སྙེ་མ་ཉེར་གསུམ་པ། རྫོགས་པའི་རིམ་པའི་དཀྱིལ་འཁོར་དང་སྦྱིན་སྲེག་དང་མཆོད་པ་ལ་སོགས་པ་རྒྱས་པར་བཤད་པ།
ཤེས་རབ་མཆོག་གི་རྫོགས་པའི་རིམ་པའི་དཀྱིལ་འཁོར་ལ་སོགས་པ་རྒྱས་པར་བསྟན་པའི་ཆེད་དུ་འདྲི་བ། ཐོས་ལགས་ཞེས་པ་ལ་སོགས་པ་སྟེ། ཐོས་པ་ནི་རབ་ཏུ་བྱེད་པ་གཉིས་པར་མདོར་བསྟན་པའོ། །རྩ་རྣམས་ཀྱི་ངོ་བོ་སྟེ་རང་གི་ངོ་བོའི་ལྷ་རྣམས་ཀྱིས་ཡང་དག་གཟུང་བ་ནི་ལྷའི་རང་བཞིན་དུ་མོས་པས་དྲི་མ་མེད་པ་ཉིད་ཀྱིས་ན་ངེས་པའི་དོན་རྒྱས་པར་བྱས་པའོ། །དེའི་ཕྱིར་འཁོར་དང་བཅས་པའི་རྩའི་རང་བཞིན་ནི། ལུས་ཀྱི་དཀྱིལ་འཁོར་ཉམས་དགའ་བ་སྟེ། ཧེ་རུ་ཀ་ལ་སོགས་པ་རྣམས་ཀྱི་བདེ་བ་ཆེན་པོའི་རིམ་པའི་གནས་ཉིད་ཀྱི་ཕྱིར་རོ། །ཇི་སྐད་གསུངས་པ་ནི་བརྗོད་པའི་རིམ་པ་ལས་མ་འདས་པ་སྟེ། ཉི་ཤུ་རྩ་གཅིག་པར་ནི། །ལུས་དང་ངག་གི་སྒོ་དག་དང༌། སེམས་ཀྱི་སྒོ་ཡང་མཆོག་ཉིད་ཀྱིས་ན་རྣམ་པ་གཉིས་སུ་བྱས་པ་ཞེས་སྒོ་བཞི་རྣམས་གསུངས་སོ། །ཡན་ལག་བརྒྱད་རྣམས་ནི་མགོ་དང་ལག་པ་དང་རྐང་པ་དང་ལྟེ་བ་དང་སྙིང་ག་དང་ཁ་རྣམས་སོ། །ལྟེ་བ་ལ་སོགས་པ་གཅིག་སྟེ་རྩིབ་ལོགས་གཉིས་ཀྱང་ངོ་ཞེས་གཞན་རྣམས་སོ། །དངོས་པོ་ཀུན་གྱིས་ནི་ཆུ་དང་ཞེང་དུའོ་ཞེས་པ་དྲང་བའི་དོན་ཏོ། །སྟོང་པ་ཉིད་ཀྱིས་ཞེས་པ་ངེས་པའི་དོན་ཏོ། །འཁོར་ལོ་གསུམ་བདག་ནི་ཇི་ལྟར་ཉི་ཤུ་རྩ་གཅིག་པར་བཤད་པའོ། །འཁོར་ལོ་གསུམ་གཅིག་ཅེས་འདོན་པ་ལ། །གཅིག་ནི་དཀྱིལ་འཁོར་རོ། །རི་བོ་ལ་སོགས་པ་རྣམས་དང་བྷཻ་རམ་བྷ་ལ་སོགས་པ་རྣམས་ཀྱི་རིམ་པ་ལས་མ་འདས་པ་ཞེས་པ་མདོར་བསྟན་པའོ། །བླ་མ་རྣམས་ནི་སངས་རྒྱས་བཅོམ་ལྡན་འདས་རྣམས་ཏེ། དེ་རྣམས་ཀྱི་དུས་ཐམས་ཅད་ནི་
མན་ངག་བརྒྱུད་པའོ། །དེ་ལྟར་དཀྱིལ་འཁོར་དེ་ནི་གང་གི་ཕྱིར། གནས་ཏེ་རང་གི་རྒྱུ་དང་རྐྱེན་རྣམས་ལས་བྱུང་བར་གྱུར་པ་ནི་རྒྱུན་ཅན་ནོ། །ད་ལྟ་ཉིད་དུ་བསྒོམ་པས་རྫོགས་པ་ནི་མ་ཡིན་ཏེ་བསྐྱེད་པའི་རིམ་པའི་དཀྱིལ་འཁོར་བཞིན་ནོ། །བྷཻ་རམ་བྷ་ལ་སོགས་པ་རྒྱས་པར་འཆད་པ། རྐང་པ་ཞེས་པ་ལ་སོགས་པའོ། །གཞུའི་དབྱིབས་ནི་གཞུའི་རྣམ་པ་ཅན་ཏེ། རྩའི་བུ་གར་གནས་པ་ཉིད་ཀྱི་ཕྱིར་རོ། །རི་བོ་ལ་སོགས་པ་རྒྱས་པར་སྟོན་པ། སྒལ་ཚིགས་ཞེས་པ་ལ་སོགས་པ་སྟེ། རི་རབ་ནི་མགོ་བོའི་གནས་སོ། །སྔར་རབ་ཏུ་གསལ་བར་བྱས་པའི་རྣམ་པར་གཞག་པས་སུམ་ཅུ་རྩ་གཉིས་ཀྱི་དབྱངས་རྣམས་དང་གསལ་བྱེད་རྣམས་ཀྱི་བརྒྱད་ཅུའི་རང་ཉིད་ནི་མི་གསལ་བའི་རང་བཞིན་ཏེ། དེའི་རྒྱུན་གྱིས་ཟླ་བ་དང་ཉི་མ་ཡོངས་སུ་གྱུར་པའི་ངོ་བོས་གནས་པ་ནི་རྩ་སུམ་ཅུ་རྩ་གཉིས་རྣམས་ཀྱི་བྱང་ཆུབ་ཀྱི་སེམས་ཁུ་བ་དང་རྔུལ་ཅུང་ཟད་ཀྱི་ངོ་བོ་ཟླ་བའི་དཀྱིལ་འཁོར་གདན་དུ་བརྗོད་དེ་བསྐྱེད་པའི་རིམ་པ་ལའོ། །དེ་འདིར་གླད་པ་ཁོ་ནའོ། །དེའི་ཞེས་པ་བྱང་ཆུབ་ཀྱི་སེམས་སུམ་ཅུ་རྩ་གཉིས་ཀྱི་དང་གླད་པའིའོ། །ཧཾ་ཡིག་ནི་ཧཾ་གི་དབྱིབས་ཅན་རྩ་ལ་ཡང་དག་པར་ཞུགས་པའི་བྱང་ཆུབ་ཀྱི་སེམས་སོ། །གཞོམ་དུ་མེད་པ་ནི་སྤྲོས་པ་རྣམས་ཀྱིས་ཏེ། སྟོང་པ་ཉིད་དང་རོ་གཅིག་པའི་བདེ་བའི་རང་བཞིན་ཉིད་ཀྱིས་ན་རྒྱུ་རྡོ་རྗེ་འཛིན་པ་ཞེས་པའི་དོན་ཏོ། །གང་འཆད་པར་འགྱུར་བ་རྡོ་རྗེ་ཅན་གྱིས་ཞེས་སོ། །གང་ཕྱིར་རྩ་བ་དང་བཅས་པའི་འཇིག་རྟེན་ནི་ཕུང་པོ་ལྔ་རྣམས་ཏེ། དེ་རྣམས་ཀྱང་རྣམ་པ་གཉིས་སོ། །དེ་ལ་བརྟེན་པ་རྣམས་ནི་མིག་ལ་སོགས་པ་རྣམས་སོ། །གཡོ་བ་རྣམས་ནི་སེམས་དང་སེམས་ལས་བྱུང་བ་རྣམས་སོ། །ཐུགས་རྡོ་རྗེ་ནི་དྲི་ཟའི་སེམས་ཅན་གྱི་གནས་སྐབས་དོར་ནས་ཕ་མའི་ཁུ་བ་དང་རྡུལ་དང་ལྷན་ཅིག་ཏུ་གྱུར་པའི་ཕན་ཚུན་ཕན་གདགས་བྱ་དང་ཕན་འདོགས་པ་པོ་ཉིད་ཀྱིས་དེ་ལྟ་དེ་ལྟར་གནས་སྐབས་ཡོངས་སུ་འགྱུར་བ་བརྒྱུད་པའི་ངོ་བོའི་ཕུང་པོ་ལྔ་རྣམས་ཉེ་བར་བསྐྱེད་དེ། སྐྱེ་བ་ལ་སོགས་པའི་གནས་སྐབས་རྣམས་སུའོ། །འོན་ཀྱང་བར་གྱི་གནས་སྐབས་སུ་
མགོ་བོའི་མཚོ་སྐྱེས་སུ་ཁུ་བ་ཤས་ཆེ་བ་རྡུལ་ཤས་ཆུང་བ་སྟེ། གསང་བའི་ཆུ་སྐྱེས་སུ་བཟློག་པའོ། །སེམས་བདེ་བའི་ངོ་བོ་ནི་འགའ་ཞིག་ཏུ་ཅི་ཞིག་ལྟར་རེས་འགའ་འཕེལ་བའམ་འགྲིབ་པའོ། །དེ་གསུངས་པ། གནས་ཞེས་པ་ལ་སོགས་པས་སོ། །ས་བོན་ནི་གནས་སྐབས་གཞན་དང་གཞན་གྱིས་ཏེ། འཇིག་རྟེན་པ་དང་འཇིག་རྟེན་ལས་འདས་པའི་ཡང་ངོ༌། །གསལ་བ་ནི་ཇི་ལྟར་རིག་པར་ཁུ་བ་དང་རྡུལ་བདེ་བ་རིག་པའི་བདག་ཉིད་དོ། །མི་འགྱུར་བའི་སྐབས་འཕེལ་བ་ན་ནི་གསུམ་ཀ་ཡང་ཤས་ཆེར་འཇུག་པ་ནི་གསལ་བའོ། །དེ་ཉིད་ཀྱང་ཀུན་རྫོབ་པ་ཁོ་ནའི་ངོ་བོས་ཏེ། གང་གི་ཕྱིར་དོན་དམ་པར་རང་བཞིན་མེད་པ་ཉིད་ཀྱིས་མི་གསལ་བའི་ངོ་བོར་གནས་པའོ། །ཇི་ལྟར་འཇིག་རྟེན་ལས་འདས་པའི་གནས་སྐབས་ཀྱི་ས་བོན་འདི་ཡིན་ཞེ་ན། གསུངས་པ། ཀུན་གྱི་ཞེས་པ་ལ་སོགས་པའོ། །ལུས་ཅན་རྣམས་ཀྱི་ནི་སྒོམ་པ་པོ་རྣམས་ཀྱི་སྟེ། ཅིག་ཤོས་རྣམས་ཀྱི་ནི་བདུད་རྩི་འཛག་པར་རུང་བའོ། །གཟུགས་ནི་རང་གི་ངོ་བོ་སྟེ་ལུས་སོ། །དེ་ལས་ནི་ཧཾ་ཡིག་ལས་ཏེ་སྐྱེས་པའི་རང་གི་ངོ་བོ་ལས་སོ། །བདུད་རྩི་ངོ་བོར་འདི་ལས་འཛག་པ་ནི་བདུད་རྩི་འཛག་པའི་རང་གི་ངོ་བོ་ཅན་ཏེ། ཧཾ་ཡིག་ནི་གསལ་བ་དང་མི་གསལ་བའི་ངོ་བོ་གང་ཡང་རུང་བའི་གཏུམ་མོས་གུས་པ་དང་བཅས་པར་བར་མ་ཆད་པར་གོམས་པ་ནི། ཆུང་དུ་གོམས་པ་ན་བདུད་རྩི་འཛག་པའོ། །བར་མན་ཆེར་འཛག་གོ །ཆེན་པོར་ན་རྒྱུན་མི་འཆད་པར་ཆེས་ཆེར་འཛག་གོ །ཐབས་ཀྱི་རྒྱུད་ཀྱི་ངོ་བོའི་རྫོགས་པའི་རིམ་པའི་དཀྱིལ་འཁོར་བསྒོམ་པས་ནི་ཡིད་བརྟན་པ་ན་གཏུམ་མོ་ངེས་པར་སྤྲོ་བ་ལས་འབར་ཞིང༌། དེས་གསུངས་པའི་རི་བོང་ཅན་ཡང་འཛག་གོ །དེའི་ཚེ་ཡང་དེ་ཁོ་ན་སྟེ་ཧཾ་ཡིག་འཛག་པ་ཅན་གྱི་ནཱ་ད་གཏུམ་མོ་རྔུལ་གྱི་རི་མོ་འབྱེད་ཅིང་ཁྱད་པར་དུ་འཕགས་པར་བྱེད་དེ། འདྲེས་པར་གྱུར་པས་བདེ་བ་དང་རོ་གཅིག་ཏུ་བྱེད་པའི་ཕྱིར་རོ། །འདི་ཁོ་ན་མེ་ཞེས་པ་ལ་སོགས་པས་གསུངས་ཏེ། གཏུམ་མོའི་མེ་མཉེས་པ་ནི་བདེ་བའི་རང་བཞིན་ཉིད་ཁོ་ནའོ། །དེ་ཉིད་ཀྱི་ཕྱིར་གསུངས་པ། ཡོངས་རྫོགས་ཞེས་པ་ལ་
སོགས་པ་སྟེ། དེས་ནི་ཁྱད་པར་དུ་ཐོབ་པའི་ཧཾ་ཡིག་གིས་ཡང་དག་རྫོགས་པ་ཁོ་ནར་རྩའི་འཁོར་ལོའི་དཀྱིལ་འཁོར་ངེས་པར་འགྱུར་རོ། །མེད་པ་ཁོ་ནའོ་ཞེས་པ་འདི་ལ་ཐེ་ཚོམ་མམ་ཕྱིན་ཅི་ལོག་མེད་པའོ། །ཅི་ལས་འདི་ལྟར་ཡིན་ཞེ་ན་གསུངས་པ། དེ་ཞེས་པ་ལ་སོགས་པ་སྟེ། དེ་ཞེས་པ་ཕྱི་མ་ལ་ལྟོས་པས་མ་ནིང་ངོ༌། །ཧཾ་ཡིག་ཁོ་ན་ཁྱད་པར་ཐོབ་པ་ནི་ཕུང་པོ་དང་ཁམས་ལ་སོགས་པ་རྣམས་ཀྱི་གནས་སྐབས་ཁྱད་པར་བའི་རྒྱུ་ཉིད་ཀྱི་ཕྱིར་སྙིང་པོ་སྟེ། བཤད་པ་ནི་འདིར་དང་རྒྱུད་གཞན་དུའོ། །འོ་ན་རྩའི་ཚོགས་ཀྱང་སྙིང་པོ་སྟེ་རྒྱས་པ་ལ་སོགས་པ་བྱེད་པའི་ཕྱིར་ཏེ། སྔར་ཇི་སྐད་བཤད་པ་བཞིན་ནོ་ཞེ་ན་གསུངས་པ། མཆོག་ཅེས་པ་སྟེ། ཇི་ལྟར་འདི་མཆོག་ཡིན་པ་དེ་ལྟར་འཆད་པར་འགྱུར་རོ། །རྩ་རྣམས་ཁོ་ན་དེ་ལེན་གྱི་ལུས་ནི་མ་ཡིན་ཏེ། དེས་ན་དཀྱིལ་འཁོར་ག་ལ་ཡིན་ཞེ་ན་གསུངས་པ། སུམ་ཅུ་རྩ་གཉིས་ཞེས་པ་ལ་སོགས་པའོ། །ནི་སྟེ་གང་གི་ཕྱིར་རྩའི་འཁོར་ལོ་ལ་དཀྱིལ་འཁོར་ཏེ། དེ་ཡང་པགས་པ་དང་རུས་པ་ལ་སོགས་པས་ཡོངས་སུ་བསྐོར་བའི་ལུས་སུ་བརྗོད་ཅིང༌། དེའི་ཕྱིར་ལུས་ཀྱི་དཀྱིལ་འཁོར་དུ་འདོད་དོ། །དེ་ལྟར་ཡང་བྷ་ག་དང་ལུས་དང་བྱང་སེམས་ཀྱི་དབྱེ་བ་ལས་དཀྱིལ་འཁོར་རྣམ་པ་གསུམ་གསུངས་ཤིང༌། དེ་ལས་བྷ་གའི་དཀྱིལ་འཁོར་ནི་བསྐྱེད་པའི་རིམ་པ་ཁོ་ནའོ་ཞེས་པས་གཉིས་འདིར་རྒྱས་པར་བསྟན་ཏོ། །ཅི་སྟེ་ལུས་ནི་བྱང་ཆུབ་ཀྱི་སེམས་ལེན་པའི་ཕྱིར་དཀྱིལ་འཁོར་དུ་བརྗོད་མོད། བྱང་ཆུབ་སེམས་ནི་ཅི་ལྟར་ཞེ་ན་གསུངས་པ། བྱང་ཆུབ་སེམས་ཞེས་པ་ཧཾ་ཡིག་ཁྱད་པར་དུ་གྱུར་པ་ནི། ཆེན་པོ་ཡང་སྟེ་སྟོང་པ་ཉིད་དང་སྙིང་རྗེ་དབྱེར་མེད་པའི་ཕྱིར་ལ། དགའ་བ་རྒྱས་པར་བྱེད་པའི་ཕྱིར་རིན་པོ་ཆེ་ཡང་ཡིན་པ་བདེ་བ་ཆེན་པོ་ནི་སྙིང་པོ་སྟེ། སྟོང་པ་ཉིད་དང་སྙིང་རྗེ་དབྱེར་མེད་པ་བདེ་བ་ཆེན་པོའི་སྙིང་པོ་དེ་དེའི་བདག་ཉིད་ཀྱིས་ལེན་པའི་ཕྱིར་བྱང་ཆུབ་སེམས་ཁོ་ན་བླ་ན་མེད་པའི་དཀྱིལ་འཁོར་རོ། །ཅི་ལྟར་ན་འདི་ལྟར་ཡིན་ཞེ་ན་གསུངས་པ། དེ་ཞེས་པ་ལ་སོགས་པའོ། །སྣ་ཚོགས་
ནི་རྣམ་པ་གཉིས་ཏེ། ཕྱི་དང་ནང་ངོ༌། །ཁྱབ་པ་ནི་དེའི་རང་གི་ངོ་བོས་ཁྱབ་བྱ་དང་དེའི་བདག་ཉིད་ཀྱིས་ཁྱབ་བྱེད་འདི་ཡིན་ཏེ། གང་འཆད་པར་འགྱུར་བ་དེ་ནི་ཕྱི་དང་ནང་གིས་ཤེས་པའོ། །དབང་པོ་ཐམས་ཅད་འཇུག་བྱེད་པ་ནི། དབང་པོ་རྣམས་ཐམས་ཅད་སོ་སོ་རང་གི་རྣམ་ཤེས་བསྐྱེད་པ་ལ་འདིས་འཇུག་གོ་ཞེས་བྱས་ནས་སོ། །འདིས་ནི་རྣམ་པར་རྟོག་པའི་གཟུང་བྱ་གཟུགས་ལ་སོགས་པ་དོན་མེད་པ་ནི་ཕྱི་རོལ་མ་ཡིན་ནོ་ཞེས་གསུངས་པར་འགྱུར་རོ། །གྲུབ་པ་ཡང་དེ་སྟེ་རྫོགས་པ་ཡིན་གྱིས། བསྐྱེད་པའི་རིམ་པ་བཞིན་དུ་བསྐྱེད་པར་བྱ་བ་ནི་མ་ཡིན་ནོ། །རྫས་ཀྱང་སྟེ་དོན་བྱ་བ་བྱེད་པའོ། །རྣམ་པར་གནས་པ་ཡང་སྟེ་ཀུན་རྫོབ་ཏུ་གནས་གཞན་དུ་གནས་པ་ལྷུར་ལེན་པ་ཁུ་བ་དང་ཁྲག་ལ་སོགས་པ་དང་དབང་པོ་རྣམས་དང་སེམས་དང་སེམས་ལས་བྱུང་བ་རྣམས་སོ། །འདིའི་མཆོག་ཉིད་ནི་མྱུར་དུ་སྐྱེས་བུའི་དོན་གྱི་མཆོག་འགྲུབ་པའི་རྒྱུ་ཉིད་ཀྱི་ཕྱིར་ཏེ། དེའི་ཕྱིར་དེ་རྟོགས་པར་བྱེད་པ། དེ་ཞེས་པ་ལ་སོགས་པའོ། །སྦོམ་པོ་ནི་གཟུགས་ཀྱི་ཕུང་པོའོ། །ཕྲ་བ་ནི་ཚོར་བ་ལ་སོགས་པའི་ཕུང་པོ་བཞི་རྣམས་སོ། །དེ་རྣམས་ཀྱི་རང་གི་ངོ་བོ་ནི་རང་བཞིན་མེད་པ་ཉིད་དོ། །གཉེན་ཉིད་ནི་ཕན་པའི་རྒྱུ་ཉིད་ཀྱིས་སོ། །ཁྱད་པར་གཉིས་ཀྱིས་སྟོང་པ་ཉིད་དང༌། སྙིང་རྗེ་དབྱེར་མེད་པ་ལ་བྱང་ཆུབ་ཀྱི་སེམས་རྡོ་རྗེ་ཅན་གྱི་སྒྲ་འཇུག་པའི་རྒྱུ་མཚན་གསལ་བར་མཛད་དོ། །དེ་ལྟར་ན་ཡང་སྟོང་པ་ཉིད་དང་སྙིང་རྗེ་དབྱེར་མེད་པའི་བྱང་ཆུབ་སེམས་ཀྱི་རང་བཞིན་ལྷའི་རྣམ་པའི་བདག་ཉིད་ཀྱི་ལུས་ཀྱི་ངོ་བོའི་དཀྱིལ་འཁོར་ནི་རྣམ་པ་སྣ་ཚོགས་པའི་ལྷ་སྤྲུལ་པ་རྣམས་ཀྱི་སྣ་ཚོགས་པའི་དོན་བྱེད་པའོ་ཞེས་གསུངས་སོ། །སངས་རྒྱས་རྣམས་ཀྱི་སྟེ་འབྲས་བུའི་གནས་སྐབས་ཀྱི་དང་བྱང་ཆུབ་སེམས་དཔའ་རྣམས་ཀྱི་སྟེ་རྒྱུའི་གནས་སྐབས་ཀྱི་དམ་ཚིག་ནི་རྟོག་པ་སྟེ། དེ་ལས་འདི་དམ་ཚིག་གི་དོན་བྱུང་ཞིང་སྐྱེས་སོ། །སངས་རྒྱས་ཉིད་དེ་རྡོ་རྗེ་འཛིན་པ་ཉིད་འཐོབ་བོ། །ཅི་ལས་ཤེ་ན། བྱུང་བའི་དཀྱིལ་འཁོར་གོམས་པ་འདི་ཁོ་ན་ལས་སོ། །རང་རྒྱལ་རྣམས་ཀྱི་སྟེ་སོ་སོ་གཅིག་པུ་སངས་རྒྱས་རྣམས་ཀྱི་འགྲུབ་པ་ནི་ཡང་དག་པར་རྫོགས་པའི་
སངས་རྒྱས་ཉིད་དེ། མི་ཁོམ་པ་སྤངས་པའི་སྐྱེ་བ་མི་རྣམས་ཀྱིས་དང་ལྷ་རྣམས་ཀྱིའོ། །ཉན་ཐོས་ལ་སོགས་པ་རྣམས་ཀྱི་ཡང་དཀྱིལ་འཁོར་འདི་གོམས་པར་རུང་བ་ཉིད་དང་སངས་རྒྱས་ཉིད་ཀྱང་ངོ་ཞེས་ཤེས་པའི་ཆེད་དུ། ཉན་ཐོས་རྣམས་ཀྱི་ཞེས་པ་ལ་སོགས་པ་གསུངས་སོ། །འགའ་ཞིག་ཏུ་སེམས་ཅན་གྱི་ཕུང་པོ་མ་ལུས་པ་སངས་རྒྱས་ཉིད་དུ་རུང་བར་གསུངས་པ་ནི། མི་ཁོམ་པར་སྐྱེས་པ་རྣམས་དལ་འབྱོར་ཐོབ་པར་གྱུར་པ་ནའོ་ཞེས་མངོན་པར་དགོངས་པས་མི་འགལ་ལོ། །མཆོད་པའི་ལས་དང་སྦྱིན་སྲེག་གི་ལས་རྒྱས་པར་སྟོན་པ། ནང་གི་ཞེས་པ་ལ་སོགས་པའོ། །ཤེས་རབ་ནི་སྟོང་པ་ཉིད་ཀྱི་ཡེ་ཤེས་སོ། །དེ་ནི་མེ་སྟེ་ལྷན་ཅིག་སྐྱེས་པའི་གཏུམ་མོའོ། །རྣམ་པར་རྟོག་པའི་རབ་རིབ་མ་ལུས་པ་སེལ་བར་བྱེད་པའི་ཕྱིར་ཆེར་འབར་བ་སྟེ་འོད་གསལ་བའོ། །དེ་ལ་ནང་དུ་སྦྱིན་སྲེག་ནི་ཁུ་བ་ལ་སོགས་པ་རྣམས་ཀྱི་ནང་དུ་འདུས་པའོ། །ཕྱི་རོལ་དུ་ནི་གཟུགས་ལ་སོགས་པ་རྣམས་ཀྱིའོ། །ཕྱི་དང་ནང་ཞེས་པའི་ཐ་སྙད་ནི་འབྱུང་བའི་ཀུན་རྫོབ་ཀྱིས་ཏེ། དོན་དམ་པར་གཉིས་ཀ་བྱང་ཆུབ་སེམས་ཀྱི་རང་བཞིན་ཉིད་ཀྱི་ཕྱིར་རོ། །དེ་ཉིད་ཀྱི་ཕྱིར་བྱང་ཆུབ་ཀྱི་སེམས་རྡོ་རྗེ་བཅོམ་ལྡན་འདས་མེ་ལྷ་ལ། སྟོང་པ་ཉིད་དང་བདེ་བའི་རང་བཞིན་སྙིང་རྗེའི་རྣལ་འབྱོར་གྱི་མཆོད་པའི་དགང་བླུགས་ཀྱིས། དེའི་ནང་དུ་རྟོགས་པའི་སྐྱེ་མཆེད་དྲུག་ལ་སོགས་པ་རྣམས་ཀྱང་མཆོད་པར་འགྱུར་ཏེ། ཁྱད་པར་དུ་སྟེ་དེ་ཁོ་ན་ཉིད་ཀྱི་མཆོད་པས་སོ། །མཁའ་འགྲོ་མ་རྣམས་ནི་རྩ་རྣམས་སོ། །དེས་ནི་སྟེ་རྣལ་འབྱོར་ཀྱིས་སོ། །དེ་རྣམས་ནི་ལྷའི་ངོ་བོ་རྣམས་སོ། །རྣམ་པར་གཞག་པ་གཞན་གསུངས་པ། མགོ་ཞེས་པ་ལ་སོགས་པ་སྟེ། བདེ་བ་ཆེན་པོའི་ཆུ་སྐྱེས་སུ་གནས་པའི་ཁུ་བ་ནི་སྲེག་རྫས་སོ། །ར་ས་ནཱ་ནི་བླུགས་གཟར་གྱི་ཡུ་བ་སྟེ་དེའི་གདོང་པདྨའི་འདབ་མའི་དབྱིབས་ཅན་གྱི་ཁ་ནི་མགྲིན་པའི་པདྨའོ། །ལ་ལ་ནཱ་ནི་དགང་གཟར་གྱི་ཡུ་བ་སྟེ། དེའི་གདོང་ནི་སྙིང་གའི་པདྨའོ། །ཡུ་བའི་འོག་རྡོ་རྗེ་རིན་པོ་ཆེ་དང་ཐབ་ཁུང་ནི་ལྟེ་བའོ། །ལས་ནི་ཡིད་མཉམ་པར་གཞག་པའམ་དབང་པོ་
གཉིས་ཀྱི་བྱ་བའོ། །དེས་བསྐུལ་བའི་རླུང་སྟེ། དེས་སྦར་བའོ། །ཚངས་པའི་དེ་ཁོ་ན་ཉིད་ནི་སྟོང་པ་ཉིད་ཀྱི་ཡེ་ཤེས་ཏེ། དེ་དེའི་རང་བཞིན་གྱི་མེ་དྲོ་བ་རྔུལ་གྱི་ངོ་བོ་རྣལ་འབྱོར་གྱི་གཏུམ་མོ་ཐབ་ཁུང་གི་དབུས་ཀྱི་འོག་གསང་བའི་ཆུ་སྐྱེས་སུ་གནས་སོ། །སྒྲ་ཙམ་ནི་གཏུམ་མོ་རྡུལ་གྱི་རི་མོ་གོམས་པའི་སྐབས་ན་ནང་གི་བརྗོད་པ་དང་ལྡན་པའོ། །འདི་སྐད་གསུངས་ཏེ། སློབ་དཔོན་ཐུགས་རྡོ་རྗེའི་བྱང་ཆུབ་སེམས་བསྒོམ་པས་ཡིད་བརྟན་པ་ན་ལ་ལ་ནཱ་དང་ར་ས་ནཱ་རུ་སོན་པའི་རླུང་དག་ཨ་ཝ་དྷཱུ་ཏཱིའི་རླུང་གི་ནང་དུ་འདུའོ། །དེ་ཡང་གཏུམ་མོ་སྦོར་ཞིང༌། དེ་ཡང་མགོ་བོའི་འཁོར་ལོས་གནས་ནས་སྲེག་རྫས་ཞུ་བར་བྱེད་དོ། །དེའི་ཚེ་ར་ས་ནཱ་དང་ལ་ལ་ནཱའི་རླུང་མ་ལུས་པ་ཨ་ཝ་དྷཱུ་ཏཱི་རུ་ཞུགས་ཤིང༌། ཨ་ཝ་དྷཱུ་ཏཱིའི་རླུང་ཡང་ཚངས་པའི་མེ་དང་རོ་གཅིག་ཅིང་དེ་ལ་འཇུག་པར་བྱེད་དོ། །ཞུགས་པ་ཡང་སྦྱིན་སྲེག་གི་མཆོད་པ་ཡང་སྟེ། མངོན་པར་འདོད་པ་གཉིས་སུ་མེད་པ་ལྷན་ཅིག་སྐྱེས་པའི་བདེ་བ་སྒྲུབ་པར་བྱེད་པའི་ཕྱིར་རོ། །དེ་ལྟར་ཡང་དང་ཡང་དུ་འབར་བྱེད་ལ་སོགས་པའོ་ཞེས་པ་སྐོར་བར་བྱེད་པ་ནི་བཟླས་པ་ཞེས་པའོ། །སྒོམ་པ་ནི་སྙིང་རྗེ་དང་ཤེས་རབ་གཉིས་སུ་མེད་པའི་ངོ་བོ་ལྷན་ཅིག་སྐྱེས་པའི་བྱང་ཆུབ་སེམས་ཀྱི་རང་བཞིན་དཀྱིལ་འཁོར་སོ་སོར་སྣང་བ་སོ་སོར་ཡང་དང་ཡང་དུ་རྒྱུན་མི་འཆད་པར་བསྐྱེད་པར་བྱ་བཞིན་པའོ། །གང་གི་ཕྱིར་ལྷན་ཅིག་སྐྱེས་པ་ལ་གནས་པ་ནི་དེའི་བདག་ཉིད་ཀྱིས་གཟུགས་ཀྱི་ཕུང་པོ་ལ་སོགས་པ་ལྷ་རྣམས་ཀྱི་དཀྱིལ་འཁོར་ཏེ། སྦྱིན་སྲེག་དང་མཆོད་པ་ཡང་ངོ༌། །དཀྱིལ་འཁོར་གྱི་བདག་པོ་ནི་དབང་དུ་བྱས་པའི་བྱང་ཆུབ་ཀྱི་སེམས་རྡོ་རྗེ་སྟེ། དེ་ཁོ་ན་ནི་བཤད་པ་འདི་ཐམས་ཅད་རྗེས་སུ་སྒྲུབ་བོ། །འོ་ན་དྲི་བ་ལ་དཀྱིལ་འཁོར་མཆོད་པ་ལ་སོགས་ཞེས་པའི་སོགས་པའི་སྒྲས་མངོན་པར་དགོངས་པ། རྡུལ་ཚོན་གདབ་པ་ལ་སོགས་པ་གཞན་དུ་གསུངས་པ། ཅི་ལྟར་འདིར་རྣམ་པར་མ་བཞག་ཅེ་ན། གསུངས་པ། ཐམས་ཅད་ཅེས་པ་ལ་སོགས་པའོ། །འདིར་ནི་སྟེ་རྫོགས་པའི་དཀྱིལ་འཁོར་ལ་སོགས་པ་ལའོ། །ཤེས་རབ་མཆོག་ལ་ནི་དེ་ལས་ཅིག་ཤོས་ཀྱི་དཀྱིལ་འཁོར་ལ་སོགས་
པའི་འཛིན་པ་གསལ་བའི་ཆེད་དུ་ཅུང་ཟད་འདིར་རྣམ་པར་གཞག་ཅིང་གཞན་ནི་རང་ཉིད་ཀྱིས་དཔྱད་ནས་རྣམ་པར་གཞག་པར་བྱ་བའམ་ཡང་ན་མ་ཡིན་ཏེ། དེ་མེད་ཀྱང་འདིར་ཉམས་པ་ཅི་ཡང་མེད་པའི་ཕྱིར་རོ་ཞེས་དགོངས་པས་གུས་པར་བྱ་བ་མིན་ནོ། །དེ་སྐད་དུ་ཡང་དྲིལ་བུ་ཞབས་ཀྱིས་གསུངས་པ། སེམས་གནས་ལས་ཀྱི་ཐིག་དང་ནི། །རྡུལ་གདབ་རིམ་པ་ལས་བྱུང་བའི། །འགྲོ་འདི་དཀྱིལ་འཁོར་ཁོ་ན་སྟེ། །རང་བཞིན་གྱིས་གྲུབ་གཉིས་མེད་པའོ། །བཅོས་མ་གཉིས་ཀྱི་ངོ་བོ་གང༌། །དེ་ནི་གདུལ་བྱའི་དབང་ལས་འདོད། །དེ་ནི་འདོད་པའི་གྲུབ་བྱ་མིན། །ཐར་པ་ཡང་དག་དོན་མཐོང་ལས། །ཞེས་སོ། །ཇི་ལྟར་ཕྱི་རོལ་གྱི་དཀྱིལ་འཁོར་གྱི་ཁང་པ་ལ་སོགས་པར་དང་བསྐྱེད་པའི་རིམ་པ་ལ་སློབ་དཔོན་རོལ་པར་བྱེད་པ་དེ་ལྟར་འདིར་ཡང་ཡིན་ནམ། རྣམ་པ་གཞན་དུ་ཡིན་ཞེས་ཐེ་ཚོམ་པས་འདྲི་པ་ད་དུང་ཞེས་པ་སྟེ། རྫོགས་པའི་རིམ་པའི་དཀྱིལ་འཁོར་དུ་ཅི་ལྟར་ཞེས་པ་རོལ་པའི་རྣམ་པ་དྲིས་པའོ། །བྱེ་བྲག་ནི་ཁྱད་པར་ཏེ་ཆོས་ལ་སོགས་པ་རྣམས་ཀྱིས་དང་རང་གི་རྟེན་གྱི་ཡང་ངོ༌། །རྟེན་གྱི་བྱེ་བྲག་གསུངས་པ། མགོ་ཞེས་པ་ལ་སོགས་པའོ། །ཨེ་ཡིག་རྣམ་པ་ནི་གྲུ་གསུམ་སྟེ། བཾ་ཡིག་འདྲ་བ་ནི་ཟླུམ་པོ་ཐིག་ལེའོ། །བརྟེན་པའི་བྱེ་བྲག་གསུངས་པ། འདབ་མ་དྲུག་ཅུ་རྩ་བཞི་ཞེས་པ་ལ་སོགས་པ་སྟེ། སྤྲུལ་པ་ལ་སོགས་པ་རྣམས་ཀྱི་མཚན་ཉིད་འཆད་པར་འགྱུར་རོ། །བྱེ་བྲག་གཞན་གསུངས་པ། སྤྲུལ་པ་ཞེས་པ་ལ་སོགས་པའོ། །སྤྲུལ་པའི་འཁོར་ལོ་སྟེ་དེའི་དབུས་སུ་དང་འཆད་པར་འགྱུར་བ་ཡང་སྟེ་ཆོས་ཀྱི་དང་ལོངས་སྤྱོད་རྫོགས་པའི་དང་བདེ་བ་ཆེན་པོའི་ཡང་ངོ༌། །རྩའི་དབྱིབས་ཁོ་ན་འཁོར་ལོ་ཉིད་ཀྱིས་དང་པདྨ་ཉིད་ཀྱི་ཚུལ་དུ་བྱ་བའོ། །སྡེ་ཆེན་བརྒྱད་ལ་སོགས་པ་རྣམས་ཀྱི་རང་གི་ངོ་བོ་ལ་སོགས་པ་ནི་རྫོགས་པའི་རིམ་པས་བཞི་པ་དང་ཉི་ཤུ་གཉིས་པར་བཤད་དོ། །བསྐྱེད་པའི་རིམ་པ་ལ་བསྒོམ་པར་བྱ་བ་རྣམས་ནི་རྫོགས་པའི་རིམ་པ་ལ་འཇུག་པ་ལ་ཐབས་ཉིད་དུ་འདིར་རྒྱས་པར་བསྟན་ཏོ། །སྡེ་ཚན་བརྒྱད་ལ་སོགས་པ་རྣམས་
ནི་བྲིས་པའི་ངོ་བོའོ། །དེ་ལ་ལྟེ་བར་གྱེན་དུ་ཁ་ཕྱོགས་པའི་ཆུ་སྐྱེས་དམར་པོ་ལ། སྡེ་ཚན་རྣམས་ཁོ་ན་བརྒྱད་དོ་ཞེས་པས་ཤར་ལ་སོགས་པའི་འདབ་མ་རྣམས་ལ་ཨ་ཀ་ཙ་ཊ་ཏ་པ་ཡ་ཤའི་སྡེ་པ་རྣམས་ཏེ་སྔར་རྣམ་པར་ཕྱེའོ། །ཁ་ཅིག་ཏུ་རྣམ་པར་ཐར་པ་བརྒྱད་རྣམ་པར་དག་པ་ཨ་ཀ་ལ་སོགས་པ་ཡི་གེ་བརྒྱད་དགོད་པ་གསུངས་པ་ནི་གདུལ་བྱའི་ངོར་ཏེ། དེའི་ཕྱིར་སྡེ་ཚན་བརྒྱད་རྣམས་སོ་ཞེས་ཀྱང་ཤེས་པར་བྱའོ། །དབུས་སུ་ཟླ་བ་ལ་ཨཾ་སྟེ་འགྱུར་བ་མེད་པ་དམ་པ་ནི་སྐྱེ་བ་མེད་པ་གསལ་བར་བྱེད་པའི་ཕྱིར་རོ། །སྙིང་གར་ཁ་ཐུར་དུ་ཕྱོགས་པའི་པདྨ་དཀར་པོར་ཟླ་བ་ལ་ཧཱུཾ་སྟེ། མི་ཤིགས་པ་ནི་སྤྲོས་པ་རྣམས་ཀྱིས་ཏེ་ཆོས་སྐུ་མཚོན་པའི་ཕྱིར་རོ། །མི་ཤིགས་པ་བརྗོད་པས་ཧཾ་ཡིག་ཏུ་དོགས་པ་སེལ་བ་ལ་ལྔ་ཞེས་པའི་གྲངས་ཀྱི་ཚིག་སྟེ། ཨུ་ཡིག་འོག་ན་གནས་པ་དང་ལྷན་ཅིག་གོ །དེས་ན་ཤར་ལ་སོགས་པའི་འདབ་མ་རྣམས་ལ་ཨཱ་ཨཱི་ཨཱ་ཨཱུ་ཨཻ་དབྱངས་རྣམས་སོ། །དབང་ལྡན་ལ་སོགས་པ་རྣམས་སུ་ཡ་ར་ལ་ཝ་རྣམས་སོ། །མགྲིན་པར་སྟེང་དུ་ཕྱོགས་པའི་ཆུ་སྐྱེས་དམར་པོ་ལ་ཟླ་བར་ཨོཾ་སྟེ་ཤར་ལ་སོགས་པའི་འདབ་མ་རྣམས་ལ་ཨཱ་ཨཱི་ཨཱ་ཨཱུ་ཨཻ་ཆ་རྣམས་སོ། །ཡ་ར་ལ་ཝ་རྣམས་ཀྱིས་ཞེས་རྗེས་སུ་འཇུག་པའི་ཕྱིར་དབང་ལྡན་ལ་སོགས་པ་རྣམས་སུ་ཡ་ར་ལ་ཝ་རྣམས་སོ། །མགོ་བོར་འོག་ཏུ་ཕྱོགས་པའི་སྣ་ཚོགས་མཚོ་སྐྱེས་སུ་ཟླ་བ་ལ་ཧཾ་ཡིག་མགོ་བོ་སྟོང་པ་སྟེ་ཟླ་བ་ཕྱེད་དང་ཐིག་ལེ་དང་ནཱ་ད་དང་ལྡན་པའོ། །ཉི་ཤུ་རྩ་གཉིས་པར་གསུངས་པ། ཧཾ་ཡིག་འདི། །ནཱ་ད་དང་ཐིག་ལེ་གཞོམ་དུ་མེད་པའོ། །ཞེས་སོ། །གཅིག་གིས་བར་དུ་ཆོད་པའི་འདབ་མ་བཅུ་དྲུག་རྣམས་སུ་དབྱངས་བཅུ་དྲུག་རྣམས་སོ། །ཨ་ཡིག་ལ་སོགས་པའི་ཡི་གེ་འདི་རྣམས་ཟླ་ཕྱེད་དང་ཐིག་ལེ་དང་བཅས་པ་པ་མོ་ལྟ་བུ་འཛག་པ་རྣམས་སོ་ཞེས་ཤེས་པར་བྱ་སྟེ། ཁྱད་པར་དང་བཅས་པ་ནི་གཏུམ་མོ་བསྒོམ་པ་ན་བཤད་པར་བྱའོ། །དཀྱུས་མ་ལ་ནི་ཟླ་བ་ཞེས་པ་ལ་སོགས་པ་སྟེ། ངོས་དག་ནི་ཧཱུཾ་ཡིག་གི་ངོས་སོ། །གཡོན་དང་གཡས་དག་ནི་རླུང་དག་སྟེ་ལ་ལ་ནཱ་དང་ར་ཝ་ནཱ་རུ་སོན་པ་དག་དང༌། ཁུ་བ་དང་རྔུལ་དག་ཀྱང་ངོ༌། །ལ་ལ་ནཱ་དང་
ར་ས་ནཱའི་རྩ་དག་ནི་མགོ་བོའི་འཁོར་ལོ་ནས་གསང་བའི་འཁོར་ལོར་ཇི་སྲིད་པར་མདུད་པ་རྣམས་སུ་ལྕགས་སྒྲོག་གི་རྣམ་པས་ཨ་ཝ་དྷཱུ་ཏཱི་ལ་འཁྱུད་ནས་གནས་པ་དག་གོ །འོན་ཀྱང་ལ་ལ་ནཱ་ནི་ཟོས་པ་དང་འཐུངས་པ་ལྟོ་བའི་མེས་སྨིན་པ་རྣམས་ལས་ཁུ་བ་འབབ་པོ་ཞེས་པས་མགྲིན་པ་ནས་ཞེས་དང་ངལ་སོ་ཞེས་གསུངས་ཀྱི་དེ་དག་ཁོ་ནའི་མཐར་ཐུག་པ་ནི་མ་ཡིན་ནོ། །དེ་ཉིད་ཀྱི་ཕྱིང་ཡང་ཞེས་གསུངས་སོ། །མྱོས་བྱེད་ཀྱང་འབེབས་ཏེ། སྤྲོས་པས་གསོའོ། །ར་ས་ནཱ་ནི་ཞུ་བ་ལས་ཁྲག་འབེབས་ཏེ། དང་པོར་ལྟེ་བར་དང་མགྲིན་པར་ཇི་སྲིད་པར་རོ་ཞེས་གསུངས་པ། ལྟེ་བ་ནས་ཞེས་པ་ལ་སོགས་པའོ། །ཡང་རྗེས་སུ་འཇུག་པའི་ཕྱིར་ངལ་སོ་བ་ཡང་ངོ༌། །དེས་ན་དེའི་ཁྲག་གིས་ལུས་ལ་མངོན་པར་ཁྱབ་བོ། །ཟླ་བ་ནི་ཁུ་བའོ། །འཇུག་པའི་རླུང་འོག་གི་སྒོ་དང་འབྱུང་བ་སྟེང་གི་སྒོ་ནི་ལ་ལ་ནཱ་དང་ར་ས་ནཱ་ལ་མཉམ་པར་གནས་པའོ། །རླུང་གཉིས་ཇི་ལྟར་སྒོ་ཡིན་ཞེ་ན། ནི་སྟེ་གང་གི་ཕྱིར། འདི་དག་སྟེ་བརྗོད་པ་དག་བརྟེན་པ་དག་གོ །ཟླ་བ་དང་ཉི་མ་དག་གི་གཙོ་བོའི་སྒོ་གཉིས་སུ་གྱུར་པ་རླུང་འདིའི་སྒོ་གཉིས་ནི་སོ་སོར་རྩ་གཉིས་སོ། །དེ་ཉིད་ཀྱི་ཕྱིར་ཉེ་བར་བཏགས་པ་ལས་ལ་ལ་ནཱ་ཟླ་བར་བརྗོད་ཅིང་ར་ས་ནཱ་ཉི་མར་རོ། །འདི་དག་སྒོ་ཉིད་དུ་རྟོགས་པར་བྱེད་པ་གསུངས་པ། དཔའ་བོ་ཞེས་པ་ལ་སོགས་པ་སྟེ། དཔའ་བོ་ཁུ་བའི་རྣམ་པ་རྣམས་ཀྱིས་དང་མཁའ་འགྲོ་མ་བདེ་བའི་ཚུལ་དང་ཁྲག་གི་ཚུལ་ཏེ། དེ་དང་ལྡན་པ་རླུང་ལ་ཞོན་པ་རྣམས་ཀྱི་འགྲོ་བ་དང་འོང་བ་དག་གི་རྒྱུ་སྟེ་རྟེན་དག་གོ །རྒྱུད་དག་ཅེས་པ་ནི་ལུང་ཉིད་ཀྱི་ཕྱིར་རོ། །ཡང་ན་འགྲོ་བ་དང་འོང་བ་དག་གང་དག་གི་ངེས་འབྲེལ་དག་སྟེ་དགོས་པ་དག་གོ་ཞེས་ཀྱང་ཚིག་རྣམ་པར་སྦྱར་རོ། །ནི་སྟེ་གང་གི་ཕྱིར་དེ་ལྟར་ཡིན་པ་དེའི་ཕྱིར་འདི་རྣམས་ཀྱི་རྩ་སོ་སོར་ཕྱི་རོལ་དུ་འགྲོ་བ་ན་ནུབ་པ་སྟེ་ནུབ་པར་འགྲོ་བ་དང་སྡུད་པ་དང་ཐིམ་པ་སྟེ་གཉིད་ལོག་པའི་གནས་སྐབས་བཞིན་ནོ། །ནང་དུ་འོང་བ་དང་འཆར་བ་དང་སྤྲོ་བ་སྟེ་སད་པའི་སྐབས་ན་བཞིན་ནོ། །གང་ལ་ལ་ནཱ་སྤྲོ་བའི་རྩ་དང་ར་ས་ནཱ་སྡུད་པའི་རྩར་བརྗོད་པ་དེ་ནི་རིམ་པ་ཇི་ལྟ་
བར་ཁུ་བ་དང་རྡུལ་ཤས་ཆེ་བ་དག་འབབ་པའི་ཕྱིར་ཞེས་ཕལ་ཆེ་བར་གསུངས་པའོ། །ཨཱ་ལི་དང་ཀཱ་ལི་དག་གི་ཡང་འགྲོ་བ་དང་འོང་བའི་རྒྱུ་དག་ནི་དེ་དག་གོ་ཞེས་རྟོགས་པའི་ཆེད་དུ་གསུངས་པ། གཡོན་ཞེས་པ་ལ་སོགས་པ་སྟེ། ཨ་ཝ་དྷཱུ་ཏཱིའི་གཡོན་ནི་ལ་ལ་ནཱ་དང༌། གཡས་ངོས་ནི། ར་ས་ནཱ་སྟེ། ཀུན་སྡུད་པའི་ཟླས་དབྱེ་བའོ། །དབྱངས་བཅུ་དྲུག་རྣམས་ཀྱི་ནང་ནས་རྀ་རཱྀ་ལྀ་ལཱྀ་སྟེ་མ་ནིང་དང་བྲལ་བ་དབྱངས་བཅུ་གཉིས་རྣམས་སོ། །བསྐོར་བ་ནི་ཡོངས་སུ་བསྐོར་བ་སྟེ། འོག་ཏུ་བལྟས་པའི་ཀ་སོགས་རྣམས་ཀྱིས་སོ། །གཡོན་དང་ཅིག་ཤོས་ཀྱི་ངོས་སུ་གནས་པའི་རྩ་དག་གི་དབུས་ཨ་ཝ་དྷཱུ་ཏཱི་རུ་བྱ་བ་དཔའ་བོ་ལ་སོགས་པའི་ཁམས་རྒྱས་པ་ལ་སོགས་པ་སྟེ་དེར་ངེས་པར་བྱས་པ་རྣམས་སོ། །དབུས་སྨོས་པས་ནི་ཨ་ཝ་དྷཱུ་ཏཱི་རུ་ཡང་ཨཱ་ལི་དང་ཀཱ་ལི་དག་འབབ་པར་གསལ་བར་མཛད་དོ། །སྲིན་པོ་ནི་གཏུམ་མོ་སྟེ། དུས་ཀྱི་མེའི་རང་བཞིན་ཉིད་ཀྱིས་ཕུང་པོ་ལ་སོགས་པ་མི་དམིགས་པའི་བདག་ཉིད་དུ་ཟ་བར་རུང་བ་ཉིད་དུ་མཚུངས་པའི་ཕྱིར་སྲིན་པོ་ལྟ་བུའོ། །འོག་གི་ཆ་རྣམས་སུ་སྟེ་ལྟེ་བའི་འོ། །འདི་སྐད་བཤད་དེ་ལ་ལ་ནཱ་ར་དང་ར་ས་ནཱ་ར་དང་ཨ་ཝ་དྷཱུ་ཏཱི་རུ་ཡང་རླུང་འབྱུང་བ་ན་སྟེང་དུ་ཕྱོགས་པའི་རླུང་གི་རང་བཞིན་མི་གསལ་བའི་ངོ་བོ་ཅན་དབྱངས་བཅུ་དྲུག་དང་ཀ་ལ་སོགས་པ་སུམ་ཅུ་རྩ་གསུམ་མ་འཁྲུགས་པ་དང་འཁྲུགས་པ་རྣམས། རིམ་པ་དང་རིམ་པ་མ་ཡིན་པས་རེ་རེར་ཡང་ཁམས་རྣམས་འབྱིན་པར་བྱེད་སྡུད་པར་བྱེད་དོ། །སྣ་ཚོགས་པའི་རྣམ་པར་རྟོགས་པ་བསལ་བར་གྱུར་པ་ནི་དེའི་རྗེས་སུ་འཇུག་པའི་ཕྱིར་འདི་རྣམས་ཀྱང་སྣ་ཚོགས་པ་འབྱུང་བའོ། །འཇུག་པ་ན་ནི་འོག་ཏུ་ཕྱོགས་པ་རྣམས་དེ་ལྟར་ཁོ་ནར་འཇུག་པར་བྱེད་སྤྲོ་བར་བྱེད་དོ། །རྩ་དང་པོ་དག་ནི་རྀ་རཱྀ་ལ་ལཱྀ་ཀྵ་རྣམས་རླུང་ལ་ཐིམ་པ་རྣམས་འབབ་ཀྱི་ཤས་ཆེར་ནི་མ་ཡིན་ནོ་ཞེས་པས་དེ་རྣམས་དོར་བ་དག་ཏུ་གསུངས་ཏེ། དཔེར་ན་ཨཱ་ལི་ཁོ་ན་ཤས་ཆེར་འབབ་པའི་ཕྱིར་ཨཱ་ལི་ལ་ལ་ནཱ་དང༌། ཀཱ་ལི་ཁོ་ནའི་ཕྱིར་ཀཱ་ལི་ར་ས་ནཱ་ཞེས་གཞན་དུ་གསུངས་པ་བཞིན་ནོ། །ཡི་གེ་ཐམས་ཅད་ཀྱང་ཤས་ཆེར་གྱུར་པ་འབབ་པ་ནི་ཨ་ཝ་དྷཱུ་ཏཱིའོ། །ཀྵ་ནི་ཐིམ་སྟེ་དེ་ནི་ཤས་ཆེར་གྱུར་པ་འོག་
ཏུ་ཆ་རྣམས་སུ་ལྷག་པར་གནས་པར་གསུངས་སོ། །དེ་ཉིད་ཀྱི་ཕྱིར་ཤེས་རབ་དང་བཅས་པའི་ཐབས་དག་སྙོམས་པར་འཇུག་པས་ལ་ལ་ནཱིའི་རླུང་དག་ཨ་ཝ་དྷཱུ་ཏཱི་རུ་འཇུག་པ་ན་གཏུམ་མོ་འབར་རོ། །དེ་ཡང་ཕུང་པོ་ལ་སོགས་པ་བསྲེག་ཅིང་སྤྱི་བོར་ཟླ་བ་འཇུ་བར་བྱེད་དོ། །དེ་ཞུ་བ་ཡང་དེ་དང་རོ་གཅིག་པའི་བདེ་བའི་རང་བཞིན་མགྲིན་པར་འབབ་པོ། །དེའི་ཕྱིར་གསུངས་པ་གང་ཚེ་ཞེས་པ་ལ་སོགས་པ་སྟེ། ཆགས་ཆེན་ནི་བདེ་བ་ཆེན་པོ་དགའ་བ་རབ་ཏུ་གྱུར་པའི་གནས་སྐབས་སོ། །ལོངས་སྤྱོད་ནི་བདེ་བ་ཉམས་སུ་མྱོང་བའི་ཕྱིར་རོ། །སངས་རྒྱས་རྣམས་ཀྱི་སྟེ་གཟུགས་ཀྱི་ཕུང་པོ་ལ་སོགས་པའི་བདག་ཉིད་རྣམ་པར་སྣང་མཛད་ལ་སོགས་པ་རྣམས་ཀྱིའོ། །རིམ་གྱིས་འབབ་བཞིན་པ་ནི་ཤེས་རབ་མའི་སྣའི་རྩེ་མོ་དང༌། ཐབས་ཀྱི་རྡོ་རྗེའི་རྩེ་མོར་ཏེ་ནོར་བུར་གང་གི་ཚེ་གནས་པ་དེའི་ཚེ་ཤིན་ཏུ་ཆེས་ལོངས་སྤྱོད་རྫོགས་པར་བཤད་དོ་ཞེས་སྔ་མ་དང་འབྲེལ་ཏེ། ལྷན་ཅིག་སྐྱེས་པའི་དགའ་བ་ཉེ་བར་ལོངས་སྤྱོད་པའི་ཕྱིར་རོ། །གང་གི་ཚེ་ལོངས་སྤྱོད་རྫོགས་པའི་སྐུ་ཡང་སྣའི་རྩེ་མོ་ལས་དང་རྡོ་རྗེའི་རྩེ་མོ་ལས་འཕོས་ཤིང་ནུབ་པ་ནི་བདེ་བ་ཉམས་སུ་མྱོང་བ་རྣམ་པར་འཆད་པའི་ཕྱིར་ན། དེའི་ཚེ་ཤེས་རབ་ཀྱི་བྷ་གའི་པདྨའི་ནང་དུ་སོན་པ་ནི། འགྲོ་ཞིང་འགྲོའོ་ཞེས་པ་ཉུངས་ཀར་ཏེ་ལུང་ཉིད་ཀྱི་ཕྱིར་རོ། །ཡུངས་ཀར་བརྗོད་པས་ཡུངས་ཀར་གྱི་འབྲས་བུའི་ཚད་ཙམ་ཕྲ་མོའི་རྣལ་འབྱོར་ལ་བསྒོམ་པར་བྱའོ་ཞེས་པར་བྱས་སོ། །དེ་གསུངས་པ། རིན་ཆེན་ཆེན་པོ་ཁ་དོག་ལྔ། །ཡུངས་ཀར་གྱི་ནི་འབྲུ་ཚོད་ཙམ། །སྣ་ཡི་རྩེ་མོར་ནན་ཏན་དུ། །རྣལ་འབྱོར་ལས་ནི་རྟག་ཏུ་བསྒོམ། །ཞེས་སོ། །ཡེ་ཤེས་ལྔའི་རང་བཞིན་ཉིད་ཀྱི་ཕྱིར་དཀར་པོ་ལ་སོགས་པ་ཁ་དོག་ལྔའོ། །རྣལ་འབྱོར་ལས་ནི་ཤེས་རབ་དང་ཐབས་སྙོམས་པར་འཇུག་པ་ལས་སོ། །རྟག་ཏུ་ནི་མཚན་མ་འབྱུང་གི་བར་དུའོ། །ཉི་མའི་གཟུགས་ནི་རྔུལ་མང་པོ་འདྲེས་པ་ཉིད་ཀྱི་ཕྱིར་ཏེ། བར་དོའི་སྲིད་པ་ལས་སྐྱེས་པའི་རྣམ་པར་ཤེས་པ་དང་བཅས་པ་ནི་སྤྲུལ་པའི་སྐུའོ། །གང་གི་ཕྱིར་ཕུང་པོ་རྣམས་དང་མིག་
ལ་སོགས་པ་རྣམས་དེས་སྤྲོ་བ་ནི་སྤྲུལ་པའོ། །དེ་ཉིད་ཀྱི་ཕྱིར་སྐྱེ་གནས་ཀྱི་པདྨར་སྤྲོ་བའི་གར་གྱིས་དབང་བྱེད་པའི་ཕྱིར་པདྨ་གར་གྱི་དབང་ཕྱུག་གོ །ཕུང་པོ་ལ་སོགས་པ་རྣམས་རྒྱས་པ་ལ་སོགས་པ་བསྐྱེད་པས་སྨིན་པར་བྱེད་པའི་ཕྱིར་རྒྱལ་པོའོ། །གང་གི་ཚེ་ཡང་ཇི་སྐད་བཤད་པའི་བྱང་ཆུབ་ཀྱི་སེམས་གོམས་པ་ཡིད་བརྟན་པ་ཕུལ་དུ་བྱུང་བ་ལས་འཕོ་བ་མེད་ཅིང་ཉི་མ་ཡང་ནུབ་སྟེ་མི་མཐོང་བ་དང་མི་སྐྱེ་བ་ཁོ་ནར་འགྲོ་བ་དེའི་ཚེ་གང་འབྱུང་བ་དེ་གསུངས་པ། དེ་རུ་ཞེས་པ་ལ་སོགས་པའོ། །ཉི་མ་གཞན་ནི་ལྟེ་བའི་འོག་ཏུ་གནས་པ་སྟེ་དེ་དང་བཅས་པ་ནི་ཡོད་དོ་ཞེས་པ་དགོངས་པའོ། །གང་རྟོགས་པའི་དོན་ཅན་དུ་གསུངས་པ་དེ་རྟོགས་པར་གྱུར་ཅིང་གོང་བུར་གྱུར་པ་སྟོང་པ་ཉིད་དང་སྙིང་རྗེ་དབྱེར་མེད་པ་ཉིད་ཀྱིས་ལྷན་ཅིག་སྐྱེས་པའི་བདེ་བ་ཆེན་པོའི་བདག་ཉིད་ཀྱིས་ན། ཕུང་པོ་ལ་སོགས་པ་རྣམས་དེ་དང་རོ་གཅིག་པ་ཉིད་ཀྱིས་དེ་ཉེ་བར་ལོངས་སྤྱོད་པའི་ཕྱིར། དེ་རྣམས་ཀྱི་ཡང་གནས་སྐབས་ཀྱི་ཁྱད་པར་སྤྲུལ་པ་ལས། ཆོས་དང་བདེ་བ་ཆེན་པོ་དང་ལོངས་སྤྱོད་རྫོགས་པ་དང་སྤྲུལ་པའི་སྐུ་བཞི་རོ་གཅིག་པར་གྱུར་པ་ནི། རྙོག་པ་མེད་པ་སྟེ་ཉོན་མོངས་པའི་རྙོག་པ་དང་བྲལ་བའི་ཕྱིར་རོ། །དེ་ཉིད་ཀྱི་ཕྱིར་འཁོར་བའི་ལམ་འདོད་ཆགས་ལ་སོགས་པ་དང༌། འཕོ་བ་ཡང་འདིས་རྣམ་པར་བཅད་པའོ། །སྤྲོས་པ་ནི་ཤེས་བྱའི་སྒྲིབ་པ་སྟེ། དེ་འདིར་ཉེ་བར་ཞི་བའོ། །དེའི་ཕྱིར་ཞི་བ་སྟེ་དགེ་བའོ། །ཅི་ལྟར་ཉེ་བར་ཞི་བ་ཡིན་ཞེ་ན། གང་གི་ཕྱིར་དངོས་པོ་ལ་སོགས་པར་འཛིན་པ་གཉིས་སྤངས་པའོ། །དེ་ཉིད་ཀྱི་ཕྱིར་མཆོག་འཇིག་རྟེན་ལས་འདས་བའི་ཕུན་སུམ་ཚོགས་པ་སྟེ། སྟོབས་དང་མི་འཇིགས་པ་ལ་སོགས་པའི་ངོ་བོའིའོ། །དག་པ་ནི་སྒྲིབ་པ་གཉིས་ཀྱི་བག་ཆགས་ཆ་ཤས་དང་བྲལ་བའི་ཕྱིར་རོ། །བཤད་པ་ནི་རྒྱུད་གཞན་རྣམས་སུ་ཡང་ངོ༌། །རྒྱུད་ནི་འབྲས་བུའི་རྒྱུད་དོ། །དགོད་དང་ལྷ་དང་ལག་བཅངས་རྒྱུད། །དགོད་པའི་རྒྱུད་ནི་འཕྲུལ་དགའ་བ་རྣམས་ཀྱི་བདེ་བ་ལྟ་བུའོ། །ལྟ་བའི་རྒྱུད་ནི་དཔེར་ན་གཞན་འཕྲུལ་དབང་བྱེད་པ་རྣམས་ཀྱི་བདེ་བ་ལྟ་
བུའོ། །ལག་བཅངས་ཀྱི་རྒྱུད་ནི་དཔེར་ན་དགའ་ལྡན་པ་རྣམས་ཀྱི་བདེ་བ་ལྟ་བུའོ། །དགོད་པ་ལ་སོགས་པ་རྣམས་ལ་འཁྱུད་པའི་ཚུལ་སྲིད་པའི་ཕྱིར་དང་འཁྱུད་པ་ལ་ཡང་དགོད་པ་ལ་སོགས་པ་སྲིད་པའི་ཕྱིར་འཁྱུད་པའི་རྒྱུད་ནང་དུ་འདུས་ཤིང་། དེ་ནི་འཐབ་བྲལ་བ་རྣམས་ཀྱི་བདེ་བ་ལྟ་བུའོ། །གཉིས་གཉིས་ཀྱི་རྒྱུད་སྔར་གསུངས་ཟིན་ཅིང་དཔེར་ན་སུམ་ཅུ་རྩ་གསུམ་པ་རྣམས་དང་རྒྱལ་པོ་ཆེན་པོ་བཞིའི་རིས་པ་རྣམས་དང་མི་རྣམས་ཀྱི་བདེ་བ་ལྟ་བུའོ། །དེ་ལྟར་ཡང་དེ་དང་དེའི་བདེ་བ་རྣམས་དག་པས་ལྷན་ཅིག་སྐྱེས་པའི་དགའ་བ་ཁོ་ན་ཆུང་ངུ་དང་འབྲིང་དང་ཆེན་པོ་དང་ཆེན་པོའི་བདག་ཉིད་དགའ་བ་དང་མཆོག་དགའ་དང་ཁྱད་དགའ་དང་ལྷན་ཅིག་སྐྱེས་པའི་དགའ་བའི་རང་བཞིན་ནི་ཐབས་ཀྱི་རྒྱུད་དེ་བྱང་ཆུབ་ཀྱི་སེམས་ཁོ་ན་རང་བཞིན་གྱིས་རྣམ་པར་དག་པར་བསྟན་ཏོ། །འོན་ཀྱང་འགྱུར་བ་ཉིད་ཀྱིས་ན་ཆགས་པ་སྟེ་ཁྱད་དགའི་མཐར་ཐུག་པས་དང་ཆགས་བྲལ་གྱིས་ཏེ་བདེ་བ་རྣམ་པར་ཆད་པས་ཉེ་བར་བཅོམ་པའོ། །འབྲས་བུའི་རྒྱུད་ནི་བསྟན་པ་ཟ་བར་མཚུངས་པའི་ཕྱིར་ཤིང་སྲིན་ཏེ་ཤིང་སྲིན་འདྲ་བ་ནི་ཤིང་སྲིན་ཏེ། དེ་ནི་ཆགས་པ་དང་ཆགས་བྲལ་དག་ཟོས་ནས་མི་འགྱུར་བ་སྲིད་པ་དང་མྱ་ངན་ལས་འདས་པ་ལ་མི་གནས་པར་གནས་སོ། །གྷུ་ཎ་དང་གྷུ་རྞ་ནི་འཁྱམ་པ་ལའོ། །འཁྱམ་པར་བྱེད་ཅིང་མི་གནས་ཏེ་འདོད་ཆགས་ལ་སོགས་པ་རྣམས་ལའོ་ཞེས་པ་གྷུ་ཎའོ། །དེ་ཁོ་ན་བཅོམ་ལྡན་འདས་རྣལ་འབྱོར་མའི་རང་བཞིན་རྩ་རྣམས་ཐམས་ཅད་ཡང་དག་པར་ཏེ་སྒྲིབ་པ་མེད་པར་བདེ་བ་ཆེན་པོ་དང་རོ་གཅིག་པ་ཉིད་ཀྱིས་ཀུན་ནས་སྦྱོར་བས་མཁའ་འགྲོ་མའི་དྲ་བ་སྡོམ། དོན་གཞན་ཡང་གསུངས་པར་བཤད་དོ་ཞེས་པའོ། །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱ་ཆེར་འགྲེལ་པ། མན་ངག་གི་སྙེ་མར་སྙེ་མ་ཉི་ཤུ་གསུམ་པའོ།། །།