སྙེ་མ་སོ་དགུ་པ། རང་གི་དོན་ཕུན་སུམ་ཚོགས་པར་ལྡན་པའི་བཅོམ་ལྡན་འདས་འདིའི་རང་གི་ངོ་བོའི་ཁྱད་པར་དང་སྒྱུ་མའི་རྣམ་པར་འཕྲུལ་བ་རྒྱས་པར་བཤད་པ།
དེ་ལྟར་གྲུབ་པའི་རང་བཞིན་དང་གཞན་གྱི་དོན་ལ་འཇུག་པ་རྟོགས་པར་བྱ་བའི་དོན་དུ་གསུངས་པ། གྲུབ་པ་ཞེས་པ་ལ་སོགས་པའོ། །རིག་པའི་སྐྱེས་བུ་ནི་ལོངས་སྤྱོད་རྫོགས་པའི་སྐུ་སྟེ། ཡང་དག་པར་སྦྱོར་བ་ཉིད་ཁོ་ནར་གསལ་བར་གྱུར་པའི་བདེ་
བ་ཆེན་པོའི་སྐུའོ། །མ་སོང་བ་ནི་ཆོས་ཀྱི་སྐུའི་བདག་ཉིད་དེ་དེ་བཞིན་ཉིད་ཀྱི་ངོ་བོ་ཉིད་ཀྱི་ཕྱིར་རོ། །གང་གསུངས་པ། རིགས་ཀྱི་བུ་དེ་བཞིན་ཉིད་ནི་གང་ལས་ཀྱང་འོང་བའམ་འགྲོ་བ་མེད་དོ། །གང་དེ་དེ་བཞིན་ཉིད་དེ་ནི་དེ་བཞིན་གཤེགས་པའོ་ཞེས་སོ། །འདིས་ནི་དོན་དམ་པར་ཆོས་ཀྱི་སྐུ་བྱ་བ་མེད་པ་ཉིད་དུ་རིག་པར་བྱའོ། །མ་ཡིན་པ་ཁོ་ན་ཞེས་པ་རྟེན་དང་བརྟེན་པ་དགག་པ་ཡང་ངོ༌། །གང་གི་ཕྱིར་དང་པོ་སྐྱེ་བ་དང་མཐའ་འགོག་པ་དང་དབུས་གནས་པ་སྟེ། དེ་རྣམས་འདི་ལ་དོན་དམ་པར་མེད་པའོ། །གང་གི་ཕྱིར་གཉིས་མེད་པ་སྟེ་སྤྲོས་པ་མེད་པ་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་ཀྱི་བདག་ཉིད་དོ། །སྲིད་པ་གསུམ་རྣམས་ནི་འདོད་པ་ལ་སོགས་པའི་ཁམས་རྣམས་ཏེ་ཕྱོགས་སོ་སོར་དཔག་ཏུ་མེད་པ་སྣང་བར་བྱེད་དོ་ཞེས་པས་དེ་སྐད་དེ་མེ་ལོང་ཡེ་ཤེས་ཀྱི་ངོ་བོའོ། །སྣང་བར་བྱེད་པ་ནི་བཅོམ་ལྡན་འདས་ཀྱི་ཡིད་ཀྱི་བློ་བཞིན་དུ་དབང་པོའི་བློ་ལ་སོགས་པ་རྣམས་ཀྱིས་ཀྱང་ཡུལ་ཐམས་ཅད་ཡོངས་སུ་གཅོད་པས་ཡུལ་ཐམས་ཅད་པར་བཤད་དེ། བཅོམ་ལྡན་འདས་ཀྱིས་ཇི་སྐད་དུ་གསུངས་པ། ཐམས་ཅད་དུ་ནི་ཕྱག་ཞབས་མཐའ། །ཀུན་ནས་སྤྱན་དང་དབུ་དང་ཞལ། །ཀུན་དུ་ཐོས་ལྡན་འཇིག་རྟེན་དུ། །ཐམས་ཅད་ཁྱབ་པར་བྱས་ཏེ་གནས། །ཞེས་སོ། །དད་པའི་སྟོབས་བསྐྱེད་པའི་མདོར་ཡང༌། འཇམ་དཔལ་དེ་ལ་དེ་བཞིན་གཤེགས་པ་ནི་ཀུན་དུ་གཟིགས་པའི་མངོན་པར་ཤེས་པ་དྲུག་གིས་སེམས་ཅན་འཆི་འཕོ་དང་སྐྱེ་བ་རྣམས་གཟིགས་ཏེ། བདེ་འགྲོ་འམ་ངན་འགྲོར་འགྲོ་བ་ཡང་ངོ༌། །དེ་བཞིན་དུ་དེ་བཞིན་གཤེགས་པས་གཙུག་ཏོར་གྱིས་ཀྱང་གཟིགས་སོ། །དེ་བཞིན་དུ་མཛོད་སྤུས་ཀྱང་གཟིགས་སོ། །དེ་ལྟར་མཚན་རེ་རེས་སོ། །དེ་ལྟར་དུས་ཅིག་ཅར་དུ་ཕྱོགས་བཅུ་རྣམས་སུ་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་གཟིགས་སོ་ཞེས་སོ། །ཐམས་ཅད་ཐམས་ཅད་ཅེས་པ་ནི་འདི་ལྟ་སྟེ་ཕུང་པོ་ལྔ་རྣམས་སོ། །དེར་སོན་པ་ནི་ཁྱབ་པར་བྱེད་པ་སྟེ། ཆོས་བདག་མེད་པར་མཉམ་པ་ཉིད་ཀྱིས་སོ་ཞེས་པ་ཐམས་ཅད་དུ་སོང་
བ་སྟེ། མཉམ་པ་ཉིད་ཀྱི་ཡེ་ཤེས་ཀྱི་བདག་ཉིད་དོ། །མུ་མཐའ་མེད་པའི་སེམས་དང་སེམས་བྱུང་རྣམས་མཁྱེན་ཏོ་ཞེས་པ་ཐམས་ཅད་མཁྱེན་པ་སྟེ་སོ་སོར་རྟོག་པའི་ཡེ་ཤེས་ཀྱི་རང་བཞིན་ནོ། །བྱ་བ་ཐམས་ཅད་ལ་མཁས་པ་ནི་ཐམས་ཅད་པ་སྟེ་བྱ་བ་གྲུབ་པའི་ཡེ་ཤེས་ཀྱི་རང་བཞིན་ནོ། །ཐོས་འཇོམས་ལ་མཁས་པ་ནི་ཐོས་འཇོམས་པ་ཞེས་པ་ལྟར་ཨ་ཎ་ནོ། །དེ་ཉིད་ཀྱི་ཕྱིར་ཐམས་ཅད་ཀྱིས་དོན་དུ་གཉེར་བར་བྱའོ་ཞེས་པ་སྐྱེས་བུའི་དོན་མཆོག་གོ །རྣམ་པར་མ་དག་པའི་སེམས་རྣམས་ལ་རང་བཞིན་གྱི་དེ་བཞིན་ཉིད་ཀྱི་ངོ་བོར་གནས་ཤིང༌། རྣམ་པར་དག་པའི་སེམས་རྣམས་ལ་དྲི་མ་མེད་པའི་དེ་བཞིན་ཉིད་ཀྱི་བདག་ཉིད་དུའོ་ཞེས་པ་སེམས་ཅན་ཀུན་གྱི་སེམས་ལ་གནས་པ་ཞེས་པའོ། །འདི་ནི་ཆོས་ལ་བདག་མེད་པ་མཉམ་པ་ཉིད་ཀྱིས་བརྗོད་པའོ། །བཅོམ་ལྡན་འདས་ཀྱི་ནི་དྲི་མ་དང་བྲལ་བ་ཉིད་ཀྱི་རྣམ་པར་དག་པ་ཁོ་ནའོ། །དེ་ཉིད་ཀྱི་ཕྱིར་དེ་ནི་ངན་འགྲོ་ལ་སོགས་པ་རྣམས་ལས་རྣམ་པར་གྲོལ་བའོ། །ཡོན་ཏན་ནི་སྟོབས་དང་མངོན་པར་ཤེས་པ་ལ་སོགས་པ་རྣམས་སོ། །ཐུགས་རྗེ་ཆེན་པོས་ཇི་ལྟར་རིགས་པར་འགྲོ་བ་བཟང་པོ་དང་རྣམ་གྲོལ་ལ་འགོང་པར་མཛད་པའི་ཕྱིར་ཐམས་ཅད་ལ་ཕན་པ་ནི་ཀུན་ཕན་ནོ། །དེ་ལྟར་འདི་ནི་སྟོང་པ་ཉིད་དང་སྙིང་རྗེའི་རང་བཞིན་གྱིས་ཟུང་དུ་འཇུག་པའི་བྱང་ཆུབ་ཀྱི་སེམས་རྡོ་རྗེ་གསུངས་སོ། །ཞི་བ་ནི་མཆོག་ཏུ་དགེ་བའི་ངོ་བོའོ། །མཉམ་པ་མེད་པའི་ཕྱིར་མི་མཉམ་པའོ། །རྟག་ཏུ་བྱུང་བ་ནི་ཆོས་ཀྱི་སྐུ་རང་བཞིན་རྟག་པ་ཉིད་ཀྱིས་དང༌། བདེ་བ་ཆེན་པོ་ལ་ལོངས་སྤྱོད་པ་ནི་ལྡོག་པ་མེད་པ་སྟེ། རྒྱུན་མི་ཆད་པ་རྟག་པ་ཉིད་ཀྱིས་དང་སྤྲུལ་པའི་སྐུ་འཇིག་རྟེན་གྱི་ཁམས་སྣ་ཚོགས་རྣམས་སུ་སྐྱེ་བ་ལ་སོགས་པ་སྟོན་པའི་ཕྱིར་རྒྱུན་གྱིས་རྟག་པ་ཉིད་ཀྱིས་སོ། །དེ་ལྟར་འགྲོ་བའི་མགོན་པོ་གཙོ་བོའོ། །སྐྱོབ་པ་ནི་ངན་འགྲོ་དང་ལམ་ལོག་པ་ལས་སོ། །དེ་ལྟ་ན་ཡང་བག་ཆགས་དང་བཅས་པའི་རྣམ་པར་རྟོག་པ་མ་ལུས་པ་སྤངས་པའོ། །དབྱིབས་ནི་ལག་པ་དང༌། རྐང་པ་ལ་སོགས་པ་ཡང་དག་པར་བཀོད་པའི་ཁྱད་པར་རིང་པོ་ཉིད་ལ་སོགས་པའོ། །ཁ་དོག་ནི་སེར་པོ་ལ་སོགས་པ་སྟེ། དེ་དག་དང་བྲལ་བ་ནི་དོན་
དམ་པར་རོ། །དེའི་ཕྱིར་མིག་གི་ཡུལ་མ་ཡིན་པའོ། །དེ་ལྟ་ན་ཡང་ཕན་པ་མཛད་པས་གསལ་བར་བྱེད་པའི་ཕྱིར་རྒྱལ་པོ་སྟེ། ཀུན་རྫོབ་ཏུ་དབྱིབས་ལ་སོགས་པ་ལྡན་པའི་ཕྱིར་ཞེས་དགོངས་པའོ། །རྡོ་རྗེ་བཞིན་དུ་དབྱེ་བར་མི་ནུས་སོ་ཞེས་པས་དབྱེ་བར་དཀའ་བ་སྟེ། ངོ་བོ་གང་དབྱེར་མེད་པ་དེ་རྡོ་རྗེ་སྟེ། ཕྱི་རོལ་གྱི་ཡང་རྡོ་རྗེ་གང་ཡིན་པ་དེ་མི་ཕྱེད་པ་ཁོ་ནར་བརྗོད་དོ། །དེ་ལ་རྡུལ་ཕྲ་རབ་ཀྱང་ཕྱོགས་ཀྱི་ཆའི་དབྱེ་བས་དང་བློས་ཡོངས་སུ་བརྟགས་པས་ཀྱང་དབྱེ་བར་ནུས་པ་ཉིད་ཀྱི་ཕྱིར་སྟོང་པ་ཉིད་ཁོ་ན་དབྱེར་མེད་པའོ། །དེ་གསུངས་པ། སྟོང་པ་ཉིད་རྡོ་རྗེར་བརྗོད་པར་བྱ། །ཞེས་སོ། །ཆོས་ཀྱི་སྐུ་བཅོམ་ལྡན་འདས་དེ་ཡང་ཟླ་བ་ལྟ་བུ་སྟེ། ཉོན་མོངས་པའི་གདུང་བ་དང་བྲལ་བ་ཉིད་ཀྱིས་སོ། །ཉེ་བར་མཚོན་པ་ལས་སྙིང་རྗེ་ཆེན་པོས་དགའ་བར་བྱེད་པའི་ཕྱིར་ཡང་ངོ༌། །དེ་ནི་འགྲོ་བ་མ་ལུས་པའི་དོན་བྱེད་པ་དམིགས་པ་མེད་པའི་སྙིང་རྗེ་སྟེ། དེ་ཡང་འདིར་ལྷན་ཅིག་སྐྱེས་པའི་བདེ་བ་ཆེན་པོའི་རང་བཞིན་ནི། ཆེས་ཤིན་ཏུ་དགའ་བར་བྱེད་དེ། ཙ་དི་དགའ་བ་ལའོ་ཞེས་པ་བྱིངས་སོ། །སེང་གེ་བཞིན་དུ་འཕྲོག་བྱེད་དང་ཐ་གུའི་ལྟོ་ལ་སོགས་པའི་རི་དགས་ཀྱི་ཚོགས་རྣམས་ལའོ། །རྒྱ་མཚོ་བཞིན་དུ་འཕྲོག་བྱེད་ལ་སོགས་པ་རྣམས་དང་འདོད་ཆགས་དང་བྲལ་བ་ལ་སོགས་པ་དང་བྱང་ཆུབ་སེམས་དཔའ་རྣམས་ཀྱིས་ཀྱང་ང་གཏིང་མི་རྟོགས་པ་ཡོན་ཏན་ཟབ་པ་ཉིད་ཀྱི་ཕྱིར་རོ། །གདུལ་བྱ་ཐམས་ཅད་ཀྱི་བསོད་ནམས་དང་རང་གི་སྨོན་ལམ་གྱི་དབང་ལས་རྣམ་པར་རྟོག་པ་མེད་ཀྱང་ཡིད་བཞིན་གྱི་རིན་པོ་ཆེ་དང་འཁོར་ལོ་འཁོར་བ་བཞིན་སེམས་ཅན་གྱི་དོན་བྱེད་པའོ་ཞེས་ལན་ཅིག་མ་ཡིན་པར་བསྒྲུབས་ཟིན་ཏོ། །སེམས་ཅན་གྱི་དོན་ཁོ་ནས་བསམ་གྱིས་མི་ཁྱབ་ཅིང་དཔག་ཏུ་མེད་པ་སྤྲུལ་པའི་ལུས་རྣམས་སུ་བསྟན་པའི་ཆེད་དུ་གསུངས་པ། བལྟམས་པ་ཞེས་པ་ལ་སོགས་པ་སྟེ། སྔར་བཤད་ཟིན་ཏོ། །འདིར་ནི་ལྷ་རུ་གཤེགས་པ་དང་ཆོ་འཕྲུལ་དག་རིམ་པ་བཟློག་སྟེ། གསུངས་པ་ལས་ཤཱཀྱ་ཐུབ་པའི་ལྟར་སངས་རྒྱས་གཞན་རྣམས་ཀྱི་གཞན་དོན་མཛད་པའི་རིམ་པ་ངེས་པ་མ་ཡིན་ཞེས་མངོན་
པར་དགོངས་པའོ། །དད་པའི་སྟོབས་བསྐྱེད་པའི་མདོར་ཡང་བཀའ་སྩལ་པ། འཇམ་དཔལ་དེ་ལ་དེ་བཞིན་གཤེགས་པ་ནི་ཕྱོགས་བཅུ་རྣམས་སུ་འཇིག་རྟེན་གྱི་ཁམས་རབ་འབྱམ་རྣམས་སུ་འཇིག་རྟེན་གྱི་ཁམས་རབ་འབྱམ་རྣམས་སུ་འཇིག་རྟེན་གྱི་ཁམས་རེ་རེར་དང་གླིང་རེ་རེར་དུས་ཅིག་ཅར་དགའ་ལྡན་གྱི་གནས་ན་བཞུགས་ཤིང་འཕོ་བ་དང་བལྟམས་པ་དང་མངོན་པར་འབྱུང་བ་དང༌། དཀའ་བ་སྤྱོད་པ་ལ་སྦྱོར་བ་དང་བྱང་ཆུབ་ཀྱི་སྙིང་པོར་ཉེ་བར་གཤེགས་པ་དང་བདུད་འཇོམས་པ་དང་མངོན་པར་རྫོགས་པར་བྱང་ཆུབ་པ་དང་ཆོས་ཀྱི་འཁོར་ལོ་བསྐོར་བ་དང་ཡོངས་སུ་མྱ་ངན་ལས་འདའ་བ་ཆེན་པོ་དང་ཆོས་གནས་པ་དང་ཆོས་ནུབ་པ་ཡང་ཡང་དག་པར་སྟོན་ཏོ། །མུ་སྟེགས་པའི་སྐྱེ་མཆེད་ཀྱི་སྤྱོད་པ་རྣམས་ཐམས་ཅད་དུ་དང་སྐྱེས་རབ་ཐམས་ཅད་དུ་འང་དུས་ཅིག་ཅར་ཡང་དག་པར་སྟོན་ཏོ། །དེ་ཅིའི་ཕྱིར་ཞེ་ན། ཆགས་པ་མེད་པར་སྟོན་པ་ཉིད་ཀྱི་ཕྱིར་ཐོགས་པ་མེད་པའི་སྟོན་པའོ། །ཡང་དག་པར་མི་ཕྱེད་པ་ཉིད་ཀྱི་ཕྱིར་ཡང་དག་པར་དབྱེར་མེད་པ་སྟེ། མི་བསྟེན་པ་ཉིད་ཀྱི་ཕྱིར་རོ། །ཡང་ན་རྩོལ་བ་མེད་པས་རྣམ་པར་མི་རྟོག་པ་དཔག་ཏུ་མེད་པའི་བྱ་བ་རྣམས་འཇུག་པར་མཛད་ཅིང༌། དེ་བཞིན་གཤེགས་པ་དགའ་ལྡན་གྱི་གནས་ནས་ཀྱང་མི་གཡོའོ་ཞེས་སོ། །དེ་ལྟར་ཞེས་པ་ཇི་ལྟར་གཅིག་པུར་གྲགས་པ་བལྟམས་པ་ལ་སོགས་པ་སྟོན་པ་དེ་ལྟར་གང་ལམ་ལེགས་པར་གོམས་པའི་རིགས་ཀྱི་བུ་ཉེ་བར་བསྔགས་པའི་ཚུལ་ཐོབ་པ་མང་པོ་དེ་རྣམས་ཀྱང་རིམ་པས་དང་ཅིག་ཅར་དུ་འཇིག་རྟེན་གྱི་ཁམས་གཞན་རྣམས་སུ་སྟོན་ཏེ་ཞེས་ཚིག་རྣམ་པར་བསྒྱུར་བས་སྦྲེལ་བའོ། །རྒྱུ་མངོན་དུ་ཕྱོགས་པ་ཉིད་ཀྱི་ཕྱིར་འབྲས་བུ་འབྱུང་བ་ངེས་པར་འགྱུར་བའོ། །དེ་ཡང་ཇི་ལྟར་གཅིག་གི་ཡིན་པ་དེ་ལྟར་གཞན་གྱི་བཟློག་ཏུ་མེད་པའོ་ཞེས་དགོངས་པའོ། །དེ་ཉིད་ཀྱི་ཕྱིར་ཉེ་བར་སྡུད་དེ། དེ་ལྟར་གང་གྲུབ་པས་སྟོན་ཏོ་ཞེས་ཁྱད་པར་མེད་པས་སོ། །མ་རྟོགས་པའི་སྐབས་སུ་སྣ་ཚོགས་པ་རྨི་ལམ་འདྲ་བའོ་ཞེས་བརྗོད་པར་བྱ་ཞིང་སྒྱུ་མ་ལྟ་བུར་ཡང་ངོ༌། །རྟོགས་པའི་གནས་སྐབས་སུ་ནི་རྨི་ལམ་གྱི་ངོ་བོ་ཁོ་ན་དང་སྒྱུ་མའི་རང་བཞིན་ཁོ་ན་དེའི་ཞེས་རྨི་ལམ་ལྟ་བུ་ཞེས་དང་
སྒྱུ་མའི་ངོ་བོ་ཞེས་པས་གསུངས་སོ་ཞེས་པའོ། །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱ་ཆེར་འགྲེལ་པ། མན་ངག་གི་སྙེ་མར་སྙེ་མ་སུམ་ཅུ་དགུ་པའོ།། །།