སྙེ་མ་བཅུ་པ། དབང་པོ་འབྲིང་རྟུལ་དག་གི་རྫོགས་པའི་རིམ་པའི་དངོས་སུ་ཐབས་བསྐྱེད་པའི་རིམ་པ་བསྒོམ་པ་བཤད་པ།
ཡེ་ཤེས་མཁའ་འགྲོ་མ་བསྒོམ་པ་ལ་སྦྱར་བའི་ཆེད་དུ་གསུངས་པ། ཉོན་ཅིག་ཅེས་པ་ལ་སོགས་པའོ། །གཙོ་བོ་ནི་རང་གི་གདུལ་བྱ་རྣམས་ཕན་པ་ལ་སྦྱར་བའི་ཆེད་དུ་རབ་ཏུ་འབྱུང་བའི་ངང་ཚུལ་ཅན་ཉིད་ཀྱི་ཕྱིར་རོ། །དེ་ཉིད་ཀྱི་ཕྱིར་གསལ་བའོ། །སྟོང་པ་ཉིད་བསྒོམ་པ་གསུངས་པ། སྤངས་པ་སྟེ་སྤངས་ཤིང་བྲལ་བ་ནི་སྟོང་པ་ཉིད་དོ་ཞེས་པའི་དོན་ཏོ། །ཅི་ཞེ་ན། གཉིས་ཀྱི་དངོས་པོ་སྟེ་དངོས་པོ་དང་དངོས་པོ་མེད་པ་ལ་སོགས་པ་གཉིས་ཀྱི་རང་བཞིན་གྱིའོ། །དེ་བསྒོམ་པར་བྱ་སྟེ་སུས་ཤེ་ན། གཉིས་མེད་ཆོས་ཀྱི་ཡེ་ཤེས་ཅན་གྱིས་ཏེ་སྟོང་པ་ཉིད་ཀྱི་ཡེ་ཤེས་དང་ལྡན་པས་སོ། ཅི་ལྟར་ཞེ་ན། གསུམ་གྱིས་ཏེ་རྒྱུད་གཞན་དུ་གསུངས་པའི་ཕྱིར་ཨོཾ་ཡིག་དང་སྭཱ་བྷཱ་ཝ་དང་བཛྲ་དང་ཡོ་ག་རྣམས་ཀྱིས་ཁྱད་པར་དུ་བྱས་པའི་ཤུདྡྷ་ཞེས་པ་ལ་སོགས་པའི་སྔགས་གསུམ་བརྗོད་པར་བྱའོ། །ནམ་གྱི་ཚེ་ཞེ་ན། རྣལ་འབྱོར་ཀུན་ནི་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ངོ་བོ་ཡེ་ཤེས་མཁའ་འགྲོའོ། །དེའི་དང་པོ་པ་ནི་རྒྱུ་སྟེ་ཧཱུཾ་དང་བཅས་པའི་རྡོ་རྗེའོ། །དེའི་སྔོན་ནི་སྟོང་པ་ཉིད་མངོན་དུ་བྱེད་པའི་རྩོམ་པའོ། །རྣལ་འབྱོར་ཀུན་དང་པོ་དང་སྔོན་ཏེ་དེ་རྣམས་སུ་རིམ་པ་ཇི་ལྟ་བར་ཡོ་ག་ཞེས་པ་ལ་སོགས་པ་དང་བཛྲ་ཞེས་པ་ལ་སོགས་པ་དང༌། སྭ་བྷཱ་ཝ་ཞེས་པ་ལ་སོགས་པ་བརྗོད་པར་བྱའོ། །ཨ་གྲའི་ཨའི་ཡི་གེ་དབྱེ་བ་ནི་ངེས་པའི་ཚིག་གོ །སྭ་བྷཱ་ཝ་ཡིས་ཏེ་རང་བཞིན་སྟོང་པ་ཉིད་ལས་དངོས་པོ་དང་དངོས་པོ་མེད་པ་དང་གཟུང་བ་དང་འཛིན་པ་ལ་སོགས་པའི་སྒྲོ་བཏགས་པ་དང་བྲལ་བའི་ཕྱིར་ཤུདྡྷ་སྟེ་དྲི་མ་མེད་པའི་ཕུང་པོ་ལ་སོགས་པ་རྣམས་ཡིན་
ཞིང་། ང་ཡང་དེ་ལྟ་སྟེ་ཆོས་ཐམས་ཅད་ཀྱི་ནང་དུ་འདུས་པ་ཉིད་ཀྱི་ཕྱིར་རོ་ཞེས་དགོངས་པའོ། །བཛྲ་ནི་སྟོང་པ་ཉིད་དེ། སྟོང་ཉིད་རྡོ་རྗེར་བརྗོད་པར་བྱ། །ཞེས་པའི་གསུང་ལས་སོ། །དེས་མཚན་མར་སྒྲོ་བཏགས་པ་མ་ལུས་པ་དང་བྲལ་བའི་ཕྱིར་ཤུདྡྷ་རྣམས་སོ། །ཡོ་ག་ནི་བྱང་ཆུབ་ཀྱི་སེམས་ཏེ། དེས་སྨོན་པ་དང་བྲལ་བ་ཉིད་ཀྱི་ཕྱིར། ཤུདྡྷ་རྣམས་སོ། །བདག་ཏུ་འཛིན་པ་ནི་དོར་བར་དཀའ་བ་ཉིད་ཀྱི་ཕྱིར་ན་སྭ་བྷཱ་ཝ་ཤུདྡྷོ྅ཧཾ་ཞེས་པ་ལ་སོགས་པའི་ཚིག་གོ །གསུམ་རྣམས་ཀྱིས་ནི་སྟོང་པ་ཉིད་དང་མཚན་ཉིད་མེད་པ་དང་སྨོན་པ་མེད་པ་སྟེ། རྣམ་པར་ཐར་པའི་སྒོ་གསུམ་རྣམས་གསུངས་སོ། །རང་བཞིན་གྱིས་ཡོངས་སུ་དག་པ་ཉིད་ན་ཡང་འདི་རྣམས་ཀྱིས་གློ་བུར་གྱི་དྲི་མ་སེལ་བའོ། །དེ་ལྟར་བྱས་ནས་ཤེས་པ་བསྒོམས་ནས། སླར་ཡང་ཁྱད་པར་དུ་དེའི་སྟེ་བྲལ་བ་ཆོས་ཐམས་ཅད་མི་དམིགས་པའིའོ། །ཅི་ཞིག་ཏུ་གནས་ནས་ཤེ་ན། ཡིད་དང་རྗེས་མཐུན་ཕྱོགས་རྣམས་སུའོ། །བསམ་གཏན་ཅི་འདྲ་བ་ཞེན་གསུངས་པ། ཡུད་ཀྱི་རྣམ་པ་ཞེས་པ་ལ་སོགས་པ་སྟེ། ཡེ་ཤེས་མཁའ་འགྲོ་མར་བསམ་བྱ། ཞེས་པ་རྣམ་དབྱེ་བསྒྱུར་བས་འབྲེལ་བར་བྱའོ། །དེའི་རྗེས་སུ་དེ་ནམ་མཁར་གཞག་པར་བྱ་སྟེ་མཆོད་པ་སྔོན་པ་མ་ཅན་དུ་ཇི་ལྟར་འགྱུར་བར་རོ། །བློ་ལྡན་ཞེས་པ་འདིས་གཞན་དུ་བརྗོད་པ་དྲན་པ་ལ་སྦྱོར་བའི་ཕྱིར་ཆོག་གཞན་གསལ་བར་བྱེད་དོ། །ཡེ་ཤེས་རྒྱ་མཚོ་ནི་ཡེ་ཤེས་མཁའ་འགྲོ་མ་ལ་སོགས་པའི་ལྷའི་འཁོར་ལོའོ། །ཅི་བྱས་ནས་ཤེ་ན་གསུངས་པ། ལྷུན་པོའི་ཞེས་པ་ལ་སོགས་པའོ། །ལྷུན་པོ་གང་གི་ཁ་དོག་བཞི་རྣམས་ཡིན་པ་སྟེ། དངུལ་དང་ཨིནྡྲ་ནཱི་ལ་དང༌། ཤེལ་དང་གསེར་གྱི་རང་བཞིན་ཉིད་ཀྱི་ཕྱིར་རོ། །ཤར་དང་ལྷོ་དང་ནུབ་དང་བྱང་གི་ཕྱོགས་རྣམས་སུ་དང༌། ཕྱོགས་མིན་དུ་དེ་ལྟར་ཏེ། །ཕྱོགས་བྲལ་རྣམས་སུ་ཡང་ཕྱོགས་ཀྱི་ཁ་དོག་ཁོ་ན་སྟེ་ཕྱོགས་བྲལ་རྣམས་ནི་དེ་དང་དེའི་ཕྱོགས་རྣམས་ཀྱི་ནང་དུ་འདུས་པའི་ཕྱིར་རོ། །ཅི་བསམས་ནས་ཤེ་ན། གསེར་གྱི་རང་བཞིན་གྱི་ཁང་པ་བརྩེགས་པ་ཡང་དག་པར་བྱུང་བོའོ། །རིན་ཆེན་བདུན་ནི། གསེར་དང་དངུལ་དང་བཻ་ཌཱུཪྻ་དང་མུ་སཱ་ར་ག་ལྦ་དང༌། རྡོའི་སྙིང་པོ་དང་མུ་ཏིག་དམར་པོ་དང་ཀ་རྐེ་ཏ་ན་རྣམས་
སོ། །པདྨ་རཱ་ག་དང༌། ཨིནྡྲ་ནཱི་ལ་དང་བཻ་ཌཱུཪྻ་དང་མ་ར་ཀ་ཏ་དང་རྡོ་རྗེ་དང་མུ་ཏིག་དང་བྱུ་རུ་རྣམས་སོ་ཞེས་ཁ་ཅིག་གོ །རང་འདོད་རྒྱ་ཁྱོན་ཞེས་པ་རང་གི་འདོད་པའི་དབང་དུ་གྱུར་པའི་རྒྱ་ཁྱོན་ནོ། །འདིའི་རྗེས་སུ་བླ་རེ་ཞེས་པ་ལ་སོགས་པ་ཕྱེད་དང་བཅས་པའི་ཚིགས་བཅད་དོ། །སེང་གེ་ལ་སོགས་པས་མཚན་པ་ནི་རྒྱལ་མཚན་ནོ། །ཕྱོགས་བརྒྱད་རྣམས་སུ་དང་སྟེང་དང་འོག་ཅེས་པ་གནས་བཅུ་རྣམས་སུ་ཀུན་དུ་སྟེ་ཁྱབ་པར་རོ། །དྲིའི་དཀྱིལ་འཁོར་ནི་དྲི་ཀུན་ནས་བསྡུས་པ་སྟེ་གཞལ་ཡས་ཁང་གི་ནང་དུའོ། །དེར་ཡང་གདན་ལ་སོགས་པ་གསུངས་པ། སེང་གེ་ཞེས་པ་ལ་སོགས་པའོ། །བདག་ཉིད་ཀྱི་སྤྲོ་བའོ་ཞེས་པ་དབུགས་ནི་ས་བོན་ཏེ་སྲོག་ཏུ་གྱུར་པ་ཉིད་ཀྱི་ཕྱིར་རོ། །དེ་ཉིད་ཀྱི་ཕྱིར་སྙིང་གར་བསྒོམ་པར་བྱའོ། །དེ་ཡོངས་སུ་གྱུར་པས་བྱུང་ན་སྟེ་རབ་ཏུ་སྐྱེས་ནས་སོ། །དེ་ལ་ཡེ་ཤེས་མཁའ་འགྲོ་མའི་རང་བཞིན་གསུངས་པ། ཞལ་གསུམ་ཞེས་པ་ལ་སོགས་པའོ། །རང་གི་གདན་གྱི་སྟེང་དུ་སྐྱིལ་ཀྲུང་གི་རྣམ་པར་ཞབས་གཡོན་པ་བཀོད་ནས་གཡས་པ་ཅུང་ཟད་བརྐྱང་བར་བྱའོ་ཞེས་པ་འདིར་སེམས་དཔའི་སྐྱིལ་ཀྲུང་སྟེ། ལྷ་མོ་བཅུ་གསུམ་པོ་རྣམས་ཀྱང་སེམས་དཔའ་སྐྱིལ་ཀྲུང་ཅན་རྣམས་སོ། །སངས་རྒྱས་ལྔ་འཕྲོ་བ་རྣམས་ཀྱིས་མངོན་པར་བརྒྱན་པའི་ཅོད་པན་དང་ངར་གྱིས་བཅིངས་པའི་ཅོད་པན་གྱི་སྟེང་དུ་རྡོ་རྗེའོ། །བཞད་པ་ནི་ཞལ་གཡས་པ་རབ་ཏུ་བཞད་པ་དཀར་པོའོ། །རྩ་བ་ནི་ཁྲོས་ཤིང་གད་རྒྱངས་ཅན་ནོ། །གཡོན་པ་དམར་པོ་སྒེག་པ་དང་བཅས་པ་སྟེ་ཞལ་སོ་སོ་ལ་སྤྱན་གསུམ་པའོ། །ཕྱག་གཡས་པ་གསུམ་ན་གྱེན་དུ་བསྒྲེང་བའི་ཁ་ཊྭཱཾ་ག་དང་དགྲ་སྟ་དང༌། རྡོ་རྗེ་སྟེ། ཕྱག་གཡོན་པ་གསུམ་ན་དྲིལ་བུ་དང་ཐོད་པ་དང་རལ་གྲི་རྣམས་སོ། །དྲག་ཏུ་གསངས་མཐོན་པོར་འཇིགས་སུ་རུང་བར་དགོད་པ་གང་གི་ཡིན་པ་དེ་སྐད་དོ། །སྣོད་ཅེས་པ་ཁྲག་གིས་གང་བའི་ཐོད་པའོ། །རྣལ་འབྱོར་སྣོད་ནི་ཐོད་པ་སྟེ་གཡོན་དུའོ། །རྡོ་རྗེ་མཁའ་འགྲོ་མ་ལ་སོགས་པ་རྣམས་སྤྱན་གསུམ་པ་གཙོ་མོ་ལ་གཟིགས་པ་རྣམས་སོ། །ཡེ་ཤེས་ཀྱི་ཞེས་པ་ཡེ་ཤེས་མཁའ་འགྲོ་མའིའོ། །སེང་གེའི་གདོང་ཅན་ཞེས་པ་ནི་སེང་གེའི་ཞལ་ལོ། །གླང་པོའི་དབང་པོ་
ནི་ལག་ལྡན་ནོ། །ཕྱག་གཡས་པར་རྡོ་རྗེས་མཚན་པའི་ལྕགས་ཀྱུའོ། །གཡོན་ན་སྡིགས་མཛུབ་དང་བཅས་པའི་ཞགས་པའོ། །སྟག་མོ་ལ་སོགས་པ་གསུམ་ནི་སྟག་དང་ཅེ་སྤྱང་དང་འུག་པའི་གདོང་བ་ཅན་ནོ། །ཀླུ་ཞེས་པ་གདེངས་ཅན་གྱི་དབང་པོ་བརྒྱད་རྣམས་ཏེ་རིགས་ལ་གཅིག་གི་ཚིག་གོ །དེ་ཁོ་ནའི་ནི་སྦྲུལ་གྱིའོ། །རྒྱལ་པོའི་དབང་མོ་ཞེས་པ་མིང་ངོ༌། །ཕྱག་རྣམས་ཞེས་པ་ཕྱག་གཉིས་ཐལ་མོ་སྦྱར་བའི་ཚུལ་ལོ། །ཕྱག་གཉིས་ཐལ་མོ་སྦྱར་བའི་ཞེས་པ་ཕྱག་གཉིས་ཐལ་མོ་སྦྱར་ལ་སྤྱི་བོའི་སྟེང་དུ་མར་མེའི་རྣམ་པས་སྟོན་པའོ། །ཁྲག་གི་རྒྱུན་ཞེས་པ་ལ་སོགས་པ་ནི་ལག་པ་གཉིས་ཀྱི་སྙིམ་པ་སྟེང་དུ་བྱས་པས་ཁྲག་སྲད་བུ་དམར་པོ་བཞིན་དུ་རྒྱུན་གྱིས་འཐུང་པའོ། །སྡིགས་མཛུབ་མདུང་གི་ཕྱག་ཅན་ཞེས་པ་ཕྱག་གཉིས་ཀྱིས་རྡོ་རྗེ་ཐལ་མོ་བྱས་ཏེ། མཐེ་བོའི་རྩེ་མོ་གཉིས་ཕན་ཚུན་སྦྱར་ནས། སྡིགས་མཛུབ་གཉིས་ཀྱི་རྩེ་མོར་བྱས་པ་ནི་མདུང་ལྟ་བུའོ་ཞེས་པས་དེ་སྐད་བརྗོད་དོ། །དེ་ཡང་རང་གི་བྷ་གར་འཛིན་པའོ། །རྨོངས་པར་མཛད་ཅེས་པ་རྨོངས་པར་བྱེད་མ་སྟེ་སེམས་ལྡན་རྣམས་ཐམས་ཅད་དབང་དུ་བྱེད་པ་ཞེས་པའི་དོན་ཏོ། །ཉེ་བར་སྡུད་དེ་ཐམས་ཅད་རིག་པས་ཐམས་ཅད་བསྒོམ་ཞེས་པ། འདི་ལྟ་བུའི་དཀྱིལ་འཁོར་ཐམས་ཅད་ཁ་དོག་དང་ཕྱག་མཚན་ལ་སོགས་པ་ཐམས་ཅད་ཤེས་པའི་རྣལ་འབྱོར་པས་བསྒོམ་པར་བྱའོ། །སེང་གེའི་གདན་བཞིན་དུ་གདན་གཞན་རྣམས་ཀྱང་ཉི་མ་མནན་པ་རྣམས་སོ། །ཐམས་ཅད་དུ་ཡང་རང་རང་གི་ས་བོན་ཡོངས་སུ་གྱུར་པའི་ལྷ་མོ་རྣམས་སོ། །འདི་རྣམས་ཞེས་པ་ལ་སོགས་པ་ནི། ལྷ་མོ་འདི་རྣམས་ཀྱི་མདུན་དུ་དམ་ཚིག་གི་ཕྱག་རྒྱ་རང་ཉིད་ཇི་ལྟ་བར་བསྟན་པར་བྱའོ། །ཡེ་ཤེས་མཁའ་འགྲོ་མའི་ས་བོན་བཏུ་བ་ནི། རླུང་དང་མེ་ལས་བདུན་པ་ཉིད། །ཅེས་པ། རླུང་གིས་ཏེ་རླུང་གི་དཀྱིལ་འཁོར་ཟླ་བ་ཕྱེད་པས་སྟེང་དུ་ཁྱད་པར་བྱས་ཤིང་མེ་ལས་ཏེ་རེ་ཕ་ལས་བདུན་པ་ཧ་ཡིག་རྡོ་རྗེ་མའི་ས་བོན་ཨུ་ཡིག་འོག་ཏུ་ལྡན་པའོ། །ཟླ་བ་ཕྱེད་པའི་སྟེང་དུ་ཐིག་ལེ་དང་ནཱ་ད་དག་གིས་མནན་པ་སྟེ། དེ་ལྟར་ཧཱུཾ་དུ་འགྱུར་རོ། །ཧཱུཾ་དེ་ཡང་བྱང་ཆུབ་སེམས་ཀྱི་རྒྱུན་ཆར་དུ་འབེབས་སོ་ཞེས་པས་ཆར་གྱི་རྒྱུན་
ཏེ་འདིས་ཕྲ་མོའི་རྣལ་འབྱོར་གསལ་བར་བྱེད་དོ། །དེའི་དོན་ཡིན་ཏེ། ས་ཕྱོགས་ཡིད་དང་རྗེས་སུ་མཐུན་པ་འགའ་ཞིག་ཏུ་ནུབ་ཏུ་གདོང་ཕྱོགས་ཤིང་སྐྲ་གྲོལ་བས་གཏོར་མ་སྦྱིན་པ་སྔོན་དུ་འགྲོ་བས་ཡུད་ཀྱིས་ཡེ་ཤེས་མཁའ་འགྲོ་མའི་གཟུགས་སུ་བདག་ཉིད་ལྷག་པར་མོས་ནས་རང་གི་སྙིང་གའི་ས་བོན་གྱི་འོད་ཀྱིས་ནམ་མཁར་སྤྱན་དྲངས་པའི་ཡེ་ཤེས་མཁའ་འགྲོ་མ་འཁོར་དང་བཅས་པ་ལ། སྙིང་གའི་ས་བོན་ལས་སྐྱེས་པའི་ལྷ་མོ་རྣམས་ཀྱིས་ཕྱི་དང་ཅིག་ཤོས་ཀྱི་མཆོད་པས་མཆོད་དེ། སྡིག་པ་བཤགས་ད་ནས་ཇི་སྲིད་བཏང་སྙོམས་ཀྱི་བར་དུ་བསྒོམས་ནས། ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ཧཾ། ཞེས་པ་ནང་གི་བརྗོད་པས་ཀློག་ཅིང༌། དོན་མངོན་དུ་བྱས་ཏེ། ཆོས་ཐམས་ཅད་སྟོང་པ་ཉིད་ལ་གཞུག་པར་བྱའོ། །དེ་ནས་ཨོཾ་ཧཱུཾ་སྭཱ་ཧཱ་ཞེས་པའི་སྔགས་ཀྱིས་རྡོ་རྗེའི་རང་བཞིན་གྱིས་གཞི་བསྒོམ་པར་བྱ་ཞིང་། ཨོཾ་ཛཾ་བྷ་ནི་ཧཱུཾ་ཕཊ་ཞེས་པས་རྡོ་རྗེའི་ར་བ་དང༌། ཨོཾ་ཇུཾ་སྭཱ་ཧཱ་ཞེས་པས་རྡོ་རྗེའི་གུར་ཏེ། ཨོཾ་ཧཱུཾ་ཕཊ་ཞེས་པས་བགེགས་རྣམས་ཕུར་བུས་བཏབ་ལ་དེའི་དབུས་སུ་ཡུཾ་ཀྵུཾ་སུཾ་ཧཱུཾ་ཧཱུཾ་རྣམས་ལས་རིམ་པ་ཇི་ལྟ་བར་སྐྱེས་པའི་རླུང་དང་མེ་དང་ཆུ་དང་ས་དང་རི་རབ་ཀྱི་སྟེང་དུ་ཨོཾ་ཧཱུཾ་ཕཊ་ཅེས་པ་ཡོངས་སུ་གྱུར་པའི་རིན་པོ་ཆེ་སྣ་བདུན་གྱིས་སྤྲས་པ་གསེར་གྱི་རང་བཞིན་གྱི་ཁང་པ་བརྩེགས་པའི་དབུས་དང་ཕྱོགས་བཞི་རྣམས་སུ་སེང་གེ་ལྔ་རྣམས་ལ་སྣ་ཚོགས་པདྨ་ལ་གནས་པའི་ཉི་མའི་གཟུགས་ལྔ་རྣམས་ཏེ། དབུས་ཀྱི་སེང་གེ་ལ་གདུགས་དཀར་པོའོ། །དེར་དབུས་ཀྱི་ཉི་མ་ལ་ཨཱ་ལི་དང་ཀཱ་ལི་ལས་སྐྱེས་པའི་ཟླ་བ་དང་ཉི་མའི་དབུས་སུ་གནས་པའི་ཧཱུཾ་ལས་སྐྱེས་ཤིང་དེས་བྱིན་གྱིས་བརླབས་པའི་རྡོ་རྗེ་བསྒོམས་ནས། ཨོཾ་བཛྲ་ཤུདྡྷཿ་སརྦ་དྷརྨ་བཛྲ་ཤུདྡྷོ྅ཧཾ་ཞེས་བརྗོད་ཅིང༌། དེ་ལས་སྤྲོས་པའི་དེ་བཞིན་གཤེགས་པ་དང་ལྷ་མོ་རྣམས་ཀྱིས་འགྲོ་བའི་དོན་བྱས་ཏེ། དེར་བསྡུས་པ་ན་ཟླ་བ་ལ་སོགས་པ་རྣམས་ལས་རྫོགས་པའི་ཡེ་ཤེས་མཁའ་འགྲོ་མ་དང་དེ་སྐྱེ་བ་དང་དུས་མཉམ་དུ་དཀྱིལ་འཁོར་བ་རྣམས་ཀྱང་རང་རང་གི་ས་བོན་རྣམས་ལས་སྐྱེས་པར་བསྒོམས་ལ། ཨོཾ་ཡོ་ག་ཤུདྡྷཿ་སརྦ་དྷརྨཱ་ཡོ་ག་ཤུདྡྷོ྅ཧཾ་
ཞེས་པས་ང་རྒྱལ་བྱའོ། །དེ་ལ་རྡོ་རྗེ་མཁའ་འགྲོ་མ་ལ་སོགས་པ་རྣམས་ཀྱི་རང་རང་གི་གདན་དང་སྣ་ཚོགས་ཆུ་སྐྱེས་དང་ཉི་མ་རྣམས་ལ། རིམ་པ་ཇི་ལྟ་བར་ཧཱུཾ་ཧཱུཾ་ཧཱུཾ་ཧཱུཾ། ཨཱཾ་ཨཱིཾ་ཨཱུཾ་རྀཾ་ལྀཾ་ཨཻཾ་ཨཽཾ་ཨཿ་ནི་ས་བོན་རྣམས་སོ། །ལྷ་མོ་བཅུ་གསུམ་པོ་རྣམས་ཀྱང་དབུ་སྐྲ་གྲོལ་བ་སྦྲུལ་གྱི་རྒྱན་ཅན་ཇི་སྐད་བཤད་པའི་སྐུ་མདོག་དང་ཕྱག་མཚན་ལ་སོགས་པ་ཅན་རྣམས་བལྟ་བར་བྱའོ། །དེར་བདག་ཉིད་ཀྱི་སྤྱི་བོར་ཀྵུཾ་དགོད་དེ། མིག་རྣམས་ལ་ཧཱུཾ་ངོ༌། །རྣ་བ་དང་སྣའི་ནང་རྣམས་སུ་ཡུཾ་མོ། །ལྕེ་རྣམས་ལ་སུཾ་ངོ༌། །མགྲིན་པར་སྨྲྱུཾ་ངོ༌། །དཔུང་པའི་རྩ་བ་དག་ཏུ་ཧྨྲྱུཾ་ངོ༌། །སྙིང་གར་ཡྨྲྱུཾ་ངོ༌། །ལྟེ་བར་ཀྵྨྲྱུཾ་ངོ༌། །འཇིགས་བྱེད་མ་དང་གཏུམ་མོ་དང་རོ་ལངས་མ་དང་རྡོ་རྗེ་མཁའ་འགྲོ་མ་དང༌། སེང་གེ་མ་དང་སྟག་མོ་དང་ཅེ་སྤྱང་མོ་དང་འུག་མོ་རྣམས་ཀྱི་རིམ་པ་ཇི་ལྟ་བར་གོ་ཆའི་ཡི་གེ་རྣམས་བཀོད་པ། ཨོཾ་ཨཱཿ་ཧཱུཾ་གིས་ལུས་དང་ངག་དང་ཡིད་རྣམས་བྱིན་གྱིས་བརླབ་པར་བྱས་ནས། རང་གི་སྙིང་གའི་ས་བོན་གྱི་འོད་ཟེར་རྣམས་ཀྱིས་ཡེ་ཤེས་ཀྱི་འཁོར་ལོ་ནམ་མཁར་སྤྱན་དྲངས་ཏེ། ཇི་ལྟ་བ་བཞིན་དུ་ཡང་དག་པར་མཆོད་ཅིང་དམ་ཚིག་བསྟན་པར་བྱའོ། །དེ་ལ་རྡོ་རྗེ་ཁུ་ཚུར་གཉིས་བཅིངས་ནས་སོར་མོ་གུང་མོ་གཉིས་བརྐྱང་སྟེ་རྩེ་མོ་སྦྱར་བ་ནི་ཡེ་ཤེས་མཁའ་འགྲོ་མ་ལ་སྟེ། ཨོཾ་ཧཱུཾ་སྭཱ་ཧཱ་ཞེས་བརྗོད་ཅིང་བསྟན་པར་བྱའོ། །རྡོ་རྗེ་ཐལ་མོ་བྱས་ནས་མཐེ་བོང་རྒན་པོ་དག་གིས་གུང་མོ་གཉིས་ལ་ཡང་དང་ཡང་དུ་རེག་ཅིང་བསྐྱོད་པའི་ཕྱག་རྒྱ་དང་ཨོཾ་བཛྲ་ཌཱ་ཀི་ནི་ཧཱུཾ་ཕཊ་སྭཱ་ཧཱ་ཞེས་པ་རྡོ་རྗེ་མཁའ་འགྲོ་མ་ལའོ། །ཁུ་ཚུར་གཉིས་མཉམ་པོར་བཅིངས་ཏེ་མཐེ་བོང་རྒན་པོ་གཉིས་བརྐྱང་ཞིང༌། ཨོཾ་གཽ་རཱི་ཧཱུཾ་སྭཱ་ཧཱ་ཞེས་པ་འཇིགས་མ་ལའོ། །ཕྱག་རྒྱ་དེ་ཁོ་ན་བཅིངས་ནས་མཐེ་ཆུང་གཉིས་བརྐྱང་བར་བྱ་ཞིང༌། ཨོཾ་བེ་ཏཱ་ལཱི་ཧཾ་ཞེས་པ་རོ་ལངས་མ་ལའོ། །ཕྱག་རྒྱ་འདི་གཉིས་བཅིངས་ཏེ་སོར་མོ་གུང་མོ་གཉིས་བརྐྱང་ཞིང༌། ཨོཾ་ཙ་ཎྜ་ལཱི་ཧཱུཾ་སྭཱ་ཧཱ་ཞེས་པ་གཏུམ་མོ་ལའོ། །རྡོ་རྗེ་ཁུ་ཚུར་གཉིས་བཅིངས་ནས་སྡིགས་མཛུབ་གཉིས་བརྐྱང་སྟེ། རྩེ་མོ་དག་སྦྱར་ཞིང་ཨོཾ་ཨཱ་སྭཱ་ཧཱ། ཨོཾ་ཨཱིཾ་སྭཱ་ཧཱ། ཨོཾ་ཨཱུཾ་སྭཱ་ཧཱ། ཨོཾ་རྀ་སྭཱ་ཧཱ། ཞེས་
པ་སེང་གེ་མ་ལ་སོགས་པ་བཞི་རྣམས་ལའོ། །ལག་པ་གཉིས་ཐལ་མོའི་ཚུལ་དུ་བརྐྱང་སྟེ་ཁར་བཅུག་པ་དང༌། ཨོཾ་ལཱྀཾ་སྭཱ་ཧཱ་ཞེས་པས་རྒྱལ་པོའི་དབང་མོ་ལའོ། །ཐལ་མོ་སྦྱར་སྤྱི་བོར་འཛིན་ཅིང་ཨོཾ་ཨཻཾ་སྭཱ་ཧཱ་ཞེས་པས་མར་མེ་མ་ལའོ། །ཐལ་མོ་གྱེན་དུ་བྱས་ནས་ཁ་དང་ཉེ་བར་བཞག་ཅིང༌། ཨོཾ་ཨཽཾ་སྭཱ་ཧཱ་ཞེས་པས་འཇིབ་མ་ལའོ། །ལག་པ་གཉིས་ཀྱིས་པདྨའི་བསྐོར་བ་བྱས་ནས་རྡོ་རྗེ་ཐལ་མོ་བྱས་ཏེ་སྔ་མ་བཞིན་གསང་གནས་སུ་བཞག་ཅིང༌། ཨོཾ་ཨཱཿ་སྭཱ་ཧཱ་ཞེས་པས་ཀམྤོ་ཛི་ལའོ། །དེའི་རྗེས་སུ་པདྨའི་བསྐོར་བ་སྔོན་དུ་འགྲོ་བས་ཡེ་ཤེས་ཀྱི་འཁོར་ལ་དམ་ཚིག་གི་འཁོར་ལོ་ཇི་ལྟར་རིགས་པར་གཞུག་པར་བྱའོ། །དེ་ནས་དབང་བསྐུར་བ་དང་རྒྱས་གདབ་པ་བསམ་པར་བྱ་སྟེ། དེ་ལ་ཡེ་ཤེས་མཁའ་འགྲོ་མ་ལ་སོགས་པ་རྣམས་ལ་རིམ་པ་ཇི་ལྟ་བར་མི་བསྐྱོད་པ་དང་རྣམ་པར་སྣང་མཛད་དང་རིན་ཆེན་འབྱུང་གནས་དང༌། འོད་དཔག་མེད་དང་དོན་ཡོད་གྲུབ་པ་རྣམས་ཀྱིས་སོ། །སེང་གེ་མ་ལ་སོགས་པ་རྣམས་ལ་མི་བསྐྱོད་པ་དང་རྣམ་པར་སྣང་མཛད་དང་རིན་ཆེན་འབྱུང་བ་དང་འོད་དཔག་ཏུ་མེད་པ་རྣམས་ཀྱིས་སོ། །རྒྱལ་པོའི་དབང་མོ་ལ་སོགས་པ་རྣམས་ལ་ཡང་རྣམ་པར་སྣང་མཛད་དང་རིན་ཆེན་འབྱུང་བ་དང་འོད་དཔག་མེད་དང་དོན་ཡོད་གྲུབ་པ་རྣམས་ཀྱིས་སོ། །རོའི་རྗེས་སུ་མཆོད་པའི་ལྷ་མོ་སྤྲོས་པ་རྣམས་ཀྱིས་བདག་ཉིད་མཆོད་ནས་བསྟོད་དུ་བཅུག་སྟེ་དེས་བསྟབས་པའི་བདུད་རྩི་མྱངས་ལ། བདེ་བ་ཆེན་པོའི་པདྨར་ཟླ་བའི་དཀྱིལ་འཁོར་ལ་གནས་པ་ཁ་ཐུར་དུ་ཕྱོགས་པ་སྨིན་མའི་དབུས་སུ་ཆགས་པའི་ཐིག་ལེ་ཧཱུཾ་ཡིག་སྟེ། བདུད་རྩིའི་རྒྱུན་འཛག་པ་ཉིད་ཀྱིས་ཆར་རྒྱུན་འབབ་པར་བསམ་པར་བྱའོ་ཞེས་པ་ཐིག་ལེའི་རྣལ་འབྱོར་ནང་དུ་འདུས་པའི་ཕྲ་མོའི་རྣལ་འབྱོར་གྱི་བར་མ་ཆད་དུ་སྐྱོན་ཨོཾ་ཧྲཱིཿ་སྭཱ་ཧཱ་ཞེས་པའི་སྔགས་འབུམ་ཕྲག་གསུམ་བཟླས་ཤིང་རྡོ་རྗེ་མཁའ་འགྲོ་མ་ལ་སོགས་པ་རྣམས་ཀྱིས་ཡང་འཆད་པར་འགྱུར་བའི་སྔགས་རྣམས་ཏེ། མངོན་པར་འདོད་པའི་དངོས་གྲུབ་འཐོབ་པོ་ཞེས་པའོ། །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱ་ཆེར་འགྲེལ་པ་
མན་ངག་གི་སྙེ་མར་སྙེ་མ་བཅུ་པའོ།། །།