སྙེ་མ་ཉེར་བརྒྱད་པ། རབ་ཏུ་གནས་པ་གསལ་བར་བཤད་པ།
ལྔ་པར་དཀྱིལ་འཁོར་གསུངས་ན་དེའི་རབ་གནས་ནི་མ་གསུངས་ཤིང༌། ཐང་སྐུ་ལ་སོགས་པ་ཡང་དངོས་གྲུབ་ཐམས་ཅད་ཀྱི་རྒྱུ་ཉིད་དུ་གསུངས་ན། འདི་རབ་ཏུ་གནས་པ་མེད་པ་འདི་ནི་མ་ཡིན་ཏེ་ཞེས་པས་དེ་དག་གི་རབ་གནས་གསལ་བའི་ཆེད་དུ་གསུངས་པ། བསྟན་དུ་གསོལ་ཞེས་པ་ལ་སོགས་པའོ། །གཟུགས་བརྙན་དང་པོ་ཏེའི་ཡི་གེ་དང་འཁྲུལ་འཁོར་དང་མཆོད་རྟེན་ལ་སོགས་པ་རྣམས་ལ་དབང་བསྐུར་བར་བྱ་བའི་སློབ་མ་ལ་དམ་ཚིག་དང་ཡེ་ཤེས་སེམས་དཔའ་དག་དེའི་བདག་ཉིད་དུ་གནས་པར་བྱེད་པ་ནི་རབ་གནས་ཏེ་ཆོ་ག་གཞན་དེའི་འཁོར་རོ། །བཟླས་པ་ནི་བསམ་གཏན་སྔོན་མ་ཅན་ཉིད་ཀྱི་ཕྱིར་བཟླས་
བའི་བསམ་གཏན་ནི་བཟླས་པ་བསམ་གཏན་ནོ། །རབ་ཏུ་གནས་པའི་རྒྱུའོ། །སྦྱིན་སྲེག་གི་ལས་ནི་ཉི་ཤུ་དྲུག་པར་གསུངས་པའི་ཆོ་ག་གཞན་ཅི་ལྟར་ཞེས་པ་རྒྱས་པར་བཤད་པའི་ཆེད་དུ་དྲི་བའོ། །རྡོ་རྗེ་ནི་སྟོང་པ་ཉིད་ཡིན་ཞིང༌། དེ་ཁོ་ན་སྙིང་པོ་སྟེ་ཚད་མས་འཐད་པ་ཉིད་ཀྱིས་མཆོག་གང་གི་བདག་ཉིད་ཡིན་པ་དེ་ནི་དེ་སྐད་དོ། །ཆོས་ཐམས་ཅད་རྣམས་ཀྱི་སྟེ། ཕྱིའི་མཚན་སུམ་ཅུ་རྩ་གཉིས་ལ་སོགས་པ་རྣམས་དང༌། ནང་གི་ཐུགས་རྗེ་ཆེན་པོའི་རང་བཞིན་དང་སྟོབས་དང་མངོན་པར་ཤེས་པ་ལ་སོགས་པ་རྣམས་ཀྱི་གཅིག་ཀྱང་འདི་ཡིན་པ་བསྡུས་པ་ཡང་ཡིན་པའོ། །ཆེན་པོ་ནི་ཕུལ་དུ་དབྱུང་དུ་མེད་པ་ཤིན་ཏུ་རྒྱས་པ་ཉིད་ཀྱི་ཕྱིར་རོ། །ཟག་པ་མེད་པ་ཉིད་ཀྱི་ཕྱིར་མཛེས་པའི་དགའ་བ་གང་གི་ཡིན་པ་དེ་ནི་དེ་སྐད་དོ། །དེ་ལྟར་ན་ཡང་སྟོང་པ་ཉིད་དང་སྙིང་རྗེ་དབྱེར་མེད་པ་བདེ་བ་ཆེན་པོའི་རང་བཞིན་སྐུ་བཞིའི་བདག་ཉིད་ཀྱིས་བོད་པ་གསུམ་ནི། སློབ་དཔོན་ཡང་དེ་ཁོ་ན་ཉིད་ཀྱི་བདག་ཉིད་ལ་ལྷག་པར་མོས་པས། འཆད་པར་འགྱུར་བ་རྗེས་སུ་སྒྲུབ་པར་འགྱུར་རོ་ཞེས་བསླབ་པར་དགོངས་པས་སོ། །རྙེད་དཀའ་བ་ཞེས་པ་བོད་པའོ། །འཕྲུལ་ཉིད་དུ་གསུང་དུ་གསོལ་ཏེ། ཕྱིས་སེམས་ཅན་གྱི་བསོད་ནམས་སྟོབས་ཆུང་བ་ཉིད་ཀྱི་ཕྱིར། འདི་ལྟ་བུའི་བསྟན་པ་ག་ལ་ཡིན་ཞེས་དགོངས་པའོ། །སློབ་དཔོན་དེ་ཡང་དེ་ལྟར་རྗེས་སུ་སྒྲུབ་པ་པོ་རྙེད་དཀའོ་ཞེས་མཚོན་ཏོ། །ལས་རྣམས་ཐམས་ཅད་ཅེས་པ་བཟླས་པ་དང་རབ་གནས་དང་དེའི་འཁོར་ས་ཡོངས་སུ་སྦྱོར་བ་ལ་སོགས་པ་རྣམས་བསམ་གཏན་ཁོ་ན་རྗེས་སུ་བསྒྲུབ་པ་ལས་བསྒྲུབ་པར་བྱའོ། །དེ་སྐད་དུ་ནི། རྡོ་རྗེ་ཐེག་པར་སློབ་དཔོན་ནི། །རྣམ་གཉིས་དེ་བཞིན་གཤེགས་པས་གསུངས། །སྔགས་གཙོར་བྱེད་པ་གཅིག་ཏུ་འགྱུར། །གཅིག་ནི་བསམ་གཏན་དཔུང་གཉེན་ཅན། །སྔགས་སྨྲ་ལ་གནས་རྣལ་འབྱོར་པ། །ལྷ་ལ་དམིགས་པ་ལྷུར་ལེན་ཏེ། །དེ་ལས་མཚན་མ་ཐོབ་གྱུར་པས། །རྔུལ་ཚོན་དཀྱིལ་འཁོར་ཀུན་ནས་བྲི། །སྔགས་ཚུལ་ལ་གནས་རྣལ་འབྱོར་པ། །གཉིས་མེད་ཡེ་ཤེས་རྣལ་འབྱོར་ལྡན། །སྒྱུ་མ་ལྟ་བུའི་ལུས་ཀྱིས་ནི། །འཁོར་ལོ་སྒྱུ་མ་ལྟ་བུར་བྲི། །ཞེས་གསུངས་སོ། །བསམ་གཏན་ཙམ་ལ་ཡང་ངོ༌། །དགའ་
བ་ནི་ནུས་པ་ཕུལ་དུ་བྱུང་བ་ཐོབ་པ་ལས་བསོད་ནམས་བསགས་པའི་སློབ་མ་རྗེས་སུ་བཟུང་བ་ལ་སོགས་པའི་དོན་དུ་གསལ་བར་དཀྱིལ་འཁོར་མངོན་པར་སྤྲུལ་པར་བྱའོ་ཞེས་གཞན་དུ་གསུངས་སོ། །དེ་ལྟར་ཡང་རྣམ་པ་འདི་ལྟ་བུ་ནི་བདག་གིས་མི་འཇིགས་པའི་གཞུང་འགྲེལ་དུ་རབ་ཏུ་ཕྱེ་ཟིན་ཏོ། །དེའི་ཕྱིར་ལས་རྣམས་ཐམས་ཅད་ལ་བསམ་གཏན་ཁོ་ན་གཙོ་བོར་ངེས་པར་བསྒྲུབ་པར་བྱའོ། །དེ་ལ་ཞེས་པ་ལས་རྣམས་ཐམས་ཅད་ལ་སྔར་དཔལ་རྡོ་རྗེ་སེམས་དཔའ་བསྙེན་པར་བྱས་པ། ཏིང་ངེ་འཛིན་གསུམ་གྱི་རྗེས་ཐོགས་སུ་ཉིན་པར་དགེ་བ་ལ། བཀྲ་ཤིས་པའི་དཀྱིལ་འཁོར་གྱི་ས་གཞི་ཡང་དག་པར་སྦྱང་བ་བསྒྲུབ་པའི་ཆེད་དུ་དང་པོར་གསུངས་པ། རྡོ་རྗེ་ཞེས་པ་ལ་སོགས་ཏེ། རྡོ་རྗེ་སེམས་དཔའ་བཞིན་དུ་རབ་ཏུ་གསལ་བར་བསྒྱིངས་པ་ཅན། རྡོ་རྗེ་སྙེམས་མའི་ངོ་བོའི་ལས་ཀྱི་ཕྱག་རྒྱ་དང་སྙོམས་པར་ཞུགས་པས་སམ་ཡེ་ཤེས་ཀྱི་ཕྱག་རྒྱ་དང་ལྷན་ཅིག་བདེ་སྟེ་བདེ་བ་དེའི་རང་བཞིན་དུ་གནས་པར་གྱུར་པའི་སློབ་དཔོན་ནོ། །འདིར་གང་ཞིག་ཤེས་རབ་ཟབ་པ་བསྒོམ་པ་ལ་བློ་གྲོས་བྱས་པ་ཆོས་ཐམས་ཅད་སྐྱེ་བ་མེད་པར་བསྒོམ་པ་དེ་ལ་བགེགས་རྣམས་ཐམས་ཅད་དང་སྐྱོན་གཞན་རྣམས་ཀྱང་འཇིག་པར་འགྱུར་ཏོ། །རྨི་ལམ་དུ་ཡང་སྣང་བའི་ལམ་དུ་འགྲོ་བ་མ་ཡིན་ནོ་ཞེས་པས་རིམ་པ་འདི་ཁོ་ན་གླགས་ཚོལ་བ་ཐམས་ཅད་སེལ་བ་ལ་མཆོག་གོ །འདི་ལ་མི་བརྟན་པ་ཡིན་ན་རྣམ་པ་ཐམས་ཅད་དུ་རང་གི་ལྷག་པའི་ལྷའི་རྣལ་འབྱོར་ཁོ་ན་བརྟན་པར་བར་མ་ཆད་པར་ལྷག་པར་མོས་པ་ནི་ང་རྒྱལ་སྟོབས་ཅན་གྱི་རྣལ་འབྱོར་པའི་བགེགས་བཟློག་པ་ལ་སོགས་པ་ཐམས་ཅད་ཕུན་སུམ་ཚོགས་པར་བྱེད་པ་ཁོ་ནའོ། །མོས་པ་ཐ་དད་པ་རྣམས་ཀྱི་དབང་དུ་བྱས་ནས་ལྷ་དང་ཕྱག་རྒྱ་དང་སྔགས་ལ་སོགས་པ་ཐ་དད་པ་དེ་དང་དེ་གསུངས་པ་འབའ་ཞིག་གོ་ཞེས་གསུངས་པས་འཇིག་རྟེན་གསུམ་རྒྱལ་ཞེས་པ་ལ་སོགས་པའོ། །རྡོ་རྗེ་རྐང་པས་ཡོངས་སུ་རྒྱུ། །ཞེས་འཆད་པར་འགྱུར་ཏེ། དེ་དགོད་པ་ནི་ཇི་ལྟར་རྒྱུད་གཞན་དུ་གསུངས་པ་དེ་ཁོ་ནའོ། །ལྷ་མོ་རྣམས་ཀྱི་སྟེ་སྤྱན་མ་ལ་སོགས་པ་ཉིད་ཀྱིས་རྒྱས་པར་འཆད་པར་འགྱུར་བའི་རིག་མ་རྣམས་ཀྱི་ཡང་དགོད་པ་དང༌། གཞུག་པ་མདོར་བསྟན་པ་དེ་ལྟ་ཁོ་ནའོ། །ཁྲོ་བོའི་སྦྱིན་སྲེག་གིས་ཀྱང་བགེགས་རྣམས་ཚར་གཅད་
པར་བྱ་བ་སྟེ། སྦྱིན་སྲེག་གི་ཕྱོགས་ལ་སློབ་མ་སྲུང་བའི་དོན་དུ་དང་པོར་ཞི་བའི་སྦྱིན་སྲེག་ཀྱང་བྱའོ། །དེའི་ཕྱིར་དེའི་ལས་ལ་སོགས་པ་དེ་ཁོ་ནའོ། །བསྙེམས་བཅས་གཉིས་མེད་བདེ་གནས་པ། །ཞེས་མདོར་བསྟན་པའི་རྒྱས་པར་སྟོན་པ། ཕྱག་རྒྱའི་རྣལ་འབྱོར་བྱས་ནས་ཞེས་པའོ། །འཇིག་རྟེན་གསུམ་ལས་རྣམ་རྒྱལ་ཞེས་པ་འདིའི་རྒྱས་པར་སྟོན་པ་ནི། །ཁྲོ་བོ་རྣམ་པར་རྒྱལ་བ་ཞེས་པའོ། །བགེགས་རྣམས་གཞོམ་པའི་ཆེད་དུ་ཁྲོ་བར་མཛད་པས་ན་ཁྲོ་བོ་རྣམས་ཏེ། གཤིན་རྗེ་མཐར་བྱེད་ལ་སོགས་པ་རྣམས་སོ། །དེ་རྣམས་གྱིས་དེ་རྣམས་རྣམ་པར་རྒྱལ་ཏེ་ཟིལ་གྱིས་གནོན་ཏོ་ཞེས་བྱས་ནས་སོ། །གནོད་མཛེས་རྒྱལ་པོ་འདི་དང་རྡོ་རྗེ་ཧཱུཾ་མཛད་བཅོམ་ལྡན་འདས་ཀྱི་སྐུ་མདོག་དང་ཞལ་དང་ཕྱག་དང་ཕྱག་མཚན་ལ་སོགས་པ་ནི་རྡོ་རྗེ་སེམས་དཔའི་མངོན་པར་རྟོགས་པར་རྒྱས་པར་བྱས་སོ། །དེ་རྣམས་ཀྱི་ནི་ཁྲོ་བོ་རྣམས་ཀྱིས་སོ། །འཁོར་དང་བཅས་པ་རྣམས་ཀྱིས་ནི་ཐོབ་པ་རྣམས་ཀྱི་ཞེས་པ་ལྷག་མ་སྟེ། བྱང་ཆུབ་སེམས་དཔའ་ལ་སོགས་པའི་འཁོར་དང་ལྷན་ཅིག་པ་རྣམས་ཀྱིས་ཞེས་པའི་དོན་ཏོ། །བྱིན་གྱིས་བརླབ་པའི་གནས་རྣམས་ཀྱིས། །ཞེས་པ་དང་པོའི་གཅིག་གི་ཚིག་གི་དོན་ལ་གསུམ་པའོ། །ཁྱེད་རྣམས་ཀྱིས་དེ་བཞིན་གཤེགས་པ་ལ་སོགས་པ་རྣམས་ལ་གསོལ་བ་བཏབ་ནས། དེ་རྣམས་ཀྱིས་བྱིན་རླབས་ཀྱིས་སྐྱབས་བསྐྱེད་པར་བྱའོ། །རང་ཉིད་ཀྱིས་བསྲུང་བར་བྱའོ་ཞེས་བསྐུལ་ནས་སོ། །དེ་ལྟར་བཀའ་བསྒོ་བྱས་པ་དེ་རྣམས་སྙིང་གའི་ཟླ་བར་རྡོ་རྗེའི་ལྟེ་བ་ལ་གནས་པའི་ཧཱུཾ་ཡིག་ལ་ནང་དུ་གཞུག་པར་བྱས་ཏེ། འཇིག་རྟེན་གསུམ་ལས་རྣམ་པར་རྒྱལ་བ་དེ་ཡང་ཡེ་ཤེས་སེམས་དཔའི་བདག་ཉིད་དེ་བཞིན་གཤེགས་པ་ཐམས་ཅད་དང་ལྷན་ཅིག་ཁྲོ་བོ་བཀུག་པ་བདག་ཉིད་ལ་ནང་དུ་བཅུག་ནས་ཞེས་འབྲེལ་ལོ། །དེ་ལྟར་རོ་གཅིག་ཏུ་གྱུར་ནས་འཆད་པར་འགྱུར་བའི་རིམ་པས་སའི་ལྷ་མོ་བཀུག་སྟེ། ཨོཾ་བྷཱུ་ཁཾ་ཞེས་པའི་སྔགས་ཀྱིས་ནམ་མཁའ་དང་འདྲ་བ་དང༌། ཧཱུཾ་ལཾ་ཧཱུཾ་ཞེས་པས་རྡོ་རྗེའི་རང་བཞིན་དུ་ས་གཞི་བསྒོམས་ནས། ཨོཾ་མེ་དི་ནཱི་བཛྲཱི་བྷ་བ་བཛྲ་བནྡྷ་ཧཱུཾ་ཞེས་མངོན་པར་བསྔགས་ཏེ། ཨོཾ་ཨཱཿ་ཧཱུཾ་ཞེས་པ་ཡི་གེ་གསུམ་གྱིས་བྱིན་གྱིས་བརླབ་པོ་ཞེས་པས་ས་གཞི་
ཡོངས་སུ་དག་པར་འགྱུར་རོ། །གང་གསུངས་པ། སྔགས་པས་རྡོ་རྗེ་སེམས་བཟླས་ཤིང༌། །རྡོ་རྗེ་ལྟ་སྟངས་ཀྱིས་བལྟ་བྱ། །དཀྱིལ་འཁོར་གྱི་ནི་ས་ཡི་ཆ། སྐྱོན་དང་ལྡན་པའང་དག་པར་བྱེད། །རྟོག་པ་ལ་གནས་སྔགས་པ་ཡིས། །གང་ཞིག་ས་ནི་རྣམ་སྦྱོང་བ། །འདི་ནི་དག་མིན་གསང་དབང་པོ། །བྱང་ཆུབ་སེམས་ནི་རྣམ་སྤངས་པས། །ཞེས་སོ། །དེ་ཡང་འཆད་པར་འགྱུར་བའི་རིམ་པས་འདུས་བྱའོ་ཞེས་ས་གཞི་ཡོངས་སུ་སྦྱང་བ། ཡི་གེ་གསུམ་གྱིས་བྱིན་གྱིས་བརླབ་པ་སྔོན་མ་ཅན་ཉེ་བར་སྡུད་པ་ན། །པདྨའི་སྐོར་བ་ཡང་དེ་སྔོན་མ་ཅན་བྱས་ནས་ས་ཡོངས་སུ་གཟུང་བའི་དོན་དུ་ཉེ་བར་འགྲོའོ་ཞེས་གསུངས་པ། གཡས་པ་ཞེས་པ་ལ་སོགས་པའོ། །རྐང་པའི་མཐིལ་དག་ཏུ་ཧཱུཾ་ལས་སྐྱེས་པའི་རྡོ་རྗེ་འབར་བ་གང་གིས་བཀོད་པ་དེ་ནི་དེ་སྐད་དོ། །ང་རྒྱལ་དང་བཅས་པ་ཡང་བརྟན་པ་སྟེ། སངས་རྒྱས་ཐམས་ཅད་ཀྱི་རང་བཞིན་རྡོ་རྗེ་འཛིན་པའི་ངོ་བོ་ཉིད་ལ། ནང་ཐུགས་རྡོ་རྗེའི་རང་བཞིན་ཡིན་ཡང༌། ཕྱི་རོལ་དུ་ཞལ་རྣམ་པར་འགྱུར་ཞིང་སྨིན་མ་འཁྱོག་པ་ལ་སོགས་པ་རྣམས་ཀྱི་སྒྲོ་བཏགས་པའི་ཁྲོ་བོ། དེ་དག་གིས་སྙིང་གར་གནས་པའི་ཧཱུཾ་ཡིག་ལས་སྤྲོ་བཞིན་པ་ཤིན་ཏུ་ང་རྒྱལ་གྱི་ཧཱུཾ་ཡིག་ཡང་ཡང་དུ་བརྗོད་ཅིང༌། འདི་ཡང་བརྗོད་དེ། ཕྱིར་དེངས་ཤིག་ཅེས་པ་ལ་སོགས་པ་འགྱེས་པར་འགྱུར་ཞེས་པའི་མཐར་ཐུག་པའོ། །ཁྲོ་བོ་ཞེས་པ་ཁྲོ་བོའི་ལྷའི་སྐུ་ཅན་གྱི་སྙིང་གའི་ས་བོན་ལས་ཕྱོགས་རྣམས་སུ་སྤྲོས་པའོ། །དེ་ལྟར་ཞེས་པས་དེའི་ཕྱིར་འདི་ལྟར་བརྗོད་པའོ། །ཕྱག་ན་རྡོ་རྗེ་ཞེས་པ་ལ་སོགས་པས་བདག་ཉིད་ཉེ་བར་སྟོན་ཞིང༌། འགྲོ་བ་ཚར་གཅོད་པ་དང་རྗེས་སུ་འཛིན་པའི་ནུས་པ་འཆད་པར་བྱེད་དོ། །ཇི་སྐད་དུ། དེ་ཁོ་ན་ཉིད་བསྡུས་པར་གསུངས་པ། དེ་ནས་ཕྱག་ན་རྡོ་རྗེས། འཇིག་རྟེན་གྱི་ཁམས་རབ་འབྱམ་སྤྲིན་རྒྱ་མཚོ་རྣམས་ཐམས་ཅད་ན། འཇིག་རྟེན་གསུམ་གྱི་བདག་པོ་དབང་ཕྱུག་ཆེན་པོ་ལ་སོགས་པ་ཇི་སྙེད་པ་དེ་རྣམས་ལྕགས་ཀྱུས་བཀུག་ནས་གསུངས་པ། དེ་བཞིན་གཤེགས་པའི་བསྟན་པ་ལ་གཙུག་ལག་རྣམས་རྟོགས་པར་གྱིས་ཤིག །བདག་གི་བཀའ་ཡང་སྲུངས་ཤིག །དེ་ནས་གང་འཇིག་རྟེན་གྱི་ཁམས་འདི་ན་ལྷ་ཆེན་པོ་དེས་སྨྲས་པ། བཅོམ་ལྡན་འདས་དབང་ཕྱུག་བདག་ལ་ཡང་བཀའ་སྟེར་བ་འདི་སུ་ལགས་བཅོམ་ལྡན་
འདས་ཀྱིས་དབང་ཕྱུག་ཆེན་པོ་ལ་སོགས་པ་རྣམས་ལ་བཀའ་སྩལ་པ། གསུམ་ལ་སྐྱབས་སུ་འགྲོ་བ་དང་དམ་ཚིག་དང་སྡོམ་པ་ལ་གཙུག་ལག་རྣམས་སྒྲུབས་ཤིག །འདི་ནི་གནོད་སྦྱིན་ཕྱག་ན་རྡོ་རྗེ་ཁྲོས་པ་ཁྲོ་བོ་གཏུམ་པོ་བྱང་ཆུབ་སེམས་དཔའ་ཆེན་པོ། རྡོ་རྗེ་འབར་བས་ཁྱེད་རྣམས་དང་ཁམས་གསུམ་པོ་མཐའ་དག་བརླག་པར་བྱས་ན་མི་རུང་ངོ༌། །དེ་ནས་དབང་ཕྱུག་ཆེན་པོས་འཇིག་རྟེན་གསུམ་པོ་མཐའ་དག་གི་བདག་པོ་ཉིད་ཀྱི་ཤེས་པ་ལ་དབང་བས་ཕྱག་ན་རྡོ་རྗེ་ལ་འཇིགས་པ་བསྟན་པའི་དོན་དུ། །གཏུམ་ཞིང་ཁྲོ་བ་ཆེན་པོ་ཉིད། །འཇིགས་པའི་གཟུགས་འཆང་ཆེན་པོ་ཉིད། །འབར་བ་སྤྲོ་བ་ཆེན་པོ་ཉིད། །དྲག་པོའི་གད་རྒྱངས་དགོད་པ་ཆེན་པོ་ཉིད་ཚོགས་པ་རྣམས་དང་ལྷན་ཅིག་སྟོན་ཅིང་སྨྲས་པ། ང་ནི་འཇིག་རྟེན་གསུམ་པོ་མཐའ་དག་གི་བདག་པོ་ཡིན་ན། ཁྱོད་ང་ལ་བཀའ་སྦྱིན་པར་བྱེད་དོ། །དེ་ནས་ཕྱག་ན་རྡོ་རྗེས། རྡོ་རྗེ་རོལ་པ་དང་བཅས་པར་གསོར་ཞིང་། རྣམ་པར་དགོད་ཅིང་གསུངས་པ། ཁོ་སྟེ་རྟོགས་པར་གྱིས་ཤིག །ལུས་སྲུལ་པོ་དང་མིའི་ཤ་ངའི་བཀའ་བཞིན་བྱེད་ན་ཟོ་ཞིག །སྨྲས་པ། ཁྱོད་ཀྱང་ངའི་བཀའ་སྐྱོངས་ཤིག །དེ་ནས་ཕྱག་ན་རྡོ་རྗེས་ཧཱུཾ་ཞེས་གསུངས་པ་ན་འཇིག་རྟེན་གསུམ་གྱི་བདག་པོ་རྣམས་ཐམས་ཅད་ཁ་བུ་བཏུ་འགྱེལ་ལོ། །ལྷ་ཆེན་པོ་ཡང་ས་ལ་འགྱེལ་ཞིང་ཤིའོ། །བཛྲ་ཨུ་ཏྟི་ཥྛ་ཞེས་གསུངས་པ་ན་ལྷ་རྣམས་ལྷའི་བདེ་བ་རྣམས་ཉམས་སུ་མྱོང་བས་ལངས་ཏེ། བཛྲ་ཨཱ་ཡུཿ་ཞེས་པ་ཤི་བ་སླར་འཚོ་བའི་སྙིང་པོས་གསོས་ནས། ཕྱག་ན་རྡོ་རྗེས་ལྷ་ཆེན་པོ་ཞབས་གཡོན་པས་མནན་ནས། གཡས་པས་ཨུ་མའི་ནུ་མའི་ཁུར་འཚིར་རོ། །དེ་ནས་ལྷ་ཆེན་པོ་ཕྱག་ན་རྡོ་རྗེའི་ཞབས་ཀྱི་མཐིལ་རེག་པ་ལས་དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་དང་གཟུངས་དང་རྣམ་པར་ཐར་པའི་སྒོ་རྣམས་ཉམས་སུ་མྱོང་ཞིང༌། ལྷ་ཆེན་པོའི་ལུས་དང་ཨུ་མ་ཡང་བླ་མའི་ཡོན་དུ་ཕྱག་ན་རྡོ་རྗེའི་ཞབས་ཀྱི་མཐིལ་ལ་ཕུལ་ནས། འོག་གི་འཇིག་རྟེན་གྱི་ཁམས་གྲངས་མེད་པ་རྣམས་འདས་ཏེ་ཐལ་བས་གཡོགས་པའི་འཇིག་རྟེན་གྱི་ཁམས་སུ་ཐལ་བའི་དབང་པོ་ཞེས་བྱ་བའི་དེ་བཞིན་གཤེགས་པར་སྐྱེས་སོ། །ལྷ་ལངས་པ་རྣམས་ཀྱང་ཕྱག་ན་རྡོ་རྗེས་རང་གི་དམ་ཚིག་ལ་
གཞག་གོ་ཞེས་སོ། །ཆེན་པོ་ཞེས་པ་ཆེན་པོ་རྣམས་ཀྱང་སྟེ། དོན་ཆེན་པོ་བསྒྲུབ་པའི་ཕྱིར་ལ། རྡོ་རྗེ་རྣམས་ཀྱང་སྟེ། བདུད་རྣམས་ཀྱིས་མི་ཕྱེད་པ་ཉིད་ཀྱི་ཕྱིར་རོ། །བྱེད་པ་རྣམས་ནི་གཡས་བརྐྱང་སྟབས་ལ་སོགས་པ་རྣམས་ཏེ། རྣམས་ཀྱི་དགོད་པ་ནི་ཚུལ་རྣམ་པ་སྣ་ཚོགས་སོ། །དེས་ཡོངས་སུ་བསྐོར་ཞེས་སྦྲེལ་ལོ། །བྱེད་པ་རྣམས་ཀྱང་བདག་གིས་རྡོ་རྗེ་ཕྲེང་བར་རྣམ་པར་སྤྲོས་སོ། །རྡོ་རྗེས་མཚན་པའམ་རྡོ་རྗེའི་རྣམ་པར་བྱེད་པ་ཅན་གྱི་རྐང་པ་ནི་རྡོ་རྗེའི་རྐང་པའོ། །གདུག་པ་ཅན་ཐམས་ཅད་སྐྲག་པར་བྱའོ་ཞེས་པ་ཉེ་བར་བསྡུས་པའོ། །དེ་ནས་དཀྱིལ་འཁོར་གྱི་ས་གཞི་དྲིས་བྱུགས་པར། མེ་ཏོག་ལ་སོགས་པ་རྣམས་དང་གར་དང་གླུ་ལ་སོགས་པ་རྣམས་ཀྱིས་མཆོད་ནས། ལག་པས་རེག་ཅིང་དཀྱིལ་འཁོར་གྱི་བདག་པོའི་སྔགས་བརྒྱ་རྩ་བརྒྱད་དང་ཡི་གེ་བརྒྱད་པ་ལན་བདུན་རྣམས་ཡོངས་སུ་བཟླས་ཏེ། དེ་ཉིད་དུ་མཉམ་པར་གཞག་པའི་ཡིད་ཀྱིས་ཉལ་ནས་ཡོངས་སུ་གཟུང་བར་འགྱུར་རོ། །དེའི་རྗེས་སུ་རབ་དང་གུར་ལ་སོགས་པ་བསྒོམས་ནས། ཁྲོ་བོའི་གཟུགས་སུ་བསྒོམས་པའི་སེང་ལྡིང་ལ་སོགས་པའི་ཕུར་བུ་རྣམས་ཀྱིས་སྔར་བཞིན་དུ་བགེགས་རྣམས་ཕུར་བུས་གདབ་པ་དང་བརྡུང་བ་དག་གིས་ཉེ་བར་ཞི་བར་བྱས་ནས་སོ། །དེ་ནས་ཞེས་པ་ལ་སོགས་པ་ཞེས་པ་པོའི་བར་གཉིས་མདོར་བསྟན་པའོ། །སྔགས་ཞེས་པ་ལ་སོགས་པ་རྒྱས་པར་བསྟན་པའོ། །སྔགས་ཀྱིས་ཚུལ་ཉེ་བར་ཕྱིན་ནས་བཀླག་པར་བྱ་བ་གང་ལས་ཡིན་པ་དེ་ལ་ཕྱག་བྱས་ནས་དེས་རྗེས་སུ་གནང་བས་ཆོ་ག་སྔ་མ་ཡང་རྗེས་སུ་བསྒྲུབ་པོ། །སའི་ལྷ་མོའི་དཀྱིལ་འཁོར་གྱིས་གཞིའི་དབུས་སུ་དྲིའི་དཀྱིལ་འཁོར་ལ་བཾ་ཡིག་ལས་སྐྱེས་པ་བསམས་ནས། ཡེ་ཤེས་སེམས་དཔའི་གཟུགས་བཀུག་སྟེ་དེ་ལ་གཞུག་གོ །སྦྱིན་སྲེག་ལས་ཞེས་པ་ཉེ་བར་མཚོན་པ་སྟེ། དཀྱིལ་འཁོར་གྱི་ལས་ཀྱང་ངོ༌། །དེས་ན་དེའི་སྐབས་སུ་དཀྱིལ་འཁོར་གྱི་ལས་ཞེས་བརྗོད་པར་བྱ་སྟེ། ལྷག་པར་གནས་པ་ཞེས་པ་ལ་སོགས་པའོ། །དེ་ལྟར་ནི་ཨེ་ཧི་ཨེ་ཧི་ཞེས་པས་ཡེ་ཤེས་སེམས་དཔའི་ངོ་བོ་དགུག་པ་རྟོགས་པར་བྱས་སོ། །སུ་སྭཱ་དྷ་ཡ་ཞེས་པ་འདིས་ཤུགས་ཀྱིས་ཉེ་བར་གནས་པའོ། །ཐམས་ཅད་ཀྱིས་ལྷག་པར་གནས་པའོ། །ལྷ་མོ་དེ་དེ་ཉིད་དུ་ཐིམ་
པར་བསམས་ནས་ས་གཞི་འདུས་བྱའོ་ཞེས་པ་གསུངས་པས་གཞི་ཞེས་པ་ལ་སོགས་པའོ་ཞེས་པ་ནི་རྒྱུ་ལས་ཏེ། ས་དག་པར་བྱའོ་ཞེས་པ་བདུད་རྩི་ལྔ་རྣམས་ཀྱིས་བསང་གཏོར་བྱའི། །འདིའི་རྒྱས་པར་བཤད་པ་ནི་བྱུག་ཅེས་པའོ། །ཡང་དག་པར་མཆོད་ནས་ནི་མེ་ཏོག་གི་རྣམ་པ་ལ་སོགས་པས་སོ། །ཕྱག་རྒྱའི་རིག་མ་བཞག་སྟེ་བདུད་རྩི་གཉིས་ཀྱི་དོན་དུའོ། །གདུག་པ་ཞེས་པ་ལ་སོགས་པ་རྗེས་སུ་བརྗོད་ནས་ལྷ་མོས་ཞུ་བའོ། །ལུགས་མ་ནི་གསེར་ལ་སོགས་པའི་རང་བཞིན་ནོ། །འདུས་བྱས་པ་ནི་གསར་པའི་ལས་ཀྱིས་སོ། །ཞེས་གསུངས་སོ་ཞེས་པ་ནི་སྡུད་པར་བྱེད་པ་པོའི་ཚིག་གོ །ཐུན་མོང་ཞེས་པ་ནི་ཞི་བ་ལ་སོགས་པ་རྣམས་ལ་ཡང་ངོ༌། །ཡན་ལག་ཅེས་མདོར་བསྟན་ནས་རྒྱས་པར་སྟོན་པ་སྙིང་གར་ཞེས་པ་ལ་སོགས་པའོ། །ཁྲོས་པའི་ལས་ལ་སྔར་གྱི་རྗེས་སུ་འབྲང་བས་རིག་མ་མཱ་མ་ཀཱི་རུ་བསྒོམ་པར་བྱའོ་ཞེས་ཀྱང་རྟོགས་པར་བྱའོ་ཞེས་པ་འདི་ལྟར་ལས་ཀྱིས་དབྱེ་བ་ལས་སོ་ཞེས་པ་འདིས་མངོན་པར་དགོངས་སོ། འམ་ནི་སྡུད་པ་ལའོ། །རྡུལ་དང་ཁུ་བ་དེ་ལ་བྱུག་པའོ། །འདུ་བྱེད་པ་ནི་ས་རྣམས་ཀྱིའོ། །དེའི་ཕྱིར་ཉེ་བར་སྡུད་དེ། འདི་ལྟར་ཞེས་པའོ། །སྦྱིན་སྲེག་གི་ས་གཞི་ནི་ཕྱི་རོལ་ཏེ། ཕྱི་རོལ་གྱི་དཀྱིལ་འཁོར་གྱིས་གཞི་ཉེ་བར་མཚོན་པའོ། །ནང་གི་སྦྱིན་སྲེག་གི་ས་གཞི་ནི་གསང་བའི་པདྨ་སྟེ། དེར་སྦྱིན་སྲེག་འཁོར་བཅས་ནི་ཉེ་བར་གསུམ་པར་བརྗོད་ཟིན་ཏོ། །འདིར་ནི་ལས་ཀྱི་གཏུམ་མོའི་མེར་མངོན་པར་དགོངས་སོ། །དེ་ནི་རྡོ་རྗེ་དང་ཆུ་སྐྱེས་བསྲུབས་པ་ལས་བྱུང་བའི་མེ་སྟེ། ལས་བྱེད་ཅིང་དགེ་བ་བྱེད་པའོ། །དོན་དམ་པར་དགེ་བ་ཡང་ཐར་པ་སྟེ། འཛིན་པའི་ཚོགས་ཚར་གཅོད་པའོ། །དེ་ཉིད་ཀྱི་ཕྱིར་གཏུམ་མོ་གསུམ་པོ་ཕན་ཚུན་རྗེས་སུ་མཐུན་པ་ཉིད་ཁོ་ནའོ། །དེ་ཉིད་ཀྱི་ཕྱིར་དེ་ཁོ་ན་ལ་མངོན་པར་བསམས་ནས་བྱང་ཆུབ་སེམས་ཞེས་པ་ལ་སོགས་པས་འགྲེལ་པ་གསལ་བར་བྱས་སོ། །འོ་ན་ཅི་དཀྱིལ་འཁོར་གྱི་ཆོ་ག་ལ་ཡང་བུ་མོ་ཁྱད་པར་ཅན་མ་ཡིན་ནམ་ཞེ་ན་གསུངས་པ་དཀྱིལ་འཁོར་ཞེས་པ་ལ་སོགས་པའོ། །འོ་ན་ནང་གི་སྦྱིན་སྲེག་གི་ཆོ་ག་ལ་ནི་རིག་མ་ཉེ་བར་མཁོ་མོད། །དཀྱིལ་འཁོར་གྱི་ཆོ་ག་ལ་དེས་ཅི་བྱ་ཞེ་ན་གསུངས་པ། དཀྱིལ་འཁོར་
ཞེས་པ་ལ་སོགས་པའོ། །དོན་ནི་འདི་ཡིན་ཏེ། ལྷ་ཚིམ་པའི་ཆེད་དུ་སྦྱིན་སྲེག་སྟེ། དེ་རྣམས་ཀྱང་དཀྱིལ་འཁོར་བ་རྣམས་སོ། །དེའི་ཕྱིར་དཀྱིལ་འཁོར་མེད་པར་སྦྱིན་སྲེག་གི་ཆོ་ག་མ་ཡིན་ཏེ། དེ་ཉེ་བར་བསྟེན་པའོ། །གང་དུ་ནང་ཡིན་པ་དེ་ལ་གསང་བ་སྟེ། ནང་གི་བདག་ཉིད་ཆོས་རྣམས་ཀྱི་སྟེ་བྱང་ཆུབ་སེམས་རྡོ་རྗེ་སྤྲོ་བའི་ངོ་བོ་ཅན་ཕུང་པོ་ལ་སོགས་པའི་ལྷ་རྣམས་ཀྱི་དཀྱིལ་འཁོར་ཡང་ཐིག་གདབ་པར་བྱ་སྟེ། ཐུན་མོང་པའི་བུ་མོ་ཉེ་བར་མཁོ་བའི་ཆོ་ག་འདིས་སོ། །ཐིག་གདབ་པ་ནི་ཉི་ཤུ་གསུམ་པར། ལུས་ཀྱི་དཀྱིལ་འཁོར་ཉམས་དགའ་བ། སྒོ་བཞི་ཞེས་པ་ལ་སོགས་པས་བཤད་ཟིན་ཏོ། །འོ་ན་དཀྱིལ་འཁོར་འདི་ལས་སྦྱང་བ་ལ་སོགས་པའི་ཆོ་ག་ཅི་ལྟར་གསུངས་ཤེ་ན་གསུངས་པ། རྣམ་པ་གཉིས་ཞེས་པ་ལ་སོགས་པ་སྟེ། ཇི་སྙེད་པ་ནི་མཐའ་དག་ཉིད་ལའོ། །རང་གི་བའི་དམ་ཚིག་ནི་རྒྱུ་དང་འབྲས་བུའི་གནས་སྐབས་དག་རྟོགས་པའོ། །གནས་སྐབས་གཉིས་ཀ་ཡང་རྟོག་པ་ནི་ཆོས་ཀྱི་དཀྱིལ་འཁོར་བླང་བར་བྱའོ་ཞེས་པའི་དོན་ཏོ། །འདིའི་རྗེས་སུ་འབྲང་བ་ལས་ནི་གདུལ་བྱའི་དབང་ལས་ཐབས་ཀྱི་ཡན་ལག་ཉིད་ཀྱིས་རྡུལ་ཚོན་གྱི་དཀྱིལ་འཁོར་ཏེ། དེ་དང་རབ་ཏུ་འབྲེལ་པ་ཕྱིའི་སྦྱིན་སྲེག་ཀྱང་ངོ༌། །དེ་ཉིད་ཀྱི་ཕྱིར་གསུངས་པ། དེ་ལྟར་རྣལ་འབྱོར་པ་ཞེས་ཏེ། ནང་གི་རྣལ་འབྱོར་དང་ལྡན་པའོ། །གནས་ནི་གསང་བའི་གནས་ལྟེ་བའོ། །ཐབ་ཀྱང་སྟེ་ལྟེ་བའི་དཀྱིལ་འཁོར་དུ་ཞེས་གསུངས་པའི་ཕྱིར་རོ། །དེ་ཉིད་གནས་ཏེ། དེ་དང་མཉམ་པར་མོས་པ་ནི་དེར་གྱུར་པ་སྟེ། ཕར་གྱུར་པ་བཞིན་ནོ། །ཅི་ལྟར་ལས་ཐམས་ཅད་སྒྲུབ་པར་བྱེད་པ་ཡིན་ཞེ་ན་གསུངས་པ། མའི་ཞེས་པ་ལ་སོགས་པའོ། །ནི་སྟེ་གང་གི་ཕྱིར། མེ་ལ་གང་རྣམས་ཀྱི་ཞལ་ཡིན་པ་དེ་རྣམས་ནི་དེ་སྐད་དོ། སྦྱིན་སྲེག་དེ་ཉིད་ལ་ནི་སྦྱིན་སྲེག་གི་རང་བཞིན་ལ་སྟེ། དེའི་དོན་དུའོ། །སྲུབས་པ་ནི་བསྲུབ་ཤིང་ངོ༌། །མི་དགེ་བ་ནི་སྔོན་སྤྱོད་ལ་སོགས་པའོ། །ཁ་རན་ནི་ཁ་ཁྱེར་རོ། །དེའི་ཕྱི་རོལ་གྱི་ཟུར་རྣམས་སུ་ཁྲོ་བོའི་རྡོ་རྗེ་རྩེ་གསུམ་པ་ནི་མངོན་སྤྱོད་ཀྱི་ཐབ་ཁུང་དུའོ། །ཞི་བ་ལ་འཁོར་ལོའམ་རྡོ་རྗེ་རྩེ་གསུམ་པ་རྣམས་སོ། །རྒྱས་པ་ལ་རིན་པོ་ཆེ་རྣམས་སོ། །དབང་དུ་བྱ་བ་ལ་ཆུ་སྐྱེས་དམར་པོས་མཚན་པའི་ལྕགས་ཀྱུ་
རྣམས་སོ། །ལས་ཐམས་ཅད་པ་ལ་རལ་གྲི་རྣམས་སམ་སྣ་ཚོགས་རྡོ་རྗེ་རྣམས་སོ། །ཞི་བའི་ཐབ་དང་འདྲ་བ་ཁྱད་པར་དང་བཅས་པ་ནི་ལས་ཐམས་ཅད་པའི་ཐབ་ཏུ་ཡང་འདིར་ཤེས་པར་བྱའོ། །གཙུག་ཏོར་ནི་འཁོར་ལོའོ། །ཐབ་ཁུང་གི་དབུས་སུ་ལས་དང་རྗེས་སུ་མཐུན་པའི་མཚན་མ་རེ་རེ་སྟེ། ལས་རྣམས་ཐམས་ཅད་ལ་མཚན་མ་བཞིའི་ནང་དུ་བྱས་པའི་ལས་དང་རྗེས་སུ་མཐུན་པའི་གཙོ་བོའི་མཚན་མའོ། །སྦྱིན་སྲེག་ཅས་པ། སྦྱིན་སྲེག་གི་རང་བཞིན་གྱི་ཆོ་ག་ཤེས་པའོ། །ཇི་ལྟར་རིགས་པར་ཤེས་པ་ལས་དང་རྗེས་སུ་མཐུན་པའི་ཕྱོགས་སུའོ། །དགང་གཟར་ཡང་མར་གྱིས་བཀང་ཞིང༌། དེ་ལྟར་གྱུར་པ་དེ་དག་གིས། །དགང་གཟར་གྱི་ཁར་བླུགས་གཟར་གྱི་ཁ་བཞག་ནས་དགང་བླུགས་སོ། །སྦྱིན་སྲེག་ཡོ་བྱད་ནི་བསྲེག་བྱའི་བུད་ཤིང་ལ་སོགས་པའོ། །ཆུ་ནི་ལས་ཐམས་ཅད་པའོ། །དྲག་པོའི་ལས་ནི་གཡས་པ་རོ། །ལས་ཐམས་ཅད་པ་ནི་བདུད་རྩི་འཁྱིལ་པའི་སྔགས་ཏེ། དེས་བཟླས་པའི་ཆུའོ། །དེས་བསང་གཏོར་ཏེ། སྦྱིན་སྲེག་བྱ་བ་ལ་སོགས་པ་དང་ལྷ་ལ་ཡང་གཏོར་མ་དང་ཞལ་བསིལ་ལོ། །ཀུ་ཤའི་རྩེ་མོ་རྣམས་ཀྱིས་ཀུན་དུ་ཕྱོགས་རྣམས་སུ་ཕྱི་མ་དང་ནང་གཡོགས་ནས་ཐབ་ཁུང་དགབ་པར་བྱའོ། །དེ་ནས་ཆོ་ག་བཞིན་ཞེས་པ་ལྷའི་བདག་ཉིད་ཀྱིས་རང་གི་ལྷའི་ས་བོན་གྱིས་ཐབ་ཁུང་བསྐྱེད་དེ། མེ་འབར་བར་རིག་ནས། དེའི་དབུས་སུ་བདག་མེད་པར་དམིགས་ལ། རཾ་ལས་བྱུང་བའི་མེའི་དཀྱིལ་འཁོར་གྲུ་གསུམ་པར། པདྨ་དང་ཉི་མ་ལ་གནས་པ་རཾ་ཡིག་ལས་བྱུང་བའམ་ཡུད་ཀྱིས་རྫོགས་པའི་མེའི་ལྷ་བསྒོམས་ཏེ། དམ་ཚིག་སེམས་དཔའི་སྙིང་གའི་ས་བོན་གྱི་འོད་ཟེར་གྱི་ལྕགས་ཀྱུས་ནམ་མཁར་ཡེ་ཤེས་སེམས་དཔའ་མེ་ལྷ་མེའི་ཕྱོགས་ནས་བྱོན་པ། དྲང་སྲོང་གི་ཚོགས་ཀྱིས་ཡོངས་སུ་བསྐོར་བ་བལྟས་ནས། འབོད་པའི་ཚུལ་གྱིས་གཡས་པ་མི་འཇིགས་པའི་ལག་པའི་མཐེ་བོང་བསྐྱོད་ཅིང་དགུག་པར་བྱ་སྟེ། ཨོཾ་ཨེ་ཧི་ཞེས་པ་ལ་སོགས་པས་སོ། །ཧ་བྱ་མ་ནི་གང་ལྷ་རྣམས་ལ་སྦྱིན་པར་བྱ་བ་སྟེ་ཀ་བྱ་མ་ནི་གང་ལྷ་རྣམས་པའོ། །ཕར་གྱུར་པ་ཡང་མེ་ལྷ་སྟེ། སྒྲུབ་པ་པོའི་སྒྲུབ་པའི་མངོན་པར་འདོད་པའི་གནས་སྐབས་བསྐྱེད་པའི་ཕྱིར་རོ། །བསང་གཏོར་བྱ་སྟེ། ཀུ་ཤའི་རྩེ་མོས་བཟུང་བ་ནི་ལས་ཐམས་ཅད་པའི་ཆུ་ཡིས་སོ། །
སྤྱན་གསུམ་པ་ནི་ཞལ་སོ་སོ་ལའོ། །སྦོམ་ཞིང་ཐུང་བ་ནག་པོ་དང་སེར་པོ་དང་དཀར་པོ་དང་གཡས་དང་ནུབ་དང་བྱང་གི་ཞལ་ཅན་ནོ། །གཞུག་པར་བྱ་བ་ནི་དམ་ཚིག་སེམས་དཔའ་ལ་རོ་གཅིག་ཏུ་གྱུར་པས་སོ། །སྲེག་བླུགས་ནི་དགང་བླུགས་སོ། །དེའི་རྗེས་སུ་ཐམས་ཅད་དེ་ཏིལ་དང་འབྲས་ལ་སོགས་པ་རྣམས་རང་ཉིད་ཇི་ལྟ་བའི་སྔགས་ཀྱིས་སྦྱིན་སྲེག་ཁོ་ན་ནི་ཐམས་ཅད་ཀྱི་སྦྱིན་སྲེག་སྟེ། དེ་བྱས་ནས་སོ། །ཡོངས་སུ་བསྒྱུར་རོ་ནི་མེ་ལྷའོ། །སྦྱོར་བའི་རིམ་པ་ནི་དམ་ཚིག་སེམས་དཔའ་ལ་ཡེ་ཤེས་སེམས་དཔའ་གཞུག་པ་དང༌། དགང་བླུགས་ལ་སོགས་པའོ། །ལྷ་རྣམས་ནི་ཞི་བ་ལ་སོགས་པའི་ལས་དང་རྗེས་སུ་མཐུན་པ་ལས་རྣམ་པར་སྣང་མཛད་ལ་སོགས་པའོ། །འདོད་པའི་དངོས་གྲུབ་ཅེས་པ་མངོན་པར་བསམས་པའི་དངོས་གྲུབ་པོ། །དེ་ནས་བགེགས་མེད་པ་དང་བགེགས་དང་བཅས་པའི་མེ་མཚན་མ་རྣམས་ཀྱིས་མཚོན་པར་བྱའོ་ཞེས་གསུངས་པ། གདུགས་ཞེས་པ་ལ་སོགས་པ་སྟེ། གདུགས་ལ་སོགས་པའི་རོལ་པས་འབར་བ་རྣམས་ནི་རབ་ཏུ་བསྔགས་སོ། །རྩེ་མོ་གསུམ་པ་ནི་ཐ་མའོ། །གཡས་སྐོར་དུ་འབར་བ་ནི་མཆོག་ཏུ་མཚོན་པའོ། །མེ་ལྕེ་མང་བ་ཞེས་པ་ལ་སོགས་པས་བགེགས་མཚོན་པར་བྱེད་པའོ། །བརྩོན་པ་ཞེས་པ་དྲུག་པའི་དོན་ལའོ། །ཨོཾ་ཡིག་སྭཱ་ཧཱ་མཐའ་ཞེས་པ་ནི་རང་གི་སྔགས་ཀྱི་ཡི་གེའི་མཐར། ཞི་བ་ལ་ཤཱ་ནྟིཾ་ཀུ་རུ་སྭཱ་ཧཱ་དང༌། རྒྱས་པ་ལ་རྒྱས་པར་གྱིས་ཤིག་ཨོཾ། དབང་དུ་བྱ་བ་ལ་པ་ཤཾ་ཀུ་རུ་ཧོཿ་དགུག་པ་ལ་དགུག་པར་གྱིས་ཤིག་ཛཿ་ཞེས་སྤེལ་ནས་གླུ་དབྱངས་ཀྱིས་ཡི་གེ་བར་མ་ཆད་པར་སྔགས་བཟླས་སོ། །དྲག་པོ་ལ་ནི་མཱ་ར་ཡ་ཧཱུཾ་ཡང་ན་ཕཊ་ཅེས་སྤེལ་ནས་བརྗོད་པ་དང་ཡི་གེ་བར་མ་ཆད་པར་སྔགས་བཟླས་སོ། །ཞི་བ་ལ་སོགས་པའི་ལས་ཀྱི་སྔགས་ལ་སོགས་པ་འདི་བྱིན་གྱིས་རློབ་པ་པོའི་ལྷ་རྣམ་པར་སྣང་མཛད་ལ་སོགས་པ་རྣམས་ཏེ། དེ་རྣམས་ཇི་ལྟར་རིགས་པར་བྱ་བ་རྣམ་པ་སྣ་ཚོགས་པ་རྣམས་ཀྱིས་མཆོད་པར་བྱའོ། །དེ་ནས་དེ་རྣམས་མངོན་པར་འདོད་པའི་དངོས་གྲུབ་ཀྱི་ཆེད་དུ་ཇི་ལྟར་རིགས་པར་སྐུལ་བའི་ཚིག་གིས་བསྐུལ་བར་བྱའོ། །ཅི་ཞེ་ན་གསུངས་པ། ཐམས་ཅད་ཅེས་པ་ལ་སོགས་པ་སྟེ། ལས་དེ་ཐམས་ཅད་སྲེག་བླུགས་ལ་སོགས་པ་གཞན་རྣམས་ཀྱིས་དང་དེ་ལས་སྐྱེས་པའི་དགེ་བ་རྣམས་ཀྱིས་ཡོངས་སུ་རྒྱས་པའི་
བསམ་པའོ། །ཆོ་ག་འདི་ཐམས་ཅད་ཀྱང་སྦྱིན་སྲེག་གི་དེ་ཁོ་ན་ཉིད་ཀྱིས་ཁྱད་པར་ཅན་བསྒྲུབ་པར་བྱའོ། །སྦྱིན་སྲེག་འཁོར་དང་བཅས་པའི་དེ་ཁོ་ན་ཉིད་ནི་སྟོང་པ་ཉིད་དང་རོ་གཅིག་པ་དེ་ཉིད་དེ། དེའི་ཕྱིར་སྦྱིན་སྲེག་མཁན་པོ་དང་བསྲེག་བྱ་དང་སྦྱིན་སྲེག་སྦྱིན་པའི་ལྷ་ལ་སོགས་པ་རྣམས་སྒྱུ་མ་ཉིད་དུ་མོས་པ་ཁོ་ནས་ཇི་སྐད་བཤད་པའི་ཆོ་ག་ནི་ཡང་དག་པར་མངོན་པར་འདོད་པ་ཕུན་སུམ་ཚོགས་པའི་རྒྱུའོ། །བཤད་ཅེས་པ་ལ་སོགས་པ་ནི་དྲག་པོའི་ལས་ལའོ། །ཞི་བ་ལ་སོགས་པའི་སྦྱིན་སྲེག་ཐམས་ཅད་ཀྱིས་ཞེས་པ་ལ་སོགས་པ་ནི་ཉེ་བར་བསྡུ་པའོ། །དེ་ལས་མངོན་པར་འདོད་པ་སྒྲུབ་པར་བྱེད་དེ་ཞེས་པ་ནི་ཉེ་བར་བསྡུ་བའི་ལྷག་མའོ། །ཞི་བ་ལ་སོགས་པ་འདི་རྣམས་ལ་ཇི་སྐད་བཤད་པ་ལས་གཞན་པའི་ལས་སོ་སོ་ནི་ཁྱད་པར་དང་བཅས་པ་བདག་གིས་འོད་ཀྱི་སྙེ་མར་གསལ་བར་བྱའོ་ཞེས་པས་འདིར་མ་སྤྲོས་སོ། །བཤད་པའི་ས་སྦྱང་བ་ལ་སོགས་པ་རྣམས་ཀྱི་ཁྱད་པར་དང་དེ་རྣམས་ཀྱིས་གསལ་བར་བྱས་པ་ཐིག་གདབ་པ་ལ་སོགས་པའི་ཆོ་ག་དང༌། རབ་གནས་ཀྱི་ཆོ་ག་ནི་དཀྱིལ་འཁོར་གྱི་ཆོ་ག་རྡོ་རྗེའི་ཕྲེང་བར་རྒྱས་པར་བྱས་སོ། །འདིར་ནི་རབ་ཏུ་གནས་པའི་ཆོ་ག་གཙོ་བོའོ། །དེ་སྔོན་མ་ཅན་ལས་རབ་འབྱམ་སྒྲུབ་པའི་དོན་དུ་གསུངས་པ། དེ་ནས་ཞེས་པ་ལ་སོགས་པའོ། །རྣམ་པར་སྣང་མཛད་རྡོ་རྗེ་ཆེན་པོ་ནི་རྡོ་རྗེ་འཛིན་པའོ། །ཡེ་ཤེས་ཀྱི་འཁོར་ལོ་ནི་ཡེ་ཤེས་སེམས་དཔའི་དཀྱིལ་འཁོར་ཏེ། དེའི་སྒྲུབ་བྱེད་ནི་དམ་ཚིག་སེམས་དཔའ་དང་ལྷན་ཅིག་རོ་གཅིག་པར་བྱེད་པ་རྡོ་རྗེ་སྟེ་མི་ཕྱེད་པ་གང་དུ་ཡིན་པ་དེ་ནི་དེ་སྐད་དོ། །རྣམ་པར་སྣང་མཛད་ལ་སོགས་པ་ཐམས་ཅད་ཀྱི་དཀྱིལ་འཁོར་རབ་ཏུ་སྒྲུབ་བྱེད་ཀྱི་ཆེད་དུ་སྦྱོར་བ་ནི་བསྒྲུབ་པ་སྟེ། དེས་ཞི་བ་ལ་སོགས་པའི་ལས་རྣམས་རབ་འབྱམ་གསལ་བར་འགྱུར་བའོ། །གང་སུ་ཞིག་སྟེ་རྣམ་པར་སྣང་མཛད་ལ་སོགས་པ་དཀྱིལ་འཁོར་གྱི་གཙོ་བོར་གཞག་པ་དེའི་དཀྱིལ་འཁོར་ཏེ། རྣམ་པར་སྣང་མཛད་འབྱུང་བ་རྡོ་རྗེ་ཞེས་པ་ལ་སོགས་པར་བརྗོད་པར་བྱ་སྟེ། རྣམ་པར་སྣང་མཛད་ལ་སོགས་པ་འདིར་གཙོ་བོར་མངོན་པར་འབྱུང་ངོ་ཞེས་པ་དང་དེ་བཞིན་དུ་རྡོ་རྗེ་སྟེ་མི་ཚུགས་པ་ཉིད་ཀྱི་ཕྱིར་རོ་ཞེས་བྱས་ནས་སོ། །གང་གི་ཚེ་དེ་བཞིན་གཤེགས་པ་རྣམས་ལས་གཞན་པའི་དཀྱིལ་འཁོར་པ་དབུས་སུ་འཁོར་
ལོའི་དབང་པོར་འགྱུར་བ་དེའི་ཚེ་དེའི་བདག་པོའི་གནས་སུ་དབུས་ཀྱི་དེ་བཞིན་གཤེགས་པ་སྟེ། དེའི་བདག་པོ་ནི་དེའི་སྤྱི་བོར་རོ། །རྡོ་རྗེ་སེམས་དཔའ་ཁོ་ན་ལྷག་པའི་བདག་པོར་གཞག་མོད། གཞན་རྣམས་ཀྱིས་ཅི་བྱ་ཞེ་ན་གསུངས་པ། ཞི་བ་ཞེས་པ་ལ་སོགས་པའོ། འཁོར་ལོ་ཅན་དང་ཡེ་ཤེས་དག་སྟེ། དམ་ཚིག་དང་ཡེ་ཤེས་སེམས་དཔའ་དག་རྣམ་པར་བསྒོམས་པ་རྣམས་ཁོ་ན་མངོན་པར་འདོད་པའི་དངོས་གྲུབ་ཀྱི་ཆེད་དུ་རྣམ་པར་སྣང་མཛད་ལ་སོགས་པ་ནི། འདི་རྣམས་ཀྱི་བདག་པོ་ཉིད་དུ་ངེས་པར་སྦྱོར་རོ་ཞེས་པ་ངེས་པར་སྦྱོར་བ་རྣམས་ཏེ། དེ་རྣམས་ཀྱི་ཞི་བ་ལ་སོགས་པའི་ལས་རྣམས་བྱེད་དོ་ཞེས་པ་ནི་བདག་པོ་གཞན་ཉིད་ཀྱི་དགོད་པའོ། །དབང་པོ་མཆོག་གི་སེམས་ཅན་ལ་ནི་རྡོ་རྗེ་སེམས་དཔའ་བདག་པོ་ཉིད་ཁོ་ནས་ཞི་བ་ལ་སོགས་པའི་ལས་རབ་འབྱམ་མཐའ་དག་འགྲུབ་བོ། །དེ་ཉིད་ཀྱི་ཕྱིར་དེ་ལས་ཅིག་ཤོས་དང༌། དེ་ལ་དགོངས་ནས་མངོན་པར་བརྗོད་པའི་རྒྱུད་བླ་མར། སངས་རྒྱས་བྱང་ཆུབ་སེམས་དཔའ་དང༌། །ཁྲོ་བོ་དང་ནི་རིགས་ཀྱི་ཡུམ། །འོད་ཟེར་ཅན་དང་ཙུནྡཱ་དང༌། །ཤེས་རབ་ཕ་རོལ་ཕྱིན་སོགས་རྣམས། །ཇི་ལྟར་འདོད་པར་བསྒོམ་པ་ཡིས། །དབུས་ཀྱིས་གཙོ་བོར་བརྟགས་པ་སྟེ། །དངོས་པོ་གང་དང་གང་གིས་ནི། །མི་རྣམས་ཡིད་ནི་ཡང་དག་སྦྱོར། །དེ་ཡིས་དེ་ཡི་རང་བཞིན་འགྱུར། །སྣ་ཚོགས་གཟུགས་ཅན་ནོར་བུ་བཞིན། །ཡང་ན་རྡོ་རྗེ་སེམས་དཔའ་ནི། སྣ་ཚོགས་གཟུགས་ཅན་འགྲོ་བའི་གཞི། །ཀུན་མཁྱེན་ཐམས་ཅད་བྱེད་པ་ཀུན། །ཀུན་ལ་ཁྱབ་པ་བདེ་བ་ཆེ། །ཞེས་ཕྱོགས་གཉིས་གསུངས་སོ། །དེ་ལ་དབང་དུ་བྱ་བ་ལ་སོགས་པའི་ལས་རྣམས་ལ་ཕལ་ཆེར་མཐུ་ཕུལ་དུ་བྱུང་བ་གསལ་བར་བྱས་པ་ཉིད་ཀྱིས་ན་སྒྲོལ་མ་བདག་པོ་ཉིད་དུ་སྒོམ་པ་གསུངས་པ། བསྒོམ་པར་བྱ་ཞེས་པ་ལ་སོགས་པ་སྟེ། བྷ་གའི་དབུས་སུ་ནི་ཆོས་འབྱུང་གི་དབུས་སུ་གནས་པའི་ཁང་པ་བརྩེགས་པར་རོ། །དོ་ཤལ་ལ་སོགས་པ་ནི་མིའི་རུས་པ་ལས་བྱུང་བའོ། །སྣ་ཚོགས་རྒྱན་རྣམས་ནི་མགོ་བོ་རློན་པའི་ཕྲེང་བ་ལ་སོགས་པ་རྣམས་སོ། །སྐབས་གསུམ་བདག་པོ་ནི་དབང་པོ་སྟེ་དེས་སོ། །དེ་རྣམས་ཀྱིས་སྐྲག་པའི་ཕྱིར་རོ། །ཀུན་ནས་སྐུག་པའི་ཚངས་པ་ལ་སོགས་པ་རྣམས་ཀྱིས་ཀྱང༌། གང་ལ་ཐལ་མོ་སྦྱར་བར་བྱས་པ་དེ་ནི་
དེ་སྐད་དོ། །འདིས་ནི་ཐལ་མོ་སྦྱར་བར་བྱས་པའི་བདུད་བཞི་མནན་པ་ཉིད་གསུངས་སོ། །གང་ལས་མཆོག་སྟེ་ཁྱད་པར་དུ་འཕགས་པ་ཅི་ཡང་མེད་པ་དེ་ནི་མཆོག་མེད་དོ། །རྣམ་པར་གཙིགས་པ་ནི་སྒེག་པ་ཅན་ཉིད་ཀྱི་ཕྱིར་རོ། །ཆེར་གཙིགས་པ་ནི་གདུག་པ་ཅན་སྐྲག་པར་བྱེད་པ་ལྷུར་ལེན་པ་ཉིད་ཀྱི་ཕྱིར་རོ། །དེ་ཉིད་ཀྱི་ཕྱིར་འཇིགས་སུ་རུང་བའོ། །སྟེང་གི་ཞལ་ཞེས་པ་དང་པོའི་ཞལ་གྱི་སྟེང་དུ་གཉིས་པ་བོང་བུའི་རྣམ་པ་ཉིད་ན་ཡང་ཡིད་དུ་འོང་བའི་གཟུགས་ཅན་ནོ། །རྩེ་གསུམ་ནི་གཡས་ལོགས་སུའོ། །སྒྲོལ་མ་འདིའི་མིང་དུ་བྱ་བ་ཧེ་རུ་ཀའི་ཞེས་པའོ། །བཅོམ་ལྡན་འདས་མ་འདི་ནི་ཧེ་རུ་ཀ་ཕྱག་བཅུ་དྲུག་པའི་གནས་སུ་བདག་པོ་ཉིད་དུ་བསྒོམ་པར་བྱ་ཞིང༌། དཀྱིལ་འཁོར་པའི་ལྷའི་ཁྱད་པར་བསྒོམ་པ་ཡང་དེ་ལྟ་ཁོ་ནའོ། །འདི་ནི་རྒྱུད་འདིར་པྲ་སེ་ནའི་སྒྲོལ་མ་ཞེས་གསུངས་སོ། །གཞན་ཡང་འདི་གཅིག་པུ་ཡང་བསྒོམ་པར་བྱ་བ། དེའི་ཚེ་རང་གི་སྙིང་གར་པདྨ་དང་ཟླ་བ་ལ་གནས་པའི་ཏཱཾ་ཡིག་ས་བོན་གྱི་འོད་ཟེར་གྱིས་བཀུག་པ་མདུན་དུ་ཡང་དག་པར་མཆོད་དེ། ཇི་སྲིད་བཏང་སྙོམས་ཀྱི་བར་དུ་བསྒོམས་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱ་ཏྨ་ཀོ྅ཧཾ། ཞེས་པས་སྟོང་པ་ཉིད་ཀྱི་རྗེས་ཐོགས་སུ། ཆོས་འབྱུང་གི་ནང་སྣ་ཚོགས་ཆུ་སྐྱེས་དང་ཟླ་བ་ལ་ཏཱཾ་ལས་སྐྱེས་པའི་ཨུཏྤལ་དང་བཅས་པའི་ཏཱཾ་ཡོངས་སུ་གྱུར་པ་ལས་བདུད་བཞི་ཞབས་ཀྱིས་མནན་པ་བསམས་ཏེ། གཡོན་པས་དབང་པོ་མནན་ཞིང༌། གཡས་པས་ཉེ་དབང་དང་ཞབས་གཉིས་ཀྱི་དབུས་སུ་དྲག་པོ་དང་ཚངས་པ་དག་གོ །སྙིང་གའི་ས་བོན་གྱི་འོད་ཟེར་གྱིས་བཀུག་པའི་ཡེ་ཤེས་ཀྱི་ལྷ་མོ་བཅུག་པ་ལས་རོ་གཅིག་ཏུ་གྱུར་པ་མཆོག་གི་ཐུགས་རྗེ་དང་ཤེས་རབ་ཀྱི་རང་བཞིན་དུ་ཤིན་ཏུ་ཡུན་རིང་བར་བརྟག་པར་བྱའོ། །དེའི་རྗེས་སུ་དང་བའི་སྒྲོལ་མའི་སྔགས་བཟླས་ཏེ་མངོན་པར་འདོད་པར་བྱེད་དོ། །འདི་ལྟ་བུའི་རྣམ་པའི་རིམ་པ་ནི་ཕྱི་མ་ལ་ཡང་རྟོགས་པར་བྱའོ། །ས་བོན་ལ་སོགས་པའི་དབྱེ་བ་ནི་འཆད་པར་འགྱུར་རོ། །དུ་བ་ནི་ཅུང་ཟད་དམར་བའི་ནག་པོའོ། །འཇམ་པའི་གཟུགས་ཅན་ནི་འཇམ་པའི་དཔལ་ཤིན་ཏུ་སེར་བ་ཅུང་ཟད་ཁྲོས་པ། ཕྱག་ཟུང་གིས་རྡོ་རྗེ་དང་རྡོ་རྗེ་དྲིལ་བུ་འཛིན་པ། ཞལ་གཅིག་པའོ། །ཉི་མའི་དཀྱིལ་འཁོར་ལས་ཞེས་པ་དེའི་སྟེང་གི་ཧཱུཾ་ཡིག་
ལས་སོ། །རྡོ་རྗེ་ནི་ཤེས་རབ་ཉིད་ཀྱི་ཕྱིར་ཏེ། འཇིགས་བྱེད་ནི་ཐབས་ཉིད་ཀྱི་ཕྱིར་རོ། །ཤིན་ཏུ་ཡང་དྲག་ཅིང་འཇིགས་པར་བྱེད་པ་ཉིད་ནི་ཐུགས་རྗེ་ཁོ་ནས་སོ། །དེ་གསུངས་པ། ཉི་མའི་འོད་ཀྱིས་གདུངས་པའི་མཚོ་ཆེན་དང༌། །མཉམ་པའི་སྐུ་ཅན་ཐུགས་རྗེའི་བདག་ཉིད་གང༌། །ནང་དུ་བ་མོ་ལྟ་བུར་བསིལ་ཡིན་ཀྱང༌། །ཕྱི་རོལ་ཁོ་ན་འགྲོ་བར་རྩུབ་པར་འགྱུར། །ཞེས་སོ། །དེའི་ཕྱིར་སྟོང་པ་ཉིད་དང་སྙིང་རྗེ་དབྱེར་མེད་པའི་བྱང་ཆུབ་ཀྱི་སེམས་ནི་རྡོ་རྗེ་འཇིགས་བྱེད་དོ། །མ་ཧེའི་གཟུགས་ཅན་ཞེས་པ་རྩ་བའི་ཞལ་ལ་སྟེ། སྤྲུལ་གྱི་མཆོད་ཕྱིར་ཐོགས་པ་ཅན། །ཚངས་པ་དང་དབང་པོ་དང་ཉེ་དབང་དང་དྲག་པོ་དང་ཉི་མ་དང་གཞོན་ནུ་ལ་སོགས་པ་ཁ་སྦུབ་ཏུ་ཞབས་འོག་ཏུ་ལྷུང་བ་རྣམས་འཇིགས་པར་མཛད་པའོ། །རྭ་གཡས་པར་ཏེ། དེའི་གཡས་ལོགས་སུའོ། །གཡོན་དུ་སྟེ་རྭ་གཡོན་པའི་གཡོན་ལོགས་སུའོ། །བྷི་ནྡཱི་པཱ་ལ་ནི་མདུང་ཐུང་གི་རྣམ་པ་ཅན་རྩེ་མོ་ལ་ཆགས་པའི་རྨ་བྱའི་སྒྲོ་མདོངས་ཅན་ནོ། །ཀ་ཎ་ཡ་ནི་མདུང་ཕྱེད་པའོ། །ཕུབ་ཀྱི་གནས་སུ་ཕུབ་ཆུང་ཞེས་པ་ཁ་ཅིག་ཏུ་འདོན་ཏོ། །རྐང་པ་ནི་མིའིའོ། །ལག་པ་ཡང་མིའིའོ། །ཁམ་ཕོར་ནི་བཏུང་བའི་སྣོད་ཀྱི་ཐོད་པའོ། །ནེ་ཙོའི་གནས་སུ་སེང་གེ་ཞེས་ཁ་ཅིག་ཏུ་འདོན་ཏོ། །ཁྲ་ནི་བོང་ཁྲའོ། །མནྟྲཱི་ནི་ཁྱིམ་བྱའོ། །བྱ་ཆེན་པོ་ནི་མགོ་དང་མཆུ་དཀར་བའི་འོལ་བའོ། །ཞབས་གཡས་པ་བརྒྱད་ཀྱི་འོག་ཏུ་མི་ལ་སོགས་པ་བརྒྱད་རྣམས་སོ། །གཡོན་པའི་ཞབས་བརྒྱད་ཀྱི་འོག་རྣམས་སུ་བྱ་རྒོད་ལ་སོགས་པ་བརྒྱད་རྣམས་སོ། །འདིར་དང་པོར་དུར་ཁྲོད་ལ་སོགས་པར་དམ་ཚིག་བསྟེན་པ་ལ་སོགས་པ་སྔོན་དུ་འགྲོ་བར་རང་གི་སྙིང་གར་པདྨ་དང་ཟླ་བ་ལ་དྷཱིཿ་ཡིག་གི་འོད་ཀྱིས་བཀུག་པའི་དཔལ་རྡོ་རྗེ་འཇིགས་བྱེད་ཡང་དག་པར་མཆོད་དེ། སྟོང་པ་ཉིད་ཇི་སྲིད་པ་བསྒོམས་ནས། ཡུད་ཀྱིས་ཆོས་འབྱུང་དུ་ཡཾ་ལས་སྐྱེས་པའི་རླུང་ལ་ཨཾ་ལས་སྐྱེས་པའི་ཟླ་བར་དྷཱིཿ་ཡིག་ལས་སྐྱེས་པའི་འཇམ་པའི་དཔལ་གྱི་གཟུགས་ཅན་གྱི་བདག་ཉིད་རྒྱུ་རྡོ་རྗེ་འཛིན་པའི་ཐུགས་ཀར་ཨཱཿ་ཡིག་ལས་སྐྱེས་པའི་ཉི་མ་ལ་གནས་པའི་ཧཱུཾ་ལས་སྐྱེས་པའི་རྡོ་རྗེ་ལ་གནས་པའི་ཧཱུཾ་ཡིག་གི་འོད་རྣམས་ཀྱིས་བཀུག་པའི་དཔལ་རྡོ་རྗེ་འཇིགས་བྱེད་ཡང་དག་པར་མཆོད་ནས་བདག་ཉིད་ལ་བཅུག་ཅིང༌། དེ་ཡོངས་སུ་གྱུར་པ་ལས་བདག་ཉིད་ཆོས་འབྱུང་དུ་ཆུ་སྐྱེས་དང་
རླུང་དང་ཉི་མའི་དཀྱིལ་འཁོར་ལ་མི་ལ་སོགས་པ་རྣམས་དང་ཚངས་པ་ལ་སོགས་པ་རྣམས་ཞབས་རྣམས་ཀྱིས་མནན་པའི་འབྲས་བུ་རྡོ་རྗེ་འཛིན་པའི་རང་བཞིན་དཔལ་རྡོ་རྗེ་འཇིགས་བྱེད་བསྒོམ་པར་བྱའོ། །དེའི་རྗེས་སུ་ཨོཾ་ཧྲཱིཿ་ཥྚཱྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་པས་འཆད་པར་འགྱུར་བ་དང༌། ཨོཾ་ཧྲཱིཿ་ཥྚཱྀ་ཝི་ཀྲྀ་ཏཱ་ན་ན་ཧཱུཾ་ཕཊ་ཅེས་པའི་ཡི་གེ་བཅུ་པ་དང༌། ཨོཾ་ཡ་མཱ་ནྟ་ཀ་ཧཱུཾ་ཕཊ་ཅེས་པ་ཡི་གེ་བདུན་པ་དང༌། ཨོཾ་ཡ་མ་རཱ་ཛཱ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡ་ཀྵེ་ཡ་ཙྪ་ནི་རཱ་མ་ཡ་ཕཊ་ཅེས་པ་ཕྲེང་བའི་སྔགས་བཟླས་སོ། །དྲག་པོའི་ལས་ཐམས་ཅད་ཅེས་པ་ཐོབ་པར་བྱེད་པ་ཉིད་ཀྱིས་ཉེ་བར་མཚོན་པ་སྟེ། འཇིག་རྟེན་པ་དང་འཇིག་རྟེན་ལས་འདས་པ་ཐམས་ཅད་འགྲུབ་པའི་ཕྱིར་རོ། །སྟོང་པ་ཉིད་ཀྱི་རྗེས་ཐོགས་སུ་ཡུད་ཀྱིས་སྐྱེད་པར་བྱེད་པའི་ཤིང་རྟའི་དབུས་སུ་པཾ་ལས་སྐྱེས་པའི་པདྨ་ལ་ཨཾ་ལས་སྐྱེས་པའི་ཟླ་བར་མཱཾ་ཡོངས་སུ་གྱུར་པ་འོད་ཟེར་ཅན་གཡས་བརྐྱང་གི་ཟླ་བོའི་སྟབས་ཀྱིས་བཞུགས་པ། གདུག་པ་ཅན་རྣམས་ཀྱི་ཁ་དང་མིག་ངག་འཚེམ་པ། ཞལ་གཡས་པ་སྔོ་བ། གཡོན་པ་དཀར་བའོ། །འདིའི་སྔགས་འཆད་པར་འགྱུར་བ་གཉིས་པོ་མངོན་པར་འདོད་པའི་ཚིག་སྤེལ་བ་བཟླས་སོ། །ནམ་མཁའི་ཁམས་ནི་སྟོང་པ་ཉིད་དོ། །ཆུ་སྐྱེས་དཀར་པོར་ཉི་མ་ལ་པཾ་སེར་པོ་ལས་སྐྱེས་པའི་རྡོ་རྗེ་དང་པཾ་ཡོངས་སུ་གྱུར་པ། ཤིང་ལོ་དང་སྒྲོའི་ཤམ་ཐབས་ཅན། སྦོམ་པ་ཞལ་གཡས་པ་སྔོ་བ། གཡོན་དམར་བ་འོག་ཏུ་བགེགས་རྣམས་བསྒྱེལ་ནས་གཡས་བརྐྱང་ཟླ་བོའི་སྟབས་ཀྱིས་བཞུགས་པ། མི་བསྐྱོད་པས་རྒྱས་བཏབ་པ། སྙིང་གར་གཡོན་པའི་ཁུ་ཚུར་སྡིགས་མཛུབ་ཀྱི་འོག་ཏུ་བགེགས་ཀྱི་ཚོགས་རྣམས་བསྡིགས་ཏེ། གཡས་པ་རྡོ་རྗེ་ཁུ་ཚུར་བརྡེག་པའི་ཚུལ་ཅན་ནོ་ཞེས་པ་རི་ཁྲོད་ལོ་མ་ཅན་གཅིག་གོ །གང་གི་ཚེ་འདི་ཁ་དོག་དཀར་བཟླ་བའི་གཟུགས་ཅན་བདུད་རྩིའི་ཆར་འབེབས་པ་བསྒོམ་པར་བྱ་བ་དེའི་ཚེ་གཉིས་པའོ། །རི་ཁྲོད་མ་གཉིས་པོ་འདིའི་སྔགས་འཆད་པར་འགྱུར་རོ། །ཁྲོ་མོའི་གཟུགས་ནི་དམ་ཚིག་སེམས་དཔའི་ངོ་བོའོ། །ཁྲོ་བོའི་རྒྱལ་པོ་ནི་ཡེ་ཤེས་སེམས་དཔའོ། །རྡོ་རྗེ་དང་རྡོ་རྗེ་དྲིལ་བུ་དང་ལྡན་པའི་ཕྱག་དག་གིས་རང་འདྲའི་ཤེས་རབ་མ་ལ་འཁྱུད་པའོ། །ཕྱག་གཡས་པ་གཉིས་པ་ན་རྩེ་
གསུམ་པ་འཕྱར་བ། གཡོན་པར་ཐོད་པ། རྩ་བའི་ཞལ་དཀར་བ། བྱང་དམར་བ། ནུབ་སེར་བ། གཡས་ནག་པོའོ། །ཡི་དགས་ཆེན་པོ་ནི་འདིར་འཇིགས་བྱེད་དོ། །དེ་སྐད་དུ་ནི་དེ་ཁོ་ན་ཉིད་འདུས་བར། ཀ་ཊ་པུ་ཏ་ན་ཞེས་པ་ལ་སོགས་པའི་བོད་པའོ། །ཉེ་བར་མཚོན་པ་ལས་གཽ་རཱི་ཡང་སྟེ། སྣ་ཚོགས་ཆུ་སྐྱེས་དང་ཟླ་བའི་སྟེང་དུའོ། །ཁ་དོག་དམར་པོ་མཉམ་པའི་འོད་ནི་ཉི་མའི་འོད་དང་དཀྱིལ་འཁོར་ཅན་ནོ། །སངས་རྒྱས་རྣམས་ཀྱིས་མཛེས་པ་ནི་དབུ་ལའོ། །རྟའི་གཟུགས་ནག་པོ། །ཕྱག་གཡས་པ་ན་ལྕགས་ཀྱུ་དང་རལ་གྲི་དག །གཡོན་པ་དག་ན་ཞགས་པ་དང་བཅས་པའི་སྡིགས་མཛུབ་དང་དྲིལ་བུ་དག་གོ །ཞལ་གཡས་པ་དཀར་བ། གཡོན་སེར་བ། སྟེང་མ་རྟའི་ཞལ་ལྗང་གུའོ། །ཕག་གདོང་མ་སེར་མོ། གཡས་དག་ན་སྡིགས་མཛུབ་དང་བཅས་པའི་ཞགས་པ་དང་རྡོ་རྗེ་དག །གཡོན་པ་དག་ན་འཁོར་ལོ་དང་དྲིལ་བུ་དག་གོ །ཞལ་གཡས་པ་ནག་པོ། གཡོན་པ་དཀར་བ། སྟེང་མ་ཕག་ཞལ་དམར་པོའོ། །ཁྱི་གདོང་མ་དམར་པོ། །ཞལ་གཡས་པ་ནག་པོ། གཡོན་པ་དཀར་པོ། སྟེང་མ་ཁྱིའི་གདོང་སེར་མོ། གཡས་པ་དག་ན་ལྕགས་སྒྲོག་དང་རྡོ་རྗེ་དག །གཡོན་དག་ན་འཁོར་ལོ་དང་ལྕགས་ཁྱུད་དག་གོ །སེང་གེ་མ་ལྗང་གུ་ཞལ་གཡས་ནག་པོ། གཡོན་པ་དཀར་བ། སྟེང་མ་ཅུང་ཟད་ནག་པོ་རྗེས་སུ་འབྲེལ་བའི་དམར་བ། གཡས་པ་དགན་དྲིལ་བུ་དང་རྡོ་རྗེ་དག །གཡོན་པ་དག་ན་ལྕགས་ཀྱུ་དང་ཞགས་པ་དག་གོ །བཞི་པོ་འདི་རྣམས་དབུ་སྐྲ་འབར་བ་གྱེན་དུ་བརྫེས་པ། གཡས་བརྐྱང་ཟླ་བོའི་སྟབས་ཀྱིས་རོ་ལ་གནས་པ། སྤྱན་གསུམ་པ། ཁྲོ་བོའི་སྒེག་པ་ཅན། བཞད་པའི་ཞལ་ཅན་ནོ། །འདི་སྐད་གསུངས་ཏེ་གཞལ་ཡས་ཁང་གི་ནང་དུ་པདྨའི་ལྟེ་བའི་ཉི་མ་ལ། བཅོམ་ལྡན་འདས་ཤེས་རབ་དང་བཅས་པ་སྟེ། ཤར་དང་ལྷོ་དང་ནུབ་དང་བྱང་གི་འདབ་མ་རྣམས་ལ་རིམ་པ་ཇི་ལྟ་བར་རྟ་གཟུགས་ལ་སོགས་པ་རྣམས་སོ། །མཚམས་ཀྱི་འདབ་མ་རྣམས་སུ་བདུད་རྩི་ལྔས་གང་བའི་ཆུ་སྐྱེས་ཀྱི་སྣོད་རྣམས་སོ། །དེ་ལྟར་ལྷ་དྲུག་གི་སྙིང་པོ་ཅན་སྒོ་སྐྱོང་མ་དང་བྲལ་བ་ནི་དཀྱིལ་འཁོར་འདིའོ། །འདིའི་སྒོམ་པའི་རིམ་པ་ནི་རིག་པའི་རྒྱལ་པོའི་ཇི་ལྟ་བ་བཞིན་ཏེ།
ཁྱད་པར་ནི་འདིར་བཤད་པའོ། །གཞན་ཡང་འདིའི་རྗེས་སུ་འབྲང་བས་རྟོགས་པར་བྱའོ། །གཞུང་རྒྱ་ཆེ་བའི་འཇིགས་པས་འདིར་མ་སྨྲས་སོ། །བཅོམ་ལྡན་འདས་རྡོ་རྗེ་སེམས་དཔའ་དེའི་སེམས་ཅན་གྱི་མོས་པ་སྣ་ཚོགས་པ་ལས་སྐུ་མདོག་དང་ཞལ་དང་ཕྱག་དང་ཕྱག་མཚན་དང་དབྱིབས་ལ་སོགས་པ་རྣམས་དང་དཀྱིལ་འཁོར་བའི་ལྷ་རྣམས་དང་དེ་རྣམས་ཀྱི་དགོང་པ་ལ་སོགས་པ་མ་ངེས་པ་རྣམས་སོ། །དེ་ཉིད་ཀྱི་ཕྱིར་དེ་ཉེ་བར་མཚོན་པ། ཇི་སྲིད་ཕྱག་ནི་འབུམ་གྱི་བར། །ཞེས་གསུངས་སོ། །ཡི་གེ་དང་ཡི་གེ་རྣམས་ཀྱི་ཕན་ཚུན་འོད་ཟེར་རྣམས་ཀྱིས་སྦྱོར་བ་གང་དུ་ཡིན་པའི་དེ་ཇི་ལྟར་འགྱུར་བ་དེ་ལྟར་བརྒྱན་པའོ། །རང་ཉིད་རྡོ་རྗེ་ཁྲོ་བོའི་གཟུགས་ཅན་གྱིས་བསྒྲུབ་བྱ་ཡང་རྡོ་རྗེ་ཁྲོ་བོའི་གཟུགས་ཐོད་པ་ལ་གནས་པར་བསྒོམས་ནས། དེའི་རྐང་པ་དག་གི་འོག་ཏུ་ཡཾ་ཡིག་ལས་སྐྱེས་པ་རླུང་གི་དཀྱིལ་འཁོར་སྔོན་པ་གཡོ་བའི་བ་དན་གྱིས་མཚན་པ་གཞུའི་དབྱིབས་ཅན་ལ་ཡང་ངོ༌། །གསང་བའི་ཆུ་སྐྱེས་སུ་རཾ་དམར་པོ་ཡོངས་སུ་གྱུར་པ་མེའི་དཀྱིལ་འཁོར་གྲུ་གསུམ་པ་ལ་རཾ་མོ། །སྙིང་གར་ལཾ་ལས་སྐྱེས་པའི་དབང་ཆེན་གྱི་དཀྱིལ་འཁོར་སེར་པོ་རྡོ་རྗེ་ཕྱེད་པས་མཚན་པ་ཟུར་བཞི་པ་ལ་ལཾ་མོ། །མགོ་བོའི་ཆུ་སྐྱེས་ལ་བཾ་ཡིག་ལས་སྐྱེས་པ་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ་ལ་བཾ་ཞེས་པ་རྣམ་པར་བསམས་ཏེ། རླུང་གིས་སྦར་བའི་མེའི་འོད་ཟེར་རྣམས་ཀྱིས་སའི་དཀྱིལ་འཁོར་དང་ཆུའང་ས་བོན་དང་བཅས་པ་ཞུ་བ་ན། ཞུ་བའི་ཁུ་བས་ཨ་ཝ་དྷཱུ་ཏཱིའི་ལམ་ནས་གསང་བའི་པདྨར་གང་ངོ་ཞེས་ཡང་ཡང་བསྒོམས་པས་འཇུའོ་ཞེས་པ་ཆོ་གའོ། །རི་ཞེས་པ་ལ་སོགས་པ་སྟེ། སྟོང་པ་ཉིད་ཀྱི་རྗེས་ཐོགས་སུ་པདྨ་དང་ཉི་མ་ལ་རཾ་ལས་སྐྱེས་པའི་སྙིང་གར་དེ་བཞིན་དུ་རཾ་དང་ལྡན་པ། ཐོད་པ་དང་མགོ་བོའི་ཕྲེང་བ་ལ་སོགས་པའི་རྒྱན་ཅན། གཡས་དག་གིས་རྡོ་རྗེ་དང་རལ་གྲི། གཡོན་དག་གིས་ཁ་ཊྭཱཾ་ག་དང་ཐོད་པ་ཅན། རྩ་བའི་ཞལ་དམར་བ། གཡས་པ་དང་ཅིག་ཤོས་དག་ནག་པོ་དང་དཀར་བ། སྟེང་ཅེ་སྤྱང་གི་ཞལ་སེར་ཞིང་དམར་བའོ། །སྣའི་རྩེ་མོར་ཧཱུཾ་ལས་སྐྱེས་པའི་སྣ་ཚོགས་རྡོ་རྗེ་ཕྲ་མོའི་སྟེང་དུ་ཧཱུཾ་སྟེ། དེ་ལས་འཕྲོས་པའི་སྣ་ཚོགས་རྡོ་རྗེ་ཕྲ་མོ་རྣམས་ཀྱིས་ཕུག་པའི་ཡན་ལག་གི་ཚིགས་རྣམས་སུ་བསྒྲུབ་
བྱའི་ཁྲག་གིས་གཏམས་པའི་ཁྲག་གི་རྒྱུན་ཅེ་སྤྱང་གི་ཞལ་གྱིས་འཐུང་བ་དང༌། རྡོ་རྗེ་མཁའ་འགྲོ་མ་སྤྲོས་པ་རྣམས་ཀྱིས་ཀྱང་སྔགས་ཟློས་པ་སྔོན་མ་ཅན་ཁྲག་འཇིབ་པར་བསྒོམ་མོ། །དེ་ཁོ་ན་ཉིད་མཐའ་དག་གིས་སྔ་མ་བཞིན་དུ་བསྐྱེད་པའོ། །གཟུགས་དང་ཁ་དོག་དང་ཞལ་རྣམས་ཀྱིས་འཇིགས་པ་ལ་སོགས་པ་རྣམས་སོ། །རྩ་བའི་མ་ཧེའི་གདོང་སྟེ། རྭ་ལས་གཡས་པ་དམར་བ། རྭ་ལས་གཡོན་པ་དཀར་བའོ། །སྟེང་གི་ཁྱིའི་གདོང་ཅུང་ཟད་སེར་བའི་དམར་པོ། །ཁྲོས་པ་རྣམ་པར་བསྡམས་པ་སྤྲོ་བ་བྱ་སྟེ། སྙིང་གའི་ཧཱུཾ་ཡིག་ལས་སོ། །ཧཱུཾ་གི་འོད་ཟེར་རྣམས་ཀྱིས་དང་རྡོ་རྗེ་ཁྲོ་བོ་རྣམས་ཀྱིས་བསྒྲུབ་བྱའི་ལུས་ལ་གནས་པའི་ལྷ་བཀུག་ནས། འདི་ལ་སྲུང་བ་བྱེད་ཅེས་བཀའ་བསྒོའོ་ཞེས་པ་ཆོ་གའོ། །རྡོ་རྗེ་ཁྲོ་བོ་དེ་རྣམས་ཀྱིས་འདྲེན་པར་བདག་ཉིད་བསྒོམ་མོ་ཞེས་ཕ་རོལ་དང་འབྲེལ་ལོ། །གསོད་བྱེད་རྣམས་ཞེས་པ་ནི་གསོད་པར་བྱེད་པར་རོ། །དྲལ་བར་བྱེད་པ་ནི་རྡོ་རྗེ་ཁྲོ་བོ་གཞན་རྣམས་ཀྱིས་སོ། །བསྒྲུབ་བྱ་རྒྱུ་མ་ནར་བ་ལས་སློང་བ་ཉིད་དོ། །ཨོཾ་བཛྲ་རཱ་ཀྵ་ས་ཆེ་གེ་བྷ་ཀྵ་ཡ་ཕཊ་ཅེས་ཀློག་ཅིང་ཁྱིའི་ཞལ་གྱིས་བཟའོ། །ཨོཾ་ཧྲཱིཿ་ཞེས་པ་ལ་སོགས་པའི་ཡི་གེ་བཅོ་ལྔ་པ་ནི་མ་ཧེའི་ཞལ་ཅན་གྱི་གཤིན་རྗེའི་གཤེད་ཀྱི་བཟླས་བྱའི་སྔགས་སོ། །བསྐྲད་པའི་ཆེད་དུ་གསུངས་པ། རླུང་ཞེས་པ་ལ་སོགས་པ་སྟེ། རྡོ་རྗེ་མཆེ་བ་ཅན་ནི་རྔ་མོའོ། །ཞོན་པ་ནི་བསྒྲུབ་བྱའོ། །དེའི་ནི་བསྒྲུབ་བྱའིའོ། །རྡོ་རྗེ་ཁྲོ་བོ་དེ་རྣམས་ཀྱིས་རྔ་མོའི་རྐང་པ་རྣམས་སུ་སྦེད་དུ་གཞུག་སྟེ། ཤིང་ལོས་བཅིངས་པའི་རྡུལ་རང་ཉིད་གཞག་པ་དེ་རྣམས་ཀྱིས་སྦེད་པར་འགྱུར་རོ་ཞེས་པའི་དོན་ཏོ། །དེ་ལྟར་གསུངས་པའི་ཆོ་ག་ལས་སོ། ཆོས་མ་ཡིན་པ་ལ་ཞུགས་པའི་མཛའ་བོ་གཉིས་ཆོས་མ་ཡིན་པ་ལས་བཟློག་པའི་ཆེད་དུ་བྱེ་ཞིང་སྡང་བའི་ཆེད་དུ་གསུངས་པ། བྲམ་ཟེ་ཞེས་པ་ལ་སོགས་པ་སྟེ་དགེ་སྦྱོང་ནི་ཤཱཀྱའི་དགེ་སློང་ངོ༌། །འུག་པའི་གཤོག་པ་ལ་བསྒྲུབ་བྱའི་མིང་སྤེལ་ནས། ཨོཾ་ཧྲཱིཿ་ཞེས་པ་ལ་སོགས་པའི་སྔགས་བྲིས་ཏེ། དེས་དཀྲིས་པའི་འཁྲུལ་འཁོར་གཉིས་སོ་སོར་བསྒྲུབ་བྱ་གཉིས་ཀྱི་གནས་སུ་ས་བརྐོས་པ་ལས་དབུགས་བཀག་པས་གཞུག་གོ །འཐབ་བཞིན་པ་ནི་འཐབ་པར་བྱེད་པའི་བདག་ཉིད་ཅན་གྱིས་བསྒྲུབ་བྱ་དག་གོ །སྟོང་པ་ཉིད་ཀྱི་རྗེས་ཐོགས་སུ་སྣ་ཚོགས་པདྨ་དང་ཉི་མ་ལ་ཙཱིའི་ས་བོན་ལས་སྐྱེས་
པའི་རྟ་མགྲིན་ལྗང་གུ་ཅུང་ཟད་སེར་བ། རིན་པོ་ཆེ་སྣ་ཚོགས་པའི་ཅོད་པན་ཅན་འོད་དཔག་ཏུ་མེད་པས་རྒྱས་བཏབ་པ། མདོག་ལྗང་གུའི་རྟའི་ཞལ་ཅན་ཕྱག་བཞི་པ་སྟེ། ལོགས་སོ་སོར་མཐེ་ཆུང་མཐེ་བོས་མནན་ནས་སོར་མོ་བར་མ་གསུམ་བརྐྱང་བ་ལས་བ་དན་གསུམ་པའི་ཚུལ་ལོ། །ལངས་པའི་ཚུལ་གྱིས་གཡོན་པ་གཅིག་གིས་སེང་གེ་དང་འཕྲོག་བྱེད་དག་དང༌། གཉིས་པས་ཚངས་པ་དང་འདོད་པའི་ལྷ་དག་དང༌། གཡས་པས་དཔལ་མོ་དང་འཇིགས་མའི་ལྷ་མོ་དང༌། གཉིས་པས་ཞི་བའི་ལྷ་མོ་དང་དགའ་བ་མོ་མནན་ཏེ། གཡས་བརྐྱང་སྟབས་དང་གཡོན་བརྐྱང་སྟབས་ཀྱིས་ཞབས་བཞི་པའོ། །འདིའི་སྔགས་ནི་ཨོཾ་ཧ་ཡ་གྲཱི་ཝ་རྩཱི་སྭཱ་ཧཱ། ཞེས་པའམ། ཨོཾ་ཧ་ཡ་གྲཱི་ཝ་ཧྲཱིཿ་ཧྲཱིཿ་ཨ་ཧཾ་ཨ་ཧཾ་ཨཱཾ་ཨཱཾ་ཧཱུཾ་ཧཱུཾ་སྭཱ་ཧཱ་ཞེས་པའོ། །ཆོ་གས་ཞེས་པ་འདིས་ཡེ་ཤེས་སེམས་དཔའ་གཞུག་པ་ལ་སོགས་པ་མཚོན་ཏོ། །ཙཱིའི་ས་བོན་གྱི་འོད་རྡོ་རྗེ་རྩེ་གཅིག་པའི་སྦུབ་ཀྱི་རྣམ་པ་རྣམས་ཀྱིས་རྟའི་ཞལ་ནས་ངེས་པར་བྱུང་སྟེ། ཆང་འཚོང་མ་ལ་སོགས་པའི་ཁྱིམ་ན་གནས་པའི་ཆང་དགུག་གོ །རྩཱི་ཞེས་བརྗོད་ཅིང་ཞེས་ཀྱང་ཤེས་པར་བྱའོ། །སྦྱོར་བ་གཞན་གསུངས་པ། བསྒྲུབ་བྱའི་ཞེས་པ་ལ་སོགས་པའོ། །ཀུན་དུ་སྟེ་ཕྱོགས་རྣམས་སོ། །ཡོངས་སུ་ས་བོན་ཞེས་པ་ཡ་ཡིག་གིས་ཏེ། ཡོངས་སུ་གྱུར་པ་དང་ལྡན་པ་རྣམས་ཀྱང་ངོ༌། །འཇིག་པ་ནི་འཇིག་པ་ནའོ། །འདི་གསུངས་ཏེ། རྟ་མགྲིན་གྱི་རྣལ་འབྱོར་དང་ལྡན་པའམ། རྒྱུད་གཞན་དུ་གསུངས་པ་ལས་འཆད་པར་འགྱུར་བའི་འཕགས་པ་མི་གཡོ་བའི་རྣལ་འབྱོར་གྱིས། གླ་རྩི་ལ་སོགས་པའི་དྲི་ནག་པོས་གྲུ་བཞི་པའི་དབུས་སུ་སོ་སོར་ཡ་ཡིག་གི་དབུས་སུ་གནས་པའི་ཐིག་ལེ་བདུན་པོ་རྣམས་ཡཾ་ལས་སྐྱེས་ཤིང་བྱིན་གྱིས་བརླབས་པའི་རླུང་གི་དཀྱིལ་འཁོར་བདུན་གྱི་ངོ་བོ་རྣམས་དང༌། དེ་ལས་སྐྱེས་ཤིང་དེ་ལ་གནས་པ་རི་དགས་ལ་ཞོན་པའི་རླུང་ལྷ་ནག་པོ་འཁོར་དྲུག་ཅན་གྱི་གཙོ་བོ་གཅིག་པ་རྣམས་སྙིང་གནས་ཕྱུང་བའི་ཁྲོ་བོས་ཞགས་པས་བཀུག་པའི་ཡེ་ཤེས་སེམས་དཔའ་དང་གཅིག་པའི་ངོ་བོ་རྣམས་བཅིངས་པར་བསམས་ཏེ། བཛྲ་ཧཱུཾ་བཾ་དྷ་ཞེས་ཀློག་ཅིང་དབུགས་ནང་དུ་བཅུག་པས། ཁམ་ཕོར་ཁ་སྦུབ་པ། ཧཱུཾ་སུཾ་ཧཱུཾ་ལས་སྐྱེས་པའི་རི་རབ་རྩེ་བརྒྱད་པའི་ངོ་
བོས་བཀབ་ནས། དེའི་སྟེང་དུ་ལཾ་ལས་སྐྱེས་ཤིང་རྡོ་རྗེས་མཚན་པ་གྲུ་བཞི་པ་སེར་པོ་སའི་དཀྱིལ་འཁོར་སྣ་ཚོགས་རྡོ་རྗེ་ཆེན་པོས་མནན་པ་བསྒོམས་ལ། དབུགས་བསྡམས་པས་ཐམས་ཅད་གཡས་བརྐྱང་སྟབས་ཀྱི་རྐང་པ་གཡོན་པས་ཉེད་ཅིང་མདུན་དུ་རལ་གྲི་དང་ཞགས་པའི་ལག་པས། རླུང་ལྷ་ལ་བསྡིགས་ཤིང་སྔགས་བཟླས་པས་རབ་གནས་ལ་སོགས་པ་ལ་རླུང་ཆེན་པོ་ཉེ་བར་ཞིའོ། །ཀླུའི་ས་བོན་ནི་ནཾའོ། །གཟིར་བ་ནི་གཟིར་བྱེད་པའོ། །ཧཱུཾ་ཡིག་ནི་དང་པོར་དང་ཐ་མར་གནས་པའོ། །འདབ་མར་གནས་པའི་ཀླུ་བརྒྱད་རྣམས་མཇུག་མ་རྣམས་ལ་དང་ཆུ་ལྷ་ལྟེ་བར་གཟིར་ཅིང༌། འཆད་པར་འགྱུར་བའི་རིམ་པར་བཟླས་པས་ཆར་པ་འབེབས་སོ། །ཉི་མ་དམར་པོའི་མདོག་ལེགས་པར་ཕྱོགས་བཅུ་རྣམས་སུ་འཕྲོ་བའི་འོད་གང་ཡིན་པའི་རྟ་མགྲིན་དེ་ནམ་མཁའི་མཚན་ཅན་ཁྲོས་པར་བདག་ཉིད་བསྒོམས་ནས་ཧཱུཾ་ལས་སྐྱེས་ཤིང་བྱིན་གྱིས་བརླབས་པའི་འབར་བའི་ལྕས། ཆུ་འཁྱིལ་བ་ལ་སོགས་པའི་སྤྲིན་ཆེན་པོ་བདུན་རྣམས་དབུགས་ཀྱིས་བཀུག་པ་ཟོས་ནས་ཕྱིར་འབྱུང་བའི་དབུགས་ཀྱིས་གཏོར་བར་བྱའོ། །གལ་ཏེ་ཧཱུཾ་གིས་བསྡིགས་པ་ལ་བརྩོན་པས་ནང་གི་རྡོ་རྗེ་ཁྲོ་བོའི་ལུས་ཐམས་ཅད་ཀྱི་ཚོགས་རྣམས་སྙིང་གའི་ས་བོན་ལས་སྤྲོས་ནས་མཚོན་ཆ་སྣ་ཚོགས་རྣམས་ཀྱིས་དྲལ་བ་ལ་སོགས་པ་བྱེད་ན་ཤིན་ཏུ་ཆར་ཆེས་པ་ཟློག་པར་བྱེད་དོ། །གནས་ནི་ལུས་སོ། །ཇི་སྐད་བཤད་པའི་སྐུ་མདོག་ལ་སོགས་པ་ཅན་རྣམ་པར་སྣང་མཛད་དུ་བདག་ཉིད་བསམས་ཏེ། དཔྲལ་པ་ལས་སྤྲོས་པ་རཾ་ལས་སྐྱེས་པའི་མེ་ལ་གནས་པ་གཏུམ་པོ་ཁྲོས་པ་ཆེན་པོ་ཇི་སྐད་བཤད་པའི་ཞལ་ལ་སོགས་པ་ཅན་ཁྲོ་བོ་གྲངས་མེད་པས་ཡོངས་སུ་བསྐོར་བས་བགེགས་རྣམས་འཇོམས་པར་བྱེད་དོ། །ཡང་ན་མིའི་ཁྲག་དང་ས་དག་ལས་མིའི་གཟུགས་བརྙན་བྱས་པ་ལ་བསྒྲུབ་བྱའི་བགེགས་རྣམས་དང་རོ་མཉམ་པར་བྱས་ནས་དེ་ལ་སྔ་མ་བཞིན་དུ་བསྒོམས་པའི་ཁྲོ་བོའི་གཟུགས་ཅན་མིའི་རུས་པའི་ཕུར་པས། ཆེ་གེའི་བི་གྷྣཱཾ་ཀཱི་ལ་ཡེ་ཞེས་སྤེལ་ནས་ཕུར་པའི་སྔགས་ཀྱིས་ཕུར་པས་བཏབ་སྟེ། བརྡུང་བའི་སྔགས་ཀྱིས་བརྡུངས་ཤིང་མིག་དགའ་ཆད་པར་འགྱུར་བའི་འོད་ཟེར་ཅན་གྱི་སྔགས་ཀྱིས་ལན་ཉི་ཤུར་མངོན་པར་བསྔགས་ཏེ། ཁྲོ་བོ་གནོད་མཛེས་ཀྱིས། །ཨོཾ་སུཾ་བྷ་ཞེས་པ་བཀའི་
སྔགས་ཀྱིས་བརྡུང་བཞིན་པ་མྱུར་བས་ཚོགས་བདག་གི་ཞལ་དུ་བཅུག་པ་ཉམས་པར་བསྒོམ་མོ། །མཁའ་ལྡིང་ནི་བྱ་ཁྱུང་ངོ༌། །གདོང་བརྒྱ་བ་སྟེ། ཁ་ཅིག་གདོང་སྟོང་ཅན་ནོ། །ཆར་པ་བསྒྲུབས་ནས་སླར་ཡང་བསྒྲུབ་སྟེ། སྤྲིན་གྱི་ཚོགས་རྣམས་བསྒྲུབས་ནས་དེ་རྣམས་ཀྱིས་སོ། །མཆེ་བའི་དུག་ཅན་རྣམས་ཀྱི་སྟེ་ཀླུ་རྣམས་ཀྱི་མི་ནི་དུག་གིས་འབར་བའི་མེའོ། །འཚམ་པ་མེད་པའི་མེ་ཞེས་ཁ་ཅིག་ཏུ་ཀློག་གོ །འདིར་འདི་ནི་མན་ངག་སྟེ། སྟོང་པ་ཉིད་ཀྱི་རྗེས་ཐོགས་སུ་ཡུད་ཀྱིས་པདྨ་རང་གི་ཕྱོགས་ཀྱི་ཀླུའི་ཁ་དོག་ཅན་གྱི་འདབ་མ་བརྒྱད་པ་བསམས་ཏེ། དེའི་ལྟེ་བ་ལ་ཉི་མར་ཧཱུཾ་ལས་སྐྱེས་པའི་རྡོ་རྗེ་བྱ་ཁྱུང་ཞེས་བྱ་བ་རྗེ་བཙུན་མདོག་ནག་པོ། །མཆེ་བ་གཙིགས་པ་འཇིགས་སུ་རུང་བ་གདོང་བཞི་པ་ཕྱག་བརྒྱད་པ་ཁྲོས་པ་ལོ་བཅུ་དྲུག་པའི་རྣམ་པ་ཅན་བསྒོམ་མོ། །དེའི་དང་པོ་སྔོན་པོ་གཡས་པ་དུ་བའི་མདོག །གཡོན་པ་ལྗང་གུ། སྟེང་མཁའ་ལྡིང་གི་གདོང་པ་དམར་པོ། ཉི་མ་བཅུ་གཉིས་ལྟ་བུར་དྲག་པོའི་འོད་ཅན། ཞལ་སོ་སོ་ལ་སྤྱན་གསུམ་པ། གཤོག་པ་གཉིས་དང་ལྡན་པ། ཕྱག་གཡས་པས་རྡོ་རྗེ་གསོར་བ་ལ་བརྩོན་པ། གཡོན་པས་ཞགས་པ་དང་སྡིགས་མཛུབ་བཟུང་བ། གཡོན་དང་གཡས་གཞན་པ་དག་གིས་དབང་པོའི་པགས་པའི་གོས་འཛིན་པ། དེ་བཞིན་དུ་རིམ་པ་ཇི་ལྟ་བར་ཐོད་པ་དང་ཁ་ཊཱཾ་ག་གཟུང་བ། དེ་ལྟར་ལྕགས་ཀྱུ་དང་ཅད་ཏེའུ་འཛིན་པ། རལ་པའི་ཅོད་པན་ཅན། སྣ་ཚོགས་རྡོ་རྗེ་དང་ཟླ་བ་ཕྱེད་པས་མཛེས་པའི་དབུ་རྒྱན་ཅན། ཕྱག་རྒྱ་དྲུག་དང་ལྡན་པ། མགོ་བོའི་ཕྲེང་བ་ཅན། སྟག་གི་པགས་པའི་ཤམ་ཐབས་ཅན། མཆེ་བ་རྣམས་ཀྱིས་མ་མཆུ་འཚིར་བ། གཡས་བརྐྱང་སྟབས་ཀྱི་ཞབས་ཀྱིས་ཆུ་ལྷ་དཀར་པོ་དང་ཀླུ་གཞང་ཡི་མཇུག་མ་མནན་པ་བསྒོམས་ནས། ཤར་དང་བྱང་དང་ནུབ་དང་ལྷོའི་འདབ་མ་རྣམས་ལ་རིམ་པ་ཇི་ལྟ་བར་མཐའ་ཡས་དང༌། ནོར་རྒྱས་དང་འཇོག་པ་དང་པདྨ་རྣམས་དཀར་པོ་དང་སྔོན་པོ་དང་དམར་པོ་དང་ལྗང་གུ་རྣམས་དང༌། དབང་ལྡན་དང་མེ་ལྷ་དང་བདེན་བྲལ་དང་རླུང་གི་ཟུར་རྣམས་སུ་པདྨ་ཆེན་པོ་དང་དུང་སྐྱོང་དང་སྟོབས་ཀྱི་རྒྱུ་དང་མ་དྲོས་པ་རྣམས་སེར་པོ་དང་དུད་ཀ་དང་ལྗང་གུ་དང༌། སེར་མོ་རྣམས་བསྒོམ་མོ། །ཀླུ་འདི་རྣམས་ཐམས་ཅད་གདེངས་ཀ་དམར་པོ་གསུམ་བསྒྲེང་བ། ཐལ་
མོ་སྦྱར་བར་བྱས་པ། བཅོམ་ལྡན་འདས་ལ་བལྟ་བཞིན་པ། བཀའ་ནོད་ཅིང་འཇིགས་པར་གྱུར་པ་རྣམས་བསྒོམ་པར་བྱའོ། །དེ་ལ་ཆུ་བ་དག་ལ་སོགས་པ་དགུ་པོ་རྣམས་ཀྱི་སྙིང་གར་སོ་སོར། ཧཱུཾ་ནཾ་ཧཱུཾ་ཞེས་བསྒོམས་ཏེ། སྔགས་པ་ཁ་ཤར་དུ་བལྟས་པས། རྡོ་རྗེ་བྱ་ཁྱུང་གི་ཐང་སྐུའི་མདུན་དུ། ཨོཾ་བཛྲ་ནཱ་རཱ་ཡ་ཎ་ཞེས་པ་ལ་སོགས་པའི་སྔགས་འབུམ་ཕྲག་གཅིག་བཟླས་སོ། །དེ་ནས་སྔགས་འདི་གྲུབ་པར་འགྱུར་རོ། །གྲུབ་པར་གྱུར་པ་ན་ཁྲོ་བོ་སྒོམ་པ་དང་ལྡན་པ་མི་སྨྲ་བར་ཚངས་པར་སྤྱོད་པ་འོ་མ་དང་འབྲས་ཤཱ་ལའི་བཟའ་བ་ཅན་གྱིས། ཀླུ་རྣམས་ལ་འོ་མའི་ཁྲུས་དང་འོ་མའི་ཟས་སྟེར་ཞིང་ཐུན་སོ་སོར་འོ་མ་ཅན་གྱི་ཤིང་བུད་ཤིང་དང་འོ་མ་དག་གིས་སྦྱིན་སྲེག་བྱེད་ཅིང༌། ཆུ་ལྷ་དང་ཀླུ་རྣམས་ཀྱི་སྔགས་སོ་སོར་ཁྲི་བཟླས་སོ། །ཨོཾ་ཨཾ་ཨ་ན་ནྟཱ་ཡ་ཧཱུཾ་ནཾ་ཧཱུཾ་ཝ་ཪྵ་ཡ་སྭཱ་ཧཱ། ཨོཾ་བཱཾ་བཱ་སུ་ཀ་ཡེ་ཧཱུཾ་ནཾ་ཧཱུཾ་བ་ཪྵ་ཡ་སྭཱ་ཧཱ། ཨོཾ་ཏཾ་ཏ་ཀྵ་ཀ་ཡ་ཧཱུཾ་ནཾ་ཧཱུཾ་ཝ་ཪྵ་ཡ་སྭཱ་ཧཱ། ཨོཾ་པཾ་པདྨ་ཡ་ཧཱུཾ་ནཾ་ཧཱུཾ་ཝ་ཪྵ་ཡ་སྭཱ་ཧཱ། ཨོཾ་མཾ་མ་ཧཱ་པདྨཱ་ཡ་ཧཱུཾ་ནཾ་ཧཱུཾ་ཝ་ཪྵ་ཡ་སྭཱ་ཧཱ། ཨོཾ་ཤཾ་ཤཾ་ཁ་པཱ་ལཱ་ཡ་ཧཱུཾ་ནཾ་ཧཱུཾ་ཝ་ཪྵ་ཡ་སྭཱ་ཧཱ། ཨོཾ་ཀཾ་ཀ་རྐོ་ཊཱ་ཡ་ཧཱུཾ་ནཾ་ཧཱུཾ་ཝ་ཪྵ་ཡ་སྭཱ་ཧཱ། ཨོཾ་ཨཾ་ཨ་ན་བ་ཏ་པྟཱ་ཡ་ཧཱུཾ་ནཾ་ཧཱུཾ་ཝ་ཪྵ་ཡ་སྭཱ་ཧཱ། ཨོཾ་བཾ་བ་རུ་ཎཱ་ཡ། ནཱ་ག་ཨ་དྷི་པ་ཏ་ཡི་ནཱ་གཱ་ན་ཝ་ཪྵ་ཡ་ཧཱུཾ་ནཾ་ཧཱུཾ་སྭཱ་ཧཱ། ཞེས་པའོ། །དེའི་རྗེས་སུ་རྡོ་རྗེ་མཁའ་ལྡིང་གི་གཤོག་པའི་རླུང་རྣམས་ཀྱིས་མཚམས་མེད་པའི་མེ་ཞི་བར་བྱེད་ཅིང༌། མཆུ་བསྣུན་པས་ཀྱང་ཆུ་བོ་བྱེད་དོ་ཞེས་པ་བསྒོམ་ཞིང༌། ཨོཾ་བཛྲ་ནཱ་རཱ་ཡ་ཎ་ཞེས་པ་ལ་སོགས་པའི་སྔགས་བཟླས་སོ། །དེ་ནས་ཞག་བདུན་གྱི་ནང་དུ་ཀླུ་རྣམས་ཐམས་ཅད་ཆུ་ཀུན་ནས་འབབ་པར་བྱེད་དོ། །ཆར་ཆེན་གུ་གུལ་དང་ས་རྫ་རས་དང་སྒོག་སྐྱ་རྣམས་ཀྱིས་བདུགས་པས་ཐང་སྐུ་ལ་གནས་པའི་ཀླུ་རྣམས་སྲེག་ཅིང༌། ཀློག་པ་སྤངས་ནས་བཟླས་བྱ་བཟླས་པས་ཆར་ཆེས་པ་ཟློག་པར་བྱེད་དོ་ཞེས་པའོ། །ཡང་ན་རྡོ་རྗེ་སེམས་དཔའི་རྣལ་འབྱོར་མ་རམ་རྡོ་རྗེ་ཧཱུཾ་མཛད་ཀྱི་རྣལ་འབྱོར་ཅན་ནམ་རང་གི་འདོད་པའི་ལྷའི་རྣལ་འབྱོར་གྱིས་ནམ་མཁའ་ལ་ཧཱུཾ་གཾ་ཧཱུཾ་ཡོངས་སུ་གྱུར་པ་མཁའ་ལྡིང་བཀའ་བྱེད་པ། ཞལ་གྱི་ཆུ་སྟོང་ཕྲག་སྦྱིན་པ་ཀླུ་བརྒྱད་ཅན་བསམས་ནས། ཨོཾ་བཛྲ་ནཱ་རཱ་ཡ་ཎ་ཞེས་པ་ལ་སོགས་པའི་སྔགས་ཀྱིས་བསྐུལ་བར་བྱའོ། །འདི་ཡང་ནམ་མཁར་གནས་པའི་བརྒྱ་བྱིན་ལ་བཀའ་བསྒོ་ཞིང༌། དེ་ཡང་ཆར་
སྤྲིན་པ་རྣམས་ལ་ཆར་པའི་དོན་དུ་བཀའ་བསྒོ་བར་བྱེད་དོ། །བཀའ་ཡང་ཐོས་ནས་ཆུའི་ཆར་པ་རྣམས་ཀྱིས་སྤྲིན་རྣམས་ལ་མེ་གསོད་པ་ལྷུར་ལེན་པར་བསམ་ཞིང༌། ནམ་མཁའ་ལྡིང་ཡང་དེ་ལྟར་གསོད་པར་བྱེད་ཅིང༌། ཆུ་ཀླུང་ཡང་བྱེད་དོ་ཞེས་བསམ་མོ་ཞེས་པའོ། །ནམ་མཁའི་ཁམས་ནི་སྟོང་པ་ཉིད་དོ། །དེར་ཆུ་སྐྱེས་དམར་པོ་དང་ཉི་མ་ལ་ཧྲཱིཿ་ལས་སྐྱེས་པའི་ཨུཏྤལ་དམར་པོ་ཧྲཱིཿ་ཡོངས་སུ་གྱུར་པ་ལས་ཀུ་རུ་ཀུ་ལླེའི་གཟུགས་དམར་པོ་དང་སྔོན་པོ་དང་དཀར་པོ་རྣམས་ཀྱི་རྩ་བ་དང་གཡས་པ་དང་ཅིག་ཤོས་ཀྱི་ཞལ་ཅན། ཕྱག་གཡས་པ་རྣམས་སུ་རལ་གྲི་དང་མདའ་དང་ཌ་མ་རུ་དང་ལྕགས་ཀྱུ་དང་མི་འཇིགས་པའི་ཚུལ་ལོ། །ཉི་མར་གནས་ཞེས་པ་ཉི་མའི་སྟེང་དུ་རོལ་གནས་པའོ། །གོས་ཆེན་པོ་ནི་འདིར་འདོད་པའི་ལྷའི་པགས་པའོ་ཞེས་གསུངས་སོ། །དེ་བླ་རེར་གང་གིས་ལག་པ་གཉིས་ཀྱིས་གཟུང་བ་དེ་ནི་དེ་སྐད་དོ། །དེའི་ཕྱིར་སྒྲོལ་མ་འདི་ཕྱག་བཅུ་གཉིས་པའོ། །དེ་ནས་ཞེས་པ་ལ་སོགས་པ་འབུམ་བཟླས་པའི་རྗེས་ཐོགས་སུའོ། །ཨོཾ་ཀུ་རུ་ཀུལླེ་ཧྲཱིཿ་སྭཱ་ཧཱ། ཞེས་པ་སྔགས་སོ། །རང་གི་ལུས་ལས་ཏེ་སྙིང་གར་གནས་པའི་ཧྲཱིཿའི་ས་བོན་ལས་སོ། །དེའི་ཞེས་པ་བསྒྲུབ་བྱའི་འོ། །ཨོཾ་ཏཱ་རེ་ཏུ་ཏྟཱ་རེ་ཏུ་རེ་སྭཱ་ཧཱ། ཞེས་པའི་ཡི་གེ་བཅུ་པའི་སྔགས་ཏེ། ཁ་དོག་དམར་པོའོ། །དེའི་འོད་ཟེར་རྣམས་ཀྱིས་ཡང་བསྒྲུབ་བྱའི་ཡེ་ཤེས་པ་བཀུག་ནས་བཅུག་སྟེ་སྔགས་བཟླས་སོ། །རྡོ་རྗེ་ནི་རྡོ་རྗེའོ། །སྤྱན་གསུམ་པ་དཀར་པོ་དང་ནག་པོ་དང་དམར་པོའི་རྩ་བ་གཡས་དང་ཅིག་ཤོས་ཀྱི་ཞལ་གསུམ་པའོ། །བསྙེམས་པས་ཞེས་པ་བསྙེམས་པ་དང་ལྡན་པའི་ཕྱིར་བསྙེམས་པ་སྟེ་རྡོ་རྗེ་དྲིལ་བུའོ། །དེའི་སྒེག་པ་དང་བཅས་པར་དྲིལ་བུ་འཛིན་པས་དཀུར་གནས་པའི་ཕྱག་སྟེ། བྱེད་པ་ཞེས་པ་ལྷག་མའོ། །ལུས་ལས་ཕྱུང་བ་སྟེ། སྤྲོས་པ་གང་རྣམས་ཀྱིས་ཡིན་པའི་སངས་རྒྱས་དེ་རྣམས་ཀྱིས་མཛད་པའི་སྤྲིན་གྱི་ཚོགས་གང་ཡིན་པ་དེ་རྣམས་སོ། སེམས་ཅན་ལས་ཕྱུང་བ་ཞེས་ཀློག་པ་ལས་ནི། སེམས་ཅན་ལས་ཏེ་ལུས་ཅན་གྱི་གཟུགས་ལས་ཕྱུང་བ་ཞེས་པའི་དོན་ཏོ། །དབང་བསྐུར་ནི་ཅོད་པན་ནོ། །བཅོམ་ལྡན་འདས་ཀྱིས་ཅོད་པན་ལ་སོགས་པ་རྣམས་ལས་འཛག་པ་སྟེ་སྤྲོས་པ་རྣམས་སོ། །དེ་ལ་མན་ངག་ཏུ་བྱེད་པ་ནི་སྟོང་པ་ཉིད་ཀྱི་རྗེས་ཐོགས་སུ་གཞལ་ཡས་
ཁང་གི་ནང་དུ་སྣ་ཚོགས་པདྨའི་ལྟེ་བར་ཉི་མ་ལ་ཧཱུཾ་ལས་སྐྱེས་པའི་རྡོ་རྗེ་དང་ཧཱུཾ་ཡོངས་སུ་གྱུར་པ་བདུད་བཞི་པོ་གཡས་བརྐྱང་སྟབས་ཀྱིས་མནན་པ་ཕྱག་དྲུག་པ། མགོ་བོ་ལ་སོགས་པའི་རྒྱན་ཅན། དབུ་སྐྲ་དམར་སེར་གྱེན་དུ་བརྫེས་པ། རང་འདྲའི་ཤེས་རབ་དང་བཅས་པའི་རྡོ་རྗེ་སེམས་དཔའོ། །དེའི་ས་བོན་ཁོ་ན་ལས་འདབ་མ་རྣམས་ལ། ཉི་མ་དང་རོ་རྣམས་ལ་ལྷ་མོ་རྣམས་སོ། །དེ་ལ་ཤར་དུ་རྡོ་རྗེ་མཚོན་ཆ་མ་སེར་མོ་སེར་པོ་དང་སྔོན་པོ་དང་ལྗང་གུའི་གཙོ་བོ་དང་གཡས་པ་དང་གཡོན་པའི་ཞལ་ཅན་ནོ། །ལྷོ་རུ་རྡོ་རྗེ་ཀཱི་ལེ་ཀཱི་ལ་དམར་མོ། །དམར་བ་དང་སེར་བ་དང་ལྗང་བའི་ཞལ་གསུམ་པའོ། །ནུབ་ཏུ་རྡོ་རྗེ་སྣུམ་པ་མ། དཀར་པོ་དང་སྔོ་བ་དང་དམར་བའི་ཞལ་གསུམ་པའོ། །བྱང་དུ་རྡོ་རྗེ་སྙེམས་མ་ལྗང་གུ་མ་ལྗང་གུ་དང་དམར་བ་དང་དཀར་བའི་ཞལ་ཅན་ནོ། །ལྔ་ཆར་ཡང་སྤྱན་གསུམ་པ་སྐྲ་གྲོལ་བ་གཅེར་བུ། ཕྱག་རྒྱ་ལྔས་བརྒྱན་པ། ཕྱག་བཞི་པ། བདག་པོ་བཞིན་དུ་རྡོ་རྗེ་ལ་སོགས་པའི་མཚོན་ཆ་འཛིན་པ་རྣམས་བསམ་པར་བྱའོ། །དེའི་རྗེས་སུ་ནམ་མཁའ་ལས་ལྷུང་བའི་རྡོ་རྗེ། ཨོཾ་མ་ཧཱ་ཞེས་པ་ལ་སོགས་པའི་སྔགས་མཐར་ཆེ་གེའི་ཕྱོགས་ཆེ་གེ་རུ་བཛྲ་པཱ་ཏཾ་ནི་ཝ་ར་ཡ་ཕཊ། ཞེས་པ་སྤེལ་ནས་བྱིངས་དང་བཅས་པར་ཟློས་ཤིང༌། རང་ཉིད་དང་སངས་རྒྱས་སྤྲོས་པ་རྣམས་ཀྱིས་རྡོ་རྗེ་རྔུལ་ཕྲ་རབ་ཏུ་ཕྱེ་མར་བྱས་པ་རླུང་ཆེན་པོ་ས་རིང་དུ་འཕེན་པར་བསྒོམ་པས་ངེས་པར་ཟློག་པར་བྱེད་དོ། །བསྒྲུབ་བྱ་ཡང་སྔགས་འདིས་བྱིན་གྱིས་བརླབས་ནས་རྡོ་རྗེ་སེམས་དཔའི་གཟུགས་ལ་སངས་རྒྱས་ཉིད་དུ་དབང་བསྐུར་ནས་དར་དཔྱངས་དང་ཕྲེང་བའི་དབང་བསྐུར་བྱའོ་ཞེས་པའོ། །ནང་གི་བདག་ཉིད་ཅན་གྱི་རྡོ་རྗེ་བྱང་ཆུབ་སེམས་ནོར་བུ་ལས་ཕྱི་རོལ་དུ་ལྷུང་བ་ཟློག་པ་ཞར་ལ་བཤད་པའི་དོན་དུ་གསུངས་པ། བྱས་ན་ཞེས་པ་ལ་སོགས་པའོ། །ཤེས་རབ་དང་ཐབས་དག་སྟོང་པ་ཉིད་དང་རོ་གཅིག་པ་ཉིད་ཀྱིས་མཛེས་པའི་དགའ་བ་ནི་ལེགས་པར་དགའ་བ་སྟེ། དེས་བྱང་ཆུབ་ཀྱི་སེམས་འཆིང་བའོ། །གཏུམ་མོ་གསུམ་ལ་ཡང་དེ་ཁོ་ནས་བདེ་བླག་ཏུ་ཡུན་རིང་དུ་འཆིང་བ་སྟེ། བཙན་ཐབས་ཀྱི་རྣལ་འབྱོར་གྱིས་ནི་དེ་ལྟར་མ་ཡིན་ནོ། །དེས་ན་དེ་བཅིངས་པས་རྡོ་རྗེ་ཟློག་པ་སྟེ། འཆིང་བ་ཁོ་ན་ཟློག་པའོ་ཞེས་པའི་དོན་ཏོ། །དེ་ལྟར་བྱས་ན་སྟེ་ཟློག་པར་གྱུར་པ་ན་གསུངས་པའི་དཔལ་མཆོག་གི་དང་པོའི་
རྣལ་འབྱོར་གྱི་བླ་ན་མེད་པའི་གོ་འཕང་མཆོག་ཏུ་ཟག་པ་མེད་པ་བདེ་བའི་རང་བཞིན་རྡོ་རྗེ་འཛིན་པ་ཉིད་གསལ་བར་འགྱུར་བ་དང་ལྡན་པར་རྣལ་འབྱོར་པ་འགྱུར་རོ། །དཀྱུས་མ་ལས་རབ་འབྱམ་གྱི་དོན་གསུངས་པ། གསོད་ཅེས་པ་ལ་སོགས་པའོ། །འདི་སྟེ་འཁྲུལ་འཁོར་ཞེས་པ་ལྷག་མའོ། །ཤར་དུ་མངོན་དུ་ཕྱོགས་པས་རི་མོ་དྲང་པོར་གཉིས་ཏེ། དེ་བཞིན་དུ་བྱང་དུ་མངོན་པར་ཕྱོགས་པས་སོ། །དབུས་སུ་རི་མོ་ཟླུམ་པོས་རེ་མིག་དགུ་རུ་འགྱུར་རོ། །དེ་ལ་ཡ་ནི་དབུས་སུ་སྟེ། མ་མེ་ད་ཀྵེ་ཤར་ལ་སོགས་པའི་ཕྱོགས་རྣམས་སུ་གཡས་སྐོར་གྱིས་སོ། །ཟུར་གྱི་རེ་མིག་བཞི་རྣམས་སུ་རེ་མི་ག་སོ་སོར། ཧཱུཾ་ཆེ་གེ་ར་ཀྵ་ཞེས་པ་ལ་སོགས་པ་དང་ཧཱུཾ་ཞེས་རབ་ཏུ་སྦྱོར་བའོ། །ཟླུམ་པོའི་རི་མོ་ལས་ཕྱི་རོལ་དུ་ཟུར་རྣམས་སུ་རི་མོ་དྲང་པོ་བཞི་བྱས་པ་ན་རེ་མིག་བཅུ་གཉིས་སོ། །དེ་རྣམས་སུ་ཤར་གྱི་རེ་མི་གནས་བརྩམས་ནས། གཡས་སྐོར་གྱིས། རཱ་ཛཱ་ས་དོ། རུ་ཎ་ཡོ་ནི་ར་ཡ་ཙྪ་ནི་ཞེས་པ་བྲི་སྟེ། སྔགས་ཀྱི་ལྷའི་རྣལ་འབྱོར་གྱིས་སོ། །དེ་ལས་ཡ་མ་རཱ་ཛཱ་ས་དོ་མེ་ཡ། ཡ་མེ་དོ་རུ་ཎ་ཡོད་ཡ། ཡ་ད་ཡོ་ནི་ར་ཡ་ཀྵེ་ཡ། ཡ་ཀྵེ་ཡ་ཙྪ་ནི་རཱ་མ་ཡ་ཞེས་པར་འགྱུར་རོ། །ཞི་བའི་དོན་ཁོ་ན་ལ་ནི་ཡ་གཉིས་དང་ནི་གཉིས་མི་བྲིའོ། །དེའི་གནས་བཞི་རྣམས་སུ་རབ་ཏུ་སྦྱོར་བའོ། །རི་མོ་དེ་ལས་ཕྱི་རོལ་དུ་ཟུར་སོ་སོ་ལ་ཕྱི་རོལ་དུ་ཕྱོགས་པའི་རི་མོ་གཉིས་བྱས་པ་ན་ཕྱི་རོལ་གྱི་རི་མོ་ཟླུམ་པོས་རེ་མིག་བཅུ་དྲུག་རྣམས་སུ་འགྱུར་ཏེ། དེ་རྣམས་ཀྱི་ཤར་ལ་སོགས་པ་གཅིག་གིས་པར་དུ་ཆོད་པའི་རེ་མིག་བརྒྱད་རྣམས་སུ། ཨོཾ་ཧྲཱིཿ་ཥྚྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པའི་སྔགས་གཡོན་སྐོར་གྱིས་ཏེ། ཨོཾ་ཧྲཱིཿ་ཞེས་དང་ཥྚྲཱྀཿ་ཝི་ཞེས། ཀྲྀ་ཏཱ་ཞེས་དང་ནན་ཞེས་དང༌། ཧཱུཾ་ཧཱུཾ་ཞེས་དང་ཕཊ་ཕཊ་ཅེས་དང་སྭཱ་ཞེས་དང་ཧཱ་ཞེས་པའོ། །གཞན་བརྒྱད་རྣམས་སུ་དགོད་པའོ། །ཡི་གེ་རྣམས་ཐམས་ཅད་དབུ་ཕྱི་རོལ་དུ་བསྟན་པའོ། །ཁྲོས་པའི་ལས་ཉིད་ལ་དབུས་ནས་གཡས་སུ་ཕྱུང་སྟེ། གཡོན་སྐོར་གྱིས་ཡི་གེ་དགོད་པའོ། །ཁྲོས་པས་གཤིན་རྗེའི་ཕྱོགས་སུ་ཁ་ཕྱོགས་པས་རང་གི་ཁྲག་དང༌། རོ་བསྲེགས་པའི་ཐལ་བས་བྱ་རོག་ཆེན་པོའི་གཤོག་པའི་འབྲི་སྨྱུག་གིས་བྲིས་ཏེ། གསོད་ལ་གཤིན་རྗེའི་ལུས་ལ་གནས། །སྡང་ལ་མ་ཧེ་རྟ་དག་ལའོ། །བསྐུལ་ལའང་རྔ་མོའི་
རྒྱབ་ལ་གནས། །ཞི་ལ་ཟླ་བའི་དཀྱིལ་འཁོར་དུ། །དབང་ལ་མི་མོའི་སྙིང་གར་རོ། །རྒྱས་ལ་རྟ་ཡི་རྒྱབ་ཏུའོ། །རེངས་པ་དང་དགུག་པ་ལ་སོགས་པ་རྣམས་ལ་མངོན་པར་བརྟག་པར་བྱའོ། །གི་ཝང་ངམ་གུར་གུམ་མམ་གཞན་གྱིས་གྲོ་ག་ལ་སོགས་པ་ལ་ཇི་ལྟར་རིགས་པའི་འབྲི་སྨྱུག་གིས་བྲིས་ཏེ། ཁམ་ཕོར་ཁ་སྦྱར་དུ་འཁྲུལ་འཁོར་གཞག་གོ །བསྟེན་པ་ཁྲི་སྔོན་མ་ཅན་གྱིས་འདི་ཁྱིམ་གང་དུ་བཞག་པ་དེར་འཐབ་མོར་འགྱུར་རོ། །གཤིན་རྗེ་གཤེད་ཀྱི་རྣལ་འབྱོར་གྱིས་འདི་བྲིའོ། །འདིར་ནི་མཆོག་གི་དང་པོའི་རྣལ་འབྱོར་གྱིས་ཀྱང༌། ཨོཾ་ཡ་མ་ཞེས་པ་ལ་སོགས་པ་ཕཊཱི་མཐའ་ཅན་གྱི་སྔགས་བཟླས་པར་བྱའོ་ཞེས་མཚོན་པའི་ཆེད་དུ་གསུངས་སོ། །ཡང་ཞེས་གསུངས་པ་ནི་མྱ་ངན་མེད་པའི་བརྒྱད་པ་ལ་སོགས་པ་ལ་ལྟོས་པས་ཏེ། མྱོས་བྱེད་ཀྱི་འབྲས་བུ་དང་ཐིག་ལེ་དག་ནི་དེར་ཡང་ཤེས་པར་བྱ་བ་དག་གོ །འབྲས་བུའི་ཁུ་བདག་ནི་ཁུ་བ་དང་རྡུལ་དག་གོ །སྒྲ་ཇི་ལྟ་བ་དག་གོ་ཞེས་གཞན་ནོ། །ཨོཾ་ཀུ་རུ་ཀུ་ལླེ་ཧྲཱིཿ་ཆེ་གེ་མོ་མེ་བ་ཤཱི་བྷ་ཝ་ཏུ་ཧྲཱིཿ་སྭཱ་ཧཱ་ཞེས་པ་ཁྲི་བཟླས་ཏེ་སྔགས་གྲུབ་པ་ནའོ། །སྔོན་དུ་འབུམ་བཟླས་པས་ཕྱི་ནས་སྤེལ་ཚིག་གོ །དེ་ནས་ཞེས་པ་ལ་སོགས་པ་ལ་སྟོང་པ་ཉིད་ཀྱི་རྗེས་ཐོགས་སུ་ཆུ་སྐྱེས་དཀར་པོ་དང་ཟླ་བ་ལ་ཨིཾ་ལས་རྫོགས་པའི་ཀླུ་ལྷག་མ་ཅན་དུ་བདག་ཉིད་དེ། གཡས་བརྐྱང་སྟབས་ཀྱིས་གནས་པ་དཀར་པོ་མིའི་གདོང་པ་ཅན། གདེངས་ཀ་སྟོང་ཕྲག་ཅན། ལག་པ་གཉིས་པ། གཡོན་པས་ཡིད་འོད་མ་ལ་རོལ་པ་དང་བཅས་པར་འཁྱུད་པ། གཡས་པས་ཨུཏྤལ་འཛིན་པའོ། །སྙིང་གར་པདྨ་འདབ་མ་བརྒྱད་པ་དཀར་པོའི་ལྟེ་བར་ཟླ་བ་དང་འདབ་མ་རྣམས་ལ། སོ་སོར་གནས་པའི་ཨོཾ་ཡིག་དཀར་པོའི་འོད་ཟེར་རྣམས་ཀྱིས་བདུད་རྩི་ཆར་དུ་འབེབས་ཤིང༌། གདེངས་ཀ་སོ་སོ་དང་མིག་དག་ལས་ངེས་པར་བྱུང་བའི་བདུད་རྩིའི་རྒྱུན་རྣམས་ཀྱིས་མགོ་བོ་ནས་བརྩམས་པའི་ཟིན་པའི་ལུས་རྐྱལ་བར་བྱས་ནས་དུག་མེད་པར་བསམ་མོ། །དེ་ནས་ཞེས་པ་ལ་སོགས་པའི་སྦྱོར་བ་གསུམ་ནི། ཀྱེའི་རྡོ་རྗེ་བཞི་གང་ཡང་རུང་བའི་རྣལ་འབྱོར་གྱིས་སོ། །ཟླ་བ་ལ་ཁུ་བ་དང་ཉི་མ་ལ་རྡུལ་བསྲེའོ། །བྱེ་བ་དྲུག་རྣམས་སྔོན་དུ་བསྙེན་པར་བྱའོ། །དེའི་རྗེས་སུ་ལས་ནི་སཱ་ལུ་ཞེས་པ་ལ་སོགས་པའོ། །བདུད་རྩི་ལྔ་
ནི་ནང་དུའོ། །བྱེ་བ་བཟླས་པའི་རྗེས་ཐོགས་སུ། ཨོཾ་བཛྲ་ཀཱ་རྟ་རི་ཞེས་པ་ལ་སོགས་པའི་སྔགས་ཀྱིས་རིལ་བུ་བྱས་ཏེ་བཟུང་ནས་འབུམ་བཟླས་སོ། །དེ་ནས་རིལ་བུ་འགྲུབ་པོ། །དེས་དགྲ་བོ་དཔུང་དང་བཅས་པའི་གཟུགས་སུ་བསམས་པའི་རིལ་པས་མགྲིན་པ་དཀྲི་བ་དང་བཅག་པར་བྱའོ། །ལྷ་རྣམས་ཀྱི་ཞེས་པ་ཕ་རོལ་པོའི་ལྟ་བའི་ལྷ་རྣམས་སོ། །རྡོ་རྗེ་སྟེ་རྡོ་རྗེ་འཛིན་པའི་ཁུ་བ་དང་རྔུལ་ཆུ་འཆིང་ངོ་ཞེས་པ་རྡོ་རྗེ་འཆིང་བ་སྟེ་བ་ལཱ་ཤའི་ས་བོན་ནོ། །དེ་ཁོ་ན་ནི་རྡོ་རྗེ་ཅན་ཏེ། རོ་བཅུད་འཆིང་བ་ལ་གཞོམ་དུ་མེད་པའི་ནུས་པ་ཅན་ཉིད་ཀྱི་ཕྱིར་རོ། །འདིར་པ་ལཱ་ཤའི་ས་བོན་གྱི་སྙིང་པོ་གཟུང་ངོ༌། །རྒྱལ་ལ་ཞེས་པ་སྐར་མ་རྒྱལ་ལའོ། །ཆོ་ག་བཞིན་ཞེས་པ་ཆུ་སྔོན་པོ་ཅན་གྱི་ཀླུའི་རྫིང་བུའི། ཨོཾ་ཨཱཿ་ཕུཿ་ཞེས་པའི་སྔགས་ཀྱི་བརྒྱད་ལྷག་པའི་བརྒྱར་བསྔགས་པའི་ས་ཁ་དོག་སྔོན་པོའི་དབུས་སུ་སྔགས་དེ་བསྒོམས་ནས། ས་དེས་ཡང་དག་པར་བཀོད་པའི་མཐའ་ཡས་སྔགས་དེས་ཡོངས་སུ་གྱུར་པ་ཅན་བསམ་མོ་ཞེས་པ་ཆོ་གའོ། །བདུད་རྩི་ལྔ་ནི་འོ་མ་ལ་སོགས་པའོ། །ཁམ་ཕོར་གཉིས་ནི་ས་དེ་ཁོ་ནས་བྱས་པ་སོ་མ་བཏང་བ་མཐའ་ཡས་ནང་དུ་གཞག་པའོ་མས་བཀང་བ་ལ་དཀྲི་བར་བྱའོ། །བདུད་རྩི་ལྔ་ལ་སོགས་པའི་བྱ་བ་བཅུ་རྣམས་ལ་སོ་སོར་ཨོཾ་ཨཱཿ་ཕུཿ་ཞེས་པའི་སྔགས་བརྒྱད་ལྷག་པའི་བརྒྱར་བཟླས་སོ། །ཆོ་གས་ཞེས་པ། མི་བསྐྱོད་པ་རྣམ་པར་དག་པས་རྡུལ་ཚོན་ནག་པོ་དུར་ཁྲོད་ཀྱི་སོལ་བས་བྱའོ། །རྣམ་པར་སྣང་མཛད་རྣམ་པར་དག་པས་རྡུལ་ཚོན་དཀར་པོ་ནི་མིའི་རུས་པའི་ཕྱེ་མས་སོ། །རིན་ཆེན་འབྱུང་ལྡན་རྣམ་པར་དག་པས་རྡུལ་ཚོན་སེར་པོ་ནི་བ་བླས་སོ། །འོད་དཔག་མེད་རྣམ་པར་དག་པས་རྡུལ་ཚོན་དམར་པོ་ནི་དུར་ཁྲོད་ཀྱི་སོ་ཕག་གིས་སོ། །དོན་ཡོད་གྲུབ་པ་རྣམ་པར་དག་པས་རྡུལ་ཚོན་ལྗང་གུ་ནི་མི་རུས་དང་རྐུན་མའི་ལོ་མ་དག་གིས་སོ། །རྡོ་རྗེ་སེམས་དཔའ་རྣམ་པར་དག་པས་རྡུལ་ཚོན་སྔོན་པོ་ནི་མིའི་རུས་པ་དང་དུར་ཁྲོད་ཀྱི་སོལ་བ་དག་གིས་སོ། །བཅུ་བཞི་པའམ་བརྒྱད་པ་ལ་སྦྱང་བ་བྱས་པའི་རོའི་ས་གཞི་ལ་ཐིག་སྐུད་བྱིན་གྱིས་བརླབ་པར་བྱ་ཞིང༌། ཇི་སྲིད་དུ་འདུས་བྱ་བ་རྫོགས་པའི་བར་དུ་སྟེ། སྐུད་པ་དེས་མཐེ་བོང་གསུམ་ལྷག་པའི་ཁྲུ་གསུམ་པའི་དཀྱིལ་འཁོར་ཐིག་བཏབ་ནས། རྡུལ་ཚོན་རྣམས་ཀྱིས་མི་
བསྐྱོད་པ་རྣམ་པར་དག་པས་བཞེངས་ཏེ། དེའི་དབུས་སུ་མཐའ་ཡས་མནན་པའི་ཀྱེའི་རྡོ་རྗེ་དང༌། གནས་ཇི་ལྟ་བར་རྣལ་འབྱོར་མ་རྣམས་བྲིའོ་ཞེས་པ་ཆོ་གའོ། །ཡང་ན་ཀྱེའི་རྡོ་རྗེ་ལ་སོགས་པ་རྣམས་ཀྱི་མཚན་མ་རྣམས་བྲི་བར་བྱའོ་ཞེས་གསུངས་སོ། །ཤིན་ཏུ་བ་ནི་བརྩོན་འགྲུས་ཆེན་པོའི་ཚུལ་ཅན་ནོ། །ཁྲོ་བོའི་སེམས་ནི་ཁྲོས་ཟིན་པའི་སེམས་སོ། །བཟློག་ནས་ཞེས་པ་སྭཱ་ཧཱ་ལ་སོགས་པའི་ཚིག་གི་ཟློག་པས་བཟླས་སོ། །ཨ་རྫ་ཀ་ནི་པ་རྞཱ་ཤའོ། །འདིས་ནི་གདོན་མི་ཟ་བར་ཆར་འབབ་པོ་ཞེས་གསུངས་སོ། །དེའི་ཚེ་ཞེས་པ་གང་གི་ཚེ་ཆར་ཆེས་པར་འགྱུར་བ་དེའི་ཆོས་བཅུ་བཞི་པ་ལ་སོགས་པ་ལ་རོའི་ཁ་བཀབ་པའི་རས་ཀྱི་དུམ་བུ་གཅིག་ལ་འདུག་ཅིང༌། དུམ་བུ་གཞན་ལ་སྔགས་བྲིས་ཏེ་བཟླས་པས། སྤྲིན་རྣམས་དྲལ་བར་བྱེད་དོ་ཞེས་པའོ། །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱ་ཆེར་འགྲེལ་པ། མན་ངག་གི་སྙེ་མར་སྙེ་མ་ཉི་ཤུ་བརྒྱད་པའོ།། །།