སྙེ་མ་སོ་བརྒྱད་པ། ཕྱག་རྒྱ་ཆེན་པོ་གྲུབ་པའི་རྡོ་རྗེ་སློབ་དཔོན་ལ་བསྙེན་བཀུར་ཕུལ་དུ་བྱུང་བ་བསྟན་པ།
དེ་ལྟར་ཕྱག་རྒྱ་ཆེན་པོ་གྲུབ་པའི་རྡོ་རྗེ་སློབ་དཔོན་ལ་བསྙེན་བཀུར་ཕུལ་དུ་བྱུང་བ་བརྗོད་པ་གསུངས་པ། དེ་ནས་ཞེས་པ་ལ་སོགས་པ་སྟེ། གང་དུ་ནི་ཉིན་མོར་རབ་གནས་སུའོ། །གྲུབ་པ་ནི་སྐུ་དང་གསུང་དང་ཐུགས་རྡོ་རྗེས་སོ། །རིག་མ་ལྔར་གསུངས་པའི་ཕྱག་རྒྱ་དང་ལྷན་ཅིག་ལྡན་པའི་སྐྱེས་བུ་ནི་རིག་མའི་སྐྱེས་བུ་སྟེ། དོན་དམ་པར་དབྱེར་མེད་པའི་ངོ་བོ་ཉིད་ཀྱིས་དང༌། ཀུན་རྫོབ་ཏུ་རྣམ་པའི་དབྱེ་བ་ལས་སོ། །གང་གི་ཕྱིར་རྡོ་རྗེ་སློབ་དཔོན་ནི་རྡོ་རྗེ་འཛིན་པ་སྟེ། དོན་དམ་པར་བྱང་ཆུབ་ཀྱི་སེམས་ཀྱི་ངོ་བོ་དང༌། ཀུན་རྫོབ་ཏུ་རིག་མའི་སྐྱེས་བུའི་གཟུགས་ཅན་ནོ། །དེ་སྐད་དུ་ཡང་འདུས་པ་ཕྱི་མར། སྐུ་གསུང་ཐུགས་ཀྱི་རྡོ་རྗེ་ཡིས། །དབྱེར་མེད་དབྱེ་བའི་དངོས་པོ་ལས། །རིག་མ་ལྷན་ཅིག་ཡང་དག་སྦྱོར། །རིག་མའི་སྐྱེས་བུར་བརྗོད་པར་བྱ། །ཞེས་སོ། །འབྱོར་པ་ནི་བསྙེན་བཀུར་ལ་སོགས་པའི་དགའ་སྟོན་ནོ། །རྣམ་འགྱུར་དྲུག་ཏུ་གཡོས་པ་ཁོ་ན་གང་དུ་ཡིན་པ་དེ་ཇི་ལྟར་འགྱུར་བར་རོ། །འདིར་འགུལ་བ་དང་གཡོ་བ་དང་ལྡེག་པ་དང་འུར་བ་དང༌། འཁྲུག་པ་དང་ཆེམ་པ་ཞེས་པ་རྣམ་པར་འགྱུར་བ་དྲུག་རྣམས་སོ། །དེ་ལས་གཞི་འགུལ་བའོ། །ལྗོན་ཤིང་རྣམས་ཐམས་ཅད་གཡོས་པའོ། །རི་བོ་རྣམས་ཐམས་ཅད་ལྡེག་པའོ། །ལྷ་དང་ལྷ་མ་ཡིན་ལ་སོགས་པ་རྣམས་འུར་བའོ། །རྒྱ་མཚོ་ལ་སོགས་པ་རྣམས་འཁྲུག་པའོ། །སྤྲིན་ལ་སོགས་པ་རྣམས་སྒྲོགས་པའོ། །འདི་རྣམས་ཀྱང་སོ་སོར་དམན་པ་དང་བར་མ་དང་མཆོག་རྣམས་སོ་ཞེས་པ་བཅོ་བརྒྱད་དོ། །དེ་ལ་གང་གི་ཚེ་ཤར་ཕྱོགས་སུ་ལྗོན་ཤིང་དང་རི་ལ་སོགས་པ་རྣམས་འཁྲུག་པ་ཆེན་པོར་འགྱུར་བ་དེའི་ཚེ་
ཤར་ཕྱོགས་མཐོ་བར་སྣང་སྟེ་ནུབ་ཕྱོགས་དམའ་བར་རོ། །དེ་ལྟར་གཞན་ལའང་ངོ༌། །འུར་རོ་ཞེས་པ་འོག་ཏུ་སྒྲ་འུར་འུར་བའོ། །གང་གིས་རྒྱ་མཚོ་ཆེན་པོ་འཁྲུག་པ་དེ་ལྟ་བུའི་སྒྲ་དེ་གང་རྣམས་ཀྱི་ཡིན་པ་དེ་རྣམས་ནི་དེ་སྐད་དོ། །ཕྱག་རྒྱའི་སྙིང་པོ་ནི་ཕྱག་རྒྱ་དང་ལྡན་པ་ཉིད་ཀྱི་ཕྱིར་རོ། །ཁམས་ནི་འདིར་དབང་པོ་སྟེ་ཆུང་ངུ་དང་བར་མ་དང་རྣོན་པོ་ཞེས་པ་རྣམ་པ་གསུམ་མོ། །དེ་ལྟར་ཁམས་གསུམ་རྣམས་གང་རྣམས་ཀྱི་ཡིན་པ་དེ་རྣམས་ནི་ཁམས་གསུམ་ཁོ་ན་ཁམས་གསུམ་པ་ཉིད་དེ་སེམས་ཅན་རྣམས་སོ། །གང་གི་ཚེ་གཟུགས་མེད་ཁམས་པ་གཟུགས་ཅུང་ཟད་དང་ལྡན་པ་སྟེ། ཆུང་བ་ལ་དགག་པའོ་ཞེས་འདོད་པ་དང༌། གང་གི་ཚེ་འདི་སྐད་དུ་གཟུགས་མེད་པའི་ཁམས་པར་གྱུར་པ་དང་གཟུགས་ཁམས་པར་འགྱུར་བའི་སེམས་ཅན་རྣམས། དགོས་པའི་དབང་ལས་འདོད་པའི་ཁམས་སུ་འོངས་པ་ན་ཇི་ལྟར་ཐོག་མ་མེད་པའི་བག་ཆགས་བསལ་བར་གྱུར་པ་ལྟར་བུད་མེད་དང་སྐྱེས་པའི་དབང་པོ་ཅན་རྣམས་ཏེ་ཚངས་མ་བཞིན་དང་ཚངས་པ་བཞིན་ཞེས་འདོད་པ། དེའི་ཚེ་འདོད་ཁམས་པར་གྱུར་པ་ལ་སོགས་པ་ཁམས་གསུམ་པ་ཉིད་རྣམས་སོ། །འདོད་པ་འདི་ཁོ་ན་མང་པོ་རིགས་པ་རྣམས་གསུང་ངོ་། །ཐ་སྐར་གྱི་བུ་དག་ནི་ལྷའི་སྨན་པ་དག་གོ །ཆེད་དུ་བརྗོད་པ་ནི། དང་བ་དང་དགའ་བས་ཆེར་རོལ་པའི་ཚིག་གོ །གཞན་ཞེས་པ་གཞན་འཕྲུལ་དབང་བྱེད་པ་རྣམས་སོ། །གཞན་མིན་དབང་སྒྱུར་ནི་འཕྲུལ་དགའ་བ་རྣམས་སོ། །བསྒྲུབ་བྱའི་བསོད་ནམས་ཀྱིས་ཞེས་པ་ལ་བསྒྲུབ་བྱ་ནི་རྡོ་རྗེ་སེམས་དཔའོ། །ཁམས་གསུམ་རྣམས་སུ་སྟེ་ཇི་སྐད་བཤད་པ་རྣམས་སུ་གང་མཆོད་པ་སྲིད་པའོ། །བདེ་བ་ཆེན་པོའི་དངོས་གྲུབ་ནི་ཕྱག་རྒྱ་ཆེན་པོའི་དངོས་གྲུབ་བོ། །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱ་ཆེར་འགྲེལ་པ། མན་ངག་གི་སྙེ་མར་སྙེ་མ་སུམ་ཅུ་བརྒྱད་པའོ།། །།