སྙེ་མ་སོ་བདུན་པ། ཕྱག་རྒྱ་ཆེན་པོའི་དངོས་གྲུབ་ཀྱི་དངོས་སུ་བའི་ཐབས་རིགས་ཀྱི་སྒེག་མོ་བསྟེན་པ་བཤད་པ།
སྔར་གསུངས་པའི་སྤྱོད་པ་སྤྱད་པ་དང་ལྡན་པ་རྣལ་འབྱོར་ཆེར་འཕེལ་བ་ལ་དབང་དུ་གྱུར་པས་ཕྱག་རྒྱ་དང་ལྷན་ཅིག་ཁོ་ནས་ཕྱག་རྒྱ་ཆེན་པོའི་དངོས་གྲུབ་བོ་ཞེས་བརྗོད་པའི་ཆེད་དུ་གསུངས་པ། ཉོན་ཞེས་པ་ལ་སོགས་པ་སྟེ། རྡོ་རྗེ་སློབ་དཔོན་ནི་འདིར་རྡོ་རྗེ་འཛིན་པའི་གཟུགས་ཀྱིས་མཐར་
ཐུག་པར་འཇུག་པ་ཉི་མ་བདུན་པའི་ལྷར་བལྟ་བར་བྱ་བའི་ཆོ་གས་གནས་པའི་རྣལ་འབྱོར་པའོ། །དེའི་དངོས་གྲུབ་ཀྱི་ཆེད་དུ་བྱ་བའི་དམ་ཚིག་ཀུན་སྤྱོད་དེ་རྗེས་སུ་སྒྲུབ་པའོ། །འཁོར་ལོ་ཆེན་པོ་ནི་རྡོ་རྗེ་སེམས་དཔའི་དཀྱིལ་འཁོར་ཏེ། དང་པོ་ནི་དམ་ཚིག་སེམས་དཔའི་གཟུགས་སོ། །དེ་ལ་རབ་ཏུ་ཞུགས་པའི་སྙིང་པོའི་དཀྱིལ་འཁོར་ནི་ཡེ་ཤེས་སེམས་དཔའི་གཟུགས་སོ། །དེ་ལྟར་རང་ཉིད་དང་པོར་རྡོ་རྗེ་སེམས་དཔའི་རང་བཞིན་ཅན་གྱི་བདག་ཉིད་ལ། རང་ཉིད་ཀྱི་དབང་བསྐུར་སོགས་རྒྱས་པ་ཇི་སྐད་བཤད་པ་རྣམས་དང་ལྡན་པར་བརྟག་ཅིང་བསམ་ནས་འགྲུབ་པོ་ཞེས་པ་ལྷག་མའོ། །དེ་གསུངས་པ་རྡོ་རྗེ་སློབ་དཔོན་ཉིད་ཅེས་པ་རྡོ་རྗེ་སེམས་དཔའོ། །ཅི་ལས་ཤེ་ན་གང་ཕྱིར་ལེགས་ཐོས་ནི་རྣམ་པར་ཐོས་ཤིང་ལེགས་པར་རྟོགས་པ་སྟེ། ཚད་མས་འཐད་པ་ཉིད་ཀྱིས་སོ། །ཅི་ཞེ་ན་བསམ་གཏན་ཞེས་པ་ལ་སོགས་པ་འགྲོ་ཞེས་པའི་བར་རོ། །གང་ཡུན་རིང་དུ་བར་མ་ཆད་པར་གུས་པས་སེམས་པར་བྱེད་པ་དེའི་ཚེ་བསམ་གཏན་རབ་ཏུ་གྱུར་པ་མཐར་ཕྱིན་པ་གསལ་བར་སྣང་བར་འགྱུར་ཏེ། དཔེར་ན་འདོད་པ་ཅན་གྱིས་འདོད་ལྡན་མ་སེམས་པ་བཞིན། མཆོག་གི་སྐྱེས་བུ་དོན་དུ་གཉེར་བས་ཀྱང་རིམ་པ་གཉིས་བསམ་གཏན་པར་བྱེད་དོ། །དེའི་ཕྱིར་ཐེ་ཚོམ་ག་ལ་ཡོད། རིམ་པ་གཉིས་བསྒོམ་བཞིན་པ་ཡང་སྟོང་པ་ཉིད་ཀྱི་ཆོས་སྒོམ་པ་ལྷུར་ལེན་པའི་མཐར་ཐུག་པའི་བྱ་བ་ཅན་ཁོ་ན་དངོས་གྲུབ་ཀྱི་རྒྱུའོ་ཞེས་སྟོན་ཏོ། །རྡོ་རྗེ་ཞེས་པ་ལ་སོགས་པ་ལ། རྡོ་རྗེ་སེམས་དཔའ་ནི་དམ་ཚིག་སེམས་དཔའ་སྟེ། སྙིང་པོ་ནི་ཡེ་ཤེས་སེམས་དཔའོ། །སོགས་པས་དབང་བསྐུར་ལ་སོགས་པའོ། །དེ་རྣམས་ཀྱིས་མཚོན་པར་བྱའོ་ཞེས་པ་མཚོན་བྱ་སྟེ་རང་བཞིན་མེད་པ་ཉིད་དོ། །དེ་བཟླས་པ་ནི་སྒོམ་པར་བྱེད་པའོ། །ཆོས་གོམས་པ་ཁོ་ན་འཁོར་བ་སེལ་བར་འགྲོ་བར་བྱེད་པ་སྟེ། ཆོས་ཅན་བསྒོམ་པ་ནི་མ་ཡིན་ནོ། །འདོད་ལྡན་མའི་ལུས་བསྒོམ་པས་འདོད་ཆགས་ཟུམ་པར་བྱེད་པ་མ་ཡིན་གྱི། འོན་ཀྱང་མི་རྟག་པ་ལ་སོགས་པ་ཉིད་དུའོ་ཞེས་པ་ལ་སོགས་པ་གཞན་དུ་མང་པོ་གསུངས་སོ། །རྡོ་རྗེ་འཛིན་པའི་སྙིང་པོའི་སྔགས་ལ་
སོགས་པ་རྣམས་ཀྱིས་བཟླས་པ་སྔར་བྱས་པ་ནི་དངོས་གྲུབ་ཀྱི་ཐབས་ཀྱི་ཡན་ལག་ཏུ་འགྱུར་རོ་ཞེས་འདིར་དེ་ལྟར་གསུངས་སོ་ཞེས་པ་ནི་དྲང་བའི་དོན་ཏོ། །འོ་ན་དེ་ལྟར་ན་རྡོ་རྗེ་སེམས་དཔའི་ཁོ་ན་འགྲུབ་ཀྱི། རྣམ་པར་སྣང་མཛད་ལ་སོགས་པ་ནི་མ་ཡིན་ནམ་ཞེ་ན་གསུངས་པ། དང་པོ་ཞེས་པ་རྡོ་རྗེ་འཛིན་པའི་གཟུགས་གྲུབ་པར་འགྱུར་བའི་རྣལ་འབྱོར་པའི་དབང་པོའི་གཙུག་གི་ནོར་བུས་བརྟག་པར་བྱ་ཞིང་བསྒོམ་པར་བྱའོ་ཞེས་པ་རྟག་པ་རྣམས་ནི་རྣམ་པར་སྣང་མཛད་ལ་སོགས་པ་ཀུན་ཏེ། དེ་རྣམས་ཀྱི་རྩེ་མོ་མཆོག་བླ་ན་མེད་པ་སྟེ། སྐྱེད་པར་བྱེད་པ་ཉིད་ཀྱི་ཕྱིར་དང་རང་བཞིན་ཉིད་ཀྱི་ཕྱིར་རོ། །རྡོ་རྗེ་སེམས་དཔའ་ཁོ་ན་མེ་ལོང་ལྟ་བུ་ལ་སོགས་པའི་ཡེ་ཤེས་ཀྱི་རང་བཞིན་ནི་གདུལ་བྱའི་འདོད་པ་སྣ་ཚོགས་པ་ལས་སྣ་ཚོགས་ཤིང་བསམ་གྱིས་མི་ཁྱབ་པར་སྤྱོད་པ་རྣམ་པར་སྣང་མཛད་ལ་སོགས་པ་དཔག་ཏུ་མེད་པའི་སྐུར་འབྱུང་བར་འགྱུར་རོ་ཞེས་པའི་དོན་ཏོ། །འོ་ན་རྣམ་པར་སྣང་མཛད་ལ་སོགས་པ་རྣམས། སོ་སོར་རང་ཉིད་ཀྱིས་འཁོར་ལོས་སྒྱུར་བ་རྣམས་སུ་བཤད་པ་མ་ཡིན་ནམ། དེའི་ཕྱིར་དེ་བསྒོམ་པ་ཁོ་ནས་དེ་འགྲུབ་པོ་ཞེ་ན། ངེས་པ་མེད་དེ། གང་གི་ཕྱིར་འདིས་ཀྱང་དང་རྡོ་རྗེ་སེམས་དཔའི་གཟུགས་གཙོ་བོར་སེམས་དཔའི་ཆོ་གས་ཀྱང་དང༌། དེ་བཞིན་གཤེགས་པ་གཞན་གྱི་གཟུགས། གཙོ་བོར་བསྒོམས་ཀྱང༌། རྣམ་པར་སྣང་མཛད་ལ་སོགས་པའི་ངོ་བོའི་རྒྱལ་བ་རྣམས་སྐྱེ་བས་སོ། །དེ་རྣམས་ཀྱང་སོ་སོར་སྟོང་པ་ཉིད་དང་སྙིང་རྗེ་དབྱེར་མེད་པའི། བྱང་ཆུབ་ཀྱི་སེམས་རྡོ་རྗེའི་རང་བཞིན་རྣམས་ཁོ་ན་སྟེ། མེ་ལོང་ལྟ་བུའི་ཡེ་ཤེས་ཀྱི་བདག་ཉིད་རྣམ་པར་སྣང་མཛད་དོ་ཞེས་པ་ལ་སོགས་པ་ནི། དེ་དང་དེའི་སྐུ་ལ་དགོས་པའི་དབང་ལས། དེ་དང་དེའི་ཡེ་ཤེས་ཀྱི་གཙོ་བོ་ཉིད་དུ། བརྗོད་པར་འདོད་པས་སོ་ཞེས་དགོངས་པའོ་ཞེས་པ་དྲང་བའི་དོན་ཏོ། །འོ་ན་རྫོགས་པའི་རིམ་པ་བསྒོམ་པའི་རིམ་པ་ཁོ་ན་རྫོགས་པའི་བྱང་ཆུབ་འགྲུབ་པའི་ཆོ་ག་སྟེ། དེས་ན་འདིས་ཅི་བྱ་ཞེ་ན་གསུངས་པ། ཆོ་ག་ཞེས་པ་ལ་སོགས་པའོ། །བསྐྱེད་པའི་རིམ་པ་ནི་རྫོགས་པའི་རིམ་པའི་དངོས་སུ་བའི་ཐབས་ཏེ། དེས་ན་ཤེས་རབ་ཀྱི་སྦྱོར་བ་བསྒྲུབ་པའི་དང༌། དེ་ཡང་ཕྱག་རྒྱ་ཆེན་པོའི་དངོས་
གྲུབ་ཀྱིའོ་ཞེས་མངོན་པར་དགོངས་པའོ་ཞེས་པ་ངེས་པའི་དོན་ཏོ། །དེ་ལྟར་ཡང་དང་པོར་རྣམ་པའི་འདི་ལྟ་བུར་ཁོ་བོས་ཕྱེ་ཟིན་ཏོ། །གཉིས་མེད་ནི་རྣམ་གཡེང་མཐའ་དག་སོ་སོར་སྤངས་པ་བསྒོམ་པར་བྱ་བ་ལ། ཡིད་གཅིག་ཏུ་བྱེད་དོ། །སྤྲོ་བར་བཅས་ནི་བརྩོན་འགྲུས་མཆོག་དང་ལྡན་པ་རྣམས་སོ། །ཚིག་གི་དོན་གཉིས་པོ་འདིའི་ཡུལ་ཉིད་ཀྱིས་ཚིག་ཕྱི་མ་གཉིས་ཀྱི་ཤེས་རབ་དང་སྙིང་རྗེའི་རྣལ་འབྱོར་གསལ་བར་བྱས་སོ། །སྙིང་རྗེས་ནི་རྣམ་པ་སྣ་ཚོགས་པའི་རྫུ་འཕྲུལ་གྱི་རྣམ་པ་རྣམས་ཀྱིས་སེམས་ཅན་གྱི་དོན་མཐུན་གྱི་སྒྲིབ་པའི་དགྲ་པོ་སྤང་བའི་ཆེད་དུ་དང༌། སྦྱིན་པ་ལ་སོགས་པས་ཚིམ་པར་བྱ་བའི་ཆེད་དུ་གོ་གྱོན་ནོ། །དེ་ལྟར་རིམ་པ་གཉིས་ཀྱིས་ཀྱང༌། ཤེས་རབ་མས་འགྲུབ་པའོ་ཞེས་གསུངས་པ། གང་ཞེས་པ་ལ་སོགས་པའོ། །ཕྱག་རྒྱ་རྣམས་ཀྱི་མཆོག་ལ་སོགས་པ་ཉིད་ནི། ལྔ་པར་བཀྲལ་ཟིན་ཏོ། །ཆོ་གས་ཤེས་པ་ལྷ་མོའི་རང་བཞིན་དུ། བསྒོམ་པ་ལ་སོགས་པ་དང་བྱེད་པའི་ཁྱད་པར་རྣམས་ཀྱིས་དང༌། སོར་མོ་བསྐྱོད་པ་ལ་སོགས་པས་ཀྱང༌། ཇི་ལྟར་རིགས་པར་འདུས་བྱ་སྟེ། བདེ་བ་ཆེན་པོ་ཉམས་སུ་མྱོང་བའི་ཆེད་དུའོ། །འོ་ན་འདིར་མ་ཕྱག་རྒྱ་ཉིད་དུ་གསུངས་པ། ཅི་ལྟར་ཏེ་དེ་ནི་ཉེ་བར་ལོངས་སྤྱད་ཟིན་པས་སོ། །ཞེ་ན་གསུངས་པ། དམ་པ་ཞེས་པ་ལ་སོགས་པ་སྟེ། རྒྱུ་དང་འབྲས་བུའི་ཚོགས་པ་བསམ་གྱིས་མི་ཁྱབ་པའོ་ཞེས་པས། དེ་ཁོ་ན་ཡུད་ཀྱི་ས་བདེ་བ་དམ་པ་འཆར་རོ། །དེ་ཉིད་ཀྱི་ཕྱིར་དེ་གསལ་བར་བྱ་བའི་ཆེད་དུ་བདེ་བ་ཆེན་པོའི་ཚིག་གོ །ཞེ་སྡང་བདག་ཉིད་གདོལ་པ་མོ། །ཞེས་པ་འདིས་རིགས་ངེས་པར་རྟོགས་པ་ཡང་དང་པོ་པའི་ལྷག་པར་མོས་པ་ལ་ལྟོས་པ་ཁོ་ན་སྟེ། རྣམ་པ་འདི་ལྟ་བུའི་རྣལ་འབྱོར་པ་ནི་མ་ཡིན་ནོ་ཞེས་བསྒྲུབས་སོ་ཞེས་འོད་མས་པར་བྱེད་དོ། །དེ་ཉིད་ཀྱི་ཕྱི་ཕྱག་རྒྱ་ཆེན་པོ་ཐིག་ལེར་གསུངས་པ། གདོལ་མོ་པདྨའི་རིགས་ལས་སྐྱེས། །ཆོས་མ་རིགས་ཆེན་ལས་སྐྱེས་བཤད། །གཡུང་མོ་རྡོ་རྗེའི་རིགས་ཉིད་དང༌། །གར་མ་ལས་ཀྱི་རིགས་དེ་བཞིན། །ཐོད་པ་མ་ནི་འཁོར་ལོའི་རིགས། །ལྔ་པོ་འདི་རྣམས་ལུས་དག་པ། །ཞེས་སོ། །
བུད་མེད་ནི་གདོལ་བའི་བུད་མེད་དམ། གཡུང་མོའི་བུད་མེད་དམ། བུའི་བུད་མེད་དོ། །མ་ལ་སོགས་པ་རྣམས། ལྷ་མོའི་ཁྱད་པར་གྱི་ངོ་བོ་ཉིད་དུ་བརྗོད་པའི་ཆེད་དུ་གསུངས་པ། སྤྱན་མ་དང་ཞེས་པ་ལ་སོགས་པའོ། །རིན་ཆེན་སྒྲོན་མ་ནི། གསེར་གྱི་མདོག་ཅན་སྤྱན་གསུམ་པ། གཡོན་པའི་ཕྱག་གསུམ་ན། དྲིལ་བུ་དང་ལྕགས་ཀྱུ་དང༌། གཞུ་རྣམས་དང༌། གཡས་པ་རྣམས་ཀྱིས། རིན་པོ་ཆེ་དང་རལ་གྲི་དང༌། མདའ་འདྲེན་པ་ལྷུར་ལེན་པ་ཅན་རྒྱན་ཐམས་ཅད་ཀྱིས་བརྒྱན་པ། ཐོད་པའི་དབུ་རྒྱན་མཐོ་བ། སྣ་ཚོགས་པདྨ་དང༌། ཟླ་བའི་དབུས་སུ་སོན་པར་རྣམ་པར་ཤེས་པར་བྱའོ། །རྣམ་པར་སྣང་མཛད་ལ་སོགས་པ་རྣམས་ཀྱིས། རང་གི་ཤེས་རབ་ནི་རིམ་པ་ཇི་ལྟ་བར། སྤྱན་མ་ལ་སོགས་པའི་ངོ་བོ་རྣམས་སུ་རྟོགས་པར་བྱའོ། །དེ་བཞིན་གཤེགས་པ་འདི་རྣམས་ཀྱང་རྡོ་རྗེ་སེམས་དཔའ་དང་བཅས་པ་ནི་འཁོར་ལོས་སྒྱུར་བ་རྣམས་ཏེ། འདི་རྣམས་ཀྱི་ཡང་ཁྱད་པར་དང་ལྡན་པའི་མིང་བཤད་པ་ནི། གཟུགས་ཀྱི་ཁྱད་པར་གསལ་བར་བྱའི་དོན་དུ་སྟེ། གཙུག་ཏོར་གྱི་གནས་ལྟ་བུ་ཉིད་ཀྱི་རིགས་ཀྱི་བདག་པོའི་དངོས་པོ་གསལ་བར་བྱེད་པའི་ཕྱིར་རོ། །འདི་རྣམས་ཀྱང་དཀྱིལ་འཁོར་བ་ཉིད་དུ། ཇི་ལྟར་རིགས་པར་གསུངས་པ་ཡོད་ན་ཡང༌། དཀྱིལ་འཁོར་གྱི་ལྷག་པའི་བདག་པོའི་དངོས་པོར་ཡང་རྟོགས་པར་བྱའོ། །ཇི་སྐད་དུ་འདུས་པ་ཕྱི་མར་གསུངས་པ། འཁོར་ལོས་སྒྱུར་དྲུག་རྒྱལ་པོ་ཡིས། །གཙུག་ཏོར་ཞེས་པ་རྣམ་པར་སྤྲོས། །ཞེས་སོ། །འོ་ན་ཇི་ལྟར་ཕྱི་རོལ་གྱི་ཕྱག་རྒྱ་ཁོ་ན་དང་ལྷན་ཅིག་དངོས་གྲུབ་ཡིན། ཅི་ལྟར་ཡང་རྒྱུ་རྡོ་རྗེ་འཛིན་པ་ཐ་མི་དད་པ་ལས། འབྲས་བུ་རྡོ་རྗེ་འཛིན་པའི་གཟུགས་རྣམ་པར་སྣད་མཛད་ལ་སོགས་པ་རྣམས་ཐ་དད་པ་ཡིན་ཞེ་ན། གསུངས་པ། སེམས་ཀྱི་སྦྱོར་བ་འདི་གསུངས་སོ། །ཞེས་སེམས་ཏེ་བདེ་བ་ཆེན་པོ་སྐྱེ་བ་ལ། འདི་ཁོ་ན་འདིས་སྦྱར་བར་བྱའོ་ཞེས་པས་སྦྱོར་བ་ནི་ཕྱག་རྒྱ་སྟེ། རྒྱུ་ཉིད་དུ་ཡང་དག་པར་རྟོགས་ནས། ཐམས་ཅད་མཁྱེན་པ་རྣམས་ཀྱིས་གསུངས་སོ། །དེའི་ཕྱིར་ཚད་མས་རབ་ཏུ་གྲུབ་པའི་རྒྱུ་དང༌། འབྲས་བུའི་དངོས་པོའི་བྱེ་བྲག་ལ་ཐེ་ཚོམ་ག་ལ་ཡོད། རྟ་
པ་ལ་སོགས་པའི་གཟུགས་ཐ་དད་ན་ཡང༌། སེམས་ཀྱིས་སྦྱོར་བ་རྣམས་ཏེ། འདིའི་སྤྲོ་བའི་ཁྱད་པར་རོ། །དེ་སྐད་དུ་ཡང༌། རྒྱགས་པས་ཁ་དོག་ཐ་དད་དེ། །ཞེས་པ་ལ་སོགས་པ་སྔར་རྣམ་པར་བྱེ་ཟིན་ཏོ། །དེ་ཉིད་ཀྱི་ཕྱིར་བསྒྲེ་བ་སྟོན་པ། འགྲུབ་ཅེས་པ་ལ་སོགས་པའོ། །འདི་ཡིས་ནི་སེམས་ཀྱིས་སྦྱོར་བས་སོ། །ཁྲོ་བོ་རྣམས་ནི་མི་བསྐྱོད་པའི་རིགས་ཅན་རྣམས་དང་མི་བསྐྱོད་པའོ། །ཆོ་ག་ནི་ཉམས་ཀྱིས་སྤྲོ་བའི་ཁྱད་པར་གྱིས་རྗེས་སུ་བསྒྲུབ་པའོ། །བདེ་བའི་བསྒྲུབ་པ་ཞེས་པ་བདེ་བ་ཆེན་པོའི་སྒྲུབ་བྱེད་དེ། ཉེ་བར་མཚོན་པ་ལས་བསྙེན་པ་ལ་སོགས་པ་ཡང་ངོ༌། །ཡང་འདིར་བསྙེན་པ་ལ་སོགས་པ་ཅི་འདྲར་བལྟ་ཞེ་ན། གང་འདྲ་བ་ནི་འདུས་པ་ཕྱི་མར་ཏེ། བསྒྲུབ་བྱ་སྒྲུབ་བྱེད་ཡང་དག་སྦྱོར། །གང་དེ་བསྙེན་པ་ཞེས་པར་བརྗོད། །རྡོ་རྗེ་པདྨ་མཉམ་སྦྱོར་བ། །ཉེ་བའི་བསྒྲུབ་པར་བརྗོད་པར་བྱ། །བསྒྲུབ་པ་བསྐྱོད་པར་རབ་བཤད་དེ། །ཧཱུཾ་ཕཊ་ཡི་གེ་ཡང་དག་ལྡན། །རང་བཞིན་རང་གི་བདེ་ཞི་བ། །བསྒྲུབ་པ་ཆེན་པོར་བརྗོད་པར་བྱ། །ཞེས་གསུངས་པ་རྣམས་སོ། །བསྒྲུབ་བྱ་སྒྲུབ་བྱེད་ཡང་དག་སྦྱོར་ནི་རིག་མ་ལ་འཁྱུད་པ་ལ་སོགས་པའོ། །དེ་ལྟར་མཐར་ཐུག་པ་ན་འཇུག་པའི་ཡན་ལག་བཞི་པོ་ཐབས་སུ་གྱུར་པ་རྣམས་ཀྱིས། སངས་རྒྱས་ཐམས་ཅད་ཀྱི་ལྷག་པའི་བདག་པོ་དཔལ་དང་ལྡན་པ། རྡོ་རྗེ་འཛིན་པ་ཆེན་པོའི་གོ་འཕང་ཐབས་ལས་བྱུང་བ། སངས་རྒྱས་རྣམས་ཐམས་ཅད་ཀྱི་ཆོས་རྣམས་ཀྱི་ཆོས་ཉིད་དེ་ཁོ་ནའོ་ཞེས་འདིས་ཐབས་བྱུང་གསུངས་སོ། །འདི་སྐད་གསུངས་ཏེ། ཟླ་བ་དྲུག་ཏུ་རིག་མའི་བརྟུལ་ཞུགས་སྤྱད་ནས་ཉིན་མོ་བདུན་རང་གི་ལྷ་བལྟ་བ་བྱས་ཏེ། སྦྱོར་བ་རབ་ཏུ་གྱུར་པར་ཤེས་ཤིང༌། གང་གི་ཚེ་ཉིན་མཚན་དུ་མར་མེའི་འོད་ཀྱི་རྒྱུན་བཞིན་དུ་རྟག་ཏུ་དེ་ཁོ་ན་ཉིད་ཀྱི་རྣལ་འབྱོར་ལ་མངོན་དུ་ཕྱོགས་པར་ནུས་པ་དེའི་ཚེ། ལྷན་ཅིག་སྤྱོད་པའི་ཕྱག་རྒྱ་དང་ལྷན་ཅིག་རྡོ་རྗེ་སེམས་དཔའ་ལ་སོགས་པ་རྣམས་ལས་གང་ཡང་རུང་བའི་རྣལ་འབྱོར་མངོན་དུ་བྱས་ཏེ། ཐོ་རངས་ཀྱི་ཐུན་ནས་བརྩམས་ལ་རྫོགས་པའི་རིམ་པའི་རྣལ་འབྱོར་ཁམས་གསུམ་པ་ཐམས་ཅད་གཅིག་པའི་རང་བཞིན་མཉམ་པར་གཞག་
པ་དང་མཉམ་པར་མ་བཞག་པར་གཅིག་པའི་ངོ་བོར་ལྷག་པར་མོས་ནས། རྡོ་རྗེས་རྒྱས་བཏབ་པའི་ཕྱག་རྒྱ་དང༌། རོ་མཉམ་པ་ཉམས་སུ་མྱོང་ཞིང༌། མར་མེའི་འོད་ཀྱིས་རྒྱུན་ལྟ་བུར་རྟག་པར་ཉིན་མཚན་ཐོག་ཐག་གནས་པར་བྱའོ། །དེ་ནས་རབ་ཀྱི་མཐར་ཐུག་པར་སོན་པའི་དགའ་བ་བཞིའི་དེ་ཁོ་ན་ཉིད་མངོན་དུ་བྱེད་པ་ལས་སྐྱ་རེངས་འཆར་བའི་དུས་སུ་འགྲུབ་སྟེ། སྒྲུབ་ཐབས་མཆོག་རྣམས་ཀྱིས་ཞེས་བཤད་པའི་ཕྱིར་མན་ངག་ཇི་ལྟ་བར་ཕྱག་རྒྱ་ཆེན་པོ་འགྲུབ་པའི་ཉེ་བའི་ཉིན་ཞག་ལ་སྟེ། བྱང་ཆུབ་ཀྱི་སེམས་ཟླ་བའི་ཆ་མཐའ་དག་ཡོངས་སུ་རྫོགས་པའི་ཕྱིར། སྐྱ་རེངས་ཤར་བའི་དུས་སུ་ཤིན་ཏུ་ཡོངས་སུ་དག་པའི་ཡེ་ཤེས་བདུད་རྩི་ཡོངས་སུ་རྫོགས་པས་ཕྱག་རྒྱ་ཆེན་པོ་གྲུབ་པ་རྡོ་རྗེ་འཛིན་པའོ་ཞེས་པའོ། །དེ་ཉིད་ཀྱི་ཕྱིར་མཁའ་འགྲོ་མ་རྡོ་རྗེ་གུར་དུ་གསུངས་པ། མེ་ཏོག་སོགས་ཀྱིས་མཆོད་བྱས་ནས། །བསམ་གཏན་གནས་སུ་རབ་བདུགས་ཏེ། །ཕྱག་རྒྱ་ལྷན་ཅིག་རབ་ཞུགས་ལ། །རྡོ་རྗེ་རྣལ་འབྱོར་ཡང་དག་བརྩམ། །ཟླ་བ་ཉི་མ་ནུབ་པ་ན། །སྦྱོར་བ་འདི་ནི་ཡང་དག་བརྩམ། །སྐྱ་རེངས་འཆར་བའི་དུས་སུ་ནི། །འགྲུབ་འགྱུར་འདི་ལ་ཐེ་ཚོམ་མེད། །ཅེས་སོ། །འདིའི་དོན་བླ་མ་རྣམས་འདོམས་པར་འགྱུར་ཏེ། རྡོ་རྗེ་ཉི་མ་ཞེས་ཀློག་པ་གཞན་ལ་ཡང་ངོ༌། །ཤིན་ཏུ་ནི་བླ་ན་མེད་པར་རོ། །སྙིང་རྗེའི་གཞན་དབང་ཉིད་ལས་འདི་རྗེས་སུ་བསྒྲུབ་པའི་ཆེད་དུ་སྤྲོ་བ་བསྐྱེད་པ་གསུངས་པ། ཐོབ་ནས་ཞེས་པ་ལ་སོགས་པའོ། །ལེ་ལོ་འདི་ཡང་འདི་ལ་ཐེ་ཚོམ་དང་ཕྱིན་ཅི་ལོག་དག་གིས་ཚུལ་གཞན་ལ་ཞུགས་པ་དང་འདིར་ཞུགས་པ་ཉིད་ན་ཡང་དོན་མ་རྟོགས་པ་ཉིད་ཀྱིས་རྨོངས་པའམ་མ་ཞུགས་པའི་དབང་དུ་བྱས་ནས་གསུངས་པའོ། །འདིར་ཇི་ལྟར་རིགས་པར་ཐོབ་པར་རུང་བ་ཉིད་ཀྱིས་ན་ཐོབ་ནས་ཞེས་གསུངས་སོ། །གང་དུ་ཞེས་པ་བདེ་འགྲོར་རམ་ངན་འགྲོར་རོ། །མི་ཤེས་སོ་ནི་ཐམས་ཅད་མཁྱེན་པ་མ་ཡིན་པ་རྣམས་ཀྱིས་ཏེ། དགེ་བ་དང་མི་དགེ་བའི་ལས་སྣ་ཚོགས་པ་ཉིད་ཀྱི་ཕྱིར་རོ། །ཇི་སྐད་གསུངས་པ། ལས་དང་དེ་ཡི་བག་ཆགས་དང༌། །དེ་ཡི་འཇུག་རྙེད་དེ་ལས་འབྲས། །ངེས་
པས་སངས་རྒྱས་ལས་གཞན་གྱིས། །རྣམ་པ་ཐམས་ཅད་མི་ཤེས་སོ། །ཞེས་སོ། །ལེགས་པར་ཞུགས་པར་བརྩོན་འགྲུས་དང་ལྡན་པའི་ངོར་གསུངས་པ། འདི་ལྟར་ཞེས་པ་ལ་སོགས་པའོ། །དེ་སྟེ་ལས་བྱ་སྟེ། གང་གིས་སངས་རྒྱས་རྣམས་ཀྱི་ཆོས་རྒྱུད་ལ་སོགས་པ་ཀུན་ཤེས་པ་ཕུན་སུམ་ཚོགས་པར་འགྱུར་བའོ་ཞེས་པའོ། །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱ་ཆེར་འགྲེལ་པ། མན་ངག་གི་སྙེ་མར་སྙེ་མ་སུམ་ཅུ་བདུན་པའོ།། །།