སྙེ་མ་སོ་གཅིག་པ། འཕོ་བ་རྒྱས་པར་བཤད་པ།
སྐྱེ་བའི་བྱེ་བྲག་ཀྱང་ཐབས་ཀྱི་ཡན་ལག་ཡིན་པས། འཆི་བའི་རྟགས་ཡོངས་སུ་ཤེས་པ་ལས། གལ་ཏེ་ཕྱིར་བཅོས་པར་མི་ནུས་ན་དེའི་ཚེ་འཕོ་བས་རྣམ་པར་ཤེས་པ་བཏང་བ་ལས་ཁྱད་པར་ཅན་གྱི་གནས་སུ་སྐྱེའོ་ཞེས་པས་འཕོ་བ་བཤད་པའི་ཆེད་དུ་རྩོམ་པ་ཉོན་ཞེས་པ་ལ་སོགས་པའོ། །གྱེན་དུ་བགྲོད་པ་ནི་འཕོ་བ་སྟེ། དེའི་དོན་དུ་བའི་རྣལ་འབྱོར་ཏིང་ངེ་འཛིན་གྱི་ཁྱད་པར་ཏེ་དེའི་རང་གི་ངོ་བོའོ། །འགྲོ་བ་མཛེས་པ་ཞེས་གསུངས་ན་ཡང་ཡོན་ཏན་གྱི་ཁྱད་པར་བསྟན་པའི་ཆེད་དུ་ཞུས་པའོ། །རབ་ཏུ་སྦྱོར་བ་ནི་རྗེས་སུ་བསྒྲུབ་པ་སྟེ་འཆི་བའི་དུས་སུའོ། །ཚད་མ་ནི་དེ་ཁོ་ནའི་འོ། །སྲིད་པར་སྐྱོན་ནི་ངན་འགྲོ་གསུམ་དུ་སྡུག་བསྔལ་བར་གནས་པའོ། །རྒྱས་པར་སྟོན་པའི་ཆེད་
དུ་གསུངས་པ། ཐིག་ལེ་ཞེས་པ་སྨིན་མའི་དབུས་ཀྱི་བུ་ག་སྟེ། དེ་ནས་འཕོས་པའི་རྣམ་པར་ཤེས་པ་ནི་གཟུགས་ཀྱི་ཁམས་སུ་སྐྱེའོ། །ལྟེ་བའི་ཁུང་བུ་ནས་འདོད་པའི་ཁམས་སུའོ། །སྟེང་ནི་གསེར་གྱི་སྒོ་སྟེ། དེ་ནས་སྟེང་རྣམས་སུ་སྟེ། བྱང་ཆུབ་སེམས་དཔའ་ལ་སོགས་པའི་གནས་རྣམས་སུའོ། །འགྲོ་བ་ནི་འགྲོ་བ་གཞན་ཁྱད་པར་ཅན་དུའོ། །མིག་ནས་མིའི་འགྲོ་བར་རོ། །སྣ་ནས་ནི་གནོད་སྦྱིན་གྱི་སྐྱེ་གནས་སོ། །སོགས་པས་ཁ་སྲིད་པའི་སྒོར་ཤེས་པར་བྱ་སྟེ། དེ་ནས་ཡི་དགས་ཀྱི་འགྲོ་བར་རོ། །རྣ་བ་ནས་གྲུབ་པའི་ལྷའི་སྐྱེ་གནས་སུའོ། །བཏུང་བ་ནི་གཅི་བའི་ལམ་སྟེ། དེས་དུད་འགྲོར་རོ། །བཏུང་མིན་ནི་བཤད་ལམ་སྟེ། དེས་དམྱལ་བ་རྣམས་སུའོ། །བརྒྱད་ཅེས་པ་དམྱལ་བ་གཞན་རྣམས་ཉེ་བར་མཚོན་པའོ། །སྒོའི་ཁྱད་པར་གྱིས་འཕོ་བའི་རྣལ་འབྱོར་མཆོག་གོ་ཞེས་འབྲེལ་ལོ། །ཤིན་ཏུ་མཉམ་གཞག་ནི་ལེགས་པར་མཉམ་པར་གཞག་ཅིང་ལས་གཞན་མེད་པ་རྣམས་ཀྱིའོ། །འཆི་བའི་དུས་ཐོབ་པ་རྣམས་ཀྱི་སྟེ། འཆི་བ་གང་ཡང་མཚན་མས་ཤེས་པར་བྱའོ། །དེ་ཡང་རྒྱུད་གཞན་རྣམས་སུ་བསྟན་ཏོ། །འཆི་བའི་དུས་ལམ་བབ་པ་ཁོ་ནར་རྒས་པས་དང་ནད་རྣམས་ཀྱིས་གདུངས་པས་ནི་རྣམ་ཤེས་དབྱེ་མི་བྱ་སྟེ་འཕོ་བར་མི་བྱའོ། །གསུང་བར་འགྱུར་བ་ཡང༌། དུས་མིན་ལྷ་རྣམས་གསོད་པའོ། །ཞེས་སོ། །དེ་ལ་འཕོ་བ་བྱེད་པར་འདོད་པས་ཐོག་མར་དགང་བ་བུམ་པ་ཅན་གོམས་པར་བྱ་སྟེ། དེས་ནི་སྒོ་རྣམས་ཐམས་ཅད་དུ་རླུང་རེངས་པ་འགྲོ་བ་བཅོམ་པར་འགྱུར་རོ། །འོན་ཀྱང་ས་བོན་རྣམས་ཀྱིས་སྒོ་རྣམས་བུ་ག་མེད་པར་བཙིར་བར་བྱ་ཞེས་གསུངས་པ། ལྔ་ཞེས་པ་ལ་སོགས་པའོ། །མགོ་བོ་དང་ལག་པ་དང་རྐང་པ་སྟེ། འབུར་བ་ལྔ་རྣམས་འདི་ལ་ཡོད་དོ་ཞེས་པ་འབུར་པོ་ལྔ་ཅན་ཏེ་ལུས་སོ། །དེའི་མཆོད་རྟེན་ནི་མགོ་བོ་དང་དེའི་སྒོ་གསེར་གྱི་སྒོ་དང་སྨིན་མའི་དབུས་སོ། །དེའི་བུ་གར་སྒོམ་པ་སྟེ། ཀྵུཾ་ཡིག་དང་ཧཱུཾ་ཡིག་གོ་ཞེས་པ་ལྷག་མའོ། །དེ་ལ་གསེར་གྱི་སྒོར་ཀྵུཾ་ཡིག་སྟེ། དེའི་འོག་ཏུ་ཧཱུཾ་བསྒོམ་མོ། །སྨིན་མའི་དབུས་སྒོར་ནི་ཧཱུཾ་དང༌། དེའི་ནང་དུ་བདེ་བ་ཆེན་པོའི་ཆུ་སྐྱེས་ཀྱི་ལྟེ་བར་ཧཾ་ངོ༌། །མཆོད་རྟེན་དེའི་འོག་གི་སྒོ་ལྕེའི་རྩ་བ་དང་མགྲིན་པའི་བུ་ག་
སྟེ། དེ་དག་གི་ས་བོན་སུཾ་དང༌། སྨྲྱུཾ་ཆུ་ལྟར་དཀར་པོ་སྟེ། དེ་རྣམ་པར་དག་པའི་ཕྱིར་རོ། །བཏུང་དང་བཏུང་མིན་གྱིའམ། དེའི་ལྟེ་ལྟེ་བའི་སྒོའི་མེའི་ས་བོན་ཀྵྨྲྱུཾ་འབར་བ་ལྟ་བུའོ། །གསུངས་ཟིན་པ་འདི་རྣམས་དང་འཆད་པར་འགྱུར་བའི་ས་བོན་རྣམས་སྔ་མའི་བུམ་པ་ཅན་གྱི་འབྲེལ་བ་ཅན་རྣམས་ཏེ། ལྷན་ཅིག་བྱེད་པ། ཉིད་ཀྱིས་བསྒོམ་མོ་ཞེས་པ་རླུང་འཆིང་བ་ནི་འདི་རྣམས་ཀྱི་དགོངས་པའོ་ཞེས་མངོན་པར་དགོངས་པའོ། །རླུང་གི་མདོག་ཅན་སྔོན་པོ་ལུས་ཧཱུཾ་ཡིག་ནི། རླུང་གི་དཀྱིལ་འཁོར་རྣམ་པར་དག་པའི་སེམས་ཀྱི་སྒོམ་སྟེ། མིག་དག་ལའོ། །ཧཱུཾ་གི་ས་བོན་འདི་ནི་འཕོ་བ་ལ་སོགས་པས་དཀར་པོ་ཁོ་ནའོ། །འདི་དང་ས་བོན་གཞན་རྣམས་ཀྱི་ཡང་སྔོན་པོ་ཉིད་ནི་ལས་གཞན་ལ་ཁ་དོག་གཞན་ཉིད་ཉེ་བར་མཚན་ཏོ། །རླུང་གི་ས་བོན་ནི་ཡུཾ་ཡིག་གོ །གང་གི་ཕྱིར་དེའི་རྩ་བ་རྣམས་ནི་རླུང་གི་རྩ་བ་སྟེ། དེའི་ས་བོན་གྱི་རྩ་བ་ཅན་ནོ། །རྩ་བ་ཅི་ཞེ་ན་རླུང་སྟེ། ས་བོན་དང་མྱུ་གུ་ལ་སོགས་པ་བཞིན་རྣམས་ཏེ་འབྲས་བུ་དང་རྒྱུའི་དངོས་པོའི་རྒྱུན་ཐོག་མ་མེད་པའོ་ཞེས་ཐམས་ཅད་པའི་རིགས་པ་མཚོན་པ་ཞར་ལ་བྱུང་བའོ། །དེ་ཡང་ཐིག་ལེ་དང་ནཱ་ད་དག་དང་ཨུ་ཡིག་དང་ལྡན་པ་སྟེ། དེའི་ཕྱིར་ཡུཾ་གྱི་ས་བོན་རྣ་བདག་དང་སྣ་བུག་དག་ལ་བསྒོམ་པའོ། །དེས་དང་གཞན་རྣམས་ཀྱིས་ཏེ། སེམས་ཀྱིས་ཡོངས་སུ་བསྒོམས་པ་ཉིད་ཀྱི་ཕྱིར་སེམས་ཀྱི་ས་བོན་རྣམས་ཀྱིས་དགུག་པར་བྱ་ཞིང་ནད་དུ་གཞུག་སྟེ། རླུང་དགག་པར་བྱ་ཞེས་པའི་དོན་ཏོ། །རྡོ་རྗེ་མ་ཞེས་པ་རྡོ་རྗེ་མཁའ་འགྲོ་མ་དང་སེང་གེ་མ་སྟེ། དེ་དག་གི་ས་བོན་དག་ནི་སུཾ་དང་སྨྲྱུཾ་སྟེ་དེ་དག་ཁ་ལ་མདོར་བསྟན་པ་དག་གི་རྒྱས་པར་བསྟན་པ་འདིའོ། །འཇིགས་མའི་ས་བོན་ནི་ཀྵུཾ་སྟེ། དེ་ཚངས་པའི་སྒོར་བསྒོམ་པ་རྒྱས་པར་བསྟན་པ་འདིའོ། །དེ་ལྟར་རྣམ་པར་བསྒོམས་ཏེ། ལྕགས་ཀྱུ་ལ་སོགས་ཞེས་པའོ། །འདི་རྒྱས་པར་སྟོན་ཏེ། འཇིགས་མ་ཞེས་པ་གཏུམ་མོའི་ལྟེ་བར་ཏེ། ཀུན་དུ་རྟོག་པ་མཐའ་དག་བསྲེགས་པས་བྱ་དཀའ་བ་ཉིད་ཀྱིས་ན་མོས་པ་ཆུང་བ་རྣམས་སྐྲག་པའི་གནས་ཉིད་ཀྱི་ཕྱིར་རོ། །དེའི་འོད་ཟེར་གྱི་ལྕགས་ཀྱུ་ལྟ་བུས་དགོང་པ་ལ་སོགས་པས་བཀུག་པ་ཞེས་པ་བཀུག་པའི་བརྟེན་པ་རྣམས་
ཀྱིས་རྟེན་ལ་ཉེ་བར་བཏགས་པ་ལས་སྒོ་དགུ་དང་སྙིང་གའི་རླུང་རྣམས་ཀྱིས་སོ། །དང་པོ་མགོ་བོ་དང་སྤྱི་གཙུག་དང་སྨིན་དབུས་དང༌། མིག་དང་རྣ་བ་གཡས་དང་རྣ་བ་གཡོན་དང་སྣ་དང་ཁ་དང་མགྲིན་པ་དང་རྒྱབ་སྟོད་ལྟག་པ་དང༌། ཕྲག་པ་དང་མཆན་ཁུང་དང་ནུ་མ་དང་སྙིང་ག་དང་ལྟེ་བ་དང་ཕོ་མཚན་དང་རྟགས་དང་བཤང་སྒོ་དང་བརླ་དང་པུས་མོ་དང་བྱིན་པ་དང་རྐང་པའི་རྒྱབ་དང་མཐེ་བོང་དང་སོར་མོ་སྟེ་གནས་ཉི་ཤུ་རྩ་བཞི་རྣམས་ལས་བཀུག་ནས། དེའི་ནང་དུ་སོན་པ་གནས་བཅུ་ལ་གནས་སུ་བཅུག་པ་རྣམས་ཀྱིས། གསང་བའི་འཁོར་ལོ་ཉིད་དུ་གོང་བུར་བྱས་པ་རྣམས་ཀྱིས། དེས་སྦར་བ་ནི་གཏུམ་མོ་འབར་བའི་ལྕགས་ཀྱུ་སྙིང་གའི་རླུང་གི་དཀྱིལ་འཁོར་ལ་སོགས་པ་རྣམས་ལ་སྦྱར་བར་བྱའོ། །དེས་ན་རབ་ཏུ་རྒྱས་པར་སྟོན་ཏེ། ཅི་ཞེས་པ་ལ་སོགས་པའོ། །ཅི་རྟགས་མེད་པའི་གོ་འཕང་གི་གནས་ཀྱི་གཞི་ལ་གོམས་པས་གནས་ནས། གཞི་ལ་སྟེ་རྟེན་ལ་གོང་དུ་ས་བོན་སྦྱར་བར་བྱའོ། །འོག་གི་གནས་སུ་ཅི་ལ་སྦྱར། །ཞེས་ཤུགས་ཀྱིས་གསུངས་ངོ༌། །དེ་ལྟར་ཧི་ཀ་ཞེས་ཕྱེད་དང་བཅས་པའི་ཡི་གེ་ནི་སྒོ་དགུ་རྣམས་ཀྱི་སྟེང་དུ་སྟེ་གསེར་གྱི་སྒོ་ལ་དག་པར་བྱའོ། །མཛོད་སྤུ་ནི་སྨིན་དབུས་སོ། །དེར་སྐྲ་དཀར་ཉམས་པར་བྱེད་པ་ཉེ་བར་མཚོན་པའི་ས་བོན་ཧཾ་དང་ཧཱུཾ་སྟེ་དེས་སོ། །ནང་དུ་གོམས་པའི་གནས་སྐབས་སུ་མཛོད་སྤུའི་འོག་གི་མཚམས་ཇི་སྲིད་པར་དྲང་སྟེ། དེས་སྟེང་དུ་མིག་ལས་འཕོ་བར་འགྱུར་རོ། །དེ་ལྟར་དབང་དུ་བྱེད་པ་ཁོ་ན་སྟེང་དུ་སྦྱོར་བའོ། །སྙིང་གར་སླར་ཡང་རླུང་གི་དཀྱིལ་འཁོར་གྱི་དབུས་སུ་ཧཱུཾ་སྔོན་པོ་སྦྱོར་བ་སྦྱང་བར་སྐྲ་དཀར་ས་བོན་གྱིས་ཞེས་གསུངས་པས་གསལ་བར་བྱས་ཏེ། གཞན་དུ་ན་བུག་པའི་ས་བོན་གྱིས་ཞེས་གསུངས་བྱར་འགྱུར་རོ་ཞེས་འདོམས་སོ། །ཅི་ལྟར་གོམས་པ་ཡིན་ཞེ་ན་གསུངས་པ། དྲག་པ་ཞེས་པ་ལ་སོགས་པ་སྟེ། དྲག་པ་ཞེས་པ་ནི་འཆི་བའི་རྒྱུའོ་ཞེས་པས་འཚོ་བ་འཛིན་པ་རྣམས་ཀྱི་སྒྲ་སྐད་དེ། དེས་སྟེང་དུ་གསང་ཆེན་པོར་ནང་གི་བརྗོད་པས་བསྐུལ་བར་ཞེས་སྦྲེལ་ལོ། །ཅི་ཞེ་ན། སྡེ་བ་བརྒྱད་རྣམས་ཀྱི་མཐའ་ནི་ཧའི་ས་བོན་ཏེ། ནང་གི་གཽ་རཱིའི་ས་བོན་ཨི་ཡིག་གིས་ཁྱད་པར་དུ་བྱས་པ་ནི་དྲག་པ་སྟེ། ཡི་གེ་ཕྱེད་ཀྱི་སྦྱར་བའོ། །དྲག་པ་སྟེ་ཅི་
ཞིག་ཅེ་ན། སྡེ་པ་རྣམས་ཀྱི་སྔ་མ་དབྱངས་ཀྱི་སྡེ་པ་གང་གི་དང་པོ་ཡིན་པ་དེ་ནི་སྡེ་པ་སྔ་མ་དང་པོ་ཅན་ཏེ་ཀ་སྡེའོ། །དེའི་སྔ་མ་ཀའི་ས་བོན་ནོ། །སྒྲའི་སྒྲས་ནི་འོག་གི་རླུང་གིས་སྦར་བའི་གཏུམ་མོའི་སྒྲས་སོ། །རླུང་གི་ས་བོན་ནི་ཡུཾ་སྟེ། དམའ་བར་ནི་རླུང་གི་དཀྱིལ་འཁོར་གྱི་འོག་གི་མཐར་རོ། །སྟེང་གི་མཐར་ཡང་རླུང་གི་ས་བོན་ནོ། །འདི་ཐམས་ཅད་རླུང་གི་དཀྱིལ་འཁོར་ལ་གནས་པ་ཞེས་བསྒོམ་པས། གནས་ཉི་ཤུ་རྩ་བཞི་རྣམས་ཀྱིས་བསྐྱོད་པའི་རླུང་བཀུག་ནས། གསང་བའི་འཁོར་ལོ་ལས་སྟེང་དུ་ལྟེ་བ་དང་སྙིང་གར་དང་དེ་ལས་སྟེང་དུ་མགྲིན་པ་དང་སྨིན་དབུས་ཀྱི་མཚམས་དང་དེ་ལས་ཀྱང་གོང་དུ་འཕོ་བའི་དུས་སུ་བསྐུལ་བར་བྱའོ། །གལ་ཏེ་སླར་ཡང་འཆི་བ་བཅོམ་ནས་སྐྲ་དཀར་ལ་སོགས་པ་ཡང་ཉམས་པར་འདོད་པ་དེའི་ཚེ་འཕོ་བ་ནི་ཐབས་སྒོམ་པ་བོར་ནས་གཞན་སྒོམ་ཞིང་སྐྲ་དཀར་ཉམས་བྱེད་ཀྱི་ས་བོན་ཧཾ་དང་ཧཱུཾ་ཡིག་ནག་པོས་འོད་ཟེར་ནག་པོ་རྣམས་ཀྱིས་བདུད་རྩིའི་ཆར་པས་ཁྱབ་པར་བྱས་ནས་མགོ་བོར་དང་གཞན་དུ་ཡང་སྐྲ་དང་སྤུ་དཀར་པོ་ཉིད་བསལ་བར་བྱའོ། །འདི་ཡང་ཉེ་བར་མཚོན་པ་སྟེ། གདམས་ངག་ཇི་ལྟ་བར་བསྒོམ་པའི་དབྱེ་བ་ལས་གཉེར་མ་དང་ནད་དང་འཆི་བ་ཉམས་པར་བྱེད་པ་ལ་སོགས་པའོ། །འདིར་ནུས་པ་མེད་པ་ཡང་མཆོག་ཏུ་བསྐུལ་བར་བྱའོ་ཞེས་གསུངས་སོ། །དེའི་ཚེ་ནི་སྒོ་དགུ་རྣམས་ཀྱི་མཆོག་སྟེ་དམ་པ་གསེར་གྱི་སྒོ་ཕྱེ་ནས། དེའི་སྐད་ཅིག་ལ་ཡིད་འཕོ་བར་འགྱུར་རོ། །ཡིད་ཉིད་ཅེས་པ་དྲུག་པའི་དོན་ལ་དང་པོའོ། །འཕོ་བ་འདིའི་ཕན་ཡོན་སྟོན་པ། ལྷ་ཞེས་པ་ལ་སོགས་པའོ། །ལྷ་སྐུ་གཟུགས་པ་ལ་སོགས་པ་རྣམས་དང༌། བྲམ་ཟེ་རྣམས་སྡིག་པ་དང་བྲལ་བའི་མི་རྣམས་གསོད་པ་པོ་དང༌། མ་དང་ཕ་དང་དགྲ་བཅོམ་པ་གསོད་པ་དང་དགེ་འདུན་གྱི་དབྱེན་དང་དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་སྟེ། མཚམས་མེད་པ་ལྔ་བྱེད་པ་དང་། མ་བྱིན་པར་ལེན་པ་དང་འདོད་པ་ལོག་པར་སྤྱོད་པ་ཡང་གསེར་གྱི་སྒོའི་ལམ་འདིས་འཕོ་བ་ནི་ངན་འགྲོ་རྣམས་ལས་གྲོལ་ཏེ། དེས་ནི་མ་ཡིན་པ་ཁོ་ནའོ་དེས་ནི་སྔོན་བག་མེད་པ་ལས་བྱས་པའི་སྡིག་པས་གོས་པ་མ་ཡིན་ནོ། །མང་པོས་ཅི་བྱ་སྟེ་འཁོར་བའི་སྐྱོན་ཉོན་མོངས་པ་ལ་
སོགས་པ་དང་ནད་དང་རྒས་པའང་དེ་ལ་རིང་དུ་འགྱུར་ཏེ། བདེ་འགྲོར་སྐྱེས་པ་ན་བྱང་ཆུབ་སེམས་དཔའ་ལ་སོགས་པ་མཐོང་བས་དེ་རྣམས་རྩད་ནས་འབྱིན་པའི་ཐབས་རྗེས་སུ་བསྒྲུབ་པའི་ཕྱིར་རོ། །ཇི་ལྟར་འདམ་དུ་སྐྱེས་ཀྱང་པདྨ་མཛེས་པས་ཤིན་ཏུ་དྲི་མ་མེད་པ་དེ་བཞིན་དུ། སྡིག་པ་རྣམས་ཀྱིས་དང་པོར་སྔར་མི་ཤེས་པ་ལ་སོགས་པས་གང་རྣམས་ཀྱི་ལུས་གོས་པ་དེ་རྣམས་ཀྱིས་ཞེས་པ་འཕོ་བས་སྲིད་པ་བར་དོ་ལ་སོགས་པ་རྣམས་སུ་ཡེ་ཤེས་ཀྱི་རང་བཞིན་གྱི་སྐུ་རང་འདོད་པས་སྤྱོད་པར་འགྱུར་རོ། །འཕོ་བ་ཡང་འཆི་བའི་དུས་ལ་བབ་པ་ན་བྱ་སྟེ། དུས་མ་ཡིན་པར་བྱས་ན་ལྷ་གསོད་པར་འགྱུར་རོ། །དེའི་ཕྱིར་འཆི་བའི་རྟགས་རྣམས་ལུས་ལ་མཚོན་པར་བྱ་བ་ནི་རང་བཞིན་དུ་གནས་པའི་ལུས་ལ་སྟེ་གཞན་དུ་ན་ཐེ་ཚོམ་མོ། །ཁམས་མི་མཉམ་པ་ལས་དང་ནད་ལས་དང་རབ་རིབ་ལ་སོགས་པའི་མཐུ་ལས་དང་འཇིགས་པ་དང་མྱ་ངན་ལ་སོགས་པའི་ནུས་པ་ལས་རྣམ་པ་གཞན་དུ་སྣད་དོ། །དབང་ཐང་དང་འབྱུང་བ་དང་གཉིས་ཀ་འཁྲུགས་པ་ལས་འཆི་བའི་མཚན་ཉིད་རྣམ་པ་གསུམ་མོ། །འཆི་ལྟས་འབྱུང་བ་ཐོབ་ནས་དེ་ལས་དབྱེ་བས་མཚོན་པར་བྱའོ། །དེ་ལ་བསྐལ་པ་འཁྲུགས་པ་ནང་དང་ཕྱི་སྟེ། རིམ་པ་ཇི་ལྟ་བར་ཨ་ན་ཤ་ན་ལ་སོགས་པ་དང་ཐོག་འབབ་པ་ལ་སོགས་པའོ། །དེ་བཞིན་དུ་འབྱུང་བ་འཁྲུགས་པ་ནི་མཁྲིས་པ་ལ་སོགས་པ་དང་མེ་དང་ཆུ་ལ་སོགས་པའི་ཉེ་བར་ཚེ་བའོ། །འཆི་བའི་རྟགས་རྣམས་ནི་སླར་ཡང་ཕྱིའི་རྣམས་དང་ནང་གི་རྣམས་སོ། །དེ་ལ་ཕྱིའི་འཆི་བའི་རྟགས་རྣམས་གྲངས་ལས་འདས་པ་རྣམས་ཏེ། དེ་རྣམས་ཁ་ཅིག་གིས་ནི་ལོ་བརྒྱ་རྣམས་ཀྱིས་ཀྱང་སུས་སྨྲ་བར་ནུས། གཞན་ཡང་ཕྱིའི་མཚན་ཉིད་ཙམ་ལས་འཆི་བ་ཡང་དག་པར་ངེས་པ་མ་ཡིན་ཏེ། ཕྱི་རོལ་དུ་བློ་ཕྱིན་ཅི་ལོག་པས་ནད་ལ་སོགས་པ་ལས་ཀྱང་དོགས་སོ། །ནང་གི་རྣམས་ནི་མཉམ་པ་རང་བཞིན་དུ་གནས་པས་བརྟག་པར་བྱའོ། །དེ་ལ་ནི་དཀར་པོའི་ཚེས་གཅིག་ནས་བརྩམས་ནས་ཉིན་གསུམ་དུ་རླུང་ཟླ་བ་ནས་ཐོ་རངས་དུས་སྦྱོར་གཅིག་གམ་ཐུན་ཕྱེད་དུ་འབབ་སྟེ་དུས་སྦྱོར་རམ་ཐུན་ཕྱེད་གཉིས་པ་ཉི་མར་རོ། །དེའི་རྗེས་སུ་ཉིན་གསུམ་རྣམས་
ཉི་མ་ནས་ཐོ་རངས་དུས་སྦྱོར་གཅིག་གམ་ཐུན་ཕྱེད་དུ་སྟེ་གཉིས་པའི་དུས་སྦྱོར་རམ་ཐུན་ཕྱེད་ནི་ཟླ་བ་ནས་སོ། །དབུགས་བརྒྱ་ཕྲག་བཅོ་བརྒྱད་དུས་སྦྱོར་གཅིག་དང༌། དབུགས་ཕྱེད་དང་བཅས་པའི་བརྒྱ་ཕྲག་བཅུ་གསུམ་ཐུན་ཕྱེད་དོ་ཞེས་སྔར་བཤད་ཟིན་ཏེ། འདོད་པ་གཉིས་ཀྱང་ངོ༌། །དེ་ལྟར་ཉིན་ཞག་གསུམ་གསུམ་རྣམས་ཀྱིས་དུས་སྦྱོར་རེ་རེ་འམ་ཐུན་ཕྱེད་ཕྱེད་རྣམས་ཀྱིས་སྣ་བུག་དག་ཏུ་རླུང་སྣྲེལ་ཞིའི་རིམ་པའོ། །རིམ་པ་འདི་བཟློག་པ་ནི་འཆི་བའི་རྟགས་སུ་རྣམ་པར་ངེས་སོ། །ཟླ་བ་ཕྱེད་པ་གསུམ་ཕྱིན་ཅི་ལོག་པ་ལས་ཟླ་བ་དྲུག་རྣམས་ཀྱིས་འཆི་བའོ། །ཟླ་ཕྱེད་གཉིས་ཀྱིས་མཛའ་བོ་རྒུད་པའོ། །ཟླ་བ་ཕྱེད་ཀྱི་གཅིག་གིས་ནད་དོ། །སྣ་བུག་དང་ཁ་སྟེ་ལམ་གསུམ་རྣམས་ཀྱིས་རྒྱུན་ཉི་མ་ཕྱེད་ལས་ཕ་རོལ་དུ་འཆིའོ། །སྣ་བུག་དག་འཕོ་བ་དང་བྲལ་བར་འབབ་ན་ཉིན་བཅུ་རྣམས་ཀྱིས་འཕོ་བ་ནའོ། །མཉམ་པ་ལྡན་པའི་སྐད་ཅིག་ལ་མིག་དག་འགུལ་ན་ཉིན་ཞག་གིས་སོ། །སྣ་བུག་གཉིས་སྤངས་ནས་ཁ་ནས་རྒྱུ་ན་ཉིན་དེ་ཁོ་ན་ལའོ། །དགུན་ཟླར་བའི་འཕོ་བའི་དུས་ནས་བརྩམས་ནས་ཉིན་ལྔར་ཉི་མའི་ལམ་ནས་རྒྱུན་ལོ་བཅོ་བརྒྱད་རྣམས་ཀྱིས་སོ། །ཐ་སྐར་ཅན་ལ་དེ་ལྟར་རྒྱུན་ལོ་བཅོ་ལྔ་རྣམས་ཀྱིས་སོ། །དབྱར་ཟླ་ཐ་ཆུངས་ལ་དེ་ལྟར་རྒྱུན་ལོ་བཅུ་གཉིས་རྣམས་ཀྱིས་སོ། །དབྱར་ཟླ་ར་བ་ལ་དེ་ལྟར་རྒྱུན་ལོ་དགུ་རྣམས་ཀྱིས་སོ། །ནག་པ་ཅན་གྱི་ལ་དེ་ལྟར་རྒྱུན་ལོ་དྲུག་རྣམས་ཀྱིས་སོ། །མཆུ་ཅན་གྱི་ལ་དེ་ལྟར་རྒྱུན་ལོ་གསུམ་རྣམས་ཀྱིས་སོ་ཞེས་པ་ཐུན་མོང་དུ་དུས་སོ། །ཁྱད་པར་དུ་ནི། མཉམ་པ་བདུན་སོང་ཉི་མ་ལ། །གལ་ཏེ་སྐྱེ་སྐར་ལ་ཟླ་བ། །དུས་འདི་རྒྱས་ཅན་ཞེས་བྱ་སྟེ། །འཆི་བ་ངེས་པར་བྱེད་པའོ། །ཁྱིམ་གང་ལ་ནི་མི་སྐྱེས་པ། །དེ་ལས་བདུན་པ་གང་ཡིན་གཞན། །མཉམ་པ་བདུན་ཞེས་གྲགས་པ་སྟེ། །དེ་རུ་ཉི་མ་མཉམ་བདུན་འགྲོ། །གལ་ཏེ་ཁྱིམ་དེར་ཟླ་བ་ན། །སྐྱེས་པའི་སྐར་མར་སོན་པར་འགྱུར། །རྒྱས་པའི་དུས་སུ་དེ་ཤེས་བྱ། །དེ་ལ་འཆི་བ་བརྟག་བྱ་བའོ། །རྒྱས་པའི་དུས་སུ་གལ་ཏེ་རླུང༌། །ཉིན་ཕྱེད་ཉི་མར་སོན་པར་འབབ། །ལོ་ནི་བཅུ་བཞིའི་གྲངས་རྣམས་ཀྱིས། །དེ་ཚེ་འཆི་བས་མཚོན་པར་
བྱ། །ཉིན་མོ་གཅིག་དང་ཉིན་མཚན་གཅིག །ཉིན་མོ་གཉིས་གསུམ་བཞི་འབབ་ན། །ཉི་མ་ཕྱོགས་དང་རི་བོ་དྲུག །རིག་བྱེད་ལོ་ཡིས་རིམ་པས་འཆི། །གཞན་ཡང་མ་རིག་པ་ལ་སོགས་པའི་རང་བཞིན་ཁྱིམ་བཅུ་གཉིས་ཀྱི་འཁོར་ལོ་རིམ་པ་གཉིས་པ་བྲིའོ། །དེ་ལ་རིམ་པ་དང་པོ་ལ། །སྐྱེ་བའི་ཁྱིམ་ནས་གཟུང་བའི་འཆི་ལྟས་ཀྱི་རླུང་རྒྱུ་བའི་ཉིན་མོ། །ཉིན་མཚན་གྱི་བདག་ཉིད་རྣམས་སོ། །གཉིས་པ་ལ་འཆི་ལྟས་ཀྱི་ཉིན་ཞག་གི་ལྷག་མ་ཆོ་ལོ་དང་ཟླ་བ་དང་ཉིན་ཞག་རྣམས་མདོར་བསྟན་པ་ཙམ་གྱིས། རྡོ་རྗེ་མཁའ་འགྲོ་དང་དུས་ཀྱི་འཁོར་ལོར་གསུངས་སོ། །རྒྱས་པར་བསྟན་པ་ལས་ནི་ཉིན་ཞག་འདོར་བ་བརྗོད་པར་བྱ་སྟེ། འདིར་གང་གི་དུས་ན་ཚེའི་ལྷག་མ་ལོ་གསུམ་རྣམས་ལྟེ་བ་ལ་སྟེ། དུས་སྦྱོར་གྱི་རྩ་རྣམས་ལ་ཤར་དུ་སྐྱེ་བའི་དུས་སྦྱོར་གྱི་རྩལ། རླུང་ཉི་མའི་ལམ་ནས་ཉིན་མོ་ལྔ་རྣམས་རྒྱུན་མི་འཆད་པར་རྒྱུ་བ་དེའི་ཚེ་ལོ་གསུམ་གྱིས་ཉིན་ཞག་བརྒྱད་ཅུ་ལྷག་པའི་སྟོང་ཕྲག་རྣམས་ལས་འཆི་ལྟས་ཀྱི་ཉིན་ཞག་རྣམས་དང་ལྷན་ཅིག་མདའ་དང་མེ་དང་མེའི་ཉིན་ཞག་རྣམས་འདོར་རོ། །རྩ་གཞན་ལ་ཡང་ཉིན་ཞག་འདོར་བ་ནི་འཆི་ལྟས་ཀྱི་ཉིན་ཞག་དང་ལྷན་ཅིག་པ་ཁོ་ནས་ཤེས་པར་བྱའོ། །དེ་ནས་རྩ་དེ་དོར་ནས་རྩ་གཉིས་པ་ལ། ལྷག་མ་བཞི་བཅུ་རྩ་ལྔ་དང་བདུན་བརྒྱའི་ཉིན་ཞག་རྣམས་དང་ལྷན་ཅིག་འཇུག་སྟེ། འཕོ་བ་བཅུ་གཅིག་རྣམས་ཀྱིས་དབུགས་ཁྲི་ཕྲག་གཉིས་དང་བརྒྱད་བརྒྱ་པ་གཉིས་ཀྱིས་ཉིན་ཞག་བྱེད་དོ། །རྩ་དོར་ན་ཡང་དབུགས་ཀྱི་འཁོར་ལོ་དམན་པ་མེད་དོ། །དེ་བཞིན་དུ་རྩ་གཞན་ཇི་སྙེད་པ་རྣམས་སུ་རྒྱུ་བ་དེ་སྙེད་ཀྱི་འཕོ་བ་རྣམས་ཀྱིས་ཉིན་མཚན་ཏེ། དབུགས་ཀྱི་འཁོར་ལོ་ཡང་སྨན་པ་མེད་པ་ཁོ་ནའོ། །རྩ་གཉིས་པ་ལ་ཡང་ཉིན་ཞག་བཅུ་རྣམས་དེ་ལྟ་ཁོ་ན་རྒྱུན། མདའ་དང་ཆུ་གཏེར་དང་མེའི་ཉིན་ཞག་རྣམས་ལ་དེར་ཏེ། དེ་སྤངས་ནས་ལྷག་མའི་ཉིན་ཞག་རྣམས་དང་ལྷན་ཅིག་གསུམ་པ་ལ་ཞུགས་ཏེ། ཉིན་ཞག་བཅོ་ལྔ་དེ་ལྟར་རྒྱུ་ཞིང་ཉིན་ཞག་བདུན་ཅུ་ལྷག་པའི་བརྒྱ་འདོར་རོ། །དེ་སྤངས་ཏེ་ལྷག་མའི་ཉིན་ཞག་རྣམས་དང་ལྷན་ཅིག་བཞི་པ་ལ་ཞུགས་ནས་ཉིན་ཞག་ཉི་ཤུ་རྣམས་དེ་ལྟར་
རྒྱུ་སྟེ། ཉིན་ཞག་བརྒྱད་བཅུ་རྩ་གཉིས་འདོར་རོ། །དེ་སྤངས་ནས་ཉིན་ཞག་མ་རྣམས་བཟུང་ནས་ལྔ་པ་ལ་སྟེ། ཉིན་ཞག་ཉི་ཤུ་རྩ་ལྔ་རྣམས་དེ་ལྟར་རྒྱུ་ཞིང༌། ཉིན་ཞག་ལྔ་བཅུ་རྩ་བདུན་རྣམས་འདོར་རོ། །ལྷག་མ་རྣམས་དང་ལྷན་ཅིག་དྲུག་པ་ལ་ཞུགས་ཏེ་ཉིན་ཞག་ཉི་ཤུ་རྩ་དྲུག་རྣམས་རྒྱུ་ཞིང་ཉིན་ཞག་ཉི་ཤུ་རྩ་བརྒྱད་རྣམས་འདོར་རོ། །ལྷག་མ་རྣམས་དང་ལྷན་ཅིག་བདུན་པ་ལ་ཞུགས་ཏེ་ཉིན་ཞག་ཉི་ཤུ་རྩ་བདུན་རྣམས་རྒྱུ་ཞིང་ཉིན་ཞག་ཉི་ཤུ་རྩ་བདུན་རྣམས་འདོར་རོ། །ལྷག་མ་ཉིན་ཞག་སུམ་ཅུ་རྩ་དྲུག་རྣམས་དང་ལྷན་ཅིག་བརྒྱད་པར་ཞུགས་ནས་ཉིན་ཞག་བཅོ་ལྔ་རྒྱུ་སྟེ། ཉིན་ཞག་བཅོ་ལྔ་རྣམས་འདོར་རོ། །ལྷག་མ་རྣམས་དང་ལྷན་ཅིག་དགུ་པར་ཞུགས་ཏེ་ཉིན་ཞག་བཅུ་རྣམས་རྒྱུ་ཞིང་ཉིན་ཞག་བཅུ་རྣམས་འདོར་རོ། །ལྷག་མ་རྣམས་དང་ལྷན་ཅིག་བཅུ་པ་ལ་ཞུགས་ཏེ་ཉིན་མོ་ལྔ་རྣམས་རྒྱུའོ། །ལྔ་འདོར་རོ། །ལྷག་མ་རྣམས་དང་ལྷན་ཅིག་བཅུ་གཅིག་པ་ལ་ཞུགས་ནས་ཉིན་ཞག་གསུམ་རྒྱུ་སྟེ་ཉིན་ཞག་གསུམ་འདོར་རོ། །ལྷག་མ་རྣམས་དང་ལྷན་ཅིག་བཅུ་གཉིས་པ་ལ་ཞུགས་ནས་ཉིན་མོ་གཉིས་རྒྱུ་སྟེ་ཉིན་ཞག་གཉིས་འདོར་རོ། །ཉིན་ཞག་གཅིག་བཟུང་ནས་ལྟེ་བ་ལ་ཨ་ཝ་དྷཱུ་ཏཱི་རུ་འཇུག་གོ་རྒྱུའོ་འདོར་རོ། །འདིར་ཉིན་ཞག་ལྔ་དང་ཉི་ཤུ་རྩ་ལྔ་དག་གི་བར་དུ་ཉིན་ཞག་བཅུ་དྲུག་རྣམས་ལ་བརྗོད་དེ། དེ་ལ་ཉིན་ཞག་དྲུག་རྒྱུན་ཉིན་ཞག་ཉི་ཤུ་རྩ་བཞིས་དམན་པའི་ལོ་གསུམ་ན་འཆི་བའོ། །ཉིན་ཞག་བདུན་ན་ནི་བཞི་བཅུ་རྩ་བརྒྱད་ཀྱིས་དམན་པ་རྣམས་ཀྱིས་སོ། །ཉིན་ཞག་བརྒྱད་ན་བདུན་ཅུ་རྩ་གཉིས་ཀྱིས་དམན་པ་རྣམས་ཀྱིས། །དགུའི་ཉིན་ཞག་ན་དགུ་བཅུ་རྩ་དྲུག་རྣམས་ཀྱིས་དམན་པ་རྣམས་ཀྱིས་སོ། །ཉིན་མོ་བཅུ་གཅིག་ན་ལོ་གཉིས་ལས་ཉི་ཤུ་རྩ་བཞིས་དམན་པས་སོ། །ཉིན་མོ་བཅུ་གཉིས་ན་ནི་བཞི་བཅུ་རྩ་བརྒྱད་ཀྱིས་དམན་པ་ལས་སོ། །ཉིན་ཞག་བཅུ་གསུམ་གྱིས་བདུན་བཅུ་རྩ་གཉིས་ཀྱིས་དམན་པ་ལས་སོ། །ཉི་ཞག་བཅུ་བཞིས་དགུ་བཅུ་རྩ་དྲུག་གིས་དམན་པ་ལས་སོ། །ཉི་ཞག་བཅུ་དྲུག་གིས་ལོ་གཅིག་ལས་བཅུ་གཉིས་ཀྱིས་དམན་པ་ལས་སོ། །
ཉིན་ཞག་བཅུ་བདུན་གྱིས་ཉི་ཤུ་རྩ་བཞིས་དམན་པ་ལས་སོ། །ཉིན་ཞག་བཅོ་བརྒྱད་ཀྱིས་སུམ་ཅུ་རྩ་དྲུག་གིས་དམན་པ་ལས་སོ། །བཅུ་དགུས་བཞི་བཅུ་རྩ་བརྒྱད་ཀྱིས་དམན་པ་ལས་སོ། །ཉི་ཤུ་རྩ་གཅིག་གིས་ཟླ་བ་དྲུག་གིས་དམན་པ་ལས་སོ། །ཉི་ཤུ་རྩ་གཉིས་ཀྱིས་བཅུ་གཉིས་ཀྱིས་དམན་པ་ལས་སོ། །ཉི་ཤུ་རྩ་གསུམ་གྱིས་ཟླ་བ་ལྔ་ལས་དྲུག་དམན་པ་ལས་སོ། །ཉི་ཤུ་རྩ་བཞིས་ཉིན་ཞག་བཅུ་གཉིས་ཀྱིས་དམན་པ་ལས་སོ་ཞེས་པ་ཉི་མའི་འཆི་ལྟས་སོ། །གང་གི་ཚེ་དུས་སྦྱོར་གྱི་རྩ་སྔ་མ་ལ་རླུང་ཟླ་བའི་ལམ་ནས། ཟླ་བ་སུམ་ཅུ་རྩ་དྲུག་རྣམས་ཀྱིས་ཟླ་བ་ཐོག་མའི་དང་པོའི་ཞག་གཅིག་འབབ་བོ། །ཟླ་བ་གཉིས་པ་ལ་མི་རྒྱུའོ། །གསུམ་པའི་དང་པོར་ཉིན་ཞག་གཉིས་རྒྱུའོ། །བཞི་པ་ལ་མ་ཡིན་ནོ། །ལྔ་པའི་དང་པོར་ཉིན་ཞག་གསུམ་འབབ་སྟེ་དྲུག་པ་ལ་མ་ཡིན་ནོ། །དེ་ལྟར་རྩ་གཅིག་ལ་འཆི་ལྟས་ཀྱི་ཉིན་ཞག་གསུམ་རྣམས་དང་ལྷན་ཅིག་ཟླ་དྲུག་འདོད་རོ། །ལྷག་མ་རྣམས་དང་ལྷན་ཅིག་གཉིས་པ་ལ་ཞུགས་ནས། བདུན་པ་ལ་སོགས་པའི་ཟླ་བ་གསུམ་རྣམས་ལ་རིམ་པ་ཇི་ལྟ་བར་ཉིན་ཞག་བཞི་རྣམས་དང་ལྔ་རྣམས་དང་དྲུག་རྣམས་རྒྱུ་སྟེ། དེ་ལྟར་ཉིན་ཞག་དྲུག་རྣམས་ཀྱིས་ཟླ་བ་གསུམ་འདོར་རོ། །ལྷག་མ་རྣམས་དང་ལྷན་ཅིག་གསུམ་པར་འཕོ་སྟེ། དེ་ལས་གཞན་པའི་ཟླ་བ་གསུམ་ལ་ཉིན་ཞག་བདུན་དང་བརྒྱད་དང་དགུ་རྣམས་འབབ་བོ། །དེ་ལྟར་ཉིན་ཞག་དགུ་རྣམས་ཀྱིས་ཟླ་བ་གསུམ་འདོར་རོ། །ལྷག་མ་དང་ལྷན་ཅིག་བཞི་པར་སོང་ནས་གསུམ་རྣམས་སུ་དེ་ལྟར་བཅུ་དང་བཅུ་གཅིག་དང་བཅུ་གཉིས་རྣམས་འབབ་བོ། །དེ་ལྟར་ཉིན་ཞག་བཅུ་གཉིས་རྣམས་ཀྱིས་ཟླ་གསུམ་འདོར་རོ། །ལྷག་མ་རྣམས་དང་ལྷན་ཅིག་ལྔ་པར་ཞུགས་ཏེ། བཅུ་གསུམ་པ་དང་བཅུ་བཞི་པ་དང་བཅོ་ལྔ་རྣམས་རྒྱུའོ། །དེ་ལྟར་ཉིན་ཞག་བཅོ་ལྔ་རྣམས་ཀྱིས་ཟླ་བ་གསུམ་འདོར་རོ། །ལྷག་མ་དང་ལྷན་ཅིག་དྲུག་པར་ཞུགས་ཏེ་གསུམ་རྣམས་ལ་བཅུ་དྲུག་དང་བཅུ་བདུན་དང་བཅོ་བརྒྱད་རྣམས་རྒྱུའོ། །དེ་ལྟར་ཉིན་ཞག་བཅོ་བརྒྱད་རྣམས་ཀྱིས་ཟླ་བ་གསུམ་འདོར་རོ། །ལྷག་མ་རྣམས་དང་ལྷན་ཅིག་བདུན་པར་སོང་ནས་གསུམ་རྣམས་སུ་བཅུ་དགུ་དང་ཉི་ཤུ་རྩ་གཅིག་རྒྱུ་སྟེ། དེ་ལྟར་ཉིན་ཞག་ཉི་ཤུ་རྩ་གཅིག་རྣམས་ཀྱིས་ཟླ་བ་གསུམ་འདོར་རོ། །
ལྷག་མ་དང་མཉམ་དུ་བརྒྱད་པར་སོང་བས་གསུམ་རྣམས་སུ་ཉི་ཤུ་རྩ་གཉིས་དང༌། ཉི་ཤུ་རྩ་གསུམ་དང་ཉི་ཤུ་རྩ་བཞི་རྒྱུ་སྟེ། དེ་ལྟར་ཉིན་ཞག་ཉི་ཤུ་རྩ་བཞི་རྣམས་ཀྱིས་ཟླ་བ་གསུམ་འདོར་རོ། །ལྷག་མ་རྣམས་དང་ལྷན་ཅིག་དགུ་བར་ཞུགས་ནས་གསུམ་རྣམས་སུ་ཉི་ཤུ་རྩ་ལྔ་དང་ཉི་ཤུ་རྩ་དྲུག་དང་ཉི་ཤུ་རྩ་བདུན་རྒྱུ་སྟེ། དེ་ལྟར་ཉིན་ཞག་ཉི་ཤུ་རྩ་བདུན་རྣམས་ཀྱིས་ཟླ་བ་གསུམ་འདོར་རོ། །ལྷག་མ་རྣམས་དང་ལྷན་ཅིག་བཅུ་པར་སོང་བ་གསུམ་རྣམས་སུ་ཉི་ཤུ་རྩ་བརྒྱད་དང་ཉིད་ཤུ་རྩ་དགུ་དང་སུམ་ཅུ་རྒྱུའོ། །དེ་ལྟར་ཉིན་ཞག་སུམ་ཅུ་རྣམས་ཀྱིས་ཟླ་གསུམ་འདོར་རོ། །ལྷག་མ་རྣམས་དང་ལྷན་ཅིག་བཅུ་གཅིག་པར་སོང་ནས་གསུམ་རྣམས་སུ་སུམ་ཅུ་རྩ་གཉིས་དང་སུམ་ཅུ་རྩ་གསུམ་རྣམས་རྒྱུ་སྟེ། དེ་ལྟར་ཉིན་ཞག་སུམ་ཅུ་རྩ་གསུམ་རྣམས་ཀྱིས་ཟླ་བ་གསུམ་འདོར་རོ། །བཅུ་གཉིས་པར་ཞུགས་ནས་ཐོག་མའི་རྩ་ལ་མ་བབ་པའི་ཉིན་ཞག་གསུམ་གྱིས་ཉིན་ཞག་གཉིས་འབབ་པོ། །ལྟེ་བ་ལ་ཉིན་ཞག་གཅིག་གོ་ཞེས་པ་ཟླ་བའི་འཆི་ལྟས་སོ། །འདིར་གལ་ཏེ་མངལ་ནས་སྐྱེས་པའི་དང་པོར་བྱིས་པ་ལ་སོགས་པ་ལ་ཉིན་ཞག་གཅིག་གམ་ཉིན་ཞག་གཉིས་ལ་སོགས་པ་རྣམས་འབབ་པ་དེའི་ཚེ་ལྟེ་བ་ནས་བཟུང་སྟེ། ལུགས་ལས་བཟློག་པས་ཚེའི་ཉིན་ཞག་རྣམས་འདོར་རོ་ཞེས་ཤེས་པར་བྱ་སྟེ། ཉི་མ་དང་ཟླ་བའི་འཆི་ལྟས་དག་ལའོ། །དུས་ཚོད་ཀྱི་སྐད་ཅིག་གང་ལ་རླུང་གི་འགྲོ་བ་གཞན་འཇུག་པའི་དུས་ཚོད་ཀྱི་སྐད་ཅིག་དེ་རྫོགས་པ་ན་འཆི་བ་སྟེ་འདི་ལ་ཐེ་ཚོམ་མེད་དོ། །དེ་ལྟར་ཉི་མའི་འཆི་ལྟས་ཀྱིས་སམ་ཟླ་བའི་འཆི་ལྟས་ཀྱིས་ཁྱིམ་བཅུ་གཉིས་འདོར་བ་ལས་རྣམ་པར་ཤེས་པ་ཡང་དབུགས་ཀྱི་འཁོར་ལོ་སྤངས་ཤིང་སྐལ་པ་མཉམ་པའི་རྒྱུན་འགགས་པ་ནི་ལས་ཀྱིས་བསྐུལ་བའི་སྲོག་གི་རླུང་དང་ལྷན་ཅིག་དྲི་ཟས་བར་མེད་པར་རམ་རྣམ་པ་གཞན་གྱིས་འགྲོ་བ་གཞན་དུ་འགྲོ་ཞིང༌། སྐལ་པ་མི་མཉམ་པའི་རྒྱུན་མངོན་པར་འགྲུབ་པར་བྱེད་དོ། །འཆི་བ་ནི་སྐལ་པ་མཉམ་པའི་རྒྱུན་གྱིས་རྣམ་པར་ཤེས་པ་དང་དབང་པོ་དང་ཚེ་འགག་པའོ། །དེ་ཁོ་ན་མཚན་རྟགས་ངེས་པ་རྣམས་ཀྱིས་ཤེས་ནས་འཕོ་བའི་དོན་དུ་རྣལ་འབྱོར་བརྩམ་པར་བྱའོ། །རྣལ་འབྱོར་བརྗོད་པའི་ཆེད་དུ་གསུངས་པ། ཉོན་ཞེས་པ་ལ་སོགས་པའོ། །
རྣལ་འབྱོར་ནི་སྟོང་པ་ཉིད་དང་སྙིང་རྗེ་དག་གཅིག་པ་ཉིད་དེ། དེའི་བདག་ཉིད་ཀྱིས་བསྒྲུབ་བྱའི་ཁྱད་པར་ལས་ལྷའི་རྣལ་འབྱོར་གྱིས་སོ། །མཉམ་ཉིད་ནི་རོ་གཅིག་པ་ཉིད་དེ། སེམས་ཞེས་པ་ཁམས་བཅོ་བརྒྱད་ཀྱི་ངོ་བོ་ཐོག་མར་གསུངས་པའི་ཆོས་རྣམས་ཐམས་ཅད་ཉེ་བར་མཚོན་པའོ། །དེ་ཉིད་ཀྱི་ཕྱིར་གསུངས་པ། སྔར་གྱི་མཚན་ཉིད་ཐམས་ཅད་ལས། །ཞེས་སོ། །མཉམ་པ་ཉིད་འདིའི་སྒྲུབ་པར་བྱེད་པའི་རིམ་པ་གསུངས་པ། སྙིང་གར་ཞེས་པ་ལ་སོགས་པ་སྟེ། སངས་རྒྱས་ལྔའི་ས་བོན་ནི་ཧཱུཾ་འོད་ཟེར་དམར་པོ་ཅན་ནོ། །དེ་ནི་དེས་བཀུག་པའི་ལྷ་མོའོ། །ཇི་སྲིད་དུ་གཟུགས་ལ་སོགས་པ་ཐམས་ཅད་དུ་སྟོང་པ་ཉིད་ཀྱི་རྗེས་ཐོགས་སུའོ། །ཧཱུཾ་ཞེས་པ་ནི་ས་བོན་གཞན་ཉེ་བར་མཚོན་པའོ། །དབུགས་མི་གཡོ་བ་ཉིད་ཅི་ལྟར་ཞེ་ན། དགང་བྱ་ཞེས་པ་ལ་སོགས་པ་སྟེ། ཧཱུཾ་སུཾ་ཡུཾ་ཡུཾ་ཀྵུཾ་སྨྲྱུཾ་ཧྨྲྱུཾ་ཡྨྲྱུཾ་ཀྵྨྲྱུཾ་ཞེས་པ་སྒོ་དགུ་རྣམས་སུའོ། །སྙིང་གར་ནི་ཧཱུཾ་ཞེས་པའོ། །ས་བོན་བརྒྱད་རྣམས་ནི། ཧཱུཾ་སུཾ་ཡུཾ་སྨྲྱུཾ་ཧྨྲྱུཾ་ཡྨྲྱུཾ་ཀྵྨྲྱུཾ་ཞེས་པ་གོ་ཆའི་ས་བོན་བརྒྱད་རྣམས་སོ། །དེ་རྣམས་སྤྱིར་བཏུབ་ནི། ཨཱ་ལི་ཞེས་པ་ལ་སོགས་པ་སྟེ། ཇི་བཞིན་ཞེས་པ་ཇི་ལྟར་རིགས་པར་རོ། །ས་བོན་ལྡན་ནི་ས་བོན་དང་ལྡན་པ་སྟེ། དེ་དང་དེའི་གནས་སོ། །གལ་ཏེ་ཡང་སྔར་ཁ་དོག་སྣ་ཚོགས་རྣམས་བརྗོད་མོད། དེ་ལྟ་ན་ཡང་འདིར་ས་བོན་རྣམས་ཐམས་ཅད་དཀར་པོ་འོད་ཟེར་དཀར་པོ་ཅན་རྣམས་སོ། །སྙིང་གའི་ས་བོན་མདོར་བསྟན་པ། ཆུ་ཤིང་ཞེས་པ་ལ་སོགས་པ་སྟེ། སྙིང་གར་པདྨ་ཆུ་ཤིང་མེ་ཏོག་བཞིན་ཅུང་ཟད་ཁ་བྱེ་བ་འོག་ཏུ་ཁ་ཕྱོགས་པ་སྟེ། དེའི་དབུས་སུ་སྒོང་སྐྱེས་སོ། །དེ་ཡང་ཡེ་ཤེས་རླུང་ལ་ཞོན་པ་ཧཱུཾ་ངོ༌། །རྣམ་ཤེས་ནི་ཡུཾ་ཡུཾ་ཧི་ཀ་ཅེས་པའོ། །དངོས་པོ་ནི་འབྱུང་བས་ན་སྟེ་ཁམས་བཅོ་བརྒྱད་ཀྱི་ངོ་བོའོ། །དེའི་དངོས་པོ་ནི་རང་བཞིན་ཏེ། རང་བཞིན་མེད་པ་ཉིད་མཉམ་པ་ཉིད་དོ། །སྟོང་པ་ཉིད་དང་སྙིང་རྗེ་ཟུང་དུ་འཇུག་པ་འདི་ཐམས་ཅད་བསྒོམ་པར་བྱ་ཞེས་པའི་དོན་ཏོ། །དེ་ལས་ཕྱི་རོལ་ཏེ་གཞན་རྣལ་འབྱོར་རྣམ་ཤེས་འཕྲོག་པ་བསམ་པར་བྱའོ། །ཕྱོགས་ཀྱི་ཁྱིམ་རྣམས་ནི་སྟེང་དང་འོག་གི་གནས་རྣམས་སོ། །དེ་རྣམས་སུ་སེམས་པར་བྱེད་དོ་ཞེས་སེམས་ཏེ་རླུང་རྣམས་སོ། །དེ་རྣམས་ཀྱི་དགང་བ་དང་བུམ་པ་ཅན་དང་ཞི་བྱེད་རྣམས་ཀྱིས་སྡུད་པས་གང་
ལྟེ་བའི་འོག་ཏུ་སོར་བཞི་དོར་ནས་རླུང་གི་དཀྱིལ་འཁོར་ཏེ། དེ་ཡི་སེམས་ཀྱིས་བཟླས་པ་བྱ། །ཞེས་འབྲེལ་ལོ། །ཕྱོགས་གཉིས་གནས་ཞེས་པ་འདོན་པ་ལ་ཡང་གཉིས་དག་ཏུ་སྟེང་དུ་འོག་ཏུ་ཞེས་འདོན་ཏེ་ཁོ་ནའོ། །དེ་ཡི་སྟེང་རླུང་གི་དཀྱིལ་འཁོར་གྱི་སྟེང་དུ་དབུས་སུ་མེའི་དཀྱིལ་འཁོར་རོ། །དེའི་སྟེང་དུ་དབུས་སུ་ལྟེ་བ་ལ་ཉི་མ་རྟུལ་ལོ། །དེ་རུ་ཨཱ་ལིའི་གཙོ་བོ་ཨཾ་ས་བོན་ཏེ་ནཱ་དའི་ངོ་བོའོ། །ཀཱ་ལི་ལྡན་པའི་ས་བོན་ནི་ཧཱུཾ་སྟེ་སྙིང་གར་རོ། །དེ་ཁོ་ན་ནི་ཨཾ་གི་ས་བོན་ཏེ་ཁ་དོག་དམར་པོའོ། །སེམས་ཀྱི་རྒྱལ་པོ་ཞོན་པའི་ཕྱིར་ཁྱོགས་དང་འདྲ་བས་ཁྱོགས་ཏེ་སྟེང་དུ་རྗེས་སུ་འགྲོ་བའི་རླུང་ངོ༌། །འཁྱེར་བར་བྱེད་དོ་ཞེས་པ་འཁྱེར་བ་ཁོ་ན་འཁྱེར་བྱེད་དེ་འོག་ཏུ་འཇུག་པའོ། །དེ་དག་གིས་གོམས་པར་བྱའོ། །དེ་ལ་ཁྱོགས་ཀྱིས་བསྣུན་བཞིན་པ་ནི་སྙིང་གའི་ཧཱུཾ་གི་ས་བོན་འཁོར་དང་བཅས་པ་མགོ་བོ་ཇི་སྲིད་པར་འདྲེན་ནོ། །དེའི་རྗེས་སུ་ཁྱེར་བྱེད་ཀྱིས་དེ་ནས་སྙིང་ག་ཇི་སྲིད་པར་ཚུར་འདྲེན་ནོ། །དེ་ལྟར་ཀཱ་ཤཱིའི་མེ་ཏོག་བཞིན་འདྲེན་པ་དང་ཚུར་འདྲེན་པ་ནི་རྣམ་པར་ཤེས་པ་ཁྱེར་བར་བྱེད་པའོ། །ཁྱོགས་ཀྱི་ཁྱོགས་ནི་གྱེན་དུ་བསྐྱོད་པ་སྟེ། དུ་ལ་འདེགས་པ་ལའོ་ཞེས་བྱིངས་སོ། །དེས་ཁྱོགས་ཀྱི་རྗེས་ཐོགས་སུ་ཁྱེར་བྱེད་ཀྱང་བཟླས་པས་དབང་དུ་བྱས་ནས་རྣལ་འབྱོར་པས་བདག་ཉིད་ཀྱི་ལུས་ལས་ཕྱི་རོལ་དུ་ཡང་གོམས་པར་བྱའོ། །ཇི་ལྟར་ཞེ་ན་གསུངས་པ། ཁྱོགས་ཞེས་པ་ལ་སོགས་པའོ། །འདེགས་པ་ནི་ཁྱོགས་ཏེ་སྙིང་གནས་ཕྱི་རོལ་དུ་འདྲེན་པའོ། །དེ་ཁོ་ན་མཚན་ཉིད་དེ། དེས་མཚོན་བྱ་རླུང་ལ་སོགས་པའིའོ། །ཁྱེར་བ་ནི་ཁྱེར་བྱེད་དེ་སྙིང་ག་ཇི་སྲིད་པར་འཇུག་པར་བྱའོ། །དེ་ཁོ་ན་མཚན་ཉིད་དེ་བསམ་པར་བྱའོ། །དེ་ལྟར་མཉམ་པར་གཞག་པ་རྣམ་གཡེང་མེད་པར་ཇི་ལྟར་འགྱུར་བ་དེ་ལྟར་ཡང་དང་ཡང་དུ་གོམས་པས། ཁྱོགས་དང་ཁྱེར་བྱེད་ཀྱི་ཏིང་ངེ་འཛིན་ལས་མཉམ་པ་ཉིད་དུ་རོ་གཅིག་པ་ཉིད་རང་གི་ངང་གིས་འབྱུང་བ་ཉིད་འགྲུབ་འགྱུར་ཏེ། རླུང་དང་རྣམ་པར་ཤེས་པ་དག་གི་དེ་ཁོ་ན་ཉིད་རོ་མཉམ་པ་ཉིད་དང༌། དེ་བསྒོམ་པ་རང་གི་ངང་གིས་འབྱུང་བ་འགྲུབ་བོ། །དེ་ལྟར་གྱུར་པ་ན་ཡང་དེ་ནས་ཞེས་པ་ལ་སོགས་པ་སྟེ། སྒྲུབ་པ་པོའི་ལུས་ལས་ཕྱི་རོལ་དུ་གྱུར་པ། རྣམ་པར་ཤེས་པ་སྲིད་པ་བར་དོ་ལ་སོགས་པར་རམ་ཕ་རོལ་གྱི་ལུས་ལ་སྤྲུལ་པར་འགྱུར་རོ། །གཞན་གྱི་
སེམས་ནི་རང་གི་ལུས་ཁོ་ན་ལས་མི་ལ་གཟུང་བའི་རྗེས་སུ་བའི་སེམས། གཞན་གྱི་སྙིང་གར་བཅུག་ནས་རྗེས་སུ་སེམས་པ་ཤེས་པར་བྱའོ། །དེ་ལྟར་ཚར་གཅད་པ་དང་རྗེས་སུ་བཟུང་བར་ནུས་པ་འདི་ནི་བདག་ཉིད་ཆེན་པོའོ་ཞེས་གཞན་ལ་རྟོགས་སུ་གཞུག་པར་བྱའོ། །དེ་ལྟར་ནི་བསྟན་པ་ལ་སོགས་པ་ལ་གནོད་པར་བྱེད་པ་ཡོངས་སུ་སྤངས་ནས་ཕན་པ་བྱེད་པ་ལྷུར་ལེན་པར་ཕ་རོལ་པོར་འགྱུར་རོ། །འདི་ཐམས་ཅད་ནི་སེང་གེ་རྣམ་རོལ་དུ་གསུངས་ཏེ། སེང་གེའི་བཞིན་དུ་མནན་ནས། འགྲོ་བ་གཞན་དུ་དང་གཞན་གྱི་གྲོང་དུ་ཡང་ཚར་གཅོད་པ་ལ་སོགས་པ་དང་ཇི་ལྟར་མངོན་པར་འདོད་པར་ཡུལ་ཉེ་བར་སྤྱོད་པ་རྣམས་ཀྱིས་དོགས་པ་མེད་པར་འདིར་རོལ་བའོ་ཞེས་བྱས་ནས་སོ། །མིག་དང་རྣ་བ་དང་སྣ་དང་ཁ་རྣམས་སོར་མོ་རྣམས་ཀྱིས་འགོག་པ་ནི་སེང་གེ་རྣམ་པར་རོལ་པའི་ཕྱག་རྒྱ་སྟེ་དེས་རླུང་སྟེང་དང་འོག་ཏུ་བསྡམས་ནས་ཇི་སྐད་གསུངས་པའི་རྣལ་འབྱོར་གོམས་པར་བྱ་ཞེས་ཁ་ཅིག་གོ །དེ་ལྟ་ཁོ་ནར་བསྒོམ་པ་ལ་སོགས་པ་རྣམས་ཀྱིས་སེམས་པར་བྱེད་པའི་གསེར་གྱི་ལམ་མངོན་པར་འདོད་པ་རྫོགས་པའི་ཆེད་དུ་འགྲུབ་པོ་ཞེས་པ་ཉེ་བར་བསྡུ་བའོ། །དེ་ནས་ཀྱང་འཕོ་བའི་རྗེས་ཐོགས་སུ་ཡེ་ཤེས་ཀྱི་གཟུགས་ཀྱི་ཡིད་ཀྱི་རང་བཞིན་གྱིས་ལུས་སུ་གྱུར་ནས་རང་དང་གཞན་གྱི་མུན་པ་འཇོམས་པའི་ཕྱིར་མར་མེས་བཞིན་དུ་དེ་ཁོ་ན་ཉིད་སྣང་བའི་ངོ་བོའི་སེམས་ཀྱི་ཡུལ་རྣམས་ཀྱིས་སེང་གེ་བཞིན་དུ་དོགས་བ་མེད་པར་རྣམ་པར་རོལ་ཅིང་རང་དང་གཞན་ལ་ཕན་པའི་ལས་སོ། །འོན་འདི་ཐམས་ཅད་ལེགས་པར་བཤད་པ་ཁོ་ན་སྟེ། འདི་འདྲ་བ་ཆ་ཤས་ཀྱང་བལྟ་བ་གཞན་ལ་ཡོད་པ་མ་ཡིན་མོད། འོན་ཀྱང་དེ་ཁོ་ན་ཉིད་ལ་གོམས་པ་དང་ལྡན་པ་ནི་དེ་ཁོ་ན་ལས་མངོན་པར་འདོད་པ་ཐམས་ཅད་འགྲུབ་པའི་ཕྱིར་ན། འཕོ་བའི་ཐབས་བཤད་པས་ཅི་བྱ་ཞེ་ན། གསུངས་པ། ཉན་ཞེས་པ་ལ་སོགས་པ་ཉན་ཐོས་ལ་སོགས་པའི་རིགས་ཅན་རྣམས་སྐྱེ་བ་གཅིག་ལ་དེ་ཁོ་ན་ཉིད་ལ་ལྷག་པར་མོས་པ་བརྟན་པ་མ་ཡིན་ནོ་ཞེས་དགོངས་པའོ། །གང་ཤིན་ཏུ་ཡུན་རིང་བར་བསོད་ནམས་བསགས་པ། རིགས་ཆེན་པོ་སད་པ་ནི་ཐེ་ཚོམ་དང་བཅས་པའི་ཕྱིན་ཅི་ལོག་གི་དྲི་མས་མ་རྙོགས་པ་ཉིད་ཀྱིས་ཤེལ་བཞིན་དུ་ཉེ་བར་གཞག་པ་ཇི་ལྟ་བའི་སྣ་ཚོགས་པའི་རྣམ་པ་འཛིན་པ་ཉིད་ཀྱིས་ཀྱང་གསུངས་ཏེ། སྤྲོས་པ་གཞན་ལ་
ཕན་པའི་ཆེད་དུ་རྟོགས་ནས་དོར་བར་བྱའོ། །འོད་ཀྱི་ངོ་བོའི་སེམས་ཀྱིས་ཀྱང་སྟོང་པ་ཉིད་དང་སྙིང་རྗེ་གཉིས་སུ་མེད་པའི་རྣལ་འབྱོར་ཁོ་ན་ལ་དམིགས་པར་བྱའོ། །འདིར་དང་པོ་རང་གི་སྙིང་གར་ཟླ་བ་ལ་གནས་པའི་ཧཱུཾ་དམར་པོའི་འོད་ཟེར་གྱིས་བཀུག་པའི་ཡེ་ཤེས་མཁའ་འགྲོ་མ་ཡང་དག་པར་མཆོད་ནས། ཇི་སྲིད་སྟོང་པ་ཉིད་ཀྱི་བར་མཆོད་དུ་སྣ་ཚོགས་ཆུ་སྐྱེས་དང་ཟླ་བ་ལ་ཧཱུཾ་དཀར་པོ་ལས་སྐྱེས་པའི་བདག་ཉིད་ཡེ་ཤེས་མཁའ་འགྲོ་མ་སེམས་དཔའི་སྐྱིལ་ཀྲུང་ཅན་དཀར་མོ་བཞད་ཅིང་དཀར་བ་དང་ཁྲོས་ཤིང་ནག་པ་དང་སྒེག་ཅིང་དམར་བའི་རྩ་བ་དང་གཡས་པ་དང་ཅིག་ཤོས་ཀྱི་ཞལ་གསུམ་པ། སྤྱན་གསུམ་མ། ཕྱག་དྲུག་མ། གཡས་པ་རྣམས་ཀྱིས་རྡོ་རྗེ་གདེངས་པ་དང་མདའ་དང་ལྕགས་ཀྱུ་འཛིན་པ། གཡོན་པ་རྣམས་ཀྱིས་སྙིང་གར་སྡིགས་མཛུབ་དང་བཅས་པའི་ཞགས་པ་དང་དཔག་བསམ་གྱི་འཁྲི་ཤིང་དང་སྟེང་དུ་གོ་གོན་པའི་གཞུ་བསྣམས་པ། སྐྲའི་ཞགས་པ་ཆས་ལེགས་པ། སྣ་ཚོགས་པའི་རིན་ཆེན་པོ་ཆེ་དང་གོས་ཀྱི་རྒྱན་ཅན། ཅོད་པན་ནས་དེ་བཞིན་གཤེགས་པ་ལ་སོགས་པ་འཕྲོ་བ་རྣམས་ཀྱིས་ནམ་མཁའི་ཁོང་འགེངས་པར་བལྟས་ཏེ་སྟེང་གི་སྒོར་ཀྵུཾ། དེའི་འོག་ཏུ་ཧཱུཾ། སྨིན་མཚམས་ཀྱི་བུ་གར་ཧཱུཾ། དེའི་སྟེང་དུ་ཧཾ། ལྕེའི་རྩ་བར་སུཾ། མགྲིན་པའི་བུག་པར་སྨྲྱུཾ། མིག་དག་ལ་ཧཱུཾ། རྣ་བ་དག་ལ་ཡུཾ་ངོ༌། །སྣ་བུག་དག་ལ་ཡུཾ། ལྟེ་བའི་སྒོར་ཀྵྨྲྱུཾ། བཏུང་བར་ཀྵྨྲྱུཾ། ཐུར་སེལ་དུ་ཀྵྨྲྱུཾ། སྒོ་དགུ་རྣམས་སུ་ས་བོན་འདི་རྣམས་དཀར་པོ་སྟེ། འོད་ཟེར་འཐུག་པོ་རྣམས་ཀྱིས་མཚམས་མེད་པར་བྱས་ནས་ནང་དུ་མགོ་བོས་གནས་པ་རྣམས་བསམ་མོ། །གོ་ཆའི་དོན་དུ་ཕྲག་པ་དག་ལ་ཧྨྲྱུཾ་སྙིང་གར་ཡྨྲྱུཾ་ཞེས་པ་སྟེ་ས་བོན་གཞན་གཉིས་དེ་ལྟར་ཁོ་ནའོ། །དེའི་རྗེས་སུ་སྙིང་གར་ཁ་ཐུར་དུ་བལྟས་པའི་ཆུ་སྐྱེས་ཀྱི་དབུས་སུ་ཐུར་དུ་ཕྱོགས་པའི་སྲོག་གི་རླུང་གི་དཀྱིལ་འཁོར་ཏེ། དེའི་དབུས་སུ་རྣམ་པར་ཤེས་པའི་རང་གི་ངོ་བོ་ཧཱུཾ། སྟེང་གི་མཐར་ཡུཾ། ཡུཾ་གི་དབུས་སུ་ཧཾ། འོག་གི་མཐར་ཡུཾ། ཡུཾ་གི་སྟེང་དུ་ཀ་ཞེས་པའོ། །ཧཱུཾ་ཡིག་ལ་སོགས་པ་རྣམས་འོག་ཏུ་མགོ་བསྟན་པའོ། །ཡུཾ་ཡིག་ལ་སོགས་པ་རྣམས་སྔོན་པོར་བསྒོམས་ཏེ། ཁྱད་པར་དུ་སྐྱིལ་ཀྲུང་བཅས་ནས་ཡན་ལག་ཐམས་ཅད་དྲང་པོར་བྱས་ཤིང་མིག་སྣ་རྩེར་གཏད་ལ། ལུས་ཐམས་ཅད་
ལ་སོང་པའི་ཁྱབ་བྱེད་ཀྱི་རླུང་བཀུག་སྟེ་ལྟོ་བའི་ནང་དགང་བར་བྱའོ་ཞེས་པ་དགང་བས། དུག་དང་གདུད་པ་དང་རིམས་ལ་སོགས་པ་ཞི་བའི་འབྲས་བུ་མཐོང་བས་ནི་རབ་ཏུ་ཞུགས་པ། ལྟེ་བ་ཁོ་ནས་བུམ་པར་ཆུ་མི་འབོ་བར་གནས་པ་ལྟ་བུའི་བུམ་པ་ཅན་བྱའོ། །དེས་ནི་སྒོ་དགུ་རྣམས་རེངས་པར་འགྱུར་རོ། །དེའི་རྗེས་སུ་དལ་བུས་དེ་ཡང་གསང་བའི་ཆུ་སྐྱེས་ཀྱི་ལྟེ་བ་ཁོ་ནར་རིལ་པོར་བྱས་པ་འབྱུང་བ་དང་འཇུག་པ་དང་བྲལ་བར་བསམ་པར་བྱའོ་ཞེས་པ་རབ་ཏུ་ཞི་བའི་མཐར་ཐུག་པས་རླུང་དབང་དུ་བྱས་ཏེ། དེས་ཁྱོགས་ཀྱིས་རབ་ཏུ་སྦར་བའི་མེ་ཆེར་གསལ་བ། ཇི་སྐད་གསུངས་པའི་ཇི་ལྟར་འདོད་པའི་གཏུམ་མོ་ཡང་དག་པར་སྦར་བས། བསྣུན་བཞིན་པའི་སྙིང་གའི་པདྨ་གྱེན་དུ་ཕྱོགས་པར་བྱས་ནས། དེར་སོན་པའི་རླུང་གི་དཀྱིལ་འཁོར་ཡི་གེ་དང་བཅས་པ་སྟེང་དུ་ཕྱོགས་པ། ཧི་དང་ཀ་དག་སྟེང་དང་འོག་ཏུ་གནས་པ་དང་འོག་དང་སྟེང་དུ་གནས་པར་གྱུར་པ་དག་ཅེས་བསྒོམས་ཏེ། མན་ངག་ཇི་ལྟ་བར་ནང་གི་བཟླས་པ་བྱེད་ཅིང་བདེ་བ་ཆེན་པོའི་འཁོར་ལོ་ཇི་སྲིད་བར་དྲང་བར་བྱའོ། །དེའི་རྗེས་སུ་རླུང་དེ་ཁོ་ན་འོག་ཏུ་འཇུག་པའི་ཁྱེར་བྱེད་ཀྱིས་སྔར་བཞིན་དུ་ཐམས་ཅད་འོག་ཏུ་ཕྱོགས་ཤིང་ཀ་དང་ཧི་དག་ཀྱང་རང་གི་གནས་སུ་སླར་དྲང་བར་བྱའོ། །དེ་ལྟར་ཡུད་ཙམ་སོ་སོ་ལ་དེ་ལྟ་ཁོ་ནར་འདྲེན་པ་དང་སླར་འདྲེན་པ་དག་གིས་རྣམ་པར་ཤེས་པའི་བཞོན་པ་སྲོག་གི་རླུང་དབང་དུ་བྱས་ཏེ། དབྱུང་བ་དེ་ཁོ་ནས་སྟེང་གི་སྒོ་ཕྱེ་ནས་འཕོ་བར་རུང་བ་ཉིད་ཀྱི་ཆེད་དུ། ཕྱི་རོལ་དུ་ཡང་དེ་ལྟ་ཁོ་ནར་དེ་དག་གིས་དབང་དུ་བྱའོ། །དེ་ལས་དེའི་རྣམ་པར་ཤེས་པ་རང་གི་འདོད་པས་འཕོས་ནས་བར་དོའི་སྲིད་པར་གནས་པ་ལམ་འགྲོ་བ་གཞན་ཡོངས་སུ་འཛིན་ཏེ། ཡང་ན་གཞན་གྱི་གྲོང་དུ་འཇུག་གོའམ། གཞན་རྣམས་ཚར་གཅོད་པ་དང་རྗེས་སུ་འཛིན་པ་དག་བྱེད་དོ། །དེ་ལ་གཏུམ་མོའི་ས་བོན་གྱིས་ཐིག་ལེ་ལས་བྱུང་བའི་འོད་ཟེར་དང་བཅས་པའི་འབར་བས་ཨཱ་ལི་ཀཱ་ལིའི་ཕྲེང་བ་དང་ལྷན་ཅིག་སྣ་གཡས་པ་ནས་བྱུང་སྟེ། བསྒྲུབ་བྱའི་སྣ་བུག་གཡོན་ནས་ཞུགས་ནས་སྙིང་གའི་ཆུ་སྐྱེས་སུ་སོང་བའི་འབར་བའི་རིན་པོ་ཆེའི་རྣམ་པ་ཅན་རྣམ་པར་ཤེས་པ་ལ་ཁྱབ་པར་བྱས་ཏེ་ཁྱེར་ནས། སྣ་གཡས་པ་ནས་བྱུང་ཞིང་རང་གི་
གཡོན་པ་ནས་ཞུགས་ཏེ་གསང་བའི་མེར་བཅུག་ལ་བསྲེག་ཅིང་ཚར་བཅད་དོ། །དེའི་རྗེས་སུ་དེ་གནོད་པ་བྱེད་པ་ལ་སོགས་པའི་བསམ་པ་ལོག་པ་མེ་དང་བྲལ་བ་ལ། མན་ངག་ཇི་ལྟ་བར་གཞོམ་དུ་མེད་པའི་བདུད་རྩིའི་རྒྱུན་དཀར་པོ་རྣམས་ཀྱིས་དབང་བསྐུར་ལས། ནད་ལ་སོགས་པ་རབ་ཏུ་ཞི་ཞིང༌། སེར་པོ་རྣམས་ཀྱིས་ཡོན་ཏན་གྱི་ཚོགས་རྒྱས་ལ་དམར་པོ་རྣམས་ཀྱིས་དབང་དུ་བྱས་པ། དེ་ལྟ་ཁོ་ནར་བཏོན་ཏེ། བཅུག་ནས་སྙིང་གའི་ཆུ་སྐྱེས་སུ་གཞུག་པས་རྗེས་ཐོགས་སུ་འཛིན་ཏོ། །དེ་ལས་ཕྱུང་ནས་རང་གི་ལུས་ལ་རབ་ཏུ་འཇུག་གོ །འཆི་བ་ནི་ཇི་སྐད་བཤད་པའི་གཏུམ་མོའི་རྣལ་འབྱོར་གོམས་པ་རབ་ཏུ་གྱུར་པ་ཁོ་ན་ལས་ངེས་པར་སླུ་བར་བྱེད་ཅིང་གཉེར་མ་ལ་སོགས་པ་ཡང་སྟེ། དེ་ཁོ་ན་ལས་རླུང་དབང་དུ་གྱུར་པ་ལ་སོགས་པ་ཡོན་ཏན་རིན་པོ་ཆེའི་ཕུང་པོ་བསྐྱེད་པའི་ཕྱིར་རོ། །རྣམ་པ་འདི་ལྟ་བུ་ནི་སྔར་རྣམ་པར་སྤྲོས་སོ་ཞེས་པ་མན་ངག་དང་བཅས་པའི་བསྡུས་པའི་དོན་ཏོ། །དེ་ཉིད་ཀྱི་ཕྱིར་སྤྲོས་པ་ཐམས་ཅད་ལྡོག་པས་སྙིང་རྗེ་དང་ཤེས་རབ་རོ་གཅིག་པ་ཉིད་གོམས་པ་ཕུལ་དུ་བྱུང་བ་ཁོ་ན་ལས་ཚོགས་གཉིས་ལས་སྐྱེས་པ་མངོན་པར་མཐོ་བ་དང་ངེས་པར་ལེགས་པ་ཕུན་སུམ་ཚོགས་པ་ཤིན་ཏུ་ཆེན་པོ་ཉིད་རྣམས་གསལ་བར་འགྱུར་རོ་ཞེས་རྟོགས་པའི་ཆེད་དུ་སྐབས་བྱེད་པ་ལ་ཞུས་པ། ཀྱེ་ཞེས་པ་ལ་སོགས་པའོ། །ཡེ་ཤེས་ཀྱི་ཁྱད་པར་ཅི་ལགས་པའོ། །གསང་བ་ནི་དམན་པ་རྣམས་ཀྱི་སྤྱོད་ཡུལ་མ་ཡིན་པ་ཉིད་ཀྱི་ཕྱིར་རོ། །ཡུལ་རྣམས་མེ་ལོང་ལ་བཞིན་བཞིན་དུ་དང་བས་ཕལ་ཆེར་མི་དགེ་བ་མི་སྤྱོད་པའི་ཕྱིར་དང༌། འགའ་ཞིག་གི་ཡིད་ཀྱི་རང་བཞིན་གྱིས་ལུས་སྣང་བརྙན་དུ་བྱེད་པའི་ཕྱིར་རོ། །ལྷ་མིན་རྣམས་ནི་ལྷའི་ཕུན་སུམ་ཚོགས་པ་རྣམས་ལ་མི་བཟོད་པ་འབར་བའི་སེམས་སོ། །བཀྲེས་པ་ལ་སོགས་པའི་སྡུག་བསྔལ་ཀྱིས་འཁྲུགས་པ་ཉིད་ཀྱི་ཕྱིར་ཡི་དགས་རྣམས་དམན་པའི་ཡིད་ཅན་རྣམས་སོ། །དམྱལ་བ་བ་རྣམས་ཀྱི་ནི་གཤིན་རྗེའི་སྐྱེས་བུ་རྣམས་ལས་མི་མཉམ་པའི་སྡུག་བསྔལ་དང་འཇིགས་པས་ཡང་དག་པར་ནོན་པའི་སེམས་རྣམས་སོ། །དུད་འགྲོ་རྣམས་ཀྱི་ནི་ཤིན་ཏུ་བརྟན་པའི་རྨོངས་པ་དང་ལྡན་པའི་སེམས་སོ། །མི་རྣམས་ཀྱི་ཡེ་ཤེས་ནི་ཇི་ལྟར་རིགས་པར་དང་བ་ཉིད་ལ་སོགས་པའི་ཁྱད་པར་ཅན་ནོ། །རང་བཞིན་ཉིད་ཀྱི་ཕྱིར་ཕལ་ཆེ་བས་དེ་རྣམས་མདོར་བསྟན་ནས་བསྟན་པ་འཇུག་པ་ལས་རྣམ་
པར་ཤེས་པར་བྱའོ། །འོ་ན་ཤིང་རྣམས་སེམས་པ་ཅན་ཡིན་ཏེ། ཉལ་བའི་ཕྱིར་རོ་ཞེས་ཕྱོགས་ཀྱི་གོས་ཅན་འདོད་པའི་ཡེ་ཤེས་ཀྱི་ཁྱད་པར་ཅི་ཡིན་ཞེ་ན། ཅི་ཡང་མེད་དེ། ཤིང་རྣམས་ལ་སེམས་མེད་པ་དེ་ཁོ་ནའི་ཕྱིར་རོ་ཞེས་གསུངས་པ། སེམས་མེད་ཅེས་པ་སེམས་པ་མེད་པའོ། །བསྟན་པ་ནི་འདིར་རྒྱུན་དུ་གནས་པའི་ཆོས་དང་ལྡན་པ་ཤིང་སྡོང་ལ་སོགས་པ་ནི་དུས་ཐུང་དུར་གནས་པ་ཀློག་ལ་སོགས་པ་གང་གི་དང་པོ་ཡིན་པ་དེ་ནི་དེ་སྐད་དོ། །རི་དང་ཆུ་ཀླུང་དང་ཀློག་ལ་སོགས་པ་བཞིན་དུ་ལྗོན་ཤིང་དང་འཁྲི་ཤིང་ལ་སོགས་པ་ལ་ཡང་སོགས་པ་མེད་པའོ་ཞེས་དགོངས་པའོ། །སྒྲུབ་བྱེད་ཉལ་བ་ལ་སོགས་པ་ནི་གཞན་དུ་ཤིང་རྟ་ཆེན་པོ་རྣམས་ཀྱིས་སུན་ཕྱུང་ཟིན་ཏོ་ཞེས་པས་གྱི་ནའོ། །དེའི་ཕྱིར་དཀྱུས་མཉེ་བར་སྡུད་དེ། ལྔ་ཡིས་ཞེས་པ་ལ་སོགས་པའོ། །མེ་ལོང་ཡེ་ཤེས་ཉིད་དང་ཁྲོ་བ་དང༌། དམན་པ་ཉིད་དང་འཇིགས་པས་དུ་བ་དང་རྨོངས་པ་ཞེས་པ་རྣམ་པ་ལྔ་སྟེ། ཕལ་ཆེར་ཁྱད་པར་ནི། ཇི་ལྟར་རིགས་པར་ཁྱད་པར་གཞན་རྣམས་ཉེ་བར་མཚོན་པའོ། །རྣམ་པ་འདི་ལྟ་བུའི་ཤེས་པ་ཅན་འཁོར་བ་པ་ལྷ་ལ་སོགས་པ་འདི་རྣམས་ནི་གླེན་པ་ཉིད་མི་ཤེས་པ་སྟེ། མ་རིག་པ་ཉིད་ཀྱིས་ཡང་དག་པ་མ་ཡིན་པ་སྒྲོ་བཏགས་པའི་འདོད་ཆགས་ལ་སོགས་པས་ངན་པར་སེམས་པའི་ཕྱིར་གླེན་པ་རྣམས་ཀྱང་ངོ༌། །དེ་ཉིད་ཀྱིས་ཁྱབ་པས་ལུས་ཀྱིས་ཉེས་པར་སྤྱད་པ་སྤྱོད་པའི་ཕྱིར་ཁེབས་པ་རྣམས་ཀྱང་ངོ༌། །ཡང་དག་པ་ཇི་ལྟ་བའི་དོན་གྱི་དེ་ཁོ་ན་ཉིད་སྨྲ་བར་མི་ནུས་པའི་ཕྱིར་ལྐུགས་པ་རྣམས་ཀྱང་ངོ༌། །དེ་ཉིད་ཀྱི་ཕྱིར་བྱིས་པའོ། །བསམ་པ་ངན་པ་སེམས་ཤིང་བྱ་བ་ངན་པ་བྱེད་པ་སྨྲ་བ་ངན་པ་སྨྲ་བའི་ངང་ཚུལ་ཅན་ནི་བྱིས་པ་ཞེས་གསུངས་སོ། །དེ་རྣམས་ཀྱི་བྱིས་པའི་ཤེས་པ་ནི་འདི་འདྲ་བ་སྟེ། དེའི་གཉེན་པོའི་ཕྱོགས་ནི་ཁམས་གསུམ་པར་སོ་སོར་སྣང་བའི་ཡོད་པ་དང་མེད་པ་དང་གཉིས་ཀ་དང་གཉིས་ཀ་མ་ཡིན་པའི་ཕྱོགས་སོ་སོར་སྤོང་བ་ལས། དེ་ཁོ་ན་ཉིད་ཀྱི་བྱེ་བྲག་རང་བཞིན་མེད་པ་ནི། ཤེས་རབ་དང་ཐབས་དབྱེར་མེད་པ་གསལ་བར་བྱེད་པའི་ཕྱིར་དང༌། ཉོན་མོངས་པའི་དགྲ་འཆོས་པ་དང་ངན་འགྲོའི་འཇིགས་པ་ལས་སྐྱོབ་པས་ན་བསྟན་བཅོས་ལས་ཏེ། རྒྱུད་རྣམ་པ་གསུམ་བསྡུས་པ་རྫོགས་པ་སྙིང་པོའི་དོན་རབ་ཏུ་གསལ་བར་བྱེད་པས་ན། རྒྱུད་གཞན་རྣམས་ལས་ཁྱད་པར་དུ་འཕགས་པ་ཞེས་པས་ཁྱད་པར་ལས་ཏེ་དཔལ་ཡང་དག་པར་སྦྱོར་བའི་རྒྱུད་འདི་
ལས་རྟོགས་པར་བྱའོ། །འདི་ལས་ཀྱང་རྒྱུད་འདིའི་བདག་ཉིད་ཆེན་པོ་ཉིད་གསལ་བར་བྱེད་ཅིང་གསུངས་པ། སྐྱེ་བ་ཞེས་པ་ལ་སོགས་པའོ། །བཅོམ་ལྡན་འདས་མར་མེ་མཛད་ཚུན་ཆད་དུ་སངས་རྒྱས་ཀྱི་ཞིང་འདིར་བསྐལ་པ་ཤིན་ཏུ་མང་པོ་རྣམས་ལ་རྒྱུད་མ་ལུས་པའི་སྙིང་པོ་རྒྱུད་སྡེ་རིན་པོ་ཆེ་འདི་དག་ཁོ་ནས་བཤད་ཀྱི། རྫོགས་པའི་སངས་རྒྱས་གཞན་རྣམས་ཀྱིས་ནི་མ་ཡིན་ནོ། །དེའི་ཕྱིར་བདག་གིས་འདིར་བཤད་པའི་གཉིས་སུ་མེད་པའི་ཡེ་ཤེས་ཀྱིས་བསྐུལ་བ་སྟེ། ཀྱེ་ཐར་པ་འདོད་པ་རྣལ་འབྱོར་གྱི་བསྟན་བཅོས་འདི་ཁོ་ན་ལ་མཁས་པ་ཤེས་པ་དང་ལྡན་པ་ཤིན་ཏུ་བར་འགྱུར་རོ། །འབྱུང་བ་མོའི་བདག་པོ་ལ་སོགས་པ་བཤད་པ་བླ་ན་མེད་པའི་དེ་ཁོ་ན་ཉིད་ལས་ཕྱིར་ཕྱོགས་པའི་བསྟན་བཅོས་རྒྱུད་ལ་སོགས་པའི་སྒྲ་བཀོད་པ་རྣམས་ལ་ནི་ཡིན་ནོ། །དེ་རྣམས་ནི་གར་གྱི་གནས་ཀྱི་ས་གཞི་ལ་མངོན་པར་གསར་དུ་ཚིག་བཀོད་པ་རྣམས་ཀྱིས་འཐད་པ་དང་འབྲལ་བ་ཉིད་ཀྱིས་ན་དེ་ལ་མོས་པ་རྣམས་རངས་པ་ཙམ་གྱིས་ཡིད་ཆགས་པར་བྱེད་པའི་ཕྱིར་མཚུངས་ཤིང་དྲང་བ་རྣམས་སོ། །དེས་ན་འདི་ཁོ་ན་ལས་ཆོས་ཐམས་ཅད་ཀྱི་རང་གི་ངོ་བོ་ཡོངས་སུ་ཤེས་པས་ཡང་དག་པའི་ཡུལ་བསྟན་པའི་ཆེད་དུ་དང་གྲོལ་བའི་ཆེད་དུ་རྣལ་འབྱོར་ལ་འབད་པ་བསྒྲུབ་པར་བྱའོ། །དོན་འདི་ཁོ་ན་སྙིང་པོ་ལས་ཏེ་ཤིན་ཏུ་མཆོག་བསྐྱེད་པའི་རིམ་པ་ལས་སྙིང་པོ་དྲང་བར་བྱ་བ་མཆོག་ཕུལ་དུ་བྱུང་བའི་རྣལ་འབྱོར་བཤད་དོ་ཞེས་པའོ། །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱ་ཆེར་འགྲེལ་པ། མན་ངག་གི་སྙེ་མར་སྙེ་མ་སུམ་ཅུ་གཅིག་པའོ།། །།