བཅུ་པ། རྣམ་དག་དྲན་པའི་ཐིག་ལེ་དང་། ཕྲ་མོ་བསྒོམ་པའི་ཡན་ལག
དཔལ་ལྡན་རྡོ་རྗེ་ཅན་ནི་ལོ་དང་ཟླ་བ་དབྱེ་བའི་དུས་ཀྱིས་དག་པར་འགྱུར་རོ་མི་དབང་ཀྱེ། །སེམས་ཀྱི་རྣམ་པ་ཉི་མ་མ་ཡིན་ཉིན་བཞིན་དབང་གིས་སྣ་ཚོགས་རྣམ་པར་དག །དུ་བ་ལ་སོགས་རླུང་རྣམས་དག་པར་རང་སྙིང་པདྨར་གཙོ་བོའི་འཁོར་ལོ་གནས་པའོ། །དྲག་པོ་ཉོན་མོངས་སྲས་བཅས་བདུད་ཀྱི་ཚོགས་ཀྱིས་བདུད་ཀྱི་གཙོ་བོ་ཞབས་ཀྱི་འོག །དུང་དང་གཎྜཱི་ནོར་བུ་ལྗོན་པ་དག་ནི་དེ་བཞིན་སྐུ་ཡི་རྡོ་རྗེ་རྫོགས། །བདུད་རྩིའི་ཡན་ལག་གིས་ནི་བུམ་པ་བརྒྱད་དེ་རྒྱལ་དང་རྣམ་རྒྱལ་བུམ་པ་བྱང་སེམས་སོགས། །འདུ་བྱེད་དོན་ཡོད་གྲུབ་པ་ཚོར་བ་དྲི་མེད་རིན་ཆེན་འབྱུང་གནས་འདུ་ཤེས་དཔག་མེད་འོད། །གཟུགས་ནི་འཁོར་ལོ་ཅན་ཏེ་རི་བོང་སྟོབས་དང་ཁྲག་དང་དྲི་ཆུ་དྲི་ཆེན་དག །ལྷ་མོ་དྲུག་གི་ཁམས་རྣམས་ཀྱི་སྟེ་ཡུལ་དང་ཡུལ་ཅན་གྱི་ནི་བྱང་ཆུབ་སེམས་དཔའ་སྲས་དང་བཅས། །སྟོབས་ཀྱིས་ཁྲོ་བོ་ལྔ་སྟེ་གཞན་རྣམས་ལས་ཀྱི་དབང་པོ་ལྔ་པོས་སོ། །ཙཱ་མུ་ཎྜ་ལ་སོགས་པ་ཐུན་ཚར་བརྒྱད་ཀྱིས་པདྨའི་འདབ་གནས་ཉི་མའི་དུས་སྦྱོར་ཆུ་ཚོད་རྣམས། །ལྷ་མིན་ལ་སོགས་ཟླ་བ་བཅུ་གཉིས་པདྨའི་འདབ་གནས་རྩ་དང་དབུགས་ཀྱི་གྲངས་རྣམས་སོ། །ཀླུ་དང་གཏུམ་མོ་གསང་བ་ལ་སྟེ་རྒྱལ་པོ་ཉིས་འགྱུར་རྩ་རྣམས་རྣམ་པར་དག །དེ་བཞིན་འདོད་པ་ལ་སོགས་དེས་ནི་རང་བཞིན་ཡོན་ཏན་དབང་གིས་ལུས་ཀྱི་བྱ་བ་དག །སྐྲ་ཡིས་སྒྲུབ་པ་མ་ལུས་དུར་ཁྲོད་ས་གནས་བ་སྦུ་རྣམས་ཀྱིས་འབྱུང་བོའི་ཚོགས་རྣམས་སོ། །ཁམས་གསུམ་དག་ནི་མ་ལུས་པ། །སངས་རྒྱས་ངོ་བོར་བསྒོམ་པར་བྱ། །དེ་ནས་པདྨ་རྣམ་པར་སྦྱང༌། །ཨ་ཡིས་པདྨ་འདབ་བརྒྱད་ལ། །ཧཱུཾ་གི་ཡི་གེ་རྡོ་རྗེ་བཅས། །ཤེས་རབ་ལ་ནི་མཐུན་ཕྱིར་རོ། །ཧཱུཾ་རིགས་རང་གི་ཡབ་ཀྱི་རྡོ་རྗེ་ནི། །རྩེ་མོ་ལྔ་པ་རྣམ་པར་བསྒོམ། །དེ་དབུས་ཨ་ལས་པད་འདབ་བརྒྱད། །དེ་ནས་རྡོ་རྗེ་པདྨར་དགོད། །དེ་ནས་རྣལ་འབྱོར་ཧཱུཾ་ཕཊ་བརྗོད། །བསྲུབ་ཅིང་བདེ་ཆེན་བསྒོམ་པར་བྱ། །གཏུམ་མོ་ལྟེ་བར་རྒྱུས་ཀླུ་བཅོམ། །ཧོ་ཡིས་ཡེ་ཤེས་དབུས་ནས་སུ། །དྲི་མེད་གློག་འདྲ་གཟི་བརྗིད་
འབར། །ཕུང་ཁམས་སྐྱེ་མཆེད་ལ་སོགས་བསྲེགས། །རི་བོང་སྤྱི་བོ་ལས་འབབ་པ། །ཐིག་ལེའི་གཟུགས་ཏེ་རྡོ་རྗེ་ཅན། །གནས་བཞི་རིམ་བཅས་སླར་སྟེང་འོག །རྒྱན་ལྡན་མེ་ལོང་གནས་ལྟ་བུར། །དུས་གསུམ་ཡེ་ཤེས་རང་འབྱུང་བ། །གསུང་དག་ཡེ་ཤེས་འབར་བར་གཅིག །དུང་ཅན་རྒྱན་ཆེན་གཏུམ་མོར་བརྗོད། །ལྟེ་སྟེང་རིགས་དན་དྷཱུ་ཏཱིའི་སྣ། །སྲོག་ལྔ་སྣ་རྩེར་ཡུངས་ཀར་བཞུགས། །སྲོག་འགགས་སྟོང་ཉིད་མ་བཅོས་དང༌། །དེ་ལ་ཡིད་གཞག་བསྒོམ་པར་བྱ། །ཨོཾ་སརྦྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་བུ་ཨཱ་ཏྨ་ཀོ྅ཧཾ། རྣམ་དག་དྲན་པའི་ཐིག་ལེ་དང༌། །ཕྲ་མོ་བསྒོམ་པའི་ཡན་ལག་སྟེ་བཅུ་བའོ།། །།