འཁྲུལ་པ་སྤོང་བ་ཞེས་བྱ་བའི་སྒྲུབ་པའི་ཐབས།
རིན་ཆེན་འབྱུང་གནས་ཞི་བས་མཛད།
དང་པོའི་རྣལ་འབྱོར་ཞེས་བྱ་བའི་ཏིང་ངེ་འཛིན་དང་པོ་ངོ་བོ་ཉིད་ཀྱི་སྐུ་བསྟན་པ།
རྒྱ་གར་སྐད་དུ། བྷྲ་མ་ཧཱ་ར་སཱ་དྷ་ནཾ་ནཱ་མ། བོད་སྐད་དུ། འཁྲུལ་པ་སྤོང་བ་ཞེས་བྱ་བའི་སྒྲུབ་པའི་ཐབས། དཔལ་དགྱེས་པའི་རྡོ་རྗེ་ལ་ཕྱག་འཚལ་ལོ། །ས་ལ་ཞབས་མནན་བྱིན་པའི་ཤུགས་ཀྱིས་རྒྱ་མཚོར་རྣམ་པར་བསྐྱོད། །འཇིགས་པའི་དུས་ཀྱི་སྤྲིན་ལྟར་ཞལ་རྣམས་ཀྱིས་ནི་སྒྲ་འབྱིན་ཞིང༌། །ཕྱག་གི་ནགས་ཚལ་རླུང་གིས་རི་ཡི་རྩེ་མོ་འགུལ་ནས་འཕེན། །ཧེ་རུ་ཀ་ཡི་གར་གྱིས་ཁྱེད་རྣམས་འཇིགས་པ་སེལ་བ་ཡིན། །ཞལ་གདོང་རེ་རེར་སྤྱན་གསུམ་པ། །ཞབས་བཞི་ཡིས་ནི་འཇིགས་མཛད་ཅིང༌། །ཕྱག་ནི་བཅུ་དྲུག་ཞལ་བརྒྱད་པའི། །དགྱེས་རྡོར་སྒྲུབ་ཐབས་བཤད་པར་བྱ། །འདིར་བསྒོམ་པ་དང༌། བཟླས་པ་ལ་དབང་བར་གྱུར་པའི་སྔགས་པ་ནང་པར་སྔར་ལངས་ཏེ། སྙིང་གར་ཉི་མ་ལ་ས་བོན་བསམས་ལ། །གདོང་བཀྲུ་བ་ལ་སོགས་པ་བྱས་ཏེ། ཨོཾ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་བྱ་བས་གནས་དང་བདག་ཉིད་དང་རྣལ་འབྱོར་བསྲུང་བ་བྱས་ནས། དྲི་དང་མེ་ཏོག་ལ་སོགས་པ་དྲི་ཞིམ་པོ་དང་ལྡན་པའི་བསམ་གཏན་གྱི་གནས་སུ་ཞུགས་ལ།
སྟན་བདེ་བ་ལ་སྐྱིལ་མོ་ཀྲུང་བཅས་ཏེ། མཆོད་ཡོན་ལ་སྔགས་ཡོངས་སུ་བཟླས་ནས་སྙིང་གའི་སྔགས་ཀྱི་འོད་ཟེར་གྱིས་མདུན་གྱི་ནམ་མཁའ་ལ་བཅོམ་ལྡན་འདས་འཁོར་དང་བཅས་པ་སྤྱན་དྲངས་ཏེ། བལྟས་ནས་སྙིང་གའི་ས་བོན་ལས་བྱུང་བའི་དཀར་མོ་ལ་སོགས་པའི་ལྷ་མོ་བརྒྱད་ཀྱིས་མཆོད་པར་བྱའོ། །དེ་ལ་དཀར་མོ་ནི་རི་བོང་ཅན་འཛིན་ནོ། །ཆོམ་རྐུན་མ་ནི་ཉི་མའོ། །རོ་ལངས་མ་ནི་ཆུའོ། །ཟ་ཕོད་མ་ནི་སྟོབས་སོ། །སྤོས་མོ་ནི་ཙནྡན་ནོ། །རི་ཁྲོད་མ་ནི་སྦྲང་རྩིའོ། །གཏུམ་མོ་ནི་ཅང་ཏེའུ་རྡུང་བའོ། །གཡུང་མོ་ནི་སྐྱེས་བུ་བཞིན་དུ་མགུལ་པ་ནས་འཁྱུད་པའོ། །དེ་ནས་བཅོམ་ལྡན་འདས་དེ་ཉིད་ཀྱི་མདུན་དུ་སྡིག་པ་བཤགས་པ་ལ་སོགས་པ་འདི་ལྟར་བྱ་སྟེ། བདག་གིས་སྡིག་པ་ཐམས་ཅད་བཅོམ་ལྡན་འདས་ལ་སོ་སོར་བཤགས་སོ། །སངས་རྒྱས་དང་བྱང་ཆུབ་སེམས་དཔའ་དང་འཕགས་པ་དང་སོ་སོའི་སྐྱེ་བོ་ཐམས་ཅད་ལ་རྗེས་སུ་ཡི་རང་ངོ༌། །བདག་གིས་དགེ་བ་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །བདག་ཉིད་བྱང་ཆུབ་ཀྱི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །ཐེག་པ་ཆེན་པོའི་ཆོས་ཀྱི་མཆོག་ཆོས་ལ་སྐྱབས་སུ་མཆིའོ། །ཕྱིར་མི་ལྡོག་པའི་བྱང་ཆུབ་སེམས་དཔའི་ཚོགས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །ཨེ་མའོ་སེམས་ཅན་ཐམས་ཅད་ཀྱི་དོན་ཕན་པ་དང་བདེ་བའི་ཕྱིར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས། མཆོག་ཏུ་མཐར་ཕྱིན་པའི་མྱ་ངན་ལས་འདས་པ་ལ་ཐུག་གི་བར་གྱི་སངས་རྒྱས་ཀྱི་བྱང་ཆུབ་ལ་དགོད་པར་བགྱིའོ། །འདི་ལྟར་བདག་ཉིད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ལམ་རྡོ་རྗེ་ཐེག་པ་ལ་བརྟེན་པར་བགྱིའོ། །དེ་ནས་སེམས་ཅན་ཐམས་ཅད་ལ་ཁྱད་པར་དུ་འཕགས་པའི་ལྷའི་བདེ་པ་དང་མི་འབྲལ་བར་གནས་པའི་རྣམ་པའི་དགའ་བ་དང༌། ཉོན་མོངས་པའི་གཉེན་པོའི་ལམ་ལ་སྦྱོར་བའི་རྣམ་པའི་བཏང་སྙོམས་བསྒོམ་པར་བྱའོ། །དེ་ནས་ཆོས་ཐམས་ཅད་ལ་ཡིད་ཀྱིས་དམིགས་ནས་དཔྱད་པར་བྱ་སྟེ། འདི་དག་ནི་སེམས་ཉིད་དེ་དང་དེའི་རྣམ་པར་འཕྲུལ་པར་སྣང་སྟེ།
དཔེར་ན་རྨི་ལམ་བཞིན་དུ་སེམས་ལས་ཕྱི་རོལ་ན་སེམས་ཀྱི་གཟུང་བ་མེད་དོ། །གཟུང་བ་དངོས་པོ་མེད་པའི་ཕྱིར་སེམས་ཀྱང་འཛིན་པའི་དངོས་པོ་མེད་དེ། དེའི་ཕྱིར་ཆོས་ཐམས་ཅད་ནི་སེམས་ཀྱི་ལུས་ཏེ། དེ་དག་གཟུང་བ་དང་འཛིན་པས་སྟོང་པ་ཉིད་ལ་དོན་དམ་པ་ཞེས་བྱའོ། །དེ་ལྟར་མཐའ་གཅིག་ཏུ་ངེས་ནས་འཁྲུལ་པར་སྒྲོ་བཏགས་པས་འཁྲུལ་པའི་མཚན་མའི་ཆོས་ཐམས་ཅད་ཀྱི་རྣམ་པ་སྤངས་པ་དེ་དག་གི་རང་བཞིན་གཉིས་སུ་མེད་པ་རྣམ་པར་རིག་པའི་མཚན་ཉིད་འབའ་ཞིག་ཏུ་བལྟའོ། །འདི་ནི་དམ་པའི་བྱང་ཆུབ་ཀྱི་སེམས་འཇིག་རྟེན་ལས་འདས་པ་སྟོང་པ་ཉིད་ཀྱི་ཡེ་ཤེས་སྤྲོས་དང་བྲལ་ཞིང་རྣམ་པར་རྟོག་པ་དང་བྲལ་བ་ཞེས་བསྟན་ཏོ། །དེ་ནས་དེའི་སྔགས་ཀྱིས་བྱིན་གྱིས་བརླབ་སྟེ། ཨོཾ་ཤཱུ་ནྱ་ཏཱ་ཛྙ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ཉིད་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་སྟེ། དེ་ཉིད་མཆོག་ཏུ་བསྲུང་བའོ། །དེ་ནས་དེའི་རྒྱུ་མཐུན་པར་གྱུར་པ་རྣམ་པ་དང་བཅས་པ་དག་པ་འཇིག་རྟེན་པའི་ཡེ་ཤེས་ཀྱི་རང་བཞིན་གྱི་བསྲུང་བ་བསྒོམ་པར་བྱ་སྟེ། །མདུན་དུ་རཾ་ལས་ཉི་མ་རྣམ་པར་བསྒོམ་བྱ་ཞིང༌། །ཉི་མ་དེ་ལས་ཧཱུྃ་བྱུང་སྣ་ཚོགས་རྡོ་རྗེར་འགྱུར། །རྡོ་རྗེ་དེ་ཉིད་ཀྱིས་ཀྱང་རྣམ་པར་བསྒོམ་བྱ་བ། །རབ་དང་ནི་གུར་ཡང་རབ་ཏུ་བཅིང་བའོ། །སྣ་ཚོགས་རྡོ་རྗེ་འོད་ཟེར་འཇིགས་པའི་མེ་ལྟར་བཟོད་པར་དཀའ་བ་རྣམས་ཀྱིས་ཐམས་ཅད་དུ་སྤྲོས་ནས་གཏམས་པར་གྱུར་པས་ལོགས་ལ་རྡོ་རྗེའི་རབ་འབར་བ་གྲུ་བཞི་པ་དང༌། སྟེང་དུ་རྡོ་རྗེའི་གུར་དང༌། འོག་ཏུ་ཡང་རྡོ་རྗེའི་རང་བཞིན་གྱི་གཞི་འོག་གི་ས་གཞི་ལ་ཐུག་པར་གྱུར་པ་བལྟ་བར་བྱའོ། །དེ་ནས་ཉི་མ་དང་སྣ་ཚོགས་རྡོ་རྗེ་འོད་ཟེར་དུ་གྱུར་ཏེ། ཕྱོགས་ཕྱོགས་སུ་སྤྲོས་ནས་གཏམས་པར་གྱུར་པས་ཕྱི་རོལ་ཐག་རིང་པོར་མཚམས་གཅད་པར་བྱའོ་ཞེས་པ་ནི་ཚིགས་སུ་བཅད་པའི་དོན་ཏོ། །དེ་ནས་དེའི་རྒྱུ་མཐུན་པར་གྱུར་པ་སྟེ་ཉིད་ཀྱི་འབྱུང་བ་ཆེན་པོ་ལྔ་རྣམ་པར་དག་པ་བསམ་པར་བྱ་སྟེ། དེ་ལ་ནམ་མཁའ་འབྱུང་བ་ཆེན་པོ་ཆོས་འབྱུང་ཞེས་བྱ་བ་རྡོ་རྗེ་འཛིན་པ་ཆེན་པོའི་རང་བཞིན་སྟོན་ཀའི་ཟླ་བ་བཞིན་དཀར་བ་འོག་ཕྲ་ཞིང་སྟེང་རྒྱ་ཆེ་པ། གྲུ་གསུམ་པ་ནང་ནམ་མཁའི་རང་བཞིན་ནང་དུ་པདྨ་འདབ་མ་སྣ་ཚོགས་པ་སྐྱེས་པའི་སྙིང་པོ་
ལ་སྣ་ཚོགས་རྡོ་རྗེ་རྒྱ་ཆེན་པོ་གནས་པའོ། །དེའི་དབུས་སུ་འབྱུང་བ་ཆེན་པོ་བཞིའི་དཀྱིལ་འཁོར་རྣམ་པ་བཞི་ལྷ་མོ་བཞིའི་རང་བཞིན་གོང་ནས་གོང་དུ་བལྟ་བར་བྱ་སྟེ། དང་པོར་ཡི་གེ་ལཾ་ལས་དབང་ཆེན་གྱི་དཀྱིལ་འཁོར་ཆེན་པོ་གྲུ་བཞི་པ་སེར་པོ་གྲྭར་རྡོ་རྗེ་རྩེ་གསུམ་པས་མཚན་པའོ། །དེ་ནས་པཾ་ལས་ཆུའི་དཀྱིལ་འཁོར་ཟླུམ་པོ་དཀར་བ་བུམ་པས་མཚན་པའོ། །དེ་ནས་རཾ་ལས་མེའི་དཀྱིལ་འཁོར་གྲུ་གསུམ་པ་དམར་པོ་གྲྭར་རཾ་གྱིས་མཚན་པའོ། །དེ་ནས་ཡཾ་ལས་རླུང་གི་དཀྱིལ་འཁོར་གཞུའི་རྣམ་པ་ནག་པོ་མཐའ་མ་གཉིས་སུ་དར་དཔྱང་གཡོ་བས་མཚན་པའོ། །སྒོམ་པ་པོས་ཡང་དེའི་ཚེ་འཇིག་རྟེན་ལས་འདས་པའི་ཡེ་ཤེས་ཁྱབ་པར་བྱེད་པ་དེ་ཉིད་ཁོ་ན་གནས་སོ། །དེ་ནས་སྣ་ཚོགས་རྡོ་རྗེའི་ལྟེ་བའི་དབུས་སུ་འབྱུང་བ་ཆེན་པོ་བཞི་ཡོངས་སུ་གྱུར་པ་ལས་སྐྱེས་པའི་སངས་རྒྱས་ཀྱི་ཞིང་ཡོངས་སུ་བསྡུས་པའི་ངོ་བོ། །ཐར་པ་ཆེན་པོའི་ཁང་པ་རྣམ་པར་སྣང་མཛད་ཀྱི་རང་བཞིན་རིན་པོ་ཆེ་སྣ་ཚོགས་ལས་གྱུར་པའི་ཁང་པ་བརྩེགས་པ་འཇིག་རྟེན་གྱི་ཁམས་ཐམས་ཅད་བདག་མེད་པར་སྟོན་པའི་དུར་ཁྲོད་བརྒྱད་ཀྱིས་ཉེ་བར་བསྐོར་བ་བསྒོམ་པར་བྱའོ། །གྲུ་བཞི་པ་ལ་སྒོ་བཞི་པ། །ཀ་བ་བརྒྱད་ཀྱིས་ཉེ་བར་མཛེས། །སྟེགས་བུ་བཞི་ཡིས་ཡོངས་སུ་བསྐོར། །ཏྭ་ར་ན་ནི་བཞིས་བརྒྱན་ཞིང༌། །དོ་ཤལ་དང་ནི་དོ་ཕྱེད་དང༌། །དར་དང་མེ་ཏོག་ཕྲེང་བ་དང༌། །བླ་རེ་མེ་ལོང་རྔ་ཡབ་དང༌། །རྡོ་རྗེ་ཐིག་སྐུད་རྣམས་ཀྱིས་མཛེས། །འོད་ལས་སངས་རྒྱས་ཚོགས་འཕྲོ་ཞིང༌། །གཡོ་ཞིང་བཀྲ་བའི་བ་དན་མཆོག །ཕྱོགས་ཀྱི་སྒོ་ལ་དྲིལ་བུ་འཁྲོལ། །འདོད་པ་ལྔ་པོ་མཆོག་རྣམས་དང༌། །དམ་པའི་མཆོད་པ་རྣམ་ལྔས་སྤྲས། །དེ་ཡི་ནང་གི་རིམ་པ་ལས། །པདྨ་འདབ་བརྒྱད་གེ་སར་བཅས། །སྒོ་བཞི་དང་ནི་གྲུ་བཞི་དང༌། །དབུས་མ་དག་ཏུ་སྟན་དག་ནི། །ཚངས་དབང་ཉེ་དབང་དྲག་པོ་དང༌། །གཤིན་རྗེ་གནོད་སྦྱིན་ཡང་དེ་བཞིན། །བདེན་བྲལ་དང་ནི་ཐགས་བཟངས་རིས། །དབུས་སུ་བདུད་རྩི་བཞི་པ་སྟེ། །གོང་ནས་གོང་དུ་བཀན་པའོ། །འཇིགས་ལྡན་བདུད་ནི་བཞི་པོ་ཡི། །སྙིང་ག་དག་ཏུ་ཉི་མས་མནན། །འཇིགས་པ་གཞན་ཡང་ཟླ་བས་སོ། །དེ་ཡི་དབུས་ཀྱི་གདན་གྱི་སྟེང་དུ་དབྱངས་
ཡིག་བཅོ་ལྔས་ཟླ་བའི་དཀྱིལ་འཁོར་མེ་ལོང་ལྟ་བུའི་ཡེ་ཤེས་ཀྱི་རང་བཞིན་དང༌། དེའི་སྟེང་དུ་གསལ་བྱེད་སུམ་ཅུ་རྩ་བཞིས་ཉི་མའི་དཀྱིལ་འཁོར་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་དང༌། དེའི་དབུས་སུ་ཨོཾ་དང་ཧཱུྃ་ཡོངས་སུ་གྱུར་པ་ལས་གྲི་གུག་དང་ཐོད་པའི་དབུས་སུ་རང་གི་ས་བོན་གྱིས་མཚན་པ་སོ་སོར་རྟོག་པའི་ཡེ་ཤེས་ཀྱི་བདག་ཉིད་བསམ་པར་བྱའོ། །དེ་ནས་ས་བོན་གཉིས་ལས་རྣལ་འབྱོར་མའི་འཁོར་ལོའི་རྣམ་པ་དང་དེ་བཞིན་གཤེགས་པ་ཐམས་ཅད་ཡོངས་སུ་སྤྲོས་ནས་སླར་འདུས་ཏེ་ས་བོན་དང་ལྷན་ཅིག་ཏུ་གྱུར་པ་ནི་བྱ་བ་ནན་ཏན་གྱི་ཡེ་ཤེས་སོ། །དེ་ནས་ཟླ་བ་དང་ཉི་མ་དང་མཚན་མ་དང་ས་བོན་ཡོངས་སུ་གྱུར་པ་ལས་སྐྱེས་པ་བཅོམ་ལྡན་འདས་རྡོ་རྗེ་སེམས་དཔའ་འཆད་པར་འགྱུར་བའི་ཁ་དོག་དང་རྣམ་པ་དང་མཚན་མ་ལ་སོགས་པ་རྣམས་ཀྱིས། དཔལ་ཧེ་རུ་ཀའི་གཟུགས་སུ་བསྐྱེད་ཅིང་དེ་བཞིན་དུ་བདག་མེད་མས་མགུལ་ནས་འཁྱུད་པ་ནི་ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་བདག་ཉིད་དུ་བལྟའོ་ཞེས་པ་ནི་མངོན་པར་རྫོགས་པར་བྱང་ཆུབ་པ་རྣམ་པ་ལྔའོ། །ཧོཿགྙིས་ཀྱི་ནི་བར་གནས་པའི། །འབར་བའི་ས་བོན་གཉིས་པོ་ནི། །དགའ་ལྡན་དེ་ཡི་ཞལ་ནས་ཞུགས། །པདྨའི་མཐའ་རུ་ཆགས་པས་ཞུ། །དེ་ནས་རྡོ་རྗེ་ཆགས་ཆེན་གྱིས། །རིག་མ་དང་ནི་ལྷན་ཅིག་ཞུ། །སྟོན་ཀའི་ཟླ་བ་དང་འདྲ་བར། །དེ་ནི་ཟླུམ་པོར་གྱུར་ནས་གནས། །དེ་ནས་ཟླ་གདན་གྲྭར་གནས་པའོ། །ལྷ་མོ་བཞི་པོ་དག་གིས་ནི། །རྡོ་རྗེའི་གླུ་ནི་བཞི་དག་གིས། །བཞེངས་ཕྱིར་དེ་ལ་སྐུལ་བར་བྱེད། །རྗེ་བཙུན་སྙིང་རྗེའི་ཡིད་ཀྱིས་བཞེངས། །སྤོས་མོ་བདག་ལ་ཡོངས་སུ་སྐྱོབས། །སྟོང་པའི་ཏིང་ངེ་འཛིན་སྤོངས་ལ། །བདེ་ཆེན་འདོད་པས་བདག་ལ་སྦྱོར། །ཁྱོད་མེད་ན་ནི་བདག་འགུམ་པས། །ཀྱེ་ཡི་རྡོ་རྗེ་ཁྱེད་བཞེངས་ཤིག །སྟོང་པའི་ཏིང་ངེ་འཛིན་སྤོངས་ལ། །རི་ཁྲོད་དགོས་པ་སྒྲུབ་མཛོད་ཅིག །གཙོ་བོ་འཇིག་རྟེན་མགྲོན་གཉེར་ནས། །ཅི་ཕྱིར་སྟོང་པ་ཉིད་ལ་བཞུགས། །ཁྱོད་མི་བཞུགས་ན་ཕྱོགས་རྨོངས་པས། །གཏུམ་མོ་བདག་ནི་གསོལ་བ་འདེབས། །མིག་འཕྲུལ་ལྟ་བུ་ཁྱོད་བཞེངས་ཤིག །བདག་གིས་ཁྱེད་ཀྱི་ཐུགས་འཚལ་གྱིས། །
སྨེ་མོ་བདག་ནི་མཁས་པར་དགོངས། །སྙིང་རྗེ་རྒྱུན་ཆད་མ་མཛད་ཅིག །དེ་ནས་གླུ་ཡི་དོར་བྱས་ཏེ། །ཞུ་བ་བསྡུས་པ་ལས་སྐྱེས་པ། །དེའི་དབུས་སུ་བྱུང་བའི་ཉི་མའི་དཀྱིལ་འཁོར་ལ་གནས་པའི་ཨཾ་དང་ཧཱུཾ་གཉིས་དང༌། ལྷའི་མཚན་མ་དང༌། ལུས་ལ་སོགས་པ་ནམ་མཁའ་ལྟ་བུ་དང་སྒྱུ་མ་ལྟ་བུར་ངེས་པར་བྱས་ནས། དེ་ཡོངས་སུ་གྱུར་པ་ལ་བརྟེན་པའི་ཏིང་ངེ་འཛིན་གྱི་རང་བཞིན་གྱི་གྲི་གུག་དང་ཐོད་པ་གཉིས་སྦྱོར་བའི་སྙིང་པོ་ལ་ཡང་དག་པར་ཇི་ལྟ་བ་བཞིན་ཡོངས་སུ་ཤེས་པའི་རང་བཞིན་གྱི་ལྷའི་ས་བོན་གཉིས་དང་ལྡན་པ་བལྟ་བར་བྱའོ། །དེ་ནས་དེ་ཉིད་ལས་རྣལ་འབྱོར་གྱིས་དེ་བཞིན་གཤེགས་པ་མཐའ་ཡས་པའི་རང་བཞིན་གྱི་རྣལ་འབྱོར་མའི་འཁོར་ལོའི་རྣམ་པ་སྤྲོས་ཏེ། །ཐམས་ཅད་སེམས་ཀྱི་རང་བཞིན་དུ་ངེས་པར་བྱས་ནས། ཡང་སླར་རྣལ་འབྱོར་གྱིས་བསྡུས་ཏེ། དེ་དག་ཐམས་ཅད་སྒྱུ་མ་ལྟ་བུ་དང་ནམ་མཁའ་ལྟ་བུ་ཡོངས་སུ་ཤེས་ནས་ཉི་མ་གཉིས་དང་མཚན་མ་དང་ས་བོན་རྣམས་ཡོངས་སུ་གྱུར་པ་ལས་སྐྱེས་པའི་བདག་ཉིད་ཧེ་རུ་ཀར་བལྟ་བར་བྱའོ། །ཞབས་རྣམས་ཀྱིས་ནི་སྟང་སྟབས་དང༌། །ལྷ་དང་ལྷ་མིན་ལ་སྡིགས་མཛུབ། །སྤྱན་ནི་གདུག་ཅིང་ཟླུམ་ལ་དམར། །ལང་ཚོ་གཞོན་ཞིང་འགྱིང་བག་ཅན། །ཞབས་བཞི་དང་ནི་ཞལ་བརྒྱད་པ། །བརྒྱད་གཉིས་ཕྱག་གིས་ཉེར་བརྒྱན་ཅིང༌། །བདུད་བཞི་དག་ནི་ཡང་དག་མནན། །སྐྱིལ་ཀྲུང་ཕྱེད་པའི་གར་བྱེད་པས། །མགོ་ཕྲེང་དོ་ཤལ་ཆེན་པོ་དང༌། །ཉི་མ་ལ་བཞུགས་འཇིགས་ཀྱང་འཇིགས། །སྤྱི་བོར་སྣ་ཚོགས་རྡོ་རྗེ་འཛིན། །གནག་ཅིང་ཉི་མ་འབར་བའི་འོད། །ཞལ་ནས་ཧཱུྃ་ནི་སྤྲོ་བར་བྱེད། །ཐལ་བ་དག་གིས་སྐུ་ལ་བྱུགས། །རྩ་བའི་ཞལ་ནི་ནག་ཆེན་པོ། །གཡས་ནི་ཀུནད་དག་དང་མཚུངས། །གཡོན་པ་མི་བཟད་ཆེན་པོ་དམར། །སྤྱི་བོའི་ཞལ་ནི་གཙིགས་པའོ། །ལྷག་མའི་ཞལ་ནི་ཕུང་བ་འདྲ། །ཞལ་གདོང་རེ་རེར་སྤྱན་གསུམ་པ། །སྒེག་ཅིང་དཔའ་ལ་འཇིགས་དང་འདྲ། །གདུག་དང་རྒོད་དང་འཇིགས་པར་བྱེད། །སྙིང་རྗེ་ངོ་མཚར་ཞི་བ་དང༌། །གར་དགུ་ཡི་ནི་རོ་དང་ལྡན། །དབུས་སྐྲ་ཁམ་སེར་གྱེན་དུ་ཕྱོགས། །འཁོར་ལོ་རྣ་ཆ་མགུལ་རྒྱན་དང༌། །ལག་གདུབ་དང་ནི་སྐ་རགས་ཀྱི། །
ཕྱག་རྒྱ་ལྔ་ཡིས་ཡོངས་སུ་བརྒྱན། །གླང་པོ་རྟ་བོང་གླང་རྔ་མོ། །མི་དང་ཤ་ར་བྷ་བྱི་ལ། །གཡས་ཀྱི་ཐོད་པར་གོ་རིམས་བཞིན། །གླང་པོ་ལ་སོགས་ཤེས་པར་བྱ། །ས་དང་ཆུ་དང་རླུང་རྣམས་དང༌། །མེ་དང་ཟླ་བ་ཉི་མ་ཉིད། །གནོད་སྦྱིན་དང་ནི་ནོར་ལྷ་སྟེ། །དེ་དག་གཡོན་གྱི་ཐོད་བརྒྱད་དུ། །བདག་མེད་མ་ཡིས་འཁྱུད་པ་སྟེ། །རང་གི་ལྟ་བུའི་ཕྱག་རྒྱ་ལྔ། །ཕྱག་གཉིས་ཞལ་གཅིག་ཞབས་གཉིས་པ། །དེ་ཡང་གྲི་གུག་ཐོད་པ་འཛིན། །དེ་ནས་བཅོམ་ལྡན་འདས་ཀྱི་ཐུགས་ཀར་ཉི་མ་ལ་ཐོད་པ་གནས་པའི་སྟེང་དུ་ཉི་མ་ལ་ཧཱུྃ་སྟེ། བཅོམ་ལྡན་འདས་མའི་ཐུགས་ཀར་ཡང་ཟླ་བ་ལ་གྲི་གུག་གནས་པ། །དེའི་ཡུ་བར་ཟླ་བ་ལ་ཨཾ་བསམ་པར་བྱའོ། །དེ་ནས་དེའི་རྣ་བ་ལ་བདག་མེད་མ་མིག་ལ་རྡོ་རྗེ་མ། སྣ་ལ་གསང་བའི་དཀར་མོ། །ལྕེ་ལ་ཆུའི་རྣལ་འབྱོར་མ། ལུས་ཀྱི་དབང་པོ་ལ་རྡོ་རྗེ་མཁའ་འགྲོ་མ་ཡིད་ལ་བདག་མེད་མ་བསམ་པར་བྱའོ། །རྡོ་རྗེ་མ་ལ་སོགས་པ་ལྔ་པོ་དེ་དག་ཉིད་གོ་རིམས་བཞིན་དུ་གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པའི་ཕུང་པོ་རྣམས་ལའོ། །གཏི་མུག་དང༌། སེར་སྣ་དང༌། འདོད་ཆགས་དང༌། ཕྲག་དོག་དང༌། ཞེ་སྡང་རྣམས་ལ་ཡང་དེ་བཞིན་ནོ། །གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་དང༌། ཆོས་ཀྱི་སྐྱེ་མཆེད་རྣམས་ལ་ཕྱིའི་དཀར་མོ་དང༌། ཆོམ་རྐུན་མ་དང༌། རོ་ལངས་མ་དང༌། ཟ་ཕོད་མ་དང༌། ས་སྤྱོད་མ་དང༌། མཁའ་སྤྱོད་མའོ། །ས་དང༌། ཆུ་དང༌། མེ་དང༌། རླུང་གི་ཁམས་རྣམས་ལ་སྤོས་མོ་དང༌། རི་ཁྲོད་མ་དང༌། གཏུམ་མོ་དང༌། གཡུང་མོ་རྣམས་སོ། །ལུས་དང༌། ངག་དང༌། ཡིད་ལས་སྤྱོད་མ་དང༌། བདག་མེད་མའོ། །ཤ་ལ་སྤོས་མོའོ། །ཁྲག་ལ་རི་ཁྲོད་མའོ། །ཁུ་བ་ལ་གཏུམ་མོའོ། །རྐང་དང་ཚིལ་གཉིས་ལ་གཡུང་མོའོ། །པགས་པ་ལ་བྱང་ཆུབ་ཀྱི་ཡན་ལག་བདུན་ནོ། །རུས་པ་ལ་བདེན་པ་བཞི་སྟེ། དེ་ལྟར་ན་ཐམས་ཅད་ལྷར་གྱུར་པ་ཡིན་ནོ། །དེའི་རྣམ་པར་དག་པ་གཞན་ཡང་བཤད་པར་བྱ་སྟེ། སྙིང་རྗེ་ཡི་ནི་སྤྱན་དམར་ལ། །ཡན་ལག་ནག་པོ་བྱམས་པའི་ཐུགས། །ཞབས་ནི་བསྡུ་བའི་དངོས་པོ་སྟེ། །བཅུ་དྲུག་ཕྱག་ནི་སྟོང་པ་ཉིད། །ཞལ་བརྒྱད་རྣམ་པར་ཐར་པ་བརྒྱད། །དེ་ཉིད་
གསུམ་ནི་སྤྱན་གསུམ་མོ། །ཕྱག་རྒྱ་ལྔ་ནི་རྒྱལ་བ་ལྔ། །ཁྲོ་བོས་གདུག་པ་རྗེས་སུ་འདུལ། །མགྲིན་སྙིང་བྷ་ག་སྤྱི་བོ་ལ། །འཁོར་ལོ་བཞི་ནི་གོ་རིམས་བཞིན། །ལོངས་སྤྱོད་རྫོགས་དང་ཆོས་སྤྲུལ་དང༌། །བདེ་བ་ཆེན་པོ་དེ་བརྗོད་པ། །ཆུ་སྐྱེས་འདབ་མ་བཅུ་དྲུག་བརྒྱད། །དྲུག་ཅུ་རྩ་བཞི་སུམ་ཅུ་གཉིས། །ཨོཾ་དང་ཧཱུྃ་དང་ཨཱཿདང་ནི། །ཧཾ་རྣམས་ཀྱིས་ནི་དབུས་སུ་བརྒྱན། །དེའི་རྗེས་ལ་རང་གི་སྙིང་གའི་ས་བོན་ལས་སྤྲོས་པའི་འོད་ཟེར་ལྕགས་ཀྱུ་རྣམས་ཀྱིས་ཕྱོགས་བཅུ་ན་བཞུགས་པའི་དེ་བཞིན་གཤེགས་པ་རྣམས་སྤྱན་དྲངས་ཏེ། ནམ་མཁའ་ལ་བཞུགས་སུ་གསོལ་ལ། དེ་དག་ལ་ལྷ་མོ་བརྒྱད་ཀྱིས་ཡང་དག་པར་མཆོད་ནས། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ་ཞེས་གསོལ་བ་གདབ་པར་བྱའོ། །དེ་ནས་དེ་དག་དཔལ་ཧེ་རུ་ཀའི་གཟུགས་སུ་གྱུར་པ་རྣམས་ཀྱིས། དེ་བཞིན་གཤེགས་པ་ལྔའི་བདག་ཉིད་ཀྱིས་བདུད་རྩི་ལྔས་གང་བའི་བུམ་པས་དབང་བསྐུར་རོ། །དབང་བསྐུར་བ་དང་ལྡན་པའི་སྤྱི་བོར་བཅོམ་ལྡན་འདས་མི་བསྐྱོད་པ་བསྐྱེད་དོ། །དེའི་མདུན་དུ་མེ་ཏོག་གི་ཆར་དང་གུར་ཀུམ་གྱི་ཆར་འབབ་པར་འགྱུར་རོ། །རྔའི་སྒྲ་ཡང་གྲག་གོ །གཟུགས་རྡོ་རྗེ་ལ་སོགས་པ་རྣམས་ཀྱིས་ཀྱང་ཡང་དག་པར་མཆོད་དོ། །སྤྱན་མ་ལ་སོགས་པ་རྣམས་ཀྱིས་ཀྱང་རྡོ་རྗེའི་གླུས་བསྟོད་དོ་ཞེས་བྱ་བ་ནི་དང་པོའི་རྣལ་འབྱོར་ཞེས་བྱ་བའི་ཏིང་ངེ་འཛིན་དང་པོ་ངོ་བོ་ཉིད་ཀྱི་སྐུ་བསྟན་ཏོ། །
དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་ལས་ལོངས་སྤྱོད་རྫོགས་པའི་སྐུ་བསྟན་པ།
དེ་ནས་པདྨ་བྱིན་གྱིས་བརླབ་པ་ནི། ཨོཾ་པདྨ་སུ་ཁཱ་དྷ་རཱ་མ་ཧཱ་རཱ་ག་སུ་ཁཾ་དཏྟ་ཙ་ཏུ་རཱ་ནནད་བྷ་ག་བི་ཤྭ་ཧཱུྃ་ཧཱུྃ་ཀཪྻཾ་ཀུ་རུ་ཥྭ་མེ། དེ་ནས་རྡོ་རྗེ་བྱིན་གྱིས་བརླབ་པ་ནི། ཨོཾ་བཛྲ་མ་ཧཱ་དྭེ་ཥ་ཙ་ཏུ་རཱ་ནནད་དཱ་ཡ་ཀ་ཁ་ག་མུ་ཀ་ཨེ་ཀ་ར་སོ་ནཱ་ཐ་ཧཱུྃ་ཧཱུྃ་ཀཪྻཾ་ཀུ་རུ་ཥྭ་མེ། དེ་ནས་ཨོཾ་ཤཱི་ཤཱི་ཧ་སྭཱ་ཧཱ། ཞེས་སྦྱོར་བ་བརྩམ་མོ། །དེ་ནས་པདྨའི་ནང་དུ་ལྟུང་བའི་ཟླ་བ་ཞུ་བའི་ཐིགས་པ་ཡོངས་སུ་གྱུར་པ་ལས། གཾ་གིས་གྲུབ་པའི་དཀར་མོ་ཁ་དོག་ནག་མོ་གྲི་གུག་དང་རོ་ཧི་ཏའི་ཉ་འཛིན་པ་ཤར་གྱི་སྒོར་ཟླ་བའི་གདན་ལ་བསམ་མོ། །དེ་བཞིན་དུ་ཙྃ་གིས་ཆོམ་རྐུན་མ་བཙོད་ཀྱི་མདོག་ཅན་ཅང་ཏེའུ་དང་ཕག་འཛིན་པ། ལྷོར་ཟླ་བའི་གདན་ལའོ། །དེ་བཞིན་དུ་བྃ་གྱིས་རོ་ལངས་མ་གསེར་གྱི་མདོག་ཅན་རུས་སྦལ་དང་ཐོད་པ་འཛིན་པ་ནུབ་ཀྱི་སྒོར་ཟླ་བའི་གདན་ལའོ། །དེ་
བཞིན་དུ་གྷྃ་གིས་ཟ་ཕོད་མ་མརྒད་ཀྱི་མདོག་ཅན་སྤྲུལ་དང་རྣལ་འབྱོར་གྱི་སྣོད་འཛིན་པ། བྱང་གི་སྒོར་ཟླ་བའི་གདན་ལའོ། །དེ་བཞིན་དུ་པྃ་གིས་སྤོས་མོ་ཨ་ནྡ་རྙིལ་གྱི་མདོག་ཅན་སེང་གེ་དང་དགྲ་སྟ་འཛིན་པ་དབང་ལྡན་གྱི་གྲྭའི་གདན་ལའོ། །དེ་བཞིན་དུ་སྃ་གིས་རི་ཁྲོད་མ་ཆུ་ཤེལ་གྱི་ཁ་དོག་ལྟ་བུ་དགེ་སློང་དང་འཁར་གསིལ་འཛིན་པ་མེའི་གྲྭའི་གདན་ལའོ། །དེ་བཞིན་དུ་ལྃ་གིས་གཏུམ་མོ་ནམ་མཁའ་ལྟར་སྔོ་བསངས་ཅན་འཁོར་ལོ་དང་གཤོལ་འཛིན་པ་བདེན་བྲལ་གྱི་གྲྭའི་གདན་ལའོ། །དེ་བཞིན་དུ་ཌྃ་གིས་གཡུང་མོ་ཁ་དོག་སྣ་ཚོགས་པ་རྡོ་རྗེ་དང་སྡིགས་མཛུབ་བྱེད་པ་རླུང་གི་གྲྭར་ཟླ་བའི་གདན་ལ་བསམ་པར་བྱའོ། །སྐྱིལ་ཀྲུང་ཕྱེད་པའི་གར་གྱིས་བཞུགས། །ཟླུམ་ཞིང་དམར་བའི་སྤྱིན་གསུམ་པ། །ཕྱག་གཉིས་སྐྲ་ཁམ་གྱེན་དུ་ཕྱོགས། །ཕྱག་རྒྱ་ལྔ་འཛིན་དེ་དག་ཀྱང༌། །དེ་ནས་ཡོངས་སུ་རྫོགས་པའི་དཀྱིལ་འཁོར་ལ་བལྟས་ནས། སྙིང་གའི་ས་བོན་གྱི་འོད་ཟེར་གྱི་ལྕགས་ཀྱུ་རྣམས་ཀྱིས་ཡེ་ཤེས་ཀྱི་དཀྱིལ་འཁོར་སྤྱན་དྲངས་ཏེ། ཤར་ཕྱོགས་ཀྱི་སྒོ་ལ་མངོན་པར་ཕྱོགས་ཤིང་བར་སྣང་ལ་བཞུགས་པ་ལ། ཞལ་བརྒྱད་ནས་ཧཱུྃ་རྣམས་ཀྱིས་བགེགས་བསྐྲད་དེ་མཆོད་ཡོན་དང་ཞབས་བསིལ་ཕུལ་ནས། ཛཿཧཱུྃ་བྃ་ཧོཿ་ཞེས་བྱ་བས་གོ་རིམས་བཞིན་དུ་དགུག་པ་དང་གཞུག་པ་དང་བཅིང་བ་དང་དབང་དུ་བྱས་ནས། དམ་ཚིག་དང་ཡེ་ཤེས་ཀྱི་དཀྱིལ་འཁོར་གཉིས་གཅིག་ཏུ་འདྲེས་པར་བསྒོམ་ཞིང་རྣམ་པར་བསྒོམས་ལ། སྙིང་གའི་སྔགས་ཀྱི་འོད་ཟེར་རྣམས་ཀྱིས་དེ་བཞིན་གཤེགས་པ་ཐམས་ཅད་སྤྱན་དྲངས་ནས་ཡང་དག་པར་མཆོད་དོ། གསོལ་བ་བཏབ་ལ་དབང་བསྐུར་བ་བྱིན་པར་བསམ་མོ། །དབང་བསྐུར་བ་དང་ལྡན་པ་ལ་དབང་བསྐུར་བའི་རྒྱལ་བས་མགོ་བོར་བསྐྱེད་དོ། །འདིར་ཚིགས་སུ་བཅད་པ། སྤོས་མོ་ལ་སོགས་བཞི་པོ་དག་དང་ནི། །དཀར་མོ་ལ་སོགས་དག་ལ་རིམ་བཞིན་དུ། །སྙིང་གའི་མི་བསྐྱོད་སངས་རྒྱས་རིན་ཆེན་འབྱུང༌། །ངག་དབང་རྣམས་ཀྱི་སྐབས་འདིར་ཕྱག་རྒྱས་གདབ། །ལུས་དང་ངག་སེམས་རིགས་བདག་རྣམས་ཀྱིས་ནི། །སྲིད་དང་མྱང་འདས་ཧེ་རུ་ཀ་རྣམས་ལའོ། །རྡོ་རྗེ་མ་སོགས་ལ་ནི་རིགས་ཀྱི་བདག །ལྔ་པོ་རྒྱལ་བ་མི་བསྐྱོད་སོགས་རྣམས་ཀྱི། །དེ་
ནས་ལྷ་རྣམས་ཀྱི་དེ་ཁོ་ན་ཉིད་ཡིད་ལ་བྱ་སྟེ། འདིར་ལུས་དང་ངག་དང་ཡིད་དང་ཡེ་ཤེས་རྣམས་ཀྱི་ཆོས་ཐམས་ཅད་བསྦུས་ལ། ལུས་ལ་སོགས་པ་དེ་དག་ཆོས་ཉིད་རྣམ་པར་རིག་པ་ཙམ་གཉིས་ཀྱིས་སྟོང་པ་ཉིད་གང་ཡིན་པ་དེ་དག་ལ་སོ་སོར་རྟོག་པ་ནི། ཅི་རིགས་པར་སྒོ་སྐྱོང་རྣམས་ཀྱི་དེ་ཁོ་ན་ཉིད་དོ། །སྟོང་པ་ཉིད་དེ་ཉིད་ཀྱིས་ཡང་དག་པའི་ཡེ་ཤེས་གང་ཡིན་པ་སྤྲོས་པ་དང་བྲལ་བ་ཟག་པ་མེད་པའི་ཤེས་རབ་བླ་ན་མེད་པའི་རྡོ་རྗེ་ཐེག་པ་ནི་ཅི་རིགས་པར་སྦོས་མོ་ལ་སོགས་པ་བཞིའི་དེ་ཁོ་ན་ཉིད་དོ། །རྡོ་རྗེ་ཐེག་པ་དེ་ཉིད་ཀྱིས་འབྲས་བུ་རྡོ་རྗེ་འཛིན་པ་ཆེན་པོའི་གོ་འཕང་གོང་ན་མེད་པའི་བྱང་ཆུབ་ནི་དཀྱིལ་འཁོར་གྱི་བདག་པོའི་དེ་ཁོ་ན་ཉིད་དོ། །དེ་ནས་རང་གི་སྙིང་གའི་ས་བོན་ལས་མཆོད་པའི་ལྷ་མོ་བརྒྱད་ཡང་དག་པར་སྤྲོས་ཏེ། ཡང་དག་པར་སྤྲོས་པའི་སྤྲིན་རྣམས་ཀྱིས་ནམ་མཁའ་གང་བར་གྱུར་པས། གཙོ་བོ་དང་བཅས་པའི་དཀྱིལ་འཁོར་ལ་མཆོད་པར་བྱའོ། །དེ་ནས་ཆོས་ཐམས་ཅད་སྒྱུ་མ་ལྟ་བུར་མོས་པར་བྱས་ནས། གླུ་གཉིས་ཀྱིས་བཅོམ་ལྡན་འདས་ལ་བསྟོད་པ་བྱ་སྟེ། སྣ་ཚོགས་དུ་མའི་སྒེག་དང་ལྟ་བ་རྣམས་ཀྱིས་རབ་ཏུ་དགའ། །སྣ་ཚོགས་དུ་མའི་འོད་དང་འཁྱུག་པ་རྣམས་ཀྱིས་རབ་ཏུ་དགའ། །སྣ་ཚོགས་དུ་མའི་བདེ་བའི་སྟོན་མོ་རྣམས་ཀྱང་རབ་ཏུ་གསོལ། །སྣ་ཚོགས་དུ་མའི་སྡོམ་པ་ཆེན་པོ་རྣམས་ནི་རབ་ཏུ་སྟོན། །ནམ་མཁའ་ཀུན་གྱི་རྣལ་འབྱོར་གྱིས། །ནམ་མཁའི་དམ་ཚིག་ལ་ཞུགས་ཤིང༌། །འཇིག་རྟེན་མ་ལུས་པ་རྣམས་ནི། །ནམ་མཁའ་ཐམས་ཅད་ཀྱིས་གསོལ་ལོ། །དེ་ནས་བར་སྣང་ལ་ཧཱུྃ་ལས་རྡོ་རྗེ་རྣམ་པར་བསམས་ལ། དེའི་འོག་ཏུ་ཨ་ལས་པདྨ་སྟེ། དེའི་དབུས་སུ་རྫས་རྣམས་ལ་ཨོཾ་གྱིས་མཚན་ནས། རྡོ་རྗེ་དང་པདྨ་མཉམ་པར་སྦྱོར་བ་ལས་འདོད་ཆགས་ཆེན་པོའི་མེ་འབར་ཏེ། དེས་དེ་རྣམས་བསྐོལ་ཞིང་སྨིན་པ་ཞུ་བར་བྱས་ནས་ཡེ་ཤེས་ཀྱི་ཉི་མའི་སྣང་བར་གྱུར་ཏེ། དེ་དག་གི་འོད་ཟེར་རྣམས་ཀྱིས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་གཟུགས་སྣང་བར་བྱས་ནས། འོད་ཟེར་དེ་དག་ཉིད་ཀྱིས་དེ་དག་གི་ཡེ་ཤེས་ཀྱི་ས་བོན་ལས་ཡེ་ཤེས་ཀྱི་བདུད་རྩི་བླངས་ནས། དེར་ལྷུང་ཞིང་འདྲེས་པར་བྱས་ལ། དེ་བཞིན་དུ་དེ་དག་
བདུད་རྩིར་གྱུར་ནས་ཡི་གེ་གསུམ་གྱིས་བྱིན་གྱིས་བརླབས་ལ་ལྕེ་ལ་ཧཱུཾ་དང་རྡོ་རྗེ་མཆོག་དང༌། སྙིང་གར་ཉི་མ་ལ་དཀྱིལ་འཁོར་མོས་པར་བྱས་ནས། དེ་དག་གི་བདག་ཉིད་དང་དཀྱིལ་འཁོར་ཡང་དག་པར་མཆོད་པར་བྱའོ། །མ་མོའི་འཁོར་ལོ་ཉམས་དགའ་བར། །རླབས་དང་བྲལ་བའི་བདེ་བ་ཐོབ། །རླབས་མེད་པ་ཡི་རང་བཞིན་ཅན། །འདི་འདྲའི་ཁྱབ་བདག་བསྒོམ་པར་བྱའོ། །དཀྱིལ་འཁོར་རྒྱལ་པོ་མཆོག་ཅེས་བྱ་བ་ཏིང་ངེ་འཛིན་གཉིས་པ་ལས་ལོངས་སྤྱོད་རྫོགས་པའི་སྐུའོ། །
ལས་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་སྤྲུལ་པའི་སྐུ་བསྟན་པ།
དེ་ནས་དཀར་མོ་དང་ཆོམ་རྐུན་མ་དང༌། དཀྱིལ་འཁོར་གྱི་བདག་པོའི་བར་དུ་རེ་རེ་ནས་རིམ་གྱིས་ཕྱོགས་བཅུར་རྒྱུན་མི་འཆད་པར་སྤྲོས་ཏེ། སེམས་ཅན་རྣམས་ཀྱི་དོན་བྱས་ནས། དེ་ཉིད་དུ་བསྡུས་པ་ནི་བྱ་བ་བྱས་པའི་དཀྱིལ་འཁོར་རོ། །དཀྱིལ་འཁོར་གྱི་བདག་པོ་ཡང་སྤྲོས་པ་དང་བྲལ་བའི་བདེ་བ་སྟེང་བར་བལྟ་སྟེ། དེ་ལ་དཀར་མོས་ནི་ལུས་ཀྱི་དེ་ཁོ་ན་ཉིད་ལ་སོ་སོར་རྟོག་པ་ལ་སེམས་ཅན་རྣམས་རྣམ་པར་གནས་པར་བྱེད་དོ། །ཆོམ་རྐུན་མས་ནི་སེམས་ཀྱིའོ། །རོ་ལངས་མས་ནི་ངག་གིའོ། །ཟ་ཕོད་མས་ནི་ཡེ་ཤེས་ཀྱིའོ། །སྦོས་མོས་ནི་ལུས་ཀྱི་ཡང་དག་པའི་ཡེ་ཤེས་ལའོ། །རི་ཁྲོད་མས་ནི་སེམས་ཀྱིའོ། །གཏུམ་མོས་ནི་ངག་གིའོ། །སྨེ་མོས་ནི་ཡེ་ཤེས་ཀྱིའོ། །དཀྱིལ་འཁོར་གྱི་བདག་པོས་ཀྱང་རྡོ་རྗེ་འཛིན་པ་ཆེན་པོའི་གོ་འཕང་ལ་སེམས་ཅན་རྣམས་གནས་པར་བྱེད་དོ། །དེ་ནས་ཡན་ལག་དྲུག་གི་རྣལ་འབྱོར་གྱིས་མཉམ་བསྒོམ་པར་བྱ་སྟེ། ནག་པོ་དམར་པོ་དེ་ནས་སེར། །ལྗང་སྔོན་དཀར་པོ་རིམ་པ་ལས། །ལྷན་ཅིག་སྐྱེས་དགའ་ཙམ་དུ་ནི། །འཁོར་ལོ་གཙོ་བྱས་བསམ་པར་བྱ། །ལས་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་སྤྲུལ་བའི་སྐུའོ། །
བཟླས་པ་སོགས་བསྟན་པ།
བསྒོམ་པས་སྐྱོན་སྔགས་བཟླ་བར་བྱ་སྟེ། བདག་ཉིད་དཀྱིལ་འཁོར་དང་བཅས་པ་ལྷའི་གཟུགས་སུ་བརྟན་པར་རྣམ་པར་བསམས་ལ། ཨོཾ་དེ་བ་པི་ཙུ་བཛྲ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། སྙིང་གར་སྔགས་ཀྱི་ཡི་གེ་བཅུ་གསུམ་མགོ་གྱེན་དུ་འགྲེང་བ་མར་མེ་ལྟར་འབར་ཞིང་ཟླུམ་པོར་གྱུར་པར་ཡིད་ཀྱིས་མངོན་པར་བྲིས་ནས་བརྗོད་པར་བྱ་བ་ནི། རྡོ་རྗེའི་ཚིག་དང་ཁྲོ་བོའི་ཚིག་ཏུ་བཟླས་པས་དེ་
དག་བཟླ་བར་བྱ་སྟེ། ཞལ་ཐམས་ཅད་དང༌། ལྷ་མོའི་ཞལ་ཐམས་ཅད་སྔགས་འདོན་པར་མོས་པར་བྱའོ། །འདི་ཉིད་ནི་ལྷ་མོ་ཐམས་ཅད་ཀྱི་བཟླས་པ་ལས་ལྷ་རང་ཉིད་ཀྱི་བཟླས་པ་བརྒྱ་འགྱུར་དུ་བྱས་པར་འགྱུར་རོ། །དེ་ནས་སྨོན་ལམ་གདབ་པར་བྱའོ། །དགེ་བ་གང་ཐོབ་དེ་དག་གིས། །སངས་རྒྱས་ཀུན་གྱི་ནོར་ཐམས་ཅད། །རྡོ་རྗེ་འཛིན་ཆེན་གོ་འཕང་ནི། །འགྲོ་བ་ལྔ་ཡིས་ཐོབ་པར་ཤོག །བྱང་ཆུབ་རྡོ་རྗེ་སྔགས་པ་ཡིས། །རྫོགས་པའི་བྱང་ཆུབ་ཕྱིར་སྤྱོད་དང༌། །རྫོགས་སངས་རྒྱས་ཀྱི་སྤྱོད་པ་གང༌། །བདག་ནི་དེ་གཉིས་སྤྱོད་པར་ཤོག །དེ་ནས་གཙོ་བོ་དང་བཅས་པའི་དཀྱིལ་འཁོར་སྔ་མ་བཞིན་དུ་ཡང་དག་པར་མཆོད་ནས་རང་གི་སྙིང་གའི་སྔགས་ལ་ལྷ་མོ་ནང་དུ་བསྒོམས་ཏེ། རྟེན་གྱི་དཀྱིལ་འཁོར་ཤིན་ཏུ་ཡང་ཡངས་པར་མོས་པར་བྱས་ལ། འབྱུང་བ་ཆེན་པོ་བཞི་ནི་སྦོས་མོ་ལ་སོགས་པའི་རང་བཞིན་དུ་ངེས་པར་བྱས་ནས། དགྱེས་པའི་རྡོ་རྗེའི་ང་རྒྱལ་གྱིས་ལྡང་བར་བྱ་སྟེ། དེ་ནས་བཟླས་པ་ལ་སོགས་པ་བྱའོ། །གཉིད་ཀྱི་དུས་སུ་ཡན་ལག་དྲུག་གི་རྣལ་འབྱོར་རམ་ལྷན་ཅིག་སྐྱེས་པ་དགའ་བའི་རྣལ་འབྱོར་མངོན་དུ་བྱས་ལ་གཉིད་ལོག་གོ །ལྷ་མོ་བཞིའི་ཡང་དག་པའི་གླུས་བསྐུལ་ནས་གཉིད་ལས་ལྡང་བར་བྱ་སྟེ། ལངས་ནས་ཐམས་ཅད་སྔ་མ་བཞིན་དུ་བྱའོ། །དེ་བཞིན་དུ་ཉི་མ་རེ་རེ་ཞིང་དངོས་གྲུབ་ཀྱི་མཚན་མའི་བར་དུ་བལྟའོ། །དེ་དག་མཐོང་ནས་གོ་རིམས་བཞིན་དུ་མཐོང་བར་འདོད་པའི་དངོས་གྲུབ་ཀྱི་ངོ་བོ་ལ་རྗེས་སུ་གནས་པར་བྱའོ། །ཡོན་ཏན་ལྕི་བའི་འབྱུང་གནས་ཞལ་བརྒྱད་ཧེ་རུ་ཀའི། སྒྲུབ་ཐབས་འཁྲུལ་པ་སྤོང་བ་ཞེས་བྱ་གསལ་བར་བརྗོད་པ་ཡིས། །དགེ་བ་གང་ཞིག་ཐོབ་པ་འདི་ཡིས་སྐྱེ་ལ་བརྟེན་པ་བདག །དུས་རྣམས་ཀུན་དུ་ཕན་པའི་རྒྱུ་དེས་རྡོ་རྗེ་རྒྱལ་བར་ཤོག །སློབ་དཔོན་རིན་ཆེན་འབྱུང་གནས་ཞི་བས་མཛད་པ་རྫོགས་སོ། །