས་ནང་དུ་བཅུག་སྟེ། སྙིང་གའི་པདྨ་ལ་སོགས་པ་རྣམས་དང་གཅིག་ཏུ་བྱས་ལ། འོག་ཏུ་བཅོམ་ལྡན་འདས་མའི་པདྨའི་སྒོ་ནས་ཕྱུང་ནས་གཟུང་བར་བྱ་སྟེ། མངོན་པར་འདོད་པར་འགྱུར་ཞིང༌། རིག་པའི་རབ་ཏུ་གནས་པ་ཡང་འདི་ལྟར་རོ་ཞེས་པ་མན་ངག་གོ །ཆོ་ག་འདི་ནི་འཆད་པར་འགྱུར་བའི་རྣལ་འབྱོར་ངག་ལ་ཡང་ཇི་ལྟར་རིགས་པར་རྟོགས་པར་བྱའོ། །དབང་དུ་བྱ་བའི་ལས་ལ་ཀུ་རུ་ཀུལླེ་ཁྱད་པར་དུ་འཕགས་ཤིང༌། དེ་ནི་བཅོམ་ལྡན་འདས་མ་སྒྲོལ་མ་ཁོ་ན་སྟེ། སྟོང་པ་ཉིད་དུ་བསྒོམ་པའི་དེ་མ་ཐག་ཏུ་ཡུད་ཀྱིས་པདྨ་དམར་པོ་དང་རོ་དང་ཉི་མ་ལ་ཧྲཱིཿ་ཡིག་དམར་པོ་ཡོངས་སུ་གྱུར་ཅིང་དེས་བྱིན་གྱིས་བརླབས་པའི་ཨུཏྤལ་དམར་པོ་ཡོངས་སུ་གྱུར་པའི་ཀུ་རུ་ཀུལླེ་དམར་མོ་ཞལ་གཅིག་མ། སྤྱན་གསུམ་གཡོལ་དམར་ཞིང་ཟླུམ་པ་དབུ་སྐྲ་དམར་སེར་གྱེན་དུ་བརྫེས་པ། འོད་དཔག་ཏུ་མེད་པས་རྒྱས་བཏབ་ལ། སྤྱི་བོར་གནས་པའི་ཐོད་པ་ལྔ་དང་འཁོར་ལོ་ཅན་ལ་སོགས་པའི་རྒྱན་ཅན་མ། མགྲིན་པར་འཕྱང་བའི་མགོ་བོའི་ཕྲེང་བ་ཅན་མ་ཕྱག་བཞི་མ། གཡས་པ་དག་གིས་ཨུཏྤལ་དམར་པོ་ཁ་འབུས་པའི་མདའ་དང་མེ་ཏོག་དམར་པོ་ལས་བྱས་པའི་ལྕགས་ཀྱུ་དང་གཡོན་པ་དག་གིས་མེ་ཏོག་དམར་པོའི་གཞུ་དང་ཨུཏྤལ་དམར་པོ་འཛིན་མ། སྐྱིལ་ཀྲུང་ཕྱེད་པས་གར་བྱེད་པར་བསམས་ནས། རང་གི་སྙིང་གར་ཉི་མ་ལ་གནས་པའི་འཁོར་ལོའི་ཡི་གེའི་འོད་ཟེར་རྣམས་ཀྱིས་བཀུག་པའི་བསྒྲུབ་བྱ་སློང་བར་གྱུར་ཅིང་ཁྱབ་པ་ཨུཏྤལ་
ཡིས་མགུལ་པར་བཅིངས་ཏེ། སྐྱེས་པ་ལ་ནི་སྙིང་གར་དང་བུད་མེད་ཀྱི་སྐྱེ་གནས་སུ་ལྕགས་ཀྱུས་གཟིར་ཞིང་མདའི་དྲ་བ་རྣམས་ཀྱིས་འབུགས་པ་པོར་བདག་ཉིད་སྒོམ་པར་བྱེད་ཅིང་དབང་དུ་བྱ་བའི་དོན་དུ་སྔགས་བཟླས་པར་བྱའོ། །འཁོར་ལོ་ནི་འཆད་པར་འགྱུར་བའི་ཟུར་དྲུག་པ་པདྨ་འདབ་མ་བརྒྱད་པ་དང་ཉི་མ་ལ་གནས་པ་སྟེ། རྩིབས་རྣམས་ལ་ཨོཾ་ཀུ་རུ་ཀུལླེ་སྭཱ་དང༌། དཀྱིལ་དུ་ཧྲིཿ་ཆེ་གེ་མོ་དབང་དུ་གྱིས་ཤིག་ཧྲཱིཿ་ཧའི་ཡི་གེ་རྣམས་སྦྱར་བར་བྱའོ། །འབྲི་བའི་རྫས་ནི་འཆད་པར་འགྱུར་རོ། །བཅིང་བ་དང་ཞི་བ་ལ་སོགས་པ་རྣམས་ལ་ཇི་ལྟར་རིགས་པས་ཆོ་ག་རྟོགས་པར་བྱའོ། །འཇིགས་པ་ཞེས་པ་སྦྲུལ་རྣམས་ཀྱིའོ། །རིམས་དང་གློ་བུར་དུ་འཆི་བ་དང་དུག་ཞི་བར་བྱེད་པ་ལ་འདི་དཀར་མོའོ། །སྲུང་བ་འདི་ནི་ཞེས་པ་འདི་ཡང་དེ་ཡིན་ལ་སྲུང་བ་ཡང་ངོ་ཞེས་བྱས་ནས་སོ། །སྔགས་པའི་ཞེས་པ་ཡེ་ཤེས་ཅན་ནི་བརྒྱ་ཕྲག་གཅིག་གིས་ཏེ་དེ་རྣམས་ནི་སྙིང་རྗེ་དང་ལྡན་པ་ཉིད་ཀྱི་ཕྱིར་རོ། །ཤེས་རབ་ཀྱི་འཁོར་ལོ་གསུངས་པ། འདབ་བརྒྱད་ཅེས་པ་ལ་སོགས་པའོ། །འདབ་མ་ནི་རྩིབས་སོ། །སྔོན་ནི་སྒྲོལ་མའི་འཁོར་ལོའོ། །སྔོན་དུ་གསུངས་པ་ནི་དགོད་པ་ལ་སོགས་པའི་ཚོགས་སོ། །ཡང་ན། དང་པོར་སྟོང་ཉིད་རྣམ་བསམས་ནས། །ལུས་ཅན་རྣམས་ཀྱི་དྲི་བཀྲུས་ཏེ། །གཟུགས་ཁམས་ཤེས་པ་ཞེས་པ་ལ་སོགས་པའི་མཚན་ཉིད་ཡང་དག་ལྡན་པའི་མཉམ་ཉིད་ངོ་བོ་ཞེས་འབྲེལ་ཏེ། སྔར་གསུངས་པའི་རིགས་པས་སོ། །འདི་ནི་སྟེ་འཆད་པར་འགྱུར་བའོ། །གུས་ཤིང་གུས་པས་ནི་ཡང་དང་ཡང་དུ་བསམ་པ་ཕུལ་དུ་བྱུང་བ་དང་བཅས་པས་སོ། །ཤེས་རབ་བདག་ཉིད་ཅེས་ཏེ་བདག་ཉིད་ཤེས་རབ་ཀྱི་ཕ་རོལ་ཏུ་ཕྱིན་པའོ་ཞེས་བསྒོམ་པར་བྱའོ། །བཟླས་བྱས་ཏེ་བཟླས་པ་ལས་སོ། །ས་བོན་ནི་སྔགས་སོ། །ཤེས་རབ་སྤེལ་བའི་སྦྱོར་བ་སྟེ་ཤེས་རབ་ཀྱི་ཕ་རོལ་ཏུ་ཕྱིན་པའི་འཁོར་ལོའི་སྦྱོར་བའོ། །དོན་འདི་ཡིན་ཏེ། སྟོང་པ་ཉིད་ཀྱི་བར་མ་ཆད་པར་པདྨ་དཀར་པོར་ཟླ་བ་ལ་ཧཱུཾ་ལས་སྐྱེས་ཤིང་བྱིན་གྱིས་བརླབས་པའི་ཆུ་སྐྱེས་དང་ཤེས་རབ་ཀྱི་
ཕ་རོལ་ཏུ་ཕྱིན་པའི་པུ་སྟི་ཡོངས་སུ་གྱུར་པའི་ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོ་སེམས་དཔའི་སྐྱིལ་ཀྲུང་ཅན་རིན་པོ་ཆེ་ལ་སོགས་པའི་རྒྱན་ཅན་མི་བསྐྱོད་པས་རྒྱས་བཏབ་པ་ཕྱག་གཉིས་མ། ཤེས་རབ་ཀྱི་ཕ་རོལ་ཏུ་ཕྱིན་པའི་པུ་སྟིས་མཚན་པའི་པདྨ་གཉིས་གཡོན་པ་དང་གཡས་པའི་ལོགས་དག་ཏུ་ནང་དུ་བསྒྲེང་བ་གྲུ་མོ་གཉིས་ཀྱིས་བཟུང་ནས། ཕྱག་དག་གིས་ཆོས་འཆད་ཀྱི་ཕྱག་རྒྱས་གནས་པར་བདག་ཉིད་བསྒོམ་པར་བྱའོ། །འཁོར་ལོ་ལ་ཡི་གེ་དགོད་པ་ནི་སྒྲོལ་མའི་སྔགས་བཞིན་ནོ་ཞེས་པའོ། །གཏི་མུག་ལ་སོགས་པའི་ཉོན་མོངས་པ་འཇིག་པའི་ཆེད་དུ་རྣམ་པར་སྣང་མཛད་ལ་སོགས་པའི་རྣལ་འབྱོར་གསུངས་པ། ཟླ་བ་ཞེས་པ་ལ་སོགས་པ་སྟེ། ཡི་གེ་ནི་བྷྲཱུཾ་ཡིག་གོ །འཁོར་ལོ་དྲིལ་བུ་གཡས་པ་དག་ཏུའོ། །དོན་འདི་ཡིན་ཏེ་སྟོང་པ་ཉིད་ཀྱི་བར་མཛད་དུ་སྣ་ཚོགས་ཆུ་སྐྱེས་དང་ཁྲག་གིས་གང་པའི་ཐོད་པ་དང་ཟླ་བ་ལ་བྷཱུཾ་ཡིག་ལས་སྐྱེས་ཤིང་བྱིན་གྱིས་བརླབས་པའི་འཁོར་ལོའི་མཚན་མ་ལས་སྐྱེས་པ་རྣམ་པར་སྣང་མཛད་དཀར་པོ་རལ་པའི་ཅོད་པན་ཅན་སྐྱིལ་ཀྲུང་ཕྱེད་པའི་གར་སྟབས་ཅན་སྟེང་གར་ཟླ་བ་ལ་གནས་པའི་ས་བོན་ལས་སྐྱེས་པའི་འོད་ཟེར་དང་བཅས་པ་རང་དང་འདྲ་བའི་ལྷ་རྣམས་ཀྱིས་འགྲོ་བའི་མི་ཤེས་པའི་མུན་པ་བསལ་ནས་སངས་རྒྱས་ཉིད་ལ་དགོད་པ་བྱེད་པར་བདག་ཉིད་བསམ་པར་བྱའོ་ཞེས་པའོ། །ཕྱི་མ་རྣམས་ལ་ཡང་ཇི་ལྟར་རིགས་པར་ཆོ་ག་འདིའོ། །དེ་ཉིད་ཀྱི་ཕྱིར་གསུངས་པ། འདི་ཡིས་ཤེས་པ་ལ་སོགས་པའོ། །འདིའི་ས་བོན་ཨོཾ་སྟེ་མཚན་མ་ནི་རིན་པོ་ཆེ་ཆ་དགུ་པའོ། །རིན་པོ་ཆེ་ཞེས་པ་ལ་སོགས་པ་རྣམས་ཀྱིས་ང་རྒྱལ་དང་འདོད་ཆགས་ལ་སོགས་པ་སེལ་བ་ནི། གཡས་པ་དག་ན་རིན་པོ་ཆེ་དང་ལྕགས་ཀྱུའོ། །འོད་དཔག་ཏུ་མེད་པའི་ས་བོན་ཧྲཱིཿ་སྟེ་མཚན་མ་པདྨའོ། །གཡས་པ་དག་ན་མཚོ་སྐྱེས་དང་མདའ་དག་གོ །འདོད་ཆགས་ཞི་བར་བྱེད་པའོ། །དོན་ཡོད་གྲུབ་པའི་ས་བོན་ཁཾ་དང་མཚན་མ་རལ་གྲི་སྟེ། གཡས་པ་དག་ན་རལ་གྲི་དང་ལྕགས་ཀྱུ་དག་སྟེ། ཕྲག་དོག་ཞི་བར་བྱེད་པའོ། །མཁའི་ཁམས་དང་འཆད་པར་འགྱུར་
བའི་བྷ་ག་དང་ནམ་མཁའ་ཡང་འདིར་ཆོས་འབྱུང་ངོ༌། །ཆོས་འབྱུང་གི་ནང་དུ་འཇུག་པ་ནི་འཆད་པར་འགྱུར་བའི་རྡོ་རྗེ་དབྱིངས་ཀྱི་དཀྱིལ་འཁོར་རོ་ཞེས་དགོངས་པའོ། །དེ་ཉིད་ཀྱི་ཕྱིར་གསུང་བར་འགྱུར་བ། གསང་བའི་དཀྱིལ་འཁོར་ཞེས་པའོ། །འདིས་ནི་རྣམ་པར་སྣང་མཛད་ལ་སོགས་པའི་ལྷ་བརྒྱད་དཀྱིལ་འཁོར་དུ་བསྒོམ་པར་བྱ་བ་རྣམས་འདིར་སོ་སོར་གསུངས་པའི་ཕྱིར་སོ་སོར་ཡང་ངོ་ཞེས་གསལ་བར་བྱེད་དོ། །སྤྱན་མ་ལ་སོགས་པ་བཞི་རྣམས་ནི་སོ་སོར་བསྒོམ་པ་ན་ཆོས་འབྱུང་གི་ནང་དུ་པདྨ་དང་པདྨའི་སྣོད་དང་ཟླ་བ་ལ་གནས་པར་ཤེས་པར་བྱའོ། །སྤྱན་མའི་མཚན་མ་འཁོར་ལོ་སྟེ། གཡས་རྣམས་ན་འཁོར་ལོ་དང་རྡོ་རྗེ་དང་རལ་གྲི་དང་མདའ་རྣམས་སོ། །ཅོད་པན་ལ་ཐོད་པ་ལྔ་རྣམས་སོ། །རྣམ་པར་སྣང་མཛད་ལ་སོགས་པ་ལྷ་བརྒྱད་པོ་རྣམས་ལ་ཡང་སྟེ། འཁོར་ལོ་ཅན་ལ་སོགས་པའི་རྒྱན་རྣམས་ཀྱང་ངོ༌། །ནད་ལ་སོགས་པའི་ཉེ་བར་འཚེ་བ་ཞི་བར་བྱེད་པའོ། །མཱ་མ་ཀཱིའི་མཚན་མ་རྡོ་རྗེ་སྟེ་གཡས་པ་རྣམས་སུ་རྡོ་རྗེ་དང་རིན་པོ་ཆེ་དང་འཁོར་ལོ་དང་པདྨ་དང་རལ་གྲི་དང་མདའ་རྣམས་ཡིན་ཞིང༌། འཇིགས་པ་ལ་སོགས་པ་ལ་རྗེས་སུ་འཛིན་པར་མཛད་པའོ། །གོས་དཀར་མོའི་མཚན་མ་པདྨ་དང་རྡོ་རྗེ་དང་རལ་གྲི་དང་མདའ་རྣམས་ཏེ། ཉམ་ཆུང་བ་རྣམས་རྒྱས་པར་བྱེད་པའོ། །སྒྲོལ་མའི་མཚན་མ་ཨུཏྤལ་དམར་པོ་སྟེ། གཡས་པ་རྣམས་སུ་ཨུཏྤལ་དམར་པོ་དང་རལ་གྲི་དང་ལྕགས་ཀྱུ་དང་མདའ་རྣམས་ཏེ་སྡང་བ་ལ་སོགས་པ་རྣམས་དབང་དུ་མཛད་པའོ། །ཉེ་བར་སྡུད་དེ་ཞེས་པ་འདི་ལྟ་བུའི་རྣམ་པའི་ཐབས་རྣམས་ཀྱིས་གཞན་གྱི་དོན་བྱེད་ཅིང་རབ་ཀྱི་མཐར་ཐུག་པ་རྡོ་རྗེ་འཛིན་པ་དང་མཉམ་པར་འགྱུར་རོ། །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱ་ཆེར་འགྲེལ་བ། མན་ངག་གི་སྙེ་མར་སྙེ་མ་བརྒྱད་པའོ།། །།