དབང་རིན་ཆེན་སྣང་བ།
ཤེས་རབ་གསང་བས་མཛད།
རྒྱ་གར་སྐད་དུ། །ཨ་བྷི་ཥེ་ཀ་ར་ཏྣ་ཨཱ་ལོ་ཀ །བོད་སྐད་དུ། དབང་རིན་ཆེན་སྣང་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བཅུ་གཉིས་ཕྱེད་ཀྱི་ཕྱེད་མེད་པ། །བཅུ་གཉིས་ཕྱེད་ཀྱི་ཕྱེད་རང་ཡིན། །བཅུ་དྲུག་ཕྱེད་ཀྱི་རོ་ཡོད་པ། །བཅུ་དྲུག་ཕྱེད་ཕྱེད་ལ་ཕྱག་འཚལ། །གང་འདི་སུས་ཀྱང་མི་ཤས་པ། །གང་འདི་སུས་ཀྱང་གསལ་མ་བྱས། །རྒྱུད་རྒྱུད་ན་ནི་གསང་བ་བཞུགས། །དེ་ཡི་དབང་མཆོག་བདག་གིས་བཤད། །དབང་མེད་ན་ནི་མྱུར་འགྲུབ་མེད། །རྡོ་རྗེ་དབང་ཕྱུག་དེ་སྐད་གསུངས། །ཡན་ལག་ཐམས་ཅད་དབང་སྐལ་ལྡན། །སྐལ་ལྡན་མིན་ན་ནམ་ཡང་མིན། །མཁས་པས་དེ་ལ་སྦྱིན་པར་བྱ། །ཕྱག་ན་རྡོ་རྗེས་དེ་སྐད་གསུངས། །ཐམས་ཅད་མཚན་གྱིས་གང་བ་དང༌། །རྒྱུད་ཀུན་ཐམས་ཅད་ཤེས་པ་དང༌། །དབང་བསྐུར་ཤེས་དང་ཐུགས་རྗེ་ཆེ། །དེ་ནི་བླ་མ་རྡོར་རྒྱལ་ཉིད། །བླ་མ་འབད་དེ་མ་ཉེས་པར་བྱ། །རྒྱུད་ལས་འབྱུང་བཞིན་མཆོད་བསྟོད་བྱ། །ཡོན་ཏན་ཕུང་པོ་བརྗོད་མི་ནུས། །ཡེ་ཤེས་རྒྱ་མཚོ་གཏིང་དཔག་དཀའ། །སྐུ་ནི་རང་བཞིན་དཔལ་དང་ལྡན། །སེམས་དཔའ་ཐམས་ཅད་ཀྱི་མ་འདྲ། །ཡེ་ཤེས་ཉི་མ་བཅོམ་ལྡན་འདས། །གཞན་གྱི་དོན་དུ་ཁྱོད་ནི་ཤར། །འཁོར་བ་དྲན་པའི་དོན་དུ་ནི། །དཀྱིལ་འཁོར་གསལ་བར་བདག་ལ་མཛོད། །དེ་ནས་ཡན་ལག་དྲི་ཞིམ་བསྐུས་ཏེ་གོས་བཟང་བརྒྱན། །སྐལ་ལྡན་གྱིས་ནི་ལྷན་ཅིག་དཀྱིལ་འཁོར་བྲི་དོན་དུ། །ས་ལ་མཆོད་པ་རབ་ཏུ་འབད་དེ་རྣམ་པར་བྱ། །རིན་ཆེན་སྣ་ཚོགས་ས་འོག་གཞུག་ཅིང་གཏེར་དུ་སྦ། །དཔལ་ཆེན་རིན་ཆེན་རྒྱ་མཚོ་ཡི། །རྒྱུད་ལས་དཀྱིལ་འཁོར་ཐ་དད་གསུམ། །མེ་ཏོག་ཡང་ན་རྡུལ་ཚོན་པིར། །ཡང་ན་ཏིང་
འཛིན་མཆོག་གིས་བྱ། །རྒྱལ་པོ་ཆོམ་རྐུན་འཇིགས་པའི་གནས། །ནམ་ཡང་དཀྱིལ་འཁོར་དེར་མི་བྱ། །སྐྱོན་ནི་ཐམས་ཅད་བྲལ་བ་ཡི། །གནས་སུ་མཁས་པས་བརྩམ་པར་བྱ། །དང་པོ་ཇི་ཙམ་ནུས་ཀུན་གྱིས། །དད་པས་བླ་མ་མཆོད་པར་བྱ། །བླ་མའི་ཞབས་ལ་མཆོད་བྱས་ན། །ཐེ་ཚོམ་མེད་པར་དངོས་གྲུབ་ཐོབ། །རྟ་དང་གླང་པོ་མུ་ཏིག་རིན་ཆེན་གསེར་དངུལ་དང༌། །རས་ལ་སོགས་པ་སྣ་ཚོགས་ཅི་ལ་དགྱེས་པ་དང༌། །ཆུང་མ་བུ་མོ་སྲིང་མོ་གཟུགས་ནི་བཟང་བ་དང༌། །དགའ་བའི་ཡིད་ཀྱིས་དེ་རྣམས་ཐམས་ཅད་དབུལ་བར་བྱ། །མགོན་པོའི་སྤྱན་གྱིས་བདག་ལ་གཟིགས། །ཁྱོད་ནི་བདག་གི་སྟོན་ཆེན་པོ། །དམ་ཚིག་དེ་ཉིད་བདག་ལ་སྩོལ། །ཐར་པའི་ལམ་ཉིད་བདག་ལ་སྩོལ། །པདྨའི་འབྱུང་བ་བདག་ལ་སྩོལ། །གསང་བའི་མཆོག་ནི་བདག་ལ་སྩོལ། །ཐམས་ཅད་མཁྱེན་ལ་ཕྱག་འཚལ་ལོ། །ཡེ་ཤེས་ཉི་འོད་ལ་ཕྱག་འཚལ། །ཐམས་ཅད་མཁྱེན་སྨན་ཕྱག་འཚལ་ལོ། །ཡེ་ཤེས་བདུད་རྩི་གཙོ་ཕྱག་འཚལ། །སྐྱེས་བུ་ཁྱོད་ནི་སུ་ཞིག་ཡིན། །ཁྱོད་ནི་ཅི་འདོད་བདག་ལ་སྨོས། །དཔའ་བོ་ཆེན་པོ་བདག་སྐལ་ལྡན། །ཐོག་མའི་དབང་ནི་བདག་ལ་སྩོལ། །དེ་ནས་དེ་ཡིས་མདའ་ཡི་རས། །དེ་ཡི་ཕྱི་རོལ་ཡོན་རྣམས་དབུལ། །རྣམ་པར་སྣང་མཛད་གཟུགས་ལ་བསྒོམ། །དམ་ཚིག་སེམས་དཔར་གཟུང་བར་བྱ། །ཨོཾ་ཨཱ་ཁཾ་པཱི་ར་སྔགས་ཀྱིས། །མེ་ཏོག་ཕྲེང་བ་མིག་དག་པ་རས། །ལས་ཀྱི་བུམ་པས་གཏོར་བར་བྱ། །ཡང་ན་དམ་ཚིག་ཆུ་ཡིས་གཏོར། །ཧཱུཾ་ཧཱུཾ་ཕཊ་ཕཊ་སྔགས་ཀྱིས་ནི། །ཨ་ཏི་ཧོ་བརྟན་བརྟུལ་ཞུགས་བཟང༌། །ལན་གསུམ་ཨརྐ་མེ་ཏོག་གིས། །ཧཱུཾ་ཕཊ་སྔགས་ཀྱིས་གདབ་པར་བྱ། །དེ་ནས་རྡོ་རྗེ་མེ་ཏོག་ཅན། །སྙིང་གར་ཅུང་ཟད་གཟུང་བར་བྱ། །ཨོཾ་སུ་ར་ཏེ་ས་མ་ཡ་སྟྭཾ། །དེ་བཞིན་ཐམས་ཅད་རྣམ་པར་གྱིས། །ཡེ་ཤེས་འབྲས་བུ་ཅི་འདོད་དང༌། །དངོས་གྲུབ་ཐམས་ཅད་རྙེད་པར་འགྱུར། །དཀྱིལ་འཁོར་མ་མཐོང་སྔོན་དུ་ནི། །གང་ཡང་སྨྲ་བར་མ་བྱེད་ཅིག །མ་ཡིན་ཁྱོད་ཀྱི་དམ་ཚིག་འདི། །ཉམས་པར་འགྱུར་བ་ངེས་པ་ཡིན། །དེ་ནས་རྡོ་རྗེ་སྤྱི་བོར་ནི། །བཟུང་ལ་འདི་སྐད་སྨར་བར་བྱ། །འདི་ནི་དམ་ཚིག་རྡོ་རྗེ་ཡིན། །
སྤྱི་བོར་བདག་གིས་གསོར་བར་བྱ། །ཁྱོད་ཀྱིས་གཞན་ལ་འདི་སྨྲས་ན། །སྐད་ཅིག་གིས་ནི་ཕུང་ནས་འགྲོ་།གུར་གུམ་དང་ནི་ཙནྡན་དང༌། །སྦྲང་རྩི་ཡོད་པའི་ཆུ་བསྲེས་ལ། །བདུད་རྩི་ལྔ་ནི་དེ་དབུས་བླུགས། །དེ་ཡིས་དམ་ཚིག་བླུད་པར་བྱ། །ཨོཾ་བཛྲོ་ད་ཀ་མ་ཧཱ་དང༌། །བཛྲ་ཀུ་རཾ་བི་ཤ་ན། །ལན་བདུན་བཟླས་པའི་སྔགས་ཀྱིས་ནི། །ལག་པ་གཡས་སུ་སྦྱིན་པར་བྱ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་འོང༌། །འཐུངས་ཤིག་རྡོ་རྗེ་བདུད་རྩི་ཆུ། །དེ་རིང་ཕན་ཆད་ཁྱོད་ཀྱིས་ནི། །ཕྱག་ན་རྡོ་རྗེར་བདག་ལ་སྨྲོས། །བདག་གིས་ཇི་ལྟར་བཀའ་སྩོལ་དཀའ་སྦྱིན། །དེ་ལྟར་ཁྱོད་ཀྱི་དད་པས་བྱ་དགོས་སོ། །གང་ཡང་ང་ལ་མི་མོས་ནམ་མི་བྱའི། །དེ་ལྟར་བྱས་ན་རྣམ་སྨིན་དམྱལ་བར་འགྲོ། །སྐྱེས་སུ་དྲི་མེད་ཡིད་ལྡན་པའི། །ཁྱོད་ཀྱི་མིག་གིས་ཇི་ལྟར་མཐོང༌། །དཀར་པོ་དག་ནི་མཐོང་གྱུར་ན། །ཞི་བའི་ལས་ནི་འགྲུབ་པར་འགྱུར། །སེར་པོ་དག་ནི་མཐོང་གྱུར་ན། །རྒྱས་པའི་ལས་ནི་འགྲུབ་པར་འགྱུར། །དམར་པོ་དག་ནི་མཐོང་གྱུར་ན། །དབང་གི་ལས་ནི་འགྲུབ་པར་འགྱུར། །ནག་པོ་དག་ནི་མཐོང་གྱུར་ན། །དྲག་པོའི་ལས་ནི་འགྲུབ་པར་འགྱུར། །རས་ཀྱིས་མིག་ལ་བཀབ་གྱུར་ནས། །རྟགས་ནི་འདི་དག་མཐོང་བར་འགྱུར། །དེ་ནས་བླ་མ་རྡོ་རྗེ་འཛིན། །ཕྱིན་གྱིས་བརླབས་ནི་སྨྲ་བར་བྱ། །ཇི་ལྟར་བསོད་ནམས་དེ་བཞིན་འོང༌། ལྷ་མོ་རིགས་ཀྱི་རིམ་པ་ལ། །ཇི་ལྟ་བ་ཡི་དངོས་གྲུབ་ཡོད། །རང་རང་གི་ནི་རིགས་རིགས་ལ། །མེ་ཏོག་བབས་པའི་བུ་འདི་ནི། །དེ་ལྟ་བུ་ཡི་དངོས་གྲུབ་ཐོབ། །མིག་དགབ་རས་ཀྱི་ཕྲེང་བ་ལས། །མེ་ཏོག་བཟང་པོ་ལག་ཏུ་སྦྱིན། །པྲ་ཏཱི་ཙྪ་ཧོ་རྡོ་རྗེ་འཛིན། །ལན་གསུམ་བརྗོད་ལ་དབུལ་བར་བགྱི། །བླ་མས་མེ་ཏོག་བལྟ་བར་བྱ། །དངོས་གྲུབ་རབ་འབྲིང་ཐ་མ་སྟེ། །ཡན་ལག་རབ་ཀྱིས་ཕྱག་རྒྱ་ཆེའི། །དངོས་གྲུབ་ཐེ་ཚོམ་མེད་པར་ཐོབ། །ཡན་ལག་འབྲིང་གིས་སྔགས་དངོས་འགྲུབ། །ཡན་ལག་ཐ་མས་ཆུང་དངོས་འགྲུབ། །རང་གི་ལྷ་མོའི་དབུས་གནས་སུ། །ཡང་ན་རང་དང་གཞན་གྱི་བར། །མེ་ཏོག་གང་གདན་ཉེ་དེའི་ཡིན། །དེ་ཡི་གནས་ནི་དབུས་སུ་བརླག །དཀྱིལ་འཁོར་ཕྱི་རོལ་བབས་ན་ནི། །
ཅུང་ཟད་ཙམ་གྱི་དངོས་གྲུབ་འོང༌། །པན་ཙ་རེ་ཁཱ་ལ་བབས་ན། །ཕྱི་ནས་ལན་གསུམ་དབུལ་བར་བྱ། །ཡང་ནི་དེ་ཡི་སྟེང་བབས་ན། །ནམ་ཡང་དངོས་གྲུབ་ཐོབ་མི་འགྱུར། །དེ་ལ་ཆུ་ཡི་དབང་གཅིག་སྦྱིན། །དབང་གཞན་དག་ནི་མི་སྦྱིན་ནོ། །སྒོ་དང་རྟ་བབས་ཕྱི་རོལ་དང༌། །རྡོ་རྗེ་ཕྲེང་བའི་ཕྱིར་བབས་ན། །དངོས་གྲུབ་ཐ་མའང་མེད་གྱུར་ན། །གཞན་ཆེན་པོ་ནི་ག་ལ་འགྲུབ། །རྡོ་རྗེ་སེམས་དཔའ་དེ་རིང་ཉིད། །ཁྱེད་ནི་ནན་ཏན་མིག་ཕྱེ་སྟེ། །བདག་གིས་ཐམས་ཅད་མིག་ཕྱེ་བས། །རྡོ་རྗེ་མིག་ནི་མཆོག་གི་མཆོག །དེ་ནས་དཀྱིལ་འཁོར་ལོའི་དོན། །དང་པོ་སྒོ་སྐྱོང་ལ་སོགས་ནས། །དཀྱིལ་འཁོར་ཇི་ལྟ་བུ་ཡི་གནས། །ཕྱོགས་མཚམས་ལ་སོགས་སོ་སོར་བསྟན། །བཅོམ་ལྡན་འདས་སྐུ་ཇི་ལྟ་བུར། །རབ་གནས་ཁྲུས་ཀྱི་ཆོ་ག་བྱ། །དེ་ལྟར་སློབ་མ་ལ་འབད་དེ། །རྩེ་གཅིག་གིས་ནི་ཁྲུས་བྱའོ། །བུམ་པ་ཆོས་ཀྱི་དབྱིངས་ལྡན་པ། །སངས་རྒྱས་རིན་པོ་ཆེ་ཡི་སྣོད། །ཉི་ཟླ་ཨཱ་ལི་ཀཱ་ལིས་འབྱུང༌། །དེ་ཡི་ནང་དུ་བསམ་པར་བྱ། །ལྷ་མོ་དང་ལྡན་མི་བསྐྱོད་པ། །སྙིང་པོ་ཞུ་བའི་རང་བཞིན་ཅན། །ཡེ་ཤེས་སེམས་དཔའ་བསྒོམ་པར་བྱ། །ལས་ཀྱི་སེམས་དཔའ་འང་དེ་ཡིན་ནོ། །བྱང་ཆུབ་རྡོ་རྗེས་སངས་རྒྱས་ལ། །བླ་མ་ཆེན་པོ་ཇི་ལྟར་བྱིན། །བདག་དང་འདྲ་བའི་དོན་དུ་ནི། །ནམ་མཁའི་རྡོ་རྗེ་བདག་ལ་སྩོལ། །དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་གྱིས་ནི་ཕྱག་བྱས་པ། །གསང་གསུམ་གཞི་ལས་འབྱུང་བ་ནི། །སངས་རྒྱས་ཀུན་གྱིས་བདག་གིས་སྦྱིན། །ཨོཾ་ཧཱུཾ་དཔལ་ནི་རྡོ་རྗེའི་ཆུས། །འཁོར་ལོས་སྒྱུར་དབང་བདག་གིས་བསྐུར། །ཆུ་ཡི་དབང་ནི་བསྐུར་བ་ཡིས། །མགོ་བོར་མི་བསྐྱོད་རིགས་འབྱུང་ངོ༌། །དེ་འབྲས་མ་ལོང་ཡེ་ཤེས་ནི། །དྲི་མེད་ཡང་དག་འབྱུང་བར་འགྱུར། །དེ་ནས་གསེར་སོགས་གཟོ་བྱས་དང༌། །ཡང་ན་རས་ལ་བྲི་བ་མཆོག །འཇིག་རྟེན་ཁམས་ནི་གྲངས་མེད་ན། །སངས་རྒྱས་ཉིད་ནི་བཞུགས་པ་ཀུན། །དབུ་རྒྱན་གཟུགས་སུ་བསྒོམ་པ་ནི། །མགོ་བོ་ལ་ནི་རྡོ་རྗེའི་གཟུགས། །ཨོཾ་མུ་ཀུ་ཊ་ཨ་བྷི་ཥིཉྩཱ་མི། །འཁོར་ལོས་སྒྱུར་ལས་ཁྱད་པར་ཆེ། །དབུ་རྒྱན་དབང་གིས་མགོ་བོར་ནི། །རིན་ཆེན་འབྱུང་ལྡན་འབྱུང་བར་འགྱུར། །དེ་འབྲས་
མཉམ་ཉིད་ཡེ་ཤེས་ནི། །དྲི་མེད་ཡང་དག་འབྱུང་བར་འགྱུར། །རྡོ་རྗེ་སྒེག་མོས་བཟུང་ནས་སུ། །ཧཱུཾ་ཧཱུཾ་ཧཱུཾ་ནི་བརྗོད་ནས་ནི། །རྡོ་རྗེ་སེམས་དཔའ་རྒྱལ་ཇི་ལྟར། །དི་རིང་བདག་གིས་ཁྱོད་དབང་བསྐུར། །འདི་ནི་སངས་རྒྱས་ཐམས་ཅད་ཀྱི། །རབ་གྲུབ་ཕྱིར་ནི་རྡོ་རྗེ་གཟུང༌། །སློབ་མའི་སྙིང་གར་གཏུགས་བྱས་ལ། །ལག་པ་གཡས་པར་སྦྱིན་པར་བྱ། །ཨོཾ་ཧཱུཾ་བཛྲ་ཨ་བྷི་ཥིཉྩཱ་མི། །ཕྱག་ན་རྡོ་རྗེ་སྟོབས་པོ་ཆེ། །རྡོ་རྗེ་དབང་གིས་མགོ་བོར་ནི། །སྣང་བ་མཐའ་ཡས་འབྱུང་བར་འགྱུར། །དེ་འབྲས་སོ་སོར་རྟོགས་པ་ཡི། །ཡེ་ཤེས་གསལ་བར་འབྱུང་བར་འགྱུར། །རྡོར་དྲིལ་སྒྱུ་འཕྲུལ་ཆེན་པོ་འདི། །གཉིས་མེད་དངོས་པོ་ཤེས་རབ་ཐབས། །ཆོས་ཀྱི་དབྱིངས་ཀྱི་རང་བཞིན་ཅན། །ལག་པ་གཡོན་པར་འདི་གཟུང་ཤིག །འཁྱུད་ནས་ཀུན་དུ་སྦྱར་ནས་སུ། །རྡོ་རྗེ་འཛིན་འདྲའི་དངོས་པོར་འདུག །ཨོཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི་ནཱ་ཡ་ཀ །དྲིལ་བུའི་དབང་གིས་མགོ་པོར་ནི། །དོན་ཡོད་གྲུབ་པ་འབྱུང་བར་འགྱུར། །དེ་འབྲས་བྱ་བ་གྲུབ་པ་ནི། །དྲི་མེད་ཡང་དག་འབྱུང་བར་འགྱུར། །རྡོ་རྗེ་དང་ནི་རྡོར་དྲིལ་ནི། །སྤྱི་བོའི་སྟེང་དུ་གཟུང་བྱས་ལ། །ཨོཾ་ཤྲཱི་ནཱ་མ་ཨ་བྷི་ཥིཉྩཱ་མི། །དངོས་པོ་ལྔ་ཡི་རང་བཞིན་ཅན། །ཀྱེ་དཔལ་རྡོ་རྗེ་ཆེ་གེ་མོའི། །སྔར་གྱི་རིགས་ཀྱི་རིམ་པ་ལྟའོ། །མིང་གི་དབང་གིས་མགོ་བོར་ནི། །རྣམ་པར་སྣང་མཛད་རིགས་འབྱུང་ངོ༌། །དེ་འབྲས་ཆོས་དབྱིངས་དག་པ་ནི། །དྲི་མ་མེད་པ་འབྱུང་བར་འགྱུར། །འདི་ནི་དབང་བསྐུར་ལྔ་ཡིན་ཏེ། །ཡེ་ཤེས་ལྔ་ཡི་རང་བཞིན་ཅན། །རིགས་ལྔའི་བདག་ཉིད་ཀྱང་ཡིན་ནོ། །འབྱུང་ལྔའི་རང་བཞིན་ཡང་ཡིན་ནོ། །དཔལ་འདི་ཡིས་ནི་དབང་བསྐུར་བས། །ཐམས་ཅད་ཀུན་ལ་དབང་བྱེད་འགྱུར། །ཡན་ལག་ལྔ་ནི་ཡོད་པའི་དབང༌། །དེ་ནི་སློབ་དཔོན་གྱི་ཡིན་ནོ། །ཡང་ན་ལྷ་མོའི་དབང་དུ་བསྟན། །ཤེས་རབ་མ་ཡི་ལས་ཡོད་ཕྱིར། །ཀྱེ་ཡི་རྡོ་རྗེ་རྒྱུད་ལས་གསུངས། །ཡེ་ཤེས་སྙིང་པོ་དེར་ཡང་བསྟན། །ལག་པ་དག་གིས་འཁྱུད་པ་ནི། །བཅུ་དྲུག་ལོན་པའི་ཤེས་རབ་འཛིན། །རྡོ་རྗེ་དྲིལ་བུ་མཉམ་སྦྱོར་བ། །སློབ་དཔོན་དབང་དུ་གསུངས་པའི་གཞུང༌། །ལྷ་མོའམ་ནི་སློབ་དཔོན་དབང༌། །སྡོམ་པའི་མཆོག་ནི་བཟུང་ནས་སུ། །སྔར་བརྗོད་པ་
ཡི་ཆོ་ག་ཡིས། །དམ་ཚིག་གསུམ་ཡང་ཞུ་བར་བྱ། །རྡོ་རྗེ་སློབ་དཔོན་གྱི་ནི་དབང༌། །ཐུགས་རྗེའི་གཏེར་གྱིས་བདག་ལ་སྩོལ། །བདག་དང་གཞན་དོན་བྱ་བ་ནི། །ཁྱོད་ཀྱི་བཀའ་དྲིན་དྲིན་གྱིས་སོ། །བཅོམ་ལྡན་ཡང་དག་དཔལ་བླ་མས། །རྡོ་རྗེ་དེ་ཉིད་གཟུང་བར་བྱ། །ཧཱུཾ་གི་དངོས་པོ་རྡོ་རྗེ་མཆོག །ཐོག་མ་ཐ་མ་མེད་བདག་ཉིད། །ཨོཾ་མཆོག་གི་དང་པོ་སྐྱེས་བུ་སྟེ། །རྡོར་འཛིན་ཐམས་ཅད་བདག་པོ་ཡིན། །ཧཾ་ཧཱཾ་ཧིཾ་ཧཱིཾ་ཧཱུཾ་ཧཱུཾ་སྟེ། །འདི་ཡིས་རྡོ་རྗེ་བྱིན་གྱིས་བརླབས། །ཨ་ལས་རྡོར་དྲིལ་སྐྱེས་པ་སྟེ། །འདི་ནི་སངས་རྒྱས་རྣམས་ཀྱི་མ། །ཧཱུཾ་ཧཱུཾ་ཕཊ་ཕཊ་ཕེཾ་ཕེཾ་སྟེ། །འདི་ཡིས་དྲིལ་བུ་བྱིན་གྱིས་བརླབས། །འདི་ནི་མཆོག་གི་དངོས་པོ་ཡིན། །ཤེས་རབ་སྒྱུ་མར་གསུངས་པའོ། །ཁྱོད་ཀྱིས་རྟག་ཏུ་གཟུང་བར་བྱ། །ཐོག་མ་བྱང་ཆུབ་རྒྱལ་བས་གཟུང༌། །རྡོ་རྗེ་མཆོག་གི་ཡེ་ཤེས་ནི། །མི་ཕྱེད་ནམ་མཁའ་ལྟ་བུའི་གཟུགས། །སྟོན་པ་འདི་ཡི་ཚིག་གིས་ནི། །སློབ་མའི་ལག་ཏུ་སྦྱིན་པར་བྱ། །དེ་ནི་སྔགས་ནི་ཡོད་པའི་ས། །རྩེ་གཅིག་གིས་ནི་དཀྲོལ་བར་བྱ། །ཨོཾ་ཨཱཿ་ཧཱུཾ་བཛྲ་གྷཎྚེམ་ཧཱ་ན་དེ་སྭ་རཱུ་པེ་བིནྡུ་ཛྙཱ་ན་མ་ཡེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། །རང་ཡིད་བརྟན་པའི་དེ་ཉིད་ཀྱིས། །རྡོ་རྗེ་སེམས་དཔའི་རང་བཞིན་ཅན། །རང་གི་ལྷ་ཡི་དངོས་པོ་ནི། །སྐུ་ཡི་ཕྱག་རྒྱས་གསལ་བར་བྱ། །རྡོ་རྗེ་སེམས་དཔའ་ཉིད་ཀྱི་རིགས། །དམ་ཚིག་གསུམ་ནི་དཔའ་བོར་གཟུང༌། །དེ་ནས་དཀྱིལ་འཁོར་དེ་ཉིད་དོན། །ནང་གི་མཚན་གྱིས་སྦྱོར་བ་དང༌། །ལྷ་ཡི་རྣམ་དག་དེ་ཁོ་ན། །མཚན་དང་འབྱུང་བ་སྨྲ་བར་བྱ། །རྣམ་སྣང་མཛད་མགོན་ཇི་ལྟ་བུར། །དེ་ལྟ་བུར་ནི་སློབ་མ་གཟུང༌། །དེ་ལ་གནང་བ་སྦྱིན་པར་བྱ། །སངས་རྒྱས་ཅི་མཛད་ཁྱོད་ཀྱིས་གྱིས། །སེམས་ཅན་ཐམས་ཅད་ཕན་དོན་དུ། །ཆོས་ཀྱི་རྒྱ་མཚོ་ལྟ་བུར་འདུག །ཐམས་ཅད་ཇི་ལྟར་འདུལ་འགྱུར་བའི། །ཁྱོད་ཀྱིས་ཆོས་ཀྱི་འཁོར་ལོ་བསྐོར། །འདི་ནི་དམ་ཚིག་འདུལ་བ་ཡིས། །དེ་ནི་གནང་བ་སྦྱིན་པའོ། །དེ་ནས་དེ་བཞིན་གཤེགས་པའི་རིགས། །ཡེ་ཤེས་ལྔ་དངོས་ཞི་བ་ནི། །ཡེ་ཤེས་རང་བཞིན་མི་ཕྱེད་ལ། །སངས་རྒྱས་ཐམས་ཅད་ཕྱག་བྱེད་པ། །དཔལ་ལྡན་རྡོ་རྗེ་སེམས་དཔའ་ཡིས། །ཉིད་ཀྱི་ཕྱག་ན་ཇི་ལྟར་བསྣམས། །རྡོ་རྒྱལ་བརྟུལ་ཞུགས་མི་ཤིགས་པ། །ཁྱོད་ཀྱིས་དེ་ལྟར་
བཟུང་བར་གྱིས། །ཨོཾ་སརྦ་ཏ་ཐཱ་ག་ཏ་ནཾ་སིདྡྷི་ས་མ་ཡ་བཛྲ་ནི། སངས་རྒྱས་གཟུགས་ནི་བདག་རང་ཉིད། །མཆོད་སྦྱིན་ཁུ་ཚུར་ལྡན་པ་ཡིས། །ཁྱོད་ནི་བདག་གིས་ལུང་བསྟན་བྱ། །དེ་བཞིན་གཤེགས་པ་རྡོར་སེམས་ཡིན། །སེམས་ཅན་ཐར་པ་འགྲུབ་དོན་དུ། །ངན་འགྲོ་རྣམས་ནི་དྲན་པར་གྱིས། །ཡང་དག་དེ་བཞིན་གཤེགས་པ་ཁྱོད། །ཁམས་གསུམ་གྱི་ནི་ཐུབ་པ་ཁྱོད། །སངས་རྒྱས་བྱང་ཆུབ་སེམས་དཔའ་དང༌། །འཕགས་པ་རྣམས་ཀྱིས་མགྲིན་གཅིག་ཏུ། །དགྲ་བཅོམ་པ་ནི་ཡང་དག་པའི། །བྱང་ཆུབ་ཏུ་ནི་ཁྱོད་ལུང་བསྟན། །ཕྱག་རྒྱ་ཆེན་པོའི་འདྲས་བུ་རབ། །འདིས་གསུངས་པས་ནི་ཁྱོད་ཀྱིས་རྙེད། །དེ་ནས་སྐྱབས་ནི་སྦྱིན་པ་ནི། །གསང་བའི་སྒྲ་ནི་ཡོད་པའོ། །འདོད་ཆགས་བྲལ་བ་ལྟ་བུ་ཡི། །ཁམས་གསུམ་ན་ནི་སྡིག་མེད་དེ། །དེ་བས་འདོད་པའི་ཆགས་བྲལ་བ། །ཁྱོད་ཀྱིས་ཀྱང་ནི་ཡང་མ་བྱེད། །དམ་ཚིག་ཆེན་པོ་ཡོད་པ་ནི། །ཧཱུཾ་ཕཊ་ཀྱིས་ནེ་མཉམ་པའོ། །སྡིག་པ་ཐམས་ཅད་མེད་པ་ནི། །གསང་བའི་དཀྱིལ་འཁོར་ལ་བཞུགས་པས། །བདེ་ཆེན་ཐེག་པ་འདི་ལས་ནི། །ཕྱི་ནས་ཤི་བ་ཡོད་མེད་དེ། །སྲིད་པ་ཡང་དག་དངོས་གྲུབ་ཀྱིས། །སྲིད་དང་མྱ་ངན་འདས་པོར་རོ། །རྡོ་རྗེ་རིན་ཆེན་ནང་ཡོད་པའི། །བྱང་ཆུབ་སེམས་ནི་སྤང་མི་རུང༌། །དེ་ནི་འབྱུང་བ་ཙམ་གྱིས་ནི། །སངས་རྒྱས་ཉིད་འགྱུར་ཐེ་ཚོམ་མེད། །དམ་པའི་ཆོས་ལ་སྨད་མི་བྱ། །ནམས་ཀྱང་བོར་བར་མི་བྱའོ། །མ་རིག་པའམ་གཏི་མུག་གིས། །ཕྱི་ནས་འཇིགས་པས་བསྲུང་བར་བྱ། །རྡོ་རྗེ་དྲིལ་བུ་ཕྱག་རྒྱ་ནི། །ནམ་ཡང་སྤང་བར་མི་བྱའོ། །སངས་རྒྱས་ཀུན་དང་མཉམ་པའི་ཕྱིར། །བླ་མ་སྨད་པར་ཡོད་མི་བྱ། །རང་བདག་ཡོངས་སུ་བོར་ནས་ནི། །དཀའ་ཐུབ་སྡུག་བསྔལ་མི་བྱའོ། །ཇི་ལྟར་བདེ་བར་བདེ་གཟུང་ན། །རྫོགས་པའི་སངས་རྒྱས་མ་འོངས་འབྱུང༌། །ཡན་ལག་བཞི་པོ་འདི་དག་དང༌། །གནང་བའི་སྦྱིན་པ་ཕྱིར་མི་ལྡོག །དབང་ནི་དབང་ལྔ་ཟིན་ནས་ནི། །ཕྱི་ནས་འབད་དེ་སྦྱིན་པར་བྱ། །དགོངས་དང་དགོངས་མིན་བྱེ་བྲག་ནི། །སློབ་དཔོན་དབང་དུ་ཤེས་པར་བྱ། །བྱ་སྤྱོད་རྣལ་འབྱོར་རྒྱུད་ལས་ནི། །དབང་ནི་དྲུག་ཏུ་བཤད་པའོ། །ཕྱི་མའི་རྣལ་འབྱོར་
གསང་བའི་དབང༌། །བདུན་པར་གྱེས་པ་ཡོད་པའོ། །ཤེས་རབ་ཡེ་ཤེས་དེ་ལྟར་ནི། །ཕྱི་མའི་ཕྱི་མ་དཔལ་རྣལ་འབྱོར། །འདི་དགུའི་དགྱེས་པར་ཤེས་པར་བྱ། །རྒྱུད་ལས་གསུངས་པའི་རིམ་པའོ། །ཆུ་དང་དབུ་རྒྱན་རྡོ་རྗེ་དང༌། །དྲིལ་བུ་མིང་དང་དེ་ལྔ་དང༌། །རིགས་གསུམ་དམ་ཚིག་ཡོད་པ་ནི། །དབང་ནི་བརྒྱད་དུ་གྱེས་པ་གསུངས། །བརྟུལ་ཤུགས་ལུང་བསྟན་སྐྱབས་སྦྱིན་ནི། །དེ་དག་བཅུ་གཅིག་གཅིག་ཡིན་ནོ། །གཉིས་པ་ལ་ནི་གསང་བའི་དབང༌། །གསུམ་པ་ཤེས་རབ་ཡེ་ཤེས་ཏེ། །དེ་ལྟར་དེ་བཞིན་བཞི་པའོ། །ཡང་ན་སོ་སོར་ཤེས་པར་བྱ། །དབང་བསྐུར་འདི་ནི་བཅུ་བཞི་པའོ། །སློབ་དཔོན་མདུན་དུ་རྩེ་གཅིག་གིས། །དེ་ནས་གུས་པས་ཞུ་བར་བྱ། །བྱང་ཆུབ་རྡོ་རྗེ་དཔའ་ཆེན་པོ། །གསང་བའི་དབང་ནི་བདག་ལ་སྩོལ། །ཡེ་ཤེས་བདུད་རྩི་བདག་ལ་སྩོལ། །རྡོ་རྗེ་འབྱུང་བ་བདག་ལ་སྩོལ། །དཔའ་བོ་ཆེན་པོ་ཁྱོད་ཕྱག་འཚལ། །ཁྱོད་ལ་ཕྱག་འཚལ་ཕྱག་འཚལ་ལོ། །ཕྱག་འཚལ་ཕྱག་འཚལ་རྨད་བྱུང་ཁྱོད། །བདེ་ཆེན་བཞུགས་ལ་ཕྱག་འཚལ་ལོ། །རང་གི་རིགས་ཀྱི་བུ་མོ་རབ། །སྐྱེས་བུ་འདི་ལ་དགོངས་པ་ཡིན། །རང་གི་རིགས་ནི་མེད་གྱུར་ན། །གཞན་མ་གང་ཡང་མཚན་ལྡན་རུང༌། །བཅུ་གཉིས་ཡང་ན་བཅུ་དྲུག་གམ། །མེད་ན་ཉི་ཤུ་ལོན་པའང་རུང༌། །དེ་ནི་ནུ་སྲ་གྱེས་པ་དང༌། །མ་བཙས་པ་དང་བརྟན་པ་དང༌། །སྐྲ་གནག་མིག་དཀྱུས་རིང་བ་དང༌། །སྐད་སྙན་དག་ཏུ་སྨྲ་བའོ། །ཧ་ཅང་སྦོམ་མིན་ཕྲ་བ་མིན། །ཡན་ལག་དཀར་མིན་གནག་པ་མིན། །ཧ་ཅང་ཐུང་མིན་རིང་བ་མིན། །ལོངས་སྤྱོད་དག་ལ་མཁས་པ་དང༌། །རྐེད་དབུས་ཕྲ་ཞིང་བྷ་ག་རུབ། །སྐུ་སྨད་ཆ་ནི་རབ་ཞེང་ཆེ། །ཁུ་བ་མང་ཞིང་སྙིང་པོ་ཆུང༌། ཕྱི་ཞེད་ཆེ་ལ་སྲ་བ་དང༌། །དྲི་ཞིམ་རེག་བྱ་འཇམ་པའི་ལུས། །འདོད་ཆགས་ཆེ་ལ་མི་དགའ་མིན། །སྨིན་མ་རིང་ཞིང་བར་མ་ཆད། །གཞུ་དངོས་འདྲ་ཞིང་འོད་འཕྲོ་གནག །གཡོན་གྱི་སྲིན་ལག་རྩ་བ་ལ། །འཁོར་ལོ་ཡང་ན་པདྨ་རིན། །རྡོ་རྗེ་རལ་གྲི་དངོས་གསལ་བ། །སུ་ལ་འདི་འདྲའི་རྟགས་ཡོད་པ། །ཕྱག་རྒྱ་དེ་ཡི་གསང་བའི་དབང༌། །དོན་ནི་འགྲུབ་པར་ནུས་པས་སོ། །དེ་ལ་ཁྲུས་སོགས་བྱུག་པ་བྱ། །དད་པས་བླ་མ་ལ་དབུལ་བྱ། །
ཁྱད་པར་གྱི་ནི་ཚིག་ཀྱང་བརྗོད། །མགོན་པོ་ཁྱོད་ལ་འདི་འཚལ་ལོ། །དེ་ནས་སློབ་མ་ཕྱིར་གྱེད་བྱ། །ནང་མིན་ཧ་ཅང་རིང་བ་འང་མིན། །རིམ་པས་བུ་མོ་དབང་བསྐུར་བྱ། །དེ་ལ་གསང་ཆོས་བཤད་པར་བྱ། །ཕྱག་རྒྱའི་བརྡ་དང་དབང་གི་དོན། །སྐད་ཅིག་རྣམས་ཀྱང་དེ་ལྟར་རོ། །དེ་ནས་གཅིག་ཏུ་སྦྱོར་བ་ཡིས། །ལེགས་དགྱེས་དགྱེས་པ་རབ་བགྱིད་དོ། །སྣང་བ་རེག་བྱ་འདུས་པ་ནི། །ཡེ་ཤེས་གསུམ་ནི་འབྱུང་བར་འགྱུར། །ཡང་དག་ཡེ་ཤེས་གསུམ་སྐྱེས་ནི། །བྱང་ཆུབ་སེམས་ནི་སྤང་མི་རུང༌། །སྤངས་ན་འགྲོ་བའི་གནས་སུ་ནི། །བདེ་ཆེན་སེམས་ནི་འགྲོ་བར་འགྱུར། །འགྲོ་ན་དེ་ནི་ཆད་པ་ཡིན། །ཤེས་རབ་ཡེ་ཤེས་གསལ་ཡིན་ནོ། །དཔལ་གསང་འདུས་པའི་ནང་ནས་ཀྱང༌། །རྡོ་རྗེ་ཉི་ནུབ་ཞེས་ནི་འབྱུང༌། །མཚམས་ནི་སྣང་བ་ཐོབ་པ་ཡིན། །རིམ་པ་ལྔ་པ་ལས་ཀྱང་གསུངས། །དེ་ནི་གསང་བར་བཤད་པ་ཡིན། །གསང་བར་སྣང་བ་མཆེད་པ་བཤད། །འདུད་ནས་དེ་ནི་སྣང་བ་མཆེད། །དེ་ནི་གཅིག་པུ་ཕོ་བྲང་གསང༌། །དེར་ནི་རང་གིས་ཤེས་པར་བྱ། །སེམས་ནི་འདམ་སྐྱེས་ནམ་མཁར་མིན། །དེ་ནས་སློབ་མ་དགུག་པར་བྱ། །དེ་ནས་རས་ཀྱིས་གདོང་ཡང་དགབ། །པདྨ་རབ་ཀྱི་ཁ་དབུས་ནས། །རྡོ་རྗེ་རྒྱལ་པོ་དྲང་བར་བྱ། །བུ་ཡི་ཁ་པད་ནང་དུ་ནི། །སྦོམ་པོ་ཐ་ལྟག་གིས་མནན་ནོ། །རྩ་གཉིས་མཆོག་གི་ནང་ནས་ནི། །ལོངས་སྤྱོད་འཁོར་ལོའི་ནང་དུ་བཏང༌། །སྐྱེས་བུ་བདུད་རྩི་ཇི་ལྟ་བུ། །ཁྱོད་ཀྱིས་སྨྲོས་ཤིག་དགའ་བ་ཡིན། །ཨེ་མའོ་མཆོག་གི་བདུད་རྩི་ཡིན། །ཨེ་མའོ་ཡེ་ཤེས་བདུད་རྩི་རབ། །ཨེ་མའོ་རོ་ནི་བརྗོད་མི་ལང༌། །ཨེ་མའོ་རྡོ་རྗེ་བདུད་རྩི་རབ། །དི་རིང་བདག་སྐྱེས་འབྲས་བུ་མཆོག །དི་རིང་བདག་ནི་རབ་ཏུ་རྒྱལ། །དི་རིང་བདག་ནི་འཁོར་ལས་རྒྱལ། །དི་རིང་བདག་ལ་ཐེ་ཚོམ་མེད། །ཁྱོད་ཀྱི་བཀའ་དྲིན་ཡང་དག་མཆོག །བརྗོད་མེད་གནས་ནི་བདག་གིས་རྙེད། །དེ་ནས་ཡང་ནི་ཞུ་བ་བྱ། །བསྟོད་པ་སྣ་ཚོགས་རབ་བགྱིས་ཏེ། །ཡེ་ཤེས་བདེ་བའི་གནས་བཞུགས་ཏེ། །རྒྱལ་འགྱུར་རྒྱལ་འགྱུར་མགོན་པོ་ཁྱོད། །ཨཱ་ལི་ཀཱ་ལི་གཉིས་བདག་ཅན། །ལེགས་དགྱེས་བདེ་མཚོ་རྒྱལ་གྱུར་ཅིག །མཆོག་དང་ཆད་པའི་དབུས་སུ་ནི། །རོལ་
ཅིག་ཁྱོད་ནི་རྒྱལ་གྱུར་ཅིག །མཆོག་གི་དབང་ཕྱུག་ཁྱོད་ཀྱིས་ནི། །ཤེས་རབ་ཡེ་ཤེས་དབང་བདག་སྩོལ། །ཁྱོད་ཀྱི་བཀའ་དྲིན་དེ་ཉིད་ཀྱིས། །རང་བཞིན་ཡེ་ཤེས་བདག་རྙེད་འོང༌། །ཡང་ན་གཅིག་པུའི་གཞུང་དུ་སྦྱོར། །ཡང་ན་གཞན་གཞུང་གཞུང་བཟང་ངོ༌། །ཤེས་རབ་ཡེ་ཤེས་དབང་འདི་ནི། །བརྟགས་ལ་དེ་ཉིད་སྦྱིན་བྱ་སྟེ། །འདོད་ཆགས་ཆགས་བྲལ་མེད་པ་དང༌། །མཉམ་ཉིད་ཡེ་ཤེས་སེམས་དཔའ་དང༌། །ཆོས་རྣམས་ཐམས་ཅད་མི་ཆགས་པ། །ཇི་ལྟར་པད་ཆུས་མི་གོས་ཤིང༌། །དེ་ལ་འབད་དེ་དབང་གི་རྒྱལ་པོ་ནི། །གཅིག་པུའི་ཡན་ལག་མ་ལ་འདིར་སྐྱོན་མེད། །བླ་མས་རྟོག་པ་མེད་པར་སྦྱིན་པར་བྱ། །ཡེ་ཤེས་ཟླ་གནས་རྒྱུད་ལས་དེ་སྐད་འབྱུང༌། །དོན་ཟིན་ནས་ནི་སྐད་ཅིག་གིས། །མ་དང་འདྲ་བས་བླ་མ་དབུལ། །འཕྱང་བའི་སྦྱོར་ཐབས་ལ་སོགས་ཀྱིས། །དང་པོར་བུ་མོའི་འདོད་མཆོག་བྱ། །དེ་ནས་སྐད་ཅིག་དགའ་ཡོན་ཏན། །རང་བཞིན་དེ་ཡང་གསལ་བར་བྱ། །འདི་ནི་རང་བཞིན་གྱི་ནི་གནས། །གཉིས་ཀྱི་བར་ན་དེ་ནི་ཡོད། །རྡོ་རྗེ་དབང་ཕྱུག་མ་ཡི་རྩ། །ཉིད་ནི་འདི་ཡི་ནང་ན་བཞུགས། །ཀུན་རྫོབ་དངོས་པོའི་གཟུགས་སུ་ནི། །ཁྱོད་ནི་བུད་མེད་གཟུགས་ཡིན་གྱི། །ཁྱོད་ནི་གཅིག་པུ་དོན་དམ་པར། །ཕྱག་རྒྱ་ཆེན་པོ་ཉིད་ཡིན་ནོ། །ཁྱོད་ཀྱིས་ཐམས་ཅད་ཀུན་བསྐྱབས་ན། །བྱང་ཆུབ་རབ་ནི་རྙེད་པར་འགྱུར། །ཤེས་རབ་སྐྱབས་སྦྱིན་བྱས་ལངས་ན། །སློབ་མའི་ལག་ཏུ་སྦྱིན་པར་བྱ། །འདི་ནས་ཁྱོད་གཟུང་བཟང་བ་ཡིན། །རྗེས་སུ་མཐུན་པར་སངས་རྒྱས་གསུང༌། །ཡེ་ཤེས་གསུམ་གྱི་རིམ་པ་ལས། །དམ་པའི་བདེ་བ་མྱོང་བྱེད་ཅིང༌། །སངས་རྒྱས་རིན་ཆེན་སྣོད་ཀྱི་ནི། །གཡོན་ངོས་ལ་ནི་རྩ་ཡི་གནས། །དེ་ནི་ཁག་མུ་ཁ་དངོས། །རྡོར་དབྱིངས་དབང་ཕྱུག་མ་ནི་ཉིད། །ཐབས་གཞན་དག་གིས་བྱང་ཆུབ་ནི། །ནམ་ཡང་རྙེད་པར་ཡོང་མི་འགྱུར། །དེ་བས་ལྷན་ཅིག་མི་གནས་པ། །དུས་འདི་ཕྱིན་ཆད་མ་བྱེད་ཅིག །དེ་ལ་ཡན་ལག་དྲི་ཞིམ་གོས་བཟང་བརྒྱན། །ཡན་ལག་མེ་ཏོག་སྣ་ཚོགས་མང་པོས་བརྒྱན། །གོས་མེད་ཆུ་སྐྱེས་སིག་སིག་ངག་བྱས་ཏེ། །ཆོས་ཀྱི་འབྱུང་གནས་གསལ་བར་སྟོན་པར་བྱེད། །དྲི་ཆེན་དྲི་ཆུ་ཟ་བ་འདི། །སྐྱེས་བུ་ཁྱོད་ཀྱིས་ནུས་སམ་
ཅི། །རཀྟ་ཤུ་ཀྲ་ཤ་ཆེན་དང༌། །བུད་མེད་བརྟུལ་ཞུགས་དེ་བཞིན་ནོ། །བྷ་གའི་པདྨ་འཇིབ་ནུས་སམ། །སྐྱེས་བུ་སྨྲོས་དང་ཇི་ལྟ་བུ། །ལྷ་མོ་བདག་གིས་ཅི་མི་ནུས། །རཀྟ་ཤུ་ཀྲ་སོགས་ཟ་ནུས། །རྟག་ཏུ་བུད་མེད་བརྟུལ་ཞུགས་བགྱིད། །བྷ་ག་ཡང་ནི་གཞིབ་པར་བྱ། །དེ་ནས་དགའ་བའི་བདག་ཉིད་དེས། །བྱམས་པའི་སྤྱན་རས་ཀྱིས་ནི་གཟིགས། །བདེ་བ་ཐམས་ཅད་འདུག་པ་ནི། །བདག་གིས་པད་རྒྱས་ཨེ་མའོ། །གང་འདི་རབ་དང་བྱེད་པ་ཡི། །དེ་ཡི་མདུན་དུ་བདག་འདུག་གིས། །ཇི་ལྟར་པདྨའི་དོན་གྱིས་ཤིག །ཡང་དག་སངས་རྒྱས་མཉེས་སོགས་བྱ། །ཉིད་ཀྱི་བདེ་ཆེན་རྒྱལ་པོ་ནི། །འདི་ནི་དུས་རྟག་ཡོད་ཕྱིར་རོ། །བདེ་བ་ཆེན་པོའི་དམར་ཐིགས་འདི། །ངོ་ཡི་ཆུ་སྐྱེས་ཀྱིས་མཉེས་ཀྱིས། །དེ་ཉིད་གསུམ་གྱི་དགའ་སྦྱོར་བས། །རྡོ་རྗེ་ཆུ་སྐྱེས་བསྐྱོད་པར་གྱིས། །བརྟན་པའི་དོན་ནི་ཁྱོད་ཀྱིས་གྱིས། །བརྟན་པ་མེད་ན་བདེ་མི་འགྲུབ། །སྔར་གསུངས་པ་ཡི་བླ་མའི་བཀའ། །མ་བརྗེད་རྩེ་གཅིག་གིས་ནི་བསམ། །རྡོར་དབྱིངས་དབང་ཕྱུག་མ་ཡི་རྩ། །གཡོན་གྱི་ངོས་ལ་བཞུགས་པ་ནི། །བླ་མའི་མན་ངག་ཡང་དག་གིས། །ཕྲ་མོའི་ལྟ་བས་བལྟ་བར་བྱ། །ལྟ་བའི་བདག་ཉིད་རྣལ་འབྱོར་གྱིས། །ས་བོན་འབབ་པར་མི་བྱའོ། །ས་བོན་སྙིང་པོ་ཡོད་པ་ན། །ངོ་མཚར་དགའ་བའི་བདེ་བ་འབྱུང༌། །ཐམས་ཅད་བདེ་བའི་གཏེར་གྱུར་པའི། །བྱང་ཆུབ་སེམས་བདེ་བབས་གྱུར་ན། །ཕུང་པོ་རྣམ་ཤེས་བརྒྱལ་འོང་བས། །དངོས་གྲུབ་རབ་དེ་ག་ལ་འགྲུབ། །ལ་ལ་མདའ་ལ་མཉམ་སྦྱོར་བས། །རེག་བྱ་ལ་ནི་བདེ་འདི་འབྱུང༌། །དེ་དག་སྨིན་པས་མཆོག་གི་དགའ། །སྣང་བ་མཆེད་པའི་གཟུགས་ཅན་ཙམ། །བསྐྱོད་པའི་རེག་བྱ་བབས་པ་ཡིས། །ཆད་དང་སྣང་བ་ཐོབ་པ་ཡིན། །ལྟ་བ་བརྟན་པས་དེ་ཉིད་ལ། །རྣལ་འབྱོར་བས་ནི་མི་གཡོ་བལྟ། །ལ་ལའི་བལྟ་བ་ནམ་མཁའ་ཡི། །མདའ་ལ་གཉིས་ཀྱི་ཕོ་བྲང་མནན། །རྡོ་རྗེ་སྐྱིལ་ཀྲུང་གི་ནི་སེམས། །རིན་ཆེན་ནང་དུ་བལྟ་བར་བྱ། །གསུང་ལམ་གྱིས་ནི་བརྗོད་མེད་པའི། །ཡེ་ཤེས་མཆོག་འདི་སྐྱེ་བར་འགྱུར། །འདི་ནི་དེ་ཉིད་མན་ངག་ཡིན། །མཁས་པ་ཡིས་ཀྱང་རྙེད་དཀའ་བ། །སྐལ་དང་ལྡན་པའི་དོན་བསྒྲུབ་ཕྱིར། །དེ་ནི་བདག་གིས་གསལ་བར་བྱས། །འདོད་ཆགས་
མ་ཡིན་ཆགས་བྲལ་མིན། །དབུ་མར་ཡང་ནི་མི་དམིགས་སོ། །དེ་ནི་ཡང་དག་དྲི་མེད་གནས། །བདེ་བ་ཆེན་པོའི་འབྲས་གཟུགས་ཅན། །ཡེ་ཤེས་ལྟ་བའི་རྣལ་འབྱོར་ན། །འགྲོ་བ་མེད་པའི་བདེ་བ་བརྟན། །སྔ་དྲོ་དུས་ན་ཉིན་གཅིག་དང༌། །བསྐལ་པ་སྟོང་གི་བར་དུ་ནི། །དཔལ་རྡོར་དབང་ཕྱུག་ཇི་ལྟ་བར། །ཡེ་ཤེས་ང་རྒྱལ་བརྟན་སྦྱོར་བའོ། །ཀྱེ་མགོན་གང་གིས་ཁྱོད་ལ་བསྟོད། །ཇི་ཙམ་བདག་གིས་ཁྱོད་བསྟོད་བྱ། །ཚད་མེད་པ་དང་བརྗོད་མི་ནུས། །རྨད་བྱུང་ཆེན་པོ་གཞལ་དུ་མེད། །ཁྱོད་ཀྱི་ཡོན་ཏན་ཡང་དག་ནི། །ཁ་ཅིག་གིས་ནི་བརྗོད་མི་ནུས། །ཅིག་གིས་དད་པས་ཅི་བསྟོད་ཀྱང༌། །དེ་ནི་བདག་ལ་བཟོད་པར་མཛོད། །རེག་བྱ་ནང་འཇམ་ལ་ཕྱག་འཚལ། །རེག་བྱ་ནང་གྲོལ་ལ་ཕྱག་འཚལ། །རེག་བྱ་ནང་སྦྱིན་ལ་ཕྱག་འཚལ། །བཞི་པའི་དབང་བསྐུར་མཆོག་འདི་ནི། །མཆོག་གི་དབང་ཕྱུག་བདག་ལ་སྩོལ། །ཁྱོད་ཀྱིས་སྲོག་ཆགས་གསད་པར་བྱ་ཁྱོད་ཀྱིས་བརྫུན་དུ་སྨྲ་བར་གྱིས། །མ་བྱིན་པར་ཡང་ཁྱོད་ཀྱིས་ལོང༌། །གཞན་གྱི་བུད་མེད་སྤྱད་པར་གྱིས། །དི་རྣམས་བྱས་ན་སྡིག་མེད་ཅིང༌། །བསོད་ནམས་ཆེན་པོ་འབྱུང་བར་འགྱུར། །དེ་རྣམས་ཁྱོད་ཀྱིས་ནུས་ན་ནི། །བཞི་པའི་དབང་ནི་སྦྱིན་པར་བྱ། །ཁྱོད་ཀྱི་ཞབས་ཀྱི་བཀའ་དྲིན་ལ། །མགོན་པོ་ཆེན་པོ་བདག་གིས་ནི། །སློབ་པའི་སྤྱོད་པ་སེམས་ཀྱིས་བརྟག །ཇི་ལྟར་དབང་སྦྱིན་རིམ་པས་གསུངས། །གཏོང་དུལ་གཏིང་རིང་སྤྱོད་ཡོད་ན། །དབང་ནི་རིན་ཆེན་ཚིག་གིས་སྦྱིན། །ཤེས་རབ་ཡེ་ཤེས་མ་རྙེད་ན། །དམ་ཚིག་སྦྱིན་པར་མི་བྱའོ། །དམ་ཚིག་ཉམས་པས་འཇིགས་ཕྱིར་རོ། །ཕྱག་ན་རྡོ་རྗེས་མ་གནང་ངོ༌། །ཡང་དག་དབང་ནི་མ་རྙེད་ན། །ཕྱི་ནས་དེ་ལྟར་སྦྱིན་པར་བྱ། །དབང་བསྐུར་དེ་ནི་བཞི་པ་ཅན། །བཞི་རུ་གྱེས་པ་ཡོད་པས་སོ། །བུམ་པ་ལ་སོགས་ནུ་རེག་པས། །དང་པོའི་འབྲས་བུ་དགའ་བ་ཡིན། །གཉིས་པ་གསང་བའི་སྦྱིན་པ་ཡིས། །གསང་བ་མཆོག་གི་དགའ་བ་ཡིན། །གསུམ་པ་གཅིག་ཏུ་སྦྱོར་བ་ཡིས། །ཤེས་རབ་འདོད་ཆགས་མེ་འོག་གིས། །ཡོངས་སུ་གྱུར་པས་ཆད་པ་ཡིན། །དེ་ནས་ཤེས་རབ་ཡེ་ཤེས་བཤད། །དེ་ཡི་འགོག་པ་བཞི་པ་ཡིན། །རང་བཞིན་དེ་ནི་དེ་ལྟར་འོང༌། །དེ་ནི་དགོངས་པར་བཤད་མ་ཡིན། །
མཁས་པས་འབད་པས་ཤེས་པར་བྱ། །བཞི་པ་ཡི་ནི་དོན་རྣམས་ལ། །མི་མཐུན་པ་ནི་མང་སྨྲ་སྟེ། །དེ་ལ་གཞན་ནི་འདི་སྐད་གསུངས། །བཏང་སྙོམས་དངོས་པོ་བསྒོམ་པ་ཡིས། །འབྲས་ཡོད་བདེ་བའི་དངོས་པོ་ནི། །ཡེ་ཤེས་གསལ་བར་འབྱུང་བར་འགྱུར། །བཏང་སྙོམས་དངོས་པོར་བདག་སྦྱོར་བའི། །ལྷ་མོའི་དེ་ཉིད་བསྒོམ་པ་ཡིས། །འབྲས་བུའི་རྒྱུན་ནི་རྙེད་པར་འགྱུར། །གཞན་གྱི་གཞུང་གིས་དེ་སྐད་གསུངས། །ལྷ་ཡི་དངོས་པོ་མེད་པ་དང༌། །བཏང་སྙོམས་དངོས་པོ་ཡོད་པ་ཡིས། །བདེ་བ་ཡོད་པ་འབྲས་བུར་འགྱུར། །གཞན་གྱི་གཞུང་གིས་དེ་སྐད་གསུངས། །བག་ཆགས་བདེ་བ་ཁྱེར་ནས་ནི། །བག་ཆགས་མ་ཡིན་བདེ་བར་འགྱུར། །ཡང་དག་མཆོག་ནི་རྫོགས་པ་ཡིན། །གཞན་གྱི་གཞུང་གིས་དེ་སྐད་གསུངས། །བག་ཆགས་མ་ཡིན་བདེ་བའི་དངོས། །ལྷ་ཡི་བསྒོམ་པ་ཡང་དག་གིས། །རབ་ཏུ་བདེ་བའི་ཡེ་ཤེས་འབྱུང༌། །དེ་ནི་གཞན་གྱིས་གསུངས་པའོ། །དེ་གཞུང་ཚད་མ་མ་ཡིན་ཏེ། དེ་དོན་ཚད་མ་ཡང་མ་ཡིན། །བཏང་སྙོམས་བསྒོམ་པའི་དོན་གྱིས་ནི། །འབྲས་བུ་བདེ་བ་རྙེད་གྱུར་ན། །དེ་ནི་སྦྱོར་བ་མ་ཡིན་པ། །ནམ་མཁའི་མེ་ཏོག་སྐྱེ་བའི་དཔེ། །དེ་བཞིན་གསུངས་པ་ཁ་ཆེ་ཡི། །རིན་ཆེན་རྡོ་རྗེ་ཞབས་ཀྱི་ནི། །མ་མཐོང་བ་ལ་བསྒོམ་པ་མེད། །མཐོང་བ་ལ་ཡང་བསྒོམ་པ་མེད། །བདག་ལ་བཏང་སྙོམས་སྦྱོར་ཡོད་དམ། །ལྷ་ཡི་བསྒོམ་པ་ཡོད་པ་ཡིས། །འབྲས་བུ་རྒྱུན་དུ་རྙེད་འགྱུར་ཟེར། །དེ་ནི་རྨོངས་པའི་གཞུང་ཡིན་ནོ། །ཐམས་ཅད་དངོས་པོའི་བཏང་སྙོམས་ཀྱིས། །དངོས་པོ་མ་ཡིན་འོང་བ་ཡིན། །དངོས་པོ་མ་ཡིན་ལྷ་ཡི་དངོས། །དེ་སྐད་འབྱུང་བ་སུ་ཡི་གཞུང༌། །འབྱུང་བ་ཡིན་ན་དེ་ཉིད་མིན། །དངོས་པོའི་གཟུགས་ཅན་འཁྲུལ་པ་ཡིན། །དངོས་པོ་མི་རྟག་བདེན་པ་ཡིན། །དེ་ཡི་དོན་ལ་ཐེ་ཚོམ་མེད། །བཏང་སྙོམས་དངོས་པོ་ཡོད་པ་དང༌། །ལྷ་ཡི་དངོས་པོ་མེད་པ་ཡིས། །དྲི་མེད་འབྲས་བུ་འབྱུང་འགྱུར་ན། །མཁས་པ་རྣམས་ནི་འགོད་པར་འགྱུར། །ལྷ་ཡི་དངོས་པོ་མེད་གྱུར་ན། །བཏང་སྙོམས་དེ་ཡིས་ཅི་ཞིག་བྱ། །ཡོད་ན་དེ་བཏང་སྙོམས་དགོས། །དངོས་པོ་མིན་ན་མི་དགོས་སོ། །རྟག་པ་ཡི་ནི་གནས་མེད་དེ། །རི་བོང་རྭ་སོགས་དཔེ་དང་
འདྲ། །བག་ཆགས་བདེ་བ་བཟུང་ན་ནི། །བག་ཆགས་མ་ཡིན་འོང་འགྱུར་ན། །དེ་ནི་སྐྱོན་དུ་འགྱུར་བའི་ཚིག །འབྲུ་ནང་ལས་ནི་ནན་ཡང་མིན། །འབྲས་ལ་སོགས་པ་འབྱུང་མི་སྲིད། །མཉམ་པ་ཀུན་གྱི་གཞུང་ལུགས་སོ། །ཡང་དག་རབ་བདེའི་བསྒོམ་པ་ཡིས། །རབ་ཏུ་བདེ་འབྲས་འབྱུང་འགྱུར་ན། །དེ་ལ་ཁྱད་པར་ཅི་ཞིག་ཡོད། །ཅི་ཕྱིར་དོན་དུ་སྒོམ་པར་བྱེད། །རབ་བདེ་བ་ལ་ཁྱད་ཡོད་ན། །དེ་ལ་བསྒོམ་པ་བྱ་དགོས་སོ། །ཁྱད་པར་གནས་འགྲོ་ན་ཡང་སྐྱོན། །དེ་ནི་དེ་ཉིད་མཚན་མ་ཡིན། །གཉིས་སུ་མེད་པའི་མཆོག་དགའ་དངོས། །ལྷ་ཡི་དངོས་པོ་རབ་བདེ་བ། །སྒྱུ་འཕྲུལ་ཡེ་ཤེས་ཆེན་པོ་ཡི། །འབྲས་བུ་དེ་ནི་རབ་བཞིན་གཞུང༌། །རང་བརྟགས་ཡང་ན་གཏི་མུག་གིས། །དེ་ལ་མཁས་པ་རྣམས་ནི་འཁྲུལ། །དེ་ཡི་གཞུང་ལུགས་གསལ་བརྟགས་ནས། །ཕྱི་ནས་རང་གཞུང་གསལ་བར་བྱ། །ཤེས་རབ་ཡེ་ཤེས་ཟིན་ནས་སེམས། །མྱོང་བ་དེ་ནི་བཞི་པ་ཡིན། །དེ་ཡི་མན་ངག་སློབ་རྣམས་ལ། །སློབ་དཔོན་གཅིག་གིས་ཚིག་གིས་བཤད། །ཤེས་རབ་ཡེ་ཤེས་ཟིན་ནས་སུ། །སློབ་དཔོན་སློབ་ལ་གསུངས་པ་འདི། །རྡོ་རྗེ་ཉི་མ་ནུབ་ལས་ནི། །འདི་ཡི་ཡེ་ཤེས་གསལ་བར་འབྱུང༌། །ཡང་དག་དེ་ཡི་དོན་ཤེས་ནི། །གཞན་བཞི་པ་རབ་ཡིན་པར་གསུངས། །ཤེས་རབ་ཡེ་ཤེས་ཟིན་ནས་སུ། །མཚོ་སྐྱེས་འབྱུང་བར་བབས་པ་ནི། །རིན་ཆེན་སྐར་ཁུང་ཁ་མི་རེག །ཐམས་ཅད་ཀྱི་ནི་དངོས་པོ་ལ། །འདུ་ཤེས་མེད་པ་བཞི་པ་ཡིན། །གཞན་དག་དེ་སྐད་གསུང་བ་ཡིན། །ཤེས་རབ་ཡེ་ཤེས་ཟིན་ནས་སུ། །འདམ་སྐྱེས་འབྱུང་བ་བབས་པ་འདི། །རིན་ཆེན་སྐར་ཁུང་ཁ་རེག་པ། །འདི་ཡིས་དངོས་པོ་ཐམས་ཅད་ལ། །དྲན་པ་མེད་པ་བཞི་པའོ། །གཞན་དག་གིས་ནི་དེ་སྐད་གསུངས། །ཤེས་རབ་ཡེ་ཤེས་ཟིན་ནས་སུ། །དང་པོའི་ཡིད་ནི་ནམ་མཁའི་དབྱིངས། །བབས་པས་ཆོས་རྣམས་ཐམས་ཅད་ལ། །རྙེད་པ་མེད་པར་གྱུར་པས་སོ། །དེ་ནི་བཞི་པ་ཡང་དག་རབ། །གཞན་གྱིས་དེ་སྐད་གསལ་བར་གསུངས། །ཐམས་ཅད་པདྨ་འབྱུང་བ་ནི། །ནམ་མཁའི་དབྱིངས་སུ་བབས་གྱུར་ན། །ཆོས་ཐམས་ཅད་ལ་བཏང་སྙོམས་སོ། །གཞན་གྱིས་བཞི་པ་གསུངས་པའོ། །དེ་དག་ཐམས་ཅད་དོར་བྱས་ཏེ། །རིགས་
པ་མེད་པས་གཞུང་ལུགས་མིན། །ཤེས་རབ་གང་ཡིན་ཡེ་ཤེས་གང༌། །དེ་ཡི་འབྲས་བུ་གང་ཡིན་གསུངས། །འདི་ཡི་དོན་དེ་མི་ཤེས་ན། །གཞན་གྱི་གཞུང་ལ་འབྲས་བུ་མེད། །མ་ཟིན་ན་ནི་མྱོང་བ་མེད། །ཟིན་ན་མྱོང་བ་ཡོད་པ་ཡིན། །ཟིན་ན་མྱོང་བ་ཅི་ཞིག་ཡོད། །སོང་ནས་འོངས་པ་ག་ལ་ཡོད། །ཟིན་ནས་མྱོང་བ་ཕྱིར་གྱི་སྟེ། །བྱོལ་སོང་གི་ནི་ལས་ཡིན་ནོ། །དང་པོ་དང་ནི་ཟིན་ནས་གཅིག །ཕྱི་མ་ནུས་ནས་དེ་བཞིན་ནོ། །ཟིན་ནས་ནུབ་པ་ཡོད་པ་ཡིས། །དེ་ལ་དཔེ་ནི་གང་གིས་བྱེད། །ཟིན་ནས་ནུབ་པ་དེ་ནི་གཅིག །དེ་ལ་ཁྱད་པར་ཅི་ཡང་མེད། །ཟིན་ནས་རིན་ཆེན་ཁ་ལ་ནི། །མ་རེག་འགྲོ་བ་དེ་གཞུང་ན། །འགྲོ་ན་དེ་ནི་ཆད་པ་ཡིན། །དེ་ལ་བལྟ་རྒྱུ་མ་མཆིས་སོ། །རེག་ནས་འགྲོ་བ་དེ་དང་མཉམ། །གང་དུ་སྨྲས་པ་དེ་ཡིན་ནོ། །དང་པོ་ནམ་མཁའི་དབྱིངས་ལ་ནི། །རིམ་པས་གཞན་ཡང་འགྲོ་བར་འགྱུར། །ཐམས་ཅད་དེ་ནི་བབས་གྱུར་ན། །ཐ་མལ་པ་དང་མཉམ་པའོ། །ཐ་མལ་པས་ནི་བདེ་ཆེན་ནི། །ནམ་ཡང་ཤེས་པ་མ་ཡིན་ནོ། །དེ་ལ་བདེ་ཆེན་མེད་པར་ནི། །ཡེ་ཤེས་འབྱུང་བར་ག་ལ་འགྱུར། །ཡེ་ཤེས་སྲིད་པ་ཉམས་དགའ་བ། །ཤེས་རབ་མྱ་ངན་འདས་ལས་ཆད། །དེ་གཉིས་འབྲས་བུ་དེ་ཉིད་ཡོད། །དེ་ཡི་འབྲས་བུ་དོན་དམ་ཡིན། །དེ་བཞིན་ཀྱེ་ཡི་རྡོ་རྗེ་ཡི། །ལེའུ་བརྒྱད་པའི་ནང་ནས་གསུངས། །དེ་ནི་གཉིས་མེད་ཞི་ཆེན་པོ། །འདོད་ཆགས་ཆགས་བྲལ་མེད་པ་དང༌། །རང་རིག་བརྗོད་དུ་མེད་པ་དང༌། །རྟོག་པ་ཐམས་ཅད་མེད་པའོ། །རང་བཞིན་སྒྲུབ་ཐབས་སོགས་ཀྱིས་ནི། །ཡན་ལག་གསུམ་ནི་ཡོད་པ་ཡི། །རང་བཞིན་ཉིད་ནི་བཞི་པའོ། །ལ་ལ་མདའ་ལ་མཉམ་སྦྱོར་བ། །སྒྲུབ་ཐབས་ཕྱི་མ་ཡིན་པར་བཤད། །ཧཱུཾ་ཕཊ་ཀྱི་ནི་མཉམ་པ་ནི། །བསྒྲུབས་པས་དེ་ནི་སྒྲུབ་ཐབས་སོ། །སྒྲུབ་ཐབས་ནང་ན་སེམས་ཡོད་ན། །རྟགས་ནི་འདི་ལྟ་བུ་དག་སྐྱེ། །འདར་དང་རྡུལ་དང་མྱོས་པ་དང༌། །ལུས་མི་བརྟན་པར་དབུགས་རྒོད་དང༌། །བཀྲག་དང་དྲོང་ནི་དེ་ལྟར་བརྒྱད། །འབྲས་བུའི་དུས་ན་སྐྱེ་བར་འགྱུར། །སྒྲུབ་ཆེན་ཡན་ལག་འབྲས་བུ་འདི། །ཡེ་ཤེས་གསུམ་ནི་མེད་པའོ། །རང་བདེ་མཆོག་ནི་ཞི་ཆེན་པོ། །ཡེ་ཤེས་འོད་ནི་རང་བཞིན་ཅན། །དེ་ཡི་རྫོགས་པའི་
རིམ་པ་ཡིས། །འབྲས་བུ་འབད་དེ་ཤེས་པར་བྱ། །དེ་འབྲས་ཡེ་ཤེས་རིགས་པས་ནི། །སློབ་མ་ལ་ནི་ཚིག་གིས་ནི། །བླ་མས་དོན་ནི་བཤད་པར་བྱ། །བལྟ་བར་དགའ་བའི་མཚན་ཉིད་དོ། །དབང་གསུམ་ལས་གཞན་གཞན་ན་མེད། །བཞི་པ་གང་ན་ཡོད་པ་ཡིན། །འབྲས་བུ་གཟུགས་ཅན་དེ་ཉིད་ནི། །གསལ་བར་དེ་ལྟར་བཞི་པའོ། །དེ་བཞིན་དཔལ་རིན་རྡོར་ཞབས་ཀྱིས། །དཔལ་བསྒོམ་པ་ཡི་རིམ་ལས་གསུངས། །གསུམ་ནི་མེད་པ་གསུམ་རང་སྟེ། །དེ་བཞིན་གཞུང་ཡིན་དེ་ལྟར་རོ། །གཞན་གྱི་དོན་ལ་རབ་དགའ་བས། །རོ་ཡི་དགུག་པས་དབང་དུ་བྱ། །གསང་བའི་གསང་བ་ཅི་བརྗོད་པ། །ཐུགས་རྗེ་ཅན་རྣམས་བཟོད་པར་མཛོད། །ཐབས་ཀྱི་རྒྱུད་ནི་འདུས་པ་ལས། །དེ་ལྟའི་གཞུང་ལུགས་མེད་ན་ཡང༌། །དེ་བཞིན་རིགས་པ་ཅི་སྨྲས་པ། །ཤེས་རབ་རྒྱུད་ཀྱི་རིམ་ལས་སོ། །ཐབས་དང་ཤེས་རབ་གཉིས་མེད་དངོས། །དེ་ནི་རྒྱལ་བས་གསུངས་པའོ། །འཁོར་ལོ་བཞི་ནི་མཉམ་སྦྱར་བ། །ཕྲ་མོའི་ཐིག་ལེ་དེ་ནང་དུ། །རང་བཞིན་གཅིག་ཅིག་གཞན་མ་མེད། །དངོས་པོ་མེད་པའི་དངོས་པོ་ཅན། །གཞན་མ་གསུམ་ནི་འདབ་ལ་གནས། །འཁོར་ལོ་རེ་རེ་སོ་སོ་ཡིན། །སྤྲུལ་པའི་འཁོར་ལོ་འདབ་མ་གསུམ། །ཆུ་སྐྱེས་ལྟེ་བ་ཡོད་པའོ། །དེ་ནི་ཕྱི་རོལ་ཤེས་པར་བྱ། །བརྒྱད་པོ་བརྒྱད་ནི་དེ་ནང་དུའོ། །དེ་ཡི་ནང་ན་གསང་བ་བཞུགས། །སངས་རྒྱས་རིན་པོ་ཆེ་ཡི་སྣོད། །བཾ་གྱི་དངོས་པོ་ཡང་དག་འཇམ། །སྣ་ཚོགས་ཅན་ནི་གཡོ་བའོ། །སངས་རྒྱས་རིན་ཆེན་དེ་ན་གནས། །རང་བཞིན་ཡེ་ཤེས་མཚན་ཉིད་དོ། །འཕྱང་བའི་རྩ་ཡི་ནང་ན་བཞུགས། །ཁམས་གསུམ་དུ་ནི་རོལ་པ་མཛད། །གསུམ་ནི་རབ་ཏུ་ཡོད་པ་སྟེ། །ནང་དང་ཕྱི་རོལ་བར་མ་ཡིན། །ཕྱི་རོལ་གཡས་ཀྱི་ར་ས་ནཱ། །ནང་གི་གཡོན་གྱི་ལ་ལ་ནཱ། །དབུས་ཀྱི་ཨ་བ་དྷཱུ་ཏཱི་ལ། །ཉིད་ཀྱི་འདུག་ས་བྱེད་པའོ། །གཅིག་པུ་ཡི་ནི་གཙོ་མོ་ཡི། །ཀུན་རྫོབ་ཏུ་ནི་གསུམ་དུ་འགྱུར། །དེ་བཞིན་བྱང་ཆུབ་སེམས་ནི་གཅིག །སྣ་ཚོགས་གཟུགས་སུ་ཡོད་པའོ། །དབང་བྱེད་ལོངས་སྤྱོད་བརླག་པ་ནི། །དེ་རྣམས་ངལ་སོར་བསྟན་པའོ། །དབང་བྱེད་མགྲིན་པའི་གནས་སུ་ནི། །ལོངས་སྤྱོད་བར་དུ་མཆོག་འདི་བསྟན། །བརླག་ནི་ཁ་ལས་ཤེས་པར་
བྱ། །དེ་ནི་ཆད་པ་གསལ་བའོ། །མཆོག་ནི་མགྲིན་པའི་གནས་སུ་སྟེ། །རང་བཞིན་བར་ན་ཡོད་པའོ། །ནང་དང་ཕྱི་རོལ་དབུས་ཀྱི་ནི། །རྣལ་འབྱོར་དེ་ཡང་མི་ཤེས་ན། །དེ་དུས་རང་བཞིན་མི་རྙེད་དེ། །ཤེས་ན་རྙེད་པར་ཐེ་ཚོམ་མེད། །དེ་ནི་ཤེས་རབ་སྐྱབས་ཡང་དག །ཤེས་རབ་བླ་མའི་ཁ་ལས་འགྱུར། །རྩ་རྣམས་དེ་ནི་མེད་གྱུར་ན། །ཁུ་བ་ཁྲག་ནི་སྦྱོར་བ་མེད། །ཁུ་བ་ཁྲག་ནི་མེད་གྱུར་ན། །རྣམ་པར་ཤེས་པ་སྦྱོར་བ་མེད། །རྣམ་པར་ཤེས་པ་མེད་གྱུར་ན། །ཐམས་ཅད་གཡོ་བ་མེད་པར་ཐལ། །གཡོ་མེད་བདེ་བ་ཆེན་པོ་ནི། །ནམ་ཡང་ཤེས་པར་མི་འགྱུར་རོ། །བདེ་བ་ཆེན་པོ་མེད་གྱུར་ན། །ནམ་ཡང་བྱང་ཆུབ་མི་རྙེད་དེ། །ཏིང་འཛིན་བཟླས་པ་སྦྱིན་པ་ནི། །བསྐལ་པ་བརྒྱར་ནི་སྤྱད་ན་ཡང༌། །མན་ངག་དེ་ནི་མེད་གྱུར་ན། །ཇི་ལྟར་རྡོ་སྟེངས་ས་བོན་བཞིན། །དེ་ནི་ཐམས་ཅད་འགྲུབ་དོན་དུ། །ཐབས་ནི་ཅུང་ཟད་བདག་གིས་བཤད། །ཐབས་གང་གིས་ནི་རྣལ་འབྱོར་རྣམས། །རང་བཞིན་གྱི་ནི་གནས་དེར་འགྱུར། །སྦྱིན་སྲེག་ཐབ་ནི་མེད་གྱུར་ན། །རྣལ་འབྱོར་དངོས་གྲུབ་ཐོབ་མི་འགྱུར། །ལྟེ་བའི་ཧོམ་ཁུང་གཏུམ་མོའི་གནས། །ཤེས་རབ་རང་རིག་མཚན་ཉིད་དོ། །རྡོ་རྗེ་ཆུ་སྐྱེས་མཉམ་སྦྱོར་བས། །ཡང་དག་འཇིགས་པར་འབར་བའོ། །ཕུང་པོ་ལྔ་ཡི་རིགས་ལྔ་ཡི། །རྣམ་པར་རྟོག་པའི་སྲེག་པ་དང༌། །དེ་བཞིན་སྤྱན་ལ་སོགས་པ་ནི། །སྐྱེ་མཆེད་ཁམས་ནི་གཟུགས་ཅན་ནོ། །ཕུང་པོ་ལ་སོགས་ཡམ་ཤིང་དང༌། །དང་པོར་སྲེག་རྫས་གསལ་བར་བྱ། །ཡམ་ཤིང་ཐམས་ཅད་བསྲེགས་པའོ། །ཧཾ་གི་དངོས་པོ་ཁ་བུབ་ནི། །ཡོན་པོའི་རང་བཞིན་མཚན་ཉིད་ཅན། །སྨིན་ཕྲག་འཁོར་ལོའི་ནང་ན་ཡོད། །དེ་ནས་དེ་ནི་ཡང་དག་འབབ། །ཤུ་ཀྲ་བདུད་རྩི་རབ་རྒྱུན་ནོ། །དེ་ཡི་གསང་བའི་སྲེག་རྫས་སྦྱིན། །ལྟེ་བའི་ཧོཾ་ཁུང་ཕྱི་རོལ་མིན། །ཡང་དག་པར་ནི་དགྱེས་ནས་ནི། །ཅི་བསམས་པ་ཡི་འབྲས་བུ་སྨིན། །འོད་ཀྱི་གཟུགས་ནི་གཏུམ་མོ་ཡིན། །ཨ་བ་དྷཱུ་ཏཱིའི་ཞི་བའི་གཟུགས། །ཆོས་དང་ལོངས་སྤྱོད་རྫོགས་ལམ་གནས། །འགྲོ་དང་འོང་བ་ཡང་དང་ཡང༌། །སྐྲ་ཡི་རྩེ་མོ་འབུམ་གྱི་ཆ། །ཆེ་བར་ལྟ་བས་མཐོང་མི་འགྱུར། །དེ་ཡི་རོ་ཡོད་མཉམ་པ་ཡིས། །བླ་མའི་ཞབས་ཀྱི་བཀའ་དྲིན་ལ། །ཕྲ་མོར་ལྟ་བའི་
མཚན་ཉིད་ཀྱིས། །མཆོག་གི་དངོས་གྲུབ་ཐོབ་པར་འགྱུར། །དེ་ཡི་ནང་ན་སེམས་ཡོད་ན། །སྐད་ཅིག་གཅིག་གིས་བྱང་ཆུབ་སེམས། །འདི་ནི་གསང་བ་མཆོག་ཡིན་ཏེ། །ལུང་ལས་གསལ་བར་བྱས་པས་སོ། །བདག་གིས་སྔོན་མེད་རང་བཟོར་ནི། །རྒྱུད་རྣམས་དོན་ལས་མི་མང་པོ། །དེ་ཡི་འབྲས་བུ་ཇི་སྙེད་པ། །བླ་མ་རབ་ཀྱི་བཀའ་དྲིན་ནོ། །འཇིག་རྟེན་ཚད་མེད་མྱུར་བར་ནི། །དེ་ཡིས་འགྲོ་བ་གྲོལ་བར་ཤོག །སྲིད་པའི་གཏི་མུག་དགོན་པ་ལ། །རྣལ་འབྱོར་རྣམས་ཀྱི་ལམ་རབ་གཏོར། །ཤེས་རབ་དཔལ་ནི་གསང་བས་ནི། །རིན་ཆེན་སྣང་བ་གསལ་བྱས་པས། །སུ་ལ་བདག་གིས་དབང་བསྐུར་བས། །བདག་ལ་དེ་བཞིན་གང་གིས་ཐོས། །དེ་ནི་རང་གིས་འདི་ཤེས་ལ། །གཞན་དག་ལ་ཡང་འཆད་ནུས་སོ། །གང་ལ་བདག་གིས་བསྐུར་བ་མིན། །གང་གིས་བདག་ལ་ཐོས་མིན་ལ། །དེ་ནི་རང་གིས་མི་ཤེས་ཏེ། །གཞན་ལ་འཆད་པར་ནུས་མིན་ནོ། །དབང་རིན་ཆེན་སྣང་བ་ཞེས་བྱ་བ་རྣལ་འབྱོར་གྱི་དབང་ཕྱུག་ཆེན་པོ་དཔལ་ཤེས་རབ་གསང་བའི་ཞབས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཔལ་ཤེས་རབ་གསང་བའི་ཞབས་དང༌། བོད་ཀྱི་ལོ་ཙཱ་བ་ཀམ་དགེ་བསྙེན་ཆོས་ཀྱི་ཡེ་ཤེས་དང༌། ཕྱུག་བརྩམས་དབང་ཕྱུག་རྒྱ་མཚོས་ཞུས་ཏེ་གཏན་ལ་ཕབ་པ།།