སྙེ་མ་བཞི་བཅུ་པ། དམ་ཚིག་བསྟེན་པ་གསལ་བར་བཤད་པ།
བླ་ན་མེད་པའི་འབྲས་བུ་ཕུན་སུམ་ཚོགས་པ་འདི་ནི་རིམ་པ་གཉིས་གོམས་པས་དམ་ཚིག་བསྟེན་པ་ཁོ་ནས་སོ་ཞེས་དེ་རྒྱས་པར་བཤད་པའི་ཆེད་དུ་འཇུག་པ་གསུངས་པ། གསུངས་པ་ཞེས་པ་ལ་སོགས་པའོ། །ཁྲག་ནི་མེ་ཏོག་སྟེ་བ་ལང་ལ་སོགས་པའི་ཁྲག་ཀྱང་ངོ༌། །ཉ་ནི་ཆུའི་ཉ་ལ་སོགས་པའོ། །ཤ་ནི་བ་ལང་ལ་སོགས་པའི་འོ། །ཡེ་ཤེས་སེམས་དཔའ་རྣམས་ཀྱི་སྟེ་ཕྱི་རོལ་དུ་ཐབ་ཁུང་དང་ནང་དུ་བསྒོམས་པ་རྣམས་ཀྱི་ཞལ་མི་གཙང་བས་བཀང་བ་ཅི་ལྟར་ཏེ་འདི་མི་རིགས་ཞེས་དགོངས་པའོ། །འབྲས་བུ་ནི་སྦྱིན་སྲེག་གིའོ། །མི་ཤེས་པ་ཡང་དག་པའི་ཤེས་པ་དང་བྲལ་བ་ཡང་དེ་རྣམས་ཡིན་ལ། རྨོངས་པ་འཁྲུལ་པ་རྣམས་ཀྱང་ངོ༌། ཡེ་ཤེས་ཐབ་ནི་འཆང་བར་འགྱུར་བའོ། །བཤང་བ་ལ་སོགས་པའི་ཕྱི་རོལ་གྱི་དངོས་པོ་དོན་དམ་པར་ཡོད་དོ་ཞེས་འཁྲུལ་བས་དེ་མ་ཡིན་ལ་དེར་འཛིན་པའི་ངོ་བོའི་མངོན་པར་ཞེན་པས་མི་གཙང་བ་ལ་སོགས་པར་སྒྲོ་འདོགས་པ་རྣམས་ཀྱིས་བླུན་པར་བྱས་པ་དངོས་པོའི་དེ་ཁོ་ན་ཉིད་མི་ཤེས་ཏེ། དེ་རྣམས་མི་གཙང་བ་ཀུན་དུ་སྤྱོད་པ་ལ་སོགས་པས་སྡིག་པ་དང་གཙང་བ་ཉེ་བར་སྤྱོད་པ་ལ་སོགས་པས་བསོད་ནམས་ཡེ་ཤེས་རྟོགས་པར་བྱེད་དོ། །དེ་ལ་རང་བཞིན་ཡོངས་སུ་དག་པར་ལྷག་པར་དམིགས་པ་ཁོ་ནས་དམ་ཚིག་བསྟེན་པར་བྱའོ་ཞེས་དགོངས་པས་འཁྲུལ་པ་འགགས་པ་ཡང་དག་པའི་ཡེ་ཤེས་ཀྱི་ཐབས་ཆོས་ཀྱི་དབྱིངས་རང་བཞིན་གྱིས་ཡོངས་སུ་དག་པར་སྟོན་པ། རང་ཞེས་པ་ལ་སོགས་པའོ། །རང་བཞིན་ནི་མ་བཅོས་པ་དོན་དམ་པར་རང་བཞིན་མེད་པ་ཉིད་དེ། དེས་དག་པ་རྣམས་ནི་མི་གཙང་བ་ལ་སོགས་པའི་ངོ་བོ་རྣམས་མ་ཡིན་ནོ། །ཆོས་རྣམས་ནི་རང་གི་མཚན་ཉིད་འཛིན་པའི་ཕྱིར་བཤང་བ་ལ་སོགས་པ་རྣམས་སོ། །གང་གི་ཕྱིར་མ་སྐྱེས་པ་རྣམས་ཏེ་སྐྱེ་བ་དང་བྲལ་བ་ཉིད་ཀྱིས་ན་རང་བཞིན་མེད་པ་ཉིད་དུ་བསྒྲུབ་པར་བྱ་བར་མངོན་པར་དགོངས་སོ། །དེ་ལྟར་ཡང་དབུ་མའི་སྙེ་མར་རྣམ་པར་
བསྒྲུབས་ཟིན་ཏོ། །གནས་མེད་པས་ན་གནས་མེད་རྣམས། །ཞེས་ཏེ་མི་གཙང་བ་ཉིད་ལ་སོགས་པའི་རྟེན་མ་ཡིན་པའོ། །རིགས་པ་འདི་དེ་ཁོ་ན་ཉིད་ཤེས་པ་འཕེལ་བའི་ཆེད་དུ་ཐབས་སོ་ཞེས་པ་སྒོམ་པས་ཡུན་རིང་དུ་རྣམ་པར་གནས་པ་ཁོ་ནའི་གཉིས་སུ་མེད་པའི་ཡེ་ཤེས་ཀྱིས་འཁྲུལ་པ་ཉམས་ཀྱི། རྣམ་པ་ཐམས་ཅད་དུ་དུས་ཤིན་ཏུ་ཐུང་བ་སྐྱེས་པ་ཙམ་གྱིས་ནི་མ་ཡིན་ནོ་ཞེས་དགོངས་པའོ། །འོ་ན་དེ་ལྟ་ན་སྡིག་པ་མེད་ན་ལེགས་སྤྱད་པ་རྣམས་ཀྱང་ཇི་ལྟར་འདོད་པའི་གཡོ་བར་འགྱུར་ཞིང་ངན་འགྲོ་མེད་ལ། བསོད་ནམས་མེད་ན་ནི་བདེ་འགྲོ་ཡང་མེད་ན་ཐར་པའི་གཏམ་ཅི་ཞིག །གཞན་ཡང་ལས་མེད་ན་སྐྱེ་བ་མེད་པའི་ཕྱིར་རྟག་ཏུ་གྲོལ་བར་འགྱུར་བའམ། ཡང་ན་ནམ་ཡང་མ་ཡིན་ནོ། །འཆིང་བ་མེད་ན་གྲོལ་བ་ག་ལས་ཡིན། །ཞེས་པས་ཐམས་ཅད་མ་བཅད་པར་བསྙིལ་བའོ་ཞེས་དོགས་པར་བྱས་ནས་གསུངས་པ། བསོད་ནམས་ཞེས་པ་ལ་སོགས་པའོ། །དམ་པ་ནི་བླ་ན་མེད་པ་སྟེ། དོན་དུ་གཉེར་བར་བྱའོ་ཞེས་པ་དོན་ནོ། །ཡང་ན་ཡེ་ཤེས་དམ་པའི་དེའི་བདག་ཉིད་ཀྱི་ཡུལ་ལོ། །ཡང་ན་དམ་པའི་དོན་ཏེ་ལམ་གྱི་ཡེ་ཤེས་ཀྱི་བསྒྲུབ་པར་བྱ་བ་ནི་དམ་པའི་དོན་ཏེ་སངས་རྒྱས་ཉིད་དོ། །དེར་བསོད་ནམས་རྒྱུའི་གནས་སྐབས་ཀྱི་ངོ་བོ་དོར་བར་བྱ་སྟེ། བསོད་ནམས་དང་དེའི་རྣམ་པར་རྟོག་པ་ཡང་བག་ཆགས་དང་བཅས་པ་སྤངས་པའི་ཕྱིར་རོ། །འབྲས་བུའི་གནས་སྐབས་པའི་བསོད་ནམས་རྣམ་པར་མི་རྟོག་པ་ནི་ཡོད་པ་ཁོ་ན་སྟེ། བྱང་ཆུབ་ཀྱི་སེམས་རྡོ་རྗེ་ནི་བསོད་ནམས་ཐམས་ཅད་ཀྱི་རང་བཞིན་ཉིད་ཀྱི་ཕྱིར་རོ། །སྡིག་པ་ནི་མ་ཡིན་ཏེ་སོ་སོ་སྐྱེ་བོའི་གནས་སྐབས་སུ་ཡང་དེ་ཀུན་དུ་མི་སྤྱོད་པའི་ཕྱིར་མི་སྲིད་པས་སོ། །སོ་སོ་སྐྱེ་བོའི་ས་ལ་ནི་ཆེས་ཤིན་ཏུའོ། །དེ་ཉིད་ཀྱི་ཕྱིར་གསུངས་པ། སུ་ཞིག་འཛིན་ཞེས་སོ། །དོན་ནི་འདི་སྟེ་ཚང་མས་ངེས་པར་དཔྱད་ན་ཕུང་པོ་ལྔ་པོ་རྣམས་ཀྱང་དོན་དམ་པར་རང་བཞིན་མེད་མོད། །འོན་ཀྱང་ཀུན་རྫོབ་པ་རྣམས་ཡོད་པ་ཁོ་ནའོ། །དེའི་ཕྱིར་འདུ་བྱེད་ཀྱི་ཕུང་པོའི་ནང་དུ་འདུས་པའི་སྡིག་པ་དང་བསོད་ནམས་ངག་ཀུན་རྫོབ་ཏུ་ཡོད་པ་ཁོ་ནའོ། །དེ་ལ་སྡིག་
པ་ནི་ལུས་དང་ངག་དང་སེམས་ཀྱི་ཉེས་པར་སྤྱོད་པ་རྣམ་པ་བཅུ་སྟེ། རང་བཞིན་གྱི་ཁ་ན་མ་ཐོ་བ་དང་བཅས་པ་དང་ཇི་ལྟར་རིགས་པར་བཅས་པའི་ཁ་ན་མ་ཐོ་བ་དང་བཅས་པའོ། །བསོད་ནམས་ནི་སྦྱིན་པ་ལ་སོགས་པའི་རང་བཞིན་ནོ། །བསོད་ནམས་དང་བསོད་ནམས་མ་ཡིན་པ་འདི་དག་ཀྱང་ཐུབ་པའི་དགོངས་པའི་རྒྱན་དུ་རྒྱས་པ་དང་བཅས་པར་བརྗོད་དོ། །དེ་ལ་བསོད་ནམས་མ་ཡིན་པ་ནི་མི་འདོད་པའི་རྣམ་པར་སྨིན་པ་ཅན་ནོ་ཞེས་པས་སྤང་བྱའོ། །བསོད་ནམས་ནི་བདེ་འགྲོའི་དང་འཁོར་བའི་ཆུ་བོ་ལས་སྒྲོལ་བའི་རྒྱུའོ་ཞེས་པས་བླང་བར་བྱའོ་ཞེས་པའོ། །འདི་ཁོ་ན་དཔེས་རྟོགས་པར་མཛད་པ། ཕ་རོལ་ཞེས་པ་ལ་སོགས་པ་སྟེ། བརྒལ་ནས་ཞེས་པ་ཆུ་ཀླུང་བརྒལ་ནས་སོ། །དོར་ནས་ནི་གཟིངས་སོ། །དེ་བཞིན་དུ་ཆོས་ཏེ་བསོད་ནམས་བླང་བར་བྱ་བ་ཉིད་ཀྱིས་དང་ཆོས་མིན་ཏེ་སྡིག་པ་དོར་བྱ་ཉིད་ཀྱིས། བརྟེན་ནས་ཏེ་བློས་ལྷག་པར་གནས་པ་སྟེ། འཁོར་བ་ལས་བརྒལ་ནས་འཁོར་བ་ལས་ཕ་རོལ་རྡོ་རྗེ་འཛིན་པའི་སའི་བར་ཆད་མེད་པའི་ལམ་གྱི་སེམས་བསྐྱེད་པའོ། །དེའི་དེ་མ་ཐག་པར་བྱང་ཆུབ་སངས་རྒྱས་ཉིད་རྟོགས་པའོ། །འོ་ན་ཇི་ལྟར་ཀུན་རྫོབ་པའི་སྡིག་པའང་རབ་ཏུ་སྤང་བར་བྱ་བ་དེ་བཞིན་དུ་ཀུན་རྫོབ་པའི་ཡང་མི་གཙང་བའི་ཉེར་སྤྱོད་སྤང་བར་བྱ་བའོ་ཞེས་དོགས་པར་བྱས་ནས་ཉེ་བར་སྡུད་པས་ལན་འདེབས་པ་དེའི་ཕྱིར་ཞེས་པ་ལ་སོགས་པ་སྟེ། རྣམ་རྟོག་དྲ་བ་ནི་དོན་དམ་པ་པའི་དངོས་པོ་ཡོད་དོ་ཞེས་པ་འདི་ལྟ་བུ་ལ་སོགས་པའོ། །ཆོས་རྣམས་ཀྱི་ཟབ་པ་ནི་ཟབ་མོ་ཉིད་དེ་དེ་བཞིན་ཉིད་དོ། །དེ་གསུངས་པ། སྟོང་ཉིད་ཆོས་ཀྱི་ཟབ་མོ་ཉིད། །ཡོན་ཏན་གཞན་རྣམས་རྒྱ་ཆེ་བའོ། །ཞེས་སོ། །དེར་འཕེལ་བ་ནི་ཚད་མས་ཉེ་བར་དྲངས་པའི་ངེས་པ་བསགས་པ་སྟེ། དེ་བཞིན་གཤེགས་པ་ཚད་མ་མཆོག་ཏུ་གྱུར་པས་གསུངས་པའི་བཤད་པ་ལ་སོགས་པའི་སྦྱིན་སྲེག་ལ་སོགས་པ་བྱས་པ་དངོས་གྲུབ་ཀྱི་ལམ་ཡིན་པ་ལ། འདི་མི་གཙང་བའོ་ཞེས་པ་ལ་སོགས་པ་སྒྲོ་གདགས་པར་མི་བྱའོ། །མི་གཙང་བ་ཉིད་ཅེས་བྱ་བའམ་གཙང་བ་ཉིད་ནི་ཀུན་རྫོབ་ཏུ་ཡང་འགར་ཡང་ཡོད་པ་མ་ཡིན་གྱི། རིག་བྱེད་ཀྱིས་རྣམ་པར་བསླུས་པའི་བྲམ་ཟེ་རྣམས་ཀྱིས་ཐ་སྙད་བྱས་པ་
འབའ་ཞིག་སྟེ། དེའི་རྗེས་སུ་འཇུག་པ་གཞན་དང་གཞན་རྣམས་ཀྱིས་ཀྱང་ངོ༌། །དེ་ལྷག་པར་མོས་པའི་གདུལ་བྱའི་ངོར་བཅོམ་ལྡན་འདས་ཀྱིས་ཀྱང་ཚུལ་གཞན་དུ་དང་བྱ་བའི་རྒྱུད་འགའ་ཞིག་ཏུ་བསྟན་ཏེ། ཟབ་མོ་ལ་ལྷག་པར་མོས་པ་ཤེས་རབ་མཆོག་ཅན་གྱི་སྔགས་ཀྱི་ཚུལ་གྱི་དོར་ནི་མ་ཡིན་ནོ། །དེ་ཉིད་ཀྱི་ཕྱིར་གསུངས་པ། སྔགས་རིག་ཅེས་པའོ། །མི་གཙང་བའི་སྒྲིབ་པ་བསོད་ནམས་མ་ཡིན་པ་ཡང་མ་ཡིན་ཏེ། དེ་ནི་རང་བཞིན་གྱིས་ཁ་ན་མ་ཐོ་བ་མ་ཡིན་ཞིང་བཅས་པས་ཀྱང་མ་ཡིན་ནོ། །གདུལ་བྱའི་ཁྱད་པར་ལ་ནི་བཅས་པས་ཁ་ན་མ་ཐོ་བར་འགྱུར་མོད། སྔགས་ཀྱིས་རྩེ་བ་ལ་མ་གསུངས་སོ། །གཞན་གྱི་ལྟ་བ་ལ་ཡང་ཇི་སྲིད་དུ་ཐམས་ཅད་དུ་འདི་ལྟར་མ་ཡིན་ཏེ། མཆོག་གི་ངང་པ་པ་དང་ལོང་པ་པ་ལ་ཡང་ཐམས་ཅད་བཟའ་ཞིང་ཐམས་ཅད་བཏུང་བ་ལ་སོགས་པ་དང་བ་ལང་གི་ཤའི་སྦྱིན་སྲེག་ལ་སོགས་པ་བསྒྲགས་པའི་ཕྱིར་རོ། །དེ་བཞིན་གཤེགས་པས་གསུངས་པའི་ལམ་ལ་རྣམ་པར་རྟོག་པ་རྣམ་པ་འདི་ལྟ་བུ་ལྟ་ཅི་སྨོས། དེ་ནི་གཏི་མུག་ཆེན་པོ་མ་རིག་པ་སྟེ། འདོད་ཆགས་ལ་སོགས་པ་རྣམས་དང་ལས་དང་སྐྱེ་བའི་རྒྱུའོ། །དེས་ན་དྲི་མ་དེ་རྩད་ནས་དབྱུང་བར་བྱའོ། །དེའི་ཕྱིར་དྲི་མ་དང་བྲལ་བ་སོ་སོར་སྣང་ངོ༌། །གང་གོམས་པར་བྱས་ནས་འདི་ལྟར་འབྱུང་བའི་ཏིང་ངེ་འཛིན་འདི་ཅི་ཞིག་ཡིན་ཞེ་ན་གསུངས་པ། གཉིས་ཞེས་པ་ལ་སོགས་པའོ། །དབྱེ་ཉིད་ཅེས་པ། ངའོ་ཞེས་བྱེད་ཅིང་བྱ་བ་མངོན་པར་ཁེངས་པ་གང་དུ་ཡིན་པ་དེའི་དངོས་པོ་ནི་དེ་ཉིད་དེ། དེས་རྒྱལ་བའི་གཟུགས་སོ། །ཀུན་གྱི་སྟེ་ལུས་དང་ངག་དང་སེམས་རྣམས་ཀྱི་རྣམ་པ་རང་བཞིན་ནོ། །ངེས་དོན་དམ་པར་སྟོང་པ་ཉིད་ཀྱི་ན་སྤངས་པའོ། །ཡེ་ཤེས་ནི་བྱང་ཆུབ་ཀྱི་སེམས་ཏེ། རྡོ་རྗེ་དང་པདྨ་སྦྱོར་བ་ལས། ལུས་དང་ངག་དང་སེམས་རོ་གཅིག་པས་སྟོང་པ་ཉིད་དང་སྙིང་རྗེ་དབྱེར་མེད་པའི་ཡེ་ཤེས་ཀྱི་རང་བཞིན་རྡོ་རྗེ་སེམས་དཔའི་སྐུའི་ང་རྒྱལ་བརྟན་པོས་སྒོམ་པར་བྱེད་པ་རྣམས། རིམ་པ་གཉིས་ཀ་ལ་ཡང་ཏིང་ངེ་འཛིན་འདི་རྫོགས་པ་ན། སྐྱེ་བ་འདི་ཁོ་ན་ལ་རྣལ་འབྱོར་པ་རྣམས་ཡེ་ཤེས་ཅན་རྣམས་སུ་འགྱུར་རོ་ཞེས་པའི་དོན་ཏོ། །དམ་ཚིག་གསུངས་པ། བུད་མེད་ཅེས་པ་ལ་སོགས་པ་སྟེ། བུད་མེད་དང་སྐྱེས་པའི་ལུས་རྣམ་པ་སྣ་ཚོགས་
པའི་ལས་སྲོག་ཆགས་གསོད་པ་ལ་སོགས་པ་སྐྱེ་བ་ནི་མི་ཤེས་པ་ཡོད་ན་འགྱུར་རོ་ཞེས་བསྟན་ཏོ། །ལས་དེ་ཕན་པ་དང་མི་ཕན་པའི་རྒྱུ་ཡོངས་སུ་ཤེས་པ་དང་ལྡན་པས་མི་བྱའོ་ཞེས་དགོངས་པའོ། །དམ་ཚིག་ཏུ་བྱ་ཞིང་འགོང་པར་མི་བྱ་བ་ཉིད་ཀྱིས་རྟོགས་པར་བྱ་བས་ན་དམ་ཚིག་གོ ། སེམས་ནི་རང་གིའོ། །ལུས་དང་ངག་གི་དང་ཉེས་པར་སྤྱོད་པ་དག་ཀུན་ནས་སློང་བ་ཉིད་ཀྱིས་དེ་དག་ལས་རྣམ་པ་སྣ་ཚོགས་པའི་གནོད་པ་གང་རྣམས་ལས་ཡིན་པ་དེ་རྣམས་ཀྱིས་སོ། །ཀུན་རྟོག་ངན་པ་ནི་བརྣབ་སེམས་ལ་སོགས་པ་རྣམས་ཏེ། དེ་རྣམས་ཀྱི་རྟོག་པའི་ཚོགས་རྣམས་ཀྱིས་སོ། །གདུག་པ་ཡང་དེ་ཡིན་ལ་རྩུབ་པ་ཡང་ཡིན་པ་ནི། གདུག་རྩུབ་བོ། རྩུབ་པའི་ངག་གདུག་པ་མ་ཡིན་པ་ཡོད་དེ། དཔེར་ན་བཅོམ་ལྡན་འདས་ཀྱིས་ལྷས་བྱིན་གྱི་དོར་འབངས་མཆིལ་མདོར་ཅིག་ཅེས་པ་ལྟ་བུའི་ངག་ཕན་པའི་རྒྱུ་ཁོ་ནའོ། །ཁྱད་པར་འདི་ཡང་ཉེ་བར་མཚོན་པ་ལྷུར་ལེན་པ་སྟེ་གཞན་ལ་ཡང་མི་གདུག་པ་ཉིད་རྟོགས་པའི་ཆེད་དུའོ། །དེ་ཡང་ཇི་ལྟ་བ་དེ་ལྟར་སྔར་སྲོག་ཆགས་ཞེས་པ་ལ་སོགས་པ་སྡོམ་པ་རྒྱས་པར་བསྟན་པས་བརྗོད་ཟིན་ཏོ། །སོགས་པས་བརྫུན་གྱི་ཚིག་གོ །རྣ་བའི་མི་བདེ་བྱེད་པ་ནི་ངག་འཁྱལ་པའོ། །དེ་ལྟར་ཉེས་པར་སྤྱོད་པ་གསུམ་ལས་ལྡོག་པའི་ཚུལ་ཁྲིམས་གསུངས་ཤིང༌། ཏིང་ངེ་འཛིན་དང་ཤེས་རབ་དག་ཀྱང་དབང་པོ་གཉིས་ཞེས་པ་ལ་སོགས་པས་དེ་མ་ཐག་ཏུ་བཤད་ཟིན་ཏོ། །དེ་ལྟར་ན་ཡང་འཁོར་བ་ཟད་པ་ལས་ཇི་སྐད་བཤད་པའི་མྱ་ངན་ལས་འདས་པ་ཁོ་ནའོ། །དེ་གསུངས་པ། ཚུལ་ཁྲིམས་ལ་ནི་གནས་ནས་མིས། །སེམས་དང་ཤེས་རབ་བསྒོམ་པར་བྱ། །སྡོམ་པ་ཡང་དག་བསྲུངས་པ་ནི། །མྱུར་དུ་སྡུག་བསྔལ་ཟད་པར་འགྲོ། །ཞེས་ཏེ། སེམས་ནི་ཏིང་ངེ་འཛིན་དང༌། ཤེས་རབ་ནི་སྟོང་པ་ཉིད་ཤེས་པའོ། །ཕྱག་རྒྱ་དང་ལྷན་ཅིག་སྟོང་པ་ཉིད་དང་རོ་གཅིག་པའི་བདེ་བ་ཆེན་པོ་ཉེ་བར་ལོངས་སྤྱོད་པ་ཁོ་ན་འདིའི་སྡོམ་པ་སྟེ། སྤྲོས་པ་ཐམས་ཅད་ལས་སྡོམ་པའི་ཕྱིར་རོ། །ཇི་སྐད་དུ་འདུས་པར་གསུངས་པ། རྟག་ཏུ་གཞན་གྱི་ནོར་འཕྲོག་ཅིང༌། །གསོད་པ་ཡང་ནི་རྨད་བྱུང་ཆེ། །འདོད་ཆགས་རྡོ་རྗེའི་གོ་འཕང་སྤྱོད། །འདི་ནི་སྡོམ་པས་བསྡམས་པའོ། །ཞེས་སོ། །གཞན་གྱི་ནོར་འཕྲོག་པ་ལ་སོགས་པའི་གསང་
ཆེན་ནི་སྔར་ཕྱེ་ཟིན་ཏོ། །ཚུལ་ཁྲིམས་ལ་སོགས་པ་གསུམ་པོ་འདི་ཁོ་ན་ལྷག་པའི་ཚུལ་ཁྲིམས་དང་ལྷག་པའི་ཤེས་རབ་སྟེ་བསླབ་པ་གསུམ་དང་ཕུང་པོ་གསུམ་མོ། །རྣམ་པར་གྲོལ་བའི་ཕུང་པོ་ཡང་རྡོ་རྗེ་འཛིན་པའི་སའི་དངོས་གཞིའི་སེམས་བསྐྱེད་པ་སྟེ། རྣམ་པར་གྲོལ་བ་ཤེས་པའི་ཕུང་པོ་ནི་རྗེས་ཀྱིའོ་ཞེས་པ་ལ་སོགས་པ་འདིར་གདུལ་བྱའི་འདོད་པ་སྣ་ཚོགས་ལས་རྣམ་པར་གཞག་གོ །ཐེག་པ་གཞན་དུ་ནི་མ་ཡིན་ཏེ། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞི་རྣམས་སུ་ཡང་ཆོས་འགའ་ཞིག་རྣམ་པར་གཞག་པ་གང་ཡོད་པ་ནི་རྒྱུ་དང་འབྲས་བུའི་གནས་སྐབས་ངག་ཏུ་བྱང་ཆུབ་ཀྱི་སེམས་རྡོ་རྗེ་བཅོམ་ལྡན་འདས་ཀྱི་ངོ་བོར་ནི་མ་ཡིན་ནོ་ཞེས་པ་སྟེ། རྒྱས་པས་ཅི་བྱ། དེ་ལྟར་འདིར་དང་སྔར་སྲོག་ཆགས་ཞེས་པ་ལ་སོགས་པས་ཤེས་རབ་ཀྱི་ཆགས་པས་ཞུ་བའི་དགའ་བ་བཅུ་དྲུག་གི་ཐིག་ལེ་རོ་གཅིག་ཏུ་གྱུར་པ་རྣམས་རྡོ་རྗེ་ནོར་བུར་རབ་ཏུ་ཞུགས་པ། ཚངས་པར་སྤྱོད་པ་དེ་བཞིན་ཞལ། །ཞེས་གསུངས་པའི་ཕྱིར། མ་འཕོས་པའི་ཚུལ་ཁྲིམས་ཀྱི་རང་བཞིན་དུ་བྱེད་པ། རྡོ་རྗེ་ནོར་བུ་ལས་སྟེང་དུ་གསང་བ་དང་ལྟེ་བ་དང་སྙིང་ག་དང་མགྲིན་པ་དང་དཔྲལ་བའི་ལྟེ་བར་འདྲེན་པ་ཡང་བསྲུང་བར་བྱ་བའི་དམ་ཚིག་ཏུ་གསུངས་སོ། །བཟའ་བར་བྱ་བ་བརྗོད་པ་གསུངས་པ། ཤ་ཞེས་པ་ལ་སོགས་པའོ། །ཆེ་མཆོག་ནི་རྡོ་རྗེ་སེམས་དཔའ་སྟེ་དེ་ལས་སྐྱེས་པའོ། །མི་བསྐྱོད་པ་གནས་པའི་སྦྱོར་བ་མི་བསྐྱོད་པ་གནས་པ་རྐང་ངོ༌། །འདྲེས་པ་འབབ་ལ་སྟེ་ཡན་ལག་ལ་རུས་པའོ་ཞེས་འབྲེལ་ལོ། །ཆོ་ག་ལས་ཞེས་པ་སྔ་མར་ཡང་ཤེས་པར་བྱ་སྟེ། ཆོ་ག་ནི་ཤ་ལ་སོགས་པ་རྣམས་དེ་བཞིན་གཤེགས་པར་དེའི་བདག་ཉིད་དུ་མོས་པའོ། །གང་ཁམས་ཁ་ཅིག་ལ་དེ་བཞིན་གཤེགས་པ་ཁྲག་འཁྲུགས་སུ་འགའ་ཞིག་ཏུ་བརྗོད་པ་དེ་ནི་དེ་བཞིན་གཤེགས་པ་རྣམས་ཕན་ཚུན་དུ་དོན་དམ་པར་དབྱེ་བ་དང་བྲལ་བ་ཉིད་དུ་དགོངས་པས་སོ། །དེ་ལ་ཤ་ཡིས་པགས་པ་བསྡུས་ཤིང༌། ཁྲག་གིས་རོ་དང་རྩ་འཆིང་བས་ཁུ་བའོ་ཞེས་ཁམས་བདུན་གྱི་རང་བཞིན་གྱི་ལུས་ལྷའི་བདག་ཉིད་དུ་བཤད་པ་ནི། རྣམ་པར་དག་པའི་ལུས་དང་འབྲེལ་པ་ལས། གོ་ཀུ་ད་ཧ་ནའི་སྒྲོན་མ་རྣམས་རྣམ་པར་དག་པའི་དོན་དུ་སྟེ། རྣམ་པ་གཞན་དུ་མ་དམ་ཚིག་གི་སྐབས་སུ་ཁམས་རྣམ་པར་དག་
པའི་རྣམ་པ་ཅི་ལྟར་ཡིན། སྔར་རྟོགས་པར་བྱས་པ་རྣམས་འདིར་སྐབས་ཀྱིས་རྟོགས་པའོ་ཞེས་རང་གི་མིང་གིས་མ་བརྗོད་པའོ་ཞེས་མན་ངག་རིག་པ་རྣམས་སོ། །དེ་ཉིད་ཀྱི་ཕྱིར་གསུངས་པ། ཡེ་ཤེས་ལ་མཁས་ཞེས་པ་ཡེ་ཤེས་ལ་མཁས་པ་གཉིས་སུ་མེད་པའི་ཡེ་ཤེས་རྟོགས་པ་དེ་བཞིན་གཤེགས་པ་རྣམས་ཀྱིས་གསང་བ་གསང་ཆེན་དམ་ཚིག་གོ །བསྟེན་བྱ་ནི་བཟའ་བར་བྱ་བའི་དམ་ཚིག་རྣམས་སོ། །བསྒོམ་བྱ་ནི་དེ་བཞིན་གཤེགས་པ་རྣམ་པར་དག་པར་རོ། །བྱང་ཆུབ་སེམས་རྡོ་རྗེའི་རང་བཞིན་གྱི་རྣལ་འབྱོར་པ་བློ་ལྡན་གྱིས་ནི་རྣམ་པར་དག་པར་ལྷག་པར་མོས་པར་མཁས་པས་སོ། །སྲེད་པ་ནི་འདིར་ཚོར་བ་སྟེ་རྒྱུ་ལ་འབྲས་བུ་ཉེ་བར་བརྟགས་པ་ལས་སོ། །འདུ་བྱེད་ཀྱང་འདི་ཡིན་པ་འཕེལ་བ་ཡང་སྟེ། སྤྲུལ་པ་སྣ་ཚོགས་རྣམས་ཀྱིས་བྱ་བ་རྗེས་སུ་བསྒྲུབ་པའི་ཕྱིར་རོ། །འདོད་ཆགས་ལ་སོགས་པ་འདི་རྣམས་སངས་རྒྱས་རྣམས་སུ་དང་བཤད་པ་ལ་སོགས་པ་བདུད་རྩི་ལྔ་རྣམས་དམ་ཚིག་རྣམས་སུ་གསུངས་ཏེ། དེ་བཞིན་གཤེགས་པ་ལྔའི་རང་བཞིན་དུ་མོས་པར་བྱ་བ་རྣམས་སོ་ཞེས་པའི་དོན་ཏོ། །སྲེད་པ་ནི་ང་རྒྱལ་ཉེ་བར་མཚོན་པ་སྟེ། འདུ་བྱེད་ནི་ཕྲག་དོག་ལ་སོགས་པའོ། །འདོད་ཆགས་ལ་སོགས་པ་སྤོང་བ་ཁོ་ན་བདུད་རྩི་ལྔ་བཟའ་བའི་ངེས་པའི་དོན་ཏོ་ཞེས་དགོངས་པའོ། །དེ་སྐད་དུ་ཡང་རྣལ་འབྱོར་མ་བཞི་ཡང་དག་པར་སྦྱོར་བའི་རྒྱུད་དུ་གསུངས་པ། ཁུ་བ་ཁྲག་དང་དེ་བཞིན་ཤ །བཤད་དང་ལྔ་པ་གཅི་བ་ནི། །རྣམ་རྟོག་མེད་པས་བཟའ་བྱ་སྟེ། །རང་བཞིན་མེད་པས་བློ་ལྡན་གྱིས། །རྨོངས་ཆ་དེ་བཞིན་ང་རྒྱལ་དང༌། །ཞེ་སྡང་དེ་བཞིན་འདོད་ཆགས་ཉིད། །ཕྲག་དོག་སེར་སྣ་ཕྲ་མ་སྟེ། །དམ་ཚིག་དྲི་མེད་བསྟེན་པར་བྱ། །ཞེས་སོ། །དེ་རྣམས་ཁོ་ན་ཡོངས་སུ་འཛག་གོ་ཞེས་པས་ཡོངས་སུ་འཛག་པའོ། །ས་དང་ཆུ་དང་མེ་དང་རླུང་རྒྱུ་དང་རྐྱེན་རྣམས་ལས་འབྱུང་བ་བཞི་རྣམས་ཀྱིས་ཡོངས་སུ་གཟུང་བར་བྱ་བ་སྟེ། ནུར་ནུར་པོའི་གནས་སྐབས་ནས་བརྩམས་ནས་ཇི་ལྟར་རིགས་པར་དེ་ལས་བྱུང་བ་ཉིད་ཀྱི་ཕྱིར་དང༌། སྒྲོན་མ་དང་བཤད་པ་ལ་སོགས་པ་རྣམས་དེའི་རང་བཞིན་ཉིད་ཀྱི་ཕྱིར་རོ། །འདི་རྣམས་ཀྱང་ནང་དུ་འདུས་པར་བཤད་པས་སྤྱན་མ་ལ་སོགས་པའི་རྣམ་པར་དག་པ་ཡང་བསྒྲུབས་སོ། །དེ་ཉིད་ཀྱི་ཕྱིར་
བདུད་རྩིའི་བསམ་གཏན་གྱི་ཆོ་ག་ལ་སྤྱན་མ་ལ་སོགས་པ་རྣམས་ཀྱི་ཡང་ས་བོན་རྣམས་སོ། །རྫོགས་པའི་བློ་སྟེ་བྱང་ཆུབ་ཀྱི་སེམས་བཅོམ་ལྡན་འདས་བསྒོམ་པ་གང་རྣམས་ཀྱི་ཡིན་པ་དེ་རྣམས་དེ་སྐད་དེ། དེ་རྣམས་ཀྱིས་སོ། །བཟའ་བ་ནི་བཟའ་བྱ་སྟེ། དེའི་དོན་དུ་འབྱུང་བ་རྩོལ་བ་མེད་པར་འདུ་བ་གང་རྣམས་ཀྱི་ཡིན་པ་ཟན་དང་བྱ་ན་ལ་སོགས་པ་དེ་རྣམས་ཀྱང་བསྟེན་པར་བྱ་ཞེས་རྟགས་བསྒྱུར་བས་སྦྲེལ་ལོ། །དོན་འདི་སྟེ། བསྐྱེད་པའི་རིམ་པ་བསྒོམ་པ་དང་པོ་པས། བདུད་རྩི་ལྔ་དང་སྒྲོན་མ་ལྔ། །ཞེས་པ་གཉིས་ནག་པོའི་བརྒྱད་པའམ་བཅུ་བཞི་པ་ལ་རིལ་བུ་བྱས་ཏེ་གྲིབ་མ་ལ་སྐམས་པ་པདྨའི་སྣོད་ཁ་སྦྱོར་དུ་བཞག་ནས། ཆོ་ག་ཇི་ལྟ་བར་བདུད་རྩིར་བྱས་ཏེ། ཉིན་ཞག་སོ་སོར་རེ་རེར་བཟའ་བར་བྱའོ། །ཇི་ལྟར་རྙེད་པའི་འདི་གཉིས་དང་མྱོས་བྱེད་ཀྱང་བྱ་ན་སོགས་བཞིན་དུ་ཡོངས་སུ་བཟའོ། །འདི་ནི་རྫོགས་པའི་རིམ་པ་ལ་གནས་པས་ཀྱང་སྟེ། འོན་ཀྱང་འདི་རང་བཞིན་ཡོངས་སུ་དག་པ་ཁོ་ནར་དམིགས་པས་ཏེ། ཅེ་སྤྱང་བཞིན་དུ་ནི་མ་ཡིན་ནོ། །གཞན་ཡང་བཤད་པ་ལ་སོགས་པ་རྣམས་ཡུལ་ལྔ་རྣམས་སུ་ངེས་པའི་ཚིག་གིས་དགོངས་ཏེ་དེ་རྣམས་ཀྱིས་ཕྱག་རྒྱ་དང་ལྷན་ཅིག་དགའ་བ་ཐམས་ཅད་སྤྱད་པར་བྱའོ། །གཞན་ཡང་དགོངས་པའི་སྐད་ཀྱིས་གོ་ཀུ་ད་ཧ་ན་རྣམས་དང་སྦྲང་བུ་སྐྱུགས་པ་ནི་རིམ་པ་ཇི་ལྟ་བར་མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་དེ་བརྗོད་ཟིན་པ་ཞེས་བཟའ་བར་བྱ་ཞིང༌། དེ་རྣམས་མེད་པ་ལས་དེའི་ཡུལ་རྣམས་དང་དེའི་རྣམ་པར་ཤེས་པ་རྣམས་ཀྱང་ངོ་ཞེས་པ་ཁམས་བཅོ་བརྒྱད་རྣམས་བཟའ་བྱ་སྟེ། སྟོང་པ་ཉིད་ཁོ་ནས་སོ། །དེ་ལྟར་ན་ཡང་སྒྲོ་བཏགས་པས་ཐམས་ཅད་ལས་ལོག་པའི་ཤེས་རབ་དང་ཐབས་ཕྱག་རྒྱ་ཆེན་པོའི་བདག་ཉིད་ཀྱི་དེ་ཁོ་ན་ཉིད་ཅན་གྱི་རྣལ་འབྱོར་པ་འདི། ཇི་སྐད་བཤད་པའི་དམ་ཚིག་དང་སྡོམ་པའི་རང་བཞིན་ཁོ་ནར་རིག་པར་བྱའོ། །དེ་ལྟར་ཡང་བཅུ་དགུ་པར་གསུངས་པའི་འགལ་བརྗོད་པས་གསོད་པ་དང་འཕྲོག་པ་དང་བསྟེན་པ་དང་བརྫུན་གྱི་ཚིག་རྣམས་ཀྱིས་སྡོམ་པ་ཐམས་ཅད་ཀྱི་ངོ་བོའོ། །དངོས་པོ་ཐམས་ཅད་ཀྱི་རང་བཞིན་ཉིད་ཀྱིས་དེ་ཁོ་ན་ཉིད་ཀྱི་རྣལ་འབྱོར་པའི་རྣམ་པར་སྣང་མཛད་ལ་
སོགས་པའི་རྫས་རྣམས་ཆོས་སྐུའི་བདག་ཉིད་རང་གི་ལུས་ཀྱི་ནང་དུ་འདུས་པ་ལས། དེར་བྱིན་གྱིས་རློབ་པའི་ཞེས་པ་དམ་ཚིག་ཐམས་ཅད་ཀྱི་རང་བཞིན་ནོ། །དེའི་ཕྱིར། དངོས་པོ་ཀུན་གྱི་རང་བཞིན་བདག །ཇི་ལྟར་འདོད་པར་རང་མཆོད་དེ། །ཡུལ་འདུས་རྣམས་ཀྱིས་རྣལ་འབྱོར་པས། །རང་བཞིན་མེད་པའི་དབང་ལས་སོ། །དོན་དམ་པར་གཅིག་ཏུ་མཐར་ཐུག་པ་འདི་ནི་གར་ཡང་འཇུག་པ་དང་ལྡོག་པ་མ་ཡིན་ནོ། །དེ་ལྟར་ནི་དམ་ཚིག་སྤྱོད་པ་རྣམས་མི་སྨྲ་བར་གྱུར་པའི་མཐར་ཐུག་པ་ཉིད་དུ་བསྟན་པའི་ཆེད་དུ་དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོ། །རྡོ་རྗེ་འཛིན་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་སྙིང་པོ་རྡོ་རྗེ་མཉམ་པ་ཉིད་རྣམ་པར་བསམས་ནས་ཅང་མི་གསུང་བར་གྱུར་ཏོ་ཞེས་སོ། །དེ་ལྟར་དོན་ཆེན་པོའི་རྒྱུད་བསྟན་པ་ཡོངས་སུ་རྫོགས་པར་གསུངས་པ་ཇི་ལྟར་ཤེས་པ་ལ་སོགས་པ། ཇི་ལྟར་བུད་མེད་རྣམས་དང་བྱིས་པ་བླང་བྱ་དང་དོར་བྱ་མངོན་པར་མི་ཤེས་པའི་སྐྱེས་བུ་རྣམས་ཀྱི་དགའ་རྩེད་སྣ་ཚོགས་པའི་གཏམ་གྱིས་སྐྱེ་བ་སྔ་མར་གོམས་པ་ལས་རྗེས་སུ་ཡི་རང་བ་ནི་རྗེས་སུ་ཡི་རང་བ་རྣམས་ཏེ། འདི་ལྟ་འདི་ལྟར་བདག་གིས་བྱའོ་ཞེས་སིམ་པ་དང་བཅས་བར་མངོན་པར་དགའ་བ་སྐྱེ་བར་འགྱུར་རོ་ཞེས་ཅི་ཞིག་ལྟར་རྟོགས་ནས་མཛའ་བོས་དེ་རྣམས་འདུ་བ་དང་རྗེས་སུ་མཐུན་པར་ཀུན་དུ་སྨྲ་བ་དགའ་རྩེད་ཀྱི་བྱེ་བྲག་དང་རྗེས་ཀྱི་གནས་སྐབས་སུ་ཉམས་སུ་མྱོང་བའི་དོན་གཏམ་པ་ཡང་འདུས་སྨྲ་འདུ་བའི་གཏམ་རྣམས་བརྗོད་དུ་གཞུག་པ་སྟེ། འདུ་བའི་ཆེད་དུ་མངག་གཞུག་པ་རྣམས་ལ་འདི་རྣམས་ལ་འདི་སྐད་སྨྲོས་ཤིག །དེ་ལས་འགྲོགས་པ་ན་དགའ་རྩེད་ཀྱི་བདེ་བ་སྐྱེ་བར་འགྱུར། གང་གིས་དེ་འདྲ་བའི་དགའ་རྩེད་ཀྱི་རོལ་པར་འགྱུར་པ་ཉམས་སུ་མྱོང་བའི་དོན་མ་སྨྲས་པར་གནས་པའི་ཆེད་དུ་འབྲོས་སུམ་འཇུག་ཅིག་ཅེས་མཛའ་བོས་སྨྲས་པའོ་ཞེས་པའི་དོན་ཏོ། །འདུ་བའི་གནས་སུ་འཇུག་པའི་ཆེད་དུ་ལམ་ཡང་ཐོབ་པ་ན། མི་མཐུན་ཕྱོགས་མེད་པ་ཉིད་ཀྱིས་འཆིང་བ་མེད་པའང་བརྗོད་དུ་གཞུག་པའོ། །རྣམ་པ་འདི་ལྟའི་རྣམ་པ་གང་དུ་ཡིན་པ་དེ་ནི་འདི་ལྟའི་རྣམ་པའོ། །རྣལ་
འབྱོར་བའི་སྟེ་རྣལ་འབྱོར་པ་རྣམས་ཀྱི་ལམ་བསྟན་པ་སྟེ། དེ་རྣམས་ནི་སྐྱེ་བ་བརྒྱུད་པར་འདྲིས་པས་ཉེ་བར་རྒྱས་པའི་རིགས་ཆེན་པོ་ཕུན་སུམ་ཚོགས་པ་དེ་ཉིད་ལ་ཤེས་རབ་དང་ཐབས་བདེ་བ་ཆེན་པོ་སྣ་ཚོགས་པ་སྟོན་པས་འདོད་པ་རྒྱས་པ་དང་བཅས་པའི་དང་བའི་གཞན་དབང་ཉིད་སྐྱེ་བར་འགྱུར་རོ་ཞེས་རིག་ནས། བདག་རྡོ་རྗེ་སེམས་དཔའ་དེའི་བདེ་བའི་གོ་འཕང་ཐོབ་པའི་ཆེད་དུ། རྒྱུའི་གནས་སྐབས་སུ་ཚོགས་གཉིས་ཡོངས་སུ་རྫོགས་པའི་དོན་དུ་གདུལ་བྱ་རྣམས་ལ་སྐལ་པ་ཇི་ལྟ་བར་ཆོས་སྟོན་པ་ལས་སོགས་པ་བྱའོ། །དེ་ནས་འབྲས་བུའི་རྒྱུད་ཀྱི་གནས་སྐབས་སུ་བླ་ན་མེད་པའི་ཤེས་རབ་དང་ཐབས་རོ་གཅིག་པ་བདེ་བ་ཆེན་པོའི་རང་བཞིན་གྱི་སྐུ་སྐྱེ་བར་འགྱུར་ཞིང༌། དེ་བཞིན་དུ་ཇི་ལྟར་ཉམས་སུ་མྱོང་བའི་དེ་ཁོ་ན་རྒྱུའི་གནས་སྐབས་དང་བཅས་པ་ལྟར་མི་ཉུང་བའི་བསྐལ་པ་བརྒྱུད་པ་རྣམས་སུ་ངེས་པར་སྟོན་ཅིག་ཅེས་པ་བརྗོད་དུ་འཇུག་པའོ། །ལམ་ཡང་ཡན་ལག་དང་བཅས་པའི་ཐབས་ཀྱི་རྒྱུད་ཀྱིས་ཡོངས་སུ་བསྐོར་བའི་རྒྱུད་ཀྱི་ངོ་བོ་རྒྱས་པ་དང་བཅས་པར་གསལ་བར་བྱས་ཟིན་ཏོ། །ལམ་རྟོགས་པའི་རིམ་པ་ལས་རིམ་གྱིས་སྒྲིབ་པ་གཉིས་སྤངས་པ་ན། འབྲས་བུའི་རྒྱུད་རྟོགས་པ་ལ་ནི་བག་ཆགས་དང་བཅས་པ་དྲུང་ཕྱུང་བའི་ཕྱིར་འཆིང་བ་དང་བྲལ་བ་ཡང་ངོ༌། །རྒྱུད་ཀྱི་དོན་མཐའ་དག་པོ་འདི་ཇི་ལྟར་རིགས་པར་སྒྲུབ་པ་ཁྱེད་རྣམས་ཀྱིས་བྱ་ཞིང་བྱེད་དུ་གཞུག་པར་བྱའོ་ཞེས་དགོངས་པའོ། །དེས་ན་མ་འོངས་པའི་གདུལ་བྱ་སྤྲོ་བར་བྱ་བར་དགོངས་པས་མཆོག་གི་ཐུགས་རྗེའི་གཞན་དབང་ལས་འཁོར་རྣམས་སྤྲོ་བར་བྱེད་པ་འདི་གསུངས་པའོ། །དེ་ལྟར་ནི་རྒྱུད་ཐམས་ཅད་ཀྱི་མཐའ་རུ་རྣམ་པ་འདི་ལྟ་བུའི་དགོངས་པ་མངོན་པར་བརྗོད་པར་བྱའོ་ཞེས་དགོངས་པས། འདུས་པར་གསུངས་པ། བཅོམ་ལྡན་འདས་དེ་བཞིན་གཤེགས་པ་རྣམས་ཐམས་ཅད་སངས་རྒྱས་ཐམས་ཅད་མཉམ་པ་ཉིད་མཐོང་ངམ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཡེ་ཤེས་ཀྱི་སྤྱོད་པ་མཐོང་ལགས་སོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་རྣམས་འཇིག་རྟེན་གྱི་ཁམས་ཐམས་ཅད་དུ་དེ་བཞིན་གཤེགས་པ་ཐམས་
ཅད་ཀྱི་སྐུ་དང་གསུང་དང་ཐུགས་རྡོ་རྗེ་འདི་འགྲོ་བ་གྱིས་ཤིག །དེ་ཅིའི་ཕྱིར་ཞེ་ན། ཕྱོགས་བཅུ་ན་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཆོས་ཀྱི་རྣམ་གྲངས་འདིའི་སྐལ་པ་ཅན་གྱི་ཕྱིར་རོ་ཞེས་སོ། །དེ་ལྟར་གླེང་གཞི་དང་བཅས་པའི་རྒྱུད་སྡུད་པ་པོས་བསྡུས་ནས་འདི་དག་གཅིག་ཉིད་དུ་སྟོན་ཞིང་ཡོངས་སུ་རྫོགས་པར་གསུངས་པ། དེ་ནས་ཞེས་པ་ལ་སོགས་པ་སྟེ། དངོས་པོར་ན་ཆོས་རྣམས་ཐམས་ཅད་རང་བཞིན་མེད་པ་ཉིད་ཀྱི་ཕྱིར་དག་དང་ཡིད་ཀྱི་སྤྱོད་ཡུལ་མ་ཡིན་པ་ཉིད་ཀྱི་མཐར་ཐུག་པ་ཉིད་དུ་གསལ་བར་བྱ་བའི་དོན་དུ་དེ་སྐད་ཅེས་བཀའ་སྩལ་པ་དང་ཞེས་མ་གསུངས་པའོ། །རྒྱུད་ཀྱི་ལྷག་པའི་རྒྱལ་པོ་སྟོན་པའི་དུས་སུ་ཁད་པ་བརྩེགས་པའི་ནང་དང་ཕྱི་རོལ་དུའང་འཁོར་ཐམས་ཅད་དེ། རྣལ་འབྱོར་པ་རྣམས་ནི་ཐོད་པའི་དུམ་བུ་ལ་སོགས་པ་རྣམས་སོ། །རྣལ་འབྱོར་མ་རྣམས་ནི་རྡོ་རྗེ་ཕག་མོ་དང་རབ་ཏུ་གཏུམ་མོ་ལ་སོགས་པ་རྣམས་སོ། །མཁའ་འགྲོ་རྣམས་ནི་སངས་རྒྱས་མཁའ་འགྲོ་ལ་སོགས་པ་རྣམས་སོ། །མཁའ་འགྲོ་མ་རྣམས་ནི་སངས་རྒྱས་མཁའ་འགྲོ་མ་དང་རྡོ་རྗེ་མཁའ་འགྲོ་མ་དང་འཇིབ་བྱེད་མ་ལ་སོགས་པ་རྣམས་སོ། །དེ་བཞིན་གཤེགས་པ་རྣམས་ནི་རྣམ་པར་སྣང་མཛད་ལ་སོགས་པ་རྣམས་སོ། །རྣམ་པ་དུ་མ་ནི་སྣ་ཚོགས་པའི་ཁ་དོག་དང་དབྱིབས་དང་རྒྱན་དང་ཞལ་དང་ཕྱག་དང་མཚོན་ཆ་ལ་སོགས་པ་རབ་ཏུ་དབྱེ་བ་མང་པོ་རྣམས་དང་ལྡན་པ་རྣམས་སོ། །ཆོས་སྟོན་པ་བླ་ན་མེད་པ་ཉན་པའི་དགའ་སྟོན་ལས་མཆོག་ཏུ་དགའ་བས་བདེ་བར་འགྱུར་བའི་སེམས་དང་ལྡན་པ་རྣམས་ཏེ། ནི་ནི་ཁྱད་པར་ལ་སྟེ། ཕུལ་དུ་དབྱུང་དུ་མེད་པའི་དགའ་བ་དང་བདེ་བ་བསྐྱེད་པའི་ཕྱིར་རོ། །དེ་བཞིན་གཤེགས་པ་རྣམས་ཐམས་ཅད་ཀྱི་ཡེ་ཤེས་ནི་སྒྲིབ་པ་བག་ཆགས་དང་བཅས་པ་རྩད་ནས་ཕྱུང་བ་སྟོང་པ་ཉིད་དང་སྙིང་རྗེའི་རང་བཞིན་བདེ་བ་ཆེན་པོར་རོ་གཅིག་པ་མེ་ལོང་ཡེ་ཤེས་ལ་སོགས་པའི་རང་བཞིན་སྟོབས་དང་མངོན་པར་ཤེས་པ་དང་སངས་རྒྱས་ཀྱི་ཆོས་མ་འདྲེས་པའི་རྣམ་པ་མ་ལུས་པས་ཡོངས་སུ་བསྐོར་བ་རྟོགས་པར་འགྱུར་བ་རྣམས་ཏེ། ཐམས་ཅད་དུ་ཞེས་པ་རྟོགས་པར་བྱ་བའི་རང་བཞིན་
ཐམས་ཅད་རྟོགས་པའི་ཕྱིར་རོ། །བྱེ་བ་ཕྲག་བརྒྱད་ཅུའི་ནང་དུ་གཏོགས་ན་ཡང༌། རྡོ་རྗེ་སྙིང་པོ་ནི་སྡུད་པ་པོ་ཉིད་ཀྱིས་དང༌། སའི་སྙིང་པོ་དང་ཕྱག་ན་རྡོ་རྗེ་ལ་སོགས་པ་རྣམས་ནི་མིག་ལ་སོགས་པ་ཡོངས་སུ་དག་པར་བྱེད་པ་ཉིད་ཀྱིས་ན་གཙོ་བོ་ཉིད་ཀྱི་ཕྱིར་སླར་ཡང་གསུངས་སོ། །འདི་རྣམས་ཐམས་ཅད་འཇིག་རྟེན་ལས་འདས་པའི་འཁོར་རོ། །ལྷ་ལ་སོགས་པ་རྣམས་འཇིག་རྟེན་པའོ། །ཐམས་ཅད་དེ་གཤིན་རྗེ་དང་ཆུ་ལྷ་དང་རླུང་ལྷ་དང་ཐགས་བཟངས་རིས་དང་བདེན་བྲལ་དང་ནམ་མཁའ་ལྡིང་དང་མིའམ་ཅི་ལ་སོགས་པ་རྣམ་པ་འདི་ལ་ཡོད་དོ་ཞེས་པ་ཐམས་ཅད་དང་ལྡན་པའོ། །ཨཱ་ཡིག་ནི་འདིར་ངེས་པའི་ཚིག་གོ །ཅི་འཁོར་རྣམས་ཐམས་ཅད་ཀྱིས་བཅོམ་ལྡན་འདས་ཀྱི་ལོངས་སྤྱོད་རྫོགས་པའི་སྐུ་དང་སྤྲུལ་པའི་སྐུ་མཐོང་ངམ་ཞེ་ན། མ་ཡིན་ཏེ་ཁ་ཅིག་ཁོ་ནས་མཐོང་ངོ༌། །ཁ་ཅིག་རྣམས་ཀྱིས་སྤྲུལ་པའི་སྐུ་ཁོ་ནའོ། །ཆོས་སྟོན་པ་ནི་ཐམས་ཅད་ཀྱིས་ཐོས་པ་ཁོ་ནའོ། །དེ་ཉིད་ཀྱི་ཕྱིར་ཐམས་ཅད་གསུངས་པ་ལ་མངོན་པར་དགའ་སྟེ། རྒྱུད་ཀྱི་དོན་རྣམས་ལ་དོགས་པ་མེད་པ་ཉིད་ཀྱིས་ན་རྒྱུད་ཀྱི་རྒྱལ་པོ་འདི་ནི་ལེགས་པར་གསུངས་པའོ་ཞེས་པ་ལ་སོགས་པ་བསྟོད་པ་རྣམས་ཀྱིས་མངོན་པར་དགའ་བར་གྱུར་པའོ། །དཔལ་ཡང་དག་པར་སྦྱོར་བ་ལས་བྱུང་བ་དང་རྒྱུད་ཐམས་ཅད་ཀྱི་གླེང་གཞི་དང་བརྟག་པའི་རྒྱལ་པོ་ཆེན་པོ་ཡང་བཅོམ་ལྡན་འདས་ཏེ། དེ་བརྗོད་པའི་གཞུང་ཡང་དཔལ་ཡང་དག་སྦྱོར་བ་ལས་བྱུང་བ་རྒྱུད་ཐམས་ཅད་ཀྱི་གླེང་གཞི་བརྟག་པའི་རྒྱལ་པོ་ཆེན་པོ་ཡིན་ཞིང་ཡང་གང་པར་རྟོགས་སོ་ཞེས་པའོ། །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱ་ཆེར་འགྲེལ་པ། མན་ངག་གི་སྙེ་མར་སྙེ་མ་བཞི་བཅུ་པའོ།། །།རྣལ་འབྱོར་མ་དང་རྣལ་འབྱོར་རྒྱུད་རྣམས་ལ། །གཞན་པ་རྣམས་ཀྱིས་འགྲེལ་བྱས་ཡོད་མོད་ཀྱི། །རབ་ཕྱེ་མ་ཡིན་ཁོ་བོས་བྱས་པ་ནི། །ཉམས་བཅུད་བཟང་ངན་སྲོག་བཅས་མཆོག་ཡིན་ནོ། །རྒྱུད་གཞན་ཐམས་ཅད་རྣམས་ཀྱི་གསང་ཆེན་འདིར་ནི་བླ་མར་བསྙེན་བཀུར་བ། །བྱས་པ་ཁོ་བོས་འགྲེལ་པས་མཆོག་ཏུ་རྣམ་པར་ཕྱེའོ་མང་མཁྱེན་པའི། །སྐྱེ་བོ་དམ་པ་རྣམས་ཀྱིས་སྒྱུ་རྩལ་མཛོད་ཅིག་བླ་མ་དམ་པ་ནི། །
བདུད་རྩིའི་འོད་ཅན་ལས་འདིར་བདུད་རྩི་སྐལ་ལྡན་སུ་ཡང་འཐུང་བར་བྱེད། །བླ་མེད་བླ་མ་རིང་དུ་གནས་ལས་བདག་ལ་འདིར། །རྒྱུད་ཀྱི་གསང་ཆེན་ངེས་སྦས་རིག་པ་གསལ་བར་གྱུར། །མཁའ་ཡི་ནོར་བུའི་མཐུ་ལས་འོག་ཏུ་པདྨ་ཡི། །འདབ་མ་སྦྱར་བའི་སྙིང་པོ་རྣམ་རྒྱས་མ་མཐོང་ངམ། །མན་ངག་དཔག་བསམ་ལྗོན་པའི་སྙེ་མ་འཇིགས་མེད་ཀྱིས། །བསྐྲུན་པ་རྣམས་ཀྱིས་འབྲས་བུ་དམ་པ་འཇིག་རྟེན་འདས་པའི་དཔལ། །སྐལ་ལྡན་རྣམས་ཀྱིས་རྫོགས་པའི་བྱང་ཆུབ་རོ་བཅུད་ཀྱི། །དགའ་སྟོན་རྣམས་ཀྱིས་ཡང་དག་འཕེལ་བྱས་གཟུང་བར་མཛོད། །ལེགས་བྱས་བདུད་རྩི་རྣམས་ཀྱིས་འགྲེལ་པ་སྙེ་མ་འདི་ནི་ཕྱོགས་དང་ཕྱོགས་སུ་ཡུན་རིང་དུ། །འཁོར་བའི་ངལ་བཞི་བྱེད་འགྲོ་བ་གསུམ་གྱི་ལོངས་སྤྱོད་བདེ་དཔལ་ཆེན་དུ་གནས་གྱུར་ཅིག །བདག་ནི་ཤེས་རབ་ཐབས་དང་བདེ་ཆེན་གཉིས་མེད་རང་བཞིན་གནས་པ་ཆེས་ཆེ་རྣམས་ཀྱི་སྐུར། །གྱུར་ཅིག་འདི་ལས་སྣ་ཚོགས་སྤྲུལ་པའི་རོ་བཅུད་རྣམས་ཀྱིས་འདི་ཡི་དགའ་སྟོན་རྒྱས་བྱེད་ཤོག །དཔལ་ཡང་དག་པར་སྦྱོར་བའི་རྒྱུད་ཀྱི་རྒྱལ་པོའི་འགྲེལ་པ་མན་ངག་གི་སྙེ་མ་མཁས་པ་ཆེན་པོ་འཇིགས་མེད་འབྱུང་གནས་སྦས་པས་མཛད་པ་རྫོགས་སོ།། །།རྣམ་གནོན་ཚུལ་མཁས་འཇིགས་མེད་ཀྱིས། །གནད་ལ་རེག་པའི་ཚིག་འདི་ནི། །དགའ་བ་སྐྱོང་གིས་རྒྱལ་སྲིད་ལོ། །སུམ་ཅུ་རྩ་བདུན་པ་ལ་བྱས། །ཡུལ་དབུས་ཀྱི་མཁས་པ་ཆེན་པོ་དེ་ཉིད་དང༌། མང་དུ་ཐོས་པའི་བསོད་སྙོམས་པ་སངས་རྒྱས་གྲགས་པས་ན་ལེ་ནྡྲར་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།ཡང་སླད་ནས་མ་ཧཱ་པཎྜི་ཏ་ཤཱཀྱ་ཤྲཱི་དང༌། དཔྱལ་ལོ་ཙཱ་བ་ཆོས་ཀྱི་བཟང་པོས་ཡུལ་དབུས་ཀྱི་དཔེ་དང་བསྟུན་ནས་བཅོས་ཤིང་བསྒྱུར་ཏེ་ཞུ་ཏིག་དག་པར་བགྱིས་སོ། །སླར་ཡང་བླ་མ་དམ་པ་རྣམས་ཀྱི་བཀའ་དྲིན་དང་སྦྱིན་བདག་རྣམས་ཀྱིས་མཐུན་རྐྱེན་བསྒྲུབས་པ་ལས་བརྟེན་ནས་ལེགས་པར་སྦྱར་བ་བརྡ་སྤྲོད་པའི་ཚུལ་ལ་བློའི་སྣང་བ་ཅུང་ཟད་སྐྱེས་པ་དཔང་ལོ་ཙཱ་བ་དགེ་སློང་དཔལ་ལྡན་བློ་གྲོས་བརྟན་པས། རྒྱ་གར་གྱི་དཔེ་གཉིས་ལ་གཏུགས་ཏེ། འདིའི་སྔ་འགྱུར་མ་དག་པ་གཟིགས་པའི་དགེ་བའི་བཤེས་གཉེན་སྡེ་སྣོད་འཛིན་པ་མང་པོའི་གསུང་གིས་བསྐུལ་ནས། བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།