དཔལ་ཀྱེ་རྡོ་རྗེའི་མངོན་པར་རྟོགས་པའི་ཐིག་ལེ།
ཤཱཀྱ་སྲུང་བས་མཛད།

---

^{[མ་དཔེ་གཟིགས་ན་འདིར་གནོན།]}

རྒྱ་གར་སྐད་དུ། །ཤྲཱི་ཧེ་བཛྲ་ཨ་བྷི་ས་མ་ཡ་ཏི་ལ་ཀ་ནཱ་མ། །བོད་སྐད་དུ། དཔལ་ཀྱེ་རྡོ་རྗེའི་མངོན་པར་རྟོགས་པའི་ཐིག་ལེ་ཞེས་བྱ་བ། བཅོམ་ལྡན་འདས་དཔལ་ཀྱེ་རྡོ་རྗེ་ལ་ཕྱག་འཚལ་ལོ། །གྲུབ་པའི་དབང་ཕྱུག་སྐུ་མདོག་སྔོན་པོ་མུན་པ་རབ་འཕྲོག་སྣ་ཚོགས་རྡོ་རྗེས་མཚན་པའི་དབུ་རྒྱན་ཅན། །དབུགས་བྲལ་འགྱེལ་བའི་བྲང་གི་སྟེང་དག་

---

^{[མ་དཔེ་གཟིགས་ན་འདིར་གནོན།]}

ཏུ་ནི་གནས་པའི་མ་ཟླུམ་དབུས་སུ་གར་མཛད་ཟ་བྱེད་དང༌། །སྤྱི་བོ་ལས་ནི་སྐྱེས་པའི་སྣོད་དང་རིག་མར་བཅས་ལ་ཕྱག་དག་རབ་སྟེར་ཕྱག་རྒྱ་དྲུག་དང་ལྡན། །མགོ་བོའི་ཕྲེང་ལྡན་འཇིགས་བྱེད་རྣམ་འགྱུར་དམར་སེར་སྐྲ་ཅན་འཇིག་རྟེན་གསུམ་བསྐྱོད་དཔའ་བོ་ཁྱོད་ལ་འདུད། །འདིར་ཆོ་ག་དང་ལྡན་པས་དབང་ཐོབ་པ་སྔོན་དུ་སོང་ཞིང༌། བླ་མ་ལ་གུས་ལ་དག་པའི་འཚོ་བ་དང་ལྡན་པ་བདེན་པའི་དག་ལ་སོམ་ཉི་མེད་པས། བདུད་རྩི་ལྔ་ལ་སོགས་པས་ཁ་ཡོངས་སུ་དག་པར་བྱས་ཏེ། དུར་ཁྲོད་ལ་སོགས་པ་ཡིད་དང་རྗེས་སུ་མཐུན་པའི་གནས་འགལ་ཞིག་ཏུ། སྣ་ཚོགས་རྡོ་རྗེས་མཚན་པའི་སྟན་བདེ་བ་ལ་གནས་པའི་རྣལ་འབྱོར་པས། ཨོཾ་རཀྵ་རཀྵ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པའི་སྔགས་ཀྱིས་གནས་བསྲུང་བར་བྱས་ནས། རང་གི་སྙིང་གའི་ནང་དུ་རཾ་དམར་པོ་ལས་བྱུང་བའི་ཉི་མའི་དཀྱིལ་འཁོར་ལ་གནས་པའི་ཧཱུཾ་ཡིག་སྔོན་པོ་ངེས་པར་བལྟས་ལ། དེའི་ཡང་འོད་ཟེར་ཁ་དོག་ལྔ་པ་རྣམས་ཀྱིས་ནས་སྣང་བར་བྱས་ཏེ། བ་སྤུའི་ཁུང་བུ་སོ་སོ་ནས་ཕྱིར་འཐོན་པ། བཅོམ་ལྡན་འདས་དཔལ་འཇིག་རྟེན་གསུམ་པོ་ཀུན་དུ་བསྐྱོད་པའི་དཔའ་བོ་འཆད་པར་འགྱུར་བའི་གཟུགས་ཅན་དང༌། བླ་མ་རྗེ་བཙུན་སྤྱན་དྲངས་ཏེ། མདུན་གྱི་ནམ་མཁར་བཞུགས་པ་ལ་ཕྱག་བྱས་ནས། སྙིང་གའི་ས་བོན་ལས་ངེས་པར་འཐོན་པའི་ཕྱི་དང་གསང་བ་དང༌། དེ་ཁོ་ན་ཉིད་ཀྱི་མཆོད་པ་རྣམས་ཀྱིས་མཆོད་པར་བྱས་ཏེ། །དེ་ལ་ལྷའི་མེ་ཏོག་དང་བདུག་སྤོས་ལ་སོགས་པ་ཉེར་སྤྱོད་ལྔས་མཆོད་པ་ནི་ཕྱིའི་མཆོད་པའོ། །ས་བོན་དེ་ཉིད་ལས་མངོན་པར་སྤྲོས་པའི་གཽ་རཱི་ལ་སོགས་པའི་ལྷ་མོ་རྣམས་ཀྱིས་རང་གི་དམ་ཚིག་གི་རྫས་ཀྱིས་ཉེ་བར་མཆོད་པ་ནི་གསང་བའི་མཆོད་པ་སྟེ། དེ་ལ་བཅོམ་ལྡན་འདས་ཀྱི་ཤར་དང་ལྷོ་དང་ནུབ་དང་བྱང་གི་ཕྱོགས་སུ་དཀར་མོ་དང་ཆོམ་རྐུན་མ་དང་རོ་ལངས་མ་དང༌། གྷསྨ་རཱི་རྣམས། ནག་མོ་དང་བཙོད་ཀ་དང༌། སེར་མོ་དང༌། ལྗང་གུའི་མདོག་ཅན། ཐོད་པར་གནས་པའི་བྱང་ཆུབ་ཀྱི་སེམས་དང༌། རང་བྱུང་མེ་ཏོག་དང༌། རྡོ་རྗེའི་ཆུ་དང་སྨན་འཛིན་པའོ། །དབང་ལྡན་དང་མེའི་ཕྱོགས་བྲལ་དུ། པུཀྐ་སཱི་དང་རི་ཁྲོད་མ་སྔོན་མོ་དང་དཀར་མོའི་ཁ་དོག་ཅན་ཐོད་པར་

---

^{[མ་དཔེ་གཟིགས་ན་འདིར་གནོན།]}

གནས་པའི་དངུལ་ཆུ་འཛིན་པའོ། །གང༌། པུཀྐ་སཱི་ནི་རྡོ་རྗེའི་ལག །ཅེས་བརྟག་གཉིས་སུ་མངོན་པར་བརྗོད་པ་དེ་ལ་ཡང༌། རྡོ་རྗེ་ཤ་ཆེན་ཉིད་དུ་རྣམ་པར་བཤད་དོ། །བདེན་བྲལ་དུ་ཙཎྜལཱི་ནམ་མཁའ་ལྟར་སྔོ་བསངས་མ་སྒྲ་དང་ལྡན་པའི་ཅང་ཏེའུའོ། །འདི་རྣམས་ཀྱིས་ནི་དཀར་མོ་ལ་སོགས་པ་རྣམས་ཀྱིས་ཏེ་གསང་བའི་མཆོད་པའོ། །ཙཎྜལཱིའི་ཅང་ཏེའུས་ནི་ཕྱིའི་མཆོད་པའོ་ཞེས་ཁ་ཅིག་ཏུ་རྣམ་པར་བཤད་དོ། །རླུང་དུ་གཡུང་མོ་སྣ་ཚོགས་པའི་མདོག་ཅན་རང་གི་ལུས་ཀྱིས་འཁྱུད་པ་སྟེ། དེ་ཡང་བདག་མེད་མ་དང་ལྷན་ཅིག་ཏུ་གྱུར་ཅིང་མགྲིན་པ་ནས་འཁྱུད་ནས། བདེ་བ་ཆེན་པོའི་རང་བཞིན་དང་ལྡན་པར་བྱེད་པ་ནི་དེ་ཁོ་ན་ཉིད་ཀྱི་མཆོད་པའོ། །གཞན་ཡང་དེ་འདིར་བརྗོད་པ། མངའ་བདག་གང་ཞིག་བདེ་བ་ཆེན་པོས་མཆོད་མཛད་མ། །ནང་འཁྲུངས་ལྷ་མོར་གཅིག་སྟེ་ལྷ་མོ་གཞན་མ་ཡིན། །ཞེས་པས་ཐམས་ཅད་རྣལ་འབྱོར་པའི་རྒྱུད་ལས་སྤྲུལ་པ་ཉིད་ཡིན་ཏེ། བདག་ཉིད་ཀྱི་རྒྱུད་ལས་ཕྱེ་བའི་ཕྱིར་ཡང་ཡིད་ཀྱི་རང་བཞིན་གྱི་ལུས་ཅན་ཐོགས་པ་མེད་པས་ལུས་གཅིག་ལ་ངེས་པར་གནས་ཏེ་སྲིད་པ་བར་མ་པ་བཞིན་ནོ་ཞེས་མན་ངག་གོ །སྙིང་པོའི་བདག་མེད་མ་བསལ་ནས་གཡུང་མོས་གཙོ་བོའི་མགྲིན་པ་ནས་འཁྱུད་དེ་བདེ་བ་ཆེན་པོའི་རང་བཞིན་དེ་ཁོ་ན་ཉིད་ཀྱིས་མཆོད་པས་མཆོད་པར་བྱེད་པའོ་ཞེས་འདོད་པའང་མཐོང་ངོ༌། །གང་ལྷ་མོ་བརྒྱད་པོ་རྣམས་ཀྱིས་གསང་བས་མཆོད་དེ་སླར་ཡང་བདག་མེད་མ་དང་ལྷན་ཅིག་རོ་གཅིག་པར་གྱུར་ནས་དེ་དང་དེ་གཉིས་སུ་མེད་པར་གྱུར་པ་ནི་དེ་ཁོ་ན་ཉིད་ཀྱི་མཆོད་པའོ་ཞེས་པ་ནི་ལེགས་པ་མ་ཡིན་ཏེ། བྱ་བ་དང་རྗེས་སུ་མཐུན་པའི་རྣམ་པས་ལོགས་སུ་ཕྱེ་བའི་ཕྱིར་ཏེ། འདོད་ཆགས་ཆེན་པོའི་རྗེས་ཆགས་པ། །གཡུང་མོས་སྐུ་ལ་འཁྱུད་པ་ཉིད། །ཅེས་རྒྱུད་དུ་གསུངས་པའི་ཕྱིར། དེའི་རྗེས་སུ་རང་གི་སྡིག་པ་བཤགས་པ་དང༌། གཞན་གྱི་བསོད་ནམས་ལ་རྗེས་སུ་ཡི་རང་བ་དང༌། རྫོགས་པའི་སངས་རྒྱས་ལ་ཆོས་ཀྱི་འཁོར་ལོ་བསྐོར་བར་བསྐུལ་བ་དང༌། མྱ་ངན་ལས་འདའ་བར་བཞེད་པའི་དེ་བཞིན་གཤེགས་པ་འཁོར་བར་

---

^{[མ་དཔེ་གཟིགས་ན་འདིར་གནོན།]}

བཞུགས་པར་གསོལ་བ་དང༌། ཡིད་ཀྱིས་ལངས་ནས་ཕྱག་འཚལ་བ་ལ་སོགས་པ་ཡན་ལག་བདུན་པའི་ཆོག་བླན་མེད་པའི་རྣམ་གྲངས་ཅན་བྱས་ནས། ཁམས་གསུམ་པོ་མཐའ་དག་གི་བདག་ཉིད་ཅན་བདེ་བ་ཆེན་པོའི་འབྱུང་གནས་དཔལ་ཧེ་རུ་ཀ་རྡོ་རྗེ་ནི་སངས་རྒྱས་དང༌། དེས་གསུངས་པའི་སྔགས་དང་ཕྱག་རྒྱ་དང་དཀྱིལ་འཁོར་ལ་སོགས་པ་རང་བཞིན་གྱི་གཟུགས་ནི་ཆོས་དང༌། དེའི་འཁོར་ལོར་གནས་པའི་རྣལ་འབྱོར་པའི་ཚོགས་དགེ་འདུན་ལ་བྱང་ཆུབ་ཀྱི་སྙིང་པོའི་བར་དུ་སྐྱབས་སུ་མཆིའོ། །སེམས་ཅན་ཐམས་ཅད་ཀྱི་དོན་བྱེད་པའི་རྒྱུར་གྱུར་པ་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་དང་མཚན་མ་མེད་པ་ཡང་དག་པར་རྫོགས་པར་རྟོགས་པའི་བདེ་བ་ཆེན་པོའི་བདག་ཉིད་ཅན་དུ་སེམས་བསྐྱེད་པར་བགྱིའོ། །བླ་ན་མེད་པའི་བྱང་ཆུབ་ཀྱི་ལམ་རྡོ་རྗེའི་ཐེག་པ་ལ་རྟག་ཏུ་གནས་པར་བགྱིའོ། །དཔལ་ཧེ་རུ་ཀ་ལ་སོགས་པ་དང༌། རྡོ་རྗེ་བཙུན་མོའི་ཚོགས་ལ་བདག་ཉིད་དབུལ་བར་བགྱིའོ་ཞེས་གསུམ་ལ་སྐྱབས་སུ་འགྲོ་བ་ལ་སོགས་པ་བདག་གི་དངོས་པོ་དབུལ་བའི་མཐར་ཐུག་པ་བྱས་ནས། བུ་གཅིག་པ་བཞིན་དུ་སེམས་ཅན་རྣམས་དེ་བཞིན་ཉིད་དུ་རོ་གཅིག་པའི་བདེ་བ་ཆེན་པོ་ལ་སྦྱོར་བར་འདོད་པའི་བྱམས་པ་དང༌། རྣམ་པར་རྟོག་པའི་རྒྱ་མཚོར་བྱིང་བའི་སེམས་ཅན་སྐྱབས་མེད་པ་མཐའ་དག་བསྒྲལ་བར་འདོད་པའི་རྣམ་པ་ཅན་གྱི་སྙིང་རྗེ་དང༌། དགེ་བ་ལས་སྐྱེས་པའི་ལོངས་སྤྱོད་སྤྱོད་པ་ལ་སོགས་པ་རྣམས་ལ་མི་འབྲལ་བར་འདོད་པའི་རང་བཞིན་ཅན་གྱི་དགའ་བ་དང༌། ཐམས་ཅད་ལ་ཁོང་ཁྲོ་བ་རྗེས་མཐུན་དང་བཅས་པ་སྤངས་ཏེ། གཞན་ལ་ཕན་པར་འདོད་པའི་ཆོས་ཉིད་ལའང་རང་དང་གཞན་རོ་མཉམ་པར་འཇུག་པའི་མཚན་ཉིད་ཅན་གྱི་བཏང་སྙོམས་བསྒོམས་ཏེ། རྣལ་འབྱོར་པའི་བསོད་ནམས་ཀྱི་ཚོགས་སྐྱེད་ཅིང་ཡེ་ཤེས་ཀྱི་ཚོགས་འཕེལ་པའི་ཆེད་དུ། ཨོཾ་སྭ་བྷཱ་བ་ཤུདྡྷཿ་སརྦ་བྷཱ་རྭཱཿ་སྭ་བྷཱ་བ་ཤུདྡྷོ྅ཧཾ། ཞེས་པའི་དོན་མངོན་སུམ་དུ་གྱུར་པར་བྱས་ཤིང་སྔོན་དུ་བཀླགས་ནས། བླ་མའི་མན་ངག་ལས་ཆོས་ཐམས་ཅད་སྟོང་པ་ཉིད་དུ་བསྒོམ་མོ། །ཇི་ལྟར་བསྡུ་བའི་རྣམ་པ་ནི་

---

^{[མ་དཔེ་གཟིགས་ན་འདིར་གནོན།]}

གཉིས་སུ་འགྱུར་ཏེ། དེ་ལ་འདིའི་རྣམ་པ་དང་པོ་ནི། འཁོར་ཐམས་ཅད་དང༌། བཅོམ་ལྡན་འདས་སྐད་ཅིག་གིས་འོད་གསལ་དུ་གཞུག་པ་ནི་བསྡུ་བའོ། །གཉིས་པ་ནི་མཆོད་པའི་ལྷ་མོ་ཐམས་ཅ་དང་བཅས་པའི་བཅོམ་ལྡན་འདས་ཀྱང་བདག་ཉིད་ཀྱི་ཐུགས་ཀའི་ས་བོན་ལ། དེ་ཉི་མ་ལ། ཉི་མ་ཧཱུཾ་ཡིག་གི་ཨཱུ་ཡིག་ལ། ཨཱུ་ཡིག་ཧ་ཡིག་ལ། ཧ་ཡིག་མགོ་བོ་ལ། མགོ་བོ་ཟླ་ཕྱེད་ལ། ཟླ་ཕྱེད་ཐིག་ལེ་ལ། ཐིག་ལེ་ནཱ་ད་ལ་རབ་ཏུ་གཞུག་ཅིང༌། མཐར་སྒོམ་བ་པོ་ཡང་སྐྲའི་རྩེ་མེ་བརྒྱ་སྟོང་གི་ཆ་ཙམ་དུ་བསྒོམས་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱ་ཏྨ་ཀོ྅ཧཾ། ཞེས་པའི་དོན་མངོན་དུ་གྱུར་པར་བྱས་ནས། བརྗོད་མ་ཐག་པའི་ཀུན་དུ་སྤྱོད་པའི་རྣམ་རྟོག་དེ་ཡང་དོར་བར་བྱ་སྟེ། འདི་ནི་ཆོས་ཐམས་ཅད་དམིགས་སུ་མེད་པའི་རང་བཞིན་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་དེ་ཡིན་ནོ། །དེ་ནས་སྔོན་གྱི་སྨོན་ལམ་གྱི་བྱེད་པའི་དབང་ལས་རང་བཞིན་གྱི་འོད་གསལ་ལས་ནམ་མཁའི་རྟོག་པ་རྣམ་པར་རྟོག་པ་ལས་སྟོང་པ་ཉིད་ཀྱི་ཏིང་ངེ་འཛིན་ལས་ལངས་ཏེ། དེ་ལ་འདིའི་ལྡང་བའི་རིམ་པ་ནི་ནམ་མཁར་ར་ལས་བྱུང་བའི་ཉི་མའི་དཀྱིལ་འཁོར་ལ་ཧཱུཾ་ཡོངས་སུ་གྱུར་པའི་སྣ་ཚོགས་རྡོ་རྗེ་རྩེ་མོ་གསུམ་པ་འོད་ཟེར་ལྔ་འཕྲོ་བ་ཅན་བསྒོམ་པར་བྱས་ནས་འོད་ཟེར་བསྐལ་པ་འཇིག་དུས་ཀྱི་མེ་ལྟ་བུ་དང་ལྷན་ཅིག་ཐམས་ཅད་ནས་འཕྲོས་པས་སྡིག་པ་རྣམས་ཐལ་བར་བྱས་ནས་འབར་པ་དང་ལྡན་པའི་རྡོ་རྗེའི་རབ་ཇི་སྲིད་འདོད་པར་ཡངས་པར་བསྐྱེད་པའི་སྟེང་དུ་རྡོ་རྗེའི་གུར། དེའི་འོག་ཏུ་རྡོ་རྗེའི་བླ་རེ། འོག་རྡོ་རྗེའི་རང་བཞིན་གྱི་ས་གཞི་ཀུན་ནས་སའི་མཐིལ་གྱི་མཐར་ཐུག་པར་རྣམ་པར་བསམ་པར་བྱ་སྟེ། རྡོ་རྗེའི་ར་བ་ལ་སོགས་པ་དེ་རྣམས་ཀྱང་བགེགས་གཞོམ་པའི་དོན་དུ་སྟེ། འཇིག་རྟེན་པའི་རྣམ་པར་ཤེས་པ་དག་པའི་རང་བཞིན་དུ་རིག་པར་བྱའོ། །དེ་ནས་རྡོ་རྗེ་གུར་གྱི་ནང་དུ་སྐུ་དང་གསུང་དང་ཐུགས་རྣམ་པར་དག་པས་ཟུར་གསུམ་པ། སྒྲིབ་པ་ཐམས་ཅད་སྤངས་ནས་སྟོན་ཀའི་ཟླ་བ་ལྟར་དཀར་བ། སྐུ་གསུམ་གྱི་བདག་ཉིད་ཅན་རྡོ་རྗེ་འཛིན་པའི་རང་བཞིན་ཆོས་ཀྱི་འབྱུང་གནས་ཆེན་པོ་སྟེ། ཆོས་ཀྱི་འབྱུང་

---

^{[མ་དཔེ་གཟིགས་ན་འདིར་གནོན།]}

གནས་དེ་ནི་འོག་ཕྲ་བ་སྟེང་ཡངས་པ་ཁ་དོག་དཀར་བའོ། །དེའི་ནང་དུ་རྣམ་པར་ཤེས་པ་བརྒྱད་དག་པས་དུར་ཁྲོད་བརྒྱད་ཀྱི་དབུས་སུ། འཇིག་རྟེན་གྱི་ཆོས་བརྒྱད་ཀྱིས་མ་གོས་པ་རྣམ་པར་དག་པས་བཾ་ཡིག་ལས་སྐྱེས་པའི་པདྨ་འདབ་མ་སྣ་ཚོགས་པ་ཅན་གྱི་ཟེ་འབྲུ་ལ། བདག་མེད་མ་ཉིད་ཀྱི་ཕྱིར་ཆོས་ཀྱི་དབྱིངས་རྣམ་པར་དག་པས་རོ་ཉལ་བའི་སྙིང་གར། རང་གི་འོད་ཀྱི་ཕྲེང་བས་སྲིད་པ་གསུམ་གྱི་གཟི་བརྗིད་སྒྲིབ་ཅིང་ཕན་པར་བྱེད་པས་ཉི་མའི་དཀྱིལ་འཁོར་དམར་སེར་ལ། ཨཱ་ལི་ཕྲག་གཉིས་ཡོངས་སུ་གྱུར་པ་ལས་མེ་ལོང་ལྟ་བུའི་ཡེ་ཤེས་ཀྱི་རང་བཞིན་ཐབས་ཀྱི་ངོ་བོ་ཟླ་བ། དེའི་སྟེང་དུ་ཌ་ཌྷ་ད་དྷ་ཡ་ར་ལ་དང་ལྡན་པའི་ཀཱ་ལི་ཕྲག་གཉིས་ཡོངས་སུ་གྱུར་པ་ལས་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་ཉི་མ་ཤེས་རབ་ཀྱི་བདག་ཉིད། འགྲོ་བ་གསུམ་པོའི་སྟེང་དུ་བརྗིད་པ་དག་བཞིན་དུ་ཤེས་རབ་ལས་སྔར་དམིགས་པའི་སྐྱེས་བུ་ཡང་གནས་པ་སྟེ་འདུས་པའི་བདེ་བ་ཆེན་པོར་བསམ་པར་བྱའོ། །དེ་ནས་མ་དང་ཕ་ཉི་མ་དང་ཟླ་བ་ཁ་སྦྱར་བའི་དབུས་སུ་ཞུགས་པའི་ཤེས་རབ་དང་ཐབས་ཀྱི་བདག་ཉིད་ཨཾ་ཧཱུཾ་སྔོན་པོའི་ས་བོན་གཉིས་བསམ་པར་བྱའོ། །དེ་ཡོངས་སུ་གྱུར་པ་ལས་གྲི་གུག་དང་རྡོ་རྗེ་དག་གི་ལྟེ་བ་ལ་ཟླ་བ་དང་ཉི་མ་ལ་གནས་པའི་ས་བོན་གཉིས་པོ་དེ་ཉིད་སོ་སོར་རྟོག་པའི་ཡེ་ཤེས་ཀྱི་རང་བཞིན་དུ་བསྒོམ་པར་བྱས་ནས། དེའི་འོད་ཟེར་གྱི་དྲ་བས་འགྲོ་བའི་དོན་བྱས་ནས་དེ་བཞིན་གཤེགས་པ་ཐམས་ཅད་མི་སྣང་བའི་ཚུལ་གྱིས་དེ་ཉིད་ལ་རབ་ཏུ་ཞུགས་ཏེ། དེ་རྣམས་ཐམས་ཅད་གཅིག་ཏུ་གྱུར་པ་བྱ་བ་གྲུབ་པའི་ཡེ་ཤེས་སུ་བསམ་པར་བྱའོ། །ཟླ་བ་དང་ཉི་མ་དང་ས་བོན་དང་མཚན་མ་ཡོངས་སུ་གྱུར་པ་ལས། བདག་ཉིད་ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་བདག་ཉིད་དཔལ་མགོན་པོ་འཇིག་རྟེན་གསུམ་ཀུན་དུ་བསྐྱོད་པ་བྱམས་པ་ཆེན་པོ་རྣམ་པར་དག་པས་སྐུ་མདོག་སྔོན་པོ། ཉོན་མོངས་པ་ཞེ་སྡང་གི་རྟོག་པ་ཞིག་པས་སྐུ་མདོག་ནག་པོའོ་ཞེས་ཁ་ཅིག་གོ །གདུག་པ་ཅན་འདུལ་བས་ཁྲོས་པ། གཉིས་སུ་མེད་པའི་ཡེ་ཤེས་དག་པས་ཞལ་གཅིག་པ། ལོག་པའི་ལྟ་བ་རབ་ཏུ་བཅོམ་པས་རྣམ་པར་འགྱུར་བའི་ཞལ་

---

^{[མ་དཔེ་གཟིགས་ན་འདིར་གནོན།]}

ཅན། བདུད་བཞི་རབ་ཏུ་འཇོམས་པས་མཆེ་བ་གཙིགས་ཤིང་འཇིགས་སུ་རུང་བ་བདུད་མངོན་པར་འཆིང་ཤིང༌། འཇོམས་པས་དྲག་ཏུ་རྒོད་པ། སྐུ་དང་གསུང་དང་ཐུགས་རྣམ་པར་དག་པས་སྤྱན་གསུམ་པ། ཡང་ན་རྣམ་པར་ཐམས་ཅད་ཀྱི་ལམ་གསུམ་མཐོང་བ་དག་པའོ། །བརྩེ་བ་དང་ལྡན་པས་དམར་པོའོ། །གདུག་པ་ཅན་འདུལ་བ་དག་པས་དབུ་སྐྲ་དམར་སེར་གྱེན་དུ་བརྫེས་པ། སྣ་ཚོགས་པ་རྗེས་སུ་འཛིན་པ་ཉིད་ཀྱི་ཕྱིར་སྣ་ཚོགས་རྡོ་རྗེས་མཚན་པའི་དབུ་རྒྱན་ཅན་ནོ། །རང་བཞིན་མེད་པ་ཉིད་སོ་སོར་རྟོག་པའོ་ཞེས་ཁ་ཅིག་གོ །རིགས་ལྡན་རྣམ་པར་དག་པས་དཔའ་བོའི་ཐོད་པ་ལྔ་དཔྲལ་བའི་མཚམས་སུའོ། །ཚོགས་གཉིས་རྣམ་པར་དག་པས་ཕྱག་གཉིས་པ། གཡས་ཀྱིས་མི་ཤེས་པའི་རི་བོ་འབྱེད་པ་ལ་མཁས་པ་ཉིད་ཀྱི་ཕྱིར་དང༌། ཡེ་ཤེས་ལྔ་རོ་མཉམ་པར་བསྒོམ་པ་དག་པས་རྡོ་རྗེ་སྔོན་པོ་རྩེ་མོ་ལྔ་པ་འཛིན་པའོ། །གཡོན་པས་གཡོན་ཉིད་ནས་ཤེས་རབ་མལ་མཉམ་པར་འཁྱུད་ཅིང་བདུད་བཞིའི་ཁྲག་དག་པ་དང༌། བདེ་བ་ཆེན་པོ་དང་སྙིང་རྗེའི་རོ་དག་པས་ཁྲག་གིས་གང་ཞིང་རྡོ་རྗེས་མཚན་པའི་ཐོད་པ་འཛིན་པའོ། །བདེན་པ་གཉིས་རྣམ་པར་དག་པས་ཞབས་གཉིས་པ། སྣ་ཚོགས་ཆུ་སྐྱེས་ལ་གནས་པའི་རོ་ཉལ་བའི་སྙིང་གར་ཉི་མ་ལ་ཁམས་གསུམ་པོ་དམིགས་པ་མེད་ཅིང་གསལ་བ་དག་པ་དང༌། ཐབས་སུ་གྱུར་པའི་བྱང་ཆུབ་ཀྱི་སེམས་སྟེང་དུ་འགྲོ་བ་དག་པས་གཡོན་པའི་བརླ་ལ་གཡས་པའི་ཞབས་ཀྱི་རྩེ་མོ་གཞག་པའི་སྐྱིལ་ཀྲུང་ཕྱེད་པའི་གར་གྱིས་གནས་པ། ཐམས་ཅད་ལ་ཀུན་དུ་ཁྲོ་པ་སྤངས་པ་དང་སྙིང་རྗེ་ཆེན་པོའི་ཚོགས་དག་པས་གཡོན་པའི་ཞབས་ཀྱི་མཐེ་བོའི་རྩེ་མོས་ཡིད་སོང་བའི་སྟན་ལ་གནས་པའོ། །ཆོས་དང་ལོངས་སྤྱོད་རྫོགས་པ་དང་སྤྲུལ་པའི་སྐུ་དང༌། གསུམ་རྣམ་པར་དག་པས་ཁྲོ་གཉེར་གསུམ་དང་ལྡན་པ་ཡི་གེ་ཨཱ་ལི་ཀཱ་ལི་ལྔ་བཅུ་དག་པས་མགོ་བོ་སར་པ་ལྔ་བཅུ་རྒྱུ་མ་རློན་པ་ལ་བརྒྱུས་པའི་ཕྲེང་བས་སྐུ་ལ་བརྒྱན་པའོ། །མི་བསྐྱོད་པ་དང༌། འོད་དཔག་མེད་དང༌། རིན་ཆེན་འབྱུང་ལྡན་དང༌། རྣམ་པར་སྣང་མཛད་དང༌།

---

^{[མ་དཔེ་གཟིགས་ན་འདིར་གནོན།]}

དོན་ཡོད་གྲུབ་པ་རྣམ་པར་དག་པས་མིའི་རུས་པ་ལས་བྱས་པའི་འཁོར་ལོ་དང༌། རྣ་རྒྱན་དང༌། མགུལ་རྒྱན་དང༌། གདུ་བུ་དང༌། སྐ་རགས་སུ་གྲགས་པའི་ཕྱག་རྒྱ་ལྔ་འཛིན་པ། རྡོ་རྗེ་སེམས་དཔའ་རྣམ་པར་དག་པས་རུས་པའི་རང་བཞིན་ལས་བྱུང་བའི་ཐལ་བས་བྱང་ཆུབ་ཀྱི་སེམས་ཀྱིས་ཡན་ལག་ཐམས་ཅད་ལ་ཁྱབ་པ་མཚོན་པ་ཉིད་ཀྱིས་ལུས་ཐམས་ཅད་ལ་བྱུགས་པའི་ཕྱག་རྒྱ་དྲུག་པ་རྣམ་པར་འཛིན་པ་ཅན་ནོ། །འགྲོ་བ་མི་རྟག་པ་ཉིད་བསྲེགས་པས་ཐལ་བས་བྱུགས་པའི་སྐུའོ་ཞེས་གཞན་རྣམས་སོ། །རྣམ་པར་མི་རྟོག་པའི་ཚངས་པ་དག་པས་མི་ཡི་སྐྲ་ཡི་མཆོད་ཕྱིར་ཐོགས་པ་ཅན། ཆགས་པ་ལ་སོགས་པ་རྣམ་པར་དག་པས་སྟག་གི་པགས་པའི་ཤམ་ཐབས་ཅན་ནོ། །ཨོཾ་ཡིག་ལས་སྐྱེས་པའི་བདག་མེད་མ་སྔོན་མོ། ཕྱག་གཡས་ཀྱིས་དངོས་པོ་དང་དངོས་པོ་མ་ཡིན་པའི་རྣམ་པར་རྟོག་པ་གཅོད་པས་གྲི་གུག ། ཅིག་ཤོས་ཀྱིས་བདེ་བ་ཆེན་པོ་དང་སྙིང་རྗེ་ཆེན་པོའི་རང་བཞིན་གྱི་རྡུལ་གྱིས་གང་བའི་ཐོད་པ་འཛིན་པའི་རྣམ་པར་འཕྲུལ་པའོ། །ཞལ་གཅིག་མ་ཅན་ཕྱག་རྒྱ་ལྔ་འཛིན་མ། སྟོང་པ་ཉིད་རྣམ་པར་དག་པས་དབྱངས་ལྔ་བཅུའི་བདག་ཉིད་ཅན་གྱི་མགོ་བོ་སྐམ་པོ་ལྔ་བཅུའི་ཕྲང་བ་ཅན་དཔྲལ་བར་ཐོད་པ་ལྔ་ཡིས་བརྒྱན་པ། དབུ་སྐྲ་དམར་སེར་གྱེན་དུ་འཁྱིལ་བའི་ཚོགས་ཅན། དམར་ལ་ཟླུམ་པའི་སྤྱན་གསུམ་དང་ལྡན་པ་མཆེ་བ་རྣམ་པར་གཙིགས་པའི་ཞལ་ཅན། སྐེ་རགས་སིལ་བུ་ཅན་མ་དང་ལྷན་ཅིག་ཡང་དག་པར་སྦྱོར་བའི་རྣལ་འབྱོར་གྱིས་གཉིས་སུ་མེད་པའི་བདེ་བ་ཆེན་པོས་ལུས་ཐམས་ཅད་ལ་བགྲོད་པའི་མཐུ་ལས་བ་སྤུ་ལངས་པའི་ལུས་ཅན་ནོ། །གཡུང་མོས་སྐུ་ལ་འཁྱུད་པ་ཉིད། །ཅེས་ཁ་ཅིག་སྒྲོག་པར་བྱེད་དོ། །སྲིད་པ་གསུམ་མཛེས་པར་གནོན་པའི་རང་བཞིན་གྱིས་ལུས་ཀྱི་ལོངས་སྤྱོད་རྒྱས་ཤིང་དམ་པའི་རོལ་སྒེག་གི་ཉམས་ཅན་ཉིད་ཀྱི་ཕྱིར་སྒེག་པ་དང་བཅས་པའོ། །འཇིག་རྟེན་གསུམ་མནན་པ་ཉིད་ཀྱི་ཕྱིར་དཔའ་བོའོ། །མི་ཡི་མགོ་བོའི་ཕྲེང་བ་ལ་སོགས་པའི་རྒྱན་འཛིན་པ་ཉིད་ཀྱི་ཕྱིར་དང༌། མནན་པ་ཉིད་ཀྱི་ཕྱིར་མི་སྡུག་པ། སྒེག་པའི་རྗེས་སུ་བྱེད་པའི་རྩེ་འཇོ་འཕྲོ་བ་ནི་རྒོད་པ།

---

^{[མ་དཔེ་གཟིགས་ན་འདིར་གནོན།]}

བསྐལ་པ་འཇིག་པ་རྩོམ་པ་འབྱུང་བའི་ཉི་མའི་དཀྱིལ་འཁོར་ཤིན་ཏུ་གཏུམ་པ་ལ་ཡུམ་དང་རྩེ་ཞིང་རྣམ་པར་རྩེ་བས་དྲག་ཤུལ་ཅན། ལྷ་དང་ལྷ་མ་ཡིན་མཐའ་དག་སྐྲག་པར་བྱེད་པའི་ལུས་ཅན་གྱིས་འཇིགས་སུ་རུང་བ། རྟོག་པ་མཐའ་དག་གི་མཚན་མ་མེད་ཅིང་བདེ་བ་ཆེན་པོའི་རང་བཞིན་ཉིད་དུ་ཡང་སྔོན་གྱི་སྨོན་ལམ་ལས་གྲུབ་པ་ཕུལ་དུ་བྱུང་བའི་སྤྲུལ་པ་མ་ལུས་པ་རྣམ་པར་སྤྲོས་ཏེ། འགྲོ་བའི་དོན་ཕུན་སུམ་ཚོགས་པ་ཇི་ལྟ་བ་བཞིན་འབྱུང་བ་ནི་སྙིང་རྗེ་ཆེན་པོ། འགྲོ་བ་ལས་འདས་ཤིང་བླ་ན་མེད་པའི་ལུས་ཅན་ཉིད་ནི་རྔམ་པ་སྟེ་རྨད་དུ་བྱུང་བ། ཆགས་པ་ལ་སོགས་པའི་ཉོན་མོངས་པའི་ཕུང་པོ་ཞི་བ་ཉིད་ཀྱི་ཕྱིར་དང༌། ཐོག་མ་མེད་པའི་གཏེར་ཅན་ཉིད་ཀྱི་ཕྱིར་ཞི་བར་འགྱུར་རོ། །བཅོམ་ལྡན་འདས་ཀྱི་ནང་རྣམ་པར་དག་པ་ནི། ཤ་ནི་པུཀྐ་སཱི། ཁྲག་ནི་རི་ཁྲོང་མ། གདོལ་པ་མོ་ཁུ་བ། གཡུང་མོ་རྐང་དང་ཚིལ་བུ། པགས་པ་རིམ་པ་བདུན་བྱང་ཆུབ་ཀྱི་ཡན་ལག་བདུན། རུས་པ་བདེན་པ་བཞིའོ། །དེ་བཞིན་དུ་དམ་ཚིག་སེམས་དཔའི་ང་རྒྱལ་དང་ལྡན་པའི་རྣལ་འབྱོར་པས་བཅོམ་ལྡན་འདས་ཀྱི་ཐུགས་ཀྱི་ནང་དུ་སོན་པའི་ཉི་མ་ལ་གནས་པའི་ཧཱུཾ་ལས་སྐྱེས་པའི་རྡོ་རྗེའི་ལྟེ་པའི་ནང་དུ་གནས་པའི་ཉི་མའི་སྟེང་དུ་ཧཱུཾ་ཡིག །བཅོམ་ལྡན་འདས་མའི་ཐུགས་ཀར་གནས་པའི་ཟླ་བ་ལ་ཨཾ་ཡིག་གི་ས་བོན་ལས་སྐྱེས་པའི་གྲི་གུག་གི་ཡུ་བ་ལ་གནས་པའི་ཟླ་བ་ལ་ཨཾ་ཡིག་བལྟས་ནས། དེ་དག་གི་འོད་ཟེར་སྤྲོས་ཤིང་བསྡུས་པས། མདུན་གྱི་ལམ་དུ་ཡེ་ཤེས་སེམས་དཔའ་འབད་པ་དང་བཅས་པས་སྤྱན་དྲངས་མདུན་དུ་བཞུགས་པ་ལ། སྙིང་གའི་ས་བོན་གྱི་འོད་ཟེར་ལས་འཕྲོས་པའི་གཽ་རཱི་ལ་སོགས་པའི་ལྷ་མོ་རྣམས་ཀྱིས་མཆོད་ཡོན་ཕུལ་བ་སྔོན་དུ་འགྲོ་བས་ཡང་དག་པར་མཆོད་པ་དང༌། ཡང་དག་པར་བསྟོད་དེ། ཛཿ་ཡིག་གིས་སྤྱན་དྲངས། ཧཱུཾ་ཡིག་གིས་དམ་ཚིག་སེམས་དཔའ་བྱིན་གྱིས་བརླབས་པའི་དོན་ཆུ་ལ་ཆུ་བཞིན་དུ་བཅུག །བཾ་ཡིག་གིས་བཅིངས། ཧོཿ་ཡིག་གིས་དབང་དུ་བྱས་ཏེ། དེ་ནས་བར་མ་ཆད་པར་སྙིང་གའི་ས་བོན་གྱི་འོད་ཟེར་ལྕགས་ཀྱུའི་རྣམ་པས་སངས་རྒྱས་ཐམས་ཅད་སྤྱན་དྲངས་ཏེ། སྔར་བཞིན་མ་མོ་

---

^{[མ་དཔེ་གཟིགས་ན་འདིར་གནོན།]}

བརྒྱད་ཀྱིས་མངོན་པར་མཆོད་ཅིང་བཀུར་སྟིར་བྱས་ཏེ། བྱང་ཆུབ་རྡོ་རྗེས་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཨ་བྷི་ཥཉྩནྟུ་མཱཾ་སརྦ་ཏ་ཐཱ་ག་ཏ། ཞེས་སོ། །དེ་ནས་སྔས་རྒྱས་དེ་རྣམས་ཧེ་རུ་ཀའི་རྣམ་པས། །སངས་རྒྱས་རྣམས་ནི་ཐམས་ཅད་ཀྱི། །གསང་གསུམ་གནས་ལས་བྱུང་བ་ཡི། །ཁམས་གསུམ་པ་ཡིས་ཕྱག་བྱས་པ། །རྡོ་རྗེའི་དབང་བསྐུར་ཆེན་པོ་སྦྱིན། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་ཞེས་གསུངས་ཤིང༌། བདུད་རྩི་ལྔ་འཛིན་པའི་དེ་བཞིན་གཤེགས་པ་ལྔའི་བདག་ཉིད་ཀྱི་བུམ་པས་དེ་ལ་གནས་པའི་དྲི་མ་དང་སྒྲིབ་པ་ཐམས་ཅད་ཟད་པར་བྱས་ཏེ། ལན་པ་མེད་ཅིང་མངོན་པར་མཚམས་སྦྱོར་བ་མེད་པའི་ཡེ་ཤེས་ཀྱི་ཆུ་རྣམས་ཀྱིས་མངོན་པར་དབང་བསྐུར་བར་བྱའོ། །དབང་བསྐུར་བའི་དུས་ཉིད་དུ་གུར་གུམ་དང་མེ་ཏོག་ལ་སོགས་པའི་ཆར་འབབ་ཅིང༌། རྔ་པོ་ཆེའི་སྒྲ་ཡང་འབྱུང་བར་འགྱུར་རོ། །གཟུགས་རྡོ་རྗེ་མ་ལ་སོགས་པ་རྣམས་ཀྱིས་མཆོད་པར་བྱ་ཞིང་འཆད་པར་འགྱུར་བའི་རྡོ་རྗེའི་གླུས་སྤྱན་མ་ལ་སོགས་པ་རྣམས་ཀྱིས་བསྟོད་པར་བྱ་སྟེ། དབང་བསྐུར་བའི་ཆུ་ལྷག་མ་རང་གི་རིགས་ཀྱི་བདག་པོར་བསྒོམས་ཏེ། དེ་ལས་ཀུན་དུ་བྱང་བ་འཚོ་བ་རྣམ་པར་དག་པས་བཅོམ་ལྡན་འདས་དང་བཅོམ་ལྡན་འདས་མའི་སྤྱི་བོར་མི་བསྐྱོད་པ་བསྐྱེད་པར་བྱའོ། །དེ་ནས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་བཛྲ་སྭ་བྷཱ་བ་ཨཱ་ཏྨ་ཀོ྅ཧཾ། ཞེས་དབང་བསྐུར་བ་ལྷག་པར་བརྟན་པར་བྱའོ། །དེ་ནས་བར་མ་ཆད་པར་དབང་པོ་རྣམས་སུ་གོ་ཆ་བྱས་ཏེ། དེ་ལ་མིག་ཏུ་གཏི་མུག་རྡོ་རྗེ་མའི་མིང་ཅན་དང་མཚུངས་པ་དཀར་མོའོ། །རྣ་བ་དག་ལ་ཞེ་སྡང་རྡོ་རྗེ་མ་བདག་མེད་མའི་མིང་ཅན་དང་མཚུངས་པ་ནག་མོ། །སྣའི་བུ་ག་དག་ལ་སེར་སྣ་རྡོ་རྗེ་མ་ནང་གི་གསང་བའི་དཀར་བའི་དཀར་མོའི་མིང་ཅན་དང་མཚུངས་པ་སེར་མོ། ཁ་ལ་འདོད་ཆགས་རྡོ་རྗེ་མ་ནང་གི་ཆུའི་རྣལ་འབྱོར་མ་དང་འདྲ་བ་དམར་མོ། ལུས་ལ་ཕྲག་དོག་རྡོ་རྗེ་རྡོ་རྗེ་མཁའ་འགྲོ་མ་ཞེས་ཀྱང་གྲགས་པ་བཞིན་ལྗང་གུ། ཡིད་ལ་བདག་མེད་རྣལ་

---

^{[མ་དཔེ་གཟིགས་ན་འདིར་གནོན།]}

འབྱོར་མ་བདག་མེད་མའི་མིང་ཅན་མ་བཞིན་ནག་མོའོ། །འདི་རྣམས་ཀྱང་གྲངས་ཇི་ལྟ་བ་བཞིན་དུ། ཨཱཾ་ཨཾ་ཨཱིཾ་ཨཱིཾ་ཨུཾ་གི་ས་བོན་ལས་སྐྱེས་པ། ཞལ་གཅིག་པ། སྤྱན་གསུམ་པ། གཡས་པ་དང་ཅིག་ཤོས་ཀྱི་ཕྱག་དག་གིས་གྲི་གུག་དང་ཐོད་པ་འཛིན་པ། རོ་ལ་གནས་པའི་ཟླ་བ་ལ་བཞུགས་པར་བསྒོམ་པར་བྱ་ཞིང༌། སྤྱི་བོ་དང་མགྲིན་པ་དང་སྙིང་ག་རྣམས་སུ་ཡང༌། ཨོཾ་ཨཱཿ་ཧཱུཾ་གི་ཡི་གེ་ལས་སྐྱེས་བའི་དཀར་པོ་དམར་པོ་ནག་པོའི་མདོག་ཅན་མ། འཇིག་རྟེན་གསུམ་ལས་བྱུང་བས་སྤྱོད་མ་དང་མཁའ་སྤྱོད་མ་དང་བདག་མེད་མ་བསམ་པར་བྱའོ། །ཨོཾ་ཨཾ་ཨཾ་གི་ས་བོན་ལས་སྐྱེས་པའོ་ཞེས་ཁ་ཅིག་གོ །དབྱིབས་ནི་གཏི་མུག་རྡོ་རྗེ་མ་ལ་སོགས་པ་བཞིན་ནོ། །དེ་བཞིན་དུ་རེ་ཞིག་མཚོ་སྐྱེས་རྡོ་རྗེའི་རིམ་པས། ཡེ་ཤེས་སེམས་དཔའ་བཅུག །དབང་བསྐུར། གོ་ཆའི་རིམ་པ་ངེས་པར་མཐོང་ངོ༌། །ལཱུ་ཡི་པའི་ཞབས་ཀྱི་མངོན་པར་རྟོགས་པར་ནི། གོ་ཆའི་བར་མ་ཆད་པར་ཡེ་ཤེས་སེམས་དཔའ་བཅུག །དེ་ནས་དབང་བསྐུར་རོ་ཞེས་གོ་རིམས་སོ། །དེ་བཞིན་དུ་ཤཱནྟི་པའི་དགོངས་པའི་རྗེས་སུ་འབྲང་བའི་ཀྱེ་རྡོ་རྗེ་ཕྱག་གཉིས་པའི་སྒྲུབ་ཐབས་སུ་ཡང་བྲིས་སོ། །རྣམ་པར་དག་པའི་གཏེར་དུ་ཡེ་ཤེས་ཀྱི་དཀྱིལ་འཁོར་བཅུག་པའི་བར་མ་ཆད་དུ་གོ་ཆ་བརྗོད་ནས་དབང་བསྐུར་བར་མངོན་པར་བརྗོད་པ་ནི་གྲུབ་པ་གཉིས་ཀྱི་བཞེད་པ་དང་མཐུན་པ་མ་ཡིན་ནོ། །དེའི་བར་མ་ཆད་དུ་མདུན་དུ་ཛཾ་ཡིག་སྔོ་པོ་ལས་སྐྱེས་པའི་རླུང་གི་དཀྱིལ་འཁོར་གཞུའི་དབྱིབས་ཅན་མཆོག་མ་གཉིས་ལ་གཡོ་བའི་བ་དན་གྱིས་མཚན་པ། དེའི་སྟེང་དུ་རཾ་དམར་པོ་ལས་སྐྱེས་པའི་མེའི་དཀྱིལ་འཁོར་གྲུ་གསུམ་པ། རེ་ཕས་ཟུར་གསུམ་ལ་མཚན་པ། དེའི་སྟེང་དུ་མགོ་བོ་གསུམ་གྱི་སྐྱེད་པུ་ལ་གནས་པའི། ཨ་ཡིག་དམར་པོ་ལས་སྐྱེས་པའི་པདྨའི་སྣོད་དེ་ཐོད་པའོ། །དེའི་དབུས་སུ་བྷཱུཾ་ཨཱཾ་ཁཾ་ཧཱུཾ་ཡོངས་སུ་གྱུར་པ་ལས། གོ་ཀུ་ད་ཧན། བི་ར་ཤུ་མ་མུའི་རང་གི་ངོ་བོའི་སྒྲོན་མ་ལྔ་དང་བདུད་རྩི་ལྔ་རང་རང་གི་ས་བོན་གྱིས་བྱིན་གྱིས་བརླབས་པ། དེའི་སྟེང་དུ་ཨོཾ་དཀར་པོ་བསམས་ནས་དེའི་གཟུགས་ཁྱབ་པའི་ཨཾ་ཡིག་ལས་སྐྱེས་པའི་

---

^{[མ་དཔེ་གཟིགས་ན་འདིར་གནོན།]}

ཟླ་བའི་དཀྱིལ་འཁོར་དེའི་ཡང་སྟེང་དུ། ཧཱུཾ་ཡིག་དཀར་པོ་ལས་བྱུང་བའི་རྡོ་རྗེ་དེའི་ས་བོན་གྱིས་མཆན་པ་བལྟ་བར་བྱའོ། །དེ་ནས་རླུང་གིས་བསྐུལ་བའི་མེས་རྡོ་རྗེའི་འཁོར་དེ་ཐམས་ཅད་དང་རྡོ་རྗེ་ཡང་ཞུ། ལྔ་ཚན་བཞི་པོ་ཞུ་བ་ལས་བྱུང་བའི་བདུད་རྩིའི་སྣོད་དེ་ཉིད་ཀྱི་ནང་དུ་བསྒྲུབས་ཏེ། དེ་ནས་ཇི་སྲིད་དུ་དེ་ཉིད་གང་བར་བསམ་པར་བྱའོ། །དེའི་སྟེང་དུ་ཨོཾ་ཨཱཿ་ཧཱུཾ་ཞེས་པའི་ཡི་གེ་གསུམ་བལྟས་ནས། དེའི་འོད་ཟེར་མགལ་མེའི་རྣམ་པས་སྲིད་པ་གསུམ་ན་གནས་པའི་བདུད་རྩི་དང༌། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་བདུད་རྩི་སྤྱན་དྲངས་ནས་དེ་ཉིད་ལ་རབ་ཏུ་བཅུག་སྟེ་རོ་མཉམ་པར་གྱུར་པས། ལྷའི་དྲི་དང་རོ་དང་ལྡན་པའི་སྟོན་ཀའི་ཟླ་བའི་འོད་ལྟར་དྲི་མ་མེད་པར་རྣམ་པར་བསམས་ནས་རང་གི་ལྕེའི་རྩེ་མོ་ལ་ཧཱུཾ་དཀར་པོ་ལས་བྱུང་བའི་རྡོ་རྗེ་ནས་འབྲུའི་ཚད་ཙམ་བསམས་ཏེ། དེའི་འོད་ཟེར་མགལ་མེ་ལྟ་བུས་བཅོམ་ལྡན་འདས་ཀྱི་བདུད་རྩི་དེ་ཞལ་གྱིས་མྱང་ཞིང༌། བཅོམ་ལྡན་འདས་མའི་ཞལ་དུ་བྱིན་ཏོ། །ཨོཾ་སརྦ་ཏ་ཐཱ་ག་ཏ་སྭ་ད་བཛྲ་སྭ་བྷཱ་བ་ཨཱ་ཏྨ་ཀོ྅ཧཾ། ཞེས་བརྗོད་པས་བཅོམ་ལྡན་འདས་མཉེས་པར་གྱུར་པའོ། །དེ་ནས་ཐུགས་ཀའི་ས་བོན་ལས་རྣམ་པར་འཐོན་པའི་གཟུགས་རྡོ་རྗེ་མ་ལ་སོགས་པ་རྣམས་ཀྱིས་མེ་ལོང་དང༌། པི་ཝང་དང༌། དྲིའི་དུང་ཆོས་དང༌། རོའི་སྣོད་དང་སྣ་ཚོགས་པའི་གོས་དང༌། ཆོས་ཀྱི་འབྱུང་གནས་ཀྱི་ཕྱག་གིས་མཆོད་པ་བར་མ་ཆད་པར་བྱ་སྟེ། ཨོཾ་སརྦ་ཏ་ཐཱ་ག་ཏ་པཱུ་ཛྲཱ་བཛྲ་སྭ་བྷཱ་བ་ཨཱ་ཏྨ་ཀོཉ་ཧཾ། ཞེས་བརྗོད་ཅིང༌། སྤྱན་མ་ལ་སོགས་པ་རྣམས་ཀྱིས། །ཁྱོད་ནི་རྣལ་འབྱོར་མ་ཚོགས་ཡོངས་སུ་བསྐོར། །ཁྱོད་ནི་ཉིད་ཀྱི་ཐུགས་ཀྱི་མཆོག་བརྙེས་ཤིང༌། །ཁྱོད་ཀྱིས་རྒྱུ་དང་མི་རྒྱུའི་འགྲོ་བ་ཀུན་བརྒྱན་ཏེ། །སྙིང་རྗེའི་ཐུགས་ཀྱིས་སེམས་ཅན་སད་མཛད་པ། །སྒྱུ་མ་སྤྲོས་པ་རྡོ་རྗེ་སྒྲུབ་པའི་ཡིད། །ཧེ་རུ་ཀ་དཔལ་རྡོ་རྗེ་ཡིད་ཀྱིས་དགྱེས། །ཞེས་རྡོ་རྗེའི་གླུ་ཡིས་བསྟོད་པར་བྱ་སྟེ། དེ་ནས་ཨོཾ་སརྦ་ཏ་ཐཱ་ག་ཏ་སྟུ་ཏི་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་བརྗོད་དོ། །ཕྱི་ནས་འཁོར་ལོ་བཞིའི་བདག་ཉིད་ཀྱི་ཕྱག་རྒྱ་བྱ་སྟེ། དེ་ལ་ལྟེ་བའི་འོག་ཏུ་རྣམ་པར་གནས་པའི་སྦྲུལ་བའི་འཁོར་ལོ་དམར་

---

^{[མ་དཔེ་གཟིགས་ན་འདིར་གནོན།]}

པོའམ། སྣ་ཚོགས་མདོག །པདྨ་འདབ་མ་དྲུག་ཅུ་རྩ་བཞི་འོད་ཟེར་འཕྲོ་བ་ཅན་གྱི་སྙིང་པོ་ལ། ཨཾ་ཡིག་ནག་པོ་བྱིན་གྱིས་བརླབ་ཅིང་གདོང་སྟེང་དུ་ཕྱོགས་པའོ། །སྙད་གར་ཆོས་ཀྱི་འཁོར་ལོ་དཀར་པོ་པདྨ་འདབ་མ་བརྒྱད་པ། དེའི་དབུས་སུ་ས་བོན་ཧཱུཾ་ཡིག་སྔོན་པོ་ཤར་ལ་སོགས་པའི་ཕྱོགས་ཀྱི་འདབ་མ་རྣམས་སུ། རྣམ་པར་སྣང་མཛད་ལ་སོགས་པ་རྣམས་ཀྱིས་གྲངས་ཇི་ལྟ་བར། བྷྲཱུཾ་ཨཱཾ་ཛྲཱྀཾ་ཁཾ་གི་ས་བོན་ནོ། །དབང་ལྡན་ལ་སོགས་པའི་འདབ་མ་རྣམས་སུ་སྤྱན་མ་ལ་སོགས་པ་རྣམས་ཀྱི་ས་བོན་ཨེ་ཝཾ་མཱ་ཡ་སྟེ་འདི་རྣམས་ཀྱི་ཁ་འོག་ཏུའོ། །མགྲིན་པར་ལོངས་སྤྱོད་རྫོགས་པའི་འཁོར་ལོ་མཚོ་སྐྱེས་དམར་པོ་འདབ་མ་བཅུ་དྲུག་པ། དེའི་ཟེའུ་འབྲུལ་ཨཾ་ཡིག་དམར་པོ། ཨཱ་ལི་ཀཱ་ལིས་ཡོངས་སུ་བསྐོར་བ་འདི་རྣམས་ཀྱི་ཁ་སྟེང་དུའོ། །སྤྱི་བོར་བདེ་བ་ཆེན་པོའི་འཁོར་ལོ་འདམ་སྐྱེས་འདབ་མ་སུམ་ཅུ་རྩ་གཉིས་པ། དབུས་སུ་ཧཾ་ཡིག་དཀར་པོས་བྱིན་གྱིས་བརླབས་པ་ཁ་འོག་ཏུ་བལྟ་བའོ། །འདི་རྣམས་ཐམས་ཅད་ཀྱི་ཡི་གེ་ཟླ་བ་ལ་གནས་པའོ། །དེ་ནས་འཁོར་ལོ་བཞི་པོ་དེའི་འོད་ཟེར་གྱི་ཚོགས་ནམ་མཁའ་ལ་སྤྲོས་པས་འགྲོ་བའི་དོན་བྱས་ནས། དེར་དེ་ཉིད་ནང་དུ་བསྒོམ་པར་བྱས་ཏེ། དེའི་རྗེས་སུ་རིགས་ལྔའི་ཆ་ཤས་ཅན་དུ་བྱ་བའི་དོན་དུ། བཅོམ་ལྡན་འདས་མའི་སྤྱི་བོ་དང་སྙིང་ག་དང་ལྟེ་བ་དང་གསང་གནས་དང་བརླ་ཟུང་རྣམས་སུ། ཇི་ལྟ་བའི་རིམ་པས། ཨོཾ་ཧཱུཾ་སྭཱ་ཨཱཿ་ཧཱ། ཡོངས་སུ་གྱུར་པ་ལས་རྣམ་པར་སྣང་མཛད་དང་མི་བསྐྱོད་པ་དང་རིན་ཆེན་འབྱུང་ལྡན་དང་འོད་དཔག་མེད་དང་དོན་ཡོད་གྲུབ་པ་བསམ་པར་བྱའོ། །ཧཱུཾ་ཡོངས་སུ་གྱུར་པ་ལས་པདྨ་དང་རྡོ་རྗེ་ཨཱཿ་དང་ཨོཾ་ཡིག་གིས་ཡོངས་སུ་རྫོགས་པའི་ཟེ་འབྲུ་དང་ནོར་བུ་བསམ་པར་བྱ་སྟེ། དེ་ནས་ཨོཾ་པདྨ་སུ་ཁ་དྷཱ་ར་མ་ཧཱ་རཱ་ག་སུ་ཁནད་ཙ་ཏུར་ཨཱ་ནནད་བྷ་ག་བི་ཤྭ་ཧཱུཾ་ཧཱུཾ་ཧཱུཾ་ཀ་ཪྻཾ་ཀུ་རུ་ཥྭ་མེ། ཨོཾ་བཛྲ་མ་ཧཱ་དྭེ་ཥ་ཙ་ཏུར་ཨཱ་ནནད་དཱ་ཡ་ཀ་ཁ་ག་མུ་ཁ་ཨེ་ཀ་རཱ་སོ་ནཱ་ཐ་ཧཱུཾ་ཧཱུཾ་ཧཱུཾ་ཀ་ཪྻཾ་ཀུ་རུ་ཥྭ་མེ། ཞེས་པས་པདྨ་དང་རྡོ་རྗེ་བྱིན་གྱིས་བརླབས་པར་བྱས་ནས། འཛག་པ་མེད་པའི་བདེ་བ་ཆེན་པོའི་ཡེ་ཤེས་ཐོབ་པར་བྱ་བའི་ཆེད་དུ། པདྨ་དང་རྡོ་རྗེའི་སྦུ་གུ་དག་ལ་ཧཱུཾ་ཕཊ་ཀྱི་ཡི་གེ་སེར་པོ་བསམ་པར་བྱའོ། །

---

^{[མ་དཔེ་གཟིགས་ན་འདིར་གནོན།]}

དེ་ནས་སཱིའི་ཡི་གེ་གསུམ་བརྗོད་ཅིང༌། ཨོཾ་སརྦྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་པ་འདིས་རྗེས་སུ་ཆགས་པར་བྱའོ། །དམ་ཚིག་ལ་ཡང་ལས་ཀྱི་ཕྱག་རྒྱའི་སྙོམས་པར་འཇུག་པ་དང༌། རིགས་ལྔའི་ཆ་ཤས་ཅན་བསྒྲུབ་པ་ལ་སོགས་པ་ཐམས་ཅད་ཡིད་ལ་བྱའོ། །གཞན་ཡང་མ་དག་པའི་བདེ་བ་སྙེམས་པའི་རྣལ་འབྱོར་པས་དེ་བསྒྲུབ་པར་བྱའོ། །དེ་ནས་ཤེས་རབ་ཡེ་ཤེས་ཀྱི་དབང་བསྐུར་བའི་དུས་སུ། བླ་མ་དམ་པའི་མན་ངག་ལས་ལྷག་པར་རྟོགས་པའི་རྣམ་པ་སྣ་ཚོགས་པ་ལ་སོགས་པའི་མཚན་ཉིད་ཀྱི་དབྱེ་བས་དགའ་བ་ལ་སོགས་པའི་ལས་ཀྱི་ཕྱག་རྒྱའི་སྙོམས་འཇུག་ལ་ཡང་དེ་བཞིན་ཁོ་ནར་གོམས་པའི་དབང་ལས་རིམ་པས་འཆར་བའི་མཐར། རྟོག་པ་མཐའ་དག་གི་དྲ་བ་མེད་པ་བཞི་པ་ལྷན་ཅིག་སྐྱེས་པའི་བདེ་བ་སྒོ་ཐམས་ཅད་ལ་ལན་ཅིག་གནས་པའི་ཆ་ཤས་ཅན་གྱི་རྣམ་པ་དྲི་མས་མཚན་པ་མ་ཡིན་པ་འོད་གསལ་བ་ལ་རབ་ཏུ་བཞུགས་པ་ནི་རིམ་པའོ། །ཡང་ན་དེ་ལ་འདིའི་རིམ་པ་ནི། འཇིག་རྟེན་གསུམ་དུར་ཁྲོད་ལ། དུར་ཁྲོད་པདྨའི་སྟན་ལ། པདྨ་རོ་ལ། རོ་ཉི་མ་ལ། ཉི་མ་བཅོམ་ལྡན་འདས་མ་ལ། བཅོམ་ལྡན་འདས་མ་རྗེས་སུ་ཆགས་པས་ཞུ་བར་གྱུར་ཏེ་བཅོམ་ལྡན་འདས་ལ། བཅོམ་ལྡན་འདས་ཐུགས་ཀའི་ཉི་མ་ལ། ཉི་མ་རྡོ་རྗེ་ལ། རྡོ་རྗེ་དེའི་ལྟེ་བར་གནས་པ་ལ། ཉི་མ་དོན་ཡོད་གྲུབ་པའི་ངོ་བོ་ཧཱུཾ་ཡིག་གི་ཨཱུ་ཡིག་ལ། ཨཱུ་ཡིག་འོད་དཔག་མེད་ཀྱི་རང་བཞིན་གྱི་ཧ་ཡིག་ལ། ཧ་ཡིག་རིན་ཆེན་འབྱུང་ལྡན་དུ་གྲགས་པའི་མགོ་བོ་ལ། མགོ་བོ་རྣམ་པར་སྣང་མཛད་ཀྱི་རང་བཞིན་གྱི་ཟླ་ཕྱེད་ལ། ཟླ་བ་རྡོ་རྗེ་སེམས་དཔའི་རང་བཞིན་གྱི་ཐིག་ལེ་ལ། ཐིག་ལེ་ལྷག་མ་མི་བསྐྱོད་པའི་བདག་ཉིད་ཀྱི་ནཱ་ད་ལ་བཞུགས་པར་བྱའོ། །ཁ་ཅིག་གིས་ནི་མི་བསྐྱོད་པའི་རང་བཞིན་གྱི་ཐིག་ལེ། རྡོ་རྗེ་སེམས་དཔའི་རང་བཞིན་གྱི་ནཱ་དར་གསུངས་སོ། །བློ་གྲོས་ལྷག་པ་ཙམ་གྱིས་ནི། །ནཱ་ད་ཡང་སྐྲའི་རྩེ་མོ་བརྒྱ་སྟོང་གི་ཆ་ཤས་ཙམ་དུ་བསམས་ནས་དོར་བར་བྱ་སྟེ། དེ་ཉིད་དངོས་པོ་དང་དངོས་པོ་མེད་པ་ལ་སོགས་པ་མཆོག་གི་སྟོང་པ་ཉིད་སྤྲིན་མེད་པའི་ནམ་མཁའ་ལྟར་གསལ་ཞིང་འོད་གསལ་བའི་གོ་འཕང་ལ་ཇི་ལྟར་སྔོན་གྱི་

---

^{[མ་དཔེ་གཟིགས་ན་འདིར་གནོན།]}

སྨོན་ལམ་གྱི་ནུས་པ་གནས་པས་སྒྲུབ་པའི་དབང་ལས་དེ་བཞིན་ཁོ་ནར་བལྟ་བར་བྱའོ། །དེ་བཞིན་དུ་ཡང་དང་ཡང་དུ་ལྡང་པའི་བྱ་བ་ལ་ཞུགས་ནས། དེ་ནས་ཇི་ལྟར་དབུགས་ཀྱི་རླུང་མེ་ལོང་ལ་གནས་པ་ཀུན་ནས་སོང་བ་བཞིན་དུ་ཡང་དག་པའི་མཐའ་ལ་རྣལ་འབྱོར་པས་ཡང་དང་ཡང་དུ་འཇུག་པར་བྱའོ། །རིམ་པ་འདི་ནི་བདེན་པ་གཉིས་དབྱེར་མེད་པ་འབྲས་བུ་རྡོ་རྗེ་འཛིན་པའི་རང་བཞིན་ཟུང་དང་གཉིས་མ་ཡིན་པའི་རང་བཞིན་གྱི་རྣལ་འབྱོར་མངོན་སུམ་དུ་བྱེད་པའོ། །འདི་ནི་དེ་ཁོ་ན་ཉིད་ཤེས་རབ་དང་བཅས་པའི་བསྒོམ་པ་འོད་གསལ་ལ་རབ་ཏུ་འཇུག་པའི་ཐབས་སོ། །ཤེས་རབ་མེད་པའི་བསྒོམ་པ་ལ་ལྟོས་པས་ནི། ཤེས་རབ་རྣམ་པར་དག་པའི་ཁ་ཊྭཱཾ་ག་ཉིད་ངོ༌། །ཤེས་རབ་ཁ་ཊྭཱཾ་ག་ཟུགས་ཅན་མ། ཞེས་གསུངས་པའི་ཕྱིར་རོ། །དེའི་ཕྱིར་གཏུམ་མོའི་རྣལ་འབྱོར་ལ་སོགས་པས་ལྷན་ཅིག་སྐྱེས་པ་འཆར་བ་ནི་འོད་གསལ་ལ་རབ་ཏུ་འཇུག་པའོ། །དེ་ལ་རེ་ཞིག་འདིའི་གཏུམ་མོའི་རྣལ་འབྱོར་ནི། ལྷའི་རྣམ་པར་གསལ་བ་ལ། ལྟེ་བའི་འཁོར་ལོར་ཨཾ་ཡིག་ཉིད་དམ། སེམས་བརྟན་པའི་རྒྱུར། སྲོག་གི་རླུང་འབབ་པ་གཉིས་པོ་དག་ཡོངས་སུ་བསྡུས་ནས། ཨ་བ་དྷཱུ་ཏཱིར་བཅུག་སྟེ། ལྟེ་བའི་འོག་གི་རླུང་གིས་སྦར་བར་གྱུར་པའི་རབ་ཏུ་གཏུམ་པའི་མེ་དྲང་ཞིང་ཤིན་ཏུ་ཕྲ་བའི་རེ་ཁཱའི་གཟུགས་ཅན། མཆོག་གི་བདག་མེད་མའི་མིང་ཅན་བཅོམ་ལྡན་འདས་མ་གཏུམ་མོ་འབར་བས། སྙིང་གའི་འཁོར་ལོར་གནས་པའི་དེ་བཞིན་གཤེགས་པ་ལྔ་རྣམས་དང༌། སྤྱན་མ་ལ་སོགས་པའི་ལྷ་མོ་བཞི་བསྲེགས་ཏེ། ཇི་སྲིད་དུ་སྤྱི་བོའི་འཁོར་ལོར་གནས་པའི་ཡིད་འཇོམས་པ་མ་ཡིན་པ་ལ་རེག་པར་བྱའོ། །དེ་བཞིན་དུ་འབར་བ་དང༌། བཅོམ་ལྡན་འདས་རི་བོང་ཅན་འཛག་སྟེ་འོང་བ་དེའི་ཚེ་ཡང་གཏུམ་མོ་མྱུར་དུ་འབར་བར་བྱེད་པའོ། །དེ་རབ་ཏུ་འབར་བ་དང་རི་བོང་ཅན་ཤིན་ཏུ་མྱུར་བར་འཛག་སྟེ། ལྟེ་བའི་དཀྱིལ་འཁོར་ལ་དམིགས་བཞིན་པའི་གཏུམ་མོ་དང་ལྷན་ཅིག་གཅིག་ཏུ་གྱུར་ནས་ཡིད་ངེས་པར་འཛིན་པར་གྱུར་པའོ། །བྱང་ཆུབ་ཀྱི་སེམས་རབ་ཏུ་འཛག་པ་ཡང་སྤྲུལ་པའི་འཁོར་ལོ་ལ་སོགས་པ་རྣམས་སུ་ཉེ་བར་བསགས་པས་

---

^{[མ་དཔེ་གཟིགས་ན་འདིར་གནོན།]}

མཆོག་ཏུ་དགའ་བའི་རིམ་པས་སྤྱི་བོ་ནས་པདྨ་དང་རྡོ་རྗེ་ནོར་བུའི་མཐར་ཐུག་པ་ལ་རྣམ་པར་མ་ཆད་པར་སྟོང་པ་ཉིད་དང༌། སྙིང་རྗེ་དབྱེར་མེད་པ་རིམ་གྱིས་འཕེལ་བ་ཉེ་བར་སོན་པ་གཏུམ་མོའི་མེའི་འོད་ཀྱིས་ཡོངས་སུ་སྦྱངས་ཏེ། བདེ་བ་ཆེན་པོའི་འཁོར་ལོ་རྩ་སུམ་ཅུ་རྩ་གཉིས་ལ་ཁྱབ་པར་གྱུར་ཅིང་དེ་ནས་གཞན་རྩ་སྟོང་ཕྲག་བདུན་ཅུ་རྩ་གཉིས་ཇི་སྲིད་པར་ལུས་ཐམས་ཅད་ལ་མངོན་པར་ཁྱབ་པར་བྱེད་པ་ནང་གི་ཉི་མ་དང་ཟླ་བའི་ངོ་བོ་ཤེས་རབ་དང་ཐབས་མཉམ་པར་བགྲོད་པ་དགའ་བྲལ་གྱི་བདེ་བ་ཆེན་པོའི་མཐུས་ཕུང་པོ་དང་ཁམས་ལ་སོགས་པ་བདུད་དང་བཅས་པ་འདི་མཐའ་དག་མངོན་དུ་གྱུར་ཅིང་རབ་ཏུ་གྱུར་ཏོ་ཞེས་པ་གཏུམ་མོའི་རྣལ་འབྱོར་གྱིས་འོད་གསལ་ལ་རབ་ཏུ་བཞུགས་པའོ། །འདི་ཉིད་ནི་ཆོས་ཀྱི་ཕྱག་རྒྱའོ། །འདི་ཉིད་ནི་དཔྱིད་ཀྱི་ཐིག་ལེའི་སྦྱོར་བའོ། །དེ་ལྟར་ན་དཔྱིད་ནི་བཅོམ་ལྡན་འདས་ཏེ་ཟླ་བའོ། །དེའི་ཐིག་ལེ་ནི་བཅོམ་ལྡན་འདས་མ་གཏུམ་མོ་སྟེ་དེ་དག་གི་སྦྱོར་བ་ཞེས་པ་འདི་ཉིད་དང་སྦྱོར་བ་སྟེ། གཏུམ་མོ་རྟག་ཏུ་གོམས་པའི་རྣལ་འབྱོར་བས་བརྟན་པར་བསྲུངས་པས་མཆོག་གི་བདེ་བ་ཆེན་པོའི་རྒྱུར་གྱུར་ལྷན་ཅིག་སྐྱེས་པ་གཏུམ་མོ་གསལ་བར་བྱའོ། །དེ་ལྟར་ཡང་རྡོ་རྗེ་ལྟ་བུའི་ཏིང་ངེ་འཛིན་ལ་ཟུང་དང་གཉིས་མ་ཡིན་པར་གནས་པའི་རྣལ་འབྱོར་བས་ཕྱག་རྒྱ་ཆེན་པོའི་དངོས་གྲུབ་ལྷག་པར་རྟོགས་སོ། །རྣལ་འབྱོར་མ་ཞེས་པ་ནི་གསང་ཆེན་རྟོགས་པར་ཁ་ཅིག་སྒྲོག་པར་བྱེད་དོ། །དེའི་ལམ་ནི་ཡེ་ཤེས་ཀྱི་ཕྱག་རྒྱའམ། ཆོས་ཀྱི་ཕྱག་རྒྱ་ལ་ས་བཅུའི་རིམ་པས་གསལ་བར་བྱ་སྟེ། ཕྱིས་རྡོ་རྗེ་འཛིན་པར་བསྟན་ཏོ། །ཁ་ཅིག་ཏུ་གནས་ལ་སོགས་པར་རྡོ་རྗེ་ལ་སོགས་པའི་རིགས་ལས་བྱུང་བ་ཡེ་ཤེས་ཐོབ་པའི་ནུས་པ་ཅན་ལས་ཀྱི་ཕྱག་རྒྱ་ཟླ་བ་གཅིག་ལ་སོགས་པར་ལོངས་སྤྱད་ཅིང་སྦྱར་བ་ལས། བདེ་བ་ཆེན་པོ་དང་སྙིང་རྗེའི་རང་བཞིན་མཐའ་ཡས་པར་རྒྱ་ཤིང་འགོག་པ་མ་ཡིན་པའོ། །ཡན་ལག་བདུན་དང་ལྡན་པ་ལྷན་ཅིག་སྐྱེས་པའི་བདེ་བ་ཆེན་པོའི་སྟོང་པ་ཉིད་ཀྱི་ཏིང་ངེ་འཛིན་གྱི་མངོན་སུམ་དུ་བྱས་ནས་མཆོག་གི་གནས་ལ་འཇུག་པར་འགྱུར་བ་སྟེ། ཡོན་ཏན་གྱི་ཚོགས་ཀྱི་ལན་བུ་དང་རྒྱན་གྱི་དགའ་བར་བྱེད་བ་ཅན་མ་སྤྲུལ་

---

^{[མ་དཔེ་གཟིགས་ན་འདིར་གནོན།]}

པའི་ཚོགས་ཐུན་མཚམས་སུ་ཡང་དག་པར་འགྲོ་བའི་དོན་བྱེད་པའི་རྡོ་རྗེ་འཛིན་པ་ཆེན་པོའི་ལུས་ཅན་ཟླ་བ་གཅིག་གིས་སྟེར་བར་བྱེད་དོ། །ཡང་ན་ཟླ་བ་དྲུག་གམ་བདུན་དུ་རིག་མའི་བརྟུལ་ཞུགས་སྤྱད་ནས་བདག་ཉིད་ཀྱང་ལྷའི་ཚུལ་དུ་བྱས་ནས་ཕུལ་དུ་བྱུང་བའི་རྣལ་འབྱོར་རྣམ་པར་ཤེས་པ་གང་གི་ཚེ་རབ་ཏུ་འབར་བའི་སྣང་བས་ཉིན་མོ་དང་མཚན་མོ་རབ་ཏུ་འབྲེལ་པ་དང་འདྲ་བར་རྒྱུན་དུ་དེ་ཁོ་ན་ཉིད་ཀྱི་རྣལ་འབྱོར་ལ་མངོན་དུ་ཕྱོགས་པར་ནུས་པ་དེའི་ཚེ། ཕྱག་རྒྱ་དང་ལྷན་ཅིག་ཏུ་ཀྱེ་རྡོ་རྗེའི་རྣལ་འབྱོར་དང་ལྡན་པས་ལྷན་ཅིག་སྐྱེས་པ་སྤྱད་པའི་ཕྱིར། སྔ་དྲོ་དང་ཐུན་མཚམས་ལ་སོགས་པར་སྙོམས་འཇུག་གི་རྩོལ་བ་བརྩམ་པར་བྱའོ། །རྣལ་འབྱོར་གྱི་རིམ་པ་སྲིད་པ་གསུམ་པོ་ཐམས་ཅད་གཅིག་པའི་རང་བཞིན་ཀུན་དུ་མཚུངས་པ་དང་ཀུན་དུ་མཚུངས་པ་མ་ཡིན་པ་གཅིག་པའི་ངོ་བོར་ལྷག་པར་གྲོལ་བ། རྡོ་རྗེའི་ཕྱག་རྒྱས་རྒྱས་བཏབ་པ་རོ་མཉམ་པའི་བདེ་བ་ཆེན་པོའི་མཐུས་སྣང་བ་དང་སྣང་བ་རབ་ཏུ་མཆེད་པ་དང་འདྲ་བར་ཉིན་མཚན་རྟག་ཏུ་གནས་པའོ། །དེ་ནས་རབ་ཏུ་དགའ་བའི་མཐར་རྟོགས་པ་དགའ་བ་བཞི་པའི་དེ་ཁོ་ན་ཉིད་མངོན་སུམ་དུ་བྱེད་པ་སྐྱ་རེངས་ཤར་བའི་དུས་སུ་སྒྲུབ་པ་པོས་མཆོག་འགྲུབ་པར་འགྱུར་རོ། །འདུས་པ་ཕྱི་མར་ཡང༌། བསྒྲུབ་བྱ་སྒྲུབ་ཐབས་ཀུན་དུ་སྦྱོར། །གང་ཞིག་བསྟེན་ལས་གསལ་བར་འགྱུར། །རྡོ་རྗེ་པདྨ་མཉན་དུ་སྦྱོར། །ཉེ་བའི་སྒྲུབ་པར་བརྗོད་པར་བྱ། །ཧཱུཾ་ཕཊ་ཡི་གེ་ཡང་དག་ལྡན། །གཡོ་བའི་སྒྲུབ་པར་རབ་ཏུ་བརྗོད། །རང་གི་བདེ་བ་ཞི་རང་བཞིན། །སྒྲུབ་པ་ཆེན་པོར་བརྗོད་པར་བྱ། །ཞེས་ཐབས་ཀྱི་ཡན་ལག་བཞི་རྣམས་ཀྱིས་དཔལ་ལྡན་རྡོ་རྗེ་འཛིན་པ་ཆེན་པོ་དང༌། རྡོ་རྗེ་འཛིན་མ་ཆེན་མོའི་གོ་འཕང་གི་ཐབས་སངས་རྒྱས་ཐམས་ཅད་ཀྱི་ཆོས་དང༌། བསྟེན་པར་བྱ་བའི་ཆོས་སོ་ཞེས་པ་འདིས་འདི་ཉིད་མངོན་སུམ་དུ་བྱེད་པའི་རིམ་པར་འདོད་དོ། །དེ་ཉིད་གལ་ཏེ་ལས་ཀྱི་ཕྱག་རྒྱ་ལ་སྙོམས་པར་ཞུགས་ན་དེ་རྩེ་གཅིག་ཏུ་འགྱུར་བའི་ཕྱིར་སྔ་མ་དང་འདྲ་བར་གཏུམ་མོའི་མེ་ཤིན་ཏུ་འབར་བ་དེས་བཞུ་བའི་རི་བོང་ཅན་ལྷན་ཅིག་སྐྱེས་པའི་མཐུ་ལས་

---

^{[མ་དཔེ་གཟིགས་ན་འདིར་གནོན།]}

ཏེ། འདིའི་རྣལ་འབྱོར་ནི་ལས་ཀྱི་གཏུམ་མོའི་རྣལ་འབྱོར་དུ་བརྗོད་པར་བྱ་སྟེ་ཤེས་རབ་དང་བཅས་པའོ། །ཤེས་རབ་མ་མེད་པའི་ནི་ལྷའི་རྣམ་པར་བསྒོམ་པའམ་ནང་དུ་བསྒོམ་པ་ཐམས་ཅད་དུ་བརྗོད་པ་སྟེ། རྟག་ཏུ་གཏུམ་མོ་འབར་བ་ཉིད་ཀྱི་རྒྱུས་ལྷན་ཅིག་སྐྱེས་པ་ཤར་པ། དབང་བསྐུར་བའི་དུས་སུ་ཡང་ཕྱིའི་རིག་མ་དང་སྙོམས་པར་ཞུགས་པ་ལས་འབར་བ་ནི་འདིའི་གཏུམ་མོ་སྟེ་སྔ་མ་དང་འདྲ་བར་ལྷན་ཅིག་སྐྱེས་པ་ཤར་བ་ལས་ཀྱང་འཆར་བ་ནི་ལས་ཀྱི་གཏུམ་མོའི་རྣལ་འབོར་དུ་འདོད་དོ། །འོ་ན་ཀྱང་ལྷན་ཅིག་སྐྱེས་པ་སྟེ། དེའི་གདོང་མཛེས་པའི་རྗེས་སུ་བྱེད་པ་མ་ཡིན་ནོ་ཞེས་གསུངས་སོ། །དེའི་ཕྱིར་ལས་ཀྱི་གཏུམ་མོའི་རྣལ་འབྱོར་འདི་གདོང་ལ་མ་ཡིན་པ་ཁོ་ནའོ། །འོ་ན་ཀྱང་ཁ་ཅིག་ནི་སླར་ཡང་སྔོན་བཞིན་དུ་རླུང་ལས་རྣམ་པར་རྒྱལ་ཞིང་གོམས་པ་ལས་སྲོག་རྩོལ་བའི་བདག་པོ་ཐོབ་པ་མ་ཡིན་ཞིང་རླུང་གི་ལམ་ཚད་མེད་པའི་ལྟེ་བའི་དཀྱིལ་འཁོར་ལའམ། ཡང་ན་འཛིན་པ་ལས་གཏུམ་མོ་དེ་རབ་ཏུ་འབར་བ་ལས་བྱུང་བའི་བདེ་བ་ཆེན་པོ་འདི་ནི་ལས་ཀྱི་གཏུམ་མོའི་རྣལ་འབྱོར་དུ་གསུངས་སོ། །གལ་ཏེ་ཐིག་ལེའི་རྣལ་འབྱོར་གྱིས་སེམས་གནས་པར་བྱེད་ཅིང་གྲུབ་པ་ཐམས་ཅད་ཀྱི་སྣང་བ་མཆེད་པར་འདོད་ན། དེའི་ཚེ་ལྟེ་བ་ལ་སོགས་པའི་འཁོར་ལོའི་འདུད་པའི་ཁུང་བུ་རྣམས་ལ་ཨཾ་ཡིག་ལ་སོགས་པའི་ཡི་གེ་བཞི་བལྟས་ནས། གསང་བའི་འཁོར་ལོ་ལ་གནས་པའི་རླུང་གིས་མེ་ཡང་དག་པར་བསྐུལ་བས། གཏུམ་མོའི་རང་བཞིན་ཨཾ་ཡིག་འབར་བའི་འོད་ཟེར་གྱིས་ཧཱུཾ་ཡིག་ལ་སོགས་པའི་ཡི་གེ་གསུམ་ཀུན་ནས་ཞུ་བས། ཨོཾ་ཡིག་དང་ལྷན་ཅིག་དབྱེར་མེད་པ་ལྷན་ཅིག་སྐྱེས་པའི་དགའ་བའི་རང་བཞིན་གྱི་ཐིག་ལེའི་གཟུགས་སུ་བསྒོམ་ཞིང༌། བསྒོམ་པ་ཡོངས་སུ་རྫོགས་པ་ན་སྤྲོ་བར་བྱ་སྟེ། དེ་ལས་དེ་ཉིད་ཕྲ་མོ་འོད་ཟེར་གྱི་རེ་ཁཱ་དག་འབར་ཞིང་གཅིག་ཏུ་འབར་བ་བཞིན་དུ་གནས་པར་བལྟ་བར་བྱའོ། །དེའི་འོད་ཀྱིས་ཞུ་བའི་བདུད་རྩིས་གང་ཞིང་འཕྲོ་བའི་ཐིག་ལེར་གྱུར་ནས། དེའང་འོད་ཟེར་དཀར་པོའི་རེ་ཁཱ་ཅན་དུ་གྱུར་ཏེ། དེ་ནས་སེམས་ཐིག་ལེ་དེ་སོན་པ་དེ་སྲིད་དུ་བལྟ་

---

^{[མ་དཔེ་གཟིགས་ན་འདིར་གནོན།]}

བར་བྱ་སྟེ། སླར་ཡང་བརྟན་པ་ཐོབ་པའི་མཚན་མ་ཉེ་བར་དམིགས་པ་ནི་སྲིད་དུའོ། །དེའི་ཉེ་བར་དམིགས་པ་དང་བརྟན་པ་ནི་འོད་ཟེར་གྱི་རེ་ཁཱ་ལས་མར་མེ་སྣ་ཚོགས་པ་འཕྲོ་བའི་སྣང་བ་ཅན་དུ་རྣམ་པར་མཐོང་ཞིང་ཐམས་ཅད་ལག་མཐོལ་གྱི་སྐྱུ་རུ་ར་ལྟ་བུར་མཐོང་སྟེ། ཏིང་ངེ་འཛིན་ཐམས་ཅད་ཀྱི་སྣང་བ་མཆེད་པ་ཞེས་པ་ཐིག་ལེའི་རྣལ་འབྱོར་རོ། །ཡང་ན་སྙིང་གའི་སྔགས་ཀྱི་འོད་ཟེར་གྱི་ཚོགས་ལས་སྤྲོས་པའི་དེ་བཞིན་གཤེགས་པས་བཀུག་པར་བྱ་བའི་འཇིག་རྟེན་གསུམ་ནང་དུ་ཐིག་ལེའི་རྣམ་པའི་ཧཱུཾ་ཡིག་དེ་ལ་གཞག་པར་བྱ་སྟེ། ཡིད་ཇི་སྲིད་འདོད་པར་རོ། །དེའི་རྗེས་སུ་སྤྲོ་བའི་ལམ་གྱི་རིམ་པས་ལུས་དང་ངག་དང་སེམས་ཀྱི་རྡོ་རྗེའི་མཐར་ཐུག་པར་རོ། །དེའི་འོད་ཟེར་གྱི་སྣང་བ་དབུགས་འཇུག་པའི་ཚུལ་གྱིས་ཀུན་དུ་བསྡུས་ཏེ། ས་བོན་གྱི་ཐིག་ལེ་ལ་མྱུར་དུ་གཞུག་ཅིང་ཇི་ལྟར་བརྗོད་པའི་བཅོམ་ལྡན་འདས་དེའི་དཀྱིལ་འཁོར་རོ། །འཁོར་ལོ་བསྒོམ་པ་ལ་ནི་དཀྱིལ་འཁོར་གྱི་འཁོར་ལོ་གཞུག་པར་བྱའོ། །སླར་ཡང་སྤྲོ་བའི་ཚུལ་གྱིས་འོད་ཟེར་འཕྲོས་པས་འཇིག་རྟེན་སྣང་བར་བྱས་ཏེ། དེ་ཉིད་ལ་བསྲེས་ཤིང་འགྲོ་བའི་དོན་བྱེད་བཞིན་པའི་དེ་བཞིན་གཤེགས་པ་རྣམས་ཀྱང་དབུགས་འཇུག་པའི་ཚུལ་གྱིས་སྙིང་གར་བཅུག་ནས་ཇི་སྲིད་འདོད་པར་བསྒོམ་པར་བྱའོ་ཞེས་པ་འདི་ནི། མཆོག་གི་ཐིག་ལེའི་རྣལ་འབྱོར་རོ། །ཡང་ན་ཏིང་ངེ་འཛིན་སེམས་དཔའི་འོད་ཟེར་རྣམས་ཨ་བ་དྷཱུ་ཏཱིར་སོང་ནས་བདེ་བ་ཆེན་པོའི་ཁོར་ལོར་གནས་པའི་བྱང་ཆུབ་ཀྱི་སེམས་བཞུ་སྟེ་དེ་ཉིད་ལས་འོངས་པ་སྙིང་གའི་ཧཱུཾ་ཡིག་གི་ཐིག་ལེ་ལ། དེའི་བདག་ཉིད་ཀྱི་རྡུལ་ཕྲ་རབ་ཀྱི་གཟུགས་སུ་གནས་པར་བསམ་པར་བྱའོ་ཞེས་པ་གཞན་རྣམས་ཀྱི་ཐིག་ལེའི་རྣལ་འབྱོར་རོ། །དེའི་རྗེས་སུ་ཕྲ་མོའི་རྣལ་འབྱོར་བསྒོམ་པ་ནི་མཆོག་ཏུ་སེམས་གནས་པར་བྱེད་པའི་ཐབས་སོ་ཞེས་པ་སྟེ། དེ་བཞིན་ཁོ་ནར་ཨཾ་ཡིག་ལ་སོགས་པའི་ཡི་གེ་རྣམས་ཞུ་བ་རོ་གཅིག་ཏུ་གྱུར་པ་ལྷན་ཅིག་སྐྱེས་པའི་རང་བཞིན་གྱིས་བྱང་ཆུབ་ཀྱི་སེམས་ཀྱི་ཐིག་ལེ་ཡུངས་ཀར་གྱི་འབྲས་བུའི་ཚད་ཙམ་ལ་གསལ་བར་རྫོགས་པའི་བཅོམ་ལྡན་འདས་ཀྱི་སྐུ་དང་ལྡན་

---

^{[མ་དཔེ་གཟིགས་ན་འདིར་གནོན།]}

པའོ། །དཀྱིལ་འཁོར་གྱི་འཁོར་ལོ་བསྒོམ་པ་ལ་ལྟོས་པས་ནི། དཀྱིལ་འཁོར་གྱི་འཁོར་ལོ་རྡོ་རྗེ་ནོར་བུའི་རྩེ་མོ་ལའོ། །དེ་ལས་ཟགས་ཏེ་པདྨར་གནས་པའམ། ཡང་ན་སྣའི་རྩེ་མོ་ལ་གནས་པར་བསྒོམ་པར་བྱའོ། །ཇི་ལྟར་གསུངས་པའི་བརྟན་པར་གནས་པའི་མཚན་མ་མཐོང་ནས། བཅོམ་ལྡན་འདས་དེའི་དཀྱིལ་འཁོར་བསྒོམ་པའམ་དཀྱིལ་འཁོར་སྤྲོ་བར་བྱའོ་ཞེས་པ་ནི་ཕྲ་མོའི་རྣལ་འབྱོར་རོ། །དེ་ཉིད་ལྷའི་རྣམ་པར་བསྒོམས་ཏེ། བར་མ་ཆད་པར་བརྗོད་པའི་རྣལ་འབྱོར་རྣམས་ཀྱིས་སམ། གཞན་གྱི་རྣལ་འབྱོར་གྱིས་ཇི་ལྟར་ནུས་པར་འོད་གསལ་ལ་གཞུག་པ་དང༌། ལྡང་བ་དང༌། བསྒོམ་པ་དང༌། སྐྱོ་བར་གྱུར་པ་ན་སྔགས་བཟླ་བའི་ཆོ་ག་འདིས་སམ། གཞན་དུ་ཡང་སྔགས་ཀྱི་ཡི་གེ་བརྗོད་པར་བྱ་སྟེ། དེ་ལ་ཤེས་རབ་ཀྱི་ཞལ་ལས་འཐོན་པའི་འོད་ཟེར་དེ་རྣམས་རང་གི་ཞལ་དུ་ཞུགས་ཏེ། རྡོ་རྗེའི་ལམ་ནས་འཐོན་ནས་ལྷ་མོའི་པདྨར་ཞུགས། སླར་ཡང་ལྷ་མོའི་ཞལ་ནས་རང་གི་ཞལ་དུ་རབ་ཏུ་ཞུགས་ཏེ། སྔགས་ཀྱི་རྒྱུན་མ་ཆད་པ་ཉིད་དུ་གཞུག་པར་བྱའོ་ཞེས་པ་ཁྱོགས་ཀྱིས་བཟླས་པར་མཚོ་སྐྱེས་ཀྱི་སྒྲུབ་ཐབས་སུ་བརྗོད་དོ། །གཞན་དུ་ནི་ཆོས་ཐམས་ཅད་མཉམ་པ་ཉིད་ཀྱི་ང་རྒྱལ་གྱིས་སྔགས་ཀྱི་ཕྲེང་བ་རང་གི་ཞལ་ཉིད་དུ་ཞུགས་པ་རྡོ་རྗེའི་ལམ་ནས་པདྨར་སོར་ཨ་བ་དྷཱུ་ཏཱིའི་ལམ་ནས་བྱུང་སྟེ། བཅོམ་ལྡན་འདས་མའི་ཞལ་ནས་སྤྲོས་ནས། རང་གི་ཞལ་གྱི་སྒོར་རབ་ཏུ་ཞུགས་པ་དེ་བཞིན་ཁོ་ནར་འཁོར་བར་བསྒོམས་ཏེ་བཟླའོ་ཞེས་པ་ལྷོད་ཅིང་ཞི་བའི་ཡི་གེ་ཁྱོགས་ཀྱིས་བཟླས་པར་བརྗོད་དོ། །འདི་ཉིད་བཅོམ་ལྡན་འདས་མའི་ཞལ་དུ་ཞུགས་ཏེ། རང་གི་ཞལ་དུ་འོང་བ་ཙམ་གྱི་ཁྱད་པར་གྱིས་ཡི་གེ་མཁྲེགས་ཤིང་རྩུབ་པ་ནི་ཁྲོ་བོའི་བཟླས་པ་སྟེ། སྙིང་པོ་ལ་སོགས་པ་མཆོག་ཏུ་དྲག་པོར་བརྗོད་པའི་ཕྱིར་ཁྲོ་བོའི་བཟླས་པའོ། །ཡང་ན་སྙིང་གར་གནས་པའི་ཧཱུཾ་ཡིག་ལ་ཡོངས་སུ་བསྐོར་ཏེ། གནས་པའི་སྔགས་ཀྱི་ཡི་གེའི་ཕྲེང་བ་མར་མེའི་ཕྲེང་བ་ལྟ་བུ་བལྟས་ཏེ་མྱུར་བར་འཁོར་བར་དམིགས་ལ། དམ་པ་མ་ཡིན་པའི་རྟོགས་པ་སྤངས་ནས་བཟླ་བར་བྱའོ། །ཨོཾ་ཏྲཻ་ལོ་ཀྱ་ཨཱ་ཀྵེ་པ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། བཅོམ་ལྡན་འདས་ཀྱི་

---

^{[མ་དཔེ་གཟིགས་ན་འདིར་གནོན།]}

རྩ་བའི་སྔགས་སོ། །འདིའི་ཡང་ཧཱུཾ་ཡིག་གསུམ་ཐུང་བར་བརྟག་པ་གཉིས་པའི་རྒྱུད་དང་དེའི་འགྲེལ་བར་གསུངས་སོ། །དེ་ནས་འཆད་པར་འགྱུར་བའི་གཏོར་མ་ཕུལ་ནས་སྨོན་ལམ་ཡང་བྱས་ཏེ་ཇི་ལྟར་བདེ་བར་གནས་པར་བྱའོ། །ཐུན་མཚམས་སུ་གྱུར་པར་བཅོམ་ལྡན་འདས་ཀྱི་གཟུགས་ལས་ལངས་ཏེ། ཡེ་ཤེས་སེམས་དཔའ་གཞུག་པ་ལ་སོགས་པ་བྱའོ། །མཚན་ཕྱེད་ཀྱི་ཐུན་མཚམས་སུ་ཡང་ཐམས་ཅད་བྱས་ནས་གཉིད་འོད་གསལ་གྱི་རང་བཞིན་དུ་ལྷག་པར་མོས་པས་ཉལ་བར་བྱའོ། །ཐོ་རངས་ཀྱི་ཐུན་མཚམས་སུ་སྤྱན་མ་ལ་སོགས་པའི་ལྷ་མོ་བཞིས་རྡོ་རྗེའི་གླུས་རབ་ཏུ་སད་དེ། །བཞེངས་པ་ལ་སོགས་པའི་བྱ་བ་ཐམས་ཅད་བྱའོ། །དེ་ནས་གྲོང་ཁྱེར་བསྐྱོད་པའི་སྔགས་ནི། ཨོཾ་ཨ་ཀ་ཙ་ཊ་ཏ་པ་ཡ་ཤ་སྭཱ་ཧཱ། འདིར་འདིའི་མན་ངག་ནི། མྱུར་བར་ཤེས་རབ་དང་བཅས་པའི་ཀྱེའི་རྡོ་རྗེའི་གཟུགས་སུ་བདག་ཉིད་རྣམ་པར་བསྒོམས་ནས། དེའི་ཐུགས་ཀར་པདྨ་དམར་པོ་འདབ་མ་བརྒྱད་པ་རྣམ་པར་བསམས་ཏེ། དེའི་ཤར་ལ་སོགས་པའི་ཕྱོགས་ཀྱི་འདབ་མ་རྣམས་སུ་གཡས་སྐོར་དུ་ཇི་ལྟ་བའི་རིམ་པས་ཨ་ཀ་ཙ་ཊ་ཞེས་པའི་ཡི་གེ་དང༌། དབང་ལྡན་ལ་སོགས་པའི་ཕྱོགས་བྲལ་གྱི་འདབ་མ་རྣམས་སུ་ཏ་པ་ཡ་ཤ་ཞེས་སོ། །དབུས་ཀྱི་ཟེ་འབྲུ་ལ་ཤར་དུ་སྭཱ། དབུས་སུ་ཨོཾ། ནུབ་ཏུ་ཧཱ། ཐམས་ཅད་ཉི་མའི་དཀྱིལ་འཁོར་ལ་གནས་པ་ཁ་དོག་དམར་པོའོ། །འདི་རྣམས་ཀྱི་ཡང་འོད་ཟེར་ལྕགས་བྱུའི་རྣམ་པར་དག་པ་བ་སྤུའི་ཁུང་བུ་རྣམས་ལས་འཐོན་ཏེ། བསྒྲུབ་བྱ་བཀུག་ཅིང་སྒྲུབ་པ་པོའི་རྐང་པ་དག་གི་འོག་ཏུ་བྱས་ནས་འདི་རྣམས་ཉིད་དབང་དུ་བྱའོ་ཞེས་བསམས་ནས་སྔགས་བཟླས་པར་བྱའོ། །འབུམ་བཟླས་པ་ལས་གྲོང་ཁྱེར་བསྐྱོད་པར་འགྱུར་རོ། །དབང་དུ་བྱ་བའི་སྒྲུབ་པའི་དོན་དུ་ནི། བརྗོད་པའི་རིམ་པས་སྔོན་དུ་བསྙེན་པའི་དོན་དུ་འབུམ་བཟླས་པ་བྱས་ཏེ། དུང་ཁྲོད་དུ་ཚོགས་ཀྱི་འཁོར་ལོ་བྱས་ནས་ཚོགས་རྣམས་ཀྱང་མངོན་པར་འདོད་པའི་སྒྲུབ་པ་པོ་གསད་པར་འདོད་པས་དེའི་ཕྱིར་ཀ་གཟུང་བར་བྱའོ། །དེ་ནས་གནས་ཁ་ཅིག་ཏུ་ཕྱིན་ནས་

---

^{[མ་དཔེ་གཟིགས་ན་འདིར་གནོན།]}

ཤར་དུ་མགོ་གཞག་སྟེ། མཐོ་བའི་སྔས་ལ་ཉལ་ཞིང་ཐོད་པ་མཱ་མ་ཀཱིས་གང་བ་རྐང་པའི་མཐིལ་ལ་ཀུན་དུ་རེག་པར་བྱས་ནས་གཅིག་བཟླས་པར་བྱའོ། །ཕྱིས་ལྡང་བ་ན་དེ་ཐམས་ཅད་འཐུངས་ནས་ཐོགས་ཀྱི་འཁོར་ལོའི་གནས་མཐའ་དག་ཏུ་ཉེ་བར་ཐུགས་ནས་སླར་ཡང་ཁྲི་བཟླས་པར་བྱའོ། །ཀྱེ་རྡོ་རྗེ་ལ་སོམ་ཉི་མེད་པའི་རྣལ་འབྱོར་བས་ཐམས་ཅད་དུ་རྣམ་པར་སྦྱོང་བར་བྱའོ། །དེ་ནས་དུས་ཀྱི་འཁོར་ལོའི་རིམ་པས་ཨཱ་ལི་ཀཱ་ལིའི་བཟླས་པ་བརྗོད་པར་བྱའོ། །ཨ་ཀ་ཙ་ཊ་ཏ་པ་ཡ་ཤའི་སྒྲས་ཨཱ་ལི་ཀཱ་ལི་དོན་གྱིས་ཐོབ་པས་བརྗོད་པར་བྱའོ། །ཨོཾ་ཨ་ཨཱ། ཨི་ཨཱི། རྀ་རཱྀ། ཨུ་ཨཱུ། ལྀ་ལཱྀ། ཨ་ཨཱ། ཨེ་ཨཻ། ཨར་ཨཱར་ཨོ་ཨཽ་ཨལ་ཨཱལ་ཧ་ཧཱ་ཡ་ཡཱ་ར་རཱ་བ་བཱ་ལ་ལཱ། ཞེས་པ་སྤྲོ་བའི་རིམ་པས་དབུགས་འཇུག་པ་དང་ཨཱ་ལི་བཟླས་སོ། །ཀ་ཀཱ་ཁ་ཁཱ་ག་གཱ་གྷ་གྷཱ་ང་ངཱ་ཙ་ཙཱ་ཚ་ཚཱ་ཛ་ཛཱ་ཛྷ་ཛྷཱ་ཉ་ཉཱ་ཊ་ཊཱ་ཋ་ཋཱ་ཌ་ཌཱ་ཌྷ་ཌྷཱ་ཎ་ཎཱ་ཏ་ཏཱ་ཐ་ཐཱ་ད་དཱ་དྷ་དྷཱ་ན་ནཱ་པ་པཱ་ཕ་ཕཱ་བ་བཱ་བྷ་བྷཱ་མ་མཱ་ད་དཱ་དྷ་དྷཱ་ན་ནཱ་ས་སཱ་ཉྤ་ཉྤཱ་ཥ་ཥཱ་ཋྐ་ཋྐཱ་སྭཱ་ཧཱ། ཞེས་རླུང་འགྲོ་བས་ཀཱ་ལི་བཟླས་སོ། །ཨཱ་ལི་ཀཱ་ལི་འབུམ་བཟླས་པས་འཇིག་རྟེན་གསུམ་སྐྱེས་པར་བྱེད་པའི་སྔགས་པས་གཅིག་དང་སླར་ཡང་གཅིག་གི་ཚད་ཙམ་དུ་བྱ་སྟེ། དགུག་པ་དང༌། བསྲུང་པ་དང༌། རྒྱས་པ་སྟེར་རོ། །རིམ་པ་འདི་ཡང་དཔལ་རྡོ་རྗེ་སྙིང་པོའི་རབ་ཏུ་བྱེད་པར་མཐོང་ངོ༌། །དེ་ནས་དབང་དུ་བྱ་བའི་མན་ངག་ནི་མྱུར་བར་ཆུ་སྐྱེས་དམར་པོའི་ཕུང་པོ་མཛེས་པ་ལ་ཤེས་རབ་དང་བཅས་པའི་ཧེ་རུ་ཀའི་གཟུགས་སུ་བདག་ཉིད་བལྟས་ཏེ། སྙིང་ཀར་འདམ་སྐྱེས་དམར་པོ་བཅུ་དྲུག་ཕྱེད་ཅན་གྱི་ཟེ་འབྲུ་ལ། ཨཱ་ལི་དང་ཀཱ་ཀི་ཡང་དག་པར་བསྡུས་པའི་ངོ་བོ་སངས་རྒྱས་ཀྱི་ཡིན་ཏན་ལ་ཀུན་ནས་རྗེས་སུ་ཆགས་པའི་ཨཾ་ཡིག་དང་ཧཱུཾ་ཡིག་དག་ཡིད་ལ་མངོན་པར་གྲིས་པ་དག་ལས་ཤིན་ཏུ་དབང་ཞིང་ཡིད་དུ་འོང་བའི་འོད་ཟེར་གྱི་ཕུང་པོ་རྣམས་ངེས་པར་འཕྲོས་པས་འགྲོ་བ་སྣང་པར་བྱས་ཏེ། དེ་ཡིས་གཞན་གྱི་ལུས་དག་ཡིད་རྣམས་བཀུག་ནས་ཨཾ་ཡིག་དང་ཧཱུཾ་ཡིག་དེ་དག་ཉིད་ཀྱི་ཐིག་ལེ་ལ་གཞུག་པར་བྱའོ། །དེ་ནས་དེ་དག་ཡོངས་སུ་གྱུར་པ་དང་བུང་པ་ཡིད་གྲུབ་ཀུ་རུ་བིནདའི་གཟུགས་བརྙན་ཅན་མཆོག་གི་སྙིང་རྗེའི་སྦྲང་རྩི་འཐུང་བས་མྱོས་

---

^{[མ་དཔེ་གཟིགས་ན་འདིར་གནོན།]}

པའི་ཡིད་ཅན་ནོ། །དེས་བརྗོད་པའི་ཤིན་ཏུ་རིང་བའི་ཧཱུཾ་ཡིག་གི་སྒྲས་བདག་མེད་དང་ཧེ་རུ་ཀའི་གཟུགས་སུ་བསམ་པར་བྱ་ཞིང༌། དེ་དང་དེའི་སྙིང་གར་ལེ་བརྒན་རྩིའི་ཚོན་གྱིས་བཙོས་པ་དང་འདྲ་བའི་ཐིག་ལེ་ཡུངས་ཀར་གྱི་འབྲུ་ཙམ་ལ། ཨཾ་ཡིག་དང་ཧཱུཾ་ཡིག་ཕྲ་བ་ངེས་པར་བསྐྱེད་དོ། །དེ་ནས་ཡིད་སྲུབ་དེ་དབུགས་ཀྱི་རླུང་འབྱུང་བའི་ཤིང་རྟ་ལ་ཞོན་ཏེ། སྣའི་བུ་ག་ནས་འཐོན་ནས་སེམས་ཅན་རྣམས་ཀྱི་ལུས་ངག་ཡིད་རྣམས་སྦྱངས་ཤིང་བཟུང་ནས་སླར་ཡང་དབུགས་འཇུག་པ་ལ་ཞོན་ཏེ་ལམ་དེ་ཉིད་ནས་སྙིང་གའི་པདྨའི་ཟེ་འབྲུ་ལ་གཞུག་པར་བྱ་ཞིང༌། དེ་ནས་ཀུན་དུ་བཀུག་པའི་ལུས་ངག་ཡིད་རྣམས་རང་གི་ལུས་ངག་ཡིད་ལ་ཏིང་ངེ་འཛིན་གྱིས་བསྟིམ་པར་བྱའོ། །དེ་བཞིན་དུ་ཡང་དང་ཡང་དུ་བསྒོམ་པར་བྱ་སྟེ། ཇི་སྲིད་དུ་རྣམ་པ་གསལ་བར་གྱུར་གྱི་བར་དུ་བསྐྱེད་པར་བྱའོ། །ཕྱི་ནས་བསྒྲུབ་བྱའམ་བསྒྲུབ་བྱ་མོའི་སྙིང་གར་སོན་པའི་པདྨ་དམར་པོ་འདབ་མ་བརྒྱད་པ་བསྒོམ་པར་བྱ་ཞིང་བུང་བ་ཡིད་སྲུབ་དེ་དེ་ཉིད་ཀྱིས་བཀུག་སྟེ། སྣའི་བུ་གནས་དེའི་ལུས་ངག་ཡིད་ཀྱི་རང་བཞིན་གྱི་སྙིང་གའི་པདྨ་ལ་གཞུག་པར་བྱའོ། །དེ་ནས་ཡིད་སྲུབ་དེ་དེའི་ལུས་ཀྱི་རང་བཞིན་མེ་ཏོག་གི་རྡུལ་གྱིས་བདག་ཉིད་དམར་སེར་དུ་བྱས། ངག་གི་རང་བཞིན་གྱི་སྦྲང་རྩི་འཐུངས། ཡིད་ཀྱི་མེ་ཏོག་ཟོས་པར་བྱས་ཏེ། དེའི་རྗེས་སུ་ཡིད་སྲུབ་དེ་སྒྲུབ་པ་པོའི་དབུགས་ཀྱི་རླུང་གིས་བཀུག་སྟེ། བསྒྲུབ་བྱའི་སྣའི་བུ་ག་ནས་བཏོན་ལ། སྒྲུབ་པ་པོའི་སྣའི་བུ་ག་ནས་སྙིང་གའི་འདམ་སྐྱེས་ལ་བཅུག་སྟེ། གཤོག་པས་གང་བྱ་བ་དེའི་ལུས་ཀྱི་མེ་ཏོག་གི་རྡུལ་སྤྲུགས། ངག་གི་སྤྲང་རྩི་དང་སེམས་ཀྱི་མེ་ཏོག་སྐྱུག་པར་བསམ་མོ། །དེ་ལྟར་ཡང་ནས་ཡང་དུ་རྗེས་སུ་ཆགས་པ་དག་ལྷག་པར་བསྒོམ་པར་བྱ་སྟེ། བསྒོམས་པའི་མཐར་བསྒྲུབ་བྱའི་མེད་སྤེལ་བའི་སྔགས་བཟླ་བར་བྱའོ། །འདི་དག་གིས་ཀྱང་གང་དག་དགའ་བས་མྱོས་པར་བྱེད་པའི་རིག་པའི་ཆ་ཤས་ཏེ། བདག་ཉིད་ཀྱི་མི་དབང་དུ་བྱེད་པས་སྔ་བར་ཁྲུས་བྱས་ནས་བསྒོམ་པར་བྱ་སྟེ། གལ་ཏེ་མིའི་འདོད་པ་ལ་སྐྱོན་མཐོང་བ་དེའི་ཚེ་མི་མཐོང་བའི་སྐྱོན་དུ་འགྱུར་བས། དེའི་ཕྱིར་དང་པོ་ཁོ་ནར་དམ་པ་དང་དམ་པ་མ་ཡིན་

---

^{[མ་དཔེ་གཟིགས་ན་འདིར་གནོན།]}

པའི་ཡུལ་ལ་རྣམ་པར་དཔྱད་དེ་བསྒོམ་པར་བྱའོ་ཞེས་པ་བུང་བ་ཡིད་སྲུབ་ཀྱི་རིམ་པའོ། །ཞི་པ་ལ་སོགས་པའི་ལས་རྣམས་སུ་སྦྱིན་སྲེག་ལ་སོགས་པའི་ཆོ་ག་རྣམས་ནི་རྒྱུད་ལ་སོགས་པའི་རྗེས་སུ་འབྲངས་པས་ལེགས་པར་ཤེས་སོ་ཞེས་པས་མ་བྲིས་སོ། །དུར་ཁྲོད་ལ་དགྱེས་པ་ཕྱག་གཉིས་པ་ཀྱེ་རྡོ་རྗེའི་སྒྲུབ་ཐབས་ནི། སླར་ཡང་སྔར་བཞིན་ཐམས་ཅད་བྱས་ཏེ། སྙིང་གར་ཟླ་བ་ལ་ཧྲཱིཿ་ཡིག་སྔོན་པོ་ལས་རྡོ་རྗེ། དེའི་ལྟེ་བའི་ནང་དུ་སོན་པའི་ཟླ་བ་ལ་གནས་པའི་ཧྲཱིཿ་ཡིག་བསམས་ནས་དེ་ཐམས་ཅད་ཡོངས་སུ་གྱུར་པ་ལས་སྔར་བརྗོད་པའི་གཟུགས་ཅན་གྱི་བཅོམ་ལྡན་འདས་ཉིད་གཅིག་པུ་བསྒོམ་པར་བྱ་སྟེ། རོ་ལ་གནས་པའི་ཟླ་བ་ཕྱེད་པ་ལ་གར་གྱིས་གནས་པ། མིའི་པགས་པའི་གོས་ཅན་ཏེ། ལྷག་མ་ནི་སྔོན་བཞིན་ནོ། །བཟླས་བྱའི་སྔགས་ནི་ཤྲཱི་ཧེ་རུ་ཀ་བཛྲ་ས་མ་ཡ་ཧྲཱིཿ། སརྦ་དུ་ཥྚཱན་མུ་དྲཱ་པྲ་བྷཉྫ་ཀ་ཧཱུཾ་ཕཊ། འདི་ཡང་བཅོམ་ལྡན་འདས་ཀྱིས་ཁ་སྦྱོར་ཐིག་ལེའི་རྒྱུད་དུ་གསུངས་སོ། །དེ་ལྟར་སྒོམ་པ་པོ་ལ་ལྟོས་ནས་བསྡུས་ཤིང་གསལ་བ་རིག་མ་དང་བཅས་པ་ལས་ཅིག་ཤོས་སུ་གྱུར་པའི་བཅོམ་ལྡན་འདས་ཙམ་གྱི་སྒྲུབ་ཐབས་བརྗོད་ཟིན་ཏོ། །འདིའི་ཡང་རྒྱས་པ་གསལ་བ་ནི་རྡོ་རྗེ་གུར་གྱི་ནང་དུ་ཆོས་ཀྱི་འབྱུང་གནས་སྐུ་གསུང་ཐུགས་དག་པས་ཟུར་གསུམ་པ། སྒྲིབ་པ་ཐམས་ཅད་སྤངས་པ་ཉིད་ཀྱིས་སྟོན་ཀའི་ཟླ་བ་ལྟར་དཀར་བ། སྐུ་གསུམ་ས་གཅིག་པ་རྡོ་རྗེའི་རང་བཞིན་ཉིད་ཀྱིས་དང༌། ཆོས་ཀྱི་སྐྱེ་གནས་ཆེན་པོ་ཡིན་པའི་ཕྱིར་འོག་ཕྲ་ཞིང་སྟེང་ཡངས་པ་བསྒོམ་པར་བྱའོ། །དེའི་ནང་དུ་དུར་ཁྲོད་བརྒྱད་ཀྱི་དབུས་སུ་ཟླ་ཉི་ཁ་སྦྱོར་ལ་གནས་པའི་ཧྲཱིཿ་ཡིག་སྔོན་པོ་ལས་སྐྱེས་པའི་རྡོ་རྗེའི་ལྟེ་བའི་ནང་དུ་ཟླ་བ་ལ་གནས་པའི་ཧྲཱིཿ་ཡིག་སྔོན་པོ་བསམས་ནས་ཞེས་པ་ནི་རྒྱས་པའོ། །ཆོས་ཀྱི་འབྱུང་གནས་མཛེས་པའི་ནང་དུ་གནས་པའི་སྣ་ཚོགས་པདྨའི་སྟེང་དུ་སྣ་ཚོགས་རྡོ་རྗེའི་ཁ་ཁྱེར་གྱི་དབུས་སུ། ཡཾ་རཾ་བཾ་ལཾ་གི་ཡི་གེ་ལས་སྐྱེས་པ་སྔོན་པོ་དང་དམར་པོ་དང་དཀར་པོ་དང་སེར་པོའི་མདོག་ཅན། གཞུའི་དབྱིབས་ཀྱི་མཆོག་མ་གཉིས་ལ་བ་དོན་གྱིས་མཚན་པ་དང༌། ཟུར་གསུམ་པ་རེ་ཕས་མཚན་པ། ཟླུམ་པོ་བུམ་པས་མཚན་པ། གྲུ་བཞི་པ་

---

^{[མ་དཔེ་གཟིགས་ན་འདིར་གནོན།]}

རྡོ་རྗེ་རྩེ་གསུམ་པས་ཟུར་བཞི་ལ་མཚན་པའི་རླུང་དང་མེ་དང་ཆུ་དང་སའི་རང་བཞིན་གྱི་འབྱུང་བ་ཆེན་པོ་བཞི་ཡོངས་སུ་གྱུར་པ་ལས་ཤེས་རབ་དང་བཅས་པའི་རྣམ་པར་སྣང་མཛད་དག་ཅིང༌། སངས་རྒྱས་ཀྱི་ཞིང་ཡང་དག་པར་བསྡུས་པའི་དོ་བོ། རིན་པོ་ཆེ་སྣ་ཚོགས་པའི་རང་བཞིན་གྱི་ཁང་པ་བརྩེགས་མ། དེ་བཞིན་གཤེགས་པ་དང་སོ་སོའི་སྐྱེ་བོ་དག་གཉིས་སུ་མེད་པའི་རང་བཞིན་ཉིད་ཀྱི་གཞལ་ཡས་ཁང་པ་གྲུ་བཞི་པ། དེའི་ཤར་ལ་སོགས་པའི་སྒོ་བཞི་ནི་དྲན་པ་ཉེ་བར་གཞག་པ་དང༌། ཡང་དག་པར་སྤོང་བ་དང༌། རྫུ་འཕྲུལ་གྱི་རྐང་པ་དང༌། དབང་པོ་རྣམ་པར་དག་པའོ། །སྒོ་ཉིད་ནི་བྱང་ཆུབ་ཀྱི་ཐབས་ཉིད་དོ། །འཕགས་པའི་ལམ་ཡན་ལག་བརྒྱད་དག་པས་སྒོ་འགྲམ་བརྒྱད་དུ་ཀ་བ་སྟེ། སངས་རྒྱས་ཐམས་ཅད་ཀྱི་ཡོན་ཏན་གྱིས་ཉེ་བའི་ཀ་བའོ། །སོ་སོ་ཡང་དག་པར་རིག་པ་བཞི་དག་པས་གཞན་གྱི་དོན་གྱི་ཁུར་ཁྱེར་བ་སྔར་ཐོབ་ཟིན་པའི་ཕྱིར་ཀ་བའི་སྟེང་དུ་གདུང་བཞིའོ། །དཔའ་བར་འགྲོ་བ་དང༌། ནམ་མཁའ་མཛོད་དང༌། དྲི་མ་མེད་པའི་ཕྱག་རྒྱ་དང༌། སེང་གེ་རྣམ་པར་རོལ་པའི་ཏིང་ངེ་འཛིན་བཞི་དག་པས་བརྟན་ཞིང་མཛེས་པའི་སྟེགས་བུ་བཞི་རྣམས་སོ། །བཟོད་པ་དང་ཆོས་དང་དོན་དང་སྔགས་ཀྱི་གཟུངས་རྣམ་པར་དག་པས་ངོས་སོ་སོར་རམ། བདེན་པ་སོ་སོ་ལ་ཆོས་ཤེས་པའི་བཟོད་པ་དང༌། ཆོས་ཤེས་པ་དང༌། རྗེས་སུ་རྟོགས་པ་ཤེས་པའི་བཟོད་པ་དང༌། རྗེས་སུ་རྟོགས་པ་ཤེས་པའི་མཚན་ཉིད་ཀྱི་སྐད་ཅིག་གི་དབྱེ་བ་རྣམ་པར་དག་པས་རྩ་བའི་སྒོའི་ངོས་གཉིས་གཉིས་རྣམས་སུ་གཡས་སྐོར་གྱིས་ལྷ་མོ་གཉིས་གཉིས་རིམ་པས་གནས་ཏེ། པི་ཝང་མ་དང༌། གླིང་བུ་མ་དང༌། རྔ་ཟླུམ་མ་དང༌། རྫ་ཟླུམ་མ་དང༌། རྫ་རྔ་མ་དང༌། ཕྲེང་བ་མ་དང༌། སྒེག་མོ་དང༌། གླུ་མ་དང༌། གར་མ་དང༌། མེ་ཏོག་མ་དང༌། བདུག་སྤོས་མ་དང༌། མར་མེ་མ་དང༌། དྲི་ཆབ་མ་དང༌། མེ་ལོང་མ་དང༌། རོ་མ་དང༌། རེག་བྱ་མ་དང༌། ཆོས་མ་སྟེ། ལྷ་མོ་བཅུ་དྲུག་རྣམས་ནི། སེར་མོ་དང༌། དམར་མོ་དང༌། དཀར་པོ་དང༌། དུད་ཁ་དང༌། སེར་པོ་དང༌། དམར་པོ་དང༌། དམར་སྐྱ་དང༌། སྣ་ཚོགས་དང༌། དཀར་པོ་དང༌།

---

^{[མ་དཔེ་གཟིགས་ན་འདིར་གནོན།]}

ནག་པོ་དང༌། གསེར་མདོག་དང༌། སེར་པོ་དང༌། དཀར་པོ་དང༌། དམར་པོ་དང༌། ལྗང་གུ་དང༌། དཀར་པོའི་མདོག་ཅན་མ་རྣམས། རང་རང་གི་མིང་དང་རྗེས་སུ་མཐུན་པའི་ཚུལ་ཅན། རང་རང་གི་དང་པོའི་ཡི་གེ་ལས་འཁྲུངས་པའོ། །བརྩེ་བས་བརླན་ཞིང་ཡངས་པའི་བསོད་ནམས་དང་ཡེ་ཤེས་ཀྱི་ཚོགས་ཀྱི་བདུད་རྩིས་ཡོངས་སུ་གང་བ་རྣམ་པར་དག་པས་བདུད་རྩིས་གང་པའི་བུམ་པ་བརྒྱད་དོ། །བསམ་པའི་དབང་ལས་རྗེས་སུ་འཇུག་པའི་མདོ་སྡེ་དང༌། དབྱངས་ཀྱིས་བསྙད་པ་དང༌། ལུང་བསྟན་པ་དང༌། ཚིགས་སུ་བཅད་པ་དང༌། ཆེད་དུ་བརྗོད་པ་དང༌། གླེང་གཞི་དང༌། རྟོགས་པ་བརྗོད་པ་དང༌། དེ་ལྟ་བུ་བྱུང་བ་དང༌། སྐྱེས་པའི་རབས་དང༌། ཤིན་ཏུ་རྒྱས་པ་དང༌། རྨད་དུ་བྱུང་བ་དང༌། གཏན་ལ་ཕབ་པའི་སྡེར་གྲགས་པའི་ཡན་ལག་བཅུ་གཉིས་ཀྱི་དམ་པའི་ཆོས་ཀྱི་སྒྲ་ཐམས་ཅད་དུ་འགྲོ་བ་རྣམ་པར་དག་པས་རླུང་གིས་བསྐྱོད་པའི་བ་དན་ལ་དྲིལ་བུའི་སྒྲ་དང་ལྡན་པ། ཇི་ལྟ་བར་སྦྱོར་ཞིང་འགྲོ་བའི་འཁོར་བར་ཀུན་ནས་གདུང་བ་ཞི་བ་དག་པས་སམ། རྣམ་པར་རྟོག་པ་མཐའ་དག་སྤངས་པས་གདུགས་དང༌། ཇི་ལྟར་བསོད་ནམས་རྣམ་པར་བཀྲ་བའི་རིན་པོ་ཆེ་ལ་སོགས་པ་རྣམས་ཀྱིས་གཞན་གྱི་དོན་ཕུན་སུམ་ཚོགས་པ་སྒྲུབ་པ་དག་པས་བུམ་པ་བཟང་པོ་དང་དཔག་བསམ་གྱི་ཤིང་རྣམས་སོ། །རྩ་བའི་ཉོན་མོངས་པའི་ཕྱིར་འཇིག་རྟེན་ལས་འདས་པའི་བསྒོམ་པའི་ལམ་རྣམ་པར་དག་པས་དོ་ཤལ། ཉོན་མོངས་པ་རྣམ་པར་སེལ་བའི་ཕྱིར་འཇིག་རྟེན་པའི་བསྒོམ་པའི་ལམ་རྣམ་པར་དག་པས་དོ་ཤལ་ཕྱེད་པ། བྱང་ཆུབ་ཀྱི་སེམས་རྣམ་པར་དག་པས་ཟླ་བ། ཤེས་རབ་ཡེ་ཤེས་རྣམ་པར་དག་པས་ཉི་མ། དེ་བཞིན་གཤེགས་པའི་ལམ་གྱི་ཡེ་ཤེས་རྣམ་པར་དག་པས་རྔ་ཡབ། བྱང་ཆུབ་ཀྱི་ཡན་ལག་གི་མེ་ཏོག་ཕུན་སུམ་ཚོགས་པ་རྣམ་པར་དག་པས་མེ་ཏོག་གི་ཕྲེང་བ། མེ་ལོང་གི་ཡེ་ཤེས་རྣམ་པར་དག་པས་མེ་ལོང་སྟེ། དེ་ལྟར་ཡང་ཐམས་ཅད་གསང་ཆེན་གྱི་རྒྱུད་དུ་གསུངས་པ། ཉོན་མོངས་ཐམས་ཅད་ངེས་འཇོམས་པའི། །དོ་ཤལ་དུ་ནི་ཡང་དག་བཤད། །ཉོན་མོངས་རྣམ་འཕྲོག་དོ་ཤལ་ཏེ། །ཀུན་དུ་གཅོད་ཅིང་རབ་འཇོམས་

---

^{[མ་དཔེ་གཟིགས་ན་འདིར་གནོན།]}

པའོ། །རབ་ཏུ་འཇོམས་ཤིང་རྣམ་སེལ་བ། །ཚོགས་གཉིས་ཀྱི་ནི་སྦྱོར་བའོ། །ཉོན་མོངས་རྣམས་ཀྱི་ཕྱེད་འཕྲོག་པའི། །དོ་ཤལ་ཕྱེད་པ་ཞེས་བརྗོད་དོ། །རང་བཞིན་འོད་གསལ་རྣམ་དག་པ། །བྱང་ཆུབ་སེམས་ནི་བླ་ན་མེད། །སེམས་ཅན་ཀུན་དོན་བྱེད་གྱུར་པའི། །ཟླ་བའི་དཀྱིལ་འཁོར་ཞེས་བརྗོད་དོ། །ཤེས་རབ་ཡེ་ཤེས་རང་བཞིན་དག །རྡོ་རྗེ་ལྟ་བུའི་ཏིང་འཛིན་སྐྱེས། །ཐར་པའི་འཇིག་རྟེན་གཟི་བརྗིད་ཆེ། །ཉི་མའི་དཀྱིལ་འཁོར་བརྗོད་པར་བྱ། །ཀུན་རྟོག་གཉིས་ལས་ངེས་གྲོལ་བའི། །ཏིང་འཛིན་ཡེ་ཤེས་རྟོག་པའོ། །ལམ་གྱི་ཡེ་ཤེས་ཁྱད་པར་ནི། །རྔ་ཡབ་ཏུ་ནི་ཡང་དག་བཤད། །དེ་བཞིན་བྱང་ཆུབ་ཡན་ལག་བདུན། །ཕྲེང་བ་མེ་ཏོག་ཆུན་འཕྱང་ལྡན། །ཞེས་སོ། །བློ་གྲོས་ཕྲ་བ་དང་རགས་པ་དང་བར་མ་རྣམས་དང་ངེས་པ་དང་བྲལ་བ་རྣམས་ལ་ཇི་ལྟར་འོས་པའི་ཆོས་སྟོན་པ་བསྲུང་བ་མེད་པ་དག་པས་བསྲུང་བ་མེད་པའི་བ་ཀུ་ལིའི་ཕྲེང་བ་དམར་པོ། འཇིག་རྟེན་ལས་འདས་པའི་མཆོག་ཏུ་དཀར་བའི་ཆོས་སྟོན་པ་དག་པས་ཀྲ་མ་ཤཱིཪྵ། བསམ་གཏན་བཞི་དག་པས་རྟ་བབས་བཞིའོ། །ཆོས་སྟོན་པའི་མི་མཐུན་ཕྱོགས་གཅོད་པ་དག་པས་ཆོས་ཀྱི་འཁོར་ལོ་སྟེ། དེའི་རྩིབས་ནི། ཕྱོགས་གཅིག་ལ། དུཿ་ཁ་དང༌། ཀུན་འབྱུང་དང༌། འགོག་པ་དང༌། ལམ་དང༌། ཀུན་རྫོབ་དང༌། དོན་དམ་པ་དང༌། འཇིག་རྟེན་པ་དང༌། འཇིག་རྟེན་ལས་འདས་པ་དག་པ་བརྒྱད་དོ། །ལུགས་གཞན་ལ་བཅུ་གཉིས་ཏེ། དུཿ་ཁ་ཤེས་པར་བྱའོ། །ཤེས་སོ། །སླར་ཤེས་པར་བྱར་མེད་དོ། །ཀུན་འབྱུང་སྤང་བར་བྱའོ། །སྤངས་སོ། །སླར་སྤང་བར་བྱར་མེད་དོ། །འགོག་པ་མངོན་དུ་བྱའོ། །བྱས་སོ། །སླར་བྱར་མེད་དོ། །ལམ་བསྒོམ་པར་བྱའོ། །བསྒོམས་སོ། །སླར་བསྒོམ་པར་བྱར་མེད་དོ་ཞེས་རྣམ་པ་བཅུ་གཉིས་ཀྱི་ཆོས་ཀྱི་འཁོར་ལོ་བསྐོར་བ་ཡོངས་སུ་དག་པ་དང༌། རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་དག་པའོ། །བཅོམ་ལྡན་འདས་ཀྱིས་གསུངས་པའི་ཆོས་ཚད་མ་ཡོངས་སུ་དག་པ་བསྟེན་པའི་དྲིན་ལས། མུ་སྟེགས་ངན་པའི་རི་

---

^{[མ་དཔེ་གཟིགས་ན་འདིར་གནོན།]}

དགས་དང་རི་དགས་མོ་ཆོས་དང་དད་པའི་རྗེས་སུ་འབྲངས་ཏེ་ལམ་ལ་སྦྱོར་བ་དག་ཅིང༌། ཆོས་ཀྱི་འཁོར་ལོ་ཞེས་པ་ལ་མངོན་པར་སྦྱོར་བ་དག་པས་མགྲིན་པ་བསྙེངས་པ་དང་ལྡན་པའི་རི་དགས་དང་རི་དགས་མོའོ། །ཁྲེལ་ཡོད་པ་དག་པས་ནི་བླ་རེ་དང་གོས་དང་ཕྲེང་བ་ལ་སོགས་པའོ། །ཐམས་ཅད་ནས་སོ་སོར་འཆིང་བ་མེད་པས་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱི་རྡོ་རྗེའི་ཚུལ་གྱི་ཆོས་ཀྱི་འཁོར་ལོ་རབ་ཏུ་བསྐོར་བ་དག་པས་རྡོ་རྗེའི་ཕྲེང་བ། ཡང་དག་པའི་ཡེ་ཤེས་ཀྱི་གཟིགས་པ་དག་པས་འོད་ཟེར་འབར་བ། རྣམ་པར་སྣང་མཛད་ལ་སོགས་པ་དག་པས་སའི་ཁ་དོག་ལ་སོགས་པ་སྟེ། གཞན་ནི་གྲགས་ཟིན་པའི་ཕྱིར་མ་བྲིས་སོ། །འདི་ལྟར་ཁང་པ་བརྩེགས་པ་བསྒོམ་པར་བྱས་ནས། དེའི་དབུས་སུ་སྣ་ཚོགས་པདྨ་ལ་སོགས་པའི་རིམ་པས་སྔར་བཞིན་བདག་ཉིད་བཅོམ་ལྡན་འདས་སུ་བསྒོམ་པར་བྱ་སྟེ། སྐུ་གསུང་ཐུགས་ཀྱི་རང་བཞིན་གྱི་ཨོཾ་ཨཱཿ་ཧཱུཾ་ཞེས་པའི་ཡི་གེ་གསུམ་ཧོ་ཡིག་དམར་པོ་གཉིས་ཀྱི་ཁོངས་སུ་ཆུད་པ་བར་དོའི་སེམས་ཅན་དུ་གྲགས་པ་ཀུན་དུ་དགའ་བ་བཅས་པས་བཅོམ་ལྡན་འདས་ཀྱི་ཞལ་ནས་ཞུགས་རྡོ་རྗེའི་ལམ་ནས་ལྷ་མོའི་པདྨར་ཞུགས་པ་ལྟོ་བར་ཞུ་བར་གྱུར་ཅིང༌། བཅོམ་ལྡན་འདས་ཀྱང་མཐར་ཤིན་ཏུ་ཆགས་པ་ཆེན་པོས་རང་གི་རིག་མ་དང་བཅས་པ་ཞུ་བར་གྱུར་ཏེ། དངུལ་ཆུ་དང་མཚུངས་པའི་བྱང་ཆུབ་ཀྱི་སེམས་ཀྱི་གཟུགས་ཀྱིས་བདེ་བ་ཆེན་པོའི་རང་བཞིན་དུ་གནས་སོ། །དེ་ནས་བར་མ་ཆད་པར་བྱམས་པ་ཆེན་པོ་ལ་སོགས་པའི་རང་བཞིན་པུཀྐ་སཱི་ལ་སོགས་པའི་རྣལ་འབྱོར་མ་རྣམས་ཀྱིས་བདག་ཅག་རྣམས་མགོན་མེད་དོ་ཞེས་ཡིད་ལ་ཤིན་ཏུ་གཅགས་པས། རྗེ་བཙུན་སྙིང་རྗེའི་ཡིད་བཞེངས་ཤིག །པུཀྐ་སཱི་ནི་བདག་ལ་སྐྱོབས། །སྟོང་པའི་རང་བཞིན་ཉིད་སྤོངས་ལ། །བདག་ལ་བདེ་ཆེན་སྦྱོར་བཞེད་མཛོད། །ཁྱོད་མེད་ན་ནི་བདག་འགུམ་པས། །ཀྱེ་ཡི་རྡོ་རྗེ་ཁྱོད་བཞེངས་ཤིག །སྟོང་པའི་རང་བཞིན་ཉིད་སྤོངས་ལ། །རི་ཁྲོད་མ་འབྲས་གྲུབ་པར་མཛོད། །དགའ་གཙོ་འཇིག་རྟེན་མགྲོན་གཉེར་བ། །སྟོང་པ་ཉིད་ལ་ཞུགས་སམ་ཅི། །ཁྱོད་མེད་ཕྱོགས་ནི་མ་འཚལ་བ། །གདོལ་པ་

---

^{[མ་དཔེ་གཟིགས་ན་འདིར་གནོན།]}

མོ་དག་ཞུ་བ་བགྱིད། །བདག་གིས་ཁྱོད་ཀྱི་ཐུགས་འཚལ་གྱིས། །གཡུང་མོ་བདག་ཡིད་དྲན་ཉམས་པས། །སྙིང་རྗེ་རྒྱུན་ཆད་མ་མཛད་པར། །མི་འཕྲུལ་མངའ་བ་ཁྱོད་བཞེངས་ཤིག །ཅེས་རྡོ་རྗེའི་གླུ་ཅན་རྣམས་ཀྱིས་ཡང་དག་པར་བསྐུལ་བ་དང༌། སྔོན་གྱི་སྨོན་ལམ་གྱིས་བསྐུལ་བས་རྡོ་རྗེའི་གླུའི་སྒྲ་ཙམ་གྱིས་སད་པའམ། རྨི་ལམ་སད་པ་ལྟ་བུར་བཞེངས་ཏེ། དེ་ནས་ཤར་ལ་སོགས་པའི་ཕྱོགས་ཀྱི་འདབ་མ་རྣམས་སུ་ཇི་ལྟ་བའི་རིམ་པས། ཚངས་པ་དང༌། དབང་པོ་དང༌། ཉེད་བར་དང༌། དྲག་པོ་རྣམས་དང༌། དབང་ལྡན་ལ་སོགས་པའི་ཕྱོགས་བྲལ་གྱི་འདབ་མ་རྣམས་སུ་གཤིན་རྗེ་དང༌། ལུས་ངན་དང༌། སྲིན་པོ་དང༌། ཐགས་བཟངས་རིས་རྣམས་ཀྱི་སྙིང་གར་ཟླ་བ་ལ་གནས་པའི་ཟླ་བ་དང༌། ཉི་མ་ཁ་སྦྱར་བའི་དབུས་སུ་ཆོ་ག་བཞིན། །བཅོམ་ལྡན་འདས་ལས་ཉེ་བར་སྤྲོས་པའི་བྱང་ཆུབ་ཀྱི་སེམས་ཀྱི་ཐིག་ལེ་བརྒྱད་ལས་སྐྱེས་པའི་གཾ་ཙཾ་བཾ་གྷཾ་པཾ་ཤཾ་ལཾ་ཌཾ་གི་ཡི་གེ་ལ་ས་སྐྱེས་པའི་གྲི་གུག་དང༌། ཅང་ཏེའུ་དང༌། རུས་སྦལ་དང༌། སྤྲུལ་དང༌། སེང་གེ་དང༌། དགེ་སློང་དང༌། འཁོར་ལོ་དང༌། རྡོ་རྗེ་རྣམས་ལ། ཟླ་བ་ལ་རྟག་ཏུ་གནས་པའི་གཞན་ཉིད་མ་ཡིན་པའི་ཡི་གེ་བལྟས་ནས། ལྔའི་འབྱུང་གནས་ཀྱི་མངོན་པར་བྱང་ཆུབ་པའི་རིམ་པས། དེ་ཐམས་ཅད་ཡོངས་སུ་གྱུར་པ་ལས། གཽ་རཱི་ལ་སོགས་པའི་རྣལ་འབྱོར་མ་བརྒྱད་ཇི་ལྟར་གསུངས་པའི་ཁ་དོག་ཅན། གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་ཀྱི་ཕུང་པོ་དང༌། ས་དང༌། ཆུ་དང༌། མེ་དང༌། རླུང་གི་ཁམས་ཀྱི་རང་བཞིན་ཅན་ཞལ་གཅིག་པ། དམར་ལ་ཟླུམ་པའི་སྤྱན་གསུམ་དང་ལྡན་པ། ཕྱག་གཉིས་པ། གཡས་ཀྱི་ཕྱག་གིས་གྲི་གུག་དང༌། ཅང་ཏེའུ་དང༌། རུས་སྦལ་དང༌། སྤྲུལ་དང༌། སེང་གེ་དང༌། དགེ་སློང་དང༌། འཁོར་ལོ་དང༌། རྡོ་རྗེ་རྣམས་ཏེ། དངོས་པོ་ལ་སོགས་པའི་རྣམ་པར་རྟོག་པ་གཅོད་པ་དང༌། གསུང་རབ་དང༌། ཕྲག་དོག་དང༌། ཞེ་སྡང་དང༌། ང་རྒྱལ་དང༌། བྱང་ཆུབ་ཀྱི་སེམས་དང༌། མི་ཤེས་པ་གཅོད་པ་དང༌། ཡེ་ཤེས་རྣམས་པར་དགེ་བའི་རྣམ་འཕྲུལ་ལོ། །གཡོན་ན་རོ་ཧི་ཏ་དང༌། ཕག་དང༌།

---

^{[མ་དཔེ་གཟིགས་ན་འདིར་གནོན།]}

ཐོད་པ་དང་རྣལ་འབྱོར་ལྷུང་བཟེད་དང༌། དགྲ་སྟ་དང༌། འཁར་གསིལ་དང༌། ཐོང་གཤོལ་དང༌། སྡིགས་མཛུབ་ཅན་ཏེ། སར་སྣ་དང༌། གཏི་མུག་དང༌། སྟོང་པ་ཉིད་དང༌། ཆགས་པའི་ཚོགས་ལ་སོགས་པ་གཅོད་པ་དང༌། འདི་རྣམས་ཀྱི་དྲན་པ་གསོ་བ་དང༌། བགེགས་དྲུངས་འབྱིན་པ་དང༌། ཆོས་གཅིག་པའི་ངོ་བོ་ཉིད་རྣམ་པར་དག་པའི་རྣམ་པར་འཕྲུལ་པའོ། །ཚངས་པ་ལ་སོགས་པའི་སྙིང་གར་ཟླ་བ་རྣམས་ལ་སྐྱིལ་ཀྲུང་ཕྱེད་པའི་གར་གྱིས་གནས་པ། ཕྱག་རྒྱ་ལྔ་འཛིན་མ། མགོ་བོ་རློན་པའི་ཕྲེང་བ་དང་ལྡན་པ། རྣམ་པར་འགྱུར་བའི་ཞལ་ཅན། དབུ་སྐྲ་དམར་སེར་གྱེན་དུ་བརྫེས་པ། ཕྱོགས་ཀྱི་གོས་ཅན་དུ་བསྒོམ་པར་བྱའོ། །ཐམས་ཅད་རྣམས་ཀྱི་སྙིང་གར་ཟླ་བ་ལ་གནས་པའི་རང་རང་གི་ཕྱག་མཚན་རྣམས་སུ་ཟླ་བ་ལ་གནས་པའི་རང་རང་གི་ས་བོན་བསམས་ཤིང༌། རྐྱེན་གྱིས་སྤྲོ་བསྡུས་སྔོན་དུ་འགྲོ་བའི་དོན་བྱས་ཏེ། དེའི་རྗེས་སུ་སྙིང་གའི་ས་བོན་གྱི་འོད་ཟེར་རྣམས་ཀྱིས་བཀུག་པའི་ཡེ་ཤེས་ཀྱི་འཁོར་ལོ་སྤྲོས་པའི་གཽ་རཱིས། ཨོཾ་གཽ་རཱི་ཨཱ་ཀཪྵ་ཡ་ཛཿ་ཞེས་པས་དགུག །ཨོཾ་ཙོ་རཱི་པྲ་བེ་ཤ་ཡ་ཧཱུཾ་ཞེས་པ་ཅཽ་རཱིས་བཅུག །ཨོཾ་བེཏཱ་ལཱི་བནྡྷ་ཡ་བཾ་ཞེས་བེ་ཏཱ་ལཱིས་བཅིངས། ཨོཾ་གྷསྨ་རཱི་ཏོ་ཥ་ཡ་ཧོཿ་།ཞེས་དབང་དུ་བྱས་ཏ་དེ་ནས་དབང་བསྐུར་བའི་མཐར། ཕྱོགས་ཀྱི་འདབ་མ་རྣམས་ལ་གནས་པའི་གོ་བོ་རཱི་ལ་སོགས་པ་རྣམས་ལ། མི་བསྐྱོད་པ་དང༌། རྣམ་པར་སྣང་མཛད་དང༌། རིན་ཆེན་འབྱུང་ལྡན་དང༌། འོད་དཔག་མེད་རྣམས་ཀྱིས་སོ། །པུཀྐ་སཱི་ལ་སོགས་པ་རྣམས་ཀྱི་འང་གོ་བོ་རཱི་ལ་སོགས་པ་དེ་རྣམས་ཉིད་ཀྱི་རྗེས་སུ་རིམ་པས་མི་བསྐྱོད་པ་ལ་སོགས་པའི་ཕྱག་རྒྱར་རྣམ་པར་དག་པ་ནི་བརྟག་པ་གཉིས་པ་བཞིན་ནོ། །དེ་ནས་གོ་ཆ་ལ་སོགས་པ་ཐམས་ཅད་སྔོན་བཞིན་ཉིད་དོ། །བདུད་རྩི་མྱང་བ་ནི། ཆོ་ག་ཇི་ལྟ་བ་བཞིན་བཅོམ་ལྡན་འདས་ཉིད་ལ་རང་གི་ཤེས་རབ་མས་དབུལ་ཏེ། འཁོར་གྱི་གཽ་རཱི་ལ་སོགས་པས་ནི་ལྕེ་རྡོ་རྗེའི་སྦྱོར་བས་མྱོང་བར་བྱའོ། །སླར་ཡང་འདིར་ཁང་པ་བརྩེགས་པ་ནི་བརྟག་པས་སོ། །དབང་བསྐུར་བ་དེ་བཞིན་གཤེགས་པ་མི་བསྐྱོད་པ། བདུད་རྩི་མྱང་བ་འོད་དཔག་མེད་ཀྱི། བསྟོད་པ་རིན་ཆེན་འབྱུང་ལྡན།

---

^{[མ་དཔེ་གཟིགས་ན་འདིར་གནོན།]}

མཆོད་པ་དོན་ཡོད་གྲུབ་པར་ཡང་དག་པར་བཤད་ཅིང༌། རྗེས་སུ་ཆགས་པ་རྡོ་རྗེ་སེམས་དཔར་རྟག་ཏུ་བསམས་ཏེ། འདི་ནི་དངོས་གྲུབ་ཀྱི་ཡན་ལག་དྲུག་ཏུ་ཉེ་བར་བརྗོད་པར་བྱའོ། །འདི་རྣམས་ཀྱང་འཆད་པར་འགྱུར་བའི་དཀྱིལ་འཁོར་གསུམ་ལ་ཡང་བལྟ་བར་བྱའོ། །འོད་གསལ་དུ་གཞུག་པ་ནི། འཇིག་རྟེན་གསུམ་དུས་གཅིག་ཏུ་དུར་ཁྲོད་ལ་དུར་ཁྲོད། ཁང་པ་བརྩེགས་པ་ལ་ཁང་པ་བརྩེགས་པ། གཽ་རཱི་ལ་སོགས་པ་རྣམས་ལ། གཽ་རཱི་ལ་སོགས་པ་རང་རང་གི་ཕྱོགས་ཀྱི་བཅོམ་ལྡན་འདས་ཀྱི་བསྡུའི་ཁུང་བུ་རྣམས་སུ་སྟེ། ལྷག་མ་ནི་སྔར་བཞིན་ནོ། །དེ་ནས་བདག་མེད་མ་ལ་སོགས་པ་རྣམས་ཀྱི་སྔགས་སུ་འགྱུར་བ་ནི། ཨོཾ་ཨཾ་སྭཱ་ཧཱ། བདག་མེད་མའི་སྙིང་པོའི་སྔགས་སོ། །ཨོཾ་ལཱིཾ་སྭཱ་ཧཱ། གཽ་རཱིའིའོ། །ཨོཾ་ཨེཾ་སྭཱ་ཧཱ། ཆོམ་རྐུན་མའིའོ། །ཨོཾ་ཨཻཾ་སྭཱ་ཧཱ། རོ་ལངས་མའིའོ། །ཨོཾ་ཨོཾ་སྭཱ་ཧཱ། གྷསྨ་རཱིའི་སྟེ་ལས་ཐམས་ཅད་པའི་སྔགས་སོ། །ཨོཾ་ཨཱུཾ་སྭཱ་ཧཱ། པུཀྐ་སཱིའིའོ། །ཨོཾ་རཾ་སྭཱ་ཧཱ། ཤ་བ་རཱིའིའོ། །ཨོཾ་ལཾ་སྭཱཧཱ། གཡུང་མོའིའོ། །འདིར་གང་གི་ཆོ་དམ་ཚིག་གི་བཟླས་པ་བྱེད་པར་འདོད་པ་དེའི་ཚེ། སྙིང་གའི་ས་བོན་ལས་སྙིང་པོའི་སྔགས་དང་ཉེ་བའི་སྙིང་པོའི་སྔགས་འཆད་པར་འགྱུར་བ་དག་བརྗོད་པའི་ཚེ། དཀྱིལ་འཁོར་གྱི་ལྷའི་ཆོགས་ཡང་དག་པར་སྤྲོས། འགྲོ་བའི་དོན་བྱས་ནས་སྔགས་དང་ལྷན་ཅིག་པ་ཉིད་ཀྱི་ཕྲེང་བའི་ཚུལ་གྱིས་བཀུག་སྟེ། རླུང་འཇུག་པ་དེའི་ཚེ་དེ་ཉིད་སྙིང་གའི་ས་བོན་ལ་གཞུག་པར་བྱ་ཞིང༌། ལྷ་རྣམས་ཀྱི་སྔགས་སོ་སོར་བརྗོད་པ་ཡོངས་སུ་རྫོགས་པ་ན། རེ་རེ་ནས་སྤྲོ་ཞིང་བསྡུ་བར་བྱའོ་ཞེས་པ་དམ་ཚིག་གི་བཟླས་པའོ། །གང་ཡང་བརྟག་པ་གཉིས་པར་གསུངས་པ། རྡོ་རྗེ་མ་དང༌། དཀར་མོ་དང༌། ཆུ་མ་དང༌། རྡོ་རྗེ་མཁའ་འགྲོ་མ་དང༌། བདག་མེད་མ་དང༌། མཁའ་སྤྱོད་མ་དང༌། ས་སྤྱོད་མའི་རྣལ་འབྱོར་ལས་རེངས་པར་བྱེད་པ་ལ་སོགས་པ་བརྟུལ་ཞུགས་ཅན་གྱིས་བྱེད་དོ་ཞེས་གསུངས་པའི་ཕྱིར། འདིར་ཡང་བླ་མ་དང་ཕན་ཚུན་དབྱེར་མེད་པར་འགྲོགས་པའི་མན་ངག་ལས་ལས་རབ་ཏུ་རྒྱས་པ་བྲི་བར་བྱ་སྟེ། ཨཾ་གི་ས་བོན་ལས་སྐྱེས་པའི་རྡོ་རྗེ་མ་སེར་མོ་

---

^{[མ་དཔེ་གཟིགས་ན་འདིར་གནོན།]}

གཡོན་པའི་ཕྱག་དག་གིས་ཐོད་པ་དང་ཁ་ཊྭཱཾ་ག །གཡས་པའི་ཕྱག་དག་གིས་རྡོ་རྗེ་དང་གྲི་གུག་འཛིན་པ་ཅན་གྱི་སྙིད་གར་ས་བོན་ཧཱུཾ་སེར་པོ་རྣམ་པར་བསྒོམས་ཏེ། ཨོཾ་ཧཱུཾ་སྭཱ་ཧཱ། ཞེས་སྔོན་དུ་བསྙེན་པ་འབུམ་བྱས་པའི་མཐར། །འཆད་པར་འགྱུར་བའི་སྤེལ་ཚིག་དང་བཅས་པའི་སྔགས་ཀྱིས་ཆོ་ག་ཇི་ལྟ་བར་སྦྱིན་སྲེག་བྱ་སྟེ། འདིའི་ཡང་ལས་ཀྱི་མཐར་སོ་མ་བཏང་བའི་ཁམ་ཕོར་གཉིས་སུ། ཐོད་ལེ་ཀོར་སེར་བོས་བུམ་པས་མཚན་པའི་ཆུའི་དཀྱིལ་འཁོར་ཟླུམ་པོ་ལ་གནས་པའི་སྣ་ཚོགས་རྡོ་རྗེ་དང༌། ཨོཾ་ཧཱུཾ་བཛྲེ་ཆེ་གེ་མོ་སྟཾ་བྷ་ཡ་ཧཱུཾ་སྭཱ་ཧཱ། ཞེས་པའི་རིག་པ་བྲིས་ནས། གཅིག་དུར་ཁྲོད་ཀྱི་ཐལ་བས་བཀང་སྟེ། ཁམ་ཕོར་གཞན་གྱིས་ཁ་སྦྱར་བར་བྱས་པའི་སྟེང་དུ། དབང་ཆེན་དཀྱིལ་འཁོར་ཟུང་ལ་ཕྱོགས་སུ་རྡོ་རྗེས་ཉེ་བར་མཚན་པ་བྲིས་ནས་ས་འོག་ཏུ་བཞག་ནས། བུད་མེད་རྐང་པ་གཡོན་དང༌། སྐྱེས་པ་རྐང་པ་གཡས་ཀྱིས་མནན་པའི་ཏིང་ངེ་འཛིན་གྱིས་གནས་པའི་མཐར་སྔགས་བཟླས་པར་བྱ་སྟེ། སྟོང་གིས་བསྒྲུབ་བྱ་རེངས་པར་བྱེད་དོ། །ཨིཾ་ལས་རྫོགས་པའི་དཀར་མོ་གུར་གུམ་གྱི་མདོག་ཅན་ཞགས་པ་དང༌། ཁ་ཏྭཱཾ་དང༌། ལྕགས་ཀྱུ་དང༌། རྡོ་རྗེ་འཛིན་པ། སྙིང་གར་སོན་པའི་ཨཾ་ཡིག་དམར་པོའི་ས་བོན་ཅན་བསམས་ནས། ཨོཾ་ཨཾ་སྭཱ་ཧཱ། ཞེས་སྔོན་དུ་བསྙེན་པ་འབུམ་བྱས་ཏེ། སྤེལ་ཆིག་དང་བཅས་པའི་སྔགས་ཀྱིས་ཆོ་ག་ཇི་ལྟ་བར་སྦྱིན་སྲེག་བྱ་སྟེ། འདིའི་ལས་ཀྱི་མཐར་ཡང༌། བསྒྲུབ་བྱ་དམར་པོ་སྐྲ་གྲོལ་བ་མན་ན་ནས། མགྲིན་པ་ཞགས་པས་བཅིངས། ལྕགས་ཀྱུས་སྐྱེ་གནས་ཕུག་ནས་བཀུག་སྟེ། རྐང་པའི་འོག་ཏུ་འགྱེལ་བར་བསམས་ནས། དེའི་སྐྱེ་གནས་སུ་ཨཾ་ཡིག་དམར་པོ་དེ་ལས་མེ་འབར་ཞིང་རྣམ་པར་འབར་བར་བསམ་པར་བྱའོ། །སྐྱེས་པ་ལ་ནི་དེ་བཞིན་ཁོ་ནར་སྙིང་གར་རོ། །ཨོཾ་ཨཾ་གཽ་རཱི་ཨ་མུ་ཀཱི་མེ་བ་ཤ་མ་ནཱ་ཡ་སྭཱ་ཧཱ། ཞེས་བཟླས་པས་ངེས་པར་དེ་དབང་དུ་འགྱུར་རོ། །ཨིཾ་གི་ས་བོན་ལས་སྐྱེས་པའི་ཆུ་མ་སྔོན་མོ་ཐོད་པ་དང༌། ཐོ་བ་དང༌། རྡོ་རྗེ་དང༌། སྡིགས་མཛུབ་འཛིན་པ། སྙིང་གར་ཉི་མ་ལ་གནས་པའི་ཁཾ་ཡིག་སྔོན་པོ་ཅན་བལྟས་ནས། ཨོཾ་ཁཾ་སྭཱ་ཧཱ། ཞེས་འབུམ་

---

^{[མ་དཔེ་གཟིགས་ན་འདིར་གནོན།]}

བཟླས་བ་བྱས་ཏེ། སྤེལ་ཚིག་དང་བཅས་པའི་སྔགས་ཀྱིས་ཇི་ལྟ་བར་སྦྱིན་སྲེག་བྱའོ། །འདིའི་ཡང་ལས་ཀྱི་མཐར་བསྒྲུབ་བྱ་སྐྲ་གྲོལ་བ་མནན་པ་རླུང་ལ་གནས་པ། རྔ་མོ་སྔོན་མོ་ལ་ཞོན་པ་ཁ་ལྷོར་ཕྱོགས་ཤིང་ཁྲོས་པས་ཐོ་བས་བསྣུན་བཞིན་པ་བསམ་པར་བྱས་ནས། ཨོཾ་ཁཾ་པཱ་རི་ཡོ་གེ་ནཱི་ཨ་མུ་ཀཾ་ཨུ་ཙྪ་ཊ་ཡ་ཁཾ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་བཟླས་ཏེ། མཚན་མོ་བདུན་གྱིས་སྐྲོད་པར་བྱེད་དོ། །ཨུ་ཡིག་ལས་སྐྱེས་པའི་རྡོ་རྗེ་མཁའ་འགྲོ་མ་ཆུ་མ་ལྟ་བུའི་སྙིང་གར་ཉི་མ་ལ་གནས་པའི་ཛྲཱྀཾ་ཡིག་སྔོན་པོ་ཅན་བསམས་ནས། ཨོཾ་ཛྲཱཾ་སྭཱ་ཧཱ། ཞེས་འབུམ་བཟླས་ཏེ། སྤེལ་ཚིག་དང་བཅས་པའི་སྔགས་ཀྱིས་ལས་དང་རྗེས་སུ་མཐུན་པའི་སྦྱིན་སྲེག་བྱ་སྟེ། འདིའི་ཡང་ལས་མཐའ་བྱ་བ། བསྒྲུབ་བྱ་དག་རྟ་དང་མ་ཧེ་ལ་ཞོན་པ་ཕ་རོལ་དང་ཕ་རོལ་ངག་རྩོད་པར་བྱེད་བཞིན་པ་བསམ་པར་བྱ་སྟེ། ཨོཾ་ཛྲཱྀཾ་བཛྲ་ཌཱ་ཀི་ནཱི་ཆེ་གེ་དང་ཆེ་གེ་དག་བི་དྭེ་ཥཾ་ཀུ་རུ་སྭཱ་ཧཱ། ཛྲཱྀཾ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་བཟླས་པས་རྣམ་པར་སྡང་བར་བྱེད་དོ། །ཨཾ་གི་ས་བོན་ལས་སྐྱེས་པའི་བདག་མེད་མ་སྔོན་མོ། རྣམ་པར་འགྱུར་བའི་གཟུགས་ཅན་ཐོད་པ་དང་ཁ་ཊྭཱཾ་ག་དང༌། རྡོ་རྗེ་དང༌། གྲི་གུག་འཛིན་པའི་སྙིང་གར་ཉི་མ་ལ་བུཾ་ཡིག་སྔོན་པོ་ཅན་བསམས་ཏེ། ཨོཾ་བུཾ་སྭཱ་ཧཱ། ཞེས་འབུམ་བཟླས་པར་བྱ་སྟེ། སྤེལ་ཚིག་དང་བཅས་པའི་སྔགས་ཀྱིས་ཆོ་ག་ཇི་ལྟ་བར་སྦྱིན་སྲེག་བྱའོ། །འདིའི་ཡང་ལས་ཀྱི་མཐར། བྲམ་ཟེའི་ཐོད་པར་དུག་དང་སྐེ་ཚེ་དང༌། སྡིགས་མཛུབ་ཀྱི་ཁྲག་གིས་འཁོར་ལོ་ཟུར་དྲུག་པ་ཟུར་རྣམས་སུ་ཧཱུཾ་དང་ལྡན་ཞིང༌། དབུས་སུ་ཨོཾ་བུཾ་ནཻ་ར་ཨཱ་ཏྨྱ་ཨ་མུ་ཀ་ཛཱ་ར་ཡ་བུཾ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པའམ་ཉེ་བར་འཚེ་བ་མཐའ་དག་སྤེལ་ཏེ་བྲིས་ནས་བཟླས་ཏེ། ཕུབ་མའི་མེ་མདག་ལ་གདུང་བར་བྱ་སྟེ། རིམས་ཀྱིས་འདེབས་པར་བྱེད་དོ། །ཨཾ་ལས་སྐྱེས་པའི་མཁའ་སྤྱོད་མ། དཀར་མོ་ལྟ་བུའི་སྙིང་གར་ཧཱུཾ་ཡིག་དམར་པོའི་ས་བོན་ཅན་བསམ་པར་བྱས་ནས། ཨོཾ་ཧཱུཾ་སྭཱ་ཧཱ། ཞེས་འབུམ་བཟླས་པ་བྱས་ཏེ། སྤེལ་ཚིག་དང་བཅས་པའི་སྔགས་ཀྱིས་ཆོ་ག་ཇི་ལྟར་སྦྱིན་སྲེག་བྱའོ། །འདིའི་ཡང་ལས་ལ་བསྒྲུབ་བྱ་རླུང་དང་མེའི་དཀྱིལ་འཁོར་གྱི་སྟེང་དུ་རྣམ་པར་

---

^{[མ་དཔེ་གཟིགས་ན་འདིར་གནོན།]}

འབར་བར་བསམས་ཏེ། རང་གི་སྙིང་གའི་ས་བོན་གྱི་འོད་ཟེར་གྱི་ལྕགས་ཀྱུ་སྣ་བུག་གཡོན་ནས་ངེས་པར་སོང་ནས། བསྒྲུབ་བྱ་རྣམས་ཀྱི་སྣ་གཡས་པའི་སྦུ་གུ་ནས་བཅུག །སྙིང་ག་དང་སྐྱེ་གནས་ཕུག །སྣ་གཡོན་ནས་འཐོན་ཏེ། རང་གི་སྣ་གཡས་ནས་སྙིང་གའི་ས་བོན་ལ་གཞུག་པར་བྱ་ཞིང༌། དབུགས་ཀྱི་རླུང་གིས་དགུག་པར་བྱ་སྟེ། ཨོཾ་ཧཱུཾ་ཁེ་ཙ་རི་ཨ་མུ་ཀཱི་ནཱ་ཨཱ་ཀཪྵ་ཡ་ཧཱུཾ་སྭཱ་ཧཱ། ཞེས་བཟླས་པས་འགུགས་པར་བྱེད་དོ། །ཨཾ་ཡིག་ལས་སྐྱེས་པའི་ས་སྤྱོད་མ་བདག་མེད་མ་དང་འདྲ་བའི་སྙིང་གར་གྷུཿ་ཡིག་སྔོན་པོ་ཅན་བསྒོམ་པར་བྱ་སྟེ། ཨཾ་གྷུཿ་སྭཱ་ཧཱ། ཞེས་བསྙེན་པ་འབུམ་བྱས་ཏེ། སྤེལ་ཚིག་དང་བཅས་པའི་སྔགས་ཀྱིས་སྔོན་བཞིན་སྦྱིན་སྲེག་བྱའོ། །འདིའི་ཡང་ལས་ལ་གྷུཿ་ཡིག་ལས་སྐྱེས་པའི་འབར་བའི་རྡོ་རྗེ། བསྒྲུབ་བྱའི་འོག་སྒོ་ནས་རྐེད་པ་ཙམ་དུ་ཟུག་པར་བསམ་པར་བྱ་སྟེ། ཨོཾ་གྷུཿ་བྷུ་ཙ་རི་ཨ་མུ་ཀཾ་མཱ་ར་ཡ་གྷུཿ་ཧཱུཾ་ཕཊ་སྭཱ་ཧཱ། ཞེས་བཟླས་པས་གསོད་པར་བྱེད་དོ། །རྒྱུད་དུ་གསུངས་པའི་སྔགས་ཀྱི་རིམ་པ་ལས་འདིར། ས་སྤྱོད་མ་དང༌། མཁའ་སྤྱོད་མ་དག་རིམ་པ་ལས་འདས་པའོ། །རྡོ་རྗེ་མ་ལ་སོགས་པ་བདུན་པོ་འདི་རྣམས་ཀྱང་ཉི་མ་དང་རོ་ལ་གར་སྟབས་ཀྱིས་གནས་པ། ཕྱག་བཞི་པ། ཕྱག་རྒྱ་ལྔ་ཡིས་བརྒྱན་པ། མགོ་སྐྱེས་དམར་པོ་གྱེན་དུ་བརྫེས་པའོ་ཞེས་སོ། །དེ་ནས་རྡོ་རྗེ་མ་ལ་སོགས་པ་རྣམས་ཀྱི་སྙིང་པོའི་སྔགས་སུ་འགྱུར་བ་ནི། ཨོཾ་ཨཱཾ་སྭཱ་ཧཱ། ཨོཾ་ཨིཾ་སྭཱ་ཧཱ། ཨོཾ་ཨཱུཾ་སྭཱ་ཧཱ། ཨོཾ་ཨཱུཾ་སྭཱ་ཧཱ། ཨོཾ་ཨཾ་སྭཱ་ཧཱ། ཨོཾ་ཨཽ་སྭཱ་ཧཱ། ཇི་ལྟར་བསྡུས་པ་ནི་རྒྱས་པ་ལ་ལྟོས་པ་ལས་གསལ་བར་འགྱུར་བའི་ཕྱིར་ཕྱག་གཉིས་པ་ཁོ་ན་ལ་དཀྱིལ་འཁོར་ལྡན་པའི་སྒྲུབ་ཐབས་འདི་བརྗོད་དོ། །དེ་བཞིན་དུ་ཕྱག་བཞི་པ་ལ་སོགས་པ་རྣམས་ཀྱི་ཡང་རིག་པར་བྱའོ། །འདི་དག་གི་ཁྱད་པར་ནི་ཛྭ་ལཱ་ཛྭ་ལྭ་ནི་བདུད་བཞི་ལས་ངེས་པར་རྒྱལ་བ་དག་པས་ཕྱག་བཞི་པ། གཡས་པ་དང་ཅིག་ཤོས་ཀྱི་རྩ་བའི་ཕྱག་དག་གིས་རྡོ་རྗེ་དང་བདུད་ཀྱི་ཁྲག་གིས་གང་བའི་ཐོད་པ་འཛིན་པ། ཕྱག་ལྷག་མ་གཉིས་ཀྱིས་བདག་མེད་མ་དང་མཚུངས་པའི་རྡོ་རྗེ་ཕག་མོ་ལ་མཉམ་པར་

---

^{[མ་དཔེ་གཟིགས་ན་འདིར་གནོན།]}

འཁྱུད་པ། གཞན་ནི་སྔོན་བཞིན་ནོ། །དེའི་སྔགས་ནི། ཨོཾ་ཛྭ་ལ་ཛྭ་ལ་བྷྱོ་ཧུཾ་ཧུཾ་ཧུཾ་ཕཊ་སྭཱ་ཧཱ། འདིའི་ཡང་ཧཱུཾ་ཡིག་གསུམ་ཐུང་བར་བཤད་དོ། །ཀི་ཊི་ཀི་ཊི་བཛྲ་ནི། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པའམ། རྩ་གསུམ་དག་པས་ཞལ་གསུམ་པ། དང་པོའི་ཞལ་ནག་པོ། གཡས་པ་དཀར་པོ། གཡོན་པ་དམར་པོའོ། །ཕ་རོལ་ཏུ་ཕྱིན་པ་དྲུག་དག་པས་ཕྱག་དྲུག་པ། གཡས་ཀྱི་རྩ་བའི་ཕྱག་གིས་རྡོ་རྗེ་གཡོན་གྱིས་སྲིད་པ་གསུམ་གྱི་ཉོན་མོངས་པ་འཇོམས་པ་དག་པས་རྩེ་གསུམ། གཞན་གྱིས་གྲི་གུག །ཅིག་ཤོས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་དག་པས་དྲིལ་བུ་རྣམ་པར་འཛིན་པའོ། །ཕྱག་ལྷག་མ་གཉིས་ཀྱིས་བདག་མེད་མ་དང་འདྲ་བའི་རྡོ་རྗེ་ལུ་གུ་རྒྱུད་མ་ལ་ཀུན་དུ་འཁྱུད་པ་སྔོན་བཞིན་དུ་གནས་པའོ། །འཁོར་ནི་ཐམས་ཅད་ལ་ལྡན་པར་གསུངས་པ་ཉིད་དོ། །དེའི་སྔགས་ནི། ཨོཾ་ཀི་ཊི་ཀི་ཊི་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཧཱུཾ་ཡིག་གསུམ་རིང་པོར་གསུངས་སོ། །པི་ཙུ་བཛྲ་ནི་སླར་ཡང་ཧཱུཾ་ཡིག་ལས་སྐྱེས་པའི་ཐོད་པར་གནས་པའི་ཉི་མ་ལ་གནས་པའི་ཧཱུཾ་ཡིག་ལས་འཁྲུངས་པ། རྣམ་པར་ཐར་པ་བརྒྱད་རྣམ་པར་དག་པས་ཞལ་བརྒྱད་པ། དེའི་རྩ་བའི་ཞལ་ནག་པོ། གཡས་དཀར་པོ། གཡོན་དམར་པོ་ཆེར་འཇིགས་པ། སྟེང་གི་ཞལ་དུད་ཀ་རྣམ་པར་གཙིགས་པ། ལྷག་མ་བུང་བའི་མདོག་ཅན་ཞལ་རེ་རེ་ཞིང་སྤྱན་གསུམ་པ། སྟོང་པ་ཉིད་བཅུ་དྲུག་རྣམ་པར་དག་པས་ཕྱག་བཅུ་དྲུག་པ། གཡས་ཀྱི་ཕྱག་བརྒྱད་ཀྱི་མ་ཐིལ་གྱི་ཐོང་པ་རྣམས་སུ་སྟེང་ནས་རིམ་པས། ལུད་པ་དང༌། དབུགས་དང༌། སྨྱོ་བ་དང༌། ཟད་པ་སྟེ་ཁོང་སྐེམས་པ་དང༌། མཛེ་དང༌། རྐང་བམ་དང༌། མཆིན་པ་དང༌། མཆེར་པ་རྣམས་ཀྱི་ནད་འཇོམས་པ་དག་པས། གླང་པོ་དང༌། རྟ་དང༌། བོང་བུ་དང༌། བ་ལང་དང༌། རྔ་མོ་དང༌། མི་དང༌། ཤ་ར་བྷ་ག་དག་གོ །དེ་བཞིན་དུ་གཡོན་གྱི་ཕྱག་ཏུ་གནས་པའི་ཐོད་པ་རྣམས་སུ་ཞི་བ་ལས་གསལ་བ་ལ་སོགས་པའི་དབང་ཕྱུག་གི་དངོས་གྲུབ་སེམས་ཅན་ཀུན་ལ་སྩོལ་བ་དག་པས། ས་དང༌། ཆུ་དང༌། རླུང་དང༌། མེ་དང༌། ཟླ་བ་དང༌། ཉི་མ་དང༌། མཐར་བྱེད་དང༌། ནོར་གྱི་

---

^{[མ་དཔེ་གཟིགས་ན་འདིར་གནོན།]}

དབང་ཕྱུག་རྣམས་སོ། །རྩ་བའི་ཕྱག་གཉིས་ཀྱིས་བདག་མེད་མ་ལ་འཁྱུད་པ། བསྡུ་བ་བཞི་རྣམ་པར་དག་པས་ཞབས་བཞི་པ། ཕུང་པོ་དང༌། ཉོན་མོངས་པ་དང༌། ལྷའི་བུ་དང་འཆི་བདག་གི་བདུད་རྣམས་རབ་ཏུ་གྲུབ་པའི་རྒྱུར་ཚངས་པ་དང༌། ཁྱབ་འཇུག་དང༌། བརྒྱ་བྱིན་དང༌། དབང་ཕྱུག་ཆེན་པོ་རྣམས་ཀྱི་སྙིང་གར་ཉི་མ་ལ་ཞབས་གཉིས་དག་གིས་སྐྱིལ་ཀྲུང་ཕྱེད་པའི་གར་གྱིས་དང༌། གཞན་དག་གཡས་བརྐྱང་བའི་ཞབས་ཀྱིས་གར་མཛད་པའི་ཞབས་བཞི་རྣམས་ཀྱི་རོལ་པ་དང་ལྡན་པའོ་ཞེས་ཁ་ཅིག་གོ །འཁོར་གྱི་ཆོ་ག་ནི་སྔོན་བཞིན་ནོ། །འོད་གསལ་དུ་གཞུག་པ་ནི། འདིའི་དབྱེ་བས་གཽ་རཱི་ལ་སོགས་པའི་རྣལ་འབྱོར་མ་བརྒྱད་ཞལ་བརྒྱད་རྣམས་སུ་རབ་ཏུ་གཞུག་ཅིང༌། ཞལ་བདུན་ནི་རྩ་བའི་ཞལ་ལའོ། །ཕྱག་བཅུ་བཞི་མཚན་མ་དང་བཅས་བ་རྩ་བའི་ཕྱག་གཉིས་ལ། ཞབས་གཉིས་རྩ་བའི་ཞབས་གཉིས་ལའོ། །སྣ་ཚོགས་པདྨ་ལ་སོགས་པ་བསྡུ་བ་ནི་སྔོན་བཞིན་ཏེ། གཞན་དང་མཚུངས་པའོ། །དེའི་སྙིང་པོའི་སྔགས་ནི། ཨོཾ་དེ་བ་པི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། འདིའི་ཡང་ཧཱུཾ་ཡིག་གསུམ་རིང་པོར་གསུངས་སོ། །ཨོཾ་བཛྲ་ཀརྟྟ་རི་ཧེ་བཛྲཱ་ཡ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཉེ་བའི་སྙིང་པོ་སྟེ་འདི་ཐམས་ཅད་ཀྱི་ཡང་ཉེ་བའི་སྙིང་པོའི་ཞེས་པར་འགྱུར་རོ། །ཨོཾ་ཨཥྚ་ན་ནཱ་ཡ། པིངོ་རྷྭ་ཀེ་ཤ་བརྟྨ་ནེ། ཙ་ཏུ་རྦིཾ་ཤ་ཏི་ནེ་ཏྲཱ་ལ། ཥོ་ཌ་ཤ་བྷུ་ཛཱ་ཡ་ཀྲྀཥྞ་ཛཱྀ་མཱུ་ཏ་བ་པུ་ཥེ། ཀ་པཱ་ལ་མཱ་ལཱ་ནེ་ཀཱ་དྷཱ་རི་ཎེ། ཨཱདྷྨཱ་ཏ་ཀྲཱུ་ར་ཙིཏྟཱ་ཡ། ཨརྡྷེནྡུ་དཾཥྚི་ཎེ། མཱ་ར་ཡ་མཱ་ར་ཡ། ཀཱ་ར་ཡ་ཀཱ་ར་ཡ། གརྫྫ་ཡ་གརྫྫ་ཡ། ཏརྫྫ་ཡ། ཤོ་ཥ་ཡ་ཤོཥ་ཡ། སཔྟ་སཱ་ག་རཱན། བནྡྷ་བནྡྷ། ནཱ་གཱཥྚ་ཀཱ་ན། གྲྀཧྞ་གྲྀཧྞ། ཤ་ཏྲཱུཾ། ཧཱ་ཧཱ་ཧི་ཧཱི་ཧུ་ཧཱུ་ཧེ་ཧཻ་ཧོ་ཧཽ་ཧཾ་ཧཿ་ཕཊ་སྭཱ་ཧཱ། ཕྲེང་བའི་སྔགས་སོ། །སླང་ཡང་འདིར་དབུས་ཀྱི་བི་ཙུ་བཛྲ་ལ་ལྷག་པའི་སེམས་ཀྱི་དབྱེ་བ་ཙམ་ལས་ཀྱང་ཀྱེ་རྡོ་རྗེ་བཞིར་ངེས་པར་མཐོང་ངོ་ཞེས་གསུངས་སོ། །རིམ་པའི་བར་མ་ཆད་པ་ནི་བྷྲཱུཾ་ལས་སྐྱེས་པའི་རྡོ་རྗེ་གུར་རྒྱ་ཆེ་བ་སེར་པོ་སྡུག་བསྔལ་བ་དང༌། ཀུན་འབྱུང་བ་དང༌། འགོག་པ་དང༌། ལམ་དང༌། ཟད་པ་དང༌། མེ་སྐྱེ་བ་དང༌། ཆོས་དང༌། རྗེས་སུ་རྟོགས་པ་དང༌།

---

^{[མ་དཔེ་གཟིགས་ན་འདིར་གནོན།]}

ཀུན་རྫོབ་དང༌། ཡོངས་སུ་སྐྱེ་བ་ཤེས་པའི་ཤེས་པ་བཅུ་རྣམ་པར་དག་པས་རྩིབས་བཅུ་འཁོར་བའི་དབུས་སུ་གནས་པའི་སྣ་ཚོགས་རྡོ་རྗེའི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་གནས་པའི་ཟླ་བ་དང་ཉི་མ་ཁ་སྦྱར་བའི་དབུས་སུ་སོན་པའི་ཧཱུཾ་ཡིག་སྔོན་པོ་བསམས་ནས་ལྔའི་འབྱུང་གནས་ཀྱི་མངོན་པར་བྱང་ཆུབ་པའི་རིམ་པས། དེ་ཐམས་ཅད་ཡོངས་སུ་གྱུར་པ་ལས། དབང་པོ་སྔོན་པོའི་མདོག་ཅན་ཞལ་གཅིག་པ། རིན་པོ་ཆེའི་ཅོད་པན་ཅན། རྡོ་རྗེ་དང་དྲིལ་བུ་འཛིན་པའི་ཕྱག་དག་གིས། རང་བཞིན་གྱི་རིག་མ་ལ་ཀུན་ནས་འཁྱུད་པ། གཡོན་བརྐྱང་གི་ཞབས་ཀྱིས་འཇིགས་བྱེད་དང་དུས་མཚན་ཅན་མནན་པ། རྣམ་པར་བཀྲ་བའི་ན་བཟའ་དང་རྒྱན་གྱིས་བརྒྱན་པའི་རྡོ་རྗེ་ཧཱུཾ་མཛད་དུ་བདག་ཉིད་དུ་རྣམ་པར་བསྒོམས་ནས། རྡོ་རྗེ་ཐོད་པའི་སྦྱོར་བས། ཁྲོ་བོ་བཅུ་རྗེས་སུ་སྤྲོས་ཏེ། དེ་ལ་ཤར་ལ་སོགས་པའི་རྩིབས་རྣམས་སུ་རིམ་པས། གཤིན་རྗེ་མཐར་བྱེད་དང༌། ཤེས་རབ་མཐར་བྱེད་དང༌། པདྨ་མཐར་བྱེད་དང༌། བགེགས་མཐར་བྱེད་རྣམས་དང༌། ནག་པོ་དཀར་པོ་དམར་པོ་སྔོན་པོའི་མདོག་ཅན། རྡོ་རྗེ་ཐོ་བ་དང༌། དབྱུག་པ་དཀར་པོ་དང༌། ཆུ་སྐྱེས་དམར་པོ་དང༌། གྱེས་པའི་རྡོ་རྗེ་རྣམས་འཛིན་པ། མིའུ་ཐུང་གསུས་ཁྱིམ་ཆེ་ཞིང་ཁྲོ་བ་ཀླུ་ཆེན་པོ་བརྒྱད་ཀྱིས་བརྒྱན་པ། དབུ་སྐྲ་དམར་སེར་གྱེན་དུ་བརྫེས་པ། དམར་ལ་ཟླུམ་པའི་སྤྱན་གསུམ་པ། རྣམ་པར་སྣང་མཛད་དང༌། རིན་ཆེན་འབྱུང་ལྡན་དང༌། འོད་དཔག་མེད་དང༌། མི་བསྐྱོད་པ་རྣམས་ཀྱི་ཅོད་པན་ཅན། སྟག་གི་པགས་པའི་ཤམས་ཐབས་འཛིན་པ་རྣམས་སོ། །མེ་ལ་སོགས་པའི་རྩིབས་རྣམས་སུ། འདོད་པའི་རྒྱལ་པོ་དང་དབྱུག་སྔོན་ཅན་དང༌། སྟོབས་པོ་ཆེ་དང༌། མི་གཡོ་བ་རྣམས་ཆེར་གནག་པ། ལྕགས་ཀྱུ་དང༌། དབྱུག་པ་དང༌། རྩེ་གསུམ་དང༌། རལ་གྲི་འཛིན་པ་རྣམས་ཏེ། འདིར་འདོད་པའི་རྒྱལ་པོ་དང༌། མི་གཡོ་བ་དག་གོས་དམ་པ་དང༌། རིན་པོ་ཆེ་ལ་སོགས་པས་བརྒྱན་ཅིང་སྒེག་པ། རིན་པོ་ཆེའི་ཅོད་པན་དག་གོ །དབྱུག་སྔོན་ཅན་དང་སྟོབས་པོ་ཆེ་དག་གཤིན་རྗེ་མཐར་བྱེད་བཞིན་རྣམ་པར་འགྱུར་བ་དག་གོ །འོག་གི་

---

^{[མ་དཔེ་གཟིགས་ན་འདིར་གནོན།]}

རྩིབས་སུ་གནོད་མཛེས་ནག་པོ་གཏུན་ཤིང་འཛིན་པ། མི་བསྐྱོད་པས་མཚན་པའི་རིན་པོ་ཆེའི་ཅོད་པན་ཅན་ནོ། །སྟེང་གི་རྩིབས་སུ་གཙུག་ཏོར་སེར་པོ་འཁོར་ལོ་འཛིན་པ་རྣམ་པར་སྣང་མཛད་ཀྱིས་མཚན་པའི་རིན་པོ་ཆེའི་ཅོད་པན་ཅན། འདོད་པའི་རྒྱལ་པོ་ལ་སོགས་པ་བཞི་ནི་མི་བསྐྱོད་པའི་ཅོད་པན་ཅན་ནོ། །ཁྲོ་བོ་བཅུ་པོ་འདི་རྣམས་སྣ་ཚོགས་ཆུ་སྐྱེས་དང་ཉི་མ་ལ་གཡོན་བརྐྱང་གི་ཞབས་ཀྱིས་གནས་པ། གཡོན་པའི་ཕྱག་རྣམས་ཀྱི་སྙིང་གའི་ཕྱོགས་སུ་ཁུ་ཚུར་གྱི་སྡིགས་འཛུབ་ཀྱིས་ཀླུའི་ཞགས་པ་འཛིན་པ་བལྟ་བར་བྱའོ། །དེ་ལྟར་གྱུར་པའི་སྲུང་བའི་འཁོར་ལོ་རྣམ་པར་བསྒོམས་ནས་དེའི་དབུས་སུ་རྡོ་རྗེ་ཧཱུཾ་མཛད་ཡོངས་སུ་གྱུར་པ་ལས། ཆོས་ཀྱི་འབྱུང་གནས་སྔར་བརྗོད་པའི་གཟུགས་ཅན་དུ་རྣམ་པར་བསམས་ཏེ། གཞན་ཐམས་ཅད་དུ་གསུངས་པའི་རིམ་པས་སྣ་ཚོགས་པདྨ་དང༌། སྣ་ཚོགས་རྡོ་རྗེ་དང༌། ཁང་པ་བརྩེགས་པ་ལ་སོགས་པ་ཅན་གྱི་ཀྱེ་རྡོ་རྗེ་བཞི་པོ་ལ་ཡང་བལྟ་བར་བྱའོ། །དེ་ལྟར་དཀྱིལ་འཁོར་གྱི་འཁོར་ལོ་རྣམས་སུ་བསྐྱེད་པའི་རིམ་པའི་རྣལ་འབྱོར་གཅིག་གིས་རྒྱུན་དུ་ངེས་པ་བར་མ་ཆད་པར་བསྒོམ་པར་བྱས་པའི་རྣལ་འབྱོར་གྱིས་གསལ་བ་ལས་ཀྱང་གསལ་བར་གྱུར་པ་ན། གཟུགས་བརྙན་གྱི་མཚན་མ་རྣམས་ཀྱིས་ཇི་སྲིད་དུ་སྒྱུ་མ་ལ་སོགས་པ་དང་འདྲ་བར་སྤྲོས་པ་མེད་ཅིང་ཀུན་དུ་གསལ་བར་འགྱུར་བ་སྟེ། དེ་ལྟར་ཡང་བརྟག་པ་གཉིས་པར་གསུངས་པ། བསྐྱེད་པའི་རིམ་པའི་རྣལ་འབྱོར་གྱིས། །བརྟུལ་ཞུགས་ཅན་གྱི་སྤྲོས་པ་བསྒོམ། །སྤྲོས་པ་རྨི་ལམ་ལྟར་བྱས་ནས། །སྤྲོས་པ་ཉིད་ནི་སྤྲོས་མེད་བྱེད། །ཇི་ལྟར་སྒྱུ་མ་རྨི་ལམ་དང༌། །ཇི་ལྟར་བར་མའི་སྲིད་ཡིན་པར། །རྟག་ཏུ་གོམས་པའི་རྣལ་འབྱོར་གྱིས། །དཀྱིལ་འཁོར་ཉིད་དུ་ནི་དེ་བཞིན་འདོད། །དེའི་ཕྱིར་འཕྲལ་དུ་ས་བཅུའི་དབང་ཕྱུག་བདེན་པ་གཉིས་གཅིག་པའི་ངོ་བོ་རྡོ་རྗེ་འཛིན་པ་ཆེན་པོའི་ས་བདུད་འཇོམས་པ་ཞེས་སོ། །བསྒོམ་པ་གཞན་གྱིས་ཀྱང་རྣལ་འབྱོར་བའི་བསོད་ནམས་ཀྱི་ཚོགས་འཕེལ་བའི་ཆེད་དང༌། བགེགས་ཉེ་བར་ཞི་བའི་དོན་དུ་ཡང་ཇི་ལྟར་རྙེད་པའི་ཕྱིར་མཆོད་པས་བཅོམ་ལྡན་འདས་མཆོད་པར་བྱའོ་ཞེས་སོ། །དེ་མཆོད་

---

^{[མ་དཔེ་གཟིགས་ན་འདིར་གནོན།]}

པའི་ཆོ་ག་བརྗོད་པར་བྱ་སྟེ། ཀྱེ་རྡོ་རྗེའི་རྣལ་འབྱོར་དང་ལྡན་པའི་སྔགས་པས་ཐོ་རངས་ཀྱི་དུས་སུ་གནས་ཇི་ལྟ་བར་ཕྱག་དར་ལ་སོགས་པ་བྱ་སྟེ། སའི་ཆ་ཤས་རྣམས་ལ་ལག་པ་རེག་སྟེ། ཨོཾ་རཀྵ་རཀྵ་ཧཱུཾ་ཧཱུཾ་ཧཱུཾ་སྭཱ་ཧཱ། ཞེས་པས་ས་གཞི་བྱིན་གྱིས་བརླབས་པ། དེར་བདུད་རྩི་ལྔ་དང་དྲི་བཟང་པོ་ལ་སོགས་པས་བྱུགས་ཏེ། དེ་དང་དེའི་ས་གཞིར་མོས་པས། གནས་དང་ཉེ་བའི་གནས། ཞིང་དང་ཉེ་བའི་ཞིང༌། འདུན་པ་དང་ཉེ་བའི་འདུན་པ་དང༌། འདུ་བ་དང་ཉེ་བའི་འདུ་བ་དང༌། འཐུང་གཅོད་དང༌། ཉེ་བའི་འཐུང་གཅོད་དང༌། དུར་ཁྲོད་དང༌། ཉེ་བའི་དུར་ཁྲོད་ཅེས་བརྗོད་དེ། མཎྜལ་གྲུ་བཞི་པ་བྱས་ནས། ཨོཾ་བཛྲ་རེ་ཁེ་ཧཱུཾ་ཞེས་པས་ཁོར་ཡུག་བྱིན་གྱིས་བརླབ་བོ། །ཨོཾ་སུ་རེ་ཁེ་སརྦ་ཏ་ཐཱ་ག་ཏ་ཨ་དྷི་ཏིཥྛ་ནྟུ་སྭཱ་ཧཱ། ཞེས་པས་མཎྜལ་གྱི་དབུས་སུ་མེ་ཏོག་གཅིག་གཞག་པར་བྱའོ། །དེ་ནས་སྙིང་གའི་ས་བོན་གྱི་འོད་ཟེར་གྱིས། བཅོམ་ལྡན་འདས་འཇིག་རྟེན་གསུམ་ཀུན་དུ་བསྐྱོད་པ་དཔའ་བོ་ལྷ་མོ་བརྒྱད་ཀྱིས་ཡོངས་སུ་བསྐོར་བ་སྤྱན་དྲངས་ཏེ། དེ་ལ་མཚུངས་པ་མེད་པའི་མཆོད་ཡོན་ལ་སོགས་པ་སྔོན་དུ་ཕུལ་ཏེ། ཧཱུཾ་ཡིག་ལས་སྐྱེས་ཤིང་ཡི་གེ་གསུམ་གྱིས་མངོན་པར་བསྔགས་པའི་མེ་ཏོག་ལ་སོགས་པ། ཨོཾ་ཨཱཿ་ཧཱུཾ་ཧེ་བཛྲ་ཡ་བཛྲ་པུཥྤེ་ཧཱུཾ་སྭཱ་ཧཱ། ཞེས་པས་དང་པོར་བཅོམ་ལྡན་འདས་ལ་མེ་ཏོག་གཅིག་དབུལ་ལོ། །ཕྱི་ནས་སྙིང་པོ་དང་ཉེ་བའི་སྙིང་པོ་དག་གིས་སོ། །ཨོཾ་ཨཱཿ་ནཻ་ར་ཨཱཏྨ་ཡེ་བཛྲ་པུཥྤེ་ཨཾ་ཧཱུཾ་སྭཱ་ཧཱ། ཞེས་པས་མཆོད་པ་བྱས་ནས་ཨོཾ་ཨཾ་ཧཱུཾ་སྭཱ་ཧཱ། ཨོཾ་ཨ་ཨཱ་ཨི་ཨཱི་ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ་ཨཾ་སྭཱ་ཧཱ། ཞེས་པའི་སྔགས་དག་གིས་མཆོད་པར་བྱའོ། །གཉིས་ཀའི་སྤྱི་བོར་ཨོཾ་ཨཱཿ། ཨཀྵོ་བྷྱ་ཡ་བཛྲ་པུཥྤེ་ཧཱུཾ་ཧཱུཾ་སྭཱ་ཧཱ། ཤར་ལ་སོགས་པའི་ཕྱོགས་ཀྱི་འདབ་མ་རྣམས་སུ། ཨོཾ་ཨཱཿ་གཽ་ཪྻེ་བཛྲ་པུཥྤེ་གཾ་ཧཱུཾ་སྭཱ་ཧཱ། ཨོཾ་གཽ་རཱི་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། འདི་དག་གིས་གཽ་རཱི་མཆོད་པར་བྱའོ། །དེ་ལྟར་ཡི་གེ་གསུམ་གྱིས་རང་རང་གི་ས་བོན་གྱི་ཡི་གེ་དང་རྣམ་པར་སྤེལ་བའི་ཙཽ་རཱི་ལ་སོགས་པ་ལྷག་པར་མཆོད་པར་བྱ་སྟེ། ཕྱི་ནས་ཨོཾ་ཡིག་དང་ལྷན་ཅིག་བོད་པའི་ཚིག་གིས་ཕུལ་ནས་ཧཱུཾ་ཧཱུཾ་ཧཱུཾ་ཕཊ་ཀྱི་ཡི་གེ་དང་སྭཱ་ཧཱའི་མཐའ་

---

^{[མ་དཔེ་གཟིགས་ན་འདིར་གནོན།]}

ཅན་གྱིས་མཆོད་པར་བྱའོ། །དེ་ལྟར་པུཥྤེའི་གནས་སུ་དྷཱུ་པེ་ལ་སོགས་རྣམས་ཀྱིས་སོ་སོའི་མིང་བཅུག་སྟེ་དབུལ་བར་བྱ་སྟེ། དེ་ནས་ཨོཾ་སརྦ་ཏ་ཐཱ་ག་ཏ་སུ་ལ་ལི་ཏ། ན་མི་ཏཻ་རེ་ན་མཱ་མི། བྷ་ག་བཱནྟཾ། ཤྲཱི་ཧེ་རུ་ཀ་ནཱ་ཐཾ་ཛཿ་ཧཱུཾ་བཾ་ཧོཿ་པྲ་ཏཱི་ཙྪ་མཾ། ཀུ་སུ་མ་ཨཉྫ་ལི་ནཱ་ཐཱཿ་ཧོ་ཞེས་པས་མེ་ཏོག་སྙིམ་པས་ཕུལ་ནས་འདུད་པར་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་མེ་གྷ་པྲ་ས་ར་ས་མུ་ཧེ་སྥ་ར་ཧཱི་མཾ་ག་ག་ན་ཁཾ་ཧཱུཾ་ས་མནྟ་སྭཱ་ཧཱ། མཆོད་པ་བྱིན་གྱིས་བརླབས་པའོ། །དེ་ནས། བདུད་ཀྱི་སྒྱུ་མ་རབ་འཇོམས་ཤིང༌། །སྟོང་ཉིད་སྙིང་རྗེ་དབྱེར་མེད་པ། །རྣམ་པར་འཕྲུལ་པའི་རང་བཞིན་སྐུ། །ཀྱེ་ཡི་རྡོ་རྗེ་ཁྱོད་ལ་འདུད། །ཅེས་པས་ཕྱག་བྱས་ནས་ཇི་ལྟར་ནུས་པའི་སྡིག་པ་བཤགས་པ་ལ་སོགས་པ་བྱས་ཏེ། རིགས་སུ་སྐྱེ་དང་དམ་ཚིག་ཅན། །སྨྱོ་མེད་ཀྱེ་ཡི་རྡོ་རྗེ་སྟོན། །བླ་མ་ལ་གུས་སྙིང་རྗེར་ལྡན། །སྐྱེ་ཞིང་སྐྱེ་བར་འགྱུར་བར་ཤོག །ལག་པས་རྡོ་རྗེ་དྲིལ་བུ་འཁྲོལ། །ཟབ་མོའི་ཆོས་ནི་ཀློག་པ་དང༌། །བཙུན་མོའི་ཁུ་བ་མཉམ་ཟས་ནི། །སྐྱེ་ཞིང་སྐྱེ་བར་འགྱུར་བ་ཤོག །སྨོན་ལམ་བྱས་ནས། དེ་ནས་ཆོ་ག་ལྷག་ཆད་ཁ་བསྐང་བའི་དོན་དུ་ཡི་གེ་བརྒྱ་པའི་སྔགས་བརྗོད་དེ། ཨོཾ་བཛྲ་ས་ཏྭ་ས་མ་ཡ་མ་ནུ་པཱ་ལ་ཡ། བཛྲ་ས་ཏྭ་ཏྭེ་ནོ་པ་ཏིཥྛ། དྲི་ཌྷོ་མེ་བྷ་བ། སུ་ཏོ་ཥྱོ་མེབྷ་བ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་བ། སརྦྦ་སིདྡྷི་མྨེ་པྲ་ཡཙྪ། སརྦ་ཀརྨྨ་སུཙྪ་མེ། ཙིཏྟཾ་ཤྲེ་ཡཿ་ཀུ་རུ་ཧཱུཾ་ཧ་ཧ་ཧ་ཧ་ཧོ། བྷ་ག་བཱན་སརྦྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿ། ཞེས་དང༌། ཨོཾ་ཁྱོད་ཀྱིས་སེམས་ཅན་དོན་ཀུན་མཛད། འདི་ལྟར་རྗེས་མཐུན་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ནི། །སླར་ཡང་བྱོན་པར་མཛད་དུ་གསོལ། །ཨོཾ་བཛྲ་མུཿ་ཞེས་གཤེགས་སུ་གསོལ། དེ་ལྟར་ཕྱག་བཞི་པ་དང༌། ཕྱག་དྲུག་པ་དང༌། ཕྱག་བཅུ་དྲུག་པའི་དཀྱིལ་འཁོར་ལ་ཡང་མཚུངས་པར་བྱ་སྟེ། དང་པོར་ཡི་གེ་གསུམ་གྱིས་མཆོད་པར་བྱས་ནས་རང་རང་གི་སྔགས་ཀྱིས་མཆོད་པར་བྱའོ། །རྡོ་རྗེ་ཕག་མོ་ལའང་བདག་མེད་མ་ཡིས་དབུལ་ལོ། །ཕྱག་བཅུ་དྲུག་པ་ལ་ནི་རྐང་པ་བརྒྱད་པའི་མཆོད་པའི་སྔགས་ཀྱིས་ཀྱང་མཆོད་པར་བྱ་

---

^{[མ་དཔེ་གཟིགས་ན་འདིར་གནོན།]}

སྟེ། ཨོཾ་ཨཥྣཱ་ན་ནཱ་ཡ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་པིདྷོ་རྡྷྭ་ཀེ་ཤ་པརྟྨ་ནེ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཙ་ཏུ་རྦིདྴ་ཏི་ནེ་ཏྲ་ཡ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཥོ་ཌ་ཤ་བྷུ་ཛཱ་ཡ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཀྲྀཤྞ་ཛཱི་མཱུ་ཏ་བ་པུ་ཥེ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཀ་པཱ་ལ་མཱ་ལཱ་ནེ་ཀཱ་དྷཱ་རི་ཎེ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཨཱདྷྨཱ་ཏ་ཀྲཱུ་ར་ཙིཏྟཱ་ཡ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཨརྡྷེ་ནྡུ་དཾ་ཥྚྲཱི་ཎེ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པའི་སྔགས་ཀྱིས་མཆོད་པར་བྱས་ནས་སྨོན་ལམ་ལ་སོགས་པ་སྔར་བཞིན་བྱས་ཏེ་གཤེགས་སུ་གསོལ་བར་བྱའོ། །དེ་ནས་ཁ་ཟས་ཀྱི་བྱ་བ་བརྗོད་པར་བྱ་སྟེ། ཚོགས་ཀྱི་འཁོར་ལོ་ལ་དང་བོར་བཟའ་བ་དང་ཐུག་པ་ལ་སོགས་པ་ལ། ཆོ་ག་བཞིན་བདུད་རྩིར་བྱས་པའི་ཆང་གཡོན་པའི་སྲིན་མཛུབ་ཀྱིས་གཏོར་ཞིང༌། ཆོས་ཀྱི་འབྱུང་གནས་ཀྱི་དབུས་སུ་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་ཀྱི་འཁོར་ལོ་སྤྱན་དྲངས་པའམ། སྙིང་གའི་ས་བོན་ལས་འཕྲོས་པ་ཡང་རུང་སྟེ། སྔར་བརྗོད་པའི་སྔགས་རྣམས་ལ་ཟས་ཀྱི་དངོས་པོའི་མིང་སྤེལ་བ་རྣམས་ཀྱིས་དབུལ་བར་བྱའོ། །ཕྱི་ནས་གཤེགས་སུ་གསོལ་ལ་དམ་ཚིག་གི་རྫས་རྣམས་ཀྱིས་ཁ་ཅུང་ཟད་དག་པར་བྱས་ཏེ། འཆད་པར་འགྱུར་བའི་ཆོ་གའི་རྣམ་པས་གཏོར་མ་ཕུལ་ནས། ལྟེ་བའི་ཐབ་ཁུང་གི་མེས་རེག་པས་ཁ་ཟས་རྣམས་ཞུ་ཞིང་བབས་ནས། སྙིང་གར་གནས་པའི་དམ་ཚིག་སེམས་དཔའ་དང་ཏིང་ངེ་འཛིན་སེམས་དཔའ་འམ། ལྟེ་བའི་པདྨའི་ཟེ་འབྲུ་ལ་གནས་པའི་འབར་བའི་ཕྲེང་བ་ཅན་གྱི་ཨཾ་ཡིག་ལ་ཐིམ་པས་ཚིམ་པར་བྱའོ་ཞེས་པ་ཕྱིའི་དངོས་པོ་རྣམས་ཀྱི་ནང་གི་བདག་ཉིད་ཀྱི་སྦྱིན་སྲེག་གི་ཆོ་གའོ། །དེ་ནས་མཐར་ཨོཾ་ཨུཙྪིཥྚ་བཛྲ་ཨ་དྷི་ཊྀཥྛ་ཨི་མཾ་བ་ལིཾ། གྲྀཧྞ་གྲྀཧྞ་ཧཱུཾ་ཧཱུཾ་ཧཱུཾ་ཕཊ། ཅེས་པས་ལྷག་མའི་གཏོར་མ་བྱིན་ནས་ཟས་དོར་བར་བྱའོ། །ཕྱིའི་དངོས་པོ་ལ་ལྟོས་པ་མེད་པའི་སླར་ཡང་ནང་གི་སྦྱིན་སྲེག་ནི། སྔར་བཞིན་རླུང་གིས་སྦར་ཏེ། རྟོག་པ་མཐའ་དག་གི་མུན་པ་དང་སྒྲིབ་པར་བྱེད་པ་རྣམས། ལྟེ་བའི་དཀྱིལ་འཁོར་གྱི་ཐབ་ཏུ་ཤིན་ཏུ་གཏུམ་པའི་གཏུམ་མོས་བསྲེགས་ཤིང༌། བྱང་ཆུབ་ཀྱི་སེམས་ཀྱི་ཟས་ཀྱི་སྦྱིན་སྲེག་གིས་སྦྱིན་སྲེག་བྱ་སྟེ། ཤེས་རབ་དང་ཐབས་ཀྱི་བདག་

---

^{[མ་དཔེ་གཟིགས་ན་འདིར་གནོན།]}

ཉིད་དང༌། ཉི་མ་དང་ཟླ་བ་རོ་མཉམ་པར་གྱུར་པ་ཤིན་ཏུ་འབར་བས་གང་བར་གྱུར་པའོ། །གཉིས་པ་འདི་ཡང༌། འཇིག་རྟེན་པའི་མངོན་པར་མཐོ་བའི་སར་གྱུར་པ་བླ་ན་མེད་པའི་སྦྱིན་སྲེག་སྟེ། སྐད་ཅིག་སོ་སོར་གོམས་པས་འཐོབ་བོ། །ད་ནི་གཏོར་མ་བརྗོད་པར་བྱ་སྟེ། དྲི་དང་མེ་ཏོག་ལ་སོགས་པ་གཡས་སུ་དང༌། མདུན་དུ་ཤ་ཀ་ཊ་དང༌། བྷ་ར་ལ་སོགས་པའི་སྣོད་དུ་ཉ་ཤ་དང༌། ཛམྦུ་ཌི་ཀ་ལ་སོགས་པ་དང༌། ཟས་བཟང་པོ་དང༌། ཆུ་ཁྱོར་བ་གསུམ་དང་ལྡན་པར་བྱ་ཞིང༌། ཇི་ལྟར་རྙེད་པའི་དམ་ཚིག་གི་རྫས་རྣམས་ཀྱང་ལྡན་པར་བྱས་ཏེ་བཞག་ལ། སྔར་བཞིན་བལྟས་ཏེ། བདུད་རྩི་མྱང་བའི་ཆོ་གའི་རིམ་པས་བདུད་རྩིར་བྱས་ཏེ། དེ་ཁོ་ན་ཉིད་གསུམ་གྱི་ཆོས་ཀྱི་འབྱུང་གནས་དཀར་པོ་དམར་པོ་ནག་པོ་གསུམ་གྱི་ཁུང་བུར་གནས་པའི་པདྨ་དམར་པོ་འདབ་མ་བརྒྱད་པ་ཅན་སྟེང་ནས་སྟེང་དུ་བལྟ་བར་བྱའོ། །དེ་ནས་སྙིང་གའི་ས་བོན་ལས་སྤྲོས་པའི་གཽ་རཱི། ཨོཾ་གཽ་རཱི་ཨིནྡྲ་ཨཱ་དཱི་ན་ས་པ་རི་བཱ་རཱ་ན་ཨཱ་ཀཪྴ་ཡ་ཛཿ་ཞེས་པས་བཀུག །ཨོམ་ཙཽ་རཱི་ཨིནྡྲ་ཨཱ་དཱི་ན་ས་པ་རི་ཝའ་རཱ་ན་པྲ་བེ་ཤ་ཡ་ཧཱུཾ་ཞེས་ཙཽ་རཱི་ས་པདྨ་རྣམས་སུ་བཅུག །ཨོཾ་བེ་ཏཱ་ལཱི་ཨིནྡྲ་ཨ་དཱི་ན་ས་པ་རི་བཱ་རཱ་ན་བནྡྷ་ཡ་བཾ་ཞེས་བེ་ཏཱ་ལཱི་སྤྲོས་པས་བཅིང་བས་བཅིངས། ཨོཾ་གྷསྨ་རཱི་ཨིནྡྲ་ཨཱ་དཱི་ན་ས་པ་རི་བཱ་རཱན་པྲ་བེ་ཤ་ཡ་ཧོཿ་ཞེས་པས་དབང་དུ་བྱས་ཏེ། དེ་ལ་ཆོས་ཀྱི་འབྱུང་གནས་དབུས་མ་ལ་གནས་པའི་པདྨའི་འདབ་མ་ལ། ཐོག་མར་དབང་པོ། མིག་སྟོང་ལྡན་པ་དཀར་པོ་རྡོ་རྗེ་དང་སྡིགས་མཛུབ་ཅན་གྱི་ཕྱག་གཉིས་པ་གླང་པོ་ཆེ་ས་སྲུང་གི་པུ་དཀར་པོ་ལ་ཞོན་པ། ལྷོའི་འདབ་མ་ལ་གཤིན་རྗེ་ནག་པོ། དབྱུག་པ་དང་སྡིགས་མཛུབ་ཅན་གྱི་ཕྱག་གཉིས་པ་མ་ཧེ་ལ་ཞོན་པ། ནུབ་ཀྱི་འདབ་མར་ཆུ་ལྷ་དཀར་པོ་ཆུ་སྲིན་ལ་ཞོན་པ། སྦྲུལ་གྱི་གདེངས་ཀ་བདུན་དང་ལྡན་པ། ཞགས་པ་དང་དུང་འཛིན་པ། བྱང་གི་འདབ་མ་ལ་ལུས་ངན་སེར་པོ་ལུས་རགས་པ། གཏེར་ལ་གནས་པ་བཱི་ཛ་པཱུ་ར་དང༌། ནེའུ་ལེའི་ཕྱག་ཅན། དེ་རྣམས་ཐམས་ཅད་རིན་པོ་ཆེའི་རྒྱན་དང་རིན་པོ་ཆེའི་ཅོད་པན་དང་ལྡན་པ། གཤིན་རྗེ་ཉི་མའི་གདན་དང་ཉི་མའི་འོད་ཅན་ནོ། །དབང་ལྡན་གྱི་འདབ་མར་དབང་ཕྱུག་

---

^{[མ་དཔེ་གཟིགས་ན་འདིར་གནོན།]}

ཆེན་པོ་དཀར་པོ། སྤྱན་གསུམ་པ། རལ་པའི་ཅོད་པན་དང་ལྡན་པ། རྩེ་གསུམ་དང་ཐོད་པའི་ཕྱག་རྒྱ་ཅན། སྟག་གི་པགས་པའི་ཤམ་ཐབས་ཅན། ཁྱུ་མཆོག་ལ་ཞོན་པ། གཽ་རཱི་ལ་མཉམ་པར་འཁྱུད་པ། ཟླ་བའི་གདན་དང་འོད་ཅན་ནོ། །མེའི་འདབ་མར་མེ་ལྷ་ཤིན་ཏུ་དམར་བ་ལྟོ་བ་འཕྱང་བ། ར་ལ་ཞོན་པ། སྨིན་མ་དང་རལ་པ་དམར་སེར་ཅན། བགྲང་ཕྲེང་དང་རིལ་བ་སྤྱི་བླུགས་ཀྱི་ཕྱག་ཅན། ཉི་མའི་གདན་དང་འོད་ཅན་ནོ། །བདེན་བྲལ་གྱི་འདབ་མར་སྲིན་པོའི་བདག་པོ་སྔོན་པོ་རོ་ལ་ཞོན་པ། སྐྲ་དམར་སེར་གྱེན་དུ་བརྫེས་པ། སྨིན་མ་འཁྱོག་པ་དང་བཅས་པ། གྲི་གུག་དང་ཐོད་པ་འཛིན་པ། རལ་གྲི་དང་ཕུབ་འཛིན་པ་ཞེས་ཁ་ཅིག་གོ །བདེན་བྲལ་གྱི་འདབ་མར་རླུང་ལྷ་སྔོན་པོ་རླུང་ཡབ་འཛིན་པ། རི་དགས་ལ་ཞོན་པ། རིན་པོ་ཆེའི་ཅོད་པན་ཅན། ཟླ་བའི་གདན་དང་འོད་དང་ལྡན་པ། རིན་པོ་ཆེའི་རྒྱན་འཆང་བའོ། །ཟེ་འབྲུ་ལ་སའི་ལྷ་མོ་སེར་མོ་རིན་པོ་ཆེའི་གོས་དང་རྒྱན་དང་ལྡན་པ། གཡོན་དུ་བུམ་པ་འཛིན་པ། གཡས་པས་དམ་བཅས་པ་སྔོན་དུ་ཉེ་བར་འགྲོ་བའི་ཕྱག་ཅན་ཟླ་བའི་གདན་དང་ཟླ་བའི་འོད་ཅན་ཡི་དགས་དང་མུན་པ་ཅན་གྱིས་བསྐོར་ཏེ་གནས་པའོ། །སྟེང་དུ་གནས་པའི་ཆོས་ཀྱི་འབྱུང་གནས་ཀྱི་པདྨའི་ཤར་གྱི་འདབ་མར། ཟླ་བ་དཀར་པོ་རྟ་དཀར་པོ་དང་ལྡན་པའི་ཀུ་མུ་ཏའི་ཤིང་རྟ་ལ་གནས་པ། ཕྱག་གཉིས་ཀྱིས་ཟླ་བས་མཚན་པའི་ཀུ་མུ་ཏ་འཛིན་པ། ཟླ་བའི་གདན་དང་འོད་ཅན་ནོ། །ལྷོར་ཉི་མ་ཉི་མས་མཚན་པའི་པདྨ་འཛིན་པ། རྟ་ལྗང་གུའི་ཤིང་རྟ་ལ་གནས་པ། རང་གི་གདན་དང་འོད་ཅན་ནོ། །ནུབ་ལ་སོགས་པ་དང་དབང་ལྡན་ལ་སོགས་པའི་མཚམས་ཀྱི་འདབ་མ་རྣམས་སུ་རིམ་པས་ས་སྐྱེས་དམར་པོ་ར་ལ་ཞོན་པ། མདུང་ཐུད་འཛིན་པའོ། །གཡས་ན་ཆུ་གྲི་དང་གཡོན་པས་མི་མགོ་ཟ་བའི་ཚུལ་གྱིས་འཛིན་པ་ཞེས་ཁ་ཅིག་གོ །ལྷག་པ་ལྗང་གུ་མདའ་དང་གཞུ་འཛིན་པ། པདྨ་ལ་གནས་པ། པུར་བུ་སེར་པོ་བགྲང་ཕྲེང་དང་རིལ་བ་སྤྱི་བླུགས་འཛིན་པ་སྟེ། རིན་པོ་ཆེའི་པ་ཏྲ་དང་བགྲང་ཕྲེང་འཛིན་པ་ཞེས་ཁ་ཅིག་གོ །སྦལ་བ་ལ་ཞོན་པའོ། །པ་སངས་དཀར་

---

^{[མ་དཔེ་གཟིགས་ན་འདིར་གནོན།]}

པོ་བགྲང་ཕྲེང་དང་རིལ་བ་སྤྱི་བླུགས་འཛིན་པ། པདྨ་ལ་གནས་པའོ། །སྤེན་པ་ནག་པོ་བགྲང་ཕྲེང་དང་དབྱུག་པ་འཛིན་པ། རུས་སྦལ་ལ་ཞོན་པའོ། །སྒྲ་གཅན་དམར་ནག་ཤིང་རྟ་ལ་གནས་པའི་ཉི་མ་དང་ཟླ་བའི་གདན་ཅན། སྐྲ་དང་སྨ་ར་དམར་སེར་འབར་བ་རྣམ་པར་འཇོམས་པའི་མཆེ་བ་བཞི་པ། ཉི་མ་དང་ཟླ་བའི་ཕྱག་ཅན་ནོ། །དེར་དེ་བཞིན་དུ་ཏོག་དུད་ཀ །རལ་གྲི་དང་ཀླུའི་ཞགས་པ་འཛིན་པ། ཨཙྪ་བྲི་ཏིའི་འབྲས་བུ་དང༌། ཀ་ཀ་ཊི་ཏྲ་འཛིན་པའོ་ཞེས་ཁ་ཅིག་གོ །ཟེ་འབྲུ་ལ་ཚངས་པ་སེར་པོ་ཞལ་བཞི་རྒྱས་པ། ཕྱག་བཞི་པ་གཡས་པའི་ཕྱག་གིས་བགྲང་ཕྲེང་འཛིན་པ། གཞན་གྱིས་མི་འཇིགས་པའི་ཚུལ་ཅན། གཡོན་གྱིས་དབྱུ་གུ་གསུམ་པ་དང༌། རིལ་བ་སྤྱི་བླུགས་འཛིན་པ། ངང་པ་ལ་ཞོན་པ་རལ་པ་ཅན་མཆོད་ཕྱིར་ཐོགས་དང་ལྡན་པ། ཚངས་པས་ཡོངས་སུ་བསྐོར་བ་མཚེ་མ་དང་དགའ་ལྡན་པ་ལ་སོགས་པ་དང༌། ཚངས་རིས་དང༌། ཚངས་པ་མདུན་ན་འདོན་ལ་སོགས་པ་རྣམས་དང༌། ལྷ་ཐམས་ཅད་གནས་པར་བལྟའོ། །ཆོས་ཀྱི་འབྱུང་གནས་འོག་མ་ལ་གནས་པའི་པདྨའི་ཤར་ལ་སོགས་པའི་འདབ་མ་རྣམས་སུ་རིམ་པས་སྟོབས་ཀྱི་རྒྱུ་དང༌། དུང་སྐྱོང་དང༌། མཐའ་ཡས་དང་ནོར་རྒྱས་རྣམས་ལྗང་གུ་དང་སེར་པོ་དང༌། སྔོན་པོ་དང་དཀར་པོ་རྣམས་སོ། །དབང་ལྡན་ལ་སོགས་པའི་ཕྱོགས་བྲལ་གྱི་འདབ་མ་རྣམས་སུ་འཇོག་པོ་དང༌། རིགས་ལྡན་དང༌། པདྨ་ཆེན་པོ་དང༌། པདྨ་རྣམས་དམར་པོ་དང༌། སྣ་ཚོགས་དང༌། དཀར་པོ་དང༌། དཀར་པོ་རྣམས་ཏེ། ནོར་རྒྱས་དམར་པོ་དང༌། འཇོག་པོ་དང༌། རིགས་ལྡན་སེར་པོའོ་ཞེས་ཁ་ཅིག་གོ །དེ་རྣམས་གདེངས་ཀ་བདུན་དང་ལྡན་པ་ཟེ་འབྲུ་ལ་ལྷག་མ་ཅན་དཀར་པོ་དེ་རྣམས་ཐམས་ཅད་ཀྱི་ལུས་ཕྱེད་མི་ལ་རིན་པོ་ཆེའི་ཅོད་པན་དང༌། རྒྱན་ཐམས་ཅད་དང་ལྡན་པ་རྣམས་ལྷག་མ་ཅན་བསྐོར་ཏེ་གནས་པ་གོ་ཆ་དང་བཅས་ཤིང་རལ་གྲི་འཛིན་པའི་ལྷ་མ་ཡིན་དང་དམྱལ་བ་པའི་སེམས་ཅན་བལྟ་བར་བྱའོ། །དབུས་དང་སྟེང་དང་འོག་གི་པདྨ་ལ་གནས་པ་རྣམས་རང་རང་གི་གཟུགས་ཡོངས་སུ་སྤངས་ཏེ། ཐུགས་དང་སྐུ་དང་

---

^{[མ་དཔེ་གཟིགས་ན་འདིར་གནོན།]}

གསུང་གི་རང་བཞིན་ཧཱུཾ་ཨོཾ་ཨཱཿའི་ཡི་གེ་ལས་སྐྱེས་པ་རྣམས་ནག་པོ་དཀར་པོ་དམར་པོའི་མདོག་ཅན་ཞལ་གཅིག་པ། ཕྱག་གཉིས་པ་རྡོ་རྗེ་དང་དྲིལ་བུ་འཛིན་པ། རང་བཞིན་གྱི་རིག་མ་ལ་འཁྱུད་པ། གཡས་བརྐྱང་གི་སྟན་ལ་གནས་པ་རྣམས་ལ། ཧེ་རུ་ཀའི་གཟུགས་ཀྱི་སངས་རྒྱས་རྣམས་ཀྱིས་དབང་བསྐུར་ཏེ། མི་བསྐྱོད་པ་དང་རྣམ་པར་སྣང་མཛད་དང༌། འོད་དཔག་ཏུ་མེད་པ་རྣམས་ཀྱིས་རྒྱས་བཏབ་པར་བལྟ་བར་བྱས་ནས། གཏི་མུག་རྡོ་རྗེ་མ་ལ་སོགས་པ་རྣམས་ཀྱིས་མིག་ལ་སོགས་པ་རྣམས་སུ་བྱིན་གྱིས་བརླབས་ཏེ། དེ་ནས་བར་མ་ཆད་པར་ཨོཾ་པྲ་བ་ར་སཏྐཱ་ར་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་པའི་སྔགས་ཀྱིས་དུང་ཆོས་ཀྱི་ཕྱག་རྒྱས་མདུན་དུ་དེ་རྣམས་ལ་མཆོད་ཡོན་ཕུལ་ནས། དུང་ཆོས་ཀྱི་ཕྱག་རྒྱས་ཞབས་དག་ལ་ཞབས་བསིལ་དབུལ་བར་བྱ་སྟེ། དེ་ནས་ཨིནད། ཛ་མ། ཛ་ལ། ཛཀྑ། བྷཱུ་ཏ། བཧྣི། བ་ཨུ། རཀྑ། ཙནད། སུཛྫ། མཱ་ད། པཔྤ། ཏ་ལཱ་པཱ་ཏཱ་ལི། ཨཊྚ་སཔྤ་སྭཱ་ཧཱ། ཞེས་པ་འདིས་བོས་ཏེ། སྒེག་པ་དང་བཅས་ཤིང་དྲིལ་བུའི་སྒྲ་བྱས་ལ། སྔར་བཞིན་བདུད་རྩིར་བྱས་པའི་གཏོར་མའི་ཟས་རྣམས་བདག་ཉིད་ཀྱི་ལྕེ་རྡོ་རྗེའི་སྦྱོར་བས་ཟོས་ཤིང་བཟའ་བར་བྱ་སྟེ། དེ་རྣམས་ཀྱང་དེ་བཞིན་ཁོ་ནར་དེ་མྱོང་བར་བྱེད་པའོ་ཞེས་བསམས་ཏེ། ཨི་དཾ་བ་ལིཾ། བྷུ་ཉྫ། ཛི་གྷ། ཕུལླ། དྷཱུཔྤ། མཱཾ་ས། པིངྷ། ཨམྦྷ། སཔྤ། ཀཛྫ། སཱ་ད། ཁནྟི། ཁུ་ཎེ། ཕེ་ཌ་གཱ་ད། ཞེས་པས་ཞལ་ཟས་སུ་བྱས་ནས་དྲིལ་བུ་གནས་གསུམ་རྣམས་སུ་དཀྲོལ་བར་བྱས་ཏེ། ཨོཾ་ཨ་ཀཱ་རོ་མུ་ཁཾ་སརྦ་དྷ་རྨཱ་ཎཱཾ་ཨཱ་དྱ་ནུ་ཏྤ་ནྣ་ཏྭཱ་ཏ་ཨོཾ་ཨཱཿ་ཧཱུཾ་ཕཊ་སྭཱ་ཧཱ། ཞེས་པ་འདིས་ཚིམ་པར་བྱས་ནས། དྲིལ་བུའི་སྒྲ་བྱས་ཏེ། ཀོ་ལལ་ཨི་རེ་ནྗཻ་ཨི་བོ་ལཱ། མུ་མྨུ་ཎི་རེ་ཀཀྐོ་ལཱ། གྷ་ཎེ་ཀྲྀ་པི་ཊ་ཧོ་བཱ་ཛྫ་ཨི། ཀཱ་རུ་ཎེ་ཀི་ཨ་ཨི་ན་རོ་ལཱ། ཏ་ཧིཾ་བ་ལ་ཁ་ཛྫ་ཨི། གེ་དྷཾ་མ་ཨ་ཎཱ་པི་ཛྫ་ཨི། ཧ་ལེ་ཀཱ་ལིཉྫ་ར་པ་ཎི་ཨ་ཨི། དུན་དུ་ར་བཱ་ཛྫི་ཨ་ཨི། ཙ་ཨུ་ས་མ་ཀཙྪུ་རཱི་སིཧླ། ཀཱ་པྤུ་ར་ལཱ་ཨི་ཨ་ཨི། མ་ལ་ཨིནྡྷ་ཎ་ས་ལིཉྫ། ཏ་ཧིཾ་བྷ་རུ་ཁ་ཨི་ཨ་ཨི། ཕྲེཾ་ཁ་ཎ་ཁ་ཊ་ཀ་ར་ནྟེ། ཤུ་དྡྷ་ཨ་ཤུ་དྡྷ་ན་མུ་ཎི་ཨ་ཨི། ནི་རཾ་ཤུ་ཨངྒེ་ཙ་ཌཱ་བི། ཏ་ཧིཾ་ཛ་ས་རཱ་བ་པ་ཎི་ཨ་ཨི། མ་ལ་ཨ་ཛེ་ཀུན་དུ་རུ་པཱ་ཏ་ཨི། ཌིན་ཌི་མ་ཏ་ཧིཾ་ན་བཛྫ་ཨ་ཨི། ཕྱི་ནས་བསང་

---

^{[མ་དཔེ་གཟིགས་ན་འདིར་གནོན།]}

གཏོར་ཕུལ་ནས་ཡང་དག་པར་མཆོད་དེ། ཨོཾ་ཨཱཿ་བཛྲ་པུ་ཤཱེ་ཧཱུཾ་སྭཱ་ཧཱ། ཞེས་པ་འདི་ཉིད་དང་དྷཱུ་པ་ལ་སོགས་པས་ཕུལ་ནས་རང་གིས་བྱེ་བྲག་མ་ཕྱེད་པ་དང༌། ཆོ་ག་དམན་དང་ལྷག་པ་སྦྱོང་བའི་དོན་དུ་སྔོན་བཞིན་ཡི་གེ་བརྒྱ་པ་བཀླག་ས་ནས་གཤེགས་སུ་གསོལ་ལོ་ཞེས་སོ། །རིམ་པའི་བར་མ་ཆད་པར་ཡང་གཏོར་མ་བརྗོད་དེ། ཀྱེ་རྡོ་རྗེའི་གཟུགས་ཀྱི་ཐུགས་ཀའི་ཧཱུཾ་ཡིག་གི་འོད་ཟེར་གྱིས། ཁྲོ་བོ་བཅུ་དང་བཅས་པའི་སྲུང་བའི་འཁོར་ལོའི་ལྟེ་བར་གནས་པའི་ཆོས་ཀྱི་འབྱུང་གནས་ཀྱི་ནང་དུ་གཞལ་ཡས་ཁང་རྒྱ་ཆེ་བ་ལ་གནས་པའི་དཀྱིལ་འཁོར་དང༌། སྲུང་བའི་འཁོར་ལོའི་ཕྱི་རོལ་གྱི་ཕྱོགས་ལ་སོགས་པ་རྣམས་སུ་དབང་པོ་ལ་སོགས་པ་འཁོར་དང་བཅས་པ་དང་སེམས་ཅན་དཔག་ཏུ་མེད་པ་བཀུག་པ་རྣམས་འོད་གསལ་དུ་བཅུག་ནས། སླར་ཡང་ཤེས་རབ་དང་བཅས་པའི་ཧེ་རུ་ཀའི་གཟུགས་སུ་སེམས་པར་བྱེད་པ་ལ་སོགས་པ་དང༌། ཞལ་ཟས་དབུལ་བ་ལ་སོགས་པ་སྔོན་བཞིན་ཏེ། ཐོག་མར་གཏོར་མ་སྦྱང་སྟེ། ཨོཾ་ཏྲཻ་ལོ་ཀྱ་ཨཱ་ཀྴེ་པ་ཡི་མཾ་བ་ལིཾ་གྲྀཧྣ་གྲྀཧྣ་ཨ་མུ་ཀ་སྱ་རཀྴཾ་ཤཱིནྟཾ་རཀྴཱ་ཉྩ་ཀུ་རུ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པའི་སྔགས་ཀྱིས་བཅོམ་ལྡན་འདས་ལ་ཞལ་ཟས་དབུལ་ལེ། །ཨོཾ་ཛྭ་ལ་བཛྲ་ལ་སོགས་པ་རྣམས་ཀྱིས་ཀྱང་སོ་སོ་ལ་བོད་པའི་དམ་ཚིག་བྱིན་ནས་རང་རང་གི་སྔགས་ཀྱིས་ཞལ་ཟས་དབུལ་བར་བྱའོ། །ཨོཾ་ཨཱ་ནཻ་ར་ཨཱ་ཏྨྱ་ཞེས་པ་ལ་སོགས་པས་བོད་པར་བྱས་ལ། དེའི་ས་བོན་ཡང་བཀླགས་ཏེ། ཨ་མུ་ཀ་སྱ་ཤཱིནྟཾ་རཀྴཱ་ཉྩ་ཀུ་རུ་ཧཱུཾ་སྭཱ་ཧཱ། ཨོཾ་ཧཱུཾ་ཞེས་པ་འདིས་བདག་མེད་མ་ལ་སོགས་པ་རྣམས་ལའོ། །ན་མཿ་སམནྟ་བུདྡྷེ་བྷྱོ། ན་མོ་བཛྲ་མུང་ག་ར་ཧ་སྟཱ་ཡ་ཙཎྜ་མཎྜལ་ཨཱ་ཀྴེ་པ་ཀ་རཱ་ཡ་ཧཱུཾ་ཕཊ། ན་མཿ་སམནྟ་བུདྡྷེ་བྷྱོ། མ་ཧཱ་དཎྜ་དྷ་ར་བི་བི་དྷ་སུ་ར་ཨ་སུ་ར། མརྡྷ་ན་བྷཱུ་ཏཱ་ནྣི་རྨ་ཐཱ་ཧཱུཾ་ཕཊ། ན་མཿ་སམནྟ་བུདྡྷེ་བྷྱོ། །ན་མོ་བཛྲ་ཀྲོ་དྷཱ་ཡ་མ་ཧཱ་དཾ་ཤྚྲོ་ཏྐ་ར་བྷཻ་ར་བ་ཡ། བཛྲ་སྣོད་ཧ་དརྤཱ་ཡ། ཨོཾ་ཨ་མྲྀ་ཏ་ཀུནྜ་ལི་རཀྴཾ་མ་མ་ཀུ་རུ་ཧཱུཾ་ཕཊ། ན་མཿ་ས་མནྟ་བུདྡྷེ་བྷྱོ། །ན་མོ་ཨ་ཙ་ལ་ཀཱ་ཎྰཾ། ཙེཊྚ་ཙེཊྚ། མོཊྚ་མོཊྚ། ཏུཊྚ་ཏུཊྚ། གྷ་གྷ། གྷཱ་ཏ་ཡ་གྷཱ་ཏ་ཡ་ཧཱུཾ་ཕཊ། ན་མཿ་ས་མ་ནྟ་བུ་དྡྷེ་བྷྱོ། ཊཀྐི་

---

^{[མ་དཔེ་གཟིགས་ན་འདིར་གནོན།]}

ཧཱུཾ་ཛཿ་ན་མཿ་སམནྟ་བུདྡྷེ་བྷྱོ། ཨོཾ་ཡ་མ་དཎྜ་ཡ། ནི་ལཱ་དཎྜ་ཡ། ཏུ་རུ་ཏུ་རུ། མུ་རུ་མུ་རུ། སརྦྦ་དུ་ཤྟཱཾ་མཱ་ར་ཡ་མཱ་ར་ཡ་ཧཱུཾ་ཕཊ། ན་མཿ་ས་མནྟ་བུདྡྷེ་བྷྱོ། ན་མོ་མ་ཧཱ་བ་ལཱ་ཡ་ཨུ་ཙྪུཤམ་ཀྲོ་དྷ་རཱ་ཛཱ་ཡ། སརྦ་ནཱ་ག་ནཱཾ། ཧྲྀ་ད་ཡཾ། ཏཱཌ་ཡ་ཧཱུཾ་ཕཊ། ན་མཿ་སམནྟ་བུདྡྷ་ནཾ། ན་མཿ་སམནྟ་དྷ་རྨཱ་ནཱཾ། ན་མཿ་སམནྟ་སཾ་གྷཱ་ཎཱཾ། ཨོཾ་སི་ཏ་ཏ་པ་ཏྲ། ཨོཾ་བི་མ་ལཱ། ཨོཾ་སྒྲྀཧྣགྐ་ར། ཨོཾ་པྲ་ཏྱ་ངྒི་ར། ཨོཾ་བཛྲ་ཨུ་ཤྞཱི་ཤ་ཙ་ཀྲ་བརྟི། སརྦ་ཡནྟྲ་མནྟྲ། མཱུ་ལ་ཀ་རྨམ། བྣྡྷ་ནཱཾ། ཏཱ་ཌ་ནཱཾ་ཀཱི་ལ་ནཾ་བཱ། མ་མ་ཀྲྀ་ཏེ། ཡེ་ན་ཀེ་ན་ཙི་ཏཏ་ཀྲི་ཏཾ་ཏ། སརྦ་ནྟུ། ཙྪིནྡ་ཙྪིནྡ། བྷིནྡ་བྷིནྡ། ཙི་རི་ཙི་རི། གི་རི་གི་རི། མ་ར་མ་ར། ཧཱུཾ་འྷུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། ཨོཾ་སུམྦྷ་ནི་སུམྦྷ་ཧཱུཾ། གྲྀ་ཧྞ་གྲྀ་ཧྞ་ཧཱུཾ། གྲྀ་ཧྞཱ་པ་ཡ་གྲྀ་ཧྞཱ་པ་ཡ་ཧཱུཾ། ཨཱ་ན་ཡ་ཧོ་བྷ་ག་བཱ་ན་བཱིདྱ་རཱ་ཛ་ཧཱུཾ་ཕཊ། ཅེས་པ་མཁའ་འགྲོ་མ་རྡོ་རྗེ་གུར་དུ་གསུངས་པའི་སྔགས་བཅུས་ཤར་ལ་སོགས་པའི་ཕྱོགས་རྣམས་དང་དབང་ལྡན་ལ་སོགས་པ་རྣམས་སུ་ཡང་གཡས་སྐོར་གྱིས་དང༌། སྟེང་དང་འོག་ཏུ་ཡང་གཤིན་རྗེའི་རྗེ་བོ་ལ་སོགས་པའི་ཁྲོ་བོ་བཅུ་པོ་རྣམས་ལའོ། །ཨོཾ་ཨིནད་ཛ་མ་ཛ་ལ། ཞེས་པ་ལ་སོགས་པ་རྣམས་ཀྱིས་དབང་པོ་ལ་སོགས་པ་རྣམས་ལ་ཡང་སྔོན་བཞིན་སྦྱིན་པར་བྱས་ཏེ། དེ་རྣམས་ཀྱིས་ཀྱང་སྔོན་བཞིན་བདུད་རྩི་མྱངས་པས་མཆོག་གི་བདེ་བ་ཆེན་པོ་ཐོབ་པར་གྱུར་ནས་སྒྲུབ་པ་པོའི་མངོན་པར་འདོད་པ་སྒྲུབ་པར་བྱེད་པའོ་ཞེས་བསམས་ཏེ། སྨོན་ལམ་ལ་སོགས་པ་བྱས་ནས་སྔོན་བཞིན་གཤེགས་སུ་གསོལ་ཞེས་པའོ། །འདི་ཡང་བསྐྱེད་པའི་རིམ་པའི་གཏོར་མའི་ཆོག་གཉིས་པའོ། །བསྐྱེད་པའི་རིམ་པར་ནི་ཤེས་རབ་དང་ཐབས་རྗེས་སུ་གཡོས་པའི་ཁུ་བས་ཟས་ཙམ་གྱི་རོ་མྱང་བས། ཤེས་རབ་དང་ཐབས་ཀྱི་ངོ་བོ་རྣམས་ལ་དང༌། དེ་བཞིན་དུ་རང་ཇི་ལྟར་འདོད་པའི་དཀྱིལ་འཁོར་གྱི་དབང་པོ་ལ་སོགས་པའི་ལྟ་དང་ཕན་པ་དང་བཅས་པའི་དབང་པོ་ལ་སོགས་པ་རྣམས་ལ་ཡེ་ཤེས་ཀྱི་རོ་དང་དབྱེར་མེད་པའི་གཏོར་མས་ཉེ་བར་མཆོད་པ་ནི་གཏོར་མའི་ཆོ་གའོ། །ཆོ་ག་ཇི་ལྟ་བར་སྦྱང་བར་བྱས་པའི་བགྲང་ཕྲེང་ཚད་ལྡན་རྣམས་ཀྱིས་སྔགས་བཟླས་པས་མྱུར་བར་དངོས་གྲུབ་སྦྱིན་པར་འགྱུར་རོ་ཞེས་པས། དེའི་ཆོ་གཅུང་ཟད་བརྗོད་པར་བྱ་སྟེ། མིག་ནི་ལྷ་ལ་ལྷག་པར་མོས་པའི་

---

^{[མ་དཔེ་གཟིགས་ན་འདིར་གནོན།]}

ཚུལ་རང་བཞིན་གྱིས་ཤེས་པའོ། །དེ་གསལ་བར་བྱེད་པའི་ཕྱིར་སྲད་བུའི་མིང་ཅན་ཏེ། ཨཀྵ་སུ་ཏྲའོ། །ཡི་གེ་རྣམས་ཀྱི་སྲད་བ་ཡིན་པའི་ཕྱིར་དང༌། གྲངས་སུ་བྱེད་པའི་ཕྱིར་ཨཀྵ་སུ་ཏྲ་སྟེ། བགྲང་ཕྲེང་ངོ༌། །ཨི་ལས་བརྗོད་པ་མ་ཡིན་པའི་ཞེས་པས་རེ་ཕ་དབྱེའོ། །དེ་ལ་མུ་ཏིག་དང་ཤེལ་དང༌། རུས་པ་ལ་སོགས་པ་རྣམས་ལ་ཟླུམ་པོ་མཛེས་པར་བྱས་པའི་རིལ་བུ་རྣམས་ཀྱིས་ཞི་བ་དང༌། དངུལ་ལ་སོགས་པ་རྣམས་ཀྱིས་རྒྱས་པ་དང༌། ཙནད་ན་དམར་པོ་དང༌། བྱུ་རུ་ལ་སོགས་པ་རྣམས་ཀྱིས་དབང་དང༌། རུ་དྲཱ་ཀྴ་དང༌། ལུང་ཏང་དང་མ་ཧེའི་རུས་པ་ལ་སོགས་པ་རྣམས་ཀྱིས་མངོན་སྤྱོད་ཀྱི་ལས་དང༌། བུའི་བོན་གྱི་ལས་ཐམས་ཅད་པར་ཁ་སྦྱོར་ཐིག་ལེར་གསུངས་ཤིང་བརྟག་པ་གཉིས་པར་ནི། ཤེལ་གྱིས་རེངས་པའི་བཟླས་པ་ཉིད། །ནི་རཾ་ཤུས་ནི་སྡང་བ་ལ། །རྟ་ཡི་རུས་པས་སྐྲོད་པ་ཉིད། །བྲམ་ཟེའི་རུས་པས་དགུག་པ་ལ། །གླང་པོའི་རུས་པས་ཆར་འབབ་པ། །ཞེས་སོ། །རིལ་བུ་བརྒྱ་རྣམས་ཀྱིས་ཞི་བ་དང༌། བརྒྱད་ལྷག་པས་རྒྱས་པ་དང༌། ཉི་ཤུ་རྩ་ལྔས་དབང་དུ་བྱས་བ་དང༌། དྲུག་ཅུས་མངོན་སྤྱོད་ལ་དང་རྒྱས་ལས་ཐམས་ཅད་ལའོ། །འཇམ་དཔལ་གྱི་རྒྱུད་དུ་གསུངས་པ། །བརྒྱ་དང་བརྒྱད་དམ་ཉི་ཤུ་ལྔ། །ལྔ་བཅུ་དེ་བཞིན་བར་མའོ། །དེ་ཡི་ཚད་ཀྱི་ཕྲེང་རྣམས་ནི། །ཀུན་ཕན་སྔགས་པས་ཐག་པར་བརྒྱུ། །སྟོང་ཕྲག་བརྒྱད་ཀྱང་དེ་བཞིན་བྱ། །ཕྲེང་བ་རྣམས་ནི་མཐེ་བོང་ཙམ། །དེ་ལྟར་ཕྲེང་པ་རྣམ་པ་བཞི། །འདིར་ནི་སྔགས་པས་བརྒྱུ་བར་བྱ། །ཞེས་སོ། །དེ་ལ་གཞོན་ནུ་མས་བྱས་པའི་སྲད་བུ་རྣམས་པདྨའི་ཕྱག་ལ་སོགས་པའི་བྱང་ཆུབ་སེམས་དཔའ་བརྒྱད་རྣམ་པར་དག་པ་ཕྱོགས་དང་ཕྱོགས་བྲལ་རྣམས་སུ་བརྒྱད་དང༌། དབུས་སུ་ཀུན་ནས་རྫོགས་པའི་སངས་རྒྱས་ཀྱི་རང་བཞིན་རྡོ་རྗེ་སེམས་དཔའ་རྣམ་པར་དག་པས་གཅིག་གོ་ཞེས་ཏེ། དགུའི་ཡོན་ཏན་གྱི་སྲད་བུ་བསྒྲིལ་བར་བྱས་ནས། རིམ་པས་རིལ་བུ་ཐག་པ་ལ་བརྒྱུས་ཏེ། སྲད་བུའི་གདོང་གཉིས་མདུད་པ་བྱས་པའི་སྟེང་དུ་རིལ་བུ་སྟེ། ཀུན་དུ་བསྟེན་པའི་སྟོབས་དང༌། མི་འཇིགས་པ་ལ་སོགས་པ་དང་པོའི་ཆོས་ཀྱི་སྐུ་ཉིད་དོ། །དེའི་སྟེང་དུ་རིལ་བུ་གཞན་ནི་ཆོས་ཀྱི་དབྱིངས་དེ་བཞིན་

---

^{[མ་དཔེ་གཟིགས་ན་འདིར་གནོན།]}

ཉིད་དོ། །དེ་ནས་ཞི་བ་ལ་སོགས་པའི་ལས་དང་རྗེས་སུ་མཐུན་པའི་ཁ་དོག་གི་རིལ་བུ་ཙན་ད་ན་ལ་སོགས་པ་རྣམས་ཀྱིས་བསྒོ་བར་བྱའོ། །ཀྱེ་རྡོ་རྗེ་ལ་སོགས་པའི་སྔགས་བཟླ་བས་ནི་བདུད་རྩི་ལྔ་དང་སྒྲོན་མ་ལྔ་ཡིས་སྦྱངས་ཏེ། མྱུར་བར་ལག་པ་གཡས་ཀྱི་སོར་མོ་རྣམས་རྡོ་རྗེ་རྩེ་ལྔ་པའི་ངོ་བོར་བསྒོམས་ནས། ཨ་ཡིག་ལས་སྐྱེས་པའི་ཉི་མས་དེ་བྱིན་གྱི་བརླབ་པོ། །གཡོན་པའི་སོར་མོ་པདྨའི་འདབ་མའི་རྣམ་པར་གསལ་བ་ལ། དང་པོའི་དབྱངས་ཡོངས་སུ་གྱུར་པ་ལ་རི་དགས་མཚན་པ་སྟེ། དེས་བྱིན་གྱིས་བརླབ་ཅིང༌། སོ་སོར་ཤེས་རབ་དང༌། ཐབས་ཀྱི་རང་བཞིན་དེ་ངག་གི་དབུས་སུ། བགྲང་ཕྲེང་བཟུང་ནས། ཀྱེ་རྡོ་རྗེའི་གཟུགས་ཀྱི་བར་མ་ཆད་པར་མངོན་པར་འདོད་པའི་ལྷའི་ངོ་བོར་རམ། ཐམས་ཅད་རིལ་བུར་བསྒོམ་པར་བྱའོ། །AKSHA་རུ་ཀཱ་ར་ཉ་ཏུ་ཨ་སོ་ཧི་ཨ་མནྟ་བི་ས་རུ་ག་ནི་ཨ་སཾ་ཁ་ཨ་ལི་སི་ཛྫ་ཨི་ཏ་ཏུ་བི་ས་རུ་ཨོཾ་པ་དེ་པ་དེ་མ་ཧཱ་ཛྙཱ་ན་སརྦ་བུདྡྷ་མ་གྲྀཧྣདྷ་མ་ཧནྡྷ་བི་ཏེ་ཧཱུཾ་ཧཱུཾ་ཧཱུཾ་ཧོཾ་ཧོཾ་ཧོཾ་ཨཱ་སྭཱ་ཧཱ། ཞེས་པས་བྱིན་གྱིས་བརླབས་ལ། བརྒྱད་ལྷག་པའི་བརྒྱར་བསྒྱུར་པའི་སྔགས་བཟླས་པས་ཀྱང་བྱིན་གྱིས་བརླབ་བོ་ཞེས་པ་རབ་ཏུ་གནས་པའི་ཆོ་གའོ། །དེའི་རྗེས་སུ་སྡོང་པ་ཉིད་དང་སྙིང་རྗེ་དག་དབྱེར་མེད་པར་ལྷག་པར་མོས་པས། གཡས་པའི་ལག་པས་ཞི་བ་དང་རྒྱས་པ་དང་དབང་དང་མངོན་སྤྱོད་ཀྱི་ལས་རྣམས་ལ། གྲངས་ཇི་ལྟ་བར་སྡིགས་མཛུབ་དང༌། གུང་མོ་དང༌། མིག་མེད་དང༌། མཐེའུ་ཆུང་རྣམས་སུ་གྲུང་ཕྲེང་གི་ཕྲེང་བ་གཞག་པ་ཡང༌། མ་ཐེ་བོང་གི་རྩེ་མོ་རྡོ་རྫེ་ལྕགས་ཀྱུའི་ངོ་བོར་བསྒོམས་ཏེ། ལྷ་དགུག་པའི་བསམ་པ་དང་བར་བྱས་ནས་སྔགས་བཟླས་པར་བྱ་སྟེ། མྱུར་དུ་འགྲུབ་པར་བྱེད་དོ། །དམ་ཚིག་དག་ནི་བསྟེན་པ་དང༌། །རྣལ་འབྱོར་སྒོམ་པར་བྱེད་པ་དང༌། །སྔགས་བཟླས་པ་ལ་སོགས་པ་ཡིས། །མྱུར་དུ་འབྲས་བུ་ལྡན་པར་འགྱུར། །ཞེས་པས། དམ་ཚིག་འགའ་ཞིག་བརྗོད་པར་བྱ་སྟེ། སེམས་ཅན་རྣམས་ལ་སྙིང་བརྩེ་བ་དོར་བར་མི་བྱ་བ་དང༌། གཞན་ལ་ཚུལ་ཁྲིམས་ཕུན་སུམ་ཚོགས་པ་མེད་པར་གླེང་བར་མི་བྱ་བ་དང༌། མངོན་སྤྱོད་ཀྱི་ལས་མི་བྱ་བ་དང༌། འཇིགས་པ་དང་ཞུམ་པ་དང་ཁྲོ་བ་ལ་

---

^{[མ་དཔེ་གཟིགས་ན་འདིར་གནོན།]}

སོ་པ་ཡོངས་སུ་སྤང་བ་དང༌། རྙེད་པ་དང་བཀུར་སྟི་ལ་སོགས་པའི་དོན་དུ་བདག་གི་ཡོན་ཏན་བསྒྲགས་པར་མི་བྱ་བ་དང༌། ཕྱག་རྒྱ་དང་དཀྱིལ་འཁོར་དང་སྔགས་རྣམས་རང་གི་རྟོག་པ་ཙམ་གྱིས་མི་བྱ་བ་དང༌། བདེ་བར་བཤེགས་པས་གསུངས་པའི་སྣ་ཚོགས་པའི་སྔགས་དང་ལྷ་རྣམས་ཀྱང་དབྱེ་བ་མེད་པར་གཟུང་བར་བྱ་ཞིང༌། ཡུལ་གང་དུ། བླ་མ་དང་སངས་རྒྱས་དང་བྱང་ཆུབ་སེམས་དཔའ་ལ་སོགས་པ་རྣམས་ལས་སླར་ཆོས་དང་ཆོ་ག་ཐོབ་པར་བྱ་བ་དང༌། བཟའ་བྱ་དང༌། བཟའ་བྱ་མ་ཡིན་པ་ལ་སོགས་པ་རྣམས་རང་བཞིན་གྱིས་ཡོངས་སུ་དག་པར་མོས་པར་བྱ་བ་དང༌། འཇིག་རྟེན་ལ་གནོད་པ་རྣམས་རྗེས་སུ་བསྲུང་བ་ལ་འཇུག་པར་གོམས་པར་བྱ་བ་དང༌། བྱ་བ་ངན་པར་སྤྱོད་པ་རྣམས་དྲངས་ཏེ། བདག་གི་ནང་གི་ནང་དུ་ཐོབ་པར་བྱ་བ་དང༌། སྒོམ་པ་པོ་བདག་རྣལ་འབྱོར་བ་དང༌། རྣལ་འབྱོར་མའི་བདག་ཉིད་དུ་ཐེ་ཆོམ་ཟ་བ་དེ་རྣམས་ཀྱི་མཐོང་བར་འགྱུར་བའི་དོན་སྤོང་བ་དང༌། བརྡ་རྣམས་ལ་བདག་གོམས་པར་བྱ་བ་དང༌། ཇི་ལྟར་ཚོགས་པའི་འདོད་པའི་ཡོན་ཏན་ལྔ་དེ་བཞིན་གཤེགས་པ་ལྔ་དག་པས་བསྟེན་པར་བྱ་བ་དང༌། བུད་མེད་རྣམས་གདུང་བར་མི་བྱ་ཞིང་ཁྱད་པར་དུ་ཕྱག་རྒྱའོ་གཟུངས་མ་ལ་ཚིག་ངན་མི་བྱ་བ་དང༌། མཚན་མའི་རྣམ་པ་དང༌། བཟའ་བ་རྣམས་ལ་འགོམ་པར་མི་བྱ་བ་དང༌། ཆོམ་རྐུན་གྱི་གྲོགས་སྤང་པར་བྱ་བ་དང༌། བདུད་རྩི་ལྔ་དང་སྒྲོན་མ་ལྔ་ནག་པོའི་ཚེས་བརྒྱད་དམ་བཅུ་བཞི་ལ་རིལ་བུར་བྱས་ནས་གྲིབ་མ་ལ་བསྐམས་ཏེ། ཐོད་པའི་སྣོད་ཁ་སྤྱོར་དུ་གཞག་ཅིང་ཇི་ལྟ་བར་བདུད་རྩིར་བྱས་ནས་ཉི་མ་སོ་སོར་བསྟེན་པར་བྱ་བ་དང༌། རྩ་བའི་ལྟུང་བ་བཅུ་བཞི་དང༌། སྦོམ་པོའི་ལྟུང་བ་བརྒྱད་རྣམས་འབད་པས་སྤང་བར་བྱ་སྟེ། དེ་རྣམས་ནི་རབ་ཏུ་གྲགས་པ་ཉིད་ཡིན་པས་མ་བྲིས་སོ། །དེ་རྣམས་དང་གཞན་ཡང་དམ་ཚིག་གི་ཁྱད་པར་རྨད་དུ་བྱུང་བ་རྣམ་པ་མང་པོ་དེ་དང་དེ་རྣམས་བཅོམ་ལྡན་འདས་ཀྱིས་རྒྱུད་རྣམས་སུ་གསུངས་པ་རྣམས་གྲུབ་པ་རྣམས་ཀྱིས་ཀྱང་རབ་ཏུ་སྤྲོས་སོ། །དེ་ལྟར་རྟོགས་པར་བྱས་ནས་འགོམ་པར་མི་བྱས་ཞིང༌། དམ་ཚིག་སྨྲ་བར་ཡང་མི་བྱའོ་ཞེས་པའོ། །བརྟག་པ་གཉིས་པ་ལ་སོགས་རྒྱུད་རྣམས་སུ། དེ་ཡི་

---

^{[མ་དཔེ་གཟིགས་ན་འདིར་གནོན།]}

ཐབས་ནི་རྣམ་པ་དུ་མ་ཞིག །མཐོང་ནས་རྣམ་པ་སྣ་ཚོགས་མངོན་རྟོགས་དང༌། སྒྲུབ་པའི་ཐབས་རྣམས་གཞན་ཡང་འབད་པར་བྱས། སྲོག་དང་འདྲ་བའི་བླ་མེད་བླ་མ་དང༌། །དོན་དུ་གཉེར་བའི་སློབ་མ་རྣམས་ཀྱིས་ཀྱང༌། །ཅུང་ཟད་དག་ནི་བསྐུལ་བར་གྱུར་པ་ལ། །འདི་ནི་བདག་གིས་རབ་ཏུ་བཀོད་པ་ཡིན། །རང་ཉིད་གཟུགས་བརྙན་འདྲ་ཡང་བསྐུལ་བ་ལས། །ཐུབ་པའི་དགོངས་པ་ཅུང་ཟད་འཆད་པ་གང༌། །དེ་ནི་ངན་པའི་སྤྱོད་པ་ཉིད་ཡིན་ཏེ། །ལྟུང་བ་དང་བཅས་དམྱལ་བ་རྣམས་སུ་འགྱུར། །མངོན་པར་རྟོགས་པའི་ཐིག་ལེ་འདི་བྱས་ལ། །བདག་གིས་དགེ་བ་ཉེ་བར་བསྒྲུབས་པ་གང༌། །དེ་ཡིས་མྱུར་དུ་དཔལ་ལྡན་ཀྱེ་རྡོ་རྗེའི། །རྣལ་འབྱོར་སྣོད་དུ་བདག་དང་འཇིག་རྟེན་གྱུར། །རྣམ་པར་གྲགས་པའི་མཁས་པ་གནས་བརྟན་ཤཱཀྱ་སྲུང་བའི་ཞབས་ཀྱིས་མཛད་པའི། དཔལ་ཀྱེ་རྡོ་རྗེའི་མངོན་པར་རྟོགས་པའི་ཐིག་ལེ་འདི་རྫོགས་སོ།། །།ལུང་རིགས་ཀྱི་དབང་ཕྱུག་སྐད་གཉིས་སྨྲ་པའི་གཙུག་གི་ནོར་བུ། །དཔལ་ལྡན་བྱང་ཆུབ་རྩེ་མོའི་བཀའ་དྲིན་ལས། །བརྡ་སྤྱོད་པའི་ཚུལ་ལ་བློའི་སྣང་བ་ཅུང་ཟད་ཐོབ་པ་ཤཱཀྱའི་བཙུན་པ་སྐྱོབ་པ་དཔལ་བཟང་པོ་ཞེས་བྱ་བས་བསྒྱུར་བའོ། །རྒྱུད་རྒྱལ་རིན་ཆེན་འབྱུང་གནས་བསྲུབས་པ་ལས། འབྱུང་བའི་ནོར་བུ་རིམ་གཉིས་འོད་དཀར་ཅན། །གང་འདིས་བོད་ཡུལ་གདུལ་བྱའོ་ཀུ་མུད་ཚལ། །རྒྱས་པར་བྱ་ཕྱིར་སྐྱོབ་པ་དཔལ་བཟང་པོས། །བསྒྱུར་ལས་བྱུང་བའི་དགེ་བ་རབ་དཀར་བ། །དེ་ཡིས་འགྲོ་ཀུན་རྡོ་རྗེ་འཛིན་གྱུར་ཅིག ། པཎྜི་ཏ་ལ་མ་གཏུགས་པ་དང༌། རྒྱ་དཔེ་གཉིས་པའང་མ་རྙེད་པས་ནོངས་པའི་ཆ་མཆིས་པ་རྣམས་མཁས་པ་རྣམས་ཀྱིས་བཟོད་པར་མཛད་ནས་སླར་བཅོས་ཤིང་ཉེས་པའི་ཆ་རྣམས་འདོར་བར་བྱའོ།།