དུར་ཁྲོད་བརྒྱད།
རཏྣ་ཤྲི་མི་ཏྲས་དང་ཤཱཀྱ་ཡེ་ཤེས་ཀྱིས་མཛད།
རྒྱ་གར་སྐད་དུ། ཨཥྚ་ཥྨ་ཤ་ན་ནཱ་མ། བོད་སྐད་དུ། དུར་ཁྲོད་བརྒྱད་ཅེས་བྱ་བ་དཔལ་ཧེ་རུ་ཀ་ལ་ཕྱག་འཚལ་ལོ། །ཧེ་རུ་ཀ་དཔལ་དཔའ་བོ་ནི། །ལྷན་ཅིག་སྐྱེས་དགའ་མཛེས་པ་དང༌། །བཟའ་དང་གྲོལ་བའི་འབྲས་རབ་སྩོལ། །བླ་མའི་ཞབས་པད་ཕྱག་འཚལ་ནས། །དུར་ཁྲོད་ཤིང་དང་ཕྱོགས་སྐྱོང་དང༌། །ཀླུ་བ་དག་ཆུ་འདོར་རྣམས་ཀྱི་ནི། །མིང་དང་ཕྱོགས་དབྱེ་གནས་པ་ནི། །བདག་ཉིད་དྲན་ཕྱིར་བྲི་བར་བྱ། །གཡོན་གྱི་ཤར་སོགས་ཕྱོགས་རྣམས་སུ། །གཡས་ཀྱི་དབང་ལྡན་ཕྱོགས་རྣམས་ལ། །རྡོ་རྗེ་གུར་གྱི་ནང་དུ་ནི། །བཞི་བཞིར་སྦྱོར་བར་བྱ་བ་ཉིད། །གཏུམ་མཆོག་ག་ཧ་ར་ཉིད་དང༌། །འབར་བ་འཁྱིམ་པ་ཐོད་པ་ཅན། །རྣམ་འཇིགས་ཤར་ལ་སོགས་པ་ཡི། །ཕྱོགས་སུ་གཡོན་གྱིས་ཡང་དག་གནས། །ཨཊྚ་ཧ་ས་དབང་ལྡན་དུ། །བྱིན་ཟ་རུ་ནི་ལཀྵི་ཅན། །འཇིག་པའི་མུན་པ་བདེན་བྲལ་དུ། །རླུང་དུ་ཀཱི་ལི་ཀཱི་ལའི་སྒྲས། །རོ་ལངས་འབྱུང་པོའི་ཚོགས་ཀྱིས་དང༌། །ཅེ་སྦྱང་སྒྲ་ཡི་འཇིགས་པ་ཡིས། །རྡོ་རྗེ་གུར་གྱི་ནང་དུ་ནི། །དུར་ཁྲོད་རྣམས་ནི་འཇིགས་པའི་གཟུགས། །འདི་ཉིད་ཀྱི་ནི་རིམ་པ་འདིར། །དུར་ཁྲོད་བརྒྱད་པོ་རྣམས་ནི་གནས། །ཤིང་དང༌། ཕྱོགས་སྐྱོང་དང༌། ཀླུའི་དབང་པོ་དང༌། ཆར་སྤྲིན་གྱི་དབང་པོ་དེ་རྣམས་གང་ཞེ་ན། ཤི་ར་ཤ་དང་ཨ་ཤྭདྠ། །ཀཾ་ཀེལླེ་ཤིང་ཙུ་ཏ་ཉིད། །གོང་མཚུངས་བ་ཏ་ཀ་རཉྫ། །དབང་པོ་དང་ནི་ནོར་སྦྱིན་ཉིད། །ཀླུ་དབང་དེ་ནས་གཤིན་རྗེ་བདག །དབང་ལྡན་དེ་ནས་བྱིན་ཟ་བདག །སྲིན་པོའི་དབང་པོ་རླུང་བདག་ཉིད། །ནོར་རྒྱས་བུ་དང་འཇོག་དེ་ཉིད། །སྟོབས་ཀྱི་རྒྱུ་དང་པདྨ་ཉིད། །པད་ཆེན་ཧུ་ལུ་ཧུ་ལུ་དང༌། །རིགས་ལྡན་དང་ནི་དུང་སྐྱོང་ངོ༌། །གརྫི་གྷུརྨི་ཏོ་འཇིགས་དང༌། །ཨ་པ་ཏོ་དང་གྷ་ན་ཉིད། །བཪྵ་ན་དང་བུ་ར་ཎ། །གཏུམ་
པ་འདི་རྣམས་ཆར་སྤྲིན་བདག །རྒྱ་གར་གྱི་མཁན་པོ་རཏྣ་ཤྲཱི་མི་ཏྲ་དང༌། དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བ།།