དཔལ་དུས་ཀྱི་འཁོར་ལོའི་སྒྲུབ་ཐབས་རྣལ་འབྱོར་རབ་གསལ།
མཻ་ཏྲི་པས་མཛད།
རྒྱ་གར་སྐད་དུ། ཤྲཱི་ཀཱ་ལ་ཙཀྲ་སཱ་དྷ་ན་ཡོ་ག་པ་དཱི་པཱ་ཧྭ་ཡཾ། བོད་སྐད་དུ། དཔལ་དུས་ཀྱི་འཁོར་ལོའི་སྒྲུབ་ཐབས་རྣལ་འབྱོར་རབ་གསལ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །གང་གི་བྱམས་པས་འཇིག་རྟེན་ལ་གཟིགས་པ། །དཀྱིལ་འཁོར་གསུམ་གྱི་གལ་བ་སྣ་ཚོགས་འདི། །དེ་ནི་དཔལ་ལྡན་དུས་འཁོར་ཏིང་འཛིན་རྒྱལ། །རྡོ་རྗེ་འཛིན་པས་ཁྱེད་ལ་ཕུན་ཚོགས་མཛོད། །བྱང་ཆུབ་སེམས་དཔས་མཛད་པའི་རྒྱས་འགྲེལ་སོགས། །མེད་པར་མཁས་པས་རྒྱུད་མང་རྟོགས་པ་མིན། །དང་པོའི་སངས་རྒྱས་ཐོས་ནས་རྫོགས་བྱང་ཆུབ། །ལེགས་གྲུབ་གཉེར་རྙེད་ཕྱིར་ན་བདེ་ཐོབ་འགྱུར། །དེ་ཡི་སྒྲུབ་ཐབས་རྗེས་དྲན་བྱ་བ་ལ། །བདག་ནི་མཁས་མིན་སྡེབ་སྦྱོར་མཆོག་ཡོད་མིན། །དེ་ལྟ་ན་ཡང་རང་ཉིད་དྲན་ཆེད་དུ། །བདག་གིས་བགྱིད་དེ་མཁས་རྣམས་བཟོད་པར་མཛོད། །རླུང་མེ་ཆུ་ས་ལྷུན་པོ་དང༌། །སྣ་ཚོགས་ཆུ་སྐྱེས་དཀྱིལ་པདྨར། །ཟླ་ཉི་སྒྲ་གཅན་བདུད་དབང་ཕྱུག །རོལ་པར་གཡས་བརྐྱང་ཞབས་གཞོལ་ཞིང༌། །སྣ་ཚོགས་ཡུམ་ལ་སྙོམས་འཇུག་པ། །གཅིག་ཏུ་རང་གཞན་དོན་ཕུན་ཚོགས། །སྐུ་བཞིའི་དག་ཉིད་ཞི་བ་ནི། །གཉིས་སུ་མེད་ཅིང་རྟོག་པ་སྤངས། །འགྱུར་མེད་བདེ་བ་ཆེན་པོ་གང༌། །སྟོང་པ་ཉིད་དང་སྙིང་རྗེའི་བདག །དེ་དྲན་ཆོས་དང་རྗེས་མཐུན་པས། །སྒྲུབ་ཐབས་ཀུན་དུ་འདྲིས་པར་བྱ། །སྲིད་པའི་སྐྱེ་བར་ཀུན་རྨོངས་ལས་སྐྱེས་པའི། །མངལ་གྱི་སྡུག་བསྔལ་དག་ཀྱང་མཐའ་ཡས་ཤིང༌། །བྱིས་པ་གཞོན་ནུ་ཉིད་དང་ལོང་ཚོ་དང༌། །རྒན་པོ་ལ་ཡང་སྲིད་པར་བར་དུ་འཇིག །དེ་ལ་མི་ཡི་དངོས་པོ་རྙེད་དཀའ་སྟེ། །ཆོས་བཞིན་སྤྱོད་པ་ཤིན་དུ་རྙེད་པར་དཀའ། །སངས་རྒྱས་འབྱུང་དང་ཐེག་པ་ཆེན་པོ་དང༌། །དེ་ལ་གུས་པ་འང་ཤིན་ཏུ་རྙེད་པར་དཀའ། །བརྟན་རྣམས་མཐའ་དག་གསང་བའི་བསམ་གཏན་ལའང༌། །གང་ཞིག་ཚེ་ན་རབ་ཏུ་འཇུག་པར་བྱེད། །དེ་ལས་སངས་རྒྱས་ཉིད་དུ་འགྱུར་བ་ལ། །ཨེ་མའོ་འཇུག་པ་ཤིན་ཏུ་དཀའ་བ་ཉིད། །དེས་ན་བློ་ལྡན་རྣམས་ཀྱི་མགོ་དང་
ནི། །གོས་ལ་མེ་ཤོར་བཟློག་པ་ལྟར་སྒྲུབ་བྱ། །སྙིང་རྗེ་ཆེ་ལྡན་རྣལ་འབྱོར་པ། །རྨོངས་དང་ང་རྒྱལ་ལ་སོགས་སྤང༌། །ཆུ་སོགས་བདེན་དང་རྗེས་གནང་དང༌། །བུམ་པ་གསང་བ་མཆོག་གསུམ་དང༌། །ཤེས་རབ་ཆེན་པོའི་དབང་བསྐུར་བ། །བླ་མ་དམ་པའི་རིམ་ཐོབ་པ། །གང་ནས་སྐྱོང་ཆོས་ལྡན་ཞིང༌། །སྐྱེ་དགུ་རྣམས་ཀྱང་བདེར་གནས་ལ། །གང་ན་ས་འཛིན་རྩོད་མེད་པ། །དེར་ནི་བསྒྲུབ་པ་བརྩམ་པར་བྱ། །སྐྱེད་ཚལ་རི་བོ་རྒྱལ་བ་བཞུགས། །གྲུབ་པའི་ལྷ་གནས་སྟོང་པ་དང༌། །དུར་ཁྲོད་དང་ནི་ཆུ་འགྲམ་དང༌། །གནས་གཙང་དང་ནི་ས་ཕུག་དང༌། །གང་དུ་སེམས་ནི་ཉམས་དགའ་བར། །ཅི་འབྱོར་པས་ནི་མཆོད་པར་བྱ། །དང་པོར་རེ་ཞིག་རྣལ་འབྱོར་པས། །ཀུན་ནས་སྲུང་བའི་འཁོར་ལོ་བསམ། །བདེ་བའི་ལམ་ལ་སྟན་འདུག་ནས། །སྔོན་དུ་ཁྲོ་དབང་ང་རྒྱལ་བྱ། །སྙིང་གར་སྣ་ཚོགས་ཆུ་སྐྱེས་ཉི། །དབུས་སུ་ས་བོན་ཧཱུཾ་བསྒོམ་བྱ། །དེ་འོད་དཀྱིལ་གསལ་སྲུང་འཁོར་མཆོག །རྒྱལ་རྒྱ་མཚོ་གཙོར་བསྒོམས་ནས། །ཕྱག་འཚལ་སྔོན་དུ་འགྲོ་བ་ཡིས། །འཆད་པར་འགྱུར་བའི་རྣམ་བདུན་གྱི། །མཆོད་པ་བླ་ན་མེད་བྱས་ནས། །སྟོང་པ་ཉིད་ལ་དམིགས་པར་བྱ། །ལྷ་ཡི་སྐུར་ནི་བསྐྱེད་པ་དང༌། །ལུས་སོགས་རྣམ་པར་སྦྱོང་བ་རྣམས། །རིམ་པ་ཇི་བཞིན་བརྗོད་བྱ་སྟེ། །དེ་རྣམས་སྔགས་ཀྱང་གོ་རིམས་བཞིན། །ཨོཾ་ཨཱཿཧཱུཾ་ཧོ་ཧཾ་ཀྵཿཔྲཛོཉ་པཱ་ཡཱཏྨཱ་ཀ་ཀཱ་ཡ་ཝཱ་ཀྩི་ཏྟ་ཛྙཱ་ནཱ་དྷི་པ་ཏེ་མ་མ་ཀཱ་ཡ་ཝཱཀྩི་ཏྟ་བཛྲཾ་བཛྲཱ་མྲྀ་ཏ་སྭ་བྷཱ་བཾ་ཀུ་རུ་ཀུ་རུ་སྐནྡྷ་དྷཱ་ཏྭོ་ཡ་ཏ་ནཾ་ནི་སྭ་བྷཱ་པཾ་སྭཱ་ཧཱ། དེ་ནས་གཙུག་ཏོར་སྟེང་གི་ཆར། །ཟླ་བའི་དཀྱིལ་འཁོར་ཉ་གང་བ། །དེ་ནི་ཝཾ་ལས་བྱུང་བ་བསྒོམ། །གཙུག་ཏོར་ནས་ནི་རྐང་སེན་མཐར། །སྦྲུལ་གྱི་ཤུན་པ་བཞིན་དུ་ནི། །ལན་གསུམ་དོར་བས་གཉུག་མའི་ལུས། །བདག་གི་ལུས་དེ་དེ་ནས་ནི། །དགེ་བའི་ལས་ལ་ཟླ་བར་བསམ། །དབང་སོགས་རྒྱས་པར་མ་བརྗོད་དོ། །གསང་སྔགས་འདི་ནི་བརྗོད་པར་བྱ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། དཔྲལ་བ་མགྲིན་པ་སྙིང་ག་དང༌། །ལྟེ་བ་གཙུག་ཏོར་གསང་བ་ལ། །ཨོཾ་ཨཱཿཧཱུཾ་ཧོཿདེ་ནས་ནི། །ཧཾ་ཀྵཿཡི་གེ་རིམ་པས་སྦྱར། །འོད་དཔག་མེད་དང་རིན་ཆེན་དབང༌། །དེ་ནས་དོན་ཡོད་རྣམ་སྣང་མཛད། །མི་བསྐྱོད་པ་དང་རྡོ་རྗེ་འཛིན། །སྐུ་མདོག་ཕྱག་མཚན་འཆད་འགྱུར་བཞིན། །ཨོཾ་ཧྲཿསརྦཱ་སྟྭ་རཱ་ཛ་མཱ་ར་ཀླེ་ཤཱནྟ་ཀ་
ར་བཛྲ་ཏཱི་ཀྵྞཱ་དུཿཁཙྪེ་ད་མ་མ་ཀ་རཾ་བི་ཤོ་དྷ་ཡ་སྭཱ་ཧཱ། སྔགས་འདི་ཡང་དག་བརྗོད་བྱས་ནས། །ལག་པ་ཕན་ཚུན་ཉེ་བར་བྱ། །ཨ་ཨི་ལ་སོགས་ཐུང་དུ་ནི། །གཡོན་པའི་མཐེའུ་ཆུང་འོག་ཚིགས་ནས། །གཡས་པའི་མཐེ་བོར་སྟེང་ཚིགས་སོགས། །ལཱ་སོགས་རིང་པོ་ལྔ་པ་གསུམ། །ཨ་ཨི་རྀ་ཨུ་ལྀ། ཨེ་ཨེ་ཨ་ར་ཨོ་ཨལ། ཧ་ཡ་ར་ཝ་ལ། ཞེས་པ་དང༌། ལཱ་ཝཱ་རཱ་ཡཱ་ཧཱ། ཨཱ་ལ་ཨཽ་ཨཱ་ར་ཨཻ་ཨཱ། ལཱྀ་ཨཱུ་རཱྀ་ཨཱ་ཞེས་པའོ། །ལག་པ་ཁ་སྦྱར་དབུས་སུ་ནི། །ཧཱུཾ་གི་ཡི་གེ་མཆོག་ཏུ་སྔོ། །ཟླ་བ་ཉི་མ་སྒྲ་གཅན་གྱི། །ས་བོན་གྱིས་ནི་རྩེ་ལྔ་བཅིང༌། །རྡོ་རྗེའི་ཕྱག་རྒྱ་དེ་ཡིས་ནི། །གཙུག་ཏོར་རྐང་སེན་མཐར་ཐུག་རེག །ཨོཾ་ཨཱཿཧཱུཾ་ཧོ་ཧཾ་ཀྵཿཀཱ་ཡ་ཝཱ་ཀྩི་ཏྟ་ཛྙཱ་ནཱ་དྷི་པ་ཏེ་བཛྲ་ཀཱ་ཡ་མ་མ་ཀཱ་ཡ་ཝཱཀྩི་ཏྟ་ཛྙཱན་བཛྲཾ་བཛྲ་ཀཱ་ཡ་སྭ་བྷཱ་བཾ་ཀུ་རུ་ཀུ་རུ་སྭཱ་ཧཱ། ཞེས་བརྗོད་དོ། །དེ་ནས་ང་རྒྱལ་བྱ་སྟེ། ཨོཾ་སརྦ་ཏ་ཐཱ་ག་ཏ་བཛྲ་ཀཱ་ཡ་སྭ་བྷཱ་བ་ཨཱཏྨ་ཀོཉ་ཞེས་བྱའོ། །བློ་ལྡན་རིགས་དྲུག་རྣམས་བཀོད་ནས། །དེ་ནས་ཡན་ལག་དྲུག་དགོད་བྱ། །ལག་གཉིས་ཁ་སྦྱར་བྱས་ནས་ནི། །མཐེ་བོང་ཟུང་དག་སྙིང་གར་དགོད། །བསྲུང་བའི་འཁོར་ལོ་ཉེར་བསྡུ་བ། །ལུགས་ལས་བཟློག་པའི་རིམ་པས་བརྗོད། །ཨོཾ་ཧླཱྀཾ་ཧྲྀ་ད་ཡཱ་ཡ་ན་མ། །ཨོཾ་ཧཱུཾ་ཤི་ར་སེ་སྭཱ་ཧཱ། ཨོཾ་དྷྲྲྀཾ་ཤི་ཁཱ་ཡཻ་བཽ་ཥཊ། ཨོཾ་ཧྲིཾ་ཀ་པ་ཙཱ་ཡ་ཧཱུཾ། ལག་གཉིས་དག་གིས་ལུས་ཀུན་ལ། །རེག་ཅིང་འདི་ནི་ཡང་དག་བརྗོད། །ཨོཾ་ཧྲཱཾ་ནེ་ཏྲཱ་ཡ་པ་ཥཊ། ཨོཾ་ཧྲཿཨ་སྟྲ་ཡ་ཕཊ། མཛུབ་མོ་དང་ནི་མཐེ་བོང་གི །སེ་གོལ་ལག་པ་གཡོན་པས་བྱའོ། །མི་དགེ་བ་ལ་ལག་གཡས་ཀྱི། །ཕྱོགས་ཀུན་དུ་ཡང་མཚོན་ཆ་མཆོག །དེ་ཡི་འོག་ཏུ་བློ་བཟངས་ཀྱིས། །འདིར་ཡང་སྟོང་ཉིད་བསྒོམ་པར་བྱ། །བརྟན་པར་བྱེད་པའི་སྔགས་རྣམས་ཀྱང༌། །འཆད་པར་འགྱུར་བ་ཉིད་བཞིན་ནོ། །རླུང་སོགས་དཀྱིལ་འཁོར་བསམས་ནས་ནི། །སྟེང་དུ་དེ་ཡོངས་གྱུར་པ་ལས། །རིང་དུ་མཐོང་བའི་མཚམས་ཀྱི་མཐའ། །དེར་ནི་རབ་གསུམ་པའོ། །ཡུལ་འཁོར་བསྲུང་ཕྱིར་ཡུལ་འཁོར་མཐར། །ར་བ་ལྔ་ཡང་དེ་བཞིན་ནོ། །ཀུན་གྱི་འོག་ཏུ་མདུང་དང་ནི། །སྟེང་དུ་མདའ་ཡི་དྲ་བའོ། །དབུས་སུ་རྡོ་རྗེས་གཞི་ནི། །ཡུལ་འཁོར་མཐར་ཡང་བསྒོམ་པར་བྱ། །ཐོ་རངས་གྲིབ་མའི་མཚམས་ཀྱི་མཐར། །ཁང་པ་བརྩེགས་པའོ་དེ་ནང་དུ། །སྣ་ཚོགས་པདྨ་འམ་འཁོར་ལོ་སྟེ། །དེ་དབུས་ཉི་མའི་དཀྱིལ་འཁོར་རོ། །ཨོཾ་ཧཱཾ་ཡཾ་རཱཾ་ཝཱཾ་ལཾ་བཛྲཱ་ཀཱ་ཤ་བཱ་ཡུ་ཏེ་ཛ་ཡུ་ད་ཀ་པྲྀ་ཐྭཱི་བཛྲ་སྭ་བྷཱ་བ་པཉྩ་དྷཱ་ཏ་བོ་བཛྲ་མཎྜལཱ་ནི་ཀུ་རུ་ཀུ་རུ་སྭཱ་ཧཱ།
ཞེས་པ་འོག་ཏུ་དཀྱིལ་འཁོར་དགོད་པའི་སྔགས་སོ། །ཨོཾ་ཨཱཿཧུཾ་རཿབཛྲ་ཙནྡྲ་སཱུཪྻ་རཱ་ཧུ་ཀཱ་ལཱགྣ་ཡཿཀཱ་ཡ་ཝཱ་ཀྩིཏྟ་བཛྲ་པྲཱ་ཀཱ་རཱ་ན་ཀུ་རུ་ཀུ་རུ་སྭཱ་ཧཱ། ཞེས་པ་ར་བའི་སྔགས་སོ། །ཨོཾ་བི་ཤྭ་ཀཱ་ཡ་བཛྲ་བཛྲ་ཀཱུ་ཊཱ་གཱ་རཾ་ཀུ་རུ་ཀུ་རུ་སྭཱ་ཧཱ། ཞེས་པ་ཁང་པ་བརྩེགས་པའི་སྔགས་སོ། །ཨོཾ་བི་ཤྭ་བཛྲ་པདྨ་ཀུ་རུ་ཀུ་རུ་སྭཱ་ཧཱ། ཞེས་པ་པདྨའི་སྔགས་སོ། །ཨོཾ་རཿབཛྲ་སཱུཪྻ་བཛྲ་སཱུཪྻཱ་ས་ནཾ་ཀུ་རུ་ཀུ་རུ་སྭཱ་ཧཱ། ཞེས་པ་ཉི་མའི་གདན་གྱི་སྔགས་སོ། །ཧཱུཾ་ཡིག་རྡོ་རྗེ་ལས་སྐྱེས་པའི། །རྡོ་རྗེ་ཤུགས་ནི་གཙོ་བོ་བཞིན། །དབུ་ནི་གཡས་འགྱིང་གླང་ལྤགས་གྱོན། །ཉི་ཤུ་རྩ་དྲུག་ཕྱག་ལྡན་པའི། །ཁྲོ་དབང་རྣལ་འབྱོར་པ་ཡིས་བསྒོམ། །ཀླུ་བཅུ་ཡིས་ནི་རྒྱན་དུ་བྱས། །རལ་པ་དར་དབྱངས་ཕྱག་གདུབ་དང༌། །སྐེ་རགས་མགུལ་རྒྱན་རྐང་གདུབ་རིམ། །རྒྱལ་བ་རྣམ་རྒྱལ་ཞེས་བྱ་དང༌། །སྟོབས་ཀྱི་རྒྱུ་དང་པདྨ་ཞེས། །གཉིས་རྣམས་དང་པོ་གཡོན་ཤེས་བྱ། །ནོར་རྒྱས་བུ་དང་དུང་སྐྱོང་དང༌། །མཐའ་ཡས་དེ་བཞིན་རིགས་ལྡན་དང༌། །འཇོག་པོ་པདྨ་ཆེ་དག་གོ །མ་ལུས་བགེགས་ཀྱི་དཀྱིལ་འཁོར་རྣམས། །སྐུ་ལས་མེ་འོད་འཕྲོས་པས་བསྲེགས། །མཐའ་ཡས་ཞིང་རྡུལ་གྲངས་འདས་པའི། །ཉི་མ་ལས་ལྷག་གཟི་འོད་ཅན། །བསམས་ནས་དེ་སྙིང་པད་ཉི་ལ། །ཧ་ཡ་ར་ཝ་ལ་རྣམས་བརྩེགས། །ཐུང་དུ་རིང་པོས་རབ་ཕྱེ་བ། །དེ་རྣམས་བཅུ་ནི་རྩིབས་བཅུར་སྤྲོ། །ཧ་ཡིག་ལས་སྐྱེས་གཙུག་ཏོར་ཅན། །རྩ་ཞལ་གྱི་ནི་སྙན་གཡོན་ལས། །ཕྱུང་སྟེ་ཁང་བརྩེགས་སྟེང་དབུས་སུ། །ཟླ་བ་འམ་ཉི་མར་སྣང་བར་བསྒོམ། །སྙན་གཡས་ནས་ཕྱུང་གནོད་མཛེས་ནི། །ཧཱ་སྐྱེས་རྡོ་རྗེ་ས་འོག་ཏུའོ། །བགེགས་མཐར་བྱེད་པ་ཡི་ལས་སྐྱེས། །ཤངས་བུག་གཡོན་ནས་ཤར་དུའོ། །ཤངས་བུག་གཡས་ནས་མེ་མཚམས་སུ། །ཡཱི་ལས་བྱུང་བའི་དབྱུག་སྔོན་ཅན། །རྲྀ་སྐྱེས་ཤེས་རབ་མཐར་བྱེད་ནི། །གཡོན་པའི་སྤྱན་ལས་ལྷོ་རུ་སྤྲོ། །རྲཱྀ་ལས་བྱུང་བའི་འདོད་རྒྱལ་ནི། །གཡས་པའི་སྤྱན་ལས་བདེན་བྲལ་དུའོ། །འདིར་ནི་སྐྱེ་བའི་རིམ་ཉིད་ཀྱིས། །དང་པོར་གནོད་སྦྱིན་དབང་ལྡན་མཆོག །ལྷག་མཆུ་དང་རླུང་གི་ཕྱོགས། །རིམ་པ་ལས་ནི་བཟློག་པ་ཡིན། །ཝུ་ཡིག་ཡོངས་སུ་གྱུར་ལས་སྐྱེས། །པདྨ་མཐར་བྱེད་ཞལ་སྒོ་ལས། །ཝཱུ་ཡིག་ལས་བྱུང་མི་གཡོ་བ། །གཅི་བའི་སྒོ་ནས་ངེས་པར་སྐྱེས། །བཤང་ལམ་སྒོ་ནས་ཕྱུང་བ་ནི། །ལྀ་ཡིག་ལས་སྐྱེས་གཤིན་རྗེ་གཤེད། །རྡོ་རྗེ་
གཙུག་ཏོར་ནས་ཕྱུང་བ། །ལཱྀ་ཡིག་ལས་ཆེན་སྟོབས་ཆེན་ཏེ། །ཁྲོ་བོའི་རྒྱལ་པོ་འདི་རྣམས་ཀུན། །མི་མཉམ་གཟི་ལྡན་གཙོ་བོ་མཚུངས། །མ་ལུས་བགེགས་ནི་འཇོམས་མཛད་ཅིང༌། །བདུད་བཞི་ཟད་པར་མཛད་རྣམས་སོ། །སོ་སོར་བསྡུ་བའི་རིམ་ཉིད་ཀྱིས། །ང་འོག་ཉ་ཎ་མན་རྣམས། །བསམས་ཏེ་ཟད་པར་ནམ་མཁའ་སོགས། །དེ་ལྟར་སྒོ་རྣམས་ལས་བྱུང་སྤྲོ། །ཁང་བརྩེགས་སྟེང་དང་གཡོན་མཛེས་དྲུང༌། །གཞན་ནི་ཁང་བརྩེགས་ཕྱི་རོལ་དུ། །སྟོང་པ་རླུང་མེ་ཆུ་དང་སའི། །དཀྱིལ་འཁོར་ལྔ་པ་ཟུང་ལའོ། །དེ་བཞིན་གཟའ་དང་ཀླུ་རྣམས་དང༌། །འབྱུང་པོ་རྣམས་ཀྱང་གདན་ལའོ། །ཟད་པར་གཟའ་དང་འབྱུང་པོ་རྣམས། །མཚོན་ཆ་འདོད་མ་སོགས་ཇི་བཞིན། །ཁྲོ་བོ་ཕྱོགས་སྐྱོང་ཀླུ་རྣམས་ཀྱི། །དབྱིབས་ནི་འཆད་འགྱུར་ཇི་བཞིན་ནོ། །ཀླུ་ཡིས་ཁྲོ་བོ་རྣམས་ཀྱང་འདིར། །ཞལ་གསུམ་ཕྱག་དྲུག་སྤྱན་གསུམ་པའོ། །འདི་ཀུན་མིང་གི་རིམ་པ་ཡང༌། །གཏོར་མའི་སྔགས་ནི་ཇི་བཞིན་ནོ། །ར་བ་གསུམ་པར་ཕྱོགས་སྐྱོང་དང༌། །གཟའ་རྣམས་འཆད་འགྱུར་གདན་ལའོ། །ཕྱི་རོལ་ར་བ་ལྔ་རྣམས་ལ། །དེ་བཞིན་ཀླུ་དང་འབྱུང་པོ་སྤྲོ། །གྷ་ཛྷ་ཌྷ་བྷ་དྷ་རྣམས་བརྩེགས། །ཕྱོགས་སྐྱོང་སས་བོན་གོ་རིམས་བཞིན། །ག་ཛ་ཌ་བ་ད་རྣམས་བརྩེགས། །གཟའ་རྣམས་རིམ་པས་འབྱུང་བའོ། །ཁ་ཚ་ཋ་ཕ་ཐ་རྣམས་བརྩེགས། །རིམ་པ་ཇི་བཞིན་ཀླུའི་ས་བོན། །ཀ་ཙ་ཊ་པ་ཏ་རྣམས་བརྩེགས། །འབྱུང་པོ་རྣམས་ནི་རིམ་པས་འབྱུང༌། །ར་བ་གསུམ་དང་ར་བ་ལྔའི། །ཕྱི་དང་ནང་དུ་དེ་བཞིན་ནོ། །དེ་དག་རྣམ་པར་གནོན་བྱེད་པའི། །སྟེང་དང་འོག་ཏུ་གནས་པ་སྤྲོ། །ཡེ་ཤེས་མཁའ་རླུང་མེ་དང་ཆུ། །ས་ཡི་ཁམས་ལས་ཡང་དག་བྱུང༌། །སྲུང་བའི་འཁོར་ལོར་གནས་པ་དྲུག །གཉིས་གཉིས་སེམས་དག་ལུས་སྲུང་བའོ། །ལུས་ལས་འཇིག་དུས་མེ་འབར་བས། །བགེགས་དང་ལོག་པར་འདྲེན་པ་བསྲེགས། །མཁའ་ཁྱབ་མེ་སྟག་ཚོགས་འཕྲོ་བའི། །འཁོར་ལོ་འདིར་ནི་རྣམ་པར་བསྒོམ། །དེ་ནས་མཉམ་པར་གཞག་པ་ཡིས། །བདུད་སྲེག་པ་ནི་བསྒྲགས་པར་བྱ། །ཨོཾ་ཨཱཿཧཱུཾ་ཧོ་ཧཾ་ཀྵཿཧྲཿཧྲཿཧྲཿཧྲཿར་ར་ར་ར་བཛྲ་ན་ལ་སརྦཱ་བ་ར་ཎ་དྷརྨ་པྲ་ལ་ཡ་སྭ་བྷཱ་བ་སརྦ་མཱ་ར་ཀཱ་ཡི་ཀ་བིགྷྣ་བི་ནཱ་ཡ་ཀཱ་དཱི་ནཱཾ་ད་ཤ་དིགྒ་ཏཱ་ནཱཾ་ཀཱ་ཡ་ཝཱ་ཀྩི་ཏྟཱ་ནི་ད་ཧ་ད་ཧ་པ་ཙ་པ་ཙ་བྷ་ཤྨཱིཾ་ཀུ་རུ་ཀུ་རུ་ཧཱུཾ་ཧཱུཾ་ཕཊ་ཕཊ། ཅེས་པ་བདུད་སྲེག་
པའི་སྔགས་སོ། །བགེགས་དང་ལོག་འདྲེན་ལ་སོགས་རྣམས། །རྡོ་རྗེ་ལྕགས་ཀྱུས་དབང་བྱས་ཏེ། །རྡོ་རྗེ་ཞགས་པ་ཡིས་ཀྱང་ནི། །བཅིང་པ་ལྔ་ཡིས་བཅིངས་པར་བསྒོམ། །ཁྲོ་དབང་རྡོ་རྗེ་ཕུར་བུ་ནི། །ལྟེ་བའི་འོག་ནས་མདུང་གི་ཚུལ། །ཕྱོགས་བཅུ་རྣམས་སུ་གདུག་པ་ཡི། །སྟེང་དུ་བྱིང་བར་བསམ་པར་བྱ། །སྔགས་ནི། ཨོཾ་ཨཱཿཧཱུཾ་ཧོ་ཧཾ་ཀྵཿཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་བཛྲ་ཀཱི་ལ་ཀ་ཀཱ་ཡ་ཝཱཀྩིཏྟ་ཛྙཱ་ནཱ་དྷི་པ་ཏེ་ཥཌྨུ་ཁ་ཥཌྦྷུ་ཛ་སརྦ་ཙ་ར་ཎ་སརྦ་བིགྷྣ་བི་ནཱ་ཡ་ཀཱ་དི་དུཥྚཱ་ནཾ་ཀཱ་ཡ་ཝཱཀྩིཏྟ་ཛྙཱ་ནཱ་ནི་ཀཱི་ལ་ཡ་ཀཱི་ལ་ཡ་ཧཱུཾ་ཧཱུཾ་ཕཊ་ཕཊ། དེ་ནས་རྡོ་རྗེ་ཐོ་བའི་སྔགས་ནི། ཨོཾ་ལླཱྀཿབཛྲ་མུངྒ་ར་མཱ་རཱ་དཱི་ནཱཾ་ཤི་ར་སི་ཀཎྛེ་ཧྲྀ་ད་ཡེ་ནཱ་བྷཽ་གུ་ཧྱ་བཛྲ་ཀཱི་ལ་ཀཱ་ནཱ་ཀོ་ཊ་ཡ་ཀྵཱཾ་ཀྵཱཾ་ཀྵིཾ་ཀྵཱིཾ་ཀྵཱིཾ་ཀྵྼཱྀཾ་ཀྵཱུཾ་ཀྵཱུཾ་ཀྵླྀ་ཀྵླཱྀཾ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། དེ་ནས་བློ་ལྡན་ཁྲོ་དབང་བགི །ང་རྒྱལ་བྱས་ནས་ཕྱོགས་བཅུ་ཡི། །ཕུར་བུ་བསྲུང་བའི་ཁྲོ་བོ་ལ། །སྔགས་འདི་བརྗོད་དེ་བཀའ་བསྒོ་བྱ། །ཨོཾ་ཧཱུཾ་ཀྲོ་དྷེནྡྲོ་ཧཾ་ཀྲོ་དྷཱ་ནཱ་མཱུ་ཛྙཱ་དཱ་ཡ་ཀ་སྭཱ་ཧཱ། ཨོཾ་ཧཾ་བཛྲ་ཀྲོ་དྷ་རཱ་ཛ་མ་ཧོ་ཥྞཱི་ཤོརྡྷ་དི་ཤི་རཀྵཱཾ་ཀུ་རུ་ཀུ་རུ་སྭཱ་ཧཱ། ཨོཾ་ཡཾ་བཛྲ་ཀྲོ་དྷ་རཱ་ཛ་ཨ་ཏི་བ་ལ། སརྦ་བིགྷྣཱནྟ་ཀ་པཱུ་རྦ་དི་ཤི་རཀྵཱཾ་ཀུ་རུ་ཀུ་རུ་སྭཱ་ཧཱ། ཨོཾ་རཾ་བཛྲ་ཀྲོ་དྷ་རཱ་ཛ་ཛམྦྷ་ཀ་དུཥྚ་པྲཛྙཱནྟ་ཀ་དཀྵི་ཎ་དི་ཤི་རཀྵཱཾ་ཀུ་རུ་ཀུ་རུ་སྭཱ་ཧཱ། ཨོཾ་ལཾ་བཛྲ་ཀྲོ་དྷ་རཱ་ཛ་སྟམྦྷ་ཀ་ཡ་མཱནྟ་ཀ་པ་ཤྩི་མ་དི་ཤི་རཀྵཱཾ་ཀུ་རུ་ཀུ་རུ་སྭཱ་ཧཱ། ཨོཾ་ཝཾ་བཛྲ་ཀྲོ་དྷ་རཱ་ཛ་མཱ་ན་ཀ་བི་རཱ་ག་པདྨ་ནྟ་ཀ་ཨུ་ཏྟ་ར་དི་ཤི་རཀྵཱཾ་ཀུ་རུ་ཀུ་རུ་སྭཱ་ཧཱ། ཨོཾ་ཡཱཿབཛྲ་ཀྲོ་དྷ་རཱ་ཛ་ནཱི་ལ་དཎྜ་ཨགྣེ་ཡྻཱཾ་དི་ཤི་རཀྵཱཾ་ཀུ་རུ་ཀུ་རུ་སྭཱ་ཧཱ། ཨོཾ་རཱཿབཛྲ་ཀྲོ་དྷ་རཱ་ཛ་ཊཀྐི་རཱ་ཛ་ནཻ་རྲྀ་ཏྱཱཾ་དི་ཤི་རཀྵཱ་ཀུ་རུ་ཀུ་རུ་སྭཱ་ཧཱ། ཨོཾ་ལཱཿབཛྲ་ཀྲོ་དྷ་རཱ་ཛ་མ་ཧཱ་བ་ལ་བཱ་ཡ་བྱནྡཱི་ཤི་རཀྵཱཾ་ཀུ་རུ་ཀུ་རུ་སྭཱ་ཧཱ། ཨོཾ་ཝཾཿབཛྲ་ཀྲོ་དྷ་རཱ་ཛ་ཙ་ལེ་ཨཱི་ཤཱ་ན་དི་ཤི་ང་ཀྵའཾ་ཀུ་རུ་ཀུ་རུ་སྭཱ་ཧཱ། ཨོཾ་ཧཱཿབཛྲ་ཀྲོ་དྷ་རཱ་ཛ་སུམྦྷ་རཱ་ཛ་ཨ་དྷྭ་དི་ཤི་རཀྵཾ་ཀུ་རུ་ཀུ་རུ་སྭཱ་ཧཱ། དེ་ནས་ཨོཾ་སརྦ་ཏ་ཐཱ་ག་ཏ་རཀྵ་ཙཀྲ་སྭཱ་བྷཱ་བཱཏྨ་ཀོཉ་ཞེས་པས་བརྟན་པར་བྱའོ། །དེ་ནས་དེ་རྣམས་ལ་གཏོར་མ། སྔགས་ཚིག་རྣམས་ཀྱིས་རིམ་པས་སྦྱིན། ཨོཾ་ཨཱཿཧཱུཾ་ཧོ། ཨུཥྞཱི་ཥ་སུམྦྷ་ནི་སུམྦྷ་བིགྷྣཱནྟ་ཀ་ནཱི་ལ་དཎྜ་ཀ་ཊཱཀྐི་ར་ཛ་པདྨནྟ་ཀ་ཨ་ཙ་ལ་ཡ་མཱནྟ་ཀ་མ་ཧཱ་བ་ལེ་བྷྱཿས་པ་རི་ཝཱ་རེ་བྷྱ་ཨི་དཾ་བ་ལིཾ་གནྡྷཾ་པུཥྤཾ་དྷཱུ་པཾ་དཱི་པཾ་ཨཀྵ་ཏཾ་ད་དཱ་མ་ཧེ་ཏེ་ཙཱ་ག་ཏྱ་ས་པ་རི་ཝཱ་རཱཿ་ཤཱི་གྷྲཾ་ཨི་དཾ་བ་ལིཾ་གྲྀ་ཧྞནྟུ་ཁ་དཱནྟུ་བི་ཝནྟུ་ཛཿཧཱུཾ་བཾ་ཧོཿསཾ་ཏྲྀཔྟཱཿསརྦ་སཏྭཱ་ནཱཾ་ཤཱནྟིཾ་པུཥྚིཾ་རཀྵཱ་བ་ར་ཎ་གུཔྟཾ་ཀུརྦནྟུ་ཧཱུཾ་ཧཱུཾ་ཕཊ་ཕཊ་བཛྲ་དྷ་ར་ཨཱ་ཛྙཱ་པ་ཡ་ཏི་སྭཱ་ཧཱ། ཞེས་པ་ཁྲོ་བོ་ཐམས་ཅད་ཀྱི་གཏོར་མའི་སྔགས་སོ། །ཨོཾ་ཨཱཿཧཱུཾ་ཧོཿ་
ཨཱ་ཀཱ་ཤ་ཝཱ་ཡུ་ཏེ་ཛ་ཨུ་ད་ཀ་པྲྀ་ཐྭཱི་སཱ་དྷི་ཏེ་བྷྱཿ་ས་པ་རི་ཝཱ་རེ་ཞེས་པ་ལ་སོགས་པ་ལྷག་མ་སྔ་མ་བཞིན་ཏེ་ཟད་པར་གྱི་གཏོར་མའི་སྔགས་སོ། །ཨོཾ་ཨཱཿ་ཧཱུཾ་ཧོཿ་བྲ་ཧྨ་བྷིཥྞཱུ་ནཻ་རྲྀ་ཏྱ་བཱ་ཡུ་ཡཱ་མཱ་གནི་ས་མུ་དྲེ་ཤྭཱ་རེ་ནྡྲ་ཡ་ཀྵེ་བྷྱཿ། ཞེས་པ་ལ་སོགས་པ་ཕྱོགས་སྐྱོང་གི་གཏོར་མའི་སྔགས་སོ། །ཨོཾ་ཨཱཿ་ཧཱུཾ་ཧོཿ་རཱ་ཧུ་ཀཱ་ལཱ་གནི་ཙནྡྲ་སཱུ་ཪྻ་བུདྡྷ་མཾ་ག་ལ་ཤུ་ཀྲ་པྲྀ་ཧ་སྤ་ཏི་ཀེ་ཏུ་ཤ་ནེ་བྷྱཿ། ཞེས་པ་ལ་སོགས་པ་གཟའི་གཏོར་མའི་སྔགས་སོ། །ཨོཾ་ཨཱཿ་ཧཱུཾ་ཧོཿ་ཛ་ཡ་བི་ཛ་ཡ་པདྨ་ཀ་རྐོ་ཊ་ག་བཱ་སུ་ཀིཾ་ཤཾ་ཁཱ་པཱ་ལ་ཀུ་ལི་ཀཱ་ནནྟ་ཏ་ཀྵ་ཀ་མ་ཧཱ་པདྨེ་བྷྱཿ། ཞེས་པ་ལ་སོགས་པ་ཀླུའི་གཏོར་མའི་སྔགས་སོ། །ཨོཾ་ཨཱཿ་ཧཱུཾ་ཧོཿ་བེ་ཏཱ་ཌ་བི་ཀྲྀ་ཏ་མུ་ཁ་ཤྭ་ཀཱ་ཀ་ཤཱུ་ཀ་ར་གྲྀ་དྷྲ་བྱཱ་གྷྲོ་ལཱུ་ཀ་ཛམྦུ་ག་རུ་ཌ་མུ་ཁེ་བྷྱཿ་ས་པ་རི་ཞེས་པ་ལ་སོགས་པ་ཐམས་ཅད་སྔ་མ་བཞིན་ཏེ་འབྱུང་པོའི་གཏོར་མའི་སྔགས་སོ། །གཏོར་མ་རྒྱལ་མཚན་བ་དན་སོགས། །མཆོད་པའི་རྣམ་པ་ཡང་དག་ལྡན། །མེད་ན་ཡིད་ཀྱིས་བསྒོམ་པར་བྱ། །བཟའ་བཅའ་ལ་སོགས་རྒྱ་ཆེ་བ། །ཤིང་རྟ་ཁུར་དང་ཟངས་མོ་ཆ། །ཐལ་མོ་ལ་སོགས་བར་དུ་ཡང༌། །གཡོན་དང་གཡས་དང་ཟུང་གིས་བཀབ། །ནམ་མཁའ་ལྡིང་གི་ཕྱག་རྒྱ་དང༌། །སྐུ་ཡི་རྡོ་རྗེས་སྦྱང་བར་བྱ། །གསུང་གི་རྡོ་རྗེས་རྟོགས་བྱ་སྟེ། །ཐུགས་ཀྱི་རྡོ་རྗེ་སྦར་བར་བྱ། །ཡེ་ཤེས་ཀྱི་ནི་བདུད་རྩི་དགུག །རྩེ་ལྔ་གྲི་གུག་རལ་གྲི་དང༌། །རིན་ཆེན་ཆུ་སྐྱེས་འཁོར་ལོ་ཡིས། །ཕྱག་རྒྱས་དེ་རྣམས་ལ་གཏོར་མ། །དབུལ་ཞིང་འཐོར་འཐུང་སོགས་ཀྱིས་མཆོད། །དྲིལ་བུའི་སྒྲ་དང་བསྟོད་པ་བྱ། །ཡེ་ཤེས་ནམ་མཁའ་རླུང་མེ་ཆུ། །ས་ཡི་རང་བཞིན་དེ་རྣམས་ཀྱང༌། །ཧཾ་ཨ་ཨི་རྀ་ཨུ་ལྀ་བསམ། །ཀྲ་མཱ་དཱ་པ་རཀྵེ་ན་ས་སྟེ། །འཁོར་ལོ་དྲུག་ཏུ་གཤེགས་གསོལ་བྱ། །སྐད་ཅིག་ཉིད་ལ་དགུག་བྱ་སྟེ། །ཇི་སྐད་བསྟན་པ་ཐམས་ཅད་ཉིད། །ཅེས་པ་གསུངས་པའི་འཁོར་ལོའི་སྒྲུབ་ཐབས་ཀྱི་ཆོ་གའོ། །དེ་ནས་རྣལ་འབྱོར་རིག་པ་འཛིན། །འདོད་མའི་གྲོགས་དང་ལྡན་པ་ཡང༌། །ཁ་ནི་དག་པར་བྱ་བའི་ཕྱིར། །བདུད་རྩི་རིལ་བུ་ཁ་རུ་གཞུག །ཡང་ན་ལུས་དག་བྱ་བའི་ཕྱིར། །རྡོ་རྗེའི་ཕྱག་རྒྱས་ལུས་རེག་ནས། །དང་པོར་སྐད་ཅིག་རྣམ་པ་ཡིས། །དཔལ་ལྡན་དུས་ཀྱི་འཁོར་ལོའི་སྐུ། །ཐུགས་ཀར་པཾ་སྐྱེས་པད་དམར་འདབ་བརྒྱད་པའམ། །ཡང་ན་ཨཾ་སྐྱེས་སྣ་ཚོགས་པདྨར་ནི། །ཟླ་བ་ཉ་བ་ལ་ནི་ཧཱུཾ་ཡིག་
སྔོ། །དེ་ལས་བྱུང་བའི་རྡོ་རྗེ་རྩེ་ལྔ་པའི། །གཟི་བརྗིད་ལས་སྐྱེས་སངས་རྒྱས་ཚོགས་རྣམས་ནི། །བསམ་པ་ཐམས་ཅད་ཡོངས་སུ་རྫོགས་མཛད་པའོ། །སངས་རྒྱས་རྣམས་ལ་མཆོད་པའི་ཕྱིར་དུ་ཡང༌། །འཁོར་ལོའི་གཙོ་བོ་རྣམས་ཀྱང་བསྒོམ་པར་བྱ། །བརྩེགས་པའི་ས་བོན་ལས་བྱུང་བ། །དྲི་ཆབ་མ་སོགས་ལྷ་མོ་ནི། །ཀུན་ནས་འོད་ཀྱིས་བཀུག་རྣམས་ཀྱིས། །མངོན་པར་ཕྱག་འཚལ་རབ་མཆོད་བྱ། །ཨོཾ་ཙྪྫྫྷྙ་བཛྲ་གནྡྷ་གནྡྷཱ་ནཾ་ཀུ་རུ་ཀུ་རུ་སྭཱ་ཧཱ། ཨོཾ་ཙྪྫྫྷྙཱ་བཛྲ་མཱ་ལེ་མཱ་ལཱ་རྩྩ་ནཾ་ཀུ་རུ་ཀུ་རུ་སྭཱ་ཧཱ། ཨོཾ་ཊྛྜྜྷྞ་བཛྲ་དྷཱུ་པེ་དྷཱུ་པཱ་རྩྩ་ནཾ་ཀུ་རུ་ཀུ་རུ་སྭཱ་ཧཱ། ཨོཾ་ཊྛྜྜྷྞཱ་བཛྲ་པྲ་དཱི་པེ་པྲ་དཱི་པ་རྩྩ་ནཾ་ཀུ་རུ་ཀུ་རུ་སྭཱ་ཧཱ། ཨོཾ་པྥྦྦྷྨ་བཛྲཱ་མྲྀ་ཏེ་ནཻ་བི་དྱ་པཱུ་ཛཾ་ཀུ་རུ་སྭཱ་ཧཱ། ཨོཾ་པྥྦྦྷྨཱ་བཛྲ་ཀྵ་ཏེ་ཉྐྵ་ཏ་ཕ་ལ་རྩྩ་ནཾ་ཀུ་རུ་ཀུ་རུ་སྭཱ་ཧཱ། ཨོཾ་ཏྠྡྡྷྣ་བཛྲ་ལཱ་སྱེ་ཝ་སྟྲ་བྷ་ར་ཎ་པཱུ་ཛཾ་ཀུ་རུ་ཀུ་རུ་སྭཱ་ཧཱ། ཨོཾ་ཏྠྡྡྷྣཱ་བཛྲ་ཧཱ་སྱེ་ག་ཎྜཱ་དརྣ་པུ་ཛཾ་ཀུ་རུ་ཀུ་རུ་སྭཱ་ཧཱ། ཨོཾ་ཀྑྒྒྷྔ་བཛྲ་ཝཱ་དྱེ་ཝ་དྱ་པཱུ་ཛཾ་ཀུ་རུ་ཀུ་རུ་སྭཱ་ཧཱ། ཨོཾ་ཀྑྒྒྷྔཱ་བཛྲ་ནྲྀ་ཏྱེ་ནྲྀ་ཏྱ་པཱུ་ཛཾ་ཀུ་རུ་ཀུ་རུ་སྭཱ་ཧཱ། ཨོཾ་སྤྵྴ་ཀ་བཛྲ་གཱི་ཏེ་གཱི་ཏ་པཱུ་ཛཱཾ་ཀུ་རུ་ཀུ་རུ་སྭཱ་ཧཱ། ཨོཾ་སཔྵྴ་ཀཱ་བཛྲ་ཀཱ་མེ་སརྦ་བུདྡྷ་བོ་དྷི་སཏྭཱ་ནཱཾ་བཛྲ་སུ་ར་ཏ་པཱུ་ཛཱིཾ་ཀུ་རུ་ཀུ་སྭཱ་ཧཱ། ཞིང་རྡུལ་ཀུན་ལས་ལྷག་པ་ཡི། །རྡོ་རྗེ་གསུམ་སྦྱོར་རྫོགས་སངས་རྒྱས། །དམ་ཆོས་དང་བཅས་ཚོགས་རྣམས་ལ། །བདག་ནི་གུས་པས་ཕྱག་བགྱིའོ། །དེ་རྣམས་རེ་རེ་ལ་ཡང་དེ་སྙེད་ཀྱི། །དེ་ལ་བོས་པ་ཤིན་ཏུ་ཡིད་འཕྲོག་པ། །དྲི་ཆབ་མ་སོགས་ལྷ་མོའི་ཚོགས་རྣམས་ཀྱིས། །དྲི་བཟང་ལ་སོགས་རྣམས་ཀྱིས་མཆོད་པ་བགྱི། །བགྱིས་དང་བགྱིད་དུ་སྩལ་དང་གཞན་རྣམས་ལ། །རྗེས་སུ་ཡིད་རངས་བཏང་སྙོམས་གཞག་པ་སྟེ། །སྲིད་པར་ལུས་སོགས་ལས་སྐྱེས་ཉེས་པ་དང༌། །སྡིག་པ་མ་ལུས་པ་དག་བཤགས་པར་བགྱི། །རྫོགས་སངས་རྒྱས་དང་བྱང་ཆུབ་སེམས་དཔའ་དང༌། །འཕགས་པ་དུ་མས་ཆོས་ལ་མཆོག་མཛད་དང༌། །གཞན་གྱི་དགེ་བ་བྱས་པ་གང་ཡིན་ལ། །རབ་ཏུ་དགའ་བས་རྗེས་སུ་ཡི་རང་ངོ༌། །མཆོག་གི་བརྩེ་བས་ཁྱབ་པར་གྱུར་པ་ཡི། །ཀུན་དུ་ཆགས་ལས་མ་ཆགས་བདེ་བ་འབྱུང༌། །ཐར་པའི་ཐབས་ནི་རབ་ཏུ་སྦྱིན་མཛད་པའི། །སངས་རྒྱས་རྣམས་ལ་རྟག་ཏུ་སྐྱབས་སུ་འཆི། །ཀུན་དུ་རྟོག་པ་མ་ལུས་ཀུན་ནས་སྤངས། །རྫོགས་
པའི་སངས་རྒྱས་རྣམས་ཀྱི་ཕུན་ཚོགས་བརྟེན། །དངོས་དང་དངོས་མེད་གཉིས་སུ་མེད་པའི་ཆོས། །རྣམ་པ་གཉིས་ལ་རབ་ཏུ་སྐྱབས་སུ་མཆི། །སངས་རྒྱས་རྫོགས་པའི་སངས་རྒྱས་དམ་པའི་ཆོས། །དམ་པའི་ཡོན་ཏན་མངའ་བ་ཚོགས་ཀྱི་མཆོག །ཆགས་པའི་ཞགས་པའི་ཚོགས་ལས་ངེས་གྲོལ་བར། །འགྱུར་བ་དེ་ལ་ངེས་པར་སྐྱབས་སུ་མཆི། །སེམས་ཅན་རྣམས་ཀྱི་ཅི་འདོད་དོན། །བྱ་ཕྱིར་བདག་གི་ལུས་འདི་ནི། །ཤིན་ཏུ་རྣམ་པར་དག་སེམས་ཀྱིས། །སངས་རྒྱས་རྣམས་ལ་དབུལ་བར་བགྱི། །རྨོངས་དང་དཀའ་ཐུབ་ཀྱིས་བསྐམས་པའི། །འགྲོ་བའི་ལོ་ཏོག་ཐམས་ཅད་ལ། །དམ་ཆོས་སྟོན་པའི་ཆར་པ་ནི། །རྒྱལ་བས་རྒྱུན་མི་འཆད་པར་མཛོད། །ཇི་སྲིད་འཁོར་བའི་བརྩོན་ར་ལས། །མ་གྲོལ་སེམས་ཅན་གཅིག་གི་བར། །དེ་སྲིད་མྱ་ངན་མི་འདའ་བའི། །བརྩེ་བ་ཆེན་པོ་བསྟན་དུ་གསོལ། །གལ་ཏེ་གཟུགས་ཅན་གྱུར་ན་ཞིང་གི་རྡུལ། །ཀུན་དང་མཉམ་པའི་ནམ་མཁའི་ཚད་ལས་ཀྱང༌། །ལྷག་པར་གྱུར་པའི་བསོད་ནམས་འདི་དེ་ཡང༌། །རྫོགས་པའི་བྱང་ཆུབ་ཉིད་དུ་བསྔོ་བར་བགྱི། །མ་ལུས་ཉེས་ལས་ངེས་གྲོལ་ཞིང༌། །ཡོན་ཏན་ཀུན་གྱིས་བརྒྱན་གྱུར་པ། །ཡེ་ཤེས་རྒྱ་མཚོ་རྫོགས་སངས་རྒྱས། །སེམས་ཅན་དོན་ཕྱིར་འགྲུབ་པར་ཤོག ། བྱང་ཆུབ་སེམས་ནི་བསྐྱེད་བགྱི་ཞིང༌། །བསམ་པ་རྣམ་པར་དག་པ་བསྐྱེད། །བདག་དང་བདག་གིར་འཛིན་པ་སྤངས། །རྩ་བ་གསུམ་ནི་དྲན་པར་བགྱི། །སྦྱིན་སོགས་ཕྱོགས་དང་ཚངས་གནས་བཞི། །བསྡུ་བ་ཞི་དགེ་བ་རྣམ་བཅུ་བསྟེན། །སྒྲིབ་པ་ལྔ་དང་ཉོན་མོངས་དང༌། །དེ་བཞིན་ཟག་པ་བཞི་པོ་སྤང༌། །དེ་ནས་དངོས་པོ་མེད་ལ་བསྒོམ་པ་མེད། །བསྒོམ་པ་བསྒོམ་པ་ཉིད་མ་ཡིན། །དེ་ལྟར་དངོས་པོ་དངོས་མེད་པས། །བསྒོམ་པ་དམིགས་སུ་མེད་པའོ། །སྟོང་པའི་རང་བཞིན་སྟོང་ཉིད་ལས། །ཀུན་ནས་ཉོན་མོངས་རྣམ་བྱང་སྐྱེས། །དེ་ལྟ་ན་ཡང་ཀུན་རྫོབ་ཏུ། །བསྔགས་པས་དཀྱིལ་འཁོར་དབང་ཕྱུག་བསྒྲུབ། །ཇི་ལྟར་མཐར་ནི་ཆུ་ཡིས་མེ། །འཇིག་སྟེ་ས་ཡང་ཞུ་བར་གྱུར། །ཆུ་ནི་རླུང་གིས་སེམས་བྱེད་ཅིང༌། །རླུང་ནི་སྟོང་པར་འཇུག་པར་བྱེད། །ཀུན་གཞི་རྣམ་པར་ཤེས་པའི་སེམས། །མཁའ་དབྱིངས་ཡུལ་དང་བྲལ་གྱུར་པ། །རྣམ་པ་ཀུན་གྱི་མཆོག་ལྡན་གཟུགས། །དབུ་མའི་གནས་སུ་
གཞག་པར་བྱ། །དེ་ནས་ཨོཾ་ཤཱུ་ནྱ་ཏཱ་ཛྙཱན་བཛྲ་ས་བྷཱ་བཱ་ཏྨ་ཀོ྅ཧཾ་ཨོཾ་ཨ་ནི་མི་ཏྟ་ཛྙཱན་བཛྲ་སྭ་བྷཱ་བཱ་ཏྨ་ཀོ྅ཧཾ། ཨོཾ་ཨ་པྲ་ནི་ཧི་ཏ་ཛྙཱན་བཛྲ་སྭ་བྷཱ་བཱ་ཏྨ་ཀོ྅ཧཾ། ཨོཾ་ཨ་ན་བྷི་སཾ་སྐཱ་ར་ཛྙ་ན་བཛྲ་སྭ་བྷཱ་བཱ་ཏྨ་ཀོ྅ཧཾ། འདི་ནི་ཕྱི་རུ་ཆོས་འབྱུང་སྟེ། །མ་ཡི་ལུས་ལ་གྲུ་གསུམ་མོ། །དེ་དབུས་བརྩེགས་པའི་ས་བོན་དང། །སྨོན་ལམ་བག་ཆགས་དབང་ལས་བྱུང༌། །ཧྐྵྨླྺྲྱ་དེ་ཡོངས་གྱུར་ལས་རླུང་ལ་སོགས། །རྟེན་གྱི་དཀྱིལ་འཁོར་དེ་རྣམས་ལ། །ཐད་ཀའི་ཚད་ནི་དཔག་ཚད་དག །འབུམ་ཕྲག་བཞི་གསུམ་གཉིས་གཅིག་གོ །ནག་དམར་སེར་དང་དཀར་བ་སྟེ། །སྣ་ཚོགས་རྡོ་རྗེ་གཉིས་ཀྱིས་མཚན། །རྒྱལ་མཚན་བཀྲ་ཤིས་ཆུ་སྐྱེས་དང༌། །རྡོ་རྗེས་ཀྱང་ནི་དེ་རྣམས་མཚན། །དབྱི་བས་ནི། གཞུ་དང་ཟུར་གསུམ་དང༌། །ཟླུམ་པོ་གྲུ་བཞི་གོ་རམ་ས་བཞིན། །མ་ཡིག་ལས་སྐྱེས་ལྷུན་པོ་ཆེ། །རིན་ཆེན་རྡོ་རྗེའི་རང་བཞིན་དེ། །འོག་ལ་སྟོང་ཕྲག་བཅུ་དྲུག་དང༌། །སྟེང་ལ་སྟོང་ཕྲག་ལྔ་བཅུར་བརྗོད། །དེ་ཡི་ཕྱེད་དུ་ཀྵ་ལས་སྐྱེས། །སྣ་ཚོགས་པདྨའོ་ཧ་དང་ནི། །ཟླ་ཕྱེད་ཐིག་ལེ་ལས་སྐྱེས་པའི། །ཟླ་བ་ཉི་མ་སྒྲ་གཅན་གཟུགས། །ནང་དུ་དཔྲལ་བ་སོགས་ཀྱང་ངོ༌། །དེ་སྟེང་ཧཱུཾ་འཕྲོས་རྡོ་རྗེ་ནི། །འབར་བའི་ས་དང་གུར་ནང་དུ། །འོད་གསལ་བྷྲཱུཾ་ཡིག་ལས་བྱུང་བའི། །ཁང་པ་བརྩེགས་པའི་དཀྱིལ་འཁོར་གསུམ། །འོག་ཏུ་ཨོཾ་སྐྱེས་དབུས་ཀྱི་ནི། །པདྨར་ཉི་ཟླ་དགྲ་གཅན་འཛིན། །ཐུགས་ཀྱི་དཀྱིལ་འཁོར་པདྨ་རམས། །སུམ་ཅུ་རྩ་གཉིས་དེ་ཞེས་བྱ། །ཨོཾ་ཡིག་ཡེ་ཤེས་ལས་སྐྱེས་པར། །ཟླ་བ་ཉི་མའི་གདན་རྣམས་སོ། །ཕྱི་རོལ་དག་ཏུ་བཞོན་པའི་སྟེང༌། །ཟླ་བ་ཉི་མ་སྤངས་པ་ཡི། །བརྒྱད་དང་བཅུ་གཉིས་གྲངས་རྣམས་སོ། །སྒོ་རྣམས་སུ་ནི་ཤིང་རྟ་བཞི། །སྣ་ཚོགས་ནོར་བུ་གསེར་སོགས་ཀྱི། །དཀྱིལ་འཁོར་དེ་ཡང་འོད་གསལ་ཏེ། །མཐའ་ཡས་སངས་རྒྱས་ཞིང་རྡུལ་དང༌། །མཉམ་པའི་ཉི་མའི་འོད་དང་མཚུངས། །ནམ་མཁའ་ཇི་སྲིད་མཐས་གཏུགས་པར། །སངས་རྒྱས་དཀྱིལ་འཁོར་རྣམ་པར་འཕྲོ། །སངས་རྒྱས་བྱང་ཆུབ་ལྷ་རྫས་གནས། །རང་བཞིན་དྲི་མེད་ཤིན་ཏུ་གསལ། །གཞལ་མེད་བསོད་ནམས་ཡེ་ཤེས་ཀྱི། །ཚོགས་ལས་བྱུང་བའི་ནོར་བུས་བརྒྱན། །སྙིང་པོའི་འཁོར་ལོའི་ནོར་བུའི་ནང༌། །འདི་ནི་ཀུན་ནས་དག་པའི་མཆོག །དེ་ནས་ཕྱི་རོལ་དེ་ལུས་ལ། །དེ་ཁམས་དག་པར་རྒྱས་པར་བརྗོད། །ཆོས་
ཀྱི་ཕུང་པོའི་དག་པ་ནི། །རྩ་བའི་རྒྱུད་བཞིན་བརྗོད་བྱ་སྟེ། །སངས་རྒྱས་ཆོས་དང་དགེ་འདུན་ཆོས། །ཐུགས་གསུང་སྐུ་ཡི་དཀྱིལ་འཁོར་རོ། །ཚངས་པའི་གནས་བཞི་རྣམས་ཀྱིས་ནི། །རྡོ་རྗེའི་ཐིག་ལེ་བཞི་པ་སྟེ། །དྲན་པ་ཉེར་གཞག་བཞི་རྣམས་ཀྱིས། །ཀུན་ནས་གྲུ་བཞི་པ་ཉིད་དོ། །ཡན་ལག་བཅུ་གཉིས་འགགས་པ་ཡིས། །སྒོ་ནི་བཅུ་གཉིས་པོ་རྣམས་ཏེ། །དེ་བཞིན་ས་ནི་བཅུ་གཉིས་ཀྱིས། །རྟ་བབས་དག་ནི་མཛེས་པ་རྣམས། །འཕགས་ལམ་ཡན་ལག་བརྒྱད་རྣམས་ཀྱིས། །ཕྱོགས་བརྒྱད་དུ་ནི་དུར་ཁྲོད་རྣམས། །སྟོང་ཉིད་བཅུ་དྲུག་ཀ་བ་རྣམས། །ཁམས་རྣམས་ཀྱིས་ཀྱང་ཁང་པ་བརྩེགས། །རྣམ་ཐར་བརྒྱད་ཀྱིས་སྒོ་ཁྱུད་རྣམས། །གཟུགས་ཅན་ཡོན་ཏན་བརྒྱད་རྣམས་ཀྱིས། །འགྲམ་རྣམས་དང་ནི་ལོགས་རྣམས་ཉིད། །ཐུགས་གསུང་སྐུ་ཡི་དབྱེ་བས་སོ། །ཚུལ་ཁྲིམས་ལ་སོགས་ཕུང་བོ་ལྔས། །ཁ་དོག་ལྔ་ནི་རྣམ་སྦྱངས་པ། །ཐེག་པ་གསུམ་གྱིས་རབ་གསུམ། །དད་པའི་དབང་པོ་སོགས་ཀྱིས་ལྔ། །དང་སོགས་སྟོབས་རྣམས་དག་གིས་ལྔ། །ཐུགས་གསུང་སྐུ་ཡི་དཀྱིལ་འཁོར་རོ། །རིང་ངེ་འཛིན་དང་གཟུངས་རྣམས་ཀྱིས། །དཀྱིལ་འཁོར་གསུམ་ལ་ཁ་ཁྱེར་ཏེ། །ཕ་རོལ་ཕྱིན་བཅུ་རྫོགས་པ་ཡིས། །རིན་ཆེན་སྣམ་བུ་རྣམ་པར་བཀྲ། །མ་འདྲེས་ཆོས་ནི་བཅོ་བརྒྱད་ཀྱིས། །དོ་ཤལ་ཕྱེད་པ་དེ་རྣམས་ཉིད། །དབང་རྣམས་ཀྱིས་ཀྱང་བ་ཀུ་ལཱི། །དགེ་བས་ཀྲ་མ་ཤཱི་ཪྵའོ། །སྟོང་ཉིད་ལ་སོགས་རྣམ་ཐར་གྱིས། །དྲིལ་བུའི་སྒྲས་ནི་གང་བ་སྟེ། །རྫུ་འཕྲུལ་རྐང་པས་རྒྱལ་མཚན་གཏམས། །སྤོང་བས་མེ་ལོང་རབ་ཏུ་འབར། །བྱང་ཆུབ་ཡན་ལག་རྔ་ཡབ་གཡོ། །ཡན་ལག་དགུ་ཡི་ཕྲེང་བས་བརྒྱན། །བསྡུ་བ་བཞི་པོ་རྣམས་ཀྱིས་ནི། །ཟུར་དུ་སྣ་ཚོགས་རྡོ་རྗེས་བརྒྱན། །བདེན་པ་རིན་ཆེན་བཞི་རྣམས་ཀྱིས། །སྒོ་དང་སྒོ་ཁྱུད་མཚམས་སུ་སྤྲས། །མངོན་ཤེས་ལྔ་ཡིས་རྟག་ཏུ་ནི། །ཟླུམ་སྐོར་ཆེན་པོ་ལྔ་ཡིས་བསྐོར། །རྣམ་པ་ཀུན་གྱིས་བྱང་ཆུབ་སྤྲས། །རྡོ་རྗེ་ཕྲེང་བས་ལེགས་པར་བསྐོར། །བདེ་བ་གཅིག་བུའི་ལྕགས་རི་ཡིས། །དེ་བཞིན་ཡེ་ཤེས་རྡོ་རྗེ་འབར། །ཤེས་རབ་ཐབས་ཀྱི་ཆ་ཡིས་ནི། །ཟླ་བ་ཉི་མ་རྟག་ཏུ་ཤར། །ཐུགས་གསུང་སྐུ་དང་ཡང་དག་དག །ཆོས་ཀྱི་འཁོར་ལོ་བུམ་པ་ཆེ། །རྔ་བོ་ཆེ་དང་བྱང་ཆུབ་ཤིང༌། །དེ་བཞིན་
ཡིད་བཞིན་ནོར་བུ་སོགས། །འདི་དག་དཔལ་ལྡན་དུས་འཁོར་གྱི། །དཀྱིལ་འཁོར་ཆོས་ཀྱི་དབྱིངས་དང་ལྡན། །ཕུན་ཚོགས་ཀུན་བྱེད་བསྒོམས་ནས་ནི། །དེ་ནས་ཨ་སོགས་ཀ་སོགས་དགོད། །ཅེས་གསུངས་སོ། །ཐུང་ངུ་ཡོན་ཏན་ཡཎ་འཕེལ་རིང༌། །ཚེས་མཐའ་དག་ཏུ་ཨཾ་དང་ཨ། །ཨ་སོགས་གཡོན་སྐོར་ལུགས་འབྱུང་སྟེ། །ལ་སོགས་དེ་ལས་བཟློག་པའོ། །སུམ་ཅུ་རྩ་གཉིས་མཚན་རྣམས་ནི། །ཟླར་འགྱུར་ཟླ་བའི་རྒྱུ་རྣམས་སོ། །ལ་སོགས་ཝ་ཡ་ཌ་ཌྷ་རྣམས། །ཡི་གེ་རྣམ་གཉིས་རྣམ་གཉིས་བརྗོད། །ལས་ཏ་སོགས་པ་ཊ་ཙ། །ཀ་སོགས་རང་རང་གཉིས་བརྩེགས་ནས། །དེ་རྣམས་གཅིག་པ་ལུགས་བཟློག་ལས། །ད་གྷ་ག་སོགས་རིམ་པའོ། །གཡས་སྐོར་བ་དང་ཟུང་གིས་ནི། །བརྒྱད་ཅུ་ཉི་མའོ་ཉི་མའི་རྒྱུ། །གང་འདི་མེ་ལོང་སོགས་རིམ་ལས། །དབྱངས་ཡིག་དང་པོ་གསལ་བྱེད་རྗེས། །གང་འདི་སྐྱེ་བའི་རིམ་པ་ལས། །གསལ་བྱེད་དང་པོ་དབྱངས་རྗེས་སུ། །དེས་ན་ཉི་མའི་སྟེང་གི་ནི། །ཟླ་བར་ཧཱུཾ་ཡིག་དྲི་ཟ་ཉིད། །དེ་རྣམས་ཀྱང་ནི་ཧྲིཿ་རུ་འགྱུར། །དེ་ཡང་ཧཾ་གྱུར་དེས་མཚན་པའི། །ཁྱབ་བདག་ཡེ་ཤེས་ལྔ་ཡི་བདག །མཐོན་ཀ་ཆེན་པོའི་འོད་ལྟར་གསལ། །རྒྱལ་བ་ལྔ་ཡི་འོད་འཕྲོ་བ། །སྟོན་པར་སྤྲུལ་པའི་རྣལ་འབྱོར་ཅན། །དུས་ཀྱི་འཁོར་ལོར་མངོན་བརྗོད་པ། །རྡོ་རྗེའི་རྒྱན་དང་སྐུ་འོད་ཀྱིས། །མ་ལུས་ནམ་མཁའི་ཁོངས་ཁྱབ་པ། །ཡན་ལག་བཅུ་གཉིས་འགོག་བདག་ཉིད། །དུས་ཀྱི་དབུགས་འགགས་ལས་སྐྱེས་པའི། །གཙུག་རྒྱན་རྣ་ཆ་མགུལ་རྒྱན་དང༌། །ཚངས་སྐུད་ཕྱག་གདུབ་སྐེ་རགས་དང༌། །ཞབས་གདུབ་རྡོ་རྗེ་ཕྲེང་བ་དང༌། །ཐལ་བ་སྟག་ལྤགས་ན་བཟའ་དང༌། །སྣ་ཚོགས་རྡོ་རྗེ་ཟླ་ཕྱེད་དང༌། །རལ་པར་དཔལ་ལྡན་རྡོར་སེམས་འཛིན། །དཔའ་བོ་མི་རུས་རྒྱན་ལྡན་ཞིང༌། །ཐོད་ཕྲེང་དང་ནི་དར་དབྱངས་ཅན། །སྤྱན་དང་ཕྱག་དར་བཅུ་གཉིས་ཏེ། །མགྲིན་པ་གསུམ་དང་ཞལ་བཞི་པ། །ནག་པོ་མཆེ་གཙིགས་དྲག་པོ་ནི། །བྱམས་ཆེན་རང་བཞིན་ལས་འཁྲུངས་ཤིང༌། །གཡས་པ་དམར་པོ་ཕྱག་དང་བཅས། །དགའ་བ་ཆེན་བོའི་ཐུགས་ལས་འཁྲུངས། །སེར་འོད་ཏིང་འཛིན་ལ་གནས་ཞལ། །བཏང་སྙོམས་ཆེ་ལས་ཡང་དག་བྱུང༌། །གཡོན་ཞལ་དཀར་པོ་ཞི་བ་སྟེ། །སྙིང་རྗེ་ཆེན་པོ་ལས་བྱུང་བའོ། །དབུས་
དང་གཡས་དང་ཅིག་ཤོས་ནི། །སྔོ་དམར་དཀར་བའི་མགྲིན་གསུམ་ལྡན། །སྐུ་གཅིག་ཞབས་གཉིས་ཕྲག་པ་དྲུག །དམ་པའི་ཕྱག་ནི་ཉི་ཤུ་བཞི། །སུམ་བརྒྱ་དྲུག་ཅུའི་ཚིགས་ཀྱིས་ནི། །སྣ་ཚོགས་གཟུགས་དང་ལྡན་པས་མཛེས། །གཡས་པའི་ཕྲག་གསུམ་སྔོ་དམར་དཀར། །ཅིག་ཤོས་ཀྱང་ནི་དེ་བཞིན་ཏེ། །དཔུང་པ་གཉིས་གཉིས་ཅིག་ཤོས་ཀྱང༌། །སྔོ་དམར་དཀར་བའི་རྣམ་པ་གསུམ། །དེ་བཞིན་ཕྱག་ནི་བཞི་བཞི་ཡང༌། །སྔོ་དམར་དཀར་བ་རྣམ་པ་གསུམ། །དེ་བཞིན་ཕྱག་སོར་འོག་ཚིགས་ནས། །སྔོ་དང་དམར་དང་དཀར་བ་ཉིད། །སོར་མོ་ཀུན་ཀྱང་སོར་གདུབ་ཀྱིས། །མཛེས་ཤིང་ཁ་དོག་ལྔ་ལྡན་ཏེ། །མཐེ་བོང་ལ་སོགས་རིམ་པ་ཡིས། །སེར་དཀར་དམར་དང་སྔོ་དང་ལྗང༌། །ནག་པོའི་ཕྱག་བཞིར་རྡོ་རྗེ་དང༌། །རལ་གྲི་རྩེ་གསུམ་གྲི་གུག་འགྱུར། །དེ་བཞིན་དམར་པོར་མེ་མདའ་དང༌། །ལྕགས་ཀྱུ་ཅང་ཏེའུ་ཐོབ་ཉིད། །དཀར་པོ་བཞིན་ནི་འཁོར་ལོ་མཆོག ། མདུང་དང་དབྱུག་པ་དགྲ་སྟའོ། །གཡོན་གྱི་ནག་པོར་དྲིལ་བུ་མཆོག །ཕུབ་དང་ཁ་ཊྭཱཾ་ཐོད་པ་སྟེ། །དམར་པོ་བཞིར་ནི་གཞུ་དང་ཞགས། །རིན་ཆེན་དང་ནི་ཆུ་སྐྱེས་དཀར། །དམར་པོར་དཔལ་ལྡན་དུང་མེ་ལོང༌། །རྡོ་རྗེ་ལྕགས་སྒྲོག་ཚངས་པའི་མགོ །སྣ་ཚོགས་ཡུམ་གྱིས་སྐུ་ལ་འཁྱུད། །དཔལ་ལྡན་ཨོཾ་ཡིག་ལས་སྐྱེས་པའི། །པདྨར་ཟླ་ཉི་སྒྲ་གཅན་གཟུགས། །སྟེང་དུ་བདུད་དང་དབང་ལྡན་གྱི། །བྲང་གི་མཐིལ་ལ་ཉི་གཞོན་དང༌། །ཟླ་འོད་ལྟར་གསལ་ཞབས་གཉིས་པོ། །གཡས་བརྐྱང་དུ་ནི་རོལ་པས་བཞུགས། །ཞབས་གཡས་དམར་པོའི་འོག་ཏུ་ནི། །ལག་པ་བཞི་བའི་བདུད་དམར་པོ། །གདོང་གཅིག་མེ་ཏོག་མདའ་ལྔ་དང༌། །ལྕགས་ཀྱུག་ཞུ་དང་ཞགས་པ་འཛིན། །ཞབས་དཀར་འོག་ཏུ་དབང་ལྡན་ཡང༌། །དཀར་པོ་གདོང་གཅིག་མིག་གསུམ་པ། །ལག་བཞི་རྩེ་གསུམ་ཌ་མ་རུ། །ཁ་ཊྭཱཾ་ག་དང་ཐོད་པ་འཛིན། །དགའ་མ་ཨུ་མ་གདོང་དམན་ཅིང༌། །ཀུན་དུ་འཁྲུལ་པ་ཡང་དག་སྐྱེས། །སྐྲ་གྲོལ་གོས་དང་བྲལ་གྱུར་པས། །རང་གི་རྗེ་བོའི་རྐང་མཐའ་འཛིན། །གཙོ་བོའི་མགུལ་ལ་འཁྱུད་པ་ཡི། །སྣ་ཚོགས་ཡུམ་ནི་གསེར་གྱི་མདོག །གཙོ་བོའི་རྒྱབ་ཞལ་གཙོར་གྱུར་ལྟའི། །ཞལ་བཞི་དང་ནི་ཕྱག་བརྒྱད་མ། །གཡས་པར་གྲི་གུག་
ཞགས་པ་དང༌། །ཌ་མ་རུ་དང་བགྲང་ཕྲེང་སྟེ། །གཡོན་པར་ཐོད་པ་ཞགས་པ་དང༌། །ཆུ་སྐྱེས་འདབ་བརྒྱ་ནོར་བུའོ། །སྤྱན་གསལ་བཅུ་གཉིས་ཀྱིས་ཕྱུག་ཅིང༌། །རྡོ་རྗེ་སེམས་དཔའི་ཅོད་པན་ལྡན། །མི་འགྱུར་གཉིས་མེད་སྦྱོར་བ་ཡིས། །གཙོ་བོའི་བྱིན་པའི་ལྗོན་ཤིང་སྟེང༌། །རང་གི་བྱིན་པའི་འཁྲི་ཤིང་དཀྲིས། །གཡོན་བརྐྱང་བ་ཡི་ཞབས་ཀྱིས་བཞུགས། །འདབ་མ་བརྒྱད་ལ་ལྷ་མོ་བརྒྱད། །ཕྱག་བརྒྱད་སྤྱན་ནི་བཅུ་གཉིས་མ། །ནག་དམར་སེར་དན་དཀར་མོ་ནི། །འབར་བ་མཉམ་པའི་སྟབས་ཀྱིས་བཞུགས། །ཕྱོགས་བྲལ་འདབ་མར་དུ་བ་དང༌། །སྨིག་རྒྱུ་མར་མེ་མཁའ་སྣང་མ། །ཕྱག་རྒྱ་ལྔ་སོགས་རྒྱན་ཀུན་གྱིས། །གཙོ་མོ་བཞིན་དུ་བརྒྱན་བྱས་མ། །རང་རང་མངོན་ཕྱོགས་མགོན་པོའི་ཞལ། །གཙོ་བོར་གྱུར་འདྲའི་ཞལ་བཞི་ལྡན། །དེ་ཕྱིར་མགོན་པོའི་ཞལ་མདོག་གམ། །ཡང་ན་ཕྱི་རོལ་ཕྱོགས་ཀྱང་ངོ༌། །མེ་སོགས་ཕྱོགས་བྲལ་རྣམས་ཀྱང་ནི། །རིམ་པ་ཇི་བཞིན་ཤར་ཕྱོགས་བཞིན། །ལྷ་དང་སྐུ་མདོག་དག་ཀྱང་འདིར། །གཡས་སྐོར་གྱིས་ནི་བརྗོད་པ་ཉིད། །གཞན་དུ་རིམ་པ་གཞན་ཉིད་དང༌། །ཡང་ན་སྤྲོ་བའི་རིམ་པས་སོ། །ནག་པོ་འབར་མ་བདུག་སྤོས་དང༌། །ཙནྡན་ཁ་ཆེ་གླ་རྩི་ནི། །ག་པུར་བཅས་སྣོད་དྲིལ་བུ་དང༌། །ཡོངས་འདུའི་མེ་ཏོག་མེ་ཏོག་ཕྲེང༌། །དམར་པོ་འབར་མ་མར་མེ་དང༌། །དོ་ཤལ་ཅོད་པན་ལག་གདུབ་གོས། །སྐེ་རགས་རིན་ཆེན་རྣ་རྒྱན་དང༌། །སིལ་སིལ་བྱེད་པའི་རྐང་གདུབ་ལྡན། །སེར་མོ་འབར་མའི་གཡས་སུ་དུང༌། །གླིང་བུ་འོད་འཕྲོ་རིན་ཆེན་དང༌། །ཅང་ཏེའུ་གཡོན་དང་པི་ཝང་རྔ། །ཁར་བའི་རྔ་དང་ཟངས་ཀྱི་དུང༌། །དཀར་མོ་འབར་བའི་གཡས་སུ་ཡང༌། །འོ་མ་ཆུ་དང་སྨན་ཆང་སྣོད། །གཡོན་དུ་བདུད་རྩི་གྲུབ་པའི་རོ། །འབྲས་བུ་སྣ་ཚོགས་འབྲས་ཆན་སྣོད། །དུ་བ་མ་སོགས་མཚན་མ་ནི། །རང་མདོག་དང་མཚུངས་རྔ་ཡབ་བརྒྱད། །འདི་དག་ཁྲོ་མོའི་དབང་ཕྱུག་དང༌། །ལྷན་ཅིག་ཕ་རོལ་ཕྱིན་བཅུར་བཤད། །ཡིད་བཞིན་ནོར་བུ་ཆོས་གཎྜཱི། །དཔག་བསམ་ཤིང་ནི་གྲྭ་གསུམ་དུའོ། །གཙོ་བོའི་པདྨའི་ས་ལས་ཕྱིའི། །དབང་ལྡན་དུ་ནི་ཆོས་ཀྱི་དུང༌། །འདོད་ཆགས་ཆེན་པོས་འདུལ་བ་ཡི། །སྐྱེ་བོའི་འཇིག་རྟེན་དེ་གཟིགས་ནས། །ལུས་ལ་ཤིན་ཏུ་དགའ་བའི་སྒྲས། །རྒྱལ་བའི་ཚོགས་ནི་རབ་ཏུ་གཞུག །སྐྱེས་བུ་རིག་མའི་
རང་བཞིན་ལས། །ཕུང་པོ་ཁམས་སོགས་རབ་བཅུག་ནས། །མིང་དང་གཟུགས་སོགས་ངོ་བོ་ཡིས། །མི་སྣང་གྱུར་བར་རྣམ་པར་བསྒོམ། །ལྷ་ཉིད་གཟུགས་ཀྱི་སྐུ་ཡིས་ནི། །མི་སྣང་གྱུར་པར་བར་སྣང་དུ། །ཕྱུང་བས་ཇི་ལྟ་བ་བཞིན་དུ། །སྣ་ཚོགས་ཡུམ་ལ་གཞུག་པར་བྱ། །སླར་ཡང་དེ་ལས་ངེས་འཐོན་ནས། །རང་གི་ལུས་ཀྱི་ནང་དུ་ཞུགས། །རྡོ་རྗེའི་ལམ་ནས་ཕྱུང་ནས་ནི། །ཟླ་བ་ཞུ་བའི་རང་བཞིན་ལས། །ལྷ་མོའི་པདྨར་རང་རང་གི །ས་བོན་ལས་སྐྱེས་རྡོ་རྗེ་ནི། །རྟེན་དང་བརྟེན་པའི་མཚན་ཉིད་ཅན། །མི་བསྐྱོད་དཀྱིལ་འཁོར་བསམས་ཏེ་དབྱུང༌། །སྔོན་དུ་བཅོམ་ལྡན་འདས་སྐུ་ལ། །འགྲོ་ལ་ཕན་པ་ཀུན་སྒྲུབ་པ། །བདག་པོ་དེ་བཞིན་བཅུག་ནས་ནི། །དཀྱིལ་འཁོར་པ་རྣམས་ཡང་དག་སྤྲོ། །བདེ་ཆེན་སྦྱར་ལས་ཕྱི་རོལ་དུ། །རྡོ་རྗེ་ཕྲེང་བ་གཉིས་ཀྱི་བར། །རལ་གྲི་ཕྲེང་སོགས་ཀྱིས་བརྒྱན་པའི། །བརྒྱད་གཉིས་ཀ་བའི་བར་བར་དུ། །ཕྱོགས་ཀྱི་པདྨར་རྫོགས་སངས་རྒྱས། །ཀུན་ཏུ་གཟིགས་རྣམས་སྤྲོ་བར་བྱ། །ཐམས་ཅད་ཞལ་གསུམ་ཕྱག་དྲུག་པ། །རྒྱན་རྣམས་ཀུན་གྱིས་ཡང་དག་བརྒྱན། །དམ་པའི་ཕྱག་གིས་རང་ཉིད་ལ། །མངོན་ཕྱོགས་གཞན་རིགས་ཤེས་རབ་འཁྱུད། །པད་དཀར་ལ་གནས་ཉི་མ་ཡི། །དཀྱིལ་འཁོར་ལ་ནི་སྐྱིལ་ཀྲུང་བཞུགས། །རྣམ་ཤེས་ཀྱིས་མཚན་སྤྱི་བོར་ནི། །རལ་པའི་ཅོད་པན་དང་དབྱངས་ཅན། །དེར་ནི་ཤར་ཕྱོགས་ཆུ་སྐྱེས་ལས། །སེམས་ཅན་མཐའ་ཡས་དོན་བྱེད་པ། །དོན་ཡོད་གྲུབ་པ་འདི་ནི་ནག །དཀར་དང་ནག་དང་དམར་བའི་ཞལ། །དེ་རྣམས་ཡེ་ཤེས་ལྔ་རང་བཞིན། །ཕུང་སོགས་དག་པའི་མཚན་ཉིད་དོ། །སྤྱན་མ་དང་ནི་མཱ་མ་ཀཱི། །སྒྲོལ་མ་གོས་དཀར་རིམ་པ་བཞིན། །སངས་རྣམས་ཀྱི་ཤེས་རབ་འགྱུར། །མངོན་དུ་ཕྱོགས་པའི་གནས་ལས་བྱུང༌། །སྐུ་མདོག་ཕྱག་མཚན་རང་བཞིན་ཡང༌། །རང་རིག་སངས་རྒྱས་རྣམས་དང་མཚུངས། །རལ་པའི་ཅོད་པན་དབྱེ་བ་གཞན། །འདི་རྣམས་རིན་ཆེན་ཅོད་བན་ཅན། །འདི་ལྟར་ཐུགས་ཀྱི་དཀྱིལ་འཁོར་དུ། །སྐུ་མདོག་ནག་པོ་རྣམས་ཀྱི་གཡས། །རལ་གྲི་གྲི་གུག་རྩེ་གསུམ་སྟེ། །གཡོན་ན་ཕུབ་ཐོད་ཁ་ཊྭཱཾ་ག །མདོག་དམར་རྣམས་ཀྱིས་གཡས་པ་ན། །མདའ་དང་ལྕགས་ཀྱུ་ཅང་ཏེའུ། །གཡོན་པའི་ཕྱག་གི་མཐིལ་གསུམ་དུ། །གཞུ་
དང་ཞགས་པ་རིན་པོ་ཆེ། །སེར་པོ་རྣམས་ཀྱི་ཕྱག་གཡས་སུ། །འཁོར་ལོ་དབྱུག་པ་རྡོ་རྗེ་མཆོག །གཡོན་ཕྱག་གསུམ་དུ་དཔལ་གྱི་དུང༌། །ལྕགས་སྒྲོག་རྡོ་རྗེ་དྲིལ་བུའོ། །དཀར་པོ་རྣམས་ཀྱི་ཕྱག་གཡས་སུ། །ཐོ་བ་མདུང་དང་རྩེ་གསུམ་སྟེ། །གཡོན་དུ་བད་དཀར་འདབ་བརྒྱད་དང༌། །མེ་ལོང་དང་ནི་བགྲང་ཕྲེང་ངོ༌། །མེ་ཡི་མཚམས་ནས་བརྩམས་བྱས་ཏེ། །ཆུ་སྐྱེས་དམར་དང་ཟླ་དཀྱིལ་ལས། །དཔལ་ལྡན་སྒྲོལ་མ་གོས་དཀར་མོ། །སྤྱན་དང་མཱ་མ་ཀཱི་རིམ་བཞིན། །འདི་རྣམས་ཐབས་ནི་རིམ་པ་བཞིན། །མངོན་དུ་ཕྱོགས་པའི་གནས་ལས་བྱུང༌། །རྣམ་སྣང་མཛད་དང་དཔག་མེད་འོད། །ལས་ཀྱི་རྒྱལ་དང་རིན་ཆེན་འབྱུང༌། །པདྨའི་གདན་བཞུགས་ཏེ་རྣམས་ཀྱང༌། །ཁམས་སོགས་དག་པའི་མཚན་ཉིད་དོ། །སངས་རྒྱས་ལྷ་མོ་གཉིས་བར་དུ། །རེ་མིག་བརྒྱད་ལ་པད་དམར་སྟེང༌། །བདུད་རྩིས་གང་བའི་བུམ་པའམ། །ཡང་ན་པདྨའི་སྣོད་རྣམས་སོ། །ཤར་ཕྱོགས་སྒོར་ནི་ཤིན་ཏུ་སྟོབས། །རྨུགས་བྱེད་རེངས་བྱེད་ཁེངས་བྱེད་རྣམས། །ཁྲོ་མོ་གཞན་ནི་ཐོབ་པ་ལ། །དེ་བཞིན་ཁོ་ནར་རོལ་བར་མཛད། །ཕན་ཚུན་གཞན་རིགས་ལས་སྐྱེས་ཕྱིར། །ཁྲོ་བོ་དང་ནི་ཁྲོ་མོ་ཉིད། །ཁྲོ་བོའི་རྒྱལ་པོ་ཐམས་ཅད་ལ། །མངོན་དུ་ཕྱོགས་པ་ཕྱག་རྒྱར་འགྱུར། །རེངས་བྱེད་མ་དང་ཁེངས་བྱེད་མ། །ཤིན་ཏུ་སྟོབས་མ་ཞེས་བྱ་དང༌། །རྨུགས་བྱེད་མ་རྣམས་བཙུན་མོ་ཉིད། །ཆུ་སྐྱེས་དཀར་དང་སྣང་བྱེད་ལ། །གཡས་བརྐྱང་བ་ཡི་སྟབས་ཀྱིས་གནས། །མངལ་དུ་ཟླ་བ་བཞི་པ་ལ། །མིང་གཟུགས་འབྱུང་བའི་སྐད་ཅིག་གོ །འབྱུང་བ་བཞི་ལས་བྱུང་བའི་གཟུགས། །དེ་སྐྱེད་ཁྲོ་བོ་ལྷག་མ་རྣམས། །དབང་པོ་དྲུག་ནི་འབྱུང་བ་ལ། །མཁའ་ལྡིང་ལ་སོགས་ཡང་དག་སྤྲོ། །ཤར་སོགས་སྒོ་ལས་བྱུང་བ་ཡི། །གཡས་སུ་ར་བའི་རྩིག་པ་ལ། །སྣམ་བུར་དབང་པོར་ལེགས་དག་པ། །མཁའ་སྙིང་ས་ཡི་སྙིང་པོ་དང༌། །རྣམ་སེལ་འཇིག་རྟེན་མགོན་ཞེས་བྱ། །བྱང་ཆུབ་སེམས་མ་ཕྱོགས་བྲལ་དུ། །རེག་བྱ་རོ་དྲི་གཟུགས་རྡོ་རྗེ། །མ་རྣམས་ཡུལ་དག་པ་ལས་སྐྱེས། །ཤར་སོགས་སྒོ་ཡི་གཡོན་རྣམས་སུ། །ཀུན་བཟང་དང་ནི་རྡོ་རྗེ་འཛིན། །འདི་དག་འོག་དང་སྟེང་དུ་འགྱུར། །སྟེང་དང་འོག་ཏུ་འགྱུར་བ་གཞག །ཆོས་དབྱིངས་མ་དང་སྒྲ་མ་སྟེ། །དེ་དག་ཐབས་དང་ཤེས་
རབ་དག །ཡེ་ཤེས་རྣམ་ཤེས་ལས་སྐྱེས་པ། །དེ་བཞིན་སྔོན་པོ་ལྗང་གུའོ། །འདི་ཀུན་གཡས་སུ་རིམ་པ་ཡིས། །རྡོ་རྗེ་གྲི་གུག་དགྲ་སྟ་སྟེ། །གཡོན་པ་རྣམས་སུ་དྲིལ་བུ་དང༌། །ཐོད་པ་དང་ནི་ཚངས་མགོ་བཤད། །འདི་ཀུན་གཡས་དང་ཅིག་ཤོས་ཞལ། །དུས་གྱི་འཁོར་ལོ་བཞིན་ཞེས་བཤད། །སྔོན་པོ་རྣམས་ནི་ནག་པོ་བཞིན། །ལྗང་གུ་རྣམས་ཀྱི་སེར་པོ་བཞིན། །ཇི་སྐད་བཤད་པའི་གནས་ཉིད་དུ། །འདི་དག་བསྒོམ་པར་ཡང་འདོད་དོ། །སྐྱེ་བའི་གནས་ཀྱང་གཞན་དག་ཏུ། །གཞན་དུ་ཇི་ལྟར་འདོད་པ་བཞིན། །ཁ་ཁྱེར་ལ་ནི་ཤར་གཡས་དང༌། །གཡོན་དུ་དྲི་དང་ཕྲེང་བ་གཉིས། །གཤིན་རྗེར་བདུག་སྤོས་མར་མེ་མ། །ནུབ་ཏུ་སྒེག་མོ་བཞད་མ་ཉིད། །ལྷ་བཤོས་དཔལ་ལྡན་བདུད་རྩི་ཡི། །འབྲས་བུ་མ་ནི་བྱང་དུའོ། །སྟེང་དུ་སྒྲ་མ་གར་མཁན་མ། །འོག་ཏུ་གླུ་མ་འདོད་མའོ། །དེ་ཡིས་བར་བར་མཐའ་ཡས་པའི། །གཟུང་བའི་མཚན་མ་བརྗོད་བྱ་སྟེ། །དུང་ཆོས་ཕྲེང་བ་སྤོས་ཕོར་དང༌། །མར་མེ་དར་དཔྱངས་དོ་ཤལ་དང༌། །ཟན་སྣོད་བདུད་རྩིའི་འབྲས་སིལ་སྙན། །གོས་དང་རྡོ་རྗེ་མཚོ་སྐྱེས་རྣམས། །རེས་འགའ་དུ་བ་མ་ལ་སོགས། །ལྷ་མོ་བརྒྱད་དང་བུམ་པ་བརྒྱད། །ཡིད་བཞིན་ནོར་བུ་ལ་སོགས་བཞི། །དོར་ནས་ཐུགས་ཀྱི་དཀྱིལ་འཁོར་ནི། །དཔལ་ལྡན་འདུས་པ་ལྟ་བུ་ཉིད། །ལྷ་ནི་ཉི་ཤུ་རྩ་ལྔ་པ། །འདི་ཡང་རང་སེམས་ནུས་པ་དག །ཤེས་ནས་རྣལ་འབྱོར་པས་བསྒོམ་བྱ། །གང་ཚེ་སེམས་མཆོག་ལྷན་ཅིག་སྐྱེས། །རྡོ་རྗེ་སེམས་དཔའ་སྙིང་པོར་གྱུར། །དེ་ཚེ་མགོན་པོ་བཞུགས་པ་ལའང༌། །རིས་ནི་མེད་པ་ཉིད་ཀྱིས་སྐྱོན། །མེད་ཅེས་ཐུབ་པ་ཆེན་པོས་གསུངས། །ཡང་ན་དབང་གི་དོན་དུ་ཡང༌། །དཀྱིལ་འཁོར་ཕྱི་ཡི་འཁོར་ལོ་སྤངས། །འདིར་ནི་ཁྲོ་རྒྱལ་གཙུག་ཏོར་དང༌། །གནོད་མཛེས་ཀྱི་ནི་རྒྱལ་པོ་དག །སྟེང་འོག་དག་ཏུ་གནས་པའང་བྱ། །ཟླ་བ་དྲུག་གིས་མ་རིག་སོགས། །དྲུག་ནི་རེག་པའི་ཡན་ལག་པར། །བདུན་པར་ཚོར་བར་སྐྱེ་བ་ལ། །དབུ་མའི་དཀྱིལ་འཁོར་སྤྲོ་བར་བྱ། །དེ་ལ་སྤྲུལ་པའི་འཁོར་ལོར་ནི། །ཆུ་ཚོད་དྲུག་ཅུའི་རང་བཞིན་གནས། །ཤར་སོགས་ཕྱོགས་སུ་ཙ་རྩི་ཀཱ། །ལ་སོགས་རྡོ་རྗེའི་མིང་ཐོགས་ལྡན། །སྣ་ཚོགས་ཞལ་དང་རྒྱན་བཟང་ཅན། །སྤྱན་གསུམ་ལྡན་ཞིང་ཕྱག་བཞི་མ། །
དབང་པོ་ཚངས་པ་དབང་ཕྱུག་དང༌། །གླང་པོའི་གདོང་དང་ལྷ་མིན་དང༌། །ཁྱབ་འཇུག་མཐར་བྱེད་སྤེད་བྱེད་རྣམས། །གཞན་རིགས་ཐབས་ལ་འདི་དག་ནི། །ལག་པ་ཡིས་ནི་ཀུན་དུ་འཁྱུད། །ཡི་དགས་དམར་དང་མཁའ་འགྲོའི་དབང༌། །མ་ཧེ་ལྟོས་འགྲོ་ཟ་བ་དང༌། །གླང་པོ་དང་པ་ཁྱུ་མཆོག་དང། །སེང་གེའི་རྒྱབ་ཏུ་པདྨ་བརྒྱད། །རང་རང་ཕྱོགས་སུ་ངེས་གསལ་བ། །ཕྱོགས་དང་ཕྱོགས་བྲལ་དམར་དང་དཀར། །པདྨའི་ལྟེ་བར་ཟླ་ཉི་བྲལ། །ས་གའི་སྟབས་ཀྱིས་གནས་པ་ལ། །ཁ་དོག་མཚུངས་པའི་མཚན་ཉིད་ཅན། །ལྷ་མོའི་ཚོགས་རྣམས་བརྒྱད་བརྒྱད་ཀྱི། །འདབ་མར་རོལ་པའི་སྟབས་ཀྱིས་བསྐོར། །ཙ་རྩི་ཀཱ་ནི་གྲི་གུག་དང༌། །མདུང་དང་ཐོད་པ་ཁ་ཊྭཱཾ་འཛིན། །ཁྱབ་འཇུག་མ་ནི་འཁོར་ལོ་དང༌། །དབྱུག་པ་པདྨ་དུང་གིས་མཚན། །ཕག་མོའི་མཚོན་ཆ་དབྱུག་པ་མཆོག །རལ་གྲི་དང་ནི་ལྕགས་སྒྲོག་ཕུབ། །གཞོན་ནུ་མ་ནི་ལྷ་རྫས་མདུང༌། །ལྕགས་ཀྱུ་ཞགས་པ་ནོར་བུས་མཚན། །རྡོ་རྗེ་དབང་མོ་རྡོ་རྗེ་དང༌། །མདའ་དང་དྲིལ་བུ་གཞུ་འཛིན་འགྱུར། །ཚངས་མ་ལག་པར་ཆུ་སྐྱེས་དང༌། །ཚངས་དབྱུག་སྤྱི་བླུགས་ལྷུང་བཟེད་འཛིན། །དྲག་མོ་རྩེ་གསུམ་ཊ་མ་རུ། །ཁ་ཊྭཱཾ་ག་དང་སྤྲུལ་གྱིས་མཚན། །དཔལ་ཆེན་མོ་ནི་པདྨ་དང༌། །བགྲང་ཕྲེང་ཆུ་སྐྱེས་རིན་ཆེན་མཚན། །དེ་ནས་དེ་འདབ་ལྷ་མོ་ཡི། །མིང་གི་ཕྲེང་བ་བཤད་པར་བྱ། །འཇིགས་མ་དྲག་མོ་དུས་ཀྱི་ནི། །མཆེ་བ་མ་དང་མེ་འབར་གདོང༌། །རླུང་གི་ཤུགས་མ་རབ་གཏུམ་མ། །སྤྱན་དྲངས་མ་དང་སྣ་ཆེན་མའོ། །གཙོ་བོ་ཁྱབ་འཇུག་མའི་འདབ་མར། །དཔལ་མོ་སྒྱུ་མ་དྲག་མ་དང༌། །བཀྲ་ཤིས་མ་དང་རྣམ་རྒྱལ་མ། །དཔལ་རྒྱལ་དཔལ་རྒྱལ་བྱེད་མ་དང༌། །དཔལ་ལྡན་འཁོར་ལོ་ཅན་མའོ། །ཕག་མོའི་འདབ་མར་ཀེང་རུས་མ། །དུས་མཚན་མ་དང་ཁྲོས་མ་དང༌། །དུས་ཀྱི་ལྕེ་མ་གཙིགས་མ་དང༌། །ནག་མོ་དྲག་མོ་གཟུགས་ངན་མའོ། །པདྨ་ལུས་མེད་གཞོན་ནུ་མ། །རི་དགས་བདག་པོས་འགྲོ་མ་དང༌། །རིན་ཆེན་ཕྲེང་མ་མིག་བཟང་མ། །རུས་མ་བརྒྱད་པ་བཟང་མོའོ། །རྡོ་རྗེ་འོད་དང་རྡོ་རྗེ་ལུས། །གསེར་ལྡན་མ་དང་ཨུ་རྦ་སྟེ། །བཀྲ་བའི་རི་མོ་རབ་འབར་གྲགས། །ཟུག་རྔུ་མེད་མ་ལེགས་སྒྲོལ་མའོ། །རིག་བྱེད་འདོན་མ་པདྨའི་མིག །ཆུ་སྐྱེས་ལྡན་མ་བློ་མ་དང༌། །ངག་གི་དབང་ཕྱུག་གླུ་
མ་དང༌། །དེ་བཞིན་གློག་མ་དྲན་མའོ། །གང་དུ་དྲག་མོ་གཙོར་གྱུར་དེར། །དཀར་མོ་གངྒཱ་རྟག་མ་དང༌། །མྱུར་མ་དང་ནི་འདེགས་མ་དང༌། །མཚོན་བྱེད་དམར་སེར་ནག་མའོ། །དཔལ་ལྡན་དཀར་མོ་ཟླ་རིས་མ། །ཟླ་ཞལ་མ་དང་དང་པའི་མདོག །འཛིན་མ་པདྨའི་དབང་མོ་དང། །སྐར་མིག་དྲི་མེད་རི་བོང་འཛིན། །སུམ་ཅུ་རྩ་དྲུག་གྲངས་མཉམ་པའི། །འདོད་དང་ཕྱིར་འདོད་ལྷ་མོ་རྣམས། །གསུང་སྐུའི་དཀྱིལ་འཁོར་ཁ་ཁྱེར་ལ། །ཞལ་གཅིག་རང་རང་ཕྱོགས་གསལ་བྱེད། །ཕྱོགས་ཆ་རེ་རེ་རྣམ་པ་དགུ། །རོལ་པའི་སྟབས་ཀྱིས་ལེགས་པར་བཞུགས། །ཤར་དུ་རལ་གྲི་ཕུབ་འཛིན་ཏེ། །གཤིན་རྗེར་མདའ་དང་གཞུ་འཛིན་རྣམས། །ཀླུར་ནི་འཁོར་ལོ་དུང་འཛིན་ཏེ། །ནོར་སྦྱིན་ཐོབ་ཆུ་སྐྱེས་འཛིན། །སྟེང་དང་འོག་གི་རིགས་གཉིས་ནི། །ལག་ན་གྲི་གུག་ཐོད་པ་འདོད། །གསོད་དང་བསྐྱེད་པར་འདོད་མ་ནི། །རྟ་བབས་རྩ་བའམ་སྟེང་འོག་ཏུའོ། །འདི་རྣམས་གང་གིས་བསྐྱེད་པ་ནི། །རྒྱས་པར་དོགས་པས་མ་བཤད་དོ། །ཟླ་བ་བརྒྱད་པ་སྲེག་པ་ཡི། །ཡན་ལག་སྐུ་ཡི་དཀྱིལ་འཁོར་སྤྲོ། །ལས་དང་བྱ་བའི་འཁོར་ལོ་ཡི། །རྩ་རྣམས་རྣམ་པར་དག་པ་དང༌། །ནག་སོགས་ཟླ་བ་དག་པ་ལས། །དེར་ནི་ལྷ་རྣམས་བཅུ་གཉིས་འགྱུར། །རྡོ་རྗེ་དང་པོའི་མིང་ལྡན་པ། །སྔར་བཞིན་ཡང་དག་ཡེ་ཤེས་སྦྱོང༌། །ཤར་སྒོའི་གཡས་ནས་བརྩམས་བྱས་ཏེ། །དེ་རྣམས་མཁའ་སྙིང་ལ་སོགས་བཞིན། །སྒྲ་དང་སྒོ་ཡི་ངོས་རྣམས་སུའོ། །སྒོ་རྣམས་སུ་ནི་རང་རང་གི །བཞོན་པའི་རྒྱབ་གནས་སྒོ་སྐྱོད་རྣམས། །ཕྱོགས་དང་ཕྱོགས་བྲལ་དམར་དང་དཀར། །གེ་སར་ཟེ་འབྲུ་འོད་འཕྲོ་བ། །ཟླ་ཉི་བྲལ་བའི་འདམ་སྐྱེས་ལ། །རྡོ་རྗེའི་གདན་བཞུགས་རང་ཕྱོགས་མདོག །གཉིས་མེད་ཤེས་རབ་ལ་མངོན་ཕྱོགས། །འདབ་མ་ཉི་ཤུ་རྩ་བརྒྱད་ལ། །རོལ་པའི་རྐང་སྟབས་ཀྱིས་གནས་པ། །ཀུན་ཀྱང་ཕྱག་བཞི་ཁ་དོག་དང༌། །མཚན་མ་མཚུངས་པའི་ལྷ་མོས་བསྐོར། །ཡི་དགས་དམར་པོ་བདེན་བྲལ་ནག །རལ་གྲི་གྲི་གུག་ཕུབ་ཐོད་འཛིན། །རི་དགས་ལ་ནི་རླུང་གི་ལྷ། །ལྗོན་ཤིང་དབང་པོའི་མེ་ཏོག་དང༌། །ཨིནྡྲ་ནཱི་ལ་ཨུཏྤལ་དམར། །མ་ཧེའི་པདྨར་གཤིན་རྗེ་དབྱུག །རལ་གྲི་ལྕགས་སྒྲོག་ཞགས་པ་འཛིན། །ར་ཡི་པདྨར་མེ་ལྷ་མདུང༌། །དབྱུག་པ་པདྨ་ཆུ་སྐྱེས་འཛིན། །
གདོང་དྲུག་ཤཀྟི་མདུང་རིན་ཆེན། །མེ་ལོང་ལྡན་པར་རྨ་བྱར་གནས། །གླང་པོའི་པདྨར་གནོད་སྦྱིན་ནི། །རིན་པོ་ཆེ་དང་བེ་ཅོན་དང༌། །ནེའུ་ལེ་དང་དུང་རྣམས་འཛིན། །དབང་པོ་ས་སྲུང་བུ་ལ་གནས། །རྡོ་རྗེ་དྲིལ་བུ་མདའ་གཞུ་འཛིན། །དང་པའི་པདྨར་ཚངས་པ་ཁབ། །བགྲང་ཕྲེང་ཆུ་སྐྱེས་སྤྱི་བླུགས་ཅན། །གླང་གི་པདྨར་དྲག་པོ་ནི། །མདུང་དང་མདའ་དང་སྦྲུལ་གཞུ་འཛིན། །ཆུ་སྲིན་པདྨར་རྒྱ་མཚོ་ནི། །ཞགས་པ་རིན་ཆེན་ངོས་གཉིས་ལྡན། །བྱི་བའི་པདྨར་ཚོགས་བདག་ནི། །དགྲ་སྟ་མཆོག་གི་རྡོ་རྗེ་དང༌། །ཞགས་པ་དང་ནི་རིན་ཆེན་ལྡན། །མཁའ་འགྲོ་དབང་པོ་ལ་གནས་པའི། །ཁྱབ་འཇུག་འཁོར་ལོ་བེ་ཅོན་དང༌། །ཆུ་སྐྱེས་སྐྱེ་བ་ལྔ་དུང་འཛིན། །མཆོག་སྡེའི་དོན་དང་རྗེས་མཐུན་པར། །འདི་རྣམས་ཕྱག་རྒྱ་འབྱུང་འགྱུར་བ། །སྲིན་མོ་དང་ནི་རབ་གཏུམ་མ། །གཤིན་རྗེ་མ་དང་ཆུ་ལྷ་མོ། །དཔལ་ཆེན་ནོར་དབང་རླུང་ལྷ་མོ། །གློག་མ་དཀར་མོ་ཕག་མོ་དང༌། །གཞོན་ནུ་མ་དང་དཔལ་མོ་རྣམས། །དཀྱིལ་འཁོར་པདྨར་བསྟན་པ་བཞིན། །ཁྱབ་འཇུག་དང་ནི་མཐར་བྱེད་དང༌། །འཕྲོག་བྱེད་དང་ནི་ནོར་དབང་དག །རིམ་བཞིན་ལྗང་དང་སྔོན་པོའོ། །སྟེང་དང་འོག་གི་རིགས་ཉིད་ཀྱིས། །དེར་མ་ཡང་ན་འདོད་པས་བརྗོད། །མ་བཤང་ཕྱག་རྒྱའི་གཟུགས་རྣམས་ཀྱང༌། །ཇི་སྐད་བཤད་པའི་མིང་ཉིད་ཀྱིས། །མངོན་ཕྱོགས་ཕྱག་རྒྱ་རྣམས་ཀྱི་ཡང༌། །མཚོན་ཆ་གཞན་རིགས་ཉིད་དུ་འདོད། །འདབ་མའི་ལྷ་མོ་དེ་རྣམས་ཀྱིས། །མིང་ནི་ས་བོན་མཐའ་རྡོ་རྗེ། །བཞི་བརྒྱད་མི་གདགས་འདབ་མར་ནི། །འཆད་འགྱུར་རྣམས་ལ་བརྗོད་པར་བྱ། །ལག་པ་རྐང་པའི་མཐིལ་གཙུག་ཏོར། །བཤང་ལམ་རྩ་ཡི་རང་བཞིན་ལས། །དྲུག་དྲུག་སྒོ་བའི་ཁྲོ་བོ་དང༌། །དེ་ཡི་ལྷ་མོ་ཡང་དག་སྤྲོ། །ལྷ་བདག་ཕྱོགས་སུ་དབྱུག་སྔོན་ཅན། །རལ་གྲི་རྡོ་རྗེ་ཕུབ་སྤྲུལ་ལྡན། །གཤིན་རྗེའི་ཕྱོགས་སུ་འདོད་པའི་རྒྱལ། །མདའ་དང་ལྕགས་ཀྱུ་གཞུ་ཞགས་ལྡན། །སྟོབས་ཆེན་འཁོར་ལོ་དབྱུག་པ་དུང༌། །རིན་ཆེན་ལྡན་པ་ཆུ་བདག་ཏུའོ། །མི་གཡོ་ཐོ་བ་མདུང་པདྨ། །མེ་ལོང་ལྡན་པ་ནོར་སྦྱིན་དུ། །གཙུག་ཏོར་ཅན་ནི་དགྲ་སྟ་དང༌། །རྩེ་གསུམ་སྦྲུལ་ཞགས་ཁ་ཊྭཱཾ་ལྡན། །གནོད་མཛེས་ཕྱག་བཞི་གྲི་གུག་དང༌། །རྡོ་རྗེ་ཐོད་པ་དྲིལ་བུ་ལྡན། །འདི་དག་གཡས་བརྐྱང་སྟབས་
ཀྱིས་ནི། །རང་རང་ཤེས་རབ་ཤིང་རྟར་གནས། །ཕག་རྟ་གླང་པོ་གདོང་ལྔ་པ། །བདུན་གྱི་གྲངས་དང་ལྡན་པས་དྲངས། །ཕྱོགས་ཀྱི་མདོག་དང་ལྷན་ཅིག་པ། །སྟེང་དང་འོག་གི་ཤིང་རྟ་ཡང༌། །ལྗང་གུ་དང་ནི་སྔོན་པོ་སྟེ། །གྲངས་བདུན་མཁའ་ལྡིང་ཨ་ནི་ལ། །སེང་གེ་རྐང་པ་བརྒྱད་པས་དྲངས། དེ་རྣམས་ཀྱི་ནི་ཤེས་རབ་ཀྱང༌། །འོད་ཟེར་ཅན་དང་སྐུལ་བྱེད་མ། །དཔལ་ལྡན་རྡོ་རྗེ་ལུ་གུ་རྒྱུད། །ཁྲོ་གཉེར་ཅན་དང་ཤིན་ཏུ་སྔོ། །དྲག་ཅན་མ་རྣམས་གཞན་གྱི་རིགས། །ཟླ་བ་དགུ་པར་ལེན་པ་ལ། །སོར་མོ་ཉི་ཤུའི་རྩ་རྣམས་ནི། །རྣམ་དག་ཀླུ་དབང་བཅུ་རྣམས་དང༌། །རབ་གཏུམ་མ་རྣམས་ཡང་དག་སྤྲོ། །རྟ་བབས་ཀ་བའི་རྩ་རྣམས་སུ། །རེ་མིག་ཟུང་བཞིར་ཀླུ་རྣམས་ཏེ། །རླུང་མེ་ས་ཆུར་བུམ་པ་དང༌། །རྡོ་རྗེ་པདྨ་རིན་ཆེན་ལྡན། །ཤར་དུ་པདྨ་སྟོབས་རྒྱུ་དག །གཤིན་རྗེར་ནོར་རྒྱས་དུང་སྐྱོང་དག །ནུབ་ཏུ་འཇོག་པོ་པད་ཆེན་ཏེ། །བྱང་དུ་རིགས་ལྡན་མཐའ་ཡས་སོ། །ཀླུ་དབང་རྒྱལ་བ་རྣམ་རྒྱལ་ཞེས། །འདི་དག་མཁའ་དང་ས་འོག་ཏུ། །མཁའ་དང་ཡེ་ཤེས་དཀྱིལ་འཁོར་ལ། །རྣལ་འབྱོར་དབང་པོས་བསྒོམ་པར་བྱ། །མགོ་བོ་རྣམས་ནི་གདེངས་ཀས་བཀབ། །རང་རང་ཕྱོགས་ཀྱི་མདོག་དང་ལྡན། །རྒྱན་རྣམས་ཀུན་གྱིས་བརྒྱན་པ་སྟེ། །ཐམས་ཅད་རྡོ་རྗེའི་གདན་གྱིས་གནས། །དམ་པའི་བདེ་སླད་ཁྱི་གདོང་མ། །ལ་སོགས་རབ་གཏུམ་ཕྱག་རྒྱར་འགྱུར། །པདྨ་ལ་སོགས་འདི་རྣམས་ཀྱང༌། །ཐབས་ཀྱི་ཚུལ་ནི་ཇི་ལྟ་བར། །ཞལ་གཅིག་ཕྱག་གཉིས་ཕྱག་རྒྱལ་ལྔ། །ལྡན་ཞིང་མི་མགོའི་ཕྲེང་བ་ཅན། །ལུས་ལ་མི་རུས་ཕྲེང་བ་དང༌། །ཐོད་པའི་ཕྲེང་བ་དར་དབྱངས་ལྡན། །གོས་དང་ལྡན་ཞིང་སྐྲ་གྲོལ་མ། །གྲི་གུག་དང་ནི་ཐོད་པ་འཛིན། །རང་གི་བཞོན་པའི་སྟེང་རྣམས་སུ། །འཁོར་ལོར་ཟླུམ་པོའི་སྟབས་ཀྱིས་གནས། །མེ་རླུང་འཁོར་ཡུག་བར་གྱི་ནི། །དུར་ཁྲོད་དུ་ནི་བཞོན་པ་རྣམས། །ཤར་དུ་བསེ་དང་མ་མཚམས་སུ། །བྷེ་རུཎྜ་དང་ལྷོ་རུ་དོམ། །བདེན་བྲལ་ཁྲུང་ཁྲུང་ནུབ་ཕྱོགས་སུ། །སེང་གེ་རླུང་དུ་མིག་སྔོན་པོ། །ནོར་བདག་ཕྱོགས་སུ་འབྲི་དང་ནི། །དབང་ལྡན་དུ་ནི་བཤང་ལམ་གདོང༌། །མདུང་གིས་འབིགས་པར་ཁྱི་གདོང་མ། །ལྷག་མ་ཟ་བར་ཁྲ་གདོང་མ། །རོ་བསྲེགས་པར་ནི་ཕག་གདོང་མ། །དྲག་པོའི་གཡུལ་དུ་བྱ་རྒོད་གདོང༌། །
ཅེ་སྦྱང་གདོང་མ་རྣག་གི་དྲིར། །སྦྲུལ་གྱིས་ཟོས་པར་མཁའ་ལྡིང་གདོང༌། །རུས་པ་བཅས་པར་སྟག་གདོང་མ། །བྱིས་པ་ཤི་བར་ལུག་གདོང་མ། །སྔོན་མོ་རྡོ་རྗེ་མིག་མ་དག །ཀུན་གྱི་སྟེང་གི་ནམ་མཁའ་དང༌། །ཀུན་གྱི་འོག་གི་ས་འོག་ཏུ། །ཨ་ནི་ལ་དང་རྐང་བརྒྱད་པའི། །ཤིང་རྟར་གནས་པ་བསྒོམ་པར་བྱ། །ཀུན་ནས་རླུང་གི་ཁོར་ཡུག་མཐར། །ཞལ་མདོག་མཚོན་ཆ་སྣ་ཚོགས་པའི། །འབྱུང་པོ་བྱེ་བ་ཕྱེད་དང་བཞིའི། །ཚོགས་རྣམས་སྒྲུབ་པ་པོ་ཡིས་བསྒོམ། །དེ་ལྟར་དཔལ་ལྡན་དུས་འཁོར་ཞེས། །བསམས་ནས་དཀྱིལ་འཁོར་གསུམ་ནང་དུ། །འགྲོ་དྲུག་གནས་པའི་སེམས་ཅན་རྣམས། །གསང་མཆོག་དཀྱིལ་འཁོར་དུ་བཀུག་ནས། །རྣམ་པར་སྣང་མཛད་སོགས་སངས་རྒྱས། །ཁམས་དང་བཅས་པ་སྙིང་གར་གཞུག །བྱང་ཆུབ་སེམས་སུ་ཞུ་གྱུར་པ། །རྡོ་རྗེ་ནས་ནི་ཡང་དག་སྤྲོ། །བྱང་ཆུབ་སེམས་དེས་དབང་བསྐུར་བར། །བསམས་ཏེ་རེག་པའི་སྐད་ཅིག་དེར། །ཞུ་བའི་ས་བོན་སོགས་ངོ་བོས། །ཞལ་མདོག་མཚོན་ཆ་སྣ་ཚོགས་པ། །ལྷ་ཡི་གཟུགས་ཀྱི་སྐུ་ཡིས་ནི། །ཤེས་རབ་ཐབས་ཀྱི་བདག་ཉིད་ཅན། །དགའ་ཆེན་བདེ་བས་གང་གྱུར་པ། །རང་ལུས་དཀྱིལ་འཁོར་བདག་ཉིད་གྱུར། །གང་ཕྱིར་གསལ་བྱེད་སྣ་ཚོགས་པ། །ས་བོན་དབྱངས་དང་ལྡན་རྣམས་ཏེ། །གསལ་བྱེད་མ་ལུས་བདག་ཉིད་ཅན། །སོ་སོར་བསྡུ་བའི་ཚུལ་ལས་ཀྵ། །སུམ་ཅུ་རྩ་གཉིས་དབྱངས་ལྡན་པ། །དེ་ནི་ས་བོན་རྣམས་སུ་འགྱུར། །ཀྵ་ཀྵི་ཀྵྼྀ་ཀྵུ་ཀྵླྀ། ཀྵཱ་ཀྵཱི་ཀྵྼཱྀ་ཀྵཱུ་ཀྵླཱྀ། ཀྵ་ཀྵེ་ཀྵ་ར་ཀྵོ་ཀྵ་ལ་ཀྵཾ། ཀྵཱ་ཀྵཻ་ཀྵ་ར་ཀྵཽ་ཀྵཱ་ལ་ཀྵཱ། ཀྵྷ་ཀྵྱ་ཀྵྼ་ཀྵྺ་ཀྵླ། ཀྵྷཱ་ཀྵྱཱ་ཀྵྼཱ་ཀྵྺཱ་ཀྵླཱ། ཕུང་པོ་ཁམས་དབང་ཡུལ་རྣམས་དང༌། །ལས་དབང་དང་ནི་བྱ་བ་རྣམས། །སུམ་ཅུ་རྩ་གཉིས་མཚན་དུ་གྱུར། །རྩ་བའི་རྒྱུད་ལས་ཇི་སྐད་དུ། །སངས་རྒྱས་ཞིང་ན་སེམས་ཅན་གང༌། །སྐུ་གསུམ་དམ་ཚིག་བདུད་རྩི་ཡིས། །བསྐྱེད་ཅིང་རྡོ་རྗེའི་དཔལ་གྱིས་རེག །ཐམས་ཅད་དེར་ནི་དེ་བཞིན་གཤེགས། །རྡོ་རྗེ་གསུམ་གྱི་ཡེ་ཤེས་འཐོབ། །འདིར་ནི་རྫོགས་པའི་སངས་རྒྱས་གྱུར། །བསྒོམས་ཏེ་དེ་ནས་དེ་དག་རྣམས། །རང་རང་ཞིང་དུ་རབ་ཏུ་གཞུག །ཅེས་གསུངས་སོ། །སྲིད་པའི་ཡན་ལག་སྲོག་སྤྲོ་བ། །རྡོ་རྗེའི་གསུང་བསྐྱེད་བཙའ་བ་བརྗོད། །གཙུག་ཏོར་དང་ནི་ལྟེ་བ་ཧོཿ། །དཔྲལ་མགྲིན་སྙིང་གར་ཨོཾ་ཨཱཿ་ཧཱུཾ། །
ལྟེ་བའི་ཧོཿ་ཡིག་འོད་རྣམས་ཀྱིས། །དཔལ་ལྡན་བདེ་ཆེན་པདྨ་རུ། །ཤེས་རབ་དང་བཅས་རྡོ་རྗེ་ཅན། །ཤེས་རབ་ཆགས་པས་ཁུ་བར་ཞུ། །དེ་མཐོང་ཡིད་མི་བདེ་བ་ཡིས། །སྒྲོལ་མ་ལ་སོགས་ཤས་ཆེར་བརྩོན། །བྱམས་སོགས་མཆོག་གི་རང་བཞིན་ཅན། །འགྲོ་བའི་དོན་ལ་རབ་འཇུག་ཕྱིར། །སྙན་པའི་དབྱངས་ཀྱིས་སྟོད་བྱེད་ཅིང༌། །སྟོན་པ་ལ་ནི་གླུ་དག་མཛད། །སྤྱན་མ་བདག་ནི་འགྲོ་བའི་ཡུམ། །རྣལ་འབྱོར་པ་ཡི་རྒྱུ་མཐུན་གནས། །བདག་གི་དཀྱིལ་འཁོར་རང་བཞིན་གྱིས། །དུས་འཁོར་བཞེངས་ལ་བདག་འདོད་མཛོད། །མཱ་མ་ཀཱི་བདག་སྲིང་མོ་སྟེ། །རྣལ་འབྱོར་བ་ཡི་རྣམ་སྨིན་གནས། །བདག་གི་དཀྱིལ་འཁོར་རང་བཞིན་གྱིས། །དུས་འཁོར་བཞེངས་ལ་བདག་འདོད་མཛོད། །གོས་དཀར་མོ་བདག་བུ་མོ་ཀྱེ། །རྣལ་འབྱོར་པ་ཡི་སྐྱེས་བུར་གནས། །བདག་གི་དཀྱིལ་འཁོར་རང་བཞིན་གྱིས། །དུས་འཁོར་བཞེངས་ལ་བདག་འདོད་མཛོད། །སྒྲོལ་མ་བདག་ནི་ཚ་མོ་སྟེ། །རྣལ་འབྱོར་པ་ཡི་དྲི་བྲལ་གནས། །བདག་གི་དཀྱིལ་འཁོར་རང་བཞིན་གྱིས། །དུས་འཁོར་བཞེངས་ལ་བདག་འདོད་མཛོད། །སྟོང་པའི་དཀྱིལ་འཁོར་ཉམས་མྱོང་ནས། །འགྲོ་བ་གདོན་པའི་བསམ་པ་ཡིས། །སྐུ་གསུང་ཐུགས་ཀྱི་དཀྱིལ་འཁོར་ནི། །འགྲོ་བའི་མགོན་པོས་སྤྲོ་བར་མཛོད། །ཅེས་སོ། །སྒྲོལ་མ་བྱམས་པའི་རང་བཞིན་ཏེ། །མཱ་མ་ཀཱི་ནི་བརྩེ་བའི་སྐུ། །གོས་དཀར་དགའ་བའི་རང་བཞིན་ཏེ། །སྤྱན་མ་བཏང་སྙོམས་སྐུ་ཅན་ནོ། །རྡོ་རྗེ་དབྱིངས་ཀྱི་དབང་ཕྱུག་མ། །ཐམས་ཅད་ལ་ནི་ཁྱབ་བདག་ཉིད། །རིམ་པས་སྤྱན་མ་ལ་སོགས་གླུ། །རྒྱུ་མཐུན་འབྲས་སོགས་རིམ་པ་སྟེ། །ཐུགས་སྐུ་གསུང་དང་ཡེ་ཤེས་བདག །རྡོ་རྗེ་གླུ་ཡིས་བསྐུལ་གྱུར་པ། །དེ་གསན་ནས་ནི་སྲིད་པ་གསུམ། །མིག་འཕྲུལ་ལྟ་བུར་གཟིགས་གྱུར་ནས། །སྔར་བཞིན་ས་བོན་སོགས་ངོ་བོས། །ཁྱབ་བདག་རྫོགས་པར་བསྡོམ་བྱ་སྟེ། །དཀྱིལ་འཁོར་སྤྲོ་བའང་དེ་བཞིན་ནོ། །ཟླ་བ་བཅུ་བར་མངའ་བཅས་པ། །རྣམ་ལྔ་མངོན་པར་རྫོགས་བྱང་ཆུབ། །སྐུ་བསྐྱེད་པ་ཡི་མཚན་ཉིད་ཅན། །བསྙེན་པའི་ཡན་ལག་དང་པོ་འདི། །ཕྱིས་ཀྱང་དེ་ལྟར་བསྒོམ་པར་བྱ། །ཨོཾ་སུ་བི་ཤུདྡྷ་དྷརྨ་དྷཱ་ཏུ་སྭ་བྷཱ་ཝཏྨ་ཀོ྅ཧཾ། བསྙེན་པའི་ཡན་ལག་གཉིས་པ་ནི། །གསུང་བསྐྱེད་པ་ཡི་རྒྱུ་ལས་འགྱུར། །ཧོ་ཡིག་གཉིས་ཀྱི་བར་གནས་པའི། །ཡི་གེ་སུཾ་ནི་སྔར་བཞིན་དགོད། །སྐུ་གསུང་ཐུགས་ལས་ཡང་དག་བྱུང༌། །ཟླ་ཉི་སྒྲ་
གཅན་མཚན་ཉིད་ཅན། །འོག་དང་སྟེང་དུ་དུས་ཀྱི་མེ། །དེ་ནི་ཤེས་རབ་གསུམ་པོའོ། །དེ་ཡི་འོད་ཀྱིས་བདག་ཉིད་ནི། །ཟླ་བ་བཞིན་དུ་ཞུ་བར་བལྟ། །མཐོང་ནས་འདིར་ཡང་བསྐུལ་བ་དང༌། །ཆོ་ག་ཐམས་ཅད་སྔར་བཞིན་དུ། །གཅིག་ནི་སྲོག་འབྱུང་ཆེད་དུ་སྟེ། །གཞན་ནི་བརྒྱད་གཉིས་ལོ་ཡི་མཐར། །བདེ་བར་སྐྱེད་པའི་ཆེད་དུའོ། །མངལ་སྐྱེས་རྣམས་ཀྱི་སྲོག་རླུང་དང༌། །ཁམས་རྣམས་ཇི་བཞིན་བསྐྱེད་པ་དང༌། །རྣམ་ཤེས་རབ་ཏུ་སད་བྱེད་པ། །དེ་བཞིན་སྤྱན་མ་ལ་སོགས་རྣམས། །ཡེ་ཤེས་རྡོ་རྗེའི་དཀྱིལ་འཁོར་དུ། །དུང་ཅན་མ་ལ་བརྟེན་པའི་སེམས། །དཀྱིལ་འཁོར་ལྔ་ནི་འབབ་དོན་དང༌། །འགྲོ་བའི་དོན་ཕྱིར་རྡོ་རྗེ་ཅན། །གླུ་གསན་རྡོ་རྗེ་ཆེ་ལྡན་པ། །ཁུ་བའི་གཟུགས་ནི་དོར་ནས་ཀྱང༌། །སྟེང་པའི་དཀྱིལ་འཁོར་འབབ་པ་ཡི། །རྡོ་རྗེ་དབྱིངས་ཀྱི་དབང་ཕྱུག་མས། །འཁྱུད་ཙམ་ཉིད་ཀྱིས་གཞོན་དུ་ནི། །སྣ་ཚོགས་ཡུམ་དང་ལྷན་ཅིག་བཞེངས། །བྱིས་པ་རྣམས་ལ་སྲོག་ལ་སོགས། །རླུང་བཅུ་ངེས་པར་འབབ་པ་སྟེ། །འདི་ནི་དམ་ཚིག་དཀྱིལ་འཁོར་དུ། །སྐུ་རྫོགས་པ་ཡི་མཚན་ཉིད་ཅན། །འདི་དེ་དཀྱིལ་འཁོར་རྒྱལ་པོ་ནི། །མཆོག་གི་ཏིང་ངེ་འཛིན་ཞེས་བྱ། །ཉེ་བར་བསྒྲུབ་པའི་ཡན་ལག་ཀྱང༌། །ཡེ་ཤེས་སེམས་དཔའ་གཞུག་པ་སྟེ། །བྱིས་པའི་ཡུལ་དང་དབང་པོ་དག །ཡང་དག་སད་པའི་དབྱེ་བ་ལས། །གསུང་ནི་མངོན་དུ་རྫོགས་གྱུར་པ། །རྣམ་པ་ཉི་ཤུས་རྫོགས་བྱང་ཆུབ། །བསྐྱེད་རིམ་རྣམ་གཉིས་ཤེས་བྱ་སྟེ། །སྒོང་སྐྱེས་དང་ནི་མངལ་ནས་སྐྱེས། །དེ་ནི་འཇིག་རྟེན་ཁམས་བསྐྱེད་དང༌། །མི་རྣམས་བསྐྱེད་པ་ཉིད་ཀྱང་ངོ༌། །སྐད་ཅིག་གིས་ནི་བསྐྱེད་པ་གང༌། །དེ་ནི་རྫུས་ཏེ་སྐྱེ་བར་འགྱུར། །རྒྱལ་བས་སེམས་ཅན་བསམ་དབང་ལས། །དེ་ཡང་བསྐྱེད་པའི་རིམ་པར་གསུངས། །གང་དུ་བསྐྱེད་པའི་རིམ་པ་དེའི། །རྟོག་པའི་དྲ་བ་སྤངས་པ་ནི། །ནམ་མཁའ་ལས་བྱུང་རང་བྱུང་བ། །ཞེས་སོགས་རྣམས་ཀྱིས་རབ་ཏུ་བརྗོད། །བྱིས་པ་བཙས་པའི་སྲོག་གང་དག །དབུ་མ་ཨ་བ་དྷཱུ་ཏཱིར་གནས། །དེ་ལས་བྱུང་ནས་དབང་པོ་དྲུག །རྣམ་ཤེས་ཡུལ་རྣམས་དང་ལྷན་ཅིག །རབ་འཇུག་དེས་ན་འོད་སྔོན་པོ། །རྡོ་རྗེ་ཤུགས་ནི་མཁས་པས་སྤྲོ། །རྐང་པ་བརྒྱད་པའི་ཤིང་རྟ་ཞོན། །ཧཱུཾ་ཡིག་རྡོ་རྗེ་ལས་བྱུང་བ། །འོད་ཟེར་རྣོན་པོས་ནམ་མཁའ་ཁྱབ། །སྲུང་འཁོར་ལས་བསྲུངས་མཚན་
ཉིད་ཅན། །བདུད་དང་ཉོན་མོངས་མཐར་བྱེད་པ། །གཙོ་དེས་ཡེ་ཤེས་འཁོར་ལོ་དགུག །ལྟེ་བར་ལྕགས་ཀྱུ་བསྣུན་བྱས་ཤིང༌། །མཚོན་ཆ་རྣམས་ཀྱིས་འཇིགས་བྱས་ཏེ། །ཉི་ཤུ་རྩ་བཞིའི་ཕྱག་རྣམས་ཀྱང༌། །འདི་ཡི་ཞགས་པས་རབ་བཅིངས་ཏེ། །བསྒྲུབ་པར་བྱས་ནས་རང་གནས་སུ། །འོང་བར་རྣམ་པར་བསྒོམ་པར་བྱ། །བྱིས་པའི་སྣ་ཚོགས་ཡུལ་རྣམས་ནི། །མཐའ་དག་དངོས་པོའི་མཚན་ཉིད་དོ། །བསྐྱོད་ནས་གཉུག་མའི་གནས་སུ་ནི། །རྣམ་ཤེས་འཇུག་པ་དེ་ཇི་བཞིན། །ཀུན་གཞི་ལས་སྐྱེས་མིག་དང་ལུས། །ལྕེ་དང་སྣ་ཡི་དབང་པོ་རྣམས། །རྣམ་དག་རྨུགས་བྱེད་རེངས་བྱེད་དང༌། །ཁེངས་བྱེད་དང་ནི་ཤིན་ཏུ་སྟོབས། །རིམ་བཞིན་གཞུག་དང་བཅིང་བ་དང༌། །དེ་བཞིན་མཉེས་དང་རོ་མཉམ་བྱེད། །ཛཿ་ཧཱུཾ་བཾ་ཧོཿ་རིམ་ཉིད་དང༌། །ལྕགས་ཀྱུ་རྡོ་རྗེ་ཞགས་པ་དང༌། །དྲིལ་བུ་ཧྲིཿ་ལས་བྱུང་དབྱུག་པ། །དེ་རྣམས་ས་བོན་མཚན་མ་ཉིད། །དེ་བཞིན་སྔར་བཞིན་ལེགས་མཆོད་ནས། །ཡེ་ཤེས་འཁོར་ལོ་ཆོ་ག་བཞིན། །མྱུར་དུ་དམ་ཚིག་འཁོར་ལོ་དང༌། །གཅིག་ཏུ་གྱུར་པ་རྣམ་བསྒོམ་བྱ། །ཡབ་ཡུམ་ས་བོན་ཧཱུཾ་དང་ཕྲེཾ། །ཕུང་པོ་ཁམས་དང་དབང་པོ་ཡུལ། །ཐུང་དུ་རིང་པོ་ཡོན་ཏན་སོགས། །འདི་ནི་ཨོཾ་དང་ཆོས་དབྱིངས་ཨཱཿ། །ཧཾ་ཧཿ་གཙུག་ཏོར་ཤིན་ཏུ་སྔོ། །ཧ་ཧཱ་གནོད་མཛེས་དྲག་ལྡན་མ། །ཡཾ་རཾ་ཝཾ་ལཾ་ཁྲོ་བོ་བཞི། །ལཱཿ་བཱཿ་རཱཿ་ཡཱཿ་ཁྲོ་མོ་རྣམས། །ཡ་ར་ལ་ཝ་དབྱུག་སྔོན་དང༌། །འདོད་པ་སྟོབས་ཆེན་མི་གཡོའོ། །སྲུང་བའི་འཁོར་ལོ་གཞན་དུ་བཤད། །ལཱ་ཝཱ་ཡཱ་རཱ་ཁོར་མོ་རྣམས། །ཨ་ཨཿ་ཨཱ་ཨཾ་ཧ་ཧཿ་ཧཱ། །ཧཾ་རྣམས་ཕྱོགས་དང་མཚམས་རིམ་བཞིན། །ནག་མོ་འབར་སོགས་དུ་བ་སོགས། །ཨོཾ་ཨཱཿ་ཧོཿ་ཧཱུཾ་རིམ་པ་བཞིན། །ཡིད་བཞིན་ནོར་བུ་ལ་སོགས་རྣམས། །ཧི་ཧཱི་ཧྲྀ་ཧྲཱྀ་ཧླྀ་ཧླཱྀ་ཧུ། །ཧཱུཾ་རྣམས་བུམ་པ་རྣམས་ཀྱིའོ། །ཧ་ཀྵ་ཧཿ་ཀྵཿ་ཧཱ་ཀྵ་དང༌། །ཧཾ་ཀྵཾ་ཙ་རྩི་ཀ་སོགས་རིམ། །ཕྱོགས་ཀྱི་པདྨའི་མདུན་རྒྱབ་ཀྱི། །འདབ་མ་གཉིས་ལ་ཧི་ཧཱི་དང༌། །ཧྲྀ་ཧྲཱྀ་ཧླྀ་ཧླཱྀ་ཧུ་ཧཱུ་རྣམས། །ཕྱོགས་བྲལ་པདྨའི་མདུན་རྒྱབ་ཀྱི། །འདབ་མ་གཉིས་སུ་ཀྵྀ་ཀྵཱི་དང༌། །ཀྵྼྀ་ཀྵྼཱྀ་ཀྵླྀ་ཀྵླཱྀ་ཀྵུ་ཀྵཱུ་རྣམས། །ཕྱོགས་ཀྱི་པདྨའི་འདབ་མ་ནི། །ལྷག་མ་རྣམས་སུ་ཡ་ལ་སོགས། །ཐུང་ངུའི་དབྱངས་ཀྱིས་ཕྱེ་བ་དྲུག །ཕྱོགས་བྲལ་པདྨའི་འདབ་
མ་ནི། །ལྷག་མ་རྣམས་སུ་ཡ་ལ་སོགས། །རིང་པོའི་དབྱངས་ཀྱིས་ཕྱེ་བ་དྲུག །ཙ་སྡེ་ལ་སོགས་སྡེ་པ་དྲུག །ཡ་ཎའི་སྡེ་པ་ཧ་ཀྵ་ལྡན། །རྣམ་བཅད་བཅས་དང་ཐིག་ལེར་བཅས། །འདོད་དང་ཕྱིར་འདོད་ཚོགས་ཀྱིའོ། །སྐུ་ཡི་དཀྱིལ་འཁོར་པདྨ་ཡི། །ལྟེ་བ་བཅུ་གཉིས་རྣམས་སུ་ནི། །བདེན་བྲལ་སོགས་ཀྱི་ཙ་ཉཿ་དང༌། །ཊཾ་ཎཿ་པཾ་མཿ་རྣམས། །ཁྱབ་འཇུག་མཐར་བྱེད་དབང་ལྡན་དང༌། །ནོར་སྦྱིན་ཀཾ་ངཿ་སཾ་ཀཿ་འོ། །འདབ་མ་རྣམས་ལ་ཉ་ཉི་སོགས། །རིང་དང་ཐུང་དུས་ཕྱེ་བ་དྲུག །ཕྱི་ནས་བརྩམས་ཏེ་དགོད་པར་བྱ། །ཛྲྀ་ནི་ལྟེ་བར་ཤེས་རབ་མ། །རླུང་ལྷའི་པདྨར་ཙཱ་ལ་སོགས། །རིང་པོའི་དབྱངས་ལྡན་འབྱུང་བ་སྟེ། །འདི་ནི་སྡུད་པའི་དབྱེ་བ་ལས། །ཛྲཱྀ་ནི་ལྟེ་བར་ཤེས་རབ་མའོ། །ཁྱི་གདོང་མ་སོགས་ལྷ་མོ་ཡི། །ས་བོན་བརྩེགས་པར་རྣམ་སྒོམ་སྟེ། །ཤར་དུ་ཀ་སྡེ་བརྩེགས་པ་ཅན། །ལ་ཐོག་ཀྵ་ཐའི་པ་ན་ལྷོ། །ནུབ་ཏུ་ས་འོག་བརྩེགས་པ་དང༌། །ལ་ཐོག་ཏ་ཐའི་ཡ་ཎ་བྱང༌། །ཟུར་དུ་ཅ་ཊ་ཏ་པ་སོགས། །ཀུན་ནས་བརྩེགས་པའི་ས་བོན་ནོ། །རྒྱལ་བའི་ཧཱུཾ་དང་རྣམ་རྒྱལ་ཀྵཱུ། །ཤིན་ཏུ་སྔོན་མོ་རྡོ་རྗེ་མིག །རྣམ་བཅད་བཅས་དང་ཐིག་ལེར་བཅས། །ཀ་ས་དང་པོའི་སྡེ་བ་བརྩེགས། །འབྱུང་པོ་བྱེ་བ་ཕྱེད་དང་བཞི། །མ་ལུས་ས་བོན་སྣ་ཚོགས་པའོ། །འདིར་ནི་བཙས་པའི་བྱིས་པ་རྣམས། །ངེས་པར་གནས་སྐབས་གསུམ་དུ་འགྱུར། །སང་དང་རྨི་ལམ་གཉིད་ལོག་ཉིད། །དེས་ན་སྐུ་སོགས་བྱིན་གྱིས་བརླབ། །དཔྲལ་བ་མགྲིན་པ་སྙིང་ག་དང༌། །ལྟེ་བ་གསང་བ་གཙུག་ཏོར་ཏེ། །ཨོཾ་ཨཱཿ་ཧཱུཾ་ཧོཿ་དེ་བཞིན་དུ། །སྭཱ་ཧཱ་ས་རིམ་བཞིན་བྱིན་གྱིས་བརླབས། །བྱིན་གྱིས་བརླབ་པ་འདི་ཉིད་ནི། །བིས་པ་མ་ཡིས་འཁྱུད་དང་མཚུངས། །དེ་བཞིན་བདག་པོ་རྣལ་འབྱོར་པས། །ལྷ་མོའི་ཚོགས་ཀྱིས་བཀྲུ་བར་བྱ། །དཔྲལ་བར་ཨཾ་ལས་བྱུང་ཟླ་བར། །ཨོཾ་ལས་འཁོར་ལོ་རྩིབས་བརྒྱད་པ། །ལས་བྱུང་སྐུའི་རྡོ་རྗེ་དཀར། །ཞལ་གསུམ་གཡས་གཡོན་ནག་དང་དམར། །ཕྱག་དྲུག་གཡས་ན་འཁོར་ལོ་དང༌། །རྡོ་རེ་པདྨ་འཛིན་པར་དྲན། །རལ་གྲི་དྲིལ་བུ་ནོར་བུ་གཡོན། །ཤེས་རབ་ལྷན་ཅིག་རལ་པ་འཛིན། །དཔྲལ་བ་ནས་ནི་དེ་ཕྱུང་སྟེ། །དེ་ཡིས་ནམ་མཁའ་ཀུན་ནས་དགོང༌། །སྐུ་ཡི་རྡོ་རྗེའི་གདུལ་བྱ་ལ། །ཆོས་སྟོན་བྱ་བ་མཛད་ནས་སླར། །བཀུག་སྟེ་མདུན་དུ་བཞག་པ་ལ། །དབང་བསྐུར་དོན་དུ་གསོལ་བ་གདབ། །ངག་གིས་བར་དུ་མཆོད་
པར། །སྐུ་ཡི་རྡོ་རྗེ་འཛིན་པ་རྣམས། །བདག་ལ་མངོན་པར་དབང་བསྐུར་གསོལ། །སྐུ་ཡི་རིགས་ལས་བྱུང་བ་ཡི། །ལྷ་མོ་རྣམས་ཀྱིས་བདུད་རྩི་ཡིས། །གང་བའི་བུམ་པས་དབང་བསྐུར་ཞིང༌། །བྱིན་གྱིས་བརླབ་པར་ཡང་ནི་བྱ། །དཔྲལ་བར་ཟླ་བའི་དཀྱིལ་འཁོར་ལ། །སྐུ་ཡི་རྡོ་རྗེ་བཅུག་ནས་ནི། །དེ་ལ་གསོལ་བ་གདབ་པ་ཡི། །ཚིགས་བཅད་འདི་གཉིས་བརྗོད་པར་བྱ། །དཔལ་ལྡན་སྐུ་ཡི་རྡོ་རྗེ་འཛིན། །རྡོ་རྗེ་མི་ཕྱེད་གསུམ་བསྒོམས་པས། །སྐུ་ཡི་རྡོ་རྗེ་ཅན་གྱིས་ནི། །བྱིན་རླབས་གནས་སུ་དེང་བདག་མཛོད། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་ནས། །སྐུ་ཡི་རྡོ་རྗེ་ཅན་གྱིས་ནི། །བྱིན་རླབས་གནས་སུ་དིང་བདག་མཛོད། །མགྲིན་པར་རེ་ཕ་ལས་བྱུང་བའི། །ཉི་མར་ཨ་ཡིག་གྱུར་ལས་སྐྱེས། །པདྨ་དམར་པོ་འདབ་བརྒྱད་པ། །དེ་ལས་གསུང་གི་རྡོ་རྗེ་བསྒོམ། །ཤེས་རབ་དང་བཅས་རྩ་ཞལ་དམར། །གཡོན་དང་ཅིག་ཤོས་དཀར་དང་ནག །ཆུ་སྐྱེས་རྡོ་རྗེ་འཁོར་ལོ་གཡས། །ནོར་བུ་དྲིལ་བུ་རལ་གྲི་གཡོན། །སྔ་མ་བཞིན་དུ་ཕྱུང་ནས་ནི། །ལྷག་མ་མིང་ཙམ་གཞན་ཐ་དད། །དེ་བཞིན་སྙིང་གར་ཐིག་ལེ་ལས། །བྱུང་བའི་སྒྲ་གཅན་དཀྱིལ་འཁོར་ནི། །སྔོན་པོ་དེར་ཡང་ཧཱུཾ་ཡིག་ལས། །ཡང་དག་བསྐྱེད་པའི་རྩེ་ལྔ་པ། །རྡོ་རྗེ་དེ་ཡོངས་གྱུར་པ་ལས། །ཐུགས་ཀྱི་རྡོ་རྗེ་རྣམ་པར་བསྒོམ། །ཤེས་རབ་བཅས་ཤིང་རྩ་ཞལ་ནས། །གཞན་དག་དམར་དར་དཀར་པོ་ཉིད། །རྡོ་རྗེ་འཁོར་ལོ་ཆུ་སྐྱེས་གཡས། །དྲིལ་བུ་རིན་ཆེན་རལ་གྲི་གཡོན། །ཕྱུང་ནས་སྔ་མ་བཞིན་དུ་སྟེ། །ཐམས་ཅད་རྒྱས་པར་མ་བྲིས་སོ། །དེ་ནས་གཅིག་ཉིད་སྔགས་འདི་ཡིས། །ང་རྒྱལ་ཀུན་དུ་གཟུང་བར་བྱ། །ཨོ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀྩིཏྟ་བཛྲ་སྭ་བྷཱ་བཱ་ཏྨ་ཀོ྅ཧཾ། དེ་བཞིན་ཁོ་ན་ཤེས་རབ་ཀྱི། །ལྟེ་བའི་ཕྱོགས་སུ་ཧོཿ་ཡིག་སྟེ། །གསང་བར་སྭཱ་ཡིག་གཙུག་ཏོར་དུ། །ཧཱ་ཡིག་རིགས་དྲུག་དགོད་པར་བྱ། །ཁུ་བ་གཅིག་པུའི་ཆོས་ལས་ནི། །གང་ཕྱིར་ཐབས་ནི་རིགས་གསུམ་ཉིད། །རྡུལ་དང་ཁྲུ་བའི་བདག་ཉིད་ཀྱིས། །ཤེས་རབ་ཀྱི་ནི་རིགས་དྲུག་འགྱུར། །དབང་བསྐུར་དེ་ནས་དེ་མ་ཐག །རང་རང་རིགས་བདག་གིས་རྒྱས་གདབ། །རྒྱས་འདེབས་སངས་རྒྱས་ཀུན་ཀྱང་ནི། །གཙུག་ཏོར་ཆོས་གོས་འཛིན་ཤེས་བྱ། །རྡོ་རྗེ་སེམས་དཔའ་ཡང་དེར་འདིར། །སྔོན་པོ་མི་བསྐྱོད་མཚུངས་པར་
འགྱུར། །སངས་རྒྱས་རྣམ་ཤེས་རྒྱས་བཏབ་པ། །སངས་རྒྱས་རྒྱས་བཏབ་སངས་རྒྱས་སྐྱེས། །ཡེ་ཤེས་རྣམ་ཤེས་ཀྱིས་རྒྱས་བཏབ། །རྣམ་ཤེས་ཡེ་ཤེས་ཀྱིས་རྒྱས་བཏབ། །འདི་ནི་ལས་ཀྱི་རྒྱལ་པོ་མཆོག །བསྐྱེད་པའི་མཚན་ཉིད་ཇི་སྲིད་པའོ། །ཞེས་པ་དེ་ལྟར་རྡོ་རྗེ་ཅན། །སྲིད་གསུམ་ཐམས་ཅད་དཀྱིལ་འཁོར་ཏེ། །ཕྱི་དང་ལུས་དང་གཞན་ལ་ཡང༌། །དེ་རྣམས་སྤྲོ་དང་སྡུད་པ་སྟེ། །དངོས་པོའི་རིགས་རྣམས་ལ་ནི་དེ། །མཁའ་ཁམས་བཞིན་དུ་ཡང་དག་གནས། །རྣམ་གསུམ་སྲིད་པར་གནས་པ་དེ། །མི་རྟག་ཉིད་དུ་མི་འགྱུར་རོ། །གང་ཕྱིར་མིག་འཕྲུལ་ཇི་ལྟ་བཞིན། །འབྱུང་བའི་ཚོགས་ནི་མི་རྟག་འགྱུར། །དེ་བཞིན་རྟག་དང་མི་རྟག་པ། །མཚུངས་མཐོང་མི་ཤེས་ཡིད་ཅན་རྣམས། །དག་ཕྱིར་འཇིག་རྟེན་བདེན་པ་ཡིས། །རྡོ་རྗེ་ཅན་གྱི་སྒྲུབ་ཐབས་བརྗོད། །སྐུ་གཅིག་ཡུམ་དང་ལྡན་པའམ། །ཡང་ན་ལྷ་མོ་དགུ་དང་ལྡན། །ཉི་ཤུ་ལྔ་པའི་བདག་ཉིད་སོགས། །རྒྱལ་བས་གདུལ་བྱའི་བསམ་པས་གསུངས། །འདིར་ནི་སེམས་ཀྱི་ངོ་བོ་ཡིས། །གནས་པའི་བསྒྲུབ་བྱ་འགའ་ཡང་མེད། །བསྒྲུབ་བྱ་གང་ཞིག་སྒྲུབ་པ་པོ། །རྡོ་རྗེ་ཅན་གྱིས་བསྒྲུབ་པ་འཁྲུལ། །དེ་ཕྱིར་རང་སེམས་དྲི་མ་བྲལ། །དཀྱིལ་འཁོར་གྱི་ནི་གཙོ་བོར་བྱ། །ད་ནི་ཐིག་ལེ་ཕྲ་མོ་སོགས། །རྣལ་འབྱོར་བཟླས་པ་བརྗོད་པར་བྱ། །གང་ཕྱིར་མི་རྣམས་བཅུ་དྲུག་ལོས། །ཐིག་ལེའི་བདེ་བ་ཀུན་དུ་འབྱུང༌། །སེམས་མཆོག་ཐིག་ལེ་རྫོགས་པ་ནི། །ཐིག་ལེའི་རྣལ་འབྱོར་ཞེས་བྱར་བརྗོད། །འཛག་པའི་བདེ་ལ་དམིགས་པ་ནི། །ཕྲ་མོའི་རྣལ་འབྱོར་ཞེས་བྱར་བརྗོད། །མི་རྣམས་ལག་པ་འཛིན་པ་དང༌། །ཤེས་རབ་མ་ཡང་གཏོད་པར་བྱེད། །དབང་བརྟུལ་ལ་སོགས་རྣལ་འབྱོར་པས། །ལས་དང་ཡེ་ཤེས་ཕྱག་རྒྱ་སྟེ། །རྣལ་འབྱོར་གཉིས་དང་དེ་བཞིན་བཟླས། །རྩ་བའི་རྒྱུད་བཞིན་བརྗོད་པར་བྱ། །བཅུ་དྲུག་ལོ་འམ་རིག་ལྡན་མ། །གཟུགས་དང་ལང་ཚོས་བརྒྱན་པ་ལ། །དང་པོར་ལེགས་པར་བསླབ་བྱས་ཏེ། །དབང་བསྐུར་ནས་ནི་བསྒྲུབ་པ་བརྩམ། །སྐུ་གསུང་ཐུགས་བྱིན་བརླབ་པ་ནི། །དཔྲལ་བ་ལ་སོགས་རྣམས་ལ་དགོད། །སྭཱ་ཧཱ་གསང་བ་གཙུག་ཏོར་ཆེ། །དེ་ནས་པདྨ་རྣམ་པར་སྦྱངས། །ཨ་ཡིག་དམ་པ་འདབ་བརྒྱད་པ། །ཧཱུཾ་ཡིག་གིས་ནི་རྡོ་རྗེ་ལྡན། །དེ་བཞིན་རྡོ་རྗེ་དང་བཅས་པའི། །ཤེས་རབ་པདྨ་བསྐྱོད་རྒྱུ་ལས། །ཧཱུཾ་གིས་རང་གི་རྡོ་རྗེ་ནི། །
རྩེ་མོ་ལྔ་པར་རྣམ་པར་བསྒོམ། །དེ་དབུས་པདྨ་འདབ་བརྒྱད་པ། །ཨཱ་ཡིག་གིས་ནི་རབ་ཏུ་བརྟགས། །དེ་ལྟར་རྡོ་རྗེ་པདྨ་དང༌། །བཅས་པར་བྱས་ནས་པདྨར་བཞུགས། །དེ་ལྟར་རྡོ་རྗེ་འཛིན་པའི་སྙེ་མས། །འཛིན་ཅིང་རྣལ་འབྱོར་ཧཱུཾ་ཕཊ་བྱ། །བྷ་གར་ལིངྒ་རབ་བཀོད་ནས། །བྱང་ཆུབ་སེམས་སེམས་ནི་སྤྲོ་མི་བྱ། །ཁམས་གསུམ་པོ་ནི་མ་ལུས་ནས། །སངས་རྒྱས་གཟུགས་སུ་བསྒོམ་པར་བྱ། །ཨོཾ་སརྦ་ཏ་ཐཱ་ག་ཏཱ་ནུ་རཱ་ག་ཎ་བཛྲ་སྭ་བྷཱ་བཱ་ཏྨ་ཀོ྅ཧཾ། །ལྟེ་བར་གཏུམ་མོ་འབར་བ་ཡིས། །དེ་བཞིན་གཤེགས་པ་ལྔ་བསྲེགས་ཤིང༌། །སྤྱན་མ་མིག་ལ་སོགས་པ་ཡང༌། །བསྲེགས་ནས་རི་བོང་ཅན་ཧཾ་འཛག། བདུད་རྩི་ཁུ་བའི་ཆོས་ཅན་ནི། །ཐིག་ལེའི་གཟུགས་ཀྱིས་འཛག་པར་བྱེད། །ཐིག་ལེའི་རྣལ་འབྱོར་ཞེས་གྲགས་པ། །བཅུ་དྲུག་ཕྱེད་ཕྱེད་ཐིག་ལེ་འཆང༌། །ཕྲ་མོའི་རྣལ་འབྱོར་ཞེས་གྲགས་པ། །རྒྱུ་མཐུན་ལ་སོགས་སྟེང་དུ་འགྲོ། །དུང་ཅན་མའི་ཕྱག་རྒྱ་ཆེ། །དེ་ནི་གཏུམ་མོ་རབ་ཏུ་བརྗོད། །ལྟེ་བའི་སྟེང་དུ་གཡུང་མོ་གང༌། །ཨ་བ་དྷཱུ་ཏཱི་མི་ཡི་སྣ། །འོད་ཟེར་ལྔ་ཡི་རང་བཞིན་སོགས། །དཀྱིལ་འཁོར་ལྔ་ནི་འབབ་བྱེད་པ། །སྣ་རྩེར་ཡུངས་ཀར་དུ་གྲགས་པ། །དེ་ཡང་སྲོག་དང་རྩོལ་བར་བཤད། །ཁམས་གསུམ་པོ་ནི་མ་ལུས་ནས། །སྲིད་པ་གསུམ་ནི་ཡོངས་ཤེས་པ། །སྲོག་འགོག་པ་ནི་ཡུངས་ཀར་མ། །དེ་ཡང་རྒྱུ་བཅས་རྒྱུ་མེད་དུའོ། །སོ་སོར་སྡུད་པ་ཕྱག་རྒྱ་ཆེ། །ནམ་མཁའ་སྟོང་པའི་མཚན་ཉིད་དོ། །གང་ཞིག་ཁོ་ནར་ཡིད་དག་ནི། །བཀོད་པ་དེ་ཡི་ཕྱོགས་སུ་སྣང༌། །མཚན་མའི་མཐར་ནི་རེ་ཁཱ་གང༌། །དེ་ལ་བརྟན་དང་གཡོ་བའི་གཟུགས། །རྣལ་འབྱོར་བསམ་གཏན་སོགས་དེ་ཡང༌། །ཞེས་གསུངས་སོ། །དེ་ལྟར་རྣམ་པ་སྣ་ཚོགས་སོགས། །མན་ངག་ཇི་བཞིན་རབ་དབྱེ་བས། །དགའ་བའི་ཐིག་ལེ་གཙོ་བོ་ལས། །སྐུ་གསུང་ཐུགས་དང་བཞི་པར་གྲགས། །རྒྱུ་མཐུན་ལ་སོགས་རིམ་པ་ཡིས། །ཇེ་ལྟར་བྱོན་པ་དེ་བཞིན་གཤེགས། །དཔྲལ་བ་སོགས་དང་ལྟེ་བ་སོགས། །ཤེས་རབ་ཆོས་འབྱུང་བདག་ཉིད་ལའོ། །གང་ཚེ་ཐིག་ལེ་ཕྲ་མོས་ཀྱང༌། །དུས་གསུམ་པ་ཡི་སྲིད་གསུམ་ཤེས། །དུ་བ་ལ་སོགས་མཚན་མའི་མཐའ། །མཐར་ཐུག་གཟུགས་བརྙན་མཐོང་བར་བྱེད། །རྣལ་འབྱོར་པ་ཡི་དཀྱིལ་འཁོར་གྱི། །འཁོར་ལོ་སྤྲོ་བ་ཉིད་དང་ཡང༌། །འཁོར་བ་སྤྲོ་པ་རྣམས་བུ་སོགས་སྤྲོ། །དེ་
བཞིན་སྒྲུབ་པ་ཆེན་པོའོ། །ལུས་དང་དབྱེར་མེད་སྔགས་བཟླས་པ། །དེ་ཡང་སྲོག་དང་རྩོལ་བར་བཤད། །ལུས་ངག་སེམས་ཀྱི་རྩ་རྣམས་ནི། །གཡས་དང་གཡོན་དང་དབུ་མ་རུ། །གློག་ལས་གཞོམ་དུ་མེད་པའི་སྐད། །ཡན་ལག་དྲུག་གིས་དེ་བཞིན་བཟླས། །སོ་སོར་སྡུད་དང་བསམ་གཏན་དང༌། །སྲོག་རྩོལ་དེ་བཞིན་འཛིན་པ་དང༌། །རྗེས་སུ་དྲན་དང་ཏིང་ངེ་འཛིན། །རྣལ་འབྱོར་ཡན་ལག་དྲུག་ཏུ་འདོད། །དབུ་མ་མཆོག་གི་དབུགས་དང་ནི། །དྲི་ཡི་ཆུ་དང་བཅས་པ་ཡིས། །རྟག་ཏུ་རིག་སྔགས་མ་མཆོད་བྱ། །ཁྱད་པར་དུས་ཀྱི་ཕོ་ཉ་མོ། །དྲང་བའི་དོན་དུ་རྣལ་འབྱོར་པ། །ཐུན་མོང་དངོས་གྲུབ་འདོད་པས་ཀྱང༌། །བགྲང་ཕྲེང་ལ་སོགས་ཆོག་ཡིས། །རྟག་ཏུ་མཉམ་པར་གཞག་པས་བཟླ། །ལས་ཀུན་པ་ལ་རྡོ་རྗེ་བཞི། །འཇིག་རྟེན་ཁམས་མཐར་སྭཱ་ཧཱ་སྦྱར། །གང་ཚེ་རྣལ་འབྱོར་བཟླས་པས་སྐྱོ། །རྣམ་པར་གཡེང་བའི་སེམས་ལྡན་ན། །མཆོག་སྦྱིན་རྡོ་རྗེ་མཆོག་སོགས་ཀྱི། །བསྟོད་པ་བྱས་ནས་རབ་མཆོད་དེ། །གཙུག་ཏོར་སྤྱི་བོ་མགྲིན་སྙིང་ག །ལྟེ་བ་གསང་བ་རྣམས་སུ་ནི། །རྡོ་རྗེ་རྩེ་མོ་བཞི་པ་དང༌། །རྩེ་མོ་བཅུ་དྲུག་པར་རྣམས་བཅས། །རྩེ་མོ་སུམ་ཅུ་རྩ་གཉིས་རྣམས། །བསམས་ནས་དེ་ཡི་ལྟེ་དབུས་གཤེགས། །ལས་དང་བྱ་བའི་འཁོར་ལོར་ཡང༌། །སུམ་ཅུ་པ་དང་རྩེ་ལྔ་པར། །ཇི་ལྟར་རིགས་པར་གཤེགས་གསོལ་བྱ། །དུང་དང་གཎྜཱི་ནོར་བུ་ལྗོན། །དུ་སོགས་ཕུང་ཁམས་ལྷ་དང་བཅས། །བདེ་བ་ཆེན་པོའི་གནས་སུའོ། །སྐྱེ་མཆེད་བཅུ་གཉིས་ཁྲོ་བོ་དང༌། རྩ་རྩི་ཀཱ་སོགས་ཤིང་རྟར་གནས། །འོད་ཟེར་ཅན་སོགས་ལྷ་མོ་དང༌། །ཀླུ་དང་ཁྱི་གདོང་མ་ལ་སོགས། །ཇི་ལྟར་རིགས་པས་གཤེགས་གསོལ་བྱ། །རྣལ་འབྱོར་པ་ཡིས་ཐུན་གསུམ་དུ། །སྔར་བཤད་ཆོགས་བདུད་རྩི་ལྔ། །ལེགས་པར་སྦྱངས་ཏེ་གཏོར་མ་སྦྱིན། །རྣལ་འབྱོར་དབང་པོས་ཉིན་སོ་སོར། །བདག་ཉིད་ཚིམ་པར་བྱ་བ་ཡང༌། །སྐྱིལ་ཀྲུང་དང་ནི་སོ་རྣམས་ཉིད། །ཅུང་ཟད་ཕྱེ་ཞིང་བཀུག་ནས་བསྐྱོད། །ཡང་ན་དཔྲལ་བར་ཐིག་ལེ་དཀར། །བསམས་ནས་ཡོངས་སུ་ངལ་བ་བསོ། །ཨོཾ་ཨཱཿ་ཧཱུཾ་ཧོཿ་རིམ་གནས་པ། །དེ་ཡིས་སྦྱངས་དང་རྟོགས་པ་དང༌། །འབར་བ་དང་ནི་བདུད་རྩིར་བྱ། །མཐེ་བོང་མིང་མེད་དག་གིས་ནི། །སྣོད་དེ་ཆང་གི་ཐིགས་པ་ཡིས། །ཕྱི་རོལ་དུ་ནི་གྲུ་གསུམ་དང༌། །དེ་དབུས་ཟླུམ་
པོ་བྱས་ནས་ནི། །ཉི་མའི་གཟུགས་ལྟར་རབ་གསལ་བ། །དེ་ཡིད་དབུས་སུ་ཡེ་ཤེས་ཀྱི། །འཁོར་ལོ་སྲིད་གསུམ་མཆོག་བསྒོམས་ནས། །ཚིམ་པ་སོགས་པ་ལ་འབད་པར་བྱ། །དེ་བཞིན་ནང་གི་དཀྱིལ་འཁོར་ཡང༌། །སྔར་བཞིན་ཟས་དང་ཁྲུས་དང་ནི། །ལྷ་མོའི་ཚོགས་ཀྱིས་དབང་བསྐུར་རོ། །ཉལ་ཚེ་སྟོང་པ་ཉིད་ལ་གཞུག །ལྡང་ཆོ་གླུ་ཡིས་བསྐུལ་བ་སྟེ། །དཔལ་ལྡན་དུས་ཀྱི་འཁོར་ལོ་ཡི། །རྡོ་རྗེའི་རྣལ་འབྱོར་རྟག་ཏུ་དྲན་བྱ། །ཡུལ་བདག་གྲོང་བདག་དག་ལ་ཡང༌། །གཏོར་མཆོག་ཇི་བཞིན་སྦྱིན། །འཕྲོག་མ་ལ་ནི་ཆང་བུ་གཉིས། །ཕོ་ཉ་མོ་ལ་ཕུད་ཀྱི་ནི། །ཆང་བུས་ལ་གཞག་པར་བྱ། །ཟོས་ལྷག་འབྱུང་པོ་རྣམས་ལ་སྟེ། །སྦྱིན་པའི་ཚིགས་བཅད་བརྗོད་བར་བྱ། །རྣལ་འབྱོར་མ་ཐོབ་རྣལ་འབྱོར་དབང༌། །གལ་ཏེ་གཡོ་བའི་སེམས་དབང་ལས། །ནམ་ཞིག་ཤི་བར་གྱུར་པ་ན། །དཔལ་ལྡན་མི་ཡི་འཇིག་རྟེན་དུ། །རབ་མཆོག་རིགས་སུ་སྐྱེ་བར་ཤོག །དེར་ཡང་སྔོན་གོམས་རྣལ་འབྱོར་ལྡན། །ཡེ་ཤེས་རྣལ་འབྱོར་རབ་ཡངས་པ། །དེ་ལ་སླར་ཡང་སྤྱོད་བྱེད་ཅིང༌། །ཚོགས་གཉིས་ཡང་དག་བསགས་པ་ལས། །མི་འགྱུར་མཆོག་གི་གོ་འཕང་གི །ཡེ་ཤེས་ངེས་པར་ཐོབ་གྱུར་ཏེ། །གང་དུའང་སྐྱེ་ལྡན་མིན་གྱུར་ཅིག །ཅེས་བྱའོ། །རྡོ་རྗེ་སློབ་དཔོན་ལས་ཀྱི་ཆོག་ལ། །སྔོན་དུ་ནན་ཏན་བྱ་བ་གང་ཡིན་པ། །རྒྱས་འགྲེལ་མཛད་པའི་མཁྱེན་ལྟར་སྒྲུབ་པའི་ཐབས། །འདི་ནི་རྣལ་འབྱོར་རབ་གསལ་ཞེས་བྱའོ། །མཁས་པའི་མན་ངག་དང་བཅས་བྲིས་པ་ལས། །དགེ་བ་ཡངས་པ་བདག་གིས་ཐོབ་པ་དེས། །འགྲོ་བ་མྱུར་དུ་མི་འགྱུར་བདེ་བ་ཆེ། །དཔལ་ལྡན་རྡོ་རྗེ་འཛིན་པ་ཉིད་གྱུར་ཅིག །དཔལ་དུས་ཀྱི་འཁོར་ལོ་ཞེས་བྱ་བ་དང་པོའི་སངས་རྒྱས་སུ་གྲགས་པའི་བསྐྱེད་པའི་རིམ་པ་ཐམས་ཅད་གཙོ་བོར་གྱུར་པའི་སྒྲུབ་ཐབས་དབུ་མ་ཆེན་པོའི་པཎྜི་ཏ་མཻ་ཏྲི་བའི་ཞལ་སྔ་ནས་མཛད་པ་རྫོགས་སོ།། །།འདིའི་གཞུང་གི་ཚད་ནི་ཅུང་ཟད་ལྷག་པའི་བཞི་བརྒྱའོ། །གཞུང་འདི་བོད་སྐད་དུ། གཅིག་ཏུ་བདེ་བར་གཤེགས་པའི་བསྟན་པ་རིན་པོ་ཆེ་ལ་གཅེས་སྦྲས་མཛད་ཅིང༌། ལུང་དང་མངོན་པར་རྟོགས་པའི་ཡོན་ཏན་རིན་པོ་ཆེ་བསམ་གྱིས་མི་ཁྱབ་པ་ལ་མངའ་འབྱོར་བས་ཐུབ་པའི་དབང་པོ་དང་གཉིས་སུ་མེད་པར་ལྷར་བཅས་སྐྱེ་དགུའི་གཙུག་རྒྱན་དཔལ་ལྡན་བླ་མ་དམ་པ། ཞྭ་མར་ཅོད་པན་འཛིན་པ་བཞི་པའི་ཞལ་སྔ་ནས་ལེགས་པར་སྒྱུར་ཅིག་ཅེས་བཀའ་སྩལ་པ་
བཞིན་དུ། །བསྟན་པ་རིན་པོ་ཆེ་གུས་པས་མཆོད་པའི་ས་སྐྱོང་ཆོས་ཀྱི་སྤྱན་ལྡན་དཔོན་ཆེན་ཀུན་དགའ་རིན་ཆེན་རྒྱལ་པོ་བས་མཐུན་རྐྱེན་སྩལ་ཏེ། ལེགས་པར་སྦྱར་བའི་སྐད་ཀྱི་བརྡ་སྤྲོད་པའི་གཞུང་གི་ཆ་ཙམ་རྟོགས་ཤིང་སྔོན་གྱི་སྐྱེས་བུ་དམ་པ་རྣམས་ཀྱིས་དམ་པའི་ཆོས་ཇི་ལྟར་བསྒྱུར་བའི་ཚུལ་རྗེས་སུ་དཔག་པ་ལས་རྟོགས་པའི་ཞ་ལུ་ལོ་ཙཱ་བ་དགེ་སློང་ཆོས་སྐྱོང་བཟང་པོས་ལུགས་གཉིས་ཀྱི་འདུན་ས་གཞིས་ཀ་ལྷུན་གྲུབ་གླིང་གི་སྐྱེད་མོས་ཚལ་དུ་ཟིལ་གནོན་གྱི་ལོ་ཆུ་སྟོད་ཀྱི་ཟླ་བའི་ཚེས་བཅུ་དྲུག་ལ་རྫོགས་པར་བསྒྱུར་ཅིང་ཞུས་ཏེ་གཏན་ལ་ཕབ་པའི་ཡེ་གེ་པ་ནི་དགེ་བའི་བཤེས་གཉེན་བླ་མ་ཤེས་རབ་འཕགས་པ་ཞེས་བགྱི་བའོ།།