སྙེ་མ་སོ་ལྔ་པ། ཐང་སྐུ་དང་གླེགས་བམ་བཤད་པ།
དངོས་གྲུབ་ཀྱི་ཐབས་ཀྱི་ཡན་ལག་བརྗོད་པའི་ཆེད་དུ་གསུངས་པ། གསང་བ་ཞེས་པ་ལ་སོགས་པའོ། །གསང་བ་ཞེས་པ་ལ་སོགས་པས་རྡོ་རྗེ་དང་པདྨ་སྦྱོར་བ་ལ་སོགས་པ་ཡང་བྲིས་སྐུ་དང་པུ་སྟི་འབྲི་བའི་ཚོགས་པར་འགྱུར་རོ་ཞེས་བསྟན་ཏོ། །སྦས་པ་དམ་པའི་དགོངས་པ་སྟེ་མངོན་པར་དགོངས་པ་དམ་པའི་སྤྱོད་ཡུལ་གང་དུ་ཡིན་པ་དེ་གསལ་བར་མཛད་དོ། །ལྷ་རྣམས་སུ་ནི་ལྷ་རྣམས་ཀྱིའོ། །རྣམ་རྟོག་མེད་པ་ནི་དམ་ཚིག་བརྟན་པ་ལ་སོགས་པ་ལའོ། །ཡང་ན་ཞེས་པ་གསུངས་པའི་ཡོན་ཏན་མེད་པའི་ཕྱིར་རོ། །དཔའ་བོ་ཞེས་པ་སྐྱེས་བུ་དཔའ་བོ་ཤི་བའིའོ། །ཁྲག་ཆེན་པོ་ནི་མིའི་ཁྲག་གོ །མི་ཅན་ནི་མིའི་ཐོད་པའོ། །ཇི་སྐད་བཤད་པ་རྣམས་ཀྱིས་ནི་གནས་དང་གནས་རྣམས་སུ་དེ་བཞིན་གཤེགས་པ་ལྔའི་བདག་ཉིད་དུ་གསུངས་པ་རྣམས་ཀྱིས་ཏེ་རྡུལ་དང་ཁུ་བ་ལ་སོགས་པ་བདུད་རྩི་ལྔས་བགོས་པ་རྣམས་ཀྱིས་སོ། །དང་པོར་ནི་མཆོད་ཡོན་སྦྱིན་པའི་དུས་སུའོ། །དཔལ་ཡང་དག་པར་སྦྱོར་བ་ནི་རྡོ་རྗེ་སེམས་དཔའོ། །གྱུར་པ་རྣམས་ནི་ཁ་དོག་ལྔ་རྣམས་སོ། །ཕོ་ཉ་མོ་ནི་རྡོ་རྗེ་རྣལ་འབྱོར་མའོ། །ཟླ་བ་ནི་བྱང་ཆུབ་ཀྱི་སེམས་སོ། །གཅིག་ཏུ་སྟེ་གནས་སུ་རྣལ་འབྱོར་མ་རྣམས་དང་ལྷན་ཅིག་གོ །དེ་ལ་ཕོ་ཉ་མོའི་གཙང་སྦྲ་ནི་བཅོམ་ལྡན་འདས་མའི་གཟུགས་སུ་བསྒོམས་པས་སོ། །ཟླ་པ་ནི་གཏུམ་མོ་ལ་སོགས་པ་བསྒོམས་པས་སོ། །མཛེས་པའི་སྟོན་མོ་ནི་བདུད་རྩི་མྱོང་བའི་ཆོ་ག་བསྒོམས་པས་སོ། །འདི་ཁོ་ནའི་གཙང་སྦྲ་ནི་ཕྱི་རོལ་གྱི་ཤེས་རབ་མའི་ཁུ་བ་ཙཱ་རུ་ཡང་དག་པར་སྤྱོད་པ་ལས་ཀྱང་ཀུན་ནས་སྤྱད་དོ། །དེས་ནི་ཡིད་དག་པས་རྣམ་པ་འདི་ལྟ་བུ་ཁོ་ནའི་དག་བྱེད་རྗེས་སུ་འབྲེལ་བར་བྱའི། ཁྲུས་དང་
ཁ་ཤོལ་བ་ལ་སོགས་པ་ནི་མ་ཡིན་ནོ། །དེའི་རང་གི་སེམས་འདོད་ཆགས་ལ་སོགས་པས་དྲི་མ་ཅན་དུ་གྱུར་པས་འབྲས་བུ་མེད་པ་ནི་དག་བྱེད་མ་ཡིན་ནོ། །སླར་ཞིང་མི་འདོད་པའི་འབྲས་བུར་འགྱུར་རོ་ཞེས་གསུངས་པ། མི་མཐུན་ཆོས་ཀྱི་ཞེས་པ་རྡོ་རྗེ་འཛིན་པའི་རྣལ་འབྱོར་ལས་ཕྱིན་ཅི་ལོག་ཉིད་ཀྱིས་སོ། །འདོད་པ་མི་འགྲུབ་པ་འབའ་ཞིག་ཏུ་མ་ཟད་ཀྱི། ཕྱིན་ཅི་ལོག་ལས་ཉེས་པ་བྱས་པས་ངན་འགྲོར་འགྱུར་རོ་ཞེས་གསུངས་པ། ཁྱི་ཞེས་པ་ལ་སོགས་པའོ། །འབྲས་བུ་མེད་པ་ཉིད་རྒྱས་པར་སྟོན་པ། དཔེར་ན་ཞེས་པ་ལ་སོགས་པའོ། །དཔེ་ཅན་བརྗོད་པ་གསུངས་པ་གཞན་གྱི་ཞེས་པ་བལྟ་བ་གཞན་བརྗོད་པ་སེང་གེ་དང་འཕྲོག་བྱེད་ལ་སོགས་པའིའོ། །དོན་མེད་ནི་དེ་ཁོ་ན་ཉིད་མ་མཐོང་བས་དང་འདོད་ཆགས་ལ་སོགས་པའི་ཆ་ཤས་ཀྱང་མ་ཉམས་པའི་ཕྱིར་རོ། །འཛིན་པ་ངེས་པར་འཛིན་པ་སྟེ་བསྒོམ་པའོ། །ཁྲུས་ཞེས་པ་ཉེ་བར་མཚོན་པ་སྟེ། ཁ་ཅིག་ཏུ་རྣལ་འབྱོར་ཞེས་འདོན་ཏོ། །འདིས་ནི་རང་དང་གཞན་ལ་ཕན་པ་སྤྱོད་ལ་མཁས་པ་རྣམས་ཀྱིས་དཔལ་ཡང་དག་པར་སྦྱོར་བ་མགོན་པོ་ཁོ་ན་ཡང་དག་པར་བསྟེན་པར་བྱའོ་ཞེས་གསུང་པར་འགྱུར་རོ། །དེས་ནི་བཅོམ་ལྡན་འདས་ཀྱིས་འཛིན་པའི་ཐོད་པ་ལ་སོགས་པ་ཤིན་ཏུ་དག་བྱེད་དོ་ཞེས་སྟོན་པ་གསུངས་པ། དུང་ཞེས་པ་ལ་སོགས་པའོ། །དུང་ལ་སོགས་པ་རྣམས་རང་གི་རྒྱུ་དག་བྱེད་མ་ཡིན་པ་ཉིད་དུ་འདོད་པ་རྣམས་ལས་ཡང་དག་པར་བྱུང་བ་རྣམས་ཀྱང་གཙང་བྱེད་ཉིད་དུ་འཇིག་རྟེན་ཡང་དག་པར་འདོད་ན། གང་གཙང་བྱེད་ཀྱི་རྒྱུ་ལས་བྱུང་བ་དེ་ཆེས་ཤིན་ཏུ་དག་བྱེད་དོ་ཞེས་གསུངས་པ། ཆོས་ཞེས་པ་ལ་སོགས་པ་སྟེ། དོན་དམ་པར་ཆོས་ཀྱི་སྐུ་ནི་དེ་བཞིན་ཉིད་རང་བཞིན་གྱིས་ཡོངས་སུ་དག་པ་ཉིད་ཀྱིས་ན། དག་བྱེད་ཀྱི་ལུས་མི་གང་རྣམས་ཀྱི་ཡིན་པའོ། །ཐོད་པ་ཞེས་པ་ཉེ་བར་མཚོན་པ་སྟེ། ཅིའི་རྒྱུས་ན་གཙང་བྱེད་མ་ཡིན་པ་ཉིད་ཀྱིས་སྨོད། མཆོད་ཕྱིར་ཐོགས་ནི་མིའི་སྣལ་མ་བཀོད་པ་སྟེ། དེ་ཁོ་ན་དག་བྱེད་དེ། ཐོས་པ་དང་དྲན་པས་བྱས་པ་ནི་མ་ཡིན་ནོ། །གང་གི་ཕྱིར་བདེན་པ་སྟེ་ཚད་མས་འཐད་པའི་ཆོས་དེ་བཞིན་ཉིད་རང་བཞིན་མེད་
པ་ཉིད་དེ། དྲི་མ་མེད་པ་ཉིད་ཡོངས་སུ་དག་པ་ཉིད་འདྲེན་ནོ་ཞེས་པ་ཚུལ་གང་དུ་ཡིན་པ་དེ་ནི་དེ་སྐད་དོ། །གཙང་བ་ཉིད་དོ། །སོ་སོའི་སྐྱེ་བོ་ཉིད་ལ་རང་བཞིན་གྱིས་ཡོངས་སུ་དག་པའི་དེ་ཁོ་ན་ཉིད་ལ་ལྷག་པར་མོས་པ་ལས་དེའི་རྒྱུ་ཅན་དང་དེའི་རང་བཞིན་ཐམས་ཅད་དག་བྱེད་ཁོ་ན་ཡིན་ན། དྲི་མ་མེད་ཅིང་རྣམ་པར་དག་པའི་དེ་ཁོ་ན་ཉིད་རྟོགས་པ་ན་ནི་བཅོམ་ལྡན་འདས་དང༌། དེ་འཛིན་པ་རྣམས་ཀྱི་ཤིན་ཏུ་ཆེས་དག་བྱེད་ཉིད་དོ་ཞེས་མངོན་པར་དགོངས་པའོ། །དེ་ཉིད་ཀྱི་ཕྱིར་གསུངས་པ། གནས་ཞེས་པ་བརྟན་པ་སྟེ། མི་གཡོ་ཞེས་པའི་དོན་ཏོ། །གང་གི་ཕྱིར་རྣམ་པ་འདི་ལྟ་བུ་ཁོ་ན་དག་བྱེད་ཡིན་པ་དེའི་ཕྱིར་མཆོད་བྱ་སྟེ། བཅོམ་ལྡན་འདས་ལ་བདེ་བ་ཆེན་པོའི་མཆོད་པས་སོ་ཞེས་པ་སྐབས་སུ་བབ་པ་ཉེ་བར་བསྡུ་བའོ། །པིར་ལ་ཞེས་པ་པིར་ཏེ། རྡོ་རྗེ་སེམས་དཔའི་རྣལ་འབྱོར་དང་ལྡན་པས། གཏོར་མ་དང་མཆོད་པ་ལ་སོགས་པ་སྔོན་མ་ཅན་པིར་བཟུང་ནས་རྡོ་རྗེ་སེམས་དཔའི་སྙིང་པོའི་སྔགས་ཀྱིས་ལན་ཉི་ཤུ་རྩ་གཅིག་མངོན་པར་བསྔགས་ཏེ་སྦྱིན་ནོ། །བཟོ་བོ་རྡོ་རྗེ་སེམས་དཔའི་གཟུགས་སུ་བསྒོམས་པ་ལ་ཡི་གེ་གསུམ་གྱི་སྙིང་ག་དང་མགྲིན་པ་དང་སྤྱི་བོར་བྱིན་གྱིས་བརླབས་པའི་ལག་པར་གནས་པའི་ཟླ་བ་ལ་པིར་རྡོ་རྗེའི་རྣམ་པ་ཅན་དང༌། ཚོན་ཡང་པདྨར་གནས་པའི་ཡེ་ཤེས་ཀྱི་བདུད་རྩིའི་རྣམ་པ་ཅན་དུ་ལྷག་པར་མོས་ཏེ། དེའི་རྗེས་སུ་བྲི་བར་བྱའོ། །འབྲི་སྨྱུག་ནི་ཤེས་རབ་ཡེ་ཤེས་ཀྱི་རང་གི་ངོ་བོར་ལྷག་པར་མོས་ནས་ཤེས་པ་ཁོ་ན་ཁྱད་པར་ཏེ། གཞན་སྔ་མ་བཞིན་ནོ། །ལེགས་པར་གསལ་བའི་ལོ་འདབ་ནི་ལེགས་པར་བརྡུངས་པའི་ལོ་འདབ་བོ། །ཏཱ་ལའི་འདབ་མའོ་ཞེས་ཁ་ཅིག་གོ །ལེགས་པར་བརྐྱང་པའི་འདབ་མ་ཞེས་ཁ་ཅིག་ཏུ་འདོན་ཏོ། །སྦྲང་ཆེན་ཞེས་པ་མིའི་མར་ཁུའོ། །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱ་ཆེར་འགྲེལ་བ། མན་ངག་གི་སྙེ་མར་སྙེ་མ་སུམ་ཅུ་ལྔ་པའོ།། །།