སྙེ་མ་ཉེར་གཅིག་པ། སྤྱོད་པ་ལ་གོམས་པ་རབ་ཏུ་གྱུར་པ་ཐོབ་པའི་རྣལ་འབྱོར་པའི་མཚན་ཉིད་བཤད་པ།
རྫོགས་པའི་རིམ་པ་ཁོ་ན་རྣམ་པ་གཞན་གྱིས་གསལ་བར་བྱ་བའི་ཆེད་དུ་བཅོམ་ལྡན་འདས་མ་རྡོ་རྗེ་སྙེམས་མས་ཞུས་པ། ཐོས་ཞེས་པ་ལ་སོགས་པའོ། །རང་གི་སྟེ་ཕུང་པོ་ལྔའི་བདག་ཉིད་ཅན་ལྷག་པའི་ལྷ་ཉིད་དུ་གནས་པ་རྟོགས་པ་ནི་བྱིན་གྱིས་བརླབ་པའི་རིམ་པའོ། །གསང་ཆེན་ཞེས་པ་ལ་སོགས་པའི་མན་ངག་ནི། གསང་ཆེན་མཆོག་ཏུ་དགྱེས་བྱ་ན། །ཐམས་ཅད་བདག་ཉིད་ལ་རྟག་ཞུགས། །ཞེས་པ་རབ་ཏུ་བྱེད་པ་གསུམ་པར་མདོར་བསྟན་པ་སྟེ། རབ་ཏུ་སྦྱར་བའོ་ཞེས་པ་དགོས་པ་སྟེ་བརྗོད་པར་བྱ་བ་འདིའི་ཅི་ཡིན་པའོ། །རྡོ་རྗེ་སེམས་དཔའ་བརྩེ་བ་ཆེ། །ཞེས་པའི་ཚིག་དག་གིས་སྟོང་པ་ཉིད་དང་སྙིང་རྗེའི་རང་བཞིན་གྱི་སྐུར་བདག་ཉིད་བརྗོད་ཅིང༌། བཅོམ་ལྡན་འདས་ཀྱིས་རང་བྱིན་གྱིས་བརླབ་པའི་དོན་རྒྱས་པར་མཛད་དོ། །ངེས་པར་དྲང་བར་བྱའོ་ཞེས་པ་ངེས་པ་སྟེ་བརྗོད་བྱའོ། །ཨེ་ཡིག་ནི་དང་པོའི་དག་ཉེ་བར་མཚོན་པའོ། །རབ་གསུངས་པ་ནི་ཨེ་ཡིག་ས་རུ་ཤེས་བྱ་སྟེ། ལས་ཀྱི་ཕྱག་རྒྱ་ཞེས་པ་ལ་སོགས་པར་དང༌། དང་པོའི་ངག་ཏུ་ཡང་ངོ༌། །འགྲོ་བ་དང་རྗེས་སུ་འགྲོ་སྟེ་འོང་བའོ། །སེམས་ནི་སེམས་ཀྱིའོ། །བགྲོད་པ་ནི་འོག་ནས་སྟེང་དུའམ་སྟེང་ནས་འོག་ཏུའོ། །ཅི་ལས་ཞེས་པ་བརྗོད་པར་འདོད་པར་ལ་གནས་པའི་བརྗོད་པར་བྱ་བ་ལས་གང་རྗོད་པར་བྱེད་པའོ། །གསང་ཆེན་དུ་ཞེས་པ་ནི་མཆོག་ཏུ་ཞེས་པ་ལ་སོགས་པ་
ཉེ་བར་མཚོན་པ་སྟེ་ཞེས་པ་ཡི་གེ་བཅུ་དྲུག་གསུངས་པ་གང་དེའི་བརྗོད་པར་བྱ་བ་འདི་ཙམ་སྟེ། འདི་ལྟ་སྟེ། ཁྲག་ལ་སོགས་པའོ། །རེག་པར་བྱ་བས་ན་རེག་བྱ་སྟེ་རླུང་ངོ༌། །ཁྲག་བཞིན་དུ་རེག་བྱ་ལ་སོགས་པ་རྣམས་ཀྱང་འཕེལ་བའམ་འགྲིབ་པ་ན་ལུས་དང་སྲོག་དག་འཛིན་པས་ན་ཁམས་རྣམས་སོ། །ལྡན་པ་ནི་ཚོགས་པ་གཅིག་ལ་རག་ལས་པ་ཉིད་ཀྱིས་ཕན་ཚུན་འབྲེལ་བའོ། །ཤིན་ཏུ་མཛེས་པ་ནི་རང་བཞིན་གྱིས་སྒོམ་པས་ཕན་ཚུན་བསྐྱེད་པའི་རྒྱུ་ཉིད་ཀྱི་ཕྱིར་རོ། །བྱང་ཆུབ་སེམས་ལས་བྱུང་བ་ནི་སྐྱེ་བ་ལ་སོགས་པ་ཁུ་བ་ལས་བྱུང་བའི་ཕྱིར་རོ། །གང་གསུངས་པ། ཁུ་བ་ལས་ནི་གོང་བུ་སྐྱེ། །གོང་བུ་ལས་ནི་མི་འབྱུང་ངོ༌། །ཞེས་སོ། །ཁུ་བ་ནི་རྡུལ་ཉེ་བར་མཚོན་པའོ། །གང་གསུངས་པ། རྩ་ཞེས་པ་ལ་སོགས་པ་སྟེ། ཨ་ཝ་དྷཱུ་ཏཱི་ལ་ནཱ་ད་ནི་གཏུམ་མོ་རྡུལ་གྱི་རི་མོའོ། །ཆའི་བདག་ཉིད་ནི་ཆ་བཅུ་དྲུག་གི་རང་བཞིན་ནོ། །རྡུལ་དང་ཁུ་བའི་རྣམ་འགྱུར་གྱི་རང་བཞིན་འདི་ཐམས་ཅད་ཡིན་ཞེས་པའི་དོན་ཏོ། །དེ་ཉིད་ཀྱི་ཕྱིར་ཁྲག་དང་རླུང་དང་བད་ཀན་དང༌། མཁྲིས་པ་དང་རོ་དང་ཚིལ་བུ་དང་མེ་དང་ཤ་དང་བཤད་པ་དང་ཞག་དང་པགས་པ་དང་རུས་པ་དང་གཅི་བ་དང་གློ་བ་དང་པདྨ་དང་ཁུ་བ་སྟེ། ཁམས་བཅུ་དྲུག་རྣམས་ཀྱི་དང་པོ་དང་མཐར་རྡུལ་དང་ཁུ་བ་དག་གསུངས་པ་ནི། དེ་དག་གི་རྣམ་འགྱུར་ཐམས་ཅད་ཡིན་ནོ་ཞེས་རྟོགས་པའི་དོན་དུའོ། །འདི་ཐམས་ཅད་ཀྱང་སེམས་ཀྱི་རང་བཞིན་ཡིན་ཞིང༌། བཅོམ་ལྡན་འདས་རྡོ་རྗེ་འཛིན་པ་ཡང་སྟོང་པ་ཉིད་དང་རོ་གཅིག་ཅིང་ཟག་པ་མེད་པ་བདེ་བ་ཆེན་པོའི་སེམས་ཀྱི་རང་བཞིན་རྡུལ་དང་ཁུ་བའི་རང་བཞིན་ཏེ། དེ་དང་དབྱེར་མེད་པའི་བཅོམ་ལྡན་འདས་མ་རྡུལ་གྱི་ངོ་བོ་སྟོང་པ་ཉིད་ཀྱི་རང་བཞིན་ལ་སོགས་པར་འགྱུར་བ་ནི་རྣམ་པར་གཞག་པ་ཙམ་ཉིད་ཀྱི་ཕྱིར་རོ། །དེའི་ཕྱིར་རྡོ་རྗེ་འཛིན་པ་ཁོ་ན་ཁྲག་ཀྱང་ཡིན་རླུང་ཡང་ཡིན་ལ་ཇི་སྲིད་ཁུ་བའོ་ཞེས་པ་སྟེ་ལས་འཛིན་པ་ལས་སོ། །རྫས་བཅུ་དྲུག་པོ་འདི་རྣམས་ཁོ་ན་མ་བཞིན་དུ་འཕེལ་བར་བྱེད་པ་ཉིད་ཀྱི་ཕྱིར་ཁྲག་རྣམས་སོ། །འདི་རྣམས་དང་རྡོ་རྗེ་འཛིན་པའི་བདག་ཉིད་ཀྱི་ལྷ་དབྱེར་མེད་
པར་མོས་པ་ལས་ལུས་ཀྱི་དཀྱིལ་འཁོར་དུ་འགྱུར་རོ། །དེ་སྐད་དུ་ཡང་རྡོ་རྗེ་མཁའ་འགྲོར་གསུངས་པ། བཅུ་དྲུག་རྣམས་ཉིད་སྒྱུ་མ་ཆེ། །མ་བཞིན་དུ་ནི་ཡོངས་སྒོམ་པ། །དེ་ཡིས་ནང་གི་དཀྱིལ་འཁོར་དུ། །ཐེ་ཚོམ་མེད་པར་འགྱུར་བ་ཉིད། །ཅེས་སོ། །དེ་ཉིད་ཀྱི་ཕྱིར་རྡུལ་དང་ཁུ་བའི་རང་བཞིན་ས་དང་ཆུ་དང་མེ་དང་རླུང་རྣམས་ཀྱི་མེར་མེར་པོ་ལ་སོགས་པའི་གནས་སྐབས་ལ་ཁྱབ་པ་ཉིད་ཀྱིས་ན་ཁམས་ཀྱི་གཙོ་བོ་ཉིད་ཀྱིས་ས་བོན་ཉིད་དེ། བར་གྱི་གནས་སྐབས་སུ་ནི་མེ་དང་ཆུ་ལ་སོགས་པ་ཡོངས་སུ་འགྱུར་བའི་ངོ་བོ་ཉིད་ཀྱིས་མཁྲིས་པ་དང་བད་ཀན་ལ་སོགས་པ་རྣམས་ཕལ་པའི་ཁམས་ཉིད་ཀྱིས་ན་ས་བོན་ཉིད་དོ་ཞེས་བརྗོད་པའི་ཆེད་དུ་གསུངས་པ། ར་ཡིག་ཅེས་པ་ལ་སོགས་པའོ། །ར་ནི་མེ་སྟེ་བརྗོད་པར་བྱ་བ་དང་རྗོད་བྱེད་དག་ཐ་མི་དད་པར་སྒྲོ་བཏགས་པའི་ཕྱིར་རོ། །ཁྲག་ནི་རྡུལ་ལོ། །འཕྲོ་འདུ་ནི་འདུ་བ་སྟེ་གནས་སྣ་ཚོགས་ན་གནས་པའི་རོ་འདུས་པ་རྣམས་བད་ཀན་ཏེ། དེ་ནི་རྡུལ་དུ་འགྲོ་སྟེ། ཆུ་རྒྱུས་ཀྱི་ལྷན་ཅིག་བྱེད་པ་ཅན་དེ་ལས་སྐྱེས་པའོ། །དེ་ཡང་རྟགས་གཞན་དང་དབྱིབས་གཞན་གྱི་རྟགས་རྣམས་ཉེ་བར་མཚོན་པ་སྟེ། དེ་རྣམས་ནི་བསྟན་བཅོས་གཞན་ལས་ཤེས་པར་བྱའོ། །འདིར་མཁྲིས་པ་དང་བད་ཀན་ནི་ཕལ་པའི་ཁམས་རྣམས་ཉེ་བར་མཚོན་པའོ། །དེ་སྟེ་ཁུ་བ་ནི་མགོན་པོ་སྟེ། ཐམས་ཅད་ཀྱི་བདག་པོ་ཉིད་ཀྱི་ཕྱིར་རོ། །ཧ་ཡིག་ནི་ཧ་ཡིག་གི་བརྗོད་བྱའོ། །ཀུན་དུ་འགྲོ་བ་ནི་ཁམས་ཐམས་ཅད་ལ་ཁྱབ་པ་ཉིད་ཀྱི་ཕྱིར་རོ། །དེ་ཉིད་ཀྱི་ཕྱིར་དེས་ཁམས་རྣམས་དེ་དང་དེ་ནས་དྲངས་པ་རྣམས་སོ། །རོ་ནི་ཆུའི་ཁམས་སོ། །ས་ནི་རྒྱུས་པ་དང་རུས་པའི་ཚིགས་ཀྱིས་གསལ་བར་བྱས་ཤིང་རྟེན་ཉིད་ཀྱིས་རྟོགས་པ་ཁོ་ནའོ་ཞེས་པས་མ་གསུངས་སོ། །དེའི་ཕྱིར་འཐད་པ་འདིས་ཐོབ་པ་ས་བོན་རྣམ་ལྔ་ཅན་ནོ། །ཇི་ལྟར་ཞེ་ན་གསུངས་པ། ར་ཡིག་ཅེས་པ་ལ་སོགས་པ་སྟེ། ར་ཡིག་ནི་མེ་སྟེ་གཏུམ་མོ་རྡུལ་གྱི་ངོ་བོ་ཡབ་ཡུམ་སྙོམས་པར་ཞུགས་པས་
འབར་བ་ནི། རྐན་ལ་སྟེ་བདེ་བ་ཆེན་པོ་ཆུ་སྐྱེས་སུ་སོན་པ་གང་གི་ཚེ་ཁུ་བ་དང་འདུས་པ་དེའི་ཚེས་དང་ཆུ་དང་མེ་དང་རླུང་སྟེ་ཁམས་བཞི་པོ་རྣམས་ཐམས་ཅད་ས་བོན་མཆོག་སྟེ་བདེ་བའི་རྒྱུ་ཉིད་ཀྱི་ཕྱིར་རོ། །དེ་སྟེ་ས་བོན་བཞི་འདིའི་དང་པོ་ཡིན་པ་ཞེས་པ་དེ་ཐོག་མ་ཅན་ས་བོན་ལྔ། མཛེས་པ་སྟེ་ལྷའི་ངོ་བོ་ཉིད་ཀྱི་ཕྱིར་དང་ལྷ་བསྐྱེད་པའི་རྒྱུ་ཉིད་ཀྱི་ཕྱིར་རོ། །ལྔ་པ་ཅི་ཞིག་ཅེ་ན་གསུངས་པ། ཧ་ཞེས་པ་ལ་སོགས་པའོ། །ཧ་དང་ཨུའི་བརྗོད་པར་བྱ་བ་ལུས་དང་ངག་དང་ལྡན་པ་མ་ཡིན་བརྗོད་པར་བྱ་བ་སེམས་ཏེ། འདུས་པ་ནི་ཧཱུཾ་ངོ༌། །བརྗོད་པར་བྱ་བ་ཞེས་པ་གཞན་དུ་བསྒྲུབས་ཟིན་པ་ཉིད་ཀྱི་ཕྱིར་རོ། །དེ་ནི་ལྔ་པར་གསུངས་སོ། །དེ་ནི་བར་དོའི་སྲིད་པ་ནས་གསུམ་རྣམས་ལས་གང་ཡང་རུང་བའི་སྒོ་ནས་ཞུགས་ཏེ། འབྱུང་བ་བཞི་ལ་ཐིམ་པ་ལས་མའི་ལྟོ་བའི་ཕྱོགས་སུ་ས་བོན་ལྔ་ཅན་དུ་འགྱུར་རོ། །དེ་ཕྱག་རྒྱ་ཆེན་པོ་ཐིག་ལེར་གསུངས་པ། རྣམ་ཤེས་ངོ་བོ་ལ་བརྟེན་ནས། །དང་པོར་འབྱུང་བ་བཞི་པོ་ལ། །རང་བཞིན་ངེས་པར་བསྐྲུན་པ་ཡིས། །དེ་ཚེ་རང་གི་གནས་ནས་ཐིམ། །རྣམ་ཤེས་ལས་ནི་རླུང་སྐྱེ་སྟེ། །དེ་ལས་མེ་ནི་ཡང་དག་འབྱུང༌། །འདི་ལས་ཆུ་རྣམས་ཡང་དག་འབྱུང༌། །དེ་ལས་ས་ནི་ཡང་དག་འབྱུང༌། །འདི་རྣམས་ལས་ཀྱང་ཕུང་པོ་འབྱུང༌། །དེ་ལས་སྐྱེ་མཆེད་རྣམས་ཀྱང་ངོ༌། །དེ་ལས་ཤེས་པའི་རང་བཞིན་ཅན། །དྲུག་ཆུ་ལྷག་པའི་བརྒྱ་རིམ་པས། །ཇི་ལྟར་སྐྱེས་པ་དེ་ལྟར་འདིར། །ཐིམ་པར་འགྱུར་རོ་རང་བཞིན་ལས། །ཞེས་སོ། །རང་བཞིན་ངེས་པར་བསྐྲུན་པ་ནི་བདག་དང་འབྱུང་བ་རྣམས་ཀྱིས་ཏེ། འདི་ཁོ་ན་ལས་རྣམ་ཤེས་ལས་རླུང་ལ་སོགས་པ་རྣམས་ཡོངས་སུ་གྱུར་པ་བརྒྱུད་པས་ནི་སྐྱེ་བའོ། །རྡོ་རྗེ་ཕྲེང་བའི་རྒྱུད་དུ་ཡང་ཁྱད་པར་དང་བཅས་པར་གསུངས་ཤིང༌། འཕགས་པའི་ལྷའི་ཞབས་ཀྱིས་རྣམ་པར་ཕྱེ་བ། ས་ལ་སོགས་པ་བཞི་རྣམས་དང༌། །དེ་བཞིན་སྟོང་པ་རྣམ་པ་བཞི། །དངོས་པོ་བརྒྱད་དུ་རྣམ་ཤེས་བྱ། །འཇིག་དང་སྐྱེ་བའི་རྒྱུ་རྣམས་སོ། །འོད་གསལ་བ་ལས་སྟོང་པ་ཆེ། །སྟོང་པ་ལས་ཀྱང་ཐབས་འབྱུང་ཞིང༌། །དེ་ལས་
ཤེས་རབ་སྐྱེ་བར་བྱེད། །དེ་ལས་རླུང་ནི་ཡང་དག་འབྱུང༌། །རླུང་ལས་མེ་ནི་ཡང་དག་འབྱུང༌། །མེ་ལས་ཆུ་ནི་ཡང་དག་འབྱུང༌། །ཆུ་ལས་ཀྱང་ནི་ས་སྐྱེ་སྟེ། །སེམས་ཅན་རྣམས་ཀྱི་འབྱུང་བ་འདིའོ། །ས་ཡི་ཁམས་ནི་ཆུ་ལ་ཐིམ། །ཆུ་ནི་མེ་ལ་ཐིམ་པའོ། །མེ་ཡང་ཕྲ་བའི་ཁམས་ལའོ། །རླུང་ནི་སེམས་ལ་རྣམ་པར་ཐིམ། །སེམས་ནི་སེམས་ལས་བྱུང་ལ་ཐིམ། །མ་རིག་པ་ལ་སེམས་འབྱུང་ངོ༌། །དེ་ཡང་འོད་གསལ་བ་ལ་འགྲོ། །འདི་ནི་སྲིད་གསུམ་དུ་འགོག་པའོ། །ཐོག་མ་མེད་པའི་དུས་ཅན་གྱི། །སྲིད་པའི་འཁོར་ལོ་འདི་འཇུག་སྟེ། །ཇི་སྲིད་སྒྱུ་ལྟའི་ཏིང་འཛིན་གྱིས། །བདག་ཉིད་མ་མཐོང་བར་དུའོ། །ཞེས་སོ། །འདིར་འོད་གསལ་བ་ནི་ཐམས་ཅད་སྟོང་པ་སྟེ་འཆི་བའོ། །སྟོང་པ་ཆེན་པོ་ནི་སྣང་བ་ཐོབ་པ་སྟེ་དྲི་ཟའི་སེམས་ཅན་གྱི་ངོ་བོ་ཅན་སེམས་སོ། །ཐབས་ནི་སྣང་བ་མཆེད་པ་སྟེ། འདོད་པ་ཉེ་བར་ལེན་པའི་སེམས་སོ། །ཤེས་རབ་ནི་སྣང་བ་སྟེ་སྐྱེ་བ་བཟུང་བའི་སེམས་སོ། །དེ་ལས་ལས་ལས་སྐྱེས་པ་རླུང་ལ་སོགས་པ་རྣམས་ཤིན་ཏུ་དང་ཆེས་ཤིན་ཏུ་བྱུང་བ་རྣམས་སུ་འགྱུར་ཏེ། དེ་དང་དེའི་སེམས་ཀྱི་རང་བཞིན་རྣམས་ཀྱང་ངོ༌། །དེ་རྣམས་ཀྱང་དགོངས་པ་བླ་ན་མེད་པར་དཀའ་འགྲེལ་གྱིས་བདག་ཅག་གིས་གསལ་བར་བྱས་པས་འདིར་མ་སྤྲོས་སོ། །ཐིམ་པ་ན་ནི་ས་ལ་སོགས་པའི་རིམ་པ་སྟེ། ལྷོང་པ་ཉིད་དང་རོ་བྲོ་བ་མེད་པ་ཉིད་དང༌། མེ་དྲོད་ཞེན་པ་ཉིད་དང་ལུས་ལ་སོགས་པའི་གཡོ་བ་ཞེན་པ་ནི། སྣང་བ་ལ་སོགས་པ་རླུང་དུ་སོན་པ་ན་རིམ་པས་རང་ཉིད་ཇི་ལྟ་བར་རང་བཞིན་རྣམས་ཞེན་པར་གྱུར་ནས་འགག་གོ །དེ་ནས་ཐམས་ཅད་སྟོང་པ་འཆི་བ་སྟེ། སླར་ཡང་སྔར་བཞིན་དུ་འཁོར་རོ། །དེ་ལྟར་འདི་ནི་རྐྱེན་ཉིད་ཙམ་གྱིས་སྐྱེ་བ་ཐོག་མ་དང་དབུས་དང་མཐའ་མེད་པ་འཁོར་ལོའི་རྩིབས་བཞིན་དུ་མཐོ་བ་དང་དམའ་བར་འགྲོ་བ་སྲིད་པའི་འཁོར་ལོའོ། །དེ་ཟློག་པ་ནི་བསྐྱེད་པ་དང་རྫོགས་པའི་རིམ་པ་དག་གིས་སྒྱུ་མ་ལྟ་བུའི་ཏིང་ངེ་འཛིན་གྱི་ངོ་བོ་བྱང་ཆུབ་ཀྱི་སེམས་ཀྱིས་སོ། །དེའི་ཕྱིར་གསུངས་པ། ཧ་ཡིག་
ཁོ་ནས་ཞེས་པ་ཨཱུ་དང་མ་ཡང་དག་པར་སྦྱར་བ་ལས། ཧཱུཾ་ཡིག་གིས་ཏེ་བྱང་ཆུབ་ཀྱི་སེམས་ཁོ་ནས་ཞེས་པའི་དོན་ཏོ། །ཡང་དག་པར་ལྡན་པ་ཉིད་ནི་དེ་བདག་ཉིད་ཁོ་ནས་སོ། །དེ་ལྟར་ཡང་དཔལ་འདུས་པར་གསུངས་པ། ཁྱེད་རྣམས་སེམས་ལུས་ཀྱི་རྣམ་པས་དང་ལུས་སེམས་ཀྱི་རྣམ་པས་དང་སེམས་ཚིག་ཏུ་བརྗོད་པས་བསྐྱེད་ཅིག་ཅེས་ཏེ། ཡིད་ཀྱིས་རང་བཞིན་གྱི་ལུས་བསྐྱེད་ཅིག་པའོ། །ཅི་ལྟར་ཞེ་ན། གང་ལོངས་སྤྱོད་རྫོགས་པའི་ལུས་ཀྱི་རྣམ་པར་རྫོགས་པའི་སེམས་ཁོ་ན་དེའོ་ཞེས་པ་སེམས་ལུས་ཀྱི་རྣམ་པ་སྟེ། ཀུན་རྫོབ་པའི་སེམས་ལས་གཞན་ཅི་ཡང་ཡོད་པ་ནི་མ་ཡིན་པས་སོ། །གང་ཡང་ཚིག་ཏུ་བརྗོད་པ་དེའི་ངོ་བོར་སེམས་ཁོ་ན་བསྐྱེད་ཅིག་པའོ། །དེ་ལྟར་གཟུང་བ་དང་འཛིན་པ་དང་བྲལ་བ་སྟོང་པ་ཉིད་དང་རོ་གཅིག་པ་ཕན་ཚུན་ཐ་མི་དད་པའི་ལུས་དང་ངག་དང་སེམས་ནི་བྱང་ཆུབ་ཀྱི་སེམས་སུ་བཀའ་སྩལ་ཏོ། །འདི་ཁོ་ན་རང་བྱིན་གྱིས་བརླབ་པའི་རིམ་པའོ་ཞེས་བསྟན་ཏོ། །གང་འཕགས་པ་ཀླུ་སྒྲུབ་ཞབས་ཀྱིས་གསུངས་པ། རང་བྱིན་བརླབ་པའི་རིམ་ཞེས་བྱ། །ཀུན་རྫོབ་བདེན་པར་བསྟན་པ་སྟེ། །ཞེས་སོ། །སླར་ཡང༌། འདི་ལ་སྐྱེ་བ་ཅི་ཡང་མེད། །སུ་ཡི་འང་འཆི་བ་ཅི་ཡང་མེད། །སེམས་ཀྱི་ངོ་བོའི་རྣམ་གནས་པ། །འཁོར་བ་ཁོ་ནར་ཤེས་པར་བྱ། །རླུང་གི་སྦྱོར་བ་མེད་པར་ནི། །སེམས་ཀྱི་རང་བཞིན་གཟུང་དུ་མེད། །སེམས་ཏེ་རང་བཞིན་རྒྱུ་ཉིད་ལས། །ལས་དང་སྐྱེ་བ་ཀུན་དུ་འབྱུང༌། །དེ་ཉིད་རླུང་དང་ཡང་དག་ལྡན། །རྣམ་ཤེས་གསུམ་པོ་སླར་ཡང་ནི། །རྣལ་འབྱོར་པ་ཡི་ལུས་སྐྱེའོ། །དེ་ནི་སྒྱུ་མའི་ལུས་སུ་བརྗོད། །ཅེས་པ་ནས། ཇི་སྲིད་དུ། ཀུན་རྫོགས་བདེན་པ་སྒྱུ་མ་ཉིད། །ལོངས་སྤྱོད་རྫོགས་པའི་སྐུ་ཡང་སྟེ། །དེ་ཉིད་དྲི་ཟའི་སེམས་ཅན་འགྱུར། །རྡོ་རྗེའི་སྐུ་ཡང་དེ་ཁོ་ནའོ། །ཞེས་པའི་བར་རོ། །ཀུན་དུ་ཞེས་པ་རྫོགས་པའི་རིམ་པ་ལ་དང་བསྐྱེད་པའི་རིམ་པ་ལའོ། །སངས་རྒྱས་ཐམས་ཅད་དེ་གཟུགས་ཀྱི་ཕུང་པོ་ལ་སོགས་པ་དང་མེ་ལོང་ལྟ་བུའི་ཡེ་ཤེས་ལ་སོགས་པའི་རང་བཞིན་རྣམ་པར་སྣང་མཛད་ལ་སོགས་པ་རྣམས་ཀྱི་
ཡང་དག་འདུས་པ་གསལ་བར་གྱུར་པར་འགྱུར་རོ། །ནི་སྟེ་གང་ཕྱིར་དབང་པོ་གཉིས་སྙོམས་པར་ཞུགས་པ་ལས་སམ་བདེ་བ་ཁུ་བ་དང་རོ་གཅིག་པ་འདྲེས་པར་འདིར་འབྱུང་ངོ་ཞེས་པ། བདེ་འབྱུང་ནཱ་ད་སྟེ་དེ་ལས་ཏེ་ཁུ་བ་འདུས་པ་ལས་ངེས་བྱུང་བའོ། །དམ་ཚིག་ནི་སྤྱན་མ་ལ་སོགས་པའི་ལྷ་མོ་ལ་སོགས་པའི་རང་བཞིན་རྣམས་ཏེ། དེ་རྣམས་ཀྱི་སྤྱོད་པ་ནི་རབ་ཏུ་འཇུག་པའོ། །དེའི་སྤྱོད་ཡུལ་ནི་ཡུལ་རྣམས་ཏེ། རྣམ་པར་སྣང་མཛད་ལ་སོགས་པ་གཟུགས་ཀྱི་ཕུང་པོ་ལ་སོགས་པའི་རང་བཞིན་རྣམས་སོ། ཡང་ན་དམ་ཚིག་ནི་སེམས་དང་སྤྱོད་པ་ནི་ངག་དང༌། སྤྱོད་ཡུལ་ནི་ལུས་སོ་ཞེས་པ་དྲང་བའི་དོན་ཏོ། །བདེ་བ་ཆེན་པོ་དང་རོ་གཅིག་པའི་ཆོས་ཀྱི་སྐུ་ནི་དམ་ཚིག་སྟེ། སྤྱོད་པ་ནི་ལོངས་སྤྱོད་རྫོགས་པའོ། །སྤྱོད་ཡུལ་ནི་དག་པ་དང་མ་དག་པའི་སེམས་ཅན་གྱི་ཕུང་པོ་ལ་སྤྲུལ་པའི་སྐུའོ་ཞེས་པ་ངེས་པའི་དོན་ཏོ། །བསྐྱེད་པའི་རིམ་པ་ལ་ནི་བདེ་འབྱུང་དང་ནཱ་ད་ནི་རྡོ་རྗེ་སེམས་དཔའི་མངོན་པར་རྟོགས་པར་རྣམ་པར་ཕྱེའོ། །དམ་ཚིག་སྤྱོད་པ་སྤྱོད་ཡུལ་རྣམས་ནི་ཐུགས་དང་གསུང་དང་སྐུའི་བདག་ཉིད་ཏིང་ངེ་འཛིན་དང་ཡེ་ཤེས་དང་དམ་ཚིག་སེམས་དཔའ་རྣམས་སོ། །དེ་ཉིད་ཀྱི་ཕྱིར་བྱང་ཆུབ་ཀྱི་སེམས་འདི་ནི་རིམ་པ་གཉིས་ཀ་ལ་ཡང་ལྷ་འབྱུང་བའི་རྒྱུ་ཉིད་ཀྱི་ཕྱིར། རྙེད་དཀའ་བ་སྟེ་བསོད་ནམས་དམན་པ་རྣམས་ཀྱིས་སོ། །འཇིག་རྟེན་གསུམ་དུ་སྟེ་མཐོ་རིས་དང་མི་ཡུལ་དང་ས་འོག་རྣམས་སུའམ། འདོད་པ་དང་གཟུགས་དང་གཟུགས་མེད་པའི་ཁམས་སུའམ། ལུས་དང་ངག་དང་སེམས་རྣམས་སུའོ། །ཐོག་མ་དབུས་མཐར་ཏེ་འདས་པ་དང་ད་ལྟར་བྱུང་བ་དང་མ་འོངས་པའི་དུས་རྣམས་སུ་འམ། སྐྱེ་བ་གནས་པ་དང་འགོག་པ་རྣམས་ལ་རྒྱུན་དུ་གྱུར་བཞིན་པ་གནས་སོ། །དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང༌། ཆོས་རྣམས་ཀྱི་ཆོས་ཉིད་འདི་ནི་གནས་པ་སྟེ། འདི་ལྟ་སྟེ། དེ་བཞིན་ཉིད་དང་སྟོང་པ་ཉིད་དང་ཆོས་ཀྱི་དབྱིངས་སོ་ཞེས་གསུངས་པའི་ཕྱིར་ན། སྟོང་པ་ཉིད་དང་རོ་གཅིག་པའི་ཡེ་ཤེས་ཀྱང་སྟོང་པ་ཉིད་ཀྱི་སྒྲའི་
བརྗོད་པར་བྱ་བ་ཉིད་ཀྱི་ཕྱིར་རོ། །གང་གི་ཕྱིར་དེ་ལྟར་གནས་ཀྱང་རྙེད་པར་དཀའ་བ་དེའི་ཕྱིར་བསྲུབ་བྱ་ནི་བདུད་རྩིའི་རྒྱ་མཚོ་ཆོས་འབྱུང་སྟེ། སྲུབ་བྱེད་ནི་རྡོ་རྗེའོ། །དེ་དག་ཡང་དག་སྦྱོར་བ་ལས་བདུད་རྩི་བཞིན་དུ་བདེ་བ་ཆེན་པོར་ཇི་ལྟར་འགྱུར་བ་དེ་ལྟར་ཉོན་ཅིག་པའོ། །སྔགས་ཀྱི་བཟླས་པ་ནི་རྡོ་རྗེ་བཟླས་པའོ། །དཔྱིད་ཀྱི་ཐིག་ལེ་ལ་སོགས་པ་བསམ་གཏན་ནོ། །མཆོད་པ་ལ་སོགས་པ་ཡང་སྟེ། དེ་རྣམས་དང་ལྷན་ཅིག་གོ །དེ་རྣམས་ཀྱང་ཉོན་ཞེས་པའི་དོན་ཏོ། །རྒྱུད་དུ་ཞེས་པ་རིགས་བརྗོད་པའི་ཕྱིར་སྣ་ཚོགས་པའི་རྒྱུད་རྣམས་སུ་བཤད་པ་འདིར་ཁྱད་པར་དུ་གསུངས་པའོ། །སྐྱེ་གནས་ཞེས་པ་སྐྱེ་གནས་ཀྱི་འཁོར་ལོའི་དབུས་སུའོ། །གཡོན་དུ་སྐྱེས་པའི་ཁུ་བ་དང་གཡས་སུ་བུད་མེད་ཀྱི་ཁྲག་གོ །གཡོན་དུ་ཁུ་བའོ། །དེའི་ཞེས་པ་ཁུ་བའི་དང་ཁྲག་གིའོ། །ཆོས་ཀྱི་དབྱིངས་སྟོང་པ་ཉིད་དང་རོ་གཅིག་པའི་སེམས་ཡང་དག་པར་འཛིན་པས་ན་ཆོས་དབྱིངས་བསྡུས་པའོ། །འདི་ཡང་ཐོག་མ་སྙིང་སྟོབས་དང་རྡུལ་དང་མུན་པ་རྣམས་མཉམ་པའི་གནས་སྐབས་ཀྱི་རང་བཞིན་ཏེ། དེ་ལས་གཞན་པའི་གནས་སྐབས་ཡོངས་སུ་འགྱུར་བའི་ཁྱད་པར་ནི་རྣམ་འགྱུར་རོ། །དེ་ལ་སྙིང་སྟོབས་ཞེས་པ་ལ་སོགས་པ་ལ། དང་པོའི་གནས་སྐབས་སུ་སྙིང་སྟོབས་ལུས་ཏེ་ཁུ་བའོ། །རྡུལ་ནི་དག་གོ །མུན་པ་ནི་སེམས་ཏེ་བསྐྱེད་པ་དང་ལྡན་པའོ། །ནམ་གྱི་ཚེ་ཞེ་ན། གང་གི་ཚེ་དྲི་ཟའི་སེམས་ཅན་གྱི་གནས་སྐབས་དོར་ནས་དངོས་པོར་མཉམ་འགྱུར་བ་ན་སྟེ། དངོས་པོ་དག་དང་སྟེ་ཁུ་བ་དང་ཁྲག་དག་དང་རོ་མཉམ་པ་སྟེ་ཕྱིས་ཅིའོ། །དེ་ལས་གསུམ་པོར་རོ་མཉམ་པ། རིམ་གྱིས་དེ་བཞིན་གཤེགས་པ་ལྔའི་བདག་ཉིད་ཀྱིས་ལུས་དྲུག་པ་རྡོ་རྗེ་འཆང་དུ་བརྗོད་དོ། །རྡོ་རྗེ་ལུས་ཀྱང་སྟེ། རྡོ་རྗེ་དེ་བཞིན་གཤེགས་པ་རྣམས་དང༌། དེའི་རང་བཞིན་གྱིས་ལུས་སོ་ཞེས་བྱས་ནས་སོ། །འདིར་དེ་ལྟར་བདུད་རྩི་ལྔ་གསུངས་སོ། །རྒྱུད་ཁ་ཅིག་ཏུ་བད་ཀན་གྱི་གནས་སུ་རྐང་མར་གསུངས་ཤིང༌། ཁ་ཅིག་ཏུ་ཤ་སྟེ། ཇི་སྐད་དུ་ཕྱག་རྒྱ་ཆེན་པོ་ཐིག་ལེར། རིན་ཆེན་དབང་
པོ་ཁྲག་ཅེས་བཤད། །སྣང་བ་མཐའ་ཡས་ཁུ་བར་བརྗོད། །དོན་ཡོད་གྲུབ་པ་ཤ་ཆེན་ཏེ། །མི་བསྐྱོད་པ་ནི་རྡོ་རྗེའི་ཆུ། །རྣམ་པར་སྣང་མཛད་རྟུག་པར་བཤད། །འདི་རྣམས་བདུད་རྩི་ལྔ་མཆོག་གོ །ཞེས་སོ། །རྣམ་པ་གཞན་གྱིས་སྡུད་དེ། རུས་པ་ཞེས་པ་ལ་སོགས་པའོ། །ཡང་འདི་རྣམས་ཀྱི་སྐྱེ་བ་ནི་བཟའ་བ་དང་བཏུང་བ་ལ་སོགས་པ་སྨིན་པ་ལ་འབྱུང་སྟེ། དང་པོར་རོའོ། །དེ་ནས་ཁྲག་དང་ཤ་དང་པགས་པ་དང་རུས་པ་དང་རྐང་མར་དང་ཁུ་བ་རྣམས་རིམ་པས་སོ། །དེ་ཉིད་ཀྱི་ཕྱིར་ཁུ་བ་ནི་འདི་སྐྱེ་བ་བདུན་པའོ་ཞེས་པས་སྐྱེ་བ་བདུན་པ་ཞེས་བརྗོད་དེ། ངེས་པའི་དོན་གཞུང་འཛུགས་པ་ལ། །སྐྱེ་བ་བདུན་པ་ཕྱུགས་ཉིད་ནི། །མཁའ་སྤྱོད་དངོས་གྲུབ་སྟེར་བ་པོ། །ཕུང་པོ་ཁམས་ནི་བརྒྱལ་བ་དང༌། །ནད་དང་རྒས་པ་འཕྲོག་པར་བྱེད། །འཁོར་ལོས་སྒྱུར་བ་ཉིད་སྟེར་བྱེད། །ཡུལ་དང་དབང་པོ་བསད་བྱས་པས། །ཤིན་ཏུ་ཕྲ་སོགས་ཡོན་ཏན་ལྡན། །མཁའ་ལ་སྤྱོད་པ་ཉིད་འདིས་སྟེར། །ཕྱི་རོལ་དངུལ་ཆུ་བཅིང་ཇི་ལྟར། །དེ་ལྟར་ཡེ་ཤེས་རོ་འདི་ཡང༌། །ཞེས་དགོངས་པའི་དབང་ལས་སོ། །གང་གི་ཕྱིར་དེ་ལྟར་ཡིན་པ་དེའི་ཕྱིར། །གོང་བུ་གཅིག་ཅེས་པ་ཁུ་བ་དང་ཁྲག་དང་རྣམ་པར་ཤེས་པ་རྣམས་རོ་གཅིག་པ་ཉིད་ཀྱི་ཕྱིར་རོ། །རྣམ་གཉིས་ནི་ཁུ་བ་དང་ཁྲག་གི་དབྱེ་བས་སོ། །རྣམ་པ་དུ་མ་ནི་ཤ་དང་པགས་པ་དང་རུས་པ་དང་རྐང་མར་དང་བཤད་པ་དང་གཅི་བ་དང་བད་ཀན་ལ་སོགས་པའི་དབྱེ་བ་ལས་སོ། །དེ་ལྟར་རང་བཞིན་གཅིག་ཁོ་ན་དུ་མའི་རང་བཞིན་དུ་དེའི་རང་གི་ངོ་བོ་བཅོམ་ལྡན་འདས་རྡོ་རྗེ་ཅན་སྟོང་པ་ཉིད་དང་སྙིང་རྗེའི་རང་བཞིན་གྱི་སྐུ་ཅན་བྱང་ཆུབ་ཀྱི་སེམས་རྡོ་རྗེ་འདིར་ཏེ་རྫོགས་པའི་རིམ་པ་ལ་བསྟན་ཏོ་ཞེས་པ་མཇུག་སྡུད་དོ། །སྔགས་ཀྱི་བཟླས་པ་ཡན་ལག་དང་བཅས་པ་མདོར་སྟོན་པའི་ཆེད་དུ་གསུངས་པ། རྩ་ཞེས་པ་ལ་སོགས་པའོ། །དེ་མ་ཐག་པར་གསུངས་པའི་གོང་བུ་སྤྲུལ་པའི་འཁོར་ལོ་ལ་སོགས་པའི་རྩ་རྣམས་སུ་དཀྱིལ་འཁོར་བཞིའི་བདག་ཉིད་རླུང་གི་བཞོན་པ་ཅན་སེམས། འཕོ་བ་ཁོ་ན་གསུངས་པ་ནི། གནས་པ་ཉེ་བར་མཚོན་པ་ཉིད་ཀྱིས། །ཨེ་ཡིག་ས་རུ་
ཤེས་པར་བྱ། །ཞེས་པ་ལ་སོགས་པ་སྟེ། གང་འཁྲུལ་འཁོར་བྱས་པ་ལས་བྱང་ཆུབ་སེམས་གང་བ་ཉིད་དུ་འགྱུར་བསྒོ་ལ་སོགས་པ་ནི་མ་ཡིན་པས། དེ་འདིར་བརྗོད་པར་བྱའོ་ཞེས་དགོངས་སོ། །གང་གི་ཕྱིར་བྱང་ཆུབ་སེམས་དེ་སྒོ་གཉིས་དག་ཏུ་འཁྲུལ་འཁོར་དུ་བྱེད་པ་ན། དེ་རྣམས་ཞེས་པ་རྩ་དེ་རྣམས་འདུ་བའི་དུས་སུ་སྟེ་ཡང་དག་པར་གང་བ་ཉིད་ཀྱིས་རྒྱུན་གྱིས་ཁྱབ་པའི་དུས་རྣམས་སུ་ཆུང་ངུ་ལ་སོགས་པའི་རིམ་པས་ཁྱབ་པ་ལས་མང་པོ་རྣམས་སུ་ལྷ་ཉིད་དེ་བྱང་ཆུབ་ཀྱི་སེམས་དང་དེའི་རང་བཞིན་ཕུང་པོ་ལ་སོགས་པ་རྣམས་དམིགས་པ་སྟེ་སྟོང་པ་ཉིད་དང་རོ་གཅིག་པའི་བདེ་བ་ཆེན་པོ་ཉིད་དུ་རྟོགས་པར་འགྱུར་རོ། །དེ་གསུངས་པ། བྱང་ཆུབ་སེམས་ནི་སུམ་ཅུ་གཉིས། །གང་ཚེ་འདིར་ནི་གང་བར་འགྱུར། །དབང་པོ་ཕུང་པོ་འབྱུང་བ་རྣམས། །དེ་མ་ཐག་ཏུ་སངས་རྒྱས་ཉིད། །ཅེས་སོ། །སྒོ་གཉིས་པོ་དེ་ཅི་ཞིག་ཅེ་ན་མདོར་སྟོན་པ། སྟེང་གི་ཞེས་པ་ལ་སོགས་པའོ། །རྣམ་པར་ཤས་པ་ནི་བྱང་ཆུབ་ཀྱི་སེམས་ཏེ། འོག་གི་སྒོ་ནས་ལྟེ་བ་ཇི་སྲིད་པར་འཇུག་པར་བསམ་པར་བྱས་ཤིང་ངེས་པར་བརྟགས་པར་བྱའོ། །ཁམས་རྣམས་ཀྱང་སྟེང་གི་ནས་འབྱུང་བའི་ནང་དུ་ལྟེ་བ་ཇི་སྲིད་པར་འཇུག་པའོ། །དེ་བཞིན་དུ་ལྟེ་བའི་འོག་ཏུ་ཡང་རྩ་གསུམ་ནས་རྣམ་པར་ཤེས་པ་དང་ཁམས་རྣམས་ལྟེ་བར་འཇུག་པའོ། །དེ་ནས་དེ་ལྟར་འཁྲུལ་འཁོར་བྱེད་པ་ནས་སེམས་བརྟན་པ་ཉིད་ལས་རླུང་ཕྱི་རོལ་དུ་འགྲོ་བ་འགོག་པ་ནི། རིམ་གྱིས་ན་རྩ་རྣམས་ཐམས་ཅད་དུ་འདུ་བ་ཇི་སྐད་གསུངས་པའི་ཁྱབ་པར་བྱང་ཆུབ་ཀྱི་སེམས་འགྱུར་རོ། །ཀུན་ནས་ཁྱབ་པ་ན་ནི་སྟེང་གི་སྒོར་དང་འོག་གི་སྒོར་ཡང་འཁྲུལ་འཁོར་བྱས་པ་ན། བྱང་ཆུབ་ཀྱི་སེམས་དེ་རྡོ་རྗེ་འཛིན་པ་བཅོམ་ལྡན་འདས་ལུས་ལ་རྟག་པ་སྟེ་རྒྱུན་མི་འཆད་པ། ཀུན་ཚེ་སྟེ་འཚམ་པ་མེད་པའི་དུས་སུ་བཞུགས་པར་འགྱུར་གྱི་འགའ་ཞིག་གི་ཚེ་འཇིག་པ་ནི་མ་ཡིན་ནོ། །དེ་ལ་སྟེང་སྒོར་ཏེ་ཡང་དང་འབྲེལ་བ་ལས་འོག་གི་སྒོར་ཡང་འཁྲུལ་འཁོར་གསུམ་རྣམས་ཀུན་དུ་སྡུད་པ་ནི་འཁྲུལ་འཁོར་གསུམ་མོ། །ཅི་ཡིས་ཞེས་པ་གྲངས་ཅན་
པའི་སྐྱེས་བུ་བཞིན་དུ་ཕུལ་དུ་བྱུང་བ་བསྒྲུབ་ཏུ་མེད་པ་ལ་བགྲོད་པ་མི་རིགས་པའི་ཕྱིར་རོ་ཞེས་པ་བསམ་པའོ། །ཡང་ན་དྲི་བ་ལ་ཅིའོ། །ཅི་ལྟར་འཁྲུལ་འཁོར་གསུམ་ཡིན་ཞེས་འབྲེལ་ལོ། །སྒོ་དགུས་ཡོངས་སུ་བསྐོར་བ་ཉིད་ནི་ལུས་ཀྱི་འཁྲུལ་འཁོར་ཁོ་ནར་གསལ་བར་བྱེད་པར་འགྱུར་རོ། །དྲི་བ་དང་པོ་ལ་ལན་གསུངས་པ། ལུས་ལ་སོགས་པ་གསུམ་རྣམས་འཁྲུལ་འཁོར་དུ་བྱེད་དོ་ཞེས་པ་འཁྲུལ་འཁོར་རྣམས་སོ། །གཉིས་པ་ལ་ནི་རྣམ་གསུམ་སྟེ། ཐ་མལ་སོགས་པ་ཡིས་སོ་ཞེས་པའོ། །ཅི་ལྟར་ཞེས་པ་རབ་ཏུ་རྒྱས་པར་འཆད་དེ། གཅིག་ཅེས་པ་ལ་སོགས་པ་སྟེ། ཀེང་རུས་ཀྱི་དབྱུག་པ་འདིའི་ཀ་བ་གཅིག་ཡིན་པ་ཞེས་པའོ། །རགས་པ་ནི་སྒོ་གཞན་ལ་ལྟོས་པ་སྟེ། འདིའི་ལྷག་པའི་ལྷ་ཕུང་པོ་ལྔའི་བདག་ཉིད་རྣམ་པར་སྣང་མཛད་ལ་སོགས་པ་ཡིན་པ་ཞེས་པ་ལྷག་པའི་ལྷ་ལྔ་ཅན་ནོ། །དེ་ལྟར་འཁྲུལ་འཁོར་ཕྱི་མ་གཉིས་ཀྱང་ལྷག་པའི་ལྷ་ལྔ་ཅན་ནོ། །མགོ་བོ་དང་སྨིན་མ་དང་མིག་དང་རྣ་བ་དང་སྣ་དང་ཁ་དང་ལྟེ་བ་དང༌། གཅི་བ་དང་བཤད་པའི་རྩ་རྣམས་ནི་བུག་པ་དགུ་རྣམས་ཏེ། བྱང་ཆུབ་ཀྱི་སེམས་འབབ་པའི་ཕྱིར་རོ། །དེར་སོན་པའི་ལུས་ཀྱི་སྒོ་རྣམ་པ་དགུའོ། །འབྱུང་བ་ལ་སོགས་པའི་རང་བཞིན་སྤྱན་མ་དང་རྣམ་པར་སྣང་མཛད་ལ་སོགས་པའི་ལྷ་རྣམས་ཀྱིས་སྤྲུལ་པ་སྟེ་སྔགས་ལ་སོགས་པས་སྤྲུལ་པ་བཞིན་དུ་རང་བཞིན་མེད་པའོ་ཞེས་པ་དགོངས་པའོ། །དྲི་བ་གསུམ་པ་ལན་འདེབས་ཏེ། སེམས་ཀྱི་ཞེས་པ་སེམས་རླུང་ལ་ཞོན་པ་ནི་སྐྱེས་བུ་རྣལ་འབྱོར་པ་སྟོང་པ་ཉིད་དང་སྙིང་རྗེ་དབྱེར་མེད་པ་ཁོ་ནའོ་ཞེས་པའི་དོན་ཏེ། དམ་པའི་དོན་ཡིན་གྱི། གྲངས་ཅན་པོའི་སྐྱེས་བུ་བཞིན་དུ་རྟག་པར་རང་བཞིན་དང་བཅས་པ་ནི་མ་ཡིན་ཏེ། གང་ལས་འདིའི་དེ་དང་འདྲ་བར་འགྲོ་བ་ལ་སོགས་པ་མེད་པ་ཡིན་པའོ་ཞེས་དགོངས་པའོ། །རྟག་ཏུ་ནི་རྒྱུན་མི་འཆད་པར་རོ། །འགྲོ་བའི་ཁྱད་པར་ནི་འོག་དང་སྟེང་དག་ཏུ་འཇུག་པ་དང་འབྱུང་བ་དག་སྟེ། སྒོ་དགུ་རྣམས་ཀྱི་བར་གྱི་གནས་སྐབས་སུ་རླུང་འབབ་པའི་དབང་ལས་སོ། །དེ་སྐད་དུ་ནི་རྡོ་རྗེའི་སྒོའི་
རྣལ་འབྱོར་གྱི་རྒྱུད་དུ། སྲོག་དང་ཐུར་སེལ་དང་མཉམ་གནས་དང་གྱེན་རྒྱུ་དང་ཁྱབ་བྱེད་དང་རྒྱུ་བ་དང་རྣམ་པར་རྒྱུ་དང་ཡང་དག་རྒྱུ་དང་ངེས་པར་རྒྱུ་དང་རབ་ཏུ་རྒྱུ་སྟེ་རླུང་བཅུ་རྣམས་ཀྱི་བྱ་བ་བསྟན་ཏོ། །དེ་ལ་སྙིང་གར་གནས་པའི་རླུང་ནི། རབ་གནོན་ལས་དང་སྲོག་རྩོལ་ལས། །དབང་པོའི་སྒོ་ཡི་རྒྱུན་རྣམས་ཀྱིས། །རྟག་པའི་དུས་སུ་རབ་འགྲོ་བ། །སྲོག་ཅེས་པར་ནི་མངོན་པར་བརྗོད། །རབ་གནོན་ནི་འབྱུང་བ་དང་འཇུག་པ་དག་གོ །སྲོག་རྩོལ་ནི་ཚེ་རིང་བར་བྱེད་པ་སྟེ། སྲོག་སྟེ་སེམས་ཀྱི་རྩོལ་བ་སྟེ་རིང་དུ་བྱེད་ཅིང་རྒྱས་པར་བྱེད་པ་ཞེས་པ་སྲོག་རྩོལ་ལོ། །སྲོག་ཏུ་བྱེད་དབུགས་སུ་བྱེད་པས་སྲོག་སྟེ། རླུང་རྣམ་པ་བཅུར་འགྱུར་རོ། །བཤད་ལམ་དུ་གནས་པ་ནི། རླུང་གཅིག་བཤང་བ་ཁུ་བ་སོགས། །ཐུར་དུ་འདྲེན་ཕྱིར་ཐུར་སེལ་ལོ། །ལྟེ་གནས་བཟའ་བཏུང་ལ་སོགས་རྣམས། །མཉམ་པར་འདྲེན་ཕྱིར་མཉམ་གནས་སོ། །མགྲིན་པར་གནས་པ་ནི། གྱེན་འགྲོའི་ཕྱིར་དང་སྡུད་པ་ལས། །བཟའ་དང་བཅའ་སོགས་ཟ་བ་ཡིས། །གྱེན་རྒྱུའི་ལས་སུ་རྣམ་ཤེས་བྱ། །ཤེས་དང་ལྷན་ཅིག་སྦྱོར་ལས་སོ། །གྱེན་འགྲོ་ནི་སྣའི་བུ་ག་ལ་སོགས་པ་རྣམས་ནས་སོ། །སྡུད་པ་ནི་ནང་དུ་འཇུག་པའོ། །ཤེས་པ་དང་སྦྱོར་བ་ནི་རླུང་བཅུ་པོ་རྣམས་ཀྱང་འབབ་པར་བྱེད་པ་ཉིད་ཀྱི་ཕྱིར་རོ། །ཚིགས་ལ་གནས་པ་ནི། ཁྱབ་དང་འཛིན་པ་ཉིད་དང་ནི། །འགྲོ་བ་དང་ནི་འོང་བ་སོགས། །ཚིགས་རྣམས་ཀུན་དུ་ཁྱབ་པའི་ཕྱིར། །ཁྱབ་བྱེད་ཅེས་པར་མངོན་པར་བརྗོད། །རྒྱུ་བ་ནི་མིག་ལ་བརྟེན་ནས་གཟུགས་ཀྱི་རྣམ་ཤེས་སྐྱེད་པར་བྱེད་དོ། །རྣམ་པར་རྒྱུ་ནི་རྣ་བ་ལ་བརྟེན་ནས་སྒྲ་ལ་ཤེས་པའོ། །ཡང་དག་རྒྱུ་ནི་སྣ་ལ་བརྟེན་ནས་དྲིའི་ཤེས་པའོ། །རབ་ཏུ་རྒྱུ་ནི་ལྕེ་ལ་བརྟེན་ནས་རོའི་ཤེས་པའོ། །ངེས་པར་རྒྱུ་ནི་ལུས་ཀྱི་སྐྱེ་མཆེད་ལ་བརྟེན་ནས་རེག་བྱ་ལ་ཤེས་པའོ། །འཕགས་པའི་ལྷའི་ཞབས་ཀྱིས་ཀྱང་གསུངས་པ། རླུང་བཅུ་པོ་འདི་རྣམས་ནི་སླར་ཡང་དབུགས་རྔུབ་པ་དང་འབྱུང་བར་འགྱུར་ཏེ། དཀྱིལ་འཁོར་བཞིའི་བདག་ཉིད་རྣམས་དང་འབྱུང་བ་ལྔའི་བདག་ཉིད་རྣམས་དང་མེ་ལོང་ལྟ་བུ་ལ་སོགས་པ་ཡེ་ཤེས་ལྔའི་བདག་ཉིད་
དང་འོད་ཟེར་ལྔའི་བདག་ཉིད་རྣམས་ཏེ། དེ་རྣམས་ཀྱང་ཡི་གེ་གསུམ་གྱི་གཞིར་གྱུར་ནས་འཇུག་པ་དང་གནས་པ་དང༌། ལྡང་བའི་རིམ་གྱིས་རྡོ་རྗེ་བཟླས་པ་བྱེད་དོ། །དེ་རྣམས་ཀྱང་ཨ་ཡིག་གི་གཞིར་གྱུར་ནས་ཚིག་བརྗོད་པ་མ་ལུས་པ་བྱེད་དུ་འཇུག་གོ ། དེ་རྣམས་ཀྱང་གཞོམ་དུ་མེད་པ་ཐོབ་ནས་རང་བཞིན་མེད་པར་འགྱུར་རོ་ཞེས་སོ། །དགོངས་པ་ལུང་སྟོན་པའི་རྒྱུད་དུ་ཡང༌། བྱང་ཆུབ་སེམས་ནི་རླུང་འགྱུར་ཞིང༌། །ནམ་མཁའ་ལ་ཡང་རྣམ་པར་གནས། །སེམས་ཅན་རྣམས་ཀྱི་སྲོག་གྱུར་པ། །ལྔ་ཡི་བདག་ཉིད་བཅུ་མིང་ཅན། །ཞེས་སོ། །ནམ་མཁའ་ལ་སྟེ་ལུས་ཀྱི་བུ་ག་ལའོ། །ལྔའི་བདག་ཉིད་ནི་དེ་བཞིན་གཤེགས་པ་ལྔའི་བདག་ཉིད་དོ། །མཐའི་གནས་སྐབས་སུ་ནི་བགྲོད་པའི་ཁྱད་པར་འཕོ་བའི་རབ་ཏུ་བྱེད་པར་འཆད་པར་འགྱུར་རོ། །ངག་གི་བགྲོད་པའི་སྒོ་བརྗོད་པའི་ཆེད་དུ་གསུངས་པ། དེ་ལྟར་ཞེས་པ་སྟེ་བགྲོད་པའི་ཁྱད་པར་ལས་འགྲོ་བའི་རླུང་ཉིད་ལ་སོགས་དབྱེ་བས་རླུང་རྣམ་པ་བཞིའོ། །འགྲོ་བ་ནི་སེམས་ཀྱི་གནས་པའི་ཁྱད་པར་ཁོ་ན་སྟེ། གནས་པ་ཡང་རྣམ་པ་གཉིས་སོ། །དེ་ལ་ཞུམ་པའི་རྒྱས་པར་སྟོན་པ། ཞུམ་པའི་གནས་པའོ་ཞེས་པ་བརྟན་པ་ཉིད་དེ་འབབ་པར་གྱུར་པའི་རླུང་བརྟན་པའི་ཕྱིར་རོ། །རབ་རྒྱུའི་ཆོ་ག་རྒྱས་པར་བསྟན་པ་ནི། །རྟག་ཏུ་རབ་རྒྱུའི་འགྲོ་དང་འོང་ཞེས་པའོ། །བགྲོད་པའི་ཁྱད་པར་ཞེས་པ་འདི་ཅི་ཞེ་ན། གསུངས་པ། མེ་ཞེས་པ་ལ་སོགས་པའོ། །འཁོར་ལོར་ནི་དཀྱིལ་འཁོར་དུའོ། །ཀུན་སྤྱོད་ནི་འཇུག་པ་དང་འབྱུང་བ་དག་གོ །སོང་ནི་བགྲོད་པའོ། །སྟེང་དུ་སོང་བ་ནི་མེའི་དཀྱིལ་འཁོར་དུ་འབབ་པ་སྟེ་སྣའི་བུ་གའི་གཡས་ངོས་ནས་སོ། །གཡོན་ངོས་སུ་སོན་པ་ནི་རླུང་གི་རུའོ། །ཐད་ཀར་གཉིས་ཀར་སོན་པ་ནི་སའི་རུའོ། །འོག་ཏུ་སོན་པ་ནི་ཆུའི་རུའོ། །འབྱུང་བ་ལྔ་པ་ནམ་མཁའི་ཁམས་ནི་ཁྱབ་པར་བྱེད་པ་ཉིད་ཀྱིས་གནས་བཞི་རྣམ་པ་གསུམ་ཡང་དཀྱིལ་འཁོར་བཞི་ཡང་དག་རྒྱུ་བའི་དུས་ཁོ་ནར་ཡང་དག་པར་རྒྱུའོ་ཞེས་པ་ལ་སོགས་སུ་མ་གསུངས་སོ། །དེ་སྐད་དུ་ཡང་འཕགས་པའི་ལྷའི་ཞབས་
ཀྱིས་གསུངས་པ། རྡོ་རྗེ་དང་པདྨ་དག་གི་སྣ་དག་ལས་འོད་ཟེར་བྱུང་ཞིང༌། གྱེན་དུ་སོང་སྟེ་རབ་ཏུ་གྲགས་པའི་སྣའི་རྩེ་མོ་ནས་རྒྱུའོ། །དེ་ལས་དང་ཆུ་དང་མེ་དང་རླུང་ཞེས་ཁམས་ཀྱི་བྱ་བ་དཀྱིལ་འཁོར་བཞི་རྣམས་ཕྱིར་འབྱུང་ཞིང༌། ཁྱབ་བྱེད་ནི་ཁྱབ་པར་བྱེད་པའི་རླུང་ཕྱིར་མི་འབྱུང་བ་ཁྱབ་པའི་འོད་ཟེར་ཅན་ཏེ། རྣམ་པར་སྣང་མཛད་དེ་བཞིན་གཤེགས་པ་ནམ་མཁའ་དང་མཉམ་པའི་རང་བཞིན་ནོ། །འོན་ཀྱང་འོད་ཟེར་རེ་རེ་འབྱུང་བ་ན། འོད་ཟེར་ལྔ་ཅན་རྣམས་ཕྱིར་འབྱུང་སྟེ། ཁམས་ཀྱི་དཀྱིལ་འཁོར་གཅིག་གིས་ཁམས་བཞི་རྣམས་ལ་ཁྱབ་པའོ་ཞེས་སོ། །འདིར་ནི་ས་ལ་སོགས་པའི་རླུང་འོད་ཟེར་བཞི་པོ་རྣམས་འདི་ཡིས་ཁྱབ་པ་རྣམས་སོ་ཞེས་པས་ཁྱབ་པའི་འོད་ཟེར་ཅན་ཞེས་པར་ཁམས་ཀྱི་ཞེས་པ་ལ་སོགས་པས་གསལ་བར་མཛད་དོ། །ཆ་ཤས་རེ་རེ་ནི་དཀྱིལ་འཁོར་བཞི་པོ་རྣམས་ཀྱི་དཀྱིལ་འཁོར་སོ་སོའི་འོད་ཟེར་དགེ་བ་སྟེ་བདེ་བ་བསྐྱེད་པར་རུང་བ་ཉིད་ཀྱིས་བདེ་བའི་ངོ་བོ་ནམ་མཁའི་བདག་ཉིད་ཀྱི་རླུང་མའི་སྐྱེ་གནས་ནས་ཕྱི་རོལ་དུ་བྱུང་བ་ནས་བརྩམས་ཏེ་འབྱུང་ཞིང༌། དེ་ཉིད་དང་ལྷན་ཅིག་ས་ལ་སོགས་པ་རྣམས་འོད་ཟེར་ལྔ་ཅན་རྣམས་སུ་འགྱུར་རོ། །རླུང་བཅུ་པོ་རྣམས་དཀྱིལ་འཁོར་བཞིའི་བདག་ཉིད་ཅན་རྣམས་དང་འབྱུང་བ་ལྔའི་བདག་ཉིད་རྣམས་ཤེས་པ་ཡང་འཐད་དོ། །དུས་ཐ་དད་པར་ནམ་མཁའ་རྒྱུན་ནི་ཐུན་ཕྱེད་ཀྱིས་མེ་ལ་སོགས་པའི་དུས་སྦྱོར་བཞི་པོ་རྣམས་ཁོ་ནའི་འོ། །དགོངས་པ་ལུང་སྟོན་པའི་རྒྱུད་དུ། གོས་དཀར་ལ་སོགས་བཟླས་བཤད་པ། །བརྒྱ་ཕྲག་གཉིས་དང་ཉི་ཤུ་ལྔ། །བཞི་ཡིས་ཡང་དག་བསྒྱུར་བ་ནི། །སྦྱོར་བ་བཞི་ལ་བརྒྱ་ཕྲག་དགུ། །ཞེས་ཉིན་མཚན་གྱི་ཐུན་ཕྱེད་པ་ཉི་ཤུ་རྩ་བཞི་རྣམས་ཀྱིས་སོ་སོར་འབྱུང་བའི་རྣམ་པས་བསྒྱུར་བ་ལས། དགུ་བརྒྱ་རྣམས་སུ་གང་བསྟན་པ། །ཉི་ཤུ་རྩ་བཞིའི་རིམ་རྣམས་ཀྱིས། །དེ་ནི་སོ་སོར་འབྱུང་བ་ལས། །ཉི་ཁྲི་ཆིག་སྟོང་དྲུག་བརྒྱའོ། །ཞེས་འཕོ་བའི་དབུགས་ཀྱིས་གྲངས་གསུངས་པ་ཅི་ལྟར་ཡིན། སོ་སོར་རང་དབང་དུ་ཡང་དག་པར་རྒྱུན་ནི་ནམ་མཁའི་ཡང་དབུགས་ཀྱི་གྲངས་གསུངས་པའི་བྱ་བ་ཤོར་བར་འགྱུར་རོ། །དཔལ་
རྡོ་རྗེ་ཕྲེང་བའི་རྒྱུད་དུ་ཡང་ནམ་མཁའ་ནང་དུ་འདུས་པ་ཁོ་ནས་དཀྱིལ་འཁོར་བཞི་རྣམས་ཁོ་ནའི་རྒྱུ་བ་གསུངས་པ། སྣ་རྩེ་ཡུངས་ཀར་ཞེས་བྱ་བ། །སྲོག་དང་རྩོལ་བར་བརྟགས་པ་སྟེ། །སྲོག་དང་རྩོལ་བ་ལ་གནས་པ། །འོད་ལྔ་སངས་རྒྱས་རྣམས་སུ་སྒོམ། །སྟེང་དུ་སྣ་ལས་ངེས་འབྱུང་བ། །གཡོན་དང་གཡས་དང་གཉི་ག་དང༌། །དལ་བ་ཞེས་པ་རྣམ་པ་བཞི། །ནང་གི་དུས་ནི་ཡིན་པར་འདོད། །མགྲིན་པ་སྙིང་ག་ལྟེ་བ་དང༌། །གསང་བའི་པདྨར་འགྲོ་འོང་སྟོན། །ཐུན་ཕྱེད་དུས་སུ་རིམ་འོངས་པས། །གོ་རིམས་ཇི་བཞིན་གནས་པར་བྱེད། །གཡས་པ་ནས་ནི་འབྱུང་བའི་འོད། །མེ་ཡི་དཀྱིལ་འཁོར་དེ་ཡིན་ཏེ། །ཁ་དོག་དམར་ཞིང་གསལ་བ་འདི། །པདྨ་མགོན་པོ་འདི་ལ་ལྷའོ། །གཡོན་པ་ནས་ནི་འབྱུང་བའི་འོད། །རླུང་གི་དཀྱིལ་འཁོར་མིང་ཅན་ཏེ། །ལྗང་སྔོན་རུ་ནི་རབ་སྣང་བ། །ལས་ཀྱི་མགོན་པོ་འདིར་ལྷ་ཉིད། །གཉིས་ཀ་ལས་ནི་བྱུང་བའི་འོད། །ཁ་དོག་སེར་པོའི་འོད་ཆེན་པོ། །དབང་པོ་ཆེན་པོའི་དཀྱིལ་འཁོར་འདི། །རིན་ཆེན་མགོན་པོ་འདི་ལ་ལྷའོ། །དལ་ཞིང་དམན་པར་རབ་རྒྱུ་བ། །དཀར་བ་ཀུན་ད་ལྟར་སྣང་བ། །འདི་ནི་ཆུ་ཡི་དཀྱིལ་འཁོར་ཏེ། །རྡོ་རྗེ་མགོན་པོ་འདི་ལྷ་ཉིད། །ལུས་ཀུན་ལ་ནི་རྗེས་སོང་རླུང༌། །བྱ་བ་ཀུན་ལ་འཇུག་བྱེད་པ། །འདི་ནི་རྣམ་སྣང་མཛད་རང་བཞིན། །ཤི་བའི་ལུས་ལས་ངེས་འབྱུང་འགྱུར། །རླུང་གི་དེ་ཉིད་གསལ་བ་འདི། །ཡེ་ཤེས་ལྔ་ཡི་ངོ་བོ་ཉིད། །ཅེས་སོ། །དེ་བཞིན་དུ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་དུ། ཡ་ཡིག་དོན་གྱིས་གང་ཅིའང་རུང༌། དངོས་གྲུབ་འདོད་པས་བྱ་བའོ། །ར་ལ་སོགས་པ་གསུམ་གྱིས་ཀྱང༌། །འགྲོ་བའི་དོན་ལ་འཇུག་པར་བྱ། །མེ་དང་རླུང་དང་དབང་ཆེན་དང༌། །ཆུ་སྟེ་སའི་དཀྱིལ་འཁོར་དུ། །ཐུན་ནི་ཕྱེད་ཕྱེད་དུས་རྣམས་སུ། །ལས་དག་གཉིས་གཉིས་གནས་པར་འགྱུར། །ཞེས་པ་འདིས་ས་དང་ཆུ་དང་མེ་དང་རླུང་གི་དཀྱིལ་འཁོར་རྒྱུ་བ་རྣམས་སུ་རིམ་པ་ཇི་ལྟ་བར་ཞི་བ་དང་རྒྱས་པ་དང་དབང་དུ་བྱ་བ་དང་མངོན་སྤྱོད་ཀྱི་ལས་གཙོ་བོར་དང༌། དཀྱིལ་འཁོར་རེ་རེ་ལ་ནི་གང་ན་
གཅིག་ཡིན་པ་དེ་ན་བཞི་རྣམས་སོ་ཞེས་པའི་རིག་པ་ལས་གཞན་པའི་ལས་གསུམ་ཕལ་པའོ་ཞེས་ཐུན་ཕྱེད་ཀྱི་དཀྱིལ་འཁོར་སོ་སོ་ལ་གཙོ་བོའི་ལས་གཉིས་གསུངས་ཤིང༌། དེ་ལྟར་ནམ་མཁའི་དཀྱིལ་འཁོར་གྱི་གང་དུ་ཡང་མ་ཡིན་ནོ། །ལས་ཐམས་ཅད་པ་ཉིད་ནི་འདི་ལ་གཅིག་དཀྱིལ་འཁོར་བཞིའི་ནང་དུ་འདུས་པ་ཁོ་ན་ལས་ཤེས་པར་བྱའོ་ཞེས་པས་མ་བརྗོད་དོ། །ཨ་ཝ་དྷཱུ་ཏཱིའི་ལམ་ནས་ཀྱང་རྒྱུ་བའི་རླུང་ནི་དཀྱིལ་འཁོར་བཞི་རྣམས་སྣ་བུག་དག་ལས་རྒྱུ་སྟེ། ལྔ་པ་དེ་ནི་དེའི་ནང་དུ་འདུས་པ་ཁོ་ནའི་ཕྱིར་ལོགས་པར་ནི་མ་ཡིན་ནོ། །གཞན་ཡང་བརྟག་པ་གཉིས་པའི་རྒྱུད་དུ། བདེ་བ་ཉིད་ནི་ནམ་མཁའི་ཁམས། །ཞེས་པ་འདིས་མེར་མེར་པོའི་གནས་སྐབས་སུ་ཁམས་བཞིའི་རྣམ་པ་ཅན་ཁོ་ནའི་བདེ་བའི་ཤེས་པ་ནི་ནམ་མཁར་གསུངས་ཀྱི། ལྷན་ཅིག་གནས་པའི་རྣམ་པ་མེད་པ་ནི་མ་ཡིན་ནོ། །ཁུ་བའི་རྣམ་པ་བཅོམ་ལྡན་འགྱུར། །དེ་ཡི་བདེ་བ་འདོད་མར་བཤད། །ཅེས་པ་འདིས་ཀྱང་ཤེས་རབ་དང་ཐབས་དག་དབྱེར་མེད་པ་མང་དུ་གསལ་བར་བྱེད་པའི་ཕྱིར་ཁུ་བའི་རྣམ་པ་ཅན་ཁོ་ན་བདེ་བ་ཉམས་སུ་མྱོང་བར་གསུངས་ཀྱི། ཡེ་ཤེས་རྣམ་པ་མེད་པ་ཡང་མ་ཡིན་ནོ། །དེ་ལས་གཞན་པའི་ནམ་མཁའ་ཞེས་བྱ་བ་ཅུང་ཟད་ཡོད་པ་ཡང་མ་ཡིན་ལ། དེ་འབྱུང་བ་ཡང་མ་ཡིན་ཏེ། མ་སྐྱེས་པ་ཉིད་ཀྱི་ཕྱིར་རོ། །སྣང་བ་དང༌། མུན་པའི་ངོ་བོ་ཡང་འབྱུང་བ་དང༌། འབྱུང་བ་ལས་གྱུར་པའི་ངོ་བོའི་ཁྱད་པར་གཟུགས་ཁོ་ནའོ་ཞེས་གཞན་དུ་དཔྱད་ཟིན་ཏོ། །དེས་ན་ཅིས་སྟོང་པའི་དཀྱིལ་འཁོར་གཞན་པའོ་ཞེས་བརྗོད། གང་དུས་ཀྱི་འཁོར་ལོར་ནམ་མཁའི་དཀྱིལ་འཁོར་ལོགས་སུ་བཏོན་ནས་གསུངས་པ་དེ་ནི་མུ་སྟེགས་པའི་ལྟ་བ་ལ་མངོན་པར་ཞེན་པའི་ཉི་མའི་ཤིང་རྟ་ལ་སོགས་པ་གདུལ་བྱ་རྣམས་ངེས་པའི་དོན་ལ་གཞུག་པ་ལ་ལྡེམ་པོར་དགོངས་པས་དྲང་བའི་དོན་ཁོ་ན་སྟེ། ཕག་ལ་སོགས་པ་འདོད་པའི་རྗེས་སུ་འཇུག་པས་རི་རབ་ཀྱི་སྟེང་གི་མཚམས་སུ་ཁམས་གསུམ་པའི་སྣོད་ཀྱི་འཇིག་རྟེན་གྱི་བཀོད་པ་ལ་སོགས་པ་བརྟེན་པ་བཞིན་ནོ། །འོ་ན་དུས་ཀྱི་འཁོར་ལོ་དང་དེའི་རྗེས་སུ་འབྲང་བའི་གཞུང་རྣམས་
སུ་ཐེག་པ་གསུམ་དང་འགལ་བའི་རྣམ་པར་གཞག་པ་མང་པོ་རྣམས་བྱ་སྟེ། དེའི་གཞུང་བྱེད་པ་གྲགས་པ་དང་པདྨ་དཀར་པོ་དང་རྡོ་རྗེ་སྙིང་པོ་དང་ཕྱག་ན་རྡོ་རྗེའི་མིང་ཅན་དེ་རྣམས་བྱང་ཆུབ་སེམས་དཔའ་རྣམས་མ་ཡིན་པ་ཁོ་ནའོ་ཞེས་མང་དུ་ཤེས་པ་རྣམས་སྨྲའོ། །འདིའི་ཕྱིར་འགལ་བ་ཐམས་ཅད་མ་སྤངས་པས་ན། འགའ་ཞིག་ཏུ་འགལ་བ་སྤོང་བའི་འབད་རྩོལ་གྱིས་ཅི་བྱ་ཞེ་ན། དུས་ཀྱི་འཁོར་ལོར་བསྟན་པ་རྒྱུད་གཞན་དང་མི་འགལ་བའི་དོན་གྱི་ཆ་འགའ་ཞིག་གི་ནི་ཁོ་བོས་རང་གཞུང་གི་ཕྱོགས་རྣམས་སུ་རྗེས་སུ་འབྲང་ཞིང༌། གདུལ་བྱ་འགའ་ཞིག་གི་བསམ་པའི་རྗེས་སུ་འཇུག་པས་འགལ་བའང་ཁ་ཅིག་སྤངས་སོ། །དེ་ལས་གཞན་ལ་ནི་འགལ་བ་མ་སྤངས་ན་ཡང་འདི་རྣམས་ལ་ཉེས་པ་ཅི་ཡང་མེད་དོ་ཞེས་པ་ཤིན་ཏུ་རྒྱས་པར་བརྗོད་པས་ཆོག་གོ །ཤི་བའི་ལུས་ལ་ངེས་འབྱུང་འགྱུར། །ཞེས་པ་འདི་ལ་མན་ངག་གིས་ཉིན་མཚན་སོ་སོར་ཐུན་ཚོད་ཕྱེད་པ་སོ་སོ་ལ་བཞི་རྣམས་སོ་ཞེས་པས་ཐུན་ཚོད་ཕྱེད་པ་ཉི་ཤུ་རྩ་བཞི་རྣམས་ཀྱིས་ཁམས་བཞིའི་དཀྱིལ་འཁོར་རྣམས་ཏོ། དགུ་བཅུ་རྩ་དྲུག་གོ །ཁམས་ཀྱི་དཀྱིལ་འཁོར་གཅིག་ལ་རྐང་པ་དང་བཅས་པའི་བརྒྱ་ཕྲག་གཉིས་ཀྱི་དབུགས་རྣམས་སོ། །དེ་ལ་དབུགས་ཕྱེད་དང་བཅས་པའི་བདུན་རྣམས་ནི་ཁྱབ་བྱེད་ཀྱི་སྟེ། མི་ཕྱེད་མ་ལ་སོགས་པ་རྩ་སུམ་ཅུ་རྩ་གཅིག་རྣམས་སུ་དབུགས་སུམ་ཅུ་རྩ་གཅིག་གི་རྗེས་སུ་བདུད་འདྲལ་མ་ཞེས་བྱ་བ་དུས་ཀྱི་རྩར་དབུགས་རེ་རེ་རྒྱུ་བའི་ཕྱིར་དང་ལྷག་མ་གཅིག་གི་ཕྱེད་རྒྱུ་བའི་ཕྱིར་རོ། །དེས་ན་དཀྱིལ་འཁོར་དགུ་བཅུ་རྩ་དྲུག་རྣམས་ལ་ཁྱབ་བྱེད་ཀྱི་དབུགས་བདུན་བརྒྱ་ཉི་ཤུ་སྟེ་ཆུ་ཚོད་གཉིས་ཞེས་བྱའོ། །ལོ་བརྒྱའི་ཉིན་མཚན་རྣམས་ཆུ་ཚོད་གཉིས་ཀྱིས་བསྒྱུར་བ་རྣམས་ལ། ཆུ་ཚོད་སྟོང་ཕྲག་བདུན་ཅུ་རྩ་གཉིས་རྣམས་སུ་འགྱུར་རོ། །དེ་ཉིད་ཀྱི་ཕྱིར་མའི་སྐྱེ་གནས་ལས་ཕྱིར་འབྱུང་བ་ནས་བརྩམས་ནས་ཉིན་མཚན་སོ་སོ་ལ་ལུས་ཀྱི་ཆུ་ཚོད་གཉིས་དག་ཚེ་ཟད་པའི་ཕྱིར་ལོ་བརྒྱ་རྣམས་ཀྱིས་ཆུ་ཚོད་སྟོང་ཕྲག་བདུན་ཅུ་
རྩ་གཉིས་རྣམས་ལ་ཚེ་ཐམས་ཅད་ཟད་དེ། འདིའི་ཕྱིར་འཆི་བའི་སྐད་ཅིག་ལ་ཁྱབ་བྱེད་ཀྱི་རླུང༌། ཤི་བའི་ལུས་ལས་ངེས་འབྱུང་འགྱུར། །ཞེས་བརྗོད་པར་བྱའོ། །ངག་གི་བ་ཞེས་པ། ཇི་སྲིད་འཇིག་རྟེན་བརྡར་བཏགས་དང༌། །དེ་བཞིན་བརྟགས་པ་སྣ་ཚོགས་རྣམས། །བྱང་ཆུབ་སེམས་ལས་འབྱུང་བའོ། །རྣམ་རྟོག་རླུང་ལས་རྟག་ཏུའོ། །ཞེས་དགོངས་པ་ལུང་སྟོན་པའི་རྒྱུད་དུ་གསུངས་པའི་ཕྱིར་ན། ངག་རྣམས་ཀྱི་རྒྱུ་ནི་རླུང་དང་རྣམ་པར་རྟོག་པ་དག་གོ །རྣམ་པར་རྟོག་པའི་ནི་སྔར་གྱི་ཤེས་པ་དང་རླུང་ངོ༌། །དེའི་ཕྱིར་དེ་རྣམས་ཀྱི་ཡང་དངོས་སུ་དང་བརྒྱུད་པས་རླུང་རྒྱུ་ཡིན་ནོ་ཞེས་པ་ངག་གི་བའི་སྒོའོ། །རླུང་དང་སེམས་འདི་དག་ཀྱང་སྒྲོ་བཏགས་པ་ཉིད་ཀྱིས་ཏེ། དོན་དམ་པ་པ་ཉིད་ཀྱི་ནི། དེའི་རང་བཞིན་གྱིས་ནག་པོས་རྒྱུ་ཡང་མ་ཡིན་གྱིས། འོན་ཀྱང་སྟོང་པ་ཉིད་ཀྱི་རང་བཞིན་གྱིས་སོ། །གང་མིའམ་ཅིའི་རྒྱལ་པོས་ཞུས་པའི་མདོར་གསུངས་པ། དེ་ཅི་ལུས་ཀྱི་ནང་གི་ཁོང་ནས་སེམས་ཅན་རྣམས་ཐམས་ཅད་ཀྱི་སྒྲ་དབྱངས་རྣམས་འབྱུང་ངམ། འོན་ཏེ་སེམས་ལས་ཡིན། སྨྲས་པ་ལུས་ལས་མ་ཡིན། སེམས་ལས་མ་ཡིན་ནོ། །འོ་ན་ཅི་ལས་ཡིན། སྨྲས་པ། ནམ་མཁའ་ལས་འབྱུང་ངོ༌། །ནམ་མཁའི་རང་བཞིན་ཅན་ནི་སྒྲ་རྣམས་ཏེ། རྣམ་པར་རིག་མ་ཐག་ཏུ་འགག་གོ །འགག་པ་རྣམས་ཀྱང་ནམ་མཁའི་རང་བཞིན་ཁོ་ན་ལ་ཡང་དག་པར་གནས་སོ་ཞེས་སོ། །རྡོ་རྗེ་བཟླས་པ་ཉིད་ཀྱི་ཕྱིར་ན་འབད་པས་ངག་རྣམས་མི་བརྗོད་པར་བྱ་བ་ཉིད་ཀྱིས་འདི་ཡིད་ཁོ་ནའི་ཡིན་ལ་ནི་ཡིད་ཀྱི་སྒོ་སྟེ་རྣམ་པ་གཉིས་སོ། །ཅི་ལྟར་ཞེ་ན། ཟླ་བ་ནི་ལ་ལ་ནཱ་སྟེ། རླུང་ལ་ཞོན་པའི་ཁུ་བ་འབབ་པའི་ཕྱིར་རོ། །ཉི་མ་ནི་ར་ས་ནཱ་སྟེ་རླུང་ལ་ཞོན་པའི་ཁྲག་འབབ་པའི་ཕྱིར་རོ། །དེ་དག་གི་རབ་དབྱེ་ལས་ཏེ་རབ་ཏུ་གྱུར་པའི་ཁྱད་པར་ལས་ནི་ཉེ་བར་མ་བཏགས་པ་ལས་སྒོ་ལ་འཇུག་པ་དང་འབྱུང་བའོ། །ཉེ་བར་བརྟགས་པ་ལས་ནི་ལ་ལ་ནཱ་དང་ར་ས་ནཱ་དག་སེམས་རྒྱུ་བའི་སྟེ་རླུང་གི་སྒོ་ཉིད་ཀྱིས་ན་སེམས་ཀྱི་ཡང་ཞེས་པའོ། །གཞན་ཡང་ལ་ལ་ནཱ་སྤྲོ་བར་བྱེད་པ་པོ་
ནི། ཕལ་ཆེར་ཁུ་བ་འོག་ཏུ་འབབ་པའི་ཕྱིར་འོག་གི་སྒོ་སྟེ། དེས་རྣམ་པར་ཤེས་པ་ཁུ་བ་འོག་ཏུ་ལྟེ་བ་ཇི་སྲིད་པར་འཇུག་གོ །ར་ས་ནཱ་ནི་སྡུད་པ་མོ་ལ་ཕལ་ཆེར་གྱེན་དུ་ཁྲག་འབབ་པའི་ཕྱིར་སྟེང་གི་སྒོའོ། །འོན་ཀྱང་འདིར་གཙོ་བོའི་སྒོ་གཉིས་ཀྱི་རྣམ་པར་ཤེས་པ་ཉེ་བར་མཚོན་པ་ཉིད་ཀྱི་ཕྱིར་ཁམས་ལ་སོགས་པ་རྣམས་ཀྱང་ངོ༌། །ཁམས་རྣམས་ནི་ས་ལ་སོགས་པ་རྣམས་ཏེ། སྤྱན་མ་ལ་སོགས་པའི་བདག་ཉིད་ཀྱི་རྣམ་པར་སྣང་མཛད་སོགས་དེ་བཞིན་གཤེགས་པ་ལྔ་པོ་འོད་ཟེར་ལྔའི་རང་བཞིན་རྣམས་རབ་ཏུ་འཇུག་ཅིང་ངེས་པར་འབྱུང་ངོ༌། །འོན་ཀྱང་སྟེང་གི་སྒོར་རྣམ་ཤེས་ལ་སོགས་པ་རྣམས་གཡོ་བ་སྟེ་འཇིག་པའི་ངང་ཅན་ཉིད་ཀྱི་ཕྱིར་མི་བརྟན་པའོ། །གཡོ་ཞིང་མི་གནས་ཞེས་འདོན་པ་ལ་ནི་འཇིག་པའི་ངང་ཅན་ཉིད་ཀྱིས་ནི་མི་གནས་པ་རྣམས་སོ་ཞེས་པའི་དོན་ཏོ། །གང་གི་ཕྱིར་དེ་རྣམས་ཀྱི་འོག་ཏུ་ལྟེ་བའི་ཆུ་སྐྱེས་ལ་རྣམ་པར་གནས་ཤིང་སྟེང་དུ་འགྲོ་བ་ན་ནི་གཤེགས་སུ་གསོལ་བ་སྟེ། དེ་ལས་འཇིག་པ་ཁོ་ནའོ། །དེ་ལྟར་ཨ་བ་དྷཱུ་ཏཱི་རུ་ཡང་རླུང་འབར་པའི་དབང་ལས་སྤྲོས་པ་དང་སྡུད་པར་བྱེད་པ་འཇུག་པ་དང་འབྱུང་བ་དག་རིག་པར་བྱ་སྟེ། གོ་སླ་བའི་ཕྱིར་མ་གསུངས་པའོ། །ལྟེ་བའི་འོག་ཏུ་ཡང་ལ་ལ་ནཱ་དང་ར་ས་ནཱ་དང་ཨ་བ་དྷཱུ་ཏཱི་རྣམས་སུ་གོ་སྐབས་ཇི་ལྟ་བར་འཇུག་པ་དང་འབྱུང་བ་དག་ཤེས་པར་བྱ་སྟེ། ལྟེ་བའི་སྟེང་དང་འོག་ཏུ་དེ་རྣམས་དབྱེར་མེད་པའི་ཕྱིར་རོ། །གང་གསུངས་པ། ཟླ་བའི་ལམ་གྱིས་བཤང་བའི་རྩ། །ཉི་མས་གཅི་བ་འབབ་པ་སྟེ། སྐྱེ་འཆི་མཉམ་པ་ཆགས་པ་ལ། །སྒྲ་གཅན་གྱིས་ནི་ཁུ་བ་འབབ། །ལྟེ་བའི་ཆུ་སྐྱེས་སྙིང་མགྲིན་དང༌། །དཔྲལ་བ་གཙུག་ཏོར་འདམ་སྐྱེས་ལ། ས་ཆུ་མེ་རླུང་སྟོང་པ་རྣམས། །སྡུད་པ་ཡིས་ནི་རབ་ཏུ་འབབ། །འབྱུང་བྱེད་དེ་ནི་འཇུག་པ་ནི། །སྤྲོ་བས་འཇུག་སྟེ་ས་ལའོ། །པད་ལྟེ་ནས་ནི་པད་ལྟེའི་དབུས། །ཨ་ཝ་དྷཱུ་ཏཱིས་འགྲོ་དང་འོང༌། །ལྟེ་གསང་ནོར་བུའི་ཆུ་སྐྱེས་ལ། །ལུས་ངག་སེམས་རྣམས་འབབ་པ་ནི། །འབྱུང་དང་དེ་ནི་འཇུག་པ་དག །སྡུད་དང་
སྤྲོ་བའི་ངོ་བོ་ཅན། །ཞེས་སོ། །མཉམ་པ་ལ་སྟེ་སྣའི་བུ་ག་ངག་གང་ཡང་རུང་བར་འཕོ་བ་ནའོ། །ཆགས་པ་ལ་ནི་ཤེས་རབ་དང་སྦྱོར་བ་ལས་སོ། །སྒྲ་གཅན་ནི་སེམས་སོ། །སྟོང་པ་ནི་བདེ་བའོ། །དེ་ལྟར་གནས་པ་ནི་སེམས་དགུག་པ་འཇུག་པ་དང་གཤེགས་གསོལ་འབྱུང་བ་སྟེ། དེའི་རང་གི་ངོ་བོའི་འགྲོ་བ་ནི་ཉིན་མོ་དང་མཚན་མོར་རོ། །དེ་ལྟར་ན་ནི་དུས་གསུམ་པ་སྟེ་སྐྱེས་ནས་ཐིམ་པ་དང་སྐྱེ་བཞིན་པ་དང་སྐྱེ་བར་འགྱུར་བའི་སངས་རྒྱས་ཐམས་ཅད་དེ་རྣམ་པར་སྣང་མཛད་ལ་སོགས་པའི་འོད་ཟེར་གྱི་བདག་ཉིད་ཅན་རྣམས་དང༌། མཁའ་འགྲོ་མ་སྤྱན་མ་ལ་སོགས་པ་ས་ལ་སོགས་པ་སྦྱོར་བའི་བདག་ཉིད་ཅན་ཡིན་ཞིང་མ་མ་རྣམས་ཀྱང་སྟེ་གནས་སྐབས་ཀྱི་ཁྱད་པར་སྐྱེད་པའི་ཕྱིར་རོ། །དབུགས་རྔུབ་པ་དང་འབྱུང་བའི་རང་བཞིན་གྱིས་འཇུག་པ་ན་སྟེ་རབ་ཏུ་འཇུག་པ་ན་སྤྲོ་བས་རྒྱས་པ་ལ་སོགས་པའི་ཡོན་ཏན་རྣམས་ཀྱིས་བདེ་བའི་ངོ་བོ་རྣམས་དང༌། ལྡོག་པ་ན་སྟེ་ཕྱིར་འབྱུང་བ་ནས་ཁམས་ཟད་པ་ལ་སོགས་པའི་སྐྱོན་རྣམས་ཀྱིས་སྡུག་བསྔལ་གྱི་ངོ་བོ་རྣམས་ཏེ། སེམས་ཅན་རྣམས་ཐམས་ཅད་ཀྱིའོ། །ཅི་འགའ་ཞིག་ཁོ་ནས་འབད་པ་ལས་གྲུབ་པ་ཡིན་ནམ་ཞེ་ན་མ་ཡིན་ཏེ། གང་གི་ཕྱིར་ལྷན་ཅིག་སྐྱེས་པར་གནས་ཤིང་འགའ་ཞིག་གི་འབད་པ་མེད་པར་ཡང་སྔ་མའི་ལས་ཀྱི་སྤྲུལ་པ་ལས་འགྲུབ་པ་སྟེ་རྫོགས་པ་རྣམས་སོ། །འདི་ནི་རྫོགས་པའི་རིམ་པ་ལ་ལྷན་ཅིག་སྐྱེས་པར་གྲུབ་པའི་རྡོ་རྗེ་བཟླས་པ་གསུངས་སོ། །འདི་ཡང་འདིར་ཁྱད་པར་དང་བཅས་པའི་སྡུད་པའི་དོན་ཏེ། འདིར་ལུས་ལ་རླུང་འབྱུང་བ་ནི་སྟེང་གི་སྒོར་བརྗོད་ཅིང༌། འཇུག་པ་ནི་འོག་གི་སྒོ་སྟེ་དེ་ལ་ཞོན་པའི་སེམས་འགྲོ་བ་དང་འོང་བའི་ཐབས་ཉིད་ཀྱི་ཕྱིར་རོ། །སྒོ་གཉིས་ཀ་ཡང་འཁྲུལ་འཁོར་དུ་བྱ་བ་ཉིད་ཀྱི་ཕྱིར་འཁྲུལ་འཁོར་དངོས་སྟེ། དེ་དང་ལྡན་པའི་ཕྱིར་གཞན་ནི་ཉེ་བར་བརྟགས་པའོ། །དེ་ཡང་རྣམ་པ་གསུམ་སྟེ་ལུས་ལ་སོགས་པའི་དབྱེ་བ་ལས་སོ། །དེ་ལ་སེམས་ཀྱི་སྒོ་ཡང་དག་པར་རྒྱུ་བའི་རླུང་ནི་སྒོ་དངོས་སོ། །རླུང་གི་ནི་ལུས་ཀྱི་བ་སྤུའི་བུ་ག་སྒོ་དགུར་རགས་པ་
རྣམས་ཏེ། དེའི་དབང་ལས་སྒོ་གཉིས་ཀྱི་ངོ་བོའི་རླུང་ཡང་སེམས་ཀྱི་སྒོ་ལུས་ཀྱི་བུ་ག་རྣམ་པ་དགུར་བརྗོད་དོ། །བུ་ག་རྣམས་ཀྱང་སེམས་ཀྱི་ཡང་ངོ༌། །དེ་བཞིན་དུ་ལ་ལ་ནཱ་འམ་ཨ་ཝ་དྷཱུ་ཏཱིར་ཡང་དག་རྒྱུ་བའི་སྒོ་གཉིས་ཀྱི་བདག་ཉིད་ཀྱང་དཀྱིལ་འཁོར་བཞིའི་ངོ་བོ་ཉིད་ཀྱིས་ན་སེམས་ཀྱི་སྒོ་རྣམ་པ་བཞི་སྟེ། ངག་རྣམས་ཀྱི་ཡང་རྒྱུ་ཉིད་ཀྱི་ཕྱིར་ངག་གི་བའོ། །དེ་ཁོ་ན་དཀྱིལ་འཁོར་གྱི་དབྱེ་བ་དང་ངག་གི་རྒྱུད་ཉིད་དུ་བརྗོད་པར་མི་འདོད་པས་སེམས་ཁོ་ནའི་སྒོ་རྣམ་པ་གཉིས་སོ་ཞེས་པ་ཡིད་ཀྱི་བའོ། །ལ་ལ་ནཱ་དང་ར་ས་ནཱ་དག་ནི་རིམ་པ་ཇི་ལྟ་བར་ཕལ་ཆེར་ཁུ་བ་དང་རྡུལ་དག་འོག་དང་སྟེང་དུ་འབབ་པའི་ཕྱིར་འོག་དང་སྟེང་དུ་ཡིད་ཀྱི་བའི་སྒོ་ཉིད་དུ་བརྗོད་དོ། །ཇི་ལྟར་ལ་ལ་ནཱ་ཁྲག་ཅུང་ཟད་འདྲེས་ཤིང་ཤས་ཆེར་ལུས་དང་སྙིང་སྟོབས་ཞེས་བྱ་བ་དང་ཟླ་བ་འབབ་པའི་ཕྱིར་ལུས་ཀྱི་དང་སྙིང་སྟོབས་ཀྱི་དང་ཟླ་བའི་དང་ཐབས་ཀྱི་རྩ་ཞེས་ཐ་སྙད་བྱ་སྟེ་ལམ་དུ་ཡང་ངོ༌། །ར་ས་ནཱ་ནི་ཅུང་ཟད་ཁུ་བ་དང་ཤས་ཆེར་ངག་ཅེས་བྱ་བ་དང་རྡུལ་དང་ཉི་མ་འབབ་པའི་ཕྱིར་ངག་གི་དང་རྡུལ་གྱི་དང་ཉི་མའི་དང་ཤེས་རབ་ཀྱི་རྩ་ཞེས་པར་ཏེ་ཕལ་ཆེར་རོ། །ཨ་ཝ་དྷཱུ་ཏཱི་ནི་ཤས་ཆེར་ཁུ་ཁྲག་དང་སེམས་དང་མུན་པ་དང་སྒྲ་གཅན་འབབ་པའི་ཕྱིར་སེམས་ཀྱི་དང་མུན་པའི་དང་སྒྲ་གཅན་གྱི་དང་མ་ནིང་གི་རྩ་ཞེས་པར་རོ། །རེ་རེ་ལ་བཤད་པའི་ཡིད་ཀྱི་བའི་སྒོ་གཉིས་མེད་པ་ནི་མ་ཡིན་ཏེ། རྡོ་རྗེ་བཟླས་པ་རྩ་གསུམ་རྣམས་ལ་ཡང་རྣམ་པ་མང་པོར་བསྟན་པའི་ཕྱིར་རོ། །ལ་ལ་ནཱ་དང་ར་ས་ནཱ་དང་ཨ་ཝ་དྷཱུ་ཏཱི་རྣམས་ཀྱི་རླུང་རྣམས་ཀྱང་རིམ་པ་ཇི་ལྟ་བར་ཟླ་བ་དང་ཉི་མ་དང་སྒྲ་གཅན་རྣམས་སོ་ཞེས་རྣམ་པར་གཞག་པར་བྱའོ། །དེ་ལ་གང་གི་ཚེ་ལ་ལ་ནཱ་དང་ར་ས་ནཱ་དང་ཨ་ཝ་དྷཱུ་ཏཱི་རྣམས་ཀྱི་རླུང་སྣ་བུག་དག་ནས་འབབ་པ་དེའི་ཚེ་སྤྲུལ་པའི་འཁོར་ལོའི་རྩ་འདབ་དྲུག་ཅུ་རྩ་བཞི་རྣམས་སུ་སོ་སོར་དབྱུ་གུ་རེ་རེ་སྟེ། དབུགས་ཕྱེད་དང་བཅས་པའི་སུམ་ཅུ་རྩ་བདུན་ལྷག་པའི་བརྒྱ་ཕྲག་གསུམ་རྣམས་སུ་དབྱུ་གུ་རྣམ་པར་གཞག་པས་སོ། །གང་བརྟག་པ་གཉིས་པར་གསུངས་པ། དབྱུ་གུ་དྲུག་ཅུ་རྩ་བཞི་རྣམས་དང༌།
ཞེས་སོ། །བདེ་བ་ཆེན་པོའི་འཁོར་ལོར་རྩ་སུམ་ཅུ་རྩ་གཉིས་རྣམས་སུ་སོ་སོར་དབྱུ་གུ་གཉིས་ཀྱི་བདག་ཉིད་ཀྱི་ཆུ་ཚོད་དོ། །ལོངས་སྤྱོད་རྫོགས་པའི་འཁོར་ལོར་རྩ་འདབ་བཅུ་དྲུག་རྣམས་ལ་སོ་སོར་ཆུ་ཚོད་གཉིས་ཀྱི་བདག་ཉིད་ཀྱི་ཐུན་ཕྱེད་དོ། །དེ་བརྟག་པ་གཉིས་པར་གསུངས་པ། འཕོ་བ་བཅུ་དྲུག་རྣམས་དང་ཞེས་སོ། །ལྟེ་བའི་འཁོར་ལོའི་རྩ་བརྒྱད་རྣམས་ལ་བཞིན་དུ་ཆོས་ཀྱི་འཁོར་ལོའི་རྩ་བརྒྱད་རྣམས་ལ་སོ་སོར་ཐུན་ཚོད་ཕྱེད་པ་གཉིས་ཀྱི་བདག་ཉིད་ཀྱི་ཐུན་ཚོད་དོ། །གཙུག་ཏོར་གྱི་འཁོར་ལོའི་རྩ་བཞི་རྣམས་ལ་བཞིན་དུ་ལྟེ་བའི་ཆུ་སྐྱེས་ཀྱི་རྩ་བཞི་རྣམས་ལ་སོ་སོར་ཐུན་ཚོད་གཉིས་སོ། །སྤྲུལ་པའི་འཁོར་ལོའི་དཀྱིལ་འཁོར་དང་པོ་ལ་རྩ་བཞིའོ། །གཉིས་པ་རྩ་བརྒྱད་དེ། རབ་ཏུ་བྱེད་པ་བཞི་པར་ཇི་སྐད་བཤད་པ་བཞིན་ནོ། །གསུམ་པ་རྩ་བཅུ་དྲུག་པ་སྟེ། དེ་མངོན་པར་བརྗོད་པ་བླ་མའི་རྒྱུད་དུ་གསུངས་པ། ལྟེ་བའི་དབུས་སུ་པད་མཆེ། །སྐུད་པ་བཅུ་དྲུག་ཐིག་བྱས་པའོ། །ཞེས་སོ། །བཞི་པ་ལ་རྩ་དྲུག་ཅུ་རྩ་བཞི་པའོ། །ཐུན་ཚོད་བརྒྱད་རྣམས་དང་དུས་སྦྱོར་བཅུ་གཉིས་རྣམས་ཉིན་མཚན་ནོ། །དེ་ལ་ལ་ལ་ནཱ་ནས་སམ་ར་ས་ནཱ་ནས་བྱུང་བའི་རླུང་སྣ་བུག་གཅིག་ཏུ། དབུགས་དྲུག་ཅུ་ལྷག་པའི་བརྒྱ་ཕྲག་གསུམ་རྣམས་ཀྱི་དབྱུ་གུར་རྣམ་པར་གཞག་པས་དབྱུ་གུ་ལྔའི་བདག་ཉིད་ཀྱི་དུས་སྦྱོར་གཅིག་རྒྱུན་མ་ཆད་པར་འབབ་པོ། །དེའི་རྗེས་སུ་སྣ་བུག་གཉིས་པར་ཡང་དེ་བཞིན་ནོ་ཞེས་པ་དུས་སྦྱོར་བཅུ་གཉིས་རྣམས་དབྱུ་གུ་དྲུག་ཅུ་རྣམས་སུ་འགྱུར་རོ། །དེ་སྐད་དུ་ཡང་གདན་བཞི་པར་གསུངས་པ། སུམ་བརྒྱ་དེ་བཞིན་དྲུག་ཅུ་ནི། །དབྱུ་གུའི་དབུགས་ཏེ་ཆུ་ཚོད་བཞིན། །ཆུ་ཚོད་དྲུག་ཅུའི་གྲངས་ཀྱིས་ནི། །ཉིན་དང་མཚན་མོའི་གཟུང་བར་བྱ། །ཞེས་སོ། འདིར་ཆུ་ཚོད་དང་ནཱ་ཌི་ནི་དབྱུ་གུ་ཁོ་ནའོ། །ཆུ་ཚོད་ཀྱི་དབུགས་རྣམས་གཟུང་བར་བྱའོ། །དགོངས་པ་ལུང་སྟོན་པ་ལ་སོགས་པ་རྣམས་སུ་ནི་དུས་སྦྱོར་ཕྱེད་ཁོ་ན་ཐུན་ཚོད་ཕྱེད་དུ་རྣམ་པར་གཞག་གོ །དེ་ལ་ཐུན་ཚོད་ཕྱེད་ལས་དང་ཆུ་དང་མེ་དང་རླུང་གི་དཀྱིལ་འཁོར་བཞི་པོ་སོ་སོར་དབུགས་ཉིས་བརྒྱ་ཉི་ཤུ་རྩ་ལྔའི་བདག་ཉིད་
ཅན་རྣམས་འབབ་ཅིང༌། བཟླས་ནས་ཀྱང་སླར་ཡང་ཐུན་ཚོད་ཕྱེད་ལ་བཞི་རྣམས་བུ་ག་གཅིག་ཏུ་སྟེ། དེའི་རྗེས་སུ་བུ་ག་གཞན་དུའོ་ཞེས་པས། ཐུན་ཚོད་ཕྱེད་པ་ཉི་ཤུ་རྩ་བཞི་རྣམས་ལ་དཀྱིལ་འཁོར་བཞི་རྣམས་ཀྱིས་ཡོངས་སུ་བསྐོར་བ་ཡོངས་སུ་རྒྱུ་བ་རྣམས་ཉི་ཤུ་རྩ་བཞིར་འགྱུར་རོ་ཞེས་པའི་ཉིན་མཚན་གྱིས་སོ། །ནང་དུ་མ་རིག་པ་ལ་སོགས་པའི་ཡན་ལག་གི་དབྱེ་བས་དུས་སྦྱོར་དང་འཕོ་བ་རྣམས་བཅུ་གཉིས་ཁོ་ན་སྟེ། ཇི་ལྟར་ཕྱི་རོལ་དུ་ཉི་མའི་ལོ་གཅིག་བཞིན་ནོ། །དུས་ཀྱི་འཁོར་ལོར་ནི་འཇུག་པ་དང་འབྱུང་བའི་རླུང་དབུགས་གཅིག་ཏུ་བགྲང་བར་བྱ་སྟེ། དབུགས་དྲུག་ལ་ཆུ་སྲང་ངོ༌། །ཆུ་སྲང་དྲུག་ཅུ་རྣམས་དབྱུ་གུའོ། །དབྱུ་གུ་གཉིས་པ་ལ་ཡིད་ཙམ་མོ། །རྐང་པས་དམན་པའི་དབྱུ་གུ་བཞི་ལ་དབྱུ་གུ་ཐུན་ཕྱེད་དོ། །དབྱུ་གུ་ལྔ་རྣམས་དུས་སྦྱོར་རོ། །ཕྱེད་དང་བཅས་པའི་དུས་སྦྱོར་ནི་ཐུན་ཚོད་དོ། །ཐུན་ཚོད་གཉིས་ལ་ཐུན་མཚམས་སོ། །ཐུན་མཚམས་བཞི་རྣམས་དང་དུས་སྦྱོར་བཅུ་གཉིས་རྣམས་ཉིན་མཚན་ཏེ། དུས་སྦྱོར་སོ་སོ་ལ་བུ་ག་གཞན་དུ་འཕོ་བ་ལས་དུས་སྦྱོར་དང་འཕོ་བ་རྣམས་བཅུ་གཉིས་སོ། །འཕོ་བ་སོ་སོའི་འཕོ་བའི་མཚམས་སུ་ཨ་ཝ་དྷཱུ་ཏཱི་ནས་དབུགས་རྐང་པ་དང་བཅས་པ་ལྔ་བཅུ་རྩ་དྲུག་སྣ་བུག་གཉིས་དག་ལས་ཅིག་ཅར་འབབ་སྟེ། ཉིན་མཚན་གྱིས་བདུན་ཅུ་རྩ་ལྔ་ལྷག་པའི་དྲུག་བརྒྱ་རྣམས་སོ། །ལྷག་མ་རྣམས་ལ་ལ་ལ་ནཱ་དང༌། ར་ས་ནཱ་དག་ཏུ་སྟེ། རྐང་བ་དང་བཅས་པའི་དགུ་བརྒྱ་ལྷག་པའི་སྟོང་ཕྲག་ཉི་ཤུའི་གྲངས་རྣམས་སུ་རྣམ་པར་གཞག་གོ་ཞེས་ཁ་གཅིག་གོ །གཞན་རྣམས་ནི་དབུགས་བརྒྱ་ཕྲག་ཕྱེད་དང་བཅས་པའི་བཅུ་གསུམ་རྣམས་ཀྱིས་ཐུན་ཚོད་ཕྱེད་དུ་རྣམ་པར་གཞག་པས་ཐུན་ཚོད་ཕྱེད་པ་སོ་སོ་ལ་ལོངས་སྤྱོད་ཀྱི་འཁོར་ལོའི་རྩ་རྣམས་ལ་བཞིན་དུ་བུ་ག་གཞན་དུ་ཡང་དག་པར་རྒྱུ་བའི་ཕྱིར་འཕོ་བ་བཅུ་དྲུག་རྣམས་ཏེ། སྣ་བུག་དག་ཏུའོ། །འཕོ་བ་བཅུ་གཉིས་སུ་རྣམ་པར་གཞག་པ་ནི། དབུགས་བརྒྱ་ཕྲག་བཅོ་བརྒྱད་བུ་ག་གཅིག་ཏུ་རྒྱུ་བ་སྟེ། ས་དང་ཆུ་དང་མེ་དང་རླུང་དང་ནམ་
མཁའི་དཀྱིལ་འཁོར་ལྔ་རྣམས་སོ་སོར་རྒྱུ་བ་བཞིན་དང༌། རིམ་པ་ཇི་ལྟ་བར་འོག་དང་གཡོན་དང་གཡས་དང་སྟེང་དང་དབུས་རྣམས་སུ་རྒྱུ་བ་བཞིན་དང༌། མགྲིན་པ་དང༌། སྤྱི་བོའི་རྩའི་གྲངས་བཟློག་པ་བཞིན་དང་སོ་སོར་དྲུག་ཅུ་ལྷག་པའི་སུམ་བརྒྱའི་དབུགས་ཀྱི་བདག་ཉིད་ཅན་གྱི་དབྱུ་གུ་དྲུག་ཅུ་རྣམས་ཀྱིས་ཉིན་མཚན་ཉིད་ཀྱིས་ན། ལྟེ་བའི་ཆུ་སྐྱེས་ཀྱི་ཟླུམ་པོ་བཞི་པ་ལ་སྟོང་པའི་རྩ་བཞི་རྣམ་པར་གཞག་པ་བཞིན་དུ་ཉི་མའི་ཤིང་རྟ་ལ་སོགས་པའི་གདུལ་བྱའི་དོར་དྲང་བའི་དོན་ཡིན་གྱི་ངེས་པའི་དོན་ནི་མ་ཡིན་ནོ། །ལྟེ་བའི་ཆུ་སྐྱེས་ཀྱི་ཟླུམ་པོ་གསུམ་པ་ལ་རྩ་བཞི་སྤངས་ནས་རྩ་བཅུ་གཉིས་རྣམས་སུ་དུས་སྦྱོར་དང་འཕོ་བ་བཅུ་གཉིས་རྣམ་པར་གཞག་པ་ན། ཅི་ལྟར་ཕྱི་རོལ་དེ་བཞིན་ནང༌། །ཞེས་པ་ཡང་ལེགས་པར་གནས་སོ། །འདི་ནི་ཐམས་ཅད་དུ་འདོད་པ་ཡང་མ་ཡིན་ནོ་ཞེས་གསུང་ངོ༌། །ཐམས་ཅད་འདོད་པ་ནི་རྩ་གསུམ་རྣམས་སུ་ཉིན་མཚན་ཉིད་གྱིས་དྲུག་བརྒྱ་ལྷག་པའི་སྟོང་ཕྲག་ཉི་ཤུ་རྩ་གཅིག་གི་དབུགས་རྣམས་སུ་འགྱུར་རོ་ཞེས་པའོ། །དེ་ལྟར་ཡང་རྫོགས་པའི་རིམ་པ་ལ་ལྟོས་པས་སྟོང་པ་ཉིད་དང་སྙིང་རྗེ་དང་དབྱེར་མེད་པའི་ངོ་བོའི་སྔགས་དང་དབྱེར་མེད་པ་ཉིད་ཀྱི་ཕྱིར་སྔགས་ཟློས་པ་ཡང་རྫོགས་པར་གྲུབ་པ་ལྷན་ཅིག་སྐྱེས་པ་གནས་ཞེས་པའི་མཐར་ཐུག་པས་གསལ་བར་བྱས་སོ། །དེ་གསུངས་པ། ཁྲི་ཕྲག་གཉིས་དང་སྟོང་ཕྲག་དང༌། དེ་བཞིན་ཁོ་ནར་བརྒྱ་ཕྲག་དྲུག །རྣལ་འབྱོར་དབང་པོ་ཉིན་མཚན་དུ། །བཟླས་བརྗོད་ཀྱིས་ནི་གྲངས་བྱེད་དོ། །ཞེས་སོ། །དེ་ལྟར་རིག་པ་བཟླས་པའི་སེམས་བརྟན་པ་ན་འདོད་ཆགས་ལ་སོགས་པ་སེམས་ཀྱི་རང་བཞིན་རྣམས་ངེས་སུ་འཇུག་ཅིང༌། ལ་ལ་ནཱ་དང་ར་ས་ནཱ་དག་ཡོངས་སུ་དོར་ནས་ཨ་ཝ་དྷཱུ་ཏཱི་རུ་ཞུགས་པའི་རླུང་ནི་ཕྱིར་འབྱུང་བ་མེད་ཅིང་ཉིན་མཚན་གྱི་ཚུལ་མེད་པ། ཟླ་བ་དང་ཉི་མ་ཟིན་པའི་སྒྲ་གཅན་བཞིན་དུ་རིམ་གྱིས་ཀྱང་འགགས་པ་ནི་ཡོན་ཏན་སྐྱེད་པར་བྱེད་དོ། །གང་གསུངས་པ། ཟླ་བ་ཉི་མའི་རྩ་འགགས་ན། །བཤད་དང་གཅི་བའི་རྩ་དག་འགག །སྒྲ་གཅན་རྩ་ནི་འགགས་པ་ན། །འོག་ཏུ་ཁུ་བ་འབབ་འགག་འགྱུར། །
དབུ་མར་སྲོག་ནི་ཉིན་མཚན་དུ། །ཞུགས་པས་ནད་རྣམས་འཕྲོག་པར་བྱེད། །སྲོག་ནི་ཚེས་ཀྱི་ཉིན་བཅིངས་པ། །འདིས་ནི་མཁའ་ལ་སྤྱོད་ཉིད་སྟེར། །ཟླ་གཅིག་སྙིང་ལ་གནས་གསང་བས། །རྣལ་འབྱོར་བ་ལ་འཆི་མེད་ཉིད། །ཟླ་བ་དྲུག་ཏུ་ལྟེ་པར་བསྲེགས། །དེས་ནི་ཐམས་ཅད་མཁྱེན་ཉིད་སྟེར། །དཔྲལ་བ་མགྲིན་པའི་འཁོར་ལོ་དང༌། སྙིང་ག་ལྟེ་བར་རིམ་ཇི་བཞིན། །འདི་ནི་བརྒྱལ་དང་འདི་བཞིན་བཅིངས། །བསད་དང་བསྲེགས་པའོ་མི་རྣམས་ཀྱི། །སྲོག་དང་ཐུར་སེལ་འགོག་པ་ཡིས། །འདོད་ཆགས་བྲལ་པ་ཉིད་དུ་འདོད། །དེ་བཞིན་སངས་རྒྱས་ཉིད་དུ་ནི། །གཉིས་བསྲེགས་པ་ཡིས་སྔགས་མཁན་འགྱུར། །སྲོག་དང་ཐུར་སེལ་ཟད་ཁོ་ནས། །ཡན་ལག་བཅུ་གཉིས་ཟད་པར་འགྱུར། །རྒྱུ་དང་འབྲས་བུ་འགོག་པ་ཡིས། །སངས་རྒྱས་མི་འགྱུར་སུ་ཞིག་ཡིན། །ཞེས་སོ། །རླུང་བཀག་པ་ན་ནི་གཏུམ་མོ་རང་བཞིན་གྱིས་འབར་ཏེ། ཟླ་བ་དེས་གདུངས་པ་ཡང་འཛག་གོ །དེ་ལས་བདེ་བ་ཆེན་པོའི་རང་བཞིན་རྫོགས་པའི་དཀྱིལ་འཁོར་མངོན་དུ་འགྱུར་རོ། །བྱང་ཆུབ་སེམས་ཀྱང་མི་གཡོ་ཞིང༌། །སྲིད་པ་དང་མྱ་ངན་ལས་འདས་པ་ལ་མི་གནས་པ་སྤྲུལ་པའི་འཁོར་ལོ་ལ་སོགས་པ་རྣམས་སུ་ཉེ་བར་བསགས་པ་ཕུལ་དུ་བྱུང་བ་མཆོག་དང་རབ་མཆོག་ལ་སོགས་པའི་རིམ་གྱིས་དཔྲལ་བ་ནས་རྡོ་རྗེ་ནོར་བུའི་མཐར་ཐུག་པ་བར་མ་ཆད་པ་ནི་སྟོང་པ་ཉིད་དང་སྙིང་རྗེ་དབྱེར་མེད་པ། རིམ་གྱིས་འཕེལ་བ་ཉེ་བར་བགྲོད་ཅིང་བདེ་བ་ཆེན་པོའི་འཁོར་ལོའི་རྩ་སུམ་ཅུ་རྩ་གཉིས་སུ་ཁྱབ་པར་བྱེད་དོ། །དེ་ལས་གཞན་རྣམས་ཏེ། ཇི་སྲིད་རྩ་སྟོང་ཕྲག་བདུན་ཅུ་རྩ་གཉིས་པོ་རྣམས་ཀྱི་བར་རོ་ཞེས་པ་སྟེ། རབ་ཏུ་དགའ་བ་ལ་སོགས་པས་རྣམས་གསལ་བར་འགྱུར་བའི་ཕྱིར་ཞེས་རྡོ་རྗེ་འཛིན་པ་ཉིད་དུ་མི་འདོད། །བསྐྱེད་པའི་རིམ་པ་ལ་ནི་དཀྱིལ་འཁོར་ཆེན་པོའི་རྣལ་འབྱོར་གྱིས་རྡོ་རྗེ་བཟླས་པ་སྔར་བཤད་ཟིན་ཏོ། །འོན་ཀྱང༌། །སྒོམ་པ་ཡི་ནི་བར་ཆད་ཅན། །རྣལ་འབྱོར་ཕྱི་རོལ་བཟླས་པ་སྤང༌། །སྔགས་དོན་བཅོམ་ལྡན་རྡོ་རྗེ་ཅན། །རྡོ་རྗེའི་
བདག་ཉིད་ཅི་ལྟར་བཟླས། ཤེ་ན། གང་རྣམས་བཟླས་པ་འདི་མི་ནུས་པའི་སྔགས་པ་བྱིས་པའི་བློ་ཅན་ཏེ། དེ་རྣམས་ཁོ་ན་བགྲང་ཕྲེང་གིས། །རབ་ཏུ་བརྗོད་པ་རབ་བསྟན་ཏེ། །སྔགས་པ་བསོད་ནམས་ཐོབ་བྱེད་དུ། །ཕྱིའི་ངག་མངོན་པར་འདོད་རྣམས་ལའོ། །དེ་ལྟར་རྡོ་རྗེ་བཟླས་པ་ལ་ཡང་སེམས་ཀྱི་རང་བཞིན་རྣམས་ངེས་པར་བྱས་ཏེ། །ཇི་ལྟར་རིགས་པར་སྤངས་ཤིང་བླངས་ནས་ཤིན་ཏུ་གོམས་པ་ལས་རླུང་འགགས་པ་ན་སྔར་བཞིན་དུ་ཡོན་ཏན་རྣམས་སུ་འགྱུར་རོ་ཞེས་པའོ། །ཉེ་བར་སྡུད་པ། །འདི་སྐད་ཅེས་པ་ལ་སོགས་པའོ། །བདེ་བ་ཆེན་པོའི་ཁྱད་པར་གྱིས་ནི་འདི་ལྟར་གོམས་པའི་ཕྱིར་བདེ་བ་ཆེན་པོའི་རང་བཞིན་རྡོ་རྗེ་འཛིན་པ་འགྲུབ་པ་ཞེས་གསལ་བར་བྱེད་དོ། །བསམ་གཏན་ལ་སོགས་པ་རྒྱས་པར་བསྟན་པའི་ཆེད་དུ་གསོལ་བ་འདེབས་པ། དེ་ནས་ཞེས་པ་ལ་སོགས་པའོ། །ཁྱོད་ཀྱི་ནི་ཉིད་ཀྱིའོ། །ཅི་ལྟར་ཏེ་བྱ་བའི་ཁྱད་པར་ཅི་ལ་བརྟེན་ནས་མི་ཕྱེད་མ་ལ་སོགས་པའི་རྩ་རྣམས་འབྱུང༌། །དེ་རྣམས་ཀྱི་རྩ་དེ་རྣམས་ཀྱིའོ། །དེ་རྣམས་ལ་པུ་ལླི་ར་ལ་སོགས་པའི་གནས་ཇི་སྐད་བཅུ་བདུན་པར་གསུངས་པ་དང༌། དེ་བཞིན་འཁོར་ལོ་དགོད་པ་དང་གཞན་ས་ལ་སོགས་པའི་རྣམ་བ་ཇི་ལྟར་ལགས། །གསང་བ་ནི་ཉན་ཐོས་ལ་སོགས་པ་ལ་གསལ་བར་མི་བྱ་བའི་ཕྱིར་ཕྱིའི་གནས་ལ་སོགས་པའོ། །ཤིན་ཏུ་གསང་བ་ནི་དེ་ལྷའི་དཀྱིལ་འཁོར་འཁོར་ལོར་རོ། །མཆོག་ནི་ཆེས་གསང་བ་སྟེ་ལུས་ལའོ། །ཅི་ཞེ་ན། རྩའི་ངོ་བོ་མཁའ་འགྲོ་མ་རྣམས་དང་གནས་ལ་སོགས་པ་རྣམས་དང་ས་བཅུ་རྣམས་དང་ཕ་རོལ་ཏུ་ཕྱིན་པ་བཅུ་རྣམས་ཏེ། དེ་རྣམས་ཀྱི་ཁོ་ན་ཉིད་ཉི་ཤུ་རྩ་བཞིར་བཅུ་བདུན་པར་གསུངས་པར་གྱུར་པ་སྟེ། །འདིར་ནི་རབ་ཏུ་རྣམ་པར་ཕྱེ་ནས་བཤད་པར་བྱའོ། །དང་པོར་རྟེན་ཉིད་ཀྱི་ཕྱིར་མགོ་ཞེས་པ་ལ་སོགས་པས་དྲི་བ་བཞི་པའི་ལན་གྱིས་སོ། །རྒྱབ་ཀྱི་སྟོད་ནི་རྒྱབ་ཀྱི་དབུས་ལས་སྟེང་གི་སྒལ་ཚིགས་ཀྱི་སྟེང་གི་ཆ་སྟེ། མགོ་བོའི་རྒྱབ་ཅེས་པའི་དོན་ཏོ། །སྨིན་མ་མིག་དག་དབུས་གནས་པ། །ཞེས་པ་སྨིན་མ་དག་གི་དང་མིག་དག་གི་དབུས་ན་གནས་པའི་ཆའོ། །
མིག་དག་གི་ཞེས་པ་མིག་གཉིས་ནི་དེ་ཝཱི་ཀོ་ཊའོ། །ཐུགས་ཀྱི་འཁོར་ལོར་ཞེས་པ་མགོ་བོ་ལ་སོགས་པ་རྣམས་དང་མ་ལ་ཡ་ལ་སོགས་པ་ནང་དང་ཕྱིའི་ཡུལ་རྣམས་སེམས་ཀྱི་རང་གི་ངོ་བོར་ཐ་སྙད་བྱས་སོ། །ནམ་མཁའ་ནི་སྟོང་པ་ཉིད་དང་རོ་གཅིག་པ་སེམས་ཏེ་རབ་ཏུ་གྲགས་པའི་ནམ་མཁའ་ཡང་ངོ༌། །གཞན་གྱི་དོན་དུ་དེ་ལ་སྤྱོད་པའི་ངང་ཚུལ་ཅན་མཐོ་རིས་སུ་སོན་པའི་རྡོ་རྗེ་ལྷ་མོ་རྣམས་ཀྱིའོ། །ཆུ་སོ་ནི་ས་བོན་གྱི་སྦུབས་གཉིས་སོ། །ཡུལ་རྣམས་ཐམས་ཅད་ནི་ཀཱ་མ་རཱུ་པ་ལ་སོགས་པ་རྣམས་ཏེ། མཆན་ཁུང་ལ་སོགས་པ་རྣམས་ཀྱང་ངོ༌། །ས་ནི་ས་གཞི་སྟེ་ངག་གི་ཐ་སྙད་ཀྱི་རྟེན་ཉིད་ཀྱི་ཕྱིར་རོ། །དེ་ལ་སྤྱོད་པ་མི་ཡུལ་མ་རྣམས་ཀྱིའོ། །རྟགས་ནི་རྡོ་རྗེའོ། །སོར་མོ་ཞེས་པ་རྐང་པ་ལ་སོགས་པའི་སོར་མོ་རྣམས་སོ། །མཐེ་བོང་ནི་རྐང་པ་ལ་སོགས་པའི་མཐེ་བོང་གཉིས་སོ། །མཁའ་འགྲོ་མ་རྣམས་ཀྱིས་ནི་སྐུའི་འཁོར་ལོ་ལ་རྣམ་པར་གནས་པ་རྣམས་ཀྱིས་ཏེ་ས་འོག་ལ་སྤྱོད་མ་རྣམས་ཀྱིས་བརྗོད་ཅིང་བདག་ཉིད་བདེ་བར་བྱ་སྟེ། ཁྱབ་ཅེས་པའི་བར་རོ། །ཡུལ་རྣམས་ཞེས་པ་མ་ལ་ཡ་ལ་སོགས་པ་འཛམ་བུ་གླིང་དང་འབྲེལ་བ་རྣམས་ཏེ། འདི་ནི་ལས་ཀྱིས་ཡིན་རྩི་གླིང་ཅིག་ཤོས་རྣམས་ནི་མ་ཡིན་ནོ། །གསེར་གླིང་ནི་འཛམ་བུའི་གླིང་གི་ནང་དུ་གཏོགས་སོ། །ལས་ཀྱིས་ཀྱང་སེམས་ཅན་རྣམས་ཀྱི་དངོས་གྲུབ་རྣམས་སོ་ཞེས་པས་རྣལ་འབྱོར་མ་རྣམས་ཕལ་ཆེར་གཞན་དུ་རྒྱུ་བ་མ་ཡིན་ནོ། །རང་གི་ལུས་སྐྱེས་ཞེས་པ། གང་གི་ཕྱིར་སེམས་ཅན་སོ་སོ་ལ་རང་གི་ལུས་འཛམ་བུ་གླིང་ཡིན་པ་དེའི་ཕྱིར་གསུངས་པ། རང་ཉིད་ཅེས་པའོ། །རང་དང་འདྲ་བའི་ཕྱི་རོལ་ནི་རང་ཉིད་ཕྱི་རོལ་ཏེ་འཛམ་བུ་གླིང་ངོ༌། །ནང་ཡང་སྟེ་ལུས་ཀྱི་བདག་ཉིད་དེ། དེ་ལ་གནས་པ་སྟེ། རང་གི་སེམས་ཀྱི་སྣང་བ་ཙམ་སྒྱུ་མའི་རང་བཞིན་འགྲོ་བའོ་ཞེས་དགོངས་པའོ། །འདི་ཉིད་ཀྱི་ཕྱིར་འདི་རྣམས་སུ་སྟེ་རང་བཞིན་གྱི་འཁོར་ལོ་གསུམ་དུ་རྣམ་པར་གཞག་པ་རྣམས་སུ་རྡོ་རྗེ་ལྷ་མོ་རྣམས་བཞུགས་པའོ། །རྩའི་གཟུགས་ཀྱིས་ཞེས་གསུངས་པ་ནི་དྲི་བ་ལྔ་པའི་ལན་ཏེ། རྩའི་ངོ་བོ་རྣམས་ཀྱང་ལྷ་མོ་སྟེ་ཕྱག་ལ་སོགས་པ་རྣམས་དང་ལྡན་པ་ལྷ་མོའི་གཟུགས་
རྣམས་ཀྱང་རྩའོ་ཞེས་ཁྱད་པར་མེད་པ་རྟོག་པར་བྱེད་པ་ལྷུར་ལེན་པའོ། །ས་རྣམས་ཕ་ཏོལ་ཏུ་ཕྱིན་པ་རྣམས་ནི། གནས་ནི་རབ་ཏུ་དགའ་བའི་ས། །ཞེས་པ་ལ་སོགས་པ་བཅུ་བདུན་པར་གསུངས་པའི་རྗེས་སུ་འབྲང་བས་མ་ལ་ཡ་ལ་སོགས་པ་རྣམས་ལ་རྣམ་པར་གཞག་པ་གོ་སླའོ་ཞེས་པས་འདིར་རྒྱས་པར་མ་བསྟན་ཏོ་ཞེས་པའོ། །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱ་ཆེར་འགྲེལ་པ། མན་ངག་གི་སྙེ་མར་སྙེ་མ་ཉི་ཤུ་གཅིག་པའོ།། །།