ལྷན་ཅིག་སྐྱེས་པའི་རྣལ་འབྱོར་དམ་པའི་འགྲེལ་པ་སྙིང་པོ་རབ་ཏུ་གསལ་བར་བྱེད་པ།
བྲམ་ཟེ་ཐ་ག་ནས་མཛད།
རྒྱ་གར་སྐད་དུ། ས་ཧ་ཛ་སདྱོ་ག་བྲྀཏྟི་གརྦྷ་པྲ་ཀཱ་ཤེ་ནཱ་མ། བོད་སྐད་དུ། ལྷན་ཅིག་སྐྱེས་པའི་རྣལ་འབྱོར་དམ་པའི་འགྲེལ་པ་སྙིང་པོ་རབ་ཏུ་གསལ་བར་བྱེད་པ་ཞེས་བྱ་བ། དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ། །མཆོག་གི་གནས་ནི་སྤྱོད་ཡུལ་གང་འགྱུར་བ། །སྣ་ཚོགས་རྣམ་རྟོག་དྲ་བའི་མི་གཙང་ཁེངས། །དྲི་མེད་མཐའ་ཡས་གོ་འཕང་འཇིག་རྟེན་ཐོབ། །རྡོ་རྗེ་མགོན་དེ་མི་མཉམ་མགོ་བོས་འདུད། །ཀུན་རྫོབ་དོན་དམ་དབྱེ་བས་རྟོགས་འགྱུར་བ། །གཉིས་ཏེ་གཉིས་མེད་ངོ་བོ་མི་བཟད་པ། །གང་ལས་ལྷན་སྐྱེས་ཉམས་མྱོང་གོ་འཕང་ཐོབ། །ལྷ་མཆོག་མཆོད་སྦྱིན་དེ་ལ་བདག་ཕྱག་འཚལ། །དགྱེས་པའི་རྡོ་རྗེའི་རྒྱུད་ལས་བྱུང༌། །དཔལ་ལྡན་རིན་ཆེན་འབྱུང་གནས་མཛད། །བློ་བཟང་རྣམ་དཔྱད་རྣམ་དག་པའི། །ལྷན་སྐྱེས་རྣལ་འབྱོར་དབྱེ་བར་བྱ། །དེ་ལ་རེ་ཞིག་སློབ་དཔོན་གྱིས་དགྱེས་རྡོར་རྒྱུ་མཐུན་དང་བཅས་དམ་པ་ནི་ཞེས་བྱ་བ་ལ་སོགས་པའི་མཐུན་པའི་ཕྱག་འཚལ་བའི་ཚིགས་སུ་བཅད་པའི་སྒོ་ནས་རབ་ཏུ་བྱེད་པ་མ་ལུས་པའི་བརྗོད་པར་བྱ་བ་བསྟན་པ་ཡིན་ཏེ་མདོར་བསྡུས་པའི་དོན་ཏོ། །དེའི་རྒྱས་པར་བཤད་པ་འདི་ཡིན་ཏེ། །རྣལ་འབྱོར་མའི་འཁོར་ལོ་དམ་པ་ལ་རབ་ཏུ་བཏུད་དེ་ཞེས་བྱ་བ་ནི་ཕྱག་འཚལ་ནས་རྫོགས་པའི་རིམ་པའི་ཕྱོགས་སུ་མངོན་པར་རྟོགས་པ་ཇི་ལྟར་འགྱུར་བ་དེ་ལྟར་བདག་
གིས་བཤད་པར་བྱའོ་ཞེས་ཚིག་གི་འབྲེལ་པའོ། །སྔོན་དུ་ནི་ཕྱིན་ཅི་མ་ལོག་པར་རྣལ་འབྱོར་མའི་འཁོར་ལོ་དང༌། དགྱེས་པ་རྡོ་རྗེའི་རང་བཞིན་རབ་ཏུ་བྱེད་པ་གང་གིས་རྟོགས་པར་འགྱུར་བ་དེ་ནི་མངོན་པར་རྟོགས་པའོ། །རྫོགས་པའི་རིམ་པ་ནི་རང་བཞིན་གྱིས་གྲུབ་པའི་རིམ་པའོ། །རྣལ་འབྱོར་མའི་འཁོར་ལོ་དེ་ཇི་ལྟ་བུ་ཡིན་ཞེ་ན། དགྱེས་རྡོར་རྒྱུ་མཐུན་དང་བཅས་ཞེས་པ་ནི་རྒྱུ་མཐུན་ནི་རྒྱུ་དང་འདྲ་བ་སྟེ་དེ་དང་བཅས་པའོ། །དགྱེས་རྡོར་ཉིད་རྒྱུ་མཐུན་ཏེ། དེ་དང་བཅས་པར་ཤེས་པར་བྱའོ། །དམ་པ་ཞེས་བྱ་བ་ནི་ཆོས་ཀྱི་སྐུའི་ལྷན་ཅིག་སྐྱེས་པའི་རང་བཞིན་ནོ། །དེ་གང་གི་ཕྱིར་འདིར་ནི་རྒྱལ་མཚན་དང་མཆོག་གི་ཡན་ལག་ཡང་དག་པར་རེག་པས་བདེ་བ་ཆེན་པོའི་འཁོར་ལོ་ལ་འཛག་ཅིང་བྱང་ཆུབ་སེམས་ཀྱི་ཐིག་ལེའི་དགའ་བ་ལ་སོགས་པའི་རང་བཞིན་ཉིད་ཉམས་སུ་མྱོང་སྟེ་དཔེའི་ལྷན་ཅིག་སྐྱེས་པའི་བདེ་བ་ཉམས་སུ་མྱོང་བ་གང་ཡིན་པ་དེ་ནི་ལོངས་སྤྱོད་རྫོགས་པའི་སྐུའི་ལྷན་ཅིག་སྐྱེས་པ་སྟེ་དེ་ཉིད་དགྱེས་རྡོར་ཞེས་བྱ་བར་བཤད་པ་ཡིན་ནོ། །དེ་ཡང་དཔེ་ལས་བྱུང་བའི་ངོ་བོ་ཆོས་ཀྱི་སྐུའི་ལྷན་ཅིག་སྐྱེས་པའི་རང་བཞིན་གྱི་རྣལ་འབྱོར་མའི་འཁོར་ལོ་རྣམ་གྲངས་ཅན་གྱི་རྒྱུ་མཐུན་ཞེས་བཤད་པ་ཡིན་ནོ། །ཇི་སྐད་དུ། དེ་དག་ལས་ནི་མཁའ་དང་མཚུངས། །གང་དེ་སྐྱོབ་པ་ཆོས་སྐུ་ཡིན། །གང་ཞིག་ཟླ་བ་རྫོགས་འདྲ་བ། །དེ་ནི་ལོངས་སྤྱོད་རྫོགས་སྐུའོ། །ཞེས་བྱ་བ་དང༌། དེ་ཉིད་རྣལ་འབྱོར་མའི་འཁོར་ལོ། །གང་ཞིག་ཡེ་ཤེས་གཉིས་སུ་མེད། །ཅེས་བྱ་བ་ལ་སོགས་པ་འོག་ནས་གསུངས་པའི་ཕྱིར་རོ། །དེ་ལྟར་ན་རྡོ་རྗེ་ནོར་བུའི་རྩེ་མོར་སྐར་མའི་བདག་པོར་ཕྱིན་ནི་ལོངས་སྤྱོད་རྫོགས་པའི་སྐུའི་ལྷན་ཅིག་སྐྱེས་པ་ཉམས་སུ་མྱོང་བའོ། །གང་ཞིག་རྣམ་པར་མི་རྟོག་པའི་ཆོས་དབྱིངས་ཉམས་སུ་མྱོང་བ་དེ་ནི་ཆོས་ཀྱི་སྐུའི་ལྷན་ཅིག་སྐྱེས་པའོ། །རི་བོང་གིས་མཚན་པ་རྡོ་རྗེ་ལས་འབྱུང་ཞིང་མཚོ་སྐྱེས་ཀྱི་ནང་དུ་གནས་ན་དེའི་ཚེ་སྤྲུལ་པའི་སྐུ་དང་སྦྱར་བར་བྱ་སྟེ། སྔ་མའི་སློབ་དཔོན་རྣམས་ཀྱི་སྐུ་གསུམ་བསྟན་པའི་གདམས་ངག་ཡིན་ནོ། །ཕྱག་འཚལ་བའི་ཚིགས་སུ་བཅད་པ་འདི་ལ་ཡང་འབྲེལ་བ་ལ་སོགས་པ་རྟོགས་པར་བྱ་སྟེ། རྫོགས་པའི་རིམ་པའི་མངོན་
པར་རྟོགས་པ་ནི་བརྗོད་པ་དང་རྣལ་འབྱོར་མའི་འཁོར་ལོ་དང་དགྱེས་པའི་རྡོ་རྗེ་དག་བརྗོད་པར་བྱའོ། །དེ་དག་ལ་སྤྱིའི་མཚན་ཉིད་ཀྱི་སྒོ་ནས་ཐབས་དང་ཐབས་ལས་བྱུང་བའི་དངོས་པོའི་འབྲེལ་པའོ། །ཀུན་རྫོབ་དང་དོན་དམ་པའི་རང་བཞིན་གྱིས་ལྷན་ཅིག་སྐྱེས་པའི་རྣམ་པ་གཉིས་ཉམས་སུ་མྱོང་བ་ནི་དགོས་པའོ། །བདག་ཉིད་ཀྱིས་ལྷན་ཅིག་སྐྱེས་པ་ཉམས་སུ་མྱོང་ནས་གཞན་རྣམས་ལ་ཡང་དེ་ཉིད་རབ་ཏུ་བསྟན་པས་བྱང་ཆུབ་བསྒྲུབ་པ་ནི་དགོས་པའི་དགོས་པའོ། །ད་ནི་སློབ་དཔོན་གྱིས་བརྟག་པ་དང་པོའི་ལེའུ་བརྒྱད་པ་ལས་གསུངས་པའི་རྫོགས་པའི་རིམ་པ་བཤད་པར་བྱ་བའི་ཕྱིར། མཁའ་དབྱིངས་བྷ་གར་བསམས་ནས་ནི། །དབུས་སུ་བསྒོམ་པར་བྱ་བ་སྟེ། །འཁོར་ལོ་སྔོན་འགྲོ་ཅི་རིགས་པར། །ལྷ་རྣམས་ཇི་ལྟར་བྱུང་བའོ། །ཞེས་བྱ་བ་གསུངས་ཏེ། དེའི་བསྐྱེད་པའི་རིམ་པའི་དོན་ནི་འདི་ཡིན་ཏེ། སྟོང་པ་ཉིད་བསྒོམ་པའི་ཕྱི་ནས་ཆོས་འབྱུང་གི་ཕྱག་རྒྱ་རྣམ་པར་བསྒོམས་ལ། དེའི་སྟེང་དུ་འཁོར་ལོ་སྔོན་འགྲོ་ཅི་རིགས་པ། ལྷ་རྣམས་ཞེས་བྱ་བ་ནི། །འཁོར་ལོ་ལ་སོགས་པའི་དཀྱིལ་འཁོར་བཞི་ཡང་དག་པར་བསམས་ཏེ། དེའི་འོག་ཏུ་རྣལ་འབྱོར་པས་བྱ་བའི་ཚོགས་བྱ་བ་ཡིན་ནོ། ཞེས་མདོར་བསྟན་པའོ། །ཇི་ལྟར་འབྱུང་བའི་སྒྲས་ནི་སྒོམ་པ་པོ་བསྟན་ནོ། །དེ་ཅིའི་ཕྱིར་གང་དཀྱིལ་འཁོར་ལ་སོགས་པའི་རིམ་པས་དེ་དང་དེ་སྒོམ་པ་པོའི་སེམས་དང་གཉིས་སུ་མེད་པའི་རྣམ་པ་ཅན་ནོ། །ཇི་སྐད་དུ། འཁོར་ལོ་ས་དང་སྔོན་འགྲོ་ཆུ། །ཅི་རིགས་པ་ནི་མི་ཡིན་ཏེ། ལྷ་རྣམས་ཀླུ་ནི་ཆེན་པོ་སྟེ། །ཇི་ལྟར་བྱུང་བ་བསྒོམ་པའོ། །ཞེས་བྱ་བ་བདག་མེད་པའི་ལེའུ་བརྒྱད་པ་ལས་གསུངས་སོ། །འདིར་ཡང་འཁོར་ལོ་ལ་སོགས་པའི་སྒྲ་རྣམས་ཀྱིས་ས་ལ་སོགས་པ་ནི་ཆོས་ཀྱི་བརྡ་འམ་རིག་པའི་སྒོ་ནས་མུ་ཏིག་གི་ཕྲེང་བ་ལས་བསྟན་པ་སྟེ། དེ་ཉིད་ལས་ཤེས་པར་བྱའོ། །དེ་ནི་དྲང་བའི་དོན་ཏོ། །དེའི་དོན་ནི་འདི་ཡིན་ཏེ། བྱ་བ་ལ་སོགས་པས་རྒྱས་པར་བཤད་པའི་སྒོ་ནས་ངེས་པའི་དོན་བཤད་པར་བྱ་བའི་ཕྱིར། གནས་ལ་བྱེད་པ་ཞུགས་ནས་ནི། །ཞེས་བྱ་བ་ལ་མཚོ་སྐྱེས་ལ་རྒྱལ་མཚན་འཇུག་སྟེ། སྒྲུབ་པ་པོ་ཡིས་བྱ་བ་བྱ། །ཞེས་པ་ནི། སྒྲུབ་པའི་དུས་སུ་འགྲོ་བ་
དང་འོང་བ་ལ་སོགས་པའི་བདེ་བས་བདེ་བར་གྱུར་པའི་བྱ་བ་དག་རྣལ་འབྱོར་པས་བྱ་བ་ཡིན་ནོ། །དེའི་རྗེས་ལ་སྒྲུབ་པ་པོའི་ཡན་ལག་ཉམས་སུ་མྱོང་བའི་སྐད་ཅིག་མ་ལ་འབྲས་བུ་རྣལ་འབྱོར་མའི་འཁོར་ལོ་ཞེས་པ་ནི་དང་པོའི་ཡན་ལག་གསུམ་རྒྱུ་བའི་རང་བཞིན་དུ་ཉམས་སུ་མྱོང་ལ། བླ་ན་མེད་པ་དང་གཉིས་སུ་མེད་པའི་བདེ་བ་ཆེན་པོའི་རང་བཞིན་ཆོས་ཀྱི་སྐུའི་ལྷན་ཅིག་སྐྱེས་པའི་རྣམ་གྲངས་ཅན། རྣལ་འབྱོར་མའི་འཁོར་ལོ་ཞེས་བྱ་བའི་སྒྲས་བྱེད་པར་བྱ་བའི་རྣམ་པར་མི་རྟོག་པའི་ཆོས་ཉིད་ཀྱི་ངོ་བོ་འབྲས་བུ་ཡིན་ནོ་ཞེས་སྟོན་ཏོ། །དེའི་རྒྱུ་མཐུན་ཧེ་ཏུ་ཀའོ། །ཞེས་བྱ་བ་ལ་དཔེ་ལས་བྱུང་བའི་རང་བཞིན་གྱི་ཆོས་ཀྱི་སྐུའི་ལྷན་ཅིག་སྐྱེས་པ་གང་ཡིན་པ་དེའི་རྒྱུ་མཐུན་ནི་རྒྱུ་དང་མཐུན་པའི་འབྲས་བུ་སྟེ། དཔེའི་རང་བཞིན་གྱི་ལོངས་སྤྱོད་རྫོགས་པའི་སྐུའི་ལྷན་ཅིག་སྐྱེས་པའི་མཚན་ཉིད་ཧེ་རུ་ཀ་ནི། །ཀུན་རྫོབ་ཀྱི་བྱང་ཆུབ་སེམས་ཀྱི་ངོ་བོ་ཡིན་ནོ་ཞེས་པའི་ཐ་ཚིག་གོ། ཆོས་ཀྱི་སྐུ་ལས་ལོངས་སྤྱོད་རྫོགས་པ་དང་སྤྲུལ་པའི་སྐུ་དག་སྔོན་གྱི་སྨོན་ལམ་གྱི་སྟོབས་ཀྱིས་འབྱུང་ངོ་ཞེས་ཐེག་པ་ཆེན་བོ་ལ་ཡང་བསྟན་པ་ཁོ་ན་ཡིན་ནོ། །གཞན་དུ་ཡང་སྐྱེས་བུ་གནས་པ་ཙམ་གྱིས་ནི། །ཡིད་བཞིན་ནོར་བུ་འདྲ་བ་སྟེ། །རྩིག་པ་ལ་སོགས་བསྟན་པ་རྣམས། །ཅི་འདོད་པ་ཡིས་འབྱུང་བ་ཡིན། །ཞེས་བསྟན་ཏོ། །དེ་བས་ན་འདིར་ཡང་དཔེ་ནི། ལྷན་ཅིག་སྐྱེས་པའི་བདག་ཉིད་ཀྱིས་ལོངས་སྤྱོད་རྫོགས་པའི་སྐུའི་དཔེ་ལས་བྱུང་བའི་ཕྱིར། ཆོས་ཀྱི་སྐུའི་རྒྱུད་མཐུན་དུ་བཤད་པ་ཡིན་ནོ། །འདིར་ཡང་ཁྱབ་པར་བྱེད་པའི་རང་བཞིན་གྱི་ཆོས་ཀྱི་སྐུས་ལོངས་སྤྱོད་རྫོགས་པའི་སྐུ་ཁྱབ་པ་སྟེ། ཆོས་ཀྱི་སྐུའི་རྒྱུ་མཐུན་ཉིད་དུ་བཤད་པ་ཡིན་ནོ། །བསྐྱེད་པའི་ཕྱོགས་སུ་ཞེས་བྱ་བ་ལ་སོགས་པས་དགའ་བ་ལ་སོགས་པའི་སྐད་ཅིག་མའི་མཚན་ཉིད་དང་མི་མཐུན་པའི་ལྷན་ཅིག་སྐྱེས་པའི་རང་བཞིན་སོ་སོར་སྟོན་པ་ཡིན་ཏེ། འདིར་བསྐྱེད་པའི་ཕྱོགས་ནི་དགའ་བ་ལ་སོགས་པ་རྣམས་འབྱུང་བའི་རང་བཞིན་ཉིད་དུ་འདོད་པ་ཡིན་ཏེ། ཟླ་བ་དང་རྡོ་རྗེ་ལ་སོགས་པ་ཡོངས་སུ་གྱུར་པ་ལས་འབྱུང་བའི་ལྷའི་མཚན་ཉིད་ནི་མ་ཡིན་ནོ། །དེ་གང་གི་ཕྱིར་བདེ་བ་ཆེན་པོའི་འཁོར་ལོ་
ལས་བྱང་ཆུབ་སེམས་ཀྱི་ཟླ་བ་འཛག་ན་འདབ་མ་བཅུ་དྲུག་གི་པདྨའི་གནས་སུ་ཕྱིན་པའི་ཚེ་སྐད་ཅིག་མ་དང་པོར་དགའ་བ་འཆར་བ་ཡིན་ནོ། །དེའི་རྗེས་ལ་ཡན་ལག་ཐམས་ཅད་ཀྱི་ཚིགས་ཁྱབ་པའི་ཚེ། སྐད་ཅིག་མ་གཉིས་པ་མཆོག་དགའ་འཆར་བ་ཡིན་ནོ། །དེ་ནས་རྡོ་རྗེ་རྩེ་མོར་ཕྱིན་པའི་ཚེ་སྐད་ཅིག་མ་གསུམ་པ་ལ་ལྷན་ཅིག་སྐྱེས་པའི་དགའ་བ་འཆར་བ་ཡིན་ནོ། །དེའི་འོག་ཏུ་མཆོག་ཏུ་ཡན་ལག་ལ་སྤྲོ་བའི་ཚེ་སྐད་ཅིག་མ་བཞི་པ་ལ་དགའ་བྲལ་འཆར་བ་ཡིན་ཏེ། དགའ་བ་རྣམས་ཀྱི་བསྐྱེད་པའི་ཕྱོགས་དེ་ལྟ་བུར་ཤེས་པར་བྱའོ། །དེ་ནི་ལྷན་ཅིག་སྐྱེས་པའི་དོན་དམ་པ་དང་ཀུན་རྫོབ་ཀྱི་བདེན་པ་རྣམ་པ་གཉིས་བསྟན་པར་བྱ་བའི་ཕྱིར། དེ་ཉིད་འདིར་ནི་རྣམ་པ་གཉིས། །འབྲས་བུ་རྣམ་པ་གཉིས་སུ་འདོད། །གཅིག་ནི་ནམ་མཁའ་དང་མཚུངས་པ། །གཞན་ནི་ཟླ་བ་རྫོགས་པ་བཞིན། །ཞེས་བྱ་བ་གསུངས་ཏེ། དང་པོའི་ཚིག་རྐང་གཉིས་ཀྱིས་མདོར་བསྟན་པ་དང༌། དེ་ནས་ཚིག་རྐང་གཉིས་ཀྱིས་རྒྱས་པར་བསྟན་པའོ། །དེ་དག་ལས་ནི་མཁའ་དང་མཚུངས། །ཞེས་བྱ་བ་ལ་སོགས་པའི་ཚིགས་སུ་བཅད་པས་སླར་ཡང་བཤད་པར་བྱ་སྟེ། འདིར་མཁའ་དང་མཚུངས་པ་ནི་གང་ཞིག་གཟུང་བ་དང༌། འཛིན་པ་གཉིས་དང་བྲལ་བ་རྫས་མ་ཡིན་པའི་ངོ་བོ་བདེ་བ་ཆེན་པོ་རང་རིག་པའི་ཆོས་ཉིད་ཉམས་སུ་མྱོང་བའི་མཚན་ཉིད་གང་ཡིན་པ་དེ་ནི་སྐྱོབ་པ་རྣམས་ནི་ཕུང་པོ་ལྔའི་རང་བཞིན་དུ་བསྡུ་བའི་བཅོམ་ལྡན་འདས་སངས་རྒྱས་རྣམས་ཀྱི་ཆོས་ཀྱི་སྐུ་ནི་ཁྱབ་བྱེད་ཀྱི་ངོ་བོ་ཤིན་ཏུ་རྣམ་པར་དག་པའི་དེ་བཞིན་ཉིད་ཀྱི་བདག་ཉིད་དཔེ་ལས་བྱུང་བའི་ལྷན་ཅིག་སྐྱེས་པའི་བདེ་བ་ཆེན་པོའི་མཚན་ཉིད་དུ་བཤད་པ་ཡིན་ནོ། །གང་ཞིག་ཟླ་བ་རྫོགས་འདྲ་བ། །ཞེས་པ་ནི་དཔེའི་ངོ་བོ་ལྷན་ཅིག་སྐྱེས་པའི་བདེ་བ་རྫས་ཀྱི་མཚན་ཉིད་གང་ཡིན་པ་དེ་ནི་ལོངས་སྤྱོད་རྫོགས་པའི་སྐུའོ་ཞེས་བྱ་བ་ལ་ལོངས་སྤྱོད་རྫོགས་པས་ནི་ལོངས་སྤྱོད་རྫོགས་པ་སྟེ། དཔེའི་བདེ་བའི་རང་བཞིན་སངས་རྒྱས་རྣམས་ཀྱི་ལོངས་སྤྱོད་རྫོགས་པའི་སྐུ་ཡིན་ནོ་ཞེས་སྟོན་ཏོ། །དེ་ཉིད་རྣལ་འབྱོར་མའི་འཁོར་ལོ་ཞེས་བྱ་བ་ལ་སོགས་པས་འདས་མ་ཐག་ཏུ་བཤད་པའི་དོན་ཁོ་ན་རབ་ཏུ་བསྟན་པ་
སྟེ། གཞན་དུ་བཤད་པར་མི་བྱའོ། །ད་ནི་ལྷན་ཅིག་སྐྱེས་པའི་བསྒོམ་པའི་ཡན་ལག་བཤད་པར་བྱ་བའི་ཕྱིར། འདིར་མངོན་པར་རྟོགས་པ་འདི་ཡིན་ཏེ་ཞེས་བྱ་བ་ལ་སོགས་པ་གསུངས་ཏེ། དཔའ་བོ་གཅིག་པུ་ནི་རྣམ་པར་རྟོག་པ་ཐམས་ཅད་ཀྱི་དྲ་བ་དང་བྲལ་བ་རྣལ་འབྱོར་པ་གང་ཡིན་པ་དེ་ལ་འདི་སྐད་ཅེས་བྱའོ། །བདག་ཉིད་ཧེ་རུ་ཀར་མོས་ཤིང་ཞེས་བྱ་བ་ནི་བསྐྱེད་པའི་རིམ་པ་བསྒོམ་པའི་རྣལ་འབྱོར་པས་རང་གི་བདག་ཉིད་ལྷག་པར་མོས་པའི་བདག་ཉིད་ཀྱི་རྣལ་འབྱོར་གྱིས་ཧེ་རུ་ཀའི་རང་བཞིན་དུ་ཡང་དག་པར་བསམས་ལ། ཡིད་ཀྱིས་གང་ཡང་རུང་བ་བཀུག་སྟེ། ཞེས་བྱ་བ་ནི་གང་ཞིག་སྔར་རྣལ་འབྱོར་པ་དགའ་བ་ལ་ཞུགས་པའི་འཁྱུད་པ་ལ་སོགས་པས་སེམས་གཟུང་ཞིང་ཤིན་ཏུ་དགའ་བ་ལ་སོགས་པ་བསྐྱེད་པའི་རྒྱུར་གྱུར་པ་གང་ཡིན་པ་དེ་ཉིད་ཡེ་ཤེས་ཀྱི་ཕྱག་རྒྱའི་ངོ་བོ་བདག་མེད་མའི་རང་བཞིན་དུ་བསམས་ཏེ། ཀཀྐོ་ལ་བོ་ལའི་རིལ་པའམ། ཞེས་བྱ་བ་ནི་ཡིད་ཀྱིས་སྤྲུལ་པའི་རིག་མ་གང་ཡིན་པ་དེའི་ཀཀྐོ་ལར་བོ་ལའི་རོལ་པ་བསྒོམ་ཞིང༌། དོན་དམ་པ་ནི་གཉིས་སུ་མེད་པའི་ཡེ་ཤེས་མངོན་པར་ཕྱོགས་པར་བྱའོ་ཞེས་གོང་མ་དང་འབྲེལ་ལོ། །འདི་ཙམ་གྱིས་ནི་ཡེ་ཤེས་ཀྱི་ཕྱག་རྒྱའི་སྦྱོར་བ་བསྟན་ཏོ། །ཡང་ན་བོ་ལའི་བུ་གར་ཞེས་བྱ་བ་ལ་སོགས་པས་ཕྱག་རྒྱ་ཆེན་པོའི་མན་ངག་བཤད་པར་བྱ་སྟེ། རང་གི་སྙིང་ག་དང་ལྟེ་བ་ལས་འབྱུང་བའི་ཐབས་དང་ཤེས་རབ་ཀྱི་རྣམ་པར་རོལ་པ་བསྒོམ་པ་ཞེས་བྱ་བ་ལ་ལྟེ་བ་ནི་སྤྲུལ་པའི་འཁོར་ལོའི་ལྟེ་བ་སྟེ། དེ་ལ་གནས་པའི་ཤེས་རབ་ནི་བཅོམ་ལྡན་འདས་མ་བདག་མེད་མའི་ངོ་བོ་དབྱིངས་ཀྱི་དང་པོའོ། །སྙིང་ག་ལ་གནས་པའི་ཐབས་ནི་པདྨ་འདབ་མ་བརྒྱད་པའི་ལྟེ་བ་ལ་གནས་པའི་དཔལ་ཧེ་རུ་ཀའི་རང་བཞིན་སྤྲིན་གྱི་སྒྲའོ། །རང་གི་ལྟེ་བ་དང༌། སྙིང་ག་ལས་བབས་པ་དེ་དག་ནང་གི་ཤེས་རབ་དང་ཐབས་ཡིན་ཏེ། གསང་བའི་རྡོ་རྗེའི་བུ་གར་ཕྱིན་པ་དང༌། དེ་དག་གི་རྣམ་པར་རོལ་པ་ནི་བདེ་བ་ཆེན་པོ་ཉམས་སུ་མྱོང་བའི་རང་བཞིན་གང་ཡིན་པ་དེ་ཉིད་རྣལ་འབྱོར་པས་བསྒོམ་ཞིང༌། དོན་དམ་པར་མངོན་པར་ཕྱོགས་པར་བྱ་བ་ནི་དེ་དང་རོ་གཅིག་པ་ཉིད་ལ་བརྟེན་པར་བྱའོ་ཞེས་སྟོན་ཏོ། །འདི་ཙམ་གྱིས་ནི་ཕྱག་རྒྱ་ཆེན་
པོའི་སྦྱོར་བ་བསྟན་ཏོ། །ཇི་ལྟར་མངོན་པར་ཕྱོགས་པར་བྱས་པ་ཞེས་བྱ་བ་ལ་སོགས་པ་བླ་ན་མེད་པ་དང་གཉིས་སུ་མེད་པའི་ངོ་བོ་བདེ་བ་ཆེན་པོ་དེ་ཉིད་སྣང་བ་མེད་ཅིང་གསལ་བ་ཙམ་ཞེས་བྱ་བ་ནི་གཟུང་བ་དང་འཛིན་པ་ལ་སོགས་པའི་རྣམ་པར་རྟོག་པའི་རང་བཞིན་གང་ལ་མེད་པ་དེ་ནི་སྣང་བ་མེད་པའོ། །དེ་ལྟ་བུ་ཡིན་ན་ཡང་གསལ་བ་ཙམ་ནི་རང་རིག་པའི་རང་བཞིན་གྱིས་ཡེ་ཤེས་ཀྱི་ཆོས་དང་མ་འདས་པའོ། །མཐའ་ཡས་པ་ཞེས་བྱ་བ་ནི། ཐོག་མ་དང་ཐ་མ་མེད་པའི་རང་བཞིན་གྱིས་རྟོགས་པའི་ཆོས་ཀྱི་སྐུའི་ངོ་བོ་ཇི་སྲིད་ནུས་པ་དེ་སྲིད་དུ་བལྟ་བར་བྱ་བ་ནི་འདིར་ལྟ་བ་ནི་རྒྱུན་མི་འཆད་པར་དེའི་རང་བཞིན་ཡོངས་སུ་ཤེས་པར་བྱའོ། །འདི་ཙམ་གྱིས་ནི་རང་གི་བདག་ཉིད་ལྷན་ཅིག་སྐྱེས་པའི་བདེ་བ་ཆེན་པོའི་རང་བཞིན་དུ་བལྟས་ལ། གཡོ་བ་དང་མི་གཡོ་བའི་དངོས་པོ་ཐམས་ཅད་ཀྱང་དེའི་རང་བཞིན་དུ་བལྟ་བར་བྱའོ་ཞེས་བསྟན་ཏོ། །འདིར་ནི་རིགས་པ་འདི་ཡིན་ཏེ། ཆོས་ཉིད་ནི་ཁྱབ་པར་བྱེད་པ་སྟེ། དེ་ཉིད་ཆོས་ཀྱི་སྐུ་རང་བཞིན་གྱིས་འོད་གསལ་བ་བདེ་བ་ཆེན་པོའི་རང་བཞིན་ནོ། །བདེ་བ་ཆེན་པོ་དེ་ཉིད་ཀྱིས་ཆོས་ཐམས་ཅད་ཁྱབ་པ་སྟེ། ཆོས་རྣམས་དང་ཆོས་ཉིད་ལ་དེའི་བདག་ཉིད་ཀྱི་འབྲེལ་བ་ཡོད་པས་རྒྱུ་བ་དང་མི་རྒྱུ་བའི་དངོས་པོ་ཐམས་ཅད་བདེ་བ་ཆེན་པོའི་རང་བཞིན་དུ་གྲུབ་པ་ཁོ་ན་ཡིན་ནོ། །ཇི་སྐད་དུ་ཆོས་ལས་ཆོས་ཉིད་ཐ་མི་དད་པ་ཡིན་ནོ་ཞེས་གསུངས་སོ། །འོ་ན་གལ་ཏེ་དེ་ལྟར་ཡིན་ན་སྒོམ་པ་དོན་མེད་པ་ཡིན་ནོ་ཞེ་ན། སྨྲས་པ་བློ་བུར་བའི་དྲི་མ་རྣམ་པར་དག་པའི་དབྱེ་བ་དེ་ལ་ཡོད་པ་མ་ཡིན་ཏེ། སྒོམ་པ་དོན་མེད་པ་མ་ཡིན་ནོ། །འདི་ཙམ་གྱིས་ནི་མཉམ་པར་གཞག་པའི་རྣལ་འབྱོར་བསྟན་ཏོ། །ལངས་ནས་ཀྱང་དངོས་པོ་ཐམས་ཅད་ཞེས་བྱ་བ་ལ་སོགས་པས་གཉིས་པ་མཉམ་པར་མ་བཞག་པའི་རྣལ་འབྱོར་གཉིས་པ་བསྟན་ཏོ། །འདིར་ཡང་སྔར་བཤད་པའི་བརྗོད་པར་བྱ་བ་ཁོ་ན་ཡིན་ཏེ་བཤད་ཟིན་ཏོ། །སྲོག་ཆགས་ཐམས་ཅད་བདག་ལས་བྱུང༌། །ཞེས་བྱ་བ་ལ་སོགས་པའི་རྒྱུད་ལས་འབྱུང་བའི་ཚིགས་སུ་བཅད་པ་གཉིས་འདས་མ་ཐག་ཏུ་བཤད་པའི་དོན་དང་རྗེས་སུ་མཐུན་པ་ཁོ་ན་ཡིན་ཏེ་དེ་གཞན་དུ་བཤད་པར་མི་བྱའོ། །
ལྡང་བའི་རྣལ་འབྱོར་ནི་མཉམ་པར་མ་བཞག་པའི་རྣལ་འབྱོར་རོ། །ཡང་དང་ཡང་ཞེས་བྱ་བའི་སྒྲས་ནི་རྣལ་འབྱོར་གཉིས་པོ་ལ་ཡང་རྒྱུན་མ་ཆད་པ་ཉིད་བསྟན་ཏོ། །ཆུ་བོའི་རྒྱུན་ནི་རྒྱུ་བ་བཞིན། །ཞེས་བྱ་བ་ལ་སོགས་པའི་ཚིགས་སུ་བཅད་པས་དེ་ཁོ་ན་ཉིད་ཡིན་ཏེ་གཞན་གྱི་རྣལ་འབྱོར་གསུམ་པ་བསྟན་ཏོ། །ཇི་ལྟར་ཆུ་བོའི་རྒྱུན་མ་ཆད་པར་ཆུའི་རྒྱུན་རྣམས་རྒྱུ་བ་དེ་བཞིན་དུ་རྒྱུ་བ་དང༌། མར་མེའི་སྣང་བའི་རྒྱུན་རྒྱུ་བ་དེ་བཞིན་དུ་དེ་ཁོ་ན་ཉིད་ཀྱི་རྣལ་འབྱོར་གྱིས་གནས་པར་བྱ་བ་ནི་རྣལ་འབྱོར་གཉིས་ཁྱབ་པར་བྱེད་པའོ། །རང་བཞིན་གྱི་དེ་ཁོ་ན་ཉིད་ཀྱི་རྣལ་འབྱོར་གྱི་དུས་ཐམས་ཅད་དུ་རྣལ་འབྱོར་པས་གནས་པར་བྱའོ་ཞེས་སྟོན་ཏོ། །དེ་གང་གི་ཕྱིར་དེ་ཁོ་ན་ཉིད་ཀྱི་རྣལ་འབྱོར་མི་ཤེས་པས་མཉམ་པར་བཞག་པའི་རྣལ་འབྱོར་ནི་མཉམ་པར་མ་བཞག་པའི་རྣལ་འབྱོར་དང་འདྲ་བར་འགྱུར་ཏེ། དེ་ཁོ་ན་ཉིད་ཀྱི་རྣལ་འབྱོར་ཤེས་པའི་རྣལ་འབྱོར་པ་རྣམས་སྤྱོད་ལམ་བཞིའི་རང་བཞིན་གྱིས་ལུས་ངག་ཡིད་གསུམ་གྱི་ལས་གང་ཡང་རུང་བ་བྱེད་ན་དེ་དག་ཐམས་ཅད་དེ་རྣམས་ལ་གཉིས་སུ་མེད་པའི་ཡེ་ཤེས་ཀྱི་རང་བཞིན་དུ་འགྱུར་རོ། །རང་གིས་རིག་པའི་ཡེ་ཤེས་འདི། །ཞེས་བྱ་བ་ལ་སོགས་པ་ཉེ་བར་བསྡུ་བའི་ཚིགས་སུ་བཅད་པ་སྟེ་གོ་སླའོ། །ས་དང་ཆུ་དང་མེ་དང་ནི། །ཞེས་བྱ་བ་ལ་སོགས་པ་ཚིགས་སུ་བཅད་པ་གཉིས་ཀྱིས་མཐོང་བའི་ཆོས་ལས་འགྱུར་བའི་ཕན་ཡོན་བསྟན་ཏོ། །ད་ནི་རྣལ་འབྱོར་ལ་འདིའི་གནས་སྐབས་ཀྱི་དབྱེ་བ་ཞེས་བྱ་བ་ལ་སོགས་པས་འདས་མ་ཐག་ཏུ་བཤད་པའི་ཏིང་ངེ་འཛིན་གནས་སྐབས་ཀྱི་དབྱེ་བ་རྣམ་པ་བཞི་རུ་བསྟན་པ་ཡིན་ཏེ། འདིར་གལ་ཏེ་ལྷན་ཅིག་སྐྱེས་པའི་རྣལ་འབྱོར་ངོ་བོ་གཅིག་ཡིན་པའི་ཕྱིར་དེ་ལ་གནས་སྐབས་ཀྱི་དབྱེ་བ་ཡོད་པ་མ་ཡིན་ཏེ། འོན་ཀྱང་དེ་ལ་བརྟེན་པའི་རྣལ་འབྱོར་པ་ལ་རིམ་གྱིས་དེ་དང་དེའི་རྣམ་པར་སྣང་བའི་ཕྱིར་གནས་སྐབས་ཀྱི་དབྱེ་བ་བསྟན་ཏོ། །དེ་གང་གི་ཕྱིར་རྫོགས་པའི་རིམ་པའི་རྣལ་འབྱོར་སློབ་བཞིན་པས་རོ་ལྷན་ཅིག་སྐྱེས་པའི་རོ་གཅིག་པ་ཡིན་ན་ཡང༌། དང་པོ་སྤྲིན་ལྟ་བུ་མཐོང་བ་ཡིན་ནོ། །དེ་བཞིན་དུ་གོང་ནས་གོང་དུ་རིམ་པར་རྟོགས་པར་བྱའོ། །ངོ་བོ་གཅིག་པ་ཡིན་ན་ཡང༌། །སྣ་ཚོགས་པའི་སྣང་བས་འཇིག་རྟེན་ལ་སྣང་བར་འགྱུར་ཏེ། དཔེར་ན་དྲི་མ་
དང་བཅས་པ་དང༌། དྲི་མ་མེད་པའི་མིག་གི་དབང་པོ་དང་ལྡན་པའི་སྐྱེས་བུ་རྣམས་ཀྱིས་ཟླ་བའི་དཀྱིལ་འཁོར་མི་གསལ་བ་དང༌། གསལ་བ་ལྟ་བུའི་ཞེས་བྱ་བ་ལ་སོགས་པའོ། །ཟླ་བའི་དཀྱིལ་འཁོར་ལ་ནི་གསལ་བ་དང་མི་གསལ་བའི་རང་བཞིན་ཡོད་པ་མ་ཡིན་ཏེ། སྣང་བ་འབའ་ཞིག་པའི་ངོ་བོ་ཡིན་པའི་ཕྱིར་རོ། །དེ་བས་ན་སློབ་བཞིན་པའི་རྣལ་འབྱོར་བའི་བྱ་བས་རྣལ་འབྱོར་གྱི་གནས་སྐབས་ཀྱི་དབྱེ་བ་བསྟན་པ་ཡིན་ནོ། །འདི་ཉིད་བཤད་པར་བྱ་བའི་ཕྱིར། །དངོས་གྲུབ་སྔོན་དུ་སྤྲིན་ལྟ་བུའི། །ཞེས་བྱ་བ་ལ་སོགས་པ་གསུངས་ཏེ། རེ་ཞིག་དང་པོ་བླ་མ་མཉེས་པར་བྱས་པའི་སློབ་མས་དཀྱིལ་འཁོར་ལ་ཞུགས་པ་སྔོན་དུ་འགྲོ་བའི་ལས་ཀྱི་ཕྱག་རྒྱ་འམ། དམ་ཚིག་གི་ཕྱག་རྒྱའི་སྦྱོར་བས་ཆོ་ག་བཞིན་དུ་ཤེས་རབ་དང་ཡེ་ཤེས་ཀྱི་དབང་ཐོབ་པས་མདོར་བསྟན་པ་དང་རྒྱས་པར་བསྟན་པའི་བླ་མས་སློབ་མ་ལ་གང་གི་ཚེ་ལྷན་ཅིག་སྐྱེས་པ་ཉེ་བར་མཚོན་པ་དེའི་ཚེ་དེ་ལ་དངོས་གྲུབ་ཀྱི་སྔོན་གྱི་གནས་སྐབས་ཡིན་ནོ། །དེ་གང་གི་ཕྱིར་དབང་བསྐུར་བའི་དུས་སུ་སློབ་མ་དེའི། ལྷན་ཅིག་སྐྱེས་པ་ཉེ་བར་མཚོན་པ་ཡིན་ཏེ། སྔོན་དུ་ནི་མ་བྱས་སོ། །གལ་ཏེ་སྔོན་དུ་བྱས་ན་སླར་ཡང་སྒྱུར་མ་ལྟ་བུ་ལ་སོགས་པའི་གནས་སྐབས་ལ་རིམ་པ་བཞིན་དུ་ཡེ་ཤེས་ཀྱི་ཕྱག་རྒྱ་དང་ཕྱག་རྒྱ་ཆེན་པོ་དང༌། ལས་ཀྱི་ཕྱག་རྒྱ་དང་དམ་ཚིག་གི་ཕྱག་རྒྱའི་སྒོམ་པ་དོན་མེད་པར་འགྱུར་བའི་ཕྱིར་རོ། །གལ་ཏེ་མཚོན་པར་མི་འགྱུར་ན་དེའི་སྒོམ་པ་མི་རིགས་པའི་ཕྱིར་རོ། །དེ་བས་ན་སྤྲིན་ལྟ་བུ་ནི་གང་གི་ཚེ་ལས་ཀྱི་ཕྱག་རྒྱ་དང༌། དམ་ཚིག་གི་ཕྱག་རྒྱའི་སྦྱོར་བས་སློབ་མ་ལ་བླ་མས་དབང་བསྐུར་བ་དེའི་ཚེ་ཤེས་པར་བྱའོ། །སྤྲིན་ལྟ་བུ་ལ་དཔེ་སྔོན་དུ་འགྲོ་བའི་གཏན་ཚིགས་བཤད་པར་བྱ་བའི་ཕྱིར། སྤྲིན་སྲབ་པས་བཀབ་པ་ལ་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་སྲབ་པའི་སྤྲིན་གྱིས་བཀབ་པའི་ཟླ་བ་རྒྱས་པ་ཅུང་ཟད་མཐོང་བར་འགྱུར་བ་སྟེ། ཤིན་ཏུ་གསལ་བར་མཐོང་བ་མ་ཡིན་ན། དེ་བཞིན་དུ་ལྷན་ཅིག་སྐྱེས་པ་ཡང་དངོས་གྲུབ་ཀྱི་སྔོན་དུ་ནི་སློབ་བཞིན་པའི་གནས་སྐབས་སུ་མི་གསལ་བར་སྣང་བར་འགྱུར་ཏེ། སྤྲིན་ལྟ་བུ་ཉིད་དུ་བསྟན་ནོ། །འགྲུབ་ན་སྒྱུ་མ་ལྟ་བུ་ཡི། །ཞེས་བྱ་བ་ལ་སྔར་ཉེ་བར་
མཚོན་པའི་ལྷན་ཅིག་སྐྱེས་པའི་དགའ་བ་གང་ཡིན་པ་དེ་ཉིད་རྒྱུན་མ་ཆད་པ་དང་རྟག་ཏུ་དད་པས་བསྒོམ་ཞིང་མངོན་དུ་གྱུར་པའི་དངོས་གྲུབ་གང་ཡིན་པ་དེ་ལ་འབྱུང་བ་ལྟ་བུ་ནི་ཇི་ལྟར་ནོར་བུ་དང༌། སྨན་དང་སྔགས་ཀྱི་མཐུ་ལས་འབྱུང་བའི་སྒྱུ་མ་སོ་སོར་སྣང་བ་མེད་ན་ཡང་མཐོང་བར་འགྱུར་བ་དེ་བཞིན་དུ་ཡིད་ཀྱིས་སྤྲུལ་པའི་རིག་མའི་སྟོབས་ནི་ཡེ་ཤེས་ཀྱི་ཕྱག་རྒྱའི་སྦྱོར་བས་ཡེ་ཤེས་གསལ་བར་འཆར་བར་འགྱུར་ཏེ། སྒྱུ་མ་ལྟ་བུ་ཉིད་སོ་སོར་བསྟན་ཏོ། །དེ་ནས་རྨི་ལམ་དང་འདྲ་བ་སྟེ་ཞེས་བྱ་བ་ལ་སོགས་པ་ལ་ཇི་ལྟར་ཁ་ཅིག་གཉིད་ལོག་པས་མི་རྟོག་པ་ཉམས་སུ་མྱོང་བ་དེ་བཞིན་དུ་ནང་གི་བདག་ཉིད་ཀྱི་ཐབས་དང༌། ཤེས་རབ་རྣམ་པར་རོལ་པ་སྒོམ་པར་བྱེད་པའི་རྣལ་འབྱོར་པས་ཕྱག་རྒྱ་ཆེན་པོ་བསྒོམས་ནས་རྣལ་འབྱོར་གྱི་གཉིད་ལོག་པར་ཅིག་ཅར་དུ་ལྷན་ཅིག་སྐྱེས་པ་ཉམས་སུ་མྱོང་བ་ཡིན་པས་རྨི་ལམ་དང་འདྲ་བ་བསྟན་ཏོ། །དེ་ནས་རྨི་ལམ་དང་སད་པ་ལྟ་བུ་ཞེས་བྱ་བ་ལ་སོགས་པ་ལ་ཕྱི་རོལ་གྱི་རིག་མ་ནི་ལས་དང་དམ་ཚིག་གི་ཕྱག་རྒྱ་མ་གཉིས་སོ། །ཕྱག་རྒྱ་གཉིས་ཀྱི་སྦྱོར་བ་ལས་བྱུང་བའི་ཕྱིར་སད་པ་ལྟ་བུ་ཡིན་ནོ། །རྣམ་པར་མི་རྟོག་པའི་ཆོས་ཉིད་ལ་མངོན་དུ་བྱས་པས་རང་གི་ལུས་དང་ཤེས་རབ་མའི་ལུས་ཡོད་ན་ཡང་མི་དམིགས་པའི་ཕྱིར་རྨི་ལམ་ལྟ་བུའོ། །གཡེང་བའི་རྒྱུ་ཡོད་ན་ཡང་ཞེས་བྱ་བ་ལ་གཡེང་བའི་རྒྱུ་ནི་ཕྱག་རྒྱ་གཉིས་ཀྱི་མཚན་ཉིད་དོ། །རྨི་ལམ་དང་སད་པ་ལྟ་བུའི་ཏིང་ངེ་འཛིན་ལ་གནས་པའི་རྣལ་འབྱོར་པ་ལ་གཡེང་བའི་རྒྱུ་ཡོད་ན་ཡང་བརྟན་པ་ལ་མཉམ་པར་གཞག་པའི་ཕྱིར་སེམས་འོང་བར་མི་འགྱུར་ཏེ། འོན་ཀྱང་དེའི་དམ་ཚིག་ནི་ཕྱག་རྒྱའི་སྦྱོར་བ་ཞེས་བྱ་བ་ཡིན་ནོ། །ཤིན་ཏུ་མཉམ་པར་གཞག་པ་ཉིད་ནི་དེའི་སྡོམ་པའོ། །དེ་ལྟར་དམ་ཚིག་དང་སྡོམ་པའི་སྦྱོར་བ་ཡོད་པས་ཐ་མ་ཐམས་ཅད་ལས་མཆོག་ཏུ་གྱུར་པ་ཡིན་ནོ། །དགྱེས་པའི་རྡོ་རྗེ་ལས་ཀྱང༌། དང་པོ་སྤྲིན་བཞིན་སྣང་བ་སྟེ། །འགྲུབ་ན་སྒྱུ་མ་ལྟ་བུར་འགྱུར། །ཅིག་ཅར་དུ་ནི་རྨི་ལམ་འདྲ། །རྨི་ལམ་སད་པ་ཐ་མི་དད། །ཐ་མི་དད་པའི་མཚན་ཉིད་འགྲུབ། །ཕྱག་རྒྱའི་རྣལ་འབྱོར་རབ་ཏུ་འགྲུབ། །ཅེས་བྱ་བ་ལ་སོགས་པ་གསུངས་སོ། །ཤིན་ཏུ་ཟབ་པའི་དགྱེས་པའི་
རྡོ་རྗེ་ལས་ཞེས་བྱ་བ་ལ་སོགས་པ་ལ་འདིས་ནི་སློབ་དཔོན་གྱི་རང་བཟོ་ཡོངས་སུ་སྤངས་པས་བདག་གིས་རབ་ཏུ་བྱེད་པ་འདི་བྱས་པ་ཡིན་ཏེ་ཞེས་བྱ་བ་དང༌། བསོད་ནམས་ཡོངས་སུ་བསྔོ་བ་བསྟན་པ་སྟེ། དེ་ཡང་གོ་སླའོ། །ལྷན་སྐྱེས་རྣལ་འབྱོར་དམ་པ་ལ། །འགྲེལ་པ་བྱས་ནས་དགེ་བ་གང༌། །བདག་གིས་བསགས་པ་དེ་ཡིས་ནི། །འཇིག་རྟེན་ལྷན་སྐྱེས་རྩེ་གཅིག་གྱུར། །གང་ཞིག་བརྗོད་བྱ་རྗོད་བྱེད་བློ་ཡིས་སྤྱོད་ཡུལ་མིན། །གཏི་མུག་ཚོགས་ཀྱི་མཚན་མོ་སེལ་བྱེད་ཉི་མ་གང༌། །རང་བདག་སྣང་བས་ཕྱོགས་ཀྱི་དབྱེ་བ་ཡོངས་བཀང་བ། །ལྷན་སྐྱེས་ནམ་མཁའ་ཟླ་བ་རྫོགས་འདྲ་དེ་ལ་འདུད། །མཁས་པ་ཆེན་པོ་རིན་ཆེན་འབྱུང་གནས་ཞི་བའི་ཞལ་སྔ་ནས་མཛད་པའི་ལྷན་ཅིག་སྐྱེས་པའི་འགྲེལ་པ་སྙིང་པོ་རབ་ཏུ་གསལ་བར་བྱེད་པ་ཞེས་བྱ་བ། ཨོ་རྒྱན་གྱི་སློབ་དཔོན་ཆེན་པོ་བྲམ་ཟེ་ཐ་ག་ནས་མཛད་པ་རྫོགས་སོ།། །།པཎྚི་ཏ་མཁས་པ་ཆེན་པོ་མནྟ་ཀ་ལ་ཀུ་ཤའི་ཞལ་སྔ་ནས་བསྒྱུར་ཅིང་གཏན་ལ་ཕབ་པ། །