སྙེ་མ་བཅོ་ལྔ་པ། རྣལ་འབྱོར་མ་རྣམས་ཀྱི་བརྡ་ཡོངས་སུ་ཤེས་ཆེད་ཐབས་ཀྱི་ཡན་ལག་ངག་གི་བརྡ་ལ་སོགས་པ་བཤད་པ།
ལཱ་མའི་རིགས་ཅན་གྱི་བུད་མེད་རྣམས་ཀྱི་མཚན་ཉིད་ལ་འཇུག་པ། དེ་ནས་ཞེས་པ་ལ་སོགས་པའོ། །པདྨ་གར་དབང་ནི་སྣང་བ་མཐའ་ཡས་སོ། །རི་ནི་ར་ཉིད་དོ། །མཁའ་འགྲོ་མ་རྣམས་ཞེས་པ་མཁའ་འགྲོ་མའོ། །དེ་བཞིན་གཤེགས་པ་ནི་རྣམ་པར་སྣང་མཛད་དོ། །སྤུ་ལྡན་ཞེས་པ་ནི་ལུས་ལ་སྤུ་རྣམས་དང་ལྡན་པའོ། །འདྲེས་པ་ནི་རྣ་ཤལ་ཏེ་དེའི་རྣམ་པ་ཅན་གྱི་རི་མོའོ། །རྣམ་པར་འདྲེན་པ་ནི་དཔལ་བདེ་མཆོག་གོ །མི་གཡོ་བ་ནི་ཤིན་ཏུ་བརྟན་པ་དང་ལྡན་པའོ། །ལག་པ་གཉིས་སྦྱར་བར་བྱ་སྟེ་མཐེ་བོ་གཉིས་བཀུག་ནས་སོར་མོ་གཞན་རྣམས་ཅུང་ཟད་བཀུག་ཅིང་རྩེ་མོ་དང་རྩེ་མོ་སྤྲད་པ་ལས་པདྨའི་ཕྱག་རྒྱའོ། །ལག་པ་གཅིག་བརྐྱང་ནས་དེའི་སྟེང་དུ་དེ་ལས་གཞན་པའི་ལག་པ་བསྐུམ་པ་རུས་སྦལ་ལྟར་གནས་པ་ལས་རུས་སྦལ་གྱི་ཕྱག་རྒྱའོ། །
ཕྱག་རྒྱ་གཉིས་པོ་འདི་ནི་སྒྲུབ་པ་པོའིའོ། །ཕྲག་པ་གཡོན་པ་ནས་འཕྱང་བའི་གོས་གཡོ་བ་དཔུང་པ་གཡོན་པ་བསྐུམ་པས་འཛིན་པའི་ཚུལ་ནི་རྒྱལ་བའི་ཕྱག་རྒྱའོ། །མཆོད་པར་བྱ་ཞེས་ཀློག་པ་ལ་ནི། གང་མཆོད་པར་བྱ་བ་དེ་རྒྱལ་བ་དེ་ཁོ་ནའོ་ཞེས་པས་རྒྱལ་བའི་ཕྱག་རྒྱ་ཁོ་ན་དཀྱོགས་པས་གསུངས་པར་འགྱུར་རོ། །ཕྱག་རྒྱ་གཉིས་པོ་འདི་ནི་རིམ་པ་ཇི་ལྟ་བར་ཕྱག་རྒྱའི་ལན་དུ་རྣལ་འབྱོར་མས་སྦྱིན་པར་བྱའོ། །མདུང་གི་ཕྱག་རྒྱ་ཞེས་པ་མཐེ་བོས་མཐེ་ཆུང་མནན་ནས་དེ་ལ་གཞན་པའི་སོར་མོ་རྣམས་གྱེན་དུ་བརྐྱང་བ་ལས་སོ། །རྐང་བ་གཡོན་པ་བསྐུམ་ནས་སྐྱིལ་ཀྲུང་ཕྱེད་པའི་གར་གྱིས་གཡོན་དུ་ཡོངས་སུ་བསྐོར་བ་ནི་རྣལ་འབྱོར་མའི་ལན་གྱི་ཕྱག་རྒྱའོ། །མཆོད་ཅེས་པ་མཆོད་པའི་དུས་སོ། །འཇིག་རྟེན་དབང་ཕྱུག་མ་རྣམས་ཀྱི་ཞེས་པ་སྣང་བ་མཐའ་ཡས་ཀྱི་རིགས་ཅན་མ་རྣམས་ཀྱིའོ། །དར་བཅིངས་པ་ཞེས་པ་དཔྲལ་བར་དར་བཅིངས་པ་ལྟ་བུའི་རི་མོ་གཅིག་གོ་ཞེས་པའི་དོན་ཏོ། །མཐེ་བོས་སོར་མོ་ཐམས་ཅད་མནན་ནས་གྱེན་དུ་སྡིགས་མཛུབ་བརྐྱང་བ་ལས་འཕང་མདུང་གི་ཕྱག་རྒྱའོ། །དྲིལ་བུ་དཀྲོལ་བའི་ཚུལ་གྱིས་དྲིལ་བུའི་ཕྱག་རྒྱའོ། །གཉིས་པ་ཞེས་པ་ལན་གྱི་ཕྱག་རྒྱ་ཞེས་པའི་དོན་ཏོ། །དེ་བྱས་ནས་ཡོངས་སུ་བསྒྱུར་བར་བྱ་སྟེ། དེ་བཞིན་དུ་འོག་མ་ལ་ཡང་ངོ༌། །རྡོ་རྗེ་ཐལ་མོ་བྱས་ནས་གུང་མོ་གཉིས་བསླང་སྟེ། སྡིགས་མཛུབ་གཉིས་ཀྱིས་མིང་མེད་གཉིས་དཀྲིས་ཤིང༌། །མཐེ་བོ་གཉིས་དྲང་པོར་བྱས་ནས་ཁ་དང་ཉེ་བར་གཞག་པར་བྱའོ་ཞེས་པ་ཁའི་ཕྱག་རྒྱའོ། །མིང་མེད་བཟློག་པ་དག་ལག་པ་དག་གི་ནང་དུ་བྱས་ལ། མཐེ་བོང་གདེངས་ཀའི་རྣམ་པ་དག་སྦྱར་ཞིང་མཐེ་ཆུང་དང་གུང་མོ་ཁབ་ལྟ་བུ་ངག་སྟེ། གུང་མོ་ཁབ་ལྟ་བུའི་ངོས་སུ་སྡིགས་མཛུབ་དག་བསྐུམ་ནས་ཚིགས་གསུམ་པར་བྱའོ་ཞེས་པ་ཁའི་ཕྱག་རྒྱའོ་ཞེས་དམ་ཚིག་གསུམ་གྱི་རྒྱལ་པོའི་རྒྱུད་དུ་གསུངས་སོ། །འཁོར་ལོའི་ཕྱག་རྒྱ་ཞེས་ཁ་ཅིག་ཏུ་ཀློག་སྟེ། དེའི་ཚེ་ལག་པ་གཉིས་གན་རྐྱལ་དུ་བྱས་ཤིང་གུང་མོ་དང་མིང་མེད་ཀྱི་སེན་མོ་དག་གི་སྟེང་དུ་མཐེ་བོ་དགོད་པར་
བྱའོ་ཞེས་པ་འཁོར་ལོའི་ཕྱག་རྒྱའོ། །དུང་གི་ཕྱག་རྒྱ་ཞེས་པ་གུང་མོ་དང་མིང་མེད་དང་མཐེ་ཆུང་རྣམས་བསྐུམ་ནས་དུང་གི་ཚུལ་གྱིས་མཐེ་བོ་དང་སྡིགས་མཛུབ་དག་བརྐྱང་བའོ། །དེ་བཞིན་ཁོ་ན་ཞེས་པ་གཡོན་པ་ཡིས་ལན་གྱི་ཕྱག་རྒྱའོ་ཞེས་བཤད་པ་སྟེ་ཇི་ལྟ་བའོ། །དུས་ཚིགས་ཞེས་པ་བསོད་ནམས་ཀྱི་དགའ་སྟོན་གྱི་དུས་སོ། །གཅིག་པ་ཞེས་པ་སོ་བསྙེར་བའོ། །ལག་པ་གཡོན་པ་ཕྱུང་བར་བྱས་ཏེ། དེའི་སྟེང་དུ་གྲུ་མོ་གཡས་པ་བཞག་ནས་མཐེ་བོང་དང་སྡིགས་མཛུབ་དག་བསླང་ཞིང༌། སོར་མོ་གསུམ་བསྐུམ་པའི་ལག་པ་གཡས་པ་གཟུང་བར་བྱའོ་ཞེས་པ་སྤྲུལ་གྱི་ཕྱག་རྒྱའོ། །སྔ་མ་བཞིན་ཞེས་པ་གཡོན་པས་ལན་གྱི་ཕྱག་རྒྱའོ། །འདི་རྣམས་ཕལ་ཆེར་ལཱ་མའི་རིགས་ཅན་རྣམས་ཀྱི་མཚན་ཉིད་རྣམས་གསུངས་ཤིང༌། རྣལ་འབྱོར་མ་སུམ་ཅུ་རྩ་བདུན་པོ་རྣམས་ཀྱི་འང་འདི་རྣམས་སུ་རིག་པར་བྱའོ་ཞེས་པ་མན་ངག་གོ །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱ་ཆེར་འགྲེལ་པ། མན་ངག་གི་སྙེ་མར་སྙེ་མ་བཅོ་ལྔ་པའོ།། །།