སྙེ་མ་སོ་གསུམ་པ། རྣམ་པར་འཕྲུལ་བ་རྣམས་ཀྱིས་སྐྱེ་བ་བསྟན་པ།
དེ་ཁོ་ན་ཉིད་ལེགས་པར་བསྒོམས་པས་ཇི་སྐད་གསུངས་པའི་རྫོགས་བའི་དཀྱིལ་འཁོར་གྱི་བདག་ཉིད་ཅན་རྡོ་རྗེ་འཛིན་པ་རྣམ་པ་སྣ་ཚོགས་པའི་སྤྲུལ་པའི་རླབས་ཀྱིས་ཡོངས་སུ་བསྐོར་བ་ཁོ་ན་སྐྱེ་བོའི་ཞེས་གསལ་བར་འགྱུར་བའི་ཆེད་དུ་གསུངས་པ། དེ་ནས་ཞེས་པ་ལ་སོགས་པའོ། །ལྷ་ཞེས་པ་རོལ་རྩེད་ཀྱི་སྐབས་སུ་འོས་པའི་བོད་པའོ། །མྱང་འདས་ནི་ཀུན་དུ་རྟོག་པ་མཐའ་དག་སྤངས་པའི་ཕྱིར་ཤེས་རབ་དང་སྙིང་རྗེ་དག་གིས་སྲིད་པ་དང་ཞི་བ་ལ་མི་གནས་པའོ། །དེའི་གོ་འཕང་ནི་གནས་ཏེ་ཀུན་རྫོབ་ཏུའོ། །དེ་ལས་རྒྱས་པ་ནི་ཆོ་འཕྲུལ་རྣམ་པར་འཕྲོ་བའོ། །མདོར་བསྟན་པ་འདི་རྒྱས་པར་སྟོན་པ་ནི། ཅི་ཞིག་ཏུ་ཞེས་པ་ལ་སོགས་པའོ། །ཉོན་ཅིག་ནི་མངོན་པར་འདོད་པའི་གནས་སོ། །རིགས་པ་ནི་འདིར་རྫོགས་པའི་རིམ་པའི་དཀྱིལ་འཁོར་རབ་ཏུ་གསལ་བ་སྟེ། དེ་ལས་མ་འདས་པར་བཤད་པར་བྱའོ། །རྟོག་པའི་སེམས་ཀྱི་འཛིན་པའི་ནི་འགོག་པ་སྟེ། མྱ་ངན་ལས་འདས་པའོ། །གང་སྔར་གཉིས་པ་དང་དྲུག་
པའི་བརྟག་པར། ཐམས་ཅད་བདག་ཉིད་ལ་རྟག་གནས། །ཞེས་པ་འདི་ལྟར་རྒྱུན་གྱིས་གསལ་བར་བྱས་པ། དེ་ཁོ་ན་འཛིན་པའོ་ཞེས་འབྲེལ་ལོ། །དེ་ཁོ་ན་སྟོང་པ་ཉིད་དང་སྙིང་རྗེ་དབྱེར་མེད་པ་བདེ་བ་ཆེན་པོའི་སྙིང་པོའི་ངོ་བོ་བྱང་ཆུབ་ཀྱི་སེམས་བླ་ན་མེད་པའི་དཀྱིལ་ཏེ། དེ་ལེན་པའི་ཕྱིར་ལུས་ནི་དཀྱིལ་འཁོར་ཞེས་སངས་རྒྱས་རྣམས་གསུང་ངོ་ཞེས་པ་སྡུད་པ་མཛད་པའིའོ། །དེ་ཅི་ལྟར་ཤེས་པར་བྱ་ཞེ་ན། བརྗོད་པའི་རྗེས་སུ་འབྲང་བས་སོ། །དེའི་གནས་ནི་ལུས་ཀྱི་དཀྱིལ་འཁོར་ལྟེ་བའི་ཆུ་སྐྱེས་སོ། །གང་གསུངས་པ། ཀུན་ཞེས་པ་ལ་སོགས་པ་སྟེ། ཀུན་མཁྱེན་ཡེ་ཤེས་ནི་ཇི་སྐད་གསུངས་པའི་བདེ་བ་ཆེན་པོ་སྟེ། དེས་མངོན་པར་ཁྱབ་པ་རབ་ཏུ་གསལ་བའོ། །དེའི་ཕྱིར་ལྟེ་བའི་པདྨ་དེར་རོ། །དགའ་བ་ནི་སྤྲོས་པ་རྩ་བ་ནས་ཕྱུང་བ་དེ་མ་ཐག་ཏུ་བཤད་པའི་བྱང་ཆུབ་སེམས་ཀྱི་བདག་ཉིད་རྡོ་རྗེ་སེམས་དཔའོ། །ཆ་མེད་ནི་དོན་དམ་པར་དགའ་པ་ལ་སོགས་པའི་ཆ་རྣམས་སྟོང་པ་ཉིད་ཀྱི་ཕྱིར་རོ། ཆ་རྣམས་སྤངས་པ་ནི་ཁུ་བའི་ཆ་རྣམས་ཀྱང་དང་བཞིན་མེད་པ་ཉིད་ཀྱི་ཕྱིར་རོ། །རྩེན་པར་བྱེད་ནི་ཀུན་རྫོབ་ཏུའོ། །ལུས་ཅན་རྣམས་ཀུན་ལ་ཞེས་པ་ཐམས་ཅད་ལ་དེའི་བདག་ཉིད་དུ་འབྲེལ་བས་སོ། །དོན་དམ་པ་ནི་ལུས་ལས་འདས་ཏེ། གང་གི་ཕྱིར་ལུས་ཀྱི་བག་ཆགས་སྤངས་པས་སོ། །ཇི་སྐད་དུ་གསུངས་པ། ལུས་གནས་ཡེ་ཤེས་ཆེན་པོ་ཡང༌། ཀུན་དུ་རྟོགས་པ་ཐམས་ཅད་སྤངས། །དངོས་པོ་ཀུན་ལ་ཁྱབ་པ་པོ། །ལུས་ལ་གནས་ཀྱང་ལུས་སྐྱེས་མིན། །ཞེས་སོ། །དེ་ནི་མ་རིག་པ་དང་བཅས་པས་རྟོགས་བྱ་མ་ཡིན་ནོ། །ཡོངས་སུ་དག་པ་ནི་དེ་རྟོགས་པས་སངས་རྒྱས་ཐམས་ཅད་རྫུ་འཕྲུལ་ཆེན་པོ་རྣམས་ཀྱིས་རྣམ་འཕྲུལ་ཅིང༌། གཞན་གྱི་དོན་དུ་ཤིན་ཏུ་དགའ་སྟོན་ལ་སྤྲོས་པས་རྣམ་པར་རོལ་ཅིང་རང་གི་ངོ་བོ་འཇུག་པར་མཛད་དོ། །དེའི་འཇུག་པ་གསུངས་པ། ལ་ལར་ཞེས་པ་ལ་སོགས་པ་སྟེ། དཔེར་ན། བདག་ཅག་གི་སྟོན་པས་ནི་བཅོམ་ལྡན་འདས་ཤཱཀྱ་ཐུབ་པ་ཡང་དག་པར་རྫོགས་པའི་སངས་རྒྱས་ལ། རབ་གསལ་ཞེས་བྱ་བའི་རྒྱལ་པོར་འགྱུར་པས་སྨོན་པའི་བྱང་ཆུབ་ཀྱི་སེམས་བསྐྱེད་པར་གྱུར་ཏོ། །བཅོམ་ལྡན་འདས་མར་མེ་མཛད་ལ་ཡང་འཇུག་པ་བྱང་ཆུབ་ཀྱི་སེམས་སོ། །
དེ་སྐད་དུ་ཡང་བཅོམ་ལྡན་འདས་ཀྱིས་གསུངས་པ། ཇི་སྲིད་སངས་རྒྱས་ཤཱཀྱ་ཐུབ་ནས། །འདྲེན་པ་ཡུལ་འཁོར་སྐྱོང་གི་བར། །སྟོང་ཕྲག་བདུན་ཅུ་རྩ་བདུན་གྱི། །སངས་རྒྱས་རྣམས་ནི་ངས་མཆོད་དོ། །བདག་གིས་རྒྱལ་བ་རྣམས་མཆོད་ལས། །གྲངས་མེད་གཅིག་ནི་སོང་གྱུར་ཏེ། བདག་གི་སེམས་ནི་སྐྱོ་བའང་མེད། །སངས་རྒྱས་ཉིད་ནི་མངོན་འདོད་པས། །ཇི་སྲིད་སངས་རྒྱས་མར་མེ་མཛད། །ཐུབ་པ་དབང་པོའི་རྒྱལ་མཚན་པར། །སྟོང་ཕྲག་བདུན་ཅུ་རྩ་དྲུག་གི །སངས་རྒྱས་རྣམས་ནི་བདག་གིས་མཆོད། །བདག་གིས་རྒྱལ་བ་མཆོད་པ་ལས། །གྲངས་མེད་གཉིས་པ་སོང་པར་གྱུར། །ཇི་སྲིད་སངས་རྒྱས་དགེ་མཛད་ནས། །སངས་རྒྱས་འོད་སྲུངས་ཇི་སྲིད་པར། །སྟོང་ཕྲག་བདུན་ཅུ་རྩ་བདུན་གྱི། །སངས་རྒྱས་རྣམས་ནི་བདག་གིས་མཆོད། །བདག་གིས་རྒྱལ་བ་རྣམས་མཆོད་ལས། །གྲངས་མེད་གསུམ་པ་འདས་པར་གྱུར། །ཞེས་པ་ལ་སོགས་པའོ། །ཇི་སྲིད་རྗེས་མཐུན་ཞེས་པ། བསྐལ་པ་གྲངས་མེད་པ་གསུམ་རྣམས་སུ་ཡང་བྱང་ཆུབ་སེམས་དཔར་གྱུར་པའི་བཅོམ་ལྡན་འདས་ཀྱིས། སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་རྣམས་སྤྱད་ཅིང་རིམ་གྱིས་རྫོགས་པའོ། །དེའི་རྗེས་སུ་བྱང་ཆུབ་སེམས་དཔའ་གཞན་གྱི་དོན་དུ་དགའ་ལྡན་པ་རྣམས་སུ་འཁྲུངས་པར་གྱུར་ཏོ། །དེ་ནས་དམ་པ་ཏོག་དཀར་པོ་ཞེས་བྱ་བ་འདིས་རིགས་དང་ཡུལ་དང་དུས་དང་རུས་དང་བུད་མེད་རྣམས་བརྟགས་ཏེ། འདོད་པ་ན་སྤྱོད་པའི་ལྷ་རྣམས་ལ་ལན་གསུམ་རྗེས་སུ་བསྒྲགས་ནས། ནམ་གྱི་གུང་ཐུན་ལ་གླང་པོ་ཆེའི་རྒྱལ་པོའི་གཟུགས་སུ་ངེས་པར་བསྟན་པས་ལྷ་མོ་སྒྱུ་འཕྲུལ་ཆེན་མོའི་ལྷུམས་སུ་ཞུགས་སོ་ཞེས་པ་འབབ་པའོ། །དེ་ནས་ཟླ་བ་བཅུ་རྣམས་འདས་པ་དང༌། ལྷ་མོ་ལས་ལུ་མྦི་ནཱིའི་ཚལ་དུ་མཚན་མོའི་གུང་ཐུན་ལ་བལྟམས་ཏེ། འཇིག་རྟེན་གྱི་ཁམས་རྣམས་ཀྱང་བྱང་ཆུབ་སེམས་དཔའི་འོད་དང་སྣང་བ་ཆེན་པོས་གསལ་པར་བྱས་ཤིང༌། ས་གཞི་ཡང་རྣམ་པར་འགྱུར་བ་དྲུག་ཏུ་གཡོས། །ལྷ་རྣམས་ཀྱིས་ཀྱང་བར་སྣང་ལས་རྣམ་པ་སྣ་ཚོགས་པའི་གོས་དང་གདུགས་དང་རྔ་ཡབ་དང་མེ་ཏོག་དང་ཙནྡན་ལ་སོགས་པ་རྣམས་ཀྱིས་གཏོར་རོ། །བྱང་ཆུབ་སེམས་དཔའ་ཡང་མངལ་གྱི་དྲི་མས་མ་གོས་པ་ནོར་བུ་བཞིན་
དུ་དང་བའི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་རྣམས་དང་དཔེ་བྱད་བཟང་པོ་བརྒྱད་ཅུས་བརྒྱན་པར་འཁྲུངས་སོ་ཞེས་པ་སྐྱེ་བ་རྣམ་པར་དག་པའོ། །དེ་ནས་གཞོན་ནུའོ་རོལ་རྩེད་ཉེ་བར་བསྟན་ནས་གྲགས་འཛིན་མ་དངས་སྐྱོང་མ་ལ་སོགས་པ་བུད་མེད་སྟོང་ཕྲག་དྲུག་ཅུའི་བཙུན་མོའི་འཁོར་དུ་ཞུགས་ནས། འདི་སྐྱེས་བུ་མིན་པས་རབ་ཏུ་བྱུང་ངོ་ཞེས་སྨོད་པ་ཡོངས་སུ་སྤང་བའི་ཆེད་དུ་ལྷ་མོ་གྲགས་འཛིན་མ་དང་ལྷན་ཅིག་ཡོངས་སུ་རྒྱུ་བ་མཛད་དོ། །དེ་ནས་བརྒྱ་བྱིན་དང་ཚངས་པ་ལ་སོགས་པ་ལྷ་རྣམས་ཀྱིས་སྤྲོ་བར་བྱས་པ། འདུན་པ་དང་ལྷན་ཅིག་རྟའི་རྒྱལ་པོ་བསྔགས་ལྡན་ལ་ཆིབས་ཏེ། འདོད་པ་ན་སྤྱོད་པ་དང་གཟུགས་ན་སྤྱོད་པའི་ལྷ་རྣམས་ཀྱིས་རྗེས་སུ་འབྲང་བཞིན་པ་རྣམ་པ་སྣ་ཚོགས་པའི་གོས་དང་མེ་ཏོག་ལ་སོགས་པ་བུས་མོ་ནུབ་ཙམ་ལ་གཤེགས་ཤིང༌། དཔག་ཚད་བཅུ་གཉིས་རྣམས་སུ་གཤེགས་སོ་ཞེས་པ་ཁབ་ནས་འབྱུང་བ་སྟེ། གསལ་བ་ནི་རབ་ཏུ་གྲགས་པའོ། །དེ་ནས་འདུན་པ་དང་བསྔགས་ལྡན་དག་བསྐུར་ནས་དབུ་སྐྲ་རྣམས་གྲིས་བྲེགས་ཏེ་བརྒྱ་བྱིན་ལ་གནང་ཞིང་ན་བཟའ་ངུར་སྨྲིག་རྣམས་བསྣམས་ཏེ་དགེ་སློང་དུ་གྱུར་པས། ཆུ་བོ་ནཻ་ར་ཉྫ་ནའི་འགྲམ་དུ་དབུགས་པ་དབྱུང་བ་དང་དབུགས་རྔུབ་པ་བཀག་པ་ལས་མི་གཡོ་བའི་ཏིང་ངེ་འཛིན་གྱིས་ཏིལ་གཅིག་རེ་ཙམ་གསོལ་བའི་དཀའ་ཐུབ་ལོ་དྲུག་སྤྱད་དེ། འདི་ནི་བྱང་ཆུབ་ཀྱི་ཆེད་དུ་བའི་ལམ་མ་ཡིན་ནོ་ཞེས་ཇི་ལྟར་བདེ་པར་དབུགས་ཕྱུང་ནས་སྦྲང་དང་འོ་ཐུག་ཡོངས་སུ་གསོལ་ཏེ། བཞུགས་པ་ཙམ་གྱིས་བྲག་རི་ཆེན་པོ་ཞིག་པའི་རྗེས་ཐོགས་སུ་ལྷ་རྣམས་ཀྱིས་ཉེ་བར་བསྟན་པའི་ལམ་ནས། ཀླུའི་རྒྱལ་པོ་ནག་པོས་བསྟོད་བཞིན་བྱང་ཆུབ་ཀྱི་ཆེད་དུ་གཟིགས་མོ་ཆེན་པོས་གཤེགས་ཏེ། རྡོ་རྗེ་གདན་གྱི་ས་གཞི་ལ་འཛེགས་ནས་བྱང་ཆུབ་ཤིང་གི་རྩ་བར། ཀུ་ཤ་གསེར་གྱི་ཁ་དོག་ཅན་རས་བལ་ལྟར་རེག་བྱ་འཇམ་པ་རྣམས་ལ་བཞུགས་ཤིང༌། འབྱུང་པོ་བྱེ་བ་ཕྲག་སུམ་ཅུ་རྩ་དྲུག་གི་འཁོར་ཅན་འདོད་པའི་ཁམས་ཀྱི་དབང་ཕྱུག་གི་བདུད་བྱམས་པའི་མཚོན་གྱིས་བཏུལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །ཚངས་པས་གསོལ་བ་བཏབ་
པ་ཝཱ་རཱ་ཎ་སཱི་རུ་གཤེགས་ཏེ། རྣམ་པ་བཅུ་གཉིས་ལན་གསུམ་གསུམ་དུ་བཟླས་པའི་ཆོས་ཀྱི་འཁོར་ལོ་རབ་ཏུ་བསྐོར་རོ། །སུམ་ཅུ་རྩ་གསུམ་པའི་ལྷའི་གནས་སུ་གཤེགས་ནས་ཆོས་བསྟན་ཏེ་བརྒྱ་བྱིན་དང་ཚངས་པ་ལ་སོགས་པ་འདོད་པ་ན་སྤྱོད་པ་དང་གཟུགས་ན་སྤྱོད་པའི་ལྷ་རྣམས་རྗེས་སུ་འབྲང་བཞིན་པ་གྲོང་ཁྱེར་གསལ་ལྡན་དུ་བབས་ནས། མཉན་ཡོད་དུ་ཆོ་འཕྲུལ་ཆེན་པོ་རབ་ཏུ་བསྟན་ཏེ། གཞན་མུ་སྟེགས་བྱེད་རྣམས་ཚད་མས་ཚར་བཅད་ཅིང༌། སེར་སྐྱའི་གཞིའི་ནགས་སུ་སེང་གེ་དང་འཕྲོག་བྱེད་དང་དབྱིག་གི་སྙིང་པོ་དང༌། གཞོན་ནུ་དང་འགེགས་ཀྱི་བདག་པོ་དང་དབང་པོ་དང་ཟླ་བ་དང་ཉི་མ་དང་སྒྲ་གཅན་དང་གཟའ་དང་རྒྱུ་སྐར་དང་དཔལ་མོ་དང་རྣམ་ཐོས་སྲས་དང་ཡུལ་འཁོར་སྲུང་དང་འཕགས་སྐྱེས་པོ་དང་མིག་མི་བཟང་དང་ས་དང་མེ་དག་གཤིན་རྗེ་དང་ཆུ་ལྷ་ལ་སོགས་པའི་ལྷ་དང་ཀླུ་དང་གནོད་སྦྱིན་དང་སྲིན་པོ་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་བརྒྱ་སྟོང་ཕྲག་དུ་མ་རྣམས་མྱ་ངན་ལས་འདས་པ་དང༌། སོ་སོར་ལྡན་པའི་ཆོས་བསྟན་པས་བཏུལ་ལོ། །དེ་ལྟ་བུ་ལ་སོགས་པའི་གདུལ་བྱའི་གནས་རྣམས་སུ་ཉེ་བར་བྱོན་ནས། ཐབས་རྣམ་པ་སྣ་ཚོགས་པ་རྣམས་ཀྱིས་སྐལ་པ་ཇི་ལྟ་བ་བཞིན་དུ་སེམས་ཅན་གྱི་ཕུང་པོ་དཔག་ཏུ་མེད་པ་རྣམས་ཐེག་པ་གསུམ་རྣམས་ལ་བཏུལ་ནས། བདེ་འགྲོའི་འབྲས་བུ་དང་ཐར་པའི་བྱང་ཆུབ་ཏུ་ཡང་རབ་ཏུ་བཀོད་དོ། །ཐེག་པ་ཆེན་པོ་ལ་རུང་བ་ཤེས་རབ་རྣོ་བ་རྣམས་ཀྱི་དབང་དུ་བྱས་ཏེ། རྡོ་རྗེ་འཛིན་པ་ལ་སོགས་པའི་གཟུགས་ཀྱིས་དངོས་གྲུབ་ཐམས་ཅད་ཀྱི་དབང་ཕྱུག་ཉིད་ཉེ་བར་སྟོན་ཅིང༌། རྡོ་རྗེ་ཐེག་པ་བསྟན་ཏོ། །དེ་ལ་ཡང་མི་འཇུག་པ་དབང་ཕྱུག་ཆེན་པོ་ལ་སོགས་པ་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་དུ་གཞུག་པ་ལ་སོགས་པས་གདུལ་བྱའི་ཆེད་དུ་འཇིག་རྟེན་གསུམ་ལས་རྣམ་པར་རྒྱལ་བའི་སྐུ་རུ་གསལ་བར་གྱུར་ཏོ། །འགྲོ་བ་འདུལ་བ་ལ་སོགས་པའི་བརྟག་པ་རྣམས་སུ་ཡང་དངོས་གྲུབ་ཆེན་པོའི་ལྷག་པའི་བདག་པོ་ཉིད་བླ་ན་མེད་པ་ཉེ་བར་བསྟན་ཏོ། །ཤཱཀྱ་ཐུབ་པའི་སྐུས་ནི་ཝཱ་རཱ་ཎ་སཱི་རུ་འཕགས་པ་བྱམས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ནས་ད་ལྟ་དེ་རྒྱལ་ཚབ་ཉིད་དུ་བསྒྲགས་སོ། །རྒྱལ་པོའི་
ཁབ་ཏུ་བྱ་རྒོད་ཕུང་པོ་ལ་འཛེགས་ཏེ། ཀུན་དགའ་བོ་མ་ག་དྷའི་ས་གཞི་ནི་དགའ་བར་འོས་པའི་ཞེས་གསུངས་ནས། ཡངས་པ་ཅན་དུ་ཡང་ཀུན་དགའ་པོ་དེ་བཞིན་གཤེགས་པ་རྫུ་འཕྲུལ་གྱི་རྐང་པ་བཞི་རྣམས་བསྟེན་པ་སྟེ། བཞེད་ན་བསྐལ་པ་འམ་བསྐལ་པའི་ལྷག་མར་གནས་སོ་ཞེས་ལན་གསུམ་བཀའ་སྩལ་ཏེ། གང་ཀུན་དགའ་བོ་ཅད་མི་སྨྲ་བར་དགོངས་ནས། མདོ་སྡེ་ལ་རྟོན་པས་ཐམས་ཅད་འབྱུང་བར་བྱའི་གང་ཟག་ལ་རྟོན་པས་ནི་མ་ཡིན་ནོ་ཞེས་བསླབས་ཏེ། གྲོང་ཁྱེར་ཀུ་ཤ་ཅན་དུ་རྒྱལ་པོ་ཆེན་པོ་བཞི་རྣམས་དང་བརྒྱ་བྱིན་ལ་བསྟན་པ་གཏད་ནས། སེམས་ཅན་རྣམས་ཀྱི་དོན་གྱི་ཆེད་དུ་རྡོ་རྗེ་ལྷ་བུའི་ཏིང་ངེ་འཛིན་གྱིས་སྐུ་གདུང་རྣམས་ཏིལ་ཙམ་དུ་བཞག་ཏེ། བསམ་གཏན་བཞི་པ་ལ་སྙོམས་པར་ཞུགས་པས་མི་གཡོ་བའི་ཞི་བ་ལྕོགས་ནས་འཇིག་རྟེན་གྱི་ཁམས་འདིར་ཡོངས་སུ་མྱ་ངན་ལས་འདས་སོ། །འཚམ་པ་མེད་པའི་ཁམས་གསུམ་པ་གཞན་རྣམས་སུ་སླར་ཡང་དཔག་ཏུ་མེད་ཅིང་བསམ་གྱིས་མི་ཁྱབ་པ་སྣ་ཚོགས་པའི་སྤྲུལ་པའི་ཚོགས་རབ་འབྱམ་རྣམས་ཀྱིས་རྒྱུན་མི་ཆད་པར་སྐྱེ་བ་ལ་སོགས་པ་སྟོན་ཅིང༌། ལུས་འཛིན་རྣམས་ལ་ཕན་པའི་བྱ་བ་རྣམས་ཀྱིས་ཆོས་ཀྱི་རྒྱལ་སྲིད་མུ་མཐའ་མེད་པས་མཆོག་ཏུ་རོལ་ཅིང་ད་དུང་ཡང་ཡོད་ལ། བསྐལ་པ་དཔག་ཏུ་མེད་པ་རབ་འབྱམ་དུ་ཆོས་ཀྱི་སྐུར་སླར་ཡང་འདི་དང་གཞན་དུ་ཡང་གནས་པར་འགྱུར་རོ་ཞེས་པ་ཐམས་ཅད་ལ་དགོངས་ནས་གསུངས་པ། འདི་ལྟ་སྟེ་ཞེས་པ་ལ་སོགས་པའོ། །འདི་ལྟ་སོགས་ཀྱིས་ཏེ་རྣམ་འཕྲུལ་གྱི་ལས་རྣམས་ཀྱིས་རབ་ཏུ་འཇུག་ཅེས་སྔ་མ་དང་འབྲེལ་ལོ། །མཆོག་ནི་དད་པོའོ། །འོ་ན་རྒྱུའི་གནས་སྐབས་ཀྱི་རྗེས་ཐོགས་སུ་ལས་རྣམས་ཡོད་པའི་ཕྱིར་དང་པོ་ཡོད་དོ་ཞེ་ན་མ་ཡིན་ཏེ། དཔག་ཏུ་མེད་ཅིང་ཐོག་མ་མེད་པའི་སངས་རྒྱས་རྣམས་ཀྱི་ལས་རྣམས་ཀྱང་ཐོག་མ་མེད་པས་སོ། །ཆོས་ཀྱི་སྐུ་ལ་ལྟོས་པས་ནི་ཤིན་ཏུ་ཡང་སྟེ། དེ་ཉིད་ཀྱི་ཕྱིར་གསུངས་པ། ཀུན་ཞེས་པ་སྟེ་སངས་རྒྱས་ཀུན་རྣམས་ཀྱི་བདག་ཉིད་ལ་སྟེ་ཆོས་ཉིད་ལ་གང་རྣམས་སྡོམ་པ་སྟེ། དེའི་རང་བཞིན་ཉིད་ཀྱིས་ནང་དུ་འདུས་པ་དེ་རྣམས་ནི་དེ་སྐད་དོ། །དེ་རྣམས་ཀྱི་སྤྲོ་བ་དང་སྡུད་པ་དག་ཀྱང་དེ་ཁོ་
ནའིའོ། །གང་མངོན་པར་རྟོགས་པའི་རྒྱུད་དུ་གསུངས་པ། ཆོས་ཀྱི་སྐུ་ཡི་ཕྲིན་ལས་འདི། །རྣམ་པ་ཉི་ཤུ་བདུན་དུ་བཞེད། །ཅེས་སོ། །དེ་ཡང་ཐམས་ཅད་མཁྱེན་པའི་ཡེ་ཤེས་དང་རོ་མཉམ་པར་གྱུར་པའོ། །དེ་ཡང་དངོས་པོ་དང་དངོས་མེད་དུ་སྒྲོ་བཏགས་པ་དག་དང་བྲལ་པ་ཁོ་ན་དང་སྤྲུལ་པ་ནུས་པ་སྟེ། རྨོངས་པ་མ་ཡིན་ནོ། །དེ་དག་ཁོ་ན་ནི་རྨོངས་པ་སྟེ། དེ་ཕྱིར་དེ་ཡོངས་སུ་སྟེ་བག་ཆགས་དང་བཅས་པ་དོར་བྱ་སྟེ། རྫོགས་པའི་རིམ་པ་དང་དཀྱིལ་འཁོར་བསྒོམ་པས་སོ། །དེ་ཡང་སྔར་རྒྱས་པ་དང་བཅས་པར་གསུངས་ཟིན་ཅིང༌། སྡུད་པ་གསུངས་པའི་ཆེད་དུ་བཀའ་སྩལ་པ། བུང་བ་ཞེས་པ་ལ་སོགས་པ་སྟེ། མི་མཉམ་པའི་བདེ་བ་ལེན་ཅིང་ཀུན་ནས་འཛིན་ནོ་ཞེས་པས་ཨཱ་ལི་སྟེ་ཁུ་བའོ། །འཁྲུལ་པ་འབྲལ་པར་བྱེད་དོ་ཞེས་པ་བུམ་པའོ། །ཅི་ལྟར་འཁྲུལ་པ་འདོར་བར་བྱེད་ཅེ་ན་གང་གི་ཕྱིར་དེ་རྡོ་རྗེ་འཇིགས་བྱེད་བཅོམ་ལྡན་འདས་ཏེ། ཁུ་བའི་རྣམ་པ་བཅོམ་ལྡན་འདས་འགྱུར། །ཞེས་གསུངས་པའི་ཕྱིར་རོ། །རྡོ་རྗེ་ནི་སྟོང་པ་ཉིད་དང་ཡེ་ཤེས་རོ་གཅིག་པ་ཉིད་ཀྱི་ཕྱིར་རོ། །དེ་ཉིད་ཀྱི་ཕྱིར་དེ་ནི། ཨེ་སྟེ་ཨ་ཡིག་མ་སྐྱེས་པ་ལ་ཐིམ་མོ་ཞེས་པ་ཨཱ་ལིའོ་ཞེས་ཀྱང་གསུང་ངོ༌། །དེ་ཉིད་ཀྱི་ཕྱིར་འཇིགས་བྱེད་དེ། བྱིས་པ་རྣམས་སྐྲག་པའི་རྒྱུ་ཉིད་ཀྱི་ཕྱིར་རོ། །གང་འཕགས་པ་སྒྲ་གཅན་འཛིན་གྱིས་གསུངས་པ། བྱིས་པ་རྣམས་ལ་འཇིགས་སྟོན་མ། །ཞེས་སོ། །རྒྱས་པར་བསྟན་ཏེ། ཨཱ་ལི་ཞེས་པ་ལ་སོགས་པའོ། །བདེ་པ་མུར་ཐུག་པར་བྱེད་འབྲེལ་པར་བྱེད་དོ་ཞེས་པ་ནམ་མཁའི་མཐའ་ཀླས་པ་སྟེ། ཨ་ཏི་ཨ་དེ་འཆིང་བ་ལ་སྐད་ཀྱི་དབྱིངས་སོ། །ཅི་ལྟར་ཞེ་ན། ཆོས་ཀྱི་དབྱིངས་ནི་དེ་བཞིན་ཉིད་ཡིན་ལ་དེ་གང་གི་རང་གི་རང་བཞིན་དེ་ཁོ་ན་ཉིད་དུ་ཡིན་པ་སྟེ་ཆོས་ཅན་གྱིས་ཆོས་ཉེ་བར་མཚོན་པའི་ཕྱིར་རོ། །ཡང་ན་ཆོས་ཀྱི་དབྱིངས་ཀྱི་རང་བཞིན་དེ་ལས་སྐྱེས་པ་ཞེས་འབྲེལ་ལོ། །མཐའ་དག་ནི་རྒྱུ་བ་དང་བཅས་པའི་མི་རྒྱུ་བ་རྣམས་སོ། །སྡིག་པ་ལ་ཤིན་ཏུ་སྤྱོད་དོ་ཞེས་རྒྱུ་བའོ། །མི་སྤྱོད་དོ་ཞེས་པ་མི་རྒྱུ་བ་སྟེ། འཁོར་བ་ཅན་གྱི་ལུས་ཅན་རྣམས་སོ། །གསང་བར་བྱས་ན་གསང་པ་ཤེས་རབ་དང་ཐབས་ཀྱི་རང་བཞིན་གྱི་དེ་ཁོ་ན་ཉིད་འཛིན་པར་བྱེད་དོ་
ཞེས་པ་འཛིན་ཏེ། སྐྱེས་ཞེས་འབྲེལ་ལོ། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱང་མངོན་པར་མ་ཞེན་པར་གཞན་གྱི་དོན་བྱ་བའི་ཆེད་དུ་ཆོས་ཀྱི་དབྱིངས་ཁོ་ན་ལས་སྐྱེ་བ་ཞེས་པའི་དོན་ཏོ། །གསངས་བ་ངེས་འཛིན་ཞེས་འདོན་པ་ལ་ཡང་དོན་འདི་ལྟར་རོ། །དེ་ལྟར་དེ་ཁོ་ན་ཉིད་མི་ཤེས་པའི་ལུས་ཅན་རྣམས་དང་དེ་ཁོ་ན་ཉིད་ཤེས་པ་རྣམས་ཀྱང་བྱང་ཆུབ་ཀྱི་སེམས་ཁོ་ན་ལས་སྐྱེའོ། །དེས་ཀྱང་སྐྱེས་ཟིན་པ་རྣམས་ཕུང་པོ་ལ་སོགས་པ་རྣམས་བདུད་རྩིས་དགའ་བར་བྱེད་པ་ཉིད་ཀྱི་ཕྱིར་ཏེ། ཐམས་ཅད་པ་སྟེ་ཁྱབ་པར་བྱེད་པ་ཉིད་ཀྱི་ཕྱིར་རོ། །དབང་པོ་སྟེ་བདེ་བ་སྐྱེད་པའི་དོར་ལྷག་པའི་བདག་པོ་ཉིད་ཀྱི་ཕྱིར་རོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་དེ་ཐམས་ཅད་དེ་རྩ་སྟོང་ཕྲག་བདུན་ཅུ་རྩ་གཉིས་སུ་སོན་པའོ། །ལྟེ་བའི་ཆུ་སྐྱེས་ཀྱི་རྩ་བའི་དབུས་སུ་ཇི་ལྟར་སྦྱོར་བ་དེ་ལྟར་གོམས་པར་བྱའོ་ཞེས་ལྷག་མའོ། །དེའི་ཚེ་ཅི་ལྟར་བྱ་ཞེ་ན། འཇིགས་བྱེད་རྡོ་རྗེ་དང་སྒྲ་ཞེས་པ་ཡང་དག་སྡུད་པ་སྟེ། དེ་དང་རོ་གཅིག་ཏུ་གྱུར་པས་སོ། །དེ་ཡང་གང་ལས་ཤེ་ན། རྫོགས་པའི་དཀྱིལ་འཁོར་དུ་གཏུམ་མོ་གསུམ་རྣམས་གང་ཡང་རུང་བས་སྦྱོར་བ་སྟེ། དེ་ཁོ་ན་ཕྱག་རྒྱ་ཡིན་ཞིང་དེ་གོམས་པ་ལས་སོ། །ཅི་ལྟར་ཞེ་ན་གསུངས་པ། རླུང་དང་ཞེས་པ་ལ་སོགས་པ་སྟེ། རླུང་ནི་རླུང་ཉིད་དོ། །མེ་ནི་མེའོ། །བདུན་ཉིད་ནི་དེ་ཁོ་ན་ཉིད་དུ་ཆོས་དང་ཆོས་ཅན་དག་ཐ་མི་དད་པ་ཉིད་ཀྱི་ཕྱིར། ཁམས་བདུན་པ་ཁུ་བ་སྟེ་དེའོ། །རྡོ་རྗེ་མ་ནི་རྡོ་རྗེ་ཕག་མོའི། །དེའི་ས་བོན་རྡུལ་དེས་སོ། །ཐིག་ལེ་ནི་བདེ་བ་ཆེན་པོའི་འཁོར་ལོར་གནས་པའི་ཁམས་བདུན་པའོ། །སྒྲ་ཙམ་ནི་ལྟེ་བར་གནས་པའི་རྡུལ་གྱི་རི་མོའོ། །དེ་དག་གི་ཡང་དག་མནན་པ་ནི་ཕན་ཚུན་རོ་མཉམ་པ་ཉིད་དུ་ཇི་ལྟར་འགྱུར་བ་དེ་ལྟར་གྱུར་ན་བྱང་ཆུབ་སེམས་ཏེ་རྒྱུན་གྱིས་ཆར་འབེབས་ཏེ། སྐྱེ་གནས་ཀྱི་པདྨར་རོ། །བཤད་པ་གཞན་ནི་བཅུ་བར་བཤད་ཟིན་ཏོ། །གང་གི་ཕྱིར་གསུངས་པ། དབྱངས་ཞེས་པ་ལ་སོགས་པའོ། །དབྱངས་རྣམས་ཀྱི་སྔོན་མ་ཨ་ཡིག་དང་པོར་མའི་མངལ་དུ་སྐྱེ་བའི་ས་བོན་ནི་གང་རྡུལ་གྱི་དབུས་སུ་གནས་པ་ན་བུ་རྒྱུད་ཀྱི་སྐྱེ། དེ་གང་དུ་ཡིན་པ་དེའི་སྟེ་ལྟེ་བའི་ཆུ་
སྐྱེས་ཀྱི་དབུས་སུའོ། །དེ་ལ་ཀཾ་བདེ་བ་ཀུན་ནས་མྱོང་ངོ་ཞེས་པ་ཀཱ་ལིའོ། །སྐྱེ་གནས་ཀྱི་ཆུ་སྐྱེས་འདིས་རྒྱས་པར་བྱེད་དོ་ཞེས་པ་མེ་ཏོག་སྟེ་རྡུལ་ལོ། །རང་གི་གནས་སུ་དྲངས་ནས་བྱང་ཆུབ་ཀྱི་སེམས་འཚེད་པར་བྱེད་དོ་ཞེས་པ་རྒྱལ་པོ་སྟེ་དེས་ཁྱད་པར་དུ་བྱས་པའོ། །མེ་ཏོག་ཁྱད་པར་དུ་ལེན་ནོ་ཞེས་པ་མེ་ཏོག་ལུས་ཅན་ཁུ་བའི་ཁམས་སོ། །དེས་ཁྱད་པར་དུ་བྱས་པའི་རྡོ་རྗེ་ཅན་ནི་སེམས་ཀྱི་རྡོ་རྗེ་སྟེ་དེ་གཟུང་བར་བྱའོ། །ཇི་ལྟར་སྐྱེ་བ་འཛིན་པའི་གནས་སྐབས་སུ་སེམས་ཀྱི་རྡོ་རྗེ་སྒྲ་གཅན་ནི་ཟླ་བ་ཁོ་ན་ལ་འཇུག་སྟེ། འོད་ཟེར་བསིལ་བ་ཉིད་ཀྱི་ཕྱིར་རོ། །ཟླ་བ་ནི་ཉི་མ་ལ་ཞུགས་པ་ན་ཉི་མ་བཟུང་ངོ་ཞེས་པ་ཕྱི་རོལ་གྱི་བཞིན་དུ་ཉེ་བར་སྒྲོགས་པ་དེ་ལྟར་དབུས་མིའི་གནས་སྐབས་སུ་ཡང་ངོ༌། །འདི་ཡང་རླུང་ལ་སོགས་པའི་སྒོམ་པའི་རིམ་པར་སྔར་རྒྱས་པར་བྱས་སོ་ཞེས་པས་མ་སྤྲོས་སོ། །སེམས་སྐྱེ་བ་ཡང་ཟླ་བ་དང་ཉི་མ་དག་ལ་བརྟེན་ནས་སོ་ཞེས་ཞར་ལས་བྱུང་བ་སྟོན་པ། འཁོར་ཞེས་པ་ལ་སོགས་པ་སྟེ། ཐམས་ཅད་ནི་ཡོངས་སུ་མ་དག་པ་རྣམས་དང་ཡོངས་སུ་དག་པ་རྣམས་སོ། །གཉིས་ཀའི་རྟེན་ཅན་སྐྱེ་བ་ན་ཡང་རྡུལ་མ་དང་ཁུ་བ་ཕ་སྟེ། དེའི་སྒོ་ནས་པདྨ་དང་རྡོ་རྗེ་དག་དང་བུད་མེད་དང་སྐྱེས་པ་དག་མ་དང་ཕ་དག་གོ་ཞེས་རྣམ་པར་གཞག་པའོ་ཞེས་པ་ཇི་ལྟར་རིགས་པར་གོ་བར་བྱའོ། །འདིར་ནི་མའི་ཞེས་པ་རྡུལ་ཏེ་ཁུ་བའི་བདག་ཉིད་ཕ་ཉེ་བར་མཚོན་པའོ། །ས་ཀུན་དུ་སྟེ་འགྲོ་བའི་དབྱེ་བ་རྣམས་སུའོ། །ཡེ་ཤེས་ནི་བདེ་བ་ཉམས་སུ་མྱོང་བའོ། །དེ་ཁོ་ན་ནི་ཆུ་སྟེ་གདུང་བ་ཞི་བར་བྱེད་པའི་ཕྱིར་རོ། །དེ་ཕལ་ཆེ་བར་བརྟེན་པའི་ཕྱིར་དང་ཤེས་རབ་ལ་སོགས་པ་དང་སྦྱོར་བའི་ཕྱིར་རྒྱ་མཚོའོ། །འདི་ནི་མ་དང་ཕ་ཡང་ངོ༌། །འདི་ལྟར་ཕྱི་རོལ་གྱི་རྒྱ་མཚོ་ལ་རབ་ཏུ་ཤེས་པར་བྱ་ཞིང་བསོད་ནམས་ཉེ་བར་བསགས་པ་རྣམས་ཀྱིས་བལྟ་བར་བྱའོ་ཞེས་པས་ཤེས་རབ་སྟེ་རིན་པོ་ཆེའི་བྱེ་བྲག་རྣམས་ཡིན་པ། དེ་ལྟར་འདིར་སྟོང་པ་ཉིད་དང་སྙིང་རྗེ་དབྱེར་མེད་པའི་ཡེ་ཤེས་རིན་པོ་ཆེ་ནི་ཡོངས་སུ་དག་པ་རྣམས་ཀྱིས་ཏེ། གཞན་རྣམས་ཀྱིས་ནི་ཆུ་སྲིན་ལ་སོགས་པ་བཞིན་དུ་འདོད་ཆགས་ལ་སོགས་པའོ། །ཐབས་ཞེས་པ་ཐབས་ཁུ་བ་སྟེ་རྡུལ་ཤེས་རབ་ཉེ་བར་མཚོན་པའོ། །ཕན་ཚུན་
འདྲེས་པ་དེ་གཉིས་ཀྱི་འདམ་དུ་རྣམ་པར་ཤེས་པའི་ས་བོན་མྱུ་གུ་ཞེས་པའོ། །གང་འཕགས་པས་གསུངས་པ། རྣམ་ཤེས་སྲིད་པའི་ས་བོན་ནོ། །ཞེས་སོ། །དེས་ཡང་སྦྲང་རྩི་རྡུལ་དང་བདུད་རྩི་ཁུ་བ་སྟེ། དེ་དག་གི་གནས་སྐྱེ་གནས་ཀྱི་པདྨའི་ལྟེ་བ་རྒྱས་པར་བྱེད་དོ། །གང་གི་ཕྱིར་རྣམ་པར་ཤེས་པའི་ལྟར་རྡུལ་དང་ཁུ་བ་དག་གི་འང་རྣམ་པ་བསྒྱུར་ཏེ། མེར་མེར་པོ་ལ་སོགས་པ་གོང་ནས་གོང་དུ་འཕེལ་བའི་བདག་ཉིད་དང་འགྲིབ་པའི་ངོ་བོ་ནི་ཡོངས་སུ་འགྱུར་བའི་ཁྱད་པར་དུ་འགྱུར་ཏེ། གང་ལས་འདི་རྣམ་པར་བསྒྱུར་བའོ། །མེ་ཏོག་ཆུ་མཐའ་ནི་མེ་ཏོག་དང་ཆུ་དག་སྟེ་རྡུལ་དང་ཁུ་བ་དག་མཐའ་རུ་བྱེད་མཐའ་མར་བྱེད་པ་སྟེ། ཥོ་ནི་མཐའི་ལས་ལ་བྱིངས་སོ། །གསུངས་པ་ཡང༌། འོག་ཏུ་ཁུ་བ་ཟད་འགྲོ་སྟེ། །ལུས་ཅན་ཐམས་ཅད་འཆི་བ་ནའོ། །སྟེང་དུ་མ་ཡི་རྡུལ་སྒྲ་གཅན། །རྣམ་ཤེས་བསམ་པའི་མཚན་ཉིད་ལ། །ཞེས་སོ། །བསམ་པ་ནི། མངོན་པར་འདོད་པ་སྟེ། དེ་ལས་ཇི་ལྟ་བར་ཡུལ་དུ་བྱས་པའི་འགྲོ་བའི་བྱེ་བྲག་ཏུའོ། །སྐབས་སུ་བབ་པ་གསུང་བའི་ཆེད་དུ་འབྲེལ་པར་བྱེད་དེ། གཉིས་དག་གི་ཞེས་པ་ལ་སོགས་པའོ། །དེ་ལྟར་ཉི་མ་དང་ཟླ་བ་དག་སྐྱེས་པའི་འོ། །ཆོ་ག་ནི་ལྷའི་བདག་ཉིད་དོ། །དང་པོར་ཏེ་སྔོན་དུའོ། །རེག་པ་ལས་ནི་རྡོ་རྗེ་དང་པདྨ་དག་གོ །དུ་བའི་ཞེས་པ་དུ་བའི་བཞིན་དུ་རླངས་པ་འཐུལ་བའི་ཕྱིར་རླུང་ངོ༌། །གཟུགས་ནི་སྲ་བ་ཉིད་དོ། །ཡེ་ཤེས་རྡོ་རྗེས་བྱིན་གྱིས་བརླབས་པ་མེ་ལ་སོགས་པ་རྣམས་སོ། །ཆ་རྣམས་དང་ལྷན་ཅིག་འཇུག་གོ་ཞེས་པ་ཟླ་བའི་དཀྱིལ་འཁོར་ཁུ་བའོ། །སླར་ཡང་ནི་བྱ་བའི་ཁྱད་པར་དུ་བརྗོད་དོ། །དབྱིབས་ནི་ཡང་དག་པར་གནས་པ་སྟེ་སྡུད་པའོ། །ཟད་པ་ནི་སྐེམས་པའོ། །རྟག་ཏུ་སྟེ་རྒྱུན་གྱི་དབུགས་སུ་བྱེད་རབ་ཏུ་རྒྱུ་བར་བྱེད་ཅེས་རྟག་ཏུ་དབུགས་ཏེ། ཨ་ན་སྲོག་བྱེད་ལ་བྱིངས་སོ། །དབང་པོའི་ངོ་བོ་ནི་འཛིན་པའོ། །འདིས་ནི་སའི་ཁམས་ནི་རྩུབ་པ་ཉིད་དང་སྲ་པ་ཉིད་དེ། འཛིན་པའི་ལས་ཅན་ནོ། །ཆུའི་ཁམས་ནི་གཤེར་བ་ཉིད་དང་བརླན་པ་ཉིད་དེ་སྡུད་པའི་ལས་ཅན་ནོ། །མེ་ནི་དྲོ་བ་ཉིད་དེ་འཚེད་པ་དང་སྐེམས་པའི་ལས་ཅན་ནོ། །རླུང་ནི་ཡང་པ་ཉིད་དེ་
གཡོ་བར་བྱེད་པ་ཉིད་དང་རབ་ཏུ་རྒྱུ་བའི་ལས་ཅན་ནོ་ཞེས་གསུངས་སོ། །ཧཱུཾ་ཞེས་ང་རྒྱལ་དང་བཅས་པར་ནང་གི་བརྗོད་པའི་རྣམ་པ་ཅན་གྱི་ཤེས་པ་ཅན་ནི་ཁམས་བཞི་རྣམས་བྱིན་གྱིས་རློབ་པར་བྱེད་དོ། །ལྷན་ཅིག་སྐྱེས་པ་ཉམས་སུ་མྱོང་བ་ན་ནི་བརྗོད་པ་མེད་པའོ། །དེ་ལྟར་རྫོགས་པ་ནི་ལུས་ཀྱི་བར་གྱི་གནས་སྐབས་སོ། །འདི་རྣམས་སོ་སོར་ལྷའི་བདག་ཉིད་དུ་འཐད་པ་དང་བཅས་པ་སྔར་བཤད་ཟིན་ཏོ། །འདི་ཐམས་ཅད་ཀྱང་སྟོང་པ་ཉིད་དང་སྙིང་རྗེ་དབྱེར་མེད་པ་ཉིད་ཀྱིས་བཅོམ་ལྡན་འདས་རྡོ་རྗེ་འཛིན་པའོ། །དེས་ན་དེ་ཁོ་ན་རང་གི་ངོ་བོ་གསལ་བར་བྱེད་པས་ལྷ་མོ་རྣམས་ཀྱིས་དགའ་བར་བྱེད་དོ། །བཛྲ་ཧཱུཾ་ཞེས་པ་ལ་སོགས་པས་སོ། །རྡོ་རྗེ་ནི་སྟེ་སྙིང་རྗེ་དང་ཤེས་རབ་རོ་གཅིག་པའོ། །ལེགས་པར་ཏེ་སྙིང་རྗེ་ཆེན་པོས་གཞན་གྱི་དོན་བྱ་བ་ལ་དགའ་བ་འདི་ཡིན་པ་ཞེས་པ་ལེགས་པར་དགའ་བའོ། །གཞན་གྱི་དོན་གྱི་ངོར་རབ་ཏུ་འབྱུང་བའི་དང་ཚུལ་ཉིད་ཀྱི་ཕྱིར་གཙོ་བོའོ། །ཤ་དང་ལྷ་དང་ཤེས་རབ་དང་ཆོས་དང་སངས་རྒྱས་ཀྱི་སྤྱན་གྱིས་གཟིགས་པ་རྣམས་ཀྱིས་སོ། །འགྱུར་མེད་ནི་མཐའ་མེད་དུ་གྱུར་པ་ཉིད་ཀྱིས་སོ། །དངོས་པོ་ནི་བདེ་བ་ཆེན་པོ་གཉིས་སུ་མེད་པ་སྟེ། རང་བཞིན་ནི་དེ་བཞིན་ཉིད་དོ། །དེ་དག་གིས་སྟོང་པ་རྣམས་ལ་ནི་ཆོས་རྣམས་ཐམས་ཅད་ལའོ། །རྫུ་འཕྲུལ་གྱི་རྣམ་པར་འཕྲུལ་པ་སྣ་ཚོགས་རྣམས་ཀྱིས་རྣམ་པར་རོལ་པར་མཛད་དོ་ཞེས་པའམ་རོལ་དུ་འཇུག་གོ་ཞེས་པ་སྟོང་པ་རྣམ་པར་རོལ་པའོ། །དེ་ཁྱོད་དེ་དངོས་པོ་དང་དངོས་མེད་དག་གིས་རྣམ་པར་སྤངས་པའོ། །སྙིང་པོ་ནི་དེ་ཁོ་ན་ཉིད་དེ། དེ་ཁྱད་པར་གྱིས་ཁྱོད་ལྟ་བུ་རྣམས་ཀྱིས་མཁྱེན་པའོ། །ཡི་གེ་རྣམས་ཏེ་རྗོད་བྱེད་རྣམས་བཅོམ་ནས། དེ་བཅོམ་པ་ལས་བརྗོད་པར་བྱ་བ་ཐམས་ཅད་བརྗོད་པར་བྱར་མེད་པ་ཉིད་དུ་འགྲོ་བ་མ་ལུས་པ་རྣམ་པར་བསམས་ཤིང་ངེས་པར་དཔྱད་དེ་ཁྱོད་ཀྱིས་སོ། །གཉིས་གཉིས་འཁྱུད་པ་ནི་ཤེས་རབ་དང་ཐམས་སྙོམས་པར་འཇུག་པ་སྟེ། དེས་རྣལ་འབྱོར་ནི་ཏིང་ངེ་འཛིན་ནོ། །དེས་ཆུ་ནི་བྱང་ཆུབ་སེམས་སོ། །དེ་ཁོ་ན་བྱ་བ་སྟེ། དེ་ཕུལ་དུ་བྱུང་བར་ཡོད་དོ་ཞེས་པ་དེའི་འབྲས་བུ་ཅན་གྱི་ཆོས་སྟོང་པ་ཉིད་དོ། །དངོས་པོ་དང་དངོས་མེད་ལ་
སོགས་པ་གཉིས་ཉིད་དང་བྲལ་བའི་ངོ་བོ་གཉིས་མེད་པ་ཁོ་ན་ནི་གཉིས་མེད་དོ། །ལྷག་མ་མེད་པ་ལྷག་པར་རྟོགས་ནས་སྒྲིབ་པ་ཐམས་ཅད་ལས་རྣམ་པར་གྲོལ་བ་རང་གི་དོན་ཕུན་སུམ་ཚོགས་པ་ཐོབ་པའོ། །བདེ་བ་ཕྱིན་ཅི་ལོག་པ་སྟེ། དེས་འཁོར་བར་ཕན་པ་དང་མི་ཕན་པ་མངོན་པར་མི་ཤེས་པ་ཉིད་ཀྱིས་རྣམ་པར་རྨོངས་པ་རྣམས་ཐར་པ་ཁྱད་པར་དུ་བྱ་སྟེ། གཞན་གྱི་དོན་ཕུན་སུམ་ཚོགས་པ་དེས་ཐ་སྙད་མཛད་དོ། །སྟོང་པ་ཉིད་ཀྱི་རང་བཞིན་གྱིས་རྣལ་འབྱོར་མ་རྣམས་དང་སྔགས་རྣམས་རྣམ་པ་སྣ་ཚོགས་པའི་ཆོག་རྣམས་ཀྱིས་ཁྱོད་ཀྱི་གར་མཛད་དོ། །ལྔ་པོ་རྣམས་ཀྱང་སྟེ། ས་དང་ཆུ་དང་མེ་དང་རླུང་དང་ནམ་མཁའི་རང་བཞིན་སྤྱན་མ་དང་མཱ་མ་ཀཱི་དང་གོས་དཀར་མོ་དང་སྒྲོལ་མ་དང་རྡོ་རྗེ་དབྱིངས་ཀྱི་དབང་ཕྱུག་མ་རྣམས་ནི་ལྷག་པར་རྟོགས་པའི་གཉིས་སུ་མེད་པའི་དེ་ཁོ་ན་ཉིད་དེ། དེས་ཉེ་བར་མཚོན་པ་རྣམས་ཏེ། དེ་ཁོ་ན་ཉིད་ཀྱི་ངོ་བོ་རྟོགས་པ་རྣམས་སོ་ཞེས་པའི་དོན་ཏོ། །སྒྱུ་མ་རྣམ་པ་སྣ་ཚོགས་པའི་ངོ་བོས་སེམས་ཅན་རྣམས་ཁྱེད་ཀྱིས་སྨིན་པར་མཛད་དོ། །རྡོ་རྗེ་སྟོང་པ་ཉིད་དང་སྙིང་རྗེ་དབྱེར་མེད་པའི་ལེགས་པར་བརྐྱང་ཞིང་ལྷག་པར་རྟོགས་པར་བྱ་བ་སྟེ། རང་དང་གཞན་གྱི་དོན་ཕུན་སུམ་ཚོགས་པའི་ངོ་བོའོ། །དེས་བདེ་བ་དང་སྡུག་བསྔལ་ལ་སོགས་པའི་རང་གི་མཚན་ཉིད་འཛིན་པའི་ཕྱིར་ཆོས་སེམས་ཅན་རྣམས་ཆོས་སྟོན་པ་ལ་སོགས་པ་རྣམས་ཀྱིས་རྨོངས་པ་དང་བྲལ་བར་ཁྱོད་ཀྱིས་མཛད་དོ། །དེ་ལྟར་བསྟོད་ནས་རབ་ཏུ་དང་བ་ལྷག་པོས་གཞན་རྣམས་ལ་ཡང་སྨྲས་པ། དེ་ལྟར་བསམ་གྱིས་མི་ཁྱབ་པ་དཔག་ཏུ་མེད་པའི་ལེགས་པའི་སྙིང་པོའི་ཆོས་རྣལ་འབྱོར་མ་རྣམས་ཀྱིས་ཐར་པ་བཅོམ་ལྡན་འདས་ལ་ཕྱག་འཚོལ་ཅིག་ཅེས་པའོ། །འདིར་ཚིགས་སུ་བཅད་པ་དང་པོས་ནི་བདེ་བ་ཆེན་པོའི་སྐུ་ཉིད་ཀྱིས་བཅོམ་ལྡན་འདས་བསྟོད་དོ། །གཉིས་པས་ནི་ཆོས་ཀྱི་སྐུ་ཉིད་ཀྱིས་སོ། །གསུམ་པ་ལ་སོགས་པ་རྣམས་ཀྱིས་ལོངས་སྤྱོད་རྫོགས་པའི་སྐུ་ཉིད་ཀྱིས་སོ། །སྒྱུ་མའི་ཞེས་པ་ལ་སོགས་པས་སྤྲུལ་པའི་སྐུ་ཉིད་ཀྱིས་ཏེ། ཇི་ལྟར་རིགས་པར་གཞན་གྱི་དོན་ཉིད་ཀྱིས་སོ། །ལྷག་མ་ཕྱེད་ཀྱིས་སྤྲོ་བར་བྱེད་པའོ། །བསྟོད་པའི་དགོས་པ་གསུངས་པ། འདིས་ཞེས་པ་ལ་སོགས་པ་
སྟེ། འདིའི་དོན་གོམས་པ་ལས་སོ། །རྒྱལ་བ་རྣམས་ཐམས་ཅད་དེ་རྣམ་པར་སྣང་མཛད་ལ་སོགས་པ་རྣམས་གང་གི་བདག་ཉིད་ལས་སྐྱེས་པ་ཡིན་པ་དེ་ནི་དེ་སྐད་དེ། རྡོ་རྗེ་སེམས་དཔར་འགྱུར་བའོ། །འདི་ཁོ་ན་དེ་བཞིན་གཤེགས་པ་ཐམས་ཅད་ཀྱི་རང་བཞིན་ཉིད་ཀྱི་ཕྱིར་དེ་བཞིན་གཤེགས་པ་ཐམས་ཅད་ཅེས་པའོ། །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱ་ཆེར་འགྲེལ་པ། མན་ངག་གི་སྙེ་མར་སྣེ་མ་སུམ་ཅུ་གསུམ་པའོ།། །།