དཔལ་དགྱེས་པ་རྡོ་རྗེའི་སྒྲུབ་ཐབས་རིན་པོ་ཆེའི་སྒྲོན་མ།
མར་མེ་མཛད་ཡེ་ཤེས་ཀྱིས་མཛད།
རྒྱ་གར་སྐད་དུ། ཤྲཱི་ཧེ་བཛྲ་རཏྣ་པྲ་ལོ་ཀེ་སཱ་དྷ་ནཾ་ནཱ་མ། བོད་སྐད་དུ། དཔལ་དགྱེས་པ་རྡོ་རྗེའི་སྒྲུབ་ཐབས་རིན་པོ་ཆེའི་སྒྲོན་མ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཧེ་རུ་ཀ་དང་བདག་མེད་བཅས། །དེ་ཆོས་འཁོར་ལ་ཕྱག་འཚལ་ཏེ། །དེ་འདོད་ཕྱིར་ན་དེ་སྒྲུབ་ཐབས། །དེ་དོན་གཉེར་ལ་སྒྲོན་འདི་བྲི། །ཆགས་མེད་བྱང་ཆུབ་སེམས་དང་ལྡན། །དབང་ཐོབ་བློ་ལྡན་ལུང་བླངས་པས། །དུར་ཁྲོད་ལ་སོགས་གནས་བདེ་བར། །རྣལ་འབྱོར་བརྩོན་པས་བསྒྲུབ་པར་བྱའོ། །ཐོ་རངས་བྱམས་པས་མལ་ནས་ལངས། །གདོང་ལ་སོགས་པ་དིས་བཀྲུས་ནས། །རྡོ་རྗེས་མཚན་པའི་སྟན་ལ་འདུག །བདུད་རྩིའི་རི་ལུ་ལྕེ་ལ་གཞག །སྙིང་རྗེས་མ་རྣམས་གཟུང་བྱས་ལ། །ཞལ་བརྒྱད་ང་རྒྱལ་བདག་བསྒོམས་ཏེ། །རཀྵས་ས་སྦྱང་གནས་བསྲུང་བ། །མེ་རི་དྲ་གུར་བརྟན་པར་བསྒོམ། །ཧེ་རུ་ཀ་ཡི་སྙིང་ག་རུ། །བཾ་དང་རཾ་ལས་གསལ་བར་ནི། །པདྨ་ཉི་མ་དམར་པོ་བསྒོམ། །དེ་སྟེང་ཧཱུཾ་ནག་འོད་ཟེར་ལྔས། །
ཕྱོགས་བཅུར་སྤྲོས་པ་བསྐུལ་དང་སྦྱང༌། །བྱས་ནས་ཐམས་ཅད་མཁའ་ལ་བཞུགས། །བླ་མ་སངས་རྒྱས་རང་དག་ལྷ། །གསལ་བསྒོམས་ལུས་སྤྲུལ་ཕྱག་བྱའོ། །དེ་ཡང་འོག་ནས་སྟོན་པ་ཡི། །བཅོམ་ལྡན་སྐུ་མདོག་ཕྱག་དང་རྒྱན། །ཕྱག་མཚན་བཅས་པ་བཞུགས་པ་ནི། །བདག་མེད་ཡུམ་དང་ལྡན་པའོ། །དེ་མདུན་གཽ་རཱི་ནག་མོ་ནི། །བྱང་ཆུབ་སེམས་དཀར་རི་བོང་ཅན། །གཡས་ན་ཙཽ་རཱི་དམར་མོ་ཡང༌། །བྱང་སེམས་དམར་པོ་ཉི་འོད་འབུལ། །རྒྱབ་ན་སེར་མོ་བེ་ཏཱ་ལཱི། །ལྷུང་བཟེད་ཆུ་བཟང་བཀང་བ་འབུལ། །གཡོན་ན་ལྗང་གུ་གྷསྨ་རཱི། །དྲི་བཟང་ཐོད་པ་བཀང་པ་འབུལ། །བྱང་ཤར་པུཀྐ་སཱི་སྔོན་མོ། །ཤ་ལྔས་ཐོད་པ་བཀང་བ་འབུལ། །མེ་ན་མདོག་དཀར་ཤ་བ་རཱི། །རོ་ལྡན་བཏུང་བ་སྣ་ཚོགས་འབུལ། །ལྷོ་ནུབ་མདོག་དམར་ཙཎྜལཱི། །ཌ་མ་རུ་སྒྲོག་སྒྲ་རྣམས་འབུལ། །རླུང་ན་ཌོ་མྦཱི་སྣ་ཚོགས་གཟུགས། །ཕྱག་རྒྱ་བསྣོལ་ནས་མཆོད་པ་འབུལ། །བླ་མ་མི་བསྐྱོད་སྤྱི་བོར་བཞུགས། །གསལ་བར་བརྟན་པར་ལེགས་བསྒོམས་ལ། །སྙིང་གའི་ས་བོན་སྤྲོ་བསྡུ་ལས། །ཕྱི་ཡི་ལྷ་མོ་མཆོད་པའི་ཚོགས། །ཡོན་ཆབ་མེ་ཏོག་སྤོས་ལ་སོགས། །རབ་གནས་ལེའུའི་སྣགས་ཀྱིས་མཆོད། །ས་བོན་སྤྲོས་ལ་གཽ་རཱིའི་ཚོགས། །བཤམས་དང་གནས་ནས་བྱོན་པ་དང༌། །མདུན་ན་གནས་པའི་རིམ་པ་ཡིས། །བདུད་རྩི་ལྔ་དང་ཤ་ལྔ་འབུལ། །གཙོ་བོའི་ས་བོན་གྱིས་བསྐུལ་ནས། །ཌོཾ་བཱི་གསང་བའི་མཆོད་པ་འབུལ། །མཆོད་པའི་ལྷ་མོ་ཐམས་ཅད་ཀྱང༌། །སྤྲོས་པ་དེ་དག་གནས་ནས་བསྡུ། །དེ་ནས་དེ་དག་མདུན་དུ་ཡང༌། །པུས་བཙུགས་ཐལ་སྦྱར་འཇིགས་སེམས་ཀྱིས། །ཐོག་མེད་དུས་ནས་དེང་དུས་སུ། །འཁོར་བས་འཁོར་བར་བསགས་པའི་སྡིག །བགྱིས་དང་བགྱིད་དུ་སྩལ་བ་དང༌། །ཡི་རང་བཤགས་ཤིང་སླན་ཆད་བསྡམ། །སངས་རྒྱས་བྱང་ཆུབ་སེམས་དཔའ་དང༌། །རང་རྒྱལ་ཉན་ཐོས་སོ་སོ་ཡི། །སྐྱེ་བོའི་དགེ་ལ་རྗེས་ཡི་རང༌། །གསུམ་ལ་སྐྱབས་དང་སེམས་གཉིས་བསྐྱེད། །བསྐུལ་དང་གསོལ་བདག་ཀྱང་གདབ། །ཐམས་ཅད་བྱང་ཆུབ་ཆེན་པོར་བསྡོ། །དེ་ནས་བྱམས་
དང་སྙིང་རྗེ་དང༌། །དགའ་དང་བཏང་སྙོམས་ཡུན་རིངས་བསྒོམ། །དེ་ཉིད་གསུམ་དང་མུཿ་བརྗོད་པས། །མདུན་གྱི་སྤྱན་དྲངས་གནས་སུ་གཤེགས། །ཆོས་རྣམས་སྟོང་པར་ཤེས་བྱས་ལ། །བློ་གནས་པ་ལ་སྔགས་འདི་བརྗོད། །ཨོཾ་སྭ་བྷཱ་བ་ཤུདྡྷཿ་སརྦ་དྷརྨཱ་སྭ་བྷཱ་བ་ཤུདྡྷོ྅ཧཾ། །བརྗོད་པས་གཟུང་བའི་ཆོས་རྣམས་ཀུན། །རྨི་ལམ་མིག་འཕྲུལ་སྨིག་རྒྱུ་དང༌། །ཆུ་ཟླ་མིག་ཡོར་སྒྱུ་མ་ཙམ། །སེམས་སྣང་ཙམ་ལས་ཡོད་མ་ཡིན། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། བརྗོད་པས་སེམས་སྣང་དེ་དག་ཀུན། །རྡུལ་དང་དུ་བ་ཁུག་རྣ་སྤྲིན། །སྐྱོན་བྲལ་སྟོན་ཀའི་ཉི་ཕྱེད་ཀྱི། །ནམ་མཁའི་དཀྱིལ་ལྟར་སེམས་གཞག་བྱ། །ཆོས་ཉིད་སྤྲོས་དང་བྲལ་བ་ལས། །སྨོན་ལམ་བྱམས་པས་འགྲོ་བ་དྲན། །ནམ་མཁའི་དཀྱིལ་དུ་རཾ་དང་ཧཱུཾ། །ཉི་མའི་དཀྱིལ་འཁོར་དུས་མེ་འབར། །དེ་ནས་ཧཱུཾ་ལས་བྱུང་བ་ཡི། །སྣ་ཚོགས་རྡོ་རྗེའི་ས་གཞི་དང༌། །ར་བ་གུར་དང་བླ་རེ་དང༌། །རྡོ་རྗེ་ར་བ་འབར་བ་འཕྲོ། །དེ་ནས་ཨེ་ལས་ཆོས་ཀྱི་དབྱིངས། །ཆོས་འབྱུང་གྲུ་གསུམ་ནམ་མཁའ་མཉམ། །བསྒོམས་པའི་ནང་དུ་ཡཾ་རཾ་བཾ། །ལཾ་བཞི་སྔོ་དམར་དཀར་དང་སེར། །ཡཾ་ཞུ་སྔོན་པོ་གཞུ་ཡི་དབྱིབས། །རླུང་གི་དཀྱིལ་འཁོར་བ་དན་ལྡན། །དེ་སྟེང་རཾ་ལས་གྲུ་གསུམ་དམར། །མེ་ཡི་དཀྱིལ་འཁོར་རཾ་གྱིས་མཚན། །དེ་སྟེང་བཾ་ལས་ཟླུམ་པོ་དཀར། །ཆུ་ཡི་དཀྱིལ་འཁོར་བུམ་པས་མཚན། །དེ་སྟེང་ལཾ་ལས་གྲུབ་བཞི་སེར། །ས་ཡི་དཀྱིལ་འཁོར་རྡོ་རྗེས་མཚན། །སེམས་ཀྱི་སྣང་བས་དེ་རྣམས་ཞུ། །སྣང་བ་མཆེད་པས་གཞལ་ཡས་གྲུབ། །རིན་པོ་ཆེ་ལས་གྲུབ་པ་ཡི། །ཟུར་བཞི་སྒོ་བཞི་ལོགས་བཞི་པ། །རྟ་བབས་བཞི་དང་ཀ་བ་བརྒྱད། །མཆོད་པ་སྣ་ཚོགས་རྒྱན་གྱིས་མཛེས། །ཆོས་ཀྱི་འཁོར་ལོ་རི་དགས་གདུགས། །བ་དན་དྲིལ་བུ་འཕན་ལ་སོགས། །སངས་རྒྱས་མང་པོའི་སྣང་བས་ཁྱབ། །དྲ་བ་དྲ་ཕྱེད་ཏྭ་ར་ན། །བུམ་པ་རྡོ་རྗེ་ཕྲེང་བ་དང༌། །སྒོ་ཁྱུད་ཟླ་ཕྱེད་རྡོ་རྗེ་མཛེས། །དུར་ཁྲོད་བརྒྱད་ན་མཚོ་བརྒྱད་ཀླུ། །ཤིང་བརྒྱད་ཞིང་སྐྱོང་གདན་མགོ་བརྒྱད། །ཕྱོགས་སྐྱོང་ཆུང་མ་བུ་འཁོར་བརྒྱད། །སྟེང་ན་ལྷ་བརྒྱད་ལྷ་ཡི་འཁོར། །མཆོད་རྟེན་བརྒྱད་དང་རྣལ་འབྱོར་ཚོགས། །
གྲོགས་བྱེད་རྣལ་འབྱོར་རོ་ལངས་འདྲེ། །བྱ་དང་གཅན་གཟན་སྣ་ཚོགས་སྤྲུལ། །ཤ་ཟ་གདུག་པ་རོ་ཡི་ཚོགས། །ཤར་སོགས་སྒོ་ཡི་ལོགས་རིམ་པར། །གླུ་མ་གར་མ་ཡོན་ཆབ་མ། །མེ་ཏོག་སྤོས་དང་མར་མེ་མ། །དྲི་ཆབ་ཞལ་ཟས་སྒྲ་སྣ་ཚོགས། །གཟུགས་སྒྲ་དྲི་རོ་རེག་བྱ་ཆོས། །རྒྱན་ཕྲེང་མ་རྣམས་སྣ་ཚོགས་མདོག །དེ་ནང་དཀར་སེར་དམར་དང་ལྗང༌། །གཞལ་ཡས་དབུས་ནི་མཐིང་ག་འབར། །རྡོ་རྗེ་ར་བ་པདྨར་ལྡན། །གེ་སར་བདུད་བཞི་ཉི་མས་མནན། །པད་མ་བརྒྱད་ལ་ལྷ་བརྒྱད་བྲི། །སྙིང་གར་ཟླ་བས་མནན་པའོ། །མཛེས་པའི་གཞལ་ཡས་དེ་ནང་གི །དབུས་ཀྱི་བདུད་བཞིའི་ཉི་སྟེང་དུ། །ཧཱུཾ་དང་ཨཾ་ལས་འོག་དང་སྟེང༌། །ཨཱ་ལི་ཉིས་འགྱུར་ཟླ་དཀྱིལ་འཁོར། །ཀཱ་ལི་ཉིས་འགྱུར་ཉིད་དཀྱིལ་འཁོར། །ཐོད་པ་གྲི་གུག་ཕྱག་མཚན་མ། །ས་བོན་གནས་པ་སྤྲོ་བསྡུས་པས། །ཐམས་ཅད་གཅིག་ཏུ་གྱུར་པ་ལས། །ཞལ་བརྒྱད་ཡུམ་དང་ཁ་སྦྱར་བ། །འོག་གཞི་གསལ་བར་བསྒོམ་པར་བྱ། །ཆགས་ཅན་བསྐྱབ་ཕྱིར་ཐུགས་རྗེ་ཡིས། །བདག་ཉིད་ཐུགས་ཀའི་ས་བོན་ལས། །ཕྱོགས་བཅུར་སངས་རྒྱས་གཙུག་ཏུ་བྱོན། །ཐུགས་ཀར་ས་བོན་སོ་སོར་གནས། །ཨོཾ་པདྨ་སུ་ཁཾ་དྷ་ར་མ་ཧཱ་རཱ་ག་དཏྟ་ཙ་ཏུར་ཨཱ་ནནད་བྷ་ག་བི་ཤྭ་ཧཱུཾ་ཧཱུཾ་ཧཱུཾ་ཀ་ཪྻཾ་ཀུ་རུ་ཥྭ་མེ། པདྨ་སྔགས་ཀྱིས་བྱིན་གྱིས་བརླབ། །དེ་ནས་རྡོ་རྗེ་བྱིན་གྱིས་བརླབ། །ཨོཾ་བཛྲ་མ་ཧཱ་དྭེ་ཥ་ཙ་ཏུར་ཨཱ་ནནད་དཱ་ཡ་ཀ་ཁ་ག་མུ་ཁ་ཨེ་ཀ་ར་སོ་ནཱ་ཐ་ཧཱུཾ་ཧཱུཾ་ཧཱུཾ་ཀ་ཪྻཾ་ཀུ་རུ་ཥྭ་མེ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཏ་བཛྲ་སྭ་བྷཱ་བ་ཨཱ་ཏྨ་ཀོ྅ཧཾ། དེ་ནི་སྦྱོར་བ་དང་པོ་ཡིན། །དེ་ནས་རྗེས་སུ་ཆགས་པ་ཡིས། །ཤར་སོགས་ཚངས་སོགས་སྙིང་ག་རུ། །གཾ་ཙཾ་བཾ་གྷཾ་པཾ་ཤཾ་ལཾ་ཌཾ། །དེ་ནས་ཕྱོགས་མཚམས་རྣམས་སུ་བབས། །ཤར་དུ་གཾ་ཡིག་གསལ་བ་ལས། །ཨཱ་ལི་ཉིས་འགྱུར་ལས་ཟླ་བའི། །དཀྱིལ་འཁོར་མེ་ལོང་ཡེ་ཤེས་དང༌། །སྟེང་དུ་ཀཱ་ལི་ཉིས་འགྱུར་ལས། །ཉི་མའི་དཀྱིལ་འཁོར་མཉམ་པ་ཉིད། །གཾ་གྱུར་གྲི་གུག་ནག་པོ་ལ། །ཟླ་བ་ས་བོན་སོ་སོར་རྟོག །ས་བོན་སྤྲུལ་སྦྱང་གཅིག་གྱུར་པ། །བྱ་བ་ནན་ཏན་ཡེ་ཤེས་ཡིན། །གཽ་རཱི་བཞེངས་པའི་སྐུ་དེ་ནི། །ཆོས་ཀྱི་དབྱིངས་ཀྱི་ཡེ་ཤེས་སོ། །སྔོན་དུ་
བསྒོམས་པའི་གཙོ་བོ་དང༌། །འོག་གི་ལྷ་མོ་བདུན་པོ་ཡང༌། །དེ་བཞིན་ཡེ་ཤེས་ལྔ་ཡི་སྐུ། །རྣལ་འབྱོར་པ་ཡིས་བརྟན་པར་བསྒོམ། །ཤར་དུ་གྲི་གུག་ལས་བྱུང་བའི། །ཚངས་པའི་སྟེང་ན་གཽ་རཱི་ནག །གཡས་ན་གྲི་གུག་གཡོན་ན་ཉ། །གཟུགས་ཀྱི་ཕུང་པོ་རང་བཞིན་བསྒོམ། །ལྷོ་རུ་དབང་པོའི་སྟེང་གནས་དམར། །ཌ་མ་རུ་ལས་ཙཽ་རཱི་བཞེངས། །ཌ་མ་རུ་གཡས་ཕག་པ་གཡོན། །ཚོར་བའི་ཕུང་པོའི་རང་བཞིན་བསྒོམ། །ནུབ་ཏུ་བཾ་ལས་བེ་ཏཱ་ལཱི། །གསེར་མདོག་ཉེ་དབང་གདན་ལ་བཞུགས། །གཡས་ན་རུས་སྦལ་ཐོད་པ་གཡོན། །འདུ་ཤེས་ཕུང་པོའི་རང་བཞིན་བསྒོམ། །བྱང་དུ་གྷཾ་ལས་གྷསྨ་རཱི། །དྲག་པོའི་སྟེང་ན་མར་ཀཏ་མདོག །སྤྲུལ་གཡས་ཕྱག་གཡོན་ཐོད་པ་འཛིན། །འདུ་བྱེད་ཕུང་པོའི་རང་བཞིན་བསྒོམ། །བྱང་ཤར་པཾ་ལས་སེང་གེ་ལས། །པུཀྐ་སཱི་སྔོ་གཤིན་རྗེའི་སྟེང༌། །གཡས་ན་སེང་གེ་དགྲ་སྟ་གཡོན། །ས་ཡི་ཁམས་ཀྱི་རང་བཞིན་ནོ། །མེ་རུ་ཤཾ་དང་དགེ་སློང་ལས། །ཤ་བ་རཱི་དཀར་གནོད་སྦྱིན་གདན། །གཡས་ན་དགེ་སློང་གསིལ་བྱེད་གཡོན། །ཆུ་ཡི་ཁམས་ཀྱི་རང་བཞིན་ནོ། །སྲིན་པོར་ལཾ་དང་འཁོར་ལོ་ལས། །གཏུམ་མོ་མཁའ་མདོག་སྲིན་པོ་མནན། །གཡས་ན་འཁོར་ལོ་ཐོང་གཤོལ་གཡོན། །མེ་ཡི་ཁམས་ཀྱི་རང་བཞིན་ནོ། །རླུང་དུ་ཌཾ་དང་རྡོ་རྗེ་ལས། །ཌཾ་བཱི་ཁ་དོག་སྣ་ཚོགས་ཏེ། །རྡོ་རྗེ་གཡས་ལ་སྡིགས་མཛུབ་གཡོན། །རླུང་གི་ཁམས་ཀྱི་རང་བཞིན་བསྒོ་མ། །ལྷ་མོ་དེ་རྣམས་སྤྱན་གསུམ་མ། །དམར་ཞིང་ཟླུམ་ལ་མཆེ་བ་གཙིགས། །དབུ་སྐྲ་ཁམ་སེར་གྱེན་དུ་མཛེས། །རུས་ཐོད་འཁོར་ལོ་སྙན་ཆ་དང༌། །མགུལ་རྒྱན་ལ་སོགས་ཕྱག་རྒྱ་ལྔ། །མི་མགོ་སྐམ་པོ་བཅོ་ལྔའི་ཕྲེང༌། །གཅེར་བུ་གཡོན་བརྐྱང་གར་ཐབས་བཞུགས། །གཙོ་ལ་འདུད་པའི་སྟངས་དང་ལྡན། །བར་དོར་གནས་པའི་ལུས་ངག་ཡིད། །ཨོཾ་དང་ཨཱཿ་ཧཱུཾ་དཀར་དམར་ནག །ཧོཿ་གཉིས་ཐབས་དང་ཤེས་རབ་བརྟེན། །འཁོར་ལོས་སྒྱུ་མ་ལྟར་མཐོང་ནས། །གཙོ་བོའི་སྤྱིར་ཞུགས་གཙོ་ཉིད་ཞུ། །ཡུམ་ཡང་ཞུ་ནས་ཧཱུཾ་ཨཾ་གཉིས། །ས་བོན་དཀྱིལ་འཁོར་དབུས་གནས་པ། །རྟོག་མེད་བདེ་བ་ཆེན་པོར་བཞུགས། །བདག་པོ་སྟོར་
བས་ལྷ་མོ་རྣམས། །ཤིན་ཏུ་འདོད་པའི་སེམས་གདུངས་པས། །པུཀྐ་སཱི་སོགས་ལྷ་མོ་བཞིས། །རྡོ་རྗེའི་གླུ་ནི་ལེན་པར་བྱེད། །རྗེ་བཙུན་ཐུགས་རྗེའི་ཡིད་བཞེངས་ཤིག །པུཀྐ་སཱི་ནི་བདག་ལ་སྐྱོབས། །སྟོང་པའི་རང་བཞིན་ཉིད་སྤོངས་ལ། །བདག་ལ་བདེ་ཆེན་སྦྱོར་བ་མཛོད། །ཁྱོད་མི་བཞུགས་ན་བདག་འགུམ་པས། །ཐུགས་རྗེ་རྒྱུན་ཆད་མ་མཛད་བཞེངས། །སྟོང་ཉིད་བཅོམ་ལྡན་ཅི་ལ་བཞུགས། །ཤ་པ་རཱི་འབྲས་འགྲུབ་པར་མཛོད། །དགའ་གཙོ་འཇིག་རྟེན་མགྲོན་པོས་ནས། །སྟོང་པ་ཉིད་ལ་བཞུགས་ས་མ་ཅི། །གཏུམ་མོ་བདག་ནི་གསོལ་འདེབས་ན། །བཅོམ་ལྡན་ཀྱེ་ཡི་རྡོ་རྗེ་བཞེངས། །བདག་གིས་ཁྱོད་ཀྱི་ཐུགས་འཚལ་གྱིས། །མིག་འཕྲུལ་ལྟ་བུར་ཁྱོད་བཞེངས། ཤིག །ཌོཾ་བཱི་བདག་ནི་དྲན་ཉམས་པས། །བཅོམ་ལྡན་དགྱེས་པ་རྡོ་རྗེ་བཞེངས། །རྡོ་རྗེ་གླུ་ནི་སྒྲ་སྙན་གྱིས། །རྨི་ལམ་ལྟ་བུར་གཙོ་བོ་བཞེངས། །མངོན་བྱང་ལྔ་ཡི་ཡེ་ཤེས་ལས། །བཅོམ་ལྡན་དགྱེས་པ་རྡོ་རྗེ་ཉིད། །དཀྱིལ་འཁོར་དབུས་ན་གར་དགུར་བཞུགས། །ཞལ་བརྒྱད་པ་ལ་ཕྱག་བཅུ་དྲུག །སྟེང་ཞལ་དུད་མདོག་མཆེ་བ་གཙིགས། །ཁམ་སེར་སྐྲ་བརྗེ་ས་འཁོར་ལོ་རུས། །སྣ་ཚོགས་རྡོ་རྗེས་དབུ་སྐྲ་བརྒྱན། །དང་པོ་སྐུ་དང་མཐུན་པའི་ཞལ། །གཡས་དཀར་གཡས་གཉིས་སྐུ་དང་མཐུན། །གཡོན་དམར་གཡོན་གཉིས་ཇི་བཞིན་སྐུ། །དབུ་སྐྲ་གྱེན་འབར་ཐོད་ལྔའི་ཐོད། །སྤྱན་གསུམ་དམར་ཟླུམ་མཆེ་བ་གཙིགས། །སྙན་ཆ་འགུལ་རྒྱན་དཔུང་བའི་རྒྱན། །ཕྱག་ཞབས་གདུ་བུ་འོག་པག་རྒྱན། སྟག་གི་ཤམ་ཐབས་སྟེང་ན་བཅིངས། །ཐོང་རློན་ཕྲེང་བ་ཐལ་བས་ཕྱུགས། །ཚངས་པ་བརྒྱ་བྱིན་ཉེ་དབང་དྲག །སྟེང་ན་ཞབས་བཞི་གཡས་བརྐྱང་བཞུགས། །ཕྱག་གཡས་དང་པོ་གླང་པོ་ཆེ། །ཐོད་པར་གནས་པས་ཡུམ་ལ་འཁྱུད། །དེ་བཞིན་རྟ་བོད་གླང་རྔ་མོ། །མི་དང་སེང་གེ་བྱི་ལ་བསྣམས། །ཕྱག་གཡས་ཐོད་པའི་རིམ་པར་འཛིན། །ཕྱག་གཡོན་དང་པོ་ཐོད་པའི་ནང༌། །ས་ཡི་ལྷ་མོ་བཅས་པ་འཁྱུད། །སྟེང་འོག་རིམ་པར་ཐོད་པར་གནས། །ཆུ་དང་མེ་དང་རླུང་ཉི་མ། །ཟླ་བ་གཤིན་རྗེ་ནོར་སྦྱིན་ནོ། །དེ་ཡུམ་ཞལ་གཅིག་ཕྱག་གཉིས་པ། །མདོག་
ནག་གྲི་གུག་ཐོད་པས་འཁྱུད། །ཕྱག་རྒྱ་ལྔས་བརྒྱན་ཐོད་སྐམ་ཕྲེང༌། །སྐྲ་སེར་གྱེན་འབར་སྤྱན་གསུམ་དམར། །བདག་པོ་རོ་མྱང་གཡོན་བརྐྱང་ཞབས། །བདུད་བཞིའི་སྟེང་ན་མཉམ་པར་བཞུགས། །དེ་ནས་བདག་དང་འཁོར་དེ་དག །གསལ་བར་ལེགས་པར་བརྟན་པར་བསྒོམ། །བདེ་གསལ་དཀྱིལ་འཁོར་རྒྱལ་པོ་མཆོག །ཏིང་འཛིན་གསུམ་དུ་བསྟན་པ་ཡིན། །དེ་དག་གསལ་ནི་རང་རང་གི །སྙིང་གར་གདན་ལ་ཕྱག་མཚན་བསྒོམ། །དེ་ཡི་ས་བོན་ཕྱོགས་བཅུར་སྤྲོ། །བསྐུལ་སྦྱངས་ས་བོན་སོ་སོར་ཐིམ། །ཧཱུཾ་གིས་ཡེ་ཤེས་འཁོར་ལོ་བཀུག །ཤར་གྱི་ནམ་མཁར་བཞུགས་ལ་མཆོད། །ཛཿ་ཧཱུཾ་བཾ་ཧོཿ་ལྷ་མོ་བཞིས། །དགུག་གཞུག་གཉིས་མེད་དགྱེས་པར་བྱ། །དེ་ནས་སྐྱེ་མཆེད་བྱིན་གྱིས་བརླབ། །གཙོ་བོ་འཁོར་ལོ་ཐམས་ཅད་ཀྱི། །མིག་ལ་གཏི་མུག་རྡོ་རྗེ་དཀར། །རྣ་བར་ཞེ་སྡང་རྡོ་རྗེ་ནག །སྣ་ལ་སེར་སྣ་རྡོ་རྗེ་སེར། །ལྕེ་ལ་འདོད་ཆགས་རྡོ་རྗེ་དམར། །ལུས་ལ་ཕྲག་དོག་རྡོ་རྗེ་ལྗང༌། །ཡིད་ལ་བདག་མེད་རྣལ་འབྱོར་གནག །དེ་དག་ཚངས་སོགས་པད་ཟླའི་སྟེང༌། །གྲི་གུག་ཐོད་པ་ཕྱག་རྒྱ་ལྔ། །སྐུ་གསུང་ཐུགས་ཀྱང་བྱིན་བརླབས་ཏེ། །མགོ་དང་ཁ་དང་སྙིང་ག་རུ། །ཨོཾ་དང་ཨཱཿ་ཧཱུཾ་དཀར་དམར་ནག །ས་སྤྱོད་མཁའ་སྤྱོད་བདག་མེད་མ། །གྲི་གུག་ཐོད་པ་འཛིན་པ་ཡི། །པད་ཟླ་ཚངས་པ་དག་ལ་བསྒོམ། །ཡང་ནི་རང་སྙིང་ས་བོན་གྱིས། །ཕྱོགས་བཅུའི་བླ་མ་རྒྱལ་བ་དང༌། །འཁོར་ལོ་ཁྲོ་བོ་ལྷ་མོ་རྣམས། །སྤྱན་དྲངས་མཆོད་ནས་གསོལ་བ་འདེབས། །ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཱཾ། །བརྗོད་པས་གནང་ནས་རིགས་ལྔ་ཡིས། །བུམ་པ་བདུད་རྩིས་བཀང་པས་བསྐུར། །རིགས་ཀྱི་བདག་པོས་སྤྱི་བོར་མཚན། །བདག་ལ་མི་བསྐྱོད་རྡོ་རྗེ་ཡིས། །ཕྱོགས་ཀྱི་ལྷ་མོ་བཞི་པོ་ལ། །མི་བསྐྱོད་རྣམ་སྣང་རིན་ཆེན་འབྱུང༌། །འོད་དཔག་མེད་དང་བཞི་ཡང་བསྒོམ། །དེ་བཞིན་ཞེ་སྡང་གཏི་མུག་དང༌། །སེར་སྣ་འདོད་ཆགས་བཞི་ཡིས་ཀྱང༌། །པུཀྐ་སཱི་སོགས་མཚམས་བཞི་ལ། །རིམ་པས་སྤྱི་བོར་མཆན་པར་བསྒོམ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ད་ནི་བདུད་རྩི་མྱང་བར་བྱ། །ཡཾ་རཾ་ཨཱཿ་ཧཱུཾ་ཨོཾ་རྣམས་བསྒོམ། །དེ་ཉིད་གསུམ་
གྱིས་བྱིན་གྱིས་བརླབས། །རླུང་དང་མེ་དང་ཐོད་སྒྱེད་དང༌། །ས་བོན་གནས་པའི་ཀ་པཱ་ལ། །ཧཱུཾ་གིས་སྦྱངས་དང་ཨཱཿ་ཡིས་འབར། །ཨོཾ་གྱིས་ཡེ་ཤེས་བདུད་རྩིར་འབབ། །བྷྲཱུཾ་ཛྲཱིཾ་ཨཱཾ་ཁཾ་ཧཱུཾ་ལྔ་དང༌། །ནཾ་ཧཾ་ཤཾ་ཥཾ་གྷཾ་དང་ལྔ། །བདུད་རྩིར་གྱུར་པ་རྡོ་རྗེ་ལྕེས། །མྱངས་ལ་འཁོར་ལོ་བདེ་བས་མཆོད། །དེ་ལ་སྔགས་འདིས་བརྟན་པར་བྱའོ། །ཨོཾ་སརྦ་ཏ་ཐཱ་ག་ཏ་ཨ་མྲྀ་ཏ་སྭ་ད་བཛྲ་སྭ་བྷཱ་བ་ཨཱཏྨ་ཀོ྅ཧཾ། །ཧཱུཾ་གིས་ས་བོན་གྱིས་བཀུག་ནས། །སངས་རྒྱས་ཐམས་ཅད་ཞལ་དུ་ཞུགས། །ཕྱིར་སྤྲོས་མཆོད་པའི་ལྷ་མོ་ཡིས། །རིམ་པས་མཆོད་ནས་གནས་སུ་ཐིམ། །ཨོཾ་སརྦ་ཏ་ཐཱ་ག་ཏ་པཱུ་ཛཱ་བཛྲ་སྭ་བྷཱ་བ་ཨཱཏྨ་ཀོ྅ཧཾ། །ལྷ་མོ་དེ་དག་རིགས་ཡུམ་དང༌། །གསུང་གཅིག་ཏུ་ནི་མཐུན་པར་བསྟོད། །བཅོམ་ལྡན་ལྷ་མོ་བརྒྱད་ཀྱིས་བསྐོར། །ཐུགས་རྗེ་ཐུགས་ཀྱིས་འགྲོ་བ་སྒྲོལ། །སྣོད་དང་འགྲོ་བ་བཅོམ་ལྡན་ཐུགས། །ཐུགས་དགྱེས་མཛོད་ཅིག་བཅོམ་ལྡན་ཁྱོད། །ཕུང་པོ་ཁམས་དང་སྐྱེ་མཆེད་དང༌། །དུག་ལྔ་དག་མཛད་ཁྱོད་ལ་བསྟོད། །ཨོཾ་སརྦ་ཏ་ཐཱ་ག་ཏ་སྟུ་ཏི་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་དག་བརྟན་པར་རབ་གསལ་བར། །རྣལ་འབྱོར་པ་ཡིས་རྣལ་འབྱོར་བྱ། །ཕོ་བྲང་རྣམ་དག་རྣམ་སྣང་མཛད། །རྗེས་སུ་ཆགས་པ་རྡོ་རྗེ་སེམས། །དབང་ནི་མི་བསྐྱོད་རྡོ་རྗེ་དག །བདུད་རྩི་མྱང་བ་འོད་དཔག་མེད། །མཆོད་པ་དོན་ཡོད་གྲུབ་པ་སྟེ། །བསྟོད་པ་རིན་ཆེན་འབྱུང་ལྡན་ཡིན། །ཡན་ལག་དྲུག་དང་ལྡན་བསྒོམས་པས། །དངོས་གྲུབ་མྱུར་དུ་འགྲུབ་པར་འགྱུར། །དང་པོ་སྤྲིན་བར་ཉི་མ་འདྲ། །གཉིས་པ་སྒྱུ་མ་ལྟ་བུར་སྣང༌། །སྣང་བ་ཐོབ་པ་རྨི་ལམ་ལྟར། །འོད་གསལ་མཉམ་གཞག་རྗེས་ཐོབ་མེད། །བདག་ཉིད་དེ་ལྟར་བརྟན་གྱུར་པས། །འགྲོ་བའི་སྡུག་བསྔལ་ལ་བལྟས་ཏེ། །བྱམས་དང་སྙིང་རྗེའི་འཁོར་ལོའི་ལྷ། །རྒྱུན་མི་ཆད་པར་ཕྱོགས་ཕྱོགས་འཕྲོ། །སོ་སོའི་གདུལ་བྱ་སྦྱངས་བྱས་ནས། །སླར་འདུས་ནང་དུ་འཁོར་ལོ་བསྒོམ། །ཐབས་དང་ཤེས་རབ་ལས་བྱུང་ཞིང༌། །བྱང་ཆུབ་སེམས་ནི་སྤྲོ་དང་བསྡུ། །མདོག་མཚན་ཆ་ལུགས་ཐམས་ཅད་ཀྱང༌། །ཇི་ལྟར་གསལ་བར་བརྟན་པར་བསྒོམ། །དེ་ལྟར་རྫོགས་བསྐྱེད་རྫོགས་པའི་རིམ། །ལྷ་མོ་རིམ་པར་ཞལ་ལ་བསྡུ་
ཞལ་དང་ཕྱག་རྣམས་མཐའ་ནས་རིམ། །རྩ་བའི་ཞལ་དང་ཕྱག་ལ་བསྡུ། །ཞབས་གཉིས་ཡུམ་ལ་ཐིམ་པ་དང༌། །འཁོར་ལོ་བཞི་ཡི་རྒྱ་ཡིས་གདབ། །ལྟེ་བ་སྙིང་མགྲིན་སྤྱི་བོན། །སྤྲུལ་པ་ཆོས་དང་ལོངས་སྤྱོད་དང༌། །བདེ་བ་ཆེན་པོའི་འཁོར་ལོ་བསྒོམ། །དེ་ཡང་སྐུ་བཞིའི་ངོ་བོ་ཡིན། །སྤྲུལ་པར་རྩ་འདབ་དྲུག་ཅུ་བཞི། །ལྟེ་བར་ཨཾ་འབར་རྩ་འདབ་ལ། །ཀཱ་ལི་བཞི་དད་དྲུག་ཅུ་གནས། །འོད་ཟེར་ལྔ་ལྡན་རབ་ཏུ་འབར། །སྙིང་གར་རྩ་འདབ་བརྒྱད་གནས་ལ། །ལྟེ་བར་ཧཱུཾ་ནག་འདབ་མ་ལ། །བྷྲཱུཾ་ཛྲཱིཾ་ཨཱཾ་ཁཾ་ཨེ་ཝཾ་མ། །ཡཾ་དང་བརྒྱད་ནི་ལེགས་པར་བསྒོམ། །མགྲིན་པར་བཅུ་དྲུག་འདབ་མ་ལ། །ལྟེ་བར་ཨཾ་འབར་རྩ་འདབ་ལ། །ཨཱ་ལི་བཅུ་དྲུག་དག་གིས་བརྒྱན། །འབར་བའི་རྣམ་པར་གནས་པ་ཡིན། །སྤྱི་བོར་རྩ་འདབ་སུམ་ཅུ་གཉིས། །ལྟེ་བར་ཧཾ་དཀར་འདབ་མ་ལ། །ཨཱ་ལི་ཉིས་འགྱུར་དག་གིས་བསྐོར། །ཁ་དོག་དཀར་པོ་བདུད་རྩི་འབབ། །ལྟ་བར་གཏུམ་མོ་སྦར་བ་ཡིས། །དེ་བཞིན་གཤེགས་པ་ལྔ་བསྲེགས་ཤིང༌། །སྤྱན་ལ་སོགས་པ་ཡང་བསྲེགས་ཏེ། །བསྲེགས་པས་རི་བོང་རྒྱུན་ཧཾ་འབབ། །ཡི་གེ་གསལ་བར་གྱུར་ནས་ནི། །ཡི་གེ་དེ་དག་སྤྲོ་དང་བསྡུ། །བསྐུལ་སྦྱང་བྱས་ནས་སླར་འདུས་ཏེ། །ཡི་གེ་རང་རང་གནས་ལ་ཞུགས། །སྲོག་དང་རྩོལ་བ་ལས་བྱུང་བ། །ལྟེ་བའི་འོག་ནས་རཾ་འབར་བས། །འཁོར་ལོ་ལེགས་སྦྱངས་འོག་མིན་གྱི། །བདུད་རྩི་བླངས་ནས་སྤྱི་བོར་བསམ། །སྦྱངས་པའི་འཁོར་ལོ་རྣམས་གང་ནས། །ཐམས་ཅད་སྙིང་གར་རབ་ཏུ་ཐིམ། །དོན་དམ་བདུད་རྩི་ཟག་མེད་བསྒོམ། །ཧཱུཾ་ཡང་རིམ་པས་ནཱ་དར་གནས། །ཤིན་ཏུ་ཡུན་རིངས་གོམས་མི་གནས། །ནམ་མཁའི་དཀྱིལ་ལྟར་རྔུལ་དང་བྲལ། །ཐོག་མ་ཐ་མ་དབུས་མེད་ཅིང༌། །འཁོར་མིན་མྱ་ངན་འདས་པ་མིན། །བདག་དང་གཞན་ཡང་ཡོད་མ་ཡིན། །འདི་ནི་བདེ་ཆེན་རྒྱལ་པོ་ཡིན། །གཟུང་དང་འཛིན་པ་རྣམ་པར་སྤངས། །སེམས་སྦྱོང་བ་ལ་སྐྱོ་ངལ་ན། །རིམ་པ་རིམ་པར་སྐུ་བསྐྱེད་ལ། །ཡབ་དང་ཡུམ་གཉིས་ཞལ་ཕྱག་རྒྱས། །སྙིང་གར་ས་བོན་ཡི་གེ་ལ། །བསྐོར་ནས་གནས་པ་ཞལ་ནས་ཞལ། །རྡོ་རྗེ་ལམ་ནས་པདྨ་དང༌། །པདྨའི་ཞལ་ནས་ཞལ་དུ་འཁོར། །རང་འདོད་པ་
ཡིས་བཟླས་པ་བྱ། །བསམ་གཏན་ཁ་དོག་དབྱེ་བ་ཡིས། །ཞི་ལ་སོགས་པར་ཤེས་པར་བྱ། །ཨོཾ་ཨཥྚཱ་ན་ནཱ་ཡ། པིང་གོ་རྡྷོ་ཀེ་ཤ་བརྟྨ་ནེ། ཙ་ཏུར་བིང་ཤ་ཏི་ནེ་ཏྲཱ་ཡ། ཥོ་ཌ་ཥ་བྷུ་ཛཱ་ཡ། ཀྲྀ་ཥཎ་ཛཱི་མཱུ་ཏ་པ་པུ་ཥེ་ཀ་པཱ་ལ་མཱ་ལ་ཨ་ནེ་ཀཾ་དྷ་རི་ཎེ། ཨཱདྷྨ་ཏ་ཀྲཱུ་ར་ཙིཏྟཱ་ཡ། ཨརྡྷནྡུ་དཾ་ཥྚྲི་ཎེ། ཨོཾ་མཱ་ར་ཡ། མཱ་ར་ཡ། ཀཱ་ར་ཡ། ཀཱ་ར་ཡ། གརྫ་ཡ། གརྫ་ཡ། ཏརྫ་ཡ། ཏརྫ་ཡ། ཤོ་ཥ་ཡ། ཤོ་ཥ་ཡ། སཔྟ་སཱ་ག་རཱན་བནྡྷ་བནྡྷ། ནཱ་ག་ཨཥྚ་ཀཱ་ན། གྲྀཧྞ་གྲྀཧྞ། སརྦ་ཤ་ཏྲཱུཾ་སརྦ་དུ་ཥྚན་ཧ་ཧཱ། ཧི་ཧཱི། ཧུ་ཧཱུ། ཧེ་ཧཻ། ཧོ་ཧཽ། ཧཾ་ཧཿ་ཕཊ་སྭཱ་ཧཱ། །བཅོམ་ལྡན་འདས་ཀྱི་རྩ་སྔགས་ཡིན། ཨོཾ་དེ་བ་པི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། སྙིང་པོའི་སྔགས་སུ་ཤེས་པར་བྱའོ། །ཨོཾ་བཛྲ་ཀ་རྟ་རི་ཧེ་བཛྲཱ་ཡ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། དེ་ནི་ཉེ་བའི་སྔགས་ཀྱང་ཡིན། ཨོཾ་ཨ་ཀ་ཙ་ཊ་ཏ་ཕ་ཡ་ཤ་ཧཱུཾ་སྭཱ་ཧཱ། གྲོང་ཁྱེར་དཀྲུག་པའི་སྔགས་ཡིན་ནོ། །ཨོཾ་ཏྲཻ་ལོ་ཀྱཱ་ཀྵ་པ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཕྱག་གཉིས་པའི་སྙིང་པོའོ། །ཨོཾ་བཛྲ་ཛྲཱ་ལ་ཛྲྭ་ལ་བྷྱོ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། དེ་ནི་ཕྱག་བཞི་པའི་སྔགས་སོ། །ཨོཾ་ཀི་ཊི་ཀི་ཊི་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཕྱག་དྲུག་པའི་སྙིང་པོ་ཡིན།། །།ཚོགས་གཉིས་བསག་དང་གཞན་དབང་བསྡུ། །བདག་དང་སེམས་ཅན་བསྲུང་བའི་ཕྱིར། །ལྷ་དང་ཆོས་སྐྱོང་སེམས་ཅན་ལ། །བདུད་རྩི་མཆོད་སྦྱིན་གཏོར་མ་སྦྱིན། །ཤར་ལྷོའི་དུར་ཁྲོད་ནམ་མཁའ་ལ། །ཆོས་འབྱུང་སུམ་བརྩེགས་སྟེང་འོག་རིམ། །དབུས་སུ་པདྨ་འདབ་བརྒྱད་ནག །ཤར་ནས་ཕྱོགས་མཚམས་གོ་རིམས་སུ། །བརྒྱ་བྱིན་གཤིན་རྗེ་ཆུ་ལྷ་དང༌། །གནོད་སྦྱིན་བདག་པོ་འབྱུང་བའི་བདག །མེ་ལྷ་སྲིན་པ་རླུང་གི་ལྷ། །དཀར་ནག་དམར་སྐྱ་སེར་པོ་དང༌། །དཀར་དམར་དུད་ཀ་ལྗང་གུ་ཡི། །མདོག་ཀྱང་རིམ་པ་བཞིན་དུ་གསལ། །རྡོ་རྗེ་དབྱུག་པ་སྤྲུལ་གྱི་ཞགས། །དཔལ་འབྲས་རྩེ་གསུམ་དབྱུ་གུ་གསུམ། །གྲི་གུག་བ་དན་ལག་ན་ཐོགས། །གླང་པོ་མ་ཧེ་ཆུ་སྲིན་དང༌། །རྟ་དང་ཁྱུ་མཆོག་ར་སྐྱེས་དང༌། །མི་རོ་རི་དགས་ཞོན་པ་དང༌། །དུར་ཁྲོད་རྒྱན་དང་ཆུང་མ་དང༌། །བུ་འཁོར་བཅས་པ་བསྒོམ་པར་བྱའོ། །སྟེང་གི་ཆོས་འབྱུང་པདྨ་དཀར། །ཤར་ནས་རིམ་པ་སྔ་མ་ལྟར། །བརྒྱ་བྱིན་ཆངས་པ་
ཁྱབ་འཇུག་དྲག །གཞོན་ནུ་ཚོགས་བདག་དག་བྱེད་དང༌། །ལེགས་ལྡན་ནག་པོ་རིམ་པར་གནས། །དཀར་སེར་དམར་དང་ནམ་མཁའི་མདོག །དཀར་གཉིས་སེར་དང་ནག་པོ་སྟེ། །མདོག་ཀྱང་དེ་བཞིན་རིམ་པར་གསལ། །རྡོ་རྗེ་དབྱུ་གུ་རྩེ་གསུམ་དང༌། །འཁོར་ལོ་རྩེ་གསུམ་མདའ་གཞུ་དང༌། །ལ་ཕུག་བ་དན་རལ་གྲི་འཛིན། །པདྨའི་གདན་གནས་རིན་ཆེན་བརྒྱན། །ཆུང་མ་བུ་འཁོར་ལྷ་ཡི་འཁོར། །རིམ་པ་བཞིན་དུ་གནས་པའོ། །འོག་གི་ཆོས་འབྱུང་པདྨ་དམར། །སྔོན་བཞིན་འཇོག་པོ་དུང་སྐྱོང་དང༌། །མཐའ་ཡས་རིགས་ལྡན་པདྨ་ཆེ། །དགའ་བོ་ནོར་རྒྱས་པདྨ་བརྒྱད་གདེངས་ཀ་ཀ་སྤྲུལ་ཞགས་པད་ཟླའི་གདན། །དཀར་སེར་དམར་ལྗང་ཡང་དཀར་དང༌། སྔོ་དང་དམར་སྐྱ་དཀར་པོའི་མདོག །རིན་ཆེན་རྒྱན་དང་པདྨ་དང༌། །ཆུང་མ་བུ་འཁོར་བཅས་པ་དང༌། །ངན་འགྲོ་གསུམ་དང་བཅས་པ་ཡིན། །པདྨའི་ལྟེ་བ་གསུམ་པོ་ལ། །རང་གི་ཧེ་རུ་ཀ་ཉིད་བསྒོམ། །ཛཿ་ཧཱུཾ་བཾ་ཧོཿ་ས་དགུག་དང་གཞུག །ནམ་མཁའ་ཁྱབ་པའི་གཙོ་བོ་འཁོར། །མི་བ་སྐྱོད་རྣམ་སྣང་འོད་དཔག་མེད། །རང་བཞིན་སྔོ་དང་དཀར་དམར་མདོག །རྡོ་རྗེ་དྲིལ་བུ་རང་འོད་བཅས། །རུས་རྒྱན་གཙོ་དང་འཁོར་དེ་བཞིན། །དེ་ཉིད་གསུམ་དང་དབང་བསྐུར་རྒྱ། །ལྕེ་རྣམས་རྡོ་རྗེ་སྦུ་གུར་བསྒོམ། །དེ་རྣམས་མདུན་དུ་གཏོར་དག་ལ། །བྱིན་གྱིས་བརླབས་ལ་རང་བཞིན་བཏུང༌། །སྔོན་དུ་བསྟན་པའི་བདུད་རྩི་ལྔ། །དགྱེས་རྡོར་ལྷ་དགུར་གྱུར་པའོ། །ཨོཾ་ཨིནད་ཛ་མ་ཛ་ལ་ཛཀྑ་བྷཱུཾ་ཏ་བ་ཧྣི་བཱ་ཡུ་རཱཀྵ་ཙཎྜྲ་སཱུཛྫ་མཱ་ས་ས་པྟ་པཱ་ཏཱ་ལ་པཱ་ཏཱ་ལ་ཨ་སྠ་སཔྤ་སྭཱ་ཧཱ། ཨི་དཾ་བ་ལི་བྷུ་ཛ་ཛིཾ་བྷ་པུཥྤ་དྷཱུ་པ་མཱཾ་ས་པིངྒ་ཨ་མྦྷ་སརྦ་ཀ་ཛྫ་ཁནྟི་ཁུ་ཎི་ཕེ་ཊ་གཱ་ད་སྭཱ་ཧཱ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱདྱ་ནུ་ཏྤནྣ་ཏྭཱ་ཏ་ཨོཾ་ཨཱཿ་ཧཱུཾ་ཕཊ་སྭཱ་ཧཱ། །གསུམ་གསུམ་བརྗོད་ལ་གཏོར་མ་གཏང༌། །ཡི་གེ་གསུམ་དང་མུཿ་ཡིས་གཤེགས། །བར་ཆད་ཞི་དང་ལྷག་ཆད་ཞི། །རྡོ་རྗེའི་གླུ་འདི་དལ་བུས་བླང༌། །ཀོ་ལ་ཨི་རི་ཊྛ་ཨ་པོ་ལཱ། མུཾ་མུ་ཎི་ཀཀྐོ་ལཱ། བྷ་ཎེ་ཨ་ཀྲི་ཏནི་ཌྛི་ཧ། ཀ་རུ་ཎི་ཀེ་ཨཱ་ཨི་ན་རོ་ལ་ཏ་ཧིཾ་བ་ལ་ཁ་ལི། མ་ཨིན་བི་ཛ། ཀི་ལ་ཀ་ལེ་ཛྫ་རཱུ་པ་ནི། ཨ་ཨཱི་དྷུ་རུ་དྷུ་རུ། ཎ་ཛྫ་ཨ་ཨི་ཙ་ཨ་ས་མ་ཤྩྪ་རི་སི་ཧླ། ཀ་པུ་ར་ལ་ཨི་
༄༅། ཨ་ཨི་མ་ཁུ་ལ་ཨ་ཨིན་དྷ། ནས་ལིཛྫ། ཧ་ཧི་བུ་རུ། ཨི་ཨ་ཨོ། པྲེ་ཁ་ན་ཁེ་ཊ། ཀ་རན་ཏི། ཤུདྡྷཱ་སུདྡྷ་ཎཎ་མ་ཎེ། ཨ་ཨི་ནི་རཾ་སུ་ཨཾ། ཙནྡྲ་བཱི། ཏ་ཨིཛྫ་ས་ར་ས་ཙི་པ་ནི་ཨཱ་ཨཱི་མ་ས་ས་ལ་ཛིར་ཀུ་རུ་ར་བཱ་ཊ། ཨི་དྷི་ཎི། མ་ནཱ་ཏིཥྚ་བཛྫ་ཨ་ཨི། མཆོད་པ་དང་གཏོར་མ་གཏང་བ། །ཚོགས་ཀྱི་འཁོར་ལོར་འདུན་བླང༌། །བཟའ་དང་བཏུང་བ་ལོངས་སྤྱོད་པ། །བདུད་རྩི་སྦྱོར་བས་ལུས་རྒྱས་འགྱུར། །ཐུན་བཞིའི་རྣལ་འབྱོར་ལྡན་པ་ཡིས། །བསྒྲུབས་ན་འགྲུབ་ཀྱི་གཞན་དུ་མིན། །སྔོན་དུ་བསྟན་པ་ལེགས་རྟོགས་ནས། །ཚོགས་གཉིས་གཞལ་ཡས་དཀྱིལ་འཁོར་གསུམ། །ཞལ་གསུམ་གཡས་དཀར་གཡོན་པ་དམར། །དབུས་ནི་སྐུ་དང་མཐུན་པ་ཉིད། །རྡོ་རྗེ་རལ་གྲི་གཡས་ན་འཛིན། །དྲིལ་བུ་རྩེ་གསུམ་ཕྱག་གཡོན་ན། །རང་ནི་རང་རིག་ཡུམ་ལ་འཁྱུད། །ཕྱག་བཞི་རྡོ་རྗེ་ཐོད་པ་དག །གཡས་དང་གཡོན་པའི་ཕྱག་ན་འཛིན། །གཉིས་ནི་རིག་མ་ཉིད་ལ་འཁྱུད། །ཕྱག་གཉིས་གཡས་ན་རྡོ་རྗེ་དང༌། །ཐོད་པ་ཁ་ཊྲཱཾ་ཕྱག་གཡོན་ན། །དེ་གསུམ་ཚངས་པའི་སྟེང་ན་བཞུགས། །གཞན་དང་སྔོན་དུ་བསྟན་པ་ཉིད། །སྤྲོ་དང་བསྡུ་དང་འཁོར་ལོ་དང༌། །དེ་དོན་བསྒོམ་དང་གཏོར་མ་སྔགས། །ཞལ་གསུམ་ཕྱག་བཞི་ལ་སོགས་རྣམས། །རྣལ་འབྱོར་པ་ཡིས་གང་འདོད་བསྒོམ། །རྗེས་ཐོབ་རྣམ་པར་དག་པ་ཡང༌། །དབྱེ་བ་ཤེས་པས་རྟག་ཏུ་བསྒོམ། །མེ་དྲི་དྲ་གུར་བདུད་ལས་རྒྱལ། །རྣམ་ཐར་ཆོས་འབྱུང་ཆོས་ཀྱི་དབྱིངས། །གཤིན་རྗེ་དབུགས་འབྱིན་དུར་ཁྲོད་བརྒྱད། །སྒོ་བཞི་དྲན་པ་ཉེ་བར་གཞག །གྲུ་བཞི་ཡང་དག་སོང་བ་བཞི། །སྒོ་རྒྱན་རྫུ་འཕྲུལ་རྐང་པ་བཞི། །འདོད་ཡོན་ལྷ་མོ་དབང་པོ་ལྔ། །རྩིག་པ་ལྔ་ཡང་སྟོབས་ལྔར་དག །རྟ་བབས་བཞི་ནི་བསམ་གཏན་བཞི། །རྟེན་འབྲེལ་བཅུ་གཉིས་དག་པས་ནི། །རིམ་པ་བཅུ་གཉིས་འོད་འབར་བའོ། །རྒྱན་རྣམས་བྱང་ཆུབ་ཡན་ལག་བདུན། །ཀ་བ་བརྒྱད་མཛེས་འཕགས་ལམ་བརྒྱད། །འཁོར་ལོ་བཞི་ནི་བདེན་པ་བཞི། །དེ་བཞིན་གདུགས་ནི་ཆད་མེད་བཞི། །བྱམས་པའི་ཐུགས་ནི་སྐུ་མདོག་ནག །སྙིང་རྗེ་སྤྱན་དམར་འགྲོ་ལ་གཟིགས། །དཔའ་བོ་གར་དགུ་འགྲོ་རྣམས་སྒྲོལ། །
བཏང་སྙོམས་སྣ་ཚོགས་རྡོ་རྗེས་མཛེས། །འཁོར་ལོའི་གཟུགས་ནི་མི་བསྐྱོད་པ། །རྣ་ཆ་དག་ལ་འོད་དཔག་མེད། །མགུལ་གྱི་ཕྲེང་བ་རིན་ཆེན་གཙོ། །ཡན་ལག་ཀུན་བཀོད་རྣམ་སྣང་མཛད། །འོད་དཔག་ལ་ནི་དོན་ཡོད་གྲུབ། །ཡན་ལག་ཀུན་ཐུགས་རྡོ་རྗེ་འཛིན། །ཞལ་བརྒྱད་རྣམ་པར་ཐར་པ་བརྒྱད། །སྐུ་གསུམ་དཀའ་དམར་གནག་པའི་ཞལ། །ཕྱག་རྣམས་སྟོང་པ་བཅུ་དྲུག་སྟེ། །ནད་རྣམས་འཇོམས་པས་གླང་བོ་སོགས། །དངོས་གྲུབ་མྱུར་བས་ལྷ་མོ་སོགས། །རུས་པའི་རྒྱན་ཡང་བདེན་པ་བཞི། །སྟག་གི་པགས་པ་བྱང་ཆུབ་བདུན། །བསྡུ་བ་བཞི་ནི་ཞབས་བཞི་ཡིན། །སྐྱེ་རྒ་བཅོམ་པས་བདུད་བཞི་མནན། །བདག་མེད་ཆོས་སྐུ་རྣམ་དག་ཉིད། །ཕུང་པོ་དག་པས་གཽ་རཱི་སོགས། །ཡེ་ཤེས་དག་པས་ཁ་དོག་བཞི། །གྲི་གུག་སོགས་ཀྱིས་བདུད་བཞི་བྱེད། །ཚད་མ་གོམས་པས་ཁམས་བཞི་ལ། །པུཀྐ་སཱི་སོགས་ལྷ་མོ་བཞི་།མདོག་དང་ཕྱག་མཚན་དེ་བཞིན་ནོ། །ཉིན་མོ་བཅོམ་ལྡན་ཐབས་སུ་གནས། །མཚན་མོ་ཤེས་རབ་སྟོང་པ་ཉིད། །འགྲོ་བའི་གར་དང་ཕྱག་རྒྱ་བསྐྱོད། །བརྗོད་པས་ཐམས་ཅད་སྔགས་ཡིན་ནོ། །ཁྲུས་བྱེད་དབང་བསྐུར་བསམ་གཏན་དང༌། ཉལ་བ་གཉིད་ཀྱི་བསམ་གཏན་བསྒོམ། །དེ་ལྟར་བརྟན་པའི་རྣལ་འབྱོར་པས། །དབང་པོ་མི་དགག་འགྲོ་རྣམས་བསྐྱབ། །བླ་མའི་རིམ་འོངས་རྒྱུད་རྒྱལ་དོན། །བསྒོམས་པས་བློ་ལ་གསལ་བའི་དོན། །དགྱེས་རྔོར་མོས་ལ་ཕན་ཕྱིར་བྱས། །འདི་ལ་བྱུང་བའི་བསོད་ནམས་དེས་།བདག་དང་འགྲོ་བ་མ་ལུས་པ། །དགྱེས་རྡོར་མྱུར་དུ་འགྲུབ་པར་ཤོག །དཔལ་དགྱེས་པ་རྡོ་རྗེ་སྒྲུབ་པའི་ཐབས། རིན་པོ་ཆེའི་སྒྲོན་མ་ཞེས་བྱ་བ། སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་དཱ་ན་ཤཱི་ལ་དང༌། ལོ་ཙཱ་བ་གན་དར་མ་བློ་གྲོས་ཀྱིས་བསྒྱུར་ཅིད་ཞུས་སོ།།