སྙེ་མ་དགུ་པ། དབང་པོ་འབྲིང་རྟུལ་དག་གི་རྫོགས་པའི་རིམ་པའི་དངོས་སུ་བའི་ཐབས་བསྐྱེད་པའི་རིམ་པ་བསྒོམ་པ་བཤད་པ།
ཧེ་རུ་ཀ་མངོན་པར་འབྱུང་བའི་སྐབས་བྱེད་དེ། ཉོན་ཞེས་པ་ལ་སོགས་པའོ། །དེ་ཁོ་ན་ཉིད་ནི་རྒྱུ་དང་འབྲས་བུའི་ངོ་བོ་སྟེ། གཉིས་གཉིས་དགའ་བ་ཞེས་པ་ལ་སོགས་པས་འཆད་པར་འགྱུར་བ་ཡང་ངོ༌། །མཁའ་འགྲོ་ནི་བཅོམ་ལྡན་འདས་སོ། །མཁའ་འགྲོ་མ་ནི་ལྷ་མོ་རྣམས་
སོ། །རྡོ་རྗེ་སེམས་དཔའ་ཞེས་པ་དང་པོར་རྡོ་རྗེ་སེམས་དཔར་གྱུར་ནས་རྡོ་རྗེ་ཅན་དེ་ནི་རྒྱུ་རྡོ་རྗེ་འཛིན་པ་སྟེ། སླར་ཡང་རྡོ་རྗེ་ཉིད་དེ་འབྲས་བུ་རྡོ་རྗེ་འཛིན་པར་འགྱུར་བའོ། །འདི་ནི་མདོར་བསྟན་པ་སྟེ་འདིའི་རྒྱས་པར་སྟོན་པ་ཟླ་བ་ཞེས་པ་ལ་སོགས་པའོ། །ཟླ་བའི་དཀྱིལ་འཁོར་ལ་ཨཱ་ལི་ཀཱ་ལིའི་ས་བོན་ཕྲེང་བ་ནི་རྒྱུ་རྡོ་རྗེ་འཛིན་པ་རྫོགས་པའི་ཆེད་དུའོ། །ཟླ་བའི་དཀྱིལ་འཁོར་ཅན་ཉིད་ཀྱིས་འདི་སྐུ་མདོག་དཀར་པོ་ཉིད་དུ་གསལ་བར་བྱེད་དོ། །འདིར་བཅོམ་ལྡན་འདས་ཀྱིས་སྐྱེ་བའི་རིམ་པ་མ་བསྟན་ཏོ། སྔ་མ་དང་ཁྱད་པར་མེད་པ་ཉིད་ཀྱི་ཕྱིར་རོ། །དེ་ལྟར་ནི་འདིར་ཡང༌། དང་པོར་རོ་ནི་བསྒོམ་པར་བྱ། །ཞེས་པ་ལ་སོགས་པ་བསྒོམ་པར་བྱའོ། འདིར་གཞན་པ་ནི་ཧཱུཾ་ཡིག་ཡོངས་སུ་གྱུར་པ་ལས་ཐོད་པའི་མཚན་མ་དང་རྣམ་པ་ལྔ་མངོན་པར་བྱང་ཆུབ་པའི་རིམ་པ་ལ་ཡང་ཧཱུཾ་ཡིག་དང་ཨ་ཡིག་དེ་དག་ཡོངས་སུ་གྱུར་པའི་ཐོད་པ་དང་གྲི་གུག་ལ་གནས་པ་དག་བསྒོམ་པར་བྱ་སྟེ། འབྲས་བུའི་རྡོ་རྗེ་འཛིན་པ་ས་བོན་གཉིས་པོ་འདི་ལས་སྐྱེས་པ་ཉིད་ཀྱི་ཕྱིར་ན། རྒྱུ་རྡོ་རྗེ་འཛིན་པའི་འང་ས་བོན་འདི་གཉིས་ཁོ་ནར་རྟོགས་པར་བྱའོ། །འདི་རིག་མ་དང་བཅས་པའི་ཡང་བསྲུབ་ཅིང་སྲུབས་པའི་སྦྱོར་བ་ལས་དགའ་བ་ལ་སོགས་པའི་བདེ་བ་ཉམས་སུ་མྱོང་ནས། བྱང་ཆུབ་སེམས་ཀྱི་ཐིག་ལེ་ལས་བྱུང་བའི་རང་གི་ས་བོན་ལས་སྐྱེས་པའི་ལྷ་མོ་རྣམས་ཇི་ལྟ་བའི་གནས་སུ་བསྒོམ་པར་བྱའོ། །ལྷ་མོ་རྣམས་ཀྱི་ས་བོན་དང་མཚན་མ་ལ་སོགས་པ་ནི་འབྲས་བུའི་དཀྱིལ་འཁོར་དང་མཚུངས་པར་རྟོགས་པར་བྱའོ། །དེ་ལྟར་ལྷ་མོ་རྣམས་ཕྱུང་ནས་འདོད་ཆགས་ཆེན་པོ་ལས་མན་ངག་ཇི་ལྟ་བར་ལྷ་མོ་དང་ལྷན་ཅིག་ཞུ་བའི་ངོ་བོ་ཉིད་དུ་གྱུར་ཏེ། དེ་ནས་པུཀྐ་སཱི་ལ་སོགས་པ་རྣམས་ཐིམ་པའི་ཏིང་ངེ་འཛིན་ལས་བསླང་བའི་ཕྱེད་དུ་སྐུལ་བར་བྱེད་དོ། །དེ་ལ་དང་པོར་པུཀྐ་སཱི་ཡིས་སྐུལ་བར་བྱེད་དེ། རྗེ་བཙུན་ཐུགས་རྗེའི་ཡིད་ཅན་བཞེངས་པར་གྱུར་པས་པུཀྐ་སཱི་བདག་ལ་སྐྱོབས་ཤིག །ཅི་ལྟར་ཞེ་ན། བདེ་ཆེན་ནི་ཐར་པ་ཆེན་པོའི་བདེ་བ་སྟེ། དེའི་དོན་དུ་སྦྱར་བ་ནི་ཞུ་བ་ལས་བྱུང་བའི་ཀྱེའི་རྡོ་རྗེའི་སྐུའོ། །
དེས་བདག་ལ་བཞེད་མཛོད་དེ་རོལ་པར་མཛོད་ཅིག་པའོ། །སྟོང་པའི་རང་བཞིན་དེ་ཞུ་བའི་ངོ་བོ་ཉིད་སྤོངས་ཤིག་པའོ། །དེ་ནས་རི་ཁྲོད་མས་ཁྱོད་མེད་ན་སྟེ་བྲལ་ན་བདག་འགུམས་པ་སྟེ། ཀྱེའི་རྡོ་རྗེ་ཁྱོད་བཞེངས་ཤིག །སྟོང་པའི་རང་བཞིན་ཉིད་དེ་ཞུ་བའི་ངོ་བོ་ཉིད་སྤོངས་མཛོད་ལ། རི་ཁྲོད་མ་འབྲས་གྲུབ་པར་མཛོད། །དེ་ནས་གཏུམ་མོས། དགའ་གཙོ་འཇིག་རྟེན་སངས་རྒྱས་ཉིད་དུ་མགྲོན་གཉེར་ནས། སྟོང་པར་ཏེ་ཞུ་བའི་ངོ་བོར་ཅིའི་ཕྱིར་ན་བཞུགས། གདོལ་པ་མོ་བདག་ཞུ་བར་བགྱིད། ཅིས་ཤེ་ན། ཁྱོད་མེད་ཕྱོགས་ནི་མི་འཚལ་བ་སྟེ་མུན་པ་ཙམ་དུ་མཐོང་ངོ་ཞེས་པའི་དོན་ཏོ། །དེ་ནས་གཡུང་མོས། མིག་འཕྲུལ་མངའ་བ་ཁྱོད་བཞེངས་ཤིག །ངོ་བོ་སྣ་ཚོགས་མཐའ་དག་ཀྱང་ཁྱོད་ཀྱི་འདི་མིག་འཕྲུལ་ལོ། །གཡུང་མོ་བདག་ནི་སྒྲིན་ཏེ་གྲོང་ཁྱེར་བའོ་ཞེས་དགོངས་མཛོད་དེ། བདག་སླུ་བར་མི་ནུས་པའོ། །དེའི་ཕྱིར་མི་སྨྲ་བ་ཁོ་ནར་ཞུ་བའི་ངོ་བོ་ཉིད་ཀྱིས་སྙིང་རྗེ་རྒྱུན་ཆད་མ་མཛད་ཅིག་པའོ། །འདིར་ཡང་བཅོམ་ལྡན་འདས་ནི་སྟོང་པ་ཉིད་དང་རོ་གཅིག་པའི་ཏིང་ངེ་འཛིན་མ་ཡིན་ཏེ། འོན་ཀྱང་ཤེས་རབ་དང་ཐབས་ཀྱི་བདག་ཉིད་ཁོ་ནའོ། །དེ་ལྟ་ན་ཡང་སྟོང་པ་ཉིད་ཀྱི་རང་བཞིན་སྤོངས་ཞེས་པ་ལ་སོགས་པའི་ཚིག་ནི་འགྲོ་བའི་དོན་མི་བྱེད་པའི་ཕྱིར་རིམ་གྱིས་སྟོང་པ་ཉིད་དུ་ལྟུང་བ་སྲིད་པས་བལྟ་བར་བྱའོ། །འདིར་ཡང་རང་རང་གིས་བསྐུལ་བའི་བར་མ་ཆད་དུ་ལྷ་མོ་རྣམས་དུ་བ་ལ་རྗེས་སུ་ཞུགས་པར་བལྟ་སྟེ་སླར་ཡང་འབྱིན་པའི་ཚིག་ལས་སོ། །བསྐུལ་བའི་བར་མ་ཆད་དུ་ཞུ་བའི་ངོ་བོའི་བཅོམ་ལྡན་འདས་ཀྱིས་དངོས་པོ་མཐའ་དག་སྒྱུ་མ་ལྟ་བུར་ཡང་དག་པར་རིག་པས་ཨ་ཧཱུཾ་གི་ངོ་བོས་གསལ་བར་འགྱུར་ཞིང༌། དེ་ལས་གྲི་གུག་དང་ཐོད་པ་དག་དེས་བྱིན་གྱིས་བརླབས་པ་དག་སྟེ། དེ་ལས་འབྲས་བུ་རྡོ་རྗེ་འཛིན་པ་བསྡེབས་པར་མཛད་ཅིང་བསྡིགས་པར་མཛད་པ་རྫོགས་ཤིང་དེ་ལྟ་ཁོ་ནར་ལྷ་མོ་རྣམས་སྤྲོའོ། །དེ་ལ་ལྷ་མོ་རྣམས་ཀྱི་ས་བོན་ནི་གཾ་ཅཾ་བཾ་གྷཾ་པཾ་ཤཾ་ལཾ་ཌཾ་སྟེ། འབྱིན་པའི་སྔགས་ཀྱང་འདི་རྣམས་ཁོ་ན་སྟེ། ས་བོན་རྣམས་ཀྱིས་དབྱུང་བར་བྱ། །ཞེས་གསུངས་པའི་ཕྱིར་རོ། །བདག་པོ་དགའ་མ་
ཞེས་པ། བདག་པོ་ནི་བཅོམ་ལྡན་འདས་ཏེ་དགའ་མོ་ནི་བཅོམ་ལྡན་འདས་མའོ། །དེ་དག་ཀྱང་ས་བོན་དག་གིས་སྤྲོའོ་ཞེས་སྦྲེལ་ལོ། །ས་བོན་གཉིས་པོ་དེ་ཉིད་གསུངས་པ། ཧཱུཾ་ཨ་ཞེས་པའོ། །འབར་འཁྲུགས་སྔོན་པོ་དག་ཅེས་པ་པདྨའི་ནང་དུ་སོན་པའི་སེམས་ཀྱི་ཞུ་བའི་རང་བཞིན་དག་གིས་ཏེ། འབར་བས་འཁྲུགས་པ་སྟེ་དྲག་པའང་དེ་རྣམས་ཡིན་ལ། སྔོན་པོ་དག་ཀྱང་ངོ་ཞེས་པའོ། །གསུམ་པ་ནི་གཉིས་ཀྱི་ཚིག་ནི་འབྱིན་པ་ལ་ལྟོས་པས་སོ། །དེ་ལ་ལྷ་མོ་ཕྱུང་བ་རྣམས་ཀྱིས་འགྲོ་བའི་དོན་བྱས་ནས་འཆད་པར་འགྱུར་བའི་གནས་སུ་དགོད་པར་བལྟ་བར་བྱ་ཞིང༌། བཅོམ་ལྡན་འདས་ནི་བདག་ཉིད་ཀྱི་ནང་དུ་ཆུད་པར་བྱའོ། །དཀྱིལ་འཁོར་རྫོགས་པ་སྟོན་པ། མ་མོའི་འཁོར་ལོ་ཞེས་པ་ལ་སོགས་པའོ། །ཞལ་རྣམས་ནི་གདོང་པ་རྣམས་སོ། །ཞབས་རྣམས་ནི་བརླ་དང་བྱིན་པ་དང༌། རྐང་མཐིལ་ཚོགས་པ་རྣམས་སོ། །བདུད་བཞི་རྣམས་བཅོམ་ནས་ཀུན་དུ་མནན་པའོ། །དེ་བཅོམ་པ་ནི་བློ་གྲོས་རྒྱ་མཚོའི་མདོར་གསུངས་པ། དེ་ལ་ཕུང་པོའི་བདུད་ནི་ཆོས་ཐམས་ཅད་སྒྱུ་མ་བཞིན་དུ་རྟོགས་པས་བཅོམ་མོ། །ཉོན་མོངས་པའི་བདུད་ནི་སྟོང་པ་ཉིད་དུ་ངེས་པར་འཛིན་པས་བཅོམ་པའོ། །འཆི་བདག་གི་བདུད་ནི་མ་སྐྱེས་ཤིང་མི་སྐྱེ་བས་བཅོམ་པའོ། །ལྷའི་བུའི་བདུད་ནི་ཆོས་ཐམས་ཅད་བསམ་དུ་མེད་པར་རྟོགས་པས་བཅོམ་པའོ་ཞེས་སོ། །དེ་ལྟར་ཕུང་པོའི་བདུད་གཟུགས་སུ་ན་ཚངས་པ་སེར་པོ་དང༌། ཉོན་མོངས་པའི་བདུད་ཁྱབ་འཇུག་ནག་པོ་དང༌། འཆི་བདག་གི་བདུད་དབང་ཕྱུག་ཆེན་པོ་དཀར་པོ་དང༌། ལྷའི་བུའི་བདུད་ལྷའི་དབང་པོ་ཁམ་སེར་རོ། །འཇིགས་པའི་ཞེས་པ་ནི་འཇིགས་པར་བྱེད་པའིའོ། །ཁམས་གསུམ་པ་ལས་འདས་པའི་རང་བཞིན་ཡུམ་ལ་ལོངས་སྤྱོད་པའི་ཕྱིར་ཆེར་རོལ་ཅིང་རྣམ་པར་སྒེག་པའི་ཉམས་ནི་སྒེག་པའོ། །བདུད་གནོན་པའི་ཕྱིར་དཔའ་བའོ། །མི་མགོའི་ཕྲེང་བ་ལ་སོགས་པའི་རྒྱན་འཛིན་པའི་ཕྱིར་རམ་གཅེར་བུ་ཉིད་ཀྱི་ཕྱིར་མི་སྡོག་པའོ། །སྒེག་པའི་རྗེས་སུ་བྱེད་པ་གང་ཡིན་པ་དེ་ནི་དགོད་པ་ཞེས་གྲགས་སོ། །འཇིགས་པའི་དུས་སུ་དུས་གཅིག་ཏུ་ཤར་བའི་ཉི་མའི་དཀྱིལ་
འཁོར་དྲག་པོ་རྣམས་དང་ཉེ་བར་མཚུངས་པའི་སྤྱན་རྣམས་ཀྱིས་དྲག་པོའོ། །ལྷ་དང་ལྷ་མ་ཡིན་མཐའ་དག་སྐྲག་པར་བྱེད་པའི་གཟུགས་ཉིད་ཀྱིས་འཇིགས་སུ་རུང་བའོ། །རྣམ་པར་རྟོག་པ་མཐའ་དག་པས་ཉེ་བར་མི་མཚོན་པའི་བདེ་བ་ཆེན་པོའི་རང་བཞིན་ཉིད་ན་ཡང་སྔོན་གྱི་སྨོན་ལམ་གྱིས་འཇུག་པས་རྣམ་པར་སྤྲོས་པའི་སྤྲུལ་པ་མ་ལུས་པའི་ཕྲེང་བ་རྣམས་ཀྱིས་སྐལ་པ་ཇི་ལྟ་བར་འགྲོ་བ་ལ་ཕན་པ་བསྒྲུབ་པའི་ཕྱིར་སྙིང་རྗེ་ཆེན་པོའོ། །འགྲོ་བ་ལས་ཤིན་ཏུ་འདས་པར་མཐོང་བ་ཉིད་ཀྱིས་ན་རྨད་བྱུང་ངོ༌། །འདོད་ཆགས་ལ་སོགས་པའི་ཉོན་མོངས་པའི་ཕུང་པོ་ཞི་བ་ཉིད་ཀྱི་ཕྱིར་ཞི་བའོ། །རོ་ཞེས་བྱ་བ་འདི་ཅི་ཞིག་ཅེ་ན། གང་འདི་མྱང་བར་བྱའོ། །ཅི་ལྟར་ཞེ་ན། འདི་ལ་བྷ་ར་ཏས་བཤད་པ། ཇི་ལྟར་རྫས་སོགས་སྦྱར་བ་ཡི། །ཚོད་མ་མང་པོ་དང་ལྡན་པའི། །ཟན་ནི་ཟན་ཟའི་སྐྱེ་བོ་རྣམས། །ཟ་ཞིང་མྱོང་བར་བྱེད་པ་སྟེ། །དེ་ལྟར་མི་རྣམས་བསམ་འགྱུར་ཚུལ། །ཕུན་ཚོགས་གནས་བྱེད་བསམ་གྱུར་པ། །ཡིད་ཀྱིས་མྱོང་བར་བྱེད་དེའི་ཕྱིར། །གར་གྱི་ཉམས་རྣམས་སུ་ནི་བཤད། །ཅེས་སོ། །གནས་བྱེད་བསམ་འགྱུར་བདག་ཉིད་དེ། །ཐམས་ཅད་སྒེག་སོགས་རོ་རུ་འདོད། །རོ་མཐའི་བར་དུ་གནས་པར་བྱེད། །ཅེས་པ་གནས་བྱེད་རྣམས་ཏེ། དེ་རྣམས་ཀྱང་བྷ་ར་ཏ་ཡིས། །དགོད་བྲོ་དགའ་དང་མྱ་ངན་དང༌། །ཁྲོ་དང་སྤྲོ་བ་དེ་བཞིན་འཇིགས། །རྨ་བྱ་ངོ་མཚར་ཞེས་པ་ནི། །གནས་བྱེད་བསམ་འགྱུར་རབ་ཏུ་བསྒྲགས། །སྣ་ཚོགས་ཚུལ་དང་འབྲེལ་བ་ཡི། །རོ་འདི་གང་ཕྱིར་བསམ་འགྱུར་བྱེད། །དེ་ཕྱིར་འདི་རྣམས་བསམ་འགྱུར་བར། །གང་སྦྱོར་རྣམས་ཀྱིས་ཤེས་པར་བྱ། །གང་ཕྱིར་དོན་ལ་མངོན་ཕྱོགས་པར། །འདྲེན་པ་དེ་ཕྱིར་ཚུལ་ཡིན་ནོ། །སྡུད་དང་ལུས་ངག་སྙིང་སྟོབས་ཀྱི། །དབྱེ་བས་དེ་ཉིད་ཐ་དད་འདོད། །དེ་ལ་སྒེག་པའི་ཚུལ་ནི་སྣ་ཚོགས་པ་མཆོག་ཏུ་གསལ་བའི་གོས་དང་བྱུག་པ་དང་ཕྲེང་བ་དང་སོ་རྩི་དང་རྒྱན་ལ་སོགས་པ་ནི་ཀུན་ནས་སྡུད་པའི་ཚུལ་ལོ། །དེ་ལ། ཀུན་ནས་འབིགས་དང་བཅིང་བྱ་དང༌། །བསྐོན་བྱ་བཏགས་བྱ་ཉིད་ཀྱང་སྟེ། །རྒྱན་གྱི་གར་ནི་རྣམ་པ་བཞི། །ཕྲེང་དུ་བྱ་བ་རྣམ་ལྔར་བཤད། །ཀུན་ནས་འབིགས་པ་རྣ་རྒྱན་སོགས། །རྣ་བ་དག་ལ་སྒྲུབ་པ་ཡིན།
རྐེད་རྒྱན་སྐུད་པ་དཔུང་རྒྱན་སོགས། །བཅིང་བར་བྱ་བ་རྣམས་སུ་བསྟན། །རྐང་གདུབ་རྐང་རྒྱན་བཅས་པ་དང༌། །རྐང་འཆིང་གོས་ཀྱི་རིགས་རྣམས་ནི། །བསྐོན་བྱ་གསེར་གྱི་སྐུད་སོགས་དང༌། དོ་ཤལ་ལ་སོགས་གདགས་བྱར་འདོད། །དཀྲིས་དང་བརྡལ་བ་ཉིད་དང་ནི། །བསྡུ་དང་དེ་བཞིན་མདུད་པར་ལྡན། །དཔྱངས་པ་ཕྲེང་དུ་བྱ་བ་ནི། །རྣམ་ལྔར་མཁས་པས་ཤེས་པར་བྱ། །དགའ་བས་ཅུང་ཟད་བལྟ་བ་དང༌། །སྨིན་མ་བསྐྱོད་པ་དང་ཟུར་མིག་ལ་སོགས་པའི་ངོ་བོ་ནི་རོལ་པ་དང་ལུས་སྒྱུར་གྱི་འགྱུར་བ་དང་ལུས་ཀྱི་ཚུལ་ལོ། །ཚིག་སྙན་པ་རྣམ་པར་འགོད་པ་ནི་ངག་གི་ཚུལ་ལོ། །རབ་གསལ་ངོ་བོ་སྙིང་སྟོབས་ཏེ། །སྙིང་སྟོབས་ལས་ནི་བསམ་འགྱུར་འབྱུང༌། །སྤུ་ལྡང་ཐིམ་དང་རེངས་པ་དང༌། །རྡུལ་དང་མདོག་འགྱུར་འདར་བ་དང༌། །དབྱངས་དབྱེ་མཆི་མ་དེ་རྣམས་འདིར། །མིང་བརྒྱད་རྣམས་ཀྱིས་ཐ་དད་པའོ། །དགའ་དང་མྱ་ངན་འཇིགས་དང་གྲང༌། །ཞེས་པ་སྤུ་ལོང་རྒྱུ་རྣམས་སོ། །བརྒྱལ་དང་སེམས་ནི་རྨོངས་གྱུར་པའི། །སྲོག་ཆགས་རྣམས་ཀྱི་ཐིམ་པར་འགྱུར། །ཤིན་ཏུ་དགའ་དང་འཇིགས་དང་ཁྲོ། །ནད་རྣམས་ལས་ནི་རེངས་པ་འབྱུང༌། །དགའ་བ་ཁྲོ་བ་འཇིགས་པ་དང༌། །ངོ་ཚ་རྗེས་ཆགས་དེ་བཞིན་ངལ། །མནན་པ་དོག་པ་དང་བཅས་པ། །རྡུལ་གྱི་རྒྱུ་རུ་ཤེས་པར་བྱ། །གྲང་དང་དྲོ་དང་འཇིགས་དང་ནད། །དུག་ནི་མདོག་འགྱུར་རྒྱུ་རྣམས་སོ། །འདར་བའི་གྲང་དང་དགའ་དག་དང༌། །རིམས་དང་ཁྲོ་བ་འཇིགས་རྣམས་སོ། །མྱོས་དང་དཔག་མེད་ཁྲོ་བ་ལས། །དབྱངས་ཀྱི་དབྱེ་བ་ཡང་དག་འབྱུང༌། །དགའ་དང་ཕྲག་དོག་ཉེན་ལས་བྱུང༌། །མཆི་མ་ཡོད་པ་རྣམ་གསུམ་ཉིད། །གང་ཡང་རོ་གཅིག་ལ་མཐོང་ཞིང༌། །རོ་གཞན་ལ་ཡང་མཐོང་གྱུར་པ། །དེ་རྣམས་སྙིང་སྟོབས་དམན་ཉིད་ཀྱིས། །སྐྱེད་པ་འཁྲུལ་པ་ཅན་རྣམས་སོ། །དེ་རྣམས་ཀྱང་ཡིད་འབྱུང་བ་དང་རིང་པ་ཅན་དང་དོགས་པ་དང་མི་བཟོད་པ་དང་དྲེགས་པ་དང་ངལ་བ་དང་སྙོམ་ལས་དང་ཞུམ་པ་ཉིད་དང་སེམས་པ་དང་རྨོངས་པ་དང་དྲན་པ་དང་བློ་གྲོས་དང་ངོ་ཚ་བ་དང་གཡོ་བ་ཉིད་དང་དགའ་བ་
དང་ཀུན་དུ་སྐྱོ་བ་དང་བླུན་པ་ཉིད་དང་ཁེངས་པ་དང་ཡི་བསད་པ་དང་སྒྱིད་ལུག་པ་དང་འདོད་པ་དང་བརྟན་པ་དང་ཁྲོ་བ་དང་གཉིད་དང་ཉལ་བ་དང་སད་པ་དང་བཅོས་སྦེད་དང་སྦུངས་ཆེ་བ་དང་རྗེད་བྱེད་དང༌། གདུང་བ་དང་སྨྱོ་བ་དང་འཆི་བ་དང་སྐྲག་པ་དང་རྟོག་ཞེས་པ་སུམ་ཅུ་རྩ་གསུམ་མོ། །མགོ་དང་ལག་པ་རྐེད་པ་བྲང༌། །རྐང་པ་ལོགས་དང་ཡང་དག་ལྡན། །ཡན་ལག་ཉེ་བའི་ཡན་ལག་ལྡན། །ཡན་ལག་དྲུག་པའི་གར་བསྡུས་པའོ། །མགོ་དང་ལོགས་དང་བྲང་དང་རྐེད་པ་དང་ལག་པ་དང་རྐང་པ་རྣམས་ནི་ཡན་ལག་དྲུག་རྣམས་སོ། །སྨིན་མ་དང་མིག་དང་སྣ་དང་མཆུ་དང་འགྲམ་པ་དང༌། ཨོ་སྐོ་རྣམས་ཉེ་བའི་ཡན་ལག་གོ །ལྟ་སྟངས་ནི་རྣམ་པ་སྣ་ཚོགས་པ་སྟེ་དེ་ལ། ཆུང་ཟད་དགོད་བཅས་ངོ་མཚར་བཅས་ལྟ་བུ། །སྨིན་མ་བསྐྱོད་བཅས་ཟུར་མིག་དང་ལྡན་པ། །མཛའ་བ་གསལ་བྱེད་རབ་དགའ་གཅིག་མཐར་ཐུག །སྒེག་པ་ལས་སྐྱེས་ལྟ་སྟངས་སུ་འདིར་བསྟན། །ཅུང་ཟད་གྱེན་ཟློག་མིག་གིས་གང༌། །སྟེང་གི་མིག་ལྤགས་མཛེས་བརྫེས་པ། །མིག་ཟུར་མཉམ་པར་རྒྱས་བྱས་པ། །ངོ་མཚར་བ་ཡི་ལྟ་སྟངས་འདོད། །གང་ཞིག་དབུས་ནི་ཅུང་ཕྱེ་ཞིང༌། །སྦུབས་ནི་རྟག་ཏུ་ཆེར་མ་ཕྱེ། །མིག་རྒྱན་མུ་ཀུ་ལ་དེ་འགྱུར། །རེག་པ་འཛིན་ལ་རྟག་ཏུའོ། །རྫི་མའི་རྩེ་མོ་གཡོ་བཞིན་པ། །སྟེང་གི་མིག་ལྤགས་སྣུམ་མཛེས་པ། །དྲི་དང་རེག་པ་དགའ་བ་ལ། །ལྟ་སྟངས་མུ་ཀུ་ལཱ་རུ་འདོད། །འཇམ་ལ་ཅུང་ཞིག་བསྐུམས་པ་གང༌། །ཅུང་ཟད་འཛུམ་ཞིང་དེ་བཞིན་མཛེས། །ལྟ་སྟངས་རོལ་པ་ཞེས་བྱ་སྟེ། །བུད་མེད་རྣམས་ཀྱིས་ཕྱེད་ལྟ་བའོ། །ཞེས་པ་ལ་སོགས་པ། །ལྟ་སྟངས་སོ་དྲུག་བསྟན་བཅོས་སུ། །བསམ་འགྱུར་རོ་ཡི་རྟེན་རྣམས་བཤད། །བྱེད་པ་རྣམས་ནི་ཁྱད་པར་ལས། །བརྒྱད་ཀྱི་ལྷག་པའི་བརྒྱ་རུ་བཤད། །ལུས་སྒྱུར་སུམ་ཅུ་རྩ་གཉིས་ཏེ། །དེ་བཞིན་དབྱུང་བ་བཞི་རྣམས་སོ། །དེ་ལས་ཅུང་ཟད་བདག་གིས་འདིར། །སློབ་མས་རྟོགས་པའི་ཆེད་དུ་བཤད། །དེ་རྣམས་རྒྱ་ཆེར་ངེས་བྱས་པ། །བྷ་ར་ཏ་སོགས་སུ་ཤེས་བྱ། །བསམ་པའི་འགྱུར་བ་ལ་སོགས་པ་འདི་རྣམས་ཀྱང་ཇི་ལྟར་རིགས་པར་རྒྱུད་འདིར་རྟོགས་པར་
བྱ་ཞིང༌། ཁྱད་པར་དུ་བཅོམ་ལྡན་འདས་ཀྱི་གར་གྱི་ཀུན་དུ་བསྐྱོད་པའི་བྱེ་བྲག་རྣམས་ནི་གོམ་པ་བསྐྱོད་པའི་རྒྱུད་ལ་སོགས་པ་རྣམས་སུ་ཉེ་བར་བསྒྲགས་ཏེ། བདག་གིས་རྡོ་རྗེ་ཕྲེང་བར་རྒྱས་པ་དང་བཅས་པར་རྣམ་པར་ཕྱེའོ་ཞེས་པས་འདིར་ཞར་བྱུང་རྒྱ་ཆེ་བས་ཆོག་གོ །འདིས་མགོ་བོའི་ཕྲེང་བས་དོ་ཤལ་བྱས་པས་ནི་དེ་སྐད་བརྗོད་དོ། །གར་སྟབས་ནི་དྲག་པོའི་གར་རོ། །ཇི་ལྟར་འཇིགས་པར་བྱེད་པར་འགྱུར་བ་དེ་ལྟ་བུའི་སྐུ་མདོག་ནག་པོའོ། །སྤྲོ་བར་བྱ་ཞེས་པ་ནི་སྤྲོ་བར་བྱེད་པའོ། །སྐུ་ནི་ལུས་སོ། །དགའ་བ་ནི་དགའ་རྩེད་དེ་ཁྱད་དགའི་དགའ་བའོ། །དེ་ཁོ་ན་གཉིས་གཉིས་ཏེ་རྣམ་པར་རྟོག་པ་དང་བཅས་པ་ཉིད་ཀྱི་ཕྱིར་རོ། །དེ་ལ་སྙོམས་ཞུགས་པ་ནི་དེ་སྔོན་དུ་མངོན་དུ་བྱེད་པའི་ཕྱིར་རོ། །དེ་ཁོ་ན་ཉིད་འདིས་ཅིས་ཕྱག་རྒྱར་བྱ་ཞེ་ན་གསུངས་པ། བདག་མེད་མ་ཞེས་པ་བདག་མེད་མ་དང་ལྷན་ཅིག་སྦྱོར་བ། དབའ་རླབས་མེད་པ་སྤྲོས་པ་མེད་པའི་བདེ་བ་ལྷན་ཅིག་སྐྱེས་པའི་དགའ་བའོ། །དེ་ཐོབ་པ་ནི་ཐོབ་པར་གྱུར་པའོ། །དེ་ཁོ་ན་ཉིད་འདིས་ཅི་ཞིག་རྒྱས་གདབ་ཅེ་ན། གསུངས་པ་དབའ་རླབས་མེད་པའི་རང་བཞིན་ཅན། །སྤྲོས་པ་ཐམས་ཅད་ཀྱི་གཉེན་པོ་ཉིད་ཀྱི་ཕྱིར་དབའ་རླབས་མེད་པ་གང་རང་གི་ངོ་བོ་ཡིན་པ་ཀྱེའི་རྡོ་རྗེའི་ངོ་བོ་སྟེ། དེ་འདི་ལ་ཡོད་པས་ན་དེ་སྐད་བཤད་དོ། །རྣམ་པར་གཙིགས་པ་ནི་མཆེ་བ་རྣམ་པར་གཙིགས་པའོ། །ཉི་ཤུ་རྩ་བཞིའི་སྤྱན་གྱིས་ཕྱུག་པ་ནི་ཞལ་བརྒྱད་ལ། སོ་སོར་དམར་ལ་ཟླུམ་པའི་སྤྱན་གསུམ་པ་ཉིད་ཀྱི་ཕྱིར་རོ། །ཚིགས་བཅད་འདིའི་རྗེས་ཐོགས་སུ་སྒེག་པ་ལ་སོགས་པའི་ཚིགས་བཤད་གཅིག་རྟོགས་པར་བྱའོ། །ཞལ་ཐམས་ཅད་ནི་སྒེག་པའི་རོ་སྟེ། དཀར་པོ་ལ་ཞི་བ་དང་ནག་པོ་ལ་དྲག་པོ་དང་ལྷག་མ་རྣམས་ལ་ཇི་ལྟར་རིགས་པར་རོ། །གཤོར་ནི་ཐོད་པོ་ཆང་གིས་བཀང་བའོ། །ཐོད་པ་ནི་ཁྲག་གིས་གང་བའོ། །རྣམ་པ་འདི་ལྟའི་ཆོ་ག་ཡིས། །ཞེས་པ་བཅོམ་ལྡན་འདས་རྫོགས་པའི་ཆོ་ག་བྱས་ནས་ཕྱུང་བའི་གཽ་རཱི་ལ་སོགས་པ་རྣམས་དགོད་པར་བྱའོ། །གཽ་རཱི་གཡོན་པ་དག་ན་གཞུ་དང་རོ་ཧི་ཏའི་ཉ་དང་བཅས་པའི་ཁྲག་གིས་གང་བའི་ཐོད་
པའོ། །ཆོམ་རྐུན་མའི་གཡོན་པ་དག་ན་ལྕགས་ཀྱུ་དང་བཅས་པའི་ཁྲག་གིས་གང་བའི་ཐོད་པའོ། །རབ་རྨོངས་མ་ནི་གཡུང་མོ་སྟེ། །དེའི་གཡོན་པ་དག་ན་བདུད་རྩི་ལྔའི་ཐོད་པ་ལ་གནས་པའི་ཅེ་སྤྱང་དང༌། ས་འདོན་ཏེ་ཐོད་པའོ། །རོ་ལངས་མ་དཀར་པོ་དང་བསྲེས་པའི་སེར་པོ་སྟེ། གཡོན་པ་དག་ན་ཐོད་པ་གཟུང་བ་ན་ཆང་དང་གཅི་བ་དག་དང་གཡས་པ་ཁྲག་དང་བཅས་པའི་ཐོད་པ་ན་རུས་སྦལ་ལོ། །པུཀྐ་སཱིའི་གཡས་པ་དག་ན་ཤས་གང་བའི་ཐོད་པ་དག་ལ་གནས་པའི་སེང་གེ་དང་མཆོག་སྦྱིན་གྱི་ཕྱག་རྒྱའོ། །གཏུམ་མོའི་གཡས་པ་ན་ཁྲག་གིས་གང་བའི་ཐོད་པ་ལ་སྟག་གོ །གྷ་སྨ་རཱི་ལྗང་གུ་ཅུང་ཟད་སེར་བ་གཡོན་པ་དག་ན་རྡོ་རྗེས་མཚན་པའི་མེ་ཐབ་དང་དགྲ་སྟ་དང༌། གཡས་པ་དག་ན་ཚིལ་གྱིས་གང་བའི་ཐོད་པ་ལ་གནས་པའི་སྦྲུལ་དང་མི་འཇིགས་པའི་ཕྱག་རྒྱའོ། །ཤ་བ་རཱིའི་གཡས་པ་དག་ན་ཁུ་བ་དང་བཅས་པའི་ཐོད་པ་ལ་གནས་པའི་དགེ་སློང་དང་རྡོ་རྗེའོ། །ཉེ་བར་སྡུད་དེ། སྣ་ཚོགས་གཟུགས་ཅན་མ་རྣམས་བསྒོམ། །ཞེས་པའོ། །ཆོ་ག་བཞིན་ཞེས་པ་ཐོད་པ་རྣམས་སུ་མ་བཤད་པའི་རྫས་ཉ་རོ་ཧི་ཏ་ལ་སོགས་པའི་ཆོ་གའོ། །རྒྱན་ནི་འཁོར་ལོ་ཅན་ལ་སོགས་པའོ། །འདི་རྣམས་ཀྱི་ཡང་ས་བོན་གྱི་རིམ་པ་བཞིན་དགོད་དོ། །དེ་ལ་གཽ་རཱི་དང་ཆོམ་རྐུན་མ་དང་རོ་ལངས་མ་དང༌། གྷ་སྨ་རཱི་དང་པུཀྐ་སཱི་དང་རི་ཁྲོད་མ་དང་གཏུམ་མོ་དང་རབ་རྨོངས་མ་རྣམས་རིམ་པ་ཇི་ལྟ་བར་ཞི་བ་དང་དྲག་པོ་དང་དགའ་བ་དང༌། ཤི་བ་སློང་བའི་ཚུལ་གྱི་གར་དང་ཞི་བ་དང་སྟེང་དུ་ཕྱོགས་པ་དང་མྱོས་པ་དང་རབ་ཏུ་རྨོངས་པའི་ལྟ་སྟངས་ཅན་གྱི་ཞལ་ཅན་རྣམས་ཏེ། ཤར་དང་ལྷོ་དང་ནུབ་དང་བྱང་དང་དབང་ལྡན་དང་མེ་དང་བདེན་བྲལ་དང༌། རླུང་གི་ཕྱོགས་དང་ཕྱོགས་མཚམས་སུ་རིམ་པ་ཇི་ལྟ་བར་བསྒོམ་པར་བྱའོ། །རྟ་གཟུགས་ལ་སོགས་པ་རྣམས་ཀྱི་གཙོ་བོ་དང་གཡས་པ་དང་ཅིག་ཤོས་དང་སྟེང་གི་རིམ་པས་ཞལ་གྱི་ཁ་དོག་གསུངས་པ། ནག་ཅེས་པ་ལ་སོགས་པའོ། །སེང་གེའི་ཞལ་ནི་དམར་བའོ། །གཡས་བརྐྱང་གི་ཟླ་བོའི་ཞབས་ནི་སྒོ་སྐྱོང་རྣམས་ཁོ་ནའོ། །ལྷ་གཞན་རྣམས་ནི་སྐྱིལ་ཀྲུང་ཕྱེད་པ་ཅན་རྣམས་སོ། །
གླིང་བུ་མ་ལ་སོགས་པ་རྣམས་ཀྱི་རིམ་པ་ཇི་ལྟ་བ་བཞིན་ཧཱུཾ་ཧཱུཾ་ཧཱུཾ་ཧཱུཾ་ཧྲཱིཿ་ཏྲཱཾ་ཊཱཾ་ཏྲཱཾ་ཞེས་པ་ས་བོན་རྣམས་སོ། །འདིར་ཡང་དབང་པོ་བྱིན་གྱིས་བརླབ་པ་དང་སྐུ་གསུང་ཐུགས་བྱིན་གྱིས་བརླབ་པ་དང་དབང་བསྐུར་ཞིང་རྒྱས་གདབ་པ་དང་མཆོད་པ་ལ་སོགས་པའང་ཤེས་པར་བྱའོ་ཞེས་པའོ། །བཅོམ་ལྡན་འདས་འདིའི་མངོན་པར་རྟོགས་པ་ནི་སྔར་བཤད་པའི་ཧེ་རུ་ཀ་གསུམ་གྱི་ཇི་ལྟ་བ་བཞིན་ཏེ། ཁྱད་པར་ནི་གཞལ་ཡས་ཁང་གི་ནང་དུ་ཆོ་ག་བཞིན་དུ་ཨཱ་ལི་དང་ཀཱ་ལི་ལས་སྐྱེས་པའི་ཟླ་བ་དང་ཉི་མའི་དབུས་སུ་ཧཱུཾ་དང་ཨ་ལས་སྐྱེས་པའི་ཐོད་པ་དང་གྲི་གུགས་གནས་པའི་ས་བོན་གཉིས་སོ་ཞེས་པ། ཐམས་ཅད་ཡོངས་སུ་གྱུར་པའི་རྡོ་རྗེ་སེམས་དཔའ་ཕྱག་རྒྱ་དྲུག་པ་ཅན་ཞལ་བརྒྱད་པ་ལ་སོགས་པའི་ཁྱད་པར་ཅན་རྣམ་པར་བསྒོམས་ནས། བསྲུབ་ཅིང་སྲུབས་པ་ལས་སྐྱེས་པའི་བྱང་ཆུབ་ཀྱི་སེམས་ཀྱི་ཐིག་ལེ་ལས་བྱུང་བའི་གཾ་རྩམ་བཾ་བྷཾ་པཾ་ཤཾ་ལཾ་ཌཾ་གི་ས་བོན་ལས་སྐྱེས་པའི་གཽ་རཱི་ལ་སོགས་པ་རྣམས་པདྨའི་ནང་ནས་ཕྱུང་ནས་གནས་ཇི་ལྟ་བར་བལྟ་བར་བྱའོ། །དེ་ནས་ཧོཿ་ཡིག་གཉིས་ཀྱི་དབུས་སུ་ཆུད་པའི་ས་བོན་གྱི་ངོ་བོའི་སེམས་ཞལ་ནས་པདྨའི་ནང་དུ་གཞུག་ཅིང༌། དེ་ནས་འདོད་ཆགས་ཆེན་པོས་རིག་མ་དང་བཅས་པའི་རྡོ་རྗེ་ཅན་ཞུ་བར་གྱུར་པ། བཞེངས་ཤིག་ཅེས་པ་ལ་སོགས་པས་བསྐུལ་ཞིང༌། ཞུ་བ་ལས་ལྷ་མོ་ཞུགས་མ་ཐག་ཏུ་ཞུ་བ་དེ་ལས་སྐྱེས་པའི་ཧཱུཾ་ཞེས་པ་ལ་སོགས་ཡོངས་སུ་གྱུར་ཏེ། ཨོཾ་དྷརྨྨ་དྷཱ་ཏུ་སྭཱ་བྷཱ་བ་ཨཱཏྨ་ཀོ྅ཧམ་ཞེས་བརྗོད་དོ། །དེ་ནས་མིག་བྱིན་གྱིས་བརླབ་པ་ལ་སོགས་པ་དང་པོའི་སྦྱོར་བའི་རྗེས་ཐོགས་སུ་བདག་མེད་མའི་སྤྱི་བོར་ཨོཾ་ཡིག་དཀར་པོ་སྟེ། ཨོཾ་ཡིག་ཕྲ་མོ་གཞན་དང་གཞན་རྣམས་ཀྱིས་སྙིང་གའི་མཐར་ཐུག་པར་ཁྱབ་པ་དང༌། སྙིང་གར་ཧཱུཾ་ཡིག་ནག་པོ་སྟེ། དེ་ལྟ་ཁོ་ནར་རྐེད་པའི་མཐར་ཐུག་པ་དང༌། གསང་བར་ཨཱཿ་ཡིག་དམར་པོ་སྟེ་དེ་བཞིན་ཁོ་ནར་རྐང་མཐིལ་གྱི་མཐར་ཐུག་པར་བསྒོམས་ནས། ཨོཾ་པདྨ་སུ་ཁཱ་དྷཱ་ར་མ་ཧཱ་རཱ་ག་སུ་ཁཾ་ད་ད་ཙ་ཏུ་རཱ་ན་ནྡ་བྷ་ག་བི་ཤྭ་ཧཱུཾ་ཧཱུཾ་ཧཱུཾ་ཀཱ་ཪྻཾ་ཀུ་རུ་ཥྭ་མེ། ཨོཾ་བཛྲ་མ་ཧཱ་དྭེ་ཥ་ཙ་ཏུ་རཱ་ན་ནྡ་དཱ་ཡ་ཀཿ་ཁ་ག་མུ་ཁཻ་ཀ་ར་སོ་ནཱ་ཐ་ཧཱུཾ་ཧཱུཾ་ཧཱུཾ་ཀཱ་ཪྻཾ་ཀུ་རུ་ཥྭ་མེ། ཞེས་པས་པདྨ་དང་རྡོ་རྗེ་བྱིན་གྱིས་བརླབས་ནས་དགའ་བ་བརྩམས་ཏེ། སྔོན་བཞིན་དུ་གཽ་རཱི་
ལ་སོགས་པའི་ལྷ་མོ་རྣམས་དབྱུང་བར་བྱའོ། །ལྷ་མོ་དང་བཅོམ་ལྡན་འདས་ཀྱང་རང་གི་ས་བོན་ལས་སྐྱེས་པ་ན་དེ་དག་སྤྲོས་ནས་བདག་ཉིད་ཀྱི་ནང་དུ་གཞུག་པར་བྱའོ། །དེ་ནས་མིག་ལ་སོགས་པ་བྱིན་གྱིས་བརླབ་པ་ནི་སྔ་མ་བཞིན་ཏེ་ཐམས་ཅད་བྱའོ། །དེ་ནས་ཡེ་ཤེས་སེམས་དཔའ་གཞུག་ཅིང་དབང་བསྐུར་ཏེ་རྒྱས་གདབ་པ་དང༌། བདུད་རྩི་མྱང་བ་ཞེས་པ་དཀྱིལ་འཁོར་གྱི་རྒྱལ་པོ་མཆོག་ལ་སོགས་པ་བསྒོམ་པ་དང་བཟླས་པ་བྱའོ་ཞེས་པའོ། །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱ་ཆེར་འགྲེལ་པ་མན་ངག་གི་སྙེ་མར་སྙེ་མ་དགུ་པའོ།། །།