དྲུག་པ། དབང་བསྐུར་གྱི་ཆོ་ག་བསྟན་པ་ཞེས་བྱ་བའི་ལེའུར་བཅད་པ།
དེ་ནས་གཞན་ཡང་དབང་བསྐུར་བའི་ཆོ་ག་བཤད་དེ། དང་པོར་རེ་ཞིག་བཀྲ་ཤིས་ཀྱི་ཚིགས་བཅད་བརྗོད་པར་བསྟན་ཏེ། རྡོ་རྗེ་དྲིལ་བུའི་སྔགས་ཀྱིས་སྤོས་དང་བཅས་པར་རྡོ་རྗེ་དྲིལ་བུ་དཀྲོལ་བར་བྱའོ། །དེའི་འོག་ཏུ་མེ་ལོང་གི་སྟེང་དུ་མེ་ཏོག་ལ་སོགས་པ་གཏོར་ཏེ། ལས་ཐམས་ཅད་པའི་བུམ་པས་རྣམ་པར་རྒྱལ་བའི་བུམ་པ་ལ་སྔགས་འདིས་དབང་བསྐུར་བར་བྱའོ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཱཀ་ཙིཏྟ་མ་ཧཱ་བཛྲ་དྷ་ར་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་ཕཊ་སྭཱ་ཧཱ། དེ་ནས་འཁོར་ལོ་དང་ལྡན་པ་ལ། ཨོཾ་བཻ་རོ་ཙ་ན་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་ཕཊ་སྭཱ་ཧཱ། དེ་ནས་པདྨ་དང་ལྡན་པ་ལ། ཨོཾ་ཨ་མི་ཏཱ་བྷ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་ཕཊ་སྭཱ་ཧཱ། དེ་ནས་རིན་པོ་ཆེ་དང་ལྡན་པ་ལ། ཨོཾ་རཏྣ་སཾ་བྷ་བ་ཏ་ཐཱ་ག་ཏ་ཨ་བྷི་ཥེ་ཀ་ས་མ་
ཡ་ཤྲི་ཡེ་ཧཱུཾ་ཕཊ་སྭཱ་ཧཱ། ཨོཾ་ཨ་མོ་གྷ་སིདྡྷི་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲེ་ཡེ་ཧཱུཾ་ཕཊ་སྭཱ་ཧཱ། དེ་ནས་རི་རབ་དང་ལྡན་པ་ལ། ཨོཾ་བྷ་ག་བ་ཏེ་བུདྡྷ་ལོ་ཙ་ནེ་ཨ་བྷི་ཥེ་ཀ་ས་མ་ཡེ་ཤྲི་ཡེ་ཧཱུཾ་ཕཊ་སྭཱ་ཧཱ། དེ་ནས་སྦྲུལ་དང་ལྡན་པ་ལ། ཨོཾ་བྷ་ག་བ་ཏི་མཱ་མ་ཀཱི་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་ཕཊ་སྭཱ་ཧཱ། དེ་ནས་མེ་དང་ལྡན་པ་ལ། ཨོཾ་བྷ་ག་བ་ཏི་བྷནྡ་ར་བྷ་སེ་ནེ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་ཕཊ་སྭཱ་ཧཱ། དེ་ནས་འཕན་དང་ལྡན་པ་ལ། ཨོཾ་བྷ་ག་བ་ཏེ་ཏ་རེ་ནེ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་ཕཊ་སྭཱ་ཧཱ། དེ་ནས་སྤོས་དང་བཅས་པར་རྡོ་རྗེ་དྲིལ་བུ་དཀྲོལ་ཏེ། འཁོར་དང་བཅས་པའི་དཀྱིལ་འཁོར་ལ་དབང་བསྐུར་སྦྱིན་པར་བྱའོ། །ཨོཾ་སརྦ་ཏ་ཐཱ་ག་ཏ་ཨཱཏྨ་ཀྭ་ཛྙཱ་ན་ཨཱ་ཀཱ་ཤ་སཱ་རུ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་ཕཊ་སྭཱ་ཧཱ། དེ་ནས་ཡང་རྡོ་རྗེ་དྲིལ་བུ་དཀྲོལ་ཏེ་ཐང་ཀ་ལ་སོགས་པའི་བདག་ཉིད་ཀྱི་སྐུ་ལ་དབང་བསྐུར་སྦྱིན་པར་བྱའོ། །ཨོཾ་པཉྩ་ཨཱ་ཀ་ར་མ་ཧཱ་ཛྙཱ་ན་ཨཱཏྨ་ཀོ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་ཕཊ་སྭཱ་ཧཱ། ད་ནི་སློབ་མའི་དབང་བསྐུར་བཤད་དེ། དང་པོ་ནི་ལས་ཐམས་ཅད་པའི་བུམ་པས་སོ། །ཡང་ན་དམ་ཚིག་གི་ཆུས། མེ་ཏོག་གི་ཕྲེང་བ་དང་བཅས་པའི་མིག་གི་རས་ལ། ཨོཾ་ཨ་ཁཾ་བཱི་རའི་སྔགས་ཀྱིས་གཏོར་བར་བྱ་སྟེ་ལས་ཀྱི་སློབ་དཔོན་གྱི་ལག་ཏུ་སྦྱིན། དེས་སློབ་མ་ལ་ཇི་ལྟར་གནས་པ་མཐོང་ནས་དམ་ཚིག་སེམས་དཔའི་གཟུགས་སུ་བྱིན་གྱིས་བརླབས་ཏེ། སྟོང་ཕྲག་དང་ལྡན་ན་སྤྱན། ཨོཾ་ས་ཧ་སྲཱ་ཀྵའི་སྔགས་ཀྱིས་བཅིང་བར་བྱའོ། །དེའི་དུས་སུ་ལས་ཀྱི་སློབ་དཔོན་གྱིས་དེ་ལ་དེ་ལྟ་བུའི་ཚིགས་བཅད་བརྗོད་པ་དེས་ཀྱང་དེ་ལྟ་བུའི་བླ་མ་ཆེན་པོ་རྡོ་རྗེ་སློབ་དཔོན་གྱི་མདུན་དུ་བརྗོད་པར་བྱའོ། །མགོན་པོ་སྤྱན་གྱིས་བདག་ལ་གཟིགས། །ཁྱོད་ནི་བདག་གིས་སྟོན་ཆེན་པོ། །དམ་ཚིག་དེ་ཉིད་བདག་ལ་གསོལ། །ཐམས་ཅད་མཁྱེན་ལ་ཕྱག་འཚལ་ལོ། །ཡེ་ཤེས་ཉི་འོད་ཕྱག་འཚལ་ལོ། །ཐམས་ཅད་མཁྱེན་སྨན་ཕྱག་འཚལ་ལོ། །ཡེ་ཤེས་བདུད་རྩི་མཚོ་ཕྱག་འཚལ། །དེ་སྐད་ཐོས་ནས་བླ་མ་ཆེན་པོ་རྡོ་རྗེ་སློབ་དཔོན་གྱིས། འདི་སྐད་ཅེས་གསུང་བར་བྱའོ། །སྐྱེས་བུ་ཁྱོད་ནི་སུ་ཞིག་ཡིན། །ཁྱོད་ནི་ཅི་འདོད་བདག་ལ་སྨྲོས། །སློབ་མས་ཀྱང་འདི་སྐད་བརྗོད་པར་བྱའོ། །དཔའ་བོ་ཆེན་པོ་
བདག་སྐལ་ལྡན། །ཐོག་མའི་དབང་ནི་བདག་ལ་སྩོལ། །དེ་ནས་བླ་མ་ཆེན་པོ་རྡོ་རྗེ་སློབ་དཔོན་གྱིས་སྐལ་ལྡན་ཚུར་ཤོག་ཚུར་ཤོག་ཅེས་གསུང་བར་བྱའོ། །སློབ་མ་ཡང་མེ་ཏོག་གིས་བཀང་བའི་སྙིམ་པ་དང་ལྡན་པ་ལས་ཀྱི་སློབ་དཔོན་གྱིས་ལག་པ་གཡས་པ་བཟུང་ནས། བླ་མ་ཆེན་པོ་རྡོ་རྗེ་སློབ་དཔོན་གྱི་མདུན་དུ་མེ་ཏོག་གི་སྙིམ་པ་དབུལ་བར་བྱའོ། །དེ་ནས་ལན་གསུམ་ཕྱག་བྱས་ནས། འདབ་མ་བརྒྱད་པའི་པདྨའི་སྟེང་དུ་གཞག་པར་བྱའོ། །དེ་ནས་རྡོ་རྗེ་སློབ་དཔོན་གྱིས། ཧཱུཾ་ཕཊ་ཀྱི་རྣམ་པའི་སྔགས་ཀྱིས་མེ་ཏོག་བྱིན་གྱིས་བརླབས་ཏེ། ཨ་ཏི་ཧོ་ཏིཥྛ་བརྟུལ་ཞུགས་བཟང་ཞེས་གསུང་ནས་མགོ་གོ་ལ་ནི་སྦྱིན་པར་བྱའོ། །ཕྱི་ནས་ཀྱང་ཧཱུཾ་གི་སྔགས་བཟླས་པའི་འབྲས་དཀར་པོ་དང་ལྡན་པའི་མེ་ཏོག་གིས་ལན་གསུམ་སྙིང་གར་བཏབ་པར་བྱའོ། །དེ་ནས་ཧཱུཾ་གི་རྣམ་པའི་སྔགས་ཀྱིས་མེ་ཏོག་དང་བཅས་པའི་རྡོ་རྗེ་སྙིང་གར་ལེགས་པར་བཞག་སྟེ་འདི་སྐད་བརྗོད་པར་བྱའོ། །ཀྱེ་ལེགས་དགྱེས་ཀྱེའི་དམ་ཚིག་ཁྱོད། དེ་བཞིན་གཤེགས་པ་ཐམས་ཅད་ལ་སོགས་པའི་དངོས་གྲུབ་ཁྱོད་ཇི་ལྟར་འདོད་པ་བཞིན་དུ་རྙེད་དོ། །ཕྱི་ནས་ཡང་འདི་སྐད་སྨྲ་བར་བྱའོ། །དཀྱིལ་འཁོར་མ་མཐོང་སྔོན་དུ་ནི། །ཁྱོད་ནི་གང་ཡང་སྨྲ་མ་བྱེད། །མ་ཡིན་ཁྱོད་ཀྱི་དམ་ཚིག་འདི། །དོན་མེད་ངེས་པར་འགྱུར་བ་ཡིན། །དེ་ནས་ཡང་ཧཱུཾ་གི་རྣམ་པས་རྡོ་རྗེ་བྱིན་གྱིས་བརླབས་ཏེ། མགོ་བོར་བཞག་ལ་འདི་སྐད་བརྗོད་པར་བྱའོ། །འདི་ནི་དམ་ཚིག་རྡོ་རྗེ་ཡིན། །སྤྱི་བོར་བདག་གིས་གསོར་བར་བྱ། །ཁྱོད་ཀྱིས་གཞན་ལ་འདི་སྨྲས་ན། །སྐད་ཅིག་གཅིག་གིས་ཕུག་ནས་འགྲོ་།དེ་ནས་དམ་ཚིག་གི་ཆུ་སྦྱིན་པར་བྱའོ། །ཨོཾ་བཛྲ་ཨུ་ད་ཀ་མ་ཧཱ་ཀུ་རཾ། །བཛྲ་ཙ་ནྡུ་བཀྲ་བྱ་ཤི་ན་ཞེས་སྔགས་དེས་ལན་བདུན་བཟླས་པ་བྱས་ནས་ལག་པ་གཡས་སུ་བྱིན་ཏེ་འདི་སྐད་ཅེས་བརྗོད་པར་བྱའོ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་འགྱུར། །འཐུངས་ཤིག་རྡོ་རྗེ་བདུད་རྩི་ཆུ། །དེ་ནས་ཡང་ཕྱག་གཡས་པས་ལག་པ་གཉིས་བཟུང་སྟེ། འདི་སྐད་བརྗོད་པར་བྱའོ། །དི་རིང་ཕན་ཆད་ཁྱོད་ཀྱིས་ནི། །རྡོ་རྗེ་སེམས་དཔར་བདག་
ལ་སྨྲོས། །བདག་གིས་ཇི་ལྟར་བཀའ་སྩལ་བཀའ་བ་སྦྱིན། །དེ་ལྟར་ཁྱོད་ཀྱིས་དད་པར་བྱ་དགོས་སོ། །གང་ཡང་ང་ལ་མི་མོས་ནམ་ཡང་མིན། །དེ་ལྟར་བྱས་ན་རྣམ་སྨིན་དམྱལ་བར་འགྲོ། །དེ་ནས་སློབ་མ་ལ་དྲི་བར་བྱའོ། །ཀྱེ་དགེ་བའི་ཡིད་དང་ལྡན་པ་ཁྱོད་ཀྱི་མིག་གིས་ཇི་ལྟར་མཐོང༌། ནག་པོ་དང༌། དམར་པོ་དང༌། དཀར་པོ་དང༌། སེར་པོ་དང་ལྗང་གུའི་ནང་ན་ཇི་ལྟར་མཐོང་བ་དེ་ལྟར་ལས་དེ་ལས་གྲུབ་ཅེས་བླ་མ་ཆེན་པོས་རང་གི་ཡིད་ལ་དཔྱད་དེ། བདེན་པའི་བྱིན་གྱི་རླབས་བྱའོ། །དྲི་མ་མེད་པའི་མེ་ཏོག་ཕྱག་གཡས་པས་བཟུང་ནས་འདི་སྐད་བརྗོད་པར་བྱའོ། །དཀྱིལ་འཁོར་འདི་ལ་དཀྱིལ་འཁོར་བའི་ལྷ་མོ་རང་རང་གི་རིགས་ཀྱི་ཇི་ལྟ་བའི་དངོས་གྲུབ་ཡོད་པ་དེ་ལྟ་བུའི་མེ་ཏོག་བཅས་པའི་བུ་འདི་ལ་དངོས་གྲུབ་ཐོབ་པར་གྱུར་ཅིག །དེ་སྐད་སྨྲས་ནས་ནམ་མཁའ་ལ་དབུལ་བར་བྱའོ། །དེ་ནས་མིག་གི་རས་ཀྱི་ཕྲེང་བའི་དབུས་ཀྱི་མེ་ཏོག་ཧཱུཾ་གི་རྣམ་པའི་སྔགས་ཀྱིས་བླངས་ནས་སློབ་མ་ལ་ཁ་སྦྱར་སྙིམ་པའི་དབུས་སུ་བྱིན་ཏེ་འདི་སྐད་བརྗོད་དོ། །ཨོཾ་ས་མ་ཡ་ཨ་དྷེ་རྦྷ་ཝེ་ཏོ་ཧཱུཾ་ཧཱུཾ་ཕཊ་སྭཱ་ཧཱ། དེ་ནས་ལས་ཀྱི་སློབ་དཔོན་གྱི་ཁ་བྱེ་བའི་པདྨའི་ཕྱག་རྒྱས་ལག་པ་འཕར་མའི་སྙིམ་པ། དམ་ཚིག་སེམས་དཔའ་བཟུང་སྟེ། དཀྱིལ་འཁོར་ལ་བསྐོར་བ་ལན་གསུམ་བྱས་ནས། རྡོ་རྗེ་སློབ་དཔོན་གྱི་གཡོན་ཕྱོགས་སུ་གཉིས་ཀ་ལངས་ཏེ། ལས་ཀྱི་སློབ་དཔོན་གྱིས་དེ་ལ་འདི་སྐད་བརྗོད་པར་བྱའོ། །ཧཱུཾ་པྲ་ཏཱི་ཙྪ་ཧོཿ་རྡོ་རྗེ་འཛིན་ལན་གསུམ་བརྗོད་དེ་དཀྱིལ་འཁོར་གྱི་དབུས་སུ་དབུལ་པར་བྱའོ། །ཕུལ་བ་ཙམ་གྱིས་བླ་མ་ཆེན་པོ་རྡོ་རྗེ་སློབ་དཔོན་གྱིས་ཐ་མ་འབྲིང་རབ་ལ་སོགས་པའི་དངོས་གྲུབ་ཉེ་བར་བལྟས་ཏེ། ཚིགས་བཅད་འདིས་མིག་དབྱེ་བར་བྱའོ། །རྡོ་རྗེ་སེམས་དཔའི་དེ་རིང་ཉིད། །ཁྱེད་ཀྱི་མིག་ནི་བརྩོན་པར་བྱེད། །བླ་ན་མེད་པའི་རྡོ་རྗེ་མིག །ཐམས་ཅད་སྤྱན་ལྡན་བདག་གིས་དབྱེ། །ཨོཾ་དེ་བྱཱིནྡྲ་ཛྙཱ་ན་ཨཱ་བ་ལོ་ཀི་ཏ་དྲྀ་ཤྱ་ཧུཾ་ཧཱུཾ་ཕཊ་སྭཱ་ཧཱ། དེ་ནས་དཀྱིལ་འཁོར་འཁོར་ལོའི་དོན་བསྟན་པར་བྱའོ། །དེའི་དུས་སུ་སློབ་མ་ལངས་ནས་བླ་མ་རྗེ་བཙུན་ལ་ལན་གསུམ་ཕྱག་བྱས་ཏེ། ཞུ་བའི་ཚིགས་བཅད་འདི་ལྟར་བརྗོད་པར་བྱའོ། །བྱང་ཆུབ་རྡོ་རྗེ་སངས་རྒྱས་ལ། །
ཆེན་པོའི་ཆེན་པོ་ཇི་ལྟར་སྦྱིན། །བདག་ཀྱང་བསྐྱབ་པའི་དོན་དུ་ན། །ནམ་མཁའ་རྡོར་སྔོན་བདག་ལ་སྩོལ། །བླ་མ་རྗེ་བཙུན་གྱིས་ཀྱང་འདི་སྐད་བརྗོད་པར་བྱའོ། །དབང་བསྐུར་ཆེན་པོའི་རིན་ཆེན་ནི། །ཁམས་གསུམ་གྱིས་ནི་ཕྱག་བྱས་པ། །གསང་གསུམ་གཞི་ལས་བྱུང་བ་ནི། །སངས་རྒྱས་ཀུན་གྱི་བདག་གིས་སྦྱིན། །དེ་ནས་ཧཱུཾ་གི་རྣམ་པའི་བྱིན་གྱིས་བརླབས་པའི་མེ་ཏོག་མགོ་བོ་ལ་བྱིན་ནས། རྡོ་རྗེ་དྲིལ་བུ་དཀྲོལ་ཏེ། སྔགས་འདིས་ཆུའི་དབང་བསྐུར་སྦྱིན་པར་བྱའོ། །ཨོཾ་ཤྲཱི་ཨ་ཀྵོ་བྷྱ་སྭ་བྷཱ་བ་བཛྲ་ཨོཾ་བོ་ན་ཨ་བྷི་ཥི་ཉྩཱ་མི་ཧཱུཾ་ཧཱུཾ་ཕཊ་སྭཱ་ཧཱ། དེ་ནས་ཧཱུཾ་གི་རྣམ་པའི་བྱིན་གྱིས་བརླབས་པའི་ཙནྡན་དེས་དཔྲལ་བར་ཐིག་ལེ་བྱའོ། །དེ་ནས་མི་བསྐྱོད་པའི་ལྷའི་རྣམ་པ་མཐོང་ནས་མཆོད་པ་ལྔ་དབུལ་བར་བྱའོ། །དེའི་རྗེས་སུ་གསེར་ལ་སོགས་པ་བཟོར་བྱས་པ་དང༌། ཡང་ན་རས་ལ་བྲིས་པའི་དབུ་རྒྱན་སྙིམ་པ་བརྐྱང་བའི་ཕྱག་རྒྱས་བཟུང་སྟེ། ཧྲི་ཕ་རའི་སྔགས་ཀྱིས་བྱིན་གྱིས་བརླབས་ནས་དེའི་སྟེང་དུ་གྲངས་མེད་པའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་བསམས་ཏེ་སྔགས་འདིས་དབུ་རྒྱན་གྱི་དབང་བསྐུར་སྦྱིན་པར་བྱའོ། །ཨོཾ་ཤྲཱི་རཏྣ་སཾ་བྷ་བ་སྭ་བྷཱ་བ་མུ་ཀུ་ཊེ་ན་ཨ་བྷི་ཥི་ཉྩཱ་མི་ཧུཾ་ཧཱུཾ་ཕཊ་སྭཱ་ཧཱ། སྔར་བཞིན་དུ་ནི་མཆོད་པ་བྱས་ནས་རིན་ཆེན་འབྱུང་ལྡན་གྱི་གཟུགས་སུ་མཐོང་སྟེ། རྡོ་རྗེའི་དབང་བསྐུར་སྦྱིན་པར་བྱའོ། །ཧཱུཾ་གི་རྣམ་པས་བྱིན་གྱིས་བརླབས་པའི་རྡོ་རྗེ་ཕྱག་གཡས་པར་བཟུང་ནས། རྡོ་རྗེ་སློབ་དཔོན་གྱིས་ཚིགས་བཅད་འདི་བརྗོད་པར་བྱའོ། །རྡོ་རྗེ་སེམས་དཔས་རྒྱལ་ཇི་ལྟར། །དེ་རིང་བདག་གིས་ཁྱོད་དབང་བསྐུར། །འདི་ནི་སངས་རྒྱས་ཐམས་ཅད་ཀྱི། །རབ་གྲུབ་ཕྱིར་ནི་རྡོ་རྗེ་བཟུང༌། །སློབ་མའི་སྙིང་གར་གཏུགས་བྱས་ལ། །ལག་པ་གཡས་པར་སྦྱིན་པར་བྱའོ། །ཨོཾ་ཤྲཱི་ཨ་མི་ཏཱ་བྷ་སྭ་བྷཱ་བ་བཛྲ་ནཱ་མ་ཨ་བྷི་ཥིཉྩཱ་མི་ཧུཾ་ཧཱུཾ་ཕཊ་སྭཱ་ཧཱ། དེའི་རྗེས་ཐོགས་སུ་ཐིག་ལེ་ལ་སོགས་པ་དང་བཅས་པའི་མཆོད་པ་བྱས་ནས་སྣང་བ་མཐའ་ཡས་ཀྱི་གཟུགས་སུ་མཐོང་སྟེ། དྲིལ་བུའི་དབང་བསྐུར་སྦྱིན་པར་བྱའོ། །ཨོཾ་ཧྲིཾ་ཧྲིཾ་ཀྵཾ་གི་སྔགས་ཀྱིས་བྱིན་གྱིས་བརླབས་ཏེ་མེ་ཏོག་ལ་སོགས་པའི་མཆོད་པ་བྱས་ནས་ཕྱག་གཡོན་པར་བཟུང་ནས་ཚིགས་བཅད་འདི་བརྗོད་པར་བྱའོ། །
རྡོར་དྲིལ་སྒྱུ་འཕྲུལ་ཆེན་པོ་འདི། །གཉིས་མེད་དངོས་པོ་ཤེས་རབ་ཐབས། །ཆོས་ཀྱི་དབྱིངས་ཀྱི་རང་བཞིན་ཅན། །ལག་པ་གཡོན་པས་འདི་ཟུང་ཤིག །ཨོཾ་ཤྲཱི་ཨ་མོ་གྷ་ཀོ་ལ་སྭ་བྷཱ་བ་ཨ་དྷི་པ་ཏེ་བཛྲ་གྷཎྜ་ཨ་བྷི་ཥི་ཉྩཱ་མི་ཧུཾ་ཧཱུཾ་ཕཊ་སྭཱ་ཧཱ། སྔར་བཞིན་མཆོད་པ་བྱས་ནས་དོན་ཡོད་གྲུབ་པའི་གཟུགས་སུ་མཐོང་སྟེ། མིང་གི་དབང་བསྐུར་བ་སྦྱིན་པར་བྱའོ། །ཨོཾ་བྷིཾ་བྷིཾ་གི་སྔགས་ཀྱིས་རྡོར་དྲིལ་བྱིན་གྱིས་བརླབས་ཏེ་མགོ་བོར་བཞག་ནས་སྔགས་འདི་བརྗོད་པར་བྱའོ། །ཨོཾ་ཤྲཱི་བཻ་རོ་ཙ་ནི་སྭ་བྷཱ་བ་ནཱ་མ་ཨ་བྷི་ཥིཉྩཱ་མི་ཧི་ཨ་མོ་གྷ་བཛྲ་ཏེ་ཧུཾ་ཧཱུཾ་ཕཊ་སྭཱ་ཧཱ། དེ་ལྟ་བུའི་ཡེ་ཤེས་ལྔའི་བདག་ཉིད་ཀྱི་སློབ་དཔོན་གྱི་དབང་བྱིན་ནས། ཕྱི་ནས་ཡང་རྡོ་རྗེ་སློབ་དཔོན་གྱི་དབང་བསྐུར་སྦྱིན་པར་བྱའོ། །སློབ་མས་ཀྱང་ཞུ་བའི་ཚིགས་བཅད་ཀྱིས་བླ་མ་རྗེ་བཙུན་མཉེས་པར་བྱའོ། །རྡོ་རྗེ་སློབ་དཔོན་གྱི་ནི་དབང༌། །ཐུགས་རྗེའི་གཏེར་གྱིས་བདག་ལ་སྩོལ། །གང་གིས་ཁྱོད་ཀྱིས་བཀའ་དྲིན་བདག །བདག་དང་གཞན་གྱི་དོན་བྱེད་ནུས། །བླ་མ་རྗེ་བཙུན་གྱིས་དེ་ལྟར་གསན་ནས། མགོ་ལ་མེ་ཏོག་ལ་སོགས་པ་བྱིན་ཏེ། དམ་ཚིག་གསུམ་གྱི་དབང་བསྐུར་སྦྱིན་པར་བྱའོ། །ཧཱུཾ་གི་རྣམ་པས་བྱིན་གྱིས་བརླབས་པའི་རྡོ་རྗེ་ཕྱག་གཡས་པར་བཟུང་ནས་སྔགས་འདི་བརྗོད་པར་བྱའོ། །ཨོཾ་པ་ར་མ་ཨཱ་དྱ་པུ་རུ་ཥཾ་སརྦ་བཛྲ་དྷ་ར་ཨ་དྷི་པ་ཏི་སྟྭཾ་ཧིཾ་ཧིཾ་ཧུཾ་ཧཱུཾ་ཕཊ་སྭཱ་ཧཱ། ཨའི་རྣམ་པ་ལས་བྱུང་བའི་རྡོ་རྗེ་དྲིལ་བུ་ཕྱག་གཡོན་པས་བཟུང་ནས། ཧཾ་ཧཱཾ་ཧིཾ་ཧཱིཾ་ཕིཾ་ཕིཾ་གི་སྔགས་ཀྱིས་བྱིན་གྱིས་བརླབས་ཏེ། དཀའ་ཐུབ་རྣམས་ཀྱིས་གདུང་མི་བྱ། །ཇི་ལྟར་བདེ་བ་བདེ་བར་གཟུང༌། །རྫོགས་པའི་སངས་རྒྱས་མ་འོངས་པ། །ཞེས་བརྗོད་ནས་སློབ་མ་ལ་སྔགས་འདིས་ལག་ཏུ་སྦྱིན་པར་བྱའོ། །ཨོཾ་སརྦ་ཏ་ཐཱ་ག་ཏ་མ་ཧཱ་སིདྡྷི་ས་མ་ཡཱ་ཤྭ་ས་ཨ་བྷི་ཥི་ཉྩཱ་མི་ཧུཾ་ཧཱུཾ་ཕཊ་སྭཱ་ཧཱ། གནང་བ་སྦྱིན་པ་དང་བརྟུལ་ཞུགས་དང༌། ལུང་བསྟན་པ་དང་སྐྱབས་སྦྱིན་ཡན་ཆད་བཞིས་ཕྱིར་མི་ལྡོག་པའི་དབང་ཤེས་པར་བྱའོ། །དེ་ནས་ཤིན་ཏུ་མཚན་ཉིད་དང་ལྡན་པའི་བརྒྱད་གཉིས་དང་ལྡན་པའི་བུ་མོ་དང་པོ་དབང་བསྐུར་ནས། བསྲུབ་པ་དང་བསྲུབ་ཐབས་ཀྱི་སྦྱོར་བས་བྱང་ཆུབ་ཀྱི་སེམས་དབྱུང་བར་བྱ་སྟེ། །རྡོ་རྗེའི་སྐེའི་ནང་དུ་ཧཱུཾ་ཕཊ་ཀྱི་སྔགས་ཀྱིས་བྱིན་གྱིས་
བརླབས་ཏེ། དྲི་མ་མེད་པ་པདྨའི་སྣོད་དུ་མཐེ་བོང་མཐའ་ལྟག་གི་ཕྱག་རྒྱས་སྐེ་བཙིར་ཏེ་དྲི་མ་མེད་པའི་རས་ཀྱིས་དགབ་པར་བྱའོ། །དེ་ལས་ལངས་ཏེ་གཡོན་ཕྱོགས་སུ་བུ་མོ་བཞག་སྟེ། ཡི་གེ་གསུམ་གྱི་སྔགས་ཀྱིས་བརྒྱ་རྩ་བརྒྱད་བཟླས་ཏེ། སློབ་མ་དགུག་པར་བྱའོ། །ཀྱེ་སེམས་དཔའ་ཆེན་པོ་ཚུར་ཤོག་ཚུར་ཤོག །དེས་ཀྱང་འདི་ལྟ་བུའི་ཞུ་བའི་ཚིགས་བཅད་ཀྱིས་ཞུ་བར་བྱའོ། །བྱང་ཆུབ་རྡོ་རྗེ་སེམས་ཆེན་པོ། །གསང་བའི་དབང་ནི་བདག་ལ་གསོལ། །ཡེ་ཤེས་བདུད་རྩི་བདག་ལ་སྩོལ། །རྡོ་རྗེའི་འབྱུང་བ་བདག་ལ་གསོལ། །དཔའ་བོ་ཆེན་པོ་ཁྱོད་ཕྱག་འཚལ། །ཕྱག་འཚལ་ཕྱག་འཚལ་རྨད་བྱུང་ཁྱོད། །བདེ་ཆེན་བཞུགས་ལ་ཕྱག་འཚལ་ལོ། །དེ་ལྟ་བུའི་རྡོ་རྗེ་སློབ་དཔོན་གྱིས་གསན་ནས་ལེགས་སོ་ལེགས་སོ་ཞེས་བརྗོད་པར་བྱའོ། །དེ་ནས་ལས་ཀྱི་སློབ་དཔོན་གྱིས་སྤོས་ཀྱི་ལེགས་པར་བདུག་པ་བྱས་པའི་རས་གདོང་པ་ལ་བྱིན་ཏེ། བླ་མ་ཆེན་པོའི་མདུན་དུ་འདུག་པར་བྱའོ། །དེའི་དུས་སུ་རྡོ་རྗེ་དྲིལ་བུ་ལ་སོགས་པ་དང་བཅས་པའི་མཆོད་པ་བྱས་ནས་མཐེ་བོ་ཐ་ལྟག་གི་བར་དུ་བཟུང་ནས་ཕྱག་གཡོན་པ་མགོ་བོ་ལ་བཞག་ནས་ལྕེའི་ནང་དུ་བྱིན་ཏེ་འདི་སྐད་བརྗོད་པར་བྱའོ། །ཨོཾ་མ་ཧཱ་ཛྙཱ་ན་ཨ་མྲྀ་ཏེ་ན་ཨ་བྷི་ཥི་ཉྩཱ་མི་ཧུཾ་ཧཱུཾ་ཕཊ་སྭཱ་ཧཱ། དེ་ནས་ལོངས་སྤྱོད་གནས་པ་དཔའ་རླབས་གཉིས་བཙིར་བར་བྱའོ། །དེ་ནས་ཤེས་རབ་ཡེ་ཤེས་ཀྱི་དབང་སྦྱིན་པར་བྱའོ། །རེ་ཞིག་བླ་མ་མཉམ་པ་ཉིད་ཀྱི་ཡེ་ཤེས་དང་ལྡན་པ་ཡིན་ན། དེ་ལ་ཡན་ལག་མ་གཅིག་པུ་སྦྱིན་པར་བྱའོ། །གལ་ཏེ་ཅུང་ཟད་ཆགས་པ་ཆེན། དེ་ལ་གཞན་མ་ཤིན་ཏུ་མཚན་ཉིད་དང་ལྡན་པ་བཀུག་སྟེ། དབང་ལ་སོགས་པ་བྱིན་ནས། སྐྱབས་བྱིན་ཏེ་བྱ་གདོང་མ་ལ་སོགས་པའི་གནས་བསྟན་པར་བྱའོ། །དེ་ནས་སློབ་མ་དགུག་པར་བྱའོ། །ཀྱེ་སེམས་དཔའ་ཆེན་པོ་ཀྱེ་ཚུར་ཤོག །དེས་ཀྱང་འདི་ལྟ་བུའི་ཚིགས་བཅད་ཀྱིས་རྗེ་བཙུན་ལ་ཞུ་བར་བྱའོ། །ཡེ་ཤེས་བདེ་བའི་གནས་བཞུགས་པའི། །རྒྱལ་འགྱུར་རྒྱལ་འགྱུར་མགོན་པོ་ཁྱོད། །ཨཱ་ལི་ཀཱ་ལི་གཉིས་བདག་ཅན། །དགའ་བའི་བདེ་མཚོ་རྒྱལ་གྱུར་ཅིག །མཆོག་དང་ཆད་པའི་དབུས་སུ་ནི། །རོལ་མཛད་ཁྱོད་ནི་རྒྱལ་གྱུར་ཅིག །ཤེས་རབ་ཡེ་ཤེས་ཀྱི་ནི་དབང༌། །མཆོག་
གིས་དབང་ཕྱུག་བདག་ལ་སྩོལ། །གང་གིས་རང་བཞིན་ཡེ་ཤེས་མཆོག །ཁྱོད་ཀྱི་བཀའ་དྲིན་བདག་གིས་རྙེད། །དེ་ཡི་དུས་སུ་གཡས་པས་ཤེས་རབ་མའི་ལག་པ་འཕར་མ་བཟུང་ནས་སློབ་མ་ལ་འདི་སྐད་བརྗོད་པར་བྱའོ། །འདི་ནི་ཁྱོད་ཟུང་དགྱེས་པ་ཡིན། །བསྙེན་བྱ་སངས་རྒྱས་ཀྱི་རབ་བརྟགས། །ཡེ་ཤེས་གསུམ་གྱི་རབ་སྦྱོར་གྱིས། །དམ་པའི་བདེ་བ་ཡང་དག་མྱོང༌། །སངས་རྒྱས་རིན་ཆེན་སྣོད་ཀྱི་ནི། །གཡོན་གྱི་མཆོག་ལ་རྩ་མཆོག་བཞུགས། །གདོང་པ་བྱ་བཞིན་རྣམ་པ་ནི། །རྡོ་རྗེ་དབྱིངས་ཕྱུག་མ་ནི་ཉིད། །ཐབས་གཞན་དག་གིས་བྱང་ཆུབ་ནི། །ནམ་ཡང་རྙེད་པར་མི་འགྱུར་རོ། །དེ་བས་འདི་དང་ལྷན་ཅིག་ནི། །ནམ་ཡང་སྦྱོར་མེད་མ་བྱེད་ཅིག །དེས་ཀྱང་ཅུང་ཟད་ནུ་མ་གཉིས་ཀྱི་སྟེང་ན་མོའི་ན་བཟའ་ཕྱེད་དེ། །དྲི་ཞིམ་པོའི་མེ་ཏོག་གིས་དབུ་རྒྱན་དེ་འདི་སྐད་བརྗོད་པར་འཁྱུད་པའི་ཕྱག་རྒྱས་རྡོ་རྗེ་སེམས་དཔའི་ཆ་ལུགས་བྱས་ནས་སློབ་མ་ལ་འདི་སྐད་བརྗོད་པར་བྱའོ། །འདི་ནི་གང་ཞིག་མཚོན་གྱི་རབ། །ཤེས་རབ་ཀྱི་སྐུར་རྗེས་སུ་དྲན། །ཁྱོད་ཀྱིས་ཀྱང་ནི་རྟག་ཏུ་བཅང༌། །ཐོག་མ་བྱང་ཆུབ་རྒྱལ་བས་བསྣམས། །རྡོ་རྗེ་མཆོག་གི་ཡེ་ཤེས་ནི། །མི་ཕྱེད་ནམ་མཁའ་ལྟ་བུའི་གཟུགས། །བདག་ནི་གཞན་མིན་རྡོ་རྗེ་འཛིན། །སེམས་ཅན་དོན་ཕྱིར་འཁོར་བར་ཞུགས། །ཞེས་བརྗོད་ནས་སློབ་མ་ལ་ལག་ཏུ་སྦྱིན་ནོ། །དེའི་དུས་སུ་འདི་སྐད་བརྗོད་པར་བྱའོ། །ཇི་ལྟར་བདག་ཏིང་ངེ་འཛིན་དུ་གནས་པ་དེ་རིང་ཁྱོད་ཀྱིས་མཐོང་བ་དེ་ལྟར་ཁྱེད་ཀྱིས་ཀྱང་དེ་བཞིན་དུ་ཞུགས་ཤིག །ཨོཾ་བཛྲས་ཏྭ་ས་རཱུ་པ་ཏྲི་ས་མ་ཡེ་ཨ་བྷི་ཥི་ཉྩཱ་མི་ཧུཾ་ཧཱུཾ་ཕཊ་སྭཱ་ཧཱ། རྡོ་རྗེ་འཛིན་པའི་ཆ་ལུགས་སུ་སློབ་མ་གཟིགས་ནས་འདི་ལྟར་གནང་བ་སྦྱིན་པར་བྱའོ། །སེམས་ཅན་ཐམས་ཅད་ཕན་དོན་དུ། །ཆོས་ཀྱི་རྒྱ་མཚོ་འདྲ་བར་འདུག །ཐམས་ཅད་ཇི་ལྟར་འདུལ་འགྱུར་བའི། །ཁྱོད་ཀྱིས་ཆོས་ཀྱི་འཁོར་ལོ་བསྐོར། །དེ་ནས་མགོ་བོ་ལ་མེ་ཏོག་ལ་སོགས་པ་བྱིན་ཏེ། བརྟུལ་ཞུགས་ཀྱི་དབང་བསྐུར་བྱིན་པར་བྱའོ། །དེའི་དུས་སུ་ཧཱུཾ་གི་རྣམ་པར་བྱིན་གྱིས་བརླབས་པའི་མེ་ཏོག་དང་བཅས་པའི་ཕྱག་གཡས་པས་བཟུང་ནས་སློབ་མ་ལ་འདི་སྐད་བརྗོད་པར་བྱའོ། །འདི་ནི་དེ་བཞིན་གཤེགས་
པའི་རིགས། །ཡེ་ཤེས་ལྔ་གྲུབ་ཞི་བ་ནི། །ཡེ་ཤེས་རང་བཞིན་མི་ཕྱེད་པས། །སངས་རྒྱས་ཐམས་ཅད་ཀྱིས་ཕྱག་བྱས། །དཔལ་ལྡན་རྡོ་རྗེ་སེམས་དཔའ་ཡི། །ཉིད་ཀྱི་ཕྱག་ན་ཇི་ལྟར་བསྣམས། །དེ་ལྟར་ཁྱོད་ཀྱིས་ཀྱང་གཟུང་བྱ། །རྡོ་རྗེ་ཁྱོད་ཀྱིས་ཀྱང་གཟུང་བྱ། །རྡོར་རྒྱལ་མི་ཤིགས་བརྟུལ་ཞུགས་སོ། །ཨོཾ་པཉྩཱ་ཀ་ར་ས་དུ་པཉྩ་ཛྙཱ་ན་ཨཱཏྨ་ཀོ་སརྦ་ཏ་ཐཱ་ག་ཏ་སིདྡྷི་བཛྲ་པ་ཏི་ནཱ། ཨ་བྷི་ཥི་ཉྩཱ་མི་ཧཱུཾ་ཧཱུཾ་ཕཊ་སྭཱ་ཧཱ། དེ་ནས་མཆོད་པ་བྱས་ནས། ལུང་བསྟན་དབང་བསྐུར་བར་བྱའོ། །ཨོཾ་གྱི་རྣམ་པས་བྱིན་གྱིས་བརླབས་པའི་ཆོས་གོས་གསོལ། །མཆོད་སྦྱིན་སྐྱབས་སྦྱིན་ལྡན་པས་སློབ་མ་ལ་འདི་སྐད་བརྗོད་པར་བྱའོ། །རྡོ་རྗེ་སེམས་དཔའ་དེ་བཞིན་གཤེགས། །ཁྱོད་ནི་བདག་གིས་ལུང་བསྟན་བྱ། །སེམས་ཅན་ཐར་པ་གྲུབ་དོན་དུ། །ངན་འགྲོ་རྣམས་ལས་འདྲེན་པ་ཡི། །ཡང་དག་དེ་བཞིན་གཤེགས་པ་ཁྱོད། །ཁམས་གསུམ་གྱི་ནི་ཐུབ་པ་ཁྱོད། །སངས་རྒྱས་བྱང་ཆུབ་སེམས་དཔའ་ཡིས། །མགྲིན་གཅིག་ཏུ་ནི་བརྟགས་པ་སྟེ། །བླ་ན་མེད་པའི་ཡང་དག་པའི། །བྱང་ཆུབ་ཏུ་ནི་ཁྱོད་ལུང་བསྟན། །དེ་སྐད་གསུངས་ནས་ཉིད་ཀྱི་ཆོས་གོས་སློབ་མ་ལ་བྱིན་ཏེ། ཕྱག་གཡས་པས་ལག་པ་བཟུང་ནས་སྔགས་འདི་བརྗོད་པར་བྱའོ། །ཨོཾ་སརྦ་བུདྡྷ་མ་མ་ཧཱ་ཏ་པ་སི་དྡྷི་བྱ་ཀ་ར་ཎ་ཨ་བྷི་ཤི་ཉྩཱ་མི་ཧུཾ་ཧཱུཾ་ཕཊ་སྭཱ་ཧཱ། དེའི་རྗེས་སུ་མགོ་བོ་ལ་མེ་ཏོག་བྱིན་ཏེ། བཀའ་སྩལ་བའི་དབང་བསྐུར་སྦྱིན་པར་བྱའོ། །སྤོས་ཀྱི་བདུག་པ་བྱས་པའི་མེ་ཏོག་གི་ཕྲེང་བ་ཕྱག་གཡས་པས་བཟུང་ནས་ཧཱུཾ་ཕཊ་ཀྱིས་བྱིན་གྱིས་བརླབས་ཏེ་སློབ་མ་ལ་འདི་སྐད་བརྗོད་པར་བྱའོ། །ཆགས་པ་བྲལ་བ་ལྟ་བུའི་སྡིག །གཞན་མ་ཁམས་གསུམ་ན་ནི་མེད། །དེ་བས་འདོད་པའི་ཆགས་བྲལ་བའི། །ཁྱོད་ཀྱིས་ཀྱང་ནི་ཡང་མ་བྱེད། །དམ་ཚིག་ཆེན་པོ་ཡོད་པ་ནི། །ཧཱུཾ་ཕཊ་རྣམ་པ་དང་ལྡན་པའི། །གསང་བའི་དཀྱིལ་འཁོར་ལ་གཞུག་བྱ། །སྡིག་པ་ཐམས་ཅད་རྣམ་པར་བྲལ། །བདེ་ཆེན་ཐེག་པ་འདི་ལས་ནི། །ཕྱི་ནས་ཤི་བ་ཡོད་མེད་དེ། །སྲིད་པ་ཡང་དག་གྲུབ་པའི་ཕྱིར། །སྲིད་དང་མྱ་ངན་འདས་བསྡུས་བྱ། །རྡོ་རྗེ་རིན་ཆེན་ནང་ཡོད་པའི། །བྱང་ཆུབ་སེམས་ནི་སྤང་མི་བྱ། །དེ་ཡི་འབྱུང་བ་ཙམ་གྱིས་ནི། །སངས་རྒྱས་ཉིད་འགྱུར་ཐེ་ཚོམ་མེད། །
དམ་པའི་ཆོས་ནི་སྨད་མི་བྱ། །ནམ་ཡང་སྤང་བ་མི་བྱའོ། །ལོག་པའི་ཤེས་པའམ་གཏི་མུག་གིས། །ཕྱི་ནས་འཇིགས་པ་བསྲུང་བར་བྱ། །རྡོ་རྗེ་དྲིལ་བུའི་ཕྱག་རྒྱ་ནི། །ནམ་ཡང་སྤང་བར་མི་བྱའོ། །སངས་རྒྱས་ཀུན་དང་མཉམ་པའི་ཕྱིར། །བླ་མ་སྨད་པར་ཡོང་མི་བྱ། བདག་ཉིད་ཡོངས་སུ་བོར་ནས་ནི། །དྲི་ཆེན་དྲི་ཆུ་ཟ་བ་འདི། །ཀྱེ་བུ་ཁྱོད་ཀྱིས་ནུས་སམ་ཅི། །ཁུ་བ་ཁྲག་དང་དེ་བཞིན་ཤ །དེ་བཞིན་བུད་མེད་གུས་པ་དང༌། །བྷ་གའི་པདྨ་ལ་འཇིབ་ནི། །ཇི་ལྟར་བདེ་བ་བུ་ཁྱོད་སྨྲོས། །སློབ་མས་ཀྱང་འདི་སྐད་བརྗོད་པར་བྱའོ། །ལྷ་མོ་བདག་གིས་ཅི་མི་ནུས། །ཁུ་བ་ཁྲག་སོགས་བཟའ་བ་དང༌། །རྟག་ཏུ་བུད་མེད་གུས་བགྱིད་དང༌། །བྷ་ག་ཡང་ནི་གཞིབ་བྱའོ། །དེ་ནས་ཡང་ཤེས་རབ་མས་འདི་སྐད་བརྗོད་པར་བྱའོ། །བདེ་བ་ཐམས་ཅད་དང་ལྡན་པ། །བདག་གི་པད་དབང་ཨེ་མའོ། །གང་ཞིག་ཆོགས་བསྙེན་བྱེད་པ། །དེ་ཡི་མདུན་དུ་བདག་ནི་འདུག །ཡང་དག་སངས་རྒྱས་མཉེས་པའི་ཕྱིར། །ཇི་ལྟར་པདྨའི་དོན་གྱིས་ཤིག །ཉིད་ཀྱི་བདེ་ཆེན་རྒྱལ་པོ་ནི། །འདི་ཡི་གནས་ན་རྟག་ཏུ་བཞུགས། །བདེ་ཆེན་དམར་ཐིགས་བསྙེན་པར་གྱིས། །ཁ་ཡི་ཆུ་སྐྱེས་ཀྱིས་ནི་བྷོ། །བསྲུབ་དང་བསྲུབ་ཐབས་སྦྱོར་བ་ཡིས། །བདེ་བ་ཁོང་དུ་ཆུད་པར་གྱིས། །ཤིན་ཏུ་བསྟན་པའི་དོན་གྱིས་ཤིག །བསྟན་པ་མེད་ན་དོན་མི་འགྲུབ། །དེ་ལྟར་ཡོངས་སུ་རྫོགས་ནས་སློབ་མའི་མགོ་ལ་མེ་ཏོག་ལ་སོགས་པ་བྱིན་ཏེ། མེ་ཏོག་གིས་སྙིམ་པ་གང་བ་དང་ལྡན་པའི་ཤེས་རབ་མ་ལག་པའི་པདྨ་ཁ་ཕྱེ་བའི་སྙིང་པོའི་དབུས་སུ་སློབ་མ་ལ། །སྔགས་འདི་བརྗོད་པར་བྱས་ནས་སྦྱིན་པར་བྱའོ། །ཨོཾ་མ་ཧཱ་བཛྲ་དྷཱ་ཏྭཱི་ཤྭ་རི་པྲཛྙཱ་ཛཉཱ་ན་ཨ་བྷི་ཥིཉྩ་ཧུཾ་ཧུའཾ་ཕཊ་སྭཱ་ཧཱ། །བཞི་པའི་དབང་ནི་དབང་རིན་ཆེན་སྣང་བར་གསལ་བར་བྱས་སོ། །གང་ཞིག་ཡང་དག་པའི་འབྲས་བུ་འདོད་པ་དེས་དེ་རུ་བལྟ་བར་བྱའོ། །སློབ་དཔོན་ཤེས་རབ་དཔལ་གྱིས་མཛད་པ། ཡན་ལག་བརྒྱད་པའི་རིམ་པ་ལས། དབང་བསྐུར་གྱི་ཆོ་ག་བསྟན་པ་ཞེས་བྱ་བ་ལེའུར་བཅད་པ་དྲུག་པའོ།། །།