བདུན་པ། མཆོད་སྦྱིན་བསྟན་པ་ཞེས་བྱ་བའི་ལེའུར་བཅད་པ།
ད་ནི་མཆོད་སྦྱིན་གྱི་ཆོ་ག་བཤད་དེ། དང་པོར་རེ་ཞིག་ཕྱིའི་འཇིག་རྟེན་སྐྱོང་བ་ལ་སོགས་པ་ལ་སྤོས་དང༌། མེ་ཏོག་
དང་ལྷ་བཤོས་ལ་སོགས་པས་མཆོད་པ་བྱས་ཏེ། གོང་གི་དཀྱིལ་འཁོར་ལ་མཆོད་སྦྱིན་བྱའོ། །རེ་ཞིག་རྣལ་འབྱོར་བླ་མའི་དཀྱིལ་འཁོར་ཡིན་ནོ། །ད་ལ་དཀྱིལ་འཁོར་རྣམས་ལ་ཕྱོགས་དང་མཚམས་བྱེ་བྲག་ཏུ་བསྟན་པའི་དང་པོའི་སྒོ་ལ་སོགས་པ་ནས་བཟུང་སྟེ། དང་པོ་ཨོཾ་དང་ཧཱུཾ་ཕཊ་མཐར། དབུས་སུ་རང་གི་མིང་དང་སྤེལ་ཏེ། སོ་སོར་རྡོ་རྗེ་དྲིལ་བུ་དང་བཅས་པའི་མེ་ཏོག་དང་སྤོས་དང་མར་མེ་དང་དྲི་དང་ལྷ་བཤོས་ལ་སོགས་པས་མཆོད་པར་བྱའོ། །ཡང་ན་རྣལ་འབྱོར་བླ་ན་མེད་པའི་རྒྱུད་ཀྱི་རིམ་པས་གནས་དང་ཉེ་བའི་གནས་ལ་སོགས་པ་ཞེས་བསྟན་པའི་མཆོད་པས་སོ། །གཞན་ཀུན་ནི་སྔར་བཞིན་ནོ། །དཔལ་རྡོ་རྗེ་འཛིན་པ་ཆེན་པོ་ལ་སྙིང་པོ་དང་ཉེ་བའི་སྙིང་པོ་དང་ཕྲེང་བའི་སྔགས་ཀྱིས་སོ། །སྐུ་ལ་སྔར་བསྟན་པའི་མཆོད་པ་དང་ལྡན་པའི་ཡི་གེ་བརྒྱ་པས་སོ། །བུམ་པ་རྣམས་ལ་དེ་ལྟར་བཞིན་ནོ། །འོན་ཀྱང་སོ་སོ་རང་གི་མིང་དང་སྤེལ་ཏེ་སྙིང་པོའི་སྔགས་ཀྱིས་སོ། །དེ་ལྟར་མཆོད་སྦྱིན་གྱི་མཆོད་པ་རྫོགས་པར་བྱས་ཏེ། སྔགས་ཀྱི་སྐུད་པ་སྦྱིན་པར་བྱའོ། །དེ་ལ་རིམ་པ་ནི་འདི་ཡིན་ཏེ། རས་བལ་གྱི་སྐུད་པ་བཞི་ལྟ་བ་བྱས་ནས། ལེགས་པར་བསྒྲིལ་ཏེ། ལྔ་དབྱེ་ལྔ་གཉིས་ཀྱིས་ཁྲུས་བྱས་ནས། དཀྱིལ་འཁོར་གཙོ་བོའི་སྔགས་ཀྱིས་ལྔ་བཅུ་རྩ་བཞི་མདུད་པར་བྱའོ། །དེ་ནས་གཞི་མཉམ་གྱིས་སྣ་ཚོགས་བཟོར་བྱས་ཏེ། ཡི་གེ་བརྒྱ་པའི་སྔགས་ཀྱིས་བརྒྱ་རྩ་བརྒྱད་བཟླས་པར་བྱའོ། །དེ་ལྟ་བུའི་བུམ་པ་དང་སྐུ་དང༌། སློབ་མ་ལ་སོགས་པའི་གྲངས་ཀྱིས་བྱ་སྟེ། དེའི་འོག་ཏུ་བཀྲ་ཤིས་ཀྱི་ཚིགས་བཅད་ལ་སོགས་པ་དང་ལྡན་པའི་རིམ་པས་ཡི་གེ་གསུམ་གྱི་སྔགས་ཀྱིས་མགུལ་པར་གདགས་པར་བྱའོ། །སློབ་དཔོན་ཤེས་རབ་དཔལ་གྱིས་མཛད་པ། ཡན་ལག་བརྒྱད་པའི་རིམ་པ་ལས། མཆོད་སྦྱིན་བསྟན་པ་ཞེས་བྱ་བ་ལེའུར་བཅད་པ་བདུན་པའོ།། །།