སྙ་མ་སུམ་ཅུ་པ། བགྲང་ཕྲེང་གི་དེ་ཁོ་ན་ཉིད་རྒྱས་པར་བཤད་པ།
བགྲང་ཕྲེང་གི་དེ་ཁོ་ན་ཉིད་རྒྱས་པར་བསྟན་པའི་ཆེད་དུ་གསུངས་པ། ཉོན་ཞེས་པ་ལ་སོགས་པའོ། །བགྲང་བ་སྟེ་ཡེ་ཤེས་སུ་ལྷག་པར་མོས་པའི་ལྷའི་གཟུགས་ཀྱི་སྐུད་པ་ནི་བགྲང་ཕྲེང་ངོ༌། །ཡང་མི་འགྱུར་བསྔགས་རྣམས་ཕྲེང་བར་བྱེད་གྲངས་སུ་བྱེད་པའི་ཕྱིར་བགྲང་ཕྲེང་སྟེ། ར་ཡིག་ཕྱིས་པ་ནི་ངེས་ཚིག་གོ །སོགས་པས་དེ་ལ་རབ་གནས་ལ་སོགས་པའི་མཚན་ཉིད་དང༌། གང་གིས་སྔགས་རྣམས་འགྲུབ་པའོ། །མུ་ཀྟི་ཞེས་པ་མུ་ཏིག་གོ །ཁམས་དཀར་པོ་རྣམས་ནི་རུས་པ་རྣམས་སོ། །སོགས་པས་རྡོ་བའི་ཁྱད་པར་དཀར་པོ་རྣམས་སོ། །ནོར་བུ་དཀར་པོ་ནོར་བུ་རྣམས་སོ། །སོགས་པས་དྲི་མ་མེད་པའི་རྫས་ཀྱང་དྲི་བཟང་བར་བྱས་པའོ། །ནག་པོའི་ས་བོན་ནི་ལུང་ཐང་གི་ས་བོན་ནོ། །
ཁྱད་པར་གྱི་ལས་དང་རྗེས་སུ་མཐུན་པས་ལས་ཐམས་ཅད་པའི་སྔགས་འགྲུབ་པའི་དོན་དུ། རིལ་བུ་ལྔ་བཅུ་རྣམས་ཀྱིས་བགྲང་ཕྲེང་ངོ༌། །ཕྱོགས་དང་ཕྱོགས་བྲལ་གྱི་སྐུད་པ་བརྒྱད་རྣམས་ལ་ཕྱག་ན་པདྨ་ལ་སོགས་པ་བརྒྱད་རྣམས་བལྟ་བར་བྱའོ། །སྐུད་པ་དབུས་མ་ལ་སངས་རྒྱས་ཐམས་ཅད་ཀྱི་རང་བཞིན་རྡོ་རྗེ་སེམས་དཔའོ། །སྐུད་པ་ཡང་རས་བལ་ལས་བྱུང་བ་གཞོན་ནུ་མས་བཀལ་བ་གཟུང་བར་བྱའོ། །དགྲ་འདོད་ཆགས་ལ་སོགས་པ་རྣམས་བཅོམ་མོ་ཞེས་པའམ། མཆོད་པ་ལ་སོགས་འོས་སོ་ཞེས་པས། དགྲ་བཅོམ་པ་རྫོགས་པའི་སངས་རྒྱས་རྣམས་ཏེ་རིལ་བུའི་རང་བཞིན་རྣམས་སོ། །སྐུད་པའི་སྣ་གཉིས་མདུད་པའི་སྟེང་དུ་རིལ་བུ་བསྒྲེང་བ་ནི་སྟོབས་དང་མི་འཇིགས་པ་ལ་སོགས་པའི་ཆོས་ཀྱི་ངོ་བོ་མཆོད་རྟེན་ཞེས་བསམ་མོ། །དེའི་སྟེང་དུ་རིལ་བུ་གཞན་ནི་ཆོས་ཀྱི་དབྱིངས། དེ་བཞིན་ཉིད་ཆོས་ཐམས་ཅད་མངོན་དུ་བྱེད་པའི་ངོ་བོ་ཅན་ཏེ། ཆོས་ཉིད་རྟོགས་པ་ཁོ་ན་ལས་རྣམ་པར་དག་པའི་ཆོས་རྟོགས་པའོ། །ཅི་བྱས་ནས་རྟོགས་པ་འདི་ཡིན་ཞེ་ན། ལག་མཐིལ་ཞེས་པ་ལ་སོགས་པའོ། །དབྱངས་རྣམས་ཀྱི་སྔ་མ་ཨ་ཡིག་གང་གི་དང་པོ་ཡིན་པ་དེ་ལ་ཨཱཿ་ཞེས་པ་ཡི་གེ་སྟེ། དེ་ཡོངས་སུ་གྱུར་པ་ལས་ལག་པ་གཡས་པར་ཡུད་ཀྱིས་བསྒོམ་པའི་སོར་མོ་རྡོ་རྗེ་རྩེ་ལྔ་པའི་ངོ་བོ་ཅན་ལ་ཉི་མ་དེས་བྱིན་གྱིས་བརླབས་པའོ། །ལག་པ་གཡོན་པ་ན་ཡུད་ཀྱིས་སོར་མོའི་འདབ་མ་ཅན་པདྨའི་རྣམ་པར་བསམས་ལ། བདུད་རྩིའི་ཡི་གེ་ཨ་ཡིག་སྟེ། དེ་ཡོངས་སུ་གྱུར་པ་ཟླ་བ་ཁ་དོག་དཀར་པོ་དེས་བྱིན་གྱིས་བརླབས་པའོ། །དེ་དག་གི་དབུས་སུ་བགྲང་ཕྲེང་བཟུང་ནས་བཤད་པའི་ལྷའི་རང་བཞིན་དུ་བསྒོམ་ཞིང༌། ཨ་ཀྑ་རུ་ཞེས་པ་ལ་སོགས་པའི་སྔགས་ཀྱིས་བྱིན་གྱིས་བརླབས་པོ་ཞེས་པ་འདིའི་རབ་གནས་སོ། །ལག་པ་གཡོན་པ་རྡོ་རྗེ་མ་ཡིན་པ་རྡོ་རྗེ་རུ་གྱུར་པ་སྟེ། ཅི་ལྟར་ཞེ་ན་རྡོ་རྗེ་ལག་པ་གཡས་པ་དང་གཉིས་སུ་མེད་པའི་ཕྱིར་རོ། །རྡོ་རྗེ་དང་པདྨ་དག་སྟོང་པ་ཉིད་དང་སྙིང་རྗེ་དག་དབྱེར་མེད་པར་བསྒོམ་པས་ལག་པ་གཡས་པས་སྔགས་བཟླའོ་ཞེས་པའི་དོན་ཏོ། །སོར་མོའི་ཁྱད་པར་གསུངས་པ། ཞི་བ་ཞེས་པ་ལ་སོགས་པའོ། །ཁྲོ་བོ་ཞེས་པ་སྡིགས་མཛུབ་ལའོ། ཡོངས་ཀྱི་མཐའ་ཞེས་པ་མཐེའུ་ཆུང་ལའོ། །ལྷ་རྣམས་དགུག་པའི་བསམས་པས་རྡོ་རྗེ་ལྕགས་
ཀྱུའི་ངོ་བོར་བསྒོམ་པའི་མཐེ་བོང་གིས་བགྲང་ཕྲེང་རབ་ཏུ་འབེབས་ཤིང་བཟླའོ། །དེ་ལྟ་བུ་ཡང་མཉམ་པར་གཞག་པ་ཇི་སྐད་བཤད་པའི་ངོ་བོ་ལ་ཏིང་ངེ་འཛིན་པར་གལ་ཏེ་གྱུར་པ་དེའི་ཚེ་འགྲུབ་ཀྱི་གཞན་དུ་མ་ཡིན་ནོ་ཞེས་གསུངས་པ། དེ་ཉིད་མེད་པས་ཤེས་པ་སྟེ། ཇི་སྐད་བཤད་པའི་དེ་ཁོ་ན་ཉིད་མི་བསྒོམ་པས་སོ། །ཕྱག་རྒྱའི་དེ་ཁོ་ན་ཉིད་སྟོང་པ་ཉིད་དུ། ལྷག་པར་མོས་པ་མེད་པར་མི་འགྲུབ་པ་ཞེས་པ་ལྷག་མའོ། །དེའི་ཕྱིར་རྣལ་འབྱོར་པ་དེ་ཁོ་ན་ཉིད་སྒོམ་པ་ཁོ་ནས་དེ་ཁོ་ན་ཉིད་གང་གི་གང་ངོ་བོ་ཡིན་པ་དེས་ཐམས་ཅད་བྱེད་དོ། །དེ་ཉིད་ཀྱི་ཕྱིར་ཨ་ཀྑ་རུ་ཞེས་པ་ལ་སོགས་པ་སྭཱ་ཧཱའི་མཐར་ཐུག་པའི་སྔགས་སོ། །ཡི་གེ་ཨ་ཡིག་ལ་སོགས་པ་རྣམས་གང་གི་རྒྱུ་ཡིན་པ་དེ་རྣམས་དེ་སྐད་དོ། །དེ་གང་གི་ངོ་བོ་ཡིན་པ་དེ་དེ་ཁོ་ན་ཉིད་ཀྱིས་སྦྱང་བའི་སྔགས་སོ། །དངོས་གྲུབ་ཀྱི་རྒྱུ་ཉིད་ཀྱི་ཕྱིར་སྙིང་པོའོ། །དེ་ཉིད་ཀྱི་ཕྱིར་རྒྱས་པར་སྟོན་པ། བགྲངས་ཞེས་པ་ལ་སོགས་པའོ། །བགྲངས་པ་ལས་ཏེ་གྲངས་ལས་ཀྱང་གྲངས་མེད་པ་སྟེ། དོན་དམ་པར་རོ། །གང་གི་ཕྱིར་བརྫུན་པ་སྒྱུ་མ་ལྟ་བུ་སྟེ། བརྫུན་པར་རྟོགས་པ་ཁོ་ནས་འགྲུབ་བོ། དེའི་ཕྱིར་དེ་ཁོ་ན་ཉིད་ཁོ་ན་སྙིང་པོ་སྟེ། མངོན་པར་འདོད་པ་སྒྲུབ་པར་བྱེད་པའི་ཕྱིར་རོ་ཞེས་པའི་དོན་ཏོ། །ཉེ་བར་སྡུད་དེ། བགྲང་ཞེས་པ་ལ་སོགས་པའོ། །དེ་ལྟར་བགྲང་ཕྲེང་དག་པར་བྱེད་པའི་སྔགས་རྣམས་ཀྱིས་བྱིན་གྱིས་བརླབས་ལ། གང་གི་ཚེ་ཁ་ཅིག་ཏུ་བསྒྲུབ་པར་བྱ་བ་ལ་ཐོབ་པར་འདོད་པར་གྱུར་པ་དེའི་ཚེ་དེ་སྒྲུབ་པར་བྱེད་དེ། དེ་དང་རྗེས་སུ་མཐུན་པའི་སྔགས་ཟློས་ཤིང་བྱིན་གྱིས་བརླབས་པའི་བགྲང་ཕྲེང་གིས་སོ། །དེ་ཉིད་ཅེས་པ་དེ་ཁོ་ན་ཉིད་སོ། །ཡོངས་སུ་མི་གསལ་བ་ནི་མི་གསལ་བ་སྟེ། གལ་ཏེ་ངེས་པས་ལྷག་པར་མོས་པ་མེད་ན་དེའི་ཚེ་དངོས་གྲུབ་རིང་བ་སྟེ། མེད་པ་ཁོ་ནའམ། དུས་ཡུན་རིང་པོས་རེས་འགའ་ཅུང་ཟད་ཙམ་འགྲུབ་བོ་ཞེས་པ་དགོངས་པའོ། །ཡེ་ཤེས་ཀྱི་མཚན་ཉིད་རྒྱས་པར་སྟོན་པ། ཉོན་ཞེས་པ་ལ་སོགས་པ་སྟེ། ཡེ་ཤེས་ཆེན་པོ་ནི་རྡོ་རྗེ་སྙིང་པོའོ། །མཉམ་པར་གཞག་པ་ན་སྟེ། ཏིང་ངེ་འཛིན་པར་གྱུར་པ་ནའོ། །འཁོར་ལོ་ནི་ལྷའི་ཚོགས་པ་དང་ཁམས་གསུམ་པའི་འཁོར་ལོའོ། །ཤེས་རབ་དང་སྙིང་རྗེ་དག་རོ་གཅིག་པ་ཉིད་ཀྱི་བྱང་ཆུབ་ཀྱི་སེམས་ཀྱི་ཁྱད་པར་ལས་སོ། །ཟླ་བ་ལ་སྟེ་སྣ་ཚོགས་
པདྨའི་སྟེང་དུའོ། ཡེ་ཤེས་ཁོ་ན་ས་བོན་ཏེ། ཤེས་རབ་རྣོན་པོས་རྫུས་སྐྱེས་ཉིད་ཀྱིས་ཡེ་ཤེས་རྫོགས་པའི་ཕྱིར་རོ། །དེ་གསུངས་པ། རྣམ་པ་ཐམས་ཅད་མཆོག་ལྡན་པ། །སྤྲོ་དང་སྡུད་པའི་བྱེད་པ་པོ། །ཡུད་ཀྱིས་ཡེ་ཤེས་རྫོགས་པ་ནི། །རྣལ་འབྱོར་རྫོགས་པར་བརྗོད་པར་བྱ། །ཞེས་སོ། །ཤེས་རབ་རྟུལ་པོ་ནི་ཡེ་ཤེས་ཀྱི་ས་བོན་ཧཱུཾ་ངོ༌། །རྒྱན་ནི་འཁོར་ལོ་ཅན་ལ་སོགས་པའོ། །རྡོ་རྗེ་དང་རྡོ་རྗེའི་དྲིལ་བུ་དང་ལྡན་པའི་ཕྱག་དག་གིས་ཕྱག་རྒྱ་ཆེན་མོ་རང་དང་འདྲ་བ་ཁ་དོག་དཀར་མོ་ཤིན་ཏུ་མཛེས་མ་ལ་འཁྱུད་པ་སྙིང་གར་འཚིར་བའོ། །ཨཱ་རཱ་ཏ་སྟེ་རིང་དུ་སྒྲིབ་པ་གཉིས་ལས་སོང་བ་ནི་འཕགས་པའོ། །དེ་ཉིད་ཀྱི་ཕྱིར་མངོན་པར་ཤེས་པ་ལ་སོགས་པ་རྣམ་པ་སྣ་ཚོགས་པ་རྣམས་ཀྱིས་སྣང་བར་མཛད་པས་ན་རྣམ་པར་སྣང་མཛད་དོ། །རྣམ་པར་སྣང་མཛད་དེ་ཁོ་ན་རྡོ་རྗེ་འཛིན་པའོ། །གཙོ་བོ་ནི་སྤྲོ་བ་དང་སྡུད་པ་ལ་སོགས་པ་རྣམས་ལ་མཐུ་ཅན་གྱི་ངང་ཚུལ་ཉིད་ཀྱི་ཕྱིར་རོ། །ཅིག་ཅར་ཟློས་པ་ནི་དམ་ཚིག་གི་བཟླས་པའོ། །རིམ་གྱིས་ཟློས་པ་ནི་ཁྱོགས་ལ་སོགས་པའི་བཟླས་པའོ། །དེ་གཉིས་ཀ་ཁྱད་པར་དུ་བྱེད་དེ། གཡོན་ཞེས་པ་ལ་སོགས་པས་སོ། །ལག་པ་གཉིས་གང་ཡང་རུང་བས་བགྲང་ཕྲེང་བསྐོར་བའི་ཕྱིར་བཟླས་པ་ཡང་བསྐོར་བ་ལྟ་བུའོ། །ལྷ་རྣམས་དེ་ལས་ཏེ་སྔགས་བཟླས་པ་ལས་བདེ་བར་དགྱེས་པར་འགྱུར་རོ། །ཅིའི་སྔགས་ཀྱི་བཟླས་པ་ཞེ་ན། ཨཱ་ལི་དག་གི་ཨོཾ་ཨཱཿ་ཡིག་དག་གོ །ཀཱ་ལི་ནི་སྭཱ་ཧཱའོ། །ས་བོན་ནི་ཧཱུཾ་སྟེ་དེ་རྣམས་ཀྱིའོ། །ཅི་ལྟར་ཞེ་ན་ཧཱུཾ་ཡིག་སྐུད་པ་སྟེ། ལུས་དང་ངག་དང་སེམས་ཀྱི་དེ་ཁོ་ན་ཉིད་གསལ་བར་བྱེད་པའི་ཕྱིར་རོ། །དེས་བརྒྱུས་ཤིང་སྙིང་པོར་བྱས་པར་ཇི་ལྟར་འགྱུར་བ་ལྟར་རོ། །ཨོཾ་ཨཱཿ་ཧཱུཾ་སྭཱ་ཧཱ་ཞེས་པའོ། །ས་བོན་འདི་ཁོ་ན་བསྐྱེད་པའི་དོན་དུ་སྙིང་གར་ཡང་བསྒོམ་མོ་ཞེས་པ་དྲང་བའི་དོན་ཏོ། །ཅིག་ཅར་འགའ་ཞིག་གི་ཚེ་སྟོང་པ་ཉིད་དང་སྙིང་རྗེ་ཟུང་དུ་འཇུག་པའི་རིམ་པ་ཁྱད་པར་དུ་བསྐྱེད་པས་སྔགས་གཉིས་སུ་མེད་པའི་ཡེ་ཤེས་ཀྱི་བཟླས་པ་གོམས་པའོ། །ཁྱད་པར་ཅི་ཞེ་ན། བརྗོད་པར་བྱ་སྟེ། གཡོན་པ་ཤེས་རབ་བོ། །གཡས་པ་ཐབས་སོ། །དེ་དག་གི་ལག་བདག་གི་བདེ་བ་འཛིན་པའི་ཐབས་རྡོ་རྗེ་དང་པདྨ་དག་གོ །དེ་གཉིས་ལས་མཁའ་འགྲོ་མ་རྣམས་ཀྱི་སྟེ། ཨ་ཝ་དྷཱུ་ཏཱི་ལ་སོགས་པ་རྣམས་ཀྱི་དེའི་བདེ་བ་ཁྱད་པར་ཏེ་གང་རྣམས་ཀྱིས་
བགྲོད་པར་བྱའོ་ཞེས་དགོངས་པའོ། །བསྐོར་བ་ནི་སྲིད་པ་དང་མྱ་ངན་ལས་འདས་པ་དག་ལ་མི་གནས་པའོ། །ཨཱ་ལི་ནི་ཁུ་བའོ། །ཀཱ་ལི་ནི་རྡུལ་ལོ། །ས་བོན་ནི་གཉིས་ཀའི་ནང་དུ་སོན་པའི་སེམས་ཏེ། མངལ་འཛིན་པའི་གནས་སྐབས་སུ་བར་དོའི་སྲིད་པ་ནས་འོངས་ནས་སྐྱེ་བའི་མྱུ་གུ་སྐྱེ་བའི་ཕྱིར་རོ། །དེ་རྣམས་དང་འབྲེལ་བ་ཅན་ཧཱུཾ་ཡིག་སྟེ། ལུས་དང་ངག་དང་སེམས་ཀྱི་དགའ་བ་གསུམ་པོ་དགའ་བ་དང་མཆོག་དགའ་དང་ཁྱད་དགའི་ངོ་བོའོ། །དེ་ཁོ་ན་སྐུད་པ་ལྟ་བུ་སྟེ། དེས་བརྒྱུས་པས་ན་སྦྲེལ་བ་སྟེ། དགའ་བ་གསུམ་པོ་རོ་གཅིག་པའི་ལྷན་ཅིག་སྐྱེས་པ་ནི་ཁྱད་པར་རོ་ཞེས་པའི་དོན་ཏོ། །འདིའི་ཞེས་པ་འདི་ཁོ་ན་སྟེ་ས་བོན་གྱིས་རང་གི་ངོ་བོ་སྟོང་པ་ཉིད་དང་སྙིང་རྗེའི་རང་བཞིན་གོམས་པར་བྱའོ་ཞེས་པ་ངེས་པའི་དོན་ཏོ། །དེ་ལྟར་བསྐྱེད་པའི་རིམ་པ་དང་རྫོགས་པའི་རིམ་པ་ལ་བཅོམ་ལྡན་འདས་རྡོ་རྗེ་སེམས་དཔའ་སེམས་ཅན་གྱི་དོན་གྱི་དབང་ལས་དཀར་པོ་དང་སེར་པོ་དང་དམར་པོ་ལ་སོགས་པ་གཟུགས་དང་དབྱིབས་དང་ཕྱག་ལ་སོགས་པ་མ་ངེས་པར་ཁམས་གསུམ་པ་མུ་མཐའ་མེད་པ་རྣམས་སུ་དེ་བཞིན་གཤེགས་པ་ལ་སོགས་པའི་བཀོད་པ་སྣ་ཚོགས་རྣམས་ཀྱིས་སྤྲོ་བ་དང་སྡུད་ཅིང་སྟོང་པ་ཉིད་དང་སྙིང་རྗེ་རོ་གཅིག་པ་བདེ་བ་ཆེན་པོའི་རང་བཞིན་ནི་ཡེ་ཤེས་ཀྱི་དེ་ཁོ་ན་ཉིད་དོ་ཞེས་གསུངས་སོ་ཞེས་པའོ། །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱ་ཆེར་འགྲེལ་བ། མན་ངག་གི་སྙེ་མར་སྙེ་མ་སུམ་ཅུ་པའོ།། །།