བདུན་པ། བྱིན་གྱིས་བརླབས་པའི་ཡན་ལག
དེ་ནས་ཡེ་ཤེས་གཞུག་པ་ནི། །རྡོ་རྗེ་སེམས་དཔའ་ཡང་དག་དགྱེས་པའི་མཆོག །སྲས་བཟངས་གྲོགས་དང་འཁོར་དང་རྩ་ལག་བཅས། །ལྷ་དང་ལྷ་མོའི་ཚོགས་ནི་མང་པོས་བསྐོར། །སངས་རྒྱས་ཡབ་ཡུམ་བཅས་པ་དགོངས་སུ་གསོལ། །ཛཿ་ཧཱུཾ་བཾ་ཧོཿ་ཧི། རང་ཉིད་ཟླ་བའི་དཀྱིལ་འཁོར་ནི། །རྡོ་རྗེ་ཧཱུཾ་དང་ལྡན་པ་ལ། །ཛཿ་ལས་རྡོ་རྗེ་ཤུགས་ཁྲོ་བོ། །ཞལ་བཞི་ཕྱག་ནི་ཉི་ཤུ་དྲུག །མདོག་རྒྱན་ཕྱག་མཚན་གཙོ་བོ་བཞིན། །ནག་པོ་སེར་པོའི་ཕྱག་ལྷག་གཉིས། །གླང་ཆེན་པགས་པ་གྱོན་པ་བཟུང༌། །རྐང་བརྒྱད་ཤིང་རྟ་ལ་ཆིབས་ནས། །ཆོས་དབྱིངས་བཞུགས་པའི་ཡེ་ཤེས་སེམས། །ལྟེ་བར་རྡོ་རྗེ་ལྕགས་ཀྱུ་ཡིས། །བཟུང་ལ་ང་རོས་སྤྱན་དྲང་ངོ༌། །ཧཱུཾ་ལས་ཤེས་རབ་མཐར་བྱེད་ཀྱིས། །རྡོ་རྗེ་ཐོགས་ཏེ་གཞུག་པར་མཛད། །བཾ་ལས་གཤིན་རྗེ་མཐར་བྱེད་ཀྱིས། །ཞགས་པ་ཐོགས་ཏེ་གཅིག་ཏུ་བྱས། །ཧོཿ་ལས་པདྨ་མཐར་བྱེད་ཀྱིས། །དྲིལ་བུ་ཐོགས་ཏེ་མཉེས་པར་བྱས། །ཧི་ལས་བགེགས་ནི་མཐར་བྱེད་ཀྱིས། །དབྱུག་
པས་གཉིས་མེད་རོ་མཉམ་བྱས། །དེ་ནས་སྔོན་བཞིན་ལྷ་མོ་རྣམས། །སྤྲོས་ལ་མཆོད་བསྟོད་མཉེས་བར་བྱས། །ཧྲཱ་ཧྲཱི་ཧྲཱྀ་ཧཱུཾ་ཧླཱྀ་ཧཱ། མིག་དང་རྣ་བ་སྣ་དང་ལྕེ། །ལུས་ཡིད་གོ་ཆའི་ལྷ་ཡིས་བརྒྱན། །དེ་ནས་གནས་གསུམ་བྱིན་གྱིས་བརླབ། །དཔྲལ་བར་ཟླ་སྟེང་ཆོ་ག་གསུམ། །སྐུ་ཡི་རྡོ་རྗེ་ཡབ་ཡུམ་བསྐྱེད། །དབུས་དཀར་གཡས་གནག་གཡོན་དམར་ཞལ། །འཁོར་ལོ་རྡོ་རྗེ་པདྨ་གཡས། །རལ་གྲི་དྲིལ་བུ་རིན་ཆེན་གཡོན། །སྤྲོས་ནས་ཕྱོགས་བཅུར་གང་བར་བསམ། །སེམས་ཅན་ཀུན་འདུལ་དོན་མཛད་ནས། །ཚུར་འདུས་མདུན་བཞུགས་གསོལ་བ་གདབ། །ཨོཾ་ཨ་བྷི་ཥི་ཉྩ་ནྟུ་མཱཾ་ཀཱ་ཡ་བཛྲ་དྷ་ར། དེ་ནས་སྐུ་རིགས་ལྷ་མོ་རྣམས། །ཤེལ་བུམ་བདུད་རྩིས་བཀང་བ་ཡིས། །བདག་ལ་དབང་ནི་བསྐུར་བར་བསམ། །ཐོབ་ནས་དཔྲལ་བའི་ཟླ་བ་ལ། །སྐུ་ཡི་རྡོ་རྗེ་ཞུགས་ནས་ནི། །བྱིན་གྱིས་བརླབ་ཅིང་འདི་སྐད་བརྗོད། །དཔལ་ལྡན་རྡོ་རྗེ་སྐུ་འཆད་བ། །རྡོ་རྗེ་མི་ཕྱེད་གསུམ་གྱི་བདག ། དེད་བདག་བྱིན་གྱིས་བརླབས་ནས་སུ། །སྐུ་ཡི་རྡོ་རྗེ་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་གྱི་བདག །དེང་བདག་བྱིན་གྱིས་བརླབས་ནས་སུ། །སྐུ་ཡི་རྡོ་རྗེ་མཛད་དུ་གསོལ། །དཔྲལ་བར་ཟླ་སྟེང་ཨོཾ་དཀར་བསྒོམ། །མགྲིན་པར་ཉི་མཆོག་གསུམ། །གསུང་གི་རྡོ་རྗེ་ཡབ་ཡུམ་བསྒོམ། །དབུས་དམར་གཡས་དཀར་གཡོན་གནག་ཞལ། །པདྨ་རྡོ་རྗེ་འཁོར་ལོ་གཡས། །རིན་ཆེན་དྲིལ་བུ་འཁོར་ལོ་གཡོན། །སྤྲོ་བསྡུ་སྔར་བཞིན་གསོལ་བ་གདབ། །ཨོཾ་ཨ་བྷི་ཥི་ཉྩ་ནྟུ་མཱཾ་བཛྲ་བཛྲི་ན། སྔར་བཞིན་དབང་བསྐུར་མགྲིན་གནས་པས། །དཔལ་ལྡན་རྡོ་རྗེ་གསུང་འཆང་བ། །མི་ཕྱེད་རྡོ་རྗེ་གསུམ་གྱི་དངོས། །དེང་བདག་བྱིན་གྱིས་བརླབས་ནས་སུ། །གསུང་གི་རྡོ་རྗེ་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་གྱི་བདག །དེང་བདག་བྱིན་གྱིས་བརླབས་ནས་སུ། །གསུང་གི་རྡོ་རྗེ་མཛད་དུ་གསོལ། །མགྲིན་པར་ཉི་མ་ཨཱཿ་དམར་བསྒོམ། །སྙིང་གར་སྒྲ་གཅན་ཆོ་ག་གསུམ། །ཐུགས་ཀྱི་རྡོ་རྗེ་ཡབ་ཡུམ་བསྐྱེད། །དབུས་གནག་གཡས་དམར་གཡོན་དཀར་ཞལ། །རྡོ་རྗེ་འཁོར་ལོ་པདྨ་གཡས། །དྲིལ་བུ་རིན་ཆེན་རལ་གྲི་གཡོན། །སྤྲོ་བསྡུ་སྔར་བཞིན་གསོལ་བ་གདབ། །ཨོཾ་ཨ་བྷི་ཥི་ཉྩ་ནྟུ་མཱཾ་ཙི་ཏྟ་བཛྲི་ན། སྔར་བཞིན་
དབང་བསྐུར་ཐུགས་ཀར་བཞུགས། །དཔལ་ལྡན་རྡོ་རྗེ་ཐུགས་འཆང་བ། །མི་ཕྱེད་རྡོ་རྗེ་གསུམ་གྱི་དངོས། །དེང་བདག་བྱིན་གྱིས་བརླབས་ནས་སུ། །ཐུགས་ཀྱི་རྡོ་རྗེ་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་གྱི་བདག །དེང་བདག་བྱིན་གྱིས་བརླབས་ནས་སུ། །ཐུགས་ཀྱི་རྡོ་རྗེ་མཛད་དུ་གསོལ། །ཐུགས་ཀར་སྒྲ་གཅན་ཧཱུཾ་ནག་བསྒོམ། །དེ་ནས་གསུམ་ལ་རིགས་དྲུག་སྟེ། །ལྟེ་བ་གསང་བ་གཙུག་ཏོར་དུ། །ཀ་ཧོཿ་སྭ་ཧཾ་ནི་དགོད་པར་བྱ། །འཁོར་རྣམས་ལ་ཡང་དེ་བཞིན་ནོ། །ཨོཾ་སརྦྦ་ཏ་ཐཱ་ག་ཏ་ཀཱ་ཡ་བཱ་ཀྩི་ཏྟ་བཛྲ་སྭ་བྷཱ་བཱ་ཏྨ་ཀོ྅ཧཾ། ཞེས་པས་ང་རྒྱལ་གཟུང་བར་བྱའོ། །བྱིན་གྱིས་བརླབས་པའི་ཡན་ལག་སྟེ་བདུན་པའོ།། །།