དགའ་བའི་སྤྱན་ཞེས་བྱ་བའི་རྒྱ་ཆེར་འགྲེལ་པ།
ཤེས་རབ་གསང་བའི་ཞབས་ཀྱིས་མཛད།
༄༅༅།། །།རྒྱ་གར་སྐད་དུ། ཨཱ་ནནད་ཙཀྴུ་ནཱ་མ་ཊཱི་ཀཱ། བོད་སྐད་དུ། དགའ་བའི་སྤྱན་ཞེས་བྱ་བའི་རྒྱ་ཆེར་འགྲེལ་པ། དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ། །རྣལ་འབྱོར་མ་ཡི་རྒྱུད་རྒྱལ་ཀུན། །རྒྱལ་དབང་རྨད་བྱུང་རྨད་དུ་བྱང༌། །དེ་ཉིད་རྒྱ་མཚོ་དཔལ་ཐིག་ལེ། །གང་གསུང་དེ་ལ་ཕྱག་འཚལ་ལོ། །དེ་ནས་གསང་བ་བཤད་བྱ་བ། །ཞེས་བྱ་བ་ཚིགས་སུ་བཅད་པ་དེའི་དོན་ནི་དང་པོ་རྒྱལ་པོ་ཆེན་པོ་ཨིནྡྲ་བྷཱུ་ཏིའི་ཞལ་སྔ་མན་ཆད་བླ་མ་གྲུབ་པ་ཐོབ་པ་ཟམ་མ་ཅད་པའི་རིམ་པ་ལས། དབང་བསྐུར་བ་དང་མན་ངག་རྙེད་པའི་མཁས་པ་ཆེན་པོ་རྒྱལ་པོའི་དབང་པོའི་རྒྱལ་པོ་མཆོག་གི་བླ་མ་ཁ་ཆེའི་མཁན་པོ་དཔལ་རིན་ཆེན་རྡོ་རྗེའི་ཞབས་ཀྱི་པདྨའི་བཀའ་དྲིན་ཇི་ལྟར་ཐོས་པ་དེ་བདག་ཉིད་དྲན་པའི་དོན་དུ་བྲིས་པ་ལ་སྐྱོན་ཅི། ཡང་ན་དམ་པ་སློབ་དཔོན་མ་བོད་ཡུལ་དབུས་སུ་སྐྱེས་པའི་དགེ་སློང་རིན་ཆེན་རྒྱལ་མཚན་གྱིས་དཔལ་ཕྱག་རྒྱ་ཆེན་པོའི་ཐིག་ལེའི་རྒྱུད་ཀྱི་སྦྱོར་བ་དྲུག་གི་དོན་དམ་པའི་བསྐྱེད་རིམ་དང་རྫོགས་རིམ་ཇི་ལྟར་ལགས་ཞེས་བསྐུལ་བ་བྱས་པ་དེའི་དོན་དུ་བཤད་པའི་ཕྱིར་ཇི་ལྟ་བར་བྲིས་པ་ལ་སྐྱོན་གང༌། གང་གི་ཕྱིར་མཁས་པ་རྣམ་པར་ཞེས་སྡང༌། ཡང་ན་ལོག་པའི་ཤེས་པ་དང་ལྡན་པའི་ལོང་བ་རྣམས་ལམ་རབ་སྟོར་བའི་ཕྱིར་བདག་གིས་དེ་ལ་དགའ་བའི་མིག་སྦྱིན་པ་དེ་ལ་ཡོན་ཏན་གྱི་དོན་ལས་གཞན་སྐྱོན་མེད་དོ། །ད་ནི་གང་ཞེས་པའི་དོན་དཔྱད་པར་བྱའོ། །དེ་ནས་ཞེས་བྱ་བའི་སྒྲ་ནི་དེའི་འོག་ཏུ་ཞེས་བྱ་བའོ་དོན་ནོ། །དཔལ་དགྱེས་པའི་རྡོ་རྗེ་ཡེ་ཤེས་ཀྱི་རྒྱ་མཚོ་འབུམ་ལྔའི་བདག་ཉིད་ཀྱི་རྒྱུད་ལས། རྒྱལ་པའི་མངའ་བདག་དཔལ་རྡོ་རྗེ་སེམས་དཔའ་བཅོམ་ལྡན་འདས་རང་བཞིན་སྦྱོར་བའི་ངོ་བོ་བདེ་པ་ཆེན་པོའི་དགའ་བའི་གནས་ན་བཞུགས་པ་ལ། རྡོ་རྗེ་མཁའ་འགྲོ་མ་བྱེ་བ་ཕྲག་བདུན་ཅུ་རྩ་གཉིས་ཀྱི་གྲངས་ཀྱི་འཁོར་གྱི་དབུས་ནས་བཙུན་མོ་དཔལ་ལེགས་དབྱེས་དབང་མོས་ཞུས་
པའི་ངོར་མཛད་ནས། དཔལ་ཕྱག་རྒྱ་ཆེན་པོའི་ཐིག་ལེ་ཕྱི་མའི་རྒྱུད་རྣལ་འབྱོར་མའི་རྒྱུད་ཀྱི་དབང་པོའི་རྒྱལ་པོ་མཆོག་གི་གསང་བ་རྣམ་དུ་བྱུང་བ། ཡེ་ཤེས་བདུད་རྩིའི་འབྲས་བུ་ཤིན་ཏུ་སྨིན་པས་བཀའ་སྩལ་ཏོ། །ཡང་ན་དབང་པོའི་རྒྱལ་པོའི་རྒྱུད་འདི་ལས་ཐམས་ཅད་ཀྱི་རྒྱུད་དང༌། དབང་བསྐུར་བའི་ལེའུ་གཉིས་ཀྱི་འོག་ཏུ་སྦྱོར་བ་དྲུག་གི་རྣམ་པར་ཤེས་པའི་དོན་དམ་པ་བཤད་པ་ནི་དེའི་འོག་ཏུ་ཞེས་བྱ་བའི་དོན་ཏོ། །དེའི་ཕྱིར་གསང་བ་ཡིན་ནོ། །ཡང་ན་ཉན་ཐོས་ལ་སོགས་པས་མ་རྙེད་པའི་ཕྱིར་དེ་ནི་གསང་བའོ། །རྟོགས་པར་དཀའ་བའི་རྡོ་རྗེའི་ཚིགས་བཅད་རྣམས་ཕྱི་མའི་རིམ་པས་གསལ་བ་དེ་ནི་བཤད་པའི་དོན་ཏོ། །དོན་ནི་ཆོས་ཀྱི་ཕྱག་རྒྱའི་ཡེ་ཤེས་རང་བཞིན་དགའ་བ་སྣ་ཚོགས་པའི་ཐམས་ཀྱིས་རྙེད་པའོ། །དེ་ནི་ཡི་གེའི་དོན་ཏོ། །ད་ནི་དེར་བསྟན་པའི་ཀུན་དུ་ཡན་ལག་གི་དོན་བཤད་པར་བྱ་སྟེ། བྱ་བའི་རྒྱུད་ལ་སོགས་པ་ལས་གཞན་པའི་རབ་མཆོག་གི་ལམ་ཤེས་རབ་ཐམས་ཀྱི་སྦྱོར་བའི་མཚན་ཉིད་དེ། དེ་ནས་ཀྱི་དོན་ཏོ། །ཤེས་རབ་དང་ཐམས་མཉམ་པར་སྦྱོར་བའི་ཡན་ལག་དང་ལོངས་སྤྱོད་དང་དབང་གིས་རང་གི་སྙིང་གའི་པདྨའི་ལྟེ་བའི་ནང་དུ། ཟླ་བ་དང་རྡོ་རྗེ་དང་ས་བོན་གྱིས་བསྐྱེད་པའི་རིམ་པའི་སྐུ་མདོག་དང་ཕྱག་མཚན་ལ་སོགས་པའི་ལྷའི་རྣམ་པ་སྒོམ་པ་དེ་ནི་གསང་བའོ། །དེ་ལྷའི་རྣམ་པ་ལ་སྒྱུ་འཕྲུལ་ཆེན་པོའི་ཡེ་ཤེས་གཉིས་སུ་མེད་པའི་རྣམ་པ་ཤེས་རབ་ཀྱི་ཕྱག་རྒྱ་ལ་སྒོམ་པ་དེ་ནི་བཤད་པའི་དོན་ཏོ། །ད་ནི་སྔར་བཤད་པའི་སྙིང་པོའི་དོན་བཤད་པར་བྱ་སྟེ། དེ་ནས་ནི་ཤེས་རབ་དང་ཐབས་ཀྱི་འོག་ཏུ་སྟེ། རྣམ་པར་སྨིན་ནས་རྒྱུ་མཐུན་པ་ལ་སོགས་པའི་འབྲས་བུ་རྙེད་དོ། །རྒྱུའི་རབ་དེ་ནི་འཁོར་བ་དང་མྱ་ངན་ལས་འདས་པའི་མཚན་ཉིད་ཀྱི་ཕྱིར་རོ། །ཅིའི་ཕྱིར་འཁོར་བ་དང་མྱ་ངན་ལས་འདས་པའི་མཚན་ཉིད་ཅེ་ན། ཀུན་བརྟགས་དང་གཞན་དབང་གི་གཟུངས་ཀྱི་ཕྱིར་རོ། །གཞན་ལ་བརྟེན་ཏེ་སྐྱེ་བའི་ཕྱིར་གཞན་དབང་ངོ༌། །གཞན་གྱི་སྒྲ་ནི་རྟེན་ཅིང་འབྲེལ་པར་འབྱུང་བའོ། །དེ་ལྟར་ཡང་ཐམས་ཅད་མཁྱེན་པས། གང་ཞིག་རྟེན་འབྱུང་དེ་ནི་སྐྱེ་བ་མིན། །ཞེས་གསུངས་སོ། །རང་གི་ངོ་བོ་དང་བྲལ་བའི་ཕྱིར་ཀུན་བརྟགས་
སོ། །གཅིག་དང་དུ་མས་རྣམ་པར་དཔྱད་ན་དོན་དམ་པར་ཕྱི་རོལ་གྱི་དངོས་པོའི་ངོ་བོ་ཉིད་ནི་རྙེད་པ་མ་ཡིན་ནོ། །མི་རྙེད་པའི་ཕྱིར་ཐམས་ཅད་སྟོང་པའི་ངོ་བོ་སྟེ། ནམ་མཁའ་བཞིན་ནོ། །ཇི་ལྟར་ལོག་པའི་ཤེས་པ་དང་ལྡན་པའི་ལོངས་སྤྱོད་པའི་མིས་ཅི་ཡང་མེད་པར་ཤེས་པ་དེ་ལྟར་མ་ཡིན་ནོ། །ཅི་ཡང་མེད་པའི་ཕྱིར་ཐར་པའི་དོན་དུ་འབད་པའི་འབྲས་བུ་མེད་པར་འགྱུར་རོ། །བསོད་ནམས་ཀྱི་ལས་སུ་བྱ་བའི་དགེ་བའི་རྩ་བ་ལ་སོགས་པ་དོན་མེད་པར་འགྱུར་རོ། །དོན་མེད་པའི་ཕྱིར་ཐར་པ་རྙེད་པར་མི་འགྱུར་རོ། །དེ་ལྟར་ནི་རིགས་པ་མ་ཡིན་ནོ། །སྦྱིན་པ་ལ་སོགས་པའི་རྟོག་པ་རྙེད་ན་ཡང་དེ་བཞིན་དུ་བཅོས་པ་མ་མ་ཡིན་ནོ། །དེ་ལྟར་ན་ཡང་སློབ་དཔོན་ཆེན་པོ་དཔལ་རིན་ཆེན་རྡོ་རྗེའི་ཞལ་སྔ་ནས་མཛད་པའི་རྫོགས་པའི་རིམ་པ་ལ། དགེ་བའི་ཚོགས་ནི་རྒྱུ་ཡི་ཕྱིར། །བདེ་བར་གཤེགས་པའི་ལམ་ཡིན་ནོ། །འདི་ནི་ཐར་པ་བཅོས་མ་མིན། །རང་བཞིན་ཡེ་ཤེས་མཚན་ཉིད་དོ། །གང་ཕྱིར་བསོད་ནམས་གྱིས་རྙེད་སྐྱེ་བ་མིན། །བསོད་ནམས་དེ་ལས་སྐྱེ་བ་མིན། །ཞེས་འབྱུང་ངོ༌། །དེ་བཞིན་དུ་ཤེས་རབ་དང་ཐབས་འཁོར་བ་དང་མྱ་ངན་ལས་འདས་པ། ཀུན་བརྟགས་དང་གཞན་དབང་རྣམ་པར་སྨིན་པ་དང༌། རྒྱུ་མཐུན་པའི་འབྲས་བུ་ཡོངས་སུ་ཤེས་ནས། ཡོངས་སུ་གྲུབ་པའི་དྲི་མ་མེད་པ་རྙེད་ཀྱི་སྐྱེ་བ་མ་ཡིན་ནོ། །དེ་ལྟར་ཡང་གསང་བའི་ངོ་བོའི་རིམ་པ་དེ་ཁོ་ན་ཉིད་གྲུབ་པ་ལས། དབང་པོ་སྡེ་ཚན་ནང་དུ་བཞུགས། །འཁོར་བའི་ས་བོན་མ་རྫོགས་མོད་ཀྱི་སྐྱེ་བ་མེད། །དཀའ་བའི་དངོས་པོའི་སྦྱོར་བ་ཡིས། །ནམ་མཁའ་དང་མཉམ་དེས་ནི་བསིལ་བ་མྱོང༌། །ཞེས་འབྱུང་ངོ༌། །དེ་བཞིན་དུ་སློབ་དཔོན་ཆེན་པོ་འཕགས་པ་ཀླུ་སྒྲུབ་ཀྱི་ཞལ་ལྔ་ནས། འཁོར་བ་ཡོངས་སུ་ཤེས་པ་ནི། །མྱ་ངན་འདས་ཞེས་བརྗོད་པ་ཡིན། །ཞེས་བཤད་དོ། །རྒྱལ་པོ་ཆེན་པོ་ཨིནྡྲ་བྷཱུ་ཏིའི་ཞལ་སྔ་ནས། མྱ་ངན་འདས་པ་ཡོངས་ཤེས་པ། །དེ་ནི་ཡེ་ཤེས་རང་བཞིན་མཁའ། །ཞེས་བཤད་དོ། །སློབ་དཔོན་ཀི་ལ་རི་བའི་ཞལ་སྔ་ནས་ནི། །སྲིད་དང་མྱ་ངན་འདས་པ་ཡོངས་ཤེས་ན། རྟོག་པ་མེད་པའི་བདེ་བ་ཆེན་པོ་ཞེས་བཤད་དོ། །སློབ་དཔོན་ཀོངྐ་ནའི་ཞལ་སྔ་ནས་ནི། སྲིད་དང་མྱ་ངན་འདས་དག་པའི། །སྐད་ཅིག་ཙམ་
གྱིས་འདྲ་མེད་སྐྱེ། །ཞེས་བཤད་དོ། །དཔལ་རྣལ་འབྱོར་མ་ཐམས་ཅད་ཀྱི་སྙིང་པོའི་རྒྱུད་ལས་ནི། སྐྱེ་བ་དང་ནི་འགག་པ་མེད། །རྒྱུད་དང་དཔེ་དང་བྲལ་བ་ནི། །སྲིད་དང་མྱ་ངན་འདས་མེད་པ། །དེ་ནི་འདྲ་མེད་བློ་གྲོས་ཆེ། །ཞེས་གསུངས་སོ། །དེ་ནི་དེ་ནས་གྱི་དོན་ཏོ། །ཕྱིའི་ཤེས་རབ་མི་དགོས་པར་འཛུམས་པ་དང་འབྱེད་པ་ལ་སོགས་པའི་ཤེས་རབ་ཀྱི་སོགས་གཏུམ་མོ་རང་གི་མཚན་ཉིད་ཤེས་རབ་ཡེ་ཤེས་ལས་ཀུན་རྫོབ་བྱང་ཆུབ་ཀྱི་སེམས་འབྱུང་བ་དེ་ནི་གསང་བའོ། །དེའི་རྡོ་རྗེའི་རྩ་བའི་ལྟེ་བའི་སྙོམས་པའི་དམ་ཚིག་གི་ཕྱག་རྒྱ་ཡེ་ཤེས་ཀྱི་ཚོགས་ཏེ་བཤད་པའི་དོན་ཏོ། །ད་ནི་རང་བཞིན་གྱི་དོན་བཤད་དོ། །དེ་ནས་ཞེས་བྱ་བ་ནི་རྣམ་པར་སྨིན་པ་དང་རྒྱུ་མཐུན་པའི་འབྲས་བུའི་འོག་ཏུ་ཡོངས་སུ་ཤེས་པས་དྲི་མ་མེད་པ་འབྱུང་བ་ཡིན་ནོ། །ཡོངས་སུ་བོར་ནས་མ་ཡིན་ནོ། །དེ་གཉིས་ཡོད་པའི་ཕྱིར་རྡོ་རྗེ་རིན་ཆེན་གྱི་བརྟ་ཀའི་ཡེ་ཤེས་ཀྱི་རླུང་འགོག་པས་དྲི་མ་མེད་པ་རྙེད་དོ། །དེ་ནི་གསང་བའོ། །དེ་རྙེད་པ་ཙམ་གྱིས་ཆོས་ཐམས་ཅད་མི་དམིགས་པ་དབའ་རླབས་དང་བྲལ་བའི་རྣམ་པའི་ངོ་བོ། །ཡང་དག་དྲི་མེད་མཆོག་གི་འོག་གི་རང་བཞིན་ཕྱག་རྒྱ་ཆེན་པོའི་ཡེ་ཤེས་ཀྱིས་ཐམས་ཅད་མཐོང་པ་སྟེ། དེ་ནི་བཤད་པའི་དོན་ཏོ། །ད་ནི་ཡི་གེ་རེ་རེ་ལ་སྦྱོར་བ་དྲུག་གི་དགའ་བ་དང་སྐད་ཅིག་དང་ལྡན་པའི་དོན་བཤད་དོ། །ཆར་ཡང་ཐིག་ལེ་ཞེས་བྱ་བ་ལ་སོགས་པ་ལ་ཆར་ཡང་ནི་དུས་སོ། །ཡང་ན་ཆར་ཡང་དུས་སྦྱོར་གང་དང་གང་སྦྱོར། ཏའི་ཡིག་འབྲུ་དང་རའི་ཡིག་འབྲུ་གཉིས་སུ་སྦྱོར་རོ། །ཏའི་ཡིག་འབྲུ་ནི་འཛིན་མ་ཤེས་རབ་ཀྱི་ངོ་བོ་རྣམ་པར་འཇོམས་པའི་གཟུགས་སོ། །རའི་ཡིག་འབྲུ་ནི་རོ་མ་ཐབས་ཀྱི་ངོ་བོ་རྣམ་པར་སྨིན་པའི་གཟུགས་སོ། །དེ་དག་སྦྱོར་བར་བྱེད་པའི་ཕྱིར་སྦྱོར་བ་མཛད་པ་རྟོག་མེད་མ་རྣམ་པའི་མཚན་ཉིད་ཀྱི་ངོ་བོ་རླུང་གི་གནས་ན་བཞུགས་སོ། །རླུང་གི་འཁོར་བ་ནི་ལྟེ་བ་ནས་རྐང་པའི་མཐིལ་གྱི་བར་དུའོ། །དེ་ལྟ་མ་ཡིན་དགོངས་ན་ནི་སྐྱོན་ཆེན་པོ་འབྱུང་བར་འགྱུར་ཏེ། དེ་ནི་འབྲེལ་པའོ། །འཛིན་མ་དང་རོ་མ་དང་རྟོག་མེད་མ་ནི་གསང་བའི་པདྨའི་སྙིང་པོ་ལས་སྐྲའི་རྩེ་མོ་སྟོང་གི་ཆ་ཙམ་ཡང་ཕྱི་
རོལ་དུ་མི་འགྲོའོ། །མི་འགྲོ་བས་ན་གང་གི་ཕྱིར། འཁོར་ལོ་དྲུག་དྲངས་རླུང་གི་འཁོར་ལོའི་རྩ་དང་དགའ་བ་རྣམས་གཞན་གང་དུ་གནས་པར་འགྱུར། དེ་བས་ན་རླུང་གི་འཁོར་ལོ་རབ་ཀྱི་གནས་ནི་གསང་བའི་པདྨའི་ལྟེ་བའི་ནི་རིགས་པའི་གཞུང་ལུགས་སོ། །དེ་ནི་རྫོགས་པའི་རིམ་པའི་ཕྱོགས་སོ། །བསྐྱེད་པའི་རིམ་པའི་ལུགས་བདེ་བ་ཆེན་པོའི་འཁོར་ལོའོ། །གང་གི་ཕྱིར་ཐམས་ཅད་འབྱུང་བའི་གནས་སོ། །འབྲས་བུ་སྦྱིན་པའོ། །འབྲས་བུ་རྙེད་པའི་དོན་དུ་དང་པོ་འདི་ལྟར་བསྒོམ་མོ། །ལྟེ་བའི་རྩ་བར་ཡཾ་ཡོངས་སུ་གྱུར་པའི་རླུང་གི་དཀྱིལ་འཁོར་གཞུ་ལྟ་བུ་མདོག་སྔོན་པོ་དེའི་སྟེང་དུ་རམ་ཡོངས་སུ་གྱུར་པ་ལས་མེའི་དཀྱིལ་འཁོར་གྲུ་གསུམ་ལྟ་བུ་མདོག་དམར་པོ། །རླུང་བསྐྱོད་པས་ལྟེ་བའི་པདྨའི་ཡེ་ཤེས་ཀྱི་མེ་འབར་བའི་འོད་ཀྱི་གཟུགས་ཀྱིས་ཆོས་ཀྱི་འཁོར་ལོ་ན་བཞུགས་པའི་དེ་བཞིན་གཤེགས་པ་རྣམས་བསྲེགས་ནས། ལོངས་སྤྱོད་ལམ་དུ་ཨུ་རྒྱན་གྱི་འདུ་ཤེས་གསེར་སྒོའི་ནང་མཚམས་ཀྱི་བུ་གའི་བདེ་བ་ཆེན་པོའི་འཁོར་ལོར་བཞུགས་ཏེ། རང་གི་འོད་ཀྱིས་བདུད་རྩི་ཞུ་བར་བྱས་ནས། དེ་ཉིད་ཁྱེར་ཏེ་ཞི་བའི་གཟུགས་ཀྱིས་སྔར་བསྲེགས་པ་རབ་ཏུ་ཚིམ་པར་བྱས་ནས་ལྟེ་བའི་པདྨར་བཞུགས་ས་བྱེད་དོ། །དེ་ལས་ཆགས་པ་ཆེན་པོའི་ཡིད་དང་ལྡན་པར་འགྱུར་རོ། །ཆོས་ཐམས་ཅད་ཀྱི་སྟེང་ན་གཅིག་གི་ངོ་བོར་ཤེས་སོ། །ཤིན་ཏུ་ཡང་བསམ་པར་བྱེད་དོ། །གང་གིས་འདི་ཀུན་རྫོབ་ཆར་ཡང་གི་དོན་གྱིས་སོ། །ཆར་ཡང་གཉིས་སུ་གྱེས་པའི་དོན་རབ་ཏུ་ཉེ་བའི་གནས་བྱེད་དོ། །རྒྱུ་ཡང་སྦྱིན་ནོ། །ཐིགས་པ་མངོན་པར་འབྱུང་བ་ལའོ། །དེ་ནི་རྩ་དང་ཡི་གེ་སྦྱོར་བས་ཨའི་ཡིག་འབྲུ་འབྱུང་བ་ཡིན་ནོ། །འབྱུང་བ་ནི་འདིར་འགྲོ་བར་ཤེས་པར་བྱའོ། །གང་ཞིག་ཨའི་ཡིག་འབྲུ་བྱང་ཆུབ་སེམས་ཀྱི་ངོ་བོ་རྟག་ཏུ་རླུང་ལ་ཞོན་པའི་ཕྱིར་འགྲོ་བར་ཤེས་པར་བྱའོ། །དེ་འགྲོ་བ་ཙམ་གྱིས་ནི་འདར་བ་ཞེས་བྱ་བའི་རྟགས་འབྱུང་བར་འགྱུར་རོ། །རྟགས་དེ་ལས་རྣམ་པ་སྣ་ཚོགས་ཀྱི་སྐད་ཅིག་རྣལ་འབྱོར་པས་ཤེས་སོ། །ཤེས་པ་ཙམ་གྱིས་ནི་སྤྱི་བོ་ན་ཡོད་པའི་བྱང་ཆུབ་ཀྱི་སེམས་དཔྲལ་བའི་གནས་སུ་འགྲོའོ། །དེ་ནི་གོམས་པ་ཡིས་སོ། །གོམས་པས་ལས་ཀྱི་ཕྱག་རྒྱ་མི་དགོས་པར་ཏིང་ངེ་འཛིན་ཤེས་སོ། །
དེ་ནི་བདེ་བ་ཆེན་པོའི་འཁོར་ལོའི་གནས་བྱང་ཆུབ་ཀྱི་སེམས་ལ་འདར་བའི་རོ་དང་རྣམ་པ་སྣ་ཚོགས་པའི་སྐད་ཅིག་དང་ལྡན་པའི་ཨའི་ཡིག་འབྲུའི་དོན་ཏོ། །ད་ནི་ཐའི་ཡིག་འབྲུའི་དོན་བཤད་དོ། །ཐའི་ཡིག་འབྲུའི་ཐིག་ལེའོ། །རབ་ཏུ་བདེ་བའི་རྣམ་པའི་གཟུགས་ཀྱི་ཕྱིར་རོ། །ཡང་ན་ཚོར་བའི་ཕྱིར་རོ། །དེ་ཉིད་ཡང་གཉིས་སུ་གྱེས་པའི་དོན་རབ་ཏུ་འབྱེད་པར་གནས་བྱེད་དོ། །མ་འོངས་པའི་རྣམ་པར་སྨིན་པ་ལས་འབྱུང་བའི་གསལ་བར་བྱེད་དོ། །རྒྱུ་ཡང་སྦྱིན་ནོ། །ཚུལ་མངོན་པར་འབྱུང་བ་ལའོ། །དེའི་དུས་སུ་རྡུལ་ཞེས་བྱ་བའི་རྟགས་འབྱུང་ངོ༌། །རྟགས་དེ་ལས་རྣམ་པར་སྨིན་པ་ཞེས་བྱ་བའི་སྐད་ཅིག་ཤེས་སོ། །དེ་ནི་ལོངས་སྤྱོད་རྫོགས་པའི་འཁོར་ལོ་གནས་པ་རྡུལ་དང་རྣམ་པར་སྨིན་པ་ལྡན་པའི་ཐའི་ཡིག་འབྲུའི་དོན་ཏོ། །ད་ནི་ཏུའི་ཡིག་འབྲུའི་དོན་བཤད་དོ། །ཏུའི་ཡིག་འབྲུའི་ཚུལ་ལོ། །རང་འབྱུང་བའི་ཕྱིར་རོ། །དེ་བས་ན་རང་བྱུང་ངོ༌། །ཐོག་མ་དང་བྲལ་བའི་ཕྱིར་རོ། །ཐོག་མ་བྲལ་བའི་ཕྱིར་ཐ་མ་ཡང་མེད་དོ། །ཐོག་མ་དང་བྲལ་བའི་ཕྱིར་དབུས་ཀྱང་མེད་དོ། །ཐོག་མ་དང་ཐ་མ་དང་དབུས་མེད་པའི་ཕྱིར་རང་བྱུང་ངོ༌། །ཡང་ན་ཨ་ཀུན་དུ་གང་ཞིག་གིས་རིག་པ་མེད་པའི་བག་ཆགས་འབྱུང་བའི་གཏི་མུག་མུན་ནག་བཅོམ་པའི་ཕྱིར་རང་བྱུང་གི་ཚུལ་ལོ། །དེ་ཉིད་གཉིས་སུ་གྱེས་པའི་དོན་རབ་ཏུ་བྱེད་པར་གནས་བྱེད་དོ། །རང་གི་ཡུལ་བྱེ་བྲག་གསལ་བར་བྱེད་དོ། །རྒྱུ་ཡང་སྦྱིན་ནོ། །ཚུལ་ཙམ་མངོན་པར་འབྱུང་བ་ལའོ། །དེ་ལས་མྱོས་པ་ཞེས་བྱ་བའི་རྟགས་འབྱུང་ངོ༌། །རྟགས་དེ་ལས་རྣམ་བར་འཇོམས་པ་ཞེས་བྱ་བའི་སྐད་ཅིག་ཤེས་སོ། །དེ་ཉིད་ཆོས་ཀྱི་འཁོར་ལོའི་གནས་ན་བྱང་ཆུབ་ཀྱི་སེམས་ཡོད་པའི་ཕྱིར་རོ། །དེ་ནི་ཆོས་ཀྱི་འཁོར་ལོའི་གནས་པ་མྱོས་པ་དང་རྣམ་པར་འཇོམས་པ་དང་ལྡན་པའི་ཏུའི་ཡིག་འབྲུའི་དོན་ཏོ། །ད་ནི་རའི་ཡིག་འབྲུའི་དོན་བཤད་དོ། །རའི་ཡིག་འབྲུ་ནི་ཚུལ་ཙམ་མོ། །ཙམ་གྱི་སྒྲ་ནི་ཡོད་མེད་དང་བྲལ་བའི་དོན་གསལ་བའོ། །ཚུལ་གྱི་སྒྲ་ཡེ་ཤེས་ལ་སོགས་པའི་ངོ་བོ་ཡོད་པའི་དངོས་པོའོ། །ཙམ་གྱི་སྒྲའི་ཡེ་ཤེས་ལ་སོགས་པའི་ངོ་བོ་མེད་པའི་དངོས་པོའོ། །ཇི་ལྟར་ཆུ་ཟླ་ལྟ་བུའོ། །དེའི་ཕྱིར་ན་ཚུལ་ཙམ་མོ། །
དེ་ཉིད་གཉིས་སུ་གྱེས་པའི་དོན་རབ་ཏུ་བྱེད་པར་གནས་བྱེད་དོ། །རང་གི་ཡུལ་གྱི་བྱེ་བྲག་གི་འཛིན་པའི་རེག་བྱ་བྱེད་དོ། །རྒྱུ་ཡང་སྦྱིན་ནོ། །མཆོག་མངོན་པར་འབྱུང་བ་ལའོ། །དེའི་སྐད་ཅིག་གི་ཡན་ལག་མི་བརྟེན་པ་ཞེས་བྱ་བའི་རྟགས་འབྱུང་ངོ༌། །རྟགས་དེ་ལས་རྣམ་པའི་མཚན་ཉིད་ཤེས་སོ། །དེ་ཉིད་སྤྲུལ་པའི་འཁོར་ལོའི་གནས་སུ་བྱང་ཆུབ་ཀྱི་སེམས་ཡོད་པའི་ཕྱིར་རོ། །དེ་ནི་སྤྲུལ་པའི་འཁོར་ལོའི་གནས་པའི་ཡན་ལག་མི་བརྟེན་པ་དང༌། རྣམ་པའི་མཚན་ཉིད་དང་ལྡན་པའི་རའི་ཡིག་འབྲུའི་དོན་ནོ། །ད་ནི་ཧའི་ཡིག་འབྲུའི་དོན་བཤད་དོ། །ཧའི་ཡིག་འབྲུ་ནི་མཆོག་གི་རབ་པོ། །ཁ་ཁྭ་མུ་ཁའི་རྣམ་པའི་གཟུགས་ཅན་ནོ། །དེ་ཉིད་གཉིས་སུ་གྱེས་པའི་དོན་རབ་ཏུ་འབྱེད་པར་གནས་བྱེད་དོ། །ཐམས་ཅད་ལ་མཐའ་ཡས་དགའ་བའི་འཛིན་པའི་བདེ་བའི་རྣམ་པར་སྨིན་པ་བྱེད་དོ། །རྒྱུ་ཡང་སྦྱིན་ནོ། །མཆོག་གཞན་དུ་འབྱུང་བ་ལའོ། །དེའི་དུས་སུ་འཕར་བ་ཞེས་བྱ་བའི་རྟགས་འབྱུང་ངོ༌། །རྟགས་དེ་ལས་དང་པོའི་དགའ་བ་ཤེས་སོ། །དེ་ཉིད་རིན་པོ་ཆེ་སྐེའི་གནས་སུ་བྱང་ཆུབ་ཀྱི་སེམས་ཡོད་པའི་ཕྱིར་རོ། །དེ་ནི་རིན་ཆེན་སྐེའི་གནས་འཕར་བ་དང་དགའ་བ་དང་ལྡན་པའི་ཧའི་ཡིག་འབྲུའི་དོན་ནོ། །ད་ནི་སྱཾ་གྱི་ཡིག་འབྲུའི་དོན་བཤད་དོ། །སྱཾ་གི་ཡིག་འབྲུ་ནི་མཆོག་གཞན་ནོ། །ཡང་ན་སངས་རྒྱས་རིན་པོ་ཆེའི་སྣོད་ཀྱི་དོན་ནོ། །ཉིད་ནི་མ་ཡིན་ནོ། །དེ་བས་ན་གཞན་ནོ། །དེ་ཉིད་གཉིས་སུ་གྱེས་པའི་དོན་རབ་ཏུ་འབྱེད་པར་བྱེད་དོ། །འདོད་པ་དང་མི་འདོད་པའི་དངོས་པོ་འཛིན་པར་བྱེད་དོ། །རྒྱུ་ཡང་སྦྱིན་ནོ། །ཆོས་ཐམས་ཅད་མི་དམིགས་པ་ལའོ། །དེའི་དུས་སུ་དབུགས་རྒོད་པ་ཞེས་བྱ་བའི་རྟགས་འབྱུང་ངོ༌། །རྟགས་དེ་ལས་མཆོག་གི་དགའ་བ་ཤེས་སོ། །དེ་ཉིད་ནང་གི་དཔྲལ་བའི་གནས་སུ་བྱང་ཆུབ་ཀྱི་སེམས་ཡོད་པའི་ཕྱིར་རོ། །དེ་ནི་ནང་གི་དཔྲལ་བར་དབུགས་རྒོད་པ་དང་མཆོག་གི་དགའ་བ་དང་ལྡན་པའི་སྱཾ་གི་ཡིག་འབྲུའི་དོན་ཏོ། །ད་ནི་བའི་ཡིག་འབྲུའི་དོན་བཤད་དོ། །བའི་ཡིག་འབྲུ་ནི་གསང་བའི་རིན་ཆེན་བརྟའི་སྙིང་པོ། །ཡང་ན་སྙིང་ཉིད་སངས་རྒྱས་རིན་པོ་ཆེའི་སྣོད་ཤིན་ཏུ་འཇམ་པ། ཕྲ་བ། མི་བཟད་པ། རགས་པ་མ་ཡིན་པ། སྱཾ་གི་པདྨའི་ལྟེ་བའི་དོན་ཏོ། །དེར་
ཕྱིན་པ་ཙམ་གྱིས་ནི་བྱང་ཆུབ་ཀྱི་སེམས་གཉིས་སུ་གྱེས་པའི་དོན་རབ་ཏུ་འབྱེད་པའི་གནས་བྱེད་དོ། །རྒྱུ་ཡང་སྦྱིན་ནོ། །སྲོག་གི་རླུང་ལ་ཞོན་ནས་སངས་རྒྱས་འབྱུང་བའི་དོན་དུ་ཤེས་རབ་མའི་སྙིང་པོའི་ནང་དུ་འགྲོའོ། །དེའི་སྐད་ཅིག་ལ་བཀྲག་ཅེས་བྱ་བའི་རྟགས་འབྱུང་ངོ༌། །རྟགས་དེ་ལས་ཆད་པའི་དགའ་བའི་ནང་གི་རེག་བྱ་ཤེས་པའི་རྣལ་འབྱོར་པས་དུས་ཤེས་སོ། །འདི་ནི་ཆད་པའི་དགའ་བའི་དུས་ཀྱི་སྐད་ཅིག་གོ །དེ་ནི་རྡོ་རྗེ་གཙུག་ཏོར་གྱི་ནང་ན་བྱང་ཆུབ་ཀྱི་སེམས་ཡོད་པའི་ཕྱིར་རོ། །དེའི་གནས་སུ་ཀྴའི་ཡིག་འབྲུ་དཔལ་རྡོ་རྗེ་སེམས་དཔའི་ངོ་བོ་ཉིད་སྟོང་པ་ཉིད་ཀྱི་ཡེ་ཤེས་དྲན་པར་བྱེད་དོ། །འགྲོ་བ་མེད་པའི་ཕྱིར་ཀྵའི་ཡིག་འབྲུ་རང་གི་སྙིང་རིན་ཆེན་གསང་བའི་པདྨའི་ལྟེ་བའི་ནང་ཡེ་ཤེས་ཀྱི་རླུང་འགོག་པའི་དྲོད་ཅེས་བྱ་བའི་རྟགས་འབྱུང་ངོ༌། །རྟགས་དེ་ལས་སྐྱེ་མེད་འགག་མེད་རང་རིག་བརྗོད་མེད་བླ་མའི་ཞལ་སྔ་ནས་ཀྱི་བཀའ་དྲིན་རང་བཞིན་དགའ་བ་རྙེད་པ་ནི་དེའི་དོན་ཏོ། །དེ་ནི་རང་གི་སྙིང་གའི་གསང་བའི་པདྨའི་ལྟེ་བའི་ནང་དྲོད་དང་རང་བཞིན་དགའ་བ་དང་ལྡན་པའི་བ་དང་ཀྵའི་ཡིག་འབྲུའི་དོན་ཏོ། །དེ་ནི། དེ་ནས་གསང་བ་བཤད་བྱ་བ། །ཞེས་བྱ་བའི་ཚིགས་བཅད་ཀྱི་དོན་རབ་ཀྱི་བླ་མའི་ཞལ་སྔ་ནས་ཀྱི་བཀའ་དྲིན་གྱིས་ཤེས་རབ་དཔལ་གསང་བ་རང་གི་དྲན་པའི་དོན་དུབ་བྲིས་སོ། །ད་ནི་ཡེ་གེ་བརྒྱད་དང་ལྡན་པའི་དོན་དམ་པའི་བྱང་ཆུབ་ཀྱི་སེམས་རང་གི་སློབ་མ་རྣམས་ཡེ་ཤེས་གྲུབ་པའི་དོན་དུ་བསམ་གཏན་སྨྲའོ། །དང་པོར་རེ་ཞིག་སྙིང་གའི་ནམ་མཁར་ཨེའི་རྣམ་པའི་ཆོས་ཀྱི་དབྱིངས་ཀྱི་ཕྱག་རྒྱ་དེའི་ནང་དུ་ཀ་ལ་སོགས་པ་ཡོངས་སུ་གྱུར་པ་ལས་ཀཱ་ལིའི་དཀྱིལ་འཁོར། ཨ་ལ་སོགས་པ་ཡོངས་སུ་གྱུར་པ་ལས་ཨཱ་ལིའི་དཀྱིལ་འཁོར། དེའི་སྟེང་དུ་བཾ་གྱི་ཡིག་འབྲུ་ཡོངས་སུ་གྱུར་པ་ལས་སྣ་ཚོགས་པདྨ་འདབ་མ་བརྒྱད་པ་ལྟེ་བ་དང་གེ་སར་དུ་ལྡན་པ་དེའི་དབུས་སུ་དོན་དམ་པའི་བྱང་ཆུབ་ཀྱི་སེམས་རིན་པོ་ཆེ་ཡང་དག་དྲི་མེད་མཆོག་གི་འོད་ཀྱི་རང་བཞིན་བསྒོམ་པར་བྱའོ། །སྣ་ཚོགས་པདྨའི་ཤར་གྱིས་འདབ་མར་ཨའི་ཡིག་འབྲུ་ཆར་ཡང་གི་ངོ་བོ་དང༌། རིན་ཆེན་མ་ཞེས་བྱ་བའི་རྩ་དང༌། དེ་བཞིན་དུ་དགའ་བའོ། །བྱང་གི་འདབ་མར་ཐའི་ཡིག་འབྲུ་ཐིག་ལེའི་ངོ་
བོ་དང་པདྨ་ཆེན་པོ་ཞེས་བྱ་བའི་རྩ་དང༌། དེ་བཞིན་དུ་མཆོག་ཏུ་དགའ་བའོ། །ནུབ་ཀྱི་འདབ་མར་ཏུའི་ཡིག་འབྲུ་ཚུལ་གྱི་ངོ་བོ་དང༌། འཇིགས་ཆེན་མ་ཞེས་བྱ་བའི་རྩ་དང༌། དེ་བཞིན་དུ་ཆད་པའི་དགའ་བའོ། །ལྷོའི་འདབ་མར་རའི་ཡིག་འབྲུ་ཚུལ་ཙམ་གྱི་ངོ་བོ་དང༌། སྟོབས་ཆེན་མ་ཞེས་བྱ་བའི་རྩ་དང༌། དེ་བཞིན་དུ་རང་བཞིན་དགའ་བའོ། །མེའི་མཚམས་ཀྱི་འདབ་མར་ཧའི་ཡིག་འབྲུ་མཆོག་གི་ངོ་བོ་དང༌། རྩེ་ཆེན་མོ་ཞེས་བྱ་བའི་རྩ་དང༌། རྣམ་པ་སྣ་ཚོགས་པའི་སྐད་ཅིག་གོ །བདེན་བྲལ་མཚམས་ཀྱི་འདབ་མར་སྱཾ་གི་ཡིག་འབྲུ་མཆོག་གཞན་གྱི་ངོ་བོ་དང༌། མྱོས་ཆེན་མ་ཞེས་བྱ་བའི་རྩ་དང༌། རྣམ་པར་སྨིན་པའི་སྐད་ཅིག་གོ །རླུང་གི་མཚམས་ཀྱི་འདབ་མར་བའི་ཡིག་འབྲུ་ཡེ་ཤེས་ཀྱི་ངོ་བོ་དང༌། དགའ་ཆེན་མ་ཞེས་བྱ་བའི་རྩ་དང༌། རྣམ་པར་འཇོམས་པའི་སྐད་ཅིག་གོ །དབང་ལྡན་མཚམས་ཀྱི་འདབ་མར་ཀྵའི་ཡིག་འབྲུ་ཡེ་ཤེས་ཆེན་པོའི་ངོ་བོ་དང༌། དགའ་མེད་ཅེས་བྱ་བའི་རྩ་དང་རྣམ་པའི་མཚན་ཉིད་ཀྱི་སྐད་ཅིག་གོ །དེ་ནི་ཡི་གེ་དང༌། དགའ་བ་དང༌། སྐད་ཅིག་རྣམ་པར་དག་པའི་ཕྱིར་སྣ་ཚོགས་པདྨའོ། །དཔལ་ཨིནྡྲ་བྷཱུ་ཏིའི་ཞལ་སྔ་ནས་མཛད་པའི་དགའ་བའི་མེ་ཏོག་གི་ཕྲེང་བ་ལས། དེ་ཉིད་ཁ་བུབ་ཤིན་ཏུ་འཛུམས་པ་ཡང་མ་ཡིན་ཕྱེ་བ་ཡང་མ་ཡིན་སྡོང་བུ་དང་ལྡན་པའི་གཞོན་ནུ་ཆོས་ཀྱི་འཁོར་ལོ་ཞེས་བཤད་དོ། །གསང་བའི་ངོ་བོ་དེ་ཁོ་ཉིད་གྲུབ་པ་ལས་གསང་བའི་སྙིང་གའི་ལྟེ་བའི་ནམ་མཁར་འདབ་མ་བརྒྱད་པ་དམར་པོ་ནམ་མཁར་ཁ་བྱེ་བ་སྡོང་བུ་དང་ལྡན་བའོ་ཞེས་འབྱུང་ངོ༌། །དེའི་སྡོང་བུའི་འོག་གི་བུ་གའི་ལམ་དུ་འཛིན་མ་རོ་མ་རྟོག་མེད་མ་སའི་མྱུ་གུའི་རྣམ་པ་ལྟ་བུའི་སྲོག་གི་རྩ་དང་ལྷན་ཅིག་སྐྲ་རྩེའི་སྟོང་ཆ་ཙམ་གྱི་ཁ་གསལ་བར་བྱེད་དོ། །དེ་ནི་མཆོག་གི་དགའ་བའི་དུས་སོ། །པདྨ་ལྟེ་བའི་དབུས་སུ་སྙོམས་པའི་རྟོག་མེད་མའོ། །འཛིན་མ་དང་རོ་མ་ནི་གཡས་གཡོན་ན། །གཞན་དག་ན་རེ་དེ་ནི་འོག་གི་ཆའི་སྲོག་གི་རྩའོ་ཞེས་ཟེར་རོ། །རྣལ་འབྱོར་གྱི་དབང་ཕྱུག་ཆེན་པོ་དཔལ་ཨིནྡྲ་བྷཱུ་ཏིའི་ཞལ་སྔ་ནས་མཛད་པའི་དགའ་བའི་མེ་ཏོག་གི་ཕྲེང་བ་ལས། སྲོག་རྩའི་ནང་དུ་ཞུགས་པའི་གཙོ་བོ་ནི་གསུམ་ཏེ། ནང་དུ་འགྲོ་བ་དང༌། ཕྱིར་འགྲོ་བ་དང༌། དབུས་སུ་འདུག་ས་བྱེད་པའོ། །
ཞེས་འབྱུང་ངོ༌། །དཔལ་རིན་ཆེན་རྡོ་རྗེའི་ཞལ་སྔ་ནས་ནི་དེ་དང་གཞུང་གཅིག་གོ །དེ་ལྟ་མོད་ཀྱི་ལུ་གུ་རྒྱུད་ཀྱི་རྣམ་པའི་ཁྱད་པར་ཡོད་དོ། །སློབ་དཔོན་མཁས་པ་ཆེན་པོ་ནཱ་རོ་པས་རྟོག་མེད་མ་ལ་སྲོག་གི་རྩ་ནི་སྐུའོ། །འཛིན་མ་ནི་གསུང་ངོ༌། །རོ་མ་ནི་ཐུགས་སོ། །རྟོག་མེད་མ་ཉིད་ནི་བདེ་བ་ཆེན་པོའི་རང་བཞིན་སྐུ་གསུང་ཐུགས་དང་བྲལ་བའོ་ཞེས་བཤད་དོ། །གཅིག་པུ་དེ་ནི་གསུམ་དུ་གྱེས་པར་འདོད་དོ། །སྲོག་གི་རྩ་སྐུའི་གཟུགས་སུ་མེད་པར་གྱུར་ན་གསུང་དང་ཐུགས་ཀྱི་འདུག་ས་མེད་དོ། །དེ་བཞིན་དུ་དགྱེས་པའི་རྡོ་རྗེའི་རྒྱུད་ལས། སྐུ་མེད་ན་ནི་ཐུགས་ཀྱི་ནི། །དེ་ནི་འདུག་ས་མེད་པ་ཡིན། །ཞེས་འབྱུང་ངོ༌། །དེ་བས་ན་སྐུ་ཡང་དགོངས་ཏེ་འབྲས་བུ་སྦྱིན་པའི་ཕྱིར་རོ། །ལུང་ནས་ནི་གསང་བའི་པདྨའི་ལྟེ་བའི་རིན་ཆེན་ནང་ན་ཡོད་པ་སྲོག་གི་རླུང་གིས་དགུག་པས་པདྨ་གྱེན་ཞལ་ལྟ་བར་འགྱུར་རོ་ཞེས་གསུངས་སོ། །གྱེན་དུ་ཞལ་འགྲོ་བ་ཙམ་གྱིས་ནི་རྒྱལ་པོའི་སྲས་མོ་རབ་ཏུ་ལང་ཚོ་བབ་པ་ཇི་ལྟར་ལེགས་དགྱེས་བདེ་བ་དེ་བཞིན། རང་བཞིན་དགའ་བ་ཐེ་ཚོམ་མེད་པར་མྱུར་དུ་རྙེད་པར་འགྱུར་རོ། །དེ་རྙེད་པ་ཙམ་གྱིས་ནི་ས་བཅུའི་དབང་ཕྱུག་བྱང་ཆུབ་སེམས་དཔའ་ལྟ་བུ་རང་དབང་གི་སྤྱོད་པ་ལ་ཞུགས་སོ། །དེ་ནི་གཅིག་པུ་ཚངས་པར་སྤྱོད་པ་ཐམས་ཅད་ཀྱི་དབུས་སུ་ཚངས་པར་སྤྱོད་པའོ། །རང་གི་ཚངས་པར་སྤྱོད་པ་བྱེད་པའི་ཕྱིར་རོ། །ཚངས་པའི་སྒྲ་ནི་བྱང་ཆུབ་ཀྱི་སེམས་སོ། །སྤྱོད་པ་ནི་ཨ་ཀུན་དུ་གཟུང་བར་བྱེད། བོར་བར་མི་བྱེད་དོ། །དེ་བས་ན་ཚངས་པར་སྤྱོད་པ་ཆེན་པོའོ། །གྱེན་དུ་བྱང་ཆུབ་ཀྱི་སེམས་ཀྱི་ཕྱིར་རོ། །དེ་ནི་བླ་མ་རབ་ཀྱི་བཀའ་དྲིན་གྱིས་རྣལ་འབྱོར་མང་པོ་རྒྱལ་པོ་ཨིནྡྲ་བྷཱུ་ཏི་ལ་སོགས་པ་དུས་རིང་པོ་མ་ལོན་པར་ཕྱག་རྒྱ་ཆེན་པོའི་དངོས་གྲུབ་ཐོབ་པོ། །དེ་ནི་གསང་མཆོག་དེ་ཁོ་ཉིད། །བརྗོད་པ་ཡིས་ནི་འཇིགས་པའི་ཕྱིར། །གང་ཞིག་བྲེ་མོ་གཏམ་ཙམ་བྲིས། །མཁས་པ་ཆེན་པོས་བཟོད་པར་མཛད། །དེ་སྐད་ཤེས་ན་ཁྱེད་ཅག་ཀུན། །སྐྱེས་བུ་ཡང་དག་དགའ་བ་ཡིས། །འདི་ཡི་དོན་ནི་འབད་པས་ཟུང༌། །བྱིས་པ་འདྲ་བའི་ངག་ཡིན་
ཡང༌། །དེ་བཞིན་ངེས་པར་འབྲས་འཕེལ་སྦྱིན། །དགེ་བ་ཡང་དག་རྨད་བྱུང་ངོ༌། །བླ་མའི་བཀའ་ལས་བདག་གིས་ནི། །ཅུང་ཟད་ཀྱིས་མྱོང་དོན་མེད་མིན། །སྔོན་མེད་པ་ནི་འདིར་བྲིས་མིན། །གང་ཞིག་རྒྱུད་ལ་མཐོང་བ་མིན། །འདི་བྱས་པ་ཡི་ཡིག་དོན་ནི། །གང་ཞིག་བདག་གིས་རྙེད་པ་ཡིས། །སྲིད་པར་བསྡམས་ཤིང་བཅིངས་པ་ཀུན། །དེ་ཡིས་འགྲོ་བ་འགྲོལ་བར་ཤོག །གང་ཞིག་བརྡ་བྱེད་མཆོག་གི་རྨད་བྱུང་རྟོགས་དཀའ་བའི། །དེ་ཉིད་རང་བཞིན་སྦྱོར་བའི་ངོ་བོ་མཉམ་སྦྱོར་གནས། །དགའ་རྒྱས་བདེ་ཆེན་ཉིད་བཞུགས་དཔའ་བོ་རབ་ཀྱི་བླ། །དཔལ་ལྡན་རིན་ཆེན་རྡོ་རྗེ་དེ་ལ་བདག་ཕྱག་འཚལ། །ཨེ་མའོ་ཤཱ་ཀྱའི་རྒྱལ་པོ་དཔལ་རྡོ་རྗེ་སེམས་དཔས་བསྡུས་པའི་རྒྱུད་རྒྱལ་ཀུན་གྱི་རྒྱལ་ཆེན་རྣལ་འབྱོར་མ་རྒྱུད་རྣམས་ཀྱི་རྒྱལ་པོའི་དབང་པོའི་འོད་གསལ་རྒྱ་མཚོ་ཕྱག་རྒྱ་ཆེན་པོ་ཐིག་ལེའི་རྒྱུད་ཆེན་ངོ་མཚར་རབ་རྨད་ཆེ། །ཨེ་མའོ་རྒྱལ་ཆེན་ཨིནྡྲ་བྷཱུ་ཏི་རྣལ་འབྱོར་དབང་ཕྱུག་གྲུབ་པ་བརྙེས་པར་མ་ཆད་པ་ཡི་རིམ་པའི་སློབ་དཔོན་མཁས་ཆེན་གྲུབ་ཐོབ་རིན་ཆེན་རྡོ་རྗེ་སློབ་མ་དམ་པ་རྣལ་འབྱོར་དབང་ཕྱག་ཤེས་རབ་དཔལ་གསང་རྨད་བྱུང་དམ་པ་ཆེ། །ཨེ་མའོ་ཕྱག་རྒྱ་ཆེན་པོའི་ནམ་མཁས་དགའ་བའི་རྒྱ་མཚོར་ཤེས་རབ་སྐྱེས་བུས་དཔལ་གྱི་སྲུབ་ཤིང་སྦྱོར་དྲུག་གསང་བའི་བཤད་པ་བཞི་ཡི་སྲུབ་ཐབས་བསམ་གཏན་བསྲུབས་པས་རང་བཞིན་དགའ་བའི་བདུད་རྩིའི་འབྲས་བུ་དགའ་སྤྱན་གསལ་ཐིག་ངོ་མཚར་ཆེ། །ཨེ་མའོ་དེ་ཡི་ཞབས་ཀྱི་པད་རེག་རིན་ཆེན་རྒྱལ་མཚན་བདག་གིས་གཞན་དོན་ལྷུར་བྱས་དད་ཅིང་གུས་པས་མང་དུ་གསོལ་བཏབ་དྲི་མེད་དགེ་བས་འགྲོ་ཀུན་རང་འོད་གསལ་བས་ངེས་པར་རོལ་པར་ཤོག་ཅིག་རྨད་མཆོག་ཆེ། །དགའ་བའི་སྤྱན་ཞེས་བྱ་བའི་རྒྱ་ཆེར་འགྲེལ་པ་སློབ་དཔོན་ཆེན་པོ་རྣལ་འབྱོར་གྱི་དབང་ཕྱུག་ཤེས་རབ་དཔལ་གསང་བའི་ཞལ་སྔ་ནས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཆེན་པོ་པྲ་ཛྙཱ་ཤྲཱི་གུཔྟ་ཉིད་དང༌། ཞུ་ཆེན་གྱི་ལོ་ཙཱ་བ་བནྡེ་རིན་ཆེན་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།